% Ramayana: Uttarakanda
% Last updated: Wed Oct 21 2020
% Encoding: ASCII
%
7001001a prAptarAjyasya rAmasya rAkSasAnAM vadhe kRte
7001001c Ajagmur RSayaH sarve rAghavaM pratinanditum
7001002a kauziko 'tha yavakrIto raibhyaz cyavana eva ca
7001002c kaNvo medhAtitheH putraH pUrvasyAM dizi ye zritAH
7001003a svastyAtreyaz ca bhagavAn namuciH pramucus tathA
7001003c Ajagmus te sahAgastyA ye zritA dakSiNAM dizam
7001004a pRSadguH kavaSo dhaumyo raudreyaz ca mahAn RSiH
7001004c te 'py AjagmuH saziSyA vai ye zritAH pazcimAM dizam
7001005a vasiSThaH kazyapo 'thAtrir vizvAmitro 'tha gautamaH
7001005c jamadagnir bharadvAjas te 'pi saptamaharSayaH
7001006a saMprApyaite mahAtmAno rAghavasya nivezanam
7001006c viSThitAH pratihArArthaM hutAzanasamaprabhAH
7001007a pratihAras tatas tUrNam agastyavacanAd atha
7001007c samIpaM rAghavasyAzu praviveza mahAtmanaH
7001008a sa rAmaM dRzya sahasA pUrNacandrasamadyutim
7001008c agastyaM kathayAm Asa saMprAptam RSibhiH saha
7001009a zrutvA prAptAn munIMs tAMs tu bAlasUryasamaprabhAn
7001009c tadovAca nRpo dvAHsthaM pravezaya yathAsukham
7001010a dRSTvA prAptAn munIMs tAMs tu pratyutthAya kRtAJjaliH
7001010c rAmo 'bhivAdya prayata AsanAny Adideza ha
7001011a teSu kAJcanacitreSu svAstIrNeSu sukheSu ca
7001011c yathArham upaviSTAs te AsaneSv RSipuMgavAH
7001012a rAmeNa kuzalaM pRSTAH saziSyAH sapurogamAH
7001012c maharSayo vedavido rAmaM vacanam abruvan
7001013a kuzalaM no mahAbAho sarvatra raghunandana
7001013c tvAM tu diSTyA kuzalinaM pazyAmo hatazAtravam
7001014a na hi bhAraH sa te rAma rAvaNo rAkSasezvaraH
7001014c sadhanus tvaM hi lokAMs trIn vijayethA na saMzayaH
7001015a diSTyA tvayA hato rAma rAvaNaH putrapautravAn
7001015c diSTyA vijayinaM tvAdya pazyAmaH saha bhAryayA
7001016a diSTyA prahasto vikaTo virUpAkSo mahodaraH
7001016c akampanaz ca durdharSo nihatAs te nizAcarAH
7001017a yasya pramANAd vipulaM pramANaM neha vidyate
7001017c diSTyA te samare rAma kumbhakarNo nipAtitaH
7001018a diSTyA tvaM rAkSasendreNa dvandvayuddham upAgataH
7001018c devatAnAm avadhyena vijayaM prAptavAn asi
7001019a saMkhye tasya na kiM cit tu rAvaNasya parAbhavaH
7001019c dvandvayuddham anuprApto diSTyA te rAvaNir hataH
7001020a diSTyA tasya mahAbAho kAlasyevAbhidhAvataH
7001020c muktaH suraripor vIra prAptaz ca vijayas tvayA
7001021a vismayas tv eSa naH saumya saMzrutyendrajitaM hatam
7001021c avadhyaH sarvabhUtAnAM mahAmAyAdharo yudhi
7001022a dattvA puNyAm imAM vIra saumyAm abhayadakSiNAm
7001022c diSTyA vardhasi kAkutstha jayenAmitrakarzana
7001023a zrutvA tu vacanaM teSAm RSINAM bhAvitAtmanAm
7001023c vismayaM paramaM gatvA rAmaH prAJjalir abravIt
7001024a bhavantaH kumbhakarNaM ca rAvaNaM ca nizAcaram
7001024c atikramya mahAvIryau kiM prazaMsatha rAvaNim
7001025a mahodaraM prahastaM ca virUpAkSaM ca rAkSasaM
7001025c atikramya mahAvIryAn kiM prazaMsatha rAvaNim
7001026a kIdRzo vai prabhAvo 'sya kiM balaM kaH parAkramaH
7001026c kena vA kAraNenaiSa rAvaNAd atiricyate
7001027a zakyaM yadi mayA zrotuM na khalv AjJApayAmi vaH
7001027c yadi guhyaM na ced vaktuM zrotum icchAmi kathyatAm
7001027e kathaM zakro jitas tena kathaM labdhavaraz ca saH
7002001a tasya tad vacanaM zrutvA rAghavasya mahAtmanaH
7002001c kumbhayonir mahAtejA vAkyam etad uvAca ha
7002002a zRNu rAjan yathAvRttaM yasya tejobalaM mahat
7002002c jaghAna ca ripUn yuddhe yathAvadhyaz ca zatrubhiH
7002003a ahaM te rAvaNasyedaM kulaM janma ca rAghava
7002003c varapradAnaM ca tathA tasmai dattaM bravImi te
7002004a purA kRtayuge rAma prajApatisutaH prabhuH
7002004c pulastyo nAma brahmarSiH sAkSAd iva pitAmahaH
7002005a nAnukIrtyA guNAs tasya dharmataH zIlatas tathA
7002005c prajApateH putra iti vaktuM zakyaM hi nAmataH
7002006a sa tu dharmaprasaGgena meroH pArzve mahAgireH
7002006c tRNabindvAzramaM gatvA nyavasan munipuMgavaH
7002007a tapas tepe sa dharmAtmA svAdhyAyaniyatendriyaH
7002007c gatvAzramapadaM tasya vighnaM kurvanti kanyakAH
7002008a devapannagakanyAz ca rAjarSitanayAz ca yAH
7002008c krIDantyo 'psarasaz caiva taM dezam upapedire
7002009a sarvartuSUpabhogyatvAd ramyatvAt kAnanasya ca
7002009c nityazas tAs tu taM dezaM gatvA krIDanti kanyakAH
7002010a atha ruSTo mahAtejA vyAjahAra mahAmuniH
7002010c yA me darzanam Agacchet sA garbhaM dhArayiSyati
7002011a tAs tu sarvAH pratigatAH zrutvA vAkyaM mahAtmanaH
7002011c brahmazApabhayAd bhItAs taM dezaM nopacakramuH
7002012a tRNabindos tu rAjarSes tanayA na zRNoti tat
7002012c gatvAzramapadaM tasya vicacAra sunirbhayA
7002013a tasminn eva tu kAle sa prAjApatyo mahAn RSiH
7002013c svAdhyAyam akarot tatra tapasA dyotitaprabhaH
7002014a sA tu vedadhvaniM zrutvA dRSTvA caiva tapodhanam
7002014c abhavat pANDudehA sA suvyaJjitazarIrajA
7002015a dRSTvA paramasaMvignA sA tu tadrUpam AtmanaH
7002015c idaM me kiM nv iti jJAtvA pitur gatvAgrataH sthitA
7002016a tAM tu dRSTvA tathA bhUtAM tRNabindur athAbravIt
7002016c kiM tvam etat tv asadRzaM dhArayasy Atmano vapuH
7002017a sA tu kRtvAJjaliM dInA kanyovAca tapodhanam
7002017c na jAne kAraNaM tAta yena me rUpam IdRzam
7002018a kiM tu pUrvaM gatAsmy ekA maharSer bhAvitAtmanaH
7002018c pulastyasyAzramaM divyam anveSTuM svasakhIjanam
7002019a na ca pazyAmy ahaM tatra kAM cid apy AgatAM sakhIm
7002019c rUpasya tu viparyAsaM dRSTvA cAham ihAgatA
7002020a tRNabindus tu rAjarSis tapasA dyotitaprabhaH
7002020c dhyAnaM viveza tac cApi apazyad RSikarmajam
7002021a sa tu vijJAya taM zApaM maharSer bhAvitAtmanaH
7002021c gRhItvA tanayAM gatvA pulastyam idam abravIt
7002022a bhagavaMs tanayAM me tvaM guNaiH svair eva bhUSitAm
7002022c bhikSAM pratigRhANemAM maharSe svayam udyatAm
7002023a tapazcaraNayuktasya zrAmyamANendriyasya te
7002023c zuzrUSAtatparA nityaM bhaviSyati na saMzayaH
7002024a taM bruvANaM tu tadvAkyaM rAjarSiM dhArmikaM tadA
7002024c jighRkSur abravIt kanyAM bADham ity eva sa dvijaH
7002025a dattvA tu sa gato rAjA svam AzramapadaM tadA
7002025c sApi tatrAvasat kanyA toSayantI patiM guNaiH
7002025e prItaH sa tu mahAtejA vAkyam etad uvAca ha
7002026a parituSTo 'smi bhadraM te guNAnAM saMpadA bhRzam
7002026c tasmAt te viramAmy adya putram AtmasamaM guNaiH
7002026e ubhayor vaMzakartAraM paulastya iti vizrutam
7002027a yasmAt tu vizruto vedas tvayehAbhyasyato mama
7002027c tasmAt sa vizravA nAma bhaviSyati na saMzayaH
7002028a evam uktA tu sA kanyA prahRSTenAntarAtmanA
7002028c acireNaiva kAlena sUtA vizravasaM sutam
7002029a sa tu lokatraye khyAtaH zaucadharmasamanvitaH
7002029c piteva tapasA yukto vizravA munipuMgavaH
7003001a atha putraH pulastyasya vizravA munipuMgavaH
7003001c acireNaiva kAlena piteva tapasi sthitaH
7003002a satyavAJ zIlavAn dakSaH svAdhyAyanirataH zuciH
7003002c sarvabhogeSv asaMsakto nityaM dharmaparAyaNaH
7003003a jJAtvA tasya tu tadvRttaM bharadvAjo mahAn RSiH
7003003c dadau vizravase bhAryAM svAM sutAM devavarNinIm
7003004a pratigRhya tu dharmeNa bharadvAjasutAM tadA
7003004c mudA paramayA yukto vizravA munipuMgavaH
7003005a sa tasyAM vIryasaMpannam apatyaM paramAdbhutam
7003005c janayAm Asa dharmAtmA sarvair brahmaguNair yutam
7003006a tasmiJ jAte tu saMhRSTaH sa babhUva pitAmahaH
7003006c nAma cAsyAkarot prItaH sArdhaM devarSibhis tadA
7003007a yasmAd vizravaso 'patyaM sAdRzyAd vizravA iva
7003007c tasmAd vaizravaNo nAma bhaviSyaty eSa vizrutaH
7003008a sa tu vaizravaNas tatra tapovanagatas tadA
7003008c avardhata mahAtejA hutAhutir ivAnalaH
7003009a tasyAzramapadasthasya buddhir jajJe mahAtmanaH
7003009c cariSye niyato dharmaM dharmo hi paramA gatiH
7003010a sa tu varSasahasrANi tapas taptvA mahAvane
7003010c pUrNe varSasahasre tu taM taM vidhim avartata
7003011a jalAzI mArutAhAro nirAhAras tathaiva ca
7003011c evaM varSasahasrANi jagmus tAny eva varSavat
7003012a atha prIto mahAtejAH sendraiH suragaNaiH saha
7003012c gatvA tasyAzramapadaM brahmedaM vAkyam abravIt
7003013a parituSTo 'smi te vatsa karmaNAnena suvrata
7003013c varaM vRNISva bhadraM te varArhas tvaM hi me mataH
7003014a athAbravId vaizravaNaH pitAmaham upasthitam
7003014c bhagava&l lokapAlatvam iccheyaM vittarakSaNam
7003015a tato 'bravId vaizravaNaM parituSTena cetasA
7003015c brahmA suragaNaiH sArdhaM bADham ity eva hRSTavat
7003016a ahaM hi lokapAlAnAM caturthaM sraSTum udyataH
7003016c yamendravaruNAnAM hi padaM yat tava cepsitam
7003017a tatkRtaM gaccha dharmajJa dhanezatvam avApnuhi
7003017c yamendravaruNAnAM hi caturtho 'dya bhaviSyasi
7003018a etac ca puSpakaM nAma vimAnaM sUryasaMnibham
7003018c pratigRhNISva yAnArthaM tridazaiH samatAM vraja
7003019a svasti te 'stu gamiSyAmaH sarva eva yathAgatam
7003019c kRtakRtyA vayaM tAta dattvA tava mahAvaram
7003020a gateSu brahmapUrveSu deveSv atha nabhastalam
7003020c dhanezaH pitaraM prAha vinayAt praNato vacaH
7003021a bhagava&l labdhavAn asmi varaM kamalayonitaH
7003021c nivAsaM na tu me devo vidadhe sa prajApatiH
7003022a tat pazya bhagavan kaM cid dezaM vAsAya naH prabho
7003022c na ca pIDA bhaved yatra prANino yasya kasya cit
7003023a evam uktas tu putreNa vizravA munipuMgavaH
7003023c vacanaM prAha dharmajJa zrUyatAm iti dharmavit
7003024a laGkA nAma purI ramyA nirmitA vizvakarmaNA
7003024c rAkSasAnAM nivAsArthaM yathendrasyAmarAvatI
7003025a ramaNIyA purI sA hi rukmavaidUryatoraNA
7003025c rAkSasaiH sA parityaktA purA viSNubhayArditaiH
7003025e zUnyA rakSogaNaiH sarvai rasAtalatalaM gataiH
7003026a sa tvaM tatra nivAsAya rocayasva matiM svakAm
7003026c nirdoSas tatra te vAso na ca bAdhAsti kasya cit
7003027a etac chrutvA tu dharmAtmA dharmiSThaM vacanaM pituH
7003027c nivezayAm Asa tadA laGkAM parvatamUrdhani
7003028a nairRtAnAM sahasrais tu hRSTaiH pramuditaiH sadA
7003028c acireNaikakAlena saMpUrNA tasya zAsanAt
7003029a atha tatrAvasat prIto dharmAtmA nairRtAdhipaH
7003029c samudraparidhAnAyAM laGkAyAM vizravAtmajaH
7003030a kAle kAle vinItAtmA puSpakeNa dhanezvaraH
7003030c abhyagacchat susaMhRSTaH pitaraM mAtaraM ca saH
7003031a sa devagandharvagaNair abhiSTutas; tathaiva siddhaiH saha cAraNair api
7003031c gabhastibhiH sUrya ivaujasA vRtaH; pituH samIpaM prayayau zriyA vRtaH
7004001a zrutvAgastyeritaM vAkyaM rAmo vismayam AgataH
7004001c pUrvam AsIt tu laGkAyAM rakSasAm iti saMbhavaH
7004002a tataH ziraH kampayitvA tretAgnisamavigraham
7004002c agastyaM taM muhur dRSTvA smayamAno 'bhyabhASata
7004003a bhagavan pUrvam apy eSA laGkAsIt pizitAzinAm
7004003c itIdaM bhavataH zrutvA vismayo janito mama
7004004a pulastyavaMzAd udbhUtA rAkSasA iti naH zrutam
7004004c idAnIm anyataz cApi saMbhavaH kIrtitas tvayA
7004005a rAvaNAt kumbhakarNAc ca prahastAd vikaTAd api
7004005c rAvaNasya ca putrebhyaH kiM nu te balavattarAH
7004006a ka eSAM pUrvako brahman kiMnAmA kiMtapobalaH
7004006c aparAdhaM ca kaM prApya viSNunA drAvitAH purA
7004007a etad vistarataH sarvaM kathayasva mamAnagha
7004007c kautUhalaM kRtaM mahyaM nuda bhAnur yathA tamaH
7004008a rAghavasya tu tac chrutvA saMskArAlaMkRtaM vacaH
7004008c ISadvismayamAnas tam agastyaH prAha rAghavam
7004009a prajApatiH purA sRSTvA apaH salilasaMbhavaH
7004009c tAsAM gopAyane sattvAn asRjat padmasaMbhavaH
7004010a te sattvAH sattvakartAraM vinItavad upasthitAH
7004010c kiM kurma iti bhASantaH kSutpipAsAbhayArditAH
7004011a prajApatis tu tAny Aha sattvAni prahasann iva
7004011c AbhASya vAcA yatnena rakSadhvam iti mAnadaH
7004012a rakSAma iti tatrAnyair yakSAmeti tathAparaiH
7004012c bhuGkSitAbhuGkSitair uktas tatas tAn Aha bhUtakRt
7004013a rakSAma iti yair uktaM rAkSasAs te bhavantu vaH
7004013c yakSAma iti yair uktaM te vai yakSA bhavantu vaH
7004014a tatra hetiH prahetiz ca bhrAtarau rAkSasarSabhau
7004014c madhukaiTabhasaMkAzau babhUvatur ariMdamau
7004015a prahetir dhArmikas tatra na dArAn so 'bhikAGkSati
7004015c hetir dArakriyArthaM tu yatnaM param athAkarot
7004016a sa kAlabhaginIM kanyAM bhayAM nAma bhayAvahAm
7004016c udAvahad ameyAtmA svayam eva mahAmatiH
7004017a sa tasyAM janayAm Asa hetI rAkSasapuMgavaH
7004017c putraM putravatAM zreSTho vidyutkeza iti zrutam
7004018a vidyutkezo hetiputraH pradIptAgnisamaprabhaH
7004018c vyavardhata mahAtejAs toyamadhya ivAmbujam
7004019a sa yadA yauvanaM bhadram anuprApto nizAcaraH
7004019c tato dArakriyAM tasya kartuM vyavasitaH pitA
7004020a saMdhyAduhitaraM so 'tha saMdhyAtulyAM prabhAvataH
7004020c varayAm Asa putrArthaM hetI rAkSasapuMgavaH
7004021a avazyam eva dAtavyA parasmai seti saMdhyayA
7004021c cintayitvA sutA dattA vidyutkezAya rAghava
7004022a saMdhyAyAs tanayAM labdhvA vidyutkezo nizAcaraH
7004022c ramate sa tayA sArdhaM paulomyA maghavAn iva
7004023a kena cit tv atha kAlena rAma sAlakaTaMkaTA
7004023c vidyutkezAd garbham Apa ghanarAjir ivArNavAt
7004024a tataH sA rAkSasI garbhaM ghanagarbhasamaprabham
7004024c prasUtA mandaraM gatvA gaGgA garbham ivAgnijam
7004025a tam utsRjya tu sA garbhaM vidyutkezAd ratArthinI
7004025c reme sA patinA sArdhaM vismRtya sutam Atmajam
7004026a tayotsRSTaH sa tu zizuH zaradarkasamadyutiH
7004026c pANim Asye samAdhAya ruroda ghanarAD iva
7004027a athopariSTAd gacchan vai vRSabhastho haraH prabhuH
7004027c apazyad umayA sArdhaM rudantaM rAkSasAtmajam
7004028a kAruNyabhAvAt pArvatyA bhavas tripurahA tataH
7004028c taM rAkSasAtmajaM cakre mAtur eva vayaHsamam
7004029a amaraM caiva taM kRtvA mahAdevo 'kSayo 'vyayaH
7004029c puram AkAzagaM prAdAt pArvatyAH priyakAmyayA
7004030a umayApi varo datto rAkSasInAM nRpAtmaja
7004030c sadyopalabdhir garbhasya prasUtiH sadya eva ca
7004030e sadya eva vayaHprAptir mAtur eva vayaH samam
7004031a tataH sukezo varadAnagarvitaH; zriyaM prabhoH prApya harasya pArzvataH
7004031c cacAra sarvatra mahAmatiH khagaH; khagaM puraM prApya puraMdaro yathA
7005001a sukezaM dhArmikaM dRSTvA varalabdhaM ca rAkSasam
7005001c grAmaNIr nAma gandharvo vizvAvasusamaprabhaH
7005002a tasya devavatI nAma dvitIyA zrIr ivAtmajA
7005002c tAM sukezAya dharmeNa dadau dakSaH zriyaM yathA
7005003a varadAnakRtaizvaryaM sA taM prApya patiM priyam
7005003c AsId devavatI tuSTA dhanaM prApyeva nirdhanaH
7005004a sa tayA saha saMyukto rarAja rajanIcaraH
7005004c aJjanAd abhiniSkrAntaH kareNveva mahAgajaH
7005005a devavatyAM sukezas tu janayAm Asa rAghava
7005005c trIMs trinetrasamAn putrAn rAkSasAn rAkSasAdhipaH
7005005e mAlyavantaM sumAliM ca mAliM ca balinAM varam
7005006a trayo lokA ivAvyagrAH sthitAs traya ivAgnayaH
7005006c trayo mantrA ivAtyugrAs trayo ghorA ivAmayAH
7005007a trayaH sukezasya sutAs tretAgnisamavarcasaH
7005007c vivRddhim agamaMs tatra vyAdhayopekSitA iva
7005008a varaprAptiM pitus te tu jJAtvaizvaryaM tato mahat
7005008c tapas taptuM gatA meruM bhrAtaraH kRtanizcayAH
7005009a pragRhya niyamAn ghorAn rAkSasA nRpasattama
7005009c vicerus te tapo ghoraM sarvabhUtabhayAvaham
7005010a satyArjavadamopetais tapobhir bhuvi duSkaraiH
7005010c saMtApayantas trI&l lokAn sadevAsuramAnuSAn
7005011a tato vibhuz caturvaktro vimAnavaram AsthitaH
7005011c sukezaputrAn Amantrya varado 'smIty abhASata
7005012a brahmANaM varadaM jJAtvA sendrair devagaNair vRtam
7005012c UcuH prAJjalayaH sarve vepamAnA iva drumAH
7005013a tapasArAdhito deva yadi no dizase varam
7005013c ajeyAH zatruhantAras tathaiva cirajIvinaH
7005013e prabhaviSNavo bhavAmeti parasparam anuvratAH
7005014a evaM bhaviSyatIty uktvA sukezatanayAn prabhuH
7005014c prayayau brahmalokAya brahmA brAhmaNavatsalaH
7005015a varaM labdhvA tataH sarve rAma rAtriMcarAs tadA
7005015c surAsurAn prabAdhante varadAnAt sunirbhayAH
7005016a tair vadhyamAnAs tridazAH sarSisaMghAH sacAraNAH
7005016c trAtAraM nAdhigacchanti nirayasthA yathA narAH
7005017a atha te vizvakarmANaM zilpinAM varam avyayam
7005017c UcuH sametya saMhRSTA rAkSasA raghusattama
7005018a gRhakartA bhavAn eva devAnAM hRdayepsitam
7005018c asmAkam api tAvat tvaM gRhaM kuru mahAmate
7005019a himavantaM samAzritya meruM mandaram eva vA
7005019c mahezvaragRhaprakhyaM gRhaM naH kriyatAM mahat
7005020a vizvakarmA tatas teSAM rAkSasAnAM mahAbhujaH
7005020c nivAsaM kathayAm Asa zakrasyevAmarAvatIm
7005021a dakSiNasyodadhes tIre trikUTo nAma parvataH
7005021c zikhare tasya zailasya madhyame 'mbudasaMnibhe
7005021e zakunair api duSprApe TaGkacchinnacaturdizi
7005022a triMzadyojanavistIrNA svarNaprAkAratoraNA
7005022c mayA laGketi nagarI zakrAjJaptena nirmitA
7005023a tasyAM vasata durdharSAH puryAM rAkSasasattamAH
7005023c amarAvatIM samAsAdya sendrA iva divaukasaH
7005024a laGkAdurgaM samAsAdya rAkSasair bahubhir vRtAH
7005024c bhaviSyatha durAdharSAH zatrUNAM zatrusUdanAH
7005025a vizvakarmavacaH zrutvA tatas te rAma rAkSasAH
7005025c sahasrAnucarA gatvA laGkAM tAm avasan purIm
7005026a dRDhaprAkAraparikhAM haimair gRhazatair vRtAm
7005026c laGkAm avApya te hRSTA viharanti nizAcarAH
7005027a narmadA nAma gandharvI nAnAdharmasamedhitA
7005027c tasyAH kanyAtrayaM hy AsId dhIzrIkIrtisamadyuti
7005028a jyeSThakrameNa sA teSAM rAkSasAnAm arAkSasI
7005028c kanyAs tAH pradadau hRSTA pUrNacandranibhAnanAH
7005029a trayANAM rAkSasendrANAM tisro gandharvakanyakAH
7005029c mAtrA dattA mahAbhAgA nakSatre bhagadaivate
7005030a kRtadArAs tu te rAma sukezatanayAH prabho
7005030c bhAryAbhiH saha cikrIDur apsarobhir ivAmarAH
7005031a tatra mAlyavato bhAryA sundarI nAma sundarI
7005031c sa tasyAM janayAm Asa yad apatyaM nibodha tat
7005032a vajramuSTir virUpAkSo durmukhaz caiva rAkSasaH
7005032c suptaghno yajJakopaz ca mattonmattau tathaiva ca
7005032e analA cAbhavat kanyA sundaryAM rAma sundarI
7005033a sumAlino 'pi bhAryAsIt pUrNacandranibhAnanA
7005033c nAmnA ketumatI nAma prANebhyo 'pi garIyasI
7005034a sumAlI janayAm Asa yad apatyaM nizAcaraH
7005034c ketumatyAM mahArAja tan nibodhAnupUrvazaH
7005035a prahasto 'kampanaiz caiva vikaTaH kAlakArmukaH
7005035c dhUmrAkzaz cAtha daNDaz ca supArzvaz ca mahAbalaH
7005036a saMhrAdiH praghasaz caiva bhAsakarNaz ca rAkSasaH
7005036c rAkA puSpotkaTA caiva kaikasI ca zucismitA
7005036e kumbhInasI ca ity ete sumAleH prasavAH smRtAH
7005037a mAles tu vasudA nAma gandharvI rUpazAlinI
7005037c bhAryAsIt padmapatrAkSI svakSI yakSIvaropamA
7005038a sumAler anujas tasyAM janayAm Asa yat prabho
7005038c apatyaM kathyamAnaM tan mayA tvaM zRNu rAghava
7005039a analaz cAnilaz caiva haraH saMpAtir eva ca
7005039c ete vibhISaNAmAtyA mAleyAs te nizAcarAH
7005040a tatas tu te rAkSasapuMgavAs trayo; nizAcaraiH putrazataiz ca saMvRtAH
7005040c surAn sahendrAn RSinAgadAnavAn; babAdhire te balavIryadarpitAH
7005041a jagad bhramanto 'nilavad durAsadA; raNe ca mRtyupratimAH samAhitAH
7005041c varapradAnAd abhigarvitA bhRzaM; kratukriyANAM prazamaMkarAH sadA
7006001a tair vadhyamAnA devAz ca RSayaz ca tapodhanAH
7006001c bhayArtAH zaraNaM jagmur devadevaM mahezvaram
7006002a te sametya tu kAmAriM tripurAriM trilocanam
7006002c UcuH prAJjalayo devA bhayagadgadabhASiNaH
7006003a sukezaputrair bhagavan pitAmahavaroddhataiH
7006003c prajAdhyakSa prajAH sarvA bAdhyante ripubAdhana
7006004a zaraNyAny azaraNyAni AzramANi kRtAni naH
7006004c svargAc ca cyAvitaH zakraH svarge krIDanti zakravat
7006005a ahaM viSNur ahaM rudro brahmAhaM devarAD aham
7006005c ahaM yamo 'haM varuNaz candro 'haM ravir apy aham
7006006a iti te rAkSasA deva varadAnena darpitAH
7006006c bAdhante samaroddharSA ye ca teSAM puraHsarAH
7006007a tan no devabhayArtAnAm abhayaM dAtum arhasi
7006007c azivaM vapur AsthAya jahi daivatakaNTakAn
7006008a ity uktas tu suraiH sarvaiH kapardI nIlalohitaH
7006008c sukezaM prati sApekSa Aha devagaNAn prabhuH
7006009a nAhaM tAn nihaniSyAmi avadhyA mama te 'surAH
7006009c kiM tu mantraM pradAsyAmi yo vai tAn nihaniSyati
7006010a evam eva samudyogaM puraskRtya surarSabhAH
7006010c gacchantu zaraNaM viSNuM haniSyati sa tAn prabhuH
7006011a tatas te jayazabdena pratinandya mahezvaram
7006011c viSNoH samIpam Ajagmur nizAcarabhayArditAH
7006012a zaGkhacakradharaM devaM praNamya bahumAnya ca
7006012c UcuH saMbhrAntavad vAkyaM sukezatanayArditAH
7006013a sukezatanayair deva tribhis tretAgnisaMnibhaiH
7006013c Akramya varadAnena sthAnAny apahRtAni naH
7006014a laGkA nAma purI durgA trikUTazikhare sthitA
7006014c tatra sthitAH prabAdhante sarvAn naH kSaNadAcarAH
7006015a sa tvam asmatpriyArthaM tu jahi tAn madhusUdana
7006015c cakrakRttAsyakamalAn nivedaya yamAya vai
7006016a bhayeSv abhayado 'smAkaM nAnyo 'sti bhavatA samaH
7006016c nuda tvaM no bhayaM deva nIhAram iva bhAskaraH
7006017a ity evaM daivatair ukto devadevo janArdanaH
7006017c abhayaM bhayado 'rINAM dattvA devAn uvAca ha
7006018a sukezaM rAkSasaM jAne IzAnavaradarpitam
7006018c tAMz cAsya tanayAJ jAne yeSAM jyeSThaH sa mAlyavAn
7006019a tAn ahaM samatikrAntamaryAdAn rAkSasAdhamAn
7006019c sUdayiSyAmi saMgrAme surA bhavata vijvarAH
7006020a ity uktAs te surAH sarve viSNunA prabhaviSNunA
7006020c yathA vAsaM yayur hRSTAH prazamanto janArdanam
7006021a vibudhAnAM samudyogaM mAlyavAn sa nizAcaraH
7006021c zrutvA tau bhrAtarau vIrAv idaM vacanam abravIt
7006022a amarA RSayaz caiva saMhatya kila zaMkaram
7006022c asmadvadhaM parIpsanta idam Ucus trilocanam
7006023a sukezatanayA deva varadAnabaloddhatAH
7006023c bAdhante 'smAn samudyuktA ghorarUpAH pade pade
7006024a rAkSasair abhibhUtAH sma na zaktAH sma umApate
7006024c sveSu vezmasu saMsthAtuM bhayAt teSAM durAtmanAm
7006025a tad asmAkaM hitArthe tvaM jahi tAMs tAMs trilocana
7006025c rAkSasAn huMkRtenaiva daha pradahatAM vara
7006026a ity evaM tridazair ukto nizamyAndhakasUdanaH
7006026c ziraH karaM ca dhunvAna idaM vacanam abravIt
7006027a avadhyA mama te devAH sukezatanayA raNe
7006027c mantraM tu vaH pradAsyAmi yo vai tAn nihaniSyati
7006028a yaH sa cakragadApANiH pItavAsA janArdanaH
7006028c haniSyati sa tAn yuddhe zaraNaM taM prapadyatha
7006029a harAn nAvApya te kAmaM kAmArim abhivAdya ca
7006029c nArAyaNAlayaM prAptAs tasmai sarvaM nyavedayan
7006030a tato nArAyaNenoktA devA indrapurogamAH
7006030c surArIn sUdayiSyAmi surA bhavata vijvarAH
7006031a devAnAM bhayabhItAnAM hariNA rAkSasarSabhau
7006031c pratijJAto vadho 'smAkaM tac cintayatha yat kSamam
7006032a hiraNyakazipor mRtyur anyeSAM ca suradviSAm
7006032c duHkhaM nArAyaNaM jetuM yo no hantum abhIpsati
7006033a tataH sumAlI mAlI ca zrutvA mAlyavato vacaH
7006033c Ucatur bhrAtaraM jyeSThaM bhagAMzAv iva vAsavam
7006034a svadhItaM dattam iSTaM ca aizvaryaM paripAlitam
7006034c Ayur nirAmayaM prAptaM svadharmaH sthApitaz ca naH
7006035a devasAgaram akSobhyaM zastraughaiH pravigAhya ca
7006035c jitA devA raNe nityaM na no mRtyukRtaM bhayam
7006036a nArAyaNaz ca rudraz ca zakraz cApi yamas tathA
7006036c asmAkaM pramukhe sthAtuM sarva eva hi bibhyati
7006037a viSNor doSaz ca nAsty atra kAraNaM rAkSasezvara
7006037c devAnAm eva doSeNa viSNoH pracalitaM manaH
7006038a tasmAd adya samudyuktAH sarvasainyasamAvRtAH
7006038c devAn eva jighAMsAmo yebhyo doSaH samutthitaH
7006039a iti mAlI sumAlI ca mAlyavAn agrajaH prabhuH
7006039c udyogaM ghoSayitvAtha rAkSasAH sarva eva te
7006039e yuddhAya niryayuH kruddhA jambhavRtrabalA iva
7006040a syandanair vAraNendraiz ca hayaiz ca girisaMnibhaiH
7006040c kharair gobhir athoSTraiz ca ziMzumArair bhujaMgamaiH
7006041a makaraiH kacchapair mInair vihaMgair garuDopamaiH
7006041c siMhair vyAghrair varAhaiz ca sRmaraiz camarair api
7006042a tyaktvA laGkAM tataH sarve rAkSasA balagarvitAH
7006042c prayAtA devalokAya yoddhuM daivatazatravaH
7006043a laGkAviparyayaM dRSTvA yAni laGkAlayAny atha
7006043c bhUtAni bhayadarzIni vimanaskAni sarvazaH
7006044a bhaumAs tathAntarikSAz ca kAlAjJaptA bhayAvahAH
7006044c utpAtA rAkSasendrANAm abhAvAyotthitA drutam
7006045a asthIni meghA varSanti uSNaM zoNitam eva ca
7006045c velAM samudro 'py utkrAntaz calante cAcalottamAH
7006046a aTTahAsAn vimuJcanto ghananAdasamasvanAn
7006046c bhUtAH paripatanti sma nRtyamAnAH sahasrazaH
7006047a gRdhracakraM mahac cApi jvalanodgAribhir mukhaiH
7006047c rAkSasAnAm upari vai bhramate kAlacakravat
7006048a tAn acintya mahotpAtAn rAkSasA balagarvitAH
7006048c yanty eva na nivartante mRtyupAzAvapAzitAH
7006049a mAlyavAMz ca sumAlI ca mAlI ca rajanIcarAH
7006049c Asan puraHsarAs teSAM kratUnAm iva pAvakAH
7006050a mAlyavantaM tu te sarve mAlyavantam ivAcalam
7006050c nizAcarA Azrayante dhAtAram iva dehinaH
7006051a tad balaM rAkSasendrANAM mahAbhraghananAditam
7006051c jayepsayA devalokaM yayau mAlI vaze sthitam
7006052a rAkSasAnAM samudyogaM taM tu nArAyaNaH prabhuH
7006052c devadUtAd upazrutya dadhre yuddhe tato manaH
7006053a sa devasiddharSimahoragaiz ca; gandharvamukhyApsarasopagItaH
7006053c samAsasAdAmarazatrusainyaM; cakrAsisIrapravarAdidhArI
7006054a suparNapakSAnilanunnapakSaM; bhramatpatAkaM pravikIrNazastram
7006054c cacAla tad rAkSasarAjasainyaM; calopalo nIla ivAcalendraH
7006055a tataH zitaiH zoNitamAMsarUSitair; yugAntavaizvAnaratulyavigrahaiH
7006055c nizAcarAH saMparivArya mAdhavaM; varAyudhair nirbibhiduH sahasrazaH
7007001a nArAyaNagiriM te tu garjanto rAkSasAmbudAH
7007001c avarSann iSuvarSeNa varSeNAdrim ivAmbudAH
7007002a zyAmAvadAtas tair viSNur nIlair naktaMcarottamaiH
7007002c vRto 'JjanagirIvAsId varSamANaiH payodharaiH
7007003a zalabhA iva kedAraM mazakA iva parvatam
7007003c yathAmRtaghaTaM jIvA makarA iva cArNavam
7007004a tathA rakSodhanur muktA vajrAnilamanojavAH
7007004c hariM vizanti sma zarA lokAstam iva paryaye
7007005a syandanaiH syandanagatA gajaiz ca gajadhUr gatAH
7007005c azvArohAH sadazvaiz ca pAdAtAz cAmbare carAH
7007006a rAkSasendrA girinibhAH zarazaktyRSTitomaraiH
7007006c nirucchvAsaM hariM cakruH prANAyAma iva dvijam
7007007a nizAcarais tudyamAno mInair iva mahAtimiH
7007007c zArGgam Ayamya gAtrANi rAkSasAnAM mahAhave
7007008a zaraiH pUrNAyatotsRSTair vajravaktrair manojavaiH
7007008c ciccheda tilazo viSNuH zatazo 'tha sahasrazaH
7007009a vidrAvya zaravarSaM taM varSaM vAyur ivotthitam
7007009c pAJcajanyaM mahAzaGkhaM pradadhmau puruSottamaH
7007010a so 'mbujo hariNA dhmAtaH sarvaprANena zaGkharAT
7007010c rarAsa bhImanihrAdo yugAnte jalado yathA
7007011a zaGkharAjaravaH so 'tha trAsayAm Asa rAkSasAn
7007011c mRgarAja ivAraNye samadAn iva kuJjarAn
7007012a na zekur azvAH saMsthAtuM vimadAH kuJjarAbhavan
7007012c syandanebhyaz cyutA yodhAH zaGkharAvitadurbalAH
7007013a zArGgacApavinirmuktA vajratulyAnanAH zarAH
7007013c vidArya tAni rakSAMsi supuGkhA vivizuH kSitim
7007014a bhidyamAnAH zaraiz cAnye nArAyaNadhanuzcyutaiH
7007014c nipetU rAkSasA bhImAH zailA vajrahatA iva
7007015a vraNair vraNakarArINAm adhokSajazarodbhavaiH
7007015c asRk kSaranti dhArAbhiH svarNadhArAm ivAcalAH
7007016a zaGkharAjaravaz cApi zArGgacAparavas tathA
7007016c rAkSasAnAM ravAMz cApi grasate vaiSNavo ravaH
7007017a sUryAd iva karA ghorA UrmayaH sAgarAd iva
7007017c parvatAd iva nAgendrA vAryoghA iva cAmbudAt
7007018a tathA bANA vinirmuktAH zArGgAn narAyaNeritAH
7007018c nirdhAvantISavas tUrNaM zatazo 'tha sahasrazaH
7007019a zarabheNa yathA siMhAH siMhena dviradA yathA
7007019c dviradena yathA vyAghrA vyAghreNa dvIpino yathA
7007020a dvIpinA ca yathA zvAnaH zunA mArjArakA yathA
7007020c mArjAreNa yathA sarpAH sarpeNa ca yathAkhavaH
7007021a tathA te rAkSasA yuddhe viSNunA prabhaviSNunA
7007021c dravanti drAvitAz caiva zAyitAz ca mahItale
7007022a rAkSasAnAM sahasrANi nihatya madhusUdanaH
7007022c vArijaM nAdayAm Asa toyadaM surarAD iva
7007023a nArAyaNazaragrastaM zaGkhanAdasuvihvalam
7007023c yayau laGkAm abhimukhaM prabhagnaM rAkSasaM balam
7007024a prabhagne rAkSasabale nArAyaNazarAhate
7007024c sumAlI zaravarSeNa AvavAra raNe harim
7007025a utkSipya hemAbharaNaM karaM karam iva dvipaH
7007025c rarAsa rAkSaso harSAt sataDit toyado yathA
7007026a sumAler nardatas tasya ziro jvalitakuNDalam
7007026c ciccheda yantur azvAz ca bhrAntAs tasya tu rakSasaH
7007027a tair azvair bhrAmyate bhrAntaiH sumAlI rAkSasezvaraH
7007027c indriyAzvair yathA bhrAntair dhRtihIno yathA naraH
7007028a mAlI cAbhyadravad yuddhe pragRhya sazaraM dhanuH
7007028c mAler dhanuzcyutA bANAH kArtasvaravibhUSitAH
7007028e vivizur harim AsAdya krauJcaM patrarathA iva
7007029a ardyamAnaH zaraiH so 'tha mAlimuktaiH sahasrazaH
7007029c cukSubhe na raNe viSNur jitendriya ivAdhibhiH
7007030a atha maurvI svanaM kRtvA bhagavAn bhUtabhAvanaH
7007030c mAlinaM prati bANaughAn sasarjAsigadAdharaH
7007031a te mAlideham AsAdya vajravidyutprabhAH zarAH
7007031c pibanti rudhiraM tasya nAgA iva purAmRtam
7007032a mAlinaM vimukhaM kRtvA mAlimauliM harir balAt
7007032c rathaM ca sadhvajaM cApaM vAjinaz ca nyapAtayat
7007033a virathas tu gadAM gRhya mAlI naktaMcarottamaH
7007033c Apupluve gadApANir giryagrAd iva keSarI
7007034a sa tayA garuDaM saMkhye IzAnam iva cAntakaH
7007034c lalATadeze 'bhyahanad vajreNendro yathAcalam
7007035a gadayAbhihatas tena mAlinA garuDo bhRzam
7007035c raNAt parAGmukhaM devaM kRtavAn vedanAturaH
7007036a parAGmukhe kRte deve mAlinA garuDena vai
7007036c udatiSThan mahAnAdo rakSasAm abhinardatAm
7007037a rakSasAM nadatAM nAdaM zrutvA harihayAnujaH
7007037c parAGmukho 'py utsasarja cakraM mAlijighAMsayA
7007038a tat sUryamaNDalAbhAsaM svabhAsA bhAsayan nabhaH
7007038c kAlacakranibhaM cakraM mAleH zIrSam apAtayat
7007039a tacchiro rAkSasendrasya cakrotkRttaM vibhISaNam
7007039c papAta rudhirodgAri purA rAhuziro yathA
7007040a tataH suraiH susaMhRSTaiH sarvaprANasamIritaH
7007040c siMhanAdaravo muktaH sAdhu deveti vAdibhiH
7007041a mAlinaM nihataM dRSTvA sumAlI malyavAn api
7007041c sabalau zokasaMtaptau laGkAM prati vidhAvitau
7007042a garuDas tu samAzvastaH saMnivRtya mahAmanAH
7007042c rAkSasAn drAvayAm Asa pakSavAtena kopitaH
7007043a nArAyaNo 'pISuvarAzanIbhir; vidArayAm Asa dhanuHpramuktaiH
7007043c naktaMcarAn muktavidhUtakezAn; yathAzanIbhiH sataDinmahendraH
7007044a bhinnAtapatraM patamAnazastraM; zarair apadhvastavizIrNadeham
7007044c viniHsRtAntraM bhayalolanetraM; balaM tad unmattanibhaM babhUva
7007045a siMhArditAnAm iva kuJjarANAM; nizAcarANAM saha kuJjarANAm
7007045c ravAz ca vegAz ca samaM babhUvuH; purANasiMhena vimarditAnAm
7007046a saMchAdyamAnA haribANajAlaiH; svabANajAlAni samutsRjantaH
7007046c dhAvanti naktaMcarakAlameghA; vAyupraNunnA iva kAlameghAH
7007047a cakraprahArair vinikRttazIrSAH; saMcUrNitAGgAz ca gadAprahAraiH
7007047c asiprahArair bahudhA vibhaktAH; patanti zailA iva rAkSasendrAH
7007048a cakrakRttAsyakamalA gadAsaMcUrNitorasaH
7007048c lAGgalaglapitagrIvA musalair bhinnamastakAH
7007049a ke cic caivAsinA chinnAs tathAnye zaratADitAH
7007049c nipetur ambarAt tUrNaM rAkSasAH sAgarAmbhasi
7007050a tadAmbaraM vigalitahArakuNDalair; nizAcarair nIlabalAhakopamaiH
7007050c nipAtyamAnair dadRze nirantaraM; nipAtyamAnair iva nIlaparvataiH
7008001a hanyamAne bale tasmin padmanAbhena pRSThataH
7008001c mAlyavAn saMnivRtto 'tha velAtiga ivArNavaH
7008002a saMraktanayanaH kopAc calan maulir nizAcaraH
7008002c padmanAbham idaM prAha vacanaM paruSaM tadA
7008003a nArAyaNa na jAnISe kSatradharmaM sanAtanam
7008003c ayuddhamanaso bhagnAn yo 'smAn haMsi yathetaraH
7008004a parAGmukhavadhaM pApaM yaH karoti surezvara
7008004c sa hantA na gataH svargaM labhate puNyakarmaNAm
7008005a yuddhazraddhAtha vA te 'sti zaGkhacakragadAdhara
7008005c ahaM sthito 'smi pazyAmi balaM darzaya yat tava
7008006a uvAca rAkSasendraM taM devarAjAnujo balI
7008006c yuSmatto bhayabhItAnAM devAnAM vai mayAbhayam
7008006e rAkSasotsAdanaM dattaM tad etad anupAlyate
7008007a prANair api priyaM kAryaM devAnAM hi sadA mayA
7008007c so 'haM vo nihaniSyAmi rasAtalagatAn api
7008008a devam evaM bruvANaM tu raktAmburuhalocanam
7008008c zaktyA bibheda saMkruddho rAkSasendro rarAsa ca
7008009a mAlyavad bhujanirmuktA zaktir ghaNTAkRtasvanA
7008009c harer urasi babhrAja meghastheva zatahradA
7008010a tatas tAm eva cotkRSya zaktiM zaktidharapriyaH
7008010c mAlyavantaM samuddizya cikSepAmburuhekSaNaH
7008011a skandotsRSTeva sA zaktir govindakaraniHsRtA
7008011c kAGkSantI rAkSasaM prAyAn maholkevAJjanAcalam
7008012a sA tasyorasi vistIrNe hArabhAsAvabhAsite
7008012c apatad rAkSasendrasya girikUTa ivAzaniH
7008013a tayA bhinnatanutrANAH prAvizad vipulaM tamaH
7008013c mAlyavAn punar Azvastas tasthau girir ivAcalaH
7008014a tataH kArSNAyasaM zUlaM kaNTakair bahubhiz citam
7008014c pragRhyAbhyahanad devaM stanayor antare dRDham
7008015a tathaiva raNaraktas tu muSTinA vAsavAnujam
7008015c tADayitvA dhanurmAtram apakrAnto nizAcaraH
7008016a tato 'mbare mahAJ zabdaH sAdhu sAdhv iti cotthitaH
7008016c Ahatya rAkSaso viSNuM garuDaM cApy atADayat
7008017a vainateyas tataH kruddhaH pakSavAtena rAkSasaM
7008017c vyapohad balavAn vAyuH zuSkaparNacayaM yathA
7008018a dvijendrapakSavAtena drAvitaM dRzya pUrvajam
7008018c sumAlI svabalaiH sArdhaM laGkAm abhimukho yayau
7008019a pakSavAtabaloddhUto mAlyavAn api rAkSasaH
7008019c svabalena samAgamya yayau laGkAM hriyA vRtaH
7008020a evaM te rAkSasA rAma hariNA kamalekSaNa
7008020c bahuzaH saMyuge bhagnA hatapravaranAyakAH
7008021a azaknuvantas te viSNuM pratiyoddhuM bhayArditAH
7008021c tyaktvA laGkAM gatA vastuM pAtAlaM sahapatnayaH
7008022a sumAlinaM samAsAdya rAkSasaM raghunandana
7008022c sthitAH prakhyAtavIryAs te vaMze sAlakaTaGkaTe
7008023a ye tvayA nihatAs te vai paulastyA nAma rAkSasAH
7008023c sumAlI mAlyavAn mAlI ye ca teSAM puraHsarAH
7008023e sarva ete mahAbhAga rAvaNAd balavattarAH
7008024a na cAnyo rakSasAM hantA sureSv api puraMjaya
7008024c Rte nArAyaNaM devaM zaGkhacakragadAdharam
7008025a bhavAn nArAyaNo devaz caturbAhuH sanAtanaH
7008025c rAkSasAn hantum utpanno ajeyaH prabhur avyayaH
7009001a kasya cit tv atha kAlasya sumAlI nAma rAkSasaH
7009001c rasAtalAn martyalokaM sarvaM vai vicacAra ha
7009002a nIlajImUtasaMkAzas taptakAJcanakuNDalaH
7009002c kanyAM duhitaraM gRhya vinA padmam iva zriyam
7009002e athApazyat sa gacchantaM puSpakeNa dhanezvaram
7009003a taM dRSTvAmarasaMkAzaM gacchantaM pAvakopamam
7009003c athAbravIt sutAM rakSaH kaikasIM nAma nAmataH
7009004a putri pradAnakAlo 'yaM yauvanaM te 'tivartate
7009004c tvatkRte ca vayaM sarve yantritA dharmabuddhayaH
7009005a tvaM hi sarvaguNopetA zrIH sapadmeva putrike
7009005c pratyAkhyAnAc ca bhItais tvaM na varaiH pratigRhyase
7009006a kanyApitRtvaM duHkhaM hi sarveSAM mAnakAGkSiNAm
7009006c na jJAyate ca kaH kanyAM varayed iti putrike
7009007a mAtuH kulaM pitRkulaM yatra caiva pradIyate
7009007c kulatrayaM sadA kanyA saMzaye sthApya tiSThati
7009008a sA tvaM munivarazreSThaM prajApatikulodbhavam
7009008c gaccha vizravasaM putri paulastyaM varaya svayam
7009009a IdRzAs te bhaviSyanti putrAH putri na saMzayaH
7009009c tejasA bhAskarasamA yAdRzo 'yaM dhanezvaraH
7009010a etasminn antare rAma pulastyatanayo dvijaH
7009010c agnihotram upAtiSThac caturtha iva pAvakaH
7009011a sA tu tAM dAruNAM velAm acintya pitRgauravAt
7009011c upasRtyAgratas tasya caraNAdhomukhI sthitA
7009012a sa tu tAM vIkSya suzroNIM pUrNacandranibhAnanAm
7009012c abravIt paramodAro dIpyamAna ivaujasA
7009013a bhadre kasyAsi duhitA kuto vA tvam ihAgatA
7009013c kiM kAryaM kasya vA hetos tattvato brUhi zobhane
7009014a evam uktA tu sA kanyA kRtAJjalir athAbravIt
7009014c AtmaprabhAvena mune jJAtum arhasi me matam
7009015a kiM tu viddhi hi mAM brahmaJ zAsanAt pitur AgatAm
7009015c kaikasI nAma nAmnAhaM zeSaM tvaM jJAtum arhasi
7009016a sa tu gatvA munir dhyAnaM vAkyam etad uvAca ha
7009016c vijJAtaM te mayA bhadre kAraNaM yan manogatam
7009017a dAruNAyAM tu velAyAM yasmAt tvaM mAm upasthitA
7009017c zRNu tasmAt sutAn bhadre yAdRzAJ janayiSyasi
7009018a dAruNAn dAruNAkArAn dAruNAbhijanapriyAn
7009018c prasaviSyasi suzroNi rAkSasAn krUrakarmaNaH
7009019a sA tu tad vacanaM zrutvA praNipatyAbravId vacaH
7009019c bhagavan nedRzAH putrAs tvatto 'rhA brahmayonitaH
7009020a athAbravIn munis tatra pazcimo yas tavAtmajaH
7009020c mama vaMzAnurUpaz ca dharmAtmA ca bhaviSyati
7009021a evam uktA tu sA kanyA rAma kAlena kena cit
7009021c janayAm Asa bIbhatsaM rakSorUpaM sudAruNam
7009022a dazazIrSaM mahAdaMSTraM nIlAJjanacayopamam
7009022c tAmrauSThaM viMzatibhujaM mahAsyaM dIptamUrdhajam
7009023a jAtamAtre tatas tasmin sajvAlakavalAH zivAH
7009023c kravyAdAz cApasavyAni maNDalAni pracakrire
7009024a vavarSa rudhiraM devo meghAz ca kharanisvanAH
7009024c prababhau na ca khe sUryo maholkAz cApatan bhuvi
7009025a atha nAmAkarot tasya pitAmahasamaH pitA
7009025c dazazIrSaH prasUto 'yaM dazagrIvo bhaviSyati
7009026a tasya tv anantaraM jAtaH kumbhakarNo mahAbalaH
7009026c pramANAd yasya vipulaM pramANaM neha vidyate
7009027a tataH zUrpaNakhA nAma saMjajJe vikRtAnanA
7009027c vibhISaNaz ca dharmAtmA kaikasyAH pazcimaH sutaH
7009028a te tu tatra mahAraNye vavRdhuH sumahaujasaH
7009028c teSAM krUro dazagrIvo lokodvegakaro 'bhavat
7009029a kumbhakarNaH pramattas tu maharSIn dharmasaMzritAn
7009029c trailokyaM trAsayan duSTo bhakSayan vicacAra ha
7009030a vibhISaNas tu dharmAtmA nityaM dharmapathe sthitaH
7009030c svAdhyAyaniyatAhAra uvAsa niyatendriyaH
7009031a atha vittezvaro devas tatra kAlena kena cit
7009031c Agacchat pitaraM draSTuM puSpakeNa mahaujasaM
7009032a taM dRSTvA kaikasI tatra jvalantam iva tejasA
7009032c AsthAya rAkSasIM buddhiM dazagrIvam uvAca ha
7009033a putra vaizravaNaM pazya bhrAtaraM tejasA vRtam
7009033c bhrAtRbhAve same cApi pazyAtmAnaM tvam IdRzam
7009034a dazagrIva tathA yatnaM kuruSvAmitavikrama
7009034c yathA bhavasi me putra zIghraM vaizvaraNopamaH
7009035a mAtus tad vacanaM zrutvA dazagrIvaH pratApavAn
7009035c amarSam atulaM lebhe pratijJAM cAkarot tadA
7009036a satyaM te pratijAnAmi tulyo bhrAtrAdhiko 'pi vA
7009036c bhaviSyAmy acirAn mAtaH saMtApaM tyaja hRdgatam
7009037a tataH krodhena tenaiva dazagrIvaH sahAnujaH
7009037c prApsyAmi tapasA kAmam iti kRtvAdhyavasya ca
7009037e Agacchad AtmasiddhyarthaM gokarNasyAzramaM zubham
7010001a athAbravId dvijaM rAmaH kathaM te bhrAtaro vane
7010001c kIdRzaM tu tadA brahmaMs tapaz cerur mahAvratAH
7010002a agastyas tv abravIt tatra rAmaM prayata mAnasaM
7010002c tAMs tAn dharmavidhIMs tatra bhrAtaras te samAvizan
7010003a kumbhakarNas tadA yatto nityaM dharmaparAyaNaH
7010003c tatApa graiSmike kAle paJcasv agniSv avasthitaH
7010004a varSe meghodakaklinno vIrAsanam asevata
7010004c nityaM ca zaizire kAle jalamadhyapratizrayaH
7010005a evaM varSasahasrANi daza tasyAticakramuH
7010005c dharme prayatamAnasya satpathe niSThitasya ca
7010006a vibhISaNas tu dharmAtmA nityaM dharmaparaH zuciH
7010006c paJcavarSasahasrANi pAdenaikena tasthivAn
7010007a samApte niyame tasya nanRtuz cApsarogaNAH
7010007c papAta puSpavarSaM ca kSubhitAz cApi devatAH
7010008a paJcavarSasahasrANi sUryaM caivAnvavartata
7010008c tasthau cordhvazirobAhuH svAdhyAyadhRtamAnasaH
7010009a evaM vibhISaNasyApi gatAni niyatAtmanaH
7010009c dazavarSasahasrANi svargasthasyeva nandane
7010010a dazavarSasahasraM tu nirAhAro dazAnanaH
7010010c pUrNe varSasahasre tu ziraz cAgnau juhAva saH
7010011a evaM varSasahasrANi nava tasyAticakramuH
7010011c zirAMsi nava cApy asya praviSTAni hutAzanam
7010012a atha varSasahasre tu dazame dazamaM ziraH
7010012c chettukAmaH sa dharmAtmA prAptaz cAtra pitAmahaH
7010013a pitAmahas tu suprItaH sArdhaM devair upasthitaH
7010013c vatsa vatsa dazagrIva prIto 'smIty abhyabhASata
7010014a zIghraM varaya dharmajJa varo yas te 'bhikAGkSitaH
7010014c kiM te kAmaM karomy adya na vRthA te parizramaH
7010015a tato 'bravId dazagrIvaH prahRSTenAntarAtmanA
7010015c praNamya zirasA devaM harSagadgadayA girA
7010016a bhagavan prANinAM nityaM nAnyatra maraNAd bhayam
7010016c nAsti mRtyusamaH zatrur amaratvam ato vRNe
7010017a suparNanAgayakSANAM daityadAnavarakSasAm
7010017c avadhyaH syAM prajAdhyakSa devatAnAM ca zAzvatam
7010018a na hi cintA mamAnyeSu prANiSv amarapUjita
7010018c tRNabhUtA hi me sarve prANino mAnuSAdayaH
7010019a evam uktas tu dharmAtmA dazagrIveNa rakSasA
7010019c uvAca vacanaM rAma saha devaiH pitAmahaH
7010020a bhaviSyaty evam evaitat tava rAkSasapuMgava
7010020c zRNu cApi vaco bhUyaH prItasyeha zubhaM mama
7010021a hutAni yAni zIrSANi pUrvam agnau tvayAnagha
7010021c punas tAni bhaviSyanti tathaiva tava rAkSasa
7010022a evaM pitAmahoktasya dazagrIvasya rakSasaH
7010022c agnau hutAni zIrSANi yAni tAny utthitAni vai
7010023a evam uktvA tu taM rAma dazagrIvaM prajApatiH
7010023c vibhISaNam athovAca vAkyaM lokapitAmahaH
7010024a vibhISaNa tvayA vatsa dharmasaMhitabuddhinA
7010024c parituSTo 'smi dharmajJa varaM varaya suvrata
7010025a vibhISaNas tu dharmAtmA vacanaM prAha sAJjaliH
7010025c vRtaH sarvaguNair nityaM candramA iva razmibhiH
7010026a bhagavan kRtakRtyo 'haM yan me lokaguruH svayam
7010026c prIto yadi tvaM dAtavyaM varaM me zRNu suvrata
7010027a yA yA me jAyate buddhir yeSu yeSv AzrameSv iha
7010027c sA sA bhavatu dharmiSThA taM taM dharmaM ca pAlaye
7010028a eSa me paramodAra varaH paramako mataH
7010028c na hi dharmAbhiraktAnAM loke kiM cana durlabham
7010029a atha prajApatiH prIto vibhISaNam uvAca ha
7010029c dharmiSThas tvaM yathA vatsa tathA caitad bhaviSyati
7010030a yasmAd rAkSasayonau te jAtasyAmitrakarSaNa
7010030c nAdharme jAyate buddhir amaratvaM dadAmi te
7010031a kumbhakarNAya tu varaM prayacchantam ariMdama
7010031c prajApatiM surAH sarve vAkyaM prAJjalayo 'bruvan
7010032a na tAvat kumbhakarNAya pradAtavyo varas tvayA
7010032c jAnISe hi yathA lokAMs trAsayaty eSa durmatiH
7010033a nandane 'psarasaH sapta mahendrAnucarA daza
7010033c anena bhakSitA brahmann RSayo mAnuSAs tathA
7010034a varavyAjena moho 'smai dIyatAm amitaprabha
7010034c lokAnAM svasti caiva syAd bhaved asya ca saMnatiH
7010035a evam uktaH surair brahmAcintayat padmasaMbhavaH
7010035c cintitA copatasthe 'sya pArzvaM devI sarasvatI
7010036a prAJjaliH sA tu parzvasthA prAha vAkyaM sarasvatI
7010036c iyam asmy AgatA deva kiM kAryaM karavANy aham
7010037a prajApatis tu tAM prAptAM prAha vAkyaM sarasvatIm
7010037c vANi tvaM rAkSasendrasya bhava yA devatepsitA
7010038a tathety uktvA praviSTA sA prajApatir athAbravIt
7010038c kumbhakarNa mahAbAho varaM varaya yo mataH
7010039a kumbhakarNas tu tad vAkyaM zrutvA vacanam abravIt
7010039c svaptuM varSANy anekAni devadeva mamepsitam
7010040a evam astv iti taM coktvA saha devaiH pitAmahaH
7010040c devI sarasvatI caiva muktvA taM prayayau divam
7010041a kumbhakarNas tu duSTAtmA cintayAm Asa duHkhitaH
7010041c kIdRzaM kiM nv idaM vAkyaM mamAdya vadanAc cyutam
7010042a evaM labdhavarAH sarve bhrAtaro dIptatejasaH
7010042c zleSmAtakavanaM gatvA tatra te nyavasan sukham
7011001a sumAlI varalabdhAMs tu jJAtvA tAn vai nizAcarAn
7011001c udatiSThad bhayaM tyaktvA sAnugaH sa rasAtalAt
7011002a mArIcaz ca prahastaz ca virUpAkSo mahodaraH
7011002c udatiSThan susaMrabdhAH sacivAs tasya rakSasaH
7011003a sumAlI caiva taiH sarvair vRto rAkSasapuMgavaiH
7011003c abhigamya dazagrIvaM pariSvajyedam abravIt
7011004a diSTyA te putra saMprAptaz cintito 'yaM manorathaH
7011004c yas tvaM tribhuvaNazreSThAl labdhavAn varam IdRzam
7011005a yatkRte ca vayaM laGkAM tyaktvA yAtA rasAtalam
7011005c tad gataM no mahAbAho mahad viSNukRtaM bhayam
7011006a asakRt tena bhagnA hi parityajya svam Alayam
7011006c vidrutAH sahitAH sarve praviSTAH sma rasAtalam
7011007a asmadIyA ca laGkeyaM nagarI rAkSasoSitA
7011007c nivezitA tava bhrAtrA dhanAdhyakSeNa dhImatA
7011008a yadi nAmAtra zakyaM syAt sAmnA dAnena vAnagha
7011008c tarasA vA mahAbAho pratyAnetuM kRtaM bhavet
7011009a tvaM ca laGkezvaras tAta bhaviSyasi na saMzayaH
7011009c sarveSAM naH prabhuz caiva bhaviSyasi mahAbala
7011010a athAbravId dazagrIvo mAtAmaham upasthitam
7011010c vittezo gurur asmAkaM nArhasy evaM prabhASitum
7011011a uktavantaM tathA vAkyaM dazagrIvaM nizAcaraH
7011011c prahastaH prazritaM vAkyam idam Aha sakAraNam
7011012a dazagrIva mahAbAho nArhas tvaM vaktum IdRzam
7011012c saubhrAtraM nAsti zUrANAM zRNu cedaM vaco mama
7011013a aditiz ca ditiz caiva bhaginyau sahite kila
7011013c bhArye paramarUpiNyau kazyapasya prajApateH
7011014a aditir janayAm Asa devAMs tribhuvaNezvarAn
7011014c ditis tv ajanayad daityAn kazyapasyAtmasaMbhavAn
7011015a daityAnAM kila dharmajJa pureyaM savanArNavA
7011015c saparvatA mahI vIra te 'bhavan prabhaviSNavaH
7011016a nihatya tAMs tu samare viSNunA prabhaviSNunA
7011016c devAnAM vazam AnItaM trailokyam idam avyayam
7011017a naitad eko bhavAn eva kariSyati viparyayam
7011017c surair AcaritaM pUrvaM kuruSvaitad vaco mama
7011018a evam ukto dazagrIvaH prahastena durAtmanA
7011018c cintayitvA muhUrtaM vai bADham ity eva so 'bravIt
7011019a sa tu tenaiva harSeNa tasminn ahani vIryavAn
7011019c vanaM gato dazagrIvaH saha taiH kSaNadAcaraiH
7011020a trikUTasthaH sa tu tadA dazagrIvo nizAcaraH
7011020c preSayAm Asa dautyena prahastaM vAkyakovidam
7011021a prahasta zIghraM gatvA tvaM brUhi nairRtapuMgavam
7011021c vacanAn mama vittezaM sAmapUrvam idaM vacaH
7011022a iyaM laGkA purI rAjan rAkSasAnAM mahAtmanAm
7011022c tvayA nivezitA saumya naitad yuktaM tavAnagha
7011023a tad bhavAn yadi sAmnaitAM dadyAd atulavikrama
7011023c kRtA bhaven mama prItir dharmaz caivAnupAlitaH
7011024a ity uktaH sa tadA gatvA prahasto vAkyakovidaH
7011024c dazagrIvavacaH sarvaM vittezAya nyavedayat
7011025a prahastAd api saMzrutya devo vaizravaNo vacaH
7011025c pratyuvAca prahastaM taM vAkyaM vAkyavizAradaH
7011026a brUhi gaccha dazagrIvaM purI rAjyaM ca yan mama
7011026c tavApy etan mahAbAho bhuGkSvaitad dhatakaNTakam
7011027a sarvaM kartAsmi bhadraM te rAkSaseza vaco 'cirAt
7011027c kiM tu tAvat pratIkSasva pitur yAvan nivedaye
7011028a evam uktvA dhanAdhyakSo jagAma pitur antikam
7011028c abhivAdya guruM prAha rAvaNasya yadIpsitam
7011029a eSa tAta dazagrIvo dUtaM preSitavAn mama
7011029c dIyatAM nagarI laGkA pUrvaM rakSogaNoSitA
7011029e mayAtra yad anuSTheyaM tan mamAcakSva suvrata
7011030a brahmarSis tv evam ukto 'sau vizravA munipuMgavaH
7011030c uvAca dhanadaM vAkyaM zRNu putra vaco mama
7011031a dazagrIvo mahAbAhur uktavAn mama saMnidhau
7011031c mayA nirbhartsitaz cAsId bahudhoktaH sudurmatiH
7011032a sa krodhena mayA cokto dhvaMsasveti punaH punaH
7011032c zreyo'bhiyuktaM dharmyaM ca zRNu putra vaco mama
7011033a varapradAnasaMmUDho mAnyAmAnyaM sudurmatiH
7011033c na vetti mama zApAc ca prakRtiM dAruNAM gataH
7011034a tasmAd gaccha mahAbAho kailAsaM dharaNIdharam
7011034c nivezaya nivAsArthaM tyaja laGkAM sahAnugaH
7011035a tatra mandAkinI ramyA nadInAM pravarA nadI
7011035c kAJcanaiH sUryasaMkAzaiH paGkajaiH saMvRtodakA
7011036a na hi kSamaM tvayA tena vairaM dhanada rakSasA
7011036c jAnISe hi yathAnena labdhaH paramako varaH
7011037a evam ukto gRhItvA tu tad vacaH pitRgauravAt
7011037c sadArapauraH sAmAtyaH savAhanadhano gataH
7011038a prahastas tu dazagrIvaM gatvA sarvaM nyavedayat
7011038c zUnyA sA nagarI laGkA triMzadyojanam AyatA
7011038e pravizya tAM sahAsmAbhiH svadharmaM tatra pAlaya
7011039a evam uktaH prahastena rAvaNo rAkSasas tadA
7011039c viveza nagarIM laGkAM sabhrAtA sabalAnugaH
7011040a sa cAbhiSiktaH kSaNadAcarais tadA; nivezayAm Asa purIM dazAnanaH
7011040c nikAmapUrNA ca babhUva sA purI; nizAcarair nIlabalAhakopamaiH
7011041a dhanezvaras tv atha pitRvAkyagauravAn; nyavezayac chazivimale girau purIm
7011041c svalaMkRtair bhavanavarair vibhUSitAM; puraMdarasyeva tadAmarAvatIm
7012001a rAkSasendro 'bhiSiktas tu bhrAtRbhyAM sahitas tadA
7012001c tataH pradAnaM rAkSasyA bhaginyAH samacintayat
7012002a dadau tAM kAlakeyAya dAnavendrAya rAkSasIm
7012002c svasAM zUrpaNakhAM nAma vidyujjihvAya nAmataH
7012003a atha dattvA svasAraM sa mRgayAM paryaTan nRpaH
7012003c tatrApazyat tato rAma mayaM nAma diteH sutam
7012004a kanyAsahAyaM taM dRSTvA dazagrIvo nizAcaraH
7012004c apRcchat ko bhavAn eko nirmanuSya mRge vane
7012005a mayas tv athAbravId rAma pRcchantaM taM nizAcaram
7012005c zrUyatAM sarvam AkhyAsye yathAvRttam idaM mama
7012006a hemA nAmApsarAs tAta zrutapUrvA yadi tvayA
7012006c daivatair mama sA dattA paulomIva zatakratoH
7012007a tasyAM saktamanAs tAta paJcavarSazatAny aham
7012007c sA ca daivatakAryeNa gatA varSaM caturdazam
7012008a tasyAH kRte ca hemAyAH sarvaM hemapuraM mayA
7012008c vajravaidUryacitraM ca mAyayA nirmitaM tadA
7012009a tatrAham aratiM vindaMs tayA hInaH suduHkhitaH
7012009c tasmAt purAd duhitaraM gRhItvA vanam AgataH
7012010a iyaM mamAtmajA rAjaMs tasyAH kukSau vivardhitA
7012010c bhartAram anayA sArdham asyAH prApto 'smi mArgitum
7012011a kanyApitRtvaM duHkhaM hi narANAM mAnakAGkSiNAm
7012011c kanyA hi dve kule nityaM saMzaye sthApya tiSThati
7012012a dvau sutau tu mama tv asyAM bhAryAyAM saMbabhUvatuH
7012012c mAyAvI prathamas tAta dundubhis tadanantaram
7012013a etat te sarvam AkhyAtaM yAthAtathyena pRcchataH
7012013c tvAm idAnIM kathaM tAta jAnIyAM ko bhavAn iti
7012014a evam ukto rAkSasendro vinItam idam abravIt
7012014c ahaM paulastyatanayo dazagrIvaz ca nAmataH
7012015a brahmarSes taM sutaM jJAtvA mayo harSam upAgataH
7012015c dAtuM duhitaraM tasya rocayAm Asa tatra vai
7012016a prahasan prAha daityendro rAkSasendram idaM vacaH
7012016c iyaM mamAtmajA rAjan hemayApsarasA dhRtA
7012016e kanyA mandodarI nAma patnyarthaM pratigRhyatAm
7012017a bADham ity eva taM rAma dazagrIvo 'bhyabhASata
7012017c prajvAlya tatra caivAgnim akarot pANisaMgraham
7012018a na hi tasya mayo rAma zApAbhijJas tapodhanAt
7012018c viditvA tena sA dattA tasya paitAmahaM kulam
7012019a amoghAM tasya zaktiM ca pradadau paramAdbhutAm
7012019c pareNa tapasA labdhAM jaghnivA&l lakSmaNaM yayA
7012020a evaM sa kRtadAro vai laGkAyAm IzvaraH prabhuH
7012020c gatvA tu nagaraM bhArye bhrAtRbhyAM samudAvahat
7012021a vairocanasya dauhitrIM vajrajvAleti nAmataH
7012021c tAM bhAryAM kumbhakarNasya rAvaNaH samudAvahat
7012022a gandharvarAjasya sutAM zailUSasya mahAtmanaH
7012022c saramAM nAma dharmajJo lebhe bhAryAM vibhISaNaH
7012023a tIre tu sarasaH sA vai saMjajJe mAnasasya ca
7012023c mAnasaM ca saras tAta vavRdhe jaladAgame
7012024a mAtrA tu tasyAH kanyAyAH snehenAkranditaM vacaH
7012024c saro mA vardhatety uktaM tataH sA saramAbhavat
7012025a evaM te kRtadArA vai remire tatra rAkSasAH
7012025c svAM svAM bhAryAm upAdAya gandharvA iva nandane
7012026a tato mandodarI putraM meghanAdam asUyata
7012026c sa eSa indrajin nAma yuSmAbhir abhidhIyate
7012027a jAtamAtreNa hi purA tena rAkSasasUnunA
7012027c rudatA sumahAn mukto nAdo jaladharopamaH
7012028a jaDIkRtAyAM laGkAyAM tena nAdena tasya vai
7012028c pitA tasyAkaron nAma meghanAda iti svayam
7012029a so 'vardhata tadA rAma rAvaNAntaHpure zubhe
7012029c rakSyamANo varastrIbhiz channaH kASThair ivAnalaH
7013001a atha lokezvarotsRSTA tatra kAlena kena cit
7013001c nidrA samabhavat tIvrA kumbhakarNasya rUpiNI
7013002a tato bhrAtaram AsInaM kumbhakarNo 'bravId vacaH
7013002c nidrA mAM bAdhate rAjan kArayasva mamAlayam
7013003a viniyuktAs tato rAjJA zilpino vizvakarmavat
7013003c akurvan kumbhakarNasya kailAsasamam Alayam
7013004a vistIrNaM yojanaM zubhraM tato dviguNam Ayatam
7013004c darzanIyaM nirAbAdhaM kumbhakarNasya cakrire
7013005a sphATikaiH kAJcanaiz citraiH stambhaiH sarvatra zobhitam
7013005c vaidUryakRtazobhaM ca kiGkiNIjAlakaM tathA
7013006a dantatoraNavinyastaM vajrasphaTikavedikam
7013006c sarvartusukhadaM nityaM meroH puNyAM guhAm iva
7013007a tatra nidrAM samAviSTaH kumbhakarNo nizAcaraH
7013007c bahUny abdasahasrANi zayAno nAvabudhyate
7013008a nidrAbhibhUte tu tadA kumbhakarNe dazAnanaH
7013008c devarSiyakSagandharvAn bAdhate sma sa nityazaH
7013009a udyAnAni vicitrANi nandanAdIni yAni ca
7013009c tAni gatvA susaMkruddho bhinatti sma dazAnanaH
7013010a nadIM gaja iva krIDan vRkSAn vAyur iva kSipan
7013010c nagAn vajra iva sRSTo vidhvaMsayati nityazaH
7013011a tathA vRttaM tu vijJAya dazagrIvaM dhanezvaraH
7013011c kulAnurUpaM dharmajJa vRttaM saMsmRtya cAtmanaH
7013012a saubhrAtradarzanArthaM tu dUtaM vaizvaraNas tadA
7013012c laGkAM saMpreSayAm Asa dazagrIvasya vai hitam
7013013a sa gatvA nagarIM laGkAm AsasAda vibhISaNam
7013013c mAnitas tena dharmeNa pRSTaz cAgamanaM prati
7013014a pRSTvA ca kuzalaM rAjJo jJAtIn api ca bAndhavAn
7013014c sabhAyAM darzayAm Asa tam AsInaM dazAnanam
7013015a sa dRSTvA tatra rAjAnaM dIpyamAnaM svatejasA
7013015c jayena cAbhisaMpUjya tUSNIm AsIn muhUrtakam
7013016a tasyopanIte paryaGke varAstaraNasaMvRte
7013016c upavizya dazagrIvaM dUto vAkyam athAbravIt
7013017a rAjan vadAmi te sarvaM bhrAtA tava yad abravIt
7013017c ubhayoH sadRzaM saumya vRttasya ca kulasya ca
7013018a sAdhu paryAptam etAvat kRtaz cAritrasaMgrahaH
7013018c sAdhu dharme vyavasthAnaM kriyatAM yadi zakyate
7013019a dRSTaM me nandanaM bhagnam RSayo nihatAH zrutAH
7013019c devAnAM tu samudyogas tvatto rAjaJ zrutaz ca me
7013020a nirAkRtaz ca bahuzas tvayAhaM rAkSasAdhipa
7013020c aparAddhA hi bAlyAc ca rakSaNIyAH svabAndhavAH
7013021a ahaM tu himavatpRSThaM gato dharmam upAsitum
7013021c raudraM vrataM samAsthAya niyato niyatendriyaH
7013022a tatra devo mayA dRSTaH saha devyomayA prabhuH
7013022c savyaM cakSur mayA caiva tatra devyAM nipAtitam
7013023a kA nv iyaM syAd iti zubhA na khalv anyena hetunA
7013023c rUpaM hy anupamaM kRtvA tatra krIDati pArvatI
7013024a tato devyAH prabhAvena dagdhaM savyaM mamekSaNam
7013024c reNudhvastam iva jyotiH piGgalatvam upAgatam
7013025a tato 'ham anyad vistIrNaM gatvA tasya gires taTam
7013025c pUrNaM varSazatAny aSTau samavApa mahAvratam
7013026a samApte niyame tasmiMs tatra devo mahezvaraH
7013026c prItaH prItena manasA prAha vAkyam idaM prabhuH
7013027a prIto 'smi tava dharmajJa tapasAnena suvrata
7013027c mayA caitad vrataM cIrNaM tvayA caiva dhanAdhipa
7013028a tRtIyaH puruSo nAsti yaz cared vratam IdRzam
7013028c vrataM suduzcaraM hy etan mayaivotpAditaM purA
7013029a tat sakhitvaM mayA sArdhaM rocayasva dhanezvara
7013029c tapasA nirjitatvAd dhi sakhA bhava mamAnagha
7013030a devyA dagdhaM prabhAvena yac ca sAvyaM tavekSaNam
7013030c ekAkSi piGgalety eva nAma sthAsyati zAzvatam
7013031a evaM tena sakhitvaM ca prApyAnujJAM ca zaMkarAt
7013031c Agamya ca zruto 'yaM me tava pApavinizcayaH
7013032a tadadharmiSThasaMyogAn nivarta kuladUSaNa
7013032c cintyate hi vadhopAyaH sarSisaMghaiH surais tava
7013033a evam ukto dazagrIvaH kruddhaH saMraktalocanaH
7013033c hastAn dantAMz a saMpIDya vAkyam etad uvAca ha
7013034a vijJAtaM te mayA dUta vAkyaM yat tvaM prabhASase
7013034c naiva tvam asi naivAsau bhrAtrA yenAsi preSitaH
7013035a hitaM na sa mamaitad dhi bravIti dhanarakSakaH
7013035c mahezvarasakhitvaM tu mUDha zrAvayase kila
7013036a na hantavyo gurur jyeSTho mamAyam iti manyate
7013036c tasya tv idAnIM zrutvA me vAkyam eSA kRtA matiH
7013037a trI&l lokAn api jeSyAmi bAhuvIryam upAzritaH
7013037c etan muhUrtam eSo 'haM tasyaikasya kRte ca vai
7013037e caturo lokapAlAMs tAn nayiSyAmi yamakSayam
7013038a evam uktvA tu laGkezo dUtaM khaDgena jaghnivAn
7013038c dadau bhakSayituM hy enaM rAkSasAnAM durAtmanAm
7013039a tataH kRtasvastyayano ratham Aruhya rAvaNaH
7013039c trailokyavijayAkAGkSI yayau tatra dhanezvaraH
7014001a tataH sa sacivaiH sArdhaM SaDbhir nityaM balotkaTaiH
7014001c mahodaraprahastAbhyAM mArIcazukasAraNaiH
7014002a dhUmrAkSeNa ca vIreNa nityaM samaragRdhnunA
7014002c vRtaH saMprayayau zrImAn krodhAl lokAn dahann iva
7014003a purANi sa nadIH zailAn vanAny upavanAni ca
7014003c atikramya muhUrtena kailAsaM girim Avizat
7014004a taM niviSTaM girau tasmin rAkSasendraM nizamya tu
7014004c rAjJo bhrAtAyam ity uktvA gatA yatra dhanezvaraH
7014005a gatvA tu sarvam Acakhyur bhrAtus tasya vinizcayam
7014005c anujJAtA yayuz caiva yuddhAya dhanadena te
7014006a tato balasya saMkSobhaH sAgarasyeva vardhataH
7014006c abhUn nairRtarAjasya giriM saMcAlayann iva
7014007a tato yuddhaM samabhavad yakSarAkSasasaMkulam
7014007c vyathitAz cAbhavaMs tatra sacivAs tasya rakSasaH
7014008a taM dRSTvA tAdRzaM sainyaM dazagrIvo nizAcaraH
7014008c harSAn nAdaM tataH kRtvA roSAt samabhivartata
7014009a ye tu te rAkSasendrasya sacivA ghoravikramaH
7014009c te sahasraM sahasrANAm ekaikaM samayodhayan
7014010a tato gadAbhiH parighair asibhiH zaktitomaraiH
7014010c vadhyamAno dazagrIvas tat sainyaM samagAhata
7014011a tair nirucchvAsavat tatra vadhyamAno dazAnanaH
7014011c varSamANair iva ghanair yakSendraiH saMnirudhyata
7014012a sa durAtmA samudyamya kAladaNDopamAM gadAm
7014012c praviveza tataH sainyaM nayan yakSAn yamakSayam
7014013a sa kakSam iva vistIrNaM zuSkendhanasamAkulam
7014013c vAtenAgnir ivAyatto 'dahat sainyaM sudAruNam
7014014a tais tu tasya mRdhe 'mAtyair mahodarazukAdibhiH
7014014c alpAvaziSTAs te yakSAH kRtA vAtair ivAmbudAH
7014015a ke cit tv AyudhabhagnAGgAH patitAH samarakSitau
7014015c oSThAn svadazanais tIkSNair daMzanto bhuvi pAtitAH
7014016a bhayAd anyonyam AliGgya bhraSTazastrA raNAjire
7014016c niSedus te tadA yakSAH kUlA jalahatA iva
7014017a hatAnAM svargasaMsthAnAM yudhyatAM pRthivItale
7014017c prekSatAm RSisaMghAnAM na babhUvAntaraM divi
7014018a etasminn antare rAma vistIrNabalavAhanaH
7014018c agamat sumahAn yakSo nAmnA saMyodhakaNTakaH
7014019a tena yakSeNa mArIco viSNuneva samAhataH
7014019c patitaH pRthivIM bheje kSINapuNya ivAmbarAt
7014020a prAptasaMjJo muhUrtena vizramya ca nizAcaraH
7014020c taM yakSaM yodhayAm Asa sa ca bhagnaH pradudruve
7014021a tataH kAJcanacitrAGgaM vaidUryarajatokSitam
7014021c maryAdAM dvArapAlAnAM toraNaM tat samAvizat
7014022a tato rAma dazagrIvaM pravizantaM nizAcaram
7014022c sUryabhAnur iti khyAto dvArapAlo nyavArayat
7014023a tatas toraNam utpATya tena yakSeNa tADitaH
7014023c rAkSaso yakSasRSTena toraNena samAhataH
7014023e na kSitiM prayayau rAma varAt salilayoninaH
7014024a sa tu tenaiva taM yakSaM toraNena samAhanat
7014024c nAdRzyata tadA yakSo bhasma tena kRtas tu saH
7014025a tataH pradudruvuH sarve yakSA dRSTvA parAkramam
7014025c tato nadIr guhAz caiva vivizur bhayapIDitAH
7015001a tatas tAn vidrutAn dRSTvA yakSAJ zatasahasrazaH
7015001c svayam eva dhanAdhyakSo nirjagAma raNaM prati
7015002a tatra mANicAro nAma yakSaH paramadurjayaH
7015002c vRto yakSasahasraiH sa caturbhiH samayodhayat
7015003a te gadAmusalaprAsazaktitomaramudgaraiH
7015003c abhighnanto raNe yakSA rAkSasAn abhidudruvuH
7015004a tataH prahastena tadA sahasraM nihataM raNe
7015004c mahodareNa gadayA sahasram aparaM hatam
7015005a kruddhena ca tadA rAma mArIcena durAtmanA
7015005c nimeSAntaramAtreNa dve sahasre nipAtite
7015006a dhUmrAkSeNa samAgamya mANibhadro mahAraNe
7015006c musalenorasi krodhAt tADito na ca kampitaH
7015007a tato gadAM samAvidhya mANibhadreNa rAkSasaH
7015007c dhUmrAkSas tADito mUrdhni vihvalo nipapAta ha
7015008a dhUmrAkSaM tADitaM dRSTvA patitaM zoNitokSitam
7015008c abhyadhAvat susaMkruddho mANibhadraM dazAnanaH
7015009a taM kruddham abhidhAvantaM yugAntAgnim ivotthitam
7015009c zaktibhis tADayAm Asa tisRbhir yakSapuMgavaH
7015010a tato rAkSasarAjena tADito gadayA raNe
7015010c tasya tena prahAreNa mukuTaH pArzvam AgataH
7015010e tadA prabhRti yakSo 'sau pArzvamaulir iti smRtaH
7015011a tasmiMs tu vimukhe yakSe mANibhadre mahAtmani
7015011c saMnAdaH sumahAn rAma tasmiJ zaile vyavardhata
7015012a tato dUrAt pradadRze dhanAdhyakSo gadAdharaH
7015012c zukraproSTaHpadAbhyAM ca zaGkhapadmasamAvRtaH
7015013a sa dRSTvA bhrAtaraM saMkhye zApAd vibhraSTagauravam
7015013c uvAca vacanaM dhImAn yuktaM paitAmahe kule
7015014a mayA tvaM vAryamANo 'pi nAvagacchasi durmate
7015014c pazcAd asya phalaM prApya jJAsyase nirayaM gataH
7015015a yo hi mohAd viSaM pItvA nAvagacchati mAnavaH
7015015c pariNAme sa vi mUDho jAnIte karmaNaH phalam
7015016a daivatAni hi nandanti dharmayuktena kena cit
7015016c yena tvam IdRzaM bhAvaM nItas tac ca na budhyase
7015017a yo hi mAtqH pitqn bhrAtqn AcaryAMz cAvamanyate
7015017c sa pazyati phalaM tasya pretarAjavazaM gataH
7015018a adhruve hi zarIre yo na karoti tapo 'rjanam
7015018c sa pazcAt tapyate mUDho mRto dRSTvAtmano gatim
7015019a kasya cin na hi durbudhez chandato jAyate matiH
7015019c yAdRzaM kurute karma tAdRzaM phalam aznute
7015020a buddhiM rUpaM balaM vittaM putrAn mAhAtmyam eva ca
7015020c prapnuvanti narAH sarvaM svakRtaiH pUrvakarmabhiH
7015021a evaM nirayagAmI tvaM yasya te matir IdRzI
7015021c na tvAM samabhibhASiSye durvRttasyaiSa nirNayaH
7015022a evam uktvA tatas tena tasyAmAtyAH samAhatAH
7015022c mArIcapramukhAH sarve vimukhA vipradudruvuH
7015023a tatas tena dazagrIvo yakSendreNa mahAtmanA
7015023c gadayAbhihato mUrdhni na ca sthAnAd vyakampata
7015024a tatas tau rAma nighnantAv anyonyaM paramAhave
7015024c na vihvalau na ca zrAntau babhUvatur amarSaNaiH
7015025a Agneyam astraM sa tato mumoca dhanado raNe
7015025c vAruNena dazagrIvas tad astraM pratyavArayat
7015026a tato mAyAM praviSTaH sa rAkSasIM rAkSasezvaraH
7015026c jaghAna mUrdhni dhanadaM vyAvidhya mahatIM gadAm
7015027a evaM sa tenAbhihato vihvalaH zoNitokSitaH
7015027c kRttamUla ivAzoko nipapAta dhanAdhipaH
7015028a tataH padmAdibhis tatra nidhibhiH sa dhanAdhipaH
7015028c nandanaM vanam AnIya dhanado zvAsitas tadA
7015029a tato nirjitya taM rAma dhanadaM rAkSasAdhipaH
7015029c puSpakaM tasya jagrAha vimAnaM jayalakSaNam
7015030a kAJcanastambhasaMvItaM vaidUryamaNitoraNam
7015030c muktAjAlapraticchannaM sarvakAmaphaladrumam
7015031a tat tu rAjA samAruhya kAmagaM vIryanirjitam
7015031c jitvA vaizravaNaM devaM kailAsAd avarohata
7016001a sa jitvA bhrAtaraM rAma dhanadaM rAkSasAdhipaH
7016001c mahAsenaprasUtiM tu yayau zaravaNaM tataH
7016002a athApazyad dazagrIvo raukmaM zaravaNaM tadA
7016002c gabhastijAlasaMvItaM dvitIyam iva bhAskaram
7016003a parvataM sa samAsAdya kiM cid ramyavanAntaram
7016003c apazyat puSpakaM tatra rAma viSTambhitaM divi
7016004a viSTabdhaM puSpakaM dRSTvA kAmagaM hy agamaM kRtam
7016004c rAkSasaz cintayAm Asa sacivais taiH samAvRtaH
7016005a kim idaM yannimittaM me na ca gacchati puSpakam
7016005c parvatasyoparisthasya kasya karma tv idaM bhavet
7016006a tato 'bravId dazagrIvaM mArIco buddhikovidaH
7016006c naitan niSkAraNaM rAjan puSpako 'yaM na gacchati
7016007a tataH pArzvam upAgamya bhavasyAnucaro balI
7016007c nandIzvara uvAcedaM rAkSasendram azaGkitaH
7016008a nivartasva dazagrIva zaile krIDati zaMkaraH
7016009a suparNanAgayakSANAM daityadAnavarakSasAm
7016009c prANinAm eva sarveSAm agamyaH parvataH kRtaH
7016010a sa roSAt tAmranayanaH puSpakAd avaruhya ca
7016010c ko 'yaM zaMkara ity uktvA zailamUlam upAgamat
7016011a nandIzvaram athApazyad avidUrasthitaM prabhum
7016011c dIptaM zUlam avaSTabhya dvitIyam iva zaMkaram
7016012a sa vAnaramukhaM dRSTvA tam avajJAya rAkSasaH
7016012c prahAsaM mumuce maurkhyAt satoya iva toyadaH
7016013a saMkruddho bhagavAn nandI zaMkarasyAparA tanuH
7016013c abravId rAkSasaM tatra dazagrIvam upasthitam
7016014a yasmAd vAnaramUrtiM mAM dRSTvA rAkSasadurmate
7016014c maurkhyAt tvam avajAnISe parihAsaM ca muJcasi
7016015a tasmAn madrUpasaMyuktA madvIryasamatejasaH
7016015c utpatsyante vadhArthaM hi kulasya tava vAnarAH
7016016a kiM tv idAnIM mayA zakyaM kartuM yat tvAM nizAcara
7016016c na hantavyo hatas tvaM hi pUrvam eva svakarmabhiH
7016017a acintayitvA sa tadA nandivAkyaM nizAcaraH
7016017c parvataM taM samAsAdya vAkyam etad uvAca ha
7016018a puSpakasya gatiz chinnA yatkRte mama gacchataH
7016018c tad etac chailam unmUlaM karomi tava gopate
7016019a kena prabhAvena bhavas tatra krIDati rAjavat
7016019c vijJAtavyaM na jAnISe bhayasthAnam upasthitam
7016020a evam uktvA tato rAjan bhujAn prakSipya parvate
7016020c tolayAm Asa taM zailaM samRgavyAlapAdapam
7016021a tato rAma mahAdevaH prahasan vIkSya tatkRtam
7016021c pAdAGguSThena taM zailaM pIDayAm Asa lIlayA
7016022a tatas te pIDitAs tasya zailasyAdho gatA bhujAH
7016022c vismitAz cAbhavaMs tatra sacivAs tasya rakSasaH
7016023a rakSasA tena roSAc ca bhujAnAM pIDanAt tathA
7016023c mukto virAvaH sumahAMs trailokyaM yena pUritam
7016024a mAnuSAH zabdavitrastA menire lokasaMkSayam
7016024c devatAz cApi saMkSubdhAz calitAH sveSu karmasu
7016025a tataH prIto mahAdevaH zailAgre viSThitas tadA
7016025c muktvA tasya bhujAn rAjan prAha vAkyaM dazAnanam
7016026a prIto 'smi tava vIryAc ca zauNDIryAc ca nizAcara
7016026c ravato vedanA muktaH svaraH paramadAruNaH
7016027a yasmAl lokatrayaM tv etad rAvitaM bhayam Agatam
7016027c tasmAt tvaM rAvaNo nAma nAmnA tena bhaviSyasi
7016028a devatA mAnuSA yakSA ye cAnye jagatItale
7016028c evaM tvAm abhidhAsyanti rAvaNaM lokarAvaNam
7016029a gaccha paulastya visrabdhaH pathA yena tvam icchasi
7016029c mayA tvam abhyanujJAto rAkSasAdhipa gamyatAm
7016030a sAkSAn mahezvareNaivaM kRtanAmA sa rAvaNaH
7016030c abhivAdya mahAdevaM vimAnaM tat samAruhat
7016031a tato mahItale rAma paricakrAma rAvaNaH
7016031c kSatriyAn sumahAvIryAn bAdhamAnas tatas tataH
7017001a atha rAjan mahAbAhur vicaran sa mahItalam
7017001c himavadvanam AsAdya paricakrAma rAvaNaH
7017002a tatrApazyata vai kanyAM kRSTAjinajaTAdharAm
7017002c ArSeNa vidhinA yuktAM tapantIM devatAm iva
7017003a sa dRSTvA rUpasaMpannAM kanyAM tAM sumahAvratAm
7017003c kAmamohaparItAtmA papraccha prahasann iva
7017004a kim idaM vartase bhadre viruddhaM yauvanasya te
7017004c na hi yuktA tavaitasya rUpasyeyaM pratikriyA
7017005a kasyAsi duhitA bhadre ko vA bhartA tavAnaghe
7017005c pRcchataH zaMsa me zIghraM ko vA hetus tapo'rjane
7017006a evam uktA tu sA kanyA tenAnAryeNa rakSasA
7017006c abravId vidhivat kRtvA tasyAtithyaM tapodhanA
7017007a kuzadhvajo nAma pitA brahmarSir mama dhArmikaH
7017007c bRhaspatisutaH zrImAn buddhyA tulyo bRhaspateH
7017008a tasyAhaM kurvato nityaM vedAbhyAsaM mahAtmanaH
7017008c saMbhUtA vAnmayI kanyA nAmnA vedavatI smRtA
7017009a tato devAH sagandharvA yakSarAkSasapannagAH
7017009c te cApi gatvA pitaraM varaNaM rocayanti me
7017010a na ca mAM sa pitA tebhyo dattavAn rAkSasezvara
7017010c kAraNaM tad vadiSyAmi nizAmaya mahAbhuja
7017011a pitus tu mama jAmAtA viSNuH kila surottamaH
7017011c abhipretas trilokezas tasmAn nAnyasya me pitA
7017012a dAtum icchati dharmAtmA tac chrutvA baladarpitaH
7017012c zambhur nAma tato rAjA daityAnAM kupito 'bhavat
7017012e tena rAtrau prasupto me pitA pApena hiMsitaH
7017013a tato me jananI dInA tac charIraM pitur mama
7017013c pariSvajya mahAbhAgA praviSTA dahanaM saha
7017014a tato manorathaM satyaM pitur nArAyaNaM prati
7017014c karomIti mamecchA ca hRdaye sAdhu viSThitA
7017015a ahaM pretagatasyApi kariSye kAGkSitaM pituH
7017015c iti pratijJAm Aruhya carAmi vipulaM tapaH
7017016a etat te sarvam AkhyAtaM mayA rAkSasapuMgava
7017016c AzritAM viddhi mAM dharmaM nArAyaNapatIcchayA
7017017a vijJAtas tvaM hi me rAjan gaccha paulastyanandana
7017017c jAnAmi tapasA sarvaM trailokye yad dhi vartate
7017018a so 'bravId rAvaNas tatra tAM kanyAM sumahAvratAm
7017018c avaruhya vimAnAgrAt kandarpazarapIDitaH
7017019a avaliptAsi suzroNi yasyAs te matir IdRzI
7017019c vRddhAnAM mRgazAvAkSi bhrAjate dharmasaMcayaH
7017020a tvaM sarvaguNasaMpannA nArhase kartum IdRzam
7017020c trailokyasundarI bhIru yauvane vArdhakaM vidhim
7017021a kaz ca tAvad asau yaM tvaM viSNur ity abhibhASase
7017021c vIryeNa tapasA caiva bhogena ca balena ca
7017021e na mayAsau samo bhadre yaM tvaM kAmayase 'Ggane
7017022a mA maivam iti sA kanyA tam uvAca nizAcaram
7017022c mUrdhajeSu ca tAM rakSaH karAgreNa parAmRzat
7017023a tato vedavatI kruddhA kezAn hastena sAcchinat
7017023c uvAcAgniM samAdhAya maraNAya kRtatvarA
7017024a dharSitAyAs tvayAnArya nedAnIM mama jIvitam
7017024c rakSas tasmAt pravekSyAmi pazyatas te hutAzanam
7017025a yasmAt tu dharSitA cAham apApA cApy anAthavat
7017025c tasmAt tava vadhArthaM vai samutpatsyAmy ahaM punaH
7017026a na hi zakyaH striyA pApa hantuM tvaM tu vizeSataH
7017026c zApe tvayi mayotsRSTe tapasaz ca vyayo bhavet
7017027a yadi tv asti mayA kiM cit kRtaM dattaM hutaM tathA
7017027c tena hy ayonijA sAdhvI bhaveyaM dharmiNaH sutA
7017028a evam uktvA praviSTA sA jvalantaM vai hutAzanam
7017028c papAta ca divo divyA puSpavRSTiH samantataH
7017029a pUrvaM krodhahataH zatrur yayAsau nihatas tvayA
7017029c samupAzritya zailAbhaM tava vIryam amAnuSam
7017030a evam eSA mahAbhAgA martyeSUtpadyate punaH
7017030c kSetre halamukhagraste vedyAm agnizikhopamA
7017031a eSA vedavatI nAma pUrvam AsIt kRte yuge
7017031c tretAyugam anuprApya vadhArthaM tasya rakSasaH
7017031e sItotpanneti sItaiSA mAnuSaiH punar ucyate
7018001a praviSTAyAM hutAzaM tu vedavatyAM sa rAvaNaH
7018001c puSpakaM tat samAruhya paricakrAma medinIm
7018002a tato maruttaM nRpatiM yajantaM saha daivataiH
7018002c uzIrabIjam AsAdya dadarza sa tu rAkSasaH
7018003a saMvarto nAma brahmarSir bhrAtA sAkSAd bRhaspateH
7018003c yAjayAm Asa dharmajJaH sarvair brahmagaNair vRtaH
7018004a dRSTvA devAs tu tad rakSo varadAnena durjayam
7018004c tAM tAM yoniM samApannAs tasya dharSaNabhIravaH
7018005a indro mayUraH saMvRtto dharmarAjas tu vAyasaH
7018005c kRkalAso dhanAdhyakSo haMso vai varuNo 'bhavat
7018006a taM ca rAjAnam AsAdya rAvaNo rAkSasAdhipaH
7018006c prAha yuddhaM prayacceti nirjito 'smIti vA vada
7018007a tato marutto nRpatiH ko bhavAn ity uvAca tam
7018007c avahAsaM tato muktvA rAkSaso vAkyam abravIt
7018008a akutUhalabhAvena prIto 'smi tava pArthiva
7018008c dhanadasyAnujaM yo mAM nAvagacchasi rAvaNam
7018009a triSu lokeSu kaH so 'sti yo na jAnAti me balam
7018009c bhrAtaraM yena nirjitya vimAnam idam AhRtam
7018010a tato marutto nRpatis taM rAkSasam athAbravIt
7018010c dhanyaH khalu bhavAn yena jyeSTho bhrAtA raNe jitaH
7018011a nAdharmasahitaM zlAghyaM na lokapratisaMhitam
7018011c karma daurAtmyakaM kRtvA zlAghase bhrAtRnirjayAt
7018012a kiM tvaM prAk kevalaM dharmaM caritvA labdhavAn varam
7018012c zrutapUrvaM hi na mayA yAdRzaM bhASase svayam
7018013a tataH zarAsanaM gRhya sAyakAMz ca sa pArthivaH
7018013c raNAya niryayau kruddhaH saMvarto mArgam AvRNot
7018014a so 'bravIt snehasaMyuktaM maruttaM taM mahAn RSiH
7018014c zrotavyaM yadi madvAkyaM saMprahAro na te kSamaH
7018015a mAhezvaram idaM satram asamAptaM kulaM dahet
7018015c dIkSitasya kuto yuddhaM krUratvaM dIkSite kutaH
7018016a saMzayaz ca raNe nityaM rAkSasaz caiSa durjayaH
7018016c sa nivRtto guror vAkyAn maruttaH pRthivIpatiH
7018016e visRjya sazaraM cApaM svastho makhamukho 'bhavat
7018017a tatas taM nirjitaM matvA ghoSayAm Asa vai zukaH
7018017c rAvaNo jitavAMz ceti harSAn nAdaM ca muktavAn
7018018a tAn bhakSayitvA tatrasthAn maharSIn yajJam AgatAn
7018018c vitRpto rudhirais teSAM punaH saMprayayau mahIm
7018019a rAvaNe tu gate devAH sendrAz caiva divaukasaH
7018019c tataH svAM yonim AsAdya tAni sattvAny athAbruvan
7018020a harSAt tadAbravId indro mayUraM nIlabarhiNam
7018020c prIto 'smi tava dharmajJa upakArAd vihaMgama
7018021a mama netrasahasraM yat tat te barhe bhaviSyati
7018021c varSamANe mayi mudaM prApsyase prItilakSaNam
7018022a nIlAH kila purA barhA mayUrANAM narAdhipa
7018022c surAdhipAd varaM prApya gatAH sarve vicitratAm
7018023a dharmarAjo 'bravId rAma prAgvaMze vAyasaM sthitam
7018023c pakSiMs tavAsmi suprItaH prItasya ca vacaH zRNu
7018024a yathAnye vividhai rogaiH pIDyante prANino mayA
7018024c te na te prabhaviSyanti mayi prIte na saMzayaH
7018025a mRtyutas te bhayaM nAsti varAn mama vihaMgama
7018025c yAvat tvAM na vadhiSyanti narAs tAvad bhaviSyasi
7018026a ye ca madviSayasthAs tu mAnavAH kSudhayArditAH
7018026c tvayi bhukte tu tRptAs te bhaviSyanti sabAndhavAH
7018027a varuNas tv abravId dhaMsaM gaGgAtoyavicAriNam
7018027c zrUyatAM prItisaMyuktaM vacaH patrarathezvara
7018028a varNo manoharaH saumyaz candramaNDalasaMnibhaH
7018028c bhaviSyati tavodagraH zuklaphenasamaprabhaH
7018029a maccharIraM samAsAdya kAnto nityaM bhaviSyasi
7018029c prApsyase cAtulAM prItim etan me prItilakSaNam
7018030a haMsAnAM hi purA rAma na varNaH sarvapANDuraH
7018030c pakSA nIlAgrasaMvItAH kroDAH zaSpAgranirmalAH
7018031a athAbravId vaizravaNaH kRkalAsaM girau sthitam
7018031c hairaNyaM saMprayacchAmi varNaM prItis tavApy aham
7018032a sadravyaM ca ziro nityaM bhaviSyati tavAkSayam
7018032c eSa kAJcanako varNo matprItyA te bhaviSyati
7018033a evaM dattvA varAMs tebhyas tasmin yajJotsave surAH
7018033c nivRtte saha rAjJA vai punaH svabhavanaM gatAH
7019001a atha jitvA maruttaM sa prayayau rAkSasAdhipaH
7019001c nagarANi narendrANAM yuddhakAGkSI dazAnanaH
7019002a sa samAsAdya rAjendrAn mahendravaruNopamAn
7019002c abravId rAkSasendras tu yuddhaM me dIyatAm iti
7019003a nirjitAH smeti vA brUta eSo hi mama nizcayaH
7019003c anyathA kurvatAm evaM mokSo vo nopapadyate
7019004a tatas tu bahavaH prAjJAH pArthivA dharmaNizcayAH
7019004c nirjitAH smety abhASanta jJAtvA varabalaM ripoH
7019005a duSyantaH suratho gAdhir gayo rAjA purUravAH
7019005c ete sarve 'bruvaMs tAta nirjitAH smeti pArthivAH
7019006a athAyodhyAM samAsAdya rAvaNo rAkSasAdhipaH
7019006c suguptAm anaraNyena zakreNevAmarAvatIm
7019007a prAha rAjAnam AsAdya yuddhaM me saMpradIyatAm
7019007c nirjito 'smIti vA brUhi mamaitad iha zAsanam
7019008a anaraNyaH susaMkruddho rAkSasendram athAbravIt
7019008c dIyate dvandvayuddhaM te rAkSasAdhipate mayA
7019009a atha pUrvaM zrutArthena sajjitaM sumahad dhi yat
7019009c niSkrAmat tan narendrasya balaM rakSovadhodyatam
7019010a nAgAnAM bahusAhasraM vAjinAm ayutaM tathA
7019010c mahIM saMchAdya niSkrAntaM sapadAtirathaM kSaNAt
7019011a tad rAvaNabalaM prApya balaM tasya mahIpateH
7019011c prANazyata tadA rAjan havyaM hutam ivAnale
7019012a so 'pazyata narendras tu nazyamAnaM mahad balam
7019012c mahArNavaM samAsAdya yathA paJcApagA jalam
7019013a tataH zakradhanuHprakhyaM dhanur visphArayan svayam
7019013c AsadAda narendrAs taM rAvaNaM krodhamUrchitaH
7019014a tato bANazatAny aSTau pAtayAm Asa mUrdhani
7019014c tasya rAkSasarAjasya ikSvAkukulanandanaH
7019015a tasya bANAH patantas te cakrire na kSataM kva cit
7019015c vAridhArA ivAbhrebhyaH patantyo nagamUrdhani
7019016a tato rAkSasarAjena kruddhena nRpatis tadA
7019016c talena bhihato mUrdhni sa rathAn nipapAta ha
7019017a sa rAjA patito bhUmau vihvalAGgaH pravepitaH
7019017c vajradagdha ivAraNye sAlo nipatito mahAn
7019018a taM prahasyAbravId rakSa ikSvAkuM pRthivIpatim
7019018c kim idAnIM tvayA prAptaM phalaM mAM prati yudhyatA
7019019a trailokye nAsti yo dvandvaM mama dadyAn narAdhipa
7019019c zaGke pramatto bhogeSu na zRNoSi balaM mama
7019020a tasyaivaM bruvato rAjA mandAsur vAkyam abravIt
7019020c kiM zakyam iha kartuM vai yat kAlo duratikramaH
7019021a na hy ahaM nirjito rakSas tvayA cAtmaprazaMsinA
7019021c kAleneha vipanno 'haM hetubhUtas tu me bhavAn
7019022a kiM tv idAnIM mayA zakyaM kartuM prANaparikSaye
7019022c ikSvAkuparibhAvitvAd vaco vakSyAmi rAkSasa
7019023a yadi dattaM yadi hutaM yadi me sukRtaM tapaH
7019023c yadi guptAH prajAH samyak tathA satyaM vaco 'stu me
7019024a utpatsyate kule hy asminn ikSvAkUNAM mahAtmanAm
7019024c rAjA paramatejasvI yas te prANAn hariSyati
7019025a tato jaladharodagras tADito devadundubhiH
7019025c tasminn udAhRte zApe puSpavRSTiz ca khAc cyutA
7019026a tataH sa rAjA rAjendra gataH sthAnaM triviSTapam
7019026c svargate ca nRpe rAma rAkSasaH sa nyavartata
7020001a tato vitrAsayan martyAn pRthivyAM rAkSasAdhipaH
7020001c AsasAda ghane tasmin nAradaM munisattamam
7020002a nAradas tu mahAtejA devarSir amitaprabhaH
7020002c abravIn meghapRSThastho rAvaNaM puSpake sthitam
7020003a rAkSasAdhipate saumya tiSTha vizravasaH suta
7020003c prIto 'smy abhijanopeta vikramair Urjitais tava
7020004a viSNunA daityaghAtaiz ca tArkSyasyoragadharSaNaiH
7020004c tvayA samaramardaiz ca bhRzaM hi paritoSitaH
7020005a kiM cid vakSyAmi tAvat te zrotavyaM zroSyase yadi
7020005c zrutvA cAnantaraM kAryaM tvayA rAkSasapuMgava
7020006a kim ayaM vadhyate lokas tvayAvadhyena daivataiH
7020006c hata eva hy ayaM loko yadA mRtyuvazaM gataH
7020007a pazya tAvan mahAbAho rAkSasezvaramAnuSam
7020007c lokam enaM vicitrArthaM yasya na jJAyate gatiH
7020008a kva cid vAditranRttAni sevyante muditair janaiH
7020008c rudyate cAparair Artair dhArAzrunayanAnanaiH
7020009a mAtA pitRsutasnehair bhAryA bandhumanoramaiH
7020009c mohenAyaM jano dhvastaH klezaM svaM nAvabudhyate
7020010a tat kim evaM pariklizya lokaM mohanirAkRtam
7020010c jita eva tvayA saumya martyaloko na saMzayaH
7020011a evam uktas tu laGkezo dIpyamAna ivaujasA
7020011c abravIn nAradaM tatra saMprahasyAbhivAdya ca
7020012a maharSe devagandharvavihAra samarapriya
7020012c ahaM khalUdyato gantuM vijayArthI rasAtalam
7020013a tato lokatrayaM jitvA sthApya nAgAn surAn vaze
7020013c samudram amRtArthaM vai mathiSyAmi rasAlayam
7020014a athAbravId dazagrIvaM nArado bhagavAn RSiH
7020014c kva khalv idAnIM mArgeNa tvayAnena gamiSyate
7020015a ayaM khalu sudurgamyaH pitRrAjJaH puraM prati
7020015c mArgo gacchati durdharSo yamasyAmitrakarzana
7020016a sa tu zAradameghAbhaM muktvA hAsaM dazAnanaH
7020016c uvAca kRtam ity eva vacanaM cedam abravIt
7020017a tasmAd eSa mahAbrahman vaivasvatavadhodyataH
7020017c gacchAmi dakSiNAm AzAM yatra sUryAtmajo nRpaH
7020018a mayA hi bhagavan krodhAt pratijJAtaM raNArthinA
7020018c avajeSyAmi caturo lokapAlAn iti prabho
7020019a tenaiSa prasthito 'haM vai pitRrAjapuraM prati
7020019c prANisaMklezakartAraM yojayiSyAmi mRtyunA
7020020a evam uktvA dazagrIvo muniM tam abhivAdya ca
7020020c prayayau dakSiNAm AzAM prahRSTaiH saha mantribhiH
7020021a nAradas tu mahAtejA muhUrtaM dhyAnam AsthitaH
7020021c cintayAm Asa viprendro vidhUma iva pAvakaH
7020022a yena lokAs trayaH sendrAH klizyante sacarAcarAH
7020022c kSINe cAyuSi dharme ca sa kAlo hiMsyate katham
7020023a yasya nityaM trayo lokA vidravanti bhayArditAH
7020023c taM kathaM rAkSasendro 'sau svayam evAbhigacchati
7020024a yo vidhAtA ca dhAtA ca sukRte duSkRte yathA
7020024c trailokyaM vijitaM yena taM kathaM nu vijeSyati
7020025a aparaM kiM nu kRtvaivaM vidhAnaM saMvidhAsyati
7020025c kautUhalasamutpanno yAsyAmi yamasAdanam
7021001a evaM saMcintya viprendro jagAma laghuvikramaH
7021001c AkhyAtuM tad yathAvRttaM yamasya sadanaM prati
7021002a apazyat sa yamaM tatra devam agnipuraskRtam
7021002c vidhAnam upatiSThantaM prANino yasya yAdRzam
7021003a sa tu dRSTvA yamaH prAptaM maharSiM tatra nAradam
7021003c abravIt sukham AsInam arghyam Avedya dharmataH
7021004a kaccit kSemaM nu devarSe kaccid dharmo na nazyati
7021004c kim AgamanakRtyaM te devagandharvasevita
7021005a abravIt tu tadA vAkyaM nArado bhagavAn RSiH
7021005c zrUyatAm abhidhAsyAmi vidhAnaM ca vidhIyatAm
7021006a eSa nAmnA dazagrIvaH pitRrAja nizAcaraH
7021006c upayAti vazaM netuM vikramais tvAM sudurjayam
7021007a etena kAraNenAhaM tvarito 'smy AgataH prabho
7021007c daNDapraharaNasyAdya tava kiM nu kariSyati
7021008a etasminn antare dUrAd aMzumantam ivoditam
7021008c dadRze divyam AyAntaM vimAnaM tasya rakSasaH
7021009a taM dezaM prabhayA tasya puSpakasya mahAbalaH
7021009c kRtvA vitimiraM sarvaM samIpaM samavartata
7021010a sa tv apazyan mahAbAhur dazagrIvas tatas tataH
7021010c prANinaH sukRtaM karma bhuJjAnAMz caiva duSkRtam
7021011a tatas tAn vadhyamAnAMs tu karmabhir duSkRtaiH svakaiH
7021011c rAvaNo mocayAm Asa vikrameNa balAd balI
7021012a preteSu mucyamAneSu rAkSasena balIyasA
7021012c pretagopAH susaMrabdhA rAkSasendram abhidravan
7021013a te prAsaiH parighaiH zUlair mudgaraiH zaktitomaraiH
7021013c puSpakaM samavarSanta zUrAH zatasahasrazaH
7021014a tasyAsanAni prAsAdAn vedikAstaraNAni ca
7021014c puSpakasya babhaJjus te zIghraM madhukarA iva
7021015a devaniSThAnabhUtaM tad vimAnaM puSpakaM mRdhe
7021015c bhajyamAnaM tathaivAsId akSayaM brahmatejasA
7021016a tatas te rAvaNAmAtyA yathAkAmaM yathAbalam
7021016c ayudhyanta mahAvIryAH sa ca rAjA dazAnanaH
7021017a te tu zoNitadigdhAGgAH sarvazastrasamAhatAH
7021017c amAtyA rAkSasendrasya cakrur AyodhanaM mahat
7021018a anyonyaM ca mahAbhAgA jaghnuH praharaNair yudhi
7021018c yamasya ca mahat sainyaM rAkSasasya ca mantriNaH
7021019a amAtyAMs tAMs tu saMtyajya rAkSasasya mahaujasaH
7021019c tam eva samadhAvanta zUlavarSair dazAnanam
7021020a tataH zoNitadigdhAGgaH prahArair jarjarIkRtaH
7021020c vimAne rAkSasazreSThaH phullAzoka ivAbabhau
7021021a sa zUlAni gadAH prAsAJ zaktitomarasAyakAn
7021021c musalAni zilAvRkSAn mumocAstrabalAd balI
7021022a tAMs tu sarvAn samAkSipya tad astram apahatya ca
7021022c jaghnus te rAkSasaM ghoram ekaM zatasahasrakaH
7021023a parivArya ca taM sarve zailaM meghotkarA iva
7021023c bhindipAlaiz ca zUlaiz ca nirucchvAsam akArayan
7021024a vimuktakavacaH kruddho siktaH zoNitavisravaiH
7021024c sa puSpakaM parityajya pRthivyAm avatiSThata
7021025a tataH sa kArmukI bANI pRthivyAM rAkSasAdhipaH
7021025c labdhasaMjJo muhUrtena kruddhas tasthau yathAntakaH
7021026a tataH pAzupataM divyam astraM saMdhAya kArmuke
7021026c tiSTha tiSTheti tAn uktvA tac cApaM vyapakarSata
7021027a jvAlAmAlI sa tu zaraH kravyAdAnugato raNe
7021027c mukto gulmAn drumAMz caiva bhasmakRtvA pradhAvati
7021028a te tasya tejasA dagdhAH sainyA vaivasvatasya tu
7021028c raNe tasmin nipatitA dAvadagdhA nagA iva
7021029a tataH sa sacivaiH sArdhaM rAkSaso bhImavikramaH
7021029c nanAda sumahAnAdaM kampayann iva medinIm
7022001a sa tu tasya mahAnAdaM zrutvA vaivasvato yamaH
7022001c zatruM vijayinaM mene svabalasya ca saMkSayam
7022002a sa tu yodhAn hatAn matvA krodhaparyAkulekSaNaH
7022002c abravIt tvaritaM sUtaM rathaH samupanIyatAm
7022003a tasya sUto rathaM divyam upasthApya mahAsvanam
7022003c sthitaH sa ca mahAtejA Aruroha mahAratham
7022004a pAzamudgarahastaz ca mRtyus tasyAgrato sthitaH
7022004c yena saMkSipyate sarvaM trailokyaM sacarAcaram
7022005a kAladaNDaz ca pArzvastho mUrtimAn syandane sthitaH
7022005c yamapraharaNaM divyaM prajvalann iva tejasA
7022006a tato lokAs trayas trastAH kampante ca divaukasaH
7022006c kAlaM kruddhaM tadA dRSTvA lokatrayabhayAvaham
7022007a dRSTvA tu te taM vikRtaM rathaM mRtyusamanvitam
7022007c sacivA rAkSasendrasya sarvalokabhayAvaham
7022008a laghusattvatayA sarve naSTasaMjJA bhayArditAH
7022008c nAtra yoddhuM samarthAH sma ity uktvA vipradudruvuH
7022009a sa tu taM tAdRzaM dRSTvA rathaM lokabhayAvaham
7022009c nAkSubhyata tadA rakSo vyathA caivAsya nAbhavat
7022010a sa tu rAvaNam AsAdya visRjaJ zaktitomarAn
7022010c yamo marmANi saMkruddho rAkSasasya nyakRntata
7022011a rAvaNas tu sthitaH svasthaH zaravarSaM mumoca ha
7022011c tasmin vaivasvatarathe toyavarSam ivAmbudaH
7022012a tato mahAzaktizataiH pAtyamAnair mahorasi
7022012c pratikartuM sa nAzaknod rAkSasaH zalyapIDitaH
7022013a nAnApraharaNair evaM yamenAmitrakarzinA
7022013c saptarAtraM kRte saMkhye na bhagno vijito 'pi vA
7022014a tato 'bhavat punar yuddhaM yamarAkSasayos tadA
7022014c vijayAkAGkSiNos tatra samareSv anivartinoH
7022015a tato devAH sagandharvAH siddhAz ca paramarSayaH
7022015c prajApatiM puraskRtya dadRzus tad raNAjiram
7022016a saMvarta iva lokAnAm abhavad yudhyatos tayoH
7022016c rAkSasAnAM ca mukhyasya pretAnAm Izvarasya ca
7022017a rAkSasendras tataH kruddhaz cApam Ayamya saMyuge
7022017c nirantaram ivAkAzaM kurvan bANAn mumoca ha
7022018a mRtyuM caturbhir vizikhaiH sUtaM saptabhir ardayat
7022018c yamaM zarasahasreNa zIghraM marmasv atADayat
7022019a tataH kruddhasya sahasA yamasyAbhiviniHsRtaH
7022019c jvAlAmAlo vinizvAso vadanAt krodhapAvakaH
7022020a tato 'pazyaMs tadAzcaryaM devadAnavarAkSasAH
7022020c krodhajaM pAvakaM dIptaM didhakSantaM ripor balam
7022021a mRtyus tu paramakruddho vaivasvatam athAbravIt
7022021c muJca mAM deva zIghraM tvaM nihanmi samare ripum
7022022a narakaH zambaro vRtraH zambhuH kArtasvaro balI
7022022c namucir virocanaz caiva tAv ubhau madhukaiTabhau
7022023a ete cAnye ca bahavo balavanto durAsadAH
7022023c vinipannA mayA dRSTAH kA cintAsmin nizAcare
7022024a muJca mAM sAdhu dharmajJa yAvad enaM nihanmy aham
7022024c na hi kaz cin mayA dRSTo muhUrtam api jIvati
7022025a balaM mama na khalv etan maryAdaiSA nisargataH
7022025c saMspRSTo hi mayA kaz cin na jIved iti nizcayaH
7022026a etat tu vacanaM zrutvA dharmarAjaH pratApavAn
7022026c abravIt tatra taM mRtyumayam enaM nihanmy aham
7022027a tataH saMraktanayanaH kruddho vaivasvataH prabhuH
7022027c kAladaNDam amoghaM taM tolayAm Asa pANinA
7022028a yasya pArzveSu nizchidrAH kAlapAzAH pratiSThitAH
7022028c pAvakasparzasaMkAzo mudgaro mUrtimAn sthitaH
7022029a darzanAd eva yaH prANAn prANinAm uparudhyati
7022029c kiM punas tADanAd vApi pIDanAd vApi dehinaH
7022030a sa jvAlAparivAras tu pibann iva nizAcaram
7022030c karaspRSTo balavatA daNDaH kruddhaH sudAruNaH
7022031a tato vidudruvuH sarve sattvAs tasmAd raNAjirAt
7022031c surAz ca kSubhitA dRSTvA kAladaNDodyataM yamam
7022032a tasmin prahartukAme tu daNDam udyamya rAvaNam
7022032c yamaM pitAmahaH sAkSAd darzayitvedam abravIt
7022033a vaivasvata mahAbAho na khalv atulavikrama
7022033c prahartavyaM tvayaitena daNDenAsmin nizAcare
7022034a varaH khalu mayA dattas tasya tridazapuMgava
7022034c tat tvayA nAnRtaM kAryaM yan mayA vyAhRtaM vacaH
7022035a amogho hy eSa sarvAsAM prajAnAM vinipAtane
7022035c kAladaNDo mayA sRSTaH pUrvaM mRtyupuraskRtaH
7022036a tan na khalv eSa te saumya pAtyo rAkSasamUrdhani
7022036c na hy asmin patite kaz cin muhUrtam api jIvati
7022037a yadi hy asmin nipatite na mriyetaiSa rAkSasaH
7022037c mriyeta vA dazagrIvas tathApy ubhayato 'nRtam
7022038a rAkSasendrAn niyacchAdya daNDam enaM vadhodyatam
7022038c satyaM mama kuruSvedaM lokAMs tvaM samavekSya ca
7022039a evam uktas tu dharmAtmA pratyuvAca yamas tadA
7022039c eSa vyAvartito daNDaH prabhaviSNur bhavAn hi naH
7022040a kiM tv idAnIM mayA zakyaM kartuM raNagatena hi
7022040c yan mayA yan na hantavyo rAkSaso varadarpitaH
7022041a eSa tasmAt praNazyAmi darzanAd asya rakSasaH
7022041c ity uktvA sarathaH sAzvas tatraivAntaradhIyata
7022042a dazagrIvas tu taM jitvA nAma vizrAvya cAtmanaH
7022042c puSpakeNa tu saMhRSTo niSkrAnto yamasAdanAt
7022043a tato vaivasvato devaiH saha brahmapurogamaiH
7022043c jagAma tridivaM hRSTo nAradaz ca mahAmuniH
7023001a sa tu jitvA dazagrIvo yamaM tridazapuMgavam
7023001c rAvaNas tu jayazlAghI svasahAyAn dadarza ha
7023002a jayena vardhayitvA ca mArIcapramukhAs tataH
7023002c puSpakaM bhejire sarve sAntvitA ravaNena ha
7023003a tato rasAtalaM hRSTaH praviSTaH payaso nidhim
7023003c daityoraga gaNAdhyuSTaM varuNena surakSitam
7023004a sa tu bhogavatIM gatvA purIM vAsukipAlitAm
7023004c sthApya nAgAn vaze kRtvA yayau maNimatIM purIm
7023005a nivAtakavacAs tatra daityA labdhavarA vasan
7023005c rAkSasas tAn samAsAdya yuddhena samupAhvayat
7023006a te tu sarve suvikrAntA daiteyA balazAlinaH
7023006c nAnApraharaNAs tatra prayuddhA yuddhadurmadAH
7023007a teSAM tu yudhyamAnAnAM sAgraH saMvatsaro gataH
7023007c na cAnyatarayos tatra vijayo vA kSayo 'pi vA
7023008a tataH pitAmahas tatra trailokyagatir avyayaH
7023008c AjagAma drutaM devo vimAnavaram AsthitaH
7023009a nivAtakavacAnAM tu nivArya raNakarma tat
7023009c vRddhaH pitAmaho vAkyam uvAca viditArthavat
7023010a na hy ayaM rAvaNo yuddhe zakyo jetuM surAsuraiH
7023010c na bhavantaH kSayaM netuM zakyAH sendraiH surAsuraiH
7023011a rAkSasasya sakhitvaM vai bhavadbhiH saha rocate
7023011c avibhaktA hi sarvArthAH suhRdAM nAtra saMzayaH
7023012a tato 'gnisAkSikaM sakhyaM kRtavAMs tatra rAvaNaH
7023012c nivAtakavacaiH sArdhaM prItimAn abhavat tadA
7023013a arcitas tair yathAnyAyaM saMvatsarasukhoSitaH
7023013c svapurAn nirvizeSaM ca pUjAM prApto dazAnanaH
7023014a sa tUpadhArya mAyAnAM zatam ekonam AtmavAn
7023014c salilendrapurAnveSI sa babhrAma rasAtalam
7023015a tato 'zmanagaraM nAma kAlakeyAbhirakSitam
7023015c taM vijitya muhUrtena jaghne daityAMz catuHzatam
7023016a tataH pANDurameghAbhaM kailAsam iva saMsthitam
7023016c varuNasyAlayaM divyam apazyad rAkSasAdhipaH
7023017a kSarantIM ca payo nityaM surabhiM gAm avasthitAm
7023017c yasyAH payoviniSyandAt kSIrodo nAma sAgaraH
7023018a yasmAc candraH prabhavati zItarazmiH prajAhitaH
7023018c yaM samAsAdya jIvanti phenapAH paramarSayaH
7023018e amRtaM yatra cotpannaM surA cApi surAzinAm
7023019a yAM bruvanti narA loke surabhiM nAma nAmataH
7023019c pradakSiNaM tu tAM kRtvA rAvaNaH paramAdbhutAm
7023019e praviveza mahAghoraM guptaM bahuvidhair balaiH
7023020a tato dhArAzatAkIrNaM zAradAbhranibhaM tadA
7023020c nityaprahRSTaM dadRze varuNasya gRhottamam
7023021a tato hatvA balAdhyakSAn samare taiz ca tADitaH
7023021c abravIt kva gato yo vo rAjA zIghraM nivedyatAm
7023022a yuddhArthI rAvaNaH prAptas tasya yuddhaM pradIyatAm
7023022c vada vA na bhayaM te 'sti nirjito 'smIti sAJjaliH
7023023a etasminn antare kruddhA varuNasya mahAtmanaH
7023023c putrAH pautrAz ca niSkrAman gauz ca puSkara eva ca
7023024a te tu vIryaguNopetA balaiH parivRtAH svakaiH
7023024c yuktvA rathAn kAmagamAn udyadbhAskaravarcasaH
7023025a tato yuddhaM samabhavad dAruNaM lomaharSaNam
7023025c salilendrasya putrANAM rAvaNasya ca rakSasaH
7023026a amAtyais tu mahAvIryair dazagrIvasya rakSasaH
7023026c vAruNaM tad balaM kRtsnaM kSaNena vinipAtitam
7023027a samIkSya svabalaM saMkhye varuNasyA sutAs tadA
7023027c arditAH zarajAlena nivRttA raNakarmaNaH
7023028a mahItalagatAs te tu rAvaNaM dRzya puSpake
7023028c AkAzam Azu vivizuH syandanaiH zIghragAmibhiH
7023029a mahad AsIt tatas teSAM tulyaM sthAnam avApya tat
7023029c AkAzayuddhaM tumulaM devadAnavayor iva
7023030a tatas te rAvaNaM yuddhe zaraiH pAvakasaMnibhaiH
7023030c vimukhIkRtya saMhRSTA vinedur vividhAn ravAn
7023031a tato mahodaraH kruddho rAjAnaM dRzya dharSitam
7023031c tyaktvA mRtyubhayaM vIro yuddhakAGkSI vyalokayat
7023032a tena teSAM hayA ye ca kAmagAH pavanopamAH
7023032c mahodareNa gadayA hatAs te prayayuH kSitim
7023033a teSAM varuNasUnUnAM hatvA yodhAn hayAMz ca tAn
7023033c mumocAzu mahAnAdaM virathAn prekSya tAn sthitAn
7023034a te tu teSAM rathAH sAzvAH saha sArathibhir varaiH
7023034c mahodareNa nihatAH patitAH pRthivItale
7023035a te tu tyaktvA rathAn putrA varuNasya mahAtmanaH
7023035c AkAze viSThitAH zUrAH svaprabhAvAn na vivyathuH
7023036a dhanUMSi kRtvA sajyAni vinirbhidya mahodaram
7023036c rAvaNaM samare kruddhAH sahitAH samabhidravan
7023037a tataH kruddho dazagrIvaH kAlAgnir iva viSThitaH
7023037c zaravarSaM mahAvegaM teSAM marmasv apAtayat
7023038a musalAni vicitrANi tato bhallazatAni ca
7023038c paTTasAMz caiva zaktIz ca zataghnIs tomarAMs tathA
7023038e pAtayAm Asa durdharSas teSAm upari viSThitaH
7023039a atha viddhAs tu te vIrA viniSpetuH padAtayaH
7023040a tato rakSo mahAnAdaM muktvA hanti sma vAruNAn
7023040c nAnApraharaNair ghorair dhArApAtair ivAmbudaH
7023041a tatas te vimukhAH sarve patitA dharaNItale
7023041c raNAt svapuruSaiH zIghraM gRhANy eva pravezitAH
7023042a tAn abravIt tato rakSo varuNAya nivedyatAm
7023042c rAvaNaM cAbravIn mantrI prabhAso nAma vAruNaH
7023043a gataH khalu mahAtejA brahmalokaM jalezvaraH
7023043c gAndharvaM varuNaH zrotuM yaM tvam Ahvayase yudhi
7023044a tat kiM tava vRthA vIra parizrAmya gate nRpe
7023044c ye tu saMnihitA vIrAH kumArAs te parAjitAH
7023045a rAkSasendras tu tac chrutvA nAma vizrAvya cAtmanaH
7023045c harSAn nAdaM vimuJcan vai niSkrAnto varuNAlayAt
7023046a Agatas tu pathA yena tenaiva vinivRtya saH
7023046c laGkAm abhimukho rakSo nabhastalagato yayau
7024001a nivartamAnaH saMhRSTo rAvaNaH sa durAtmavAn
7024001c jahre pathi narendrarSidevagandharvakanyakAH
7024002a darzanIyAM hi yAM rakSaH kanyAM strIM vAtha pazyati
7024002c hatvA bandhujanaM tasyA vimAne saMnyavezayat
7024003a tatra pannagayakSANAM mAnuSANAM ca rakSasAm
7024003c daityAnAM dAnavAnAM ca kanyA jagrAha rAvaNaH
7024004a dIrghakezyaH sucArvaGgyaH pUrNacandranibhAnanAH
7024004c zokAyattAs taruNyaz ca samastA stananamritAH
7024005a tulyam agnyarciSAM tatra zokAgnibhayasaMbhavam
7024005c pravepamAnA duHkhArtA mumucur bASpajaM jalam
7024006a tAsAM nizvasamAnAnAM nizvasaiH saMpradIpitam
7024006c agnihotram ivAbhAti saMniruddhAgnipuSpakam
7024007a kA cid dadhyau suduHkhArtA hanyAd api hi mAm ayam
7024007c smRtvA mAtqH pitqn bhrAtqn putrAn vai zvazurAn api
7024007e duHkhazokasamAviSTA vilepuH sahitAH striyaH
7024008a kathaM nu khalu me putraH kariSyati mayA vinA
7024008c kathaM mAtA kathaM bhrAtA nimagnAH zokasAgare
7024009a hA kathaM nu kariSyAmi bhartAraM daivataM vinA
7024009c mRtyo prasIda yAce tvAM naya mAM yamasAdanam
7024010a kiM nu me duSkRtaM karma kRtaM dehAntare purA
7024010c tato 'smi dharSitAnena patitA zokasAgare
7024011a na khalv idAnIM pazyAmi duHkhasyAntam ihAtmanaH
7024011c aho dhin mAnuSA&l lokAn nAsti khalv adhamaH paraH
7024012a yad durbalA balavatA bAndhavA rAvaNena me
7024012c uditenaiva sUryeNa tArakA iva nAzitAH
7024013a aho subalavad rakSo vadhopAyeSu rajyate
7024013c aho durvRttam AtmAnaM svayam eva na budhyate
7024014a sarvathA sadRzas tAvad vikramo 'sya durAtmanaH
7024014c idaM tv asadRzaM karma paradArAbhimarzanam
7024015a yasmAd eSa parakhyAsu strISu rajyati durmatiH
7024015c tasmAd dhi strIkRtenaiva vadhaM prApsyati rAvaNaH
7024016a zaptaH strIbhiH sa tu tadA hatatejAH suniSprabha
7024016c pativratAbhiH sAdhvIbhiH sthitAbhiH sAdhuvartmani
7024017a evaM vilapamAnAsu rAvaNo rAkSasAdhipaH
7024017c praviveza purIM laGkAM pUjyamAno nizAcaraiH
7024018a tato rAkSasarAjasya svasA paramaduHkhitA
7024018c pAdayoH patitA tasya vaktum evopacakrame
7024019a tataH svasAram utthApya rAvaNaH parisAntvayan
7024019c abravIt kim idaM bhadre vaktum arhasi me drutam
7024020a sA bASpapariruddhAkSI rAkSasI vAkyam abravIt
7024020c hatAsmi vidhavA rAjaMs tvayA balavatA kRtA
7024021a ete vIryAt tvayA rAjan daityA vinihatA raNe
7024021c kAlakeyA iti khyAtA mahAbalaparAkramAH
7024022a tatra me nihato bhartA garIyAJ jIvitAd api
7024022c sa tvayA dayitas tatra bhrAtrA zatrusamena vai
7024023a yA tvayAsmi hatA rAjan svayam eveha bandhunA
7024023c duHkhaM vaidhavyazabdaM ca dattaM bhokSyAmy ahaM tvayA
7024024a nanu nAma tvayA rakSyo jAmAtA samareSv api
7024024c taM nihatya raNe rAjan svayam eva na lajjase
7024025a evam uktas tayA rakSo bhaginyA krozamAnayA
7024025c abravIt sAntvayitvA tAM sAmapUrvam idaM vacaH
7024026a alaM vatse viSAdena na bhetavyaM ca sarvazaH
7024026c mAnadAnavizeSais tvAM toSayiSyAmi nityazaH
7024027a yuddhe pramatto vyAkSipto jayakAGkSI kSipaJ zarAn
7024027c nAvagacchAmi yuddheSu svAn parAn vApy ahaM zubhe
7024027e tenAsau nihataH saMkhye mayA bhartA tava svasaH
7024028a asmin kAle tu yat prAptaM tat kariSyAmi te hitam
7024028c bhrAtur aizvaryasaMsthasya kharasya bhava pArzvataH
7024029a caturdazAnAM bhrAtA te sahasrANAM bhaviSyati
7024029c prabhuH prayANe dAne ca rAkSasAnAM mahaujasAm
7024030a tatra mAtRSvasuH putro bhrAtA tava kharaH prabhuH
7024030c bhaviSyati sadA kurvan yad vakSyasi vacaH svayam
7024031a zIghraM gacchatv ayaM zUro daNDakAn parirakSitum
7024031c dUSaNo 'sya balAdhyakSo bhaviSyati mahAbalaH
7024032a sa hi zapto vanoddezaH kruddhenozanasA purA
7024032c rAkSasAnAm ayaM vAso bhaviSyati na saMzayaH
7024033a evam uktvA dazagrIvaH sainyaM tasyAdideza ha
7024033c caturdaza sahasrANi rakSasAM kAmarUpiNAm
7024034a sa taiH sarvaiH parivRto rAkSasair ghoradarzanaiH
7024034c kharaH saMprayayau zIghraM daNDakAn akutobhayaH
7024035a sa tatra kArayAm Asa rAjyaM nihatakaNTakam
7024035c sA ca zUrpaNakhA prItA nyavasad daNDakAvane
7025001a sa tu dattvA dazagrIvo vanaM ghoraM kharasya tat
7025001c bhaginIM ca samAzvAsya hRSTaH svasthataro 'bhavat
7025002a tato nikumbhilA nAma laGkAyAH kAnanaM mahat
7025002c mahAtmA rAkSasendras tat praviveza sahAnugaH
7025003a tatra yUpazatAkIrNaM saumyacaityopazobhitam
7025003c dadarza viSThitaM yajJaM saMpradIptam iva zriyA
7025004a tataH kRSNAjinadharaM kamaNDaluzikhAdhvajam
7025004c dadarza svasutaM tatra meghanAdam ariMdamam
7025005a rakSaHpatiH samAsAdya samAzliSya ca bAhubhiH
7025005c abravIt kim idaM vatsa vartate tad bravIhi me
7025006a uzanA tv abravIt tatra gurur yajJasamRddhaye
7025006c rAvaNaM rAkSasazreSThaM dvijazreSTho mahAtapAH
7025007a aham AkhyAmi te rAjaJ zrUyatAM sarvam eva ca
7025007c yajJAs te sapta putreNa prAptAH subahuvistarAH
7025008a agniSTomo 'zvamedhaz ca yajJo bahusuvarNakaH
7025008c rAjasUyas tathA yajJo gomedho vaiSNavas tathA
7025009a mAhezvare pravRtte tu yajJe pumbhiH sudurlabhe
7025009c varAMs te labdhavAn putraH sAkSAt pazupater iha
7025010a kAmagaM syandanaM divyam antarikSacaraM dhruvam
7025010c mAyAM ca tAmasIM nAma yayA saMpadyate tamaH
7025011a etayA kila saMgrAme mAyayA rAkSasezvara
7025011c prayuddhasya gatiH zakyA na hi jJAtuM surAsuraiH
7025012a akSayAv iSudhI bANaiz cApaM cApi sudurjayam
7025012c astraM ca balavat saumya zatruvidhvaMsanaM raNe
7025013a etAn sarvAn varA&l labdhvA putras te 'yaM dazAnana
7025013c adya yajJasamAptau ca tvatpratIkSaH sthito aham
7025014a tato 'bravId dazagrIvo na zobhanam idaM kRtam
7025014c pUjitAH zatravo yasmAd dravyair indrapurogamAH
7025015a ehIdAnIM kRtaM yad dhi tad akartuM na zakyate
7025015c Agaccha saumya gacchAmaH svam eva bhavanaM prati
7025016a tato gatvA dazagrIvaH saputraH savibhISaNaH
7025016c striyo 'vatArayAm Asa sarvAs tA bASpaviklavAH
7025017a lakSiNyo ratnabUtAz ca devadAnavarakSasAm
7025017c nAnAbhUSaNasaMpannA jvalantyaH svena tejasA
7025018a vibhISaNas tu tA nArIr dRSTvA zokasamAkulAH
7025018c tasya tAM ca matiM jJAtvA dharmAtmA vAkyam abravIt
7025019a IdRzais taiH samAcArair yazo'rthakulanAzanaiH
7025019c dharSaNaM prANinAM dattvA svamatena viceSTase
7025020a jJAtIn vai dharSayitvemAs tvayAnItA varAGganAH
7025020c tvAm atikramya madhunA rAjan kumbhInasI hRtA
7025021a rAvaNas tv abravId vAkyaM nAvagacchAmi kiM tv idam
7025021c ko vAyaM yas tvayAkhyAto madhur ity eva nAmataH
7025022a vibhISaNas tu saMkruddho bhrAtaraM vAkyam abravIt
7025022c zrUyatAm asya pApasya karmaNaH phalam Agatam
7025023a mAtAmahasya yo 'smAkaM jyeSTho bhrAtA sumAlinaH
7025023c mAlyavAn iti vikhyAto vRddhaprAjJo nizAcaraH
7025024a pitur jyeSTho jananyAz ca asmAkaM tv Aryako 'bhavat
7025024c tasya kumbhInasI nAma duhitur duhitAbhavat
7025025a mAtRSvasur athAsmAkaM sA kanyA cAnalodbhavA
7025025c bhavaty asmAkam eSA vai bhrAtqNAM dharmataH svasA
7025026a sA hRtA madhunA rAjan rAkSasena balIyasA
7025026c yajJapravRtte putre te mayi cAntarjaloSite
7025027a nihatya rAkSasazreSThAn amAtyAMs tava saMmatAn
7025027c dharSayitvA hRtA rAjan guptA hy antaHpure tava
7025028a zrutvA tv etan mahArAja kSAntam eva hato na saH
7025028c yasmAd avazyaM dAtavyA kanyA bhartre hi dAtRbhiH
7025028e asminn evAbhisaMprAptaM loke viditam astu te
7025029a tato 'bravId dazagrIvaH kruddhaH saMraktalocanaH
7025029c kalpyatAM me rathaH zIghraM zUrAH sajjIbhavantu ca
7025030a bhrAtA me kumbhakarNaz ca ye ca mukhyA nizAcarAH
7025030c vAhanAny adhirohantu nAnApraharaNAyudhAH
7025031a adya taM samare hatvA madhuM rAvaNanirbhayam
7025031c indralokaM gamiSyAmi yuddhakAGkSI suhRdvRtaH
7025032a tato vijitya tridivaM vaze sthApya puraMdaram
7025032c nirvRto vihariSyAmi trailokyaizvaryazobhitaH
7025033a akSauhiNIsahasrANi catvAry ugrANi rakSasAm
7025033c nAnApraharaNAny Azu niryayur yuddhakAGkSiNAm
7025034a indrajit tv agrataH sainyaM sainikAn parigRhya ca
7025034c rAvaNo madhyataH zUraH kumbhakarNaz ca pRSThataH
7025035a vibhISaNas tu dharmAtmA laGkAyAM dharmam Acarat
7025035c te tu sarve mahAbhAgA yayur madhupuraM prati
7025036a rathair nAgaiH kharair uSTrair hayair dIptair mahoragaiH
7025036c rAkSasAH prayayuH sarve kRtvAkAzaM nirantaram
7025037a daityAz ca zatazas tatra kRtavairAH suraiH saha
7025037c rAvaNaM prekSya gacchantam anvagacchanta pRSThataH
7025038a sa tu gatvA madhupuraM pravizya ca dazAnanaH
7025038c na dadarza madhuM tatra bhaginIM tatra dRSTavAn
7025039a sA prahvA prAJjalir bhUtvA zirasA pAdayor gatA
7025039c tasya rAkSasarAjasya trastA kumbhInasI svasA
7025040a tAM samutthApayAm Asa na bhetavyam iti bruvan
7025040c rAvaNo rAkSasazreSThaH kiM cApi karavANi te
7025041a sAbravId yadi me rAjan prasannas tvaM mahAbala
7025041c bhartAraM na mamehAdya hantum arhasi mAnada
7025042a satyavAg bhava rAjendra mAm avekSasva yAcatIm
7025042c tvayA hy uktaM mahAbAho na bhetavyam iti svayam
7025043a rAvaNas tv abravId dhRSTaH svasAraM tatra saMsthitAm
7025043c kva cAsau tava bhartA vai mama zIghraM nivedyatAm
7025044a saha tena gamiSyAmi suralokaM jayAya vai
7025044c tava kAruNyasauhArdAn nivRtto 'smi madhor vadhAt
7025045a ity uktA sA prasuptaM taM samutthApya nizAcaram
7025045c abravIt saMprahRSTeva rAkSasI suvipazcitam
7025046a eSa prApto dazagrIvo mama bhrAtA nizAcaraH
7025046c suralokajayAkAGkSI sAhAyye tvAM vRNoti ca
7025047a tad asya tvaM sahAyArthaM sabandhur gaccha rAkSasa
7025047c snigdhasya bhajamAnasya yuktam arthAya kalpitum
7025048a tasyAs tad vacanaM zrutvA tathety Aha madhur vacaH
7025048c dadarza rAkSasazreSThaM yathAnyAyam upetya saH
7025049a pUjayAm Asa dharmeNa rAvaNaM rAkSasAdhipam
7025049c prAptapUjo dazagrIvo madhuvezmani vIryavAn
7025049e tatra caikAM nizAm uSya gamanAyopacakrame
7025050a tataH kailAsam AsAdya zailaM vaizravaNAlayam
7025050c rAkSasendro mahendrAbhaH senAm upanivezayat
7026001a sa tu tatra dazagrIvaH saha sainyena vIryavAn
7026001c astaM prApte dinakare nivAsaM samarocayat
7026002a udite vimale candre tulyaparvatavarcasi
7026002c sa dadarza guNAMs tatra candrapAdopazobhitAn
7026003a karNikAravanair divyaiH kadambagahanais tathA
7026003c padminIbhiz ca phullAbhir mandAkinyA jalair api
7026004a ghaNTAnAm iva saMnAdaH zuzruve madhurasvanaH
7026004c apsarogaNasaMghanAM gAyatAM dhanadAlaye
7026005a puSpavarSANi muJcanto nagAH pavanatADitAH
7026005c zailaM taM vAsayantIva madhumAdhavagandhinaH
7026006a madhupuSparajaHpRktaM gandham AdAya puSkalam
7026006c pravavau vardhayan kAmaM rAvaNasya sukho 'nilaH
7026007a geyAt puSpasamRddhyA ca zaityAd vAyor guNair gireH
7026007c pravRttAyAM rajanyAM ca candrasyodayanena ca
7026008a rAvaNaH sumahAvIryaH kAmabANavazaM gataH
7026008c vinizvasya vinizvasya zazinaM samavaikSata
7026009a etasminn antare tatra divyapuSpavibhUSitA
7026009c sarvApsarovarA rambhA pUrNacandranibhAnanA
7026010a kRtair vizeSakair ArdraiH SaDartukusumotsavaiH
7026010c nIlaM satoyameghAbhaM vastraM samavaguNThitA
7026011a yasya vaktraM zazinibhaM bhruvau cApanibhe zubhe
7026011c UrU karikarAkArau karau pallavakomalau
7026011e sainyamadhyena gacchantI rAvaNenopalakSitA
7026012a tAM samutthAya rakSendraH kAmabANabalArditaH
7026012c kare gRhItvA gacchantIM smayamAno 'bhyabhASata
7026013a kva gacchasi varArohe kAM siddhiM bhajase svayam
7026013c kasyAbhyudayakAlo 'yaM yas tvAM samupabhokSyate
7026014a tavAnanarasasyAdya padmotpalasugandhinaH
7026014c sudhAmRtarasasyeva ko 'dya tRptiM gamiSyati
7026015a svarNakumbhanibhau pInau zubhau bhIru nirantarau
7026015c kasyorasthalasaMsparzaM dAsyatas te kucAv imau
7026016a suvarNacakrapratimaM svarNadAmacitaM pRthu
7026016c adhyArokSyati kas te 'dya svargaM jaghanarUpiNam
7026017a madviziSTaH pumAn ko 'nyaH zakro viSNur athAzvinau
7026017c mAm atItya hi yasya tvaM yAsi bhIru na zobhanam
7026018a vizrama tvaM pRthuzroNi zilAtalam idaM zubham
7026018c trailokye yaH prabhuz caiva tulyo mama na vidyate
7026019a tad eSa prAJjaliH prahvo yAcate tvAM dazAnanaH
7026019c yaH prabhuz cApi bhartA ca trailokyasya bhajasva mAm
7026020a evam uktAbravId rambhA vepamAnA kRtAJjaliH
7026020c prasIda nArhase vaktum IdRzaM tvaM hi me guruH
7026021a anyebhyo 'pi tvayA rakSyA prApnuyAM dharSaNaM yadi
7026021c dharmataz ca snuSA te 'haM tattvam etad bravImi te
7026022a abravIt tAM dazagrIvaz caraNAdhomukhIM sthitAm
7026022c sutasya yadi me bhAryA tatas tvaM me snuSA bhaveH
7026023a bADham ity eva sA rambhA prAha rAvaNam uttaram
7026023c dharmatas te sutasyAhaM bhAryA rAkSasapuMgava
7026024a putraH priyataraH prANair bhrAtur vaizravaNasya te
7026024c khyAto yas triSu lokeSu nalakUbara ity asau
7026025a dharmato yo bhaved vipraH kSatriyo vIryato bhavet
7026025c krodhAd yaz ca bhaved agniH kSAntyA ca vasudhAsamaH
7026026a tasyAsmi kRtasaMketA lokapAlasutasya vai
7026026c tam uddizya ca me sarvaM vibhUSaNam idaM kRtam
7026027a yasya tasya hi nAnyasya bhAvo mAM prati tiSThati
7026027c tena satyena mAM rAjan moktum arhasy ariMdama
7026028a sa hi tiSThati dharmAtmA sAmprataM matsamutsukaH
7026028c tan na vighnaM sutasyeha kartum arhasi muJca mAm
7026029a sadbhir AcaritaM mArgaM gaccha rAkSasapuMgava
7026029c mAnanIyo mayA hi tvaM lAlanIyA tathAsmi te
7026030a evaM bruvANAM rambhAM tAM dharmArthasahitaM vacaH
7026030c nirbhartsya rAkSaso mohAt pratigRhya balAd balI
7026030e kAmamohAbhisaMrabdho maithunAyopacakrame
7026031a sA vimuktA tato rambhA bhraSTamAlyavibhUSaNA
7026031c gajendrAkrIDamathitA nadIvAkulatAM gatA
7026032a sA vepamAnA lajjantI bhItA karakRtAJjaliH
7026032c nalakUbaram AsAdya pAdayor nipapAta ha
7026033a tadavasthAM ca tAM dRSTvA mahAtmA nalakUbaraH
7026033c abravIt kim idaM bhadre pAdayoH patitAsi me
7026034a sA tu nizvasamAnA ca vepamAnAtha sAJjaliH
7026034c tasmai sarvaM yathAtathyam AkhyAtum upacakrame
7026035a eSa deva dazagrIvaH prApto gantuM triviSTapam
7026035c tena sainyasahAyena nizeha pariNAmyate
7026036a AyAntI tena dRSTAsmi tvatsakAzam ariMdama
7026036c gRhItvA tena pRSTAsmi kasya tvam iti rakSasA
7026037a mayA tu sarvaM yat satyaM tad dhi tasmai niveditam
7026037c kAmamohAbhibhUtAtmA nAzrauSIt tad vaco mama
7026038a yAcyamAno mayA deva snuSA te 'ham iti prabho
7026038c tat sarvaM pRSThataH kRtvA balAt tenAsmi dharSitA
7026039a evaM tvam aparAdhaM me kSantum arhasi mAnada
7026039c na hi tulyaM balaM saumya striyAz ca puruSasya ca
7026040a evaM zrutvA tu saMkruddhas tadA vaizvaraNAtmajaH
7026040c dharSaNAM tAM parAM zrutvA dhyAnaM saMpraviveza ha
7026041a tasya tat karma vijJAya tadA vaizravaNAtmajaH
7026041c muhUrtAd roSatAmrAkSas toyaM jagrAha pANinA
7026042a gRhItvA salilaM divyam upaspRzya yathAvidhi
7026042c utsasarja tadA zApaM rAkSasendrAya dAruNam
7026043a akAmA tena yasmAt tvaM balAd bhadre pradharSitA
7026043c tasmAt sa yuvatIm anyAM nAkAmAm upayAsyati
7026044a yadA tv akAmAM kAmArto dharSayiSyati yoSitam
7026044c mUrdhA tu saptadhA tasya zakalIbhavitA tadA
7026045a tasminn udAhRte zApe jvalitAgnisamaprabhe
7026045c devadundubhayo neduH puSpavRSTiz ca khAc cyutA
7026046a prajApatimukhAz cApi sarve devAH praharSitAH
7026046c jJAtvA lokagatiM sarvAM tasya mRtyuM ca rakSasaH
7026047a zrutvA tu sa dazagrIvas taM zApaM romaharSaNam
7026047c nArISu maithunaM bhAvaM nAkAmAsv abhyarocayat
7027001a kailAsaM laGghayitvAtha dazagrIvaH sarAkSasaH
7027001c AsasAda mahAtejA indralokaM nizAcaraH
7027002a tasya rAkSasasainyasya samantAd upayAsyataH
7027002c devalokaM yayau zabdo bhidyamAnArNavopamaH
7027003a zrutvA tu rAvaNaM prAptam indraH saMcalitAsanaH
7027003c abravIt tatra tAn devAn sarvAn eva samAgatAn
7027004a AdityAn savasUn rudrAn vizvAn sAdhyAn marudgaNAn
7027004c sajjIbhavata yuddhArthaM rAvaNasya durAtmanaH
7027005a evam uktAs tu zakreNa devAH zakrasamA yudhi
7027005c saMnahyanta mahAsattvA yuddhazraddhAsamanvitAH
7027006a sa tu dInaH paritrasto mahendro rAvaNaM prati
7027006c viSNoH samIpam Agatya vAkyam etad uvAca ha
7027007a viSNo kathaM kariSyAmo mahAvIryaparAkrama
7027007c asau hi balavAn rakSo yuddhArtham abhivartate
7027008a varapradAnAd balavAn na khalv anyena hetunA
7027008c tac ca satyaM hi kartavyaM vAkyaM deva prajApateH
7027009a tad yathA namucir vRtro balir narakazambarau
7027009c tvan mataM samavaSTabhya yathA dagdhAs tathA kuru
7027010a na hy anyo deva devAnAm Apatsu sumahAbala
7027010c gatiH parAyaNaM vAsti tvAm Rte puruSottama
7027011a tvaM hi nArAyaNaH zrImAn padmanAbhaH sanAtanaH
7027011c tvayAhaM sthApitaz caiva devarAjye sanAtane
7027012a tad AkhyAhi yathAtattvaM devadeva mama svayam
7027012c asicakrasahAyas tvaM yudhyase saMyuge ripum
7027013a evam uktaH sa zakreNa devo nArAyaNaH prabhuH
7027013c abravIn na paritrAsaH kAryas te zrUyatAM ca me
7027014a na tAvad eSa durvRttaH zakyo daivatadAnavaiH
7027014c hantuM yudhi samAsAdya varadAnena durjayaH
7027015a sarvathA tu mahat karma kariSyati balotkaTaH
7027015c rakSaH putrasahAyo 'sau dRSTam etan nisargataH
7027016a bravISi yat tu mAM zakra saMyuge yotsyasIti ha
7027016c naivAhaM pratiyotsye taM rAvaNaM rAkSasAdhipam
7027017a anihatya ripuM viSNur na hi pratinivartate
7027017c durlabhaz caiSa kAmo 'dya varam AsAdya rAkSase
7027018a pratijAnAmi devendra tvatsamIpaM zatakrato
7027018c rAkSasasyAham evAsya bhavitA mRtyukAraNam
7027019a aham enaM vadhiSyAmi rAvaNaM sasutaM yudhi
7027019c devatAs toSayiSyAmi jJAtvA kAlam upasthitam
7027020a etasminn antare nAdaH zuzruve rajanIkSaye
7027020c tasya rAvaNasainyasya prayuddhasya samantataH
7027021a atha yuddhaM samabhavad devarAkSasayos tadA
7027021c ghoraM tumulanirhrAdaM nAnApraharaNAyudham
7027022a etasminn antare zUrA rAkSasA ghoradarzanAH
7027022c yuddhArtham abhyadhAvanta sacivA rAvaNAjJayA
7027023a mArIcaz ca prahastaz ca mahApArzvamahodarau
7027023c akampano nikumbhaz ca zukaH sAraNa eva ca
7027024a saMhrAdir dhUmaketuz ca mahAdaMSTro mahAmukhaH
7027024c jambumAlI mahAmAlI virUpAkSaz ca rAkSasaH
7027025a etaiH sarvair mahAvIryair vRto rAkSasapuMgavaH
7027025c rAvaNasyAryakaH sainyaM sumAlI praviveza ha
7027026a sa hi devagaNAn sarvAn nAnApraharaNaiH zitaiH
7027026c vidhvaMsayati saMkruddhaH saha taiH kSaNadAcaraiH
7027027a etasminn antare zUro vasUnAm aSTamo vasuH
7027027c sAvitra iti vikhyAtaH praviveza mahAraNam
7027028a tato yuddhaM samabhavat surANAM rAkSasaiH saha
7027028c kruddhAnAM rakSasAM kIrtiM samareSv anivartinAm
7027029a tatas te rAkSasAH zUrA devAMs tAn samare sthitAn
7027029c nAnApraharaNair ghorair jaghnuH zatasahasrazaH
7027030a surAs tu rAkSasAn ghorAn mahAvIryAn svatejasA
7027030c samare vividhaiH zastrair anayan yamasAdanam
7027031a etasminn antare zUraH sumAlI nAma rAkSasaH
7027031c nAnApraharaNaiH kruddho raNam evAbhyavartata
7027032a devAnAM tad balaM sarvaM nAnApraharaNaiH zitaiH
7027032c vidhvaMsayati saMkruddho vAyur jaladharAn iva
7027033a te mahAbANavarSaiz ca zUlaiH prAsaiz ca dAruNaiH
7027033c pIDyamAnAH surAH sarve na vyatiSThan samAhitAH
7027034a tato vidrAvyamANeSu tridazeSu sumAlinA
7027034c vasUnAm aSTamo devaH sAvitro vyavatiSThata
7027035a saMvRtaH svair anIkais tu praharantaM nizAcaram
7027035c vikrameNa mahAtejA vArayAm Asa saMyuge
7027036a sumattayos tayor AsId yuddhaM loke sudAruNam
7027036c sumAlino vasoz caiva samareSv anivartinoH
7027037a tatas tasya mahAbANair vasunA sumahAtmanA
7027037c mahAn sa pannagarathaH kSaNena vinipAtitaH
7027038a hatvA tu saMyuge tasya rathaM bANazataiH zitaiH
7027038c gadAM tasya vadhArthAya vasur jagrAha pANinA
7027039a tAM pradIptAM pragRhyAzu kAladaNDanibhAM zubhAm
7027039c tasya mUrdhani sAvitraH sumAler vinipAtayat
7027040a tasya mUrdhani solkAbhA patantI ca tadA babhau
7027040c sahasrAkSasamutsRSTA girAv iva mahAzaniH
7027041a tasya naivAsthi kAyo vA na mAMsaM dadRze tadA
7027041c gadayA bhasmasAdbhUto raNe tasmin nipAtitaH
7027042a taM dRSTvA nihataM saMkhye rAkSasAs te samantataH
7027042c dudruvuH sahitAH sarve krozamAnA mahAsvanam
7028001a sumAlinaM hataM dRSTvA vasunA bhasmasAtkRtam
7028001c vidrutaM cApi svaM sainyaM lakSayitvArditaM zaraiH
7028002a tataH sa balavAn kruddho rAvaNasya suto yudhi
7028002c nivartya rAkSasAn sarvAn meghanAdo vyatiSThata
7028003a sa rathenAgnivarNena kAmagena mahArathaH
7028003c abhidudrAva senAM tAM vanAny agnir iva jvalan
7028004a tataH pravizatas tasya vividhAyudhadhAriNaH
7028004c vidudruvur dizaH sarvA devAs tasya ca darzanAt
7028005a na tatrAvasthitaH kaz cid raNe tasya yuyutsataH
7028005c sarvAn Avidhya vitrastAn dRSTvA zakro 'bhyabhASata
7028006a na bhetavyaM na gantavyaM nivartadhvaM raNaM prati
7028006c eSa gacchati me putro yuddhArtham aparAjitaH
7028007a tataH zakrasuto devo jayanta iti vizrutaH
7028007c rathenAdbhutakalpena saMgrAmam abhivartata
7028008a tatas te tridazAH sarve parivArya zacIsutam
7028008c rAvaNasya sutaM yuddhe samAsAdya vyavasthitAH
7028009a teSAM yuddhaM mahad abhUt sadRzaM devarakSasAm
7028009c kRte mahendraputrasya rAkSasendrasutasya ca
7028010a tato mAtaliputre tu gomukhe rAkSasAtmajaH
7028010c sArathau pAtayAm Asa zarAn kAJcanabhUSaNAn
7028011a zacIsutas tv api tathA jayantas tasya sArathim
7028011c taM caiva rAvaNiM kruddhaH pratyavidhyad raNAjire
7028012a tataH kruddho mahAtejA rakSo visphAritekSaNaH
7028012c rAvaNiH zakraputraM taM zaravarSair avAkirat
7028013a tataH pragRhya zastrANi sAravanti mahAnti ca
7028013c zataghnIs tomarAn prAsAn gadAkhaDgaparazvadhAn
7028013e sumahAnty adrizRGgANi pAtayAm Asa rAvaNiH
7028014a tataH pravyathitA lokAH saMjajJe ca tamo mahat
7028014c tasya rAvaNaputrasya tadA zatrUn abhighnataH
7028015a tatas tad daivatabalaM samantAt taM zacIsutam
7028015c bahuprakAram asvasthaM tatra tatra sma dhAvati
7028016a nAbhyajAnaMs tadAnyonyaM zatrUn vA daivatAni vA
7028016c tatra tatra viparyastaM samantAt paridhAvitam
7028017a etasminn antare zUraH pulomA nAma vIryavAn
7028017c daiteyas tena saMgRhya zacIputro 'pavAhitaH
7028018a gRhItvA taM tu naptAraM praviSTaH sa mahodadhim
7028018c mAtAmaho 'ryakas tasya paulomI yena sA zacI
7028019a praNAzaM dRzya tu surA jayantasyAtidAruNam
7028019c vyathitAz cAprahRSTAz ca samantAd vipradudruvuH
7028020a rAvaNis tv atha saMhRSTo balaiH parivRtaH svakaiH
7028020c abhyadhAvata devAMs tAn mumoca ca mahAsvanam
7028021a dRSTvA praNAzaM putrasya rAvaNez cApi vikramam
7028021c mAtaliM prAha devendro rathaH samupanIyatAm
7028022a sa tu divyo mahAbhImaH sajja eva mahArathaH
7028022c upasthito mAtalinA vAhyamAno manojavaH
7028023a tato meghA rathe tasmiMs taDidvanto mahAsvanAH
7028023c agrato vAyucapalA gacchanto vyanadaMs tadA
7028024a nAnAvAdyAni vAdyanta stutayaz ca samAhitAH
7028024c nanRtuz cApsaraHsaMghAH prayAte vAsave raNam
7028025a rudrair vasubhir AdityaiH sAdhyaiz ca samarudgaNaiH
7028025c vRto nAnApraharaNair niryayau tridazAdhipaH
7028026a nirgacchatas tu zakrasya paruSaM pavano vavau
7028026c bhAskaro niSprabhaz cAsIn maholkAz ca prapedire
7028027a etasminn antare zUro dazagrIvaH pratApavAn
7028027c Aruroha rathaM divyaM nirmitaM vizvakarmaNA
7028028a pannagaiH sumahAkAyair veSTitaM lomaharSaNaiH
7028028c yeSAM nizvAsavAtena pradIptam iva saMyugam
7028029a daityair nizAcaraiH zUrai rathaH saMparivAritaH
7028029c samarAbhimukho divyo mahendram abhivartata
7028030a putraM taM vArayitvAsau svayam eva vyavasthitaH
7028030c so 'pi yuddhAd viniSkramya rAvaNiH samupAvizat
7028031a tato yuddhaM pravRttaM tu surANAM rAkSasaiH saha
7028031c zastrAbhivarSaNaM ghoraM meghAnAm iva saMyuge
7028032a kumbhakarNas tu duSTAtmA nAnApraharaNodyataH
7028032c nAjJAyata tadA yuddhe saha kenApy ayudhyata
7028033a dantair bhujAbhyAM padbhyAM ca zaktitomarasAyakaiH
7028033c yena kenaiva saMrabdhas tADayAm Asa vai surAn
7028034a tato rudrair mahAbhAgaiH sahAdityair nizAcaraH
7028034c prayuddhas taiz ca saMgrAme kRttaH zastrair nirantaram
7028035a tatas tad rAkSasaM sainyaM tridazaiH samarudgaNaiH
7028035c raNe vidrAvitaM sarvaM nAnApraharaNaiH zitaiH
7028036a ke cid vinihatAH zastrair veSTanti sma mahItale
7028036c vAhaneSv avasaktAz ca sthitA evApare raNe
7028037a rathAn nAgAn kharAn uSTrAn pannagAMs turagAMs tathA
7028037c ziMzumArAn varAhAMz ca pizAcavadanAMs tathA
7028038a tAn samAliGgya bAhubhyAM viSTabdhAH ke cid ucchritAH
7028038c devais tu zastrasaMviddhA mamrire ca nizAcarAH
7028039a citrakarma ivAbhAti sa teSAM raNasaMplavaH
7028039c nihatAnAM pramattAnAM rAkSasAnAM mahItale
7028040a zoNitodaka niSyandAkaGkagRdhrasamAkulA
7028040c pravRttA saMyugamukhe zastragrAhavatI nadI
7028041a etasminn antare kruddho dazagrIvaH pratApavAn
7028041c nirIkSya tad balaM sarvaM daivatair vinipAtitam
7028042a sa taM prativigAhyAzu pravRddhaM sainyasAgaram
7028042c tridazAn samare nighnaJ zakram evAbhyavartata
7028043a tataH zakro mahac cApaM visphArya sumahAsvanam
7028043c yasya visphAraghoSeNa svananti sma dizo daza
7028044a tad vikRSya mahac cApam indro rAvaNamUrdhani
7028044c nipAtayAm Asa zarAn pAvakAdityavarcasaH
7028045a tathaiva ca mahAbAhur dazagrIvo vyavasthitaH
7028045c zakraM kArmukavibhraSTaiH zaravarSair avAkirat
7028046a prayudhyator atha tayor bANavarSaiH samantataH
7028046c nAjJAyata tadA kiM cit sarvaM hi tamasA vRtam
7029001a tatas tamasi saMjAte rAkSasA daivataiH saha
7029001c ayudhyanta balonmattAH sUdayantaH parasparam
7029002a tatas tu devasainyena rAkSasAnAM mahad balam
7029002c dazAMzaM sthApitaM yuddhe zeSaM nItaM yamakSayam
7029003a tasmiMs tu tamasA naddhe sarve te devarAkSasAH
7029003c anyonyaM nAbhyajAnanta yudhyamAnAH parasparam
7029004a indraz ca rAvaNaz caiva rAvaNiz ca mahAbalaH
7029004c tasmiMs tamojAlavRte moham Iyur na te trayaH
7029005a sa tu dRSTvA balaM sarvaM nihataM rAvaNo raNe
7029005c krodham abhyAgamat tIvraM mahAnAdaM ca muktavAn
7029006a krodhAt sUtaM ca durdharSaH syandanastham uvAca ha
7029006c parasainyasya madhyena yAvadantaM nayasva mAm
7029007a adyaitAMs tridazAn sarvAn vikramaiH samare svayam
7029007c nAnAzastrair mahAsArair nAzayAmi nabhastalAt
7029008a aham indraM vadhiSyAmi varuNaM dhanadaM yamam
7029008c tridazAn vinihatyAzu svayaM sthAsyAmy athopari
7029009a viSAdo na ca kartavyaH zIghraM vAhaya me ratham
7029009c dviH khalu tvAM bravImy adya yAvadantaM nayasva mAm
7029010a ayaM sa nandanoddezo yatra vartAmahe vayam
7029010c naya mAm adya tatra tvam udayo yatra parvataH
7029011a tasya tad vacanaM zrutvA turagAn sa manojavAn
7029011c AdidezAtha zatrUNAM madhyenaiva ca sArathiH
7029012a tasya taM nizcayaM jJAtvA zakro devezvaras tadA
7029012c rathasthaH samarasthAMs tAn devAn vAkyam athAbravIt
7029013a surAH zRNuta madvAkyaM yat tAvan mama rocate
7029013c jIvann eva dazagrIvaH sAdhu rakSo nigRhyatAm
7029014a eSa hy atibalaH sainye rathena pavanaujasA
7029014c gamiSyati pravRddhormiH samudra iva parvaNi
7029015a na hy eSa hantuM zakyo 'dya varadAnAt sunirbhayaH
7029015c tad grahISyAmahe rakSo yattA bhavata saMyuge
7029016a yathA baliM nigRhyaitat trailokyaM bhujyate mayA
7029016c evam etasya pApasya nigraho mama rocate
7029017a tato 'nyaM dezam AsthAya zakraH saMtyajya rAvaNam
7029017c ayudhyata mahAtejA rAkSasAn nAzayan raNe
7029018a uttareNa dazagrIvaH pravivezAnivartitaH
7029018c dakSiNena tu pArzvena praviveza zatakratuH
7029019a tataH sa yojanazataM praviSTo rAkSasAdhipaH
7029019c devatAnAM balaM kRtsnaM zaravarSair avAkirat
7029020a tataH zakro nirIkSyAtha praviSTaM taM balaM svakam
7029020c nyavartayad asaMbhrAntaH samAvRtya dazAnanam
7029021a etasminn antare nAdo mukto dAnavarAkSasaiH
7029021c hA hatAH smeti taM dRSTvA grastaM zakreNa rAvaNam
7029022a tato rathaM samAruhya rAvaNiH krodhamUrchitaH
7029022c tat sainyam atisaMkruddhaH praviveza sudAruNam
7029023a sa tAM pravizya mAyAM tu dattAM gopatinA purA
7029023c adRzyaH sarvabhUtAnAM tat sainyaM samavAkirat
7029024a tataH sa devAn saMtyajya zakram evAbhyayAd drutam
7029024c mahendraz ca mahAtejA na dadarza sutaM ripoH
7029025a sa mAtaliM hayAMz caiva tADayitvA zarottamaiH
7029025c mahendraM bANavarSeNa zIghrahasto hy avAkirat
7029026a tataH zakro rathaM tyaktva visRjya ca sa mAtalim
7029026c airAvataM samAruhya mRgayAm Asa rAvaNim
7029027a sa tu mAyA balAd rakSaH saMgrAme nAbhyadRzyata
7029027c kiramANaH zaraughena mahendram amitaujasaM
7029028a sa taM yadA parizrAntam indraM mene 'tha rAvaNiH
7029028c tadainaM mAyayA baddhvA svasainyam abhito 'nayat
7029029a taM dRSTvAtha balAt tasmin mAyayApahRtaM raNe
7029029c mahendram amarAH sarve kiM nv etad iti cukruzuH
7029029e na hi dRzyati vidyAvAn mAyayA yena nIyate
7029030a etasminn antare cApi sarve suragaNAs tadA
7029030c abhyadravan susaMkruddhA rAvaNaM zastravRSTibhiH
7029031a rAvaNas tu samAsAdya vasvAdityamarudgaNAn
7029031c na zazAka raNe sthAtuM na yoddhuM zastrapIDitaH
7029032a taM tu dRSTvA parizrAntaM prahArair jarjaracchavim
7029032c rAvaNiH pitaraM yuddhe 'darzanastho 'bravId idam
7029033a Agaccha tAta gacchAvo nivRttaM raNakarma tat
7029033c jitaM te viditaM bho 'stu svastho bhava gatajvaraH
7029034a ayaM hi surasainyasya trailokyasya ca yaH prabhuH
7029034c sa gRhIto mayA zakro bhagnamAnAH surAH kRtAH
7029035a yatheSTaM bhuGkSva trailokyaM nigRhya ripum ojasA
7029035c vRthA te kiM zramaM kRtvA yuddhaM hi tava niSphalam
7029036a sa daivatabalAt tasmAn nivRtto raNakarmaNaH
7029036c tac chrutvA rAvaNer vAkyaM svasthacetA dazAnanaH
7029037a atha raNavigatajvaraH prabhur; vijayam avApya nizAcarAdhipaH
7029037c bhavanam abhi tato jagAma hRSTaH; svasutam avApya ca vAkyam abravIt
7029038a atibalasadRzaiH parAkramais tair; mama kulamAnavivardhanaM kRtam
7029038c yad amarasamavikrama tvayA; tridazapatis tridazAz ca nirjitAH
7029039a tvaritam upanayasva vAsavaM; nagaram ito vraja sainyasaMvRtaH
7029039c aham api tava gacchato drutaM; saha sacivair anuyAmi pRSThataH
7029040a atha sa balavRtaH savAhanas; tridazapatiM parigRhya rAvaNiH
7029040c svabhavanam upagamya rAkSaso; muditamanA visasarja rAkSasAn
7030001a jite mahendre 'tibale rAvaNasya sutena vai
7030001c prajApatiM puraskRtya gatA laGkAM surAs tadA
7030002a taM rAvaNaM samAsAdya putrabhrAtRbhir AvRtam
7030002c abravId gagane tiSThan sAntvapUrvaM prajApatiH
7030003a vatsa rAvaNa tuSTo 'smi tava putrasya saMyuge
7030003c aho 'sya vikramaudAryaM tava tulyo 'dhiko 'pi vA
7030004a jitaM hi bhavatA sarvaM trailokyaM svena tejasA
7030004c kRtA pratijJA saphalA prIto 'smi svasutena vai
7030005a ayaM ca putro 'tibalas tava rAvaNa rAvaNiH
7030005c indrajit tv iti vikhyAto jagaty eSa bhaviSyati
7030006a balavAJ zatrunirjetA bhaviSyaty eSa rAkSasaH
7030006c yam Azritya tvayA rAjan sthApitAs tridazA vaze
7030007a tan mucyatAM mahAbAho mahendraH pAkazAsanaH
7030007c kiM cAsya mokSaNArthAya prayacchanti divaukasaH
7030008a athAbravIn mahAtejA indrajit samitiMjayaH
7030008c amaratvam ahaM deva vRNomIhAsya mokSaNe
7030009a abravIt tu tadA devo rAvaNiM kamalodbhavaH
7030009c nAsti sarvAmaratvaM hi keSAM cit prANinAM bhuvi
7030010a athAbravIt sa tatrastham indrajit padmasaMbhavam
7030010c zrUyatAM yA bhavet siddhiH zatakratuvimokSaNe
7030011a mameSTaM nityazo deva havyaiH saMpUjya pAvakam
7030011c saMgrAmam avatartuM vai zatrunirjayakAGkSiNaH
7030012a tasmiMz ced asamApte tu japyahome vibhAvasoH
7030012c yudhyeyaM deva saMgrAme tadA me syAd vinAzanam
7030013a sarvo hi tapasA caiva vRNoty amaratAM pumAn
7030013c vikrameNa mayA tv etad amaratvaM pravartitam
7030014a evam astv iti taM prAha vAkyaM devaH prajApatiH
7030014c muktaz cendrajitA zakro gatAz ca tridivaM surAH
7030015a etasminn antare zakro dIno bhraSTAmbarasrajaH
7030015c rAma cintAparItAtmA dhyAnatatparatAM gataH
7030016a taM tu dRSTvA tathAbhUtaM prAha devaH prajApatiH
7030016c zatakrato kim utkaNThAM karoSi smara duSkRtam
7030017a amarendra mayA bahvyaH prajAH sRSTAH purA prabho
7030017c ekavarNAH samAbhASA ekarUpAz ca sarvazaH
7030018a tAsAM nAsti vizeSo hi darzane lakSaNe 'pi vA
7030018c tato 'ham ekAgramanAs tAH prajAH paryacintayam
7030019a so 'haM tAsAM vizeSArthaM striyam ekAM vinirmame
7030019c yad yat prajAnAM pratyaGgaM viziSTaM tat tad uddhRtam
7030020a tato mayA rUpaguNair ahalyA strI vinirmitA
7030020c ahalyety eva ca mayA tasyA nAma pravartitam
7030021a nirmitAyAM tu devendra tasyAM nAryAM surarSabha
7030021c bhaviSyatIti kasyaiSA mama cintA tato 'bhavat
7030022a tvaM tu zakra tadA nArIM jAnISe manasA prabho
7030022c sthAnAdhikatayA patnI mamaiSeti puraMdara
7030023a sA mayA nyAsabhUtA tu gautamasya mahAtmanaH
7030023c nyastA bahUni varSANi tena niryAtitA ca sA
7030024a tatas tasya parijJAya mayA sthairyaM mahAmuneH
7030024c jJAtvA tapasi siddhiM ca patnyarthaM sparzitA tadA
7030025a sa tayA saha dharmAtmA ramate sma mahAmuniH
7030025c Asan nirAzA devAs tu gautame dattayA tayA
7030026a tvaM kruddhas tv iha kAmAtmA gatvA tasyAzramaM muneH
7030026c dRSTavAMz ca tadA tAM strIM dIptAm agnizikhAm iva
7030027a sA tvayA dharSitA zakra kAmArtena samanyunA
7030027c dRSTas tvaM ca tadA tena Azrame paramarSiNA
7030028a tataH kruddhena tenAsi zaptaH paramatejasA
7030028c gato 'si yena devendra dazAbhAgaviparyayam
7030029a yasmAn me dharSitA patnI tvayA vAsava nirbhayam
7030029c tasmAt tvaM samare rAjaJ zatruhastaM gamiSyasi
7030030a ayaM tu bhAvo durbuddhe yas tvayeha pravartitaH
7030030c mAnuSeSv api sarveSu bhaviSyati na saMzayaH
7030031a tatrAdharmaH subalavAn samutthAsyati yo mahAn
7030031c tatrArdhaM tasya yaH kartA tvayy ardhaM nipatiSyati
7030032a na ca te sthAvaraM sthAnaM bhaviSyati puraMdara
7030032c etenAdharmayogena yas tvayeha pravartitaH
7030033a yaz ca yaz ca surendraH syAd dhruvaH sa na bhaviSyati
7030033c eSa zApo mayA mukta ity asau tvAM tadAbravIt
7030034a tAM tu bhAryAM vinirbhartsya so 'bravIt sumahAtapAH
7030034c durvinIte vinidhvaMsa mamAzramasamIpataH
7030035a rUpayauvanasaMpannA yasmAt tvam anavasthitA
7030035c tasmAd rUpavatI loke na tvam ekA bhaviSyasi
7030036a rUpaM ca tat prajAH sarvA gamiSyanti sudurlabham
7030036c yat tavedaM samAzritya vibhrame 'yam upasthitaH
7030037a tadA prabhRti bhUyiSThaM prajA rUpasamanvitAH
7030037c zApotsargAd dhi tasyedaM muneH sarvam upAgatam
7030038a tat smara tvaM mahAbAho duSkRtaM yat tvayA kRtam
7030038c yena tvaM grahaNaM zatror gato nAnyena vAsava
7030039a zIghraM yajasva yajJaM tvaM vaiSNavaM susamAhitaH
7030039c pAvitas tena yajJena yAsyasi tridivaM tataH
7030040a putraz ca tava devendra na vinaSTo mahAraNe
7030040c nItaH saMnihitaz caiva aryakeNa mahodadhau
7030041a etac chrutvA mahendras tu yajJam iSTvA ca vaiSNavam
7030041c punas tridivam AkrAmad anvazAsac ca devatAH
7030042a etad indrajito rAma balaM yat kIrtitaM mayA
7030042c nirjitas tena devendraH prANino 'nye ca kiM punaH
7031001a tato rAmo mahAtejA vismayAt punar eva hi
7031001c uvAca praNato vAkyam agastyam RSisattamam
7031002a bhagavan kiM tadA lokAH zUnyA Asan dvijottama
7031002c dharSaNAM yatra na prApto rAvaNo rAkSasezvaraH
7031003a utAho hInavIryAs te babhuvuH pRthivIkSitaH
7031003c bahiSkRtA varAstraiz ca bahavo nirjitA nRpAH
7031004a rAghavasya vacaH zrutvA agastyo bhagavAn RSiH
7031004c uvAca rAmaM prahasan pitAmaha ivezvaram
7031005a sa evaM bAdhamAnas tu pArthivAn pArthivarSabha
7031005c cacAra rAvaNo rAma pRthivyAM pRthivIpate
7031006a tato mAhiSmatIM nAma purIM svargapurIprabhAm
7031006c saMprApto yatra sAmnidhyaM paramaM vasuretasaH
7031007a tulya AsIn nRpas tasya pratApAd vasuretasaH
7031007c arjuno nAma yasyAgniH zarakuNDe zayaH sadA
7031008a tam eva divasaM so 'tha haihayAdhipatir balI
7031008c arjuno narmadAM rantuM gataH strIbhiH sahezvaraH
7031009a rAvaNo rAkSasendras tu tasyAmAtyAn apRcchata
7031009c kvArjuno vo nRpaH so 'dya zIghram AkhyAtum arhatha
7031010a rAvaNo 'ham anuprApto yuddhepsur nRvareNa tu
7031010c mamAgamanam avyagrair yuSmAbhiH saMnivedyatAm
7031011a ity evaM rAvaNenoktAs te 'mAtyAH suvipazcitaH
7031011c abruvan rAkSasapatim asAmnidhyaM mahIpateH
7031012a zrutvA vizravasaH putraH paurANAm arjunaM gatam
7031012c apasRtyAgato vindhyaM himavatsaMnibhaM girim
7031013a sa tam abhram ivAviSTam udbhrAntam iva medinIm
7031013c apazyad rAvaNo vindhyam Alikhantam ivAmbaram
7031014a sahasrazikharopetaM siMhAdhyuSitakandaram
7031014c prapAta patitaiH zItaiH sATTahAsam ivAmbubhiH
7031015a devadAnavagandharvaiH sApsarogaNakiMnaraiH
7031015c sAha strIbhiH krIDamAnaiH svargabhUtaM mahocchrayam
7031016a nadIbhiH syandamAnAbhir agatipratimaM jalam
7031016c sphuTIbhiz calajihvAbhir vamantam iva viSThitam
7031017a ulkAvantaM darIvantaM himavatsaMnibhaM girim
7031017c pazyamAnas tato vindhyaM rAvaNo narmadAM yayau
7031018a calopalajalAM puNyAM pazcimodadhigAminIm
7031018c mahiSaiH sRmaraiH siMhaiH zArdUlarkSagajottamaiH
7031018e uSNAbhitaptais tRSitaiH saMkSobhitajalAzayAm
7031019a cakravAkaiH sakAraNDaiH sahaMsajalakukkuTaiH
7031019c sArasaiz ca sadAmattaiH kokUjadbhiH samAvRtAm
7031020a phulladrumakRtottaMsAM cakravAkayugastanIm
7031020c vistIrNapulinazroNIM haMsAvalisumekhalAm
7031021a puSpareNvanuliptAGgIM jalaphenAmalAMzukAm
7031021c jalAvagAhasaMsparzAM phullotpalazubhekSaNAm
7031022a puSpakAd avaruhyAzu narmadAM saritAM varAm
7031022c iSTAm iva varAM nArIm avagAhya dazAnanaH
7031023a sa tasyAH puline ramye nAnAkusumazobhite
7031023c upopaviSTaH sacivaiH sArdhaM rAkSasapuMgavaH
7031023e narmadA darzajaM harSam AptavAn rAkSasezvaraH
7031024a tataH salIlaM prahasAn rAvaNo rAkSasAdhipaH
7031024c uvAca sacivAMs tatra mArIcazukasAraNAn
7031025a eSa razmisahasreNa jagat kRtveva kAJcanam
7031025c tIkSNatApakaraH sUryo nabhaso madhyam AsthitaH
7031025e mAm AsInaM viditveha candrAyAti divAkaraH
7031026a narmadA jalazItaz ca sugandhiH zramanAzanaH
7031026c madbhayAd anilo hy eSa vAty asau susamAhitaH
7031027a iyaM cApi saricchreSThA narmadA narma vardhinI
7031027c lInamInavihaMgormiH sabhayevAGganA sthitA
7031028a tad bhavantaH kSatAH zastrair nRpair indrasamair yudhi
7031028c candanasya raseneva rudhireNa samukSitAH
7031029a te yUyam avagAhadhvaM narmadAM zarmadAM nRNAm
7031029c mahApadmamukhA mattA gaGgAm iva mahAgajAH
7031030a asyAM snAtvA mahAnadyAM pApmAnaM vipramokSyatha
7031031a aham apy atra puline zaradindusamaprabhe
7031031c puSpopaharaM zanakaiH kariSyAmi umApateH
7031032a rAvaNenaivam uktAs tu mArIcazukasAraNAH
7031032c samahodaradhUmrAkSA narmadAm avagAhire
7031033a rAkSasendragajais tais tu kSobhyate narmadA nadI
7031033c vAmanAJjanapadmAdyair gaGgA iva mahAgajaiH
7031034a tatas te rAkSasAH snAtvA narmadAyA varAmbhasi
7031034c uttIrya puSpANy Ajahrur balyarthaM rAvaNasya tu
7031035a narmadA puline ramye zubhrAbhrasadRzaprabhe
7031035c rAkSasendrair muhUrtena kRtaH puSpamayo giriH
7031036a puSpeSUpahRteSv eva rAvaNo rAkSasezvaraH
7031036c avatIrNo nadIM snAtuM gaGgAm iva mahAgajaH
7031037a tatra snAtvA ca vidhivaj japtvA japyam anuttamam
7031037c narmadA salilAt tasmAd uttatAra sa rAvaNaH
7031038a rAvaNaM prAJjaliM yAntam anvayuH saptarAkSasAH
7031038c yatra yatra sa yAti sma rAvaNo rAkSasAdhipaH
7031038e jAmbUnadamayaM liGgaM tatra tatra sma nIyate
7031039a vAlukavedimadhye tu tal liGgaM sthApya rAvaNaH
7031039c arcayAm Asa gandhaiz ca puSpaiz cAmRtagandhibhiH
7031040a tataH satAm ArtiharaM haraM paraM; varapradaM candramayUkhabhUSaNam
7031040c samarcayitvA sa nizAcaro jagau; prasArya hastAn praNanarta cAyatAn
7032001a narmadA puline yatra rAkSasendraH sa rAvaNaH
7032001c puSpopahAraM kurute tasmAd dezAd adUrataH
7032002a arjuno jayatAM zreSTho mAhiSmatyAH patiH prabhuH
7032002c krIDite saha nArIbhir narmadAtoyam AzritaH
7032003a tAsAM madhyagato rAja rarAja sa tato 'rjunaH
7032003c kareNUnAM sahasrasya madhyastha iva kuJjaraH
7032004a jijJAsuH sa tu bAhUnAM sahasrasyottamaM balam
7032004c rurodha narmadA vegaM bAhubhiH sa tadArjunaH
7032005a kArtavIryabhujAsetuM taj jalaM prApya nirmalam
7032005c kUlApahAraM kurvANaM pratisrotaH pradhAvati
7032006a samInanakramakaraH sapuSpakuzasaMstaraH
7032006c sa narmadAmbhaso vegaH prAvRTkAla ivAbabhau
7032007a sa vegaH kArtavIryeNa saMpreSiTa ivAmbhasaH
7032007c puSpopahAraM tat sarvaM rAvaNasya jahAra ha
7032008a rAvaNo 'rdhasamAptaM tu utsRjya niyamaM tadA
7032008c narmadAM pazyate kAntAM pratikUlAM yathA priyAm
7032009a pazcimena tu taM dRSTvA sAgarodgArasaMnibham
7032009c vardhantam ambhaso vegaM pUrvAm AzAM pravizya tu
7032010a tato 'nudbhrAntazakunAM svAbhAvye parame sthitAm
7032010c nirvikArAGganAbhAsAM pazyate rAvaNo nadIm
7032011a savyetarakarAGgulyA sazabdaM ca dazAnanaH
7032011c vegaprabhavam anveSTuM so 'dizac chukasAraNau
7032012a tau tu rAvaNasaMdiSTau bhrAtarau zukasAraNau
7032012c vyomAntaracarau vIrau prasthitau pazcimonmukhau
7032013a ardhayojanamAtraM tu gatvA tau tu nizAcarau
7032013c pazyetAM puruSaM toye krIDantaM sahayoSitam
7032014a bRhatsAlapratIkazaM toyavyAkulamUrdhajam
7032014c madaraktAntanayanaM madanAkAravarcasaM
7032015a nadIM bAhusahasreNa rundhantam arimardanam
7032015c giriM pAdasahasreNa rundhantam iva medinIm
7032016a bAlAnAM varanArINAM sahasreNAbhisaMvRtam
7032016c samadAnAM kareNUnAM sahasreNeva kuJjaram
7032017a tam adbhutatamaM dRSTvA rAkSasau zukasAraNau
7032017c saMnivRttAv upAgamya rAvaNaM tam athocatuH
7032018a bRhatsAlapratIkAzaH ko 'py asau rAkSasezvara
7032018c narmadAM rodhavad ruddhvA krIDApayati yoSitaH
7032019a tena bAhusahasreNa saMniruddhajalA nadI
7032019c sAgarodgArasaMkAzAn udgArAn sRjate muhuH
7032020a ity evaM bhASamANau tau nizamya zukasAraNau
7032020c rAvaNo 'rjuna ity uktvA uttasthau yuddhalAlasaH
7032021a arjunAbhimukhe tasmin prasthite rAkSasezvare
7032021c sakRd eva kRto rAvaH saraktaH preSito ghanaiH
7032022a mahodaramahApArzvadhUmrAkSazukasAraNaiH
7032022c saMvRto rAkSasendras tu tatrAgAd yatra so 'rjunaH
7032023a nAtidIrgheNa kAlena sa tato rAkSaso balI
7032023c taM narmadA hradaM bhImam AjagAmAJjanaprabhaH
7032024a sa tatra strIparivRtaM vAzitAbhir iva dvipam
7032024c narendraM pazyate rAjA rAkSasAnAM tadArjunam
7032025a sa roSAd raktanayano rAkSasendro baloddhataH
7032025c ity evam arjunAmAtyAn Aha gambhIrayA girA
7032026a amAtyAH kSipram AkhyAta haihayasya nRpasya vai
7032026c yuddhArthaM samanuprApto rAvaNo nAma nAmataH
7032027a rAvaNasya vacaH zrutvA mantriNo 'thArjunasya te
7032027c uttasthuH sAyudhAs taM ca rAvaNaM vAkyam abruvan
7032028a yuddhasya kAlo vijJAtaH sAdhu bhoH sAdhu rAvaNa
7032028c yaH kSIbaM strIvRtaM caiva yoddhum icchasi no nRpam
7032028e vAzitAmadhyagaM mattaM zArdUla iva kuJjaram
7032029a kSamasvAdya dazagrIva uSyatAM rajanI tvayA
7032029c yuddhazraddhA tu yady asti zvas tAta samare 'rjunam
7032030a yadi vApi tvarA tubhyaM yuddhatRSNAsamAvRtA
7032030c nihatyAsmAMs tato yuddham arjunenopayAsyasi
7032031a tatas te rAvaNAmAtyair amAtyAH pArthivasya tu
7032031c sUditAz cApi te yuddhe bhakSitAz ca bubhukSitaiH
7032032a tato halahalAzabdo narmadA tira Ababhau
7032032c arjunasyAnuyAtrANAM rAvaNasya ca mantriNAm
7032033a iSubhis tomaraiH zUlair vajrakalpaiH sakarSaNaiH
7032033c sarAvaNAn ardayantaH samantAt samabhidrutAH
7032034a haihayAdhipayodhAnAM vega AsIt sudAruNaH
7032034c sanakramInamakarasamudrasyeva nisvanaH
7032035a rAvaNasya tu te 'mAtyAH prahastazukasAraNAH
7032035c kArtavIryabalaM kruddhA nirdahanty agnitejasaH
7032036a arjunAya tu tat karma rAvaNasya samantriNaH
7032036c krIDamAnAya kathitaM puruSair dvArarakSibhiH
7032037a uktvA na bhetavyam iti strIjanaM sa tato 'rjunaH
7032037c uttatAra jalAt tasmAd gaGgAtoyAd ivAJjanaH
7032038a krodhadUSitanetras tu sa tato 'rjuna pAvakaH
7032038c prajajvAla mahAghoro yugAnta iva pAvakaH
7032039a sa tUrNataram AdAya varahemAGgado gadAm
7032039c abhidravati rakSAMsi tamAMsIva divAkaraH
7032040a bAhuvikSepakaraNAM samudyamya mahAgadAm
7032040c gAruDaM vegam AsthAya ApapAtaiva so 'rjunaH
7032041a tasya margaM samAvRtya vindhyo 'rkasyeva parvataH
7032041c sthito vindhya ivAkampyaH prahasto musalAyudhaH
7032042a tato 'sya musalaM ghoraM lohabaddhaM madoddhataH
7032042c prahastaH preSayan kruddho rarAsa ca yathAmbudaH
7032043a tasyAgre musalasyAgnir azokApIDasaMnibhaH
7032043c prahastakaramuktasya babhUva pradahann iva
7032044a AdhAvamAnaM musalaM kArtavIryas tadArjunaH
7032044c nipuNaM vaJcayAm Asa sagado gajavikramaH
7032045a tatas tam abhidudrAva prahastaM haihayAdhipaH
7032045c bhrAmayANo gadAM gurvIM paJcabAhuzatocchrayAm
7032046a tenAhato 'tivegena prahasto gadayA tadA
7032046c nipapAta sthitaH zailo vajrivajrahato yathA
7032047a prahastaM patitaM dRSTvA mArIcazukasAraNAH
7032047c samahodaradhUmrAkSA apasRptA raNAjirAt
7032048a apakrAnteSv amAtyeSu prahaste ca nipAtite
7032048c rAvaNo 'bhyadravat tUrNam arjunaM nRpasattamam
7032049a sahasrabAhos tad yuddhaM viMzadbAhoz ca dAruNam
7032049c nRparAkSasayos tatra ArabdhaM lomaharSaNam
7032050a sAgarAv iva saMkSubdhau calamUlAv ivAcalau
7032050c tejoyuktAv ivAdityau pradahantAv ivAnalau
7032051a baloddhatau yathA nAgau vAzitArthe yathA vRSau
7032051c meghAv iva vinardantau siMhAv iva balotkaTau
7032052a rudrakAlAv iva kruddhau tau tathA rAkSasArjunau
7032052c parasparaM gadAbhyAM tau tADayAm Asatur bhRzam
7032053a vajraprahArAn acalA yathA ghorAn viSehire
7032053c gadAprahArAMs tadvat tau sahete nararAkSasau
7032054a yathAzaniravebhyas tu jAyate vai pratizrutiH
7032054c tathA tAbhyAM gadApAtair dizaH sarvAH pratizrutAH
7032055a arjunasya gadA sA tu pAtyamAnAhitorasi
7032055c kAJcanAbhaM nabhaz cakre vidyutsaudAmanI yathA
7032056a tathaiva rAvaNenApi pAtyamAnA muhur muhuH
7032056c arjunorasi nirbhAti gadolkeva mahAgirau
7032057a nArjunaH khedam Apnoti na rAkSasagaNezvaraH
7032057c samam AsIt tayor yuddhaM yathA pUrvaM balIndrayoH
7032058a zRGgair maharSabhau yadvad dantAgrair iva kuJjarau
7032058c parasparaM vinighnantau nararAkSasasattamau
7032059a tato 'rjunena kruddhena sarvaprANena sA gadA
7032059c stanayor antare muktA rAvaNasya mahAhave
7032060a varadAnakRtatrANe sA gadA rAvaNorasi
7032060c durbaleva yathA senA dvidhAbhUtApatat kSitau
7032061a sa tv arjunapramuktena gadApAtena rAvaNaH
7032061c apAsarpad dhanurmAtraM niSasAda ca niSTanan
7032062a sa vihvalaM tad AlakSya dazagrIvaM tato 'rjunaH
7032062c sahasA pratijagrAha garutmAn iva pannagam
7032063a sa taM bAhusahasreNa balAd gRhya dazAnanam
7032063c babandha balavAn rAjA baliM nArAyaNo yathA
7032064a badhyamAne dazagrIve siddhacAraNadevatAH
7032064c sAdhvIti vAdinaH puSpaiH kiranty arjunamUrdhani
7032065a vyAghro mRgam ivAdAya siMharAD iva dantinam
7032065c rarAsa haihayo rAjA harSAd ambudavan muhuH
7032066a prahastas tu samAzvasto dRSTvA baddhaM dazAnanam
7032066c saha tai rAkasaiH kruddha abhidudrAva pArthivam
7032067a naktaMcarANAM vegas tu teSAm ApatatAM babhau
7032067c uddhRta AtapApAye samudrANAm ivAdbhutaH
7032068a muJca muJceti bhASantas tiSTha tiSTheti cAsakRt
7032068c musalAni ca zUlAni utsasarjus tadArjune
7032069a aprAptAny eva tAny Azu asaMbhrAntas tadArjunaH
7032069c AyudhAny amarArINAM jagrAha ripusUdanaH
7032070a tatas tair eva rakSAMsi durdharaiH pravarAyudhaiH
7032070c bhittvA vidrAvayAm Asa vAyur ambudharAn iva
7032071a rAkSasAMs trAsayitvA tu kArtavIryArjunas tadA
7032071c rAvaNaM gRhya nagaraM praviveza suhRdvRtaH
7032072a sa kIryamANaH kusumAkSatotkarair; dvijaiH sapauraiH puruhUtasaMnibhaH
7032072c tadArjunaH saMpraviveza tAM purIM; baliM nigRhyaiva sahasralocanaH
7033001a rAvaNagrahaNaM tat tu vAyugrahaNasaMnibham
7033001c RSiH pulastyaH zuzrAva kathitaM divi daivataiH
7033002a tataH putrasutasnehAt kampyamAno mahAdhRtiH
7033002c mAhiSmatIpatiM draSTum AjagAma mahAn RSiH
7033003a sa vAyumArgam AsthAya vAyutulyagatir dvijaH
7033003c purIM mAhiSmatIM prApto manaHsaMtApavikramaH
7033004a so 'marAvatisaMkAzAM hRSTapuSTajanAvRtAm
7033004c praviveza purIM brahmA indrasyevAmarAvatIm
7033005a pAdacAram ivAdityaM niSpatantaM sudurdRzam
7033005c tatas te pratyabhijJAya arjunAya nyavedayan
7033006a pulastya iti taM zrutvA vacanaM haihayAdhipaH
7033006c zirasy aJjalim uddhRtya pratyudgacchad dvijottamam
7033007a purohito 'sya gRhyArghyaM madhuparkaM tathaiva ca
7033007c purastAt prayayau rAjJa indrasyeva bRhaspatiH
7033008a tatas tam RSim AyAntam udyantam iva bhAskaram
7033008c arjuno dRzya saMprAptaM vavandendra ivezvaram
7033009a sa tasya madhuparkaM ca pAdyam arghyaM ca dApayan
7033009c pulastyam Aha rAjendro harSagadgadayA girA
7033010a adyeyam amarAvatyA tulyA mAhiSmatI kRtA
7033010c adyAhaM tu dvijendrendra yasmAt pazyAmi durdRzam
7033011a adya me kuzalaM deva adya me kulam uddhRtam
7033011c yat te devagaNair vandyau vande 'haM caraNAv imau
7033012a idaM rAjyam ime putrA ime dArA ime vayam
7033012c brahman kiM kurma kiM kAryam AjJApayatu no bhavAn
7033013a taM dharme 'gniSu bhRtyeSu zivaM pRSTvAtha pArthivam
7033013c pulastyovAca rAjAnaM haihayAnAM tadArjunam
7033014a rAjendrAmalapadmAkSapUrNacandranibhAnana
7033014c atulaM te balaM yena dazagrIvas tvayA jitaH
7033015a bhayAd yasyAvatiSThetAM niSpandau sAgarAnilau
7033015c so 'yam adya tvayA baddhaH pautro me 'tIvadurjayaH
7033016a tat putraka yazaH sphItaM nAma vizrAvitaM tvayA
7033016c madvAkyAd yAcyamAno 'dya muJca vatsa dazAnanam
7033017a pulastyAjJAM sa gRhyAtha akiMcanavaco 'rjunaH
7033017c mumoca pArthivendrendro rAkSasendraM prahRSTavat
7033018a sa taM pramuktvA tridazArim arjunaH; prapUjya divyAbharaNasragambaraiH
7033018c ahiMsAkaM sakhyam upetya sAgnikaM; praNamya sa brahmasutaM gRhaM yayau
7033019a pulastyenApi saMgamya rAkSasendraH pratApavAn
7033019c pariSvaGgakRtAtithyo lajjamAno visarjitaH
7033020a pitAmahasutaz cApi pulastyo munisattamaH
7033020c mocayitvA dazagrIvaM brahmalokaM jagAma saH
7033021a evaM sa rAvaNaH prAptaH kArtavIryAt tu dharSaNAt
7033021c pulastyavacanAc cApi punar mokSam avAptavAn
7033022a evaM balibhyo balinaH santi rAghavanandana
7033022c nAvajJA parataH kAryA ya icchec chreya AtmanaH
7033023a tataH sa rAjA pizitAzanAnAM; sahasrabAhor upalabhya maitrIm
7033023c punar narANAM kadanaM cakAra; cacAra sarvAM pRthivIM ca darpAt
7034001a arjunena vimuktas tu rAvaNo rAkSasAdhipaH
7034001c cacAra pRthivIM sarvAm anirviNNas tathA kRtaH
7034002a rAkSasaM vA manuSyaM vA zRNute yaM balAdhikam
7034002c rAvaNas taM samAsAdya yuddhe hvayati darpitaH
7034003a tataH kadA cit kiSkindhAM nagarIM vAlipAlitAm
7034003c gatvAhvayati yuddhAya vAlinaM hemamAlinam
7034004a tatas taM vAnarAmAtyas tAras tArApitA prabhuH
7034004c uvAca rAvaNaM vAkyaM yuddhaprepsum upAgatam
7034005a rAkSasendra gato vAlI yas te pratibalo bhavet
7034005c nAnyaH pramukhataH sthAtuM tava zaktaH plavaMgamaH
7034006a caturbhyo 'pi samudrebhyaH saMdhyAm anvAsya rAvaNa
7034006c imaM muhUrtam AyAti vAlI tiSTha muhUrtakam
7034007a etAn asthicayAn pazya ya ete zaGkhapANDurAH
7034007c yuddhArthinAm ime rAjan vAnarAdhipatejasA
7034008a yad vAmRtarasaH pItas tvayA rAvaNarAkSasa
7034008c tathA vAlinam AsAdya tadantaM tava jIvitam
7034009a atha vA tvarase martuM gaccha dakSiNasAgaram
7034009c vAlinaM drakSyase tatra bhUmiSTham iva bhAskaram
7034010a sa tu tAraM vinirbhartsya rAvaNo rAkSasezvaraH
7034010c puSpakaM tat samAruhya prayayau dakSiNArNavam
7034011a tatra hemagiriprakhyaM taruNArkanibhAnanam
7034011c rAvaNo vAlinaM dRSTvA saMdhyopAsanatatparam
7034012a puSpakAd avaruhyAtha rAvaNo 'JjanasaMnibhaH
7034012c grahItuM vAlinaM tUrNaM niHzabdapadam Adravat
7034013a yadRcchayonmIlayatA vAlinApi sa rAvaNaH
7034013c pApAbhiprAyavAn dRSTaz cakAra na ca saMbhramam
7034014a zazam AlakSya siMho vA pannagaM garuDo yathA
7034014c na cintayati taM vAlI rAvaNaM pApanizcayam
7034015a jighRkSamANam adyainaM rAvaNaM pApabuddhinam
7034015c kakSAvalambinaM kRtvA gamiSyAmi mahArNavAn
7034016a drakSyanty ariM mamAGkasthaM sraMsitorukarAmbaram
7034016c lambamAnaM dazagrIvaM garuDasyeva pannagam
7034017a ity evaM matim AsthAya vAlI karNam upAzritaH
7034017c japan vai naigamAn mantrAMs tasthau parvatarAD iva
7034018a tAv anyonyaM jighRkSantau harirAkSasapArthivau
7034018c prayatnavantau tat karma Ihatur baladarpitau
7034019a hastagrAhyaM tu taM matvA pAdazabdena rAvaNam
7034019c parAGmukho 'pi jagrAha vAlI sarpam ivANDajaH
7034020a grahItukAmaM taM gRhya rakSasAm IzvaraM hariH
7034020c kham utpapAta vegena kRtvA kakSAvalambinam
7034021a sa taM pIDdayamAnas tu vitudantaM nakhair muhuH
7034021c jahAra rAvaNaM vAlI pavanas toyadaM yathA
7034022a atha te rAkSasAmAtyA hriyamANe dazAnane
7034022c mumokSayiSavo ghorA ravamANA hy abhidravan
7034023a anvIyamAnas tair vAlI bhrAjate 'mbaramadhyagaH
7034023c anvIyamAno meghaughair ambarastha ivAMzumAn
7034024a te 'zaknuvantaH saMprAptaM vAlinaM rAkSasottamAH
7034024c tasya bAhUruvegena parizrAntaH patanti ca
7034025a vAlimArgAd apAkrAman parvatendrA hi gacchataH
7034026a apakSigaNasaMpAto vAnarendro mahAjavaH
7034026c kramazaH sAgarAn sarvAn saMdhyAkAlam avandata
7034027a sabhAjyamAno bhUtais tu khecaraiH khecaro hariH
7034027c pazcimaM sAgaraM vAlI AjagAma sarAvaNaH
7034028a tatra saMdhyAm upAsitvA snAtvA japtvA ca vAnaraH
7034028c uttaraM sAgaraM prAyAd vahamAno dazAnanam
7034029a uttare sAgare saMdhyAm upAsitvA dazAnanam
7034029c vahamAno 'gamad vAlI pUrvam ambumahAnidhim
7034030a tatrApi saMdhyAm anvAsya vAsaviH sa harIzvaraH
7034030c kiSkindhAbhimukho gRhya rAvaNaM punar Agamat
7034031a caturSv api samudreSu saMdhyAm anvAsya vAnaraH
7034031c rAvaNodvahanazrAntaH kiSkindhopavane 'patat
7034032a rAvaNaM tu mumocAtha svakakSAt kapisattamaH
7034032c kutas tvam iti covAca prahasan rAvaNaM prati
7034033a vismayaM tu mahad gatvA zramalokanirIkSaNaH
7034033c rAkSasezo harIzaM tam idaM vacanam abravIt
7034034a vAnarendra mahendrAbha rAkSasendro 'smi rAvaNaH
7034034c yuddhepsur ahaM saMprAptaH sa cAdyAsAditas tvayA
7034035a aho balam aho vIryam aho gambhIratA ca te
7034035c yenAhaM pazuvad gRhya bhrAmitaz caturo 'rNavAn
7034036a evam azrAntavad vIra zIghram eva ca vAnara
7034036c mAM caivodvahamAnas tu ko 'nyo vIraH kramiSyati
7034037a trayANAm eva bhUtAnAM gatir eSA plavaMgama
7034037c mano'nilasuparNAnAM tava vA nAtra saMzayaH
7034038a so 'haM dRSTabalas tubhyam icchAmi haripuMgava
7034038c tvayA saha ciraM sakhyaM susnigdhaM pAvakAgrataH
7034039a dArAH putrAH puraM rASTraM bhogAcchAdanabhojanam
7034039c sarvam evAvibhaktaM nau bhaviSyati harIzvara
7034040a tataH prajvAlayitvAgniM tAv ubhau harirAkSasau
7034040c bhrAtRtvam upasaMpannau pariSvajya parasparam
7034041a anyonyaM lambitakarau tatas tau harirAkSasau
7034041c kiSkindhAM vizatur hRSTau siMhau giriguhAm iva
7034042a sa tatra mAsam uSitaH sugrIva iva rAvaNaH
7034042c amAtyair Agatair nIcas trailokyotsAdanArthibhiH
7034043a evam etat purAvRttaM vAlinA rAvaNaH prabho
7034043c dharSitaz ca kRtaz cApi bhrAtA pAvakasaMnidhau
7034044a balam apratimaM rAma vAlino 'bhavad uttamam
7034044c so 'pi tayA vinirdagdhaH zalabho vahninA yathA
7035001a apRcchata tato rAmo dakSiNAzAlayaM munim
7035001c prAJjalir vinayopeta idam Aha vaco 'rthavat
7035002a atulaM balam etAbhyAM vAlino rAvaNasya ca
7035002c na tv etau hanumadvIryaiH samAv iti matir mama
7035003a zauryaM dAkSyaM balaM dhairyaM prAjJatA nayasAdhanam
7035003c vikramaz ca prabhAvaz ca hanUmati kRtAlayAH
7035004a dRSTvodadhiM viSIdantIM tadaiSa kapivAhinIm
7035004c samAzvAsya kapIn bhUyo yojanAnAM zataM plutaH
7035005a dharSayitvA purIM laGkAM rAvaNAntaHpuraM tathA
7035005c dRSTvA saMbhASitA cApi sItA vizvAsitA tathA
7035006a senAgragA mantrisutAH kiMkarA rAvaNAtmajaH
7035006c ete hanumatA tatra ekena vinipAtitAH
7035007a bhUyo bandhAd vimuktena saMbhASitvA dazAnanam
7035007c laGkA bhasmIkRtA tena pAvakeneva medinI
7035008a na kAlasya na zakrasya na viSNor vittapasya ca
7035008c karmANi tAni zrUyante yAni yuddhe hanUmataH
7035009a etasya bAhuvIryeNa laGkA sItA ca lakSmaNaH
7035009c prApto mayA jayaz caiva rAjyaM mitrANi bAndhavAH
7035010a hanUmAn yadi me na syAd vAnarAdhipateH sakhA
7035010c pravRttam api ko vettuM jAnakyAH zaktimAn bhavet
7035011a kimarthaM vAlI caitena sugrIvapriyakAmyayA
7035011c tadA vaire samutpanne na dagdho vIrudho yathA
7035012a na hi veditavAn manye hanUmAn Atmano balam
7035012c yad dRSTavAJ jIviteSTaM klizyantaM vAnarAdhipam
7035013a etan me bhagavan sarvaM hanUmati mahAmune
7035013c vistareNa yathAtattvaM kathayAmarapUjita
7035014a rAghavasya vacaH zrutvA hetuyuktam RSis tataH
7035014c hanUmataH samakSaM tam idaM vacanam abravIt
7035015a satyam etad raghuzreSTha yad bravISi hanUmataH
7035015c na bale vidyate tulyo na gatau na matau paraH
7035016a amoghazApaiH zApas tu datto 'sya RSibhiH purA
7035016c na veditA balaM yena balI sann arimardanaH
7035017a bAlye 'py etena yat karma kRtaM rAma mahAbala
7035017c tan na varNayituM zakyam atibAlatayAsya te
7035018a yadi vAsti tv abhiprAyas tac chrotuM tava rAghava
7035018c samAdhAya matiM rAma nizAmaya vadAmy aham
7035019a sUryadattavarasvarNaH sumerur nAma parvataH
7035019c yatra rAjyaM prazAsty asya kesarI nAma vai pitA
7035020a tasya bhAryA babhUveSTA hy aJjaneti parizrutA
7035020c janayAm Asa tasyAM vai vAyur Atmajam uttamam
7035021a zAlizUkasamAbhAsaM prAsUtemaM tadAJjanA
7035021c phalAny AhartukAmA vai niSkrAntA gahane carA
7035022a eSa mAtur viyogAc ca kSudhayA ca bhRzArditaH
7035022c ruroda zizur atyarthaM zizuH zarabharAD iva
7035023a tatodyantaM vivasvantaM japApuSpotkaropamam
7035023c dadRze phalalobhAc ca utpapAta raviM prati
7035024a bAlArkAbhimukho bAlo bAlArka iva mUrtimAn
7035024c grahItukAmo bAlArkaM plavate 'mbaramadhyagaH
7035025a etasmin plavamAne tu zizubhAve hanUmati
7035025c devadAnavasiddhAnAM vismayaH sumahAn abhUt
7035026a nApy evaM vegavAn vAyur garuDo na manas tathA
7035026c yathAyaM vAyuputras tu kramate 'mbaram uttamam
7035027a yadi tAvac chizor asya IdRzau gativikramau
7035027c yauvanaM balam AsAdya kathaM vego bhaviSyati
7035028a tam anuplavate vAyuH plavantaM putram AtmanaH
7035028c sUryadAhabhayAd rakSaMs tuSAracayazItalaH
7035029a bahuyojanasAhasraM kramaty eSa tato 'mbaram
7035029c pitur balAc ca bAlyAc ca bhAskarAbhyAzam AgataH
7035030a zizur eSa tv adoSajJa iti matvA divAkaraH
7035030c kAryaM cAtra samAyattam ity evaM na dadAha saH
7035031a yam eva divasaM hy eSa grahItuM bhAskaraM plutaH
7035031c tam eva divasaM rAhur jighRkSati divAkaram
7035032a anena ca parAmRSTo rAma sUryarathopari
7035032c apakrAntas tatas trasto rAhuz candrArkamardanaH
7035033a sa indrabhavanaM gatvA saroSaH siMhikAsutaH
7035033c abravId bhrukuTIM kRtvA devaM devagaNair vRtam
7035034a bubhukSApanayaM dattvA candrArkau mama vAsava
7035034c kim idaM tat tvayA dattam anyasya balavRtrahan
7035035a adyAhaM parvakAle tu jighRkSuH sUryam AgataH
7035035c athAnyo rAhur AsAdya jagrAha sahasA ravim
7035036a sa rAhor vacanaM zrutvA vAsavaH saMbhramAnvitaH
7035036c utpapAtAsanaM hitvA udvahan kAJcanasrajam
7035037a tataH kailAsakUTAbhaM caturdantaM madasravam
7035037c zRGgArakAriNaM prAMzuM svarNaghaNTATTahAsinam
7035038a indraH karIndram Aruhya rAhuM kRtvA puraHsaram
7035038c prAyAd yatrAbhavat sUryaH sahAnena hanUmatA
7035039a athAtirabhasenAgAd rAhur utsRjya vAsavam
7035039c anena ca sa vai dRSTa AdhAvaJ zailakUTavat
7035040a tataH sUryaM samutsRjya rAhum evam avekSya ca
7035040c utpapAta punar vyoma grahItuM siMhikAsutam
7035041a utsRjyArkam imaM rAma AdhAvantaM plavaMgamam
7035041c dRSTvA rAhuH parAvRtya mukhazeSaH parAGmukhaH
7035042a indram AzaMsamAnas tu trAtAraM siMhikAsutaH
7035042c indra indreti saMtrAsAn muhur muhur abhASata
7035043a rAhor vikrozamAnasya prAg evAlakSitaH svaraH
7035043c zrutvendrovAca mA bhaiSIr ayam enaM nihanmy aham
7035044a airAvataM tato dRSTvA mahat tad idam ity api
7035044c phalaM taM hastirAjAnam abhidudrAva mArutiH
7035045a tadAsya dhAvato rUpam airAvatajighRkSayA
7035045c muhUrtam abhavad ghoram indrAgnyor iva bhAsvaram
7035046a evam AdhAvamAnaM tu nAtikruddhaH zacIpatiH
7035046c hastAntenAtimuktena kulizenAbhyatADayat
7035047a tato girau papAtaiSa indravajrAbhitADitaH
7035047c patamAnasya caitasya vAmo hanur abhajyata
7035048a tasmiMs tu patite bAle vajratADanavihvale
7035048c cukrodhendrAya pavanaH prajAnAm azivAya ca
7035049a viNmUtrAzayam AvRtya prajAsv antargataH prabhuH
7035049c rurodha sarvabhUtAni yathA varSANi vAsavaH
7035050a vAyuprakopAd bhUtAni nirucchvAsAni sarvataH
7035050c saMdhibhir bhajyamAnAni kASThabhUtAni jajJire
7035051a niHsvadhaM nirvaSaTkAraM niSkriyaM dharmavarjitam
7035051c vAyuprakopAt trailokyaM nirayastham ivAbabhau
7035052a tataH prajAH sagandharvAH sadevAsuramAnuSAH
7035052c prajApatiM samAdhAvann asukhArtAH sukhaiSiNaH
7035053a UcuH prAJjalayo devA darodaranibhodarAH
7035053c tvayA sma bhagavan sRSTAH prajAnAtha caturvidhAH
7035054a tvayA datto 'yam asmAkam AyuSaH pavanaH patiH
7035054c so 'smAn prANezvaro bhUtvA kasmAd eSo 'dya sattama
7035055a rurodha duHkhaM janayann antaHpura iva striyaH
7035055c tasmAt tvAM zaraNaM prAptA vAyunopahatA vibho
7035056a vAyusaMrodhajaM duHkham idaM no nuda zatruhan
7035057a etat prajAnAM zrutvA tu prajAnAthaH prajApatiH
7035057c kAraNAd iti tAn uktvA prajAH punar abhASata
7035058a yasmin vaH kAraNe vAyuz cukrodha ca rurodha ca
7035058c prajAH zRNudhvaM tat sarvaM zrotavyaM cAtmanaH kSamam
7035059a putras tasyAmarezena indreNAdya nipAtitaH
7035059c rAhor vacanam AjJAya rAjJA vaH kopito 'nilaH
7035060a azarIraH zarIreSu vAyuz carati pAlayan
7035060c zarIraM hi vinA vAyuM samatAM yAti reNubhiH
7035061a vAyuH prANAH sukhaM vAyur vAyuH sarvam idaM jagat
7035061c vAyunA saMparityaktaM na sukhaM vindate jagat
7035062a adyaiva ca parityaktaM vAyunA jagad AyuSA
7035062c adyaiveme nirucchvAsAH kASThakuDyopamAH sthitAH
7035063a tad yAmas tatra yatrAste mAruto rukprado hi vaH
7035063c mA vinAzaM gamiSyAma aprasAdyAditeH sutam
7035064a tataH prajAbhiH sahitaH prajApatiH; sadevagandharvabhujaMgaguhyakaH
7035064c jagAma tatrAsyati yatra mArutaH; sutaM surendrAbhihataM pragRhya saH
7035065a tato 'rkavaizvAnarakAJcanaprabhaM; sutaM tadotsaGgagataM sadAgateH
7035065c caturmukho vIkSya kRpAm athAkarot; sadevasiddharSibhujaMgarAkSasaH
7036001a tataH pitAmahaM dRSTvA vAyuH putravadhArditaH
7036001c zizukaM taM samAdAya uttasthau dhAtur agrataH
7036002a calatkuNDalamaulisraktapanIyavibhUSaNaH
7036002c pAdayor nyapatad vAyus tisro 'vasthAya vedhase
7036003a taM tu vedavidAdyas tu lambAbharaNazobhinA
7036003c vAyum utthApya hastena zizuM taM parimRSTavAn
7036004a spRSTamAtras tataH so 'tha salIlaM padmajanmanA
7036004c jalasiktaM yathA sasyaM punar jIvitam AptavAn
7036005a prANavantam imaM dRSTvA prANo gandhavaho mudA
7036005c cacAra sarvabhUteSu saMniruddhaM yathApurA
7036006a marudrogavinirmuktAH prajA vai muditAbhavan
7036006c zItavAtavinirmuktAH padminya iva sAmbujAH
7036007a tatas triyugmas trikakut tridhAmA tridazArcitaH
7036007c uvAca devatA brahmA mArutapriyakAmyayA
7036008a bho mahendrAgnivaruNadhanezvaramahezvarAH
7036008c jAnatAm api tat sarvaM hitaM vakSyAmi zrUyatAm
7036009a anena zizunA kAryaM kartavyaM vo bhaviSyati
7036009c dadatAsya varAn sarve mArutasyAsya tuSTidAn
7036010a tataH sahasranayanaH prItiraktaH zubhAnanaH
7036010c kuze zayamayIM mAlAM samutkSipyedam abravIt
7036011a matkarotsRSTavajreNa hanur asya yathA kSataH
7036011c nAmnaiSa kapizArdUlo bhavitA hanumAn iti
7036012a aham evAsya dAsyAmi paramaM varam uttamam
7036012c ataH prabhRti vajrasya mamAvadhyo bhaviSyati
7036013a mArtANDas tv abravIt tatra bhagavAMs timirApahaH
7036013c tejaso 'sya madIyasya dadAmi zatikAM kalAm
7036014a yadA tu zAstrANy adhyetuM zaktir asya bhaviSyati
7036014c tadAsya zAstraM dAsyAmi yena vAgmI bhaviSyati
7036015a varuNaz ca varaM prAdAn nAsya mRtyur bhaviSyati
7036015c varSAyutazatenApi matpAzAd udakAd api
7036016a yamo 'pi daNDAvadhyatvam arogatvaM ca nityazaH
7036016c dizate 'sya varaM tuSTa aviSAdaM ca saMyuge
7036017a gadeyaM mAmikA nainaM saMyugeSu vadhiSyati
7036017c ity evaM varadaH prAha tadA hy ekAkSipiGgalaH
7036018a matto madAyudhAnAM ca na vadhyo 'yaM bhaviSyati
7036018c ity evaM zaMkareNApi datto 'sya paramo varaH
7036019a sarveSAM brahmadaNDAnAm avadhyo 'yaM bhaviSyati
7036019c dIrghAyuz ca mahAtmA ca iti brahmAbravId vacaH
7036020a vizvakarmA tu dRSTvainaM bAlasUryopamaM zizum
7036020c zilpinAM pravaraH prAha varam asya mahAmatiH
7036021a vinirmitAni devAnAm AyudhAnIha yAni tu
7036021c teSAM saMgrAmakAle tu avadhyo 'yaM bhaviSyati
7036022a tataH surANAM tu varair dRSTvA hy enam alaMkRtam
7036022c caturmukhas tuSTamukho vAyum Aha jagadguruH
7036023a amitrANAM bhayakaro mitrANAm abhayaMkaraH
7036023c ajeyo bhavitA te 'tra putro mArutamArutiH
7036024a rAvaNotsAdanArthAni rAmaprItikarANi ca
7036024c romaharSakarANy eSa kartA karmANi saMyuge
7036025a evam uktvA tam Amantrya mArutaM te 'maraiH saha
7036025c yathAgataM yayuH sarve pitAmahapurogamAH
7036026a so 'pi gandhavahaH putraM pragRhya gRham Anayat
7036026c aJjanAyAstam AkhyAya varaM dattaM viniHsRtaH
7036027a prApya rAma varAn eSa varadAnabalAnvitaH
7036027c balenAtmani saMsthena so 'pUryata yathArNavaH
7036028a balenApUryamANo hi eSa vAnarapuMgavaH
7036028c AzrameSu maharSINAm aparAdhyati nirbhayaH
7036029a srugbhANDAn agnihotraM ca valkalAnAM ca saMcayAn
7036029c bhagnavicchinnavidhvastAn suzAntAnAM karoty ayam
7036030a sarveSAM brahmadaNDAnAm avadhyaM brahmaNA kRtam
7036030c jAnanta RSayas taM vai kSamante tasya nityazaH
7036031a yadA keSariNA tv eSa vAyunA sAJjanena ca
7036031c pratiSiddho 'pi maryAdAM laGghayaty eva vAnaraH
7036032a tato maharSayaH kruddhA bhRgvaGgirasavaMzajAH
7036032c zepur enaM raghuzreSTha nAtikruddhAtimanyavaH
7036033a bAdhase yat samAzritya balam asmAn plavaMgama
7036033c tad dIrghakAlaM vettAsi nAsmAkaM zApamohitaH
7036034a tatas tu hRtatejaujA maharSivacanaujasA
7036034c eSo zramANi nAtyeti mRdubhAvagataz caran
7036035a atha RkSarajA nAma vAlisugrIvayoH pitA
7036035c sarvavAnararAjAsIt tejasA iva bhAskaraH
7036036a sa tu rAjyaM ciraM kRtvA vAnarANAM harIzvaraH
7036036c tatas tvarkSarajA nAma kAladharmeNa saMgataH
7036037a tasminn astamite vAlI mantribhir mantrakovidaiH
7036037c pitrye pade kRto rAjA sugrIvo vAlinaH pade
7036038a sugrIveNa samaM tv asya advaidhaM chidravarjitam
7036038c ahAryaM sakhyam abhavad anilasya yathAgninA
7036039a eSa zApavazAd eva na vedabalam AtmanaH
7036039c vAlisugrIvayor vairaM yadA rAma samutthitam
7036040a na hy eSa rAma sugrIvo bhrAmyamANo 'pi vAlinA
7036040c vedayAno na ca hy eSa balam Atmani mArutiH
7036041a parAkramotsAhamatipratApaiH; sauzIlyamAdhuryanayAnayaiz ca
7036041c gAmbhIryacAturyasuvIryadhairyair; hanUmataH ko 'py adhiko 'sti loke
7036042a asau purA vyAkaraNaM grahISyan; sUryonmukhaH pRSThagamaH kapIndraH
7036042c udyadgirer astagiriM jagAma; granthaM mahad dhArayad aprameyaH
7036043a pravIvivikSor iva sAgarasya; lokAn didhakSor iva pAvakasya
7036043c lokakSayeSv eva yathAntakasya; hanUmataH sthAsyati kaH purastAt
7036044a eSo 'pi cAnye ca mahAkapIndrAH; sugrIvamaindadvividAH sanIlAH
7036044c satAratAreyanalAH sarambhAs; tvatkAraNAd rAma surair hi sRSTAH
7036045a tad etat kathitaM sarvaM yan mAM tvaM paripRcchasi
7036045c hanUmato bAlabhAve karmaitat kathitaM mayA
7036046a dRSTaH saMbhASitaz cAsi rAma gacchamahe vayam
7036046c evam uktvA gatAH sarve RSayas te yathAgatam
7037001a vimRzya ca tato rAmo vayasyam akutobhayam
7037001c pratardanaM kAzipatiM pariSvajyedam abravIt
7037002a darzitA bhavatA prItir darzitaM sauhRdaM param
7037002c udyogaz ca kRto rAjan bharatena tvayA saha
7037003a tad bhavAn adya kAzeyIM purIM vArANasIM vraja
7037003c ramaNIyAM tvayA guptAM suprAkArAM sutoraNAm
7037004a etAvad uktvA utthAya kAkutsthaH paramAsanAt
7037004c paryaSvajata dharmAtmA nirantaram urogatam
7037005a visRjya taM vayasyaM sa svAgatAn pRthivIpatIn
7037005c prahasan rAghavo vAkyam uvAca madhurAkSaram
7037006a bhavatAM prItir avyagrA tejasA parirakSitA
7037006c dharmaz ca niyato nityaM satyaM ca bhavatAM sadA
7037007a yuSmAkaM ca prabhAvena tejasA ca mahAtmanAm
7037007c hato durAtmA durbuddhI rAvaNo rAkSasAdhipaH
7037008a hetumAtram ahaM tatra bhavatAM tejasA hataH
7037008c rAvaNaH sagaNo yuddhe saputraH sahabAndhavaH
7037009a bhavantaz ca samAnItA bharatena mahAtmanA
7037009c zrutvA janakarAjasya kAnane tanayAM hRtAm
7037010a udyuktAnAM ca sarveSAM pArthivAnAM mahAtmanAm
7037010c kAlo hy atItaH sumahAn gamane rocatAM matiH
7037011a pratyUcus taM ca rAjAno harSeNa mahatAnvitAH
7037011c diSTyA tvaM vijayI rAma rAjyaM cApi pratiSThitam
7037012a diSTyA pratyAhRtA sItA diSTyA zatruH parAjitaH
7037012c eSa naH paramaH kAma eSA naH kIrtir uttamA
7037013a yat tvAM vijayinaM rAma pazyAmo hatazAtravam
7037013c upapannaM ca kAkutstha yat tvam asmAn prazaMsasi
7037014a prazaMsArhA hi jAnanti prazaMsAM vaktum IdRzIm
7037014c ApRcchAmo gamiSyAmo hRdistho naH sadA bhavAn
7037015a bhavec ca te mahArAja prItir asmAsu nityadA
7038001a te prayAtA mahAtmAnaH pArthivAH sarvato dizam
7038001c kampayanto mahIM vIrAH svapurANi prahRSTavat
7038002a akSauhiNIsahasrais te samavetAs tv anekazaH
7038002c hRSTAH pratigatAH sarve rAghavArthe samAgatAH
7038003a Ucuz caiva mahIpAlA baladarpasamanvitAH
7038003c na nAma rAvaNaM yuddhe pazyAmaH purataH sthitam
7038004a bharatena vayaM pazcAt samAnItA nirarthakam
7038004c hatA hi rAkSasAs tatra pArthivaiH syur na saMzayaH
7038005a rAmasya bAhuvIryeNa pAlitA lakSmaNasya ca
7038005c sukhaM pAre samudrasya yudhyema vigatajvarAH
7038006a etAz cAnyAz ca rAjAnaH kathAs tatra sahasrazaH
7038006c kathayantaH svarASTrANi vivizus te mahArathAH
7038007a yathApurANi te gatvA ratnAni vividhAni ca
7038007c rAmAya priyakAmArtham upahArAn nRpA daduH
7038008a azvAn ratnAni vastrANi hastinaz ca madotkaTAn
7038008c candanAni ca divyAni divyAny AbharaNAni ca
7038009a bharato lakSmaNaz caiva zatrughnaz ca mahArathaH
7038009c AdAya tAni ratnAni ayodhyAm agaman punaH
7038010a AgatAz ca purIM ramyAm ayodhyAM puruSarSabhAH
7038010c daduH sarvANi ratnAni rAghavAya mahAtmane
7038011a pratigRhya ca tat sarvaM prItiyuktaH sa rAghavaH
7038011c sarvANi tAni pradadau sugrIvAya mahAtmane
7038012a vibhISaNAya ca dadau ye cAnye RkSavAnarAH
7038012c hanUmatpramukhA vIrA rAkSasAz ca mahAbalAH
7038013a te sarve hRSTamanaso rAmadattAni tAny atha
7038013c zirobhir dhArayAm Asur bAhubhiz ca mahAbalAH
7038014a papuz caiva sugandhIni madhUni vividhAni ca
7038014c mAMsAni ca sumRSTAni phalAny AsvAdayanti ca
7038015a evaM teSAM nivasatAM mAsaH sAgro gatas tadA
7038015c muhUrtam iva tat sarvaM rAmabhaktyA samarthayan
7038016a reme rAmaH sa taiH sArdhaM vAnaraiH kAmarUpibhiH
7038016c rAjabhiz ca mahAvIryai rAkSasaiz ca mahAbalaiH
7038017a evaM teSAM yayau mAso dvitIyaH zaiziraH sukham
7038017c vAnarANAM prahRSTAnAM rAkSasAnAM ca sarvazaH
7039001a tathA sma teSAM vasatAm RkSavAnararakSasAm
7039001c rAghavas tu mahAtejAH sugrIvam idam abravIt
7039002a gamyatAM saumya kiSkindhAM durAdharSAM surAsuraiH
7039002c pAlayasva sahAmAtyai rAjyaM nihatakaNTakam
7039003a aGgadaM ca mahAbAho prItyA paramayAnvitaH
7039003c pazya tvaM hanumantaM ca nalaM ca sumahAbalam
7039004a suSeNaM zvazuraM zUraM tAraM ca balinAM varam
7039004c kumudaM caiva durdharSaM nIlaM ca sumahAbalam
7039005a vIraM zatabaliM caiva maindaM dvividam eva ca
7039005c gajaM gavAkSaM gavayaM zarabhaM ca mahAbalam
7039006a RkSarAjaM ca durdharSaM jAmbavantaM mahAbalam
7039006c pazya prItisamAyukto gandhamAdanam eva ca
7039007a ye cAnye sumahAtmAno madarthe tyaktajIvitAH
7039007c pazya tvaM prItisaMyukto mA caiSAM vipriyaM kRthAH
7039008a evam uktvA ca sugrIvaM prazasya ca punaH punaH
7039008c vibhISaNam athovAca rAmo madhurayA girA
7039009a laGkAM prazAdhi dharmeNa saMmato hy asi pArthiva
7039009c purasya rAkSasAnAM ca bhrAtur vaizvaraNasya ca
7039010a mA ca buddhim adharme tvaM kuryA rAjan kathaM cana
7039010c buddhimanto hi rAjAno dhruvam aznanti medinIm
7039011a ahaM ca nityazo rAjan sugrIvasahitas tvayA
7039011c smartavyaH parayA prItyA gaccha tvaM vigatajvaraH
7039012a rAmasya bhASitaM zrutvA RkSavAnararAkSasAH
7039012c sAdhu sAdhv iti kAkutsthaM prazazaMsuH punaH punaH
7039013a tava buddhir mahAbAho vIryam adbhutam eva ca
7039013c mAdhuryaM paramaM rAma svayambhor iva nityadA
7039014a teSAm evaM bruvANAnAM vAnarANAM ca rakSasAm
7039014c hanUmAn praNato bhUtvA rAghavaM vAkyam abravIt
7039015a sneho me paramo rAjaMs tvayi nityaM pratiSThitaH
7039015c bhaktiz ca niyatA vIra bhAvo nAnyatra gacchati
7039016a yAvad rAmakathAM vIra zroSye 'haM pRthivItale
7039016c tAvac charIre vatsyantu mama prANA na saMzayaH
7039017a evaM bruvANaM rAjendro hanUmantam athAsanAt
7039017c utthAya ca pariSvajya vAkyam etad uvAca ha
7039018a evam etat kapizreSTha bhavitA nAtra saMzayaH
7039018c lokA hi yAvat sthAsyanti tAvat sthAsyati me kathA
7039019a cariSyati kathA yAval lokAn eSA hi mAmikA
7039019c tAvac charIre vatsyanti prANAs tava na saMzayaH
7039020a tato 'sya hAraM candrAbhaM mucya kaNThAt sa rAghavaH
7039020c vaidUryataralaM snehAd Ababandhe hanUmati
7039021a tenorasi nibaddhena hAreNa sa mahAkapiH
7039021c rarAja hemazailendraz candreNAkrAntamastakaH
7039022a zrutvA tu rAghavasyaitad utthAyotthAya vAnarAH
7039022c praNamya zirasA pAdau prajagmus te mahAbalAH
7039023a sugrIvaz caiva rAmeNa pariSvakto mahAbhujaH
7039023c vibhISaNaz ca dharmAtmA nirantaram urogataH
7039024a sarve ca te bASpagalAH sAzrunetrA vicetasaH
7039024c saMmUDhA iva duHkhena tyajante rAghavaM tadA
7040001a visRjya ca mahAbAhur RkSavAnararAkSasAn
7040001c bhrAtRbhiH sahito rAmaH pramumoda sukhI sukham
7040002a athAparAhNasamaye bhrAtRbhiH saha rAghavaH
7040002c zuzrAva madhurAM vANIm antarikSAt prabhASitAm
7040003a saumya rAma nirIkSasva saumyena vadanena mAm
7040003c kailAsazikharAt prAptaM viddhi mAM puSkaraM prabho
7040004a tava zAsanam AjJAya gato 'smi dhanadaM prati
7040004c upasthAtuM narazreSTha sa ca mAM pratyabhASata
7040005a nirjitas tvaM narendreNa rAghaveNa mahAtmanA
7040005c nihatya yudhi durdharSaM rAvaNaM rAkSasAdhipam
7040006a mamApi paramA prItir hate tasmin durAtmani
7040006c rAvaNe sagaNe saumya saputrAmAtyabAndhave
7040007a sa tvaM rAmeNa laGkAyAM nirjitaH paramAtmanA
7040007c vaha saumya tam eva tvam aham AjJApayAmi te
7040008a eSa me paramaH kAmo yat tvaM rAghavanandanam
7040008c vaher lokasya saMyAnaM gacchasva vigatajvaraH
7040009a tacchAsanam ahaM jJAtvA dhanadasya mahAtmanaH
7040009c tvatsakAzaM punaH prAptaH sa evaM pratigRhNa mAm
7040010a bADham ity eva kAkutsthaH puSpakaM samapUjayat
7040010c lAjAkSataiz ca puSpaiz ca gandhaiz ca susugandhibhiH
7040011a gamyatAM ca yathAkAmam Agacches tvaM yadA smare
7040011c evam astv iti rAmeNa visRSTaH puSpakaH punaH
7040011e abhipretAM dizaM prAyAt puSpakaH puSpabhUSitaH
7040012a evam antarhite tasmin puSpake vividhAtmani
7040012c bharataH prAJjalir vAkyam uvAca raghunandanam
7040013a atyadbhutAni dRzyante tvayi rAjyaM prazAsati
7040013c amAnuSANAM sattvAnAM vyAhRtAni muhur muhuH
7040014a anAmayAc ca martyAnAM sAgro mAso gato hy ayam
7040014c jIrNAnAm api sattvAnAM mRtyur nAyAti rAghava
7040015a putrAn nAryaH prasUyante vapuSmantaz ca mAnavAH
7040015c harSaz cAbhyadhiko rAjaJ janasya puravAsinaH
7040016a kAle ca vAsavo varSaM pAtayaty amRtopamam
7040016c vAyavaz cApi vAyante sparzavantaH sukhapradAH
7040017a IdRzo naz ciraM rAjA bhavatv iti narezvara
7040017c kathayanti pure paurA janA janapadeSu ca
7040018a etA vAcaH sumadhurA bharatena samIritAH
7040018c zrutvA rAmo mudA yuktaH pramumoda sukhI sukham
7041001a sa visRjya tato rAmaH puSpakaM hemabhUSitam
7041001c praviveza mahAbAhur azokavanikAM tadA
7041002a candanAgarucUtaiz ca tuGgakAleyakair api
7041002c devadAruvanaiz cApi samantAd upazobhitAm
7041003a priyaGgubhiH kadambaiz ca tathA kurabakair api
7041003c jambUbhiH pATalIbhiz ca kovidAraiz ca saMvRtAm
7041004a sarvadA kusumai ramyaiH phalavadbhir manoramaiH
7041004c cArupallavapuSpADhyair mattabhramarasaMkulaiH
7041005a kokilair bhRGgarAjaiz ca nAnAvarNaiz ca pakSibhiH
7041005c zobhitAM zatazaz citraiz cUtavRkSAvataMsakaiH
7041006a zAtakumbhanibhAH ke cit ke cid agnizikhopamAH
7041006c nIlAJjananibhAz cAnye bhAnti tatra sma pAdapAH
7041007a dIrghikA vividhAkArAH pUrNAH paramavAriNA
7041007c mahArhamaNisopAnasphaTikAntarakuTTimAH
7041008a phullapadmotpalavanAz cakravAkopazobhitAH
7041008c prAkArair vividhAkAraiH zobhitAz ca zilAtalaiH
7041009a tatra tatra vanoddeze vaidUryamaNisaMnibhaiH
7041009c zAdvalaiH paramopetAH puSpitadrumasaMyutAH
7041010a nandanaM hi yathendrasya brAhmaM caitrarathaM yathA
7041010c tathArUpaM hi rAmasya kAnanaM tan nivezitam
7041011a bahvAsanagRhopetAM latAgRhasamAvRtAm
7041011c azokavanikAM sphItAM pravizya raghunandanaH
7041012a Asane tu zubhAkAre puSpastabakabhUSite
7041012c kuthAstaraNasaMvIte rAmaH saMniSasAda ha
7041013a sItAM saMgRhya bAhubhyAM madhumaireyam uttamam
7041013c pAyayAm Asa kAkutsthaH zacIm indro yathAmRtam
7041014a mAMsAni ca vicitrANi phalAni vividhAni ca
7041014c rAmasyAbhyavahArArthaM kiMkarAs tUrNam Aharan
7041015a upanRtyanti rAjAnaM nRtyagItavizAradAH
7041015c bAlAz ca rUpavatyaz ca striyaH pAnavazaM gatAH
7041016a evaM rAmo mudA yuktaH sItAM surucirAnanAm
7041016c ramayAm Asa vaidehIm ahany ahani devavat
7041017a tathA tu ramamANasya tasyaivaM ziziraH zubhaH
7041017c atyakrAman narendrasya rAghavasya mahAtmanaH
7041018a pUrvAhNe paurakRtyAni kRtvA dharmeNa dharmavit
7041018c zeSaM divasabhAgArdham antaHpuragato 'bhavat
7041019a sItA ca devakAryANi kRtvA paurvAhNikAni tu
7041019c zvazrUNAm avizeSeNa sarvAsAM prAJjaliH sthitA
7041020a tato rAmam upAgacchad vicitrabahubhUSaNA
7041020c triviSTape sahasrAkSam upaviSTaM yathA zacI
7041021a dRSTvA tu rAghavaH patnIM kalyANena samanvitAm
7041021c praharSam atulaM lebhe sAdhu sAdhv iti cAbravIt
7041022a apatyalAbho vaidehi mamAyaM samupasthitaH
7041022c kim icchasi hi tad brUhi kaH kAmaH kriyatAM tava
7041023a prahasantI tu vaidehI rAmaM vAkyam athAbravIt
7041023c tapovanAni puNyAni draSTum icchAmi rAghava
7041024a gaGgAtIre niviSTAni RSINAM puNyakarmaNAm
7041024c phalamUlAzinAM vIra pAdamUleSu vartitum
7041025a eSa me paramaH kAmo yan mUlaphalabhojiSu
7041025c apy ekarAtraM kAkutstha vaseyaM puNyazAliSu
7041026a tatheti ca pratijJAtaM rAmeNAkliSTakarmaNA
7041026c visrabdhA bhava vaidehi zvo gamiSyasy asaMzayam
7041027a evam uktvA tu kAkutstho maithilIM janakAtmajAm
7041027c madhyakakSAntaraM rAmo nirjagAma suhRdvRtaH
7042001a tatropaviSTaM rAjAnam upAsante vicakSaNAH
7042001c kathAnAM bahurUpANAM hAsyakArAH samantataH
7042002a vijayo madhumattaz ca kAzyapaH piGgalaH kuzaH
7042002c surAjiH kAliyo bhadro dantavakraH samAgadhaH
7042003a ete kathA bahuvidhA parihAsasamanvitAH
7042003c kathayanti sma saMhRSTA rAghavasya mahAtmanaH
7042004a tataH kathAyAM kasyAM cid rAghavaH samabhASata
7042004c kAH kathA nagare bhadra vartante viSayeSu ca
7042005a mAm AzritAni kAny AhuH paurajAnapadA janAH
7042005c kiM ca sItAM samAzritya bharataM kiM nu lakSmaNam
7042006a kiM nu zatrughnam Azritya kaikeyIM mAtaraM ca me
7042006c vaktavyatAM ca rAjAno nave rAjye vrajanti hi
7042007a evam ukte tu rAmeNa bhadraH prAJjalir abravIt
7042007c sthitAH kathAH zubhA rAjan vartante puravAsinAm
7042008a ayaM tu vijayaH saumya dazagrIvavadhAzritaH
7042008c bhUyiSThaM svapure pauraiH kathyate puruSarSabha
7042009a evam uktas tu bhadreNa rAghavo vAkyam abravIt
7042009c kathayasva yathAtathyaM sarvaM niravazeSataH
7042010a zubhAzubhAni vAkyAni yAny AhuH puravAsinaH
7042010c zrutvedAnIM zubhaM kuryAM na kuryAm azubhAni ca
7042011a kathayasva ca visrabdho nirbhayo vigatajvaraH
7042011c kathayante yathA paurA janA janapadeSu ca
7042012a rAghaveNaivam uktas tu bhadraH suruciraM vacaH
7042012c pratyuvAca mahAbAhuM prAJjaliH susamAhitaH
7042013a zRNu rAjan yathA paurAH kathayanti zubhAzubham
7042013c catvarApaNarathyAsu vaneSUpavaneSu ca
7042014a duSkaraM kRtavAn rAmaH samudre setubandhanam
7042014c akRtaM pUrvakaiH kaiz cid devair api sadAnavaiH
7042015a rAvaNaz ca durAdharSo hataH sabalavAhanaH
7042015c vAnarAz ca vazaM nItA RkSAz ca saha rAkSasaiH
7042016a hatvA ca rAvaNaM yuddhe sItAm AhRtya rAghavaH
7042016c amarSaM pRSThataH kRtvA svavezma punar Anayat
7042017a kIdRzaM hRdaye tasya sItAsaMbhogajaM sukham
7042017c aGkam Aropya hi purA rAvaNena balAd dhRtAm
7042018a laGkAm api punar nItAm azokavanikAM gatAm
7042018c rakSasAM vazam ApannAM kathaM rAmo na kutsate
7042019a asmAkam api dAreSu sahanIyaM bhaviSyati
7042019c yathA hi kurute rAjA prajA tam anuvartate
7042020a evaM bahuvidhA vAco vadanti puravAsinaH
7042020c nagareSu ca sarveSu rAjaJ janapadeSu ca
7042021a tasyaitad bhASitaM zrutvA rAghavaH paramArtavat
7042021c uvAca sarvAn suhRdaH katham etan nivedyatAm
7042022a sarve tu zirasA bhUmAv abhivAdya praNamya ca
7042022c pratyUcU rAghavaM dInam evam etan na saMzayaH
7042023a zrutvA tu vAkyaM kAkutsthaH sarveSAM samudIritam
7042023c visarjayAm Asa tadA sarvAMs tAJ zatrutApanaH
7043001a visRjya tu suhRdvargaM buddhyA nizcitya rAghavaH
7043001c samIpe dvAHstham AsInam idaM vacanam abravIt
7043002a zIghram Anaya saumitriM lakSmaNaM zubhalakSaNam
7043002c bharataM ca mahAbAhuM zatrughnaM cAparAjitam
7043003a rAmasya bhASitaM zrutvA dvAHstho mUrdhni kRtAJjaliH
7043003c lakSmaNasya gRhaM gatvA pravivezAnivAritaH
7043004a uvAca ca tadA vAkyaM vardhayitvA kRtAJjaliH
7043004c draSTum icchati rAjA tvAM gamyatAM tatra mA ciram
7043005a bADham ity eva saumitriH zrutvA rAghavazAsanam
7043005c prAdravad ratham Aruhya rAghavasya nivezanam
7043006a prayAntaM lakSmaNaM dRSTvA dvAHstho bharatam antikAt
7043006c uvAca prAJjalir vAkyaM rAjA tvAM draSTum icchati
7043007a bharatas tu vacaH zrutvA dvAHsthAd rAmasamIritam
7043007c utpapAtAsanAt tUrNaM padbhyAm eva tato 'gamat
7043008a dRSTvA prayAntaM bharataM tvaramANaH kRtAJjaliH
7043008c zatrughnabhavanaM gatvA tato vAkyaM jagAda ha
7043009a ehy Agaccha raghuzreSTha rAjA tvAM draSTum icchati
7043009c gato hi lakSmaNaH pUrvaM bharataz ca mahAyazAH
7043010a zrutvA tu vacanaM tasya zatrughno rAmazAsanam
7043010c zirasA vandya dharaNIM prayayau yatra rAghavaH
7043011a kumArAn AgatAJ zrutvA cintAvyAkulitendriyaH
7043011c avAkzirA dInamanA dvAHsthaM vacanam abravIt
7043012a pravezaya kumArAMs tvaM matsamIpaM tvarAnvitaH
7043012c eteSu jIvitaM mahyam ete prANA bahizcarAH
7043013a AjJaptAs tu narendreNa kumArAH zuklavAsasaH
7043013c prahvAH prAJjalayo bhUtvA vivizus te samAhitAH
7043014a te tu dRSTvA mukhaM tasya sagrahaM zazinaM yathA
7043014c saMdhyAgatam ivAdityaM prabhayA parivarjitam
7043015a bASpapUrNe ca nayane dRSTvA rAmasya dhImataH
7043015c hatazobhaM yathA padmaM mukhaM vIkSya ca tasya te
7043016a tato 'bhivAdya tvaritAH pAdau rAmasya mUrdhabhiH
7043016c tasthuH samAhitAH sarve rAmaz cAzrUNy avartayat
7043017a tAn pariSvajya bAhubhyAm utthApya ca mahAbhujaH
7043017c AsaneSv Adhvam ity uktvA tato vAkyaM jagAda ha
7043018a bhavanto mama sarvasvaM bhavanto mama jIvitam
7043018c bhavadbhiz ca kRtaM rAjyaM pAlayAmi narezvarAH
7043019a bhavantaH kRtazAstrArthA buddhau ca pariniSThitAH
7043019c saMbhUya ca madartho 'yam anveSTavyo narezvarAH
7044001a teSAM samupaviSTAnAM sarveSAM dInacetasAm
7044001c uvAca vAkyaM kAkutstho mukhena parizuSyatA
7044002a sarve zRNuta bhadraM vo mA kurudhvaM mano 'nyathA
7044002c paurANAM mama sItAyAM yAdRzI vartate kathA
7044003a paurApavAdaH sumahAMs tathA janapadasya ca
7044003c vartate mayi bIbhatsaH sa me marmANi kRntati
7044004a ahaM kila kule jAta ikSvAkUNAM mahAtmanAm
7044004c sItAM pApasamAcArAm AnayeyaM kathaM pure
7044005a jAnAsi hi yathA saumya daNDake vijane vane
7044005c rAvaNena hRtA sItA sa ca vidhvaMsito mayA
7044006a pratyakSaM tava saumitre devAnAM havyavAhanaH
7044006c apApAM maithilIm Aha vAyuz cAkAzagocaraH
7044007a candrAdityau ca zaMsete surANAM saMnidhau purA
7044007c RSINAM caiva sarveSAm apApAM janakAtmajAm
7044008a evaM zuddhasamAcArA devagandharvasaMnidhau
7044008c laGkAdvIpe mahendreNa mama haste nivezitA
7044009a antarAtmA ca me vetti sItAM zuddhAM yazasvinIm
7044009c tato gRhItvA vaidehIm ayodhyAm aham AgataH
7044010a ayaM tu me mahAn vAdaH zokaz ca hRdi vartate
7044010c paurApavAdaH sumahAMs tathA janapadasya ca
7044011a akIrtir yasya gIyeta loke bhUtasya kasya cit
7044011c pataty evAdhamA&l lokAn yAvac chabdaH sa kIrtyate
7044012a akIrtir nindyate daivaiH kIrtir deveSu pUjyate
7044012c kIrtyarthaM ca samArambhaH sarva eva mahAtmanAm
7044013a apy ahaM jIvitaM jahyAM yuSmAn vA puruSarSabhAH
7044013c apavAdabhayAd bhItaH kiM punar janakAtmajAm
7044014a tasmAd bhavantaH pazyantu patitaM zokasAgare
7044014c na hi pazyAmy ahaM bhUyaH kiM cid duHkham ato 'dhikam
7044015a zvas tvaM prabhAte saumitre sumantrAdhiSThitaM ratham
7044015c Aruhya sItAm Aropya viSayAnte samutsRja
7044016a gaGgAyAs tu pare pAre vAlmIkeH sumahAtmanaH
7044016c Azramo divyasaMkAzas tamasAtIram AzritaH
7044017a tatrainAM vijane kakSe visRjya raghunandana
7044017c zIghram Agaccha saumitre kuruSva vacanaM mama
7044018a na cAsmi prativaktavyaH sItAM prati kathaM cana
7044018c aprItiH paramA mahyaM bhavet tu prativArite
7044019a zApitAz ca mayA yUyaM bhujAbhyAM jIvitena ca
7044019c ye mAM vAkyAntare brUyur anunetuM kathaM cana
7044020a mAnayantu bhavanto mAM yadi macchAsane sthitAH
7044020c ito 'dya nIyatAM sItA kuruSva vacanaM mama
7044021a pUrvam ukto 'ham anayA gaGgAtIre mahAzramAn
7044021c pazyeyam iti tasyAz ca kAmaH saMvartyatAm ayam
7044022a evam uktvA tu kAkutstho bASpeNa pihitekSaNaH
7044022c praviveza sa dharmAtmA bhrAtRbhiH parivAritaH
7045001a tato rajanyAM vyuSTAyAM lakSmaNo dInacetanaH
7045001c sumantram abravId vAkyaM mukhena parizuSyatA
7045002a sArathe turagAJ zIghraM yojayasva rathottame
7045002c svAstIrNaM rAjabhavanAt sItAyAz cAsanaM zubham
7045003a sItA hi rAjabhavanAd AzramaM puNyakarmaNAm
7045003c mayA neyA maharSINAM zIghram AnIyatAM rathaH
7045004a sumantras tu tathety uktvA yuktaM paramavAjibhiH
7045004c rathaM suruciraprakhyaM svAstIrNaM sukhazayyayA
7045005a AdAyovAca saumitriM mitrANAM harSavardhanam
7045005c ratho 'yaM samanuprApto yat kAryaM kriyatAM prabho
7045006a evam uktaH sumantreNa rAjavezma sa lakSmaNaH
7045006c pravizya sItAm AsAdya vyAjahAra nararSabhaH
7045007a gaGgAtIre mayA devi munInAm Azrame zubhe
7045007c zIghraM gatvopaneyAsi zAsanAt pArthivasya naH
7045008a evam uktA tu vaidehI lakSmaNena mahAtmanA
7045008c praharSam atulaM lebhe gamanaM cAbhyarocayat
7045009a vAsAMsi ca mahArhANi ratnAni vividhAni ca
7045009c gRhItvA tAni vaidehI gamanAyopacakrame
7045010a imAni munipatnInAM dAsyAmy AbharaNAny aham
7045010c saumitris tu tathety uktvA ratham Aropya maithilIm
7045010e prayayau zIghraturago rAmasyAjJAm anusmaran
7045011a abravIc ca tadA sItA lakSmaNaM lakSmivardhanam
7045011c azubhAni bahUny adya pazyAmi raghunandana
7045012a nayanaM me sphuraty adya gAtrotkampaz ca jAyate
7045012c hRdayaM caiva saumitre asvastham iva lakSaye
7045013a autsukyaM paramaM cApi adhRtiz ca parA mama
7045013c zUnyAm iva ca pazyAmi pRthivIM pRthulocana
7045014a api svasti bhavet tasya bhrAtus te bhrAtRbhiH saha
7045014c zvazrUNAM caiva me vIra sarvAsAm avizeSataH
7045015a pure janapade caiva kuzalaM prANinAm api
7045015c ity aJjalikRtA sItA devatA abhyayAcata
7045016a lakSmaNo 'rthaM tu taM zrutvA zirasA vandya maithilIm
7045016c zivam ity abravId dhRSTo hRdayena vizuSyatA
7045017a tato vAsam upAgamya gomatItIra Azrame
7045017c prabhAte punar utthAya saumitriH sUtam abravIt
7045018a yojayasva rathaM zIghram adya bhAgIrathIjalam
7045018c zirasA dhArayiSyAmi tryambakaH parvate yathA
7045019a so 'zvAn vicArayitvAzu rathe yuktvA manojavAn
7045019c Arohasveti vaidehIM sUtaH prAJjalir abravIt
7045020a sA tu sUtasya vacanAd Aruroha rathottamam
7045020c sItA saumitriNA sArdhaM sumantreNa ca dhImatA
7045021a athArdhadivasaM gatvA bhAgIrathyA jalAzayam
7045021c nirIkSya lakSmaNo dInaH praruroda mahAsvanam
7045022a sItA tu paramAyattA dRSTvA lakSmaNam Aturam
7045022c uvAca vAkyaM dharmajJa kim idaM rudyate tvayA
7045023a jAhnavItIram AsAdya cirAbhilaSitaM mama
7045023c harSakAle kim arthaM mAM viSAdayasi lakSmaNa
7045024a nityaM tvaM rAmapAdeSu vartase puruSarSabha
7045024c kaccid vinAkRtas tena dvirAtre zokam AgataH
7045025a mamApi dayito rAmo jIvitenApi lakSmaNa
7045025c na cAham evaM zocAmi maivaM tvaM bAlizo bhava
7045026a tArayasva ca mAM gaGgAM darzayasva ca tApasAn
7045026c tato dhanAni vAsAMsi dAsyAmy AbharaNAni ca
7045027a tataH kRtvA maharSINAM yathArham abhivAdanam
7045027c tatra caikAM nizAm uSya yAsyAmas tAM purIM punaH
7045028a tasyAs tad vacanaM zrutvA pramRjya nayane zubhe
7045028c titIrSur lakSmaNo gaGgAM zubhAM nAvam upAharat
7046001a atha nAvaM suvistIrNAM naiSAdIM rAghavAnujaH
7046001c Aruroha samAyuktAM pUrvam Aropya maithilIm
7046002a sumantraM caiva sarathaM sthIyatAm iti lakSmaNaH
7046002c uvAca zokasaMtaptaH prayAhIti ca nAvikam
7046003a tatas tIram upAgamya bhAgIrathyAH sa lakSmaNaH
7046003c uvAca maithilIM vAkyaM prAJjalir bASpagadgadaH
7046004a hRdgataM me mahac chalyaM yad asmy AryeNa dhImatA
7046004c asmin nimitte vaidehi lokasya vacanIkRtaH
7046005a zreyo hi maraNaM me 'dya mRtyor vA yat paraM bhavet
7046005c na cAsminn IdRze kArye niyojyo lokanindite
7046006a prasIda na ca me roSaM kartum arhasi suvrate
7046006c ity aJjalikRto bhUmau nipapAta sa lakSmaNaH
7046007a rudantaM prAJjaliM dRSTvA kAGkSantaM mRtyum AtmanaH
7046007c maithilI bhRzasaMvignA lakSmaNaM vAkyam abravIt
7046008a kim idaM nAvagacchAmi brUhi tattvena lakSmaNa
7046008c pazyAmi tvAM ca na svastham api kSemaM mahIpateH
7046009a zApito 'si narendreNa yat tvaM saMtApam AtmanaH
7046009c tad brUyAH saMnidhau mahyam aham AjJApayAmi te
7046010a vaidehyA codyamAnas tu lakSmaNo dInacetanaH
7046010c avAGmukho bASpagalo vAkyam etad uvAca ha
7046011a zrutvA pariSado madhye apavAdaM sudAruNam
7046011c pure janapade caiva tvatkRte janakAtmaje
7046012a na tAni vacanIyAni mayA devi tavAgrataH
7046012c yAni rAjJA hRdi nyastAny amarSaH pRSThataH kRtaH
7046013a sA tvaM tyaktA nRpatinA nirdoSA mama saMnidhau
7046013c paurApavAdabhItena grAhyaM devi na te 'nyathA
7046014a AzramAnteSu ca mayA tyaktavyA tvaM bhaviSyasi
7046014c rAjJaH zAsanam AjJAya tavaivaM kila daurhRdam
7046015a tad etaj jAhnavItIre brahmarSINAM tapovanam
7046015c puNyaM ca ramaNIyaM ca mA viSAdaM kRthAH zubhe
7046016a rAjJo dazarathasyaiSa pitur me munipuMgavaH
7046016c sakhA paramako vipro vAlmIkiH sumahAyazAH
7046017a pAdacchAyAm upAgamya sukham asya mahAtmanaH
7046017c upavAsaparaikAgrA vasa tvaM janakAtmaje
7046018a pativratAtvam AsthAya rAmaM kRtvA sadA hRdi
7046018c zreyas te paramaM devi tathA kRtvA bhaviSyati
7047001a lakSmaNasya vacaH zrutvA dAruNaM janakAtmajA
7047001c paraM viSAdam Agamya vaidehI nipapAta ha
7047002a sA muhUrtam ivAsaMjJA bASpavyAkulitekSaNA
7047002c lakSmaNaM dInayA vAcA uvAca janakAtmajA
7047003a mAmikeyaM tanur nUnaM sRSTA duHkhAya lakSmaNa
7047003c dhAtrA yasyAs tathA me 'dya duHkhamUrtiH pradRzyate
7047004a kiM nu pApaM kRtaM pUrvaM ko vA dArair viyojitaH
7047004c yAhaM zuddhasamAcArA tyaktA nRpatinA satI
7047005a purAham Azrame vAsaM rAmapAdAnuvartinI
7047005c anurudhyApi saumitre duHkhe viparivartinI
7047006a sA kathaM hy Azrame saumya vatsyAmi vijanIkRtA
7047006c AkhyAsyAmi ca kasyAhaM duHkhaM duHkhaparAyaNA
7047007a kiM ca vakSyAmi muniSu kiM mayApakRtaM nRpe
7047007c kasmin vA kAraNe tyaktA rAghaveNa mahAtmanA
7047008a na khalv adyaiva saumitre jIvitaM jAhnavIjale
7047008c tyajeyaM rAjavaMzas tu bhartur me parihAsyate
7047009a yathAjJAM kuru saumitre tyaja mAM duHkhabhAginIm
7047009c nideze sthIyatAM rAjJaH zRNu cedaM vaco mama
7047010a zvazrUNAm avizeSeNa prAJjaliH pragraheNa ca
7047010c zirasA vandya caraNau kuzalaM brUhi pArthivam
7047011a yathA bhrAtRSu vartethAs tathA paureSu nityadA
7047011c paramo hy eSa dharmaH syAd eSA kIrtir anuttamA
7047012a yat tvaM paurajanaM rAjan dharmeNa samavApnuyAH
7047012c ahaM tu nAnuzocAmi svazarIraM nararSabha
7047012e yathApavAdaM paurANAM tathaiva raghunandana
7047013a evaM bruvantyAM sItAyAM lakSmaNo dInacetanaH
7047013c zirasA dharaNIM gatvA vyAhartuM na zazAka ha
7047014a pradakSiNaM ca kRtvA sa rudann eva mahAsvanam
7047014c Aruroha punar nAvaM nAvikaM cAbhyacodayat
7047015a sa gatvA cottaraM kUlaM zokabhArasamanvitaH
7047015c saMmUDha iva duHkhena ratham adhyAruhad drutam
7047016a muhur muhur apAvRtya dRSTvA sItAm anAthavat
7047016c veSTantIM paratIrasthAM lakSmaNaH prayayAv atha
7047017a dUrasthaM ratham Alokya lakSmaNaM ca muhur muhuH
7047017c nirIkSamANAm udvignAM sItAM zokaH samAvizat
7047018a sA duHkhabhArAvanatA tapasvinI; yazodharA nAtham apazyatI satI
7047018c ruroda sA barhiNanAdite vane; mahAsvanaM duHkhaparAyaNA satI
7048001a sItAM tu rudatIM dRSTvA ye tatra munidArakAH
7048001c prAdravan yatra bhagavAn Aste vAlmIkir agryadhIH
7048002a abhivAdya muneH pAdau muniputrA maharSaye
7048002c sarve nivedayAm Asus tasyAs tu ruditasvanam
7048003a adRSTapUrvA bhagavan kasyApy eSA mahAtmanaH
7048003c patnI zrIr iva saMmohAd virauti vikRtasvarA
7048004a bhagavan sAdhu pazyemAM devatAm iva khAc cyutAm
7048004c na hy enAM mAnuSIM vidmaH satkriyAsyAH prayujyatAm
7048005a teSAM tad vacanaM zrutvA buddhyA nizcitya dharmavit
7048005c tapasA labdhacakSuSmAn prAdravad yatra maithilI
7048006a taM tu dezam abhipretya kiM cit padbhyAM mahAmuniH
7048006c arghyam AdAya ruciraM jAhnavItIram AzritaH
7048006e dadarza rAghavasyeSTAM patnIM sItAm anAthavat
7048007a tAM sItAM zokabhArArtAM vAlmIkir munipuMgavaH
7048007c uvAca madhurAM vANIM hlAdayann iva tejasA
7048008a snuSA dazarathasya tvaM rAmasya mahiSI satI
7048008c janakasya sutA rAjJaH svAgataM te pativrate
7048009a AyAnty evAsi vijJAtA mayA dharmasamAdhinA
7048009c kAraNaM caiva sarvaM me hRdayenopalakSitam
7048010a apApAM vedmi sIte tvAM tapolabdhena cakSuSA
7048010c vizuddhabhAvA vaidehi sAmprataM mayi vartase
7048011a AzramasyAvidUre me tApasyas tapasi sthitAH
7048011c tAs tvAM vatse yathA vatsaM pAlayiSyanti nityazaH
7048012a idam arghyaM pratIccha tvaM visrabdhA vigatajvarA
7048012c yathA svagRham abhyetya viSAdaM caiva mA kRthAH
7048013a zrutvA tu bhASitaM sItA muneH paramam adbhutam
7048013c zirasA vandya caraNau tathety Aha kRtAJjaliH
7048014a taM prayAntaM muniM sItA prAJjaliH pRSThato 'nvagAt
7048014c anvayAd yatra tApasyo dharmanityAH samAhitAH
7048015a taM dRSTvA munim AyAntaM vaidehyAnugataM tadA
7048015c upAjagmur mudA yuktA vacanaM cedam abruvan
7048016a svAgataM te munizreSTha cirasyAgamanaM prabho
7048016c abhivAdayAmaH sarvAs tvAm ucyatAM kiM ca kurmahe
7048017a tAsAM tad vacanaM zrutvA vAlmIkir idam abravIt
7048017c sIteyaM samanuprAptA patnI rAmasya dhImataH
7048018a snuSA dazarathasyaiSA janakasya sutA satI
7048018c apApA patinA tyaktA paripAlyA mayA sadA
7048019a imAM bhavatyaH pazyantu snehena parameNa ha
7048019c gauravAn mama vAkyasya pUjyA vo 'stu vizeSataH
7048020a muhur muhuz ca vaidehIM parisAntvya mahAyazAH
7048020c svam AzramaM ziSyavRtaH punar AyAn mahAtapAH
7049001a dRSTvA tu maithilIM sItAm AzramaM saMpravezitAm
7049001c saMtApam akarod ghoraM lakSmaNo dInacetanaH
7049002a abravIc ca mahAtejAH sumantraM mantrasArathim
7049002c sItAsaMtApajaM duHkhaM pazya rAmasya dhImataH
7049003a ato duHkhataraM kiM nu rAghavasya bhaviSyati
7049003c patnIM zuddhasamAcArAM visRjya janakAtmajAm
7049004a vyaktaM daivAd ahaM manye rAghavasya vinAbhavam
7049004c vaidehyA sArathe sArdhaM daivaM hi duratikramam
7049005a yo hi devAn sagandharvAn asurAn saha rAkSasaiH
7049005c nihanyAd rAghavaH kruddhaH sa daivam anuvartate
7049006a purA mama pitur vAkyair daNDake vijane vane
7049006c uSito nava varSANi paJca caiva sudAruNe
7049007a tato duHkhataraM bhUyaH sItAyA vipravAsanam
7049007c paurANAM vacanaM zrutvA nRzaMsaM pratibhAti me
7049008a ko nu dharmAzrayaH sUta karmaNy asmin yazohare
7049008c maithilIM prati saMprAptaH paurair hInArthavAdibhiH
7049009a etA bahuvidhA vAcaH zrutvA lakSmaNabhASitAH
7049009c sumantraH prAJjalir bhUtvA vAkyam etad uvAca ha
7049010a na saMtApas tvayA kAryaH saumitre maithilIM prati
7049010c dRSTam etat purA vipraiH pitus te lakSmaNAgrataH
7049011a bhaviSyati dRDhaM rAmo duHkhaprAyo 'lpasaukhyavAn
7049011c tvAM caiva maithilIM caiva zatrughnabharatau tathA
7049011e saMtyajiSyati dharmAtmA kAlena mahatA mahAn
7049012a na tv idaM tvayi vaktavyaM saumitre bharate 'pi vA
7049012c rAjJA vo 'vyAhRtaM vAkyaM durvAsA yad uvAca ha
7049013a mahArAjasamIpe ca mama caiva nararSabha
7049013c RSiNA vyAhRtaM vAkyaM vasiSThasya ca saMnidhau
7049014a RSes tu vacanaM zrutvA mAm Aha puruSarSabhaH
7049014c sUta na kva cid evaM te vaktavyaM janasaMnidhau
7049015a tasyAhaM lokapAlasya vAkyaM tat susamAhitaH
7049015c naiva jAtv anRtaM kuryAm iti me saumya darzanam
7049016a sarvathA nAsty avaktavyaM mayA saumya tavAgrataH
7049016c yadi te zravaNe zraddhA zrUyatAM raghunandana
7049017a yady apy ahaM narendreNa rahasyaM zrAvitaH purA
7049017c tac cApy udAhariSyAmi daivaM hi duratikramam
7049018a tac chrutvA bhASitaM tasya gambhIrArthapadaM mahat
7049018c tathyaM brUhIti saumitriH sUtaM vAkyam athAbravIt
7050001a tathA saMcoditaH sUto lakSmaNena mahAtmanA
7050001c tad vAkyam RSiNA proktaM vyAhartum upacakrame
7050002a purA nAmnA hi durvAsA atreH putro mahAmuniH
7050002c vasiSThasyAzrame puNye sa vArSikyam uvAsa ha
7050003a tam AzramaM mahAtejAH pitA te sumahAyazAH
7050003c purodhasaM mahAtmAnaM didRkSur agamat svayam
7050004a sa dRSTvA sUryasaMkAzaM jvalantam iva tejasA
7050004c upaviSTaM vasiSThasya savye pArzve mahAmunim
7050004e tau munI tApasazreSThau vinItas tv abhyavAdayat
7050005a sa tAbhyAM pUjito rAjA svAgatenAsanena ca
7050005c pAdyena phalamUlaiz ca so 'py Aste munibhiH saha
7050006a teSAM tatropaviSTAnAM tAs tAH sumadhurAH kathAH
7050006c babhUvuH paramarSINAM madhyAdityagate 'hani
7050007a tataH kathAyAM kasyAM cit prAJjaliH pragraho nRpaH
7050007c uvAca taM mahAtmAnam atreH putraM tapodhanam
7050008a bhagavan kiMpramANena mama vaMzo bhaviSyati
7050008c kimAyuz ca hi me rAmaH putrAz cAnye kimAyuSaH
7050009a rAmasya ca sutA ye syus teSAm AyuH kiyad bhavet
7050009c kAmyayA bhagavan brUhi vaMzasyAsya gatiM mama
7050010a tac chrutvA vyAhRtaM vAkyaM rAjJo dazarathasya tu
7050010c durvAsAH sumahAtejA vyAhartum upacakrame
7050011a ayodhyAyAH patI rAmo dIrghakAlaM bhaviSyati
7050011c sukhinaz ca samRddhAz ca bhaviSyanty asya cAnujAH
7050012a kasmiMz cit karaNe tvAM ca maithilIM ca yazasvinIm
7050012c saMtyajiSyati dharmAtmA kAlena mahatA kila
7050013a dazavarSasahasraNi dazavarSazatAni ca
7050013c rAmo rAjyam upAsitvA brahmalokaM gamiSyati
7050014a samRddhair hayamedhaiz ca iSTvA parapuraMjayaH
7050014c rAjavaMzAMz ca kAkutstho bahUn saMsthApayiSyati
7050015a sa sarvam akhilaM rAjJo vaMzasyAsya gatAgatam
7050015c AkhyAya sumahAtejAs tUSNIm AsIn mahAdyutiH
7050016a tUSNIMbhUte munau tasmin rAjA dazarathas tadA
7050016c abhivAdya mahAtmAnau punar AyAt purottamam
7050017a etad vaco mayA tatra muninA vyAhRtaM purA
7050017c zrutaM hRdi ca nikSiptaM nAnyathA tad bhaviSyati
7050018a evaM gate na saMtApaM gantum arhasi rAghava
7050018c sItArthe rAghavArthe vA dRDho bhava narottama
7050019a tac chrutvA vyAhRtaM vAkyaM sUtasya paramAdbhutam
7050019c praharSam atulaM lebhe sAdhu sAdhv iti cAbravIt
7050020a tayoH saMvadator evaM sUtalakSmaNayoH pathi
7050020c astam arko gato vAsaM gomatyAM tAv athoSatuH
7051001a tatra tAM rajanIm uSya gomatyAM raghunandanaH
7051001c prabhAte punar utthAya lakSmaNaH prayayau tadA
7051002a tato 'rdhadivase prApte praviveza mahArathaH
7051002c ayodhyAM ratnasaMpUrNAM hRSTapuSTajanAvRtAm
7051003a saumitris tu paraM dainyaM jagAma sumahAmatiH
7051003c rAmapAdau samAsAdya vakSyAmi kim ahaM gataH
7051004a tasyaivaM cintayAnasya bhavanaM zazisaMnibham
7051004c rAmasya paramodAraM purastAt samadRzyata
7051005a rAjJas tu bhavanadvAri so 'vatIrya narottamaH
7051005c avAGmukho dInamanAH pravivezAnivAritaH
7051006a sa dRSTvA rAghavaM dInam AsInaM paramAsane
7051006c netrAbhyAm azrupUrNAbhyAM dadarzAgrajam agrataH
7051007a jagrAha caraNau tasya lakSmaNo dInacetanaH
7051007c uvAca dInayA vAcA prAJjaliH susamAhitaH
7051008a AryasyAjJAM puraskRtya visRjya janakAtmajAm
7051008c gaGgAtIre yathoddiSTe vAlmIker Azrame zubhe
7051008e punar asmy Agato vIra pAdamUlam upAsitum
7051009a mA zucaH puruSavyAghra kAlasya gatir IdRzI
7051009c tvadvidhA na hi zocanti sattvavanto manasvinaH
7051010a sarve kSayAntA nicayAH patanAntAH samucchrayAH
7051010c saMyogA viprayogAntA maraNAntaM ca jIvitam
7051011a zaktas tvam AtmanAtmAnaM vijetuM manasaiva hi
7051011c lokAn sarvAMz ca kAkutstha kiM punar duHkham IdRzam
7051012a nedRzeSu vimuhyanti tvadvidhAH puruSarSabhAH
7051012c yadarthaM maithilI tyaktA apavAdabhayAn nRpa
7051013a sa tvaM puruSazArdUla dhairyeNa susamAhitaH
7051013c tyajemAM durbalAM buddhiM saMtApaM mA kuruSva ha
7051014a evam uktas tu kAkutstho lakSmaNena mahAtmanA
7051014c uvAca parayA prItyA saumitriM mitravatsalam
7051015a evam etan narazreSTha yathA vadasi lakSmaNa
7051015c paritoSaz ca me vIra mama kAryAnuzAsane
7051016a nirvRtiz ca kRtA saumya saMtApaz ca nirAkRtaH
7051016c bhavadvAkyaiH sumadhurair anunIto 'smi lakSmaNa
7052001a tataH sumantras tv Agamya rAghavaM vAkyam abravIt
7052001c ete nivAritA rAjan dvAri tiSThanti tApasAH
7052002a bhArgavaM cyavanaM nAma puraskRtya maharSayaH
7052002c darzanaM te mahArAja codayanti kRtatvarAH
7052002e prIyamANA naravyAghra yamunAtIravAsinaH
7052003a tasya tad vacanaM zrutvA rAmaH provAca dharmavit
7052003c pravezyantAM mahAtmAno bhArgavapramukhA dvijAH
7052004a rAjJas tv AjJAM puraskRtya dvAHstho mUrdhni kRtAJjaliH
7052004c pravezayAm Asa tatas tApasAn saMmatAn bahUn
7052005a zataM samadhikaM tatra dIpyamAnaM svatejasA
7052005c praviSTaM rAjabhavanaM tApasAnAM mahAtmanAm
7052006a te dvijAH pUrNakalazaiH sarvatIrthAmbu satkRtam
7052006c gRhItvA phalamUlaM ca rAmasyAbhyAharan bahu
7052007a pratigRhya tu tat sarvaM rAmaH prItipuraskRtaH
7052007c tIrthodakAni sarvANi phalAni vividhAni ca
7052008a uvAca ca mahAbAhuH sarvAn eva mahAmunIn
7052008c imAny AsanamukhyAni yathArham upavizyatAm
7052009a rAmasya bhASitaM zrutvA sarva eva maharSayaH
7052009c bRsISu rucirAkhyAsu niSeduH kAJcanISu te
7052010a upaviSTAn RSIMs tatra dRSTvA parapuraMjayaH
7052010c prayataH prAJjalir bhUtvA rAghavo vAkyam abravIt
7052011a kim AgamanakAryaM vaH kiM karomi tapodhanAH
7052011c AjJApyo 'haM maharSINAM sarvakAmakaraH sukham
7052012a idaM rAjyaM ca sakalaM jIvitaM ca hRdi sthitam
7052012c sarvam etad dvijArthaM me satyam etad bravImi vaH
7052013a tasya tad vacanaM zrutvA sAdhuvAdo mahAn abhUt
7052013c RSINAm ugratapasAM yamunAtIravAsinAm
7052014a Ucuz ca te mahAtmAno harSeNa mahatAnvitAH
7052014c upapannaM narazreSTha tavaiva bhuvi nAnyataH
7052015a bahavaH pArthivA rAjann atikrAntA mahAbalAH
7052015c kAryagauravam azrutvA pratijJAM nAbhyarocayan
7052016a tvayA punar brAhmaNagauravAd iyaM; kRtA pratijJA hy anavekSya kAraNam
7052016c kuruSva kartA hy asi nAtra saMzayo; mahAbhayAt trAtum RSIMs tvam arhasi
7053001a bruvadbhir evam RSibhiH kAkutstho vAkyam abravIt
7053001c kiM kAryaM brUta bhavatAM bhayaM nAzayitAsmi vaH
7053002a tathA vadati kAkutsthe bhArgavo vAkyam abravIt
7053002c bhayaM naH zRNu yan mUlaM dezasya ca narezvara
7053003a pUrvaM kRtayuge rAma daiteyaH sumahAbalaH
7053003c lolAputro 'bhavaj jyeSTho madhur nAma mahAsuraH
7053004a brahmaNyaz ca zaraNyaz ca buddhyA ca pariniSThitaH
7053004c suraiz ca paramodAraiH prItis tasyAtulAbhavat
7053005a sa madhur vIryasaMpanno dharme ca susamAhitaH
7053005c bahumAnAc ca rudreNa dattas tasyAdbhuto varaH
7053006a zUlaM zUlAd viniSkRSya mahAvIryaM mahAprabham
7053006c dadau mahAtmA suprIto vAkyaM caitad uvAca ha
7053007a tvayAyam atulo dharmo matprasAdAt kRtaH zubhaH
7053007c prItyA paramayA yukto dadAmy Ayudham uttamam
7053008a yAvat suraiz ca vipraiz ca na virudhyer mahAsura
7053008c tAvac chUlaM tavedaM syAd anyathA nAzam ApnuyAt
7053009a yaz ca tvAm abhiyuJjIta yuddhAya vigatajvaraH
7053009c taM zUlaM bhasmasAt kRtvA punar eSyati te karam
7053010a evaM rudrAd varaM labdhvA bhUya eva mahAsuraH
7053010c praNipatya mahAdevaM vAkyam etad uvAca ha
7053011a bhagavan mama vaMzasya zUlam etad anuttamam
7053011c bhavet tu satataM deva surANAm Izvaro hy asi
7053012a taM bruvANaM madhuM devaH sarvabhUtapatiH zivaH
7053012c pratyuvAca mahAdevo naitad evaM bhaviSyati
7053013a mA bhUt te viphalA vANI matprasAdakRtA zubhA
7053013c bhavataH putram ekaM tu zUlam etad gamiSyati
7053014a yAvat karasthaH zUlo 'yaM bhaviSyati sutasya te
7053014c avadhyaH sarvabhUtAnAM zUlahasto bhaviSyati
7053015a evaM madhur varaM labdhvA devAt sumahad adbhutam
7053015c bhavanaM cAsurazreSThaH kArayAm Asa suprabham
7053016a tasya patnI mahAbhAgA priyA kumbhInasI hi yA
7053016c vizvAvasor apatyaM sA hy analAyAM mahAprabhA
7053017a tasyAH putro mahAvIryo lavaNo nAma dAruNaH
7053017c bAlyAt prabhRti duSTAtmA pApAny eva samAcarat
7053018a taM putraM durvinItaM tu dRSTvA duHkhasamanvitaH
7053018c madhuH sa zokam Apede na cainaM kiM cid abravIt
7053019a sa vihAya imaM lokaM praviSTo varuNAlayam
7053019c zUlaM nivezya lavaNe varaM tasmai nyavedayat
7053020a sa prabhAvena zUlasya daurAtmyenAtmanas tathA
7053020c saMtApayati lokAMs trIn vizeSeNa tu tApasAn
7053021a evaMprabhAvo lavaNaH zUlaM caiva tathAvidham
7053021c zrutvA pramANaM kAkutstha tvaM hi naH paramA gatiH
7053022a bahavaH pArthivA rAma bhayArtair RSibhiH purA
7053022c abhayaM yAcitA vIra trAtAraM na ca vidmahe
7053023a te vayaM rAvaNaM zrutvA hataM sabalavAhanam
7053023c trAtAraM vidmahe rAma nAnyaM bhuvi narAdhipam
7053023e tat paritrAtum icchAmo lavaNAd bhayapIDitAH
7054001a tathokte tAn RSIn rAmaH pratyuvAca kRtAJjaliH
7054001c kimAhAraH kimAcAro lavaNaH kva ca vartate
7054002a rAghavasya vacaH zrutvA RSayaH sarva eva te
7054002c tato nivedayAm Asur lavaNo vavRdhe yathA
7054003a AhAraH sarvasattvAni vizeSeNa ca tApasAH
7054003c AcAro raudratA nityaM vAso madhuvane sadA
7054004a hatvA dazasahasrANi siMhavyAghramRgadvipAn
7054004c mAnuSAMz caiva kurute nityam AhAram Ahnikam
7054005a tato 'parANi sattvAni khAdate sa mahAbalaH
7054005c saMhAre samanuprApte vyAditAsya ivAntakaH
7054006a tac chrutvA rAghavo vAkyam uvAca sa mahAmunIn
7054006c ghAtayiSyAmi tad rakSo vyapagacchatu vo bhayam
7054007a tathA teSAM pratijJAya munInAm ugratejasAm
7054007c sa bhrAtqn sahitAn sarvAn uvAca raghunandanaH
7054008a ko hantA lavaNaM vIrAH kasyAMzaH sa vidhIyatAm
7054008c bharatasya mahAbAhoH zatrughnasyAtha vA punaH
7054009a rAghaveNaivam uktas tu bharato vAkyam abravIt
7054009c aham enaM vadhiSyAmi mamAMzaH sa vidhIyatAm
7054010a bharatasya vacaH zrutvA zauryavIryasamanvitam
7054010c lakSmaNAvarajas tasthau hitvA sauvarNam Asanam
7054011a zatrughnas tv abravId vAkyaM praNipatya narAdhipam
7054011c kRtakarmA mahAbAhur madhyamo raghunandanaH
7054012a AryeNa hi purA zUnyA ayodhyA rakSitA purI
7054012c saMtApaM hRdaye kRtvA AryasyAgamanaM prati
7054013a duHkhAni ca bahUnIha anubhUtAni pArthiva
7054013c zayAno duHkhazayyAsu nandigrAme mahAtmanA
7054014a phalamUlAzano bhUtvA jaTAcIradharas tathA
7054014c anubhUyedRzaM duHkham eSa rAghavanandanaH
7054014e preSye mayi sthite rAjan na bhUyaH klezam ApnuyAt
7054015a tathA bruvati zatrughne rAghavaH punar abravIt
7054015c evaM bhavatu kAkutstha kriyatAM mama zAsanam
7054016a rAjye tvAm abhiSekSyAmi madhos tu nagare zubhe
7054016c nivezaya mahAbAho bharataM yady avekSase
7054017a zUras tvaM kRtavidyaz ca samarthaH saMnivezane
7054017c nagaraM madhunA juSTaM tathA janapadAJ zubhAn
7054018a yo hi vaMzaM samutpATya pArthivasya punaH kSaye
7054018c na vidhatte nRpaM tatra narakaM sa nigacchati
7054019a sa tvaM hatvA madhusutaM lavaNaM pApanizcayam
7054019c rAjyaM prazAdhi dharmeNa vAkyaM me yady avekSase
7054020a uttaraM ca na vaktavyaM zUra vAkyAntare mama
7054020c bAlena pUrvajasyAjJA kartavyA nAtra saMzayaH
7054021a abhiSekaM ca kAkutstha pratIcchasva mayodyatam
7054021c vasiSThapramukhair viprair vidhimantrapuraskRtam
7055001a evam uktas tu rAmeNa parAM vrIDAm upAgataH
7055001c zatrughno vIryasaMpanno mandaM mandam uvAca ha
7055002a avazyaM karaNIyaM ca zAsanaM puruSarSabha
7055002c tava caiva mahAbhAga zAsanaM duratikramam
7055002e ayaM kAmakaro rAjaMs tavAsmi puruSarSabha
7055003a evam ukte tu zUreNa zatrughnena mahAtmanA
7055003c uvAca rAmaH saMhRSTo lakSmaNaM bharataM tathA
7055004a saMbhArAn abhiSekasya AnayadhvaM samAhitAH
7055004c adyaiva puruSavyAghram abhiSekSyAmi durjayam
7055005a purodhasaM ca kAkutsthau naigamAn Rtvijas tathA
7055005c mantriNaz caiva me sarvAn AnayadhvaM mamAjJayA
7055006a rAjJaH zAsanam AjJAya tathAkurvan mahArathAH
7055006c abhiSekasamArambhaM puraskRtya purodhasaM
7055006e praviSTA rAjabhavanaM puraMdaragRhopamam
7055007a tato 'bhiSeko vavRdhe zatrughnasya mahAtmanaH
7055007c saMpraharSakaraH zrImAn rAghavasya purasya ca
7055008a tato 'bhiSiktaM zatrughnam aGkam Aropya rAghavaH
7055008c uvAca madhurAM vANIM tejas tasyAbhipUrayan
7055009a ayaM zaras tv amoghas te divyaH parapuraMjayaH
7055009c anena lavaNaM saumya hantAsi raghunandana
7055010a sRSTaH zaro 'yaM kAkutstha yadA zete mahArNave
7055010c svayambhUr ajito devo yaM nApazyan surAsurAH
7055011a adRzyaH sarvabhUtAnAM tenAyaM hi zarottamaH
7055011c sRSTaH krodhAbhibhUtena vinAzArthaM durAtmanoH
7055011e madhukaiTabhayor vIra vighAte vartamAnayoH
7055012a sraSTukAmena lokAMs trIMs tau cAnena hatau yudhi
7055012c anena zaramukhyena tato lokAMz cakAra saH
7055013a nAyaM mayA zaraH pUrvaM rAvaNasya vadhArthinA
7055013c muktaH zatrughna bhUtAnAM mahAMs trAso bhaved iti
7055014a yac ca tasya mahac chUlaM tryambakeNa mahAtmanA
7055014c dattaM zatruvinAzAya madhor Ayudham uttamam
7055015a tat saMnikSipya bhavane pUjyamAnaM punaH punaH
7055015c dizaH sarvAH samAlokya prApnoty AhAram AtmanaH
7055016a yadA tu yuddham AkAGkSan kaz cid enaM samAhvayet
7055016c tadA zUlaM gRhItvA tad bhasma rakSaH karoti tam
7055017a sa tvaM puruSazArdUla tam Ayudhavivarjitam
7055017c apraviSTapuraM pUrvaM dvAri tiSTha dhRtAyudhaH
7055018a apraviSTaM ca bhavanaM yuddhAya puruSarSabha
7055018c AhvayethA mahAbAho tato hantAsi rAkSasam
7055019a anyathA kriyamANe tu avadhyaH sa bhaviSyati
7055019c yadi tv evaM kRte vIra vinAzam upayAsyati
7055020a etat te sarvam AkhyAtaM zUlasya ca viparyayam
7055020c zrImataH zitikaNThasya kRtyaM hi duratikramam
7056001a evam uktvA tu kAkutsthaM prazasya ca punaH punaH
7056001c punar evAparaM vAkyam uvAca raghunandanaH
7056002a imAny azvasahasrANi catvAri puruSarSabha
7056002c rathAnAM ca sahasre dve gajAnAM zatam eva ca
7056003a antarApaNavIthyaz ca nAnApaNyopazobhitAH
7056003c anugacchantu zatrughna tathaiva naTanartakAH
7056004a hiraNyasya suvarNasya ayutaM puruSarSabha
7056004c gRhItvA gaccha zatrughna paryAptadhanavAhanaH
7056005a balaM ca subhRtaM vIra hRSTapuSTam anuttamam
7056005c saMbhASya saMpradAnena raJjayasva narottama
7056006a na hy arthAs tatra tiSThanti na dArA na ca bAndhavAH
7056006c suprIto bhRtyavargas tu yatra tiSThati rAghava
7056007a ato hRSTajanAkIrNAM prasthApya mahatIM camUm
7056007c eka eva dhanuSpAnis tad gaccha tvaM madhor vanam
7056008a yathA tvAM na prajAnAti gacchantaM yuddhakAGkSiNam
7056008c lavaNas tu madhoH putras tathA gaccher azaGkitaH
7056009a na tasya mRtyur anyo 'sti kaz cid dhi puruSarSabha
7056009c darzanaM yo 'bhigaccheta sa vadhyo lavaNena hi
7056010a sa grISme vyapayAte tu varSarAtra upasthite
7056010c hanyAs tvaM lavaNaM saumya sa hi kAlo 'sya durmateH
7056011a maharSIMs tu puraskRtya prayAntu tava sainikAH
7056011c yathA grISmAvazeSeNa tareyur jAhnavIjalam
7056012a tataH sthApya balaM sarvaM nadItIre samAhitaH
7056012c agrato dhanuSA sArdhaM gaccha tvaM laghuvikrama
7056013a evam uktas tu rAmeNa zatrughnas tAn mahAbalAn
7056013c senAmukhyAn samAnIya tato vAkyam uvAca ha
7056014a ete vo gaNitA vAsA yatra yatra nivatsyatha
7056014c sthAtavyaM cAvirodhena yathA bAdhA na kasya cit
7056015a tathA tAMs tu samAjJApya niryApya ca mahad balam
7056015c kausalyAM ca sumitrAM ca kaikeyIM cAbhyavAdayat
7056016a rAmaM pradakSiNaM kRtvA zirasAbhipraNamya ca
7056016c rAmeNa cAbhyanujJAtaH zatrughnaH zatrutApanaH
7056017a lakSmaNaM bharataM caiva praNipatya kRtAJjaliH
7056017c purodhasaM vasiSThaM ca zatrughnaH prayatAtmavAn
7056017e pradakSiNam atho kRtvA nirjagAma mahAbalaH
7057001a prasthApya tad balaM sarvaM mAsamAtroSitaH pathi
7057001c eka evAzu zatrughno jagAma tvaritas tadA
7057002a dvirAtram antare zUra uSya rAghavanandanaH
7057002c vAlmIker AzramaM puNyam agacchad vAsam uttamam
7057003a so 'bhivAdya mahAtmAnaM vAlmIkiM munisattamam
7057003c kRtAJjalir atho bhUtvA vAkyam etad uvAca ha
7057004a bhagavan vastum icchAmi guroH kRtyAd ihAgataH
7057004c zvaH prabhAte gamiSyAmi pratIcIM vAruNIM dizam
7057005a zatrughnasya vacaH zrutvA prahasya munipuMgavaH
7057005c pratyuvAca mahAtmAnaM svAgataM te mahAyazaH
7057006a svam Azramam idaM saumya rAghavANAM kulasya ha
7057006c AsanaM pAdyam arghyaM ca nirvizaGkaH pratIccha me
7057007a pratigRhya tataH pUjAM phalamUlaM ca bhojanam
7057007c bhakSayAm Asa kAkutsthas tRptiM ca paramAM gataH
7057008a sa tu bhuktvA mahAbAhur maharSiM tam uvAca ha
7057008c pUrvaM yajJavibhUtIyaM kasyAzramasamIpataH
7057009a tasya tadbhASitaM zrutvA vAlmIkir vAkyam abravIt
7057009c zatrughna zRNu yasyedaM babhUvAyatanaM purA
7057010a yuSmAkaM pUrvako rAjA sudAsasya mahAtmanaH
7057010c putro mitrasaho nAma vIryavAn atidhArmikaH
7057011a sa bAla eva saudAso mRgayAm upacakrame
7057011c caJcUryamANaM dadRze sa zUro rAkSasadvayam
7057012a zArdUlarUpiNau ghorau mRgAn bahusahasrazaH
7057012c bhakSayANAv asaMtuSTau paryAptiM ca na jagmatuH
7057013a sa tu tau rAkSasau dRSTvA nirmRgaM ca vanaM kRtam
7057013c krodhena mahatAviSTo jaghAnaikaM maheSuNA
7057014a vinipAtya tam ekaM tu saudAsaH puruSarSabhaH
7057014c vijvaro vigatAmarSo hataM rakSo 'bhyavaikSata
7057015a nirIkSamANaM taM dRSTvA sahAyas tasya rakSasaH
7057015c saMtApam akarod ghoraM saudAsaM cedam abravIt
7057016a yasmAd anaparAddhaM tvaM sahAyaM mama jaghnivAn
7057016c tasmAt tavApi pApiSTha pradAsyAmi pratikriyAm
7057017a evam uktvA tu taM rakSas tatraivAntaradhIyata
7057017c kAlaparyAyayogena rAjA mitrasaho 'bhavat
7057018a rAjApi yajate yajJaM tasyAzramasamIpataH
7057018c azvamedhaM mahAyajJaM taM vasiSTho 'bhyapAlayat
7057019a tatra yajJo mahAn AsId bahuvarSagaNAyutAn
7057019c samRddhaH parayA lakSmyA devayajJasamo 'bhavat
7057020a athAvasAne yajJasya pUrvavairam anusmaran
7057020c vasiSTharUpI rAjAnam iti hovAca rAkSasaH
7057021a adya yajJAvasAnAnte sAmiSaM bhojanaM mama
7057021c dIyatAm iti zIghraM vai nAtra kAryA vicAraNA
7057022a tac chrutvA vyAhRtaM vAkyaM rakSasA kAmarUpiNA
7057022c bhakSasaMskArakuzalam uvAca pRthivIpatiH
7057023a haviSyaM sAmiSaM svAdu yathA bhavati bhojanam
7057023c tathA kuruSva zIghraM vai parituSyed yathA guruH
7057024a zAsanAt pArthivendrasya sUdaH saMbhrAntamAnasaH
7057024c sa ca rakSaH punas tatra sUdaveSam athAkarot
7057025a sa mAnuSam atho mAMsaM pArthivAya nyavedayat
7057025c idaM svAdu haviSyaM ca sAmiSaM cAnnam AhRtam
7057026a sa bhojanaM vasiSThAya patnyA sArdham upAharat
7057026c madayantyA naravyAghra sAmiSaM rakSasA hRtam
7057027a jJAtvA tadAmiSaM vipro mAnuSaM bhojanAhRtam
7057027c krodhena mahatAviSTo vyAhartum upacakrame
7057028a yasmAt tvaM bhojanaM rAjan mamaitad dAtum icchasi
7057028c tasmAd bhojanam etat te bhaviSyati na saMzayaH
7057029a sa rAjA saha patnyA vai praNipatya muhur muhuH
7057029c punar vasiSThaM provAca yad uktaM brahmarUpiNA
7057030a tac chrutA pArthivendrasya rakSasA vikRtaM ca tat
7057030c punaH provAca rAjAnaM vasiSThaH puruSarSabham
7057031a mayA roSaparItena yad idaM vyAhRtaM vacaH
7057031c naitac chakyaM vRthA kartuM pradAsyAmi ca te varam
7057032a kAlo dvAdaza varSANi zApasyAsya bhaviSyati
7057032c matprasAdAc ca rAjendra atItaM na smariSyasi
7057033a evaM sa rAjA taM zApam upabhujyArimardanaH
7057033c pratilebhe punA rAjyaM prajAz caivAnvapAlayat
7057034a tasya kalmASapAdasya yajJasyAyatanaM zubham
7057034c Azramasya samIpe 'smin yasmin pRcchasi rAghava
7057035a tasya tAM pArthivendrasya kathAM zrutvA sudAruNAm
7057035c viveza parNazAlAyAM maharSim abhivAdya ca
7058001a yAm eva rAtriM zatrughnaH parNazAlAM samAvizat
7058001c tAm eva rAtriM sItApi prasUtA dArakadvayam
7058002a tato 'rdharAtrasamaye bAlakA munidArakAH
7058002c vAlmIkeH priyam AcakhyuH sItAyAH prasavaM zubham
7058002e tasya rakSAM mahAtejaH kuru bhUtavinAzinIm
7058003a teSAM tad vacanaM zrutvA munir harSam upAgamat
7058003c bhUtaghnIM cAkarot tAbhyAM rakSAM rakSovinAzinIm
7058004a kuzamuSTim upAdAya lavaM caiva tu sa dvijaH
7058004c vAlmIkiH pradadau tAbhyAM rakSAM bhUtavinAzinIm
7058005a yas tayoH pUrvajo jAtaH sa kuzair mantrasaMskRtaiH
7058005c nirmArjanIyas tu bhavet kuza ity asya nAmataH
7058006a yaz cAparo bhavet tAbhyAM lavena susamAhitaH
7058006c nirmArjanIyo vRddhAbhir lavaz ceti sa nAmataH
7058007a evaM kuzalavau nAmnA tAv ubhau yamajAtakau
7058007c matkRtAbhyAM ca nAmabhyAM khyAtiyuktau bhaviSyataH
7058008a te rakSAM jagRhus tAM ca munihastAt samAhitAH
7058008c akurvaMz ca tato rakSAM tayor vigatakalmaSAH
7058009a tathA tAM kriyamANAM tu rakSAM gotraM ca nAma ca
7058009c saMkIrtanaM ca rAmasya sItAyAH prasavau zubhau
7058010a ardhArAtre tu zatrughnaH zuzrAva sumahat priyam
7058010c parNazAlAM gato rAtrau diSTyA diSTyeti cAbravIt
7058011a tathA tasya prahRSTasya zatrughnasya mahAtmanaH
7058011c vyatItA vArSikI rAtriH zrAvaNI laghuvikramA
7058012a prabhAte tu mahAvIryaH kRtvA paurvAhNikaM kramam
7058012c muniM prAJjalir Amantrya prAyAt pazcAnmukhaH punaH
7058013a sa gatvA yamunAtIraM saptarAtroSitaH pathi
7058013c RSINAM puNyakIrtInAm Azrame vAsam abhyayAt
7058014a sa tatra munibhiH sArdhaM bhArgavapramukhair nRpaH
7058014c kathAbhir bahurUpAbhir vAsaM cakre mahAyazAH
7059001a atha rAtryAM pravRttAyAM zatrughno bhRgunandanam
7059001c papraccha cyavanaM vipraM lavaNasya balAbalam
7059002a zUlasya ca balaM brahman ke ca pUrvaM nipAtitAH
7059002c anena zUlamukhena dvandvayuddham upAgatAH
7059003a tasya tadbhASitaM zrutvA zatrughnasya mahAtmanaH
7059003c pratyuvAca mahAtejAz cyavano raghunandanam
7059004a asaMkhyeyAni karmANi yAny asya puruSarSabha
7059004c ikSvAkuvaMzaprabhave yad vRttaM tac chRNuSva me
7059005a ayodhyAyAM purA rAjA yuvanAzvasuto balI
7059005c mAndhAtA iti vikhyAtas triSu lokeSu vIryavAn
7059006a sa kRtvA pRthivIM kRtsnAM zAsane pRthivIpatiH
7059006c suralokam atho jetum udyogam akaron nRpaH
7059007a indrasya tu bhayaM tIvraM surANAM ca mahAtmanAm
7059007c mAndhAtari kRtodyoge devalokajigISayA
7059008a ardhAsanena zakrasya rAjyArdhena ca pArthivaH
7059008c vandyamAnaH suragaNaiH pratijJAm adhyarohata
7059009a tasya pApam abhiprAyaM viditvA pAkazAsanaH
7059009c sAntvapUrvam idaM vAkyam uvAca yuvanAzvajam
7059010a rAjA tvaM mAnuSe loke na tAvat puruSarSabha
7059010c akRtvA pRthivIM vazyAM devarAjyam ihecchasi
7059011a yadi vIra samagrA te medinI nikhilA vaze
7059011c devarAjyaM kuruSveha sabhRtyabalavAhanaH
7059012a indram evaM bruvANaM tu mAndhAtA vAkyam abravIt
7059012c kva me zakra pratihataM zAsanaM pRthivItale
7059013a tam uvAca sahasrAkSo lavaNo nAma rAkSasaH
7059013c madhuputro madhuvane nAjJAM te kurute 'nagha
7059014a tac chrutvA vipriyaM ghoraM sahasrAkSeNa bhASitam
7059014c vrIDito 'vAGmukho rAjA vyAhartuM na zazAka ha
7059015a Amantrya tu sahasrAkSaM hriyA kiM cid avAGmukhaH
7059015c punar evAgamac chrImAn imaM lokaM narezvaraH
7059016a sa kRtvA hRdaye 'marSaM sabhRtyabalavAhanaH
7059016c AjagAma madhoH putraM vaze kartum aninditaH
7059017a sa kAGkSamANo lavaNaM yuddhAya puruSarSabhaH
7059017c dUtaM saMpreSayAm Asa sakAzaM lavaNasya saH
7059018a sa gatvA vipriyANy Aha bahUni madhunaH sutam
7059018c vadantam evaM taM dUtaM bhakSayAm Asa rAkSasaH
7059019a cirAyamANe dUte tu rAjA krodhasamanvitaH
7059019c ardayAm Asa tad rakSaH zaravRSTyA samantataH
7059020a tataH prahasya lavaNaH zUlaM jagrAha pANinA
7059020c vadhAya sAnubandhasya mumocAyudham uttamam
7059021a tac chUlaM dIpyamAnaM tu sabhRtyabalavAhanam
7059021c bhasmIkRtya nRpaM bhUyo lavaNasyAgamat karam
7059022a evaM sa rAjA sumahAn hataH sabalavAhanaH
7059022c zUlasya ca balaM vIra aprameyam anuttamam
7059023a zvaH prabhAte tu lavaNaM vadhiSyasi na saMzayaH
7059023c agRhItAyudhaM kSipraM dhruvo hi vijayas tava
7060001a kathAM kathayatAM teSAM jayaM cAkAGkSatAM zubham
7060001c vyatItA rajanI zIghraM zatrughnasya mahAtmanaH
7060002a tataH prabhAte vimale tasmin kAle sa rAkSasaH
7060002c nirgatas tu purAd vIro bhakSAhArapracoditaH
7060003a etasminn antare zUraH zatrughno yamunAM nadIm
7060003c tIrtvA madhupuradvAri dhanuSpANir atiSThata
7060004a tato 'rdhadivase prApte krUrakarmA sa rAkSasaH
7060004c Agacchad bahusAhasraM prANinAm udvahan bharam
7060005a tato dadarza zatrughnaM sthitaM dvAri dhRtAyudham
7060005c tam uvAca tato rakSaH kim anena kariSyasi
7060006a IdRzAnAM sahasrANi sAyudhAnAM narAdhama
7060006c bhakSitAni mayA roSAt kAlam AkAGkSase nu kim
7060007a AhAraz cApy asaMpUrNo mamAyaM puruSAdhama
7060007c svayaM praviSTo nu mukhaM katham AsAdya durmate
7060008a tasyaivaM bhASamANasya hasataz ca muhur muhuH
7060008c zatrughno vIryasaMpanno roSAd azrUNy avartayat
7060009a tasya roSAbhibhUtasya zatrughnasya mahAtmanaH
7060009c tejomayA marIcyas tu sarvagAtrair viniSpatan
7060010a uvAca ca susaMkruddhaH zatrughnas taM nizAcaram
7060010c yoddhum icchAmi durbuddhe dvandvayuddhaM tvayA saha
7060011a putro dazarathasyAhaM bhrAtA rAmasya dhImataH
7060011c zatrughno nAma zatrughno vadhAkAGkSI tavAgataH
7060012a tasya me yuddhakAmasya dvandvayuddhaM pradIyatAm
7060012c zatrus tvaM sarvajIvAnAM na me jIvan gamiSyasi
7060013a tasmiMs tathA bruvANe tu rAkSasaH prahasann iva
7060013c pratyuvAca narazreSThaM diSTyA prApto 'si durmate
7060014a mama mAtRSvasur bhrAtA rAvaNo nAma rAkSasaH
7060014c hato rAmeNa durbuddhe strIhetoH puruSAdhama
7060015a tac ca sarvaM mayA kSAntaM rAvaNasya kulakSayam
7060015c avajJAM purataH kRtvA mayA yUyaM vizeSataH
7060016a na hatAz ca hi me sarve paribhUtAs tRNaM yathA
7060016c bhUtAz caiva bhaviSyAz ca yUyaM ca puruSAdhamAH
7060017a tasya te yuddhakAmasya yuddhaM dAsyAmi durmate
7060017c IpsitaM yAdRzaM tubhyaM sajjaye yAvad Ayudham
7060018a tam uvAcAtha zatrughnaH kva me jIvan gamiSyasi
7060018c durbalo 'py AgataH zatrur na moktavyaH kRtAtmanA
7060019a yo hi viklavayA buddhyA prasaraM zatrave dadau
7060019c sa hato mandabuddhitvAd yathA kApuruSas tathA
7061001a tac chrutvA bhASitaM tasya zatrughnasya mahAtmanaH
7061001c krodham AhArayat tIvraM tiSTha tiSTheti cAbravIt
7061002a pANau pANiM viniSpiSya dantAn kaTakaTAyya ca
7061002c lavaNo raghuzArdUlam AhvayAm Asa cAsakRt
7061003a taM bruvANaM tathA vAkyaM lavaNaM ghoravikramam
7061003c zatrughno deva zatrughna idaM vacanam abravIt
7061004a zatrughno na tadA jAto yadAnye nirjitAs tvayA
7061004c tad adya bANAbhihato vraja taM yamasAdanam
7061005a RSayo 'py adya pApAtman mayA tvAM nihataM raNe
7061005c pazyantu viprA vidvAMsas tridazA iva rAvaNam
7061006a tvayi madbANanirdagdhe patite 'dya nizAcara
7061006c puraM janapadaM cApi kSemam etad bhaviSyati
7061007a adya madbAhuniSkrAntaH zaro vajranibhAnanaH
7061007c pravekSyate te hRdayaM padmam aMzur ivArkajaH
7061008a evam ukto mahAvRkSaM lavaNaH krodhamUrchitaH
7061008c zatrughnorasi cikSepa taM zUraH zatadhAcchinat
7061009a tad dRSTvA viphalaM karma rAkSasaH punar eva tu
7061009c pAdapAn subahUn gRhya zatrughne vyasRjad balI
7061010a zatrughnaz cApi tejasvI vRkSAn Apatato bahUn
7061010c tribhiz caturbhir ekaikaM ciccheda nataparvabhiH
7061011a tato bANamayaM varSaM vyasRjad rAkSasor asi
7061011c zatrughno vIryasaMpanno vivyathe na ca rAkSasaH
7061012a tataH prahasya lavaNo vRkSam utpATya lIlayA
7061012c zirasy abhyahanac chUraM srastAGgaH sa mumoha vai
7061013a tasmin nipatite vIre hAhAkAro mahAn abhUt
7061013c RSINAM deva saMghAnAM gandharvApsarasAm api
7061014a tam avajJAya tu hataM zatrughnaM bhuvi pAtitam
7061014c rakSo labdhAntaram api na viveza svam Alayam
7061015a nApi zUlaM prajagrAha taM dRSTvA bhuvi pAtitam
7061015c tato hata iti jJAtvA tAn bhakSAn samudAvahat
7061016a muhUrtAl labdhasaMjJas tu punas tasthau dhRtAyudhaH
7061016c zatrughno rAkSasadvAri RSibhiH saMprapUjitaH
7061017a tato divyam amoghaM taM jagrAha zaram uttamam
7061017c jvalantaM tejasA ghoraM pUrayantaM dizo daza
7061018a vajrAnanaM vajravegaM merumandara gauravam
7061018c nataM parvasu sarveSu saMyugeSv aparAjitam
7061019a asRkcandanadigdhAGgaM cArupatraM patatriNam
7061019c dAnavendrAcalendrANAm asurANAM ca dAruNam
7061020a taM dIptam iva kAlAgniM yugAnte samupasthite
7061020c dRSTvA sarvANi bhUtAni paritrAsam upAgaman
7061021a sadevAsuragandharvaM samuniM sApsarogaNam
7061021c jagad dhi sarvam asvasthaM pitAmaham upasthitam
7061022a Ucuz ca devadevezaM varadaM prapitAmaham
7061022c kaccil lokakSayo deva prApto vA yugasaMkayaH
7061023a nedRzaM dRSTapUrvaM na zrutaM vA prapitAmaha
7061023c devAnAM bhayasaMmoho lokAnAM saMkSayaH prabho
7061024a teSAM tad vacanaM zrutvA brahmA lokapitAmanaH
7061024c bhayakAraNam AcaSTe devAnAm abhayaMkaraH
7061025a vadhAya lavaNasyAjau zaraH zatrughnadhAritaH
7061025c tejasA yasya sarve sma saMmUDhAH surasattamAH
7061026a eSo hi pUrvaM devasya lokakartuH sanAtanaH
7061026c zaras tejomayo vatsA yena vai bhayam Agatam
7061027a eSa vai kaiTabhasyArthe madhunaz ca mahAzaraH
7061027c sRSTo mahAtmanA tena vadhArthaM daityayos tayoH
7061028a evam etaM prajAnIdhvaM viSNos tejomayaM zaram
7061028c eSA caiva tanuH pUrvA viSNos tasya mahAtmanaH
7061029a ito gacchatA pazyadhvaM vadhyamAnaM mahAtmanA
7061029c rAmAnujena vIreNa lavaNaM rAkSasottamam
7061030a tasya te devadevasya nizamya madhurAM giram
7061030c Ajagmur yatra yudhyete zatrughnalavaNAv ubhau
7061031a taM zaraM divyasaMkAzaM zatrughnakaradhAritam
7061031c dadRzuH sarvabhUtAni yugAntAgnim ivotthitam
7061032a AkAzam AvRtaM dRSTvA devair hi raghunandanaH
7061032c siMhanAdaM muhuH kRtvA dadarza lavaNaM punaH
7061033a AhUtaz ca tatas tena zatrughnena mahAtmanA
7061033c lavaNaH krodhasaMyukto yuddhAya samupasthitaH
7061034a AkarNAt sa vikRSyAtha tad dhanur dhanvinAM varaH
7061034c sa mumoca mahAbANaM lavaNasya mahorasi
7061034e uras tasya vidAryAzu praviveza rasAtalam
7061035a gatvA rasAtalaM divyaM zaro vibudhapUjitaH
7061035c punar evAgamat tUrNam ikSvAkukulanandanam
7061036a zatrughnazaranirbhinno lavaNaH sa nizAcaraH
7061036c papAta sahasA bhUmau vajrAhata ivAcalaH
7061037a tac ca divyaM mahac chUlaM hate lavaNarAkSase
7061037c pazyatAM sarvabhUtAnAM rudrasya vazam anvagAt
7061038a ekeSupAtena bhayaM nihatya; lokatrayasyAsya raghupravIraH
7061038c vinirbabhAv udyatacApabANas; tamaH praNudyeva sahasrarazmiH
7062001a hate tu lavaNe devAH sendrAH sAgnipurogamAH
7062001c UcuH sumadhurAM vANIM zatrughnaM zatrutApanam
7062002a diSTyA te vijayo vatsa diSTyA lavaNarAkSasaH
7062002c hataH puruSazArdUla varaM varaya rAghava
7062003a varadAH sma mahAbAho sarva eva samAgatAH
7062003c vijayAkAGkSiNas tubhyam amoghaM darzanaM hi naH
7062004a devAnAM bhASitaM zrutvA zUro mUrdhni kRtAJjaliH
7062004c pratyuvAca mahAbAhuH zatrughnaH prayatAtmavAn
7062005a imAM madhupurIM ramyAM madhurAM deva nirmitAm
7062005c nivezaM prApnuyAM zIghram eSa me 'stu varo mataH
7062006a taM devAH prItamanaso bADham ity eva rAghavam
7062006c bhaviSyati purI ramyA zUrasenA na saMzayaH
7062007a te tathoktvA mahAtmAno divam Aruruhus tadA
7062007c zatrughno 'pi mahAtejAs tAM senAM samupAnayat
7062008a sA senA zIghram Agacchac chrutvA zatrughnazAsanam
7062008c nivezanaM ca zatrughnaH zAsanena samArabhat
7062009a sA purI divyasaMkAzA varSe dvAdazame zubhA
7062009c niviSTA zUrasenAnAM viSayaz cAkutobhayaH
7062010a kSetrANi sasyayuktAni kAle varSati vAsavaH
7062010c arogA vIrapuruSA zatrughnabhujapAlitA
7062011a ardhacandrapratIkAzA yamunAtIrazobhitA
7062011c zobhitA gRhamukhyaiz ca zobhitA catvarApaNaiH
7062012a yac ca tena mahac chUnyaM lavaNena kRtaM purA
7062012c zobhayAm Asa tad vIro nAnApaNyasamRddhibhiH
7062013a tAM samRddhAM samRddhArthaH zatrughno bharatAnujaH
7062013c nirIkSya paramaprItaH paraM harSam upAgamat
7062014a tasya buddhiH samutpannA nivezya madhurAM purIm
7062014c rAmapAdau nirIkSeyaM varSe dvAdazame zubhe
7063001a tato dvAdazame varSe zatrughno rAmapAlitAm
7063001c ayodhyAM cakame gantum alpabhRtyabalAnugaH
7063002a mantriNo balamukhyAMz ca nivartya ca purodhasaM
7063002c jagAma rathamukhyena hayayuktena bhAsvatA
7063003a sa gatvA gaNitAn vAsAn saptASTau raghunandanaH
7063003c ayodhyAm agamat tUrNaM rAghavotsukadarzanaH
7063004a sa pravizya purIM ramyAM zrImAn ikSvAkunandanaH
7063004c praviveza mahAbAhur yatra rAmo mahAdyutiH
7063005a so 'bhivAdya mahAtmAnaM jvalantam iva tejasA
7063005c uvAca prAJjalir bhUtvA rAmaM satyaparAkramam
7063006a yad AjJaptaM mahArAja sarvaM tat kRtavAn aham
7063006c hataH sa lavaNaH pApaH purI sA ca nivezitA
7063007a dvAdazaM ca gataM varSaM tvAM vinA raghunandana
7063007c notsaheyam ahaM vastuM tvayA virahito nRpa
7063008a sa me prasAdaM kAkutstha kuruSvAmitavikrama
7063008c mAtRhIno yathA vatsas tvAM vinA pravasAmy aham
7063009a evaM bruvANaM zatrughnaM pariSvajyedam abravIt
7063009c mA viSAdaM kRthA vIra naitat kSatriyaceSTitam
7063010a nAvasIdanti rAjAno vipravAseSu rAghava
7063010c prajAz ca paripAlyA hi kSatradharmeNa rAghava
7063011a kAle kAle ca mAM vIra ayodhyAm avalokitum
7063011c Agaccha tvaM narazreSTha gantAsi ca puraM tava
7063012a mamApi tvaM sudayitaH prANair api na saMzayaH
7063012c avazyaM karaNIyaM ca rAjyasya paripAlanam
7063013a tasmAt tvaM vasa kAkutstha paJcarAtraM mayA saha
7063013c UrdhvaM gantAsi madhurAM sabhRtyabalavAhanaH
7063014a rAmasyaitad vacaH zrutvA dharmayuktaM mano'nugam
7063014c zatrughno dInayA vAcA bADham ity eva cAbravIt
7063015a sa paJcarAtraM kAkutstho rAghavasya yathAjJayA
7063015c uSya tatra maheSvAso gamanAyopacakrame
7063016a Amantrya tu mahAtmAnaM rAmaM satyaparAkramam
7063016c bharataM lakSmaNaM caiva mahAratham upAruhat
7063017a dUraM tAbhyAm anugato lakSmaNena mahAtmanA
7063017c bharatena ca zatrughno jagAmAzu purIM tadA
7064001a prasthApya tu sa zatrughnaM bhrAtRbhyAM saha rAghavaH
7064001c pramumoda sukhI rAjyaM dharmeNa paripAlayan
7064002a tataH katipayAhaHsu vRddho jAnapado dvijaH
7064002c zavaM bAlam upAdAya rAjadvAram upAgamat
7064003a rudan bahuvidhA vAcaH snehAkSarasamanvitAH
7064003c asakRtputra putreti vAkyam etad uvAca ha
7064004a kiM nu me duSkRtaM karma pUrvaM dehAntare kRtam
7064004c yad ahaM putram ekaM tvAM pazyAmi nidhanaM gatam
7064005a aprAptayauvanaM bAlaM paJcavarSasamanvitam
7064005c akAle kAlam ApannaM duHkhAya mama putraka
7064006a alpair ahobhir nidhanaM gamiSyAmi na saMzayaH
7064006c ahaM ca jananI caiva tava zokena putraka
7064007a na smarAmy anRtaM hy uktaM na ca hiMsAM smarAmy aham
7064007c kena me duSkRtenAdya bAla eva mamAtmajaH
7064007e akRtvA pitRkAryANi nIto vaivasvatakSayam
7064008a nedRzaM dRSTapUrvaM me zrutaM vA ghoradarzanam
7064008c mRtyur aprAptakAlAnAM rAmasya viSaye yathA
7064009a rAmasya duSkRtaM kiM cin mahad asti na saMzayaH
7064009c tvaM rAjaJ jIvayasvainaM bAlaM mRtyuvazaM gatam
7064010a bhrAtRbhiH sahito rAjan dIrgham Ayur avApnuhi
7064010c uSitAH sma sukhaM rAjye tavAsmin sumahAbala
7064011a saMpraty anAtho viSaya ikSvAkUNAM mahAtmanAm
7064011c rAmaM nAtham ihAsAdya bAlAntakaraNaM nRpam
7064012a rAjadoSair vipadyante prajA hy avidhipAlitAH
7064012c asadvRtte tu nRpatAv akAle mriyate janaH
7064013a yadA pureSv ayuktAni janA janapadeSu ca
7064013c kurvate na ca rakSAsti tadAkAlakRtaM bhayam
7064014a suvyaktaM rAjadoSo 'yaM bhaviSyati na saMzayaH
7064014c pure janapade vApi tadA bAlavadho hy ayam
7064015a evaM bahuvidhair vAkyair nindayAno muhur muhuH
7064015c rAjAnaM duHkhasaMtaptaH sutaM tam upagUhati
7065001a tathA tu karuNaM tasya dvijasya paridevitam
7065001c zuzrAva rAghavaH sarvaM duHkhazokasamanvitam
7065002a sa duHkhena susaMtapto mantriNaH samupAhvayat
7065002c vasiSThaM vAmadevaM ca bhrAtqMz ca sahanaigamAn
7065003a tato dvijA vasiSThena sArdham aSTau pravezitAH
7065003c rAjAnaM devasaMkAzaM vardhasveti tato 'bruvan
7065004a mArkaNDeyo 'tha maudgalyo vAmadevaz ca kAzyapaH
7065004c kAtyAyano 'tha jAbAlir gautamo nAradas tathA
7065005a ete dvijarSabhAH sarve AsaneSUpavezitAH
7065005c mantriNo naigamAz caiva yathArham anukUlataH
7065006a tASAM samupaviSTAnAM sarveSAM dIptatejasAm
7065006c rAghavaH sarvam AcaSTe dvijo yasmAt praroditi
7065007a tasya tad vacanaM zrutvA rAjJo dInasya nAradaH
7065007c pratyuvAca zubhaM vAkyam RSINAM saMnidhau nRpam
7065008a zRNu rAjan yathAkAle prApto 'yaM bAlasaMkSayaH
7065008c zrutvA kartavyatAM vIra kuruSva raghunandana
7065009a purA kRtayuge rAma brAhmaNA vai tapasvinaH
7065009c abrAhmaNas tadA rAjan na tapasvI kathaM cana
7065010a tasmin yuge prajvalite brahmabhUte anAvRte
7065010c amRtyavas tadA sarve jajJire dIrghadarzinaH
7065011a tatas tretAyugaM nAma mAnavAnAM vapuSmatAm
7065011c kSatriyA yatra jAyante pUrveNa tapasAnvitAH
7065012a vIryeNa tapasA caiva te 'dhikAH pUrvajanmani
7065012c mAnavA ye mahAtmAnas tasmiMs tretAyuge yuge
7065013a brahmakSatraM tu tat sarvaM yat pUrvam aparaM ca yat
7065013c yugayor ubhayor AsIt samavIryasamanvitam
7065014a apazyantas tu te sarve vizeSam adhikaM tataH
7065014c sthApanaM cakrire tatra cAturvarNyasya sarvataH
7065015a adharmaH pAdam ekaM tu pAtayat pRthivItale
7065015c adharmeNa hi saMyuktAs tena mandAbhavan dvijAH
7065016a tataH prAduSkRtaM pUrvam AyuSaH pariniSThitam
7065016c zubhAny evAcara&l lokAH satyadharmaparAyaNAH
7065017a tretAyuge tv avartanta brAhmaNAH kSatriyaz ca ye
7065017c tapo 'tapyanta te sarve zuzrUSAm apare janAH
7065018a sa dharmaH paramas teSAM vaizyazUdram athAgamat
7065018c pUjAM ca sarvavarNAnAM zUdrAz cakrur vizeSataH
7065019a tataH pAdam adharmasya dvitIyam avatArayat
7065019c tato dvAparasaMkhyA sA yugasya samajAyata
7065020a tasmin dvAparasaMkhye tu vartamAne yugakSaye
7065020c adharmaz cAnRtaM caiva vavRdhe puruSarSabha
7065021a tasmin dvAparasaMkhyAte tapo vaizyAn samAvizat
7065021c na zUdro labhate dharmam ugraM taptaM nararSabha
7065022a hInavarNo narazreSTha tapyate sumahat tapaH
7065022c bhaviSyA zUdrayonyAM hi tapazcaryA kalau yuge
7065023a adharmaH paramo rAma dvApare zUdradhAritaH
7065023c sa vai viSayaparyante tava rAjan mahAtapAH
7065023e zUdras tapyati durbuddhis tena bAlavadho hy ayam
7065024a yo hy adharmam akAryaM vA viSaye pArthivasya hi
7065024c karoti rAjazArdUla pure vA durmatir naraH
7065024e kSipraM hi narakaM yAti sa ca rAjA na saMzayaH
7065025a sa tvaM puruSazArdUla mArgasva viSayaM svakam
7065025c duSkRtaM yatra pazyethAs tatra yatnaM samAcara
7065026a evaM te dharmavRddhiz ca nRNAM cAyurvivardhanam
7065026c bhaviSyati narazreSTha bAlasyAsya ca jIvitam
7066001a nAradasya tu tad vAkyaM zrutvAmRtamayaM yathA
7066001c praharSam atulaM lebhe lakSmaNaM cedam abravIt
7066002a gaccha saumya dvijazreSThaM samAzvAsaya lakSmaNa
7066002c bAlasya ca zarIraM tat tailadroNyAM nidhApaya
7066003a gandhaiz ca paramodArais tailaiz ca susugandhibhiH
7066003c yathA na kSIyate bAlas tathA saumya vidhIyatAm
7066004a yathA zarIre bAlasya guptasyAkliSTakarmaNaH
7066004c vipattiH paribhedo vA bhaven na ca tathA kuru
7066005a tathA saMdizya kAkutstho lakSmaNaM zubhalakSaNam
7066005c manasA puSpakaM dadhyAv Agaccheti mahAyazAH
7066006a iGgitaM sa tu vijJAya puSpako hemabhUSitaH
7066006c AjagAma muhUrtena samIpaM rAghavasya vai
7066007a so 'bravIt praNato bhUtvA ayam asmi narAdhipa
7066007c vazyas tava mahAbAho kiMkaraH samupasthitaH
7066008a bhASitaM ruciraM zrutvA puSpakasya narAdhipaH
7066008c abhivAdya maharSIs tAn vimAnaM so 'dhyarohata
7066009a dhanur gRhItvA tUNIM ca khaDgaM ca ruciraprabham
7066009c nikSipya nagare vIrau saumitribharatAv ubhau
7066010a prAyAt pratIcIM sa marUn vicinvaMz ca samantataH
7066010c uttarAm agamac chrImAn dizaM himavadAvRtam
7066011a apazyamAnas tatrApi svalpam apy atha duSkRtam
7066011c pUrvAm api dizaM sarvAm athApazyan narAdhipaH
7066012a dakSiNAM dizam AkrAmat tato rAjarSinandanaH
7066012c zaivalasyottare pArzve dadarza sumahat saraH
7066013a tasmin sarasi tapyantaM tApasaM sumahat tapaH
7066013c dadarza rAghavaH zrImA&l lambamAnam adhomukham
7066014a athainaM samupAgamya tapyantaM tapa uttamam
7066014c uvAca rAghavo vAkyaM dhanyas tvam asi suvrata
7066015a kasyAM yonyAM tapovRddha vartase dRDhavikrama
7066015c kautUhalAt tvAM pRcchAmi rAmo dAzarathir hy aham
7066016a manISitas te ko nv arthaH svargalAbho varAzrayaH
7066016c yam azritya tapas taptaM zrotum icchAmi tApasa
7066017a brAhmaNo vAsi bhadraM te kSatriyo vAsi durjayaH
7066017c vaizyo vA yadi vA zUdraH satyam etad bravIhi me
7067001a tasya tad vacanaM zrutvA rAmasyAkliSTakarmaNaH
7067001c avAkzirAs tathAbhUto vAkyam etad uvAca ha
7067002a zUdrayonyAM prasUto 'smi tapa ugraM samAsthitaH
7067002c devatvaM prArthaye rAma sazarIro mahAyazaH
7067003a na mithyAhaM vade rAjan devalokajigISayA
7067003c zUdraM mAM viddhi kAkutstha zambUkaM nAma nAmataH
7067004a bhASatas tasya zUdrasya khaDgaM suruciraprabham
7067004c niSkRSya kozAd vimalaM ziraz ciccheda rAghavaH
7067005a tasmin muhUrte bAlo 'sau jIvena samayujyata
7067006a tato 'gastyAzramapadaM rAmaH kamalalocanaH
7067006c sa gatvA vinayenaiva taM natvA mumude sukhI
7067007a so 'bhivAdya mahAtmAnaM jvalantam iva tejasA
7067007c AtithyaM paramaM prApya niSasAda narAdhipaH
7067008a tam uvAca mahAtejAH kumbhayonir mahAtapAH
7067008c svAgataM te narazreSTha diSTyA prApto 'si rAghava
7067009a tvaM me bahumato rAma guNair bahubhir uttamaiH
7067009c atithiH pUjanIyaz ca mama rAjan hRdi sthitaH
7067010a surA hi kathayanti tvAm AgataM zUdraghAtinam
7067010c brAhmaNasya tu dharmeNa tvayA jIvApitaH sutaH
7067011a uSyatAM ceha rajanIM sakAze mama rAghava
7067011c prabhAte puSpakeNa tvaM gantA svapuram eva hi
7067012a idaM cAbharaNaM saumya nirmitaM vizvakarmaNA
7067012c divyaM divyena vapuSA dIpyamAnaM svatejasA
7067012e pratigRhNISva kAkutstha matpriyaM kuru rAghava
7067013a dattasya hi punar dAnaM sumahat phalam ucyate
7067013c tasmAt pradAsye vidhivat tat pratIccha nararSabha
7067014a tad rAmaH pratijagrAha munes tasya mahAtmanaH
7067014c divyam AbharaNaM citraM pradIptam iva bhAskaram
7067015a pratigRhya tato rAmas tad AbharaNam uttamam
7067015c AgamaM tasya divyasya praSTum evopacakrame
7067016a atyadbhutam idaM brahman vapuSA yuktam uttamam
7067016c kathaM bhagavatA prAptaM kuto vA kena vAhRtam
7067017a kutUhalatayA brahman pRcchAmi tvAM mahAyazaH
7067017c AzcaryANAM bahUnAM hi nidhiH paramako bhavAn
7067018a evaM bruvati kAkutsthe munir vAkyam athAbravIt
7067018c zRNu rAma yathAvRttaM purA tretAyuge gate
7068001a purA tretAyuge hy AsId araNyaM bahuvistaram
7068001c samantAd yojanazataM nirmRgaM pakSivarjitam
7068002a tasmin nirmAnuSe 'raNye kurvANas tapa uttamam
7068002c aham AkramituM saumya tad araNyam upAgamam
7068003a tasya rUpam araNyasya nirdeSTuM na zazAka ha
7068003c phalamUlaiH sukhAsvAdair bahurUpaiz ca pAdapaiH
7068004a tasyAraNyasya madhye tu saro yojanam Ayatam
7068004c padmotpalasamAkIrNaM samatikrAntazaivalam
7068005a tad Azcaryam ivAtyarthaM sukhAsvAdam anuttamam
7068005c arajaskaM tathAkSobhyaM zrImatpakSigaNAyutam
7068006a tasmin saraHsamIpe tu mahad adbhutam Azramam
7068006c purANaM puNyam atyarthaM tapasvijanavarjitam
7068007a tatrAham avasaM rAtriM naidAghIM puruSarSabha
7068007c prabhAte kAlyam utthAya saras tad upacakrame
7068008a athApazyaM zavaM tatra supuSTam ajaraM kva cit
7068008c tiSThantaM parayA lakSmyA tasmiMs toyAzaye nRpa
7068009a tam arthaM cintayAno 'haM muhUrtaM tatra rAghava
7068009c viSThito 'smi sarastIre kiM nv idaM syAd iti prabho
7068010a athApazyaM muhUrtAt tu divyam adbhutadarzanam
7068010c vimAnaM paramodAraM haMsayuktaM manojavam
7068011a atyarthaM svargiNaM tatra vimAne raghunandana
7068011c upAste 'psarasAM vIra sahasraM divyabhUSaNam
7068011e gAnti geyAni ramyANi vAdayanti tathAparAH
7068012a pazyato me tadA rAma vimAnAd avaruhya ca
7068012c taM zavaM bhakSayAm Asa sa svargI raghunandana
7068013a tato bhuktvA yathAkAmaM mAMsaM bahu ca suSThu ca
7068013c avatIrya saraH svargI saMspraSTum upacakrame
7068014a upaspRzya yathAnyAyaM sa svargI puruSarSabha
7068014c AroDhum upacakrAma vimAnavaram uttamam
7068015a tam ahaM devasaMkAzam Arohantam udIkSya vai
7068015c athAham abruvaM vAkyaM tam eva puruSarSabha
7068016a ko bhavAn devasaMkAza AhAraz ca vigarhitaH
7068016c tvayAyaM bhujyate saumya kiM karthaM vaktum arhasi
7068017a Azcaryam IdRzo bhAvo bhAsvaro devasaMmataH
7068017c AhAro garhitaH saumya zrotum icchAmi tattvataH
7069001a bhuktvA tu bhASitaM vAkyaM mama rAma zubhAkSaram
7069001c prAJjaliH pratyuvAcedaM sa svargI raghunandana
7069002a zRNu brahman yathAvRttaM mamaitat sukhaduHkhayoH
7069002c duratikramaNIyaM hi yathA pRcchasi mAM dvija
7069003a purA vaidarbhako rAjA pitA mama mahAyazAH
7069003c sudeva iti vikhyAtas triSu lokeSu vIryavAn
7069004a tasya putradvayaM brahman dvAbhyAM strIbhyAm ajAyata
7069004c ahaM zveta iti khyAto yavIyAn suratho 'bhavat
7069005a tataH pitari svaryAte paurA mAm abhyaSecayan
7069005c tatrAhaM kRtavAn rAjyaM dharmeNa susamAhitaH
7069006a evaM varSasahasrANi samatItAni suvrata
7069006c rAjyaM kArayato brahman prajA dharmeNa rakSataH
7069007a so 'haM nimitte kasmiMz cid vijJAtAyur dvijottama
7069007c kAladharmaM hRdi nyasya tato vanam upAgamam
7069008a so 'haM vanam idaM durgaM mRgapakSivivarjitam
7069008c tapaz cartuM praviSTo 'smi samIpe sarasaH zubhe
7069009a bhrAtaraM surathaM rAjye abhiSicya narAdhipam
7069009c idaM saraH samAsAdya tapas taptaM mayA ciram
7069010a so 'haM varSasahasrANi tapas trINi mahAmune
7069010c taptvA suduSkaraM prApto brahmalokam anuttamam
7069011a tato mAM svargasaMsthaM vai kSutpipAse dvijottama
7069011c bAdhete paramodAra tato 'haM vyathitendriyaH
7069012a gatvA tribhuvaNazreSThaM pitAmaham uvAca ha
7069012c bhagavan brahmaloko 'yaM kSutpipAsAvivarjitaH
7069013a kasyeyaM karmaNaH prAptiH kSutpipAsAvazo 'smi yat
7069013c AhAraH kaz ca me deva tan me brUhi pitAmaha
7069014a pitAmahas tu mAm Aha tavAhAraH sudevaja
7069014c svAdUni svAni mAMsAni tAni bhakSaya nityazaH
7069015a svazarIraM tvayA puSTaM kurvatA tapa uttamam
7069015c anuptaM rohate zveta na kadA cin mahAmate
7069016a dattaM na te 'sti sUkSmo 'pi vane sattvaniSevite
7069016c tena svargagato vatsa bAdhyase kSutpipAsayA
7069017a sa tvaM supuSTam AhAraiH svazarIram anuttamam
7069017c bhakSayasvAmRtarasaM sA te tRptir bhaviSyati
7069018a yadA tu tad vanaM zveta agastyaH sumahAn RSiH
7069018c AkramiSyati durdharSas tadA kRcchAd vimokSyase
7069019a sa hi tArayituM saumya zaktaH suragaNAn api
7069019c kiM punas tvAM mahAbAho kSutpipAsAvazaM gatam
7069020a so 'haM bhagavataH zrutvA devadevasya nizcayam
7069020c AhAraM garhitaM kurmi svazarIraM dvijottama
7069021a bahUn varSagaNAn brahman bhujyamAnam idaM mayA
7069021c kSayaM nAbhyeti brahmarSe tRptiz cApi mamottamA
7069022a tasya me kRcchrabhUtasya kRcchrAd asmAd vimokSaya
7069022c anyeSAm agatir hy atra kumbhayonim Rte dvijam
7069023a idam AbharaNaM saumya tAraNArthaM dvijottama
7069023c pratigRhNISva brahmarSe prasAdaM kartum arhasi
7069024a tasyAhaM svargiNo vAkyaM zrutvA duHkhasamanvitam
7069024c tAraNAyopajagrAha tad AbharaNam uttamam
7069025a mayA pratigRhIte tu tasminn AbharaNe zubhe
7069025c mAnuSaH pUrvako deho rAjarSeH sa nanAza ha
7069026a pranaSTe tu zarIre 'sau rAjarSiH parayA mudA
7069026c tRptaH pramudito rAjA jagAma tridivaM punaH
7069027a tenedaM zakratulyena divyam AbharaNaM mama
7069027c tasmin nimitte kAkutstha dattam adbhutadarzanam
7070001a tad adbhutatamaM vAkyaM zrutvAgastyasya rAghavaH
7070001c gauravAd vismayAc caiva bhUyaH praSTuM pracakrame
7070002a bhagavaMs tad vanaM ghoraM tapas tapyati yatra saH
7070002c zveto vaidarbhako rAjA kathaM tad amRgadvijam
7070003a niHsattvaM ca vanaM jAtaM zUnyaM manujavarjitam
7070003c tapaz cartuM praviSTaH sa zrotum icchAmi tattvataH
7070004a rAmasya bhASitaM zrutvA kautUhalasamanvitam
7070004c vAkyaM paramatejasvI vaktum evopacakrame
7070005a purA kRtayuge rAma manur daNDadharaH prabhuH
7070005c tasya putro mahAn AsId ikSvAkuH kulavardhanaH
7070006a taM putraM pUrvake rAjye nikSipya bhuvi durjayam
7070006c pRthivyAM rAjavaMzAnAM bhava kartety uvAca ha
7070007a tatheti ca pratijJAtaM pituH putreNa rAghava
7070007c tataH paramasaMhRSTo manuH punar uvAca ha
7070008a prIto 'smi paramodArakartA cAsi na saMzayaH
7070008c daNDena ca prajA rakSa mA ca daNDam akAraNe
7070009a aparAdhiSu yo daNDaH pAtyate mAnaveSu vai
7070009c sa daNDo vidhivan muktaH svargaM nayati pArthivam
7070010a tasmAd daNDe mahAbAho yatnavAn bhava putraka
7070010c dharmo hi paramo loke kurvatas te bhaviSyati
7070011a iti taM bahu saMdizya manuH putraM samAdhinA
7070011c jagAma tridivaM hRSTo brahmalokam anuttamam
7070012a prayAte tridive tasminn ikSvAkur amitaprabhaH
7070012c janayiSye kathaM putrAn iti cintAparo 'bhavat
7070013a karmabhir bahurUpaiz ca tais tair manusutaH sutAn
7070013c janayAm Asa dharmAtmA zataM devasutopamAn
7070014a teSAm avarajas tAta sarveSAM raghunandana
7070014c mUDhaz cAkRtividyaz ca na zuzrUSati pUrvajAn
7070015a nAma tasya ca daNDeti pitA cakre 'lpatejasaH
7070015c avazyaM daNDapatanaM zarIre 'sya bhaviSyati
7070016a sa pazyamAnas taM doSaM ghoraM putrasya rAghava
7070016c vindhyazaivalayor madhye rAjyaM prAdAd ariMdama
7070017a sa daNDas tatra rAjAbhUd ramye parvatarodhasi
7070017c puraM cApratimaM rAma nyavezayad anuttamam
7070018a purasya cAkaron nAma madhumantam iti prabho
7070018c purohitaM cozanasaM varayAm Asa suvratam
7070019a evaM sa rAjA tad rAjyaM kArayat sapurohitaH
7070019c prahRSTamanujAkIrNaM devarAjyaM yathA divi
7071001a etad AkhyAya rAmAya maharSiH kumbhasaMbhavaH
7071001c asyAm evAparaM vAkyaM kathAyAm upacakrame
7071002a tataH sa daNDaH kAkutstha bahuvarSagaNAyutam
7071002c akarot tatra mandAtmA rAjyaM nihatakaNTakam
7071003a atha kAle tu kasmiMz cid rAjA bhArgavam Azramam
7071003c ramaNIyam upAkrAmac caitre mAsi manorame
7071004a tatra bhArgavakanyAM sa rUpeNApratimAM bhuvi
7071004c vicarantIM vanoddeze daNDo 'pazyad anuttamAm
7071005a sa dRSTvA tAM sudurmedhA anaGgazarapIDitaH
7071005c abhigamya susaMvignaH kanyAM vacanam abravIt
7071006a kutas tvam asi suzroNi kasya vAsi sutA zubhe
7071006c pIDito 'ham anaGgena pRcchAmi tvAM sumadhyame
7071007a tasya tv evaM bruvANasya mohonmattasya kAminaH
7071007c bhArgavI pratyuvAcedaM vacaH sAnunayaM nRpam
7071008a bhArgavasya sutAM viddhi devasyAkliSTakarmaNaH
7071008c arajAM nAma rAjendra jyeSThAm AzramavAsinIm
7071009a guruH pitA me rAjendra tvaM ca ziSyo mahAtmanaH
7071009c vyasanaM sumahat kruddhaH sa te dadyAn mahAtapAH
7071010a yadi vAtra mayA kAryaM dharmadRSTena satpathA
7071010c varayasva nRpa zreSTha pitaraM me mahAdyutim
7071011a anyathA tu phalaM tubhyaM bhaved ghorAbhisaMhitam
7071011c krodhena hi pitA me 'sau trailokyam api nirdahet
7071012a evaM bruvANAm arajAM daNDaH kAmazarArditaH
7071012c pratyuvAca madonmattaH zirasy AdhAya so 'Jjalim
7071013a prasAdaM kuru suzroNi na kAlaM kSeptum arhasi
7071013c tvatkRte hi mama prANA vidIryante zubhAnane
7071014a tvAM prApya hi vadho vApi pApaM vApi sudAruNam
7071014c bhaktaM bhajasva mAM bhIru bhajamAnaM suvihvalam
7071015a evam uktvA tu tAM kanyAM dorbhyAM gRhya balAd balI
7071015c visphurantIM yathAkAmaM maithunAyopacakrame
7071016a tam anarthaM mahAghoraM daNDaH kRtvA sudAruNam
7071016c nagaraM prayayau cAzu madhumantam anuttamam
7071017a arajApi rudantI sA AzramasyAvidUrataH
7071017c pratIkSate susaMtrastA pitaraM devasaMnibham
7072001a sa muhUrtAd upazrutya devarSir amitaprabhaH
7072001c svam AzramaM ziSya vRtaH kSudhArtaH saMnyavartata
7072002a so 'pazyad arajAM dInAM rajasA samabhiplutAm
7072002c jyotsnAm ivAruNagrastAM pratyUSe na virAjatIm
7072003a tasya roSaH samabhavat kSudhArtasya vizeSataH
7072003c nirdahann iva lokAMs trIJ ziSyAMz cedam uvAca ha
7072004a pazyadhvaM viparItasya daNDasyAviditAtmanaH
7072004c vipattiM ghorasaMkAzAM kruddhAm agnizikhAm iva
7072005a kSayo 'sya durmateH prAptaH sAnugasya durAtmanaH
7072005c yaH pradIptAM hutAzasya zikhAM vai spraSTum icchati
7072006a yasmAt sa kRtavAn pApam IdRzaM ghoradarzanam
7072006c tasmAt prApsyati durmedhAH phalaM pApasya karmaNaH
7072007a saptarAtreNa rAjAsau sabhRtyabalavAhanaH
7072007c pApakarmasamAcAro vadhaM prApsyati durmatiH
7072008a samantAd yojanazataM viSayaM cAsya durmateH
7072008c dhakSyate pAMsuvarSeNa mahatA pAkazAsanaH
7072009a sarvasattvAni yAnIha sthAvarANi carANi ca
7072009c mahatA pAMsuvarSeNa nAzaM yAsyanti sarvazaH
7072010a daNDasya viSayo yAvat tAvat sarvasamucchrayaH
7072010c pAMsubhuta ivAlakSyaH saptarAtrAd bhaviSyati
7072011a ity uktvA krodhasaMtapas tam AzramanivAsinam
7072011c janaM janapadAnteSu sthIyatAm iti cAbravIt
7072012a zrutvA tUzasano vAkyaM sa AzramAvasatho janaH
7072012c niSkrAnto viSayAt tasya sthAnaM cakre 'tha bAhyataH
7072013a sa tathoktvA munijanam arajAm idam abravIt
7072013c ihaiva vasa durmedhe Azrame susamAhitA
7072014a idaM yojanaparyantaM saraH suruciraprabham
7072014c araje vijvarA bhuGkSva kAlaz cAtra pratIkSyatAm
7072015a tvatsamIpe tu ye sattvA vAsam eSyanti tAM nizAm
7072015c avadhyAH pAMsuvarSeNa te bhaviSyanti nityadA
7072016a ity uktvA bhArgavo vAsam anyatra samupAkramat
7072016c saptAhAd bhasmasAdbhUtaM yathoktaM brahmavAdinA
7072017a tasyAsau daNDaviSayo vindhyazaivalasAnuSu
7072017c zapto brahmarSiNA tena purA vaidharmake kRte
7072018a tataH prabhRti kAkutstha daNDakAraNyam ucyate
7072018c tapasvinaH sthitA yatra janasthAnam atho 'bhavat
7072019a etat te sarvam AkhyAtaM yan mAM pRcchasi rAghava
7072019c saMdhyAm upAsituM vIra samayo hy ativartate
7072020a ete maharSayaH sarve pUrNakumbhAH samantataH
7072020c kRtodako naravyAghra AdityaM paryupAsate
7072021a sa tair RSibhir abhyastaH sahitair brahmasattamaiH
7072021c ravir astaM gato rAma gacchodakam upaspRza
7073001a RSer vacanam AjJAya rAmaH saMdhyAm upAsitum
7073001c upAkrAmat saraH puNyam apsarobhir niSevitam
7073002a tatrodakam upaspRzya saMdhyAm anvAsya pazcimAm
7073002c AzramaM prAvizad rAmaH kumbhayoner mahAtmanaH
7073003a asyAgastyo bahuguNaM phalamUlaM tathauSadhIH
7073003c zAkAni ca pavitrANi bhojanArtham akalpayat
7073004a sa bhuktavAn narazreSThas tad annam amRtopamam
7073004c prItaz ca parituSTaz ca tAM rAtriM samupAvasat
7073005a prabhAte kAlyam utthAya kRtvAhnikam ariMdamaH
7073005c RSiM samabhicakrAma gamanAya raghUttamaH
7073006a abhivAdyAbravId rAmo maharSiM kumbhasaMbhavam
7073006c ApRcche tvAM gamiSyAmi mAm anujJAtum arhasi
7073007a dhanyo 'smy anugRhIto 'smi darzanena mahAtmanaH
7073007c draSTuM caivAgamiSyAmi pAvanArtham ihAtmanaH
7073008a tathA vadati kAkutsthe vAkyam adbhutadarzanam
7073008c uvAca paramaprIto dharmanetras tapodhanaH
7073009a atyadbhutam idaM vAkyaM tava rAma zubhAkSaram
7073009c pAvanaH sarvalokAnAM tvam eva raghunandana
7073010a muhUrtam api rAma tvAM ye nu pazyanti ke cana
7073010c pAvitAH svargabhUtAs te pUjyante divi daivataiH
7073011a ye ca tvAM ghoracakSurbhir IkSante prANino bhuvi
7073011c hatAs te yamadaNDena sadyo nirayagAminaH
7073012a gaccha cAriSTam avyagraH panthAnam akutobhayam
7073012c prazAdhi rAjyaM dharmeNa gatir hi jagato bhavAn
7073013a evam uktas tu muninA prAJjaliH pragraho nRpaH
7073013c abhyavAdayata prAjJas tam RSiM puNyazIlinam
7073014a abhivAdya munizreSThaM tAMz ca sarvAMs tapodhanAn
7073014c adhyArohat tad avyagraH puSpakaM hemabhUSitam
7073015a taM prayAntaM munigaNA AzIrvAdaiH samantataH
7073015c apUjayan mahendrAbhaM sahasrAkSam ivAmarAH
7073016a svasthaH sa dadRze rAmaH puSpake hemabhUSite
7073016c zazI meghasamIpastho yathA jaladharAgame
7073017a tato 'rdhadivase prApte pUjyamAnas tatas tataH
7073017c ayodhyAM prApya kAkutstho vimAnAd avarohata
7073018a tato visRjya ruciraM puSpakaM kAmagAminam
7073018c kakSyAntaravinikSiptaM dvAHsthaM rAmo 'bravId vacaH
7073019a lakSmaNaM bharataM caiva gatvA tau laghuvikramau
7073019c mamAgamanam AkhyAya zabdApaya ca mA ciram
7074001a tac chrutvA bhASitaM tasya rAmasyAkliSTakarmaNaH
7074001c dvAHsthaH kumArAv AhUya rAghavAya nyavedayat
7074002a dRSTvA tu rAghavaH prAptau priyau bharatalakSmaNau
7074002c pariSvajya tato rAmo vAkyam etad uvAca ha
7074003a kRtaM mayA yathAtathyaM dvijakAryam anuttamam
7074003c dharmasetumato bhUyaH kartum icchAmi rAghavau
7074004a yuvAbhyAm AtmabhUtAbhyAM rAjasUyam anuttamam
7074004c sahito yaSTum icchAmi tatra dharmo hi zAzvataH
7074005a iSTvA tu rAjasUyena mitraH zatrunibarhaNaH
7074005c suhutena suyajJena varuNatvam upAgamat
7074006a somaz ca rAjasUyena iSTvA dharmeNa dharmavit
7074006c prAptaz ca sarvalokAnAM kIrtiM sthAnaM ca zAzvatam
7074007a asminn ahani yac chreyaz cintyatAM tan mayA saha
7074007c hitaM cAyati yuktaM ca prayatau vaktum arhatha
7074008a zrutvA tu rAghavasyaitad vAkyaM vAkyavizAradaH
7074008c bharataH prAJjalir bhUtvA vAkyam etad uvAca ha
7074009a tvayi dharmaH paraH sAdho tvayi sarvA vasuMdharA
7074009c pratiSThitA mahAbAho yazaz cAmitavikrama
7074010a mahIpAlAz ca sarve tvAM prajApatim ivAmarAH
7074010c nirIkSante mahAtmAno lokanAthaM yathA vayam
7074011a prajAz ca pitRvad rAjan pazyanti tvAM mahAbala
7074011c pRthivyAM gatibhUto 'si prANinAm api rAghava
7074012a sa tvam evaMvidhaM yajJam AhartAsi kathaM nRpa
7074012c pRthivyAM rAjavaMzAnAM vinAzo yatra dRzyate
7074013a pRthivyAM ye ca puruSA rAjan pauruSam AgatAH
7074013c sarveSAM bhavitA tatra kSayaH sarvAntakopamaH
7074014a sa tvaM puruSazArdUla guNair atulavikrama
7074014c pRthivIM nArhase hantuM vaze hi tava vartate
7074015a bharatasya tu tad vAkyaM zrutvAmRtamayaM yathA
7074015c praharSam atulaM lebhe rAmaH satyaparAkramaH
7074016a uvAca ca zubhAM vANIM kaikeyyA nandivardhanam
7074016c prIto 'smi parituSTo 'smi tavAdya vacanena hi
7074017a idaM vacanam aklIbaM tvayA dharmasamAhitam
7074017c vyAhRtaM puruSavyAghra pRthivyAH paripAlanam
7074018a eSa tasmAd abhiprAyAd rAjasUyAt kratUttamAt
7074018c nivartayAmi dharmajJa tava suvyAhRtena vai
7074019a prajAnAM pAlanaM dharmo rAjJAM yajJena saMmitaH
7074019c tasmAc chRNomi te vAkyaM sAdhUktaM susamAhitam
7075001a tathoktavati rAme tu bharate ca mahAtmani
7075001c lakSmaNo 'pi zubhaM vAkyam uvAca raghunandanam
7075002a azvamedho mahAyajJaH pAvanaH sarvapApmanAm
7075002c pAvanas tava durdharSo rocatAM kratupuMgavaH
7075003a zrUyate hi purAvRttaM vAsave sumahAtmani
7075003c brahmahatyAvRtaH zakro hayamedhena pAvitaH
7075004a purA kila mahAbAho devAsurasamAgame
7075004c vRtro nAma mahAn AsId daiteyo lokasaMmataH
7075005a vistIrNA yojanazatam ucchritas triguNaM tataH
7075005c anurAgeNa lokAMs trIn snehAt pazyati sarvataH
7075006a dharmajJaz ca kRtajJaz ca buddhyA ca pariniSThitaH
7075006c zazAsa pRthivIM sarvAM dharmeNa susamAhitaH
7075007a tasmin prazAsati tadA sarvakAmadughA mahI
7075007c rasavanti prasUtAni mUlAni ca phalAni ca
7075008a akRSTapacyA pRthivI susaMpannA mahAtmanaH
7075008c sa rAjyaM tAdRzaM bhuGkte sphItam adbhutadarzanam
7075009a tasya buddhiH samutpannA tapaH kuryAm anuttamam
7075009c tapo hi paramaM zreyas tapo hi paramaM sukham
7075010a sa nikSipya sutaM jyeSThaM paureSu paramezvaram
7075010c tapa ugram upAtiSThat tApayan sarvadevatAH
7075011a tapas tapyati vRtre tu vAsavaH paramArtavat
7075011c viSNuM samupasaMkramya vAkyam etad uvAca ha
7075012a tapasyatA mahAbAho lokA vRtreNa nirjitAH
7075012c balavAn sa hi dharmAtmA nainaM zakSyAmi bAdhitum
7075013a yady asau tapa AtiSThed bhUya eva surezvara
7075013c yAval lokA dhariSyanti tAvad asya vazAnugAH
7075014a tvaM cainaM paramodAram upekSasi mahAbala
7075014c kSaNaM hi na bhaved vRtraH kruddhe tvayi surezvara
7075015a yadA hi prItisaMyogaM tvayA viSNo samAgataH
7075015c tadA prabhRti lokAnAM nAthatvam upalabdhavAn
7075016a sa tvaM prasAdaM lokAnAM kuruSva sumahAyazaH
7075016c tvatkRtena hi sarvaM syAt prazAntam ajaraM jagat
7075017a ime hi sarve viSNo tvAM nirIkSante divaukasaH
7075017c vRtraghatena mahatA eSAM sAhyaM kuruSva ha
7075018a tvayA hi nityazaH sAhyaM kRtam eSAM mahAtmanAm
7075018c asahyam idam anyeSAm agatInAM gatir bhavAn
7076001a lakSmaNasya tu tad vAkyaM zrutvA zatrunibarhaNaH
7076001c vRtraghAtam azeSeNa kathayety Aha lakSmaNam
7076002a rAghaveNaivam uktas tu sumitrAnandavardhanaH
7076002c bhUya eva kathAM divyAM kathayAm Asa lakSmaNaH
7076003a sahasrAkSavacaH zrutvA sarveSAM ca divaukasAm
7076003c viSNur devAn uvAcedaM sarvAn indrapurogamAn
7076004a pUrvaM sauhRdabaddho 'smi vRtrasya sumahAtmanaH
7076004c tena yuSmat priyArthaM vai nAhaM hanmi mahAsuram
7076005a avazyaM karaNIyaM ca bhavatAM sukham uttamam
7076005c tasmAd upAyam AkhyAsye yena vRtraM haniSyatha
7076006a tridhA bhUtaM kariSye 'ham AtmAnaM surasattamAH
7076006c tena vRtraM sahasrAkSo haniSyati na saMzayaH
7076007a eko 'Mzo vAsavaM yAtu dvitIyo vajram eva tu
7076007c tRtIyo bhUtalaM zakras tato vRtraM haniSyati
7076008a tathA bruvati deveze devA vAkyam athAbruvan
7076008c evam etan na saMdeho yathA vadasi daityahan
7076009a bhadraM te 'stu gamiSyAmo vRtrAsuravadhaiSiNaH
7076009c bhajasva paramodAravAsavaM svena tejasA
7076010a tataH sarve mahAtmAnaH sahasrAkSapurogamAH
7076010c tad araNyam upAkrAman yatra vRtro mahAsuraH
7076011a te 'pazyaMs tejasA bhUtaM tapantam asurottamam
7076011c pibantam iva lokAMs trIn nirdahantam ivAmbaram
7076012a dRSTvaiva cAsurazreSThaM devAs trAsam upAgaman
7076012c katham enaM vadhiSyAmaH kathaM na syAt parAjayaH
7076013a teSAM cintayatAM tatra sahasrAkSaH puraMdaraH
7076013c vajraM pragRhya bAhubhyAM prahiNod vRtramUrdhani
7076014a kAlAgnineva ghoreNa dIpteneva mahArciSA
7076014c prataptaM vRtrazirasi jagat trAsam upAgamat
7076015a asaMbhAvyaM vadhaM tasya vRtrasya vibudhAdhipaH
7076015c cintayAno jagAmAzu lokasyAntaM mahAyazAH
7076016a tam indraM brahmahatyAzu gacchantam anugacchati
7076016c apatac cAsya gAtreSu tam indraM duHkham Avizat
7076017a hatArayaH pranaSTendrA devAH sAgnipurogamAH
7076017c viSNuM tribhuvaNazreSThaM muhur muhur apUjayan
7076018a tvaM gatiH paramA deva pUrvajo jagataH prabhuH
7076018c rathArthaM sarvabhUtAnAM viSNutvam upajagmivAn
7076019a hataz cAyaM tvayA vRtro brahmahatyA ca vAsavam
7076019c bAdhate surazArdUla mokSaM tasya vinirdiza
7076020a teSAM tad vacanaM zrutvA devAnAM viSNur abravIt
7076020c mAm eva yajatAM zakraH pAvayiSyAmi vajriNam
7076021a puNyena hayamedhena mAm iSTvA pAkazAsanaH
7076021c punar eSyati devAnAm indratvam akutobhayaH
7076022a evaM saMdizya devAnAM tAM vANIm amRtopamA
7076022c jagAma viSNur devezaH stUyamAnas triviSTapam
7077001a tathA vRtravadhaM sarvam akhilena sa lakSmaNaH
7077001c kathayitvA narazreSThaH kathAzeSam upAkramat
7077002a tato hate mahAvIrye vRtre devabhayaMkare
7077002c brahmahatyAvRtaH zakraH saMjJAM lebhe na vRtrahA
7077003a so 'ntam Azritya lokAnAM naSTasaMjJo vicetanaH
7077003c kAlaM tatrAvasat kaM cid veSTamAno yathoragaH
7077004a atha naSTe sahasrAkSe udvignam abhavaj jagat
7077004c bhUmiz ca dhvastasaMkAzA niHsnehA zuSkakAnanA
7077005a niHsrotasaz cAmbuvAhA hradAz ca saritas tathA
7077005c saMkSobhaz caiva sattvAnAm anAvRSTikRto 'bhavat
7077006a kSIyamANe tu loke 'smin saMbhrAntamanasaH surAH
7077006c yad uktaM viSNunA pUrvaM taM yajJaM samupAnayan
7077007a tataH sarve suragaNAH sopAdhyAyAH saharSibhiH
7077007c taM dezaM sahitA jagmur yatrendro bhayamohitaH
7077008a te tu dRSTvA sahasrAkSaM mohitaM brahmahatyayA
7077008c taM puraskRtya devezam azvamedhaM pracakrire
7077009a tato 'zvamedhaH sumahAn mahendrasya mahAtmanaH
7077009c vavRdhe brahmahatyAyAH pAvanArthaM narezvara
7077010a tato yajJasamAptau tu brahmahatyA mahAtmanaH
7077010c abhigamyAbravId vAkyaM kva me sthAnaM vidhAsyatha
7077011a te tAm Ucus tato devAs tuSTAH prItisamanvitAH
7077011c caturdhA vibhajAtmAnam Atmanaiva durAsade
7077012a devAnAM bhASitaM zrutvA brahmahatyA mahAtmanAm
7077012c saMnidhau sthAnam anyatra varayAm Asa durvasA
7077013a ekenAMzena vatsyAmi pUrNodAsu nadISu vai
7077013c dvitIyena tu vRkSeSu satyam etad bravImi vaH
7077014a yo 'yam aMzas tRtIyo me strISu yauvanazAliSu
7077014c trirAtraM darpaparNAsu vasiSye darpaghAtinI
7077015a hantAro brAhmaNAn ye tu prekSApUrvam adUSakAn
7077015c tAMz caturthena bhAgena saMzrayiSye surarSabhAH
7077016a pratyUcus tAM tato devA yathA vadasi durvase
7077016c tathA bhavatu tat sarvaM sAdhayasva yathepsitam
7077017a tataH prItyAnvitA devAH sahasrAkSaM vavandire
7077017c vijvaraH pUtapApmA ca vAsavaH samapadyata
7077018a prazAntaM ca jagat sarvaM sahasrAkSe pratiSThate
7077018c yajJaM cAdbhutasaMkAzaM tadA zakro 'bhyapUjayat
7077019a IdRzo hy azvamedhasya prabhAvo raghunandana
7077019c yajasva sumahAbhAga hayamedhena pArthiva
7078001a tac chrutvA lakSmaNenoktaM vAkyaM vAkyavizAradaH
7078001c pratyuvAca mahAtejAH prahasan rAghavo vacaH
7078002a evam etan narazreSTha yathA vadasi lakSmaNa
7078002c vRtraghAtam azeSeNa vAjimedhaphalaM ca yat
7078003a zrUyate hi purA saumya kardamasya prajApateH
7078003c putro bAhlIzvaraH zrImAn ilo nAma sudhArmikaH
7078004a sa rAjA pRthivIM sarvAM vaze kRtvA mahAyazAH
7078004c rAjyaM caiva naravyAghra putravat paryapAlayat
7078005a suraiz ca paramodArair daiteyaiz ca mahAsuraiH
7078005c nAgarAkSasagandharvair yakSaiz ca sumahAtmabhiH
7078006a pUjyate nityazaH saumya bhayArtai raghunandana
7078006c abibhyaMz ca trayo lokAH saroSasya mahAtmanaH
7078007a sa rAjA tAdRzo hy AsId dharme vIrye ca niSThitaH
7078007c buddhyA ca paramodAro bAhlIkAnAM mahAyazAH
7078008a sa pracakre mahAbAhur mRgayAM rucire vane
7078008c caitre manorame mAsi sabhRtyabalavAhanaH
7078009a prajaghne sa nRpo 'raNye mRgAJ zatasahasrazaH
7078009c hatvaiva tRptir nAbhUc ca rAjJas tasya mahAtmanaH
7078010a nAnAmRgANAm ayutaM vadhyamAnaM mahAtmanA
7078010c yatra jAto mahAsenas taM dezam upacakrame
7078011a tasmiMs tu devadevezaH zailarAjasutAM haraH
7078011c ramayAm Asa durdharSaiH sarvair anucaraiH saha
7078012a kRtvA strIbhUtam AtmAnam umezo gopatidhvajaH
7078012c devyAH priyacikIrSuH sa tasmin parvatanirjhare
7078013a ye ca tatra vanoddeze sattvAH puruSavAdinaH
7078013c yac ca kiM cana tat sarvaM nArIsaMjJaM babhUva ha
7078014a etasminn antare rAjA sa ilaH kardamAtmajaH
7078014c nighnan mRgasahasrANi taM dezam upacakrame
7078015a sa dRSTvA strIkRtaM sarvaM savyAlamRgapakSiNam
7078015c AtmAnaM sAnugaM caiva strIbhUtaM raghunandana
7078016a tasya duHkhaM mahat tv AsId dRSTvAtmAnaM tathA gatam
7078016c umApatez ca tat karma jJAtvA trAsam upAgamat
7078017a tato devaM mahAtmAnaM zitikaNThaM kapardinam
7078017c jagAma zaraNaM rAjA sabhRtyabalavAhanaH
7078018a tataH prahasya varadaH saha devyA mahAyazAH
7078018c prajApatisutaM vAkyam uvAca varadaH svayam
7078019a uttiSThottiSTha rAjarSe kArdameya mahAbala
7078019c puruSatvam Rte saumya varaM varaya suvrata
7078020a tataH sa rAjA zokArtAH pratyAkhyAto mahAtmanA
7078020c na sa jagrAha strIbhUto varam anyaM surottamAt
7078021a tataH zokena mahatA zailarAjasutAM nRpaH
7078021c praNipatya mahAdevIM sarveNaivAntarAtmanA
7078022a Ize varANAM varade lokAnAm asi bhAmini
7078022c amoghadarzane devi bhaje saumye namo 'stu te
7078023a hRdgataM tasya rAjarSer vijJAya harasaMnidhau
7078023c pratyuvAca zubhaM vAkyaM devI rudrasya saMmatA
7078024a ardhasya devo varado varArdhasya tathA hy aham
7078024c tasmAd ardhaM gRhANa tvaM strIpuMsor yAvad icchasi
7078025a tad adbhutatamaM zrutvA devyA varam anuttamam
7078025c saMprahRSTamanA bhUtvA rAjA vAkyam athAbravIt
7078026a yadi devi prasannA me rUpeNApratimA bhuvi
7078026c mAsaM strItvam upAsitvA mAsaM syAM puruSaH punaH
7078027a IpsitaM tasya vijJAya devI surucirAnanA
7078027c pratyuvAca zubhaM vAkyam evam etad bhaviSyati
7078028a rAjan puruSabhUtas tvaM strIbhAvaM na smariSyasi
7078028c strIbhUtaz cAparaM mAsaM na smariSyasi pauruSam
7078029a evaM sa rAjA puruSo mAsaM bhUtvAtha kArdamiH
7078029c trailokyasundarI nArI mAsam ekam ilAbhavat
7079001a tAM kathAm ilasaMbaddhAM rAmeNa samudIritAm
7079001c lakSmaNo bharataz caiva zrutvA paramavismitau
7079002a tau rAmaM prAJjalIbhUtvA tasya rAjJo mahAtmanaH
7079002c vistaraM tasya bhAvasya tadA papracchatuH punaH
7079003a kathaM sa rAjA strIbhUto vartayAm Asa durgatim
7079003c puruSo vA yadA bhUtaH kAM vRttiM vartayaty asau
7079004a tayos tad bhASitaM zrutvA kautUhalasamanvitam
7079004c kathayAm Asa kAkutSThas tasya rAjJo yathA gatam
7079005a tam eva prathamaM mAsaM strIbhUtvA lokasundarI
7079005c tAbhiH parivRtA strIbhir ye 'sya pUrvaM padAnugAH
7079006a tat kAnanaM vigAhyAzu vijahre lokasundarI
7079006c drumagulmalatAkIrNaM padbhyAM padmadalekSaNA
7079007a vAhanAni ca sarvANi saMtyaktvA vai samantataH
7079007c parvatAbhogavivare tasmin reme ilA tadA
7079008a atha tasmin vanoddeze parvatasyAvidUrataH
7079008c saraH suruciraprakhyaM nAnApakSigaNAyutam
7079009a dadarza sA ilA tasmin budhaM somasutaM tadA
7079009c jvalantaM svena vapuSA pUrNaM somam ivoditam
7079010a tapantaM ca tapas tIvram ambhomadhye durAsadam
7079010c yazak saraM kAmagamaM tAruNye paryavasthitam
7079011a sA taM jalAzayaM sarvaM kSobhayAm Asa vismitA
7079011c saha taiH pUra puruSaiH strIbhUtai raghunandana
7079012a budhas tu tAM nirIkSyaiva kAmabANAbhipIDitaH
7079012c nopalebhe tadAtmAnaM cacAla ca tadAmbhasi
7079013a ilAM nirIkSamANaH sa trailokyAbhyadhikAM zubhAm
7079013c cintAM samabhyatikrAmat kA nv iyaM devatAdhikA
7079014a na devISu na nAgISu nAsurISv apsaraHsu ca
7079014c dRSTapUrvA mayA kA cid rUpeNaitena zobhitA
7079015a sadRzIyaM mama bhaved yadi nAnyaparigrahA
7079015c iti buddhiM samAsthAya jalAt sthalam upAgamat
7079016a sa AzramaM samupAgamya catasraH pramadAs tataH
7079016c zabdApayata dharmAtmA tAz cainaM ca vavandire
7079017a sa tAH papraccha dharmAtma kasyaiSA lokasundarI
7079017c kimartham AgatA ceha satyam AkhyAta mAciram
7079018a zubhaM tu tasya tadvAkyaM madhuraM madhurAkSaram
7079018c zrutvA tu tAH striyaH sarvA Ucur madhurayA girA
7079019a asmAkam eSA suzroNI prabhutve vartate sadA
7079019c apatiH kAnanAnteSu sahAsmAbhir aTaty asau
7079020a tad vAkyam avyaktapadaM tAsAM strINAM nizamya tu
7079020c vidyAm AvartanIM puNyAm Avartayata sa dvijaH
7079021a so 'rthaM viditvA nikhilaM tasya rAjJo yathAgatam
7079021c sarvA eva striyas tAz ca babhASe munipuMgavaH
7079022a atra kiM puruSA bhadrA avasaJ zailarodhasi
7079022c vatsyathAsmin girau yUyam avakAzo vidhIyatAm
7079023a mUlaputraphalaiH sarvA vartayiSyatha nityadA
7079023c striyaH kimpuruSAn nAma bhartqn samupalapsyatha
7079024a tAH zrutvA somaputrasya vAcaM kiMpuruSIkRtAH
7079024c upAsAM cakrire zailaM bahvyas tA bahudhA tadA
7080001a zrutvA kiMpuruSotpattiM lakSmaNo bharatas tadA
7080001c Azcaryam iti cAbrUtAm ubhau rAmaM janezvaram
7080002a atha rAmaH kathAm etAM bhUya eva mahAyazAH
7080002c kathayAm Asa dharmAtmA prajApatisutasya vai
7080003a sarvAs tA vidrutA dRSTvA kiMnarIr RSisattamaH
7080003c uvAca rUpasaMpannAM tAM striyaM prahasann iva
7080004a somasyAhaM sudayitaH sutaH surucirAnane
7080004c bhajasva mAM varArohe bhaktyA snigdhena cakSuSA
7080005a tasya tad vacanaM zrutvA zUnye svajanavarjitA
7080005c ilA suruciraprakhyaM pratyuvAca mahAgraham
7080006a ahaM kAmakarI saumya tavAsmi vazavartinI
7080006c prazAdhi mAM somasuta yathecchasi tathA kuru
7080007a tasyAs tad adbhutaprakhyaM zrutvA harSasamanvitaH
7080007c sa vai kAmI saha tayA reme candramasaH sutaH
7080008a budhasya mAdhavo mAsas tAm ilAM rucirAnanAm
7080008c gato ramayato 'tyarthaM kSaNavat tasya kAminaH
7080009a atha mAse tu saMpUrNe pUrNendusadRzAnanaH
7080009c prajApatisutaH zrImAJ zayane pratyabudhyata
7080010a so 'pazyat somajaM tatra tapyantaM salilAzaye
7080010c UrdhvabAhuM nirAlambaM taM rAjA pratyabhASata
7080011a bhagavan parvataM durgaM praviSTo 'smi sahAnugaH
7080011c na ca pazyAmi tat sainyaM kva nu te mAmakA gatAH
7080012a tac chrutvA tasya rAjarSer naSTasaMjJasya bhASitam
7080012c pratyuvAca zubhaM vAkyaM sAntvayan parayA girA
7080013a azmavarSeNa mahatA bhRtyAs te vinipAtitAH
7080013c tvaM cAzramapade supto vAtavarSabhayArditaH
7080014a samAzvasihi bhadraM te nirbhayo vigatajvaraH
7080014c phalamUlAzano vIra vasa ceha yathAsukham
7080015a sa rAjA tena vAkyena pratyAzvasto mahAyazAH
7080015c pratyuvAca zubhaM vAkyaM dIno bhRtyajanakSayAt
7080016a tyakSyAmy ahaM svakaM rAjyaM nAhaM bhRtyair vinA kRtaH
7080016c vartayeyaM kSaNaM brahman samanujJAtum arhasi
7080017a suto dharmaparo brahmaJ jyeSTho mama mahAyazAH
7080017c zazabindur iti khyAtaH sa me rAjyaM prapatsyate
7080018a na hi zakSyAmy ahaM gatvA bhRtyadArAn sukhAnvitAn
7080018c prativaktuM mahAtejaH kiM cid apy azubhaM vacaH
7080019a tathA bruvati rAjendre budhaH paramam adbhutam
7080019c sAntvapUrvam athovAca vAsas ta iha rocatAm
7080020a na saMtApas tvayA kAryaH kArdameya mahAbala
7080020c saMvatsaroSitasyeha kArayiSyAmi te hitam
7080021a tasya tad vacanaM zrutvA budhasyAkliSTakarmaNaH
7080021c vAsAya vidadhe buddhiM yad uktaM brahmavAdinA
7080022a mAsaM sa strI tadA bhUtvA ramayaty anizaM zubhA
7080022c mAsaM puruSabhAvena dharmabuddhiM cakAra saH
7080023a tataH sa navame mAsi ilA somasutAtmajam
7080023c janayAm Asa suzroNI purUravasam Atmajam
7080024a jAtamAtraM tu suzroNI pitur haste nyavezayat
7080024c budhasya samavarNAbham ilAputraM mahAbalam
7080025a budho 'pi puruSIbhUtaM samAzvAsya narAdhipam
7080025c kathAbhI ramayAm Asa dharmayuktAbhir AtmavAn
7081001a tathoktavati rAme tu tasya janma tad adbhutam
7081001c uvAca lakSmaNo bhUyo bharataz ca mahAyazAH
7081002a sA priyA somaputrasya saMvatsaram athoSitA
7081002c akarot kiM narazreSTha tat tvaM zaMsitum arhasi
7081003a tayos tad vAkyamAdhuryaM nizamya paripRcchatoH
7081003c rAmaH punar uvAcemAM prajApatisute kathAm
7081004a puruSatvaM gate zUre budhaH paramabuddhimAn
7081004c saMvartaM paramodAram AjuhAva mahAyazAH
7081005a cyavanaM bhRguputraM ca muniM cAriSTaneminam
7081005c pramodanaM modakaraM tato durvAsasaM munim
7081006a etAn sarvAn samAnIya vAkyajJas tattvadarzinaH
7081006c uvAca sarvAn suhRdo dhairyeNa susamAhitaH
7081007a ayaM rAjA mahAbAhuH kardamasya ilaH sutaH
7081007c jAnItainaM yathA bhUtaM zreyo hy asya vidhIyatAm
7081008a teSAM saMvadatAm eva tam Azramam upAgamat
7081008c kardamaH sumahAtejA dvijaiH saha mahAtmabhiH
7081009a pulastyaz ca kratuz caiva vaSaTkAras tathaiva ca
7081009c oMkAraz ca mahAtejAs tam Azramam upAgaman
7081010a te sarve hRSTamanasaH parasparasamAgame
7081010c hitaiSiNo bAhli pateH pRthag vAkyam athAbruvan
7081011a kardamas tv abravId vAkyaM sutArthaM paramaM hitam
7081011c dvijAH zRNuta madvAkyaM yac chreyaH pArthivasya hi
7081012a nAnyaM pazyAmi bhaiSajyam antareNa vRSadhvajam
7081012c nAzvamedhAt paro yajJaH priyaz caiva mahAtmanaH
7081013a tasmAd yajAmahe sarve pArthivArthe durAsadam
7081013c kardamenaivam uktAs tu sarva eva dvijarSabhAH
7081013e rocayanti sma taM yajJaM rudrasyArAdhanaM prati
7081014a saMvartasya tu rAjarSiH ziSyaH parapuraMjayaH
7081014c marutta iti vikhyAtas taM yajJaM samupAharat
7081015a tato yajJo mahAn AsId budhAzramasamIpataH
7081015c rudraz ca paramaM toSam AjagAma mahAyazAH
7081016a atha yajJasamAptau tu prItaH paramayA mudA
7081016c umApatir dvijAn sarvAn uvAcedam ilAM prati
7081017a prIto 'smi hayamedhena bhaktyA ca dvijasattamAH
7081017c asya bAhlipatez caiva kiM karomi priyaM zubham
7081018a tathA vadati deveze dvijAs te susamAhitAH
7081018c prasAdayanti devezaM yathA syAt puruSas tv ilA
7081019a tataH prItamanA rudraH puruSatvaM dadau punaH
7081019c ilAyai sumahAtejA dattvA cAntaradhIyata
7081020a nivRtte hayamedhe tu gate cAdarzanaM hare
7081020c yathAgataM dvijAH sarve agacchan dIrghadarzinaH
7081021a rAjA tu bAhlim utsRjya madhyadeze hy anuttamam
7081021c nivezayAm Asa puraM pratiSThAnaM yazaskaram
7081022a zazabindus tu rAjAsId bAhlyAM parapuraMjayaH
7081022c pratiSThAna ilo rAjA prajApatisuto balI
7081023a sa kAle prAptavA&l lokam ilo brAhmam anuttamam
7081023c ailaH purUravA rAjA pratiSThAnam avAptavAn
7081024a IdRzo hy azvamedhasya prabhAvaH puruSarSabhau
7081024c strIbhUtaH pauruSaM lebhe yac cAnyad api durlabham
7082001a etad AkhyAya kAkutstho bhrAtRbhyAm amitaprabhaH
7082001c lakSmaNaM punar evAha dharmayuktam idaM vacaH
7082002a vasiSThaM vAmadevaM ca jAbAlim atha kazyapam
7082002c dvijAMz ca sarvapravarAn azvamedhapuraskRtAn
7082003a etAn sarvAn samAhUya mantrayitvA ca lakSmaNa
7082003c hayaM lakSmaNasaMpannaM vimokSyAmi samAdhinA
7082004a tad vAkyaM rAghaveNoktaM zrutvA tvaritavikramaH
7082004c dvijAn sarvAn samAhUya darzayAm Asa rAghavam
7082005a te dRSTvA devasaMkAzaM kRtapAdAbhivandanam
7082005c rAghavaM sudurAdharSam AzIrbhiH samapUjayan
7082006a prAJjalis tu tato bhUtvA rAghavo dvijasattamAn
7082006c uvAca dharmasaMyuktam azvamedhAzritaM vacaH
7082007a sa teSAM dvijamukhyAnAM vAkyam adbhutadarzanam
7082007c azvamedhAzritaM zrutvA bhRzaM prIto 'bhavat tadA
7082008a vijJAya tu mataM teSAM rAmo lakSmaNam abravIt
7082008c preSayasva mahAbAho sugrIvAya mahAtmane
7082009a zIghraM mahadbhir haribhir bahubhiz ca tadAzrayaiH
7082009c sArdham Agaccha bhadraM te anubhoktuM makhottamam
7082010a vibhISaNaz ca rakSobhiH kAmagair bahubhir vRtaH
7082010c azvamedhaM mahAbAhuH prApnotu laghuvikramaH
7082011a rAjAnaz ca naravyAghra ye me priyacikIrSavaH
7082011c sAnugAH kSipram AyAntu yajJabhUmim anuttamAm
7082012a dezAntaragatA ye ca dvijA dharmaparAyaNAH
7082012c nimantrayasva tAn sarvAn azvamedhAya lakSmaNa
7082013a RSayaz ca mahAbAho AhUyantAM tapodhanAH
7082013c dezAntaragatA ye ca sadArAz ca maharSayaH
7082014a yajJavATaz ca sumahAn gomatyA naimiSe vane
7082014c AjJApyatAM mahAbAho tad dhi puNyam anuttamam
7082015a zataM vAhasahasrANAM taNDulAnAM vapuSmatAm
7082015c ayutaM tilamudgasya prayAtv agre mahAbala
7082016a suvarNakoTyo bahulA hiraNyasya zatottarAH
7082016c agrato bharataH kRtvA gacchatv agre mahAmatiH
7082017a antarApaNavIthyaz ca sarvAMz ca naTanartakAn
7082017c naigamAn bAlavRddhAMz ca dvijAMz ca susamAhitAn
7082018a karmAntikAMz ca kuzalAJ zilpinaz ca supaNDitAn
7082018c mAtaraz caiva me sarvAH kumArAntaHpurANi ca
7082019a kAJcanIM mama patnIM ca dIkSArhAM yajJakarmaNi
7082019c agrato bharataH kRtvA gacchatv agre mahAmatiH
7083001a tat sarvam akhilenAzu prasthApya bharatAgrajaH
7083001c hayaM lakSmaNasaMpannaM kRSNasAraM mumoca ha
7083002a Rtvigbhir lakSmaNaM sArdham azve ca viniyujya saH
7083002c tato 'bhyagacchat kAkutsthaH saha sainyena naimiSam
7083003a yajJavATaM mahAbAhur dRSTvA paramam adbhutam
7083003c praharSam atulaM lebhe zrImAn iti ca so 'bravIt
7083004a naimiSe vasatas tasya sarva eva narAdhipAH
7083004c AjagmuH sarvarASTrebhyas tAn rAmaH pratyapUjayat
7083005a upakAryAn mahArhAMz ca pArthivAnAM mahAtmanAm
7083005c sAnugAnAM narazreSTho vyAdideza mahAdyutiH
7083006a annapAnAni vastrANi sAnugAnAM mahAtmanAm
7083006c bharataH saMdadAv Azu zatrughnasahitas tadA
7083007a vAnarAz ca mahAtmAnaH sugrIvasahitAs tadA
7083007c viprANAM praNatAH sarve cakrire pariveSaNam
7083008a vibhISaNaz ca rakSobhiH sragvibhir bahubhir vRtaH
7083008c RSINAm ugratapasAM kiMkaraH paryupasthitaH
7083009a evaM suvihito yajJo hayamedho 'bhyavartata
7083009c lakSmaNenAbhiguptA ca hayacaryA pravartitA
7083010a nAnyaH zabdo 'bhavat tatra hayamedhe mahAtmanaH
7083010c chandato dehi visrabdho yAvat tuSyanti yAcakAH
7083010e tAvad vAnararakSobhir dattam evAbhyadRzyata
7083011a na kaz cin malinas tatra dIno vApy atha vA kRzaH
7083011c tasmin yajJavare rAjJo hRSTapuSTajanAvRte
7083012a ye ca tatra mahAtmAno munayaz cirajIvinaH
7083012c nAsmaraMs tAdRzaM yajJaM dAnaughasamalaMkRtam
7083013a rajatAnAM suvarNAnAM ratnAnAm atha vAsasAm
7083013c anizaM dIyamAnAnAM nAntaH samupadRzyate
7083014a na zakrasya na somasya yamasya varuNasya vA
7083014c IdRzo dRSTapUrvo na evam Ucus tapodhanAH
7083015a sarvatra vAnarAs tasthuH sarvatraiva ca rAkSasAH
7083015c vAso dhanAni kAmibhyaH pUrNahastA dadur bhRzam
7083016a IdRzo rAjasiMhasya yajJaH sarvaguNAnvitaH
7083016c saMvatsaram atho sAgraM vartate na ca hIyate
7084001a vartamAne tathAbhUte yajJe paramake 'dbhute
7084001c saziSya AjagAmAzu vAlmIkir munipuMgavaH
7084002a sa dRSTvA divyasaMkAzaM yajJam adbhutadarzanam
7084002c ekAnte RSivATAnAM cakAra uTajAJ zubhAn
7084003a sa ziSyAv abravId dhRSTo yuvAM gatvA samAhitau
7084003c kRtsnaM rAmAyaNaM kAvyaM gAyatAM parayA mudA
7084004a RSivATeSu puNyeSu brAhmaNAvasatheSu ca
7084004c rathyAsu rAjamArgeSu pArthivAnAM gRheSu ca
7084005a rAmasya bhavanadvAri yatra karma ca vartate
7084005c RtvijAm agrataz caiva tatra geyaM vizeSataH
7084006a imAni ca phalAny atra svAdUni vividhAni ca
7084006c jAtAni parvatAgreSu AsvAdyAsvAdya gIyatAm
7084007a na yAsyathaH zramaM vatsau bhakSayitvA phalAni vai
7084007c mUlAni ca sumRSTAni nagarAt parihAsyatha
7084008a yadi zabdApayed rAmaH zravaNAya mahIpatiH
7084008c RSINAm upaviSTAnAM tato geyaM pravartatAm
7084009a divase viMzatiH sargA geyA vai parayA mudA
7084009c pramANair bahubhis tatra yathoddiSTaM mayA purA
7084010a lobhaz cApi na kartavyaH svalpo 'pi dhanakAGkSayA
7084010c kiM dhanenAzramasthAnAM phalamUlopabhoginAm
7084011a yadi pRcchet sa kAkutstho yuvAM kasyeti dArakau
7084011c vAlmIker atha ziSyau hi brUtAm evaM narAdhipam
7084012a imAs tantrIH sumadhurAH sthAnaM vA pUrvadarzitam
7084012c mUrchayitvA sumadhuraM gAyetAM vigatajvarau
7084013a AdiprabhRti geyaM syAn na cAvajJAya pArthivam
7084013c pitA hi sarvabhUtAnAM rAjA bhavati dharmataH
7084014a tad yuvAM hRSTamanasau zvaH prabhAte samAdhinA
7084014c gAyetAM madhuraM geyaM tantrIlayasamanvitam
7084015a iti saMdizya bahuzo muniH prAcetasas tadA
7084015c vAlmIkiH paramodAras tUSNIm AsIn mahAyazAH
7084016a tAm adbhutAM tau hRdaye kumArau; nivezya vANIm RSibhASitAM zubhAm
7084016c samutsukau tau sukham USatur nizAM; yathAzvinau bhArgavanItisaMskRtau
7085001a tau rajanyAM prabhAtAyAM snAtau hutahutAzanau
7085001c yathoktam RSiNA pUrvaM tatra tatrAbhyagAyatAm
7085002a tAM sa zuzrAva kAkutsthaH pUrvacaryAM tatas tataH
7085002c apUrvAM pAThya jAtiM ca geyena samalaMkRtAm
7085003a pramANair bahubhir baddhAM tantrIlayasamanvitAm
7085003c bAlAbhyAM rAghavaH zrutvA kautUhalaparo 'bhavat
7085004a atha karmAntare rAjA samAnIya mahAmunIn
7085004c pArthivAMz ca naravyAghraH paNDitAn naigamAMs tathA
7085005a paurANikAJ zabdavito ye ca vRddhA dvijAtayaH
7085005c etAn sarvAn samAnIya gAtArau samavezayat
7085006a hRSTA RSigaNAs tatra pArthivAz ca mahaujasaH
7085006c pibanta iva cakSurbhyAM rAjAnaM gAyakau ca tau
7085007a parasparam athocus te sarva eva samaM tataH
7085007c ubhau rAmasya sadRzau bimbAd bimbam ivoddhRtau
7085008a jaTilau yadi na syAtAM na valkaladharau yadi
7085008c vizeSaM nAdhigacchAmo gAyato rAghavasya ca
7085009a teSAM saMvadatAm evaM zrotqNAM harSavardhanam
7085009c geyaM pracakratus tatra tAv ubhau munidArakau
7085010a tataH pravRttaM madhuraM gAndharvam atimAnuSam
7085010c na ca tRptiM yayuH sarve zrotAro geyasampadA
7085011a pravRttam AditaH pUrvaM sargAn nAradadarzanAt
7085011c tataH prabhRti sargAMz ca yAvadviMzaty agAyatAm
7085012a tato 'parAhNasamaye rAghavaH samabhASata
7085012c zrutvA viMzatisargAMs tAn bharataM bhrAtRvatsalaH
7085013a aSTAdaza sahasrANi suvarNasya mahAtmanoH
7085013c dadasva zIghraM kAkutstha bAlayor mA vRthA zramaH
7085014a dIyamAnaM suvarNaM tan nAgRhNItAM kuzIlavau
7085014c Ucatuz ca mahAtmAnau kim aneneti vismitau
7085015a vanyena phalamUlena niratu svo vanaukasau
7085015c suvarNena hiraNyena kiM kariSyAvahe vane
7085016a tathA tayoH prabruvatoH kautUhalasamanvitAH
7085016c zrotAraz caiva rAmaz ca sarva eva suvismitAH
7085017a tasya caivAgamaM rAmaH kAvyasya zrotum utsukaH
7085017c papraccha tau mahAtejAs tAv ubhau munidArakau
7085018a kiMpramANam idaM kAvyaM kA pratiSThA mahAtmanaH
7085018c kartA kAvyasya mahataH ko vAsau munipuMgavaH
7085019a pRcchantaM rAghavaM vAkyam Ucatur munidArakau
7085019c vAlmIkir bhagavAn kartA saMprApto yajJasaMnidhim
7085019e yenedaM caritaM tubhyam azeSaM saMpradarzitam
7085020a AdiprabhRti rAjendra paJcasarga zatAni ca
7085020c pratiSThA jIvitaM yAvat tAvad rAjaJ zubhAzubham
7085021a yadi buddhiH kRtA rAjaJ zravaNAya mahAratha
7085021c karmAntare kSaNI hUtas tac chRNuSva sahAnujaH
7085022a bADham ity abravId rAmas tau cAnujJApya rAghavam
7085022c prahRSTau jagmatur vAsaM yatrAsau munipuMgavaH
7085023a rAmo 'pi munibhiH sArdhaM pArthivaiz ca mahAtmabhiH
7085023c zrutvA tad gItamAdhuryaM karmazAlAm upAgamat
7086001a rAmo bahUny ahAny eva tad gItaM paramAdbhutam
7086001c zuzrAva munibhiH sArdhaM rAjabhiH saha vAnaraiH
7086002a tasmin gIte tu vijJAya sItAputrau kuzIlavau
7086002c tasyAH pariSado madhye rAmo vacanam abravIt
7086003a madvaco brUta gacchadhvam iti bhagavato 'ntikam
7086004a yadi zuddhasamAcArA yadi vA vItakalmaSA
7086004c karotv ihAtmanaH zuddhim anumAnya mahAmunim
7086005a chandaM munes tu vijJAya sItAyAz ca manogatam
7086005c pratyayaM dAtukAmAyAs tataH zaMsata me laghu
7086006a zvaH prabhAte tu zapathaM maithilI janakAtmajA
7086006c karotu pariSanmadhye zodhanArthaM mameha ca
7086007a zrutvA tu rAghavasyaitad vacaH paramam adbhutam
7086007c dUtAH saMprayayur vATaM yatrAste munipuMgavaH
7086008a te praNamya mahAtmAnaM jvalantam amitaprabham
7086008c Ucus te rAmavAkyAni mRdUni madhurANi ca
7086009a teSAM tad bhASitaM zrutvA rAmasya ca manogatam
7086009c vijJAya sumahAtejA munir vAkyam athAbravIt
7086010a evaM bhavatu bhadraM vo yathA tuSyati rAghavaH
7086010c tathA kariSyate sItA daivataM hi patiH striyAH
7086011a tathoktA muninA sarve rAmadUtA mahaujasaH
7086011c pratyetya rAghavaM sarve munivAkyaM babhASire
7086012a tataH prahRSTaH kAkutsthaH zrutvA vAkyaM mahAtmanaH
7086012c RSIMs tatra sametAMz ca rAjJaz caivAbhyabhASata
7086013a bhagavantaH saziSyA vai sAnugAz ca narAdhipAH
7086013c pazyantu sItAzapathaM yaz caivAnyo 'bhikAGkSate
7086014a tasya tad vacanaM zrutvA rAghavasya mahAtmanaH
7086014c sarveSAm RSimukhyAnAM sAdhuvAdo mahAn abhUt
7086015a rAjAnaz ca mahAtmAnaH prazaMsanti sma rAghavam
7086015c upapannaM narazreSTha tvayy eva bhuvi nAnyataH
7086016a evaM vinizcayaM kRtvA zvobhUta iti rAghavaH
7086016c visarjayAm Asa tadA sarvAMs tAJ zatrusUdanaH
7087001a tasyAM rajanyAM vyuSTAyAM yajJavATagato nRpaH
7087001c RSIn sarvAn mahAtejAH zabdApayati rAghavaH
7087002a vasiSTho vAmadevaz ca jAbAlir atha kAzyapaH
7087002c vizvAmitro dIrghatapA durvAsAz ca mahAtapAH
7087003a agastyo 'tha tathAzaktir bhArgavaz caiva vAmanaH
7087003c mArkaNDeyaz ca dIrghAyur maudgalyaz ca mahAtapAH
7087004a bhArgavaz cyavanaz caiva zatAnandaz ca dharmavit
7087004c bharadvAjaz ca tejasvI agniputraz ca suprabhaH
7087005a ete cAnye ca munayo bahavaH saMzitavratAH
7087005c rAjAnaz ca naravyAghrAH sarva eva samAgatAH
7087006a rAkSasAz ca mahAvIryA vAnarAz ca mahAbalAH
7087006c samAjagmur mahAtmAnaH sarva eva kutUhalAt
7087007a kSatriyAz caiva vaizyAz ca zUdrAz caiva sahasrazaH
7087007c sItAzapathavIkSArthaM sarva eva samAgatAH
7087008a tathA samAgataM sarvam azvabhUtam ivAcalam
7087008c zrutvA munivaras tUrNaM sasItaH samupAgamat
7087009a tam RSiM pRSThataH sItA sAnvagacchad avAGmukhI
7087009c kRtAJjalir bASpagalA kRtvA rAmaM manogatam
7087010a tAM dRSTvA zrIm ivAyAntIM brahmANam anugAminIm
7087010c vAlmIkeH pRSThataH sItAM sAdhukAro mahAn abhUt
7087011a tato halahalAzabdaH sarveSAm evam Ababhau
7087011c duHkhajena vizAlena zokenAkulitAtmanAm
7087012a sAdhu sIteti ke cit tu sAdhu rAmeti cApare
7087012c ubhAv eva tu tatrAnye sAdhu sAdhv iti cAbruvan
7087013a tato madhyaM janaughAnAM pravizya munipuMgavaH
7087013c sItAsahAyo vAlmIkir iti hovAca rAghavam
7087014a iyaM dAzarathe sItA suvratA dharmacAriNI
7087014c apApA te parityaktA mamAzramasamIpataH
7087015a lokApavAdabhItasya tava rAma mahAvrata
7087015c pratyayaM dAsyate sItA tAm anujJAtum arhasi
7087016a imau ca jAnakIputrAv ubhau ca yamajAtakau
7087016c sutau tavaiva durdharSau satyam etad bravImi te
7087017a pracetaso 'haM dazamaH putro rAghavanandana
7087017c na smarAmy anRtaM vAkyaM tathemau tava putrakau
7087018a bahuvarSasahasrANi tapazcaryA mayA kRtA
7087018c tasyAH phalam upAznIyAm apApA maithilI yathA
7087019a ahaM paJcasu bhUteSu manaHSaSTheSu rAghava
7087019c vicintya sItAM zuddheti nyagRhNAM vananirjhare
7087020a iyaM zuddhasamAcArA apApA patidevatA
7087020c lokApavAdabhItasya dAsyati pratyayaM tava
7088001a vAlmIkinaivam uktas tu rAghavaH pratyabhASata
7088001c prAJjalir jagato madhye dRSTvA tAM devavarNinIm
7088002a evam etan mahAbhAga yathA vadasi dharmavit
7088002c pratyayo hi mama brahmaMs tava vAkyair akalmaSaiH
7088003a pratyayo hi purA datto vaidehyA surasaMnidhau
7088003c seyaM lokabhayAd brahmann apApety abhijAnatA
7088003e parityaktA mayA sItA tad bhavAn kSantum arhati
7088004a jAnAmi cemau putrau me yamajAtau kuzIlavau
7088004c zuddhAyAM jagato madhye maithilyAM prItir astu me
7088005a abhiprAyaM tu vijJAya rAmasya surasattamAH
7088005c pitAmahaM puraskRtya sarva eva samAgatAH
7088006a AdityA vasavo rudrA vizvedevA marudgaNAH
7088006c azvinAv RSigandharvA apsarANAM gaNAs tathA
7088006e sAdhyAz ca devAH sarve te sarve ca paramarSayaH
7088007a tato vAyuH zubhaH puNyo divyagandho manoramaH
7088007c taM janaughaM surazreSTho hlAdayAm Asa sarvataH
7088008a tad adbhutam ivAcintyaM nirIkSante samAhitAH
7088008c mAnavAH sarvarASTrebhyaH pUrvaM kRtayuge yathA
7088009a sarvAn samAgatAn dRSTvA sItA kASAyavAsinI
7088009c abravIt prAJjalir vAkyam adhodRSTir avAGmukhI
7088010a yathAhaM rAghavAd anyaM manasApi na cintaye
7088010c tathA me mAdhavI devI vivaraM dAtum arhati
7088011a tathA zapantyAM vaidehyAM prAdurAsIt tad adbhutam
7088011c bhUtalAd utthitaM divyaM siMhAsanam anuttamam
7088012a dhriyamANaM zirobhis tan nAgair amitavikramaiH
7088012c divyaM divyena vapuSA sarvaratnavibhUSitam
7088013a tasmiMs tu dharaNI devI bAhubhyAM gRhya maithilIm
7088013c svAgatenAbhinandyainAm Asane copaveSayat
7088014a tAm AsanagatAM dRSTvA pravizantIM rasAtalam
7088014c puSpavRSTir avicchinnA divyA sItAm avAkirat
7088015a sAdhukAraz ca sumahAn devAnAM sahasotthitaH
7088015c sAdhu sAdhv iti vai sIte yasyAs te zIlam IdRzam
7088016a evaM bahuvidhA vAco hy antarikSagatAH surAH
7088016c vyAjahrur hRSTamanaso dRSTvA sItApravezanam
7088017a yajJavATagatAz cApi munayaH sarva eva te
7088017c rAjAnaz ca naravyAghrA vismayAn noparemire
7088018a antarikSe ca bhUmau ca sarve sthAvarajaGgamAH
7088018c dAnavAz ca mahAkAyAH pAtAle pannagAdhipAH
7088019a ke cid vineduH saMhRSTAH ke cid dhyAnaparAyaNAH
7088019c ke cid rAmaM nirIkSante ke cit sItAm acetanAH
7088020a sItApravezanaM dRSTvA teSAm AsIt samAgamaH
7088020c taM muhUrtam ivAtyarthaM sarvaM saMmohitaM jagat
7089001a tadAvasAne yajJasya rAmaH paramadurmanAH
7089001c apazyamAno vaidehIM mene zUnyam idaM jagat
7089001e zokena paramAyatto na zAntiM manasAgamat
7089002a visRjya pArthivAn sarvAn RkSavAnararAkSasAn
7089002c janaughaM brahmamukhyAnAM vittapUrNaM vyasarjayat
7089003a tato visRjya tAn sarvAn rAmo rAjIvalocanaH
7089003c hRdi kRtvA tadA sItAm ayodhyAM praviveza saH
7089004a na sItAyAH parAM bhAryAM vavre sa raghunandanaH
7089004c yajJe yajJe ca patnyarthaM jAnakI kAJcanI bhavat
7089005a dazavarSasahasrANi vAjimedham upAkarot
7089005c vAjapeyAn dazaguNAMs tathA bahusuvarNakAn
7089006a agniSTomAtirAtrAbhyAM gosavaiz ca mahAdhanaiH
7089006c Ije kratubhir anyaiz ca sa zrImAn AptadakSiNaiH
7089007a evaM sa kAlaH sumahAn rAjyasthasya mahAtmanaH
7089007c dharme prayatamAnasya vyatIyAd rAghavasya tu
7089008a RkSavAnararakSAMsi sthitA rAmasya zAsane
7089008c anurajyanti rAjAno ahany ahani rAghavam
7089009a kAle varSati parjanyaH subhikSaM vimalA dizaH
7089009c hRSTapuSTajanAkIrNaM puraM janapadas tathA
7089010a nAkAle mriyate kaz cin na vyAdhiH prANinAM tadA
7089010c nAdharmaz cAbhavat kaz cid rAme rAjyaM prazAsati
7089011a atha dIrghasya kAlasya rAmamAtA yazasvinI
7089011c putrapautraiH parivRtA kAladharmam upAgamat
7089012a anviyAya sumitrApi kaikeyI ca yazasvinI
7089012c dharmaM kRtvA bahuvidhaM tridive paryavasthitA
7089013a sarvAH pratiSThitAH svarge rAjJA dazarathena ca
7089013c samAgatA mahAbhAgAH sahadharmaM ca lebhire
7089014a tAsAM rAmo mahAdAnaM kAle kAle prayacchati
7089014c mAtqNAm avizeSeNa brAhmaNeSu tapasviSu
7089015a pitryANi bahuratnAni yajJAn paramadustarAn
7089015c cakAra rAmo dharmAtmA pitqn devAn vivardhayan
7090001a kasya cit tv atha kAlasya yudhAjit kekayo nRpaH
7090001c svaguruM preSayAm Asa rAghavAya mahAtmane
7090002a gArgyam aGgirasaH putraM brahmarSim amitaprabham
7090002c daza cAzvasahasrANi prItidAnam anuttamam
7090003a kambalAni ca ratnAni citravastram athottamam
7090003c rAmAya pradadau rAjA bahUny AbharaNAni ca
7090004a zrutvA tu rAghavo gArgyaM maharSiM samupAgatam
7090004c mAtulasyAzvapatinaH priyaM dUtam upAgatam
7090005a pratyudgamya ca kAkutsthaH krozamAtraM sahAnugaH
7090005c gArgyaM saMpUjayAm Asa dhanaM tat pratigRhya ca
7090006a pRSTvA ca prItidaM sarvaM kuzalaM mAtulasya ca
7090006c upaviSTaM mahAbhAgaM rAmaH praSTuM pracakrame
7090007a kim Aha mAtulo vAkyaM yadarthaM bhagavAn iha
7090007c prApto vAkyavidAM zreSTha sAkSAd iva bRhaspatiH
7090008a rAmasya bhASitaM zrutvA brahmarSiH kAryavistaram
7090008c vaktum adbhutasaMkAzaM rAghavAyopacakrame
7090009a mAtulas te mahAbAho vAkyam Aha nararSabha
7090009c yudhAjit prItisaMyuktaM zrUyatAM yadi rocate
7090010a ayaM gandharvaviSayaH phalamUlopazobhitaH
7090010c sindhor ubhayataH pArzve dezaH paramazobhanaH
7090011a taM ca rakSanti gandharvAH sAyudhA yuddhakovidAH
7090011c zailUSasya sutA vIrAs tisraH koTyo mahAbalAH
7090012a tAn vinirjitya kAkutstha gandharvaviSayaM zubham
7090012c nivezaya mahAbAho dve pure susamAhitaH
7090013a anyasya na gatis tatra dezaz cAyaM suzobhanaH
7090013c rocatAM te mahAbAho nAhaM tvAm anRtaM vade
7090014a tac chrutvA rAghavaH prIto maharSer mAtulasya ca
7090014c uvAca bADham ity evaM bharataM cAnvavaikSata
7090015a so 'bravId rAghavaH prItaH prAJjalipragraho dvijam
7090015c imau kumArau taM dezaM brahmarSe vijayiSyataH
7090016a bharatasyAtmajau vIrau takSaH puSkala eva ca
7090016c mAtulena suguptau tau dharmeNa ca samAhitau
7090017a bharataM cAgrataH kRtvA kumArau sabalAnugau
7090017c nihatya gandharvasutAn dve pure vibhajiSyataH
7090018a nivezya te puravare AtmAjau saMnivezya ca
7090018c AgamiSyati me bhUyaH sakAzam atidhArmikaH
7090019a brahmarSim evam uktvA tu bharataM sabalAnugam
7090019c AjJApayAm Asa tadA kumArau cAbhyaSecayat
7090020a nakSatreNa ca saumyena puraskRtyAGgiraH sutam
7090020c bharataH saha sainyena kumArAbhyAM ca niryayau
7090021a sA senA zakrayukteva naragAn niryayAv atha
7090021c rAghavAnugatA dUraM durAdharSA surAsuraiH
7090022a mAMsAzIni ca sattvAni rakSAMsi sumahAnti ca
7090022c anujagmuz ca bharataM rudhirasya pipAsayA
7090023a bhUtagrAmAz ca bahavo mAMsabhakSAH sudAruNAH
7090023c gandharvaputramAMsAni bhoktukAmAH sahasrazaH
7090024a siMhavyAghrasRgAlAnAM khecarANAM ca pakSiNAm
7090024c bahUni vai sahasrANi senAyA yayur agrataH
7090025a adhyardhamAsam uSitA pathi senA nirAmayA
7090025c hRSTapuSTajanAkIrNA kekayaM samupAgamat
7091001a zrutvA senApatiM prAptaM bharataM kekayAdhipaH
7091001c yudhAjid gArgyasahitaM parAM prItim upAgamat
7091002a sa niryayau janaughena mahatA kekayAdhipaH
7091002c tvaramANo 'bhicakrAma gandharvAn devarUpiNaH
7091003a bharataz ca yudhAjic ca sametau laghuvikramau
7091003c gandharvanagaraM prAptau sabalau sapadAnugau
7091004a zrutvA tu bharataM prAptaM gandharvAs te samAgatAH
7091004c yoddhukAmA mahAvIryA vinadantaH samantataH
7091005a tataH samabhavad yuddhaM tumulaM lomaharSaNam
7091005c saptarAtraM mahAbhImaM na cAnyatarayor jayaH
7091006a tato rAmAnujaH kruddhaH kAlasyAstraM sudAruNam
7091006c saMvartaM nAma bharato gandharveSv abhyayojayat
7091007a te baddhAH kAlapAzena saMvartena vidAritAH
7091007c kSaNenAbhihatAs tisras tatra koTyo mahAtmanA
7091008a taM ghAtaM ghorasaMkAzaM na smaranti divaukasaH
7091008c nimeSAntaramAtreNa tAdRzAnAM mahAtmanAm
7091009a hateSu teSu vIreSu bharataH kaikayIsutaH
7091009c nivezayAm Asa tadA samRddhe dve purottame
7091009e takSaM takSazilAyAM tu puSkaraM puSkarAvatau
7091010a gandharvadezo ruciro gAndhAraviSayaz ca saH
7091010c varSaiH paJcabhir AkIrNo viSayair nAgarais tathA
7091011a dhanaratnaughasaMpUrNo kAnanair upazobhite
7091011c anyonyasaMgharSakRte spardhayA guNavistare
7091012a ubhe suruciraprakhye vyavahArair akalmaSaiH
7091012c udyAnayAnaughavRte suvibhaktAntarApaNe
7091013a ubhe puravare ramye vistarair upazobhite
7091013c gRhamukhyaiH surucirair vimAnaiH samavarNibhiH
7091014a zobhite zobhanIyaiz ca devAyatanavistaraiH
7091014c nivezya paJcabhir varSair bharato rAghavAnujaH
7091014e punar AyAn mahAbAhur ayodhyAM kaikayIsutaH
7091015a so 'bhivAdya mahAtmAnaM sAkSAd dharmam ivAparam
7091015c rAghavaM bharataH zrImAn brahmANam iva vAsavaH
7091016a zazaMsa ca yathAvRttaM gandharvavadham uttamam
7091016c nivezanaM ca dezasya zrutvA prIto 'sya rAghavaH
7092001a tac chrutvA harSam Apede rAghavo bhrAtRbhiH saha
7092001c vAkyaM cAdbhutasaMkAzaM bhrAtqn provAca rAghavaH
7092002a imau kumArau saumitre tava dharmavizAradau
7092002c aGgadaz candraketuz ca rAjyArhau dRDhadhanvinau
7092003a imau rAjye 'bhiSekSyAmi dezaH sAdhu vidhIyatAm
7092003c ramaNIyo hy asaMbAdho rametAM yatra dhanvinau
7092004a na rAjJAM yatra pIdA syAn nAzramANAM vinAzanam
7092004c sa dezo dRzyatAM saumya nAparAdhyAmahe yathA
7092005a tathoktavati rAme tu bharataH pratyuvAca ha
7092005c ayaM kArApatho dezaH suramaNyo nirAmayaH
7092006a nivezyatAM tatra puram aGgadasya mahAtmanaH
7092006c candraketoz ca ruciraM candrakAntaM nirAmayam
7092007a tad vAkyaM bharatenoktaM pratijagrAha rAghavaH
7092007c taM ca kRtvA vaze dezam aGgadasya nyavezayat
7092008a aGgadIyA purI ramyA aGgadasya nivezitA
7092008c ramaNIyA suguptA ca rAmeNAkliSTakarmaNA
7092009a candraketos tu mallasya mallabhUmyAM nivezitA
7092009c candrakAnteti vikhyAtA divyA svargapurI yathA
7092010a tato rAmaH parAM prItiM bharato lakSmaNas tathA
7092010c yayur yudhi durAdharSA abhiSekaM ca cakrire
7092011a abhiSicya kumArau dvau prasthApya sabalAnugau
7092011c aGgadaM pazcimAM bhUmiM candraketum udaGmukham
7092012a aGgadaM cApi saumitrir lakSmaNo 'nujagAma ha
7092012c candraketos tu bharataH pArSNigrAho babhUva ha
7092013a lakSmaNas tv aGgadIyAyAM saMvatsaram athoSitaH
7092013c putre sthite durAdharSe ayodhyAM punar Agamat
7092014a bharato 'pi tathaivoSya saMvatsaram athAdhikam
7092014c ayodhyAM punar Agamya rAmapAdAv upAgamat
7092015a ubhau saumitribharatau rAmapAdAv anuvratau
7092015c kAlaM gatam api snehAn na jajJAte 'tidhArmikau
7092016a evaM varSasahasrANi daza teSAM yayus tadA
7092016c dharme prayatamAnAnAM paurakAryeSu nityadA
7092017a vihRtya kAlaM paripUrNamAnasAH; zriyA vRtA dharmapathe pare sthitAH
7092017c trayaH samiddhA iva dIptatejasA; hutAgnayaH sAdhu mahAdhvare trayaH
7093001a kasya cit tv atha kAlasya rAme dharmapathe sthite
7093001c kAlas tApasarUpeNa rAjadvAram upAgamat
7093002a so 'bravIl lakSmaNaM vAkyaM dhRtimantaM yazasvinam
7093002c mAM nivedaya rAmAya saMprAptaM kAryagauravAt
7093003a dUto hy atibalasyAhaM maharSer amitaujasaH
7093003c rAmaM didRkSur AyAtaH kAryeNa hi mahAbala
7093004a tasya tad vacanaM zrutvA saumitris tvarayAnvitaH
7093004c nyavedayata rAmAya tApasasya vivakSitam
7093005a jayasva rAjan dharmeNa ubhau lokau mahAdyute
7093005c dUtas tvAM draSTum AyAtas tapasvI bhAskaraprabhaH
7093006a tad vAkyaM lakSmaNenoktaM zrutvA rAma uvAca ha
7093006c pravezyatAM munis tAta mahaujAs tasya vAkyadhRk
7093007a saumitris tu tathety uktvA prAvezayata taM munim
7093007c jvalantam iva tejobhiH pradahantam ivAMzubhiH
7093008a so 'bhigamya raghuzreSThaM dIpyamAnaM svatejasA
7093008c RSir madhurayA vAcA vardhasvety Aha rAghavam
7093009a tasmai rAmo mahAtejAH pUjAm arghyapurogamAm
7093009c dadau kuzalam avyagraM praSTuM caivopacakrame
7093010a pRSTaz ca kuzalaM tena rAmeNa vadatAM varaH
7093010c Asane kAJcane divye niSasAda mahAyazAH
7093011a tam uvAca tato rAmaH svAgataM te mahAmune
7093011c prApayasva ca vAkyAni yato dUtas tvam AgataH
7093012a codito rAjasiMhena munir vAkyam udIrayat
7093012c dvandvam etat pravaktavyaM na ca cakSur hataM vacaH
7093013a yaH zRNoti nirIkSed vA sa vadhyas tava rAghava
7093013c bhaved vai munimukhyasya vacanaM yady avekSase
7093014a tatheti ca pratijJAya rAmo lakSmaNam abravIt
7093014c dvAri tiSTha mahAbAho pratihAraM visarjaya
7093015a sa me vadhyaH khalu bhavet kathAM dvandvasamIritAm
7093015c RSer mama ca saumitre pazyed vA zRNuyAc ca yaH
7093016a tato nikSipya kAkutstho lakSmaNaM dvArasaMgrahe
7093016c tam uvAca muniM vAkyaM kathayasveti rAghavaH
7093017a yat te manISitaM vAkyaM yena vAsi samAhitaH
7093017c kathayasva vizaGkas tvaM mamApi hRdi vartate
7094001a zRNu rAma mahAbAho yadartham aham AhataH
7094001c pitAmahena devena preSito 'smi mahAbala
7094002a tavAhaM pUrvake bhAve putraH parapuraMjaya
7094002c mAyAsaMbhAvito vIra kAlaH sarvasamAharaH
7094003a pitAmahaz ca bhagavAn Aha lokapatiH prabhuH
7094003c samayas te mahAbAho svarlokAn parirakSitum
7094004a saMkSipya ca purA lokAn mAyayA svayam eva hi
7094004c mahArNave zayAno 'psu mAM tvaM pUrvam ajIjanaH
7094005a bhogavantaM tato nAgam anantam udake zayam
7094005c mAyayA janayitvA tvaM dvau ca sattvau mahAbalau
7094006a madhuM ca kaiTabhaM caiva yayor asthicayair vRtA
7094006c iyaM parvatasaMbAdhA medinI cAbhavan mahI
7094007a padme divyArkasaMkAze nAbhyAm utpAdya mAm api
7094007c prAjApatyaM tvayA karma sarvaM mayi nivezitam
7094008a so 'haM saMnyastabhAro hi tvAm upAse jagatpatim
7094008c rakSAM vidhatsva bhUteSu mama tejas karo bhavAn
7094009a tatas tvam api durdharSas tasmAd bhAvAt sanAtanAt
7094009c rakSArthaM sarvabhUtAnAM viSNutvam upajagmivAn
7094010a adityAM vIryavAn putro bhrAtqNAM harSavardhanaH
7094010c samutpanneSu kRtyeSu lokasAhyAya kalpase
7094011a sa tvaM vitrAsyamAnAsu prajAsu jagatAM vara
7094011c rAvaNasya vadhAkAGkSI mAnuSeSu mano 'dadhAH
7094012a dazavarSasahasrANi dazavarSazatAni ca
7094012c kRtvA vAsasya niyatiM svayam evAtmanaH purA
7094013a sa tvaM manomayaH putraH pUrNAyur mAnuSeSv iha
7094013c kAlo naravarazreSTha samIpam upavartitum
7094014a yadi bhUyo mahArAja prajA icchasy upAsitum
7094014c vasa vA vIra bhadraM te evam Aha pitAmahaH
7094015a atha vA vijigISA te suralokAya rAghava
7094015c sanAthA viSNunA devA bhavantu vigatajvarAH
7094016a zrutvA pitAmahenoktaM vAkyaM kAlasamIritam
7094016c rAghavaH prahasan vAkyaM sarvasaMhAram abravIt
7094017a zrutaM me devadevasya vAkyaM paramam adbhutam
7094017c prItir hi mahatI jAtA tavAgamanasaMbhavA
7094018a bhadraM te 'stu gamiSyAmi yata evAham AgataH
7094018c hRd gato hy asi saMprApto na me 'sty atra vicAraNA
7094019a mayA hi sarvakRtyeSu devAnAM vazavartinAm
7094019c sthAtavyaM sarvasaMhAre yathA hy Aha pitAmahaH
7095001a tathA tayoH kathayator durvAsA bhagavAn RSiH
7095001c rAmasya darzanAkAGkSI rAjadvAram upAgamat
7095002a so 'bhigamya ca saumitrim uvAca RSisattamaH
7095002c rAmaM darzaya me zIghraM purA me 'rtho 'tivartate
7095003a munes tu bhASitaM zrutvA lakSmaNaH paravIrahA
7095003c abhivAdya mahAtmAnaM vAkyam etad uvAca ha
7095004a kiM kAryaM brUhi bhagavan ko vArthaH kiM karomy aham
7095004c vyagro hi rAghavo brahman muhUrtaM vA pratIkSatAm
7095005a tac chrutvA RSizArdUlaH krodhena kaluSIkRtaH
7095005c uvAca lakSmaNaM vAkyaM nirdahann iva cakSuSA
7095006a asmin kSaNe mAM saumitre rAmAya prativedaya
7095006c viSayaM tvAM puraM caiva zapiSye rAghavaM tathA
7095007a bharataM caiva saumitre yuSmAkaM yA ca saMtatiH
7095007c na hi zakSyAmy ahaM bhUyo manyuM dhArayituM hRdi
7095008a tac chrutvA ghorasaMkAzaM vAkyaM tasya mahAtmanaH
7095008c cintayAm Asa manasA tasya vAkyasya nizcayam
7095009a ekasya maraNaM me 'stu mA bhUt sarvavinAzanam
7095009c iti buddhyA vinizcitya rAghavAya nyavedayat
7095010a lakSmaNasya vacaH zrutvA rAmaH kAlaM visRjya ca
7095010c niSpatya tvaritaM rAjA atreH putraM dadarza ha
7095011a so 'bhivAdya mahAtmAnaM jvalantam iva tejasA
7095011c kiM kAryam iti kAkutsthaH kRtAJjalir abhASata
7095012a tad vAkyaM rAghaveNoktaM zrutvA munivaraH prabhuH
7095012c pratyAha rAmaM durvAsAH zrUyatAM dharmavatsala
7095013a adya varSasahasrasya samAptir mama rAghava
7095013c so 'haM bhojanam icchAmi yathAsiddhaM tavAnagha
7095014a tac chrutvA vacanaM rAmo harSeNa mahatAnvitaH
7095014c bhojanaM munimukhyAya yathAsiddham upAharat
7095015a sa tu bhuktvA munizreSThas tad annam amRtopamam
7095015c sAdhu rAmeti saMbhASya svam Azramam upAgamat
7095016a tasmin gate mahAtejA rAghavaH prItamAnasaH
7095016c saMsmRtya kAlavAkyAni tato duHkham upeyivAn
7095017a duHkhena ca susaMtaptaH smRtvA tad ghoradarzanam
7095017c avAnmukho dInamanA vyAhartuM na zazAka ha
7095018a tato buddhyA vinizcitya kAlavAkyAni rAghavaH
7095018c naitad astIti coktvA sa tUSNIm AsIn mahAyazAH
7096001a avAGmukham atho dInaM dRSTvA somam ivAplutam
7096001c rAghavaM lakSmaNo vAkyaM hRSTo madhuram abravIt
7096002a na saMtApaM mahAbAho madarthaM kartum arhasi
7096002c pUrvanirmANabaddhA hi kAlasya gatir IdRzI
7096003a jahi mAM saumya visrabdhaH pratijJAM paripAlaya
7096003c hInapratijJAH kAkutstha prayAnti narakaM narAH
7096004a yadi prItir mahArAja yady anugrAhyatA mayi
7096004c jahi mAM nirvizaGkas tvaM dharmaM vardhaya rAghava
7096005a lakSmaNena tathoktas tu rAmaH pracalitendriyaH
7096005c mantriNaH samupAnIya tathaiva ca purodhasaM
7096006a abravIc ca yathAvRttaM teSAM madhye narAdhipaH
7096006c durvAso'bhigamaM caiva pratijJAM tApasasya ca
7096007a tac chrutvA mantriNaH sarve sopAdhyAyAH samAsata
7096007c vasiSThas tu mahAtejA vAkyam etad uvAca ha
7096008a dRSTam etan mahAbAho kSayaM te lomaharSaNam
7096008c lakSmaNena viyogaz ca tava rAma mahAyazaH
7096009a tyajainaM balavAn kAlo mA pratijJAM vRthA kRthAH
7096009c vinaSTAyAM pratijJAyAM dharmo hi vilayaM vrajet
7096010a tato dharme vinaSTe tu trailokye sacarAcaram
7096010c sadevarSigaNaM sarvaM vinazyeta na saMzayaH
7096011a sa tvaM puruSazArdUla trailokyasyAbhipAlanam
7096011c lakSmaNasya vadhenAdya jagat svasthaM kuruSva ha
7096012a teSAM tat samavetAnAM vAkyaM dharmArthasaMhitam
7096012c zrutvA pariSado madhye rAmo lakSmaNam abravIt
7096013a visarjaye tvAM saumitre mA bhUd dharmaviparyayaH
7096013c tyAgo vadho vA vihitaH sAdhUnAm ubhayaM samam
7096014a rAmeNa bhASite vAkye bASpavyAkulitekSaNaH
7096014c lakSmaNas tvaritaH prAyAt svagRhaM na viveza ha
7096015a sa gatvA sarayUtIram upaspRzya kRtAJjaliH
7096015c nigRhya sarvasrotAMsi niHzvAsaM na mumoca ha
7096016a anucchvasantaM yuktaM taM sazakrAH sApsarogaNAH
7096016c devAH sarSigaNAH sarve puSpair avakiraMs tadA
7096017a adRzyaM sarvam anujaiH sazarIraM mahAbalam
7096017c pragRhya lakSmaNaM zakro divaM saMpraviveza ha
7096018a tato viSNoz caturbhAgam AgataM surasattamAH
7096018c hRSTAH pramuditAH sarve 'pUjayan RSibhiH saha
7097001a visRjya lakSmaNaM rAmo duHkhazokasamanvitaH
7097001c purodhasaM mantriNaz ca naigamAMz cedam abravIt
7097002a adya rAjye 'bhiSekSyAmi bharataM dharmavatsalam
7097002c ayodhyAyAM patiM vIraM tato yAsyAmy ahaM vanam
7097003a pravezayata saMbhArAn mA bhUt kAlAtyayo yathA
7097003c adyaivAhaM gamiSyAmi lakSmaNena gatAM gatim
7097004a tac chrutvA rAghaveNoktaM sarvAH prakRtayo bhRzam
7097004c mUrdhabhiH praNatA bhUmau gatasattvA ivAbhavan
7097005a bharataz ca visaMjJo 'bhUc chrutvA rAmasya bhASitam
7097005c rAjyaM vigarhayAm Asa rAghavaM cedam abravIt
7097006a satyena hi zape rAjan svargaloke na caiva hi
7097006c na kAmaye yathA rAjyaM tvAM vinA raghunandana
7097007a imau kuzIlavau rAjann abhiSiJca narAdhipa
7097007c kosaleSu kuzaM vIram uttareSu tathA lavam
7097008a zatrughnasya tu gacchantu dUtAs tvaritavikramAH
7097008c idaM gamanam asmAkaM svargAyAkhyAntu mAciram
7097009a tac chrutvA bharatenoktaM dRSTvA cApi hy adhomukhAn
7097009c paurAn duHkhena saMtaptAn vasiSTho vAkyam abravIt
7097010a vatsa rAma imAH pazya dharaNIM prakRtIr gatAH
7097010c jJAtvaiSAm IpsitaM kAryaM mA caiSAM vipriyaM kRthAH
7097011a vasiSThasya tu vAkyena utthApya prakRtIjanam
7097011c kiM karomIti kAkutsthaH sarvAn vacanam abravIt
7097012a tataH sarvAH prakRtayo rAmaM vacanam abruvan
7097012c gacchantam anugacchAmo yato rAma gamiSyasi
7097013a eSA naH paramA prItir eSa dharmaH paro mataH
7097013c hRdgatA naH sadA tuSTis tavAnugamane dRDhA
7097014a paureSu yadi te prItir yadi sneho hy anuttamaH
7097014c saputradArAH kAkutstha samaM gacchAma satpatham
7097015a tapovanaM vA durgaM vA nadIm ambhonidhiM tathA
7097015c vayaM te yadi na tyAjyAH sarvAn no naya Izvara
7097016a sa teSAM nizcayaM jJAtvA kRtAntaM ca nirIkSya ca
7097016c paurANAM dRDhabhaktiM ca bADham ity eva so 'bravIt
7097017a evaM vinizcayaM kRtvA tasminn ahani rAghavaH
7097017c kosaleSu kuzaM vIram uttareSu tathA lavam
7097018a abhiSiJcan mahAtmAnAv ubhAv eva kuzIlavau
7097018c rathAnAM tu sahasrANi trINi nAgAyutAni ca
7097019a daza cAzvasahasrANi ekaikasya dhanaM dadau
7097019c bahuratnau bahudhanau hRSTapuSTajanAvRtau
7097020a abhiSicya tu tau vIrau prasthApya svapure tathA
7097020c dUtAn saMpreSayAm Asa zatrughnAya mahAtmane
7098001a te dUtA rAmavAkyena coditA laghuvikramAH
7098001c prajagmur madhurAM zIghraM cakrur vAsaM na cAdhvani
7098002a tatas tribhir ahorAtraiH saMprApya madhurAm atha
7098002c zatrughnAya yathAvRttam AcakhyuH sarvam eva tat
7098003a lakSmaNasya parityAgaM pratijJAM rAghavasya ca
7098003c putrayor abhiSekaM ca paurAnugamanaM tathA
7098004a kuzasya nagarI ramyA vindhyaparvatarodhasi
7098004c kuzAvatIti nAmnA sA kRtA rAmeNa dhImatA
7098005a zrAvitA ca purI ramyA zrAvatIti lavasya ca
7098005c ayodhyAM vijanAM caiva bharataM rAghavAnugam
7098006a evaM sarvaM nivedyAzu zatrughnAya mahAtmane
7098006c viremus te tato dUtAs tvara rAjann iti bruvan
7098007a zrutvA taM ghorasaMkAzaM kulakSayam upasthitam
7098007c prakRtIs tu samAnIya kAJcanaM ca purohitam
7098008a teSAM sarvaM yathAvRttam AkhyAya raghunandanaH
7098008c Atmanaz ca viparyAsaM bhaviSyaM bhrAtRbhiH saha
7098009a tataH putradvayaM vIraH so 'bhyaSiJcan narAdhipaH
7098009c subAhur madhurAM lebhe zatrughAtI ca vaidizam
7098010a dvidhAkRtvA tu tAM senAM mAdhurIM putrayor dvayoH
7098010c dhanadhAnyasamAyuktau sthApayAm Asa pArthivau
7098011a tato visRjya rAjAnaM vaidize zatrughAtinam
7098011c jagAma tvarito 'yodhyAM rathenaikena rAghavaH
7098012a sa dadarza mahAtmAnaM jvalantam iva pAvakam
7098012c kSaumasUkSmAmbaradharaM munibhiH sArdham akSayaiH
7098013a so 'bhivAdya tato rAmaM prAJjaliH prayatendriyaH
7098013c uvAca vAkyaM dharmajJo dharmam evAnucintayan
7098014a kRtvAbhiSekaM sutayor yuktaM rAghavayor dhanaiH
7098014c tavAnugamane rAjan viddhi mAM kRtanizcayam
7098015a na cAnyad atra vaktavyaM dustaraM tava zAsanam
7098015c tyaktuM nArhasi mAM vIra bhaktimantaM vizeSataH
7098016a tasya tAM buddhim aklIbAM vijJAya raghunandanaH
7098016c bADham ity eva zatrughnaM rAmo vacanam abravIt
7098017a tasya vAkyasya vAkyAnte vAnarAH kAmarUpiNaH
7098017c RkSarAkSasasaMghAz ca samApetur anekazaH
7098018a devaputrA RSisutA gandharvANAM sutAs tathA
7098018c rAmakSayaM viditvA te sarva eva samAgatAH
7098019a te rAmam abhivAdyAhuH sarva eva samAgatAH
7098019c tavAnugamane rAjan saMprAptAH sma mahAyazaH
7098020a yadi rAma vinAsmAbhir gacches tvaM puruSarSabha
7098020c yamadaNDam ivodyamya tvayA sma vinipAtitAH
7098021a evaM teSAM vacaH zrutvA RkSavAnararakSasAm
7098021c vibhISaNam athovAca madhuraM zlakSNayA girA
7098022a yAvat prajA dhariSyanti tAvat tvaM vai vibhISaNa
7098022c rAkSasendra mahAvIrya laGkAsthaH svaM dhariSyasi
7098023a prajAH saMrakSa dharmeNa nottaraM vaktum arhasi
7098024a tam evam uktvA kAkutstho hanUmantam athAbravIt
7098024c jIvite kRtabuddhis tvaM mA pratijJAM vilopaya
7098025a matkathAH pracariSyanti yAval loke harIzvara
7098025c tAvat tvaM dhArayan prANAn pratijJAm anupAlaya
7098026a tathaivam uktvA kAkutsthaH sarvAMs tAn RkSavAnarAn
7098026c mayA sArdhaM prayAteti tadA tAn rAghavo 'bravIt
7099001a prabhAtAyAM tu zarvaryAM pRthuvakSA mahAyazAH
7099001c rAmaH kamalapatrAkSaH purodhasam athAbravIt
7099002a agnihotraM vrajatv agre sarpir jvalitapAvakam
7099002c vAjapeyAtapatraM ca zobhayAnaM mahApatham
7099003a tato vasiSThas tejasvI sarvaM niravazeSataH
7099003c cakAra vidhivad dharmyaM mahAprAsthAnikaM vidhim
7099004a tataH kSaumAmbaradharo brahma cAvartayan param
7099004c kuzAn gRhItvA pANibhyAM prasajya prayayAv atha
7099005a avyAharan kva cit kiM cin nizceSTo niHsukhaH pathi
7099005c nirjagAma gRhAt tasmAd dIpyamAno yathAMzumAn
7099006a rAmasya pArzve savye tu padmA zrIH susamAhitA
7099006c dakSiNe hrIr vizAlAkSI vyavasAyas tathAgrataH
7099007a zarA nAnAvidhAz cApi dhanur Ayatavigraham
7099007c anuvrajanti kAkutsthaM sarve puruSavigrahAH
7099008a vedA brAhmaNarUpeNa sAvitrI sarvarakSiNI
7099008c oMkAro 'tha vaSaTkAraH sarve rAmam anuvratAH
7099009a RSayaz ca mahAtmAnaH sarva eva mahIsurAH
7099009c anvagacchanta kAkutsthaM svargadvAram upAgatam
7099010a taM yAntam anuyAnti sma antaHpuracarAH striyaH
7099010c savRddhabAladAsIkAH savarSavarakiMkarAH
7099011a sAntaHpuraz ca bharataH zatrughnasahito yayau
7099012a rAmavratam upAgamya rAghavaM samanuvratAH
7099012c tato viprA mahAtmAnaH sAgnihotrAH samAhitAH
7099012e saputradArAH kAkutstham anvagacchan mahAmatim
7099013a mantriNo bhRtyavargAz ca saputrAH sahabAndhavAH
7099013c sAnugA rAghavaM sarve anvagacchan prahRSTavat
7099014a tataH sarvAH prakRtayo hRSTapuSTajanAvRtAH
7099014c anujagmuH pragacchantaM rAghavaM guNaraJjitAH
7099015a snAtaM pramuditaM sarvaM hRSTapuSTam anuttamam
7099015c dRptaM kilikilAzabdaiH sarvaM rAmam anuvratam
7099016a na tatra kaz cid dIno 'bhUd vrIDito vApi duHkhitaH
7099016c hRSTaM pramuditaM sarvaM babhUva paramAdbhutam
7099017a draSTukAmo 'tha niryANaM rAjJo jAnapado janaH
7099017c saMprAptaH so 'pi dRSTvaiva saha sarvair anuvrataH
7099018a RkSavAnararakSAMsi janAz ca puravAsinaH
7099018c agachan parayA bhaktyA pRSThataH susamAhitAH
7100001a adhyardhayojanaM gatvA nadIM pazcAn mukhAzritAm
7100001c sarayUM puNyasalilAM dadarza raghunandanaH
7100002a atha tasmin muhUrte tu brahmA lokapitAmahaH
7100002c sarvaiH parivRto devair RSibhiz ca mahAtmabhiH
7100003a Ayayau yatra kAkutsthaH svargAya samupasthitaH
7100003c vimAnazatakoTIbhir divyAbhir abhisaMvRtaH
7100004a papAta puSpavRSTiz ca vAyumuktA mahaughavat
7100005a tasmiMs tUryazatAkIrNe gandharvApsarasaMkule
7100005c sarayUsalilaM rAmaH padbhyAM samupacakrame
7100006a tataH pitAmaho vANIm antarikSAd abhASata
7100006c Agaccha viSNo bhadraM te diSTyA prApto 'si rAghava
7100007a bhrAtRbhiH saha devAbhaiH pravizasva svakAM tanum
7100007c vaiSNavIM tAM mahAtejas tad AkAzaM sanAtanam
7100008a tvaM hi lokagatir deva na tvAM ke cit prajAnate
7100008c Rte mAyAM vizAlAkSa tava pUrvaparigrahAm
7100009a tvam acintyaM mahad bhUtam akSayaM sarvasaMgraham
7100009c yAm icchasi mahAtejas tAM tanuM praviza svayam
7100010a pitAmahavacaH zrutvA vinizcitya mahAmatiH
7100010c viveza vaiSNavaM tejaH sazarIraH sahAnujaH
7100011a tato viSNugataM devaM pUjayanti sma devatAH
7100011c sAdhyA marudgaNAz caiva sendrAH sAgnipurogamAH
7100012a ye ca divyA RSigaNA gandharvApsarasaz ca yAH
7100012c suparNanAgayakSAz ca daityadAnavarAkSasAH
7100013a sarvaM hRSTaM pramuditaM sarvaM pUrNamanoratham
7100013c sAdhu sAdhv iti tat sarvaM tridivaM gatakalmaSam
7100014a atha viSNur mahAtejAH pitAmaham uvAca ha
7100014c eSAM lokAJ janaughAnAM dAtum arhasi suvrata
7100015a ime hi sarve snehAn mAm anuyAtA manasvinaH
7100015c bhaktA bhAjayitavyAz ca tyaktAtmAnaz ca matkRte
7100016a tac chrutvA viSNuvacanaM brahmA lokaguruH prabhuH
7100016c lokAn sAntAnikAn nAma yAsyantIme samAgatAH
7100017a yac ca tiryaggataM kiM cid rAmam evAnucintayat
7100017c prANAMs tyakSyati bhaktyA vai saMtAne tu nivatsyati
7100017e sarvair eva guNair yukte brahmalokAd anantare
7100018a vAnarAz ca svakAM yonim RkSAz caiva tathA yayuH
7100019a yebhyo viniHsRtA ye ye surAdibhyaH susaMbhavAH
7100019c RSibhyo nAgayakSebhyas tAMs tAn eva prapedire
7100020a tathoktavati deveze gopratAram upAgatAH
7100020c bhejire sarayUM sarve harSapUrNAzruviklavAH
7100021a avagAhya jalaM yo yaH prANI hy AsIt prahRSTavat
7100021c mAnuSaM deham utsRjya vimAnaM so 'dhyarohata
7100022a tiryagyonigatAz cApi saMprAptAH sarayUjalam
7100022c divyA divyena vapuSA devA dIptA ivAbhavan
7100023a gatvA tu sarayUtoyaM sthAvarANi carANi ca
7100023c prApya tat toyavikledaM devalokam upAgaman
7100024a devAnAM yasya yA yonir vAnarA RSkarAkSasAH
7100024c tAm eva vivizuH sarve dehAn nikSipya cAmbhasi
7100025a tathA svargagataM sarvaM kRtvA lokagurur divam
7100025c jagAma tridazaiH sArdhaM hRSTair hRSTo mahAmatiH
7100026a etAvad eva AkhyAnaM sottaraM brahmapUjitam
7100026c rAmAyaNam iti khyAtaM mukhyaM vAlmIkinA kRtam