% Ramayana: Kiskindhakanda
% Last updated: Sat Sep 25 2021
% Encoding: ASCII
%
4001001a sa tAM puSkariNIM gatvA padmotpalajhaSAkulAm
4001001c rAmaH saumitrisahito vilalApAkulendriyaH
4001002a tasya dRSTvaiva tAM harSAd indriyANi cakampire
4001002c sa kAmavazam ApannaH saumitrim idam abravIt
4001003a saumitre pazya pampAyAH kAnanaM zubhadarzanam
4001003c yatra rAjanti zailAbhA drumAH sazikharA iva
4001004a mAM tu zokAbhisaMtaptam AdhayaH pIDayanti vai
4001004c bharatasya ca duHkhena vaidehyA haraNena ca
4001005a adhikaM pravibhAty etan nIlapItaM tu zAdvalam
4001005c drumANAM vividhaiH puSpaiH paristomair ivArpitam
4001006a sukhAnilo 'yaM saumitre kAlaH pracuramanmathaH
4001006c gandhavAn surabhir mAso jAtapuSpaphaladrumaH
4001007a pazya rUpANi saumitre vanAnAM puSpazAlinAm
4001007c sRjatAM puSpavarSANi varSaM toyamucAm iva
4001008a prastareSu ca ramyeSu vividhAH kAnanadrumAH
4001008c vAyuvegapracalitAH puSpair avakiranti gAm
4001009a mArutaH sukhaM saMsparze vAti candanazItalaH
4001009c SaTpadair anukUjadbhir vaneSu madhugandhiSu
4001010a giriprastheSu ramyeSu puSpavadbhir manoramaiH
4001010c saMsaktazikharA zailA virAjanti mahAdrumaiH
4001011a puSpitAgrAMz ca pazyemAn karNikArAn samantataH
4001011c hATakapratisaMchannAn narAn pItAmbarAn iva
4001012a ayaM vasantaH saumitre nAnAvihaganAditaH
4001012c sItayA viprahINasya zokasaMdIpano mama
4001013a mAM hi zokasamAkrAntaM saMtApayati manmathaH
4001013c hRSTaH pravadamAnaz ca samAhvayati kokilaH
4001014a eSa dAtyUhako hRSTo ramye mAM vananirjhare
4001014c praNadan manmathAviSTaM zocayiSyati lakSmaNa
4001015a vimizrA vihagAH pumbhir AtmavyUhAbhinanditAH
4001015c bhRGgarAjapramuditAH saumitre madhurasvarAH
4001016a mAM hi sA mRgazAvAkSI cintAzokabalAtkRtam
4001016c saMtApayati saumitre krUraz caitravanAnilaH
4001017a zikhinIbhiH parivRtA mayUrA girisAnuSu
4001017c manmathAbhiparItasya mama manmathavardhanAH
4001018a pazya lakSNama nRtyantaM mayUram upanRtyati
4001018c zikhinI manmathArtaiSA bhartAraM girisAnuSu
4001019a mayUrasya vane nUnaM rakSasA na hRtA priyA
4001019c mama tv ayaM vinA vAsaH puSpamAse suduHsahaH
4001020a pazya lakSmaNa puSpANi niSphalAni bhavanti me
4001020c puSpabhArasamRddhAnAM vanAnAM zizirAtyaye
4001021a vadanti rAvaM muditAH zakunAH saMghazaH kalam
4001021c Ahvayanta ivAnyonyaM kAmonmAdakarA mama
4001022a nUnaM paravazA sItA sApi zocaty ahaM yathA
4001022c zyAmA padmapalAzAkSI mRdubhASA ca me priyA
4001023a eSa puSpavaho vAyuH sukhasparzo himAvahaH
4001023c tAM vicintayataH kAntAM pAvakapratimo mama
4001024a tAM vinAtha vihaMgo 'sau pakSI praNaditas tadA
4001024c vAyasaH pAdapagataH prahRSTam abhinardati
4001025a eSa vai tatra vaidehyA vihagaH pratihArakaH
4001025c pakSI mAM tu vizAlAkSyAH samIpam upaneSyati
4001026a pazya lakSmaNa saMnAdaM vane madavivardhanam
4001026c puSpitAgreSu vRkSeSu dvijAnAm upakUjatAm
4001027a saumitre pazya pampAyAz citrAsu vanarAjiSu
4001027c nalinAni prakAzante jale taruNasUryavat
4001028a eSA prasannasalilA padmanIlotpalAyatA
4001028c haMsakAraNDavAkIrNA pampA saugandhikAyutA
4001029a cakravAkayutA nityaM citraprasthavanAntarA
4001029c mAtaGgamRgayUthaiz ca zobhate salilArthibhiH
4001030a padmakozapalAzAni draSTuM dRSTir hi manyate
4001030c sItAyA netrakozAbhyAM sadRzAnIti lakSmaNa
4001031a padmakesarasaMsRSTo vRkSAntaraviniHsRtaH
4001031c niHzvAsa iva sItAyA vAti vAyur manoharaH
4001032a saumitre pazya pampAyA dakSiNe girisAnuni
4001032c puSpitAM karNikArasya yaSTiM paramazobhanAm
4001033a adhikaM zailarAjo 'yaM dhAtubhis tu vibhUSitaH
4001033c vicitraM sRjate reNuM vAyuvegavighaTTitam
4001034a giriprasthAs tu saumitre sarvataH saMprapuSpitaiH
4001034c niSpatraiH sarvato ramyaiH pradIpA iva kuMzukaiH
4001035a pampAtIraruhAz ceme saMsaktA madhugandhinaH
4001035c mAlatImallikASaNDAH karavIrAz ca puSpitAH
4001036a ketakyaH sinduvArAz ca vAsantyaz ca supuSpitAH
4001036c mAdhavyo gandhapUrNAz ca kundagulmAz ca sarvazaH
4001037a ciribilvA madhUkAz ca vaJjulA bakulAs tathA
4001037c campakAs tilakAz caiva nAgavRkSAz ca puSpitAH
4001038a nIpAz ca varaNAz caiva kharjUrAz ca supuSpitAH
4001038c aGkolAz ca kuraNTAz ca cUrNakAH pAribhadrakAH
4001039a cUtAH pATalayaz caiva kovidArAz ca puSpitAH
4001039c mucukundArjunAz caiva dRzyante girisAnuSu
4001040a ketakoddAlakAz caiva zirISAH ziMzapA dhavAH
4001040c zAlmalyaH kiMzukAz caiva raktAH kurabakAs tathA
4001040e tinizA nakta mAlAz ca candanAH syandanAs tathA
4001041a vividhA vividhaiH puSpais tair eva nagasAnuSu
4001041c vikIrNaiH pItaraktAbhAH saumitre prastarAH kRtAH
4001042a himAnte pazya saumitre vRkSANAM puSpasaMbhavam
4001042c puSpamAse hi taravaH saMgharSAd iva puSpitAH
4001043a pazya zItajalAM cemAM saumitre puSkarAyutAm
4001043c cakravAkAnucaritAM kAraNDavaniSevitAm
4001043e plavaiH krauJcaiz ca saMpUrNAM varAhamRgasevitAm
4001044a adhikaM zobhate pampAvikUjadbhir vihaMgamaiH
4001045a dIpayantIva me kAmaM vividhA muditA dvijAH
4001045c zyAmAM candramukhIM smRtvA priyAM padmanibhekSaNAm
4001046a paya sAnuSu citreSu mRgIbhiH sahitAn mRgAn
4001046c mAM punar mRgazAvAkSyA vaidehyA virahIkRtam
4001047a evaM sa vilapaMs tatra zokopahatacetanaH
4001047c avekSata zivAM pampAM ramyavArivahAM zubhAm
4001048a nirIkSamANaH sahasA mahAtmA; sarvaM vanaM nirjharakandaraM ca
4001048c udvignacetAH saha lakSmaNena; vicArya duHkhopahataH pratasthe
4001049a tAv RSyamUkaM sahitau prayAtau; sugrIvazAkhAmRgasevitaM tam
4001049c trastAs tu dRSTvA harayo babhUvur; mahaujasau rAghavalakSmaNau tau
4002001a tau tu dRSTvA mahAtmAnau bhrAtarau rAmalakSmaNau
4002001c varAyudhadharau vIrau sugrIvaH zaGkito 'bhavat
4002002a udvignahRdayaH sarvA dizaH samavalokayan
4002002c na vyatiSThata kasmiMz cid deze vAnarapuMgavaH
4002003a naiva cakre manaH sthAne vIkSamANo mahAbalau
4002003c kapeH paramabhItasya cittaM vyavasasAda ha
4002004a cintayitvA sa dharmAtmA vimRzya gurulAghavam
4002004c sugrIvaH paramodvignaH sarvair anucaraiH saha
4002005a tataH sa sacivebhyas tu sugrIvaH plavagAdhipaH
4002005c zazaMsa paramodvignaH pazyaMs tau rAmalakSmaNau
4002006a etau vanam idaM durgaM vAlipraNihitau dhruvam
4002006c chadmanA cIravasanau pracarantAv ihAgatau
4002007a tataH sugrIvasacivA dRSTvA paramadhanvinau
4002007c jagmur giritaTAt tasmAd anyac chikharam uttamam
4002008a te kSipram abhigamyAtha yUthapA yUthaparSabham
4002008c harayo vAnarazreSThaM parivAryopatasthire
4002009a ekam ekAyanagatAH plavamAnA girer girim
4002009c prakampayanto vegena girINAM zikharANi ca
4002010a tataH zAkhAmRgAH sarve plavamAnA mahAbalAH
4002010c babhaJjuz ca nagAMs tatra puSpitAn durgasaMzritAn
4002011a Aplavanto harivarAH sarvatas taM mahAgirim
4002011c mRgamArjArazArdUlAMs trAsayanto yayus tadA
4002012a tataH sugrIvasacivAH parvatendraM samAzritAH
4002012c saMgamya kapimukhyena sarve prAJjalayaH sthitAH
4002013a tatas taM bhayasaMtrastaM vAlikilbiSazaGkitam
4002013c uvAca hanumAn vAkyaM sugrIvaM vAkyakovidaH
4002014a yasmAd udvignacetAs tvaM pradruto haripuMgava
4002014c taM krUradarzanaM krUraM neha pazyAmi vAlinam
4002015a yasmAt tava bhayaM saumya pUrvajAt pApakarmaNaH
4002015c sa neha vAlI duSTAtmA na te pazyAmy ahaM bhayam
4002016a aho zAkhAmRgatvaM te vyaktam eva plavaMgama
4002016c laghucittatayAtmAnaM na sthApayasi yo matau
4002017a buddhivijJAnasaMpanna iGgitaiH sarvam Acara
4002017c na hy abuddhiM gato rAjA sarvabhUtAni zAsti hi
4002018a sugrIvas tu zubhaM vAkyaM zrutvA sarvaM hanUmataH
4002018c tataH zubhataraM vAkyaM hanUmantam uvAca ha
4002019a dIrghabAhU vizAlAkSau zaracApAsidhAriNau
4002019c kasya na syAd bhayaM dRSTvA etau surasutopamau
4002020a vAlipraNihitAv etau zaGke 'haM puruSottamau
4002020c rAjAno bahumitrAz ca vizvAso nAtra hi kSamaH
4002021a arayaz ca manuSyeNa vijJeyAz channacAriNaH
4002021c vizvastAnAm avizvastAz chidreSu praharanti hi
4002022a kRtyeSu vAlI medhAvI rAjAno bahudarzanAH
4002022c bhavanti parahantAras te jJeyAH prAkRtair naraiH
4002023a tau tvayA prAkRtenaiva gatvA jJeyau plavaMgama
4002023c zaGkitAnAM prakAraiz ca rUpavyAbhASaNena ca
4002024a lakSayasva tayor bhAvaM prahRSTamanasau yadi
4002024c vizvAsayan prazaMsAbhir iGgitaiz ca punaH punaH
4002025a mamaivAbhimukhaM sthitvA pRccha tvaM haripuMgava
4002025c prayojanaM pravezasya vanasyAsya dhanurdharau
4002026a zuddhAtmAnau yadi tv etau jAnIhi tvaM plavaMgama
4002026c vyAbhASitair vA rUpair vA vijJeyA duSTatAnayoH
4002027a ity evaM kapirAjena saMdiSTo mArutAtmajaH
4002027c cakAra gamane buddhiM yatra tau rAmalakSmaNau
4002028a tatheti saMpUjya vacas tu tasya; kapeH subhItasya durAsadasya
4002028c mahAnubhAvo hanumAn yayau tadA; sa yatra rAmo 'tibalaz ca lakSmaNaH
4003001a vaco vijJAya hanumAn sugrIvasya mahAtmanaH
4003001c parvatAd RzyamUkAt tu pupluve yatra rAghavau
4003002a sa tatra gatvA hanumAn balavAn vAnarottamaH
4003002c upacakrAma tau vAgbhir mRdvIbhiH satyavikramaH
4003003a svakaM rUpaM parityajya bhikSurUpeNa vAnaraH
4003003c AbabhASe ca tau vIrau yathAvat prazazaMsa ca
4003004a rAjarSidevapratimau tApasau saMzitavratau
4003004c dezaM katham imaM prAptau bhavantau varavarNinau
4003005a trAsayantau mRgagaNAn anyAMz ca vanacAriNaH
4003005c pampAtIraruhAn vRkSAn vIkSamANau samantataH
4003006a imAM nadIM zubhajalAM zobhayantau tarasvinau
4003006c dhairyavantau suvarNAbhau kau yuvAM cIravAsasau
4003007a siMhaviprekSitau vIrau siMhAtibalavikramau
4003007c zakracApanibhe cApe pragRhya vipulair bhujaiH
4003008a zrImantau rUpasaMpannau vRSabhazreSThavikramau
4003008c hastihastopamabhujau dyutimantau nararSabhau
4003009a prabhayA parvatendro 'yaM yuvayor avabhAsitaH
4003009c rAjyArhAv amaraprakhyau kathaM dezam ihAgatau
4003010a padmapatrekSaNau vIrau jaTAmaNDaladhAriNau
4003010c anyonyasadRzau vIrau devalokAd ivAgatau
4003011a yadRcchayeva saMprAptau candrasUryau vasuMdharAm
4003011c vizAlavakSasau vIrau mAnuSau devarUpiNau
4003012a siMhaskandhau mahAsattvau samadAv iva govRSau
4003012c AyatAz ca suvRttAz ca bAhavaH parighottamAH
4003012e sarvabhUSaNabhUSArhAH kim arthaM na vibhUSitaH
4003013a ubhau yogyAv ahaM manye rakSituM pRthivIm imAm
4003013c sasAgaravanAM kRtsnAM vindhyameruvibhUSitAm
4003014a ime ca dhanuSI citre zlakSNe citrAnulepane
4003014c prakAzete yathendrasya vajre hemavibhUSite
4003015a saMpUrNA nizitair bANair tUNAz ca zubhadarzanAH
4003015c jIvitAntakarair ghorair jvaladbhir iva pannagaiH
4003016a mahApramANau vipulau taptahATakabhUSitau
4003016c khaDgAv etau virAjete nirmuktabhujagAv iva
4003017a evaM mAM paribhASantaM kasmAd vai nAbhibhASathaH
4003018a sugrIvo nAma dharmAtmA kaz cid vAnarayUthapaH
4003018c vIro vinikRto bhrAtrA jagad bhramati duHkhitaH
4003019a prApto 'haM preSitas tena sugrIveNa mahAtmanA
4003019c rAjJA vAnaramukhyAnAM hanumAn nAma vAnaraH
4003020a yuvAbhyAM saha dharmAtmA sugrIvaH sakhyam icchati
4003020c tasya mAM sacivaM vittaM vAnaraM pavanAtmajam
4003021a bhikSurUpapraticchannaM sugrIvapriyakAmyayA
4003021c RzyamUkAd iha prAptaM kAmagaM kAmarUpiNam
4003022a evam uktvA tu hanumAMs tau vIrau rAmalakSmaNau
4003022c vAkyajJau vAkyakuzalaH punar novAca kiM cana
4003023a etac chrutvA vacas tasya rAmo lakSmaNam abravIt
4003023c prahRSTavadanaH zrImAn bhrAtaraM pArzvataH sthitam
4003024a sacivo 'yaM kapIndrasya sugrIvasya mahAtmanaH
4003024c tam eva kAGkSamANasya mamAntikam upAgataH
4003025a tam abhyabhASa saumitre sugrIvasacivaM kapim
4003025c vAkyajJaM madhurair vAkyaiH snehayuktam ariMdamam
4004001a tataH prahRSTo hanumAn kRtyavAn iti tad vacaH
4004001c zrutvA madhurasaMbhASaM sugrIvaM manasA gataH
4004002a bhavyo rAjyAgamas tasya sugrIvasya mahAtmanaH
4004002c yad ayaM kRtyavAn prAptaH kRtyaM caitad upAgatam
4004003a tataH paramasaMhRSTo hanUmAn plavagarSabhaH
4004003c pratyuvAca tato vAkyaM rAmaM vAkyavizAradaH
4004004a kimarthaM tvaM vanaM ghoraM pampAkAnanamaNDitam
4004004c AgataH sAnujo durgaM nAnAvyAlamRgAyutam
4004005a tasya tad vacanaM zrutvA lakSmaNo rAmacoditaH
4004005c AcacakSe mahAtmAnaM rAmaM dazarathAtmajam
4004006a rAjA dazaratho nAma dyutimAn dharmavatsalaH
4004006c tasyAyaM pUrvajaH putro rAmo nAma janaiH zrutaH
4004007a zaraNyaH sarvabhUtAnAM pitur nirdezapAragaH
4004007c vIro dazarathasyAyaM putrANAM guNavattaraH
4004008a rAjyAd bhraSTo vane vastuM mayA sArdham ihAgataH
4004008c bhAryayA ca mahAtejAH sItayAnugato vazI
4004008e dinakSaye mahAtejAH prabhayeva divAkaraH
4004009a aham asyAvaro bhrAtA guNair dAsyam upAgataH
4004009c kRtajJasya bahujJasya lakSmaNo nAma nAmataH
4004010a sukhArhasya mahArhasya sarvabhUtahitAtmanaH
4004010c aizvaryeNa vihInasya vanavAsAzritasya ca
4004011a rakSasApahRtA bhAryA rahite kAmarUpiNA
4004011c tac ca na jJAyate rakSaH patnI yenAsya sA hRtA
4004012a danur nAma zriyaH putraH zApAd rAkSasatAM gataH
4004012c AkhyAtas tena sugrIvaH samartho vAnarAdhipaH
4004013a sa jJAsyati mahAvIryas tava bhAryApahAriNam
4004013c evam uktvA danuH svargaM bhrAjamAno gataH sukham
4004014a etat te sarvam AkhyAtaM yAthAtathyena pRcchataH
4004014c ahaM caiva hi rAmaz ca sugrIvaM zaraNaM gatau
4004015a eSa dattvA ca vittAni prApya cAnuttamaM yazaH
4004015c lokanAthaH purA bhUtvA sugrIvaM nAtham icchati
4004016a zokAbhibhUte rAme tu zokArte zaraNaM gate
4004016c kartum arhati sugrIvaH prasAdaM saha yUthapaiH
4004017a evaM bruvANaM saumitriM karuNaM sAzrupAtanam
4004017c hanUmAn pratyuvAcedaM vAkyaM vAkyavizAradaH
4004018a IdRzA buddhisaMpannA jitakrodhA jitendriyAH
4004018c draSTavyA vAnarendreNa diSTyA darzanam AgatAH
4004019a sa hi rAjyAc ca vibhraSTaH kRtavairaz ca vAlinA
4004019c hRtadAro vane trasto bhrAtrA vinikRto bhRzam
4004020a kariSyati sa sAhAyyaM yuvayor bhAskarAtmajaH
4004020c sugrIvaH saha cAsmAbhiH sItAyAH parimArgaNe
4004021a ity evam uktvA hanumAJ zlakSNaM madhurayA girA
4004021c babhASe so 'bhigacchAmaH sugrIvam iti rAghavam
4004022a evaM bruvANaM dharmAtmA hanUmantaM sa lakSmaNaH
4004022c pratipUjya yathAnyAyam idaM provAca rAghavam
4004023a kapiH kathayate hRSTo yathAyaM mArutAtmajaH
4004023c kRtyavAn so 'pi saMprAptaH kRtakRtyo 'si rAghava
4004024a prasannamukhavarNaz ca vyaktaM hRSTaz ca bhASate
4004024c nAnRtaM vakSyate vIro hanUmAn mArutAtmajaH
4004025a tataH sa tu mahAprAjJo hanUmAn mArutAtmajaH
4004025c jagAmAdAya tau vIrau harirAjAya rAghavau
4004026a sa tu vipula yazAH kapipravIraH; pavanasutaH kRtakRtyavat prahRSTaH
4004026c girivaram uruvikramaH prayAtaH; sa zubhamatiH saha rAmalakSmaNAbhyAm
4005001a RzyamUkAt tu hanumAn gatvA taM malayaM giram
4005001c AcacakSe tadA vIrau kapirAjAya rAghavau
4005002a ayaM rAmo mahAprAjJaH saMprApto dRDhavikramaH
4005002c lakSmaNena saha bhrAtrA rAmo 'yaM satyavikramaH
4005003a ikSvAkUNAM kule jAto rAmo dazarathAtmajaH
4005003c dharme nigaditaz caiva pitur nirdezapAlakaH
4005004a tasyAsya vasato 'raNye niyatasya mahAtmanaH
4005004c rakSasApahRtA bhAryA sa tvAM zaraNam AgataH
4005005a rAjasUyAzvamedhaiz ca vahnir yenAbhitarpitaH
4005005c dakSiNAz ca tathotsRSTA gAvaH zatasahasrazaH
4005006a tapasA satyavAkyena vasudhA yena pAlitA
4005006c strIhetos tasya putro 'yaM rAmas tvAM zaraNaM gataH
4005007a bhavatA sakhyakAmau tau bhrAtarau rAmalakSmaNau
4005007c pratigRhyArcayasvemau pUjanIyatamAv ubhau
4005008a zrutvA hanumato vAkyaM sugrIvo hRSTamAnasaH
4005008c bhayaM sa rAghavAd ghoraM prajahau vigatajvaraH
4005009a sa kRtvA mAnuSaM rUpaM sugrIvaH plavagAdhipaH
4005009c darzanIyatamo bhUtvA prItyA provAca rAghavam
4005010a bhavAn dharmavinItaz ca vikrAntaH sarvavatsalaH
4005010c AkhyAtA vAyuputreNa tattvato me bhavadguNAH
4005011a tan mamaivaiSa satkAro lAbhaz caivottamaH prabho
4005011c yat tvam icchasi sauhArdaM vAnareNa mayA saha
4005012a rocate yadi vA sakhyaM bAhur eSa prasAritaH
4005012c gRhyatAM pANinA pANir maryAdA vadhyatAM dhruvA
4005013a etat tu vacanaM zrutvA sugrIvasya subhASitam
4005013c saMprahRSTamanA hastaM pIDayAm Asa pANinA
4005013e hRdyaM sauhRdam Alambya paryaSvajata pIDitam
4005014a tato hanUmAn saMtyajya bhikSurUpam ariMdamaH
4005014c kASThayoH svena rUpeNa janayAm Asa pAvakam
4005015a dIpyamAnaM tato vahniM puSpair abhyarcya satkRtam
4005015c tayor madhye tu suprIto nidadhe susamAhitaH
4005016a tato 'gniM dIpyamAnaM tau cakratuz ca pradakSiNam
4005016c sugrIvo rAghavaz caiva vayasyatvam upAgatau
4005017a tataH suprIta manasau tAv ubhau harirAghavau
4005017c anyonyam abhivIkSantau na tRptim upajagmatuH
4005018a tataH sarvArthavidvAMsaM rAmaM dazarathAtmajam
4005018c sugrIvaH prAha tejasvI vAkyam ekamanAs tadA
4006001a ayam AkhyAti me rAma sacivo mantrisattamaH
4006001c hanumAn yannimittaM tvaM nirjanaM vanam AgataH
4006002a lakSmaNena saha bhrAtrA vasataz ca vane tava
4006002c rakSasApahRtA bhAryA maithilI janakAtmajA
4006003a tvayA viyuktA rudatI lakSmaNena ca dhImatA
4006003c antaraM prepsunA tena hatvA gRdhraM jaTAyuSam
4006004a bhAryAviyogajaM duHkhaM nacirAt tvaM vimokSyase
4006004c ahaM tAm AnayiSyAmi naSTAM vedazrutiM yathA
4006005a rasAtale vA vartantIM vartantIM vA nabhastale
4006005c aham AnIya dAsyAmi tava bhAryAm ariMdama
4006006a idaM tathyaM mama vacas tvam avehi ca rAghava
4006006c tyaja zokaM mahAbAho tAM kAntAm AnayAmi te
4006007a anumAnAt tu jAnAmi maithilI sA na saMzayaH
4006007c hriyamANA mayA dRSTA rakSasA krUrakarmaNA
4006008a krozantI rAma rAmeti lakSmaNeti ca visvaram
4006008c sphurantI rAvaNasyAGke pannagendravadhUr yathA
4006009a AtmanA paJcamaM mAM hi dRSTvA zailataTe sthitam
4006009c uttarIyaM tayA tyaktaM zubhAny AbharaNAni ca
4006010a tAny asmAbhir gRhItAni nihitAni ca rAghava
4006010c AnayiSyAmy ahaM tAni pratyabhijJAtum arhasi
4006011a tam abravIt tato rAmaH sugrIvaM priyavAdinam
4006011c Anayasva sakhe zIghraM kimarthaM pravilambase
4006012a evam uktas tu sugrIvaH zailasya gahanAM guhAm
4006012c praviveza tataH zIghraM rAghavapriyakAmyayA
4006013a uttarIyaM gRhItvA tu zubhAny AbharaNAni ca
4006013c idaM pazyeti rAmAya darzayAm Asa vAnaraH
4006014a tato gRhItvA tadvAsaH zubhAny AbharaNAni ca
4006014c abhavad bASpasaMruddho nIhAreNeva candramAH
4006015a sItAsnehapravRttena sa tu bASpeNa dUSitaH
4006015c hA priyeti rudan dhairyam utsRjya nyapatat kSitau
4006016a hRdi kRtvA sa bahuzas tam alaMkAram uttamam
4006016c nizazvAsa bhRzaM sarpo bilastha iva roSitaH
4006017a avicchinnAzruvegas tu saumitriM vIkSya pArzvataH
4006017c paridevayituM dInaM rAmaH samupacakrame
4006018a pazya lakSmaNa vaidehyA saMtyaktaM hriyamANayA
4006018c uttarIyam idaM bhUmau zarIrAd bhUSaNAni ca
4006019a zAdvalinyAM dhruvaM bhUmyAM sItayA hriyamANayA
4006019c utsRSTaM bhUSaNam idaM tathArUpaM hi dRzyate
4006020a brUhi sugrIva kaM dezaM hriyantI lakSitA tvayA
4006020c rakSasA raudrarUpeNa mama prANasamA priyA
4006021a kva vA vasati tad rakSo mahad vyasanadaM mama
4006021c yannimittam ahaM sarvAn nAzayiSyAmi rAkSasAn
4006022a haratA maithilIM yena mAM ca roSayatA bhRzam
4006022c Atmano jIvitAntAya mRtyudvAram apAvRtam
4006023a mama dayitatamA hRtA vanAd; rajanicareNa vimathya yena sA
4006023c kathaya mama ripuM tam adya vai; pravagapate yamasaMnidhiM nayAmi
4007001a evam uktas tu sugrIvo rAmeNArtena vAnaraH
4007001c abravIt prAJjalir vAkyaM sabASpaM bASpagadgadaH
4007002a na jAne nilayaM tasya sarvathA pAparakSasaH
4007002c sAmarthyaM vikramaM vApi dauSkuleyasya vA kulam
4007003a satyaM tu pratijAnAmi tyaja zokam ariMdama
4007003c kariSyAmi tathA yatnaM yathA prApsyasi maithilIm
4007004a rAvaNaM sagaNaM hatvA paritoSyAtmapauruSam
4007004c tathAsmi kartA nacirAd yathA prIto bhaviSyasi
4007005a alaM vaiklavyam Alambya dhairyam AtmagataM smara
4007005c tvadvidhAnAM na sadRzam IdRzaM buddhilAghavam
4007006a mayApi vyasanaM prAptaM bhAryA haraNajaM mahat
4007006c na cAham evaM zocAmi na ca dhairyaM parityaje
4007007a nAhaM tAm anuzocAmi prAkRto vAnaro 'pi san
4007007c mahAtmA ca vinItaz cA kiM punar dhRtimAn bhavAn
4007008a bASpam ApatitaM dhairyAn nigrahItuM tvam arhasi
4007008c maryAdAM sattvayuktAnAM dhRtiM notsraSTum arhasi
4007009a vyasane vArtha kRcchre vA bhaye vA jIvitAntage
4007009c vimRzan vai svayA buddhyA dhRtimAn nAvasIdati
4007010a bAlizas tu naro nityaM vaiklavyaM yo 'nuvartate
4007010c sa majjaty avazaH zoke bhArAkrAnteva naur jale
4007011a eSo 'Jjalir mayA baddhaH praNayAt tvAM prasAdaye
4007011c pauruSaM zraya zokasya nAntaraM dAtum arhasi
4007012a ye zokam anuvartante na teSAM vidyate sukham
4007012c tejaz ca kSIyate teSAM na tvaM zocitum arhasi
4007013a hitaM vayasya bhAvena brUhi nopadizAmi te
4007013c vayasyatAM pUjayan me na tvaM zocitum arhasi
4007014a madhuraM sAntvitas tena sugrIveNa sa rAghavaH
4007014c mukham azrupariklinnaM vastrAntena pramArjayat
4007015a prakRtiSThas tu kAkutsthaH sugrIvavacanAt prabhuH
4007015c saMpariSvajya sugrIvam idaM vacanam abravIt
4007016a kartavyaM yad vayasyena snigdhena ca hitena ca
4007016c anurUpaM ca yuktaM ca kRtaM sugrIva tat tvayA
4007017a eSa ca prakRtiSTho 'ham anunItas tvayA sakhe
4007017c durlabho hIdRzo bandhur asmin kAle vizeSataH
4007018a kiM tu yatnas tvayA kAryo maithilyAH parimArgaNe
4007018c rAkSasasya ca raudrasya rAvaNasya durAtmanaH
4007019a mayA ca yad anuSTheyaM visrabdhena tad ucyatAm
4007019c varSAsv iva ca sukSetre sarvaM saMpadyate tava
4007020a mayA ca yad idaM vAkyam abhimAnAt samIritam
4007020c tat tvayA harizArdUla tattvam ity upadhAryatAm
4007021a anRtaM noktapUrvaM me na ca vakSye kadA cana
4007021c etat te pratijAnAmi satyenaiva zapAmi te
4007022a tataH prahRSTaH sugrIvo vAnaraiH sacivaiH saha
4007022c rAghavasya vacaH zrutvA pratijJAtaM vizeSataH
4007023a mahAnubhAvasya vaco nizamya; harir narANAm RSabhasya tasya
4007023c kRtaM sa mene harivIra mukhyas; tadA svakAryaM hRdayena vidvAn
4008001a parituSTas tu sugrIvas tena vAkyena vAnaraH
4008001c lakSmaNasyAgrajaM rAmam idaM vacanam abravIt
4008002a sarvathAham anugrAhyo devatAnAm asaMzayaH
4008002c upapannaguNopetaH sakhA yasya bhavAn mama
4008003a zakyaM khalu bhaved rAma sahAyena tvayAnagha
4008003c surarAjyam api prAptuM svarAjyaM kiM punaH prabho
4008004a so 'haM sabhAjyo bandhUnAM suhRdAM caiva rAghava
4008004c yasyAgnisAkSikaM mitraM labdhaM rAghavavaMzajam
4008005a aham apy anurUpas te vayasyo jJAsyase zanaiH
4008005c na tu vaktuM samartho 'haM svayam AtmagatAn guNAn
4008006a mahAtmanAM tu bhUyiSThaM tvadvidhAnAM kRtAtmanAm
4008006c nizcalA bhavati prItir dhairyam AtmavatAm iva
4008007a rajataM vA suvarNaM vA vastrANy AbharaNAni vA
4008007c avibhaktAni sAdhUnAm avagacchanti sAdhavaH
4008008a ADhyo vApi daridro vA duHkhitaH sukhito 'pi vA
4008008c nirdoSo vA sadoSo vA vayasyaH paramA gatiH
4008009a dhanatyAgaH sukhatyAgo dehatyAgo 'pi vA punaH
4008009c vayasyArthe pravartante snehaM dRSTvA tathAvidham
4008010a tat tathety abravId rAmaH sugrIvaM priyavAdinam
4008010c lakSmaNasyAgrato lakSmyA vAsavasyeva dhImataH
4008011a tato rAmaM sthitaM dRSTvA lakSmaNaM ca mahAbalam
4008011c sugrIvaH sarvataz cakSur vane lolam apAtayat
4008012a sa dadarza tataH sAlam avidUre harIzvaraH
4008012c supuSpam ISatpatrADhyaM bhramarair upazobhitam
4008013a tasyaikAM parNabahulAM bhaGktvA zAkhAM supuSpitAm
4008013c sAlasyAstIrya sugrIvo niSasAda sarAghavaH
4008014a tAv AsInau tato dRSTvA hanUmAn api lakSmaNam
4008014c sAlazAkhAM samutpATya vinItam upavezayat
4008015a tataH prahRSTaH sugrIvaH zlakSNaM madhurayA girA
4008015c uvAca praNayAd rAmaM harSavyAkulitAkSaram
4008016a ahaM vinikRto bhrAtrA carAmy eSa bhayArditaH
4008016c RzyamUkaM girivaraM hRtabhAryaH suduHkhitaH
4008017a so 'haM trasto bhaye magno vasAmy udbhrAntacetanaH
4008017c vAlinA nikRto bhrAtrA kRtavairaz ca rAghava
4008018a vAlino me bhayArtasya sarvalokAbhayaMkara
4008018c mamApi tvam anAthasya prasAdaM kartum arhasi
4008019a evam uktas tu tejasvI dharmajJo dharmavatsalaH
4008019c pratyuvAca sa kAkutsthaH sugrIvaM prahasann iva
4008020a upakAraphalaM mitram apakAro 'rilakSaNam
4008020c adyaiva taM haniSyAmi tava bhAryApahAriNam
4008021a ime hi me mahAvegAH patriNas tigmatejasaH
4008021c kArtikeyavanodbhUtAH zarA hemavibhUSitAH
4008022a kaGkapatrapraticchannA mahendrAzanisaMnibhAH
4008022c suparvANaH sutIkSNAgrA saroSA bhujagA iva
4008023a bhrAtRsaMjJam amitraM te vAlinaM kRtakilbiSam
4008023c zarair vinihataM pazya vikIrNam iva parvatam
4008024a rAghavasya vacaH zrutvA sugrIvo vAhinIpatiH
4008024c praharSam atulaM lebhe sAdhu sAdhv iti cAbravIt
4008025a rAmazokAbhibhUto 'haM zokArtAnAM bhavAn gatiH
4008025c vayasya iti kRtvA hi tvayy ahaM paridevaye
4008026a tvaM hi pANipradAnena vayasyo so 'gnisAkSikaH
4008026c kRtaH prANair bahumataH satyenApi zapAmy aham
4008027a vayasya iti kRtvA ca visrabdhaM pravadAmy aham
4008027c duHkham antargataM yan me mano dahati nityazaH
4008028a etAvad uktvA vacanaM bASpadUSitalocanaH
4008028c bASpopahatayA vAcA noccaiH zaknoti bhASitum
4008029a bASpavegaM tu sahasA nadIvegam ivAgatam
4008029c dhArayAm Asa dhairyeNa sugrIvo rAmasaMnidhau
4008030a saMnigRhya tu taM bASpaM pramRjya nayane zubhe
4008030c viniHzvasya ca tejasvI rAghavaM punar abravIt
4008031a purAhaM valinA rAma rAjyAt svAd avaropitaH
4008031c paruSANi ca saMzrAvya nirdhUto 'smi balIyasA
4008032a hRtA bhAryA ca me tena prANebhyo 'pi garIyasI
4008032c suhRdaz ca madIyA ye saMyatA bandhaneSu te
4008033a yatnavAMz ca suduSTAtmA mad vinAzAya rAghava
4008033c bahuzas tat prayuktAz ca vAnarA nihatA mayA
4008034a zaGkayA tv etayA cAhaM dRSTvA tvAm api rAghava
4008034c nopasarpAmy ahaM bhIto bhaye sarve hi bibhyati
4008035a kevalaM hi sahAyA me hanumat pramukhAs tv ime
4008035c ato 'haM dhArayAmy adya prANAn kRcchra gato 'pi san
4008036a ete hi kapayaH snigdhA mAM rakSanti samantataH
4008036c saha gacchanti gantavye nityaM tiSThanti ca sthite
4008037a saMkSepas tv eSa me rAma kim uktvA vistaraM hi te
4008037c sa me jyeSTho ripur bhrAtA vAlI vizrutapauruSaH
4008038a tadvinAzAd dhi me duHkhaM pranaSTaM syAd anantaram
4008038c sukhaM me jIvitaM caiva tadvinAzanibandhanam
4008039a eSa me rAma zokAntaH zokArtena niveditaH
4008039c duHkhito 'duHkhito vApi sakhyur nityaM sakhA gatiH
4008040a zrutvaitac ca vaco rAmaH sugrIvam idam abravIt
4008040c kiMnimittam abhUd vairaM zrotum icchAmi tattvataH
4008041a sukhaM hi kAraNaM zrutvA vairasya tava vAnara
4008041c AnantaryaM vidhAsyAmi saMpradhArya balAbalam
4008042a balavAn hi mamAmarSaH zrutvA tvAm avamAnitam
4008042c vardhate hRdayotkampI prAvRDvega ivAmbhasaH
4008043a hRSTaH kathaya visrabdho yAvad Aropyate dhanuH
4008043c sRSTaz ca hi mayA bANo nirastaz ca ripus tava
4008044a evam uktas tu sugrIvaH kAkutsthena mahAtmanA
4008044c praharSam atulaM lebhe caturbhiH saha vAnaraiH
4008045a tataH prahRSTavadanaH sugrIvo lakSmaNAgraje
4008045c vairasya kAraNaM tattvam AkhyAtum upacakrame
4009001a vAlI nAma mama bhrAtA jyeSThaH zatruniSUdanaH
4009001c pitur bahumato nityaM mama cApi tathA purA
4009002a pitary uparate 'smAkaM jyeSTho 'yam iti mantribhiH
4009002c kapInAm Izvaro rAjye kRtaH paramasaMmataH
4009003a rAjyaM prazAsatas tasya pitRpaitAmahaM mahat
4009003c ahaM sarveSu kAleSu praNataH preSyavat sthitaH
4009004a mAyAvI nAma tejasvI pUrvajo dundubheH sutaH
4009004c tena tasya mahad vairaM strIkRtaM vizrutaM purA
4009005a sa tu supte jane rAtrau kiSkindhAd vAram AgataH
4009005c nardati sma susaMrabdho vAlinaM cAhvayad raNe
4009006a prasuptas tu mama bhrAtA narditaM bhairavasvanam
4009006c zrutvA na mamRSe vAlI niSpapAta javAt tadA
4009007a sa tu vai niHsRtaH krodhAt taM hantum asurottamam
4009007c vAryamANas tataH strIbhir mayA ca praNatAtmanA
4009008a sa tu nirdhUya sarvAnno nirjagAma mahAbalaH
4009008c tato 'ham api sauhArdAn niHsRto vAlinA saha
4009009a sa tu me bhrAtaraM dRSTvA mAM ca dUrAd avasthitam
4009009c asuro jAtasaMtrAsaH pradudrAva tadA bhRzam
4009010a tasmin dravati saMtraste hy AvAM drutataraM gatau
4009010c prakAzo 'pi kRto mArgaz candreNodgacchatA tadA
4009011a sa tRNair AvRtaM durgaM dharaNyA vivaraM mahat
4009011c pravivezAsuro vegAd AvAm AsAdya viSThitau
4009012a taM praviSTaM ripuM dRSTvA bilaM roSavazaM gataH
4009012c mAm uvAca tadA vAlI vacanaM kSubhitendriyaH
4009013a iha tvaM tiSTha sugrIva biladvAri samAhitaH
4009013c yAvad atra pravizyAhaM nihanmi samare ripum
4009014a mayA tv etad vacaH zrutvA yAcitaH sa paraMtapa
4009014c zApayitvA ca mAM padbhyAM praviveza bilaM tadA
4009015a tasya praviSTasya bilaM sAgraH saMvatsaro gataH
4009015c sthitasya ca mama dvAri sa kAlo vyatyavartata
4009016a ahaM tu naSTaM taM jJAtvA snehAd AgatasaMbhramaH
4009016c bhrAtaraM na hi pazyAmi pApazaGki ca me manaH
4009017a atha dIrghasya kAlasya bilAt tasmAd viniHsRtam
4009017c saphenaM rudhiraM raktam ahaM dRSTvA suduHkhitaH
4009018a nardatAm asurANAM ca dhvanir me zrotram AgataH
4009018c nirastasya ca saMgrAme krozato niHsvano guroH
4009019a ahaM tv avagato buddhyA cihnais tair bhrAtaraM hatam
4009019c pidhAya ca biladvAraM zilayA girimAtrayA
4009019e zokArtaz codakaM kRtvA kiSkindhAm AgataH sakhe
4009020a gUhamAnasya me tattvaM yatnato mantribhiH zrutam
4009020c tato 'haM taiH samAgamya sametair abhiSecitaH
4009021a rAjyaM prazAsatas tasya nyAyato mama rAghava
4009021c AjagAma ripuM hatvA vAlI tam asurottamam
4009022a abhiSiktaM tu mAM dRSTvA krodhAt saMraktalocanaH
4009022c madIyAn mantriNo baddhvA paruSaM vAkyam abravIt
4009023a nigrahe 'pi samarthasya taM pApaM prati rAghava
4009023c na prAvartata me buddhir bhrAtRgauravayantritA
4009024a mAnayaMs taM mahAtmAnaM yathAvac cAbhyavAdayam
4009024c uktAz ca nAziSas tena saMtuSTenAntarAtmanA
4010001a tataH krodhasamAviSTaM saMrabdhaM tam upAgatam
4010001c ahaM prasAdayAM cakre bhrAtaraM priyakAmyayA
4010002a diSTyAsi kuzalI prApto nihataz ca tvayA ripuH
4010002c anAthasya hi me nAthas tvam eko 'nAthanandanaH
4010003a idaM bahuzalAkaM te pUrNacandram ivoditam
4010003c chatraM savAlavyajanaM pratIcchasva mayodyatam
4010004a tvam eva rAjA mAnArhaH sadA cAhaM yathApurA
4010004c nyAsabhUtam idaM rAjyaM tava niryAtayAmy aham
4010005a mA ca roSaM kRthAH saumya mayi zatrunibarhaNa
4010005c yAce tvAM zirasA rAjan mayA baddho 'yam aJjaliH
4010006a balAd asmi samAgamya mantribhiH puravAsibhiH
4010006c rAjabhAve niyukto 'haM zUnyadezajigISayA
4010007a snigdham evaM bruvANaM mAM sa tu nirbhartsya vAnaraH
4010007c dhik tvAm iti ca mAm uktvA bahu tat tad uvAca ha
4010008a prakRtIz ca samAnIya mantriNaz caiva saMmatAn
4010008c mAm Aha suhRdAM madhye vAkyaM paramagarhitam
4010009a viditaM vo yathA rAtrau mAyAvI sa mahAsuraH
4010009c mAM samAhvayata krUro yuddhAkAGkSI sudurmatiH
4010010a tasya tad garjitaM zrutvA niHsRto 'haM nRpAlayAt
4010010c anuyAtaz ca mAM tUrNam ayaM bhrAtA sudAruNaH
4010011a sa tu dRSTvaiva mAM rAtrau sadvitIyaM mahAbalaH
4010011c prAdravad bhayasaMtrasto vIkSyAvAM tam anudrutau
4010011e anudrutas tu vegena praviveza mahAbilam
4010012a taM praviSTaM viditvA tu sughoraM sumahad bilam
4010012c ayam ukto 'tha me bhrAtA mayA tu krUradarzanaH
4010013a ahatvA nAsti me zaktiH pratigantum itaH purIm
4010013c biladvAri pratIkSa tvaM yAvad enaM nihanmy aham
4010014a sthito 'yam iti matvA tu praviSTo 'haM durAsadam
4010014c taM ca me mArgamANasya gataH saMvatsaras tadA
4010015a sa tu dRSTo mayA zatrur anirvedAd bhayAvahaH
4010015c nihataz ca mayA tatra so 'suro bandhubhiH saha
4010016a tasyAsyAt tu pravRttena rudhiraugheNa tad bilam
4010016c pUrNam AsId durAkrAmaM stanatas tasya bhUtale
4010017a sUdayitvA tu taM zatruM vikrAntaM dundubheH sutam
4010017c niSkrAmann eva pazyAmi bilasya pihitaM mukham
4010018a vikrozamAnasya tu me sugrIveti punaH punaH
4010018c yadA prativaco nAsti tato 'haM bhRzaduHkhitaH
4010019a pAdaprahArais tu mayA bahuzas tad vidAritam
4010019c tato 'haM tena niSkramya yathA punar upAgataH
4010020a tatrAnenAsmi saMruddho rAjyaM mArgayatAtmanaH
4010020c sugrIveNa nRzaMsena vismRtya bhrAtRsauhRdam
4010021a evam uktvA tu mAM tatra vastreNaikena vAnaraH
4010021c tadA nirvAsayAm Asa vAlI vigatasAdhvasaH
4010022a tenAham apaviddhaz ca hRtadAraz ca rAghava
4010022c tadbhayAc ca mahIkRtsnA krAnteyaM savanArNavA
4010023a RzyamUkaM girivaraM bhAryAharaNaduHkhitaH
4010023c praviSTo 'smi durAdharSaM vAlinaH kAraNAntare
4010024a etat te sarvam AkhyAtaM vairAnukathanaM mahat
4010024c anAgasA mayA prAptaM vyasanaM pazya rAghava
4010025a vAlinas tu bhayArtasya sarvalokAbhayaMkara
4010025c kartum arhasi me vIra prasAdaM tasya nigrahAt
4010026a evam uktaH sa tejasvI dharmajJo dharmasaMhitam
4010026c vacanaM vaktum Arebhe sugrIvaM prahasann iva
4010027a amoghAH sUryasaMkAzA mameme nizitAH zarAH
4010027c tasmin vAlini durvRtte patiSyanti ruSAnvitAH
4010028a yAvat taM na hi pazyeyaM tava bhAryApahAriNam
4010028c tAvat sa jIvet pApAtmA vAlI cAritradUSakaH
4010029a AtmAnumAnAt pazyAmi magnaM tvAM zokasAgare
4010029c tvAm ahaM tArayiSyAmi kAmaM prApsyasi puSkalam
4011001a rAmasya vacanaM zrutvA harSapauruSavardhanam
4011001c sugrIvaH pUjayAM cakre rAghavaM prazazaMsa ca
4011002a asaMzayaM prajvalitais tIkSNair marmAtigaiH zaraiH
4011002c tvaM daheH kupito lokAn yugAnta iva bhAskaraH
4011003a vAlinaH pauruSaM yat tad yac ca vIryaM dhRtiz ca yA
4011003c tan mamaikamanAH zrutvA vidhatsva yadanantaram
4011004a samudrAt pazcimAt pUrvaM dakSiNAd api cottaram
4011004c krAmaty anudite sUrye vAlI vyapagataklamaH
4011005a agrANy Aruhya zailAnAM zikharANi mahAnty api
4011005c Urdhvam utkSipya tarasA pratigRhNAti vIryavAn
4011006a bahavaH sAravantaz ca vaneSu vividhA drumAH
4011006c vAlinA tarasA bhagnA balaM prathayatAtmanaH
4011007a mahiSo dundubhir nAma kailAsazikharaprabhaH
4011007c balaM nAgasahasrasya dhArayAm Asa vIryavAn
4011008a vIryotsekena duSTAtmA varadAnAc ca mohitaH
4011008c jagAma sa mahAkAyaH samudraM saritAM patim
4011009a Urmimantam atikramya sAgaraM ratnasaMcayam
4011009c mama yuddhaM prayaccheti tam uvAca mahArNavam
4011010a tataH samudro dharmAtmA samutthAya mahAbalaH
4011010c abravId vacanaM rAjann asuraM kAlacoditam
4011011a samartho nAsmi te dAtuM yuddhaM yuddhavizArada
4011011c zrUyatAm abhidhAsyAmi yas te yuddhaM pradAsyati
4011012a zailarAjo mahAraNye tapasvizaraNaM param
4011012c zaMkarazvazuro nAmnA himavAn iti vizrutaH
4011013a guhA prasravaNopeto bahukandaranirjharaH
4011013c sa samarthas tava prItim atulAM kartum Ahave
4011014a taM bhItam iti vijJAya samudram asurottamaH
4011014c himavadvanam Agacchac charaz cApAd iva cyutaH
4011015a tatas tasya gireH zvetA gajendravipulAH zilAH
4011015c cikSepa bahudhA bhUmau dundubhir vinanAda ca
4011016a tataH zvetAmbudAkAraH saumyaH prItikarAkRtiH
4011016c himavAn abravId vAkyaM sva eva zikhare sthitaH
4011017a kleSTum arhasi mAM na tvaM dundubhe dharmavatsala
4011017c raNakarmasv akuzalas tapasvizaraNaM hy aham
4011018a tasya tad vacanaM zrutvA girirAjasya dhImataH
4011018c uvAca dundubhir vAkyaM krodhAt saMraktalocanaH
4011019a yadi yuddhe 'samarthas tvaM madbhayAd vA nirudyamaH
4011019c tam AcakSva pradadyAn me yo 'dya yuddhaM yuyutsataH
4011020a himavAn abravId vAkyaM zrutvA vAkyavizAradaH
4011020c anuktapUrvaM dharmAtmA krodhAt tam asurottamam
4011021a vAlI nAma mahAprAjJaH zakratulyaparAkramaH
4011021c adhyAste vAnaraH zrImAn kiSkindhAm atulaprabhAm
4011022a sa samartho mahAprAjJas tava yuddhavizAradaH
4011022c dvandvayuddhaM mahad dAtuM namucer iva vAsavaH
4011023a taM zIghram abhigaccha tvaM yadi yuddham ihecchasi
4011023c sa hi durdharSaNo nityaM zUraH samarakarmaNi
4011024a zrutvA himavato vAkyaM krodhAviSTaH sa dundubhiH
4011024c jagAma tAM purIM tasya kiSkindhAM vAlinas tadA
4011025a dhArayan mAhiSaM rUpaM tIkSNazRGgo bhayAvahaH
4011025c prAvRSIva mahAmeghas toyapUrNo nabhastale
4011026a tatas tu dvAram Agamya kiSkindhAyA mahAbalaH
4011026c nanarda kampayan bhUmiM dundubhir dundubhir yathA
4011027a samIpajAn drumAn bhaJjan vasudhAM dArayan khuraiH
4011027c viSANenollekhan darpAt taddvAraM dvirado yathA
4011028a antaHpuragato vAlI zrutvA zabdam amarSaNaH
4011028c niSpapAta saha strIbhis tArAbhir iva candramAH
4011029a mitaM vyaktAkSarapadaM tam uvAca sa dundubhim
4011029c harINAm Izvaro vAlI sarveSAM vanacAriNAm
4011030a kimarthaM nagaradvAram idaM ruddhvA vinardasi
4011030c dundubhe vidito me 'si rakSa prANAn mahAbala
4011031a tasya tad vacanaM zrutvA vAnarendrasya dhImataH
4011031c uvAca dundubhir vAkyaM krodhAt saMraktalocanaH
4011032a na tvaM strIsaMnidhau vIra vacanaM vaktum arhasi
4011032c mama yuddhaM prayaccha tvaM tato jJAsyAmi te balam
4011033a atha vA dhArayiSyAmi krodham adya nizAm imAm
4011033c gRhyatAm udayaH svairaM kAmabhogeSu vAnara
4011034a yo hi mattaM pramattaM vA suptaM vA rahitaM bhRzam
4011034c hanyAt sa bhrUNahA loke tvadvidhaM madamohitam
4011035a sa prahasyAbravIn mandaM krodhAt tam asurottamam
4011035c visRjya tAH striyaH sarvAs tArAprabhRtikAs tadA
4011036a matto 'yam iti mA maMsthA yady abhIto 'si saMyuge
4011036c mado 'yaM saMprahAre 'smin vIrapAnaM samarthyatAm
4011037a tam evam uktvA saMkruddho mAlAm utkSipya kAJcanIm
4011037c pitrA dattAM mahendreNa yuddhAya vyavatiSThata
4011038a viSANayor gRhItvA taM dundubhiM girisaMnibham
4011038c vAlI vyApAtayAM cakre nanarda ca mahAsvanam
4011039a yuddhe prANahare tasmin niSpiSTo dundubhis tadA
4011039c zrotrAbhyAm atha raktaM tu tasya susrAva pAtyataH
4011039e papAta ca mahAkAyaH kSitau paJcatvam AgataH
4011040a taM tolayitvA bAhubhyAM gatasattvam acetanam
4011040c cikSepa vegavAn vAlI vegenaikena yojanam
4011041a tasya vegapraviddhasya vaktrAt kSatajabindavaH
4011041c prapetur mArutotkSiptA mataGgasyAzramaM prati
4011042a tAn dRSTvA patitAMs tatra muniH zoNitavipruSaH
4011042c utsasarja mahAzApaM kSeptAraM vAlinaM prati
4011042e iha tenApraveSTavyaM praviSTasya badho bhavet
4011043a sa maharSiM samAsAdya yAcate sma kRtAJjaliH
4011044a tataH zApabhayAd bhIta RzyamUkaM mahAgirim
4011044c praveSTuM necchati harir draSTuM vApi narezvara
4011045a tasyApravezaM jJAtvAham idaM rAma mahAvanam
4011045c vicarAmi sahAmAtyo viSAdena vivarjitaH
4011046a eSo 'sthinicayas tasya dundubheH saMprakAzate
4011046c vIryotsekAn nirastasya girikUTanibho mahAn
4011047a ime ca vipulAH sAlAH sapta zAkhAvalambinaH
4011047c yatraikaM ghaTate vAlI niSpatrayitum ojasA
4011048a etad asyAsamaM vIryaM mayA rAma prakAzitam
4011048c kathaM taM vAlinaM hantuM samare zakSyase nRpa
4011049a yadi bhindyAd bhavAn sAlAn imAMs tv ekeSuNA tataH
4011049c jAnIyAM tvAM mahAbAho samarthaM vAlino vadhe
4011050a tasya tad vacanaM zrutvA sugrIvasya mahAtmanaH
4011050c rAghavo dundubheH kAyaM pAdAGguSThena lIlayA
4011050e tolayitvA mahAbAhuz cikSepa dazayojanam
4011051a kSiptaM dRSTvA tataH kAyaM sugrIvaH punar abravIt
4011051c lakSmaNasyAgrato rAmam idaM vacanam arthavat
4011052a ArdraH samAMsapratyagraH kSiptaH kAyaH purA sakhe
4011052c laghuH saMprati nirmAMsas tRNabhUtaz ca rAghava
4011052e nAtra zakyaM balaM jJAtuM tava vA tasya vAdhikam
4012001a etac ca vacanaM zrutvA sugrIveNa subhASitam
4012001c pratyayArthaM mahAtejA rAmo jagrAha kArmukam
4012002a sa gRhItvA dhanur ghoraM zaram ekaM ca mAnadaH
4012002c sAlAn uddizya cikSepa jyAsvanaiH pUrayan dizaH
4012003a sa visRSTo balavatA bANaH svarNapariSkRtaH
4012003c bhittvA sAlAn giriprasthe sapta bhUmiM viveza ha
4012004a praviSTas tu muhUrtena rasAM bhittvA mahAjavaH
4012004c niSpatya ca punas tUrNaM svatUNIM praviveza ha
4012005a tAn dRSTvA sapta nirbhinnAn sAlAn vAnarapuMgavaH
4012005c rAmasya zaravegena vismayaM paramaM gataH
4012006a sa mUrdhnA nyapatad bhUmau pralambIkRtabhUSaNaH
4012006c sugrIvaH paramaprIto rAghavAya kRtAJjaliH
4012007a idaM covAca dharmajJaM karmaNA tena harSitaH
4012007c rAmaM sarvAstraviduSAM zreSThaM zUram avasthitam
4012008a sendrAn api surAn sarvAMs tvaM bANaiH puruSarSabha
4012008c samarthaH samare hantuM kiM punar vAlinaM prabho
4012009a yena sapta mahAsAlA girir bhUmiz ca dAritAH
4012009c bANenaikena kAkutstha sthAtA te ko raNAgrataH
4012010a adya me vigataH zokaH prItir adya parA mama
4012010c suhRdaM tvAM samAsAdya mahendravaruNopamam
4012011a tam adyaiva priyArthaM me vairiNaM bhrAtRrUpiNam
4012011c vAlinaM jahi kAkutstha mayA baddho 'yam aJjaliH
4012012a tato rAmaH pariSvajya sugrIvaM priyadarzanam
4012012c pratyuvAca mahAprAjJo lakSmaNAnumataM vacaH
4012013a asmAd gacchAma kiSkindhAM kSipraM gaccha tvam agrataH
4012013c gatvA cAhvaya sugrIva vAlinaM bhrAtRgandhinam
4012014a sarve te tvaritaM gatvA kiSkindhAM vAlinaH purIm
4012014c vRkSair AtmAnam AvRtya vyatiSThan gahane vane
4012015a sugrIvo vyanadad ghoraM vAlino hvAnakAraNAt
4012015c gADhaM parihito vegAn nAdair bhindann ivAmbaram
4012016a taM zrutvA ninadaM bhrAtuH kruddho vAlI mahAbalaH
4012016c niSpapAta susaMrabdho bhAskaro 'stataTAd iva
4012017a tataH sutumulaM yuddhaM vAlisugrIvayor abhUt
4012017c gagane grahayor ghoraM budhAGgArakayor iva
4012018a talair azanikalpaiz ca vajrakalpaiz ca muSTibhiH
4012018c jaghnatuH samare 'nyonyaM bhrAtarau krodhamUrchitau
4012019a tato rAmo dhanuSpANis tAv ubhau samudIkSya tu
4012019c anyonyasadRzau vIrAv ubhau devAv ivAzvinau
4012020a yan nAvagacchat sugrIvaM vAlinaM vApi rAghavaH
4012020c tato na kRtavAn buddhiM moktum antakaraM zaram
4012021a etasminn antare bhagnaH sugrIvas tena vAlinA
4012021c apazyan rAghavaM nAtham RzyamUkaM pradudruve
4012022a klAnto rudhirasiktAGgaH prahArair jarjarIkRtaH
4012022c vAlinAbhidrutaH krodhAt praviveza mahAvanam
4012023a taM praviSTaM vanaM dRSTvA vAlI zApabhayAt tataH
4012023c mukto hy asi tvam ity uktvA sa nivRtto mahAbalaH
4012024a rAghavo 'pi saha bhrAtrA saha caiva hanUmatA
4012024c tad eva vanam Agacchat sugrIvo yatra vAnaraH
4012025a taM samIkSyAgataM rAmaM sugrIvaH sahalakSmaNam
4012025c hrImAn dInam uvAcedaM vasudhAm avalokayan
4012026a Ahvayasveti mAm uktvA darzayitvA ca vikramam
4012026c vairiNA ghAtayitvA ca kim idAnIM tvayA kRtam
4012027a tAm eva velAM vaktavyaM tvayA rAghava tattvataH
4012027c vAlinaM na nihanmIti tato nAham ito vraje
4012028a tasya caivaM bruvANasya sugrIvasya mahAtmanaH
4012028c karuNaM dInayA vAcA rAghavaH punar abravIt
4012029a sugrIva zrUyatAM tAtaH krodhaz ca vyapanIyatAm
4012029c kAraNaM yena bANo 'yaM na mayA sa visarjitaH
4012030a alaMkAreNa veSeNa pramANena gatena ca
4012030c tvaM ca sugrIva vAlI ca sadRzau sthaH parasparam
4012031a svareNa varcasA caiva prekSitena ca vAnara
4012031c vikrameNa ca vAkyaiz ca vyaktiM vAM nopalakSaye
4012032a tato 'haM rUpasAdRzyAn mohito vAnarottama
4012032c notsRjAmi mahAvegaM zaraM zatrunibarhaNam
4012033a etanmuhUrte tu mayA pazya vAlinam Ahave
4012033c nirastam iSuNaikena veSTamAnaM mahItale
4012034a abhijJAnaM kuruSva tvam Atmano vAnarezvara
4012034c yena tvAm abhijAnIyAM dvandvayuddham upAgatam
4012035a gajapuSpIm imAM phullAm utpATya zubhalakSaNAm
4012035c kuru lakSmaNa kaNThe 'sya sugrIvasya mahAtmanaH
4012036a tato giritaTe jAtAm utpATya kusumAyutAm
4012036c lakSmaNo gajapuSpIM tAM tasya kaNThe vyasarjayat
4012037a sa tathA zuzubhe zrImA&l latayA kaNThasaktayA
4012037c mAlayeva balAkAnAM sasaMdhya iva toyadaH
4012038a vibhrAjamAno vapuSA rAmavAkyasamAhitaH
4012038c jagAma saha rAmeNa kiSkindhAM vAlipAlitAm
4013001a RzyamUkAt sa dharmAtmA kiSkindhAM lakSmaNAgrajaH
4013001c jagAma sahasugrIvo vAlivikramapAlitAm
4013002a samudyamya mahac cApaM rAmaH kAJcanabhUSitam
4013002c zarAMz cAditya saMkAzAn gRhItvA raNasAdhakAn
4013003a agratas tu yayau tasya rAghavasya mahAtmanaH
4013003c sugrIvaH saMhatagrIvo lakSmaNaz ca mahAbalaH
4013004a pRSThato hanumAn vIro nalo nIlaz ca vAnaraH
4013004c tAraz caiva mahAtejA hariyUthapa yUthapAH
4013005a te vIkSamANA vRkSAMz ca puSpabhArAvalambinaH
4013005c prasannAmbuvahAz caiva saritaH sAgaraM gamAH
4013006a kandarANi ca zailAMz ca nirjharANi guhAs tathA
4013006c zikharANi ca mukhyAni darIz ca priyadarzanAH
4013007a vaidUryavimalaiH parNaiH padmaiz cAkAzakuDmalaiH
4013007c zobhitAn sajalAn mArge taTAkAMz ca vyalokayan
4013008a kAraNDaiH sArasair haMsair vaJjUlair jalakukkuTaiH
4013008c cakravAkais tathA cAnyaiH zakunaiH pratinAditAn
4013009a mRduzaSpAGkurAhArAn nirbhayAn vanagocarAn
4013009c carataH sarvato 'pazyan sthalISu hariNAn sthitAn
4013010a taTAkavairiNaz cApi zukladantavibhUSitAn
4013010c ghorAn ekacarAn vanyAn dviradAn kUlaghAtinaH
4013011a vane vanacarAMz cAnyAn khecarAMz ca vihaMgamAn
4013011c pazyantas tvaritA jagmuH sugrIvavazavartinaH
4013012a teSAM tu gacchatAM tatra tvaritaM raghunandanaH
4013012c drumaSaNDaM vanaM dRSTvA rAmaH sugrIvam abravIt
4013013a eSa megha ivAkAze vRkSaSaNDaH prakAzate
4013013c meghasaMghAtavipulaH paryantakadalIvRtaH
4013014a kim etaj jJAtum icchAmi sakhe kautUhalaM mama
4013014c kautUhalApanayanaM kartum icchAmy ahaM tvayA
4013015a tasya tad vacanaM zrutvA rAghavasya mahAtmanaH
4013015c gacchann evAcacakSe 'tha sugrIvas tan mahad vanam
4013016a etad rAghava vistIrNam AzramaM zramanAzanam
4013016c udyAnavanasaMpannaM svAdumUlaphalodakam
4013017a atra saptajanA nAma munayaH saMzitavratAH
4013017c saptaivAsann adhaHzIrSA niyataM jalazAyinaH
4013018a saptarAtrakRtAhArA vAyunA vanavAsinaH
4013018c divaM varSazatair yAtAH saptabhiH sakalevarAH
4013019a teSAm evaM prabhAvena drumaprAkArasaMvRtam
4013019c AzramaM sudurAdharSam api sendraiH surAsuraiH
4013020a pakSiNo varjayanty etat tathAnye vanacAriNaH
4013020c vizanti mohAd ye 'py atra nivartante na te punaH
4013021a vibhUSaNaravAz cAtra zrUyante sakalAkSarAH
4013021c tUryagItasvanAz cApi gandho divyaz ca rAghava
4013022a tretAgnayo 'pi dIpyante dhUmo hy eSa pradRzyate
4013022c veSTayann iva vRkSAgrAn kapotAGgAruNo ghanaH
4013023a kuru praNAmaM dharmAtmaMs tAn samuddizya rAghavaH
4013023c lakSmaNena saha bhrAtrA prayataH saMyatAJjaliH
4013024a praNamanti hi ye teSAm RSINAM bhAvitAtmanAm
4013024c na teSAm azubhaM kiM cic charIre rAma dRzyate
4013025a tato rAmaH saha bhrAtrA lakSmaNena kRtAJjaliH
4013025c samuddizya mahAtmAnas tAn RSIn abhyavAdayat
4013026a abhivAdya ca dharmAtmA rAmo bhrAtA ca lakSmaNaH
4013026c sugrIvo vAnarAz caiva jagmuH saMhRSTamAnasAH
4013027a te gatvA dUram adhvAnaM tasmAt saptajanAzramAt
4013027c dadRzus tAM durAdharSAM kiSkindhAM vAlipAlitAm
4014001a sarve te tvaritaM gatvA kiSkindhAM vAlipAlitAm
4014001c vRkSair AtmAnam AvRtya vyatiSThan gahane vane
4014002a vicArya sarvato dRSTiM kAnane kAnanapriyaH
4014002c sugrIvo vipulagrIvaH krodham AhArayad bhRzam
4014003a tataH sa ninadaM ghoraM kRtvA yuddhAya cAhvayat
4014003c parivAraiH parivRto nAdair bhindann ivAmbaram
4014004a atha bAlArkasadRzo dRptasiMhagatis tadA
4014004c dRSTvA rAmaM kriyAdakSaM sugrIvo vAkyam abravIt
4014005a harivAgurayA vyAptaM taptakAJcanatoraNAm
4014005c prAptAH sma dhvajayantrADhyAM kiSkindhAM vAlinaH purIm
4014006a pratijJA yA tvayA vIra kRtA vAlivadhe purA
4014006c saphalAM tAM kuru kSipraM latAM kAla ivAgataH
4014007a evam uktas tu dharmAtmA sugrIveNa sa rAghavaH
4014007c tam athovAca sugrIvaM vacanaM zatrusUdanaH
4014008a kRtAbhijJAna cihnas tvam anayA gajasAhvayA
4014008c viparIta ivAkAze sUryo nakSatra mAlayA
4014009a adya vAlisamutthaM te bhayaM vairaM ca vAnara
4014009c ekenAhaM pramokSyAmi bANamokSeNa saMyuge
4014010a mama darzaya sugrIvavairiNaM bhrAtRrUpiNam
4014010c vAlI vinihato yAvad vane pAMsuSu veSTate
4014011a yadi dRSTipathaM prApto jIvan sa vinivartate
4014011c tato doSeNa mA gacchet sadyo garhec ca mA bhavAn
4014012a pratyakSaM sapta te sAlA mayA bANena dAritAH
4014012c tato vetsi balenAdya bAlinaM nihataM mayA
4014013a anRtaM noktapUrvaM me vIra kRcchre 'pi tiSThatA
4014013c dharmalobhaparItena na ca vakSye kathaM cana
4014014a saphalAM ca kariSyAmi pratijJAM jahi saMbhramam
4014014c prasUtaM kalamaM kSetre varSeNeva zatakratuH
4014015a tadAhvAnanimittaM tvaM vAlino hemamAlinaH
4014015c sugrIva kuru taM zabdaM niSpated yena vAnaraH
4014016a jitakAzI jayazlAghI tvayA cAdharSitaH purAt
4014016c niSpatiSyaty asaMgena vAlI sa priyasaMyugaH
4014017a ripUNAM dharSaNaM zUrA marSayanti na saMyuge
4014017c jAnantas tu svakaM vIryaM strIsamakSaM vizeSataH
4014018a sa tu rAmavacaH zrutvA sugrIvo hemapiGgalaH
4014018c nanarda krUranAdena vinirbhindann ivAmbaram
4014019a tasya zabdena vitrastA gAvo yAnti hataprabhAH
4014019c rAjadoSaparAmRSTAH kulastriya ivAkulAH
4014020a dravanti ca mRgAH zIghraM bhagnA iva raNe hayAH
4014020c patanti ca khagA bhUmau kSINapuNyA iva grahAH
4014021a tataH sa jImUtagaNapraNAdo; nAdaM vyamuJcat tvarayA pratItaH
4014021c sUryAtmajaH zauryavivRddhatejAH; saritpatir vAnilacaJcalormiH
4015001a atha tasya ninAdaM taM sugrIvasya mahAtmanaH
4015001c zuzrAvAntaHpuragato vAlI bhrAtur amarSaNaH
4015002a zrutvA tu tasya ninadaM sarvabhUtaprakampanam
4015002c madaz caikapade naSTaH krodhaz cApatito mahAn
4015003a sa tu roSaparItAGgo vAlI saMdhyAtapaprabhaH
4015003c uparakta ivAdityaH sadyo niSprabhatAM gataH
4015004a vAlI daMSTrA karAlas tu krodhAd dIptAgnisaMnibhaH
4015004c bhAty utpatitapadmAbhaH samRNAla iva hradaH
4015005a zabdaM durmarSaNaM zrutvA niSpapAta tato hariH
4015005c vegena caraNanyAsair dArayann iva medinIm
4015006a taM tu tArA pariSvajya snehAd darzitasauhRdA
4015006c uvAca trastasaMbhrAntA hitodarkam idaM vacaH
4015007a sAdhu krodham imaM vIra nadI vegam ivAgatam
4015007c zayanAd utthitaH kAlyaM tyaja bhuktAm iva srajam
4015008a sahasA tava niSkrAmo mama tAvan na rocate
4015008c zrUyatAm abhidhAsyAmi yannimittaM nivAryase
4015009a pUrvam ApatitaH krodhAt sa tvAm Ahvayate yudhi
4015009c niSpatya ca nirastas te hanyamAno dizo gataH
4015010a tvayA tasya nirastasya pIDitasya vizeSataH
4015010c ihaitya punar AhvAnaM zaGkAM janayatIva me
4015011a darpaz ca vyavasAyaz ca yAdRzas tasya nardataH
4015011c ninAdasya ca saMrambho naitad alpaM hi kAraNam
4015012a nAsahAyam ahaM manye sugrIvaM tam ihAgatam
4015012c avaSTabdhasahAyaz ca yam AzrityaiSa garjati
4015013a prakRtyA nipuNaz caiva buddhimAMz caiva vAnaraH
4015013c aparIkSitavIryeNa sugrIvaH saha naiSyati
4015014a pUrvam eva mayA vIra zrutaM kathayato vacaH
4015014c aGgadasya kumArasya vakSyAmi tvA hitaM vacaH
4015015a tava bhrAtur hi vikhyAtaH sahAyo raNakarkazaH
4015015c rAmaH parabalAmardI yugAntAgnir ivotthitaH
4015016a nivAsavRkSaH sAdhUnAm ApannAnAM parA gatiH
4015016c ArtAnAM saMzrayaz caiva yazasaz caikabhAjanam
4015017a jJAnavijJAnasaMpanno nidezo nirataH pituH
4015017c dhAtUnAm iva zailendro guNAnAm Akaro mahAn
4015018a tatkSamaM na virodhas te saha tena mahAtmanA
4015018c durjayenAprameyena rAmeNa raNakarmasu
4015019a zUra vakSyAmi te kiM cin na cecchAmy abhyasUyitum
4015019c zrUyatAM kriyatAM caiva tava vakSyAmi yad dhitam
4015020a yauvarAjyena sugrIvaM tUrNaM sAdhv abhiSecaya
4015020c vigrahaM mA kRthA vIra bhrAtrA rAjan balIyasA
4015021a ahaM hi te kSamaM manye tava rAmeNa sauhRdam
4015021c sugrIveNa ca saMprItiM vairam utsRjya dUrataH
4015022a lAlanIyo hi te bhrAtA yavIyAn eSa vAnaraH
4015022c tatra vA sann ihastho vA sarvathA bandhur eva te
4015023a yadi te matpriyaM kAryaM yadi cAvaiSi mAM hitAm
4015023c yAcyamAnaH prayatnena sAdhu vAkyaM kuruSva me
4016001a tAm evaM bruvatIM tArAM tArAdhipanibhAnanAm
4016001c vAlI nirbhartsayAm Asa vacanaM cedam abravIt
4016002a garjato 'sya ca saMrambhaM bhrAtuH zatror vizeSataH
4016002c marSayiSyAmy ahaM kena kAraNena varAnane
4016003a adharSitAnAM zUrANAM samareSv anivartinAm
4016003c dharSaNAmarSaNaM bhIru maraNAd atiricyate
4016004a soDhuM na ca samartho 'haM yuddhakAmasya saMyuge
4016004c sugrIvasya ca saMrambhaM hInagrIvasya garjataH
4016005a na ca kAryo viSAdas te rAghavaM prati matkRte
4016005c dharmajJaz ca kRtajJaz ca kathaM pApaM kariSyati
4016006a nivartasva saha strIbhiH kathaM bhUyo 'nugacchasi
4016006c sauhRdaM darzitaM tAre mayi bhaktiH kRtA tvayA
4016007a pratiyotsyAmy ahaM gatvA sugrIvaM jahi saMbhramam
4016007c darpaM cAsya vineSyAmi na ca prANair vimokSyate
4016008a zApitAsi mama prANair nivartasva jayena ca
4016008c ahaM jitvA nivartiSye tam alaM bhrAtaraM raNe
4016009a taM tu tArA pariSvajya vAlinaM priyavAdinI
4016009c cakAra rudatI mandaM dakSiNA sA pradakSiNam
4016010a tataH svastyayanaM kRtvA mantravad vijayaiSiNI
4016010c antaHpuraM saha strIbhiH praviSTA zokamohitA
4016011a praviSTAyAM tu tArAyAM saha strIbhiH svam Alayam
4016011c nagarAn niryayau kruddho mahAsarpa iva zvasan
4016012a sa niHzvasya mahAvego vAlI paramaroSaNaH
4016012c sarvataz cArayan dRSTiM zatrudarzanakAGkSayA
4016013a sa dadarza tataH zrImAn sugrIvaM hemapiGgalam
4016013c susaMvItam avaSTabdhaM dIpyamAnam ivAnalam
4016014a sa taM dRSTvA mahAvIryaM sugrIvaM paryavasthitam
4016014c gADhaM paridadhe vAso vAlI paramaroSaNaH
4016015a sa vAlI gADhasaMvIto muSTim udyamya vIryavAn
4016015c sugrIvam evAbhimukho yayau yoddhuM kRtakSaNaH
4016016a zliSTamuSTiM samudyamya saMrabdhataram AgataH
4016016c sugrIvo 'pi samuddizya vAlinaM hemamAlinam
4016017a taM vAlI krodhatAmrAkSaH sugrIvaM raNapaNDitam
4016017c ApatantaM mahAvegam idaM vacanam abravIt
4016018a eSa muSTir mayA baddho gADhaH sunihitAGguliH
4016018c mayA vegavimuktas te prANAn AdAya yAsyati
4016019a evam uktas tu sugrIvaH kruddho vAlinam abravIt
4016019c tavaiva ca haran prANAn muSTiH patatu mUrdhani
4016020a tADitas tena saMkruddhaH samabhikramya vegataH
4016020c abhavac choNitodgArI sotpIDa iva parvataH
4016021a sugrIveNa tu niHsaMgaM sAlam utpATya tejasA
4016021c gAtreSv abhihato vAlI vajreNeva mahAgiriH
4016022a sa tu vAlI pracaritaH sAlatADanavihvalaH
4016022c gurubhArasamAkrAntA sAgare naur ivAbhavat
4016023a tau bhImabalavikrAntau suparNasamaveginau
4016023c pravRddhau ghoravapuSau candrasUryAv ivAmbare
4016024a vAlinA bhagnadarpas tu sugrIvo mandavikramaH
4016024c vAlinaM prati sAmarSo darzayAm Asa lAghavam
4016025a tato dhanuSi saMdhAya zaram AzIviSopamam
4016025c rAghaveNa mahAbANo vAlivakSasi pAtitaH
4016026a vegenAbhihato vAlI nipapAta mahItale
4016027a athokSitaH zoNitatoyavisravaiH; supuSpitAzoka ivAniloddhataH
4016027c vicetano vAsavasUnur Ahave; prabhraMzitendradhvajavat kSitiM gataH
4017001a tataH zareNAbhihato rAmeNa raNakarkazaH
4017001c papAta sahasA vAlI nikRtta iva pAdapaH
4017002a sa bhUmau nyastasarvAGgas taptakAJcanabhUSaNaH
4017002c apatad devarAjasya muktarazmir iva dhvajaH
4017003a tasmin nipatite bhUmau haryRSANAM gaNezvare
4017003c naSTacandram iva vyoma na vyarAjata bhUtalam
4017004a bhUmau nipatitasyApi tasya dehaM mahAtmanaH
4017004c na zrIr jahAti na prANA na tejo na parAkramaH
4017005a zakradattA varA mAlA kAJcanI ratnabhUSitA
4017005c dadhAra harimukhyasya prANAMs tejaH zriyaM ca sA
4017006a sa tayA mAlayA vIro haimayA hariyUthapaH
4017006c saMdhyAnugataparyantaH payodhara ivAbhavat
4017007a tasya mAlA ca dehaz ca marmaghAtI ca yaH zaraH
4017007c tridheva racitA lakSmIH patitasyApi zobhate
4017008a tad astraM tasya vIrasya svargamArgaprabhAvanam
4017008c rAmabANAsanakSiptam Avahat paramAM gatim
4017009a taM tathA patitaM saMkhye gatArciSam ivAnalam
4017009c yayAtim iva puNyAnte devalokAt paricyutam
4017010a Adityam iva kAlena yugAnte bhuvi pAtitam
4017010c mahendram iva durdharSaM mahendram iva duHsaham
4017011a mahendraputraM patitaM vAlinaM hemamAlinam
4017011c siMhoraskaM mahAbAhuM dIptAsyaM harilocanam
4017011e lakSmaNAnugato rAmo dadarzopasasarpa ca
4017012a sa dRSTvA rAghavaM vAlI lakSmaNaM ca mahAbalam
4017012c abravIt prazritaM vAkyaM paruSaM dharmasaMhitam
4017013a parAGmukhavadhaM kRtvA ko nu prAptas tvayA guNaH
4017013c yad ahaM yuddhasaMrabdhas tvatkRte nidhanaM gataH
4017014a kulInaH sattvasaMpannas tejasvI caritavrataH
4017014c rAmaH karuNavedI ca prajAnAM ca hite rataH
4017015a sAnukrozo mahotsAhaH samayajJo dRDhavrataH
4017015c iti te sarvabhUtAni kathayanti yazo bhuvi
4017016a tAn guNAn saMpradhAryAham agryaM cAbhijanaM tava
4017016c tArayA pratiSiddhaH san sugrIveNa samAgataH
4017017a na mAm anyena saMrabdhaM pramattaM veddhum arhasi
4017017c iti me buddhir utpannA babhUvAdarzane tava
4017018a na tvAM vinihatAtmAnaM dharmadhvajam adhArmikam
4017018c jAne pApasamAcAraM tRNaiH kUpam ivAvRtam
4017019a satAM veSadharaM pApaM pracchannam iva pAvakam
4017019c nAhaM tvAm abhijAnAni dharmacchadmAbhisaMvRtam
4017020a viSaye vA pure vA te yadA nApakaromy aham
4017020c na ca tvAM pratijAne 'haM kasmAt tvaM haMsy akilbiSam
4017021a phalamUlAzanaM nityaM vAnaraM vanagocaram
4017021c mAm ihApratiyudhyantam anyena ca samAgatam
4017022a tvaM narAdhipateH putraH pratItaH priyadarzanaH
4017022c liGgam apy asti te rAjan dRzyate dharmasaMhitam
4017023a kaH kSatriyakule jAtaH zrutavAn naSTasaMzayaH
4017023c dharmaliGga praticchannaH krUraM karma samAcaret
4017024a rAma rAjakule jAto dharmavAn iti vizrutaH
4017024c abhavyo bhavyarUpeNa kimarthaM paridhAvasi
4017025a sAma dAnaM kSamA dharmaH satyaM dhRtiparAkramau
4017025c pArthivAnAM guNA rAjan daNDaz cApy apakAriSu
4017026a vayaM vanacarA rAma mRgA mUlaphalAzanAH
4017026c eSA prakRtir asmAkaM puruSas tvaM narezvaraH
4017027a bhUmir hiraNyaM rUpyaM ca nigrahe kAraNAni ca
4017027c tatra kas te vane lobho madIyeSu phaleSu vA
4017028a nayaz ca vinayaz cobhau nigrahAnugrahAv api
4017028c rAjavRttir asaMkIrNA na nRpAH kAmavRttayaH
4017029a tvaM tu kAmapradhAnaz ca kopanaz cAnavasthitaH
4017029c rAjavRttaiz ca saMkIrNaH zarAsanaparAyaNaH
4017030a na te 'sty apacitir dharme nArthe buddhir avasthitA
4017030c indriyaiH kAmavRttaH san kRSyase manujezvara
4017031a hatvA bANena kAkutstha mAm ihAnaparAdhinam
4017031c kiM vakSyasi satAM madhye karma kRtvA jugupsitam
4017032a rAjahA brahmahA goghnaz coraH prANivadhe rataH
4017032c nAstikaH parivettA ca sarve nirayagAminaH
4017033a adhAryaM carma me sadbhI romANy asthi ca varjitam
4017033c abhakSyANi ca mAMsAni tvadvidhair dharmacAribhiH
4017034a paJca paJcanakhA bhakSyA brahmakSatreNa rAghava
4017034c zalyakaH zvAvidho godhA zazaH kUrmaz ca paJcamaH
4017035a carma cAsthi ca me rAjan na spRzanti manISiNaH
4017035c abhakSyANi ca mAMsAni so 'haM paJcanakho hataH
4017036a tvayA nAthena kAkutstha na sanAthA vasuMdharA
4017036c pramadA zIlasaMpannA dhUrtena patitA yathA
4017037a zaTho naikRtikaH kSudro mithyA prazritamAnasaH
4017037c kathaM dazarathena tvaM jAtaH pApo mahAtmanA
4017038a chinnacAritryakakSyeNa satAM dharmAtivartinA
4017038c tyaktadharmAGkuzenAhaM nihato rAmahastinA
4017039a dRzyamAnas tu yudhyethA mayA yudhi nRpAtmaja
4017039c adya vaivasvataM devaM pazyes tvaM nihato mayA
4017040a tvayAdRzyena tu raNe nihato 'haM durAsadaH
4017040c prasuptaH pannageneva naraH pAnavazaM gataH
4017041a sugrIvapriyakAmena yad ahaM nihatas tvayA
4017041c kaNThe baddhvA pradadyAM te 'nihataM rAvaNaM raNe
4017042a nyastAM sAgaratoye vA pAtAle vApi maithilIm
4017042c jAnayeyaM tavAdezAc chvetAm azvatarIm iva
4017043a yuktaM yat prapnuyAd rAjyaM sugrIvaH svargate mayi
4017043c ayuktaM yad adharmeNa tvayAhaM nihato raNe
4017044a kAmam evaMvidhaM lokaH kAlena viniyujyate
4017044c kSamaM ced bhavatA prAptam uttaraM sAdhu cintyatAm
4017045a ity evam uktvA parizuSkavaktraH; zarAbhighAtAd vyathito mahAtmA
4017045c samIkSya rAmaM ravisaMnikAzaM; tUSNIM babhUvAmararAjasUnuH
4018001a ity uktaH prazritaM vAkyaM dharmArthasahitaM hitam
4018001c paruSaM vAlinA rAmo nihatena vicetasA
4018002a taM niSprabham ivAdityaM muktatoyam ivAmbudam
4018002c uktavAkyaM harizreSTham upazAntam ivAnalam
4018003a dharmArthaguNasaMpannaM harIzvaram anuttamam
4018003c adhikSiptas tadA rAmaH pazcAd vAlinam abravIt
4018004a dharmam arthaM ca kAmaM ca samayaM cApi laukikam
4018004c avijJAya kathaM bAlyAn mAm ihAdya vigarhase
4018005a apRSTvA buddhisaMpannAn vRddhAn AcAryasaMmatAn
4018005c saumya vAnaracApalyAt tvaM mAM vaktum ihecchasi
4018006a ikSvAkUNAm iyaM bhUmiH sazailavanakAnanA
4018006c mRgapakSimanuSyANAM nigrahAnugrahAv api
4018007a tAM pAlayati dharmAtmA bharataH satyavAg RjuH
4018007c dharmakAmArthatattvajJo nigrahAnugrahe rataH
4018008a nayaz ca vinayaz cobhau yasmin satyaM ca susthitam
4018008c vikramaz ca yathA dRSTaH sa rAjA dezakAlavit
4018009a tasya dharmakRtAdezA vayam anye ca pArthivaH
4018009c carAmo vasudhAM kRtsnAM dharmasaMtAnam icchavaH
4018010a tasmin nRpatizArdUla bharate dharmavatsale
4018010c pAlayaty akhilAM bhUmiM kaz cared dharmanigraham
4018011a te vayaM mArgavibhraSTaM svadharme parame sthitAH
4018011c bharatAjJAM puraskRtya nigRhNImo yathAvidhi
4018012a tvaM tu saMkliSTadharmA ca karmaNA ca vigarhitaH
4018012c kAmatantrapradhAnaz ca na sthito rAjavartmani
4018013a jyeSTho bhrAtA pitA caiva yaz ca vidyAM prayacchati
4018013c trayas te pitaro jJeyA dharme ca pathi vartinaH
4018014a yavIyAn AtmanaH putraH ziSyaz cApi guNoditaH
4018014c putravat te trayaz cintyA dharmaz ced atra kAraNam
4018015a sUkSmaH paramadurjJeyaH satAM dharmaH plavaMgama
4018015c hRdisthaH sarvabhUtAnAm AtmA veda zubhAzubham
4018016a capalaz capalaiH sArdhaM vAnarair akRtAtmabhiH
4018016c jAtyandha iva jAtyandhair mantrayan drakSyase nu kim
4018017a ahaM tu vyaktatAm asya vacanasya bravImi te
4018017c na hi mAM kevalaM roSAt tvaM vigarhitum arhasi
4018018a tad etat kAraNaM pazya yadarthaM tvaM mayA hataH
4018018c bhrAtur vartasi bhAryAyAM tyaktvA dharmaM sanAtanam
4018019a asya tvaM dharamANasya sugrIvasya mahAtmanaH
4018019c rumAyAM vartase kAmAt snuSAyAM pApakarmakRt
4018020a tad vyatItasya te dharmAt kAmavRttasya vAnara
4018020c bhrAtRbhAryAbhimarze 'smin daNDo 'yaM pratipAditaH
4018021a na hi dharmaviruddhasya lokavRttAd apeyuSaH
4018021c daNDAd anyatra pazyAmi nigrahaM hariyUthapa
4018022a aurasIM bhaginIM vApi bhAryAM vApy anujasya yaH
4018022c pracareta naraH kAmAt tasya daNDo vadhaH smRtaH
4018023a bharatas tu mahIpAlo vayaM tv AdezavartinaH
4018023c tvaM ca dharmAd atikrAntaH kathaM zakyam upekSitum
4018024a gurudharmavyatikrAntaM prAjJo dharmeNa pAlayan
4018024c bharataH kAmavRttAnAM nigrahe paryavasthitaH
4018025a vayaM tu bharatAdezaM vidhiM kRtvA harIzvara
4018025c tvadvidhAn bhinnamaryAdAn niyantuM paryavasthitAH
4018026a sugrIveNa ca me sakhyaM lakSmaNena yathA tathA
4018026c dArarAjyanimittaM ca niHzreyasi rataH sa me
4018027a pratijJA ca mayA dattA tadA vAnarasaMnidhau
4018027c pratijJA ca kathaM zakyA madvidhenAnavekSitum
4018028a tad ebhiH kAraNaiH sarvair mahadbhir dharmasaMhitaiH
4018028c zAsanaM tava yad yuktaM tad bhavAn anumanyatAm
4018029a sarvathA dharma ity eva draSTavyas tava nigrahaH
4018029c vayasyasyopakartavyaM dharmam evAnupazyatA
4018030a rAjabhir dhRtadaNDAs tu kRtvA pApAni mAnavAH
4018030c nirmalAH svargam AyAnti santaH sukRtino yathA
4018031a AryeNa mama mAndhAtrA vyasanaM ghoram Ipsitam
4018031c zramaNena kRte pApe yathA pApaM kRtaM tvayA
4018032a anyair api kRtaM pApaM pramattair vasudhAdhipaiH
4018032c prAyazcittaM ca kurvanti tena tac chAmyate rajaH
4018033a tad alaM paritApena dharmataH parikalpitaH
4018033c vadho vAnarazArdUla na vayaM svavaze sthitAH
4018034a vAgurAbhiz ca pAzaiz ca kUTaiz ca vividhair narAH
4018034c praticchannAz ca dRzyAz ca gRhNanti subahUn mRgAn
4018034e pradhAvitAn vA vitrastAn visrabdhAn ativiSThitAn
4018035a pramattAn apramattAn vA narA mAMsArthino bhRzam
4018035c vidhyanti vimukhAMz cApi na ca doSo 'tra vidyate
4018036a yAnti rAjarSayaz cAtra mRgayAM dharmakovidAH
4018036c tasmAt tvaM nihato yuddhe mayA bANena vAnara
4018036e ayudhyan pratiyudhyan vA yasmAc chAkhAmRgo hy asi
4018037a durlabhasya ca dharmasya jIvitasya zubhasya ca
4018037c rAjAno vAnarazreSTha pradAtAro na saMzayaH
4018038a tAn na hiMsyAn na cAkrozen nAkSipen nApriyaM vadet
4018038c devA mAnuSarUpeNa caranty ete mahItale
4018039a tvaM tu dharmam avijJAya kevalaM roSam AsthitaH
4018039c pradUSayasi mAM dharme pitRpaitAmahe sthitam
4018040a evam uktas tu rAmeNa vAlI pravyathito bhRzam
4018040c pratyuvAca tato rAmaM prAJjalir vAnarezvaraH
4018041a yat tvam Attha narazreSTha tad evaM nAtra saMzayaH
4018041c prativaktuM prakRSTe hi nApakRSTas tu zaknuyAt
4018042a yad ayuktaM mayA pUrvaM pramAdAd vAkyam apriyam
4018042c tatrApi khalu me doSaM kartuM nArhasi rAghava
4018043a tvaM hi dRSTArthatattvajJaH prajAnAM ca hite rataH
4018043c kAryakAraNasiddhau te prasannA buddhir avyayA
4018044a mAm apy avagataM dharmAd vyatikrAntapuraskRtam
4018044c dharmasaMhitayA vAcA dharmajJa paripAlaya
4018045a bASpasaMruddhakaNThas tu vAlI sArtaravaH zanaiH
4018045c uvAca rAmaM saMprekSya paGkalagna iva dvipaH
4018046a na tv AtmAnam ahaM zoce na tArAM nApi bAndhavAn
4018046c yathA putraM guNazreSTham aGgadaM kanakAGgadam
4018047a sa mamAdarzanAd dIno bAlyAt prabhRti lAlitaH
4018047c taTAka iva pItAmbur upazoSaM gamiSyati
4018048a sugrIve cAGgade caiva vidhatsva matim uttamAm
4018048c tvaM hi zAstA ca goptA ca kAryAkAryavidhau sthitaH
4018049a yA te narapate vRttir bharate lakSmaNe ca yA
4018049c sugrIve cAGgade rAjaMs tAM cintayitum arhasi
4018050a maddoSakRtadoSAM tAM yathA tArAM tapasvinIm
4018050c sugrIvo nAvamanyeta tathAvasthAtum arhasi
4018051a tvayA hy anugRhItena zakyaM rAjyam upAsitum
4018051c tvadvaze vartamAnena tava cittAnuvartinA
4018052a sa tam AzvAsayad rAmo vAlinaM vyaktadarzanam
4018053a na vayaM bhavatA cintyA nApy AtmA harisattama
4018053c vayaM bhavadvizeSeNa dharmataH kRtanizcayAH
4018054a daNDye yaH pAtayed daNDaM daNDyo yaz cApi daNDyate
4018054c kAryakAraNasiddhArthAv ubhau tau nAvasIdataH
4018055a tad bhavAn daNDasaMyogAd asmAd vigatakalmaSaH
4018055c gataH svAM prakRtiM dharmyAM dharmadRSTtena vartmanA
4018056a sa tasya vAkyaM madhuraM mahAtmanaH; samAhitaM dharmapathAnuvartinaH
4018056c nizamya rAmasya raNAvamardino; vacaH suyuktaM nijagAda vAnaraH
4018057a zarAbhitaptena vicetasA mayA; pradUSitas tvaM yad ajAnatA prabho
4018057c idaM mahendropamabhImavikrama; prasAditas tvaM kSama me mahIzvara
4019001a sa vAnaramahArAjaH zayAnaH zaravikSataH
4019001c pratyukto hetumadvAkyair nottaraM pratyapadyata
4019002a azmabhiH paribhinnAGgaH pAdapair Ahato bhRzam
4019002c rAmabANena cAkrAnto jIvitAnte mumoha saH
4019003a taM bhAryAbANamokSeNa rAmadattena saMyuge
4019003c hataM plavagazArdUlaM tArA zuzrAva vAlinam
4019004a sA saputrApriyaM zrutvA vadhaM bhartuH sudAruNam
4019004c niSpapAta bhRzaM trastA vividhAd girigahvarAt
4019005a ye tv aGgadaparIvArA vAnarA hi mahAbalAH
4019005c te sakArmukam Alokya rAmaM trastAH pradudruvuH
4019006a sA dadarza tatas trastAn harIn Apatato drutam
4019006c yUthAd iva paribhraSTAn mRgAn nihatayUthapAn
4019007a tAn uvAca samAsAdya duHkhitAn duHkhitA satI
4019007c rAma vitrAsitAn sarvAn anubaddhAn iveSubhiH
4019008a vAnarA rAjasiMhasya yasya yUyaM puraHsarAH
4019008c taM vihAya suvitrastAH kasmAd dravata durgatAH
4019009a rAjyahetoH sa ced bhrAtA bhrAtA raudreNa pAtitaH
4019009c rAmeNa prasRtair dUrAn mArgaNair dUra pAtibhiH
4019010a kapipatnyA vacaH zrutvA kapayaH kAmarUpiNaH
4019010c prAptakAlam avizliSTam Ucur vacanam aGganAm
4019011a jIva putre nivartasya putraM rakSasva cAndagam
4019011c antako rAma rUpeNa hatvA nayati vAlinam
4019012a kSiptAn vRkSAn samAvidhya vipulAz ca zilAs tathA
4019012c vAlI vajrasamair bANair vajreNeva nipAtitaH
4019013a abhidrutam idaM sarvaM vidrutaM prasRtaM balam
4019013c asmin plavagazArdUle hate zakrasamaprabhe
4019014a rakSyatAM nagaraM zUrair aGgadaz cAbhiSicyatAm
4019014c padasthaM vAlinaH putraM bhajiSyanti plavaMgamAH
4019015a atha vA ruciraM sthAnam iha te rucirAnane
4019015c Avizanti hi durgANi kSipram adyaiva vAnarAH
4019016a abhAryAH saha bhAryAz ca santy atra vanacAriNaH
4019016c lubdhebhyo viprayuktebhyaH svebhyo nas tumulaM bhayam
4019017a alpAntaragatAnAM tu zrutvA vacanam aGganA
4019017c AtmanaH pratirUpaM sA babhASe cAruhAsinI
4019018a putreNa mama kiM kAryaM kiM rAjyena kim AtmanA
4019018c kapisiMhe mahAbhAge tasmin bhartari nazyati
4019019a pAdamUlaM gamiSyAmi tasyaivAhaM mahAtmanaH
4019019c yo 'sau rAmaprayuktena zareNa vinipAtitaH
4019020a evam uktvA pradudrAva rudatI zokakarzitA
4019020c ziraz coraz ca bAhubhyAM duHkhena samabhighnatI
4019021a AvrajantI dadarzAtha patiM nipatitaM bhuvi
4019021c hantAraM dAnavendrANAM samareSv anivartinAm
4019022a kSeptAraM parvatendrANAM vajrANAm iva vAsavam
4019022c mahAvAtasamAviSTaM mahAmeghaughaniHsvanam
4019023a zakratulyaparAkrAntaM vRSTvevoparataM ghanam
4019023c nardantaM nardatAM bhImaM zUraM zUreNa pAtitam
4019024a zArdUlenAmiSasyArthe mRgarAjaM yathA hatam
4019024c arcitaM sarvalokasya sapatAkaM savedikam
4019025a nAgahetoH suparNena caityam unmathitaM yathA
4019025c avaSTabhyAvatiSThantaM dadarza dhanur Urjitam
4019026a rAmaM rAmAnujaM caiva bhartuz caivAnujaM zubhA
4019026c tAn atItya samAsAdya bhartAraM nihataM raNe
4019027a samIkSya vyathitA bhUmau saMbhrAntA nipapAta ha
4019027c supteva punar utthAya Aryaputreti krozatI
4019028a ruroda sA patiM dRSTvA saMditaM mRtyudAmabhiH
4019028c tAm avekSya tu sugrIvaH krozantIM kurarIm iva
4019029a viSAdam agamat kaSTaM dRSTvA cAGgadam Agatam
4020001a rAmacApavisRSTena zareNAntakareNa tam
4020001c dRSTvA vinihataM bhUmau tArA tArAdhipAnanA
4020002a sA samAsAdya bhartAraM paryaSvajata bhAminI
4020002c iSuNAbhihataM dRSTvA vAlinaM kuJjaropamam
4020003a vAnarendraM mahendrAbhaM zokasaMtaptamAnasA
4020003c tArA tarum ivonmUlaM paryadevayad AturA
4020004a raNe dAruNavikrAnta pravIra plavatAM vara
4020004c kiM dInAm apurobhAgAm adya tvaM nAbhibhASase
4020005a uttiSTha harizArdUla bhajasva zayanottamam
4020005c naivaMvidhAH zerate hi bhUmau nRpatisattamAH
4020006a atIva khalu te kAntA vasudhA vasudhAdhipa
4020006c gatAsur api yAM gAtrair mAM vihAya niSevase
4020007a vyaktam anyA tvayA vIra dharmataH saMpravartatA
4020007c kiSkindheva purI ramyA svargamArge vinirmitA
4020008a yAny asmAbhis tvayA sArdhaM vaneSu madhugandhiSu
4020008c vihRtAni tvayA kAle teSAm uparamaH kRtaH
4020009a nirAnandA nirAzAhaM nimagnA zokasAgare
4020009c tvayi paJcatvam Apanne mahAyUthapayUthape
4020010a hRdayaM susthiraM mahyaM dRSTvA vinihataM bhuvi
4020010c yan na zokAbhisaMtaptaM sphuTate 'dya sahasradhA
4020011a sugrIvasya tvayA bhAryA hRtA sa ca vivAsitaH
4020011c yat tat tasya tvayA vyuSTiH prApteyaM plavagAdhipa
4020012a niHzreyasaparA mohAt tvayA cAhaM vigarhitA
4020012c yaiSAbruvaM hitaM vAkyaM vAnarendrahitaiSiNI
4020013a kAlo niHsaMzayo nUnaM jIvitAntakaras tava
4020013c balAd yenAvapanno 'si sugrIvasyAvazo vazam
4020014a vaidhavyaM zokasaMtApaM kRpaNaM kRpaNA satI
4020014c aduHkhopacitA pUrvaM vartayiSyAmy anAthavat
4020015a lAlitaz cAGgado vIraH sukumAraH sukhocitaH
4020015c vatsyate kAm avasthAM me pitRvye krodhamUrchite
4020016a kuruSva pitaraM putra sudRSTaM dharmavatsalam
4020016c durlabhaM darzanaM tv asya tava vatsa bhaviSyati
4020017a samAzvAsaya putraM tvaM saMdezaM saMdizasva ca
4020017c mUrdhni cainaM samAghrAya pravAsaM prasthito hy asi
4020018a rAmeNa hi mahat karma kRtaM tvAm abhinighnatA
4020018c AnRNyaM tu gataM tasya sugrIvasya pratizrave
4020019a sakAmo bhava sugrIva rumAM tvaM pratipatsyase
4020019c bhuGkSva rAjyam anudvignaH zasto bhrAtA ripus tava
4020020a kiM mAm evaM vilapatIM preMNA tvaM nAbhibhASase
4020020c imAH pazya varA bahvIr bhAryAs te vAnarezvara
4020021a tasyA vilapitaM zrutvA vAnaryaH sarvataz ca tAH
4020021c parigRhyAGgadaM dInaM duHkhArtAH paricukruzuH
4020022a kim aGgadaM sAGgada vIra bAho; vihAya yAsy adya cirapravAsaM
4020022c na yuktam evaM guNasaMnikRSTaM; vihAya putraM priyaputra gantum
4020023a kim apriyaM te priyacAruveSa; kRtaM mayA nAtha sutena vA te
4020023c sahAyinIm adya vihAya vIra; yamakSayaM gacchasi durvinItam
4020024a yady apriyaM kiM cid asaMpradhArya; kRtaM mayA syAt tava dIrghabAho
4020024c kSamasva me tad dharivaMza nAtha; vrajAmi mUrdhnA tava vIra pAdau
4020025a tathA tu tArA karuNaM rudantI; bhartuH samIpe saha vAnarIbhiH
4020025c vyavasyata prAyam anindyavarNA; upopaveSTuM bhuvi yatra vAlI
4021001a tato nipatitAM tArAM cyutAM tArAm ivAmbarAt
4021001c zanair AzvAsayAm Asa hanUmAn hariyUthapaH
4021002a guNadoSakRtaM jantuH svakarmaphalahetukam
4021002c avyagras tad avApnoti sarvaM pretya zubhAzubham
4021003a zocyA zocasi kaM zocyaM dInaM dInAnukampase
4021003c kaz ca kasyAnuzocyo 'sti dehe 'smin budbudopame
4021004a aGgadas tu kumAro 'yaM draSTavyo jIvaputrayA
4021004c AyatyA ca vidheyAni samarthAny asya cintaya
4021005a jAnAsy aniyatAm evaM bhUtAnAm AgatiM gatim
4021005c tasmAc chubhaM hi kartavyaM paNDite naihalaukikam
4021006a yasmin harisahasrANi prayutAny arbudAni ca
4021006c vartayanti kRtAMzAni so 'yaM diSTAntam AgataH
4021007a yad ayaM nyAyadRSTArthaH sAmadAnakSamAparaH
4021007c gato dharmajitAM bhUmiM nainaM zocitum arhasi
4021008a sarve ca harizArdUla putraz cAyaM tavAGgadaH
4021008c haryRSkapatirAjyaM ca tvatsanAtham anindite
4021009a tAv imau zokasaMtaptau zanaiH preraya bhAmini
4021009c tvayA parigRhIto 'yam aGgadaH zAstu medinIm
4021010a saMtatiz ca yathAdRSTA kRtyaM yac cApi sAmpratam
4021010c rAjJas tat kriyatAM sarvam eSa kAlasya nizcayaH
4021011a saMskAryo harirAjas tu aGgadaz cAbhiSicyatAm
4021011c siMhAsanagataM putraM pazyantI zAntim eSyasi
4021012a sA tasya vacanaM zrutvA bhartRvyasanapIDitA
4021012c abravId uttaraM tArA hanUmantam avasthitam
4021013a aGgada pratirUpANAM putrANAm ekataH zatam
4021013c hatasyApy asya vIrasya gAtrasaMzleSaNaM varam
4021014a na cAhaM harirAjasya prabhavAmy aGgadasya vA
4021014c pitRvyastasya sugrIvaH sarvakAryeSv anantaraH
4021015a na hy eSA buddhir AstheyA hanUmann aGgadaM prati
4021015c pitA hi bandhuH putrasya na mAtA harisattama
4021016a na hi mama harirAjasaMzrayAt; kSamataram asti paratra ceha vA
4021016c abhimukhahatavIrasevitaM; zayanam idaM mama sevituM kSamam
4022001a vIkSamANas tu mandAsuH sarvato mandam ucchvasan
4022001c AdAv eva tu sugrIvaM dadarza tv AtmajAgrataH
4022002a taM prAptavijayaM vAlI sugrIvaM plavagezvaram
4022002c AbhASya vyaktayA vAcA sasneham idam abravIt
4022003a sugrIvadoSeNa na mAM gantum arhasi kilbiSAt
4022003c kRSyamANaM bhaviSyeNa buddhimohena mAM balAt
4022004a yugapadvihitaM tAta na manye sukham AvayoH
4022004c sauhArdaM bhrAtRyuktaM hi tad idaM jAtam anyathA
4022005a pratipadya tvam adyaiva rAjyam eSAM vanaukasAm
4022005c mAm apy adyaiva gacchantaM viddhi vaivasvatakSayam
4022006a jIvitaM ca hi rAjyaM ca zriyaM ca vipulAm imAm
4022006c prajahAmy eSa vai tUrNaM mahac cAgarhitaM yazaH
4022007a asyAM tv aham avasthAyAM vIra vakSyAmi yad vacaH
4022007c yady apy asukaraM rAjan kartum eva tad arhasi
4022008a sukhArhaM sukhasaMvRddhaM bAlam enam abAlizam
4022008c bASpapUrNamukhaM pazya bhUmau patitam aGgadam
4022009a mama prANaiH priyataraM putraM putram ivaurasaM
4022009c mayA hInam ahInArthaM sarvataH paripAlaya
4022010a tvam apy asya hi dAtA ca paritrAtA ca sarvataH
4022010c bhayeSv abhayadaz caiva yathAhaM plavagezvara
4022011a eSa tArAtmajaH zrImAMs tvayA tulyaparAkramaH
4022011c rakSasAM tu vadhe teSAm agratas te bhaviSyati
4022012a anurUpANi karmANi vikramya balavAn raNe
4022012c kariSyaty eSa tAreyas tarasvI taruNo 'GgadaH
4022013a suSeNaduhitA ceyam arthasUkSmavinizcaye
4022013c autpAtike ca vividhe sarvataH pariniSThitA
4022014a yad eSA sAdhv iti brUyAt kAryaM tan muktasaMzayam
4022014c na hi tArAmataM kiM cid anyathA parivartate
4022015a rAghavasya ca te kAryaM kartavyam avizaGkayA
4022015c syAd adharmo hy akaraNe tvAM ca hiMsyAd vimAnitaH
4022016a imAM ca mAlAm Adhatsva divyAM sugrIvakAJcanIm
4022016c udArA zrIH sthitA hy asyAM saMprajahyAn mRte mayi
4022017a ity evam uktaH sugrIvo vAlinA bhrAtRsauhRdAt
4022017c harSaM tyaktvA punar dIno grahagrasta ivoDurAT
4022018a tad vAlivacanAc chAntaH kurvan yuktam atandritaH
4022018c jagrAha so 'bhyanujJAto mAlAM tAM caiva kAJcanIm
4022019a tAM mAlAM kAJcanIM dattvA vAlI dRSTvAtmajaM sthitam
4022019c saMsiddhaH pretya bhAvAya snehAd aGgadam abravIt
4022020a dezakAlau bhajasvAdya kSamamANaH priyApriye
4022020c sukhaduHkhasahaH kAle sugrIvavazago bhava
4022021a yathA hi tvaM mahAbAho lAlitaH satataM mayA
4022021c na tathA vartamAnaM tvAM sugrIvo bahu maMsyate
4022022a mAsyAmitrair gataM gaccher mA zatrubhir ariMdama
4022022c bhartur arthaparo dAntaH sugrIvavazago bhava
4022023a na cAtipraNayaH kAryaH kartavyo 'praNayaz ca te
4022023c ubhayaM hi mahAdoSaM tasmAd antaradRg bhava
4022024a ity uktvAtha vivRttAkSaH zarasaMpIDito bhRzam
4022024c vivRtair dazanair bhImair babhUvotkrAntajIvitaH
4022025a hate tu vIre plavagAdhipe tadA; plavaMgamAs tatra na zarma lebhire
4022025c vanecarAH siMhayute mahAvane; yathA hi gAvo nihate gavAM patau
4022026a tatas tu tArA vyasanArNava plutA; mRtasyA bhartur vadanaM samIkSya sA
4022026c jagAma bhUmiM parirabhya vAlinaM; mahAdrumaM chinnam ivAzritA latA
4023001a tataH samupajighrantI kapirAjasya tanmukham
4023001c patiM lokAc cyutaM tArA mRtaM vacanam abravIt
4023002a zeSe tvaM viSame duHkham akRtvA vacanaM mama
4023002c upalopacite vIra suduHkhe vasudhAtale
4023003a mattaH priyatarA nUnaM vAnarendra mahI tava
4023003c zeSe hi tAM pariSvajya mAM ca na pratibhASase
4023004a sugrIva eva vikrAnto vIra sAhasika priya
4023004c RkSavAnaramukhyAs tvAM balinaM paryupAsate
4023005a eSAM vilapitaM kRcchram aGgadasya ca zocataH
4023005c mama cemAM giraM zrutvA kiM tvaM na pratibudhyase
4023006a idaM tac chUrazayanaM yatra zeSe hato yudhi
4023006c zAyitA nihatA yatra tvayaiva ripavaH purA
4023007a vizuddhasattvAbhijana priyayuddha mama priya
4023007c mAm anAthAM vihAyaikAM gatas tvam asi mAnada
4023008a zUrAya na pradAtavyA kanyA khalu vipazcitA
4023008c zUrabhAryAM hatAM pazya sadyo mAM vidhavAM kRtAm
4023009a avabhagnaz ca me mAno bhagnA me zAzvatI gatiH
4023009c agAdhe ca nimagnAsmi vipule zokasAgare
4023010a azmasAramayaM nUnam idaM me hRdayaM dRDham
4023010c bhartAraM nihataM dRSTvA yan nAdya zatadhA gatam
4023011a suhRc caiva hi bhartA ca prakRtyA ca mama priyaH
4023011c Ahave ca parAkrAntaH zUraH paJcatvam AgataH
4023012a patihInA tu yA nArI kAmaM bhavatu putriNI
4023012c dhanadhAnyaiH supUrNApi vidhavety ucyate budhaiH
4023013a svagAtraprabhave vIra zeSe rudhiramaNDale
4023013c kRmirAgaparistome tvam evaM zayane yathA
4023014a reNuzoNitasaMvItaM gAtraM tava samantataH
4023014c parirabdhuM na zaknomi bhujAbhyAM plavagarSabha
4023015a kRtakRtyo 'dya sugrIvo vaire 'sminn atidAruNe
4023015c yasya rAmavimuktena hRtam ekeSuNA bhayam
4023016a zareNa hRdi lagnena gAtrasaMsparzane tava
4023016c vAryAmi tvAM nirIkSantI tvayi paJcatvam Agate
4023017a udbabarha zaraM nIlas tasya gAtragataM tadA
4023017c girigahvarasaMlInaM dIptam AzIviSaM yathA
4023018a tasya niSkRSyamANasya bANasya ca babhau dyutiH
4023018c astamastakasaMruddho razmir dinakarAd iva
4023019a petuH kSatajadhArAs tu vraNebhyas tasya sarvazaH
4023019c tAmragairikasaMpRktA dhArA iva dharAdharAt
4023020a avakIrNaM vimArjantI bhartAraM raNareNunA
4023020c asrair nayanajaiH zUraM siSecAstrasamAhatam
4023021a rudhirokSitasarvAGgaM dRSTvA vinihataM patim
4023021c uvAca tArA piGgAkSaM putram aGgadam aGganA
4023022a avasthAM pazcimAM pazya pituH putra sudAruNAm
4023022c saMprasaktasya vairasya gato 'ntaH pApakarmaNA
4023023a bAlasUryodayatanuM prayAntaM yamasAdanam
4023023c abhivAdaya rAjAnaM pitaraM putra mAnadam
4023024a evam uktaH samutthAya jagrAha caraNau pituH
4023024c bhujAbhyAM pInavRtAbhyAm aGgado 'ham iti bruvan
4023025a abhivAdayamAnaM tvAm aGgadaM tvaM yathApurA
4023025c dIrghAyur bhava putreti kimarthaM nAbhibhASase
4023026a ahaM putrasahAyA tvAm upAse gatacetanam
4023026c siMhena nihataM sadyo gauH savatseva govRSam
4023027a iSTvA saMgrAmayajJena nAnApraharaNAmbhasA
4023027c asminn avabhRthe snAtaH kathaM patnyA mayA vinA
4023028a yA dattA devarAjena tava tuSTena saMyuge
4023028c zAtakumbhamayIM mAlAM tAM te pazyAmi neha kim
4023029a rAjazrIr na jahAti tvAM gatAsum api mAnada
4023029c sUryasyAvartamAnasya zailarAjam iva prabhA
4023030a na me vacaH pathyam idaM tvayA kRtaM; na cAsmi zaktA hi nivAraNe tava
4023030c hatA saputrAsmi hatena saMyuge; saha tvayA zrIr vijahAti mAm iha
4024001a gatAsuM vAlinaM dRSTvA rAghavas tadanantaram
4024001c abravIt prazritaM vAkyaM sugrIvaM zatrutApanaH
4024002a na zokaparitApena zreyasA yujyate mRtaH
4024002c yad atrAnantaraM kAryaM tat samAdhAtum arhatha
4024003a lokavRttam anuSTheyaM kRtaM vo bASpamokSaNam
4024003c na kAlAd uttaraM kiM cit karma zakyam upAsitum
4024004a niyataH kAraNaM loke niyatiH karmasAdhanam
4024004c niyatiH sarvabhUtAnAM niyogeSv iha kAraNam
4024005a na kartA kasya cit kaz cin niyoge cApi nezvaraH
4024005c svabhAve vartate lokas tasya kAlaH parAyaNam
4024006a na kAlaH kAlam atyeti na kAlaH parihIyate
4024006c svabhAvaM vA samAsAdya na kaz cid ativartate
4024007a na kAlasyAsti bandhutvaM na hetur na parAkramaH
4024007c na mitrajJAtisaMbandhaH kAraNaM nAtmano vazaH
4024008a kiM tu kAla parINAmo draSTavyaH sAdhu pazyatA
4024008c dharmaz cArthaz ca kAmaz ca kAlakramasamAhitAH
4024009a itaH svAM prakRtiM vAlI gataH prAptaH kriyAphalam
4024009c dharmArthakAmasaMyogaiH pavitraM plavagezvara
4024010a svadharmasya ca saMyogAj jitas tena mahAtmanA
4024010c svargaH parigRhItaz ca prANAn aparirakSatA
4024011a eSA vai niyatiH zreSThA yAM gato hariyUthapaH
4024011c tad alaM paritApena prAptakAlam upAsyatAm
4024012a vacanAnte tu rAmasya lakSmaNaH paravIrahA
4024012c avadat prazritaM vAkyaM sugrIvaM gatacetasaM
4024013a kuru tvam asya sugrIva pretakAryam anantaram
4024013c tArAGgadAbhyAM sahito vAlino dahanaM prati
4024014a samAjJApaya kASThAni zuSkANi ca bahUni ca
4024014c candanAni ca divyAni vAlisaMskArakAraNAt
4024015a samAzvAsaya cainaM tvam aGgadaM dInacetasaM
4024015c mA bhUr bAlizabuddhis tvaM tvadadhInam idaM puram
4024016a aGgadas tv Anayen mAlyaM vastrANi vividhAni ca
4024016c ghRtaM tailam atho gandhAn yac cAtra samanantaram
4024017a tvaM tAra zibikAM zIghram AdAyAgaccha saMbhramAt
4024017c tvarA guNavatI yuktA hy asmin kAle vizeSataH
4024018a sajjIbhavantu plavagAH zibikAvAhanocitAH
4024018c samarthA balinaz caiva nirhariSyanti vAlinam
4024019a evam uktvA tu sugrIvaM sumitrAnandavardhanaH
4024019c tasthau bhrAtRsamIpastho lakSmaNaH paravIrahA
4024020a lakSmaNasya vacaH zrutvA tAraH saMbhrAntamAnasaH
4024020c praviveza guhAM zIghraM zibikAsaktamAnasaH
4024021a AdAya zibikAM tAraH sa tu paryApayat punaH
4024021c vAnarair uhyamAnAM tAM zUrair udvahanocitaiH
4024022a tato vAlinam udyamya sugrIvaH zibikAM tadA
4024022c Aropayata vikrozann aGgadena sahaiva tu
4024023a Aropya zibikAM caiva vAlinaM gatajIvitam
4024023c alaMkAraiz ca vividhair mAlyair vastraiz ca bhUSitam
4024024a AjJApayat tadA rAjA sugrIvaH plavagezvaraH
4024024c aurdhvadehikam Aryasya kriyatAm anurUpataH
4024025a vizrANayanto ratnAni vividhAni bahUni ca
4024025c agrataH plavagA yAntu zibikA tadanantaram
4024026a rAjJAm RddhivizeSA hi dRzyante bhuvi yAdRzAH
4024026c tAdRzaM vAlinaH kSipraM prAkurvann aurdhvadehikam
4024027a aGgadam aprigRhyAzu tAraprabhRtayas tathA
4024027c krozantaH prayayuH sarve vAnarA hatabAndhavAH
4024028a tArAprabhRtayaH sarvA vAnaryo hatayUthapAH
4024028c anujagmur hi bhartAraM krozantyaH karuNasvanAH
4024029a tAsAM ruditazabdena vAnarINAM vanAntare
4024029c vanAni girayaH sarve vikrozantIva sarvataH
4024030a puline girinadyAs tu vivikte jalasaMvRte
4024030c citAM cakruH subahavo vAnarA vanacAriNaH
4024031a avaropya tataH skandhAc chibikAM vahanocitAH
4024031c tasthur ekAntam Azritya sarve zokasamanvitAH
4024032a tatas tArA patiM dRSTvA zibikAtalazAyinam
4024032c AropyAGke ziras tasya vilalApa suduHkhitA
4024033a janaM ca pazyasImaM tvaM kasmAc chokAbhipIDitam
4024033c prahRSTam iva te vaktraM gatAsor api mAnada
4024033e astArkasamavarNaM ca lakSyate jIvato yathA
4024034a eSa tvAM rAmarUpeNa kAlaH karSati vAnara
4024034c yena sma vidhavAH sarvAH kRtA ekeSuNA raNe
4024035a imAs tAs tava rAjendravAnaryo vallabhAH sadA
4024035c pAdair vikRSTam adhvAnam AgatAH kiM na budhyase
4024036a taveSTA nanu nAmaitA bhAryAz candranibhAnanAH
4024036c idAnIM nekSase kasmAt sugrIvaM plavagezvaram
4024037a ete hi sacivA rAjaMs tAraprabhRtayas tava
4024037c puravAsijanaz cAyaM parivAryAsate 'nagha
4024038a visarjayainAn pravalAn yathocitam ariMdama
4024038c tataH krIDAmahe sarvA vaneSu madirotkaTAH
4024039a evaM vilapatIM tArAM patizokapariplutAm
4024039c utthApayanti sma tadA vAnaryaH zokakarzitAH
4024040a sugrIveNa tataH sArdham aGgadaH pitaraM rudan
4024040c citAm AropayAm Asa zokenAbhihatendriyaH
4024041a tato 'gniM vidhivad dattvA so 'pasavyaM cakAra ha
4024041c pitaraM dIrgham adhvAnaM prasthitaM vyAkulendriyaH
4024042a saMskRtya vAlinaM te tu vidhipUrvaM plavaMgamAH
4024042c Ajagmur udakaM kartuM nadIM zItajalAM zubhAm
4024043a tatas te sahitAs tatra aGgadaM sthApya cAgrataH
4024043c sugrIvatArAsahitAH siSicur vAline jalam
4024044a sugrIveNaiva dInena dIno bhUtvA mahAbalaH
4024044c samAnazokaH kAkutsthaH pretakAryANy akArayat
4025001a tataH zokAbhisaMtaptaM sugrIvaM klinnavAsanam
4025001c zAkhAmRgamahAmAtrAH parivAryopatasthire
4025002a abhigamya mahAbAhuM rAmam akliSTakAriNam
4025002c sthitAH prAJjalayaH sarve pitAmaham ivarSayaH
4025003a tataH kAJcanazailAbhas taruNArkanibhAnanaH
4025003c abravIt prAJjalir vAkyaM hanumAn mArutAtmajaH
4025004a bhavatprasAdAt sugrIvaH pitRpaitAmahaM mahat
4025004c vAnarANAM suduSprApaM prApto rAjyam idaM prabho
4025005a bhavatA samanujJAtaH pravizya nagaraM zubham
4025005c saMvidhAsyati kAryANi sarvANi sasuhRjjanaH
4025006a snAto 'yaM vividhair gandhair auSadhaiz ca yathAvidhi
4025006c arcayiSyati ratnaiz ca mAlyaiz ca tvAM vizeSataH
4025007a imAM giriguhAM ramyAm abhigantum ito 'rhasi
4025007c kuruSva svAmi saMbandhaM vAnarAn saMpraharSayan
4025008a evam ukto hanumatA rAghavaH paravIrahA
4025008c pratyuvAca hanUmantaM buddhimAn vAkyakovidaH
4025009a caturdazasamAH saumya grAmaM vA yadi vA puram
4025009c na pravekSyAmi hanuman pitur nirdezapAlakaH
4025010a susamRddhAM guhAM divyAM sugrIvo vAnararSabhaH
4025010c praviSTo vidhivad vIraH kSipraM rAjye 'bhiSicyatAm
4025011a evam uktvA hanUmantaM rAmaH sugrIvam abravIt
4025011c imam apy aGgadaM vIra yauvarAjye 'bhiSecaya
4025012a pUrvo 'yaM vArSiko mAsaH zrAvaNaH salilAgamaH
4025012c pravRttAH saumya catvAro mAsA vArSikasaMjJitAH
4025013a nAyam udyogasamayaH praviza tvaM purIM zubhAm
4025013c asmin vatsyAmy ahaM saumya parvate sahalakSmaNaH
4025014a iyaM giriguhA ramyA vizAlA yuktamArutA
4025014c prabhUtasalilA saumya prabhUtakamalotpalA
4025015a kArtike samanuprApte tvaM rAvaNavadhe yata
4025015c eSa naH samayaH saumya praviza tvaM svam Alayam
4025015e abhiSiJcasva rAjye ca suhRdaH saMpraharSaya
4025016a iti rAmAbhyanujJAtaH sugrIvo vAnararSabhaH
4025016c praviveza purIM ramyAM kiSkindhAM vAlipAlitAm
4025017a taM vAnarasahasrANi praviSTaM vAnarezvaram
4025017c abhivAdya prahRSTAni sarvataH paryavArayan
4025018a tataH prakRtayaH sarvA dRSTvA harigaNezvaram
4025018c praNamya mUrdhnA patitA vasudhAyAM samAhitAH
4025019a sugrIvaH prakRtIH sarvAH saMbhASyotthApya vIryavAn
4025019c bhrAtur antaHpuraM saumyaM praviveza mahAbalaH
4025020a pravizya tv abhiniSkrAntaM sugrIvaM vAnararSabham
4025020c abhyaSiJcanta suhRdaH sahasrAkSam ivAmarAH
4025021a tasya pANDuram Ajahruz chatraM hemapariSkRtam
4025021c zukle ca bAlavyajane hemadaNDe yazaskare
4025022a tathA sarvANi ratnAni sarvabIjauSadhAni ca
4025022c sakSIrANAM ca vRkSANAM prarohAn kusumAni ca
4025023a zuklAni caiva vastrANi zvetaM caivAnulepanam
4025023c sugandhIni ca mAlyAni sthalajAny ambujAni ca
4025024a candanAni ca divyAni gandhAMz ca vividhAn bahUn
4025024c akSataM jAtarUpaM ca priyaGgumadhusarpiSI
4025025a dadhicarma ca vaiyAghraM vArAhI cApy upAnahau
4025025c samAlambhanam AdAya rocanAM samanaHzilAm
4025025e Ajagmus tatra muditA varAH kanyAs tu SoDaza
4025026a tatas te vAnarazreSThaM yathAkAlaM yathAvidhi
4025026c ratnair vastraiz ca bhakSyaiz ca toSayitvA dvijarSabhAn
4025027a tataH kuzaparistIrNaM samiddhaM jAtavedasaM
4025027c mantrapUtena haviSA hutvA mantravido janAH
4025028a tato hemapratiSThAne varAstaraNasaMvRte
4025028c prAsAdazikhare ramye citramAlyopazobhite
4025029a prAGmukhaM vividhair mantraiH sthApayitvA varAsane
4025029c nadInadebhyaH saMhRtya tIrthebhyaz ca samantataH
4025030a AhRtya ca samudrebhyaH sarvebhyo vAnararSabhAH
4025030c apaH kanakakumbheSu nidhAya vimalAH zubhAH
4025031a zubhair vRSabhazRGgaiz ca kalazaiz cApi kAJcanaiH
4025031c zAstradRSTena vidhinA maharSivihitena ca
4025032a gajo gavAkSo gavayaH zarabho gandhamAdanaH
4025032c maindaz ca dvividaz caiva hanUmAJ jAmbavAn nalaH
4025033a abhyaSiJcanta sugrIvaM prasannena sugandhinA
4025033c salilena sahasrAkSaM vasavo vAsavaM yathA
4025034a abhiSikte tu sugrIve sarve vAnarapuMgavAH
4025034c pracukruzur mahAtmAno hRSTAs tatra sahasrazaH
4025035a rAmasya tu vacaH kurvan sugrIvo haripuMgavaH
4025035c aGgadaM saMpariSvajya yauvarAjye 'bhiSecayat
4025036a aGgade cAbhiSikte tu sAnukrozAH plavaMgamAH
4025036c sAdhu sAdhv iti sugrIvaM mahAtmAno 'bhyapUjayan
4025037a hRSTapuSTajanAkIrNA patAkAdhvajazobhitA
4025037c babhUva nagarI ramyA kSikindhA girigahvare
4025038a nivedya rAmAya tadA mahAtmane; mahAbhiSekaM kapivAhinIpatiH
4025038c rumAM ca bhAryAM pratilabhya vIryavAn; avApa rAjyaM tridazAdhipo yathA
4026001a abhiSikte tu sugrIve praviSTe vAnare guhAm
4026001c AjagAma saha bhrAtrA rAmaH prasravaNaM girim
4026002a zArdUlamRgasaMghuSTaM siMhair bhImaravair vRtam
4026002c nAnAgulmalatAgUDhaM bahupAdapasaMkulam
4026003a RkSavAnaragopucchair mArjAraiz ca niSevitam
4026003c megharAzinibhaM zailaM nityaM zucijalAzrayam
4026004a tasya zailasya zikhare mahatIm AyatAM guhAm
4026004c pratyagRhNata vAsArthaM rAmaH saumitriNA saha
4026005a avasat tatra dharmAtmA rAghavaH sahalakSmaNaH
4026005c bahudRzyadarIkuJje tasmin prasravaNe girau
4026006a susukhe 'pi bahudravye tasmin hi dharaNIdhare
4026006c vasatas tasya rAmasya ratir alpApi nAbhavat
4026006e hRtAM hi bhAryAM smarataH prANebhyo 'pi garIyasIm
4026007a udayAbhyuditaM dRSTvA zazAGkaM ca vizeSataH
4026007c Aviveza na taM nidrA nizAsu zayanaM gatam
4026008a tat samutthena zokena bASpopahatacetasaM
4026008c taM zocamAnaM kAkutsthaM nityaM zokaparAyaNam
4026008e tulyaduHkho 'bravId bhrAtA lakSmaNo 'nunayan vacaH
4026009a alaM vIra vyathAM gatvA na tvaM zocitum arhasi
4026009c zocato hy avasIdanti sarvArthA viditaM hi te
4026010a bhavAn kriyAparo loke bhavAn devaparAyaNaH
4026010c Astiko dharmazIlaz ca vyavasAyI ca rAghava
4026011a na hy avyavasitaH zatruM rAkSasaM taM vizeSataH
4026011c samarthas tvaM raNe hantuM vikramair jihmakAriNam
4026012a samunmUlaya zokaM tvaM vyavasAyaM sthiraM kuru
4026012c tataH saparivAraM taM nirmUlaM kuru rAkSasaM
4026013a pRthivIm api kAkutstha sasAgaravanAcalAm
4026013c parivartayituM zaktaH kim aGga puna rAvaNam
4026014a ahaM tu khalu te vIryaM prasuptaM pratibodhaye
4026014c dIptair AhutibhiH kAle bhasmac channam ivAnalam
4026015a lakSmaNasya tu tad vAkyaM pratipUjya hitaM zubham
4026015c rAghavaH suhRdaM snigdham idaM vacanam abravIt
4026016a vAcyaM yad anuraktena snigdhena ca hitena ca
4026016c satyavikrama yuktena tad uktaM lakSmaNa tvayA
4026017a eSa zokaH parityaktaH sarvakAryAvasAdakaH
4026017c vikrameSv apratihataM tejaH protsAhayAmy aham
4026018a zaratkAlaM pratIkSe 'ham iyaM prAvRD upasthitA
4026018c tataH sarASTraM sagaNaM rAkSasaM taM nihanmy aham
4026019a tasya tad vacanaM zrutvA hRSTo rAmasya lakSmaNaH
4026019c punar evAbravId vAkyaM saumitrir mitranandanaH
4026020a etat te sadRzaM vAkyam uktaM zatrunibarhaNa
4026020c idAnIm asi kAkutstha prakRtiM svAm upAgataH
4026021a vijJAya hy Atmano vIryaM tathyaM bhavitum arhasi
4026021c etat sadRzam uktaM te zrutasyAbhijanasya ca
4026022a tasmAt puruSazArdUla cintayaJ zatrunigraham
4026022c varSArAtram anuprAptam atikrAmaya rAghava
4026023a niyamya kopaM pratipAlyatAM zarat; kSamasva mAsAMz caturo mayA saha
4026023c vasAcale 'smin mRgarAjasevite; saMvardhayaJ zatruvadhe samudyataH
4027001a sa tadA vAlinaM hatvAh sugrIvam abhiSicya ca
4027001c vasan mAlyavataH pRSTe rAmo lakSmaNam abravIt
4027002a ayaM sa kAlaH saMprAptaH samayo 'dya jalAgamaH
4027002c saMpazya tvaM nabho meghaiH saMvRtaM girisaMnibhaiH
4027003a nava mAsa dhRtaM garbhaM bhAskArasya gabhastibhiH
4027003c pItvA rasaM samudrANAM dyauH prasUte rasAyanam
4027004a zakyam ambaram Aruhya meghasopAnapaGktibhiH
4027004c kuTajArjunamAlAbhir alaMkartuM divAkaram
4027005a saMdhyArAgotthitais tAmrair anteSv adhikapANDuraiH
4027005c snigdhair abhrapaTacchadair baddhavraNam ivAmbaram
4027006a mandamArutaniHzvAsaM saMdhyAcandanaraJjitam
4027006c ApANDujaladaM bhAti kAmAturam ivAmbaram
4027007a eSA dharmaparikliSTA navavAripariplutA
4027007c sIteva zokasaMtaptA mahI bASpaM vimuJcati
4027008a meghodaravinirmuktAH kahlArasukhazItalAH
4027008c zakyam aJjalibhiH pAtuM vAtAH ketakigandhinaH
4027009a eSa phullArjunaH zailaH ketakair adhivAsitaH
4027009c sugrIva iva zAntArir dhArAbhir abhiSicyate
4027010a meghakRSNAjinadharA dhArAyajJopavItinaH
4027010c mArutApUritaguhAH prAdhItA iva parvatAH
4027011a kazAbhir iva haimIbhir vidyudbhir iva tADitam
4027011c antaHstanitanirghoSaM savedanam ivAmbaram
4027012a nIlameghAzritA vidyut sphurantI pratibhAti me
4027012c sphurantI rAvaNasyAGke vaidehIva tapasvinI
4027013a imAs tA manmathavatAM hitAH pratihatA dizaH
4027013c anuliptA iva ghanair naSTagrahanizAkarAH
4027014a kva cid bASpAbhisaMruddhAn varSAgamasamutsukAn
4027014c kuTajAn pazya saumitre puSTitAn girisAnuSu
4027014e mama zokAbhibhUtasya kAmasaMdIpanAn sthitAn
4027015a rajaH prazAntaM sahimo 'dya vAyur; nidAghadoSaprasarAH prazAntAH
4027015c sthitA hi yAtrA vasudhAdhipAnAM; pravAsino yAnti narAH svadezAn
4027016a saMprasthitA mAnasavAsalubdhAH; priyAnvitAH saMprati cakravAkaH
4027016c abhIkSNavarSodakavikSateSu; yAnAni mArgeSu na saMpatanti
4027017a kva cit prakAzaM kva cid aprakAzaM; nabhaH prakIrNAmbudharaM vibhAti
4027017c kva cit kva cit parvatasaMniruddhaM; rUpaM yathA zAntamahArNavasya
4027018a vyAmizritaM sarjakadambapuSpair; navaM jalaM parvatadhAtutAmram
4027018c mayUrakekAbhir anuprayAtaM; zailApagAH zIghrataraM vahanti
4027019a rasAkulaM SaTpadasaMnikAzaM; prabhujyate jambuphalaM prakAmam
4027019c anekavarNaM pavanAvadhUtaM; bhUmau pataty AmraphalaM vipakvam
4027020a vidyutpatAkAH sabalAka mAlAH; zailendrakUTAkRtisaMnikAzAH
4027020c garjanti meghAH samudIrNanAdA; mattagajendrA iva saMyugasthaH
4027021a meghAbhikAmI parisaMpatantI; saMmoditA bhAti balAkapaGktiH
4027021c vAtAvadhUtA varapauNDarIkI; lambeva mAlA racitAmbarasya
4027022a nidrA zanaiH kezavam abhyupaiti; drutaM nadI sAgaram abhyupaiti
4027022c hRSTA balAkA ghanam abhyupaiti; kAntA sakAmA priyam abhyupaiti
4027023a jAtA vanAntAH zikhisupranRttA; jAtAH kadambAH sakadambazAkhAH
4027023c jAtA vRSA goSu samAnakAmA; jAtA mahI sasyavanAbhirAmA
4027024a vahanti varSanti nadanti bhAnti; dhyAyanti nRtyanti samAzvasanti
4027024c nadyo ghanA mattagajA vanAntAH; priyAvinIhAH zikhinaH plavaMgAH
4027025a praharSitAH ketakapuSpagandham; AghrAya hRSTA vananirjhareSu
4027025c prapAta zabdAkulitA gajendrAH; sArdhaM mayUraiH samadA nadanti
4027026a dhArAnipAtair abhihanyamAnAH; kadambazAkhAsu vilambamAnAH
4027026c kSaNArjitaM puSparasAvagADhaM; zanair madaM SaTcaraNAs tyajanti
4027027a aGgAracUrNotkarasaMnikAzaiH; phalaiH suparyApta rasaiH samRddhaiH
4027027c jambUdrumANAM pravibhAnti zAkhA; nilIyamAnA iva SaTpadaughaiH
4027028a taDitpatAkAbhir alaMkRtAnAm; udIrNagambhIramahAravANAm
4027028c vibhAnti rUpANi balAhakAnAM; raNodyatAnAm iva vAraNAnAm
4027029a mArgAnugaH zailavanAnusArI; saMprasthito megharavaM nizamya
4027029c yuddhAbhikAmaH pratinAgazaGkI; matto gajendraH pratisaMnivRttaH
4027030a muktAsakAzaM salilaM patad vai; sunirmalaM patrapuTeSu lagnam
4027030c hRSTA vivarNacchadanA vihaMgAH; surendradattaM tRSitAH pibanti
4027031a nIleSu nIlA navavAripUrNA; megheSu meghAH pravibhAnti saktAH
4027031c davAgnidagdheSu davAgnidagdhAH; zaileSu zailA iva baddhamUlAH
4027032a mattA gajendrA muditA gavendrA; vaneSu vizrAntatarA mRgendrAH
4027032c ramyA nagendrA nibhRtA nagendrAH; prakrIDito vAridharaiH surendraH
4027033a vRttA yAtrA narendrANAM senA pratinivartate
4027033c vairANi caiva mArgAz ca salilena samIkRtAH
4027034a mAsi prauSThapade brahma brAhmaNAnAM vivakSatAm
4027034c ayam adhyAyasamayaH sAmagAnAm upasthitaH
4027035a nivRttakarmAyatano nUnaM saMcitasaMcayaH
4027035c ASADhIm abhyupagato bharataH koSakAdhipaH
4027036a nUnam ApUryamANAyAH sarayvA vadhate rayaH
4027036c mAM samIkSya samAyAntam ayodhyAyA iva svanaH
4027037a imAH sphItaguNA varSAH sugrIvaH sukham aznute
4027037c vijitAriH sadAraz ca rAjye mahati ca sthitaH
4027038a ahaM tu hRtadAraz ca rAjyAc ca mahataz cyutaH
4027038c nadIkUlam iva klinnam avasIdAmi lakSmaNa
4027039a zokaz ca mama vistIrNo varSAz ca bhRzadurgamAH
4027039c rAvaNaz ca mahAJ zatrur apAraM pratibhAti me
4027040a ayAtrAM caiva dRSTvemAM mArgAMz ca bhRzadurgamAn
4027040c praNate caiva sugrIve na mayA kiM cid Iritam
4027041a api cAtiparikliSTaM cirAd dAraiH samAgatam
4027041c AtmakAryagarIyastvAd vaktuM necchAmi vAnaram
4027042a svayam eva hi vizramya jJAtvA kAlam upAgatam
4027042c upakAraM ca sugrIvo vetsyate nAtra saMzayaH
4027043a tasmAt kAlapratIkSo 'haM sthito 'smi zubhalakSaNa
4027043c sugrIvasya nadInAM ca prasAdam anupAlayan
4027044a upakAreNa vIro hi pratikAreNa yujyate
4027044c akRtajJo 'pratikRto hanti sattvavatAM manaH
4027045a athaivam uktaH praNidhAya lakSmaNaH; kRtAJjalis tat pratipUjya bhASitam
4027045c uvAca rAmaM svabhirAma darzanaM; pradarzayan darzanam AtmanaH zubham
4027046a yathoktam etat tava sarvam IpsitaM; narendra kartA nacirAd dharIzvaraH
4027046c zaratpratIkSaH kSamatAm imaM bhavAJ; jalaprapAtaM ripunigrahe dhRtaH
4028001a samIkSya vimalaM vyoma gatavidyudbalAhakam
4028001c sArasAravasaMghuSTaM ramyajyotsnAnulepanam
4028002a samRddhArthaM ca sugrIvaM mandadharmArthasaMgraham
4028002c atyartham asatAM mArgam ekAntagatamAnasaM
4028003a nivRttakAryaM siddhArthaM pramadAbhirataM sadA
4028003c prAptavantam abhipretAn sarvAn eva manorathAn
4028004a svAM ca pAtnIm abhipretAM tArAM cApi samIpsitAm
4028004c viharantam ahorAtraM kRtArthaM vigatajvalam
4028005a krIDantam iva devezaM nandane 'psarasAM gaNaiH
4028005c mantriSu nyastakAryaM ca mantriNAm anavekSakam
4028006a utsannarAjyasaMdezaM kAmavRttam avasthitam
4028006c nizcitArtho 'rthatattvajJaH kAladharmavizeSavit
4028007a prasAdya vAkyair madhurair hetumadbhir manoramaiH
4028007c vAkyavid vAkyatattvajJaM harIzaM mArutAtmajaH
4028008a hitaM tathyaM ca pathyaM ca sAmadharmArthanItimat
4028008c praNayaprItisaMyuktaM vizvAsakRtanizcayam
4028008e harIzvaram upAgamya hanumAn vAkyam abravIt
4028009a rAjyaM prAptaM yazaz caiva kaulI zrIr abhivarthitA
4028009c mitrANAM saMgrahaH zeSas tad bhavAn kartum arhati
4028010a yo hi mitreSu kAlajJaH satataM sAdhu vartate
4028010c tasya rAjyaM ca kIrtiz ca pratApaz cAbhivardhate
4028011a yasya kozaz ca daNDaz ca mitrANy AtmA ca bhUmipa
4028011c samavetAni sarvANi sa rAjyaM mahad aznute
4028012a tad bhavAn vRttasaMpannaH sthitaH pathi niratyaye
4028012c mitrArtham abhinItArthaM yathAvat kartum arhati
4028013a yas tu kAlavyatIteSu mitrakAryeSu vartate
4028013c sa kRtvA mahato 'py arthAn na mitrArthena yujyate
4028014a kriyatAM rAghavasyaitad vaidehyAH parimArgaNam
4028014c tad idaM vIra kAryaM te kAlAtItam ariMdama
4028015a na ca kAlam atItaM te nivedayati kAlavit
4028015c tvaramANo 'pi san prAjJas tava rAjan vazAnugaH
4028016a kulasya ketuH sphItasya dIrghabandhuz ca rAghavaH
4028016c aprameyaprabhAvaz ca svayaM cApratimo guNaiH
4028017a tasya tvaM kuru vai kAryaM pUrvaM tena kRtaM tava
4028017c harIzvara harizreSThAn AjJApayitum arhasi
4028018a na hi tAvad bhavet kAlo vyatItaz codanAd Rte
4028018c coditasya hi kAryasya bhavet kAlavyatikramaH
4028019a akartur api kAryasya bhavAn kartA harIzvara
4028019c kiM punaH pratikartus te rAjyena ca dhanena ca
4028020a zaktimAn asi vikrAnto vAnararSka gaNezvara
4028020c kartuM dAzaratheH prItim AjJAyAM kiM nu sajjase
4028021a kAmaM khalu zarair zaktaH surAsuramahoragAn
4028021c vaze dAzarathiH kartuM tvatpratijJAM tu kAGkSate
4028022a prANatyAgAvizaGkena kRtaM tena tava priyam
4028022c tasya mArgAma vaidehIM pRthivyAm api cAmbare
4028023a na devA na ca gandharvA nAsurA na marudgaNAH
4028023c na ca yakSA bhayaM tasya kuryuH kim uta rAkSasAH
4028024a tad evaM zaktiyuktasya pUrvaM priyakRtas tathA
4028024c rAmasyArhasi piGgeza kartuM sarvAtmanA priyam
4028025a nAdhastAd avanau nApsu gatir nopari cAmbare
4028025c kasya cit sajjate 'smAkaM kapIzvara tavAjJayA
4028026a tad AjJApaya kaH kiM te kRte vasatu kutra cit
4028026c harayo hy apradhRSyAs te santi koTyagrato 'nagha
4028027a tasya tad vacanaM zrutvA kAle sAdhuniveditam
4028027c sugrIvaH sattvasaMpannaz cakAra matim uttamAm
4028028a sa saMdidezAbhimataM nIlaM nityakRtodyamam
4028028c dikSu sarvAsu sarveSAM sainyAnAm upasaMgrahe
4028029a yathA senA samagrA me yUthapAlAz ca sarvazaH
4028029c samAgacchanty asaMgena senAgrANi tathA kuru
4028030a ye tv antapAlAH plavagAH zIghragA vyavasAyinaH
4028030c samAnayantu te sainyaM tvaritAH zAsanAn mama
4028030e svayaM cAnantaraM sainyaM bhavAn evAnupazyatu
4028031a tripaJcarAtrAd UrdhvaM yaH prApnuyAn neha vAnaraH
4028031c tasya prANAntiko daNDo nAtra kAryA vicAraNA
4028032a harIMz ca vRddhAn upayAtu sAGgado; bhavAn mamAjJAm adhikRtya nizcitAm
4028032c iti vyavasthAM haripuMgavezvaro; vidhAya vezma praviveza vIryavAn
4029001a guhAM praviSTe sugrIve vimukte gagane ghanaiH
4029001c varSarAtroSito rAmaH kAmazokAbhipIDitaH
4029002a pANDuraM gaganaM dRSTvA vimalaM candramaNDalam
4029002c zAradIM rajanIM caiva dRSTvA jyotsnAnulepanAm
4029003a kAmavRttaM ca sugrIvaM naSTAM ca janakAtmajAm
4029003c buddhvA kAlam atItaM ca mumoha paramAturaH
4029004a sa tu saMjJAm upAgamya muhUrtAn matimAn punaH
4029004c manaHsthAm api vaidehIM cintayAm Asa rAghavaH
4029005a AsInaH parvatasyAgre hemadhAtuvibhUSite
4029005c zAradaM gaganaM dRSTva jagAma manasA priyAm
4029006a dRSTvA ca vimalaM vyoma gatavidyudbalAhakam
4029006c sArasAravasaMghuSTaM vilalApArtayA girA
4029007a sArasAravasaMnAdaiH sArasAravanAdinI
4029007c yAzrame ramate bAlA sAdya me ramate katham
4029008a puSpitAMz cAsanAn dRSTvA kAJcanAn iva nirmalAn
4029008c kathaM sa ramate bAlA pazyantI mAm apazyatI
4029009a yA purA kalahaMsAnAM svareNa kalabhASiNI
4029009c budhyate cArusarvAGgI sAdya me budhyate katham
4029010a niHsvanaM cakravAkAnAM nizamya sahacAriNAm
4029010c puNDarIkavizAlAkSI katham eSA bhaviSyati
4029011a sarAMsi sarito vApIH kAnanAni vanAni ca
4029011c tAM vinA mRgazAvAkSIM caran nAdya sukhaM labhe
4029012a api tAM madviyogAc ca saukumAryAc ca bhAminIm
4029012c na dUraM pIDayet kAmaH zaradguNanirantaraH
4029013a evamAdi narazreSTho vilalApa nRpAtmajaH
4029013c vihaMga iva sAraGgaH salilaM tridazezvarAt
4029014a tataz caJcUrya ramyeSu phalArthI girisAnuSu
4029014c dadarza paryupAvRtto lakSmIvA&l lakSmaNo 'grajam
4029015a taM cintayA duHsahayA parItaM; visaMjJam ekaM vijane manasvI
4029015c bhrAtur viSAdAt paritApadInaH; samIkSya saumitrir uvAca rAmam
4029016a kim Arya kAmasya vazaMgatena; kim AtmapauruSyaparAbhavena
4029016c ayaM sadA saMhRiyate samAdhiH; kim atra yogena nivartitena
4029017a kriyAbhiyogaM manasaH prasAdaM; samAdhiyogAnugataM ca kAlam
4029017c sahAyasAmarthyam adInasattva; svakarmahetuM ca kuruSva hetum
4029018a na jAnakI mAnavavaMzanAtha; tvayA sanAthA sulabhA pareNa
4029018c na cAgnicUDAM jvalitAm upetya; na dahyate vIravarArha kaz cit
4029019a salakSmaNaM lakSmaNam apradhRSyaM; svabhAvajaM vAkyam uvAca rAmaH
4029019c hitaM ca pathyaM ca nayaprasaktaM; sasAmadharmArthasamAhitaM ca
4029020a niHsaMzayaM kAryam avekSitavyaM; kriyAvizeSo hy anuvartitavyaH
4029020c nanu pravRttasya durAsadasya; kumArakAryasya phalaM na cintyam
4029021a atha padmapalAzAkSIM maithilIm anucintayan
4029021c uvAca lakSmaNaM rAmo mukhena parizuSyatA
4029022a tarpayitvA sahasrAkSaH salilena vasuMdharAm
4029022c nirvartayitvA sasyAni kRtakarmA vyavasthitaH
4029023a snigdhagambhIranirghoSAH zailadrumapurogamAH
4029023c visRjya salilaM meghAH parizrAntA nRpAtmaja
4029024a nIlotpaladalazyAmaH zyAmIkRtvA dizo daza
4029024c vimadA iva mAtaGgAH zAntavegAH payodharAH
4029025a jalagarbhA mahAvegAH kuTajArjunagandhinaH
4029025c caritvA viratAH saumya vRSTivAtAH samudyatAH
4029026a ghanAnAM vAraNAnAM ca mayUrANAM ca lakSmaNa
4029026c nAdaH prasravaNAnAM ca prazAntaH sahasAnagha
4029027a abhivRSTA mahAmeghair nirmalAz citrasAnavaH
4029027c anuliptA ivAbhAnti girayaz candrarazmibhiH
4029028a darzayanti zarannadyaH pulinAni zanaiH zanaiH
4029028c navasaMgamasavrIDA jaghanAnIva yoSitaH
4029029a prasannasalilAH saumya kurarIbhir vinAditAH
4029029c cakravAkagaNAkIrNA vibhAnti salilAzayAH
4029030a anyonyabaddhavairANAM jigISUNAM nRpAtmaja
4029030c udyogasamayaH saumya pArthivAnAm upasthitaH
4029031a iyaM sA prathamA yAtrA pArthivAnAM nRpAtmaja
4029031c na ca pazyAmi sugrIvam udyogaM vA tathAvidham
4029032a catvAro vArSikA mAsA gatA varSazatopamAH
4029032c mama zokAbhitaptasya saumya sItAm apazyataH
4029033a priyAvihIne duHkhArte hRtarAjye vivAsite
4029033c kRpAM na kurute rAjA sugrIvo mayi lakSmaNa
4029034a anAtho hRtarAjyo 'yaM rAvaNena ca dharSitaH
4029034c dIno dUragRhaH kAmI mAM caiva zaraNaM gataH
4029035a ity etaiH kAraNaiH saumya sugrIvasya durAtmanaH
4029035c ahaM vAnararAjasya paribhUtaH paraMtapa
4029036a sa kAlaM parisaMkhyAya sItAyAH parimArgaNe
4029036c kRtArthaH samayaM kRtvA durmatir nAvabudhyate
4029037a tvaM pravizya ca kiSkindhAM brUhi vAnarapuMgavam
4029037c mUrkhaM grAmya sukhe saktaM sugrIvaM vacanAn mama
4029038a arthinAm upapannAnAM pUrvaM cApy upakAriNAm
4029038c AzAM saMzrutya yo hanti sa loke puruSAdhamaH
4029039a zubhaM vA yadi vA pApaM yo hi vAkyam udIritam
4029039c satyena parigRhNAti sa vIraH puruSottamaH
4029040a kRtArthA hy akRtArthAnAM mitrANAM na bhavanti ye
4029040c tAn mRtAn api kravyAdaH kRtaghnAn nopabhuJjate
4029041a nUnaM kAJcanapRSThasya vikRSTasya mayA raNe
4029041c draSTum icchanti cApasya rUpaM vidyudgaNopamam
4029042a ghoraM jyAtalanirghoSaM kruddhasya mama saMyuge
4029042c nirghoSam iva vajrasya punaH saMzrotum icchati
4029043a kAmam evaMgate 'py asya parijJAte parAkrame
4029043c tvatsahAyasya me vIra na cintA syAn nRpAtmaja
4029044a yadartham ayam ArambhaH kRtaH parapuraMjaya
4029044c samayaM nAbhijAnAti kRtArthaH plavagezvaraH
4029045a varSAsamayakAlaM tu pratijJAya harIzvaraH
4029045c vyatItAMz caturo mAsAn viharan nAvabudhyate
4029046a sAmAtyapariSat krIDan pAnam evopasevate
4029046c zokadIneSu nAsmAsu sugrIvaH kurute dayAm
4029047a ucyatAM gaccha sugrIvas tvayA vatsa mahAbala
4029047c mama roSasya yadrUpaM brUyAz cainam idaM vacaH
4029048a na ca saMkucitaH panthA yena vAlI hato gataH
4029048c samaye tiSTha sugrIvamA vAlipatham anvagAH
4029049a eka eva raNe vAlI zareNa nihato mayA
4029049c tvAM tu satyAd atikrAntaM haniSyAmi sabAndhavam
4029050a tad evaM vihite kArye yad dhitaM puruSarSabha
4029050c tat tad brUhi narazreSTha tvara kAlavyatikramaH
4029051a kuruSva satyaM mayi vAnarezvara; pratizrutaM dharmam avekSya zAzvatam
4029051c mA vAlinaM pretya gato yamakSayaM; tvam adya pazyer mama coditaiH zaraiH
4029052a sa pUrvajaM tIvravivRddhakopaM; lAlapyamAnaM prasamIkSya dInam
4029052c cakAra tIvrAM matim ugratejA; harIzvaramAnavavaMzanAthaH
4030001a sa kAminaM dInam adInasattvaH; zokAbhipannaM samudIrNakopam
4030001c narendrasUnur naradevaputraM; rAmAnujaH pUrvajam ity uvAca
4030002a na vAnaraH sthAsyati sAdhuvRtte; na maMsyate kAryaphalAnuSaGgAn
4030002c na bhakSyate vAnararAjyalakSmIM; tathA hi nAbhikramate 'sya buddhiH
4030003a matikSayAd grAmyasukheSu saktas; tava prasAdApratikArabuddhiH
4030003c hato 'grajaM pazyatu vAlinaM sa; na rAjyam evaM viguNasya deyam
4030004a na dhAraye kopam udIrNavegaM; nihanmi sugrIvam asatyam adya
4030004c haripravIraiH saha vAliputro; narendrapatnyA vicayaM karotu
4030005a tam AttabANAsanam utpatantaM; niveditArthaM raNacaNDakopam
4030005c uvaca rAmaH paravIrahantA; svavekSitaM sAnunayaM ca vAkyam
4030006a na hi vai tvadvidho loke pApam evaM samAcaret
4030006c pApam AryeNa yo hanti sa vIraH puruSottamaH
4030007a nedam adya tvayA grAhyaM sAdhuvRttena lakSmaNa
4030007c tAM prItim anuvartasva pUrvavRttaM ca saMgatam
4030008a sAmopahitayA vAcA rUkSANi parivarjayan
4030008c vaktum arhasi sugrIvaM vyatItaM kAlaparyaye
4030009a so' grajenAnuziSTArtho yathAvat puruSarSabhaH
4030009c praviveza purIM vIro lakSmaNaH paravIrahA
4030010a tataH zubhamatiH prAjJo bhrAtuH priyahite rataH
4030010c lakSmaNaH pratisaMrabdho jagAma bhavanaM kapeH
4030011a zakrabANAsanaprakhyaM dhanuH kAlAntakopamaH
4030011c pragRhya girizRGgAbhaM mandaraH sAnumAn iva
4030012a yathoktakArI vacanam uttaraM caiva sottaram
4030012c bRhaspatisamo buddhyA mattvA rAmAnujas tadA
4030013a kAmakrodhasamutthena bhrAtuH kopAgninA vRtaH
4030013c prabhaJjana ivAprItaH prayayau lakSmaNas tadA
4030014a sAlatAlAzvakarNAMz ca tarasA pAtayan bahUn
4030014c paryasyan girikUTAni drumAn anyAMz ca vegataH
4030015a zilAz ca zakalIkurvan padbhyAM gaja ivAzugaH
4030015c dUram ekapadaM tyaktvA yayau kAryavazAd drutam
4030016a tAm apazyad balAkIrNAM harirAjamahApurIm
4030016c durgAm ikSvAkuzArdUlaH kiSkindhAM girisaMkaTe
4030017a roSAt prasphuramANauSThaH sugrIvaM prati kalSmaNaH
4030017c dadarza vAnarAn bhImAn kiSkindhAyA bahizcarAn
4030018a zailazRGgANi zatazaH pravRddhAMz ca mahIruhAn
4030018c jagRhuH kuJjaraprakhyA vAnarAH parvatAntare
4030019a tAn gRhItapraharaNAn harIn dRSTvA tu lakSmaNaH
4030019c babhUva dviguNaM kruddho bahvindhana ivAnalaH
4030020a taM te bhayaparItAGgAH kruddhaM dRSTvA plavaMgamAH
4030020c kAlamRtyuyugAntAbhaM zatazo vidrutA dizaH
4030021a tataH sugrIvabhavanaM pravizya haripuMgavAH
4030021c krodham AgamanaM caiva lakSmaNasya nyavedayan
4030022a tArayA sahitaH kAmI saktaH kapivRSo rahaH
4030022c na teSAM kapivIrANAM zuzrAva vacanaM tadA
4030023a tataH sacivasaMdiSTA harayo romaharSaNAH
4030023c girikuJjarameghAbhA nagaryA niryayus tadA
4030024a nakhadaMSTrAyudhA ghorAH sarve vikRtadarzanAH
4030024c sarve zArdUladarpAz ca sarve ca vikRtAnanAH
4030025a dazanAgabalAH ke cit ke cid dazaguNottarAH
4030025c ke cin nAgasahasrasya babhUvus tulyavikramAH
4030026a kRtsnAM hi kapibhir vyAptAM drumahastair mahAbalaiH
4030026c apazyal lakSmaNaH kruddhaH kiSkindhAM tAM durAsadam
4030027a tatas te harayaH sarve prAkAraparikhAntarAt
4030027c niSkramyodagrasattvAs tu tasthur AviSkRtaM tadA
4030028a sugrIvasya pramAdaM ca pUrvajaM cArtam AtmavAn
4030028c buddhvA kopavazaM vIraH punar eva jagAma saH
4030029a sa dIrghoSNamahocchvAsaH kopasaMraktalocanaH
4030029c babhUva narazArdUlasadhUma iva pAvakaH
4030030a bANazalyasphurajjihvaH sAyakAsanabhogavAn
4030030c svatejoviSasaMghAtaH paJcAsya iva pannagaH
4030031a taM dIptam iva kAlAgniM nAgendram iva kopitam
4030031c samAsAdyAGgadas trAsAd viSAdam agamad bhRzam
4030032a so 'GgadaM roSatAmrAkSaH saMdideza mahAyazAH
4030032c sugrIvaH kathyatAM vatsa mamAgamanam ity uta
4030033a eSa rAmAnujaH prAptas tvatsakAzam ariMdamaH
4030033c bhrAtur vyasanasaMtapto dvAri tiSThati lakSmaNaH
4030034a lakSmaNasya vacaH zrutvA zokAviSTo 'Ggado 'bravIt
4030034c pituH samIpam Agamya saumitrir ayam AgataH
4030035a te mahaughanibhaM dRSTvA vajrAzanisamasvanam
4030035c siMhanAdaM samaM cakrur lakSmaNasya samIpataH
4030036a tena zabdena mahatA pratyabudhyata vAnaraH
4030036c madavihvalatAmrAkSo vyAkulasragvibhUSaNaH
4030037a athAGgadavacaH zrutvA tenaiva ca samAgatau
4030037c mantriNo vAnarendrasya saMmatodAradarzinau
4030038a plakSaz caiva prabhAvaz ca mantriNAv arthadharmayoH
4030038c vaktum uccAvacaM prAptaM lakSmaNaM tau zazaMsatuH
4030039a prasAdayitvA sugrIvaM vacanaiH sAmanizcitaiH
4030039c AsInaM paryupAsInau yathA zakraM marutpatim
4030040a satyasaMdhau mahAbhAgau bhrAtarau rAmalakSmaNau
4030040c vayasya bhAvaM saMprAptau rAjyArhau rAjyadAyinau
4030041a tayor eko dhanuSpANir dvAri tiSThati lakSmaNaH
4030041c yasya bhItAH pravepante nAdAn muJcanti vAnarAH
4030042a sa eSa rAghavabhrAtA lakSmaNo vAkyasArathiH
4030042c vyavasAya rathaH prAptas tasya rAmasya zAsanAt
4030043a tasya mUrdhnA praNamya tvaM saputraH saha bandhubhiH
4030043c rAjaMs tiSTha svasamaye bhava satyapratizravaH
4031001a aGgadasya vacaH zrutvA sugrIvaH sacivaiH saha
4031001c lakSmaNaM kupitaM zrutvA mumocAsanam AtmavAn
4031002a sacivAn abravId vAkyaM nizcitya gurulAghavam
4031002c mantrajJAn mantrakuzalo mantreSu pariniSThitaH
4031003a na me durvyAhRtaM kiM cin nApi me duranuSThitam
4031003c lakSmaNo rAghavabhrAtA kruddhaH kim iti cintaye
4031004a asuhRdbhir mamAmitrair nityam antaradarzibhiH
4031004c mama doSAn asaMbhUtAJ zrAvito rAghavAnujaH
4031005a atra tAvad yathAbuddhi sarvair eva yathAvidhi
4031005c bhavadbhir nizcayas tasya vijJeyo nipuNaM zanaiH
4031006a na khalv asti mama trAso lakSmaNAn nApi rAghavAt
4031006c mitraM tv asthAna kupitaM janayaty eva saMbhramam
4031007a sarvathA sukaraM mitraM duSkaraM paripAlanam
4031007c anityatvAt tu cittAnAM prItir alpe 'pi bhidyate
4031008a atonimittaM trasto 'haM rAmeNa tu mahAtmanA
4031008c yan mamopakRtaM zakyaM pratikartuM na tan mayA
4031009a sugrIveNaivam uktas tu hanumAn haripuMgavaH
4031009c uvAca svena tarkeNa madhye vAnaramantriNAm
4031010a sarvathA naitad AzcaryaM yat tvaM harigaNezvara
4031010c na vismarasi susnigdham upakArakRtaM zubham
4031011a rAghaveNa tu zUreNa bhayam utsRjya dUrataH
4031011c tvatpriyArthaM hato vAlI zakratulyaparAkramaH
4031012a sarvathA praNayAt kruddho rAghavo nAtra saMzayaH
4031012c bhrAtaraM sa prahitavA&l lakSmaNaM lakSmivardhanam
4031013a tvaM pramatto na jAnISe kAlaM kalavidAM vara
4031013c phullasaptacchadazyAmA pravRttA tu zarac chivA
4031014a nirmala grahanakSatrA dyauH pranaSTabalAhakA
4031014c prasannAz ca dizaH sarvAH saritaz ca sarAMsi ca
4031015a prAptam udyogakAlaM tu nAvaiSi haripuMgava
4031015c tvaM pramatta iti vyaktaM lakSmaNo 'yam ihAgataH
4031016a Artasya hRtadArasya paruSaM puruSAntarAt
4031016c vacanaM marSaNIyaM te rAghavasya mahAtmanaH
4031017a kRtAparAdhasya hi te nAnyat pazyAmy ahaM kSamam
4031017c antareNAJjaliM baddhvA lakSmaNasya prasAdanAt
4031018a niyuktair mantribhir vAcyo avazyaM pArthivo hitam
4031018c ata eva bhayaM tyaktvA bravImy avadhRtaM vacaH
4031019a abhikruddhaH samartho hi cApam udyamya rAghavaH
4031019c sadevAsuragandharvaM vaze sthApayituM jagat
4031020a na sa kSamaH kopayituM yaH prasAdya punar bhavet
4031020c pUrvopakAraM smaratA kRtajJena vizeSataH
4031021a tasya mUrdhnA praNamya tvaM saputraH sasuhRjjanaH
4031021c rAjaMs tiSTha svasamaye bhartur bhAryeva tadvaze
4031022a na rAmarAmAnujazAsanaM tvayA; kapIndrayuktaM manasApy apohitum
4031022c mano hi te jJAsyati mAnuSaM balaM; sarAghavasyAsya surendravarcasaH
4032001a atha pratisamAdiSTo lakSmaNaH paravIrahA
4032001c praviveza guhAM ghorAM kiSkindhAM rAmazAsanAt
4032002a dvArasthA harayas tatra mahAkAyA mahAbalAH
4032002c babhUvur lakSmaNaM dRSTvA sarve prAJjalayaH sthitAH
4032003a niHzvasantaM tu taM dRSTvA kruddhaM dazarathAtmajam
4032003c babhUvur harayas trastA na cainaM paryavArayan
4032004a sa taM ratnamayIM zrImAn divyAM puSpitakAnanAm
4032004c ramyAM ratnasamAkIrNAM dadarza mahatIM guhAm
4032005a harmyaprAsAdasaMbAdhAM nAnApaNyopazobhitAm
4032005c sarvakAmaphalair vRkSaiH puSpitair upazobhitAm
4032006a devagandharvaputraiz ca vAnaraiH kAmarUpibhiH
4032006c divya mAlyAmbaradhAraiH zobhitAM priyadarzanaiH
4032007a candanAgarupadmAnAM gandhaiH surabhigandhinAm
4032007c maireyANAM madhUnAM ca saMmoditamahApathAm
4032008a vindhyamerugiriprasthaiH prAsAdair naikabhUmibhiH
4032008c dadarza girinadyaz ca vimalAs tatra rAghavaH
4032009a aGgadasya gRhaM ramyaM maindasya dvividasya ca
4032009c gavayasya gavAkSasya gajasya zarabhasya ca
4032010a vidyunmAlez ca saMpAteH sUryAkSasya hanUmataH
4032010c vIrabAhoH subAhoz ca nalasya ca mahAtmanaH
4032011a kumudasya suSeNasya tArajAmbavatos tathA
4032011c dadhivaktrasya nIlasya supATalasunetrayoH
4032012a eteSAM kapimukhyAnAM rAjamArge mahAtmanAm
4032012c dadarza gRhamukhyAni mahAsArANi lakSmaNaH
4032013a pANDurAbhraprakAzAni divyamAlyayutAni ca
4032013c prabhUtadhanadhAnyAni strIratnaiH zobhitAni ca
4032014a pANDureNa tu zailena parikSiptaM durAsadam
4032014c vAnarendragRhaM ramyaM mahendrasadanopamam
4032015a zulkaiH prAsAdazikharaiH kailAsazikharopamaiH
4032015c sarvakAmaphalair vRkSaiH puSTitair upazobhitam
4032016a mahendradattaiH zrImadbhir nIlajImUtasaMnibhaiH
4032016c divyapuSpaphalair vRkSaiH zItacchAyair manoramaiH
4032017a haribhiH saMvRtadvAraM balibhiH zastrapANibhiH
4032017c divyamAlyAvRtaM zubhraM taptakAJcanatoraNam
4032018a sugrIvasya gRhaM ramyaM praviveza mahAbalaH
4032018c avAryamANaH saumitrir mahAbhram iva bhAskaraH
4032019a sa sapta kakSyA dharmAtmA yAnAsanasamAvRtAH
4032019c pravizya sumahad guptaM dadarzAntaHpuraM mahat
4032020a haimarAjataparyaGkair bahubhiz ca varAsanaiH
4032020c mahArhAstaraNopetais tatra tatropazobhitam
4032021a pravizann eva satataM zuzrAva madhurasvaram
4032021c tantrIgItasamAkIrNaM samagItapadAkSaram
4032022a bahvIz ca vividhAkArA rUpayauvanagarvitAH
4032022c striyaH sugrIvabhavane dadarza sa mahAbalaH
4032023a dRSTvAbhijanasaMpannAz citramAlyakRtasrajaH
4032023c varamAlyakRtavyagrA bhUSaNottamabhUSitAH
4032024a nAtRptAn nAti ca vyagrAn nAnudAttaparicchadAn
4032024c sugrIvAnucarAMz cApi lakSayAm Asa lakSmaNaH
4032025a tataH sugrIvam AsInaM kAJcane paramAsane
4032025c mahArhAstaraNopete dadarzAdityasaMnibham
4032026a divyAbharaNacitrAGgaM divyarUpaM yazasvinam
4032026c divyamAlyAmbaradharaM mahendram iva durjayam
4032026e divyAbharaNamAlyAbhiH pramadAbhiH samAvRtam
4032027a rumAM tu vIraH parirabhya gADhaM; varAsanastho varahemavarNaH
4032027c dadarza saumitrim adInasattvaM; vizAlanetraH suvizAlanetram
4033001a tam apratihataM kruddhaM praviSTaM puruSarSabham
4033001c sugrIvo lakSmaNaM dRSTvA babhUva vyathitendriyaH
4033002a kruddhaM niHzvasamAnaM taM pradIptam iva tejasA
4033002c bhrAtur vyasanasaMtaptaM dRSTvA dazarathAtmajam
4033003a utpapAta harizreSTho hitvA sauvarNam Asanam
4033003c mahAn mahendrasya yathA svalaMkRta iva dhvajaH
4033004a utpatantam anUtpetU rumAprabhRtayaH striyaH
4033004c sugrIvaM gagane pUrNaM candraM tArAgaNA iva
4033005a saMraktanayanaH zrImAn vicacAla kRtAJjaliH
4033005c babhUvAvasthitas tatra kalpavRkSo mahAn iva
4033006a rumA dvitIyaM sugrIvaM nArImadhyagataM sthitam
4033006c abravIl lakSmaNaH kruddhaH satAraM zazinaM yathA
4033007a sattvAbhijanasaMpannaH sAnukrozo jitendriyaH
4033007c kRtajJaH satyavAdI ca rAjA loke mahIyate
4033008a yas tu rAjA sthito 'dharme mitrANAm upakAriNAm
4033008c mithyApratijJAM kurute ko nRzaMsataras tataH
4033009a zatam azvAnRte hanti sahasraM tu gavAnRte
4033009c AtmAnaM svajanaM hanti puruSaH puruSAnRte
4033010a pUrvaM kRtArtho mitrANAM na tat pratikaroti yaH
4033010c kRtaghnaH sarvabhUtAnAM sa vadhyaH plavagezvara
4033011a gIto 'yaM brahmaNA zlokaH sarvalokanamaskRtaH
4033011c dRSTvA kRtaghnaM kruddhena taM nibodha plavaMgama
4033012a brahmaghne ca surApe ca core bhagnavrate tathA
4033012c niSkRtir vihitA sadbhiH kRtaghne nAsti niSkRtiH
4033013a anAryas tvaM kRtaghnaz ca mithyAvAdI ca vAnara
4033013c pUrvaM kRtArtho rAmasya na tat pratikaroSi yat
4033014a nanu nAma kRtArthena tvayA rAmasya vAnara
4033014c sItAyA mArgaNe yatnaH kartavyaH kRtam icchatA
4033015a sa tvaM grAmyeSu bhogeSu sakto mithyA pratizravaH
4033015c na tvAM rAmo vijAnIte sarpaM maNDUkarAviNam
4033016a mahAbhAgena rAmeNa pApaH karuNavedinA
4033016c harINAM prApito rAjyaM tvaM durAtmA mahAtmanA
4033017a kRtaM cen nAbhijAnISe rAmasyAkliSTakarmaNaH
4033017c sadyas tvaM nizitair bANair hato drakSyasi vAlinam
4033018a na ca saMkucitaH panthA yena vAlI hato gataH
4033018c samaye tiSTha sugrIva mA vAlipatham anvagAH
4033019a na nUnam ikSvAkuvarasya kArmukAc; cyutAJ zarAn pazyasi vajrasaMnibhAn
4033019c tataH sukhaM nAma niSevase sukhI; na rAmakAryaM manasApy avekSase
4034001a tathA bruvANaM saumitriM pradIptam iva tejasA
4034001c abravIl lakSmaNaM tArA tArAdhipanibhAnanA
4034002a naivaM lakSmaNa vaktavyo nAyaM paruSam arhati
4034002c harINAm IzvaraH zrotuM tava vaktrAd vizeSataH
4034003a naivAkRtajJaH sugrIvo na zaTho nApi dAruNaH
4034003c naivAnRtakatho vIra na jihmaz ca kapIzvaraH
4034004a upakAraM kRtaM vIro nApy ayaM vismRtaH kapiH
4034004c rAmeNa vIra sugrIvo yad anyair duSkaraM raNe
4034005a rAmaprasAdAt kIrtiM ca kapirAjyaM ca zAzvatam
4034005c prAptavAn iha sugrIvo rumAM mAM ca paraMtapa
4034006a suduHkhaM zAyitaH pUrvaM prApyedaM sukham uttamam
4034006c prAptakAlaM na jAnIte vizvAmitro yathA muniH
4034007a ghRtAcyAM kila saMsakto dazavarSANi lakSmaNa
4034007c aho 'manyata dharmAtmA vizvAmitro mahAmuniH
4034008a sa hi prAptaM na jAnIte kAlaM kAlavidAM varaH
4034008c vizvAmitro mahAtejAH kiM punar yaH pRthagjanaH
4034009a dehadharmaM gatasyAsya parizrAntasya lakSmaNa
4034009c avitRptasya kAmeSu rAmaH kSantum ihArhati
4034010a na ca roSavazaM tAta gantum arhasi lakSmaNa
4034010c nizcayArtham avijJAya sahasA prAkRto yathA
4034011a sattvayuktA hi puruSAs tvadvidhAH puruSarSabha
4034011c avimRzya na roSasya sahasA yAnti vazyatAm
4034012a prasAdaye tvAM dharmajJa sugrIvArthe samAhitA
4034012c mahAn roSasamutpannaH saMrambhas tyajyatAm ayam
4034013a rumAM mAM kapirAjyaM ca dhanadhAnyavasUni ca
4034013c rAmapriyArthaM sugrIvas tyajed iti matir mama
4034014a samAneSvyati sugrIvaH sItayA saha rAghavam
4034014c zazAGkam iva rohiSyA nihatvA rAvaNaM raNe
4034015a zatakoTisahasrANi laGkAyAM kila rakSasAm
4034015c ayutAni ca SaTtriMzat sahasrANi zatAni ca
4034016a ahatvA tAMz ca durdharSAn rAkSasAn kAmarUpiNaH
4034016c na zakyo rAvaNo hantuM yena sA maithilI hRtA
4034017a te na zakyA raNe hantum asahAyena lakSmaNa
4034017c rAvaNaH krUrakarmA ca sugrIveNa vizeSataH
4034018a evam AkhyAtavAn vAlI sa hy abhijJo harIzvaraH
4034018c Agamas tu na me vyaktaH zravAt tasya bravImy aham
4034019a tvatsahAyanimittaM vai preSitA haripuMgavAH
4034019c AnetuM vAnarAn yuddhe subahUn hariyUthapAn
4034020a tAMz ca pratIkSamANo 'yaM vikrAntAn sumahAbalAn
4034020c rAghavasyArthasiddhyarthaM na niryAti harIzvaraH
4034021a kRtA tu saMsthA saumitre sugrIveNa yathApurA
4034021c adya tair vAnarair sarvair AgantavyaM mahAbalaiH
4034022a RkSakoTisahasrANi golAGgUlazatAni ca
4034022c adya tvAm upayAsyanti jahi kopam ariMdama
4034022e koTyo 'nekAs tu kAkutstha kapInAM dIptatejasAm
4034023a tava hi mukham idaM nirIkSya kopAt; kSatajanibhe nayane nirIkSamANAH
4034023c harivaravanitA na yAnti zAntiM; prathamabhayasya hi zaGkitAH sma sarvAH
4035001a ity uktas tArayA vAkyaM prazritaM dharmasaMhitam
4035001c mRdusvabhAvaH saumitriH pratijagrAha tad vacaH
4035002a tasmin pratigRhIte tu vAkye harigaNezvaraH
4035002c lakSmaNAt sumahat trAsaM vastraM klinnam ivAtyajat
4035003a tataH kaNThagataM mAlyaM citraM bahuguNaM mahat
4035003c ciccheda vimadaz cAsIt sugrIvo vAnarezvaraH
4035004a sa lakSmaNaM bhImabalaM sarvavAnarasattamaH
4035004c abravIt prazritaM vAkyaM sugrIvaH saMpraharSayan
4035005a pranaSTA zrIz ca kIrtiz ca kapirAjyaM ca zAzvatam
4035005c rAmaprasAdAt saumitre punaH prAptam idaM mayA
4035006a kaH zaktas tasya devasya khyAtasya svena karmaNA
4035006c tAdRzaM vikramaM vIra pratikartum ariMdama
4035007a sItAM prApsyati dharmAtmA vadhiSyati ca rAvaNam
4035007c sahAyamAtreNa mayA rAghavaH svena tejasA
4035008a sahAyakRtyaM hi tasya yena sapta mahAdrumAH
4035008c zailaz ca vasudhA caiva bANenaikena dAritAH
4035009a dhanur visphAramANasya yasya zabdena lakSmaNa
4035009c sazailA kampitA bhUmiH sahAyais tasya kiM nu vai
4035010a anuyAtrAM narendrasya kariSye 'haM nararSabha
4035010c gacchato rAvaNaM hantuM vairiNaM sapuraHsaram
4035011a yadi kiM cid atikrAntaM vizvAsAt praNayena vA
4035011c preSyasya kSamitavyaM me na kaz cin nAparAdhyati
4035012a iti tasya bruvANasya sugrIvasya mahAtmanaH
4035012c abhaval lakSmaNaH prItaH preMNA cedam uvAca ha
4035013a sarvathA hi mama bhrAtA sanAtho vAnarezvara
4035013c tvayA nAthena sugrIva prazritena vizeSataH
4035014a yas te prabhAvaH sugrIva yac ca te zaucam uttamam
4035014c arhas taM kapirAjyasya zriyaM bhoktum anuttamAm
4035015a sahAyena ca sugrIva tvayA rAmaH pratApavAn
4035015c vadhiSyati raNe zatrUn acirAn nAtra saMzayaH
4035016a dharmajJasya kRtajJasya saMgrAmeSv anivartinaH
4035016c upapannaM ca yuktaM ca sugrIva tava bhASitam
4035017a doSajJaH sati sAmarthye ko 'nyo bhASitum arhati
4035017c varjayitvA mama jyeSThaM tvAM ca vAnarasattama
4035018a sadRzaz cAsi rAmasya vikrameNa balena ca
4035018c sahAyo daivatair dattaz cirAya haripuMgava
4035019a kiM tu zIghram ito vIra niSkrAma tvaM mayA saha
4035019c sAntvayasva vayasyaM ca bhAryAharaNaduHkhitam
4035020a yac ca zokAbhibhUtasya zrutvA rAmasya bhASitam
4035020c mayA tvaM paruSANy uktas tac ca tvaM kSantum arhasi
4036001a evam uktas tu sugrIvo lakSmaNena mahAtmanA
4036001c hanumantaM sthitaM pArzve sacivaM vAkyam abravIt
4036002a mahendrahimavadvindhyakailAsazikhareSu ca
4036002c mandare pANDuzikhare paJcazaileSu ye sthitAH
4036003a taruNAdityavarNeSu bhrAjamAneSu sarvazaH
4036003c parvateSu samudrAnte pazcimasyAM tu ye dizi
4036004a Adityabhavane caiva girau saMdhyAbhrasaMnibhe
4036004c padmatAlavanaM bhImaM saMzritA haripuMgavAH
4036005a aJjanAmbudasaMkAzAH kuJjarapratimaujasaH
4036005c aJjane parate caiva ye vasanti plavaMgamAH
4036006a manaHzilA guhAvAsA vAnarAH kanakaprabhAH
4036006c merupArzvagatAz caiva ye ca dhUmragiriM zritAH
4036007a taruNAdityavarNAz ca parvate ye mahAruNe
4036007c pibanto madhumaireyaM bhImavegAH plavaMgamAH
4036008a vaneSu ca suramyeSu sugandhiSu mahatsu ca
4036008c tApasAnAM ca ramyeSu vanAnteSu samantataH
4036009a tAMs tAMs tvam Anaya kSipraM pRthivyAM sarvavAnarAn
4036009c sAmadAnAdibhiH kalpair Azu preSaya vAnarAn
4036010a preSitAH prathamaM ye ca mayA dUtA mahAjavAH
4036010c tvaraNArthaM tu bhUyas tvaM harIn saMpreSayAparAn
4036011a ye prasaktAz ca kAmeSu dIrghasUtrAz ca vAnarAH
4036011c ihAnayasva tAn sarvAJ zIghraM tu mama zAsanAt
4036012a ahobhir dazabhir ye ca nAgacchanti mamAjJayA
4036012c hantavyAs te durAtmAno rAjazAsanadUSakAH
4036013a zatAny atha sahasrANi koTyaz ca mama zAsanAt
4036013c prayAntu kapisiMhAnAM dizo mama mate sthitAH
4036014a meghaparvatasaMkAzAz chAdayanta ivAmbaram
4036014c ghorarUpAH kapizreSThA yAntu macchAsanAd itaH
4036015a te gatijJA gatiM gatvA pRthivyAM sarvavAnarAH
4036015c Anayantu harIn sarvAMs tvaritAH zAsanAn mama
4036016a tasya vAnararAjasya zrutvA vAyusuto vacaH
4036016c dikSu sarvAsu vikrAntAn preSayAm Asa vAnarAn
4036017a te padaM viSNuvikrAntaM patatrijyotiradhvagAH
4036017c prayAtAH prahitA rAjJA harayas tatkSaNena vai
4036018a te samudreSu giriSu vaneSu ca saritsu ca
4036018c vAnarA vAnarAn sarvAn rAmahetor acodayan
4036019a mRtyukAlopamasyAjJAM rAjarAjasya vAnarAH
4036019c sugrIvasyAyayuH zrutvA sugrIvabhayadarzinaH
4036020a tatas te 'JjanasaMkAzA gires tasmAn mahAjavAH
4036020c tisraH koTyaH plavaMgAnAM niryayur yatra rAghavaH
4036021a astaM gacchati yatrArkas tasmin girivare ratAH
4036021c taptahemasamAbhAsAs tasmAt koTyo dazacyutAH
4036022a kailAsa zikharebhyaz ca siMhakesaravarcasAm
4036022c tataH koTisahasrANi vAnarANAm upAgaman
4036023a phalamUlena jIvanto himavantam upAzritAH
4036023c teSAM koTisahasrANAM sahasraM samavartata
4036024a aGgAraka samAnAnAM bhImAnAM bhImakarmaNAm
4036024c vindhyAd vAnarakoTInAM sahasrANy apatan drutam
4036025a kSIrodavelAnilayAs tamAlavanavAsinaH
4036025c nArikelAzanAz caiva teSAM saMkhyA na vidyate
4036026a vanebhyo gahvarebhyaz ca saridbhyaz ca mahAjavAH
4036026c Agacchad vAnarI senA pibantIva divAkaram
4036027a ye tu tvarayituM yAtA vAnarAH sarvavAnarAn
4036027c te vIrA himavac chailaM dadRzus taM mahAdrumam
4036028a tasmin girivare ramye yajJo mahezvaraH purA
4036028c sarvadevamanastoSo babhau divyo manoharaH
4036029a annaviSyandajAtAni mUlAni ca phalAni ca
4036029c amRtasvAdukalpAni dadRzus tatra vAnarAH
4036030a tad anna saMbhavaM divyaM phalaM mUlaM manoharam
4036030c yaH kaz cit sakRd aznAti mAsaM bhavati tarpitaH
4036031a tAni mUlAni divyAni phalAni ca phalAzanAH
4036031c auSadhAni ca divyAni jagRhur hariyUthapAH
4036032a tasmAc ca yajJAyatanAt puSpANi surabhINi ca
4036032c Aninyur vAnarA gatvA sugrIvapriyakAraNAt
4036033a te tu sarve harivarAH pRthivyAM sarvavAnarAn
4036033c saMcodayitvA tvaritaM yUthAnAM jagmur agrataH
4036034a te tu tena muhUrtena yUthapAH zIghrakAriNaH
4036034c kiSkindhAM tvarayA prAptAH sugrIvo yatra vAnaraH
4036035a te gRhItvauSadhIH sarvAH phalaM mUlaM ca vAnarAH
4036035c taM pratigrAhayAm Asur vacanaM cedam abruvan
4036036a sarve parigatAH zailAH samudrAz ca vanAni ca
4036036c pRthivyAM vAnarAH sarve zAsanAd upayAnti te
4036037a evaM zrutvA tato hRSTaH sugrIvaH plavagAdhipaH
4036037c pratijagrAha ca prItas teSAM sarvam upAyanam
4037001a pratigRhya ca tat sarvam upAnayam upAhRtam
4037001c vAnarAn sAntvayitvA ca sarvAn eva vyasarjayat
4037002a visarjayitvA sa harIJ zUrAMs tAn kRtakarmaNaH
4037002c mene kRtArtham AtmAnaM rAghavaM ca mahAbalam
4037003a sa lakSmaNo bhImabalaM sarvavAnarasattamam
4037003c abravIt prazritaM vAkyaM sugrIvaM saMpraharSayan
4037003e kiSkindhAyA viniSkrAma yadi te saumya rocate
4037004a tasya tad vacanaM zrutvA lakSmaNasya subhASitam
4037004c sugrIvaH paramaprIto vAkyam etad uvAca ha
4037005a evaM bhavatu gacchAmaH stheyaM tvacchAsane mayA
4037005c tam evam uktvA sugrIvo lakSmaNaM zubhalakSmaNam
4037006a visarjayAm Asa tadA tArAm anyAz ca yoSitaH
4037006c etety uccair harivarAn sugrIvaH samudAharat
4037007a tasya tad vacanaM zrutvA harayaH zIghram AyayuH
4037007c baddhAJjalipuTAH sarve ye syuH strIdarzanakSamAH
4037008a tAn uvAca tataH prAptAn rAjArkasadRzaprabhaH
4037008c upasthApayata kSipraM zibikAM mama vAnarAH
4037009a zrutvA tu vacanaM tasya harayaH zIghravikramAH
4037009c samupasthApayAm AsuH zibikAM priyadarzanAm
4037010a tAm upasthApitAM dRSTvA zibikAM vAnarAdhipaH
4037010c lakSmaNAruhyatAM zIghram iti saumitrim abravIt
4037011a ity uktvA kAJcanaM yAnaM sugrIvaH sUryasaMnibham
4037011c bRhadbhir haribhir yuktam Aruroha salakSmaNaH
4037012a pANDureNAtapatreNa dhriyamANena mUrdhani
4037012c zuklaiz ca bAlavyajanair dhUyamAnaiH samantataH
4037013a zaGkhabherIninAdaiz ca bandibhiz cAbhivanditaH
4037013c niryayau prApya sugrIvo rAjyazriyam anuttamAm
4037014a sa vAnarazatais tISkNair bahubhiH zastrapANibhiH
4037014c parikIrNo yayau tatra yatra rAmo vyavasthitaH
4037015a sa taM dezam anuprApya zreSThaM rAmaniSevitam
4037015c avAtaran mahAtejAH zibikAyAH salakSmaNaH
4037016a AsAdya ca tato rAmaM kRtAJjalipuTo 'bhavat
4037016c kRtAJjalau sthite tasmin vAnarAz cabhavaMs tathA
4037017a taTAkam iva tad dRSTvA rAmaH kuDmalapaGkajam
4037017c vAnarANAM mahat sainyaM sugrIve prItimAn abhUt
4037018a pAdayoH patitaM mUrdhnA tam utthApya harIzvaram
4037018c preMNA ca bahumAnAc ca rAghavaH pariSasvaje
4037019a pariSvajya ca dharmAtmA niSIdeti tato 'bravIt
4037019c taM niSaNNaM tato dRSTvA kSitau rAmo 'bravId vacaH
4037020a dharmam arthaM ca kAmaM ca kAle yas tu niSevate
4037020c vibhajya satataM vIra sa rAjA harisattama
4037021a hitvA dharmaM tathArthaM ca kAmaM yas tu niSevate
4037021c sa vRkSAgre yathA suptaH patitaH pratibudhyate
4037022a amitrANAM vadhe yukto mitrANAM saMgrahe rataH
4037022c trivargaphalabhoktA tu rAjA dharmeNa yujyate
4037023a udyogasamayas tv eSa prAptaH zatruvinAzana
4037023c saMcintyatAM hi piGgeza haribhiH saha mantribhiH
4037024a evam uktas tu sugrIvo rAmaM vacanam abravIt
4037025a pranaSTA zrIz ca kIrtiz ca kapirAjyaM ca zAzvatam
4037025c tvatprasAdAn mahAbAho punaH prAptam idaM mayA
4037026a tava devaprasadAc ca bhrAtuz ca jayatAM vara
4037026c kRtaM na pratikuryAd yaH puruSANAM sa dUSakaH
4037027a ete vAnaramukhyAz ca zatazaH zatrusUdana
4037027c prAptAz cAdAya balinaH pRthivyAM sarvavAnarAn
4037028a RkSAz cAvahitAH zUrA golAGgUlAz ca rAghava
4037028c kAntAra vanadurgANAm abhijJA ghoradarzanAH
4037029a devagandharvaputrAz ca vAnarAH kAmarUpiNaH
4037029c svaiH svaiH parivRtAH sainyair vartante pathi rAghava
4037030a zataiH zatasahasraiz ca koTibhiz ca plavaMgamAH
4037030c ayutaiz cAvRtA vIrA zaGkubhiz ca paraMtapa
4037031a arbudair arbudazatair madhyaiz cAntaiz ca vAnarAH
4037031c samudraiz ca parArdhaiz ca harayo hariyUthapAH
4037032a AgamiSyanti te rAjan mahendrasamavikramAH
4037032c merumandarasaMkAzA vindhyamerukRtAlayAH
4037033a te tvAm abhigamiSyanti rAkSasaM ye sabAndhavam
4037033c nihatya rAvaNaM saMkhye hy AnayiSyanti maithilIm
4037034a tatas tam udyogam avekSya buddhimAn; haripravIrasya nidezavartinaH
4037034c babhUva harSAd vasudhAdhipAtmajaH; prabuddhanIlotpalatulyadarzanaH
4038001a iti bruvANaM sugrIvaM rAmo dharmabhRtAM varaH
4038001c bAhubhyAM saMpariSvajya pratyuvAca kRtAJjalim
4038002a yad indro varSate varSaM na tac citraM bhaved bhuvi
4038002c Adityo vA sahasrAMzuH kuryAd vitimiraM nabhaH
4038003a candramA razmibhiH kuryAt pRthivIM saumya nirmalAm
4038003c tvadvidho vApi mitrANAM pratikuryAt paraMtapa
4038004a evaM tvayi na tac citraM bhaved yat saumya zobhanam
4038004c jAnAmy ahaM tvAM sugrIva satataM priyavAdinam
4038005a tvatsanAthaH sakhe saMkhye jetAsmi sakalAn arIn
4038005c tvam eva me suhRn mitraM sAhAyyaM kartum arhasi
4038006a jahArAtmavinAzAya vaidehIM rAkSasAdhamaH
4038006c vaJcayitvA tu paulomIm anuhlAdo yathA zacIm
4038007a nacirAt taM haniSyAmi rAvaNaM nizitaiH zaraiH
4038007c paulomyAH pitaraM dRptaM zatakratur ivArihA
4038008a etasminn antare caiva rajaH samabhivartata
4038008c uSNAM tIvrAM sahasrAMzoz chAdayad gagane prabhAm
4038009a dizaH paryAkulAz cAsan rajasA tena mUrchitAH
4038009c cacAla ca mahI sarvA sazailavanakAnanA
4038010a tato nagendrasaMkAzais tIkSNa daMSTrair mahAbalaiH
4038010c kRtsnA saMchAditA bhUmir asaMkhyeyaiH plavaMgamaiH
4038011a nimeSAntaramAtreNa tatas tair hariyUthapaiH
4038011c koTIzataparIvAraiH kAmarUpibhir AvRtA
4038012a nAdeyaiH pArvatIyaiz ca sAmudraiz ca mahAbalaiH
4038012c haribhir meghanirhrAdair anyaiz ca vanacAribhiH
4038013a taruNAdityavarNaiz ca zazigauraiz ca vAnaraiH
4038013c padmakesaravarNaiz ca zvetair merukRtAlayaiH
4038014a koTIsahasrair dazabhiH zrImAn parivRtas tadA
4038014c vIraH zatabalir nAma vAnaraH pratyadRzyata
4038015a tataH kAJcanazailAbhas tArAyA vIryavAn pitA
4038015c anekair dazasAhasraiH koTibhiH pratyadRzyata
4038016a padmakesarasaMkAzas taruNArkanibhAnanaH
4038016c buddhimAn vAnarazreSThaH sarvavAnarasattamaH
4038017a anIkair bahusAhasrair vAnarANAM samanvitaH
4038017c pitA hanumataH zrImAn kesarI pratyadRzyata
4038018a golAGgUlamahArAjo gavAkSo bhImavikramaH
4038018c vRtaH koTisahasreNa vAnarANAm adRzyata
4038019a RkSANAM bhImavegAnAM dhUmraH zatrunibarhaNaH
4038019c vRtaH koTisahasrAbhyAM dvAbhyAM samabhivartata
4038020a mahAcalanibhair ghoraiH panaso nAma yUthapaH
4038020c AjagAma mahAvIryas tisRbhiH koTibhir vRtaH
4038021a nIlAJjanacayAkAro nIlo nAmAtha yUthapaH
4038021c adRzyata mahAkAyaH koTibhir dazabhir vRtaH
4038022a darImukhaz ca balavAn yUthapo 'bhyAyayau tadA
4038022c vRtaH koTisahasreNa sugrIvaM samupasthitaH
4038023a maindaz ca dvividaz cobhAv azviputrau mahAvalau
4038023c koTikoTisahasreNa vAnarANAm adRzyatAm
4038024a tataH koTisahasrANAM sahasreNa zatena ca
4038024c pRSThato 'nugataH prApto haribhir gandhamAdanaH
4038025a tataH padmasahasreNa vRtaH zaGkuzatena ca
4038025c yuvarAjo 'GgadaH prAptaH pitRtulyaparAkramaH
4038026a tatas tArAdyutis tAro harir bhImaparAkramaH
4038026c paJcabhir harikoTIbhir dUrataH pratyadRzyata
4038027a indrajAnuH kapir vIro yUthapaH pratyadRzyata
4038027c ekAdazAnAM koTInAm Izvaras taiz ca saMvRtaH
4038028a tato rambhas tv anuprAptas taruNAdityasaMnibhaH
4038028c ayutena vRtaz caiva sahasreNa zatena ca
4038029a tato yUthapatir vIro durmukho nAma vAnaraH
4038029c pratyadRzyata koTibhyAM dvAbhyAM parivRto balI
4038030a kailAsazikharAkArair vAnarair bhImavikramaiH
4038030c vRtaH koTisahasreNa hanumAn pratyadRzyata
4038031a nalaz cApi mahAvIryaH saMvRto drumavAsibhiH
4038031c koTIzatena saMprAptaH sahasreNa zatena ca
4038032a zarabhaH kumudo vahnir vAnaro rambha eva ca
4038032c ete cAnye ca bahavo vAnarAH kAmarUpiNaH
4038033a AvRtya pRthivIM sarvAM parvatAMz ca vanAni ca
4038033c AplavantaH plavantaz ca garjantaz ca plavaMgamAH
4038033e abhyavartanta sugrIvaM sUryam abhragaNA iva
4038034a kurvANA bahuzabdAMz ca prahRSTA balazAlinaH
4038034c zirobhir vAnarendrAya sugrIvAya nyavedayan
4038035a apare vAnarazreSThAH saMgamya ca yathocitam
4038035c sugrIveNa samAgamya sthitAH prAJjalayas tadA
4038036a sugrIvas tvarito rAme sarvAMs tAn vAnararSabhAn
4038036c nivedayitvA dharmajJaH sthitaH prAJjalir abravIt
4038037a yathA sukhaM parvatanirjhareSu; vaneSu sarveSu ca vAnarendrAH
4038037c nivezayitvA vidhivad balAni; balaM balajJaH pratipattum ISTe
4039001a atha rAjA samRddhArthaH sugrIvaH plavagezvaraH
4039001c uvAca narazArdUlaM rAmaM parabalArdanam
4039002a AgatA viniviSTAz ca balinaH kAmarUpiNaH
4039002c vAnarendrA mahendrAbhA ye madviSayavAsinaH
4039003a ta ime bahusAhasrair haribhir bhImavikramaiH
4039003c AgatA vAnarA ghorA daityadAnavasaMnibhAH
4039004a khyAtakarmApadAnAz ca balavanto jitaklamAH
4039004c parAkrameSu vikhyAtA vyavasAyeSu cottamAH
4039005a pRthivyambucarA rAma nAnAnaganivAsinaH
4039005c koTyagraza ime prAptA vAnarAs tava kiMkarAH
4039006a nidezavartinaH sarve sarve guruhite ratAH
4039006c abhipretam anuSThAtuM tava zakSyanty ariMdama
4039007a yan manyase naravyAghra prAptakAlaM tad ucyatAm
4039007c tat sainyaM tvadvaze yuktam AjJApayitum arhasi
4039008a kAmam eSAm idaM kAryaM viditaM mama tattvataH
4039008c tathApi tu yathA tattvam AjJApayitum arhasi
4039009a tathA bruvANaM sugrIvaM rAmo dazarathAtmajaH
4039009c bAhubhyAM saMpariSvajya idaM vacanam abravIt
4039010a jJAyatAM saumya vaidehI yadi jIvati vA na vA
4039010c sa ca dezo mahAprAjJa yasmin vasati rAvaNaH
4039011a adhigamya ca vaidehIM nilayaM rAvaNasya ca
4039011c prAptakAlaM vidhAsyAmi tasmin kAle saha tvayA
4039012a nAham asmin prabhuH kArye vAnareza na lakSmaNaH
4039012c tvam asya hetuH kAryasya prabhuz ca plavagezvara
4039013a tvam evAjJApaya vibho mama kAryavinizcayam
4039013c tvaM hi jAnAsi yat kAryaM mama vIra na saMzayaH
4039014a suhRddvitIyo vikrAntaH prAjJaH kAlavizeSavit
4039014c bhavAn asmaddhite yuktaH sukRtArtho 'rthavittamaH
4039015a evam uktas tu sugrIvo vinataM nAma yUthapam
4039015c abravId rAma sAmnidhye lakSmaNasya ca dhImataH
4039015e zailAbhaM meghanirghoSam UrjitaM plavagezvaram
4039016a somasUryAtmajaiH sArdhaM vAnarair vAnarottama
4039016c dezakAlanayair yuktaH kAryAkAryavinizcaye
4039017a vRtaH zatasahasreNa vAnarANAM tarasvinAm
4039017c adhigaccha dizaM pUrvAM sazailavanakAnanAm
4039018a tatra sItAM ca vaidehIM nilayaM rAvaNasya ca
4039018c mArgadhvaM giridurgeSu vaneSu ca nadISu ca
4039019a nadIM bhAgIrathIM ramyAM sarayUM kauzikIM tathA
4039019c kAlindIM yamunAM ramyAM yAmunaM ca mahAgirim
4039020a sarasvatIM ca sindhuM ca zoNaM maNinibhodakam
4039020c mahIM kAlamahIM caiva zailakAnanazobhitAm
4039021a brahmamAlAn videhAMz ca mAlavAn kAzikosalAn
4039021c mAgadhAMz ca mahAgrAmAn puNDrAn vaGgAMs tathaiva ca
4039022a pattanaM kozakArANAM bhUmiM ca rajatAkarAm
4039022c sarvam etad vicetavyaM mRgayadbhir tatas tataH
4039023a rAmasya dayitAM bhAryAM sItAM dazarataH snuSAm
4039023c samudram avagADhAMz ca parvatAn pattanAni ca
4039024a mandarasya ca ye koTiM saMzritAH ke cid AyatAm
4039024c karNaprAvaraNAz caiva tathA cApy oSThakarNakAH
4039025a ghorA lohamukhAz caiva javanAz caikapAdakAH
4039025c akSayA balavantaz ca puruSAH puruSAdakAH
4039026a kirAtAH karNacUDAz ca hemAGgAH priyadarzanAH
4039026c AmamInAzanAs tatra kirAtA dvIpavAsinaH
4039027a antarjalacarA ghorA naravyAghrA iti zrutAH
4039027c eteSAm AlayAH sarve viceyAH kAnanaukasaH
4039028a giribhir ye ca gamyante plavanena plavena ca
4039028c ratnavantaM yavadvIpaM saptarAjyopazobhitam
4039029a suvarNarUpyakaM caiva suvarNAkaramaNDitam
4039029c yavadvIpam atikramya ziziro nAma parvataH
4039030a divaM spRzati zRGgeNa devadAnavasevitaH
4039030c eteSAM giridurgeSu pratApeSu vaneSu ca
4039031a rAvaNaH saha vaidehyA mArgitavyas tatas tataH
4039031c tataH samudradvIpAMz ca subhImAn draSTum arhatha
4039032a tatrAsurA mahAkAyAz chAyAM gRhNanti nityazaH
4039032c brahmaNA samanujJAtA dIrghakAlaM bubhukSitAH
4039033a taM kAlameghapratimaM mahoraganiSevitam
4039033c abhigamya mahAnAdaM tIrthenaiva mahodadhim
4039034a tato raktajalaM bhImaM lohitaM nAma sAgaram
4039034c gatA drakSyatha tAM caiva bRhatIM kUTazAlmalIm
4039035a gRhaM ca vainateyasya nAnAratnavibhUSitam
4039035c tatra kailAsasaMkAzaM vihitaM vizvakarmaNA
4039036a tatra zailanibhA bhImA mandehA nAma rAkSasAH
4039036c zailazRGgeSu lambante nAnArUpA bhayAvahAH
4039037a te patanti jale nityaM sUryasyodayanaM prati
4039037c abhitaptAz ca sUryeNa lambante sma punaH punaH
4039038a tataH pANDurameghAbhaM kSIraudaM nAma sAgaram
4039038c gatA drakSyatha durdharSA mukhA hAram ivormibhiH
4039039a tasya madhye mahAzveta RSabho nAma parvataH
4039039c divyagandhaiH kusumitai rajataiz ca nagair vRtaH
4039040a saraz ca rAjataiH padmair jvalitair hemakesaraiH
4039040c nAmnA sudarzanaM nAma rAjahaMsaiH samAkulam
4039041a vibudhAz cAraNA yakSAH kiMnarAH sApsarogaNAH
4039041c hRSTAH samabhigacchanti nalinIM tAM riraMsavaH
4039042a kSIrodaM samatikramya tato drakSyatha vAnarAH
4039042c jalodaM sAgarazreSThaM sarvabhUtabhayAvaham
4039043a tatra tat kopajaM tejaH kRtaM hayamukhaM mahat
4039043c asyAhus tan mahAvegam odanaM sacarAcaram
4039044a tatra vikrozatAM nAdo bhUtAnAM sAgaraukasAm
4039044c zrUyate cAsamarthAnAM dRSTvA tad vaDavAmukham
4039045a svAdUdasyottare deze yojanAni trayodaza
4039045c jAtarUpazilo nAma mahAn kanakaparvataH
4039046a AsInaM parvatasyAgre sarvabhUtanamaskRtam
4039046c sahasrazirasaM devam anantaM nIlavAsasaM
4039047a trizirAH kAJcanaH ketus tAlas tasya mahAtmanaH
4039047c sthApitaH parvatasyAgre virAjati savedikaH
4039048a pUrvasyAM dizi nirmANaM kRtaM tat tridazezvaraiH
4039048c tataH paraM hemamayaH zrImAn udayaparvataH
4039049a tasya koTir divaM spRSTvA zatayojanam AyatA
4039049c jAtarUpamayI divyA virAjati savedikA
4039050a sAlais tAlais tamAlaiz ca karNikAraiz ca puSpitaiH
4039050c jAtarUpamayair divyaiH zobhate sUryasaMnibhaiH
4039051a tatra yojanavistAram ucchritaM dazayojanam
4039051c zRGgaM saumanasaM nAma jAtarUpamayaM dhruvam
4039052a tatra pUrvaM padaM kRtvA purA viSNus trivikrame
4039052c dvitIyaM zikharaM meroz cakAra puruSottamaH
4039053a uttareNa parikramya jambUdvIpaM divAkaraH
4039053c dRzyo bhavati bhUyiSThaM zikharaM tan mahocchrayam
4039054a tatra vaikhAnasA nAma vAlakhilyA maharSayaH
4039054c prakAzamAnA dRzyante sUryavarNAs tapasvinaH
4039055a ayaM sudarzano dvIpaH puro yasya prakAzate
4039055c yasmiMs tejaz ca cakSuz ca sarvaprAnabhRtAm api
4039056a zailasya tasya kuJjeSu kandareSu vaneSu ca
4039056c rAvaNaH saha vaidehyA mArgitavyas tatas tataH
4039057a kAJcanasya ca zailasya sUryasya ca mahAtmanaH
4039057c AviSTA tejasA saMdhyA pUrvA raktA prakAzate
4039058a tataH paramagamyA syAd dik pUrvA tridazAvRtA
4039058c rahitA candrasUryAbhyAm adRzyA timirAvRtA
4039059a zaileSu teSu sarveSu kandareSu vaneSu ca
4039059c ye ca noktA mayA dezA viceyA teSu jAnakI
4039060a etAvad vAnaraiH zakyaM gantuM vAnarapuMgavAH
4039060c abhAskaram amaryAdaM na jAnImas tataH param
4039061a adhigamya tu vaidehIM nilayaM rAvaNasya ca
4039061c mAse pUrNe nivartadhvam udayaM prApya parvatam
4039062a UrdhvaM mAsAn na vastavyaM vasan vadhyo bhaven mama
4039062c siddhArthAH saMnivartadhvam adhigamya ca maithilIm
4039063a mahendrakAntAM vanaSaNDa maNDitAM; dizaM caritvA nipuNena vAnarAH
4039063c avApya sItAM raghuvaMzajapriyAM; tato nivRttAH sukhito bhaviSyatha
4040001a tataH prasthApya sugrIvas tan mahad vAnaraM balam
4040001c dakSiNAM preSayAm Asa vAnarAn abhilakSitAn
4040002a nIlam agnisutaM caiva hanumantaM ca vAnaram
4040002c pitAmahasutaM caiva jAmbavantaM mahAkapim
4040003a suhotraM ca zarIraM ca zaragulmaM tathaiva ca
4040003c gajaM gavAkSaM gavayaM suSeNam RSabhaM tathA
4040004a maindaM ca dvividaM caiva vijayaM gandhamAdanam
4040004c ulkAmukham asaGgaM ca hutAzana sutAv ubhau
4040005a aGgadapramukhAn vIrAn vIraH kapigaNezvaraH
4040005c vegavikramasaMpannAn saMdideza vizeSavit
4040006a teSAm agresaraM caiva mahad balam asaMgagam
4040006c vidhAya harivIrANAm Adizad dakSiNAM dizam
4040007a ye ke cana samuddezAs tasyAM dizi sudurgamAH
4040007c kapIzaH kapimukhyAnAM sa teSAM tAn udAharat
4040008a sahasrazirasaM vindhyaM nAnAdrumalatAvRtam
4040008c narmadAM ca nadIM durgAM mahoraganiSevitAm
4040009a tato godAvarIM ramyAM kRSNAveNIM mahAnadIm
4040009c varadAM ca mahAbhAgAM mahoraganiSevitAm
4040010a mekhalAn utkalAMz caiva dazArNanagarANy api
4040010c avantIm abhravantIM ca sarvam evAnupazyata
4040011a vidarbhAn RSikAMz caiva ramyAn mAhiSakAn api
4040011c tathA baGgAn kaliGgAMz ca kauzikAMz ca samantataH
4040012a anvIkSya daNDakAraNyaM saparvatanadIguham
4040012c nadIM godAvarIM caiva sarvam evAnupazyata
4040013a tathaivAndhrAMz ca puNDrAMz ca colAn pANDyAn sakeralAn
4040013c ayomukhaz ca gantavyaH parvato dhAtumaNDitaH
4040014a vicitrazikharaH zrImAMz citrapuSpitakAnanaH
4040014c sacandanavanoddezo mArgitavyo mahAgiriH
4040015a tatas tAm ApagAM divyAM prasannasalilAM zivAm
4040015c tatra drakSyatha kAverIM vihRtAm apsarogaNaiH
4040016a tasyAsInaM nagasyAgre malayasya mahaujasaM
4040016c drakSyathAdityasaMkAzam agastyam RSisattamam
4040017a tatas tenAbhyanujJAtAH prasannena mahAtmanA
4040017c tAmraparNIM grAhajuSTAM tariSyatha mahAnadIm
4040018a sA candanavanair divyaiH pracchannA dvIpa zAlinI
4040018c kAnteva yuvatiH kAntaM samudram avagAhate
4040019a tato hemamayaM divyaM muktAmaNivibhUSitam
4040019c yuktaM kavATaM pANDyAnAM gatA drakSyatha vAnarAH
4040020a tataH samudram AsAdya saMpradhAryArthanizcayam
4040020c agastyenAntare tatra sAgare vinivezitaH
4040021a citranAnAnagaH zrImAn mahendraH parvatottamaH
4040021c jAtarUpamayaH zrImAn avagADho mahArNavam
4040022a nAnAvidhair nagaiH phullair latAbhiz copazobhitam
4040022c devarSiyakSapravarair apsarobhiz ca sevitam
4040023a siddhacAraNasaMghaiz ca prakIrNaM sumanoharam
4040023c tam upaiti sahasrAkSaH sadA parvasu parvasu
4040024a dvIpas tasyApare pAre zatayojanam AyataH
4040024c agamyo mAnuSair dIptas taM mArgadhvaM samantataH
4040024e tatra sarvAtmanA sItA mArgitavyA vizeSataH
4040025a sa hi dezas tu vadhyasya rAvaNasya durAtmanaH
4040025c rAkSasAdhipater vAsaH sahasrAkSasamadyuteH
4040026a dakSiNasya samudrasya madhye tasya tu rAkSasI
4040026c aGgAraketi vikhyAtA chAyAm AkSipya bhojinI
4040027a tam atikramya lakSmIvAn samudre zatayojane
4040027c giriH puSpitako nAma siddhacAraNasevitaH
4040028a candrasUryAMzusaMkAzaH sAgarAmbusamAvRtaH
4040028c bhrAjate vipulaiH zRGgair ambaraM vilikhann iva
4040029a tasyaikaM kAJcanaM zRGgaM sevate yaM divAkaraH
4040029c zvetaM rAjatam ekaM ca sevate yaM nizAkaraH
4040030a na taM kRtaghnAH pazyanti na nRzaMsA na nAstikAH
4040030c praNamya zirasA zailaM taM vimArgata vAnarAH
4040031a tam atikramya durdharSAH sUryavAn nAma parvataH
4040031c adhvanA durvigAhena yojanAni caturdaza
4040032a tatas tam apy atikramya vaidyuto nAma parvataH
4040032c sarvakAmaphalair vRkSaiH sarvakAlamanoharaiH
4040033a tatra bhuktvA varArhANi mUlAni ca phalAni ca
4040033c madhUni pItvA mukhyAni paraM gacchata vAnarAH
4040034a tatra netramanaHkAntaH kuJjaro nAma parvataH
4040034c agastyabhavanaM yatra nirmitaM vizvakarmaNA
4040035a tatra yojanavistAram ucchritaM dazayojanam
4040035c zaraNaM kAJcanaM divyaM nAnAratnavibhUSitam
4040036a tatra bhogavatI nAma sarpANAm AlayaH purI
4040036c vizAlarathyA durdharSA sarvataH parirakSitA
4040036e rakSitA pannagair ghorais tIkSNadaMSTrair mahAviSaiH
4040037a sarparAjo mahAghoro yasyAM vasati vAsukiH
4040037c niryAya mArgitavyA ca sA ca bhogavatI purI
4040038a taM ca dezam atikramya mahAn RSabhasaMsthitaH
4040038c sarvaratnamayaH zrImAn RSabho nAma parvataH
4040039a gozIrSakaM padmakaM ca harizyAmaM ca candanam
4040039c divyam utpadyate yatra tac caivAgnisamaprabham
4040040a na tu tac candanaM dRSTvA spraSTavyaM ca kadA cana
4040040c rohitA nAma gandharvA ghorA rakSanti tad vanam
4040041a tatra gandharvapatayaH paJcasUryasamaprabhAH
4040041c zailUSo grAmaNIr bhikSuH zubhro babhrus tathaiva ca
4040042a ante pRthivyA durdharSAs tatra svargajitaH sthitAH
4040042c tataH paraM na vaH sevyaH pitRlokaH sudAruNaH
4040042e rAjadhAnI yamasyaiSA kaSTena tamasAvRtA
4040043a etAvad eva yuSmAbhir vIrA vAnarapuMgavAH
4040043c zakyaM vicetuM gantuM vA nAto gatimatAM gatiH
4040044a sarvam etat samAlokya yac cAnyad api dRzyate
4040044c gatiM viditvA vaidehyAH saMnivartitam arhatha
4040045a yas tu mAsAn nivRtto 'gre dRSTA sIteti vakSyati
4040045c mattulyavibhavo bhogaiH sukhaM sa vihariSyati
4040046a tataH priyataro nAsti mama prANAd vizeSataH
4040046c kRtAparAdho bahuzo mama bandhur bhaviSyati
4040047a amitabalaparAkramA bhavanto; vipulaguNeSu kuleSu ca prasUtAH
4040047c manujapatisutAM yathA labhadhvaM; tad adhiguNaM puruSArtham Arabhadhvam
4041001a tataH prasthApya sugrIvas tAn harIn dakSiNAM dizam
4041001c buddhivikramasaMpannAn vAyuvegasamAJjave
4041002a athAhUya mahAtejAH suSeNaM nAma yUthapam
4041002c tArAyAH pitaraM rAjA zvazurabhImavikramam
4041003a abravIt prAJjalir vAkyam abhigamya praNamya ca
4041003c sAhAyyaM kuru rAmasya kRtye 'smin samupasthite
4041004a vRtaH zatasahasreNa vAnarANAM tarasvinAm
4041004c abhigaccha dizaM saumya pazcimAM vAruNIM prabho
4041005a surASTrAn saha bAhlIkAJ zUrAbhIrAMs tathaiva ca
4041005c sphItAJjanapadAn ramyAn vipulAni purANi ca
4041006a puMnAgagahanaM kukSiM bahuloddAlakAkulam
4041006c tathA ketakaSaNDAMz ca mArgadhvaM hariyUthapAH
4041007a pratyak srotogamAz caiva nadyaH zItajalAH zivAH
4041007c tApasAnAm araNyAni kAntArA girayaz ca ye
4041008a girijAlAvRtAM durgAM mArgitvA pazcimAM dizam
4041008c tataH pazcimam AsAdya samudraM draSTum arhatha
4041008e timi nakrAyuta jalam akSobhyam atha vAnaraH
4041009a tataH ketakaSaNDeSu tamAlagahaneSu ca
4041009c kapayo vihariSyanti nArikelavaneSu ca
4041010a tatra sItAM ca mArgadhvaM nilayaM rAvaNasya ca
4041010c marIcipattanaM caiva ramyaM caiva jaTIpuram
4041011a avantIm aGgalopAM ca tathA cAlakSitaM vanam
4041011c rASTrANi ca vizAlAni pattanAni tatas tataH
4041012a sindhusAgarayoz caiva saMgame tatra parvataH
4041012c mahAn hemagirir nAma zatazRGgo mahAdrumaH
4041013a tasya prastheSu ramyeSu siMhAH pakSagamAH sthitAH
4041013c timimatsyagajAMz caiva nIDAny Aropayanti te
4041014a tAni nIDAni siMhAnAM girizRGgagatAz ca ye
4041014c dRptAs tRptAz ca mAtaGgAs toyadasvananiHsvanAH
4041014e vicaranti vizAle 'smiMs toyapUrNe samantataH
4041015a tasya zRGgaM divasparzaM kAJcanaM citrapAdapam
4041015c sarvam Azu vicetavyaM kapibhiH kAmarUpibhiH
4041016a koTiM tatra samudre tu kAJcanIM zatayojanam
4041016c durdarzAM pariyAtrasya gatA drakSyatha vAnarAH
4041017a koTyas tatra caturviMzad gandharvANAM tarasvinAm
4041017c vasanty agninikAzAnAM ghorANAM kAmarUpiNAm
4041018a nAtyAsAdayitavyAs te vAnarair bhImavikramaiH
4041018c nAdeyaM ca phalaM tasmAd dezAt kiM cit plavaMgamaiH
4041019a durAsadA hi te vIrAH sattvavanto mahAbalAH
4041019c phalamUlAni te tatra rakSante bhImavikramAH
4041020a tatra yatnaz ca kartavyo mArgitavyA ca jAnakI
4041020c na hi tebhyo bhayaM kiM cit kapitvam anuvartatAm
4041021a caturbhAge samudrasya cakravAn nAma parvataH
4041021c tatra cakraM sahasrAraM nirmitaM vizvakarmaNA
4041022a tatra paJcajanaM hatvA hayagrIvaM ca dAnavam
4041022c AjahAra tataz cakraM zaGkhaM ca puruSottamaH
4041023a tasya sAnuSu citreSu vizAlAsu guhAsu ca
4041023c rAvaNaH saha vaidehyA mArgitavyas tatas tataH
4041024a yojanAni catuHSaSTir varAho nAma parvataH
4041024c suvarNazRGgaH suzrImAn agAdhe varuNAlaye
4041025a tatra prAgjyotiSaM nAma jAtarUpamayaM puram
4041025c yasmin vasti duSTAtmA narako nAma guhAsu ca
4041026a tasya sAnuSu citreSu vizAlAsu guhAsu ca
4041026c rAvaNaH saha vaidehyA mArgitavyas tatas tataH
4041027a tam atikramya zailendraM kAJcanAntaranirdaraH
4041027c parvataH sarvasauvarNo dhArA prasravaNAyutaH
4041028a taM gajAz ca varAhAz ca siMhA vyAghrAz ca sarvataH
4041028c abhigarjanti satataM tena zabdena darpitAH
4041029a tasmin harihayaH zrImAn mahendraH pAkazAsanaH
4041029c abhiSiktaH surai rAjA meghavAn nAma parvataH
4041030a tam atikramya zailendraM mahendraparipAlitam
4041030c SaSTiM girisahasrANi kAJcanAni gamiSyatha
4041031a taruNAdityavarNAni bhrAjamAnAni sarvataH
4041031c jAtarUpamayair vRkSaiH zobhitAni supuSpitaiH
4041032a teSAM madhye sthito rAjA merur uttamaparvataH
4041032c Adityena prasannena zailo dattavaraH purA
4041033a tenaivam uktaH zailendraH sarva eva tvadAzrayAH
4041033c matprasAdAd bhaviSyanti divArAtrau ca kAJcanAH
4041034a tvayi ye cApi vatsyanti devagandharvadAnavAH
4041034c te bhaviSyanti raktAz ca prabhayA kAJcanaprabhAH
4041035a AdityA vasavo rudrA marutaz ca divaukasaH
4041035c Agamya pazcimAM saMdhyAM merum uttamaparvatam
4041036a Adityam upatiSThanti taiz ca sUryo 'bhipUjitaH
4041036c adRzyaH sarvabhUtAnAm astaM gacchati parvatam
4041037a yojanAnAM sahasrANi dazatAni divAkaraH
4041037c muhUrtArdhena taM zIghram abhiyAti ziloccayam
4041038a zRGge tasya mahad divyaM bhavanaM sUryasaMnibham
4041038c prAsAdaguNasaMbAdhaM vihitaM vizvakarmaNA
4041039a zobhitaM tarubhiz citrair nAnApakSisamAkulaiH
4041039c niketaM pAzahastasya varuNasya mahAtmanaH
4041040a antarA merum astaM ca tAlo dazazirA mahAn
4041040c jAtarUpamayaH zrImAn bhrAjate citravedikaH
4041041a teSu sarveSu durgeSu saraHsu ca saritsu ca
4041041c rAvaNaH saha vaidehyA mArgitavyas tatas tataH
4041042a yatra tiSThati dharmAtmA tapasA svena bhAvitaH
4041042c merusAvarNir ity eva khyAto vai brahmaNA samaH
4041043a praSTavyo merusAvarNir maharSiH sUryasaMnibhaH
4041043c praNamya zirasA bhUmau pravRttiM maithilIM prati
4041044a etAvaj jIvalokasya bhAskaro rajanIkSaye
4041044c kRtvA vitimiraM sarvam astaM gacchati parvatam
4041045a etAvad vAnaraiH zakyaM gantuM vAnarapuMgavAH
4041045c abhAskaram amaryAdaM na jAnImas tataH param
4041046a adhigamya tu vaidehIM nilayaM rAvaNasya ca
4041046c astaM parvatam AsAdya pUrNe mAse nivartata
4041047a UrdhvaM mAsAn na vastavyaM vasan vadhyo bhaven mama
4041047c sahaiva zUro yuSmAbhiH zvazuro me gamiSyati
4041048a zrotavyaM sarvam etasya bhavadbhir diSTa kAribhiH
4041048c gurur eSa mahAbAhuH zvazuro me mahAbalaH
4041049a bhavantaz cApi vikrAntAH pramANaM sarvakarmasu
4041049c pramANam enaM saMsthApya pazyadhvaM pazcimAM dizam
4041050a dRSTAyAM tu narendrasyA patnyAm amitatejasaH
4041050c kRtakRtyA bhaviSyAmaH kRtasya pratikarmaNA
4041051a ato 'nyad api yat kiM cit kAryasyAsya hitaM bhavet
4041051c saMpradhArya bhavadbhiz ca dezakAlArthasaMhitam
4041052a tataH suSeNa pramukhAH plavaMgamAH; sugrIvavAkyaM nipuNaM nizamya
4041052c Amantrya sarve plavagAdhipaM te; jagmur dizaM tAM varuNAbhiguptAm
4042001a tataH saMdizya sugrIvaH zvazuraM pazcimAM dizam
4042001c vIraM zatabaliM nAma vAnaraM vAnararSabhaH
4042002a uvAca rAjA mantrajJaH sarvavAnarasaMmatam
4042002c vAkyam AtmahitaM caiva rAmasya ca hitaM tathA
4042003a vRtaH zatasahasreNa tvadvidhAnAM vanaukasAm
4042003c vaivasvata sutaiH sArdhaM pratiSThasva svamantribhiH
4042004a dizaM hy udIcIM vikrAntAM himazailAvataMsakAm
4042004c sarvataH parimArgadhvaM rAmapatnIm aninditAm
4042005a asmin kArye vinivRtte kRte dAzaratheH priye
4042005c RNAn muktA bhaviSyAmaH kRtArthArthavidAM varAH
4042006a kRtaM hi priyam asmAkaM rAghaveNa mahAtmanA
4042006c tasya cet pratikAro 'sti saphalaM jIvitaM bhavet
4042007a etAM buddhiM samAsthAya dRzyate jAnakI yathA
4042007c tathA bhavadbhiH kartavyam asmatpriyahitaiSibhiH
4042008a ayaM hi sarvabhUtAnAM mAnyas tu narasattamaH
4042008c asmAsu cAgataprItI rAmaH parapuraMjayaH
4042009a imAni vanadurgANi nadyaH zailAntarANi ca
4042009c bhavantaH parimArgaMs tu buddhivikramasaMpadA
4042010a tatra mlecchAn pulindAMz ca zUrasenAMs tathaiva ca
4042010c prasthAlAn bharatAMz caiva kurUMz ca saha madrakaiH
4042011a kAmbojAn yavanAMz caiva zakAn AraTTakAn api
4042011c bAhlIkAn RSikAMz caiva pauravAn atha TaGkaNAn
4042012a cInAn paramacInAMz ca nIhArAMz ca punaH punaH
4042012c anviSya daradAMz caiva himavantaM vicinvatha
4042013a lodhrapadmakaSaNDeSu devadAruvaneSu ca
4042013c rAvaNaH saha vaidehya mArgitavyas tatas tataH
4042014a tataH somAzramaM gatvA devagandharvasevitam
4042014c kAlaM nAma mahAsAnuM parvataM taM gamiSyatha
4042015a mahatsu tasya zRGgeSu nirdareSu guhAsu ca
4042015c vicinudhvaM mahAbhAgAM rAmapatnIM yazasvinIm
4042016a tam atikramya zailendraM hemavargaM mahAgirim
4042016c tataH sudarzanaM nAma parvataM gantum arhatha
4042017a tasya kAnanaSaNDeSu nirdareSu guhAsu ca
4042017c rAvaNaH saha vaidehyA mArgitavyas tatas tataH
4042018a tam atikramya cAkAzaM sarvataH zatayojanam
4042018c aparvatanadI vRkSaM sarvasattvavivarjitam
4042019a taM tu zIghram atikramya kAntAraM romaharSaNam
4042019c kailAsaM pANDuraM zailaM prApya hRSTA bhaviSyatha
4042020a tatra pANDurameghAbhaM jAmbUnadapariSkRtam
4042020c kuberabhavanaM divyaM nirmitaM vizvakarmaNA
4042021a vizAlA nalinI yatra prabhUtakamalotpalA
4042021c haMsakAraNDavAkIrNA apsarogaNasevitA
4042022a tatra vaizravaNo rAjA sarvabhUtanamaskRtaH
4042022c dhanado ramate zrImAn guhyakaiH saha yakSarAT
4042023a tasya candranikazeSu parvateSu guhAsu ca
4042023c rAvaNaH saha vaidehyA mArgitavyas tatas tataH
4042024a krauJcaM tu girim AsAdya bilaM tasya sudurgamam
4042024c apramattaiH praveSTavyaM duSpravezaM hi tat smRtam
4042025a vasanti hi mahAtmAnas tatra sUryasamaprabhAH
4042025c devair apy arcitAH samyag devarUpA maharSayaH
4042026a krauJcasya tu guhAz cAnyAH sAnUni zikharANi ca
4042026c nirdarAz ca nitambAz ca vicetavyAs tatas tataH
4042027a krauJcasya zikharaM cApi nirIkSya ca tatas tataH
4042027c avRkSaM kAmazailaM ca mAnasaM vihagAlayam
4042028a na gatis tatra bhUtAnAM devadAnavarakSasAm
4042028c sa ca sarvair vicetavyaH sasAnuprasthabhUdharaH
4042029a krauJcaM girim atikramya mainAko nAma parvataH
4042029c mayasya bhavanaM tatra dAnavasya svayaM kRtam
4042030a mainAkas tu vicetavyaH sasAnuprasthakandaraH
4042030c strINAm azvamukhInAM ca niketAs tatra tatra tu
4042031a taM dezaM samatikramya AzramaM siddhasevitam
4042031c siddhA vaikhAnasAs tatra vAlakhilyAz ca tApasAH
4042032a vandyAs te tu tapaHsiddhAs tApasA vItakalmaSAH
4042032c praSTavyAz cApi sItAyAH pravRttaM vinayAnvitaiH
4042033a hemapuSkarasaMchannaM tatra vaikhAnasaM saraH
4042033c taruNAdityasaMkAzair haMsair vicaritaM zubhaiH
4042034a aupavAhyaH kuberasya sarvabhauma iti smRtaH
4042034c gajaH paryeti taM dezaM sadA saha kareNubhiH
4042035a tat sAraH samatikramya naSTacandradivAkaram
4042035c anakSatragaNaM vyoma niSpayodam anAdimat
4042036a gabhastibhir ivArkasya sa tu dezaH prakAzate
4042036c vizrAmyadbhis tapaH siddhair devakalpaiH svayamprabhaiH
4042037a taM tu dezam atikramya zailodA nAma nimnagA
4042037c ubhayos tIrayor yasyAH kIcakA nAma veNavaH
4042038a te nayanti paraM tIraM siddhAn pratyAnayanti ca
4042038c uttarAH kuravas tatra kRtapuNyapratizriyAH
4042039a tataH kAJcanapadmAbhiH padminIbhiH kRtodakAH
4042039c nIlavaidUryapatrADhyA nadyas tatra sahasrazaH
4042040a raktotpalavanaiz cAtra maNDitAz ca hiraNmayaiH
4042040c taruNAdityasadRzair bhAnti tatra jalAzayAH
4042041a mahArhamaNipatraiz ca kAJcanaprabha kesaraiH
4042041c nIlotpalavanaiz citraiH sa dezaH sarvatovRtaH
4042042a nistulAbhiz ca muktAbhir maNibhiz ca mahAdhanaiH
4042042c udbhUtapulinAs tatra jAtarUpaiz ca nimnagAH
4042043a sarvaratnamayaiz citrair avagADhA nagottamaiH
4042043c jAtarUpamayaiz cApi hutAzanasamaprabhaiH
4042044a nityapuSpaphalAz cAtra nagAH patrarathAkulAH
4042044c divyagandharasasparzAH sarvakAmAn sravanti ca
4042045a nAnAkArANi vAsAMsi phalanty anye nagottamAH
4042045c muktAvaidUryacitrANi bhUSaNAni tathaiva ca
4042046a strINAM yAny anurUpANi puruSANAM tathaiva ca
4042046c sarvartusukhasevyAni phalanty anye nagottamAH
4042047a mahArhANi vicitrANi haimAny anye nagottamAH
4042047c zayanAni prasUyante citrAstAraNavanti ca
4042048a manaHkAntAni mAlyAni phalanty atrApare drumAH
4042048c pAnAni ca mahArhANi bhakSyANi vividhAni ca
4042049a striyaz ca guNasaMpannA rUpayauvanalakSitAH
4042049c gandharvAH kiMnarA siddhA nAgA vidyAdharAs tathA
4042049e ramante sahitAs tatra nArIbhir bhAskaraprabhAH
4042050a sarve sukRtakarmANaH sarve ratiparAyaNAH
4042050c sarve kAmArthasahitA vasanti saha yoSitaH
4042051a gItavAditranirghoSaH sotkRSTahasitasvanaH
4042051c zrUyate satataM tatra sarvabhUtamanoharaH
4042052a tatra nAmuditaH kaz cin nAsti kaz cid asatpriyaH
4042052c ahany ahani vardhante guNAs tatra manoramAH
4042053a samatikramya taM dezam uttaras toyasAM nidhiH
4042053c tatra somagirir nAma madhye hemamayo mahAn
4042054a indralokagatA ye ca brahmalokagatAz ca ye
4042054c devAs taM samavekSante girirAjaM divaM gatam
4042055a sa tu dezo visUryo 'pi tasya bhAsA prakAzate
4042055c sUryalakSmyAbhivijJeyas tapaseva vivasvatA
4042056a bhagavAn api vizvAtmA zambhur ekAdazAtmakaH
4042056c brahmA vasati devezo brahmarSiparivAritaH
4042057a na kathaM cana gantavyaM kurUNAm uttareNa vaH
4042057c anyeSAm api bhUtAnAM nAtikrAmati vai gatiH
4042058a sA hi somagirir nAma devAnAm api durgamaH
4042058c tam Alokya tataH kSipram upAvartitum arhatha
4042059a etAvad vAnaraiH zakyaM gantuM vAnarapuMgavAH
4042059c abhAskaram amaryAdaM na jAnImas tataH param
4042060a sarvam etad vicetavyaM yan mayA parikIrtitam
4042060c yad anyad api noktaM ca tatrApi kriyatAM matiH
4042061a tataH kRtaM dAzarather mahat priyaM; mahattaraM cApi tato mama priyam
4042061c kRtaM bhaviSyaty anilAnalopamA; videhajA darzanajena karmaNA
4042062a tataH kRtArthAH sahitAH sabAndhavA; mayArcitAH sarvaguNair manoramaiH
4042062c cariSyathorvIM pratizAntazatravaH; sahapriyA bhUtadharAH plavaMgamAH
4043001a vizeSeNa tu sugrIvo hanumatyartham uktavAn
4043001c sa hi tasmin harizreSThe nizcitArtho 'rthasAdhane
4043002a na bhUmau nAntarikSe vA nAmbare nAmarAlaye
4043002c nApsu vA gatisaMgaM te pazyAmi haripuMgava
4043003a sAsurAH sahagandharvAH sanAganaradevatAH
4043003c viditAH sarvalokAs te sasAgaradharAdharAH
4043004a gatir vegaz ca tejaz ca lAghavaM ca mahAkape
4043004c pitus te sadRzaM vIra mArutasya mahaujasaH
4043005a tejasA vApi te bhUtaM samaM bhuvi na vidyate
4043005c tad yathA labhyate sItA tattvam evopapAdaya
4043006a tvayy eva hanumann asti balaM buddhiH parAkramaH
4043006c dezakAlAnuvRttaz ca nayaz ca nayapaNDita
4043007a tataH kAryasamAsaMgam avagamya hanUmati
4043007c viditvA hanumantaM ca cintayAm Asa rAghavaH
4043008a sarvathA nizcitArtho 'yaM hanUmati harIzvaraH
4043008c nizcitArthataraz cApi hanUmAn kAryasAdhane
4043009a tad evaM prasthitasyAsya parijJAtasya karmabhiH
4043009c bhartrA parigRhItasya dhruvaH kAryaphalodayaH
4043010a taM samIkSya mahAtejA vyavasAyottaraM harim
4043010c kRtArtha iva saMvRttaH prahRSTendriyamAnasaH
4043011a dadau tasya tataH prItaH svanAmAGkopazobhitam
4043011c aGgulIyam abhijJAnaM rAjaputryAH paraMtapaH
4043012a anena tvAM harizreSTha cihnena janakAtmajA
4043012c matsakAzAd anuprAptam anudvignAnupazyati
4043013a vyavasAyaz ca te vIra sattvayuktaz ca vikramaH
4043013c sugrIvasya ca saMdezaH siddhiM kathayatIva me
4043014a sa tad gRhya harizreSThaH sthApya mUrdhni kRtAJjaliH
4043014c vanditvA caraNau caiva prasthitaH plavagottamaH
4043015a sa tat prakarSan hariNAM balaM mahad; babhUva vIraH pavanAtmajaH kapi
4043015c gatAmbude vyomni vizuddhamaNDalaH; zazIva nakSatragaNopazobhitaH
4043016a atibalabalam Azritas tavAhaM; harivaravikramavikramair analpaiH
4043016c pavanasuta yathAbhigamyate sA; janakasutA hanumaMs tathA kuruSva
4044001a tad ugrazAsanaM bhartur vijJAya haripuMgavAH
4044001c zalabhA iva saMchAdya medinIM saMpratasthire
4044002a rAmaH prasravaNe tasmin nyavasat sahalakSmaNaH
4044002c pratIkSamANas taM mAsaM yaH sItAdhigame kRtaH
4044003a uttarAM tu dizaM ramyAM girirAjasamAvRtAm
4044003c pratasthe sahasA vIro hariH zatabalis tadA
4044004a pUrvAM dizaM prati yayau vinato hariyUthapaH
4044005a tArAGgadAdi sahitaH plavagaH pavanAtmajaH
4044005c agastyacaritAm AzAM dakSiNAM hariyUthapaH
4044006a pazcimAM tu dizaM ghorAM suSeNaH plavagezvaraH
4044006c pratasthe harizArdUlo bhRzaM varuNapAlitAm
4044007a tataH sarvA dizo rAjA codayitvA yathA tatham
4044007c kapisenA patIn mukhyAn mumoda sukhitaH sukham
4044008a evaM saMcoditAH sarve rAjJA vAnarayUthapAH
4044008c svAM svAM dizam abhipretya tvaritAH saMpratasthire
4044009a nadantaz connadantaz ca garjantaz ca plavaMgamAH
4044009c kSvelanto dhAvamAnAz ca yayuH plavagasattamAH
4044009e AnayiSyAmahe sItAM haniSyAmaz ca rAvaNam
4044010a aham eko haniSyAmi prAptaM rAvaNam Ahave
4044010c tataz conmathya sahasA hariSye janakAtmajAm
4044011a vepamAnaM zrameNAdya bhavadbhiH sthIyatAm iti
4044011c eka evAhariSyAmi pAtAlAd api jAnakIm
4044012a vidhamiSyAmy ahaM vRkSAn dArayiSyAmy ahaM girIn
4044012c dharaNIM dArayiSyAmi kSobhayiSyAmi sAgarAn
4044013a ahaM yojanasaMkhyAyAH plavitA nAtra saMzayaH
4044013c zataM yojanasaMkhyAyAH zataM samadhikaM hy aham
4044014a bhUtale sAgare vApi zaileSu ca vaneSu ca
4044014c pAtAlasyApi vA madhye na mamAcchidyate gatiH
4044015a ity ekaikaM tadA tatra vAnarA baladarpitAH
4044015c Ucuz ca vacanaM tasmin harirAjasya saMnidhau
4045001a gateSu vAnarendreSu rAmaH sugrIvam abravIt
4045001c kathaM bhavAn vinAjIte sarvaM vai maNDalaM bhuvaH
4045002a sugrIvas tu tato rAmam uvAca praNatAtmavAn
4045002c zrUyatAM sarvam AkhyAsye vistareNa nararSabha
4045003a yadA tu dundubhiM nAma dAnavaM mahiSAkRtim
4045003c parikAlayate vAlI malayaM prati parvatam
4045004a tadA viveza mahiSo malayasya guhAM prati
4045004c viveza vAlI tatrApi malayaM tajjighAMsayA
4045005a tato 'haM tatra nikSipto guhAd vArivinItavat
4045005c na ca niSkramate vAlI tadA saMvatsare gate
4045006a tataH kSatajavegena ApupUre tadA bilam
4045006c tad ahaM vismito dRSTvA bhrAtRzokaviSArditaH
4045007a athAhaM kRtabuddhis tu suvyaktaM nihato guruH
4045007c zilAparvatasaMkAzA biladvAri mayA kRtA
4045007e azaknuvan niSkramituM mahiSo vinazed iti
4045008a tato 'ham AgAM kiSkindhAM nirAzas tasya jIvite
4045008c rAjyaM ca sumahat prAptaM tArA ca rumayA saha
4045008e mitraiz ca sahitas tatra vasAmi vigatajvaraH
4045009a AjagAma tato vAlI hatvA taM dAnavarSabham
4045009c tato 'ham adadAM rAjyaM gauravAd bhayayantritaH
4045010a sa mAM jighAMsur duSTAtmA vAlI pravyathitendriyaH
4045010c parilAkayate krodhAd dhAvantaM sacivaiH saha
4045011a tato 'haM vAlinA tena sAnubandhaH pradhAvitaH
4045011c nadIz ca vividhAH pazyan vanAni nagarANi ca
4045012a AdarzatalasaMkAzA tato vai pRthivI mayA
4045012c alAtacakrapratimA dRSTA goSpadavat tadA
4045013a tataH pUrvam ahaM gatvA dakSiNAm aham AzritaH
4045013c dizaM ca pazcimAM bhUyo gato 'smi bhayazaGkitaH
4045013e uttarAM tu dizaM yAntaM hanumAn mAm athAbravIt
4045014a idAnIM me smRtaM rAjan yathA vAlI harIzvaraH
4045014c mataGgena tadA zapto hy asminn AzramamaNDale
4045015a pravized yadi vA vAlI mUrdhAsya zatadhA bhavet
4045015c tatra vAsaH sukho 'smAkaM nirudvigno bhaviSyati
4045016a tataH parvatam AsAdya RzyamUkaM nRpAtmaja
4045016c na viveza tadA vAlI mataGgasya bhayAt tadA
4045017a evaM mayA tadA rAjan pratyakSam upalakSitam
4045017c pRthivImaNDalaM kRtsnaM guhAm asmy Agatas tataH
4046001a darzanArthaM tu vaidehyAH sarvataH kapiyUthapAH
4046001c vyAdiSTAH kapirAjena yathoktaM jagmur aJjasA
4046002a sarAMsi saritaH kakSAn AkAzaM nagarANi ca
4046002c nadIdurgAMs tathA zailAn vicinvanti samantataH
4046003a sugrIveNa samAkhyAtAn sarve vAnarayUthapAH
4046003c pradezAn pravicinvanti sazailavanakAnanAn
4046004a vicintya divasaM sarve sItAdhigamane dhRtAH
4046004c samAyAnti sma medinyAM nizAkAlezu vAnarAH
4046005a sarvartukAMz ca dezeSu vAnarAH saphalAn drumAn
4046005c AsAdya rajanIM zayyAM cakruH sarveSv ahaHsu te
4046006a tad ahaH prathamaM kRtvA mAse prasravaNaM gatAH
4046006c kapirAjena saMgamya nirAzAH kapiyUthapAH
4046007a vicitya tu dizaM pUrvAM yathoktAM sacivaiH saha
4046007c adRSTvA vinataH sItAm AjagAma mahAbalaH
4046008a uttarAM tu dizaM sarvAM vicitya sa mahAkapiH
4046008c AgataH saha sainyena vIraH zatabalis tadA
4046009a suSeNaH pazcimAm AzAM vicitya saha vAnaraiH
4046009c sametya mAse saMpUrNe sugrIvam upacakrame
4046010a taM prasravaNapRSThasthaM samAsAdyAbhivAdya ca
4046010c AsInaM saha rAmeNa sugrIvam idam abruvan
4046011a vicitAH parvatAH sarve vanAni nagarANi ca
4046011c nimnagAH sAgarAntAz ca sarve janapadAs tathA
4046012a guhAz ca vicitAH sarvA yAs tvayA parikIrtitAH
4046012c vicitAz ca mahAgulmA latAvitatasaMtatAH
4046013a gahaneSu ca dezeSu durgeSu viSameSu ca
4046013c sattvAny atipramANAni vicitAni hatAni ca
4046013e ye caiva gahanA dezA vicitAs te punaH punaH
4046014a udArasattvAbhijano mahAtmA; sa maithilIM drakSyati vAnarendraH
4046014c dizaM tu yAm eva gatA tu sItA; tAm Asthito vAyusuto hanUmAn
4047001a sahatArAGgadAbhyAM tu gatvA sa hanumAn kapiH
4047001c sugrIveNa yathoddiSTaM taM dezam upacakrame
4047002a sa tu dUram upAgamya sarvais taiH kapisattamaiH
4047002c vicinoti sma vindhyasya guhAz ca gahanAni ca
4047003a parvatAgrAn nadIdurgAn sarAMsi vipulAn drumAn
4047003c vRkSaSaNDAMz ca vividhAn parvatAn ghanapAdapAn
4047004a anveSamANAs te sarve vAnarAH sarvato dizam
4047004c na sItAM dadRzur vIrA maithilIM janakAtmajAm
4047005a te bhakSayanto mUlAni phalAni vividhAni ca
4047005c anveSamANA durdharSA nyavasaMs tatra tatra ha
4047005e sa tu dezo duranveSo guhAgahanavAn mahAn
4047006a tyaktvA tu taM tadA dezaM sarve vai hariyUthapAH
4047006c dezam anyaM durAdharSaM vivizuz cAkutobhayAH
4047007a yatra vandhyaphalA vRkSA vipuSpAH parNavarjitAH
4047007c nistoyAH sarito yatra mUlaM yatra sudurlabham
4047008a na santi mahiSA yatra na mRgA na ca hastinaH
4047008c zArdUlAH pakSiNo vApi ye cAnye vanagocarAH
4047009a snigdhapatrAH sthale yatra padminyaH phullapaGkajAH
4047009c prekSaNIyAH sugandhAz ca bhramaraiz cApi varjitAH
4047010a kaNDur nAma mahAbhAgaH satyavAdI tapodhanaH
4047010c maharSiH paramAmarSI niyamair duSpradharSaNaH
4047011a tasya tasmin vane putro bAlako dazavArSikaH
4047011c pranaSTo jIvitAntAya kruddhas tatra mahAmuniH
4047012a tena dharmAtmanA zaptaM kRtsnaM tatra mahad vanam
4047012c azaraNyaM durAdharSaM mRgapakSivivarjitam
4047013a tasya te kAnanAntAMs tu girINAM kandarANi ca
4047013c prabhavAni nadInAMca vicinvanti samAhitAH
4047014a tatra cApi mahAtmAno nApazyaJ janakAtmajAm
4047014c hartAraM rAvaNaM vApi sugrIvapriyakAriNaH
4047015a te pravizya tu taM bhImaM latAgulmasamAvRtam
4047015c dadRzuH krUrakarmANam asuraM suranirbhayam
4047016a taM dRSTvA vanarA ghoraM sthitaM zailam ivAparam
4047016c gADhaM parihitAH sarve dRSTvA taM parvatopamam
4047017a so 'pi tAn vAnarAn sarvAn naSTAH sthety abravId balI
4047017c abhyadhAvata saMkruddho muSTim udyamya saMhitam
4047018a tam ApatantaM sahasA vAliputro 'Ggadas tadA
4047018c rAvaNo 'yam iti jJAtvA talenAbhijaghAna ha
4047019a sa vAliputrAbhihato vaktrAc choNitam udvaman
4047019c asuro nyapatad bhUmau paryasta iva parvataH
4047020a te tu tasmin nirucchvAse vAnarA jitakAzinaH
4047020c vyacinvan prAyazas tatra sarvaM tad girigahvaram
4047021a vicitaM tu tataH kRtvA sarve te kAnanaM punaH
4047021c anyadevAparaM ghoraM vivizur girigahvaram
4047022a te vicintya punaH khinnA viniSpatya samAgatAH
4047022c ekAnte vRkSamUle tu niSedur dInamAnasAH
4048001a athAGgadas tadA sarvAn vAnarAn idam abravIt
4048001c parizrAnto mahAprAjJaH samAzvAsya zanair vacaH
4048002a vanAni girayo nadyo durgANi gahanAni ca
4048002c daryo giriguhAz caiva vicitA naH samantataH
4048003a tatra tatra sahAsmAbhir jAnakI na ca dRzyate
4048003c tad vA rakSo hRtA yena sItA surasutopamA
4048004a kAlaz ca no mahAn yAtaH sugrIvaz cograzAsanaH
4048004c tasmAd bhavantaH sahitA vicinvantu samantataH
4048005a vihAya tandrIM zokaM ca nidrAM caiva samutthitAm
4048005c vicinudhvaM yathA sItAM pazyAmo janakAtmajAm
4048006a anirvedaM ca dAkSyaM ca manasaz cAparAjayam
4048006c kAryasiddhikarANy Ahus tasmAd etad bravImy aham
4048007a adyApIdaM vanaM durgaM vicinvantu vanaukasaH
4048007c khedaM tyaktvA punaH sarvaM vanam etad vicIyatAm
4048008a avazyaM kriyamANasya dRzyate karmaNaH phalam
4048008c alaM nirvedam Agamya na hi no malinaM kSamam
4048009a sugrIvaH krodhano rAjA tIkSNadaNDaz ca vAnarAH
4048009c bhetavyaM tasya satataM rAmasya ca mahAtmanaH
4048010a hitArtham etad uktaM vaH kriyatAM yadi rocate
4048010c ucyatAM vA kSamaM yan naH sarveSAm eva vAnarAH
4048011a aGgadasya vacaH zrutvA vacanaM gandhamAdanaH
4048011c uvAcAvyaktayA vAcA pipAsA zramakhinnayA
4048012a sadRzaM khalu vo vAkyam aGgado yad uvAca ha
4048012c hitaM caivAnukUlaM ca kriyatAm asya bhASitam
4048013a punar mArgAmahe zailAn kandarAMz ca darIs tathA
4048013c kAnanAni ca zUnyAni giriprasravaNAni ca
4048014a yathoddiSThAni sarvANi sugrIveNa mahAtmanA
4048014c vicinvantu vanaM sarve giridurgANi sarvazaH
4048015a tataH samutthAya punar vAnarAs te mahAbalAH
4048015c vindhyakAnanasaMkIrNAM vicerur dakSiNAM dizam
4048016a te zAradAbhrapratimaM zrImadrajataparvatam
4048016c zRGgavantaM darIvantam adhiruhya ca vAnarAH
4048017a tatra lodhravanaM ramyaM saptaparNavanAni ca
4048017c vicinvanto harivarAH sItAdarzanakAGkSiNaH
4048018a tasyAgram adhirUDhAs te zrAntA vipulavikramAH
4048018c na pazyanti sma vaidehIM rAmasya mahiSIM priyAm
4048019a te tu dRSTigataM kRtvA taM zailaM bahukandaram
4048019c avArohanta harayo vIkSamANAH samantataH
4048020a avaruhya tato bhUmiM zrAntA vigatacetasaH
4048020c sthitvA muhUrtaM tatrAtha vRkSamUlam upAzritAH
4048021a te muhUrtaM samAzvastAH kiM cid bhagnaparizramAH
4048021c punar evodyatAH kRtsnAM mArgituM dakSiNAM dizam
4048022a hanumatpramukhAs te tu prasthitAH plavagarSabhAH
4048022c vindhyam evAditas tAvad vicerus te samantataH
4049001a saha tArAGgadAbhyAM tu saMgamya hanumAn kapiH
4049001c vicinoti sma vindhyasya guhAz ca gahanAni ca
4049002a siMhazArdUlajuSTAz ca guhAz ca paritas tathA
4049002c viSameSu nagendrasya mahAprasravaNeSu ca
4049003a teSAM tatraiva vasatAM sa kAlo vyatyavartata
4049004a sa hi dezo duranveSo guhA gahanavAn mahAn
4049004c tatra vAyusutaH sarvaM vicinoti sma parvatam
4049005a paraspareNa rahitA anyonyasyAvidUrataH
4049005c gajo gavAkSo gavayaH zarabho gandhamAdanaH
4049006a maindaz ca dvividaz caiva hanumAJ jAmbavAn api
4049006c aGgado yuvarAjaz ca tAraz ca vanagocaraH
4049007a girijAlAvRtAn dezAn mArgitvA dakSiNAM dizam
4049007c kSutpipAsA parItAz ca zrAntAz ca salilArthinaH
4049007e avakIrNaM latAvRkSair dadRzus te mahAbilam
4049008a tataH krauJcAz ca haMsAz ca sArasAz cApi niSkraman
4049008c jalArdrAz cakravAkAz ca raktAGgAH padmareNubhiH
4049009a tatas tad bilam AsAdya sugandhi duratikramam
4049009c vismayavyagramanaso babhUvur vAnararSabhAH
4049010a saMjAtaparizaGkAs te tad bilaM plavagottamAH
4049010c abhyapadyanta saMhRSTAs tejovanto mahAbalAH
4049011a tataH parvatakUTAbho hanumAn mArutAtmajaH
4049011c abravId vAnarAn sarvAn kAntAra vanakovidaH
4049012a girijAlAvRtAn dezAn mArgitvA dakSiNAM dizam
4049012c vayaM sarve parizrAntA na ca pazyAmi maithilIm
4049013a asmAc cApi bilAd dhaMsAH krauJcAz ca saha sArasaiH
4049013c jalArdrAz cakravAkAz ca niSpatanti sma sarvazaH
4049014a nUnaM salilavAn atra kUpo vA yadi vA hradaH
4049014c tathA ceme biladvAre snigdhAs tiSThanti pAdapAH
4049015a ity uktAs tad bilaM sarve vivizus timirAvRtam
4049015c acandrasUryaM harayo dadRzU romaharSaNam
4049016a tatas tasmin bile durge nAnApAdapasaMkule
4049016c anyonyaM saMpariSvajya jagmur yojanam antaram
4049017a te naSTasaMjJAs tRSitAH saMbhrAntAH salilArthinaH
4049017c paripetur bile tasmin kaM cit kAlam atandritAH
4049018a te kRzA dInavadanAH parizrAntAH plavaMgamAH
4049018c AlokaM dadRzur vIrA nirAzA jIvite tadA
4049019a tatas taM dezam Agamya saumyaM vitimiraM vanam
4049019c dadRzuH kAJcanAn vRkSAn dIptavaizvAnaraprabhAn
4049020a sAlAMs tAlAMz ca puMnAgAn kakubhAn vaJjulAn dhavAn
4049020c campakAn nAgavRkSAMz ca karNikArAMz ca puSpitAn
4049021a taruNAdityasaMkAzAn vaidUryamayavedikAn
4049021c nIlavaidUryavarNAz ca padminIH patagAvRtAH
4049022a mahadbhiH kAJcanair vRkSair vRtaM bAlArka saMnibhaiH
4049022c jAtarUpamayair matsyair mahadbhiz ca sakacchapaiH
4049023a nalinIs tatra dadRzuH prasannasalilAyutAH
4049023c kAJcanAni vimAnAni rAjatAni tathaiva ca
4049024a tapanIyagavAkSANi muktAjAlAvRtAni ca
4049024c haimarAjatabhaumAni vaidUryamaNimanti ca
4049025a dadRzus tatra harayo gRhamukhyAni sarvazaH
4049025c puSpitAn phalino vRkSAn pravAlamaNisaMnibhAn
4049026a kAJcanabhramarAMz caiva madhUni ca samantataH
4049026c maNikAJcanacitrANi zayanAny AsanAni ca
4049027a mahArhANi ca yAnAni dadRzus te samantataH
4049027c haimarAjatakAMsyAnAM bhAjanAnAM ca saMcayAn
4049028a agarUNAM ca divyAnAM candanAnAM ca saMcayAn
4049028c zucIny abhyavahAryANi mUlAni ca phalAni ca
4049029a mahArhANi ca pAnAni madhUni rasavanti ca
4049029c divyAnAm ambarANAM ca mahArhANAM ca saMcayAn
4049029e kambalAnAM ca citrANAm ajinAnAM ca saMcayAn
4049030a tatra tatra vicinvanto bile tatra mahAprabhAH
4049030c dadRzur vAnarAH zUrAH striyaM kAM cid adUrataH
4049031a tAM dRSTvA bhRzasaMtrastAz cIrakRSNAjinAmbarAm
4049031c tApasIM niyatAhArAM jvalantIm iva tejasA
4049032a tato hanUmAn girisaMnikAzaH; kRtAJjalis tAm abhivAdya vRddhAm
4049032c papraccha kA tvaM bhavanaM bilaM ca; ratnAni cemAni vadasva kasya
4050001a ity uktvA hanumAMs tatra punaH kRSNAjinAmbarAm
4050001c abravIt tAM mahAbhAgAM tApasIM dharmacAriNIm
4050002a idaM praviSTAH sahasA bilaM timirasaMvRtam
4050002c kSutpipAsA parizrAntAH parikhinnAz ca sarvazaH
4050003a mahad dhiraNyA vivaraM praviSTAH sma pipAsitAH
4050003c imAMs tv evaM vidhAn bhAvAn vividhAn adbhutopamAn
4050003e dRSTvA vayaM pravyathitAH saMbhrAntA naSTacetasaH
4050004a kasyeme kAJcanA vRkSAs taruNAdityasaMnibhAH
4050004c zucIny abhyavahAryANi mUlAni ca phalAni ca
4050005a kAJcanAni vimAnAni rAjatAni gRhANi ca
4050005c tapanIya gavAkSANi maNijAlAvRtAni ca
4050006a puSpitAH phAlavantaz ca puNyAH surabhigandhinaH
4050006c ime jAmbUnadamayAH pAdapAH kasya tejasA
4050007a kAJcanAni ca padmAni jAtAni vimale jale
4050007c kathaM matsyAz ca sauvarNA caranti saha kacchapaiH
4050008a AtmAnam anubhAvaM ca kasya caitat tapobalam
4050008c ajAnatAM naH sarveSAM sarvam AkhyAtum arhasi
4050009a evam uktA hanumatA tApasI dharmacAriNI
4050009c pratyuvAca hanUmantaM sarvabhUtahite ratA
4050010a mayo nAma mahAtejA mAyAvI dAnavarSabhaH
4050010c tenedaM nirmitaM sarvaM mAyayA kAJcanaM vanam
4050011a purA dAnavamukhyAnAM vizvakarmA babhUva ha
4050011c yenedaM kAJcanaM divyaM nirmitaM bhavanottamam
4050012a sa tu varSasahasrANi tapas taptvA mahAvane
4050012c pitAmahAd varaM lebhe sarvam auzasanaM dhanam
4050013a vidhAya sarvaM balavAn sarvakAmezvaras tadA
4050013c uvAsa sukhitaH kAlaM kaM cid asmin mahAvane
4050014a tam apsarasi hemAyAM saktaM dAnavapuMgavam
4050014c vikramyaivAzaniM gRhya jaghAnezaH puraMdaraH
4050015a idaM ca brahmaNA dattaM hemAyai vanam uttamam
4050015c zAzvataH kAmabhogaz ca gRhaM cedaM hiraNmayam
4050016a duhitA merusAvarNer ahaM tasyAH svayaM prabhA
4050016c idaM rakSAmi bhavanaM hemAyA vAnarottama
4050017a mama priyasakhI hemA nRttagItavizAradA
4050017c tayA dattavarA cAsmi rakSAmi bhavanottamam
4050018a kiM kAryaM kasya vA hetoH kAntArANi prapadyatha
4050018c kathaM cedaM vanaM durgaM yuSmAbhir upalakSitam
4050019a imAny abhyavahAryANi mUlAni ca phalAni ca
4050019c bhuktvA pItvA ca pAnIyaM sarvaM me vaktum arhatha
4051001a atha tAn abravIt sarvAn vizrAntAn hariyUthapAn
4051001c idaM vacanam ekAgrA tApasI dharmacAriNI
4051002a vAnarA yadi vaH khedaH pranaSTaH phalabhakSaNAt
4051002c yadi caitan mayA zrAvyaM zrotum icchAmi kathyatAm
4051003a tasyAs tad vacanaM zrutvA hanumAn mArutAtmajaH
4051003c Arjavena yathAtattvam AkhyAtum upacakrame
4051004a rAjA sarvasya lokasya mahendravaruNopamaH
4051004c rAmo dAzarathiH zrImAn praviSTo daNDakAvanam
4051005a lakSmaNena saha bhrAtrA vaidehyA cApi bhAryayA
4051005c tasya bhAryA janasthAnAd rAvaNena hRtA balAt
4051006a vIras tasya sakhA rAjJaH sugrIvo nAma vAnaraH
4051006c rAjA vAnaramukhyAnAM yena prasthApitA vayam
4051007a agastyacaritAm AzAM dakSiNAM yamarakSitAm
4051007c sahaibhir vAnarair mukhyair aGgadapramukhair vayam
4051008a rAvaNaM sahitAH sarve rAkSasaM kAmarUpiNam
4051008c sItayA saha vaidehyA mArgadhvam iti coditAH
4051009a vicitya tu vayaM sarve samagrAM dakSiNAM dizam
4051009c bubhukSitAH parizrAntA vRkSamUlam upAzritAH
4051010a vivarNavadanAH sarve sarve dhyAnaparAyaNAH
4051010c nAdhigacchAmahe pAraM magnAz cintAmahArNave
4051011a cArayantas tataz cakSur dRSTavanto mahad bilam
4051011c latApAdapasaMchannaM timireNa samAvRtam
4051012a asmAd dhaMsA jalaklinnAH pakSaiH salilareNubhiH
4051012c kurarAH sArasAz caiva niSpatanti patatriNaH
4051012e sAdhv atra pravizAmeti mayA tUktAH plavaMgamAH
4051013a teSAm api hi sarveSAm anumAnam upAgatam
4051013c gacchAmaH pravizAmeti bhartRkAryatvarAnvitAH
4051014a tato gADhaM nipatitA gRhya hastau parasparam
4051014c idaM praviSTAH sahasA bilaM timirasaMvRtam
4051015a etan naH kAyam etena kRtyena vayam AgatAH
4051015c tvAM caivopagatAH sarve paridyUnA bubhukSitAH
4051016a AtithyadharmadattAni mUlAni ca phalAni ca
4051016c asmAbhir upabhuktAni bubhukSAparipIDitaiH
4051017a yat tvayA rakSitAH sarve mriyamANA bubhukSayA
4051017c brUhi pratyupakArArthaM kiM te kurvantu vAnarAH
4051018a evam uktA tu sarvajJA vAnarais taiH svayaMprabhA
4051018c pratyuvAca tataH sarvAn idaM vAnarayUthapam
4051019a sarveSAM parituSTAsmi vAnarANAM tarasvinAm
4051019c carantyA mama dharmeNa na kAryam iha kena cit
4052001a evam uktaH zubhaM vAkyaM tApasyA dharmasaMhitam
4052001c uvAca hanumAn vAkyaM tAm aninditaceSTitAm
4052002a zaraNaM tvAM prapannAH smaH sarve vai dharmacAriNi
4052002c yaH kRtaH samayo 'smAkaM sugrIveNa mahAtmanA
4052002e sa tu kAlo vyatikrAnto bile ca parivartatAm
4052003a sA tvam asmAd bilAd ghorAd uttArayitum arhasi
4052004a tasmAt sugrIvavacanAd atikrAntAn gatAyuSaH
4052004c trAtum arhasi naH sarvAn sugrIvabhayazaGkitAn
4052005a mahac ca kAryam asmAbhiH kartavyaM dharmacAriNi
4052005c tac cApi na kRtaM kAryam asmAbhir iha vAsibhiH
4052006a evam uktA hanumatA tApasI vAkyam abravIt
4052006c jIvatA duSkaraM manye praviSTena nivartitum
4052007a tapasas tu prabhAvena niyamopArjitena ca
4052007c sarvAn eva bilAd asmAd uddhariSyAmi vAnarAn
4052008a nimIlayata cakSUMSi sarve vAnarapuMgavAH
4052008c na hi niSkramituM zakyam animIlitalocanaiH
4052009a tataH saMmIlitAH sarve sukumArAGgulaiH karaiH
4052009c sahasA pidadhur dRSTiM hRSTA gamanakAGkSiNaH
4052010a vAnarAs tu mahAtmAno hastaruddhamukhAs tadA
4052010c nimeSAntaramAtreNa bilAd uttAritAs tayA
4052011a tatas tAn vAnarAn sarvAMs tApasI dharmacAriNI
4052011c niHsRtAn viSamAt tasmAt samAzvAsyedam abravIt
4052012a eSa vindhyo giriH zrImAn nAnAdrumalatAyutaH
4052012c eSa prasavaNaH zailaH sAgaro 'yaM mahodadhiH
4052013a svasti vo 'stu gamiSyAmi bhavanaM vAnararSabhAH
4052013c ity uktvA tad bilaM zrImat praviveza svayaMprabhA
4052014a tatas te dadRzur ghoraM sAgaraM varuNAlayam
4052014c apAram abhigarjantaM ghorair Urmibhir Akulam
4052015a mayasya mAyA vihitaM giridurgaM vicinvatAm
4052015c teSAM mAso vyatikrAnto yo rAjJA samayaH kRtaH
4052016a vindhyasya tu gireH pAde saMprapuSpitapAdape
4052016c upavizya mahAbhAgAz cintAm Apedire tadA
4052017a tataH puSpAtibhArAgrA&l latAzatasamAvRtAn
4052017c drumAn vAsantikAn dRSTvA babhUvur bhayazaGkitAH
4052018a te vasantam anuprAptaM prativedya parasparam
4052018c naSTasaMdezakAlArthA nipetur dharaNItale
4052019a sa tu siMharSabha skandhaH pInAyatabhujaH kapiH
4052019c yuvarAjo mahAprAjJa aGgado vAkyam abravIt
4052020a zAsanAt kapirAjasya vayaM sarve vinirgatAH
4052020c mAsaH pUrNo bilasthAnAM harayaH kiM na budhyate
4052021a tasminn atIte kAle tu sugrIveNa kRte svayam
4052021c prAyopavezanaM yuktaM sarveSAM ca vanaukasAm
4052022a tIkSNaH prakRtyA sugrIvaH svAmibhAve vyavasthitaH
4052022c na kSamiSyati naH sarvAn aparAdhakRto gatAn
4052023a apravRttau ca sItAyAH pApam eva kariSyati
4052023c tasmAt kSamam ihAdyaiva prAyopavizanaM hi naH
4052024a tyaktvA putrAMz ca dArAMz ca dhanAni ca gRhANi ca
4052024c yAvan na ghAtayed rAjA sarvAn pratigatAn itaH
4052024e vadhenApratirUpeNa zreyAn mRtyur ihaiva naH
4052025a na cAhaM yauvarAjyena sugrIveNAbhiSecitaH
4052025c narendreNAbhiSikto 'smi rAmeNAkliSTakarmaNA
4052026a sa pUrvaM baddhavairo mAM rAjA dRSTvA vyatikramam
4052026c ghAtayiSyati daNDena tIkSNena kRtanizcayaH
4052027a kiM me suhRdbhir vyasanaM pazyadbhir jIvitAntare
4052027c ihaiva prAyam AsiSye puNye sAgararodhasi
4052028a etac chrutvA kumAreNa yuvarAjena bhASitam
4052028c sarve te vAnarazreSThAH karuNaM vAkyam abruvan
4052029a tIkSNaH prakRtyA sugrIvaH priyAsaktaz ca rAghavaH
4052029c adRSTAyAM ca vaidehyAM dRSTvAsmAMz ca samAgatAn
4052030a rAghavapriyakAmArthaM ghAtayiSyaty asaMzayam
4052030c na kSamaM cAparAddhAnAM gamanaM svAmipArzvataH
4052031a plavaMgamAnAM tu bhayArditAnAM; zrutvA vacas tAra idaM babhASe
4052031c alaM viSAdena bilaM pravizya; vasAma sarve yadi rocate vaH
4052032a idaM hi mAyA vihitaM sudurgamaM; prabhUtavRkSodakabhojyapeyam
4052032c ihAsti no naiva bhayaM puraMdarAn; na rAghavAd vAnararAjato 'pi vA
4052033a zrutvAGgadasyApi vaco 'nukUlam; Ucuz ca sarve harayaH pratItAH
4052033c yathA na hanyema tathAvidhAnam; asaktam adyaiva vidhIyatAM naH
4053001a tathA bruvati tAre tu tArAdhipativarcasi
4053001c atha mene hRtaM rAjyaM hanumAn aGgadena tat
4053002a buddhyA hy aSTAGgayA yuktaM caturbalasamanvitam
4053002c caturdazaguNaM mene hanumAn vAlinaH sutam
4053003a ApUryamANaM zazvac ca tejobalaparAkramaiH
4053003c zazinaM zuklapakSAdau vardhamAnam iva zriyA
4053004a bRhaspatisamaM buddhyA vikrame sadRzaM pituH
4053004c zuzrUSamANaM tArasya zukrasyeva puraMdaram
4053005a bhartur arthe parizrAntaM sarvazAstravizAradam
4053005c abhisaMdhAtum Arebhe hanumAn aGgadaM tataH
4053006a sa caturNAm upAyAnAM tRtIyam upavarNayan
4053006c bhedayAm Asa tAn sarvAn vAnarAn vAkyasaMpadA
4053007a teSu sarveSu bhinneSu tato 'bhISayad aGgadam
4053007c bhISaNair bahubhir vAkyaiH kopopAyasamanvitaiH
4053008a tvaM samarthataraH pitrA yuddhe tAreya vai dhuram
4053008c dRDhaM dhArayituM zaktaH kapirAjyaM yathA pitA
4053009a nityam asthiracittA hi kapayo haripuMgava
4053009c nAjJApyaM viSahiSyanti putradArAn vinA tvayA
4053010a tvAM naite hy anuyuJjeyuH pratyakSaM pravadAmi te
4053010c yathAyaM jAmbavAn nIlaH suhotraz ca mahAkapiH
4053011a na hy ahaM ta ime sarve sAmadAnAdibhir guNaiH
4053011c daNDena na tvayA zakyAH sugrIvAd apakarSitum
4053012a vigRhyAsanam apy Ahur durbalena balIyasaH
4053012c AtmarakSAkaras tasmAn na vigRhNIta durbalaH
4053013a yAM cemAM manyase dhAtrIm etad bilam iti zrutam
4053013c etal lakSmaNabANAnAm ISatkAryaM vidAraNe
4053014a svalpaM hi kRtam indreNa kSipatA hy azaniM purA
4053014c lakSmaNo nizitair bANair bhindyAt patrapuTaM yathA
4053014e lakSmaNasya ca nArAcA bahavaH santi tadvidhAH
4053015a avasthAne yadaiva tvam AsiSyasi paraMtapa
4053015c tadaiva harayaH sarve tyakSyanti kRtanizcayAH
4053016a smarantaH putradArANAM nityodvignA bubhukSitAH
4053016c kheditA duHkhazayyAbhis tvAM kariSyanti pRSThataH
4053017a sa tvaM hInaH suhRdbhiz ca hitakAmaiz ca bandhubhiH
4053017c tRNAd api bhRzodvignaH spandamAnAd bhaviSyasi
4053018a na ca jAtu na hiMsyus tvAM ghorA lakSmaNasAyakAH
4053018c apavRttaM jighAMsanto mahAvegA durAsadAH
4053019a asmAbhis tu gataM sArdhaM vinItavad upasthitam
4053019c AnupUrvyAt tu sugrIvo rAjye tvAM sthApayiSyati
4053020a dharmakAmaH pitRvyas te prItikAmo dRDhavrataH
4053020c zuciH satyapratijJaz ca nA tvAM jAtu jighAMsati
4053021a priyakAmaz ca te mAtus tadarthaM cAsya jIvitam
4053021c tasyApatyaM ca nAsty anyat tasmAd aGgada gamyatAm
4054001a zrutvA hanumato vAkyaM prazritaM dharmasaMhitam
4054001c svAmisatkArasaMyuktam aGgado vAkyam abravIt
4054002a sthairyaM sarvAtmanA zaucam AnRzaMsyam athArjavam
4054002c vikramaiz caiva dhairyaM ca sugrIve nopapadyate
4054003a bhrAtur jyeSThasya yo bhAryAM jIvito mahiSIM priyAm
4054003c dharmeNa mAtaraM yas tu svIkaroti jugupsitaH
4054004a kathaM sa dharmaM jAnIte yena bhrAtrA durAtmanA
4054004c yuddhAyAbhiniyuktena bilasya pihitaM mukham
4054005a satyAt pANigRhItaz ca kRtakarmA mahAyazAH
4054005c vismRto rAghavo yena sa kasya sukRtaM smaret
4054006a lakSmaNasya bhayAd yena nAdharmabhayabhIruNA
4054006c AdiSTA mArgituM sItAM dharmam asmin kathaM bhavet
4054007a tasmin pApe kRtaghne tu smRtihIne calAtmani
4054007c AryaH ko vizvasej jAtu tat kulIno jijIviSuH
4054008a rAjye putraM pratiSThApya saguNo nirguNo 'pi vA
4054008c kathaM zatrukulInaM mAM sugrIvo jIvayiSyati
4054009a bhinnamantro 'parAddhaz ca hInazaktiH kathaM hy aham
4054009c kiSkindhAM prApya jIveyam anAtha iva durbalaH
4054010a upAMzudaNDena hi mAM bandhanenopapAdayet
4054010c zaThaH krUro nRzaMsaz ca sugrIvo rAjyakAraNAt
4054011a bandhanAc cAvasAdAn me zreyaH prAyopavezanam
4054011c anujAnIta mAM sarve gRhAn gacchantu vAnarAH
4054012a ahaM vaH pratijAnAmi na gamiSyAmy ahaM purIm
4054012c ihaiva prAyam AsiSye zreyo maraNam eva me
4054013a abhivAdanapUrvaM tu rAjA kuzalam eva ca
4054013c vAcyas tato yavIyAn me sugrIvo vAnarezvaraH
4054014a ArogyapUrvaM kuzalaM vAcyA mAtA rumA ca me
4054014c mAtaraM caiva me tArAm AzvAsayitum arhatha
4054015a prakRtyA priyaputrA sA sAnukrozA tapasvinI
4054015c vinaSTaM mAm iha zrutvA vyaktaM hAsyati jIvitam
4054016a etAvad uktvA vacanaM vRddhAn apy abhivAdya ca
4054016c saMvivezAGgado bhUmau rudan darbheSu durmanAH
4054017a tasya saMvizatas tatra rudanto vAnararSabhAH
4054017c nayanebhyaH pramumucur uSNaM vai vAriduHkhitAH
4054018a sugrIvaM caiva nindantaH prazaMsantaz ca vAlinam
4054018c parivAryAGgado sarve vyavasyan prAyam Asitum
4054019a mataM tad vAliputrasya vijJAya plavagarSabhAH
4054019c upaspRzyodakaM sarve prAGmukhAH samupAvizan
4054019e dakSiNAgreSu darbheSu udaktIraM samAzritAH
4054020a sa saMvizadbhir bahubhir mahIdharo; mahAdrikUTapramitaiH plavaMgamaiH
4054021c babhUva saMnAditanirjharAntaro; bhRzaM nadadbhir jaladair ivolbaNaiH
4055001a upaviSTAs tu te sarve yasmin prAyaM giristhale
4055001c harayo gRdhrarAjaz ca taM dezam upacakrame
4055002a sAmpAtir nAma nAmnA tu cirajIvI vihaMgamaH
4055002c bhrAtA jaTAyuSaH zrImAn prakhyAtabalapauruSaH
4055003a kandarAd abhiniSkramya sa vindhyasya mahAgireH
4055003c upaviSTAn harIn dRSTvA hRSTAtmA giram abravIt
4055004a vidhiH kila naraM loke vidhAnenAnuvartate
4055004c yathAyaM vihito bhakSyaz cirAn mahyam upAgataH
4055005a paramparANAM bhakSiSye vAnarANAM mRtaM mRtam
4055005c uvAcaivaM vacaH pakSI tAn nirIkSya plavaMgamAn
4055006a tasya tad vacanaM zrutvA bhakSalubdhasya pakSiNaH
4055006c aGgadaH param Ayasto hanUmantam athAbravIt
4055007a pazya sItApadezena sAkSAd vaivasvato yamaH
4055007c imaM dezam anuprApto vAnarANAM vipattaye
4055008a rAmasya na kRtaM kAryaM rAjJo na ca vacaH kRtam
4055008c harINAm iyam ajJAtA vipattiH sahasAgatA
4055009a vaidehyAH priyakAmena kRtaM karma jaTAyuSA
4055009c gRdhrarAjena yat tatra zrutaM vas tad azeSataH
4055010a tathA sarvANi bhUtAni tiryagyonigatAny api
4055010c priyaM kurvanti rAmasya tyaktvA prANAn yathA vayam
4055011a rAghavArthe parizrAntA vayaM saMtyaktajIvitAH
4055011c kAntArANi prapannAH sma na ca pazyAma maithilIm
4055012a sa sukhI gRdhrarAjas tu rAvaNena hato raNe
4055012c muktaz ca sugrIvabhayAd gataz ca paramAM gatim
4055013a jaTAyuSo vinAzena rAjJo dazarathasya ca
4055013c haraNena ca vaidehyAH saMzayaM harayo gatAH
4055014a rAmalakSmaNayor vAsAm araNye saha sItayA
4055014c rAghavasya ca bANena vAlinaz ca tathA vadhaH
4055015a rAmakopAd azeSANAM rAkSasAnAM tathA vadhaH
4055015c kaikeyyA varadAnena idaM hi vikRtaM kRtam
4055016a tat tu zrutvA tadA vAkyam aGgadasya mukhodgatam
4055016c abravId vacanaM gRdhras tIkSNatuNDo mahAsvanaH
4055017a ko 'yaM girA ghoSayati prANaiH priyatarasya me
4055017c jaTAyuSo vadhaM bhrAtuH kampayann iva me manaH
4055018a katham AsIj janasthAne yuddhaM rAkSasagRdhrayoH
4055018c nAmadheyam idaM bhrAtuz cirasyAdya mayA zrutam
4055019a yavIyaso guNajJasya zlAghanIyasya vikramaiH
4055019c tad iccheyam ahaM zrotuM vinAzaM vAnararSabhAH
4055020a bhrAtur jaTAyuSas tasya janasthAnanivAsinaH
4055020c tasyaiva ca mama bhrAtuH sakhA dazarathaH katham
4055020e yasya rAmaH priyaH putro jyeSTho gurujanapriyaH
4055021a sUryAMzudagdhapakSatvAn na zaknomi visarpitum
4055021c iccheyaM parvatAd asmAd avatartum ariMdamAH
4056001a zokAd bhraSTasvaram api zrutvA te hariyUthapAH
4056001c zraddadhur naiva tad vAkyaM karmaNA tasya zaGkitAH
4056002a te prAyam upaviSTAs tu dRSTvA gRdhraM plavaMgamAH
4056002c cakrur buddhiM tadA raudrAM sarvAn no bhakSayiSyati
4056003a sarvathA prAyam AsInAn yadi no bhakSayiSyati
4056003c kRtakRtyA bhaviSyAmaH kSipraM siddhim ito gatAH
4056004a etAM buddhiM tataz cakruH sarve te vAnararSabhAH
4056004c avatArya gireH zRGgAd gRdhram AhAGgadas tadA
4056005a babhUvur kSarajo nAma vAnarendraH pratApavAn
4056005c mamAryaH pArthivaH pakSin dhArmikau tasya cAtmajau
4056006a sugrIvaz caiva valI ca putrAv oghabalAv ubhau
4056006c loke vizrutakarmAbhUd rAjA vAlI pitA mama
4056007a rAjA kRtsnasya jagata ikSvAkUNAM mahArathaH
4056007c rAmo dAzarathiH zrImAn praviSTo daNDakAvanam
4056008a lakSmaNena saha bhrAtrA vaidehyA cApi bhAryayA
4056008c pitur nidezanirato dharmyaM panthAnam AzritaH
4056008e tasya bhAryA janasthAnAd rAvaNena hRtA balAt
4056009a rAmasya ca pitur mitraM jaTAyur nAma gRdhrarAT
4056009c dadarza sItAM vaidehIM hriyamANAM vihAyasA
4056010a rAvaNaM virathaM kRtvA sthApayitvA ca maithilIm
4056010c parizrAntaz ca vRddhaz ca rAvaNena hato raNe
4056011a evaM gRdhro hatas tena rAvaNena bahIyasA
4056011c saMskRtaz cApi rAmeNa gataz ca gatim uttamAm
4056012a tato mama pitRvyeNa sugrIveNa mahAtmanA
4056012c cakAra rAghavaH sakhyaM so 'vadhIt pitaraM mama
4056013a mAma pitrA viruddho hi sugrIvaH sacivaiH saha
4056013c nihatya vAlinaM rAmas tatas tam abhiSecayat
4056014a sa rAjye sthApitas tena sugrIvo vAnarezvaraH
4056014c rAjA vAnaramukhyAnAM yena prasthApitA vayam
4056015a evaM rAmaprayuktAs tu mArgamANAs tatas tataH
4056015c vaidehIM nAdhigacchAmo rAtrau sUryaprabhAm iva
4056016a te vayaM daNdakAraNyaM vicitya susamAhitAH
4056016c ajJAnAt tu praviSTAH sma dharaNyA vivRtaM bilam
4056017a mayasya mAyA vihitaM tad bilaM ca vicinvatAm
4056017c vyatItas tatra no mAso yo rAjJA sAmayaH kRtaH
4056018a te vayaM kapirAjasya sarve vacanakAriNaH
4056018c kRtAM saMsthAm atikrAntA bhayAt prAyam upAsmahe
4056019a kruddhe tasmiMs tu kAkutsthe sugrIve ca salakSmaNe
4056019c gatAnAm api sarveSAM tatra no nAsti jIvitam
4057001a ity uktaH karuNaM vAkyaM vAnarais tyaktajIvitaiH
4057001c sabASpo vAnarAn gRdhraH pratyuvAca mahAsvanaH
4057002a yavIyAn mama sa bhrAtA jaTAyur nAma vAnarAH
4057002c yamAkhyAta hataM yuddhe rAvaNena balIyasA
4057003a vRddhabhAvAd apakSatvAc chRNvaMs tad api marSaye
4057003c na hi me zaktir adyAsti bhrAtur vairavimokSaNe
4057004a purA vRtravadhe vRtte sa cAhaM ca jayaiSiNau
4057004c Adityam upayAtau svo jvalantaM razmimAlinam
4057005a AvRtyAkAzamArgeNa javena sma gatau bhRzam
4057005c madhyaM prApte ca sUrye ca jaTAyur avasIdati
4057006a tam ahaM bhrAtaraM dRSTvA sUryarazmibhir arditam
4057006c pakSAbhyaM chAdayAm Asa snehAt paramavihvalam
4057007a nirdagdhapakSaH patito vindhye 'haM vAnarottamAH
4057007c aham asmin vasan bhrAtuH pravRttiM nopalakSaye
4057008a jaTAyuSas tv evam ukto bhrAtrA saMpAtinA tadA
4057008c yuvarAjo mahAprAjJaH pratyuvAcAGgadas tadA
4057009a jaTAyuSo yadi bhrAtA zrutaM te gaditaM mayA
4057009c AkhyAhi yadi jAnAsi nilayaM tasya rakSasaH
4057010a adIrghadarzinaM taM vA rAvaNaM rAkSasAdhipam
4057010c antike yadi vA dUre yadi jAnAsi zaMsa naH
4057011a tato 'bravIn mahAtejA jyeSTho bhrAtA jaTAyuSaH
4057011c AtmAnurUpaM vacanaM vAnarAn saMpraharSayan
4057012a nirdagdhapakSo gRdhro 'haM gatavIryaH plavaMgamAH
4057012c vAGmAtreNa tu rAmasya kariSye sAhyam uttamam
4057013a jAnAmi vAruNAl lokAn viSNos traivikramAn api
4057013c devAsuravimardAMz ca amRtasya ca manthanam
4057014a rAmasya yad idaM kAryaM kartavyaM prathamaM mayA
4057014c jarayA ca hRtaM tejaH prANAz ca zithilA mama
4057015a taruNI rUpasaMpannA sarvAbharaNabhUSitA
4057015c hriyamANA mayA dRSTA rAvaNena durAtmanA
4057016a krozantI rAma rAmeti lakSmaNeti ca bhAminI
4057016c bhUSaNAny apavidhyantI gAtrANi ca vidhunvatI
4057017a sUryaprabheva zailAgre tasyAH kauzeyam uttamam
4057017c asite rAkSase bhAti yathA vA taDidambude
4057018a tAM tu sItAm ahaM manye rAmasya parikIrtanAt
4057018c zrUyatAM me kathayato nilayaM tasya rakSasaH
4057019a putro vizravasaH sAkSAd bhrAtA vaizravaNasya ca
4057019c adhyAste nagarIM laGkAM rAvaNo nAma rAkasaH
4057020a ito dvIpe samudrasya saMpUrNe zatayojane
4057020c tasmi&l laGkA purI ramyA nirmitA vizvakarmaNA
4057021a tasyAM vasati vaidehI dInA kauzeyavAsinI
4057021c rAvaNAntaHpure ruddhA rAkSasIbhiH surakSitA
4057022a janakasyAtmajAM rAjJas tasyAM drakSyatha maithilIm
4057022c laGkAyAm atha guptAyAM sAgareNa samantataH
4057023a saMprApya sAgarasyAntaM saMpUrNaM zatayojanam
4057023c AsAdya dakSiNaM kUlaM tato drakSyatha rAvaNam
4057024a tatraiva tvaritAH kSipraM vikramadhvaM plavaMgamAH
4057024c jJAnena khalu pazyAmi dRSTvA pratyAgamiSyatha
4057025a AdyaH panthAH kuliGgAnAM ye cAnye dhAnyajIvinaH
4057025c dvitIyo balibhojAnAM ye ca vRkSaphalAzinaH
4057026a bhAsAs tRtIyaM gacchanti krauJcAz ca kuraraiH saha
4057026c zyenAz caturthaM gacchanti gRdhrA gacchanti paJcamam
4057027a balavIryopapannAnAM rUpayauvanazAlinAm
4057027c SaSThas tu panthA haMsAnAM vainateyagatiH parA
4057027e vainateyAc ca no janma sarveSAM vAnararSabhAH
4057028a garhitaM tu kRtaM karma yena sma pizitAzanAH
4057028c ihastho 'haM prapazyAmi rAvaNaM jAnakIM tathA
4057029a asmAkam api sauvarNaM divyaM cakSurbalaM tathA
4057029c tasmAd AhAravIryeNa nisargeNa ca vAnarAH
4057029e AyojanazatAt sAgrAd vayaM pazyAma nityazaH
4057030a asmAkaM vihitA vRttir nisArgeNa ca dUrataH
4057030c vihitA pAdamUle tu vRttiz caraNayodhinAm
4057031a upAyo dRzyatAM kaz cil laGghane lavaNAmbhasaH
4057031c abhigamya tu vaidehIM samRddhArthA gamiSyatha
4057032a samudraM netum icchAmi bhavadbhir varuNAlayam
4057032c pradAsyAmy udakaM bhrAtuH svargatasya mahAtmanaH
4057033a tato nItvA tu taM dezaM tIre nadanadIpateH
4057033c nirdagdhapakSaM saMpAtiM vAnarAH sumahaujasaH
4057034a punaH pratyAnayitvA vai taM dezaM patagezvaram
4057034c babhUvur vAnarA hRSTAH pravRttim upalabhya te
4058001a tatas tad amRtAsvAdaM gRdhrarAjena bhASitam
4058001c nizamya vadato hRSTAs te vacaH plavagarSabhAH
4058002a jAmbavAn vai harizreSThaH saha sarvaiH plavaMgamaiH
4058002c bhUtalAt sahasotthAya gRdhrarAjAnam abravIt
4058003a kva sItA kena vA dRSTA ko vA harati maithilIm
4058003c tad AkhyAtu bhavAn sarvaM gatir bhava vanaukasAm
4058004a ko dAzarathibANAnAM vajraveganipAtinAm
4058004c svayaM lakSmaNamuktAnAM na cintayati vikramam
4058005a sa harIn prItisaMyuktAn sItA zrutisamAhitAn
4058005c punar AzvAsayan prIta idaM vacanam abravIt
4058006a zrUyatAm iha vaidehyA yathA me haraNaM zrutam
4058006c yena cApi mamAkhyAtaM yatra cAyatalocanA
4058007a aham asmin girau durge bahuyojanam Ayate
4058007c cirAn nipatito vRddhaH kSINaprANaparAkramaH
4058008a taM mAm evaMgataM putraH supArzvo nAma nAmataH
4058008c AhAreNa yathAkAlaM bibharti patatAM varaH
4058009a tIkSNakAmAs tu gandharvAs tIkSNakopA bhujaMgamAH
4058009c mRgANAM tu bhayaM tIkSNaM tatas tIkSNakSudhA vayam
4058010a sa kadA cit kSudhArtasya mama cAhArakAGkSiNaH
4058010c gatasUryo 'hani prApto mama putro hy anAmiSaH
4058011a sa mayA vRddhabhAvAc ca kopAc ca paribhartsitaH
4058011c kSutpipAsA parItena kumAraH patatAM varaH
4058012a sa mamAhArasaMrodhAt pIDitaH prItivardhanaH
4058012c anumAnya yathAtattvam idaM vacanam abravIt
4058013a ahaM tAta yathAkAlam AmiSArthI kham AplutaH
4058013c mahendrasya girer dvAram AvRtya ca samAsthitaH
4058014a tatra sattvasahasrANAM sAgarAntaracAriNAm
4058014c panthAnam eko 'dhyavasaM saMniroddhum avAGmukhaH
4058015a tatra kaz cin mayA dRSTaH sUryodayasamaprabhAm
4058015c striyam AdAya gacchan vai bhinnAJjanacayopamaH
4058016a so 'ham abhyavahArArthI tau dRSTvA kRtanizcayaH
4058016c tena sAmnA vinItena panthAnam abhiyAcitaH
4058017a na hi sAmopapannAnAM prahartA vidyate kva cit
4058017c nIceSv api janaH kaz cit kim aGga bata madvidhaH
4058018a sa yAtas tejasA vyoma saMkSipann iva vegataH
4058018c athAhaM khe carair bhUtair abhigamya sabhAjitaH
4058019a diSTyA jIvasi tAteti abruvan mAM maharSayaH
4058019c kathaM cit sakalatro 'sau gatas te svasty asaMzayam
4058020a evam uktas tato 'haM taiH siddhaiH paramazobhanaiH
4058020c sa ca me rAvaNo rAjA rakSasAM prativeditaH
4058021a haran dAzarather bhAryAM rAmasya janakAtmajAm
4058021c bhraSTAbharaNakauzeyAM zokavegaparAjitAm
4058022a rAmalakSmaNayor nAma krozantIM muktamUrdhajAm
4058022c eSa kAlAtyayas tAvad iti vAkyavidAM varaH
4058023a etam arthaM samagraM me supArzvaH pratyavedayat
4058023c tac chrutvApi hi me buddhir nAsIt kA cit parAkrame
4058024a apakSo hi kathaM pakSI karma kiM cid upakramet
4058024c yat tu zakyaM mayA kartuM vAgbuddhiguNavartinA
4058025a zrUyatAM tat pravakSyAmi bhavatAM pauruSAzrayam
4058025c vAGmatibhyAM hi sArveSAM kariSyAmi priyaM hi vaH
4058025e yad dhi dAzaratheH kAryaM mama tan nAtra saMzayaH
4058026a te bhavanto matizreSThA balavanto manasvinaH
4058026c sahitAH kapirAjena devair api durAsadAH
4058027a rAmalakSmaNabANAz ca nizitAH kaGkapatriNaH
4058027c trayANAm api lokAnAM paryAptAs trANanigrahe
4058028a kAmaM khalu dazagrIvas tejobalasamanvitaH
4058028c bhavatAM tu samarthAnAM na kiM cid api duSkaram
4058029a tad alaM kAlasaMgena kriyatAM buddhinizcayaH
4058029c na hi karmasu sajjante buddhimanto bhavadvidhAH
4059001a tataH kRtodakaM snAtaM taM gRdhraM hariyUthapAH
4059001c upaviSTA girau durge parivArya samantataH
4059002a tam aGgadam upAsInaM taiH sarvair haribhir vRtam
4059002c janitapratyayo harSAt saMpAtiH punar abravIt
4059003a kRtvA niHzabdam ekAgrAH zRNvantu harayo mama
4059003c tattvaM saMkIrtayiSyAmi yathA jAnAmi maithilIm
4059004a asya vindhyasya zikhare patito 'smi purA vane
4059004c sUryAtapaparItAGgo nirdagdhaH sUryarazmibhiH
4059005a labdhasaMjJas tu SaDrAtrAd vivazo vihvalann iva
4059005c vIkSamANo dizaH sarvA nAbhijAnAmi kiM cana
4059006a tatas tu sAgarAJ zailAn nadIH sarvAH sarAMsi ca
4059006c vanAny aTavidezAMz ca samIkSya matir Agamat
4059007a hRSTapakSigaNAkIrNaH kandarAntarakUTavAn
4059007c dakSiNasyodadhes tIre vindhyo 'yam iti nizcitaH
4059008a AsIc cAtrAzramaM puNyaM surair api supUjitam
4059008c RSir nizAkaro nAma yasminn ugratapAbhavat
4059009a aSTau varSasahasrANi tenAsminn RSiNA vinA
4059009c vasato mama dharmajJAH svargate tu nizAkare
4059010a avatIrya ca vindhyAgrAt kRcchreNa viSamAc chanaiH
4059010c tIkSNadarbhAM vasumatIM duHkhena punar AgataH
4059011a tam RSiM draSTu kAmo 'smi duHkhenAbhyAgato bhRzam
4059011c jaTAyuSA mayA caiva bahuzo 'bhigato hi saH
4059012a tasyAzramapadAbhyAze vavur vAtAH sugandhinaH
4059012c vRkSo nApuSpitaH kaz cid aphalo vA na dRzyate
4059013a upetya cAzramaM puNyaM vRkSamUlam upAzritaH
4059013c draSTukAmaH pratIkSe ca bhagavantaM nizAkaram
4059014a athApazyam adUrastham RSiM jvalitatejasaM
4059014c kRtAbhiSekaM durdharSam upAvRttam udaGmukham
4059015a tam RkSAH sRmarA vyAghrAH siMhA nAgAH sarIsRpAH
4059015c parivAryopagacchanti dAtAraM prANino yathA
4059016a tataH prAptam RSiM jJAtvA tAni sattvAni vai yayuH
4059016c praviSTe rAjani yathA sarvaM sAmAtyakaM balam
4059017a RSis tu dRSTvA mAM tuSTaH praviSTaz cAzramaM punaH
4059017c muhUrtamAtrAn niSkramya tataH kAryam apRcchata
4059018a saumya vaikalyatAM dRSTvA roMNAM te nAvagamyate
4059018c agnidagdhAv imau pakSau tvak caiva vraNitA tava
4059019a dvau gRdhrau dRSTapUrvau me mAtarizvasamau jave
4059019c gRdhrANAM caiva rAjAnau bhrAtarau kAmarUpiNau
4059020a jyeSThas tvaM tu ca saMpAtir jaTAyur anujas tava
4059020c mAnuSaM rUpam AsthAya gRhNItAM caraNau mama
4059021a kiM te vyAdhisamutthAnaM pakSayoH patanaM katham
4059021c daNDo vAyaM dhRtaH kena sarvam AkhyAhi pRcchataH
4060001a tatas tad dAruNaM karma duSkaraM sAhasAt kRtam
4060001c AcacakSe muneH sarvaM sUryAnugamanaM tathA
4060002a bhagavan vraNayuktatvAl lajjayA cAkulendriyaH
4060002c parizrAnto na zaknomi vacanaM paribhASitum
4060003a ahaM caiva jaTAyuz ca saMgharSAd darpamohitau
4060003c AkAzaM patitau vIrau jighAsantau parAkramam
4060004a kailAsazikhare baddhvA munInAm agrataH paNam
4060004c raviH syAd anuyAtavyo yAvad astaM mahAgirim
4060005a athAvAM yugapat prAptAv apazyAva mahItale
4060005c rathacakrapramANAni nagarANi pRthak pRthak
4060006a kva cid vAditraghoSAMz ca brahmaghoSAMz ca zuzruva
4060006c gAyantIz cAGganA bahvIH pazyAvo raktavAsasaH
4060007a tUrNam utpatya cAkAzam Adityapatham Asthitau
4060007c AvAm AlokayAvas tad vanaM zAdvalasaMsthitam
4060008a upalair iva saMchannA dRzyate bhUH ziloccayaiH
4060008c ApagAbhiz ca saMvItA sUtrair iva vasuMdharA
4060009a himavAMz caiva vindhyaz ca meruz ca sumahAn nagaH
4060009c bhUtale saMprakAzante nAgA iva jalAzaye
4060010a tIvrasvedaz ca khedaz ca bhayaM cAsIt tadAvayoH
4060010c samAvizata mohaz ca mohAn mUrchA ca dAruNA
4060011a na dig vijJAyate yAmyA nAgenyA na ca vAruNI
4060011c yugAnte niyato loko hato dagdha ivAgninA
4060012a yatnena mahatA bhUyo raviH samavalokitaH
4060012c tulyaH pRthvIpramANena bhAskaraH pratibhAti nau
4060013a jaTAyur mAm anApRcchya nipapAta mahIM tataH
4060013c taM dRSTvA tUrNam AkAzAd AtmAnaM muktavAn aham
4060014a pakSibhyAM ca mayA gupto jaTAyur na pradahyata
4060014c pramAdAt tatra nirdagdhaH patan vAyupathAd aham
4060015a AzaGke taM nipatitaM janasthAne jaTAyuSam
4060015c ahaM tu patito vindhye dagdhapakSo jaDIkRtaH
4060016a rAjyena hIno bhrAtrA ca pakSAbhyAM vikrameNa ca
4060016c sarvathA martum evecchan patiSye zikharAd gireH
4061001a evam uktvA munizreSTham arudaM duHkhito bhRzam
4061001c atha dhyAtvA muhUrtaM tu bhagavAn idam abravIt
4061002a pakSau ca te prapakSau ca punar anyau bhaviSyataH
4061002c cakSuSI caiva prANAz ca vikramaz ca balaM ca te
4061003a purANe sumahat kAryaM bhaviSyaM hi mayA zrutam
4061003c dRSTaM me tapasA caiva zrutvA ca viditaM mama
4061004a rAjA dazaratho nAma kaz cid ikSvAkunandanaH
4061004c tasya putro mahAtejA rAmo nAma bhaviSyati
4061005a araNyaM ca saha bhrAtrA lakSmaNena gamiSyati
4061005c tasminn arthe niyuktaH san pitrA satyaparAkramaH
4061006a nairRto rAvaNo nAma tasyA bhAryAM hariSyati
4061006c rAkSasendro janasthAnAd avadhyaH suradAnavaiH
4061007a sA ca kAmaiH pralobhyantI bhakSyair bhojyaiz ca maithilI
4061007c na bhokSyati mahAbhAgA duHkhamagnA yazasvinI
4061008a paramAnnaM tu vaidehyA jJAtvA dAsyati vAsavaH
4061008c yad annam amRtaprakhyaM surANAm api durlabham
4061009a tad annaM maithilI prApya vijJAyendrAd idaM tv iti
4061009c agram uddhRtya rAmAya bhUtale nirvapiSyati
4061010a yadi jIvati me bhartA lakSmaNena saha prabhuH
4061010c devatvaM gatayor vApi tayor annam idaM tv iti
4061011a eSyanty anveSakAs tasyA rAmadUtAH plavaMgamAH
4061011c AkhyeyA rAmamahiSI tvayA tebhyo vihaMgama
4061012a sarvathA tu na gantavyam IdRzaH kva gamiSyasi
4061012c dezakAlau pratIkSasva pakSau tvaM pratipatsyase
4061013a utsaheyam ahaM kartum adyaiva tvAM sapakSakam
4061013c ihasthas tvaM tu lokAnAM hitaM kAryaM kariSyasi
4061014a tvayApi khalu tat kAryaM tayoz ca nRpaputrayoH
4061014c brAhmaNAnAM surANAM ca munInAM vAsavasya ca
4061015a icchAmy aham api draSTuM bhrAtaru rAmalakSmaNau
4061015c necche ciraM dhArayituM prANAMs tyakSye kalevaram
4062001a etair anyaiz ca bahubhir vAkyair vAkyavizAradaH
4062001c mAM prazasyAbhyanujJApya praviSTaH sa svam Azramam
4062002a kandarAt tu visarpitvA parvatasya zanaiH zanaiH
4062002c ahaM vindhyaM samAruhya bhavataH pratipAlaye
4062003a adya tv etasya kAlasya sAgraM varSazataM gatam
4062003c dezakAlapratIkSo 'smi hRdi kRtvA muner vacaH
4062004a mahAprasthAnam AsAdya svargate tu nizAkare
4062004c mAM nirdahati saMtApo vitarkair bahubhir vRtam
4062005a utthitAM maraNe buddhiM muni vAkyair nivartaye
4062005c buddhir yA tena me dattA prANasaMrakSaNAya tu
4062005e sA me 'panayate duHkhaM dIptevAgnizikhA tamaH
4062006a budhyatA ca mayA vIryaM rAvaNasya durAtmanaH
4062006c putraH saMtarjito vAgbhir na trAtA maithilI katham
4062007a tasyA vilapitaM zrutvA tau ca sItA vinAkRtau
4062007c na me dazarathasnehAt putreNotpAditaM priyam
4062008a tasya tv evaM bruvANasya saMpAter vAnaraiH saha
4062008c utpetatus tadA pakSau samakSaM vanacAriNAm
4062009a sa dRSTvA svAM tanuM pakSair udgatair aruNacchadaiH
4062009c praharSam atulaM lebhe vAnarAMz cedam abravIt
4062010a nizAkarasya maharSeH prabhAvAd amitAtmanaH
4062010c Adityarazminirdagdhau pakSau me punar utthitau
4062011a yauvane vartamAnasya mamAsId yaH parAkramaH
4062011c tam evAdyAvagacchAmi balaM pauruSam eva ca
4062012a sarvathA kriyatAM yatnaH sItAm adhigamiSyatha
4062012c pakSalAbho mamAyaM vaH siddhipratyaya kArakaH
4062013a ity uktvA tAn harIn sarvAn saMpAtiH patatAM varaH
4062013c utpapAta gireH zRGgAj jijJAsuH khagamo gatim
4062014a tasya tad vacanaM zrutvA prItisaMhRSTamAnasAH
4062014c babhUvur harizArdUlA vikramAbhyudayonmukhAH
4062015a atha pavanasamAnavikramAH; plavagavarAH pratilabdha pauruSAH
4062015c abhijidabhimukhAM dizaM yayur; janakasutA parimArgaNonmukhAH
4063001a AkhyAtA gRdhrarAjena samutpatya plavaMgamAH
4063001c saMgatAH prItisaMyuktA vineduH siMhavikramAH
4063002a saMpAter vacanaM zrutvA harayo rAvaNakSayam
4063002c hRSTAH sAgaram AjagmuH sItAdarzanakAGkSiNaH
4063003a abhikramya tu taM dezaM dadRzur bhImavikramAH
4063003c kRtsnaM lokasya mahataH pratibimbam iva sthitam
4063004a dakSiNasya samudrasya samAsAdyottarAM dizam
4063004c saMnivezaM tataz cakruH sahitA vAnarottamAH
4063005a sattvair mahadbhir vikRtaiH krIDadbhir vividhair jale
4063005c vyAttAsyaiH sumahAkAyair Urmibhiz ca samAkulam
4063006a prasuptam iva cAnyatra krIDantam iva cAnyataH
4063006c kva cit parvatamAtraiz ca jalarAzibhir AvRtam
4063007a saMkulaM dAnavendraiz ca pAtAlatalavAsibhiH
4063007c romaharSakaraM dRSTvA viSeduH kapikuJjarAH
4063008a AkAzam iva duSpAraM sAgaraM prekSya vAnarAH
4063008c viSeduH sahasA sarve kathaM kAryam iti bruvan
4063009a viSaNNAM vAhinIM dRSTvA sAgarasya nirIkSaNAt
4063009c AzvAsayAm Asa harIn bhayArtAn harisattamaH
4063010a na niSAdena naH kAryaM viSAdo doSavattaraH
4063010c viSAdo hanti puruSaM bAlaM kruddha ivoragaH
4063011a viSAdo 'yaM prasahate vikrame paryupasthite
4063011c tejasA tasya hInasya puruSArtho na sidhyati
4063012a tasyAM rAtryAM vyatItAyAm aGgado vAnaraiH saha
4063012c harivRddhaiH samAgamya punar mantram amantrayat
4063013a sA vAnarANAM dhvajinI parivAryAGgadaM babhau
4063013c vAsavaM parivAryeva marutAM vAhinI sthitA
4063014a ko 'nyas tAM vAnarIM senAM zaktaH stambhayituM bhavet
4063014c anyatra vAlitanayAd anyatra ca hanUmataH
4063015a tatas tAn harivRddhAMz ca tac ca sainyam ariMdamaH
4063015c anumAnyAGgadaH zrImAn vAkyam arthavad abravIt
4063016a ka idAnIM mahAtejA laGghayiSyati sAgaram
4063016c kaH kariSyati sugrIvaM satyasaMdham ariMdamam
4063017a ko vIro yojanazataM laGghayeta plavaMgamAH
4063017c imAMz ca yUthapAn sarvAn mocayet ko mahAbhayAt
4063018a kasya prasAdAd dArAMz ca putrAMz caiva gRhANi ca
4063018c ito nivRttAH pazyema siddhArthAH sukhino vayam
4063019a kasya prasAdAd rAmaM ca lakSmaNaM ca mahAbalam
4063019c abhigacchema saMhRSTAH sugrIvaM ca mahAbalam
4063020a yadi kaz cit samartho vaH sAgaraplavane hariH
4063020c sa dadAtv iha naH zIghraM puNyAm abhayadakSiNAm
4063021a aGgadasya vacaH zrutvA na kaz cit kiM cid abravIt
4063021c stimitevAbhavat sarvA sA tatra harivAhinI
4063022a punar evAGgadaH prAha tAn harIn harisattamaH
4063022c sarve balavatAM zreSThA bhavanto dRDhavikramAH
4063023a vyapadezya kule jAtAH pUjitAz cApy abhIkSNazaH
4063023c na hi vo gamane saMgaH kadA cid api kasya cit
4063024a bruvadhvaM yasya yA zaktir gamane plavagarSabhAH
4064001a tato 'GgadavacaH zrutvA sarve te vAnarottamAH
4064001c svaM svaM gatau samutsAham Ahus tatra yathAkramam
4064002a gajo gavAkSo gavayaH zarabho gandhamAdanaH
4064002c maindaz ca dvividaz caiva suSeNo jAmbavAMs tathA
4064003a AbabhASe gajas tatra plaveyaM dazayojanam
4064003c gavAkSo yojanAny Aha gamiSyAmIti viMzatim
4064004a gavayo vAnaras tatra vAnarAMs tAn uvAca ha
4064004c triMzataM tu gamiSyAmi yojanAnAM plavaMgamAH
4064005a zarabho vAnaras tatra vAnarAMs tAn uvAca ha
4064005c catvAriMzad gamiSyAmi yojanAnAM na saMzayaH
4064006a vAnarAMs tu mahAtejA abravId gandhamAdanaH
4064006c yojanAnAM gamiSyAmi paJcAzat tu na saMzayaH
4064007a maindas tu vAnaras tatra vAnarAMs tAn uvAca ha
4064007c yojanAnAM paraM SaSTim ahaM plavitum utsahe
4064008a tatas tatra mahAtejA dvividaH pratyabhASata
4064008c gamiSyAmi na saMdehaH saptatiM yojanAny aham
4064009a suSeNas tu harizreSThaH proktavAn kapisattamAn
4064009c azItiM yojanAnAM tu plaveyaM plavagarSabhAH
4064010a teSAM kathayatAM tatra sarvAMs tAn anumAnya ca
4064010c tato vRddhatamas teSAM jAmbavAn pratyabhASata
4064011a pUrvam asmAkam apy AsIt kaz cid gatiparAkramaH
4064011c te vayaM vayasaH pAram anuprAptAH sma sAmpratam
4064012a kiM tu naivaM gate zakyam idaM kAryam upekSitum
4064012c yad arthaM kapirAjaz ca rAmaz ca kRtanizcayau
4064013a sAmprataM kAlabhedena yA gatis tAM nibodhata
4064013c navatiM yojanAnAM tu gamiSyAmi na saMzayaH
4064014a tAMz ca sarvAn harizreSThAJ jAmbavAn punar abravIt
4064014c na khalv etAvad evAsId gamane me parAkramaH
4064015a mayA mahAbalaiz caiva yajJe viSNuH sanAtanaH
4064015c pradakSiNIkRtaH pUrvaM kramamANas trivikramaH
4064016a sa idAnIm ahaM vRddhaH plavane mandavikramaH
4064016c yauvane ca tadAsIn me balam apratimaM paraiH
4064017a saMpraty etAvatIM zaktiM gamane tarkayAmy aham
4064017c naitAvatA ca saMsiddhiH kAryasyAsya bhaviSyati
4064018a athottaram udArArtham abravId aGgadas tadA
4064018c anumAnya mahAprAjJo jAmbavantaM mahAkapim
4064019a aham etad gamiSyAmi yojanAnAM zataM mahat
4064019c nivartane tu me zaktiH syAn na veti na nizcitam
4064020a tam uvAca harizreSTho jAmbavAn vAkyakovidaH
4064020c jJAyate gamane zaktis tava haryRkSasattama
4064021a kAmaM zatasahasraM vA na hy eSa vidhir ucyate
4064021c yojanAnAM bhavAJ zakto gantuM pratinivartitum
4064022a na hi preSayitA tata svAmI preSyaH kathaM cana
4064022c bhavatAyaM janaH sarvaH preSyaH plavagasattama
4064023a bhavAn kalatram asmAkaM svAmibhAve vyavasthitaH
4064023c svAmI kalatraM sainyasya gatir eSA paraMtapa
4064024a tasmAt kalatravat tAta pratipAlyaH sadA bhavAn
4064024c api caitasya kAryasya bhavAn mUlam ariMdama
4064025a mUlam arthasya saMrakSyam eSa kAryavidAM nayaH
4064025c mUle hi sati sidhyanti guNAH puSpaphalAdayaH
4064026a tad bhavAn asyA kAryasya sAdhane satyavikramaH
4064026c buddhivikramasaMpanno hetur atra paraMtapaH
4064027a guruz ca guruputraz ca tvaM hi naH kapisattama
4064027c bhavantam Azritya vayaM samarthA hy arthasAdhane
4064028a uktavAkyaM mahAprAjJaM jAmbavantaM mahAkapiH
4064028c pratyuvAcottaraM vAkyaM vAlisUnur athAGgadaH
4064029a yadi nAhaM gamiSyAmi nAnyo vAnarapuMgavaH
4064029c punaH khalv idam asmAbhiH kAryaM prAyopavezanam
4064030a na hy akRtvA haripateH saMdezaM tasya dhImataH
4064030c tatrApi gatvA prANAnAM pazyAmi parirakSaNam
4064031a sa hi prasAde cAtyarthaM kope ca harir IzvaraH
4064031c atItya tasya saMdezaM vinAzo gamane bhavet
4064032a tad yathA hy asya kAryasya na bhavaty anyathA gatiH
4064032c tad bhavAn eva dRSTArthaH saMcintayitum arhati
4064033a so 'Ggadena tadA vIraH pratyuktaH plavagarSabhaH
4064033c jAmbavAn uttaraM vAkyaM provAcedaM tato 'Ggadam
4064034a asya te vIra kAryasya na kiM cit parihIyate
4064034c eSa saMcodayAmy enaM yaH kAryaM sAdhayiSyati
4064035a tataH pratItaM plavatAM variSTham; ekAntam Azritya sukhopaviSTam
4064035c saMcodayAm Asa haripravIro; haripravIraM hanumantam eva
4065001a anekazatasAhasrIM viSaNNAM harivAhinIm
4065001c jAmbavAn samudIkSyaivaM hanumantam athAbravIt
4065002a vIra vAnaralokasya sarvazAstravidAM vara
4065002c tUSNIm ekAntam Azritya hanuman kiM na jalpasi
4065003a hanuman harirAjasya sugrIvasya samo hy asi
4065003c rAmalakSmaNayoz cApi tejasA ca balena ca
4065004a ariSTaneminaH putrau vainateyo mahAbalaH
4065004c garutmAn iva vikhyAta uttamaH sarvapakSiNAm
4065005a bahuzo hi mayA dRSTaH sAgare sa mahAbalaH
4065005c bhujagAn uddharan pakSI mahAvego mahAyazAH
4065006a pakSayor yad balaM tasya tAvad bhujabalaM tava
4065006c vikramaz cApi vegaz ca na te tenApahIyate
4065007a balaM buddhiz ca tejaz ca sattvaM ca harisattama
4065007c viziSTaM sarvabhUteSu kim AtmAnaM na budhyase
4065008a apsarApsarasAM zreSThA vikhyAtA puJjikasthalA
4065008c ajJaneti parikhyAtA patnI kesariNo hareH
4065009a abhizApAd abhUt tAta vAnarI kAmarUpiNI
4065009c duhitA vAnarendrasya kuJjarasya mahAtmanaH
4065010a kapitve cArusarvAGgI kadA cit kAmarUpiNI
4065010c mAnuSaM vigrahaM kRtvA yauvanottamazAlinI
4065011a acarat parvatasyAgre prAvRDambudasaMnibhe
4065011c vicitramAlyAbharaNA mahArhakSaumavAsinI
4065012a tasyA vastraM vizAlAkSyAH pItaM raktadazaM zubham
4065012c sthitAyAH parvatasyAgre mAruto 'paharac chanaiH
4065013a sa dadarza tatas tasyA vRttAv UrU susaMhatau
4065013c stanau ca pInau sahitau sujAtaM cAru cAnanam
4065014a tAM vizAlAyatazroNIM tanumadhyAM yazasvinIm
4065014c dRSTvaiva zubhasarvAgnIM pavanaH kAmamohitaH
4065015a sa tAM bhujAbhyAM pInAbhyAM paryaSvajata mArutaH
4065015c manmathAviSTasarvAGgo gatAtmA tAm aninditAm
4065016a sA tu tatraiva saMbhrAntA suvRttA vAkyam abravIt
4065016c ekapatnIvratam idaM ko nAzayitum icchati
4065017a aJjanAyA vacaH zrutvA mArutaH pratyabhASata
4065017c na tvAM hiMsAmi suzroNi mA bhUt te subhage bhayam
4065018a manasAsmi gato yat tvAM pariSvajya yazasvini
4065018c vIryavAn buddhisaMpannaH putras tava bhaviSyati
4065019a abhyutthitaM tataH sUryaM bAlo dRSTvA mahAvane
4065019c phalaM ceti jighRkSus tvam utplutyAbhyapato divam
4065020a zatAni trINi gatvAtha yojanAnAM mahAkape
4065020c tejasA tasya nirdhUto na viSAdaM tato gataH
4065021a tAvad Apatatas tUrNam antarikSaM mahAkape
4065021c kSiptam indreNa te vajraM krodhAviSTena dhImatA
4065022a tataH zailAgrazikhare vAmo hanur abhajyata
4065022c tato hi nAmadheyaM te hanumAn iti kIrtyate
4065023a tatas tvAM nihataM dRSTvA vAyur gandhavahaH svayam
4065023c trailokye bhRzasaMkruddho na vavau vai prabhaJjanaH
4065024a saMbhrAntAz ca surAH sarve trailokye kSubhite sati
4065024c prasAdayanti saMkruddhaM mArutaM bhuvanezvarAH
4065025a prasAdite ca pavane brahmA tubhyaM varaM dadau
4065025c azastravadhyatAM tAta samare satyavikrama
4065026a vajrasya ca nipAtena virujaM tvAM samIkSya ca
4065026c sahasranetraH prItAtmA dadau te varam uttamam
4065027a svacchandataz ca maraNaM te bhUyAd iti vai prabho
4065027c sa tvaM kesariNaH putraH kSetrajo bhImavikramaH
4065028a mArutasyaurasaH putras tejasA cApi tatsamaH
4065028c tvaM hi vAyusuto vatsa plavane cApi tatsamaH
4065029a vayam adya gataprANA bhavAn asmAsu sAmpratam
4065029c dAkSyavikramasaMpannaH pakSirAja ivAparaH
4065030a trivikrame mayA tAta sazailavanakAnanA
4065030c triH saptakRtvaH pRthivI parikrAntA pradakSiNam
4065031a tadA cauSadhayo 'smAbhiH saMcitA devazAsanAt
4065031c niSpannam amRtaM yAbhis tadAsIn no mahad balam
4065032a sa idAnIm ahaM vRddhaH parihInaparAkramaH
4065032c sAmprataM kAlam asmAkaM bhavAn sarvaguNAnvitaH
4065033a tad vijRmbhasva vikrAntaH plavatAm uttamo hy asi
4065033c tvadvIryaM draSTukAmeyaM sarvA vAnaravAhinI
4065034a uttiSTha harizArdUla laGghayasva mahArNavam
4065034c parA hi sarvabhUtAnAM hanuman yA gatis tava
4065035a viSANNA harayaH sarve hanuman kim upekSase
4065035c vikramasva mahAvego viSNus trIn vikramAn iva
4065036a tatas tu vai jAmbavatAbhicoditaH; pratItavegaH pavanAtmajaH kapiH
4065036c praharSayaMs tAM harivIra vAhinIM; cakAra rUpaM mahad Atmanas tadA
4066001a saMstUyamAno hanumAn vyavardhata mahAbalaH
4066001c samAvidhya ca lAGgUlaM harSAc ca balam eyivAn
4066002a tasya saMstUyamAnasya sarvair vAnarapuMgavaiH
4066002c tejasApUryamANasya rUpam AsId anuttamam
4066003a yathA vijRmbhate siMho vivRddho girigahvare
4066003c mArutasyaurasaH putras tathA saMprati jRmbhate
4066004a azobhata mukhaM tasya jRmbhamANasya dhImataH
4066004c ambarISopamaM dIptaM vidhUma iva pAvakaH
4066005a harINAm utthito madhyAt saMprahRSTatanUruhaH
4066005c abhivAdya harIn vRddhAn hanumAn idam abravIt
4066006a arujan parvatAgrANi hutAzanasakho 'nilaH
4066006c balavAn aprameyaz ca vAyur AkAzagocaraH
4066007a tasyAhaM zIghravegasya zIghragasya mahAtmanaH
4066007c mArutasyaurasaH putraH plavane nAsti me samaH
4066008a utsaheyaM hi vistIrNam Alikhantam ivAmbaram
4066008c meruM girim asaMgena parigantuM sahasrazaH
4066009a bAhuvegapraNunnena sAgareNAham utsahe
4066009c samAplAvayituM lokaM saparvatanadIhradam
4066010a mamorujaGghAvegena bhaviSyati samutthitaH
4066010c saMmUrchitamahAgrAhaH samudro varuNAlayaH
4066011a pannagAzanam AkAze patantaM pakSisevitam
4066011c vainateyam ahaM zaktaH parigantuM sahasrazaH
4066012a udayAt prasthitaM vApi jvalantaM razmimAlinam
4066012c anastamitam Adityam abhigantuM samutsahe
4066013a tato bhUmim asaMspRzya punar Agantum utsahe
4066013c pravegenaiva mahatA bhImena plavagarSabhAH
4066014a utsaheyam atikrAntuM sarvAn AkAzagocarAn
4066014c sAgaraM kSobhayiSyAmi dArayiSyAmi medinIm
4066015a parvatAn kampayiSyAmi plavamAnaH plavaMgamAH
4066015c hariSye coruvegena plavamAno mahArNavam
4066016a latAnAM vIrudhAM puSpaM pAdapAnAM ca sarvazaH
4066016c anuyAsyati mAm adya plavamAnaM vihAyasA
4066016e bhaviSyati hi me panthAH svAteH panthA ivAmbare
4066017a carantaM ghoram AkAzam utpatiSyantam eva ca
4066017c drakSyanti nipatantaM ca sarvabhUtAni vAnarAH
4066018a mahAmerupratIkAzaM mAM drakSyadhvaM plavaMgamAH
4066018c divam AvRtya gacchantaM grasamAnam ivAmbaram
4066019a vidhamiSyAmi jImUtAn kampayiSyAmi parvatAn
4066019c sAgaraM kSobhayiSyAmi plavamAnaH samAhitaH
4066020a vainateyasya vA zaktir mama vA mArutasya vA
4066020c Rte suparNarAjAnaM mArutaM vA mahAbalam
4066020e na hi bhUtaM prapazyAmi yo mAM plutam anuvrajet
4066021a nimeSAntaramAtreNa nirAlambhanam ambaram
4066021c sahasA nipatiSyAmi ghanAd vidyud ivotthitA
4066022a bhaviSyati hi me rUpaM plavamAnasya sAgaram
4066022c viSNoH prakramamANasya tadA trIn vikramAn iva
4066023a buddhyA cAhaM prapazyAmi manaz ceSTA ca me tathA
4066023c ahaM drakSyAmi vaidehIM pramodadhvaM plavaMgamAH
4066024a mArutasya samo vege garuDasya samo jave
4066024c ayutaM yojanAnAM tu gamiSyAmIti me matiH
4066025a vAsavasya savajrasya brahmaNo vA svayambhuvaH
4066025c vikramya sahasA hastAd amRtaM tad ihAnaye
4066025e laGkAM vApi samutkSipya gaccheyam iti me matiH
4066026a tam evaM vAnarazreSThaM garjantam amitaujasaM
4066026c uvAca parisaMhRSTo jAmbavAn harisattamaH
4066027a vIra kesariNaH putra vegavan mArutAtmaja
4066027c jJAtInAM vipulaM zokas tvayA tAta praNAzitaH
4066028a tava kalyANarucayaH kapimukhyAH samAgatAH
4066028c maGgalaM kAryasiddhyarthaM kariSyanti samAhitAH
4066029a RSINAM ca prasAdena kapivRddhamatena ca
4066029c gurUNAM ca prasAdena plavasva tvaM mahArNavam
4066030a sthAsyAmaz caikapAdena yAvadAgamanaM tava
4066030c tvadgatAni ca sarveSAM jIvitAni vanaukasAm
4066031a tatas tu harizArdUlas tAn uvAca vanaukasaH
4066031c neyaM mama mahI vegaM plavane dhArayiSyati
4066032a etAni hi nagasyAsya zilAsaMkaTazAlinaH
4066032c zikharANi mahendrasya sthirANi ca mahAnti ca
4066033a etAni mama niSpeSaM pAdayoH patatAM varAH
4066033c plavato dhArayiSyanti yojanAnAm itaH zatam
4066034a tatas tu mArutaprakhyaH sa harir mArutAtmajaH
4066034c Aruroha nagazreSThaM mahendram arimardanaH
4066035a vRtaM nAnAvidhair vRkSair mRgasevitazAdvalam
4066035c latAkusumasaMbAdhaM nityapuSpaphaladrumam
4066036a siMhazArdUlacaritaM mattamAtaGgasevitam
4066036c mattadvijagaNodghuSTaM salilotpIDasaMkulam
4066037a mahadbhir ucchritaM zRGgair mahendraM sa mahAbalaH
4066037c vicacAra harizreSTho mahendrasamavikramaH
4066038a pAdAbhyAM pIDitas tena mahAzailo mahAtmanA
4066038c rarAsa siMhAbhihato mahAn matta iva dvipaH
4066039a mumoca salilotpIDAn viprakIrNaziloccayaH
4066039c vitrastamRgamAtaGgaH prakampitamahAdrumaH
4066040a nAnAgandharvamithunaiH pAnasaMsargakarkazaiH
4066040c utpatadbhir vihaMgaiz ca vidyAdharagaNair api
4066041a tyajyamAnamahAsAnuH saMnilInamahoragaH
4066041c zailazRGgazilodghAtas tadAbhUt sa mahAgiriH
4066042a niHzvasadbhis tadA tais tu bhujagair ardhaniHsRtaiH
4066042c sapatAka ivAbhAti sa tadA dharaNIdharaH
4066043a RSibhis trAsa saMbhrAntais tyajyamAnaH ziloccayaH
4066043c sIdan mahati kAntAre sArthahIna ivAdhvagaH
4066044a sa vegavAn vegasamAhitAtmA; haripravIraH paravIrahantA
4066044c manaH samAdhAya mahAnubhAvo; jagAma laGkAM manasA manasvI