% Ramayana: Aranyakanda
% Last updated: Wed Nov 18 2020
% Encoding: ASCII
%
3001001a pravizya tu mahAraNyaM daNDakAraNyam AtmavAn
3001001c dadarza rAmo durdharSas tApasAzramamaNDalam
3001002a kuzacIraparikSiptaM brAhmyA lakSmyA samAvRtam
3001002c yathA pradIptaM durdharzaM gagane sUryamaNDalam
3001003a zaraNyaM sarvabhUtAnAM susamRSTAjiraM sadA
3001003c pUjitaM copanRttaM ca nityam apsarasAM gaNaiH
3001004a vizAlair agnizaraNaiH srugbhANDair ajinaiH kuzaiH
3001004c samidbhis toyakalazaiH phalamUlaiz ca zobhitam
3001005a AraNyaiz ca mahAvRkSaiH puNyaiH svAduphalair vRtam
3001005c balihomArcitaM puNyaM brahmaghoSaninAditam
3001006a puSpair vanyaiH parikSiptaM padminyA ca sapadmayA
3001006c phalamUlAzanair dAntaiz cIrakRSNAjinAmbaraiH
3001007a sUryavaizvAnarAbhaiz ca purANair munibhir vRtam
3001007c puNyaiz a niyatAhAraiH zobhitaM paramarSibhiH
3001008a tad brahmabhavanaprakhyaM brahmaghoSaninAditam
3001008c brahmavidbhir mahAbhAgair brAhmaNair upazobhitam
3001009a tad dRSTvA rAghavaH zrImAMs tApasAzramamaNDalam
3001009c abhyagacchan mahAtejA vijyaM kRtvA mahad dhanuH
3001010a divyajJAnopapannAs te rAmaM dRSTvA maharSayaH
3001010c abhyagacchaMs tadA prItA vaidehIM ca yazasvinIm
3001011a te taM somam ivodyantaM dRSTvA vai dharmacAriNaH
3001011c maGgalAni prayuJjAnAH pratyagRhNan dRDhavratAH
3001012a rUpasaMhananaM lakSmIM saukumAryaM suveSatAm
3001012c dadRzur vismitAkArA rAmasya vanavAsinaH
3001013a vaidehIM lakSmaNaM rAmaM netrair animiSair iva
3001013c AzcaryabhUtAn dadRzuH sarve te vanacAriNaH
3001014a atrainaM hi mahAbhAgAH sarvabhUtahite ratAH
3001014c atithiM parNazAlAyAM rAghavaM saMnyavezayan
3001015a tato rAmasya satkRtya vidhinA pAvakopamAH
3001015c Ajahrus te mahAbhAgAH salilaM dharmacAriNaH
3001016a mUlaM puSpaM phalaM vanyam AzramaM ca mahAtmanaH
3001016c nivedayItvA dharmajJAs tataH prAJjalayo 'bruvan
3001017a dharmapAlo janasyAsya zaraNyaz ca mahAyazAH
3001017c pUjanIyaz ca mAnyaz ca rAjA daNDadharo guruH
3001018a indrasyaiva caturbhAgaH prajA rakSati rAghava
3001018c rAjA tasmAd vanAn bhogAn bhuGkte lokanamaskRtaH
3001019a te vayaM bhavatA rakSyA bhavadviSayavAsinaH
3001019c nagarastho vanastho vA tvaM no rAjA janezvaraH
3001020a nyastadaNDA vayaM rAjaJ jitakrodhA jitendriyAH
3001020c rakSitavyAs tvayA zazvad garbhabhUtAs tapodhanAH
3001021a evam uktvA phalair mUlaiH puSpair vanyaiz ca rAghavam
3001021c anyaiz ca vividhAhAraiH salakSmaNam apUjayan
3001022a tathAnye tApasAH siddhA rAmaM vaizvAnaropamAH
3001022c nyAyavRttA yathAnyAyaM tarpayAm Asur Izvaram
3002001a kRtAtithyo 'tha rAmas tu sUryasyodayanaM prati
3002001c Amantrya sa munIn sarvAn vanam evAnvagAhata
3002002a nAnAmRgagaNAkIrNaM zArdUlavRkasevitam
3002002c dhvastavRkSalatAgulmaM durdarza salilAzayam
3002003a niSkUjanAnAzakuni jhillikA gaNanAditam
3002003c lakSmaNAnugato rAmo vanamadhyaM dadarza ha
3002004a vanamadhye tu kAkutsthas tasmin ghoramRgAyute
3002004c dadarza girizRGgAbhaM puruSAdaM mahAsvanam
3002005a gabhIrAkSaM mahAvaktraM vikaTaM viSamodaram
3002005c bIbhatsaM viSamaM dIrghaM vikRtaM ghoradarzanam
3002006a vasAnaM carmavaiyAghraM vasArdraM rudhirokSitam
3002006c trAsanaM sarvabhUtAnAM vyAditAsyam ivAntakam
3002007a trIn siMhAMz caturo vyAghrAn dvau vRkau pRSatAn daza
3002007c saviSANaM vasAdigdhaM gajasya ca ziro mahat
3002008a avasajyAyase zUle vinadantaM mahAsvanam
3002008c sa rAmaM lakSmaNaM caiva sItAM dRSTvA ca maithilIm
3002009a abhyadhAvat susaMkruddhaH prajAH kAla ivAntakaH
3002009c sa kRtvA bhairavaM nAdaM cAlayann iva medinIm
3002010a aGgenAdAya vaidehIm apakramya tato 'bravIt
3002010c yuvAM jaTAcIradharau sabhAryau kSINajIvitau
3002011a praviSTau daNDakAraNyaM zaracApAsidhAriNau
3002011c kathaM tApasayor vAM ca vAsaH pramadayA saha
3002012a adharmacAriNau pApau kau yuvAM munidUSakau
3002012c ahaM vanam idaM durgaM virAgho nAma rAkSasaH
3002013a carAmi sAyudho nityam RSimAMsAni bhakSayan
3002013c iyaM nArI varArohA mama bharyA bhaviSyati
3002013e yuvayoH pApayoz cAhaM pAsyAmi rudhiraM mRdhe
3002014a tasyaivaM bruvato dhRSTaM virAdhasya durAtmanaH
3002014c zrutvA sagarvitaM vAkyaM saMbhrAntA janakAtmajA
3002014e sItA prAvepatodvegAt pravAte kadalI yathA
3002015a tAM dRSTvA rAghavaH sItAM virAdhAGkagatAM zubhAm
3002015c abravIl lakSmaNaM vAkyaM mukhena parizuSyatA
3002016a pazya saumya narendrasya janakasyAtmasaMbhavAm
3002016c mama bhAryAM zubhAcArAM virAdhAGke pravezitAm
3002016e atyanta sukhasaMvRddhAM rAjaputrIM yazasvinIm
3002017a yad abhipretam asmAsu priyaM vara vRtaM ca yat
3002017c kaikeyyAs tu susaMvRttaM kSipram adyaiva lakSmaNa
3002018a yA na tuSyati rAjyena putrArthe dIrghadarzinI
3002018c yayAhaM sarvabhUtAnAM hitaH prasthApito vanam
3002018e adyedAnIM sakAmA sA yA mAtA mama madhyamA
3002019a parasparzAt tu vaidehyA na duHkhataram asti me
3002019c pitur vinAzAt saumitre svarAjyaharaNAt tathA
3002020a iti bruvati kAkutsthe bASpazokapariplute
3002020c abravIl lakSmaNaH kruddho ruddho nAga iva zvasan
3002021a anAtha iva bhUtAnAM nAthas tvaM vAsavopamaH
3002021c mayA preSyeNa kAkutstha kimarthaM paritapsyase
3002022a zareNa nihatasyAdya mayA kruddhena rakSasaH
3002022c virAdhasya gatAsor hi mahI pAsyati zoNitam
3002023a rAjyakAme mama krodho bharate yo babhUva ha
3002023c taM virAdhe vimokSyAmi vajrI vajram ivAcale
3002024a mama bhujabalavegavegitaH; patatu zaro 'sya mahAn mahorasi
3002024c vyapanayatu tanoz ca jIvitaM; patatu tataz ca mahIM vighUrNitaH
3003001a athovAca punar vAkyaM virAdhaH pUrayan vanam
3003001c AtmAnaM pRcchate brUtaM kau yuvAM kva gamiSyathaH
3003002a tam uvAca tato rAmo rAkSasaM jvalitAnanam
3003002c pRcchantaM sumahAtejA ikSvAkukulam AtmanaH
3003003a kSatriyo vRttasaMpannau viddhi nau vanagocarau
3003003c tvAM tu veditum icchAvaH kas tvaM carasi daNDakAn
3003004a tam uvAca virAdhas tu rAmaM satyaparAkramam
3003004c hanta vakSyAmi te rAjan nibodha mama rAghava
3003005a putraH kila jayasyAhaM mAtA mama zatahradA
3003005c virAdha iti mAm AhuH pRthivyAM sarvarAkSasAH
3003006a tapasA cApi me prAptA brahmaNo hi prasAdajA
3003006c zastreNAvadhyatA loke 'cchedyAbhedyatvam eva ca
3003007a utsRjya pramadAm enAm anapekSau yathAgatam
3003007c tvaramANau pAlayethAM na vAM jIvitam Adade
3003008a taM rAmaH pratyuvAcedaM kopasaMraktalocanaH
3003008c rAkSasaM vikRtAkAraM virAdhaM pApacetasaM
3003009a kSudra dhik tvAM tu hInArthaM mRtyum anveSase dhruvam
3003009c raNe saMprApsyase tiSTha na me jIvan gamiSyasi
3003010a tataH sajyaM dhanuH kRtvA rAmaH sunizitAJ zarAn
3003010c suzIghram abhisaMdhAya rAkSasaM nijaghAna ha
3003011a dhanuSA jyAguNavatA saptabANAn mumoca ha
3003011c rukmapuGkhAn mahAvegAn suparNAnilatulyagAn
3003012a te zarIraM virAdhasya bhittvA barhiNavAsasaH
3003012c nipetuH zoNitAdigdhA dharaNyAM pAvakopamAH
3003013a sa vinadya mahAnAdaM zUlaM zakradhvajopamam
3003013c pragRhyAzobhata tadA vyAttAnana ivAntakaH
3003014a tac chUlaM vajrasaMkAzaM gagane jvalanopamam
3003014c dvAbhyAM zarAbhyAM ciccheda rAmaH zastrabhRtAM varaH
3003015a tasya raudrasya saumitrir bAhuM savyaM babhaJja ha
3003015c rAmas tu dakSiNaM bAhuM tarasA tasya rakSasaH
3003016a sa bhagnabAhuH saMvigno nipapAtAzu rAkSasaH
3003016c dharaNyAM meghasaMkAzo vajrabhinna ivAcalaH
3003016e idaM provAca kAkutsthaM virAdhaH puruSarSabham
3003017a kausalyA suprajAs tAta rAmas tvaM vidito mayA
3003017c vaidehI ca mahAbhAgA lakSmaNaz ca mahAyazAH
3003018a abhizApAd ahaM ghorAM praviSTo rAkSasIM tanum
3003018c tumburur nAma gandharvaH zapto vaizvaraNena hi
3003019a prasAdyamAnaz ca mayA so 'bravIn mAM mahAyazAH
3003019c yadA dAzarathI rAmas tvAM vadhiSyati saMyuge
3003020a tadA prakRtim Apanno bhavAn svargaM gamiSyati
3003020c iti vaizravaNo rAjA rambhAsaktam uvAca ha
3003021a anupasthIyamAno mAM saMkruddho vyajahAra ha
3003021c tava prasAdAn mukto 'ham abhizApAt sudAruNAt
3003021e bhavanaM svaM gamiSyAmi svasti vo 'stu paraMtapa
3003022a ito vasati dharmAtmA zarabhaGgaH pratApavAn
3003022c adhyardhayojane tAta maharSiH sUryasaMnibhaH
3003023a taM kSipram abhigaccha tvaM sa te zreyo vidhAsyati
3003023c avaTe cApi mAM rAma nikSipya kuzalI vraja
3003024a rakSasAM gatasattvAnAm eSa dharmaH sanAtanaH
3003024c avaTe ye nidhIyante teSAM lokAH sanAtanAH
3003025a evam uktvA tu kAkutsthaM virAdhaH zarapIDitaH
3003025c babhUva svargasaMprApto nyastadeho mahAbalaH
3003026a taM muktakaNTham utkSipya zaGkukarNaM mahAsvanam
3003026c virAdhaM prAkSipac chvabhre nadantaM bhairavasvanam
3003027a tatas tu tau kAJcanacitrakArmukau; nihatya rakSaH parigRhya maithilIm
3003027c vijahratus tau muditau mahAvane; divi sthitau candradivAkarAv iva
3004001a hatvA tu taM bhImabalaM virAdhaM rAkSasaM vane
3004001c tataH sItAM pariSvajya samAzvAsya ca vIryavAn
3004001e abravIl lakSmaNAM rAmo bhrAtaraM dIptatejasaM
3004002a kaSTaM vanam idaM durgaM na ca smo vanagocarAH
3004002c abhigacchAmahe zIghraM zarabhaGgaM tapodhanam
3004003a AzramaM zarabhaGgasya rAghavo 'bhijagAma ha
3004004a tasya devaprabhAvasya tapasA bhAvitAtmanaH
3004004c samIpe zarabhaGgasya dadarza mahad adbhutam
3004005a vibhrAjamAnaM vapuSA sUryavaizvAnaropamam
3004005c asaMspRzantaM vasudhAM dadarza vibudhezvaram
3004006a suprabhAbharaNaM devaM virajo 'mbaradhAriNam
3004006c tadvidhair eva bahubhiH pUjyamAnaM mahAtmabhiH
3004007a haribhir vAjibhir yuktam antarikSagataM ratham
3004007c dadarzAdUratas tasya taruNAdityasaMnibham
3004008a pANDurAbhraghanaprakhyaM candramaNDalasaMnibham
3004008c apazyad vimalaM chatraM citramAlyopazobhitam
3004009a cAmaravyajane cAgrye rukmadaNDe mahAdhane
3004009c gRhIte vananArIbhyAM dhUyamAne ca mUrdhani
3004010a gandharvAmarasiddhAz ca bahavaH paramarSayaH
3004010c antarikSagataM devaM vAgbhir agryAbhir IDire
3004011a dRSTvA zatakratuM tatra rAmo lakSmaNam abravIt
3004011c ye hayAH puruhUtasya purA zakrasya naH zrutAH
3004011e antarikSagatA divyAs ta ime harayo dhruvam
3004012a ime ca puruSavyAghra ye tiSThanty abhito ratham
3004012c zataM zataM kuNDalino yuvAnaH khaDgapANayaH
3004013a urodezeSu sarveSAM hArA jvalanasaMnibhAH
3004013c rUpaM bibhrati saumitre paJcaviMzativArSikam
3004014a etad dhi kila devAnAM vayo bhavati nityadA
3004014c yatheme puruSavyAghrA dRzyante priyadarzanAH
3004015a ihaiva saha vaidehyA muhUrtaM tiSTha lakSmaNa
3004015c yAvaj janAmy ahaM vyaktaM ka eSa dyutimAn rathe
3004016a tam evam uktvA saumitrim ihaiva sthIyatAm iti
3004016c abhicakrAma kAkutsthaH zarabhaGgAzramaM prati
3004017a tataH samabhigacchantaM prekSya rAmaM zacIpatiH
3004017c zarabhaGgam anujJApya vibudhAn idam abravIt
3004018a ihopayAty asau rAmo yAvan mAM nAbhibhASate
3004018c niSThAM nayata tAvat tu tato mAM draSTum arhati
3004019a jitavantaM kRtArthaM ca draSTAham acirAd imam
3004019c karma hy anena kartavyaM mahad anyaiH suduSkaram
3004020a iti vajrI tam Amantrya mAnayitvA ca tApasaM
3004020c rathena hariyuktena yayau divam ariMdamaH
3004021a prayAte tu sahasrAkSe rAghavaH saparicchadaH
3004021c agnihotram upAsInaM zarabhaGgam upAgamat
3004022a tasya pAdau ca saMgRhya rAmaH sItA ca lakSmaNaH
3004022c niSedus tadanujJAtA labdhavAsA nimantritAH
3004023a tataH zakropayAnaM tu paryapRcchat sa rAghavaH
3004023c zarabhaGgaz ca tat sarvaM rAghavAya nyavedayat
3004024a mAm eSa varado rAma brahmalokaM ninISati
3004024c jitam ugreNa tapasA duSprApam akRtAtmabhiH
3004025a ahaM jJAtvA naravyAghra vartamAnam adUrataH
3004025c brahmalokaM na gacchAmi tvAm adRSTvA priyAtithim
3004026a samAgamya gamiSyAmi tridivaM devasevitam
3004026c akSayA narazArdUla jitA lokA mayA zubhAH
3004026e brAhmyAz ca nAkapRSThyAz ca pratigRhNISva mAmakAn
3004027a evam ukto naravyAghraH sarvazAstravizAradaH
3004027c RSiNA zarabhaGgena rAghavo vAkyam abravIt
3004028a aham evAhariSyAmi sarvA&l lokAn mahAmune
3004028c AvAsaM tv aham icchAmi pradiSTam iha kAnane
3004029a rAghaveNaivam uktas tu zakratulyabalena vai
3004029c zarabhaGgo mahAprAjJaH punar evAbravId vacaH
3004030a sutIkSNam abhigaccha tvaM zucau deze tapasvinam
3004030c ramaNIye vanoddeze sa te vAsaM vidhAsyati
3004031a eSa panthA naravyAghra muhUrtaM pazya tAta mAm
3004031c yAvaj jahAmi gAtrANi jIrNaM tvacam ivoragaH
3004032a tato 'gniM sa samAdhAya hutvA cAjyena mantravit
3004032c zarabhaGgo mahAtejAH praviveza hutAzanam
3004033a tasya romANi kezAMz ca dadAhAgnir mahAtmanaH
3004033c jIrNaM tvacaM tathAsthIni yac ca mAMsaM ca zoNitam
3004034a sa ca pAvakasaMkAzaH kumAraH samapadyata
3004034c utthAyAgnicayAt tasmAc charabhaGgo vyarocata
3004035a sa lokAn AhitAgnInAm RSINAM ca mahAtmanAm
3004035c devAnAM ca vyatikramya brahmalokaM vyarohata
3004036a sa puNyakarmA bhuvane dvijarSabhaH; pitAmahaM sAnucaraM dadarza ha
3004036c pitAmahaz cApi samIkSya taM dvijaM; nananda susvAgatam ity uvAca ha
3005001a zarabhaGge divaM prApte munisaMghAH samAgatAH
3005001c abhyagacchanta kAkutsthaM rAmaM jvalitatejasaM
3005002a vaikhAnasA vAlakhilyAH saMprakSAlA marIcipAH
3005002c azmakuTTAz ca bahavaH patrAhArAz ca tApasAH
3005003a dantolUkhalinaz caiva tathaivonmajjakAH pare
3005003c munayaH salilAhArA vAyubhakSAs tathApare
3005004a AkAzanilayAz caiva tathA sthaNDilazAyinaH
3005004c tathordhvavAsino dAntAs tathArdrapaTavAsasaH
3005005a sajapAz ca taponityAs tathA paJcatapo'nvitAH
3005005c sarve brAhmyA zriyA juSTA dRDhayogasamAhitAH
3005005e zarabhaGgAzrame rAmam abhijagmuz ca tApasAH
3005006a abhigamya ca dharmajJA rAmaM dharmabhRtAM varam
3005006c UcuH paramadharmajJam RSisaMghAH samAhitAH
3005007a tvam ikSvAkukulasyAsya pRthivyAz ca mahArathaH
3005007c pradhAnaz cAsi nAthaz ca devAnAM maghavAn iva
3005008a vizrutas triSu lokeSu yazasA vikrameNa ca
3005008c pitRvratatvaM satyaM ca tvayi dharmaz ca puSkalaH
3005009a tvAm AsAdya mahAtmAnaM dharmajJaM dharmavatsalam
3005009c arthitvAn nAtha vakSyAmas tac ca naH kSantum arhasi
3005010a adhArmas tu mahAMs tAta bhavet tasya mahIpateH
3005010c yo hared baliSaDbhAgaM na ca rakSati putravat
3005011a yuJjAnaH svAn iva prANAn prANair iSTAn sutAn iva
3005011c nityayuktaH sadA rakSan sarvAn viSayavAsinaH
3005012a prApnoti zAzvatIM rAma kIrtiM sa bahuvArSikIm
3005012c brahmaNaH sthAnam AsAdya tatra cApi mahIyate
3005013a yat karoti paraM dharmaM munir mUlaphalAzanaH
3005013c tatra rAjJaz caturbhAgaH prajA dharmeNa rakSataH
3005014a so 'yaM brAhmaNabhUyiSTho vAnaprasthagaNo mahAn
3005014c tvan nAtho 'nAthavad rAma rAkSasair vadhyate bhRzam
3005015a ehi pazya zarIrANi munInAM bhAvitAtmanAm
3005015c hatAnAM rAkSasair ghorair bahUnAM bahudhA vane
3005016a pampAnadInivAsAnAm anumandAkinIm api
3005016c citrakUTAlayAnAM ca kriyate kadanaM mahat
3005017a evaM vayaM na mRSyAmo viprakAraM tapasvinam
3005017c kriyamANaM vane ghoraM rakSobhir bhImakarmabhiH
3005018a tatas tvAM zaraNArthaM ca zaraNyaM samupasthitAH
3005018c paripAlaya no rAma vadhyamAnAn nizAcaraiH
3005019a etac chrutvA tu kAkutsthas tApasAnAM tapasvinAm
3005019c idaM provAca dharmAtmA sarvAn eva tapasvinaH
3005019e naivam arhatha mAM vaktum AjJApyo 'haM tapasvinam
3005020a bhavatAm arthasiddhyartham Agato 'haM yadRcchayA
3005020c tasya me 'yaM vane vAso bhaviSyati mahAphalaH
3005020e tapasvinAM raNe zatrUn hantum icchAmi rAkSasAn
3005021a dattvA varaM cApi tapodhanAnAM; dharme dhRtAtmA sahalakSmaNena
3005021c tapodhanaiz cApi sahArya vRttaH; sutISkNam evAbhijagAma vIraH
3006001a rAmas tu sahito bhrAtrA sItayA ca paraMtapaH
3006001c sutIkSNasyAzramapadaM jagAma saha tair dvijaiH
3006002a sa gatvA dUram adhvAnaM nadIs tIrtva bahUdakAH
3006002c dadarza vipulaM zailaM mahAmegham ivonnatam
3006003a tatas tad ikSvAkuvarau satataM vividhair drumaiH
3006003c kAnanaM tau vivizatuH sItayA saha rAghavau
3006004a praviSTas tu vanaM ghoraM bahupuSpaphaladrumam
3006004c dadarzAzramam ekAnte cIramAlApariSkRtam
3006005a tatra tApasam AsInaM malapaGkajaTAdharam
3006005c rAmaH sutIkSNaM vidhivat tapovRddham abhASata
3006006a rAmo 'ham asmi bhagavan bhavantaM draSTum AgataH
3006006c tan mAbhivada dharmajJa maharSe satyavikrama
3006007a sa nirIkSya tato vIraM rAmaM dharmabhRtAM varam
3006007c samAzliSya ca bAhubhyAm idaM vacanam abravIt
3006008a svAgataM khalu te vIra rAma dharmabhRtAM vara
3006008c Azramo 'yaM tvayAkrAntaH sanAtha iva sAmpratam
3006009a pratIkSamANas tvAm eva nArohe 'haM mahAyazaH
3006009c devalokam ito vIra dehaM tyaktvA mahItale
3006010a citrakUTam upAdAya rAjyabhraSTo 'si me zrutaH
3006010c ihopayAtaH kAkutstho devarAjaH zatakratuH
3006010e sarvA&l lokAJ jitAn Aha mama puNyena karmaNA
3006011a teSu devarSijuSTeSu jiteSu tapasA mayA
3006011c matprasAdAt sabhAryas tvaM viharasva salakSmaNaH
3006012a tam ugratapasaM dIptaM maharSiM satyavAdinam
3006012c pratyuvAcAtmavAn rAmo brahmANam iva vAsavaH
3006013a aham evAhariSyAmi svayaM lokAn mahAmune
3006013c AvAsaM tv aham icchAmi pradiSTam iha kAnane
3006014a bhavAn sarvatra kuzalaH sarvabhUtahite rataH
3006014c AkhyAtaH zarabhaGgena gautamena mahAtmanA
3006015a evam uktas tu rAmeNa maharSir lokavizrutaH
3006015c abravIn madhuraM vAkyaM harSeNa mahatAplutaH
3006016a ayam evAzramo rAma guNavAn ramyatAm iha
3006016c RSisaMghAnucaritaH sadA mUlaphalair yutaH
3006017a imam Azramam Agamya mRgasaMghA mahAyazAH
3006017c aTitvA pratigacchanti lobhayitvAkutobhayAH
3006018a tac chrutvA vacanaM tasya maharSer lakSmaNAgrajaH
3006018c uvAca vacanaM dhIro vikRSya sazaraM dhanuH
3006019a tAn ahaM sumahAbhAga mRgasaMghAn samAgatAn
3006019c hanyAM nizitadhAreNa zareNAzanivarcasA
3006020a bhavAMs tatrAbhiSajyeta kiM syAt kRcchrataraM tataH
3006020c etasminn Azrame vAsaM ciraM tu na samarthaye
3006021a tam evam uktvA varadaM rAmaH saMdhyAm upAgamat
3006021c anvAsya pazcimAM saMdhyAM tatra vAsam akalpayat
3006022a tataH zubhaM tApasabhojyam annaM; svayaM sutIkSNaH puruSarSabhAbhyAm
3006022c tAbhyAM susatkRtya dadau mahAtmA; saMdhyAnivRttau rajanIM samIkSya
3007001a rAmas tu sahasaumitriH sutIkSNenAbhipUjitaH
3007001c pariNamya nizAM tatra prabhAte pratyabudhyata
3007002a utthAya tu yathAkAlaM rAghavaH saha sItayA
3007002c upAspRzat suzItena jalenotpalagandhinA
3007003a atha te 'gniM surAMz caiva vaidehI rAmalakSmaNau
3007003c kAlyaM vidhivad abhyarcya tapasvizaraNe vane
3007004a udayanntaM dinakaraM dRSTvA vigatakalmaSAH
3007004c sutIkSNam abhigamyedaM zlakSNaM vacanam abruvan
3007005a sukhoSitAH sma bhagavaMs tvayA pUjyena pUjitAH
3007005c ApRcchAmaH prayAsyAmo munayas tvarayanti naH
3007006a tvarAmahe vayaM draSTuM kRtsnam AzramamaNDalam
3007006c RSINAM puNyazIlAnAM daNDakAraNyavAsinAm
3007007a abhyanujJAtum icchAmaH sahaibhir munipuGgavaiH
3007007c dharmanityais tapodAntair vizikhair iva pAvakaiH
3007008a aviSahyAtapo yAvat sUryo nAtivirAjite
3007008c amArgeNAgatAM lakSmIM prApyevAnvayavarjitaH
3007009a tAvad icchAmahe gantum ity uktvA caraNau muneH
3007009c vavande sahasaumitriH sItayA saha rAghavaH
3007010a tau saMspRzantau caraNAv utthApya munipuMgavaH
3007010c gADham AliGgya sasneham idaM vacanam abravIt
3007011a ariSTaM gaccha panthAnaM rAma saumitriNA saha
3007011c sItayA cAnayA sArdhaM chAyayevAnuvRttayA
3007012a pazyAzramapadaM ramyaM daNDakAraNyavAsinAm
3007012c eSAM tapasvinAM vIra tapasA bhAvitAtmanAm
3007013a suprAjyaphalamUlAni puSpitAni vanAni ca
3007013c prazAntamRgayUthAni zAntapakSigaNAni ca
3007014a phullapaGkajaSaDAni prasannasalilAni ca
3007014c kAraNDavavikIrNAni taTAkAni sarAMsi ca
3007015a drakSyase dRSTiramyANi giriprasravaNAni ca
3007015c ramaNIyAny araNyAni mayUrAbhirutAni ca
3007016a gamyatAM vatsa saumitre bhavAn api ca gacchatu
3007016c AgantavyaM ca te dRSTvA punar evAzramaM mama
3007017a evam uktas tathety uktvA kAkutsthaH sahalakSmaNaH
3007017c pradakSiNaM muniM kRtA prasthAtum upacakrame
3007018a tataH zubhatare tUNI dhanuSI cAyatekSaNA
3007018c dadau sItA tayor bhrAtroH khaDgau ca vimalau tataH
3007019a Abadhya ca zubhe tUNI cApe cAdAya sasvane
3007019c niSkrAntAv AzramAd gantum ubhau tau rAmalakSmaNau
3008001a sutIkSNenAbhyanujJAtaM prasthitaM raghunandanam
3008001c vaidehI snigdhayA vAcA bhartAram idam abravIt
3008002a ayaM dharmaH susUkSmeNa vidhinA prApyate mahAn
3008002c nivRttena ca zakyo 'yaM vyasanAt kAmajAd iha
3008003a trINy eva vyasanAny atra kAmajAni bhavanty uta
3008003c mithyA vAkyaM paramakaM tasmAd gurutarAv ubhau
3008003e paradArAbhigamanaM vinA vairaM ca raudratA
3008004a mithyAvAkyaM na te bhUtaM na bhaviSyati rAghava
3008004c kuto 'bhilaSaNaM strINAM pareSAM dharmanAzanam
3008005a tac ca sarvaM mahAbAho zakyaM voDhuM jitendriyaiH
3008005c tava vazyendriyatvaM ca jAnAmi zubhadarzana
3008006a tRtIyaM yad idaM raudraM paraprANAbhihiMsanam
3008006c nirvairaM kriyate mohAt tac ca te samupasthitam
3008007a pratijJAtas tvayA vIra daNDakAraNyavAsinAm
3008007c RSINAM rakSaNArthAya vadhaH saMyati rakSasAm
3008008a etannimittaM ca vanaM daNDakA iti vizrutam
3008008c prasthitas tvaM saha bhrAtrA dhRtabANazarAsanaH
3008009a tatas tvAM prasthitaM dRSTvA mama cintAkulaM manaH
3008009c tvad vRttaM cintayantyA vai bhaven niHzreyasaM hitam
3008010a na hi me rocate vIra gamanaM daNDakAn prati
3008010c kAraNaM tatra vakSyAmi vadantyAH zrUyatAM mama
3008011a tvaM hi bANadhanuSpANir bhrAtrA saha vanaM gataH
3008011c dRSTvA vanacarAn sarvAn kaccit kuryAH zaravyayam
3008012a kSatriyANAm iha dhanur hutAzasyendhanAni ca
3008012c samIpataH sthitaM tejobalam ucchrayate bhRzam
3008013a purA kila mahAbAho tapasvI satyavAk zuciH
3008013c kasmiMz cid abhavat puNye vane ratamRgadvije
3008014a tasyaiva tapaso vighnaM kartum indraH zacIpatiH
3008014c khaDgapANir athAgacchad AzramaM bhaTa rUpadhRk
3008015a tasmiMs tad Azramapade nihitaH khaDga uttamaH
3008015c sa nyAsavidhinA dattaH puNye tapasi tiSThataH
3008016a sa tac chastram anuprApya nyAsarakSaNatatparaH
3008016c vane tu vicaraty eva rakSan pratyayam AtmanaH
3008017a yatra gacchaty upAdAtuM mUlAni ca phalAni ca
3008017c na vinA yAti taM khaDgaM nyAsarakSaNatatparaH
3008018a nityaM zastraM parivahan krameNa sa tapodhanaH
3008018c cakAra raudrIM svAM buddhiM tyaktvA tapasi nizcayam
3008019a tataH sa raudrAbhirataH pramatto 'dharmakarSitaH
3008019c tasya zastrasya saMvAsAj jagAma narakaM muniH
3008020a snehAc ca bahumAnAc ca smAraye tvAM na zikSaye
3008020c na kathaM cana sA kAryA hRhItadhanuSA tvayA
3008021a buddhir vairaM vinA hantuM rAkSasAn daNDakAzritAn
3008021c aparAdhaM vinA hantuM lokAn vIra na kAmaye
3008022a kSatriyANAM tu vIrANAM vaneSu niyatAtmanAm
3008022c dhanuSA kAryam etAvad ArtAnAm abhirakSaNam
3008023a kva ca zastraM kva ca vanaM kva ca kSAtraM tapaH kva ca
3008023c vyAviddham idam asmAbhir dezadharmas tu pUjyatAm
3008024a tad AryakaluSA buddhir jAyate zastrasevanAt
3008024c punar gatvA tv ayodhyAyAM kSatradharmaM cariSyasi
3008025a akSayA tu bhavet prItiH zvazrU zvazurayor mama
3008025c yadi rAjyaM hi saMnyasya bhaves tvaM nirato muniH
3008026a dharmAd arthaH prabhavati dharmAt prabhavate sukham
3008026c dharmeNa labhate sarvaM dharmasAram idaM jagat
3008027a AtmAnaM niyamais tais taiH karSayitvA prayatnataH
3008027c prApyate nipuNair dharmo na sukhAl labhyate sukham
3008028a nityaM zucimatiH saumya cara dharmaM tapovane
3008028c sarvaM hi viditaM tubhyaM trailokyam api tattvataH
3008029a strIcApalAd etad udAhRtaM me; dharmaM ca vaktuM tava kaH samarthaH
3008029c vicArya buddhyA tu sahAnujena; yad rocate tat kuru mAcireNa
3009001a vAkyam etat tu vaidehyA vyAhRtaM bhartRbhaktayA
3009001c zrutvA dharme sthito rAmaH pratyuvAcAtha maithilIm
3009002a hitam uktaM tvayA devi snigdhayA sadRzaM vacaH
3009002c kulaM vyapadizantyA ca dharmajJe janakAtmaje
3009003a kiM tu vakSyAmy ahaM devi tvayaivoktam idaM vacaH
3009003c kSatriyair dhAryate cApo nArtazabdo bhaved iti
3009004a te cArtA daNDakAraNye munayaH saMzitavratAH
3009004c mAM sIte svayam Agamya zaraNyAH zaraNaM gatAH
3009005a vasanto dharmaniratA vane mUlaphalAzanAH
3009005c na labhante sukhaM bhItA rAkSasaiH krUrakarmabhiH
3009006a kAle kAle ca niratA niyamair vividhair vane
3009006c bhakSyante rAkSasair bhImair naramAMsopajIvibhiH
3009007a te bhakSyamANA munayo daNDakAraNyavAsinaH
3009007c asmAn abhyavapadyeti mAm Ucur dvijasattamAH
3009008a mayA tu vacanaM zrutvA teSAm evaM mukhAc cyutam
3009008c kRtvA caraNazuzrUSAM vAkyam etad udAhRtam
3009009a prasIdantu bhavanto me hrIr eSA hi mamAtulA
3009009c yadIdRzair ahaM viprair upastheyair upasthitaH
3009009e kiM karomIti ca mayA vyAhRtaM dvijasaMnidhau
3009010a sarvair eva samAgamya vAg iyaM samudAhRtA
3009010c rAkSasair daNDakAraNye bahubhiH kAmarUpibhiH
3009010e arditAH sma bhRzaM rAma bhavAn nas trAtum arhati
3009011a homakAle tu saMprApte parvakAleSu cAnagha
3009011c dharSayanti sma durdharSA rAkSasAH pizitAzanAH
3009012a rAkSasair dharSitAnAM ca tApasAnAM tapasvinAm
3009012c gatiM mRgayamANAnAM bhavAn naH paramA gatiH
3009013a kAmaM tapaH prabhAvena zaktA hantuM nizAcarAn
3009013c cirArjitaM tu necchAmas tapaH khaNDayituM vayam
3009014a bahuvighnaM taponityaM duzcaraM caiva rAghava
3009014c tena zApaM na muJcAmo bhakSyamANAz ca rAkSasaiH
3009015a tad ardyamAnAn rakSobhir daNDakAraNyavAsibhiH
3009015c rakSanas tvaM saha bhrAtrA tvannAthA hi vayaM vane
3009016a mayA caitad vacaH zrutvA kArtsnyena paripAlanam
3009016c RSINAM daNDakAraNye saMzrutaM janakAtmaje
3009017a saMzrutya ca na zakSyAmi jIvamAnaH pratizravam
3009017c munInAm anyathA kartuM satyam iSTaM hi me sadA
3009018a apy ahaM jIvitaM jahyAM tvAM vA sIte salakSmaNAm
3009018c na tu pratijJAM saMzrutya brAhmaNebhyo vizeSataH
3009019a tad avazyaM mayA kAryam RSINAM paripAlanam
3009019c anuktenApi vaidehi pratijJAya tu kiM punaH
3009020a mama snehAc ca sauhArdAd idam uktaM tvayA vacaH
3009020c parituSTo 'smy ahaM sIte na hy aniSTo 'nuziSyate
3009020e sadRzaM cAnurUpaM ca kulasya tava zobhane
3009021a ity evam uktvA vacanaM mahAtmA; sItAM priyAM maithila rAjaputrIm
3009021c rAmo dhanuSmAn sahalakSmaNena; jagAma ramyANi tapovanAni
3010001a agrataH prayayau rAmaH sItA madhye sumadhyamA
3010001c pRSThatas tu dhanuSpANir lakSmaNo 'nujagAma ha
3010002a tau pazyamAnau vividhAJ zailaprasthAn vanAni ca
3010002c nadIz ca vividhA ramyA jagmatuH saha sItayA
3010003a sArasAMz cakravAkAMz ca nadIpulinacAriNaH
3010003c sarAMsi ca sapadmAni yutAni jalajaiH khagaiH
3010004a yUthabaddhAMz ca pRSatAn madonmattAn viSANinaH
3010004c mahiSAMz ca varAhAMz ca gajAMz ca drumavairiNaH
3010005a te gatvA dUram adhvAnaM lambamAne divAkare
3010005c dadRzuH sahitA ramyaM taTAkaM yojanAyatam
3010006a padmapuSkarasaMbAdhaM gajayUthair alaMkRtam
3010006c sArasair haMsakAdambaiH saMkulaM jalacAribhiH
3010007a prasannasalile ramyatasmin sarasi zuzruve
3010007c gItavAditranirghoSo na tu kaz cana dRzyate
3010008a tataH kautUhalAd rAmo lakSmaNaz ca mahArathaH
3010008c muniM dharmabhRtaM nAma praSTuM samupacakrame
3010009a idam atyadbhutaM zrutvA sarveSAM no mahAmune
3010009c kautUhalaM mahaj jAtaM kim idaM sAdhu kathyatAm
3010010a tenaivam ukto dharmAtmA rAghaveNa munis tadA
3010010c prabhAvaM sarasaH kRtsnam AkhyAtum upacakrame
3010011a idaM paJcApsaro nAma taTAkaM sArvakAlikam
3010011c nirmitaM tapasA rAma muninA mANDakarNinA
3010012a sa hi tepe tapas tIvraM mANDakarNir mahAmuniH
3010012c dazavarSasahasrANi vAyubhakSo jalAzraya
3010013a tataH pravyathitAH sarve devAH sAgnipurogamAH
3010013c abruvan vacanaM sarve paraspara samAgatAH
3010013e asmakaM kasya cit sthAnam eSa prArthayate muniH
3010014a tataH kartuM tapovighnaM sarvair devair niyojitAH
3010014c pradhAnApsarasaH paJcavidyuccalitavarcasaH
3010015a apsarobhis tatas tAbhir munir dRSTaparAvaraH
3010015c nIto madanavazyatvaM surANAM kAryasiddhaye
3010016a tAz caivApsarasaH paJcamuneH patnItvam AgatAH
3010016c taTAke nirmitaM tAsAm asminn antarhitaM gRham
3010017a tatraivApsarasaH paJcanivasantyo yathAsukham
3010017c ramayanti tapoyogAn muniM yauvanam Asthitam
3010018a tAsAM saMkrIDamAnAnAm eSa vAditraniHsvanaH
3010018c zrUyate bhUSaNonmizro gItazabdo manoharaH
3010019a Azcaryam iti tasyaitad vacanaM bhAvitAtmanaH
3010019c rAghavaH pratijagrAha saha bhrAtrA mahAyazAH
3010020a evaM kathayamAnasya dadarzAzramamaNDalam
3010020c kuzacIraparikSiptaM nAnAvRkSasamAvRtam
3010021a pravizya saha vaidehyA lakSmaNena ca rAghavaH
3010021c tadA tasmin sa kAkutsthaH zrImaty AzramamaNDale
3010022a uSitvA susukhaM tatra pUrjyamAno maharSibhiH
3010022c jagAma cAzramAMs teSAM paryAyeNa tapasvinAm
3010023a yeSAm uSitavAn pUrvaM sakAze sa mahAstravit
3010023c kva cit paridazAn mAsAn ekaM saMvatsaraM kva cit
3010024a kva cic ca caturo mAsAn paJcaSaT cAparAn kva cit
3010024c aparatrAdhikAn mAsAn adhyardham adhikaM kva cit
3010025a trIn mAsAn aSTamAsAMz ca rAghavo nyavasat sukham
3010025c tathA saMvasatas tasya munInAm AzrameSu vai
3010025e ramataz cAnukulyena yayuH saMvatsarA daza
3010026a parisRtya ca dharmajJo rAghavaH saha sItayA
3010026c sutIkSNasyAzramaM zrImAn punar evAjagAma ha
3010027a sa tam Azramam Agamya munibhiH pratipUjitaH
3010027c tatrApi nyavasad rAmaH kaM cit kAlam ariMdamaH
3010028a athAzramastho vinayAt kadA cit taM mahAmunim
3010028c upAsInaH sa kAkutsthaH sutIkSNam idam abravIt
3010029a asminn araNye bhagavann agastyo munisattamaH
3010029c vasatIti mayA nityaM kathAH kathayatAM zrutam
3010030a na tu jAnAmi taM dezaM vanasyAsya mahattayA
3010030c kutrAzramapadaM puNyaM maharSes tasya dhImataH
3010031a prasAdAt tatra bhavataH sAnujaH saha sItayA
3010031c agastyam abhigaccheyam abhivAdayituM munim
3010032a manoratho mahAn eSa hRdi saMparivartate
3010032c yad ahaM taM munivaraM zuzrUSeyam api svayam
3010033a iti rAmasya sa muniH zrutvA dharmAtmano vacaH
3010033c sutIkSNaH pratyuvAcedaM prIto dazarathAtmajam
3010034a aham apy etad eva tvAM vaktukAmaH salakSmaNam
3010034c agastyam abhigaccheti sItayA saha rAghava
3010035a diSTyA tv idAnIm arthe 'smin svayam eva bravISi mAm
3010035c aham AkhyAmi te vatsa yatrAgastyo mahAmuniH
3010036a yojanAny AzramAt tAta yAhi catvAri vai tataH
3010036c dakSiNena mahAJ zrImAn agastyabhrAtur AzramaH
3010037a sthalaprAye vanoddeze pippalIvanazobhite
3010037c bahupuSpaphale ramye nAnAzakuninAdite
3010038a padminyo vividhAs tatra prasannasalilAH zivAH
3010038c haMsakAraNDavAkIrNAz cakravAkopazobhitAH
3010039a tatraikAM rajanIm uSya prabhAte rAma gamyatAm
3010039c dakSiNAM dizam AsthAya vanakhaNDasya pArzvataH
3010040a tatrAgastyAzramapadaM gatvA yojanam antaram
3010040c ramaNIye vanoddeze bahupAdapa saMvRte
3010040e raMsyate tatra vaidehI lakSmaNaz ca tvayA saha
3010041a sa hi ramyo vanoddezo bahupAdapasaMkulaH
3010041c yadi buddhiH kRtA draSTum agastyaM taM mahAmunim
3010041e adyaiva gamane buddhiM rocayasva mahAyazaH
3010042a iti rAmo muneH zrutvA saha bhrAtrAbhivAdya ca
3010042c pratasthe 'gastyam uddizya sAnujaH saha sItayA
3010043a pazyan vanAni citrANi parvapAMz cAbhrasaMnibhAn
3010043c sarAMsi saritaz caiva pathi mArgavazAnugAH
3010044a sutIkSNenopadiSTena gatvA tena pathA sukham
3010044c idaM paramasaMhRSTo vAkyaM lakSmaNam abravIt
3010045a etad evAzramapadaM nUnaM tasya mahAtmanaH
3010045c agastyasya muner bhrAtur dRzyate puNyakarmaNaH
3010046a yathA hIme vanasyAsya jJAtAH pathi sahasrazaH
3010046c saMnatAH phalabhareNa puSpabhAreNa ca drumAH
3010047a pippalInAM ca pakvAnAM vanAd asmAd upAgataH
3010047c gandho 'yaM pavanotkSiptaH sahasA kaTukodayaH
3010048a tatra tatra ca dRzyante saMkSiptAH kASThasaMcayAH
3010048c lUnAz ca pathi dRzyante darbhA vaidUryavarcasaH
3010049a etac ca vanamadhyasthaM kRSNAbhrazikharopamam
3010049c pAvakasyAzramasthasya dhUmAgraM saMpradRzyate
3010050a vivikteSu ca tIrtheSu kRtasnAnA dvijAtayaH
3010050c puSpopahAraM kurvanti kusumaiH svayam ArjitaiH
3010051a tat sutIkSNasya vacanaM yathA saumya mayA zrutam
3010051c agastyasyAzramo bhrAtur nUnam eSa bhaviSyati
3010052a nigRhya tarasA mRtyuM lokAnAM hitakAmyayA
3010052c yasya bhrAtrA kRteyaM dik zaraNyA puNyakarmaNA
3010053a ihaikadA kila krUro vAtApir api celvalaH
3010053c bhrAtarau sahitAv AstAM brAhmaNaghnau mahAsurau
3010054a dhArayan brAhmaNaM rUpam ilvalaH saMskRtaM vadan
3010054c Amantrayati viprAn sa zrAddham uddizya nirghRNaH
3010055a bhrAtaraM saMskRtaM bhrAtA tatas taM meSarUpiNam
3010055c tAn dvijAn bhojayAm Asa zrAddhadRSTena karmaNA
3010056a tato bhuktavatAM teSAM viprANAm ilvalo 'bravIt
3010056c vAtApe niSkramasveti svareNa mahatA vadan
3010057a tato bhrAtur vacaH zrutvA vAtApir meSavan nadan
3010057c bhittvA bhitvA zarIrANi brAhmaNAnAM viniSpatat
3010058a brAhmaNAnAM sahasrANi tair evaM kAmarUpibhiH
3010058c vinAzitAni saMhatya nityazaH pizitAzanaiH
3010059a agastyena tadA devaiH prArthitena maharSiNA
3010059c anubhUya kila zrAddhe bhakSitaH sa mahAsuraH
3010060a tataH saMpannam ity uktvA dattvA hastAvasecanam
3010060c bhrAtaraM niSkramasveti ilvalaH so 'bhyabhASata
3010061a taM tathA bhASamANaM tu bhrAtaraM vipraghAtinam
3010061c abravIt prahasan dhImAn agastyo munisattamaH
3010062a kuto niSkramituM zaktir mayA jIrNasya rakSasaH
3010062c bhrAtus te meSa rUpasya gatasya yamasAdanam
3010063a atha tasya vacaH zrutvA bhrAtur nidhanasaMzritam
3010063c pradharSayitum Arebhe muniM krodhAn nizAcaraH
3010064a so 'bhyadravad dvijendraM taM muninA dIptatejasA
3010064c cakSuSAnalakalpena nirdagdho nidhanaM gataH
3010065a tasyAyam Azramo bhrAtus taTAkavanazobhitaH
3010065c viprAnukampayA yena karmedaM duSkaraM kRtam
3010066a evaM kathayamAnasya tasya saumitriNA saha
3010066c rAmasyAstaM gataH sUryaH saMdhyAkAlo 'bhyavartata
3010067a upAsya pazcimAM saMdhyAM saha bhrAtrA yathAvidhi
3010067c pravivezAzramapadaM tam RSiM cAbhyavAdayan
3010068a samyak pratigRhItas tu muninA tena rAghavaH
3010068c nyavasat tAM nizAm ekAM prAzya mUlaphalAni ca
3010069a tasyAM rAtryAM vyatItAyAM vimale sUryamaNDale
3010069c bhrAtaraM tam agastyasya Amantrayata rAghavaH
3010070a abhivAdaye tvA bhagavan sukham adhyuSito nizAm
3010070c Amantraye tvAM gacchAmi guruM te draSTum agrajam
3010071a gamyatAm iti tenokto jagAma raghunandanaH
3010071c yathoddiSTena mArgeNa vanaM tac cAvalokayan
3010072a nIvArAn panasAMs tAlAMs timizAn vaJjulAn dhavAn
3010072c ciribilvAn madhUkAMz ca bilvAn api ca tindukAn
3010073a puSpitAn puSpitAgrAbhir latAbhir anuveSTitAn
3010073c dadarza rAmaH zatazas tatra kAntArapAdapAn
3010074a hastihastair vimRditAn vAnarair upazobhitAn
3010074c mattaiH zakunisaMghaiz ca zatazaH pratinAditAn
3010075a tato 'bravIt samIpasthaM rAmo rAjIvalocanaH
3010075c pRSThato 'nugataM vIraM lakSmaNaM lakSmivardhanam
3010076a snigdhapatrA yathA vRkSA yathA kSAntA mRgadvijAH
3010076c Azramo nAtidUrastho maharSer bhAvitAtmanaH
3010077a agastya iti vikhyAto loke svenaiva karmaNA
3010077c Azramo dRzyate tasya parizrAnta zramApahaH
3010078a prAjyadhUmAkulavanaz cIramAlApariSkRtaH
3010078c prazAntamRgayUthaz ca nAnAzakuninAditaH
3010079a nigRhya tarasA mRtyuM lokAnAM hitakAmyayA
3010079c dakSiNA dik kRtA yena zaraNyA puNyakarmaNA
3010080a tasyedam AzramapadaM prabhAvAd yasya rAkSasaiH
3010080c dig iyaM dakSiNA trAsAd dRzyate nopabhujyate
3010081a yadA prabhRti cAkrAntA dig iyaM puNyakarmaNA
3010081c tadA prabhRti nirvairAH prazAntA rajanIcarAH
3010082a nAmnA ceyaM bhagavato dakSiNA dik pradakSiNA
3010082c prathitA triSu lokeSu durdharSA krUrakarmabhiH
3010083a mArgaM niroddhuM satataM bhAskarasyAcalottamaH
3010083c saMdezaM pAlayaMs tasya vindhyazaulo na vardhate
3010084a ayaM dIrghAyuSas tasya loke vizrutakarmaNaH
3010084c agastyasyAzramaH zrImAn vinItamRgasevitaH
3010085a eSa lokArcitaH sAdhur hite nityaM rataH satAm
3010085c asmAn adhigatAn eSa zreyasA yojayiSyati
3010086a ArAdhayiSyAmy atrAham agastyaM taM mahAmunim
3010086c zeSaM ca vanavAsasya saumya vatsyAmy ahaM prabho
3010087a atra devAH sagandharvAH siddhAz ca paramarSayaH
3010087c agastyaM niyatAhAraM satataM paryupAsate
3010088a nAtra jIven mRSAvAdI krUro vA yadi vA zaThaH
3010088c nRzaMsaH kAmavRtto vA munir eSa tathAvidhaH
3010089a atra devAz ca yakSAz ca nAgAz ca patagaiH saha
3010089c vasanti niyatAhArA dharmam ArAdhayiSNavaH
3010090a atra siddhA mahAtmAno vimAnaiH sUryasaMnibhaiH
3010090c tyaktvA dehAn navair dehaiH svaryAtAH paramarSayaH
3010091a yakSatvam amaratvaM ca rAjyAni vividhAni ca
3010091c atra devAH prayacchanti bhUtair ArAdhitAH zubhaiH
3010092a AgatAH smAzramapadaM saumitre pravizAgrataH
3010092c nivedayeha mAM prAptam RSaye saha sItayA
3011001a sa pravizyAzramapadaM lakSmaNo rAghavAnujaH
3011001c agastyaziSyam AsAdya vAkyam etad uvAca ha
3011002a rAjA dazaratho nAma jyeSThas tasya suto balI
3011002c rAmaH prApto muniM draSTuM bhAryayA saha sItayA
3011003a lakSmaNo nAma tasyAhaM bhrAtA tv avarajo hitaH
3011003c anukUlaz ca bhaktaz ca yadi te zrotram AgataH
3011004a te vayaM vanam atyugraM praviSTAH pitRzAsanAt
3011004c draSTum icchAmahe sarve bhagavantaM nivedyatAm
3011005a tasya tad vacanaM zrutvA lakSmaNasya tapodhanaH
3011005c tathety uktvAgnizaraNaM praviveza niveditum
3011006a sa pravizya munizreSThaM tapasA duSpradharSaNam
3011006c kRtAJjalir uvAcedaM rAmAgamanam aJjasA
3011007a putrau dazarathasyemau rAmo lakSmaNa eva ca
3011007c praviSTAv AzramapadaM sItayA saha bhAryayA
3011008a draSTuM bhavantam AyAtau zuzrUSArtham ariMdamau
3011008c yad atrAnantaraM tattvam AjJApayitum arhasi
3011009a tataH ziSyAd upazrutya prAptaM rAmaM salakSmaNam
3011009c vaidehIM ca mahAbhAgAm idaM vacanam abravIt
3011010a diSTyA rAmaz cirasyAdya draSTuM mAM samupAgataH
3011010c manasA kAGkSitaM hy asya mayApy AgamanaM prati
3011011a gamyatAM satkRto rAmaH sabhAryaH sahalakSmaNaH
3011011c pravezyatAM samIpaM me kiM cAsau na pravezitaH
3011012a evam uktas tu muninA dharmajJena mahAtmanA
3011012c abhivAdyAbravIc chiSyas tatheti niyatAJjaliH
3011013a tato niSkramya saMbhrAntaH ziSyo lakSmaNam abravIt
3011013c kvAsau rAmo muniM draSTum etu pravizatu svayam
3011014a tato gatvAzramapadaM ziSyeNa saha lakSmaNaH
3011014c darzayAm Asa kAkutsthaM sItAM ca janakAtmajAm
3011015a taM ziSyaH prazritaM vAkyam agastyavacanaM bruvan
3011015c prAvezayad yathAnyAyaM satkArArthaM susatkRtam
3011016a praviveza tato rAmaH sItayA sahalakSmaNaH
3011016c prazAntahariNAkIrNam AzramaM hy avalokayan
3011017a sa tatra brahmaNaH sthAnam agneH sthAnaM tathaiva ca
3011017c viSNoH sthAnaM mahendrasya sthAnaM caiva vivasvataH
3011018a somasthAnaM bhagasthAnaM sthAnaM kauberam eva ca
3011018c dhAtur vidhAtuH sthAnaM ca vAyoH sthAnaM tathaiva ca
3011019a tataH ziSyaiH parivRto munir apy abhiniSpatat
3011019c taM dadarzAgrato rAmo munInAM dIptatejasaM
3011019e abravId vacanaM vIro lakSmaNaM lakSmivardhanam
3011020a eSa lakSmaNa niSkrAmaty agastyo bhagavAn RSiH
3011020c audAryeNAvagacchAmi nidhAnaM tapasAm imam
3011021a evam uktvA mahAbAhur agastyaM sUryavarcasaM
3011021c jagrAha paramaprItas tasya pAdau paraMtapaH
3011022a abhivAdya tu dharmAtmA tasthau rAmaH kRtAJjaliH
3011022c sItayA saha vaidehyA tadA rAma salakSmaNaH
3011023a pratigRhya ca kAkutstham arcayitvAsanodakaiH
3011023c kuzalapraznam uktvA ca AsyatAm iti so 'bravIt
3011024a agniM hutvA pradAyArghyam atithiM pratipUjya ca
3011024c vAnaprasthena dharmeNa sa teSAM bhojanaM dadau
3011025a prathamaM copavizyAtha dharmajJo munipuMgavaH
3011025c uvAca rAmam AsInaM prAJjaliM dharmakovidam
3011026a anyathA khalu kAkutstha tapasvI samudAcaran
3011026c duHsAkSIva pare loke svAni mAMsAni bhakSayet
3011027a rAjA sarvasya lokasya dharmacArI mahArathaH
3011027c pUjanIyaz ca mAnyaz ca bhavAn prAptaH priyAtithiH
3011028a evam uktvA phalair mUlaiH puSpaiz cAnyaiz ca rAghavam
3011028c pUjayitvA yathAkAmaM punar eva tato 'bravIt
3011029a idaM divyaM mahac cApaM hemavajravibhUSitam
3011029c vaiSNavaM puruSavyAghra nirmitaM vizvakarmaNA
3011030a amoghaH sUryasaMkAzo brahmadattaH zarottamaH
3011030c datto mama mahendreNa tUNI cAkSayasAyakau
3011031a saMpUrNau nizitair bANair jvaladbhir iva pAvakaiH
3011031c mahArAjata kozo 'yam asir hemavibhUSitaH
3011032a anena dhanuSA rAma hatvA saMkhye mahAsurAn
3011032c AjahAra zriyaM dIptAM purA viSNur divaukasAm
3011033a tad dhanus tau ca tUNIrau zaraM khaDgaM ca mAnada
3011033c jayAya pratigRhNISva vajraM vajradharo yathA
3011034a evam uktvA mahAtejAH samastaM tad varAyudham
3011034c dattvA rAmAya bhagavAn agastyaH punar abravIt
3012001a rAma prIto 'smi bhadraM te parituSTo 'smi lakSmaNa
3012001c abhivAdayituM yan mAM prAptau sthaH saha sItayA
3012002a adhvazrameNa vAM khedo bAdhate pracurazramaH
3012002c vyaktam utkaNThate cApi maithilI janakAtmajA
3012003a eSA hi sukumArI ca duHkhaiz ca na vimAnitA
3012003c prAjyadoSaM vanaM praptA bhartRsnehapracoditA
3012004a yathaiSA ramate rAma iha sItA tathA kuru
3012004c duSkaraM kRtavaty eSA vane tvAm anugacchatI
3012005a eSA hi prakRtiH strINAm AsRSTe raghunandana
3012005c samastham anurajyante viSamasthaM tyajanti ca
3012006a zatahradAnAM lolatvaM zastrANAM tIkSNatAM tathA
3012006c garuDAnilayoH zaighryam anugacchanti yoSitaH
3012007a iyaM tu bhavato bhAryA doSair etair vivarjitAH
3012007c zlAghyA ca vyapadezyA ca yathA devI hy arundhatI
3012008a alaMkRto 'yaM dezaz ca yatra saumitriNA saha
3012008c vaidehyA cAnayA rAma vatsyasi tvam ariMdama
3012009a evam uktas tu muninA rAghavaH saMyatAJjaliH
3012009c uvAca prazritaM vAkyam RSiM dIptam ivAnalam
3012010a dhanyo 'smy anugRhIto 'smi yasya me munipuMgavaH
3012010c guNaiH sabhrAtRbhAryasya varadaH parituSyati
3012011a kiM tu vyAdiza me dezaM sodakaM bahukAnanam
3012011c yatrAzramapadaM kRtvA vaseyaM nirataH sukham
3012012a tato 'bravIn muni zreSThaH zrutvA rAmasya bhASitam
3012012c dhyAtvA muhUrtaM dharmAtmA dhIro dhIrataraM vacaH
3012013a ito dviyojane tAta bahumUlaphalodakaH
3012013c dezo bahumRgaH zrImAn paJcavaTy abhivizrutaH
3012014a tatra gatvAzramapadaM kRtvA saumitriNA saha
3012014c ramasva tvaM pitur vAkyaM yathoktam anupAlayan
3012015a vidito hy eSa vRttAnto mama sarvas tavAnagha
3012015c tapasaz ca prabhAvena snehAd dazarathasya ca
3012016a hRdayasthaz ca te chando vijJAtas tapasA mayA
3012016c iha vAsaM pratijJAya mayA saha tapovane
3012017a ataz ca tvAm ahaM brUmi gaccha paJcavaTIm iti
3012017c sa hi ramyo vanoddezo maithilI tatra raMsyate
3012018a sa dezaH zlAghanIyaz ca nAtidUre ca rAghava
3012018c godAvaryAH samIpe ca maithilI tatra raMsyate
3012019a prAjyamUlaphalaiz caiva nAnAdvija gaNair yutaH
3012019c viviktaz ca mahAbAho puNyo ramyas tathaiva ca
3012020a bhavAn api sadAraz ca zaktaz ca parirakSaNe
3012020c api cAtra vasan rAmas tApasAn pAlayiSyasi
3012021a etad AlakSyate vIra madhukAnAM mahad vanam
3012021c uttareNAsya gantavyaM nyagrodham abhigacchatA
3012022a tataH sthalam upAruhya parvatasyAvidUrataH
3012022c khyAtaH paJcavaTIty eva nityapuSpitakAnanaH
3012023a agastyenaivam uktas tu rAmaH saumitriNA saha
3012023c sAtkRtyAmantrayAm Asa tam RSiM satyavAdinam
3012024a tau tu tenAbhyanujJAtau kRtapAdAbhivandanau
3012024c tadAzramAt paJcavaTIM jagmatuH saha sItayA
3012025a gRhItacApau tu narAdhipAtmajau; viSaktatUNI samareSv akAtarau
3012025c yathopadiSTena pathA maharSiNA; prajagmatuH paJcavaTIM samAhitau
3013001a atha paJcavaTIM gacchann antarA raghunandanaH
3013001c AsasAda mahAkAyaM gRdhraM bhImaparAkramam
3013002a taM dRSTvA tau mahAbhAgau vanasthaM rAmalakSmaNau
3013002c menAte rAkSasaM pakSiM bruvANau ko bhavAn iti
3013003a sa tau madhurayA vAcA saumyayA prINayann iva
3013003c uvAca vatsa mAM viddhi vayasyaM pitur AtmanaH
3013004a sa taM pitRsakhaM buddhvA pUjayAm Asa rAghavaH
3013004c sa tasya kulam avyagram atha papraccha nAma ca
3013005a rAmasya vacanaM zrutvA kulam AtmAnam eva ca
3013005c AcacakSe dvijas tasmai sarvabhUtasamudbhavam
3013006a pUrvakAle mahAbAho ye prajApatayo 'bhavan
3013006c tAn me nigadataH sarvAn AditaH zRNu rAghava
3013007a kardamaH prathamas teSAM vikRtas tadanantaram
3013007c zeSaz ca saMzrayaz caiva bahuputraz ca vIryavAn
3013008a sthANur marIcir atriz ca kratuz caiva mahAbalaH
3013008c pulastyaz cAGgirAz caiva pracetAH pulahas tathA
3013009a dakSo vivasvAn aparo 'riSTanemiz ca rAghava
3013009c kazyapaz ca mahAtejAs teSAm AsIc ca pazcimaH
3013010a prajApates tu dakSasya babhUvur iti naH zrutam
3013010c SaSTir duhitaro rAma yazasvinyo mahAyazaH
3013011a kazyapaH pratijagrAha tAsAm aSTau sumadhyamAH
3013011c aditiM ca ditiM caiva danUm api ca kAlakAm
3013012a tAmrAM krodhavazAM caiva manuM cApy analAm api
3013012c tAs tu kanyAs tataH prItaH kazyapaH punar abravIt
3013013a putrAMs trailokyabhartqn vai janayiSyatha mat samAn
3013013c aditis tan manA rAma ditiz ca danur eva ca
3013014a kAlakA ca mahAbAho zeSAs tv amanaso 'bhavan
3013014c adityAM jajJire devAs trayastriMzad ariMdama
3013015a AdityA vasavo rudrA azvinau ca paraMtapa
3013015c ditis tv ajanayat putrAn daityAMs tAta yazasvinaH
3013016a teSAm iyaM vasumatI purAsIt savanArNavA
3013016c danus tv ajanayat putram azvagrIvam ariMdama
3013017a narakaM kAlakaM caiva kAlakApi vyajAyata
3013017c krauJcIM bhAsIM tathA zyenIM dhRtarASTrIM tathA zukIm
3013018a tAmrApi suSuve kanyAH paJcaitA lokavizrutAH
3013018c ulUkAJ janayat krauJcI bhAsI bhAsAn vyajAyata
3013019a zyenI zyenAMz ca gRdhrAMz ca vyajAyata sutejasaH
3013019c dhRtarASTrI tu haMsAMz ca kalahaMsAMz ca sarvazaH
3013020a cakravAkAMz ca bhadraM te vijajJe sApi bhAminI
3013020c zukI natAM vijajJe tu natAyA vinatA sutA
3013021a dazakrodhavazA rAma vijajJe 'py AtmasaMbhavAH
3013021c mRgIM ca mRgamandAM ca harIM bhadramadAm api
3013022a mAtaGgIm atha zArdUlIM zvetAM ca surabhIM tathA
3013022c sarvalakSaNasaMpannAM surasAM kadrukAm api
3013023a apatyaM tu mRgAH sarve mRgyA naravarottama
3013023c RSkAz ca mRgamandAyAH sRmarAz camarAs tathA
3013024a tatas tv irAvatIM nAma jajJe bhadramadA sutAm
3013024c tasyAs tv airAvataH putro lokanAtho mahAgajaH
3013025a haryAz ca harayo 'patyaM vAnarAz ca tapasvinaH
3013025c golAGgUlAMz ca zArdUlI vyAghrAMz cAjanayat sutAn
3013026a mAtaGgyAs tv atha mAtaGgA apatyaM manujarSabha
3013026c dizAgajaM tu zvetAkSaM zvetA vyajanayat sutam
3013027a tato duhitarau rAma surabhir devy ajAyata
3013027c rohiNIM nAma bhadraM te gandharvIM ca yazasvinIm
3013028a rohiNy ajanayad gA vai gandharvI vAjinaH sutAn
3013028c surasAjanayan nAgAn rAma kadrUz ca pannagAn
3013029a manur manuSyAJ janayat kazyapasya mahAtmanaH
3013029c brAhmaNAn kSatriyAn vaizyAJ zUdrAMz ca manujarSabha
3013030a mukhato brAhmaNA jAtA urasaH kSatriyAs tathA
3013030c UrubhyAM jajJire vaizyAH padbhyAM zUdrA iti zrutiH
3013031a sarvAn puNyaphalAn vRkSAn analApi vyajAyata
3013031c vinatA ca zukI pautrI kadrUz ca surasA svasA
3013032a kadrUr nAgasahaskraM tu vijajJe dharaNIdharam
3013032c dvau putrau vinatAyAs tu garuDo 'ruNa eva ca
3013033a tasmAj jAto 'ham aruNAt saMpAtiz ca mamAgrajaH
3013033c jaTAyur iti mAM viddhi zyenIputram ariMdama
3013034a so 'haM vAsasahAyas te bhaviSyAmi yadIcchasi
3013034c sItAM ca tAta rakSiSye tvayi yAte salakSmaNe
3013035a jaTAyuSaM tu pratipUjya rAghavo; mudA pariSvajya ca saMnato 'bhavat
3013035c pitur hi zuzrAva sakhitvam AtmavAJ; jaTAyuSA saMkathitaM punaH punaH
3013036a sa tatra sItAM paridAya maithilIM; sahaiva tenAtibalena pakSiNA
3013036c jagAma tAM paJcavaTIM salakSmaNo; ripUn didhakSaJ zalabhAn ivAnalaH
3014001a tataH paJcavaTIM gatvA nAnAvyAlamRgAyutAm
3014001c uvAca bhrAtaraM rAmo lakSmaNaM dIptatejasaM
3014002a AgatAH sma yathoddiSTam amuM dezaM maharSiNA
3014002c ayaM paJcavaTI dezaH saumya puSpitakAnanaH
3014003a sarvataz cAryatAM dRSTiH kAnane nipuNo hy asi
3014003c AzramaH katarasmin no deze bhavati saMmataH
3014004a ramate yatra vaidehI tvam ahaM caiva lakSmaNa
3014004c tAdRzo dRzyatAM dezaH saMnikRSTajalAzayaH
3014005a vanarAmaNyakaM yatra jalarAmaNyakaM tathA
3014005c saMnikRSTaM ca yatra syAt samitpuSpakuzodakam
3014006a evam uktas tu rAmeNa lakmaNaH saMyatAJjaliH
3014006c sItA samakSaM kAkutstham idaM vacanam abravIt
3014007a paravAn asmi kAkutstha tvayi varSazataM sthite
3014007c svayaM tu rucire deze kriyatAm iti mAM vada
3014008a suprItas tena vAkyena lakSmaNasya mahAdyutiH
3014008c vimRzan rocayAm Asa dezaM sarvaguNAnvitam
3014009a sa taM ruciram Akramya dezam AzramakarmaNi
3014009c haste gRhItvA hastena rAmaH saumitrim abravIt
3014010a ayaM dezaH samaH zrImAn puSpitair tarubhir vRtaH
3014010c ihAzramapadaM saumya yathAvat kartum arhasi
3014011a iyam AdityasaMkAzaiH padmaiH surabhigandhibhiH
3014011c adUre dRzyate ramyA padminI padmazobhitA
3014012a yathAkhyAtam agastyena muninA bhAvitAtmanA
3014012c iyaM godAvarI ramyA puSpitais tarubhir vRtA
3014013a haMsakAraNDavAkIrNA cakravAkopazobhitA
3014013c nAtidUre na cAsanne mRgayUthanipIDitA
3014014a mayUranAditA ramyAH prAMzavo bahukandarAH
3014014c dRzyante girayaH saumya phullais tarubhir AvRtAH
3014015a sauvarNe rAjatais tAmrair deze deze ca dhAtubhiH
3014015c gavAkSitA ivAbhAnti gajAH paramabhaktibhiH
3014016a sAlais tAlais tamAlaiz ca kharjUraiH panasAmrakaiH
3014016c nIvArais timizaiz caiva puMnAgaiz copazobhitAH
3014017a cUtair azokais tilakaiz campakaiH ketakair api
3014017c puSpagulmalatopetais tais tais tarubhir AvRtAH
3014018a candanaiH syandanair nIpaiH panasair lakucair api
3014018c dhavAzvakarNakhadiraiH zamIkiMzukapATalaiH
3014019a idaM puNyam idaM medhyam idaM bahumRgadvijam
3014019c iha vatsyAma saumitre sArdham etena pakSiNA
3014020a evam uktas tu rAmeNa lakSmaNaH paravIrahA
3014020c acireNAzramaM bhrAtuz cakAra sumahAbalaH
3014021a parNazAlAM suvipulAM tatra saMghAtamRttikAm
3014021c sustambhAM maskarair dIrghaiH kRtavaMzAM suzobhanAm
3014022a sa gatvA lakSmaNaH zrImAn nadIM godAvarIM tadA
3014022c snAtvA padmAni cAdAya saphalaH punar AgataH
3014023a tataH puSpabaliM kRtvA zAntiM ca sa yathAvidhi
3014023c darzayAm Asa rAmAya tad AzramapadaM kRtam
3014024a sa taM dRSTvA kRtaM saumyam AzramaM saha sItayA
3014024c rAghavaH parNazAlAyAM harSam AhArayat param
3014025a susaMhRSTaH pariSvajya bAhubhyAM lakSmaNaM tadA
3014025c atisnigdhaM ca gADhaM ca vacanaM cedam abravIt
3014026a prIto 'smi te mahat karma tvayA kRtam idaM prabho
3014026c pradeyo yannimittaM te pariSvaGgo mayA kRtaH
3014027a bhAvajJena kRtajJena dharmajJena ca lakSmaNa
3014027c tvayA putreNa dharmAtmA na saMvRttaH pitA mama
3014028a evaM lakSmaNam uktvA tu rAghavo lakSmivardhanaH
3014028c tasmin deze bahuphale nyavasat sa sukhaM vazI
3014029a kaM cit kAlaM sa dharmAtmA sItayA lakSmaNena ca
3014029c anvAsyamAno nyavasat svargaloke yathAmaraH
3015001a vasatas tasya tu sukhaM rAghavasya mahAtmanaH
3015001c zaradvyapAye hemanta Rtur iSTaH pravartate
3015002a sa kadA cit prabhAtAyAM zarvaryAM raghunandanaH
3015002c prayayAv abhiSekArthaM ramyAM godAvarIM nadIm
3015003a prahvaH kalazahastas taM sItayA saha vIryavAn
3015003c pRSThato 'nuvrajan bhrAtA saumitrir idam abravIt
3015004a ayaM sa kAlaH saMprAptaH priyo yas te priyaMvada
3015004c alaMkRta ivAbhAti yena saMvatsaraH zubhaH
3015005a nIhAraparuSo lokaH pRthivI sasyamAlinI
3015005c jalAny anupabhogyAni subhago havyavAhanaH
3015006a navAgrayaNapUjAbhir abhyarcya pitRdevatAH
3015006c kRtAgrayaNakAH kAle santo vigatakalmaSAH
3015007a prAjyakAmA janapadAH saMpannataragorasAH
3015007c vicaranti mahIpAlA yAtrArthaM vijigISavaH
3015008a sevamAne dRDhaM sUrye dizam antakasevitAm
3015008c vihInatilakeva strI nottarA dik prakAzate
3015009a prakRtyA himakozADhyo dUrasUryaz ca sAmpratam
3015009c yathArthanAmA suvyaktaM himavAn himavAn giriH
3015010a atyantasukhasaMcArA madhyAhne sparzataH sukhAH
3015010c divasAH subhagAdityAz chAyAsaliladurbhagAH
3015011a mRdusUryAH sanIhArAH paTuzItAH samArutAH
3015011c zUnyAraNyA himadhvastA divasA bhAnti sAmpratam
3015012a nivRttAkAzazayanAH puSyanItA himAruNAH
3015012c zItA vRddhatarAyAmAs triyAmA yAnti sAmpratam
3015013a ravisaMkrAntasaubhAgyas tuSArAruNamaNDalaH
3015013c niHzvAsAndha ivAdarzaz candramA na prakAzate
3015014a jyotsnA tuSAramalinA paurNamAsyAM na rAjate
3015014c sIteva cAtapazyAmA lakSyate na tu zobhate
3015015a prakRtyA zItalasparzo himaviddhaz ca sAmpratam
3015015c pravAti pazcimo vAyuH kAle dviguNazItalaH
3015016a bASpacchannAny araNyAni yavagodhUmavanti ca
3015016c zobhante 'bhyudite sUrye nadadbhiH krauJcasArasaiH
3015017a kharjUrapuSpAkRtibhiH zirobhiH pUrNataNDulaiH
3015017c zobhante kiM cidAlambAH zAlayaH kanakaprabhAH
3015018a mayUkhair upasarpadbhir himanIhArasaMvRtaiH
3015018c dUram abhyuditaH sUryaH zazAGka iva lakSyate
3015019a agrAhyavIryaH pUrvAhNe madhyAhne sparzataH sukhaH
3015019c saMraktaH kiM cid ApANDur AtapaH zobhate kSitau
3015020a avazyAyanipAtena kiM cit praklinnazAdvalA
3015020c vanAnAM zobhate bhUmir niviSTataruNAtapA
3015021a avazyAyatamonaddhA nIhAratamasAvRtAH
3015021c prasuptA iva lakSyante vipuSpA vanarAjayaH
3015022a bASpasaMchannasalilA rutavijJeyasArasAH
3015022c himArdravAlukais tIraiH sarito bhAnti sAmpratam
3015023a tuSArapatanAc caiva mRdutvAd bhAskarasya ca
3015023c zaityAd agAgrastham api prAyeNa rasavaj jalam
3015024a jarAjarjaritaiH parNaiH zIrNakesarakarNikaiH
3015024c nAlazeSA himadhvastA na bhAnti kamalAkarAH
3015025a asmiMs tu puruSavyAghra kAle duHkhasamanvitaH
3015025c tapaz carati dharmAtmA tvadbhaktyA bharataH pure
3015026a tyaktvA rAjyaM ca mAnaM ca bhogAMz ca vividhAn bahUn
3015026c tapasvI niyatAhAraH zete zIte mahItale
3015027a so 'pi velAm imAM nUnam abhiSekArtham udyataH
3015027c vRtaH prakRtibhir nityaM prayAti sarayUM nadIm
3015028a atyantasukhasaMvRddhaH sukumAro himArditaH
3015028c kathaM tv apararAtreSu sarayUm avagAhate
3015029a padmapatrekSaNaH zyAmaH zrImAn nirudaro mahAn
3015029c dharmajJaH satyavAdI ca hrIniSedho jitendriyaH
3015030a priyAbhibhASI madhuro dIrghabAhur ariMdamaH
3015030c saMtyajya vividhAn saukhyAn AryaM sarvAtmanAzritaH
3015031a jitaH svargas tava bhrAtrA bharatena mahAtmanA
3015031c vanastham api tApasye yas tvAm anuvidhIyate
3015032a na pitryam anuvarntante mAtRkaM dvipadA iti
3015032c khyAto lokapravAdo 'yaM bharatenAnyathAkRtaH
3015033a bhartA dazaratho yasyAH sAdhuz ca bharataH sutaH
3015033c kathaM nu sAmbA kaikeyI tAdRzI krUradarzinI
3015034a ity evaM lakSmaNe vAkyaM snehAd bruvati dhArmike
3015034c parivAdaM jananyAs tam asahan rAghavo 'bravIt
3015035a na te 'mbA madhyamA tAta garhitavyA kathaM cana
3015035c tAm evekSvAkunAthasya bharatasya kathAM kuru
3015036a nizcitApi hi me buddhir vanavAse dRDhavratA
3015036c bharatasnehasaMtaptA bAlizIkriyate punaH
3015037a ity evaM vilapaMs tatra prApya godAvarIM nadIm
3015037c cakre 'bhiSekaM kAkutsthaH sAnujaH saha sItayA
3015038a tarpayitvAtha salilais te pitqn daivatAni ca
3015038c stuvanti smoditaM sUryaM devatAz ca samAhitAH
3015039a kRtAbhiSekaH sa rarAja rAmaH; sItAdvitIyaH saha lakSmaNena
3015039c kRtAbhiSekas tv agarAjaputryA; rudraH sanandir bhagavAn ivezaH
3016001a kRtAbhiSeko rAmas tu sItA saumitrir eva ca
3016001c tasmAd godAvarItIrAt tato jagmuH svam Azramam
3016002a AzramaM tam upAgamya rAghavaH sahalakSmaNaH
3016002c kRtvA paurvAhNikaM karma parNazAlAm upAgamat
3016003a sa rAmaH parNazAlAyAm AsInaH saha sItayA
3016003c virarAja mahAbAhuz citrayA candramA iva
3016003e lakSmaNena saha bhrAtrA cakAra vividhAH kathAH
3016004a tadAsInasya rAmasya kathAsaMsaktacetasaH
3016004c taM dezaM rAkSasI kA cid AjagAma yadRcchayA
3016005a sA tu zUrpaNakhA nAma dazagrIvasya rakSasaH
3016005c bhaginI rAmam AsAdya dadarza tridazopamam
3016006a siMhoraskaM mahAbAhuM padmapatranibhekSaNam
3016006c sukumAraM mahAsattvaM pArthivavyaJjanAnvitam
3016007a rAmam indIvarazyAmaM kandarpasadRzaprabham
3016007c babhUvendropamaM dRSTvA rAkSasI kAmamohitA
3016008a sumukhaM durmukhI rAmaM vRttamadhyaM mahodarI
3016008c vizAlAkSaM virUpAkSI sukezaM tAmramUrdhajA
3016009a priyarUpaM virUpA sA susvaraM bhairavasvanA
3016009c taruNaM dAruNA vRddhA dakSiNaM vAmabhASiNI
3016010a nyAyavRttaM sudurvRttA priyam apriyadarzanA
3016010c zarIrajasamAviSTA rAkSasI rAmam abravIt
3016011a jaTI tApasarUpeNa sabhAryaH zaracApadhRk
3016011c Agatas tvam imaM dezaM kathaM rAkSasasevitam
3016012a evam uktas tu rAkSasyA zUrpaNakhyA paraMtapaH
3016012c RjubuddhitayA sarvam AkhyAtum upacakrame
3016013a AsId dazaratho nAma rAjA tridazavikramaH
3016013c tasyAham agrajaH putro rAmo nAma janaiH zrutaH
3016014a bhrAtAyaM lakSmaNo nAma yavIyAn mAm anuvrataH
3016014c iyaM bhAryA ca vaidehI mama sIteti vizrutA
3016015a niyogAt tu narendrasya pitur mAtuz ca yantritaH
3016015c dharmArthaM dharmakAGkSI ca vanaM vastum ihAgataH
3016016a tvAM tu veditum icchAmi kathyatAM kAsi kasya vA
3016016c iha vA kiMnimittaM tvam AgatA brUhi tattvataH
3016017a sAbravId vacanaM zrutvA rAkSasI madanArditA
3016017c zrUyatAM rAma vakSyAmi tattvArthaM vacanaM mama
3016018a ahaM zUrpaNakhA nAma rAkSasI kAmarUpiNI
3016018c araNyaM vicarAmIdam ekA sarvabhayaMkarA
3016019a rAvaNo nAma me bhrAtA rAkSaso rAkSasezvaraH
3016019c pravRddhanidraz ca sadA kumbhakarNo mahAbalaH
3016020a vibhISaNas tu dharmAtmA na tu rAkSasaceSTitaH
3016020c prakhyAtavIryau ca raNe bhrAtarau kharadUSaNau
3016021a tAn ahaM samatikrAntA rAma tvApUrvadarzanAt
3016021c samupetAsmi bhAvena bhartAraM puruSottamam
3016021e cirAya bhava bhartA me sItayA kiM kariSyasi
3016022a vikRtA ca virUpA ca na seyaM sadRzI tava
3016022c aham evAnurUpA te bhAryArUpeNa pazya mAm
3016023a imAM virUpAm asatIM karAlAM nirNatodarIm
3016023c anena saha te bhrAtrA bhakSayiSyAmi mAnuSIm
3016024a tataH parvatazRGgANi vanAni vividhAni ca
3016024c pazyan saha mayA kAnta daNDakAn vicariSyasi
3016025a ity evam uktaH kAkutsthaH prahasya madirekSaNAm
3016025c idaM vacanam Arebhe vaktuM vAkyavizAradaH
3017001a tAM tu zUrpaNakhAM rAmaH kAmapAzAvapAzitAm
3017001c svecchayA zlakSNayA vAcA smitapUrvam athAbravIt
3017002a kRtadAro 'smi bhavati bhAryeyaM dayitA mama
3017002c tvadvidhAnAM tu nArINAM suduHkhA sasapatnatA
3017003a anujas tv eSa me bhrAtA zIlavAn priyadarzanaH
3017003c zrImAn akRtadAraz ca lakSmaNo nAma vIryavAn
3017004a apUrvI bhAryayA cArthI taruNaH priyadarzanaH
3017004c anurUpaz ca te bhartA rUpasyAsya bhaviSyati
3017005a enaM bhaja vizAlAkSi bhartAraM bhrAtaraM mama
3017005c asapatnA varArohe merum arkaprabhA yathA
3017006a iti rAmeNa sA proktA rAkSasI kAmamohitA
3017006c visRjya rAmaM sahasA tato lakSmaNam abravIt
3017007a asya rUpasya te yuktA bhAryAhaM varavarNinI
3017007c mayA saha sukhaM sarvAn daNDakAn vicariSyasi
3017008a evam uktas tu saumitrI rAkSasyA vAkyakovidaH
3017008c tataH zUrpaNakhIM smitvA lakSmaNo yuktam abravIt
3017009a kathaM dAsasya me dAsI bhAryA bhavitum icchasi
3017009c so 'ham AryeNa paravAn bhrAtrA kamalavarNini
3017010a samRddhArthasya siddhArthA muditAmalavarNinI
3017010c Aryasya tvaM vizAlAkSi bhAryA bhava yavIyasI
3017011a etAM virUpAm asatIM karAlAM nirNatodarIm
3017011c bhAryAM vRddhAM parityajya tvAm evaiSa bhajiSyati
3017012a ko hi rUpam idaM zreSThaM saMtyajya varavarNini
3017012c mAnuSeSu varArohe kuryAd bhAvaM vicakSaNaH
3017013a iti sA lakSmaNenoktA karAlA nirNatodarI
3017013c manyate tad vacaH satyaM parihAsAvicakSaNA
3017014a sA rAmaM parNazAlAyAm upaviSTaM paraMtapam
3017014c sItayA saha durdharSam abravIt kAmamohitA
3017015a imAM virUpAm asatIM karAlAM nirNatodarIm
3017015c vRddhAM bhAryAm avaSTabhya na mAM tvaM bahu manyase
3017016a adyemAM bhakSayiSyAmi pazyatas tava mAnuSIm
3017016c tvayA saha cariSyAmi niHsapatnA yathAsukham
3017017a ity uktvA mRgazAvAkSIm alAtasadRzekSaNA
3017017c abhyadhAvat susaMkruddhA maholkA rohiNIm iva
3017018a tAM mRtyupAzapratimAm ApatantIM mahAbalaH
3017018c nigRhya rAmaH kupitas tato lakSmaNam abravIt
3017019a krUrair anAryaiH saumitre parihAsaH kathaM cana
3017019c na kAryaH pazya vaidehIM kathaM cit saumya jIvatIm
3017020a imAM virUpAm asatIm atimattAM mahodarIm
3017020c rAkSasIM puruSavyAghra virUpayitum arhasi
3017021a ity ukto lakSmaNas tasyAH kruddho rAmasya pazyataH
3017021c uddhRtya khaDgaM ciccheda karNanAsaM mahAbalaH
3017022a nikRttakarNanAsA tu visvaraM sA vinadya ca
3017022c yathAgataM pradudrAva ghorA zUrpaNakhA vanam
3017023a sA virUpA mahAghorA rAkSasI zoNitokSitA
3017023c nanAda vividhAn nAdAn yathA prAvRSi toyadaH
3017024a sA vikSarantI rudhiraM bahudhA ghoradarzanA
3017024c pragRhya bAhU garjantI praviveza mahAvanam
3017025a tatas tu sA rAkSasasaMghasaMvRtaM; kharaM janasthAnagataM virUpitA
3017025c upetya taM bhrAtaram ugratejasaM; papAta bhUmau gaganAd yathAzaniH
3017026a tataH sabhAryaM bhayamohamUrchitA; salakSmaNaM rAghavam AgataM vanam
3017026c virUpaNaM cAtmani zoNitokSitA; zazaMsa sarvaM bhaginI kharasya sA
3018001a tAM tathA patitAM dRSTvA virUpAM zoNitokSitAm
3018001c bhaginIM krodhasaMtaptaH kharaH papraccha rAkSasaH
3018002a balavikramasaMpannA kAmagA kAmarUpiNI
3018002c imAm avasthAM nItA tvaM kenAntakasamA gatA
3018003a devagandharvabhUtAnAm RSINAM ca mahAtmanAm
3018003c ko 'yam evaM mahAvIryas tvAM virUpAM cakAra ha
3018004a na hi pazyAmy ahaM loke yaH kuryAn mama vipriyam
3018004c antarena sahasrAkSaM mahendraM pAkazAsanam
3018005a adyAhaM mArgaNaiH prANAn AdAsye jIvitAntakaiH
3018005c salile kSIram AsaktaM niSpibann iva sArasaH
3018006a nihatasya mayA saMkhye zarasaMkRttamarmaNaH
3018006c saphenaM rudhiraM raktaM medinI kasya pAsyati
3018007a kasya patrarathAH kAyAn mAMsam utkRtya saMgatAH
3018007c prahRSTA bhakSayiSyanti nihatasya mayA raNe
3018008a taM na devA na gandharvA na pizAcA na rAkSasAH
3018008c mayApakRSTaM kRpaNaM zaktAs trAtuM mahAhave
3018009a upalabhya zanaiH saMjJAM taM me zaMsitum arhasi
3018009c yena tvaM durvinItena vane vikramya nirjitA
3018010a iti bhrAtur vacaH zrutvA kruddhasya ca vizeSataH
3018010c tataH zUrpaNakhA vAkyaM sabASpam idam abravIt
3018011a taruNau rUpasaMpannau sukUmArau mahAbalau
3018011c puNDarIkavizAlAkSau cIrakRSNAjinAmbarau
3018012a gandharvarAjapratimau pArthivavyaJjanAnvitau
3018012c devau vA mAnuSau vA tau na tarkayitum utsahe
3018013a taruNI rUpasaMpannA sarvAbharaNabhUSitA
3018013c dRSTA tatra mayA nArI tayor madhye sumadhyamA
3018014a tAbhyAm ubhAbhyAM saMbhUya pramadAm adhikRtya tAm
3018014c imAm avasthAM nItAhaM yathAnAthAsatI tathA
3018015a tasyAz cAnRjuvRttAyAs tayoz ca hatayor aham
3018015c saphenaM pAtum icchAmi rudhiraM raNamUrdhani
3018016a eSa me prathamaH kAmaH kRtas tAta tvayA bhavet
3018016c tasyAs tayoz ca rudhiraM pibeyam aham Ahave
3018017a iti tasyAM bruvANAyAM caturdaza mahAbalAn
3018017c vyAdideza kharaH kruddho rAkSasAn antakopamAn
3018018a mAnuSau zastrasaMpannau cIrakRSNAjinAmbarau
3018018c praviSTau daNDakAraNyaM ghoraM pramadayA saha
3018019a tau hatvA tAM ca durvRttAm upAvartitum arhatha
3018019c iyaM ca rudhiraM teSAM bhaginI mama pAsyati
3018020a manoratho 'yam iSTo 'syA bhaginyA mama rAkSasAH
3018020c zIghraM saMpadyatAM gatvA tau pramathya svatejasA
3018021a iti pratisamAdiSTA rAkSasAs te caturdaza
3018021c tatra jagmus tayA sArdhaM ghanA vAteritA yathA
3019001a tataH zUrpaNakhA ghorA rAghavAzramam AgatA
3019001c rakSasAm AcacakSe tau bhrAtarau saha sItayA
3019002a te rAmaM parNazAlAyAm upaviSTaM mahAbalam
3019002c dadRzuH sItayA sArdhaM vaidehyA lakSmaNena ca
3019003a tAn dRSTvA rAghavaH zrImAn AgatAM tAM ca rAkSasIm
3019003c abravId bhrAtaraM rAmo lakSmaNaM dIptatejasaM
3019004a muhUrtaM bhava saumitre sItAyAH pratyanantaraH
3019004c imAn asyA vadhiSyAmi padavIm AgatAn iha
3019005a vAkyam etat tataH zrutvA rAmasya viditAtmanaH
3019005c tatheti lakSmaNo vAkyaM rAmasya pratyapUjayat
3019006a rAghavo 'pi mahac cApaM cAmIkaravibhUSitam
3019006c cakAra sajyaM dharmAtmA tAni rakSAMsi cAbravIt
3019007a putrau dazarathasyAvAM bhrAtarau rAmalakSmaNau
3019007c praviSTau sItayA sArdhaM duzcaraM daNDakAvanam
3019008a phalamUlAzanau dAntau tApasau dharmacAriNau
3019008c vasantau daNDakAraNye kimartham upahiMsatha
3019009a yuSmAn pApAtmakAn hantuM viprakArAn mahAvane
3019009c RSINAM tu niyogena prApto 'haM sazarAsanaH
3019010a tiSThataivAtra saMtuSTA nopasarpitum arhatha
3019010c yadi prANair ihArtho vo nivartadhvaM nizAcarAH
3019011a tasya tad vacanaM zrutvA rAkSasAs te caturdaza
3019011c Ucur vAcaM susaMkruddhA brahmaghnaH zUlapANayaH
3019012a saMraktanayanA ghorA rAmaM raktAntalocanam
3019012c paruSA madhurAbhASaM hRSTAdRSTaparAkramam
3019013a krodham utpAdya no bhartuH kharasya sumahAtmanaH
3019013c tvam eva hAsyase prANAn adyAsmAbhir hato yudhi
3019014a kA hi te zaktir ekasya bahUnAM raNamUrdhani
3019014c asmAkam agrataH sthAtuM kiM punar yoddhum Ahave
3019015a ebhir bAhuprayuktair naH parighaiH zUlapaTTizaiH
3019015c prANAMs tyakSyasi vIryaM ca dhanuz ca karapIDitam
3019016a ity evam uktvA saMrabdhA rAkSasAs te caturdaza
3019016c udyatAyudhanistriMzA rAmam evAbhidudruvuH
3019016e cikSipus tAni zUlAni rAghavaM prati durjayam
3019017a tAni zUlAni kAkutsthaH samastAni caturdaza
3019017c tAvadbhir eva ciccheda zaraiH kAJcanabhUSaNaiH
3019018a tataH pazcAn mahAtejA nArAcAn sUryasaMnibhAn
3019018c jagrAha paramakruddhaz caturdaza zilAzitAn
3019019a gRhItvA dhanur Ayamya lakSyAn uddizya rAkSasAn
3019019c mumoca rAghavo bANAn vajrAn iva zatakratuH
3019020a rukmapuGkhAz ca vizikhAH pradIptA hemabhUSaNAH
3019020c antarikSe maholkAnAM babhUvus tulyavarcasaH
3019021a te bhittvA rakSasAM vegAd vakSAMsi rudhirAplutAH
3019021c viniSpetus tadA bhUmau nyamajjantAzanisvanAH
3019022a te bhinnahRdayA bhUmau chinnamUlA iva drumAH
3019022c nipetuH zoNitArdrAGgA vikRtA vigatAsavaH
3019023a tAn bhUmau patitAn dRSTvA rAkSasI krodhamUrchitA
3019023c paritrastA punas tatra vyasRjad bhairavaM ravam
3019024a sA nadantI mahAnAdaM javAc chUrpaNakhA punaH
3019024c upagamya kharaM sA tu kiM cit saMzuSka zoNitA
3019024e papAta punar evArtA saniryAseva vallarI
3019025a nipAtitAn prekSya raNe tu rAkSasAn; pradhAvitA zUrpaNakhA punas tataH
3019025c vadhaM ca teSAM nikhilena rakSasAM; zazaMsa sarvaM bhaginI kharasya sA
3020001a sa punaH patitAM dRSTvA krodhAc chUrpaNakhAM kharaH
3020001c uvAca vyaktatA vAcA tAm anarthArtham AgatAm
3020002a mayA tv idAnIM zUrAs te rAkSasA rudhirAzanAH
3020002c tvatpriyArthaM vinirdiSTAH kimarthaM rudyate punaH
3020003a bhaktAz caivAnuraktAz ca hitAz ca mama nityazaH
3020003c ghnanto 'pi na nihantavyA na na kuryur vaco mama
3020004a kim etac chrotum icchAmi kAraNaM yatkRte punaH
3020004c hA nAtheti vinardantI sarpavad veSTase kSitau
3020005a anAthavad vilapasi kiM nu nAthe mayi sthite
3020005c uttiSThottiSTha mA bhaiSIr vaiklavyaM tyajyatAm iha
3020006a ity evam uktA durdharSA khareNa parisAntvitA
3020006c vimRjya nayane sAsre kharaM bhrAtaram abravIt
3020007a preSitAz ca tvayA zUrA rAkSasAs te caturdaza
3020007c nihantuM rAghavaM ghorA matpriyArthaM salakSmaNam
3020008a te tu rAmeNa sAmarSAH zUlapaTTizapANayaH
3020008c samare nihatAH sarve sAyakair marmabhedibhiH
3020009a tAn bhUmau patitAn dRSTvA kSaNenaiva mahAbalAn
3020009c rAmasya ca mahat karma mahAMs trAso 'bhavan mama
3020010a sAsmi bhItA samudvignA viSaNNA ca nizAcara
3020010c zaraNaM tvAM punaH prAptA sarvato bhayadarzinI
3020011a viSAdanakrAdhyuSite paritrAsormimAlini
3020011c kiM mAM na trAyase magnAM vipule zokasAgare
3020012a ete ca nihatA bhUmau rAmeNa nizitaiH zaraiH
3020012c ye ca me padavIM prAptA rAkSasAH pizitAzanAH
3020013a mayi te yady anukrozo yadi rakSaHsu teSu ca
3020013c rAmeNa yadi zaktis te tejo vAsti nizAcara
3020013e daNDakAraNyanilayaM jahi rAkSasakaNTakam
3020014a yadi rAmaM mamAmitram adya tvaM na vadhiSyasi
3020014c tava caivAgrataH prANAMs tyakSyAmi nirapatrapA
3020015a buddhyAham anupazyAmi na tvaM rAmasya saMyuge
3020015c sthAtuM pratimukhe zaktaH sacApasya mahAraNe
3020016a zUramAnI na zUras tvaM mithyAropitavikramaH
3020016c mAnuSau yan na zaknoSi hantuM tau rAmalakSmaNau
3020017a apayAhi janasthAnAt tvaritaH sahabAndhavaH
3020017c niHsattvasyAlpavIryasya vAsas te kIdRzas tv iha
3020018a rAmatejo'bhibhUto hi tvaM kSipraM vinaziSyasi
3020018c sa hi tejaHsamAyukto rAmo dazarathAtmajaH
3020018e bhrAtA cAsya mahAvIryo yena cAsmi virUpitA
3021001a evam AdharSitaH zUraH zUrpaNakhyA kharas tadA
3021001c uvAca rakSasAM madhye kharaH kharataraM vacaH
3021002a tavApamAnaprabhavaH krodho 'yam atulo mama
3021002c na zakyate dhArayituM lavaNAmbha ivotthitam
3021003a na rAmaM gaNaye vIryAn mAnuSaM kSINajIvitam
3021003c AtmA duzcaritaiH prANAn hato yo 'dya vimokSyati
3021004a bASpaH saMhriyatAm eSa saMbhramaz ca vimucyatAm
3021004c ahaM rAmaH saha bhrAtrA nayAmi yamasAdanam
3021005a parazvadhahatasyAdya mandaprANasya bhUtale
3021005c rAmasya rudhiraM raktam uSNaM pAsyasi rAkSasi
3021006a sA prahRSTvA vacaH zrutvA kharasya vadanAc cyutam
3021006c prazazaMsa punar maurkhyAd bhrAtaraM rakSasAM varam
3021007a tayA paruSitaH pUrvaM punar eva prazaMsitaH
3021007c abravId dUSaNaM nAma kharaH senApatiM tadA
3021008a caturdaza sahasrANi mama cittAnuvartinAm
3021008c rakSasIM bhImavegAnAM samareSv anivartinAm
3021009a nIlajImUtavarNAnAM ghorANAM krUrakarmaNAm
3021009c lokasiMhAvihArANAM balinAm ugratejasAm
3021010a teSAM zArdUladarpANAM mahAsyAnAM mahaujasAm
3021010c sarvodyogam udIrNAnAM rakSasAM saumya kAraya
3021011a upasthApaya me kSipraM rathaM saumya dhanUMSi ca
3021011c zarAMz ca citrAn khaDgAMz ca zaktIz ca vividhAH zitAH
3021012a agre niryAtum icchAmi paulastyAnAM mahAtmanAm
3021012c vadhArthaM durvinItasya rAmasya raNakovidaH
3021013a iti tasya bruvANasya sUryavarNaM mahAratham
3021013c sadazvaiH zabalair yuktam AcacakSe 'tha dUSaNaH
3021014a taM meruzikharAkAraM taptakAJcanabhUSaNam
3021014c hemacakram asaMbAdhaM vaidUryamaya kUbaram
3021015a matsyaiH puSpair drumaiH zailaiz candrasUryaiz ca kAJcanaiH
3021015c mAGgalyaiH pakSisaMghaiz ca tArAbhiz ca samAvRtam
3021016a dhvajanistriMzasaMpannaM kiGkiNIkavibhUSitam
3021016c sadazvayuktaM so 'marSAd Aruroha rathaM kharaH
3021017a nizAmya taM rathagataM rAkSasA bhImavikramAH
3021017c tasthuH saMparivAryainaM dUSaNaM ca mahAbalam
3021018a kharas tu tAn maheSvAsAn ghoracarmAyudhadhvajAn
3021018c niryAtety abravId dRSTvA rathasthaH sarvarAkSasAn
3021019a tatas tad rAkSasaM sainyaM ghoracarmAyudhadhvajam
3021019c nirjagAma janasthAnAn mahAnAdaM mahAjavam
3021020a mudgaraiH paTTizaiH zUlaiH sutIkSNaiz ca parazvadhaiH
3021020c khaDgaiz cakraiz ca hastasthair bhrAjamAnaiz ca tomaraiH
3021021a zaktibhiH patighair ghorair atimAtraiz ca kArmukaiH
3021021c gadAsimusalair vajrair gRhItair bhImadarzanaiH
3021022a rAkSasAnAM sughorANAM sahasrANi caturdaza
3021022c niryAtAni janasthAnAt kharacittAnuvartinAm
3021023a tAMs tv abhidravato dRSTvA rAkSasAn bhImavikramAn
3021023c kharasyApi rathaH kiM cij jagAma tadanantaram
3021024a tatas tAJ zabalAn azvAMs taptakAJcanabhUSitAn
3021024c kharasya matam AjJAya sArathiH samacodayat
3021025a sa codito rathaH zIghraM kharasya ripughAtinaH
3021025c zabdenApUrayAm Asa dizaz ca pratizas tathA
3021026a pravRddhamanyus tu kharaH kharasvano; ripor vadhArthaM tvarito yathAntakaH
3021026c acUcudat sArathim unnadan punar; mahAbalo megha ivAzmavarSavAn
3022001a tat prayAtaM balaM ghoram azivaM zoNitodakam
3022001c abhyavarSan mahAmeghas tumulo gardabhAruNaH
3022002a nipetus turagAs tasya rathayuktA mahAjavAH
3022002c same puSpacite deze rAjamArge yadRcchayA
3022003a zyAmaM rudhiraparyantaM babhUva pariveSaNam
3022003c alAtacakrapratimaM pratigRhya divAkaram
3022004a tato dhvajam upAgamya hemadaNDaM samucchritam
3022004c samAkramya mahAkAyas tasthau gRdhraH sudAruNaH
3022005a janasthAnasamIpe ca samAkramya kharasvanAH
3022005c visvarAn vividhAMz cakrur mAMsAdA mRgapakSiNaH
3022006a vyAjahruz ca padIptAyAM dizi vai bhairavasvanam
3022006c azivA yAtu dAhAnAM zivA ghorA mahAsvanAH
3022007a prabhinnagirisaMkAzAs toyazoSitadhAriNaH
3022007c AkAzaM tad anAkAzaM cakrur bhImA balAhakAH
3022008a babhUva timiraM ghoram uddhataM romaharSaNam
3022008c dizo vA vidizo vApi suvyaktaM na cakAzire
3022009a kSatajArdrasavarNAbhA saMdhyAkAlaM vinA babhau
3022009c kharasyAbhimukhaM nedus tadA ghorA mRgAH khagAH
3022010a nityAzivakarA yuddhe zivA ghoranidarzanAH
3022010c nedur balasyAbhimukhaM jvAlodgAribhir AnanaiH
3022011a kabandhaH parighAbhAso dRzyate bhAskarAntike
3022011c jagrAha sUryaM svarbhAnur aparvaNi mahAgrahaH
3022012a pravAti mArutaH zIghraM niSprabho 'bhUd divAkaraH
3022012c utpetuz ca vinA rAtriM tArAH khadyotasaprabhAH
3022013a saMlInamInavihagA nalinyaH puSpapaGkajAH
3022013c tasmin kSaNe babhUvuz ca vinA puSpaphalair drumAH
3022014a uddhUtaz ca vinA vAtaM reNur jaladharAruNaH
3022014c vIcIkUcIti vAzyanto babhUvus tatra sArikAH
3022015a ulkAz cApi sanirghoSA nipetur ghoradarzanAH
3022015c pracacAla mahI cApi sazailavanakAnanA
3022016a kharasya ca rathasthasya nardamAnasya dhImataH
3022016c prAkampata bhujaH savyaH kharaz cAsyAvasajjata
3022017a sAsrA saMpadyate dRSTiH pazyamAnasya sarvataH
3022017c lalATe ca rujA jAtA na ca mohAn nyavartata
3022018a tAn samIkSya mahotpAtAn utthitAn romaharSaNAn
3022018c abravId rAkSasAn sarvAn prahasan sa kharas tadA
3022019a mahotpAtAn imAn sarvAn utthitAn ghoradarzanAn
3022019c na cintayAmy ahaM vIryAd balavAn durbalAn iva
3022020a tArA api zarais tIkSNaiH pAtayeyaM nabhastalAt
3022020c mRtyuM maraNadharmeNa saMkruddho yojayAmy aham
3022021a rAghavaM taM balotsiktaM bhrAtaraM cApi lakSmaNam
3022021c ahatvA sAyakais tIkSNair nopAvartitum utsahe
3022022a sakAmA bhaginI me 'stu pItvA tu rudhiraM tayoH
3022022c yannimittaM tu rAmasya lakSmaNasya viparyayaH
3022023a na kva cit prAptapUrvo me saMyugeSu parAjayaH
3022023c yuSmAkam etat pratyakSaM nAnRtaM kathayAmy aham
3022024a devarAjam api kruddho mattairAvatayAyinam
3022024c vajrahastaM raNe hanyAM kiM punas tau ca mAnuSau
3022025a sA tasya garjitaM zrutvA rAkSasasya mahAcamUH
3022025c praharSam atulaM lebhe mRtyupAzAvapAzitA
3022026a sameyuz ca mahAtmAno yuddhadarzanakAGkSiNaH
3022026c RSayo devagandharvAH siddhAz ca saha cAraNaiH
3022027a sametya coruH sahitAs te 'nyAyaM puNyakarmaNaH
3022027c svasti gobrAhmaNebhyo 'stu lokAnAM ye ca saMmatAH
3022028a jayatAM rAghavo yuddhe paulastyAn rajanIcarAn
3022028c cakrA hasto yathA yuddhe sarvAn asurapuMgavAn
3022029a etac cAnyac ca bahuzo bruvANAH paramarSayaH
3022029c dadRzur vAhinIM teSAM rAkSasAnAM gatAyuSAm
3022030a rathena tu kharo vegAt sainyasyAgrAd viniHsRtaH
3022030c taM dRSTvA rAkSasaM bhUyo rAkSasAz ca viniHsRtAH
3022031a zyena gAmI pRthugrIvo yajJazatrur vihaMgamaH
3022031c durjayaH karavIrAkSaH paruSaH kAlakArmukaH
3022032a meghamAlI mahAmAlI sarpAsyo rudhirAzanaH
3022032c dvAdazaite mahAvIryAH pratasthur abhitaH kharam
3022033a mahAkapAlaH sthUlAkSaH pramAthI trizirAs tathA
3022033c catvAra ete senAgryA dUSaNaM pRSThato 'nvayuH
3022034a sA bhImavegA samarAbhikAmA; sudAruNA rAkSasavIra senA
3022034c tau rAjaputrau sahasAbhyupetA; mAlAgrahANAm iva candrasUryau
3023001a AzramaM prati yAte tu khare kharaparAkrame
3023001c tAn evautpAtikAn rAmaH saha bhrAtrA dadarza ha
3023002a tAn utpAtAn mahAghorAn utthitAn romaharSaNAn
3023002c prajAnAm ahitAn dRSTvA vAkyaM lakSmaNam abravIt
3023003a imAn pazya mahAbAho sarvabhUtApahAriNaH
3023003c samutthitAn mahotpAtAn saMhartuM sarvarAkSasAn
3023004a amI rudhiradhArAs tu visRjantaH kharasvanAn
3023004c vyomni meghA vivartante paruSA gardabhAruNAH
3023005a sadhUmAz ca zarAH sarve mama yuddhAbhinandinaH
3023005c rukmapRSThAni cApAni viveSTante ca lakSmaNa
3023006a yAdRzA iha kUjanti pakSiNo vanacAriNaH
3023006c agrato no bhayaM prAptaM saMzayo jIvitasya ca
3023007a saMprahAras tu sumahAn bhaviSyati na saMzayaH
3023007c ayam AkhyAti me bAhuH sphuramANo muhur muhuH
3023008a saMnikarSe tu naH zUra jayaM zatroH parAjayam
3023008c suprabhaM ca prasannaM ca tava vaktraM hi lakSyate
3023009a udyatAnAM hi yuddhArthaM yeSAM bhavati lakSmaNaH
3023009c niSprabhaM vadanaM teSAM bhavaty AyuH parikSayaH
3023010a anAgatavidhAnaM tu kartavyaM zubham icchatA
3023010c ApadaM zaGkamAnena puruSeNa vipazcitA
3023011a tasmAd gRhItvA vaidehIM zarapANir dhanurdharaH
3023011c guhAm Azrayazailasya durgAM pAdapasaMkulAm
3023012a pratikUlitum icchAmi na hi vAkyam idaM tvayA
3023012c zApito mama pAdAbhyAM gamyatAM vatsa mAciram
3023013a evam uktas tu rAmeNa lakSmaNaH saha sItayA
3023013c zarAn AdAya cApaM ca guhAM durgAM samAzrayat
3023014a tasmin praviSTe tu guhAM lakSmaNe saha sItayA
3023014c hanta niryuktam ity uktvA rAmaH kavacam Avizat
3023015a sA tenAgninikAzena kavacena vibhUSitaH
3023015c babhUva rAmas timire vidhUmo 'gnir ivotthitaH
3023016a sa cApam udyamya mahac charAn AdAya vIryavAn
3023016c babhUvAvasthitas tatra jyAsvanaiH pUrayan dizaH
3023017a tato devAH sagandharvAH siddhAz ca saha cAraNaiH
3023017c UcuH paramasaMtrastA guhyakAz ca parasparam
3023018a caturdaza sahasrANi rakSasAM bhImakarmaNAm
3023018c ekaz ca rAmo dharmAtmA kathaM yuddhaM bhaviSyati
3023019a tato gambhIranirhrAdaM ghoravarmAyudhadhvajam
3023019c anIkaM yAtudhAnAnAM samantAt pratyadRzyata
3023020a siMhanAdaM visRjatAm anyonyam abhigarjatAm
3023020c cApAni vispharayatAM jRmbhatAM cApy abhIkSNazaH
3023021a vipraghuSTasvanAnAM ca dundubhIMz cApi nighnatAm
3023021c teSAM sutumulaH zabdaH pUrayAm Asa tad vanam
3023022a tena zabdena vitrastAH zvApadA vanacAriNaH
3023022c dudruvur yatra niHzabdaM pRSThato nAvalokayan
3023023a tat tv anIkaM mahAvegaM rAmaM samupasarpata
3023023c ghRtanAnApraharaNaM gambhIraM sAgaropamam
3023024a rAmo 'pi cArayaMz cakSuH sarvato raNapaNDitaH
3023024c dadarza kharasainyaM tad yuddhAbhimukham udyatam
3023025a vitatya ca dhanur bhImaM tUNyAz coddhRtya sAyakAn
3023025c krodham AhArayat tIvraM vadhArthaM sarvarakSasAm
3023026a duSprekSyaH so 'bhavat kruddho yugAntAgnir iva jvalan
3023026c taM dRSTvA tejasAviSTaM prAvyathan vanadevatAH
3023027a tasya kruddhasya rUpaM tu rAmasya dadRze tadA
3023027c dakSasyeva kratuM hantum udyatasya pinAkinaH
3024001a avaSTabdhadhanuM rAmaM kruddhaM ca ripughAtinam
3024001c dadarzAzramam Agamya kharaH saha puraHsaraiH
3024002a taM dRSTvA saguNaM cApam udyamya kharaniHsvanam
3024002c rAmasyAbhimukhaM sUtaM codyatAm ity acodayat
3024003a sa kharasyAjJayA sUtas turagAn samacodayat
3024003c yatra rAmo mahAbAhur eko dhunvan dhanuH sthitaH
3024004a taM tu niSpatitaM dRSTvA sarve te rajanIcarAH
3024004c nardamAnA mahAnAdaM sacivAH paryavArayan
3024005a sa teSAM yAtudhAnAnAM madhye rato gataH kharaH
3024005c babhUva madhye tArANAM lohitAGga ivoditaH
3024006a tatas taM bhImadhanvAnaM kruddhAH sarve nizAcarAH
3024006c rAmaM nAnAvidhaiH zastrair abhyavarSanta durjayam
3024007a mudgarair AyasaiH zUlaiH prAsaiH khaDgaiH parazvadhaiH
3024007c rAkSasAH samare rAmaM nijaghnU roSatatparAH
3024008a te balAhakasaMkAzA mahAnAdA mahAbalAH
3024008c abhyadhAvanta kAkutsthaM rAmaM yuddhe jighAMsavaH
3024009a te rAme zaravarSANi vyasRjan rakSasAM guNAH
3024009c zailendram iva dhArAbhir varSamANA mahAdhanAH
3024010a sa taiH parivRto ghorai rAghavo rakSasAM gaNaiH
3024010c tithiSv iva mahAdevo vRtaH pAriSadAM gaNaiH
3024011a tAni muktAni zastrANi yAtudhAnaiH sa rAghavaH
3024011c pratijagrAha vizikhair nadyoghAn iva sAgaraH
3024012a sa taiH praharaNair ghorair bhinnagAtro na vivyathe
3024012c rAmaH pradIptair bahubhir vajrair iva mahAcalaH
3024013a sa viddhaH kSatajAdigdhaH sarvagAtreSu rAghavaH
3024013c babhUva rAmaH saMdhyAbhrair divAkara ivAvRtaH
3024014a viSedur devagandharvAH siddhAz ca paramarSayaH
3024014c ekaM sahastrair bahubhis tadA dRSTvA samAvRtam
3024015a tato rAmaH susaMkruddho maNDalIkRtakArmukaH
3024015c sasarja nizitAn bANAJ zatazo 'tha sahasrazaH
3024016a durAvArAn durviSahAn kAlapAzopamAn raNe
3024016c mumoca lIlayA rAmaH kaGkapatrAn ajihmagAn
3024017a te zarAH zatrusainyeSu muktA rAmeNa lIlayA
3024017c AdadU rakSasAM prANAn pAzAH kAlakRtA iva
3024018a bhittvA rAkSasadehAMs tAMs te zarA rudhirAplutAH
3024018c antarikSagatA rejur dIptAgnisamatejasaH
3024019a asaMkhyeyAs tu rAmasya sAyakAz cApamaNDalAt
3024019c viniSpetur atIvogrA rakSaH prANApahAriNaH
3024020a tair dhanUMSi dhvajAgrANi varmANi ca zirAMsi ca
3024020c bahUn sahastAbharaNAn UrUn karikaropamAn
3024021a tato nAlIkanArAcais tIkSNAgraiz ca vikarNibhiH
3024021c bhImam ArtasvaraM cakrur bhidyamAnA nizAcarAH
3024022a tat sainyaM nizitair bANair arditaM marmabhedibhiH
3024022c rAmeNa na sukhaM lebhe zuSkaM vanam ivAgninA
3024023a ke cid bhImabalAH zUrAH zUlAn khaDgAn parazvadhAn
3024023c cikSipuH paramakruddhA rAmAya rajanIcarAH
3024024a tAni bANair mahAbAhuH zastrANy AvArya rAghavaH
3024024c jahAra samare prANAMz ciccheda ca zirodharAn
3024025a avaziSTAz ca ye tatra viSaNNAz ca nizAcarAH
3024025c kharam evAbhyadhAvanta zaraNArthaM zarArditAH
3024026a tAn sarvAn punar AdAya samAzvAsya ca dUSaNaH
3024026c abhyadhAvata kAkutsthaM kruddho rudram ivAntakaH
3024027a nivRttAs tu punaH sarve dUSaNAzrayanirbhayAH
3024027c rAmam evAbhyadhAvanta sAlatAlazilAyudhAH
3024028a tad babhUvAdbhutaM yuddhaM tumulaM romaharSaNam
3024028c rAmasyAsya mahAghoraM punas teSAM ca rakSasAm
3025001a tad drumANAM zilAnAM ca varSaM prANaharaM mahat
3025001c pratijagrAha dharmAtmA rAghavas tIkSNasAyakaiH
3025002a pratigRhya ca tad varaM nimIlita ivarSabhaH
3025002c rAmaH krodhaM paraM bheje vadhArthaM sarvarakSasAm
3025003a tataH krodhasamAviSTaH pradIpta iva tejasA
3025003c zarair abhyakirat sainyaM sarvataH sahadUSaNam
3025004a tataH senApatiH kruddho dUSaNaH zatrudUSaNaH
3025004c jagrAha girizRGgAbhaM parighaM romaharSaNam
3025005a veSTitaM kAJcanaiH paTTair devasainyAbhimardanam
3025005c AyasaiH zaGkubhis tIkSNaiH kIrNaM paravasokSitAm
3025006a vajrAzanisamasparzaM paragopuradAraNam
3025006c taM mahoragasaMkAzaM pragRhya parighaM raNe
3025006e dUSaNo 'bhyapatad rAmaM krUrakarmA nizAcaraH
3025007a tasyAbhipatamAnasya dUSaNasya sa rAghavaH
3025007c dvAbhyAM zarAbhyAM ciccheda sahastAbharaNau bhujau
3025008a bhraSTas tasya mahAkAyaH papAta raNamUrdhani
3025008c parighaz chinnahastasya zakradhvaja ivAgrataH
3025009a sa karAbhyAM vikIrNAbhyAM papAta bhuvi dUSaNaH
3025009c viSANAbhyAM vizIrNAbhyAM manasvIva mahAgajaH
3025010a dRSTvA taM patitaM bhUmau dUSaNaM nihataM raNe
3025010c sAdhu sAdhv iti kAkutsthaM sarvabhUtAny apUjayan
3025011a etasminn antare kruddhAs trayaH senAgrayAyinaH
3025011c saMhatyAbhyadravan rAmaM mRtyupAzAvapAzitAH
3025011e mahAkapAlaH sthUlAkSaH pramAthI ca mahAbalaH
3025012a mahAkapAlo vipulaM zUlam udyamya rAkSasaH
3025012c sthUlAkSaH paTTizaM gRhya pramAthI ca parazvadham
3025013a dRSTvaivApatatas tAMs tu rAghavaH sAyakaiH zitaiH
3025013c tIkSNAgraiH pratijagrAha saMprAptAn atithIn iva
3025014a mahAkapAlasya ziraz ciccheda raghunaGganaH
3025014c asaMkhyeyais tu bANaughaiH pramamAtha pramAthinam
3025015a sthUlAkSasyAkSiNI tIkSNaiH pUrayAm Asa sAyakaiH
3025015c sa papAta hato bhUmau viTapIva mahAdrumaH
3025016a tataH pAvakasaMkAzair hemavajravibhUSitaiH
3025016c jaghanazeSaM tejasvI tasya sainyasya sAyakaiH
3025017a te rukmapuGkhA vizikhAH sadhUmA iva pAvakAH
3025017c nijaghnus tAni rakSAMsi vajrA iva mahAdrumAn
3025018a rakSasAM tu zataM rAmaH zatenaikena karNinA
3025018c sahasraM ca sahasreNa jaghAna raNamUrdhani
3025019a tair bhinnavarmAbharaNAz chinnabhinnazarAsanAH
3025019c nipetuH zoNitAdigdhA dharaNyAM rajanIcarAH
3025020a tair muktakezaiH samare patitaiH zoNitokSitaiH
3025020c AstIrNA vasudhA kRtsnA mahAvediH kuzair iva
3025021a kSaNena tu mahAghoraM vanaM nihatarAkSasaM
3025021c babhUva niraya prakhyaM mAMsazoNitakardamam
3025022a caturdaza sahasrANi rakSasAM bhImakarmaNAm
3025022c hatAny ekena rAmeNa mAnuSeNa padAtinA
3025023a tasya sainyasya sarvasya kharaH zeSo mahArathaH
3025023c rAkSasas trizirAz caiva rAmaz ca ripusUdanaH
3025024a tatas tu tad bhImabalaM mahAhave; samIkSya rAmeNa hataM balIyasA
3025024c rathena rAmaM mahatA kharas tataH; samAsasAdendra ivodyatAzaniH
3026001a kharaM tu rAmAbhimukhaM prayAntaM vAhinIpatiH
3026001c rAkSasas trizirA nAma saMnipatyedam abravIt
3026002a mAM niyojaya vikrAnta saMnivartasva sAhasAt
3026002c pazya rAmaM mahAbAhuM saMyuge vinipAtitam
3026003a pratijAnAmi te satyam AyudhaM cAham Alabhe
3026003c yathA rAmaM vadhiSyAmi vadhArhaM sarvarakSasAm
3026004a ahaM vAsya raNe mRtyur eSa vA samare mama
3026004c vinivartya raNotsAhaM muhUrtaM prAzniko bhava
3026005a prahRSTo vA hate rAme janasthAnaM prayAsyasi
3026005c mayi vA nihate rAmaM saMyugAyopayAsyasi
3026006a kharas trizirasA tena mRtyulobhAt prasAditaH
3026006c gaccha yudhyety anujJAto rAghavAbhimukho yayau
3026007a trizirAz ca rathenaiva vAjiyuktena bhAsvatA
3026007c abhyadravad raNe rAmaM trizRGga iva parvataH
3026008a zaradhArA samUhAn sa mahAmegha ivotsRjan
3026008c vyasRjat sadRzaM nAdaM jalArdrasyeva dundubheH
3026009a AgacchantaM trizirasaM rAkSasaM prekSya rAghavaH
3026009c dhanuSA pratijagrAha vidhunvan sAyakAJ zitAn
3026010a sa saMprahAras tumulo rAma trizirasor mahAn
3026010c babhUvAtIva balinoH siMhakuJjarayor iva
3026011a tatas trizirasA bANair lalATe tADitas tribhiH
3026011c amarSI kupito rAmaH saMrabdham idam abravIt
3026012a aho vikramazUrasya rAkSasasyedRzaM balam
3026012c puSpair iva zarair yasya lalATe 'smi parikSataH
3026012e mamApi pratigRhNISva zarAMz cApaguNacyutAn
3026013a evam uktvA tu saMrabdhaH zarAn AzIviSopamAn
3026013c triziro vakSasi kruddho nijaghAna caturdaza
3026014a caturbhis turagAn asya zaraiH saMnataparvabhiH
3026014c nyapAtayata tejasvI caturas tasya vAjinaH
3026015a aSTabhiH sAyakaiH sUtaM rathopasthe nyapAtayat
3026015c rAmaz ciccheda bANena dhvajaM cAsya samucchritam
3026016a tato hatarathAt tasmAd utpatantaM nizAcaram
3026016c bibheda rAmas taM bANair hRdaye so 'bhavaj jaDaH
3026017a sAyakaiz cAprameyAtmA sAmarSas tasya rakSasaH
3026017c zirAMsy apAtayat trINi vegavadbhis tribhiH zataiH
3026018a sa bhUmau zoNitodgArI rAmabANAbhipIDitaH
3026018c nyapatat patitaiH pUrvaM svazirobhir nizAcaraH
3026019a hatazeSAs tato bhagnA rAkSasAH kharasaMzrayAH
3026019c dravanti sma na tiSThanti vyAghratrastA mRgA iva
3026020a tAn kharo dravato dRSTvA nivartya ruSitaH svayam
3026020c rAmam evAbhidudrAva rAhuz candramasaM yathA
3027001a nihataM dUSaNaM dRSTvA raNe trizirasA saha
3027001c kharasyApy abhavat trAso dRSTvA rAmasya vikramam
3027002a sa dRSTvA rAkSasaM sainyam aviSahyaM mahAbalam
3027002c hatam ekena rAmeNa dUSaNas trizirA api
3027003a tad balaM hatabhUyiSThaM vimanAH prekSya rAkSasaH
3027003c AsasAda kharo rAmaM namucir vAsavaM yathA
3027004a vikRSya balavac cApaM nArAcAn raktabhojanAn
3027004c kharaz cikSepa rAmAya kruddhAn AzIviSAn iva
3027005a jyAM vidhunvan subahuzaH zikSayAstrANi darzayan
3027005c cacAra samare mArgAJ zarai rathagataH kharaH
3027006a sa sarvAz ca dizo bANaiH pradizaz ca mahArathaH
3027006c pUrayAm Asa taM dRSTvA rAmo 'pi sumahad dhanuH
3027007a sa sAyakair durviSahaiH sasphuliGgair ivAgnibhiH
3027007c nabhaz cakArAvivaraM parjanya iva vRSTibhiH
3027008a tad babhUva zitair bANaiH khararAmavisarjitaiH
3027008c paryAkAzam anAkAzaM sarvataH zarasaMkulam
3027009a zarajAlAvRtaH sUryo na tadA sma prakAzate
3027009c anyonyavadhasaMrambhAd ubhayoH saMprayudhyatoH
3027010a tato nAlIkanArAcais tIkSNAgraiz ca vikarNibhiH
3027010c AjaghAna raNe rAmaM totrair iva mahAdvipam
3027011a taM rathasthaM dhanuSpANiM rAkSasaM paryavasthitam
3027011c dadRzuH sarvabhUtAni pAzahastam ivAntakam
3027012a taM siMham iva vikrAntaM siMhavikrAntagAminam
3027012c dRSTvA nodvijate rAmaH siMhaH kSudramRgaM yathA
3027013a tataH sUryanikAzena rathena mahatA kharaH
3027013c AsasAda raNe rAmaM pataGga iva pAvakam
3027014a tato 'sya sazaraM cApaM muSTideze mahAtmanaH
3027014c kharaz ciccheda rAmasya darzayan pANilAghavam
3027015a sa punas tv aparAn sapta zarAn AdAya varmaNi
3027015c nijaghAna raNe kruddhaH zakrAzanisamaprabhAn
3027016a tatas tat prahataM bANaiH kharamuktaiH suparvabhiH
3027016c papAta kavacaM bhUmau rAmasyAdityavarcasaH
3027017a sa zarair arpitaH kruddhaH sarvagAtreSu rAghavaH
3027017c rarAja samare rAmo vidhUmo 'gnir iva jvalan
3027018a tato gambhIranirhrAdaM rAmaH zatrunibarhaNaH
3027018c cakArAntAya sa ripoH sajyam anyan mahad dhanuH
3027019a sumahad vaiSNavaM yat tad atisRSTaM maharSiNA
3027019c varaM tad dhanur udyamya kharaM samabhidhAvata
3027020a tataH kanakapuGkhais tu zaraiH saMnataparvabhiH
3027020c ciccheda rAmaH saMkruddhaH kharasya samare dhvajam
3027021a sa darzanIyo bahudhA vicchinnaH kAJcano dhvajaH
3027021c jagAma dharaNIM sUryo devatAnAm ivAjJayA
3027022a taM caturbhiH kharaH kruddho rAmaM gAtreSu mArgaNaiH
3027022c vivyAdha hRdi marmajJo mAtaGgam iva tomaraiH
3027023a sa rAmo bahubhir bANaiH kharakArmukaniHsRtaiH
3027023c viddho rudhirasiktAGgo babhUva ruSito bhRzam
3027024a sa dhanur dhanvinAM zreSThaH pragRhya paramAhave
3027024c mumoca parameSvAsaH SaT zarAn abhilakSitAn
3027025a zirasy ekena bANena dvAbhyAM bAhvor athArpayat
3027025c tribhiz candrArdhavaktraiz ca vakSasy abhijaghAna ha
3027026a tataH pazcAn mahAtejA nArAcAn bhAskaropamAn
3027026c jighAMsU rAkSasaM kruddhas trayodaza zilAzitAn
3027027a tato 'sya yugam ekena caturbhiz caturo hayAn
3027027c SaSThena ca ziraH saMkhye ciccheda kharasAratheH
3027028a tribhis triveNuM balavAn dvAbhyAm akSaM mahAbalaH
3027028c dvAdazena tu bANena kharasya sazaraM dhanuH
3027028e chittvA vajranikAzena rAghavaH prahasann iva
3027028g trayodazenendrasamo bibheda samare kharam
3027029a prabhagnadhanvA viratho hatAzvo hatasArathiH
3027029c gadApANir avaplutya tasthau bhUmau kharas tadA
3027030a tat karma rAmasya mahArathasya; sametya devAz ca maharSayaz ca
3027030c apUjayan prAJjalayaH prahRSTAs; tadA vimAnAgragatAH sametAH
3028001a kharaM tu virathaM rAmo gadApANim avasthitam
3028001c mRdupUrvaM mahAtejAH paruSaM vAkyam abravIt
3028002a gajAzvarathasaMbAdhe bale mahati tiSThatA
3028002c kRtaM sudAruNaM karma sarvalokajugupsitam
3028003a udvejanIyo bhUtAnAM nRzaMsaH pApakarmakRt
3028003c trayANAm api lokAnAm Izvaro 'pi na tiSThati
3028004a karma lokaviruddhaM tu kurvANaM kSaNadAcara
3028004c tIkSNaM sarvajano hanti sarpaM duSTam ivAgatam
3028005a lobhAt pApAni kurvANaH kAmAd vA yo na budhyate
3028005c bhraSTaH pazyati tasyAntaM brAhmaNI karakAd iva
3028006a vasato daNDakAraNye tApasAn dharmacAriNaH
3028006c kiM nu hatvA mahAbhAgAn phalaM prApsyasi rAkSasa
3028007a na ciraM pApakarmANaH krUrA lokajugupsitAH
3028007c aizvaryaM prApya tiSThanti zIrNamUlA iva drumAH
3028008a avazyaM labhate kartA phalaM pApasya karmaNaH
3028008c ghoraM paryAgate kAle drumaH puSpam ivArtavam
3028009a nacirAt prApyate loke pApAnAM karmaNAM phalam
3028009c saviSANAm ivAnnAnAM bhuktAnAM kSaNadAcara
3028010a pApam AccaratAM ghoraM lokasyApriyam icchatAm
3028010c aham AsAdito rAjA prANAn hantuM nizAcara
3028011a adya hi tvAM mayA muktAH zarAH kAJcanabhUSaNAH
3028011c vidArya nipatiSyanti valmIkam iva pannagAH
3028012a ye tvayA daNDakAraNye bhakSitA dharmacAriNaH
3028012c tAn adya nihataH saMkhye sasainyo 'nugamiSyasi
3028013a adya tvAM nihataM bANaiH pazyantu paramarSayaH
3028013c nirayasthaM vimAnasthA ye tvayA hiMsitAH purA
3028014a prahara tvaM yathAkAmaM kuru yatnaM kulAdhama
3028014c adya te pAtayiSyAmi ziras tAlaphalaM yathA
3028015a evam uktas tu rAmeNa kruddhaH saMraktalocanaH
3028015c pratyuvAca tato rAmaM prahasan krodhamUrchitaH
3028016a prAkRtAn rAkSasAn hatvA yuddhe dazarathAtmaja
3028016c AtmanA katham AtmAnam aprazasyaM prazaMsasi
3028017a vikrAntA balavanto vA ye bhavanti nararSabhAH
3028017c kathayanti na te kiM cit tejasA svena garvitAH
3028018a prAkRtAs tv akRtAtmAno loke kSatriyapAMsanAH
3028018c nirarthakaM vikatthante yathA rAma vikatthase
3028019a kulaM vyapadizan vIraH samare ko 'bhidhAsyati
3028019c mRtyukAle hi saMprApte svayam aprastave stavam
3028020a sarvathA tu laghutvaM te katthanena vidarzitam
3028020c suvarNapratirUpeNa tapteneva kuzAgninA
3028021a na tu mAm iha tiSThantaM pazyasi tvaM gadAdharam
3028021c dharAdharam ivAkampyaM parvataM dhAtubhiz citam
3028022a paryApto 'haM gadApANir hantuM prANAn raNe tava
3028022c trayANAm api lokAnAM pAzahasta ivAntakaH
3028023a kAmaM bahv api vaktavyaM tvayi vakSyAmi na tv aham
3028023c astaM gacched dhi savitA yuddhavighras tato bhavet
3028024a caturdaza sahasrANi rAkSasAnAM hatAni te
3028024c tvadvinAzAt karomy adya teSAm azrupramArjanam
3028025a ity uktvA paramakruddhas tAM gadAM paramAGgadAm
3028025c kharaz cikSepa rAmAya pradIptAm azaniM yathA
3028026a kharabAhupramuktA sA pradIptA mahatI gadA
3028026c bhasmavRkSAMz ca gulmAMz ca kRtvAgAt tatsamIpataH
3028027a tAm ApatantIM jvalitAM mRtyupAzopamAM gadA
3028027c antarikSagatAM rAmaz ciccheda bahudhA zaraiH
3028028a sA vizIrNA zarair bhinnA papAta dharaNItale
3028028c gadAmantrauSadhibalair vyAlIva vinipAtitA
3029001a bhittvA tu tAM gadAM bANai rAghavo dharmavatsalaH
3029001c smayamAnaH kharaM vAkyaM saMrabdham idam abravIt
3029002a etat te balasarvasvaM darzitaM rAkSasAdhama
3029002c zaktihInataro matto vRthA tvam upagarjitam
3029003a eSA bANavinirbhinnA gadA bhUmitalaM gatA
3029003c abhidhAnapragalbhasya tava pratyayaghAtinI
3029004a yat tvayoktaM vinaSTAnAm idam azrupramArjanam
3029004c rAkSasAnAM karomIti mithyA tad api te vacaH
3029005a nIcasya kSudrazIlasya mithyAvRttasya rakSasaH
3029005c prANAn apahariSyAmi garutmAn amRtaM yathA
3029006a adya te bhinnakaNThasya phenabudbudabhUSitam
3029006c vidAritasya madbANair mahI pAsyati zoNitam
3029007a pAMsurUSitasarvAGgaH srastanyastabhujadvayaH
3029007c svapsyase gAM samAzliSya durlabhAM pramadAm iva
3029008a pravRddhanidre zayite tvayi rAkSasapAMsane
3029008c bhaviSyanty azaraNyAnAM zaraNyA daNDakA ime
3029009a janasthAne hatasthAne tava rAkSasamaccharaiH
3029009c nirbhayA vicariSyanti sarvato munayo vane
3029010a adya viprasariSyanti rAkSasyo hatabAndhavAH
3029010c bASpArdravadanA dInA bhayAd anyabhayAvahAH
3029011a adya zokarasajJAs tA bhaviSyanti nizAcara
3029011c anurUpakulAH patnyo yAsAM tvaM patir IdRzaH
3029012a nRzaMsazIla kSudrAtman nityaM brAhmaNakaNTaka
3029012c tvatkRte zaGkitair agnau munibhiH pAtyate haviH
3029013a tam evam abhisaMrabdhaM bruvANaM rAghavaM raNe
3029013c kharo nirbhartsayAm Asa roSAt kharatara svanaH
3029014a dRDhaM khalv avalipto 'si bhayeSv api ca nirbhayaH
3029014c vAcyAvAcyaM tato hi tvaM mRtyuvazyo na budhyase
3029015a kAlapAzaparikSiptA bhavanti puruSA hi ye
3029015c kAryAkAryaM na jAnanti te nirastaSaDindriyAH
3029016a evam uktvA tato rAmaM saMrudhya bhRkuTiM tataH
3029016c sa dadarza mahAsAlam avidUre nizAcaraH
3029017a raNe praharaNasyArthe sarvato hy avalokayan
3029017c sa tam utpATayAm Asa saMdRzya dazanacchadam
3029018a taM samutkSipya bAhubhyAM vinarditvA mahAbalaH
3029018c rAmam uddizya cikSepa hatas tvam iti cAbravIt
3029019a tam ApatantaM bANaughaiz chittvA rAmaH pratApavAn
3029019c roSam AhArayat tIvraM nihantuM samare kharam
3029020a jAtasvedas tato rAmo roSAd raktAntalocanaH
3029020c nirbibheda sahasreNa bANAnAM samare kharam
3029021a tasya bANAntarAd raktaM bahu susrAva phenilam
3029021c gireH prasravaNasyeva toyadhArAparisravaH
3029022a vihvalaH sa kRto bANaiH kharo rAmeNa saMyuge
3029022c matto rudhiragandhena tam evAbhyadravad drutam
3029023a tam ApatantaM saMrabdhaM kRtAstro rudhirAplutam
3029023c apasarpat pratipadaM kiM cit tvaritavikramaH
3029024a tataH pAvakasaMkAzaM badhAya samare zaram
3029024c kharasya rAmo jagrAha brahmadaNDam ivAparam
3029025a sa tad dattaM maghavatA surarAjena dhImatA
3029025c saMdadhe ca sa dharmAtmA mumoca ca kharaM prati
3029026a sa vimukto mahAbANo nirghAtasamaniHsvanaH
3029026c rAmeNa dhanur udyamya kharasyorasi cApatat
3029027a sa papAta kharo bhUmau dahyamAnaH zarAgninA
3029027c rudreNaiva vinirdagdhaH zvetAraNye yathAndhakaH
3029028a sa vRtra iva vajreNa phenena namucir yathA
3029028c balo vendrAzanihato nipapAta hataH kharaH
3029029a tato rAjarSayaH sarve saMgatAH paramarSayaH
3029029c sabhAjya muditA rAmam idaM vacanam abruvan
3029030a etadarthaM mahAtejA mahendraH pAkazAsanaH
3029030c zarabhaGgAzramaM puNyam AjagAma puraMdaraH
3029031a AnItas tvam imaM dezam upAyena maharSibhiH
3029031c eSAM vadhArthaM krUrANAM rakSasAM pApakarmaNAm
3029032a tad idaM naH kRtaM kAryaM tvayA dazarathAtmaja
3029032c sukhaM dharmaM cariSyanti daNDakeSu maharSayaH
3029033a etasminn antare vIro lakSmaNaH saha sItayA
3029033c giridurgAd viniSkramya saMvivezAzramaM sukhI
3029034a tato rAmas tu vijayI pUjyamAno maharSibhiH
3029034c pravivezAzramaM vIro lakSmaNenAbhivAditaH
3029035a taM dRSTvA zatruhantAraM maharSINAM sukhAvaham
3029035c babhUva hRSTA vaidehI bhartAraM pariSasvaje
3030001a tataH zUrpaNakhA dRSTvA sahasrANi caturdaza
3030001c hatAny ekena rAmeNa rakSasAM bhImakarmaNAm
3030002a dUSaNaM ca kharaM caiva hataM trizirasaM raNe
3030002c dRSTvA punar mahAnAdaM nanAda jaladopamA
3030003a sA dRSTvA karma rAmasya kRtam anyaiH suduSkaram
3030003c jagAma paramaudvignA laGkAM rAvaNapAlitAm
3030004a sa dadarza vimAnAgre rAvaNaM dIptatejasaM
3030004c upopaviSTaM sacivair marudbhir iva vAsavam
3030005a AsInaM sUryasaMkAze kAJcane paramAsane
3030005c rukmavedigataM prAjyaM jvalantam iva pAvakam
3030006a devagandharvabhUtAnAm RSINAM ca mahAtmanAm
3030006c ajeyaM samare zUraM vyAttAnanam ivAntakam
3030007a devAsuravimardeSu vajrAzanikRtavraNam
3030007c airAvataviSANAgrair utkRSTakiNavakSasaM
3030008a viMzadbhujaM dazagrIvaM darzanIyaparicchadam
3030008c vizAlavakSasaM vIraM rAjalakSmaNalakSitam
3030009a snigdhavaidUryasaMkAzaM taptakAJcanakuNDalam
3030009c subhujaM zukladazanaM mahAsyaM parvatopamam
3030010a viSNucakranipAtaiz ca zatazo devasaMyuge
3030010c AhatAGgaM samastaiz ca devapraharaNais tathA
3030011a akSobhyANAM samudrANAM kSobhaNaM kSiprakAriNam
3030011c kSeptAraM parvatAgrANAM surANAM ca pramardanam
3030012a ucchettAraM ca dharmANAM paradArAbhimarzanam
3030012c sarvadivyAstrayoktAraM yajJavighnakaraM sadA
3030013a purIM bhogavatIM gatvA parAjitya ca vAsukim
3030013c takSakasya priyAM bhAryAM parAjitya jahAra yaH
3030014a kailAsaM parvataM gatvA vijitya naravAhanam
3030014c vimAnaM puSpakaM tasya kAmagaM vai jahAra yaH
3030015a vanaM caitrarathaM divyaM nalinIM nandanaM vanam
3030015c vinAzayati yaH krodhAd devodyAnAni vIryavAn
3030016a candrasUryau mahAbhAgAv uttiSThantau paraMtapau
3030016c nivArayati bAhubhyAM yaH zailazikharopamaH
3030017a dazavarSasahasrANi tapas taptvA mahAvane
3030017c purA svayambhuve dhIraH zirAMsy upajahAra yaH
3030018a devadAnavagandharvapizAcapatagoragaiH
3030018c abhayaM yasya saMgrAme mRtyuto mAnuSAd Rte
3030019a mantrar abhituSTaM puNyam adhvareSu dvijAtibhiH
3030019c havirdhAneSu yaH somam upahanti mahAbalaH
3030020a AptayajJaharaM krUraM brahmaghnaM duSTacAriNam
3030020c karkazaM niranukrozaM prajAnAm ahite ratam
3030020e rAvaNaM sarvabhUtAnAM sarvalokabhayAvaham
3030021a rAkSasI bhrAtaraM krUraM sA dadarza mahAbalam
3030021c taM divyavastrAbharaNaM divyamAlyopazobhitam
3030021e rAkSasendraM mahAbhAgaM paulastya kulanandanam
3030022a tam abravId dIptavizAlalocanaM; pradarzayitvA bhayamohamUrchitA
3030022c sudAruNaM vAkyam abhItacAriNI; mahAtmanA zUrpaNakhA virUpitA
3031001a tataH zUrpaNakhA dInA rAvaNaM lokarAvaNam
3031001c amAtyamadhye saMkruddhA paruSaM vAkyam abravIt
3031002a pramattaH kAmabhogeSu svairavRtto niraGkuzaH
3031002c samutpannaM bhayaM ghoraM boddhavyaM nAvabudhyase
3031003a saktaM grAmyeSu bhogeSu kAmavRttaM mahIpatim
3031003c lubdhaM na bahu manyante zmazAnAgnim iva prajAH
3031004a svayaM kAryANi yaH kAle nAnutiSThati pArthivaH
3031004c sa tu vai saha rAjyena taiz ca kAryair vinazyati
3031005a ayuktacAraM durdarzam asvAdhInaM narAdhipam
3031005c varjayanti narA dUrAn nadIpaGkam iva dvipAH
3031006a ye na rakSanti viSayam asvAdhInA narAdhipaH
3031006c te na vRddhyA prakAzante girayaH sAgare yathA
3031007a Atmavadbhir vigRhya tvaM devagandharvadAnavaiH
3031007c ayuktacAraz capalaH kathaM rAjA bhaviSyasi
3031008a yeSAM cAraz ca kozaz ca nayaz ca jayatAM vara
3031008c asvAdhInA narendrANAM prAkRtais te janaiH samAH
3031009a yasmAt pazyanti dUrasthAn sarvAn arthAn narAdhipAH
3031009c cAreNa tasmAd ucyante rAjAno dIrghacakSuSaH
3031010a ayuktacAraM manye tvAM prAkRtaiH sacivair vRtam
3031010c svajanaM ca janasthAnaM hataM yo nAvabudhyase
3031011a caturdaza sahasrANi rakSasAM bhImakarmaNAm
3031011c hatAny ekena rAmeNa kharaz ca sahadUSaNaH
3031012a RSINAm abhayaM dattaM kRtakSemAz ca daNDakAH
3031012c dharSitaM ca janasthAnaM rAmeNAkliSTakarmaNA
3031013a tvaM tu lubdhaH pramattaz ca parAdhInaz ca rAvaNa
3031013c viSaye sve samutpannaM bhayaM yo nAvabudhyase
3031014a tIkSNam alpapradAtAraM pramattaM garvitaM zaTham
3031014c vyasane sarvabhUtAni nAbhidhAvanti pArthivam
3031015a atimAninam agrAhyam AtmasaMbhAvitaM naram
3031015c krodhanaM vyasane hanti svajano 'pi narAdhipam
3031016a nAnutiSThati kAryANi bhayeSu na bibheti ca
3031016c kSipraM rAjyAc cyuto dInas tRNais tulyo bhaviSyati
3031017a zuSkakASThair bhavet kAryaM loSTair api ca pAMsubhiH
3031017c na tu sthAnAt paribhraSTaiH kAryaM syAd vasudhAdhipaiH
3031018a upabhuktaM yathA vAsaH srajo vA mRditA yathA
3031018c evaM rAjyAt paribhraSTaH samartho 'pi nirarthakaH
3031019a apramattaz ca yo rAjA sarvajJo vijitendriyaH
3031019c kRtajJo dharmazIlaz ca sa rAjA tiSThate ciram
3031020a nayanAbhyAM prasupto 'pi jAgarti nayacakSuSA
3031020c vyaktakrodhaprasAdaz ca sa rAjA pUjyate janaiH
3031021a tvaM tu rAvaNadurbuddhir guNair etair vivarjitaH
3031021c yasya te 'viditaz cArai rakSasAM sumahAn vadhaH
3031022a parAvamantA viSayeSu saMgato; nadeza kAlapravibhAga tattvavit
3031022c ayuktabuddhir guNadoSanizcaye; vipannarAjyo na cirAd vipatsyate
3031023a iti svadoSAn parikIrtitAMs tayA; samIkSya buddhyA kSaNadAcarezvaraH
3031023c dhanena darpeNa balena cAnvito; vicintayAm Asa ciraM sa rAvaNaH
3032001a tataH zUrpaNakhAM kruddhAM bruvatIM paruSaM vacaH
3032001c amAtyamadhye saMkruddhaH paripapraccha rAvaNaH
3032002a kaz ca rAmaH kathaM vIryaH kiM rUpaH kiM parAkramaH
3032002c kimarthaM daNDakAraNyaM praviSTaz ca suduzcaram
3032003a AyudhaM kiM ca rAmasya nihatA yena rAkSasAH
3032003c kharaz ca nihataM saMkhye dUSaNas trizirAs tathA
3032004a ity uktA rAkSasendreNa rAkSasI krodhamUrchitA
3032004c tato rAmaM yathAnyAyam AkhyAtum upacakrame
3032005a dIrghabAhur vizAlAkSaz cIrakRSNAjinAmbaraH
3032005c kandarpasamarUpaz ca rAmo dazarathAtmajaH
3032006a zakracApanibhaM cApaM vikRSya kanakAGgadam
3032006c dIptAn kSipati nArAcAn sarpAn iva mahAviSAn
3032007a nAdadAnaM zarAn ghorAn na muJcantaM mahAbalam
3032007c na kArmukaM vikarSantaM rAmaM pazyAmi saMyuge
3032008a hanyamAnaM tu tat sainyaM pazyAmi zaravRSTibhiH
3032008c indreNaivottamaM sasyam AhataM tv azmavRSTibhiH
3032009a rakSasAM bhImavIryANAM sahasrANi caturdaza
3032009c nihatAni zarais tIkSNais tenaikena padAtinA
3032010a ardhAdhikamuhUrtena kharaz ca sahadUSaNaH
3032010c RSINAm abhayaM dattaM kRtakSemAz ca daNDakAH
3032011a ekA kathaM cin muktAhaM paribhUya mahAtmanA
3032011c strIvadhaM zaGkamAnena rAmeNa viditAtmanA
3032012a bhrAtA cAsya mahAtejA guNatas tulyavikramaH
3032012c anuraktaz ca bhaktaz ca lakSmaNo nAma vIryavAn
3032013a amarSI durjayo jetA vikrAnto buddhimAn balI
3032013c rAmasya dakSiNe bAhur nityaM prANo bahiScaraH
3032014a rAmasya tu vizAlAkSI dharmapatnI yazasvinI
3032014c sItA nAma varArohA vaidehI tanumadhyamA
3032015a naiva devI na gandharvA na yakSI na ca kiMnarI
3032015c tathArUpA mayA nArI dRSTapUrvA mahItale
3032016a yasya sItA bhaved bhAryA yaM ca hRSTA pariSvajet
3032016c atijIvet sa sarveSu lokeSv api puraMdarAt
3032017a sA suzIlA vapuHzlAghyA rUpeNApratimA bhuvi
3032017c tavAnurUpA bhAryA sA tvaM ca tasyAs tathA patiH
3032018a tAM tu vistIrNajaghanAM pInottuGgapayodharAm
3032018c bhAryArthe tu tavAnetum udyatAhaM varAnanAm
3032019a tAM tu dRSTvAdya vaidehIM pUrNacandranibhAnanAm
3032019c manmathasya zarANAM ca tvaM vidheyo bhaviSyasi
3032020a yadi tasyAm abhiprAyo bhAryArthe tava jAyate
3032020c zIghram uddhriyatAM pAdo jayArtham iha dakSiNaH
3032021a kuru priyaM tathA teSAM rakSasAM rAkSasezvara
3032021c vadhAt tasya nRzaMsasya rAmasyAzramavAsinaH
3032022a taM zarair nizitair hatvA lakSmaNaM ca mahAratham
3032022c hatanAthAM sukhaM sItAM yathAvad upabhokSyase
3032023a rocate yadi te vAkyaM mamaitad rAkSasezvara
3032023c kriyatAM nirvizaGkena vacanaM mama rAghava
3032024a nizamya rAmeNa zarair ajihmagair; hatAJ janasthAnagatAn nizAcarAn
3032024c kharaM ca buddhvA nihataM ca dUSaNaM; tvam adya kRtyaM pratipattum arhasi
3033001a tataH zUrpaNakhA vAkyaM tac chrutvA romaharSaNam
3033001c sacivAn abhyanujJAya kAryaM buddhvA jagAma ha
3033002a tat kAryam anugamyAtha yathAvad upalabhya ca
3033002c doSANAM ca guNAnAM ca saMpradhArya balAbalam
3033003a iti kartavyam ity eva kRtvA nizcayam AtmanaH
3033003c sthirabuddhis tato ramyAM yAnazAlAM jagAma ha
3033004a yAnazAlAM tato gatvA pracchannaM rAkSasAdhipaH
3033004c sUtaM saMcodayAm Asa rathaH saMyujyatAm iti
3033005a evam uktaH kSaNenaiva sArathir laghuvikramaH
3033005c rathaM saMyojayAm Asa tasyAbhimatam uttamam
3033006a kAJcanaM ratham AsthAya kAmagaM ratnabhUSitam
3033006c pizAcavadanair yuktaM kharaiH kanakabhUSaNaiH
3033007a meghapratimanAdena sa tena dhanadAnujaH
3033007c rAkSasAdhipatiH zrImAn yayau nadanadIpatim
3033008a sa zvetabAlavyasanaH zvetacchatro dazAnanaH
3033008c snigdhavaidUryasaMkAzas taptakAJcanabhUSaNaH
3033009a dazAsyo viMzatibhujo darzanIya paricchadaH
3033009c tridazArir munIndraghno dazazIrSa ivAdrirAT
3033010a kAmagaM ratham AsthAya zuzubhe rAkSasAdhipaH
3033010c vidyunmaNDalavAn meghaH sabalAka ivAmbare
3033011a sazailaM sAgarAnUpaM vIryavAn avalokayan
3033011c nAnApuSpaphalair vRkSair anukIrNaM sahasrazaH
3033012a zItamaGgalatoyAbhiH padminIbhiH samantataH
3033012c vizAlair Azramapadair vedimadbhiH samAvRtam
3033013a kadaly ADhakisaMbAdhaM nAlikeropazobhitam
3033013c sAlais tAlais tamAlaiz ca tarubhiz ca supuSpitaiH
3033014a atyantaniyatAhAraiH zobhitaM paramarSibhiH
3033014c nAgaiH suparNair gandharvaiH kiMnaraiz ca sahasrazaH
3033015a jitakAmaiz ca siddhaiz ca cAmaNaiz copazobhitam
3033015c Ajair vaikhAnasair mASair vAlakhilyair marIcipaiH
3033016a divyAbharaNamAlyAbhir divyarUpAbhir AvRtam
3033016c krIDA ratividhijJAbhir apsarobhiH sahasrazaH
3033017a sevitaM devapatnIbhiH zrImatIbhiH zriyA vRtam
3033017c devadAnavasaMghaiz ca caritaM tv amRtAzibhiH
3033018a haMsakrauJcaplavAkIrNaM sArasaiH saMpraNAditam
3033018c vaidUryaprastaraM ramyaM snigdhaM sAgaratejasA
3033019a pANDurANi vizAlAni divyamAlyayutAni ca
3033019c tUryagItAbhijuSTAni vimAnAni samantataH
3033020a tapasA jitalokAnAM kAmagAny abhisaMpatan
3033020c gandharvApsarasaz caiva dadarza dhanadAnujaH
3033021a niryAsarasamUlAnAM candanAnAM sahasrazaH
3033021c vanAni pazyan saumyAni ghrANatRptikarANi ca
3033022a agarUNAM ca mukhyAnAM vanAny upavanAni ca
3033022c takkolAnAM ca jAtyAnAM phalAnAM ca sugandhinAm
3033023a puSpANi ca tamAlasya gulmAni maricasya ca
3033023c muktAnAM ca samUhAni zuSyamANAni tIrataH
3033024a zaGkhAnAM prastaraM caiva pravAlanicayaM tathA
3033024c kAJcanAni ca zailAni rAjatAni ca sarvazaH
3033025a prasravANi manojJAni prasannAni hradAni ca
3033025c dhanadhAnyopapannAni strIratnair AvRtAni ca
3033026a hastyazvarathagADhAni nagarANy avalokayan
3033026c taM samaM sarvataH snigdhaM mRdusaMsparzamArutam
3033027a anUpaM sindhurAjasya dadarza tridivopamam
3033027c tatrApazyat sa meghAbhaM nyagrodham RSibhir vRtam
3033028a samantAd yasya tAH zAkhAH zatayojanam AyatAH
3033028c yasya hastinam AdAya mahAkAyaM ca kaccapam
3033028e bhakSArthaM garuDaH zAkhAm AjagAma mahAbalaH
3033029a tasya tAM sahasA zAkhAM bhAreNa patagottamaH
3033029c suparNaH parNabahulAM babhaJjAtha mahAbalaH
3033030a tatra vaikhAnasA mASA vAlakhilyA marIcipAH
3033030c ajA babhUvur dhUmrAz ca saMgatAH paramarSayaH
3033031a teSAM dayArthaM garuDas tAM zAkhAM zatayojanAm
3033031c jagAmAdAya vegena tau cobhau gajakacchapau
3033032a ekapAdena dharmAtmA bhakSayitvA tad AmiSam
3033032c niSAdaviSayaM hatvA zAkhayA patagottamaH
3033032e praharSam atulaM lebhe mokSayitvA mahAmunIn
3033033a sa tenaiva praharSeNa dviguNIkRtavikramaH
3033033c amRtAnayanArthaM vai cakAra matimAn matim
3033034a ayojAlAni nirmathya bhittvA ratnagRhaM varam
3033034c mahendrabhavanAd guptam AjahArAmRtaM tataH
3033035a taM maharSigaNair juSTaM suparNakRtalakSaNam
3033035c nAmnA subhadraM nyagrodhaM dadarza dhanadAnujaH
3033036a taM tu gatvA paraM pAraM samudrasya nadIpateH
3033036c dadarzAzramam ekAnte puNye ramye vanAntare
3033037a tatra kRSNAjinadharaM jaTAvalkaladhAriNam
3033037c dadarza niyatAhAraM mArIcaM nAma rAkSasaM
3033038a sa rAvaNaH samAgamya vidhivat tena rakSasA
3033038c tataH pazcAd idaM vAkyam abravId vAkyakovidaH
3034001a mArIca zrUyatAM tAta vacanaM mama bhASataH
3034001c Arto 'smi mama cArtasya bhavAn hi paramA gatiH
3034002a jAnISe tvaM janasthAnaM bhrAtA yatra kharo mama
3034002c dUSaNaz ca mahAbAhuH svasA zUrpaNakhA ca me
3034003a trizirAz ca mahAtejA rAkSasaH pizitAzanaH
3034003c anye ca bahavaH zUrA labdhalakSA nizAcarAH
3034004a vasanti manniyogena adhivAsaM ca rAkSasaH
3034004c bAdhamAnA mahAraNye munIn ye dharmacAriNaH
3034005a caturdaza sahasrANi rakSasAM bhImakarmaNAm
3034005c zUrANAM labdhalakSANAM kharacittAnuvartinAm
3034006a te tv idAnIM janasthAne vasamAnA mahAbalAH
3034006c saMgatAH param AyattA rAmeNa saha saMyuge
3034007a tena saMjAtaroSeNa rAmeNa raNamUrdhani
3034007c anuktvA paruSaM kiM cic charair vyApAritaM dhanuH
3034008a caturdaza sahasrANi rakSasAM bhImakarmaNAm
3034008c nihatAni zarais tIkSNair mAnuSeNa padAtinA
3034009a kharaz ca nihataH saMkhye dUSaNaz ca nipAtitaH
3034009c hatvA trizirasaM cApi nirbhayA daNDakAH kRtAH
3034010a pitrA nirastaH kruddhena sabhAryaH kSINajIvitaH
3034010c sa hantA tasya sainyasya rAmaH kSatriyapAMsanaH
3034011a azIlaH karkazas tIkSNo mUrkho lubdho 'jitendriyaH
3034011c tyaktadharmas tv adharmAtmA bhUtAnAm ahite rataH
3034012a yena vairaM vinAraNye sattvam Azritya kevalam
3034012c karNanAsApahAreNa bhaginI me virUpitA
3034013a tasya bhAryAM janasthAnAt sItAM surasutopamAm
3034013c AnayiSyAmi vikramya sahAyas tatra me bhava
3034014a tvayA hy ahaM sahAyena pArzvasthena mahAbala
3034014c bhrAtRbhiz ca surAn yuddhe samagrAn nAbhicintaye
3034015a tat sahAyo bhava tvaM me samartho hy asi rAkSasa
3034015c vIrye yuddhe ca darpe ca na hy asti sadRzas tava
3034016a etadartham ahaM prAptas tvatsamIpaM nizAcara
3034016c zRNu tat karma sAhAyye yat kAryaM vacanAn mama
3034017a sauvarNas tvaM mRgo bhUtvA citro rajatabindubhiH
3034017c Azrame tasya rAmasya sItAyAH pramukhe cara
3034018a tvAM tu niHsaMzayaM sItA dRSTvA tu mRgarUpiNam
3034018c gRhyatAm iti bhartAraM lakSmaNaM cAbhidhAsyati
3034019a tatas tayor apAye tu zUnye sItAM yathAsukham
3034019c nirAbAdho hariSyAmi rAhuz candraprabhAm iva
3034020a tataH pazcAt sukhaM rAme bhAryAharaNakarzite
3034020c visrabdhaM prahariSyAmi kRtArthenAntarAtmanA
3034021a tasya rAmakathAM zrutvA mArIcasya mahAtmanaH
3034021c zuSkaM samabhavad vaktraM paritrasto babhUva ca
3034022a sa rAvaNaM trastaviSaNNacetA; mahAvane rAmaparAkramajJaH
3034022c kRtAJjalis tattvam uvAca vAkyaM; hitaM ca tasmai hitam Atmanaz ca
3035001a tac chrutvA rAkSasendrasya vAkyaM vAkyavizAradaH
3035001c pratyuvAca mahAprAjJo mArIco rAkSasezvaram
3035002a sulabhAH puruSA rAjan satataM priyavAdinaH
3035002c apriyasya ca pathyasya vaktA zrotA ca durlabhaH
3035003a na nUnaM budhyase rAmaM mahAvIryaM guNonnatam
3035003c ayuktacAraz capalo mahendravaruNopamam
3035004a api svasti bhavet tAta sarveSAM bhuvi rakSasAm
3035004c api rAmo na saMkruddhaH kuryAl lokam arAkSasaM
3035005a api te jIvitAntAya notpannA janakAtmajA
3035005c api sItA nimittaM ca na bhaved vyasanaM mahat
3035006a api tvAm IzvaraM prApya kAmavRttaM niraGkuzam
3035006c na vinazyet purI laGkA tvayA saha sarAkSasA
3035007a tvadvidhaH kAmavRtto hi duHzIlaH pApamantritaH
3035007c AtmAnaM svajanaM rASTraM sa rAjA hanti durmatiH
3035008a na ca pitrA parityakto nAmaryAdaH kathaM cana
3035008c na lubdho na ca duHzIlo na ca kSatriyapAMsanaH
3035009a na ca dharmaguNair hInaiH kausalyAnandavardhanaH
3035009c na ca tIkSNo hi bhUtAnAM sarveSAM ca hite rataH
3035010a vaJcitaM pitaraM dRSTvA kaikeyyA satyavAdinam
3035010c kariSyAmIti dharmAtmA tataH pravrajito vanam
3035011a kaikeyyAH priyakAmArthaM pitur dazarathasya ca
3035011c hitvA rAjyaM ca bhogAMz ca praviSTo daNDakAvanam
3035012a na rAmaH karkazas tAta nAvidvAn nAjitendriyaH
3035012c anRtaM na zrutaM caiva naiva tvaM vaktum arhasi
3035013a rAmo vigrahavAn dharmaH sAdhuH satyaparAkramaH
3035013c rAjA sarvasya lokasya devAnAm iva vAsavaH
3035014a kathaM tvaM tasya vaidehIM rakSitAM svena tejasA
3035014c icchasi prasabhaM hartuM prabhAm iva vivasvataH
3035015a zarArciSam anAdhRSyaM cApakhaDgendhanaM raNe
3035015c rAmAgniM sahasA dIptaM na praveSTuM tvam arhasi
3035016a dhanurvyAditadIptAsyaM zarArciSam amarSaNam
3035016c cApabANadharaM vIraM zatrusenApahAriNam
3035017a rAjyaM sukhaM ca saMtyajya jIvitaM ceSTam AtmanaH
3035017c nAtyAsAdayituM tAta rAmAntakam ihArhasi
3035018a aprameyaM hi tat tejo yasya sA janakAtmajA
3035018c na tvaM samarthas tAM hartuM rAmacApAzrayAM vane
3035019a prANebhyo 'pi priyatarA bhAryA nityam anuvratA
3035019c dIptasyeva hutAzasya zikhA sItA sumadhyamA
3035020a kim udyamaM vyartham imaM kRtvA te rAkSasAdhipa
3035020c dRSTaz cet tvaM raNe tena tad antaM tava jIvitam
3035020e jIvitaM ca sukhaM caiva rAjyaM caiva sudurlabham
3035021a sa sarvaiH sacivaiH sArdhaM vibhISaNapuraskRtaiH
3035021c mantrayitvA tu dharmiSThaiH kRtvA nizcayam AtmanaH
3035022a doSANAM ca guNAnAM ca saMpradhArya balAbalam
3035022c Atmanaz ca balaM jJAtvA rAghavasya ca tattvataH
3035022e hitaM hi tava nizcitya kSamaM tvaM kartum arhasi
3035023a ahaM tu manye tava na kSamaM raNe; samAgamaM kosalarAjasUnunA
3035023c idaM hi bhUyaH zRNu vAkyam uttamaM; kSamaM ca yuktaM ca nizAcarAdhipa
3036001a kadA cid apy ahaM vIryAt paryaTan pRthivIm imAm
3036001c balaM nAgasahasrasya dhArayan parvatopamaH
3036002a nIlajImUtasaMkAzas taptakAJcanakuNDalaH
3036002c bhayaM lokasya janayan kirITI parighAyudhaH
3036002e vyacaraM daNDakAraNyam RSimAMsAni bhakSayan
3036003a vizvAmitro 'tha dharmAtmA madvitrasto mahAmuniH
3036003c svayaM gatvA dazarathaM narendram idam abravIt
3036004a ayaM rakSatu mAM rAmaH parvakAle samAhitaH
3036004c mArIcAn me bhayaM ghoraM samutpannaM narezvara
3036005a ity evam ukto dharmAtmA rAjA dazarathas tadA
3036005c pratyuvAca mahAbhAgaM vizvAmitraM mahAmunim
3036006a Una SoDaza varSo 'yam akRtAstraz ca rAghavaH
3036006c kAmaM tu mama yat sainyaM mayA saha gamiSyati
3036006e badhiSyAmi munizreSTha zatruM tava yathepsitam
3036007a ity evam uktaH sa munI rAjAnaM punar abravIt
3036007c rAmAn nAnyad balaM loke paryAptaM tasya rakSasaH
3036008a bAlo 'py eSa mahAtejAH samarthas tasya nigrahe
3036008c gamiSye rAmam AdAya svasti te 'stu paraMtapaH
3036009a ity evam uktvA sa munis tam AdAya nRpAtmajam
3036009c jagAma paramaprIto vizvAmitraH svam Azramam
3036010a taM tadA daNDakAraNye yajJam uddizya dIkSitam
3036010c babhUvAvasthito rAmaz citraM visphArayan dhanuH
3036011a ajAtavyaJjanaH zrImAn bAlaH zyAmaH zubhekSaNaH
3036011c ekavastradharo dhanvI zikhI kanakamAlayA
3036012a zobhayan daNDakAraNyaM dIptena svena tejasA
3036012c adRzyata tadA rAmo bAlacandra ivoditaH
3036013a tato 'haM meghasaMkAzas taptakAJcanakuNDalaH
3036013c balI dattavaro darpAd AjagAma tadAzramam
3036014a tena dRSTaH praviSTo 'haM sahasaivodyatAyudhaH
3036014c mAM tu dRSTvA dhanuH sajyam asaMbhrAntaz cakAra ha
3036015a avajAnann ahaM mohAd bAlo 'yam iti rAghavam
3036015c vizvAmitrasya tAM vedim adhyadhAvaM kRtatvaraH
3036016a tena muktas tato bANaH zitaH zatrunibarhaNaH
3036016c tenAhaM tADitaH kSiptaH samudre zatayojane
3036017a rAmasya zaravegena nirasto bhrAntacetanaH
3036017c pAtito 'haM tadA tena gambhIre sAgarAmbhasi
3036017e prApya saMjJAM cirAt tAta laGkAM prati gataH purIm
3036018a evam asmi tadA muktaH sahAyAs te nipAtitAH
3036018c akRtAstreNa rAmeNa bAlenAkliSTakarmaNA
3036019a tan mayA vAryamANas tvaM yadi rAmeNa vigraham
3036019c kariSyasy ApadaM ghorAM kSipraM prApya naziSyasi
3036020a krIDA ratividhijJAnAM samAjotsavazAlinAm
3036020c rakSasAM caiva saMtApam anarthaM cAhariSyasi
3036021a harmyaprAsAdasaMbAdhAM nAnAratnavibhUSitAm
3036021c drakSyasi tvaM purIM laGkAM vinaSTAM maithilIkRte
3036022a akurvanto 'pi pApAni zucayaH pApasaMzrayAt
3036022c parapApair vinazyanti matsyA nAgahrade yathA
3036023a divyacandanadigdhAGgAn divyAbharaNabhUSitAn
3036023c drakSyasy abhihatAn bhUmau tava doSAt tu rAkSasAn
3036024a hRtadArAn sadArAMz ca dazavidravato dizaH
3036024c hatazeSAn azaraNAn drakSyasi tvaM nizAcarAn
3036025a zarajAlaparikSiptAm agnijvAlAsamAvRtAm
3036025c pradagdhabhavanAM laGkAM drakSyasi tvam asaMzayam
3036026a pramadAnAM sahasrANi tava rAjan parigrahaH
3036026c bhava svadAranirataH svakulaM rakSarAkSasa
3036027a mAnaM vRddhiM ca rAjyaM ca jIvitaM ceSTam AtmanaH
3036027c yadIcchasi ciraM bhoktuM mA kRthA rAma vipriyam
3036028a nivAryamANaH suhRdA mayA bhRzaM; prasahya sItAM yadi dharSayiSyasi
3036028c gamiSyasi kSINabalaH sabAndhavo; yamakSayaM rAmazarAttajIvitaH
3037001a evam asmi tadA muktaH kathaM cit tena saMyuge
3037001c idAnIm api yad vRttaM tac chRNuSva yad uttaram
3037002a rAkSasAbhyAm ahaM dvAbhyAm anirviNNas tathA kRtaH
3037002c sahito mRgarUpAbhyAM praviSTo daNDakAvanam
3037003a dIptajihvo mahAkAyas tIkSNazRNgo mahAbalaH
3037003c vyacaran daNDakAraNyaM mAMsabhakSo mahAmRgaH
3037004a agnihotreSu tIrtheSu caityavRkSeSu rAvaNa
3037004c atyantaghoro vyacaraMs tApasAMs tAn pradharSayan
3037005a nihatya daNDakAraNye tApasAn dharmacAriNaH
3037005c rudhirANi pibaMs teSAM tathA mAMsAni bhakSayan
3037006a RSimAMsAzanaH krUras trAsayan vanagocarAn
3037006c tadA rudhiramatto 'haM vyacaraM daNDakAvanam
3037007a tadAhaM daNDakAraNye vicaran dharmadUSakaH
3037007c AsAdayaM tadA rAmaM tApasaM dharmam Azritam
3037008a vaidehIM ca mahAbhAgAM lakSmaNaM ca mahAratham
3037008c tApasaM niyatAhAraM sarvabhUtahite ratam
3037009a so 'haM vanagataM rAmaM paribhUya mahAbalam
3037009c tApaso 'yam iti jJAtvA pUrvavairam anusmaran
3037010a abhyadhAvaM susaMkruddhas tIkSNazRGgo mRgAkRtiH
3037010c jighAMsur akRtaprajJas taM prahAram anusmaran
3037011a tena muktAs trayo bANAH zitAH zatrunibarhaNAH
3037011c vikRSya balavac cApaM suparNAnilatulyagAH
3037012a te bANA vajrasaMkAzAH sughorA raktabhojanAH
3037012c AjagmuH sahitAH sarve trayaH saMnataparvaNaH
3037013a parAkramajJo rAmasya zaTho dRSTabhayaH purA
3037013c samutkrAntas tato muktas tAv ubhau rAkSasau hatau
3037014a zareNa mukto rAmasya kathaM cit prApya jIvitam
3037014c iha pravrAjito yuktas tApaso 'haM samAhitaH
3037015a vRkSe vRkSe hi pazyAmi cIrakRSNAjinAmbaram
3037015c gRhItadhanuSaM rAmaM pAzahastam ivAntakam
3037016a api rAmasahasrANi bhItaH pazyAmi rAvaNa
3037016c rAmabhUtam idaM sarvam araNyaM pratibhAti me
3037017a rAmam eva hi pazyAmi rahite rAkSasezvara
3037017c dRSTvA svapnagataM rAmam udbhramAmi vicetanaH
3037018a rakArAdIni nAmAni rAmatrastasya rAvaNa
3037018c ratnAni ca rathAz caiva trAsaM saMjanayanti me
3037019a ahaM tasya prabhAvajJo na yuddhaM tena te kSamam
3037019c raNe rAmeNa yudhyasva kSamAM vA kuru rAkSasa
3037019e na te rAmakathA kAryA yadi mAM draSTum icchasi
3037020a idaM vaco bandhuhitArthinA mayA; yathocyamAnaM yadi nAbhipatsyase
3037020c sabAndhavas tyakSyasi jIvitaM raNe; hato 'dya rAmeNa zarair ajihmagaiH
3038001a mArIcena tu tad vAkyaM kSamaM yuktaM ca rAvaNaH
3038001c ukto na pratijagrAha martukAma ivauSadham
3038002a taM pathyahitavaktAraM mArIcaM rAkSasAdhipaH
3038002c abravIt paruSaM vAkyam ayuktaM kAlacoditaH
3038003a yat kilaitad ayuktArthaM mArIca mayi kathyate
3038003c vAkyaM niSphalam atyarthaM bIjam uptam ivoSare
3038004a tvadvAkyair na tu mAM zakyaM bhettuM rAmasya saMyuge
3038004c pApazIlasya mUrkhasya mAnuSasya vizeSataH
3038005a yas tyaktvA suhRdo rAjyaM mAtaraM pitaraM tathA
3038005c strIvAkyaM prAkRtaM zrutvA vanam ekapade gataH
3038006a avazyaM tu mayA tasya saMyuge kharaghAtinaH
3038006c prANaiH priyatarA sItA hartavyA tava saMnidhau
3038007a evaM me nizcitA buddhir hRdi mArIca vartate
3038007c na vyAvartayituM zakyA sendrair api surAsuraiH
3038008a doSaM guNaM vA saMpRSTas tvam evaM vaktum arhasi
3038008c apAyaM vApy upAyaM vA kAryasyAsya vinizcaye
3038009a saMpRSTena tu vaktavyaM sacivena vipazcitA
3038009c udyatAJjalinA rAjJo ya icched bhUtim AtmanaH
3038010a vAkyam apratikUlaM tu mRdupUrvaM zubhaM hitam
3038010c upacAreNa yuktaM ca vaktavyo vasudhAdhipaH
3038011a sAvamardaM tu yad vAkyaM mArIca hitam ucyate
3038011c nAbhinandati tad rAjA mAnArho mAnavarjitam
3038012a paJcarUpANi rAjAno dhArayanty amitaujasaH
3038012c agner indrasya somasya yamasya varuNasya ca
3038012e auSNyaM tathA vikramaM ca saumyaM daNDaM prasannatAm
3038013a tasmAt sarvAsv avasthAsu mAnyAH pUjyAz ca pArthivAH
3038013c tvaM tu dharmam avijJAya kevalaM moham AsthitaH
3038014a abhyAgataM mAM daurAtmyAt paruSaM vadasIdRzam
3038014c guNadoSau na pRcchAmi kSamaM cAtmani rAkSasa
3038014e asmiMs tu sa bhavAn kRtye sAhAyyaM kartum arhati
3038015a sauvarNas tvaM mRgo bhUtvA citro rajatabindubhiH
3038015c pralobhayitvA vaidehIM yatheSTaM gantum arhasi
3038016a tvAM tu mAyAmRgaM dRSTvA kAJcanaM jAtavismayA
3038016c Anayainam iti kSipraM rAmaM vakSyati maithilI
3038017a apakrAnte ca kAkutsthe lakSmaNe ca yathAsukham
3038017c AnayiSyAmi vaidehIM sahasrAkSaH zacIm iva
3038018a evaM kRtvA tv idaM kAryaM yatheSTaM gaccha rAkSasa
3038018c rAjyasyArdhaM pradAsyAmi mArIca tava suvrata
3038019a gaccha saumya zivaM mArgaM kAryasyAsya vivRddhaye
3038019c prApya sItAm ayuddhena vaJcayitvA tu rAghavam
3038019e laGkAM prati gamiSyAmi kRtakAryaH saha tvayA
3038020a etat kAryam avazyaM me balAd api kariSyasi
3038020c rAjJo hi pratikUlastho na jAtu sukham edhate
3038021a AsAdya taM jIvitasaMzayas te; mRtyur dhruvo hy adya mayA virudhya
3038021c etad yathAvat parigRhya buddhyA; yad atra pathyaM kuru tat tathA tvam
3039001a AjJapto rAjavad vAkyaM pratikUlaM nizAcaraH
3039001c abravIt paruSaM vAkyaM mArIco rAkSasAdhipam
3039002a kenAyam upadiSTas te vinAzaH pApakarmaNA
3039002c saputrasya sarASTrasya sAmAtyasya nizAcara
3039003a kas tvayA sukhinA rAjan nAbhinandati pApakRt
3039003c kenedam upadiSTaM te mRtyudvAram upAyataH
3039004a zatravas tava suvyaktaM hInavIryA nizAcara
3039004c icchanti tvAM vinazyantam uparuddhaM balIyasA
3039005a kenedam upadiSTaM te kSudreNAhitavAdinA
3039005c yas tvAm icchati nazyantaM svakRtena nizAcara
3039006a vadhyAH khalu na hanyante sacivAs tava rAvaNa
3039006c ye tvAm utpatham ArUDhaM na nigRhNanti sarvazaH
3039007a amAtyaiH kAmavRtto hi rAjA kApatham AzritaH
3039007c nigrAhyaH sarvathA sadbhir na nigrAhyo nigRhyase
3039008a dharmam arthaM ca kAmaM ca yazaz ca jayatAM vara
3039008c svAmiprasAdAt sacivAH prApnuvanti nizAcara
3039009a viparyaye tu tat sarvaM vyarthaM bhavati rAvaNa
3039009c vyasanaM svAmivaiguNyAt prApnuvantItare janAH
3039010a rAjamUlo hi dharmaz ca jayaz ca jayatAM vara
3039010c tasmAt sarvAsv avasthAsu rakSitavyo narAdhipaH
3039011a rAjyaM pAlayituM zakyaM na tIkSNena nizAcara
3039011c na cApi pratikUlena nAvinItena rAkSasa
3039012a ye tIkSNamantrAH sacivA bhajyante saha tena vai
3039012c viSameSu rathAH zIghraM mandasArathayo yathA
3039013a bahavaH sAdhavo loke yuktadharmam anuSThitAH
3039013c pareSAm aparAdhena vinaSTAH saparicchadAH
3039014a svAminA pratikUlena prajAs tIkSNena rAvaNa
3039014c rakSyamANA na vardhante meSA gomAyunA yathA
3039015a avazyaM vinaziSyanti sarve rAvaNa rAkSasAH
3039015c yeSAM tvaM karkazo rAjA durbuddhir ajitendriyaH
3039016a tad idaM kAkatAlIyaM ghoram AsAditaM tvayA
3039016c atra kiM zobhanaM yat tvaM sasainyo vinaziSyasi
3039017a mAM nihatya tu rAmo 'sau nacirAt tvAM vadhiSyati
3039017c anena kRtakRtyo 'smi mriye yad ariNA hataH
3039018a darzanAd eva rAmasya hataM mAm upadhAraya
3039018c AtmAnaM ca hataM viddhi hRtvA sItAM sabAndhavam
3039019a AnayiSyasi cet sItAm AzramAt sahito mayA
3039019c naiva tvam asi naivAhaM naiva laGkA na rAkSasAH
3039020a nivAryamANas tu mayA hitaiSiNA; na mRSyase vAkyam idaM nizAcara
3039020c paretakalpA hi gatAyuSo narA; hitaM na gRhNanti suhRdbhir Iritam
3040001a evam uktvA tu paruSaM mArIco rAvaNaM tataH
3040001c gacchAvety abravId dIno bhayAd rAtriMcaraprabhoH
3040002a dRSTaz cAhaM punas tena zaracApAsidhAriNA
3040002c madvadhodyatazastreNa vinaSTaM jIvitaM ca me
3040003a kiM tu kartuM mayA zakyam evaM tvayi durAtmani
3040003c eSa gacchAmy ahaM tAta svasti te 'stu nizAcara
3040004a prahRSTas tv abhavat tena vacanena sa rAkSasaH
3040004c pariSvajya susaMzliSTam idaM vacanam abravIt
3040005a etac chauNDIryayuktaM te macchandAd iva bhASitam
3040005c idAnIm asi mArIcaH pUrvam anyo nizAcaraH
3040006a AruhyatAm ayaM zIghraM khago ratnavibhUSitaH
3040006c mayA saha ratho yuktaH pizAcavadanaiH kharaiH
3040007a tato rAvaNamArIcau vimAnam iva taM ratham
3040007c Aruhya yayatuH zIghraM tasmAd AzramamaNDalAt
3040008a tathaiva tatra pazyantau pattanAni vanAni ca
3040008c girIMz ca saritaH sarvA rASTrANi nagarANi ca
3040009a sametya daNDakAraNyaM rAghavasyAzramaM tataH
3040009c dadarza sahamarIco rAvaNo rAkSasAdhipaH
3040010a avatIrya rathAt tasmAt tataH kAJcanabhUSaNAt
3040010c haste gRhItvA mArIcaM rAvaNo vAkyam abravIt
3040011a etad rAmAzramapadaM dRzyate kadalIvRtam
3040011c kriyatAM tat sakhe zIghraM yadarthaM vayam AgatAH
3040012a sa rAvaNavacaH zrutvA mArIco rAkSasas tadA
3040012c mRgo bhUtvAzramadvAri rAmasya vicacAra ha
3040013a maNipravarazRGgAgraH sitAsitamukhAkRtiH
3040013c raktapadmotpalamukha indranIlotpalazravAH
3040014a kiM cid abhyunnata grIva indranIlanibhodaraH
3040014c madhUkanibhapArzvaz ca kaJjakiJjalkasaMnibhaH
3040015a vaidUryasaMkAzakhuras tanujaGghaH susaMhataH
3040015c indrAyudhasavarNena pucchenordhvaM virAjitaH
3040016a manoharasnigdhavarNo ratnair nAnAvidhair vRtaH
3040016c kSaNena rAkSaso jAto mRgaH paramazobhanaH
3040017a vanaM prajvalayan ramyaM rAmAzramapadaM ca tat
3040017c manoharaM darzanIyaM rUpaM kRtvA sa rAkSasaH
3040018a pralobhanArthaM vaidehyA nAnAdhAtuvicitritam
3040018c vicaran gacchate samyak zAdvalAni samantataH
3040019a rUpyabinduzataiz citro bhUtvA ca priyadarzanaH
3040019c viTapInAM kisalayAn bhaGktvAdan vicacAra ha
3040020a kadalIgRhakaM gatvA karNikArAn itas tataH
3040020c samAzrayan mandagatiH sItAsaMdarzanaM tadA
3040021a rAjIvacitrapRSThaH sa virarAja mahAmRgaH
3040021c rAmAzramapadAbhyAze vicacAra yathAsukham
3040022a punar gatvA nivRttaz ca vicacAra mRgottamaH
3040022c gatvA muhUrtaM tvarayA punaH pratinivartate
3040023a vikrIDaMz ca punar bhUmau punar eva niSIdati
3040023c AzramadvAram Agamya mRgayUthAni gacchati
3040024a mRgayUthair anugataH punar eva nivartate
3040024c sItAdarzanam AkAGkSan rAkSaso mRgatAM gataH
3040025a paribhramati citrANi maNDalAni viniSpatan
3040025c samudvIkSya ca sarve taM mRgA ye 'nye vanecarAH
3040026a upagamya samAghrAya vidravanti dizo daza
3040026c rAkSasaH so 'pi tAn vanyAn mRgAn mRgavadhe rataH
3040027a pracchAdanArthaM bhAvasya na bhakSayati saMspRzan
3040027c tasminn eva tataH kAle vaidehI zubhalocanA
3040028a kusumApacaye vyagrA pAdapAn atyavartata
3040028c karNikArAn azokAMz ca cUTAMz ca madirekSaNA
3040029a kusumAny apacinvantI cacAra rucirAnanA
3040029c anarhAraNyavAsasya sA taM ratnamayaM mRgam
3040029e muktAmaNivicitrAGgaM dadarza paramAGganA
3040030a taM vai ruciradaNtauSThaM rUpyadhAtutanUruham
3040030c vismayotphullanayanA sasnehaM samudaikSata
3040031a sa ca tAM rAmadayitAM pazyan mAyAmayo mRgaH
3040031c vicacAra tatas tatra dIpayann iva tad vanam
3040032a adRSTapUrvaM dRSTvA taM nAnAratnamayaM mRgam
3040032c vismayaM paramaM sItA jagAma janakAtmajA
3041001a sA taM saMprekSya suzroNI kusumAni vicinvatI
3041001c hemarAjatavarNAbhyAM pArzvAbhyAm upazobhitam
3041002a prahRSTA cAnavadyAGgI mRSTahATakavarNinI
3041002c bhartAram api cAkrandal lakSmaNaM caiva sAyudham
3041003a tayAhUtau naravyAghrau vaidehyA rAmalakSmaNau
3041003c vIkSamANau tu taM dezaM tadA dadRzatur mRgam
3041004a zaGkamAnas tu taM dRSTvA lakSmaNo rAmam abravIt
3041004c tam evainam ahaM manye mArIcaM rAkSasaM mRgam
3041005a caranto mRgayAM hRSTAH pApenopAdhinA vane
3041005c anena nihatA rAma rAjAnaH kAmarUpiNA
3041006a asya mAyAvido mAyAmRgarUpam idaM kRtam
3041006c bhAnumatpuruSavyAghra gandharvapurasaMnibham
3041007a mRgo hy evaMvidho ratnavicitro nAsti rAghava
3041007c jagatyAM jagatInAtha mAyaiSA hi na saMzayaH
3041008a evaM bruvANaM kAkutsthaM prativArya zucismitA
3041008c uvAca sItA saMhRSTA chadmanA hRtacetanA
3041009a AryaputrAbhirAmo 'sau mRgo harati me manaH
3041009c AnayainaM mahAbAho krIDArthaM no bhaviSyati
3041010a ihAzramapade 'smAkaM bahavaH puNyadarzanAH
3041010c mRgAz caranti sahitAz camarAH sRmarAs tathA
3041011a RkSAH pRSatasaMghAz ca vAnarAH kiMnarAs tathA
3041011c vicaranti mahAbAho rUpazreSThA mahAbalAH
3041012a na cAsya sadRzo rAjan dRSTapUrvo mRgaH purA
3041012c tejasA kSamayA dIptyA yathAyaM mRgasattamaH
3041013a nAnAvarNavicitrAGgo ratnabindusamAcitaH
3041013c dyotayan vanam avyagraM zobhate zazisaMnibhaH
3041014a aho rUpam aho lakSmIH svarasaMpac ca zobhanA
3041014c mRgo 'dbhuto vicitro 'sau hRdayaM haratIva me
3041015a yadi grahaNam abhyeti jIvann eva mRgas tava
3041015c AzcaryabhUtaM bhavati vismayaM janayiSyati
3041016a samAptavanavAsAnAM rAjyasthAnAM ca naH punaH
3041016c antaHpuravibhUSArtho mRga eSa bhaviSyati
3041017a bharatasyAryaputrasya zvazrUNAM mama ca prabho
3041017c mRgarUpam idaM divyaM vismayaM janayiSyati
3041018a jIvan na yadi te 'bhyeti grahaNaM mRgasattamaH
3041018c ajinaM narazArdUla ruciraM me bhaviSyati
3041019a nihatasyAsya sattvasya jAmbUnadamayatvaci
3041019c zaSpabRsyAM vinItAyAm icchAmy aham upAsitum
3041020a kAmavRttam idaM raudraM strINAm asadRzaM matam
3041020c vapuSA tv asya sattvasya vismayo janito mama
3041021a tena kAJcanaromNA tu maNipravarazRGgiNA
3041021c taruNAdityavarNena nakSatrapathavarcasA
3041021e babhUva rAghavasyApi mano vismayam Agatam
3041022a evaM sItAvacaH zrutvA dRSTvA ca mRgam adbhutam
3041022c uvAca rAghavo hRSTo bhrAtaraM lakSmaNaM vacaH
3041023a pazya lakSmaNa vaidehyAH spRhAM mRgagatAm imAm
3041023c rUpazreSThatayA hy eSa mRgo 'dya na bhaviSyati
3041024a na vane nandanoddeze na caitrarathasaMzraye
3041024c kutaH pRthivyAM saumitre yo 'sya kaz cit samo mRgaH
3041025a pratilomAnulomAz ca rucirA romarAjayaH
3041025c zobhante mRgam Azritya citrAH kanakabindubhiH
3041026a pazyAsya jRmbhamANasya dIptAm agnizikhopamAm
3041026c jihvAM mukhAn niHsarantIM meghAd iva zatahradAm
3041027a masAragalvarkamukhaH zaGkhamuktAnibhodaraH
3041027c kasya nAmAnirUpyo 'sau na mano lobhayen mRgaH
3041028a kasya rUpam idaM dRSTvA jAmbUnadamayaprabham
3041028c nAnAratnamayaM divyaM na mano vismayaM vrajet
3041029a mAMsahetor api mRgAn vihArArthaM ca dhanvinaH
3041029c ghnanti lakSmaNa rAjAno mRgayAyAM mahAvane
3041030a dhanAni vyavasAyena vicIyante mahAvane
3041030c dhAtavo vividhAz cApi maNiratnasuvarNinaH
3041031a tat sAram akhilaM nqNAM dhanaM nicayavardhanam
3041031c manasA cintitaM sarvaM yathA zukrasya lakSmaNa
3041032a arthI yenArthakRtyena saMvrajaty avicArayan
3041032c tam artham arthazAstrajJaH prAhur arthyAz ca lakSmaNa
3041033a etasya mRgaratnasya parArdhye kAJcanatvaci
3041033c upavekSyati vaidehI mayA saha sumadhyamA
3041034a na kAdalI na priyakI na praveNI na cAvikI
3041034c bhaved etasya sadRzI sparzaneneti me matiH
3041035a eSa caiva mRgaH zrImAn yaz ca divyo nabhazcaraH
3041035c ubhAv etau mRgau divyau tArAmRgamahImRgau
3041036a yadi vAyaM tathA yan mAM bhaved vadasi lakSmaNa
3041036c mAyaiSA rAkSasasyeti kartavyo 'sya vadho mayA
3041037a etena hi nRzaMsena mArIcenAkRtAtmanA
3041037c vane vicaratA pUrvaM hiMsitA munipuMgavAH
3041038a utthAya bahavo yena mRgayAyAM janAdhipAH
3041038c nihatAH parameSvAsAs tasmAd vadhyas tv ayaM mRgaH
3041039a purastAd iha vAtApiH paribhUya tapasvinaH
3041039c udarastho dvijAn hanti svagarbho 'zvatarIm iva
3041040a sa kadA cic cirAl loke AsasAda mahAmunim
3041040c agastyaM tejasA yuktaM bhakSyas tasya babhUva ha
3041041a samutthAne ca tad rUpaM kartukAmaM samIkSya tam
3041041c utsmayitvA tu bhagavAn vAtApim idam abravIt
3041042a tvayAvigaNya vAtApe paribhUtAz ca tejasA
3041042c jIvaloke dvijazreSThAs tasmAd asi jarAM gataH
3041043a evaM tan na bhaved rakSo vAtApir iva lakSmaNa
3041043c madvidhaM yo 'timanyeta dharmanityaM jitendriyam
3041044a bhaved dhato 'yaM vAtApir agastyeneva mA gatiH
3041044c iha tvaM bhava saMnaddho yantrito rakSa maithilIm
3041045a asyAm Ayattam asmAkaM yat kRtyaM raghunandana
3041045c aham enaM vadhiSyAmi grahISyAmy atha vA mRgam
3041046a yAvad gacchAmi saumitre mRgam AnayituM drutam
3041046c pazya lakSmaNa vaidehIM mRgatvaci gataspRhAm
3041047a tvacA pradhAnayA hy eSa mRgo 'dya na bhaviSyati
3041047c apramattena te bhAvyam Azramasthena sItayA
3041048a yAvat pRSatam ekena sAyakena nihanmy aham
3041048c hatvaitac carma AdAya zIghram eSyAmi lakSmaNa
3041049a pradakSiNenAtibalena pakSiNA; jaTAyuSA buddhimatA ca lakSmaNa
3041049c bhavApramattaH pratigRhya maithilIM; pratikSaNaM sarvata eva zaGkitaH
3042001a tathA tu taM samAdizya bhrAtaraM raghunandanaH
3042001c babandhAsiM mahAtejA jAmbUnadamayatsarum
3042002a tatas triviNataM cApam AdAyAtmavibhUSaNam
3042002c Abadhya ca kalApau dvau jagAmodagravikramaH
3042003a taM vaJcayAno rAjendram ApatantaM nirIkSya vai
3042003c babhUvAntarhitas trAsAt punaH saMdarzane 'bhavat
3042004a baddhAsir dhanur AdAya pradudrAva yato mRgaH
3042004c taM sa pazyati rUpeNa dyotamAnam ivAgrataH
3042005a avekSyAvekSya dhAvantaM dhanuSpANir mahAvane
3042005c ativRttam iSoH pAtAl lobhayAnaM kadA cana
3042006a zaGkitaM tu samudbhrAntam utpatantam ivAmbare
3042006c dazyamAnam adRzyaM ca navoddezeSu keSu cit
3042007a chinnAbhrair iva saMvItaM zAradaM candramaNDalam
3042007c muhUrtAd eva dadRze muhur dUrAt prakAzate
3042008a darzanAdarzanenaiva so 'pAkarSata rAghavam
3042008c AsIt kruddhas tu kAkutstho vivazas tena mohitaH
3042009a athAvatasthe suzrAntaz chAyAm Azritya zAdvale
3042009c mRgaiH parivRto vanyair adUrAt pratyadRzyata
3042010a dRSTvA rAmo mahAtejAs taM hantuM kRtanizcayaH
3042010c saMdhAya sudRDhe cApe vikRSya balavad balI
3042011a tam eva mRgam uddizya jvalantam iva pannagam
3042011c mumoca jvalitaM dIptam astrabrahmavinirmitam
3042012a sa bhRzaM mRgarUpasya vinirbhidya zarottamaH
3042012c mArIcasyaiva hRdayaM vibhedAzanisaMnibhaH
3042013a tAlamAtram athotpatya nyapatat sa zarAturaH
3042013c vyanadad bhairavaM nAdaM dharaNyAm alpajIvitaH
3042013e mriyamANas tu mArIco jahau tAM kRtrimAM tanum
3042014a saMprAptakAlam AjJAya cakAra ca tataH svaram
3042014c sadRzaM rAghavasyaiva hA sIte lakSmaNeti ca
3042015a tena marmaNi nirviddhaH zareNAnupamena hi
3042015c mRgarUpaM tu tat tyaktvA rAkSasaM rUpam AtmanaH
3042015e cakre sa sumahAkAyo mArIco jIvitaM tyajan
3042016a tato vicitrakeyUraH sarvAbharaNabhUSitaH
3042016c hemamAlI mahAdaMSTro rAkSaso 'bhUc charAhataH
3042017a taM dRSTvA patitaM bhUmau rAkSasaM ghoradarzanam
3042017c jagAma manasA sItAM lakSmaNasya vacaH smaran
3042018a hA sIte lakSmaNety evam Akruzya tu mahAsvaram
3042018c mamAra rAkSasaH so 'yaM zrutvA sItA kathaM bhavet
3042019a lakSmaNaz ca mahAbAhuH kAm avasthAM gamiSyati
3042019c iti saMcintya dharmAtmA rAmo hRSTatanUruhaH
3042020a tatra rAmaM bhayaM tIvram Aviveza viSAdajam
3042020c rAkSasaM mRgarUpaM taM hatvA zrutvA ca tat svaram
3042021a nihatya pRSataM cAnyaM mAMsam AdAya rAghavaH
3042021c tvaramANo janasthAnaM sasArAbhimukhas tadA
3043001a ArtasvaraM tu taM bhartur vijJAya sadRzaM vane
3043001c uvAca lakSmaNaM sItA gaccha jAnIhi rAghavam
3043002a na hi me jIvitaM sthAne hRdayaM vAvatiSThate
3043002c krozataH paramArtasya zrutaH zabdo mayA bhRzam
3043003a AkrandamAnaM tu vane bhrAtaraM trAtum arhasi
3043003c taM kSipram abhidhAva tvaM bhrAtaraM zaraNaiSiNam
3043004a rakSasAM vazam ApannaM siMhAnAm iva govRSam
3043004c na jagAma tathoktas tu bhrAtur AjJAya zAsanam
3043005a tam uvAca tatas tatra kupitA janakAtmajA
3043005c saumitre mitrarUpeNa bhrAtus tvam asi zatruvat
3043006a yas tvam asyAm avasthAyAM bhrAtaraM nAbhipadyase
3043006c icchasi tvaM vinazyantaM rAmaM lakSmaNa matkRte
3043007a vyasanaM te priyaM manye sneho bhrAtari nAsti te
3043007c tena tiSThasi visrabdhas tam apazyan mahAdyutim
3043008a kiM hi saMzayam Apanne tasminn iha mayA bhavet
3043008c kartavyam iha tiSThantyA yat pradhAnas tvam AgataH
3043009a iti bruvANaM vaidehIM bASpazokapariplutAm
3043009c abravIl lakSmaNas trastAM sItAM mRgavadhUm iva
3043010a devi devamanuSyeSu gandharveSu patatriSu
3043010c rAkSaseSu pizAceSu kiMnareSu mRgeSu ca
3043011a dAnaveSu ca ghoreSu na sa vidyeta zobhane
3043011c yo rAmaM pratiyudhyeta samare vAsavopamam
3043012a avadhyaH samare rAmo naivaM tvaM vaktum arhasi
3043012c na tvAm asmin vane hAtum utsahe rAghavaM vinA
3043013a anivAryaM balaM tasya balair balavatAm api
3043013c tribhir lokaiH samudyuktaiH sezvaraiH sAmarair api
3043014a hRdayaM nirvRtaM te 'stu saMtApas tyajyatAm ayam
3043014c AgamiSyati te bhartA zIghraM hatvA mRgottamam
3043015a na sa tasya svaro vyaktaM na kaz cid api daivataH
3043015c gandharvanagaraprakhyA mAyA sA tasya rakSasaH
3043016a nyAsabhUtAsi vaidehi nyastA mayi mahAtmanA
3043016c rAmeNa tvaM varArohe na tvAM tyaktum ihotsahe
3043017a kRtavairAz ca kalyANi vayam etair nizAcaraiH
3043017c kharasya nidhane devi janasthAnavadhaM prati
3043018a rAkSasA vidhinA vAco visRjanti mahAvane
3043018c hiMsAvihArA vaidehi na cintayitum arhasi
3043019a lakSmaNenaivam uktA tu kruddhA saMraktalocanA
3043019c abravIt paruSaM vAkyaM lakSmaNaM satyavAdinam
3043020a anArya karuNArambha nRzaMsa kulapAMsana
3043020c ahaM tava priyaM manye tenaitAni prabhASase
3043021a naitac citraM sapatneSu pApaM lakSmaNa yad bhavet
3043021c tvadvidheSu nRzaMseSu nityaM pracchannacAriSu
3043022a suduSTas tvaM vane rAmam ekam eko 'nugacchasi
3043022c mama hetoH praticchannaH prayukto bharatena vA
3043023a katham indIvarazyAmaM rAmaM padmanibhekSaNam
3043023c upasaMzritya bhartAraM kAmayeyaM pRthag janam
3043024a samakSaM tava saumitre prANAMs tyakSye na saMzayaH
3043024c rAmaM vinA kSaNam api na hi jIvAmi bhUtale
3043025a ity uktaH paruSaM vAkyaM sItayA somaharSaNam
3043025c abravIl lakSmaNaH sItAM prAJjalir vijitendriyaH
3043026a uttaraM notsahe vaktuM daivataM bhavatI mama
3043026c vAkyam apratirUpaM tu na citraM strISu maithili
3043027a svabhAvas tv eSa nArINAm eSu lokeSu dRzyate
3043027c vimuktadharmAz capalAs tIkSNA bhedakarAH striyaH
3043028a upazRNvantu me sarve sAkSibhUtA vanecarAH
3043028c nyAyavAdI yathA vAkyam ukto 'haM paruSaM tvayA
3043029a dhik tvAm adya praNazya tvaM yan mAm evaM vizaGkase
3043029c strItvAd duSTasvabhAvena guruvAkye vyavasthitam
3043030a gamiSye yatra kAkutsthaH svasti te 'stu varAnane
3043030c rakSantu tvAM vizAlAkSi samagrA vanadevatAH
3043031a nimittAni hi ghorANi yAni prAdurbhavanti me
3043031c api tvAM saha rAmeNa pazyeyaM punar AgataH
3043032a lakSmaNenaivam uktA tu rudatI janakAtmajA
3043032c pratyuvAca tato vAkyaM tIvraM bASpapariplutA
3043033a godAvarIM pravekSyAmi vinA rAmeNa lakSmaNa
3043033c AbandhiSye 'tha vA tyakSye viSame deham AtmanaH
3043034a pibAmi vA viSaM tIkSNaM pravekSyAmi hutAzanam
3043034c na tv ahaM rAghavAd anyaM padApi puruSaM spRze
3043035a iti lakSmaNam Akruzya sItA duHkhasamanvitA
3043035c pANibhyAM rudatI duHkhAd udaraM prajaghAna ha
3043036a tAm ArtarUpAM vimanA rudantIM; saumitrir Alokya vizAlanetrAm
3043036c AzvAsayAm Asa na caiva bhartus; taM bhrAtaraM kiM cid uvAca sItA
3043037a tatas tu sItAm abhivAdya lakSmaNaH; kRtAJjaliH kiM cid abhipraNamya
3043037c avekSamANo bahuzaz ca maithilIM; jagAma rAmasya samIpam AtmavAn
3044001a tayA paruSam uktas tu kupito rAghavAnujaH
3044001c sa vikAGkSan bhRzaM rAmaM pratasthe nacirAd iva
3044002a tadAsAdya dazagrIvaH kSipram antaram AsthitaH
3044002c abhicakrAma vaidehIM parivrAjakarUpadhRk
3044003a zlakSNakASAyasaMvItaH zikhI chatrI upAnahI
3044003c vAme cAMse 'vasajyAtha zubhe yaSTikamaNDalU
3044003e parivrAjakarUpeNa vaidehIM samupAgamat
3044004a tAm AsasAdAtibalo bhrAtRbhyAM rahitAM vane
3044004c rahitAM sUryacandrAbhyAM saMdhyAm iva mahattamaH
3044005a tAm apazyat tato bAlAM rAjaputrIM yazasvinIm
3044005c rohiNIM zazinA hInAM grahavad bhRzadAruNaH
3044006a tam ugraM pApakarmANaM janasthAnaruhA drumAH
3044006c samIkSya na prakampante na pravAti ca mArutaH
3044007a zIghrasrotAz ca taM dRSTvA vIkSantaM raktalocanam
3044007c stimitaM gantum Arebhe bhayAd godAvarI nadI
3044008a rAmasya tv antaraM prepsur dazagrIvas tadantare
3044008c upatasthe ca vaidehIM bhikSurUpeNa rAvaNaH
3044009a abhavyo bhavyarUpeNa bhartAram anuzocatIm
3044009c abhyavartata vaidehIM citrAm iva zanaizcaraH
3044010a sa pApo bhavyarUpeNa tRNaiH kUpa ivAvRtaH
3044010c atiSThat prekSya vaidehIM rAmapatnIM yazasvinIm
3044011a zubhAM ruciradantauSThIM pUrNacandranibhAnanAm
3044011c AsInAM parNazAlAyAM bASpazokAbhipIDitAm
3044012a sa tAM padmapalAzAkSIM pItakauzeyavAsinIm
3044012c abhyagacchata vaidehIM duSTacetA nizAcaraH
3044013a sa manmathazarAviSTo brahmaghoSam udIrayan
3044013c abravIt prazritaM vAkyaM rahite rAkSasAdhipaH
3044014a tAm uttamAM trilokAnAM padmahInAm iva zriyam
3044014c vibhrAjamAnAM vapuSA rAvaNaH prazazaMsa ha
3044015a kA tvaM kAJcanavarNAbhe pItakauzeyavAsini
3044015c kamalAnAM zubhAM mAlAM padminIva ca bibhratI
3044016a hrIH zrIH kIrtiH zubhA lakSmIr apsarA vA zubhAnane
3044016c bhUtir vA tvaM varArohe ratir vA svairacAriNI
3044017a samAH zikhariNaH snigdhAH pANDurA dazanAs tava
3044017c vizAle vimale netre raktAnte kRSNatArake
3044018a vizAlaM jaghanaM pInam UrU karikaropamau
3044018c etAv upacitau vRttau sahitau saMpragalbhitau
3044019a pInonnatamukhau kAntau snigdhatAlaphalopamau
3044019c maNipravekAbharaNau rucirau te payodharau
3044020a cArusmite cArudati cArunetre vilAsini
3044020c mano harasi me rAme nadIkUlam ivAmbhasA
3044021a karAntamitamadhyAsi sukezI saMhatastanI
3044021c naiva devI na gandharvI na yakSI na ca kiMnarI
3044022a naivaMrUpA mayA nArI dRSTapUrvA mahItale
3044022c iha vAsaz ca kAntAre cittam unmAthayanti me
3044023a sA pratikrAma bhadraM te na tvaM vastum ihArhasi
3044023c rAkSasAnAm ayaM vAso ghorANAM kAmarUpiNAm
3044024a prAsAdAgryANi ramyANi nagaropavanAni ca
3044024c saMpannAni sugandhIni yuktAny AcarituM tvayA
3044025a varaM mAlyaM varaM pAnaM varaM vastraM ca zobhane
3044025c bhartAraM ca varaM manye tvadyuktam asitekSaNe
3044026a kA tvaM bhavasi rudrANAM marutAM vA zucismite
3044026c vasUnAM vA varArohe devatA pratibhAsi me
3044027a neha gacchantI gandharvA na devA na ca kiMnarAH
3044027c rAkSasAnAm ayaM vAsaH kathaM nu tvam ihAgatA
3044028a iha zAkhAmRgAH siMhA dvIpivyAghramRgAs tathA
3044028c RkSAs tarakSavaH kaGkAH kathaM tebhyo na bibhyase
3044029a madAnvitAnAM ghorANAM kuJjarANAM tarasvinAm
3044029c katham ekA mahAraNye na bibheSi vanAnane
3044030a kAsi kasya kutaz ca tvaM kiMnimittaM ca daNDakAn
3044030c ekA carasi kalyANi ghorAn rAkSasasevitAn
3044031a iti prazastA vaidehI rAvaNena durAtmanA
3044031c dvijAtiveSeNa hi taM dRSTvA rAvaNam Agatam
3044031e sarvair atithisatkAraiH pUjayAm Asa maithilI
3044032a upAnIyAsanaM pUrvaM pAdyenAbhinimantrya ca
3044032c abravIt siddham ity eva tadA taM saumyadarzanam
3044033a dvijAtiveSeNa samIkSya maithilI; tam AgataM pAtrakusumbhadhAriNam
3044033c azakyam uddveSTum upAyadarzanAn; nyamantrayad brAhmaNavad yathAgatam
3044034a iyaM bRsI brAhmaNa kAmam AsyatAm; idaM ca pAdyaM pratigRhyatAm iti
3044034c idaM ca siddhaM vanajAtam uttamaM; tvadartham avyagram ihopabhujyatAm
3044035a nimantryamANaH pratipUrNabhASiNIM; narendrapatnIM prasamIkSya maithilIm
3044035c prahasya tasyA haraNe dhRtaM manaH; samarpayAm Asa vadhAya rAvaNaH
3044036a tataH suveSaM mRgayA gataM patiM; pratIkSamANA sahalakSmaNaM tadA
3044036c nirIkSamANA haritaM dadarza tan; mahad vanaM naiva tu rAmalakSmaNau
3045001a rAvaNena tu vaidehI tadA pRSTA jihIrSuNA
3045001c parivrAjakarUpeNa zazaMsAtmAnam AtmanA
3045002a brAhmaNaz cAtithiz caiSa anukto hi zapeta mAm
3045002c iti dhyAtvA muhUrtaM tu sItA vacanam abravIt
3045003a duhitA janakasyAhaM maithilasya mahAtmanaH
3045003c sItA nAmnAsmi bhadraM te rAmabhAryA dvijottama
3045004a saMvatsaraM cAdhyuSitA rAghavasya nivezane
3045004c bhuJjAnA mAnuSAn bhogAn sarvakAmasamRddhinI
3045005a tataH saMvatsarAd UrdhvaM samamanyata me patim
3045005c abhiSecayituM rAmaM sameto rAjamantribhiH
3045006a tasmin saMbhriyamANe tu rAghavasyAbhiSecane
3045006c kaikeyI nAma bhartAraM mamAryA yAcate varam
3045007a pratigRhya tu kaikeyI zvazuraM sukRtena me
3045007c mama pravrAjanaM bhartur bharatasyAbhiSecanam
3045007e dvAv ayAcata bhartAraM satyasaMdhaM nRpottamam
3045008a nAdya bhokSye na ca svapsye na pAsye 'haM kadA cana
3045008c eSa me jIvitasyAnto rAmo yady abhiSicyate
3045009a iti bruvANAM kaikeyIM zvazuro me sa mAnadaH
3045009c ayAcatArthair anvarthair na ca yAcJAM cakAra sA
3045010a mama bhartA mahAtejA vayasA paJcaviMzakaH
3045010c rAmeti prathito loke guNavAn satyavAk zuciH
3045010e vizAlAkSo mahAbAhuH sarvabhUtahite rataH
3045011a abhiSekAya tu pituH samIpaM rAmam Agatam
3045011c kaikeyI mama bhartAram ity uvAca drutaM vacaH
3045012a tava pitrA samAjJaptaM mamedaM zRNu rAghava
3045012c bharatAya pradAtavyam idaM rAjyam akaNTakam
3045013a tvayA tu khalu vastavyaM nava varSANi paJca ca
3045013c vane pravraja kAkutstha pitaraM mocayAnRtAt
3045014a tathety uvAca tAM rAmaH kaikeyIm akutobhayaH
3045014c cakAra tad vacas tasyA mama bhartA dRDhavrataH
3045015a dadyAn na pratigRhNIyAt satyabrUyAn na cAnRtam
3045015c etad brAhmaNa rAmasya vrataM dhruvam anuttamam
3045016a tasya bhrAtA tu vaimAtro lakSmaNo nAma vIryavAn
3045016c rAmasya puruSavyAghraH sahAyaH samare 'rihA
3045017a sa bhrAtA lakSmaNo nAma dharmacArI dRDhavrataH
3045017c anvagacchad dhanuSpANiH pravrajantaM mayA saha
3045018a te vayaM pracyutA rAjyAt kaileyyAs tu kRte trayaH
3045018c vicarAma dvijazreSTha vanaM gambhIram ojasA
3045019a samAzvasa muhUrtaM tu zakyaM vastum iha tvayA
3045019c AgamiSyati me bhartA vanyam AdAya puSkalam
3045020a sa tvaM nAma ca gotraM ca kulam AcakSva tattvataH
3045020c ekaz ca daNDakAraNye kimarthaM carasi dvija
3045021a evaM bruvatyAM sItAyAM rAmapatnyAM mahAbalaH
3045021c pratyuvAcottaraM tIvraM rAvaNo rAkSasAdhipaH
3045022a yena vitrAsitA lokAH sadevAsurapannagAH
3045022c ahaM sa rAvaNo nAma sIte rakSogaNezvaraH
3045023a tvAM tu kAJcanavarNAbhAM dRSTvA kauzeyavAsinIm
3045023c ratiM svakeSu dAreSu nAdhigacchAmy anindite
3045024a bahvInAm uttamastrINAm AhRtAnAm itas tataH
3045024c sarvAsAm eva bhadraM te mamAgramahiSI bhava
3045025a laGkA nAma samudrasya madhye mama mahApurI
3045025c sAgareNa parikSiptA niviSTA girimUrdhani
3045026a tatra sIte mayA sArdhaM vaneSu vicariSyasi
3045026c na cAsyAraNyavAsasya spRhayiSyasi bhAmini
3045027a paJcadAsyaH sahasrANi sarvAbharaNabhUSitAH
3045027c sIte paricariSyanti bhAryA bhavasi me yadi
3045028a rAvaNenaivam uktA tu kupitA janakAtmajA
3045028c pratyuvAcAnavadyAGgI tam anAdRtya rAkSasaM
3045029a mahAgirim ivAkampyaM mahendrasadRzaM patim
3045029c mahodadhim ivAkSobhyam ahaM rAmam anuvratA
3045030a mahAbAhuM mahoraskaM siMhavikrAntagAminam
3045030c nRsiMhaM siMhasaMkAzam ahaM rAmam anuvratA
3045031a pUrNacandrAnanaM vIraM rAjavatsaM jitendriyam
3045031c pRthukIrtiM mahAbAhum ahaM rAmam anuvratA
3045032a tvaM punar jambukaH siMhIM mAm ihecchasi durlabhAm
3045032c nAhaM zakyA tvayA spraSTum Adityasya prabhA yathA
3045033a pAdapAn kAJcanAn nUnaM bahUn pazyasi mandabhAk
3045033c rAghavasya priyAM bhAryAM yas tvam icchasi rAvaNa
3045034a kSudhitasya ca siMhasya mRgazatros tarasvinaH
3045034c AzIviSasya vadanAd daMSTrAm AdAtum icchasi
3045035a mandaraM parvatazreSThaM pANinA hartum icchasi
3045035c kAlakUTaM viSaM pItvA svastimAn gantum icchasi
3045036a akSisUcyA pramRjasi jihvayA leDhi ca kSuram
3045036c rAghavasya priyAM bhAryAm adhigantuM tvam icchasi
3045037a avasajya zilAM kaNThe samudraM tartum icchasi
3045037c sUryA candramasau cobhau prANibhyAM hartum icchasi
3045037e yo rAmasya priyAM bhAryAM pradharSayitum icchasi
3045038a agniM prajvalitaM dRSTvA vastreNAhartum icchasi
3045038c kalyANa vRttAM rAmasya yo bhAryAM hartum icchasi
3045039a ayomukhAnAM zUlAnAm agre caritum icchasi
3045039c rAmasya sadRzIM bhAryAM yo 'dhigantuM tvam icchasi
3045040a yad antaraM siMhazRgAlayor vane; yad antaraM syandanikAsamudrayoH
3045040c surAgryasauvIrakayor yad antaraM; tad antaraM dAzarathes tavaiva ca
3045041a yad antaraM kAJcanasIsalohayor; yad antaraM candanavAripaGkayoH
3045041c yad antaraM hastibiDAlayor vane; tad antaraM dazarathes tavaiva ca
3045042a yad antaraM vAyasavainateyayor; yad antaraM madgumayUrayor api
3045042c yad antaraM sArasagRdhrayor vane; tad antaraM dAzarathes tavaiva ca
3045043a tasmin sahasrAkSasamaprabhAve; rAme sthite kArmukabANapANau
3045043c hRtApi te 'haM na jarAM gamiSye; vajraM yathA makSikayAvagIrNam
3045044a itIva tad vAkyam aduSTabhAvA; sudRSTam uktvA rajanIcaraM tam
3045044c gAtraprakampAd vyathitA babhUva; vAtoddhatA sA kadalIva tanvI
3045045a tAM vepamAnAm upalakSya sItAM; sa rAvaNo mRtyusamaprabhAvaH
3045045c kulaM balaM nAma ca karma cAtmanaH; samAcacakSe bhayakAraNArtham
3046001a evaM bruvatyAM sItAyAM saMrabdhaH paruSAkSaram
3046001c lalATe bhrukuTIM kRtvA rAvaNaH pratyuvAca ha
3046002a bhrAtA vaizravaNasyAhaM sApatnyo varavarNini
3046002c rAvaNo nAma bhadraM te dazagrIvaH pratApavAn
3046003a yasya devAH sagandharvAH pizAcapatagoragAH
3046003c vidravanti bhayAd bhItA mRtyor iva sadA prajAH
3046004a yena vaizravaNo bhrAtA vaimAtraH kAraNAntare
3046004c dvandvam AsAditaH krodhAd raNe vikramya nirjitaH
3046005a madbhayArtaH parityajya svam adhiSThAnam Rddhimat
3046005c kailAsaM parvatazreSTham adhyAste naravAhanaH
3046006a yasya tat puSpakaM nAma vimAnaM kAmagaM zubham
3046006c vIryAd AvarjitaM bhadre yena yAmi vihAyasaM
3046007a mama saMjAtaroSasya mukhaM dRSTvaiva maithili
3046007c vidravanti paritrastAH surAH zakrapurogamAH
3046008a yatra tiSThAmy ahaM tatra mAruto vAti zaGkitaH
3046008c tIvrAMzuH zizirAMzuz ca bhayAt saMpadyate raviH
3046009a niSkampapatrAs taravo nadyaz ca stimitodakAH
3046009c bhavanti yatra yatrAhaM tiSThAmi ca carAmi ca
3046010a mama pAre samudrasya laGkA nAma purI zubhA
3046010c saMpUrNA rAkSasair ghorair yathendrasyAmarAvatI
3046011a prAkAreNa parikSiptA pANDureNa virAjitA
3046011c hemakakSyA purI ramyA vaidUryamaya toraNA
3046012a hastyazvarathasaMbhAdhA tUryanAdavinAditA
3046012c sarvakAmaphalair vRkSaiH saMkulodyAnazobhitA
3046013a tatra tvaM vasatI sIte rAjaputri mayA saha
3046013c na sramiSyasi nArINAM mAnuSINAM manasvini
3046014a bhuJjAnA mAnuSAn bhogAn divyAMz ca varavarNini
3046014c na smariSyasi rAmasya mAnuSasya gatAyuSaH
3046015a sthApayitvA priyaM putraM rAjJA dazarathena yaH
3046015c mandavIryaH suto jyeSThas tataH prasthApito vanam
3046016a tena kiM bhraSTarAjyena rAmeNa gatacetasA
3046016c kariSyasi vizAlAkSi tApasena tapasvinA
3046017a sarvarAkSasabhartAraM kAmAt svayam ihAgatam
3046017c na manmathazarAviSTaM pratyAkhyAtuM tvam arhasi
3046018a pratyAkhyAya hi mAM bhIru paritApaM gamiSyasi
3046018c caraNenAbhihatyeva purUravasam urvazI
3046019a evam uktA tu vaidehI kruddhA saMraktalocanA
3046019c abravIt paruSaM vAkyaM rahite rAkSasAdhipam
3046020a kathaM vaizravaNaM devaM sarvabhUtanamaskRtam
3046020c bhrAtaraM vyapadizya tvam azubhaM kartum icchasi
3046021a avazyaM vinaziSyanti sarve rAvaNa rAkSasAH
3046021c yeSAM tvaM karkazo rAjA durbuddhir ajitendriyaH
3046022a apahRtya zacIM bhAryAM zakyam indrasya jIvitum
3046022c na tu rAmasya bhAryAM mAm apanIyAsti jIvitam
3046023a jIvec ciraM vajradharasya hastAc; chacIM pradhRSyApratirUparUpAm
3046023c na mAdRzIM rAkSasadharSayitvA; pItAmRtasyApi tavAsti mokSaH
3047001a sItAyA vacanaM zrutvA dazagrIvaH pratApavAn
3047001c haste hastaM samAhatya cakAra sumahad vapuH
3047002a sa maithilIM punar vAkyaM babhASe ca tato bhRzam
3047002c nonmattayA zrutau manye mama vIryaparAkramau
3047003a udvaheyaM bhujAbhyAM tu medinIm ambare sthitaH
3047003c ApibeyaM samudraM ca mRtyuM hanyAM raNe sthitaH
3047004a arkaM rundhyAM zarais tIkSNair vibhindyAM hi mahItalam
3047004c kAmarUpiNam unmatte pazya mAM kAmadaM patim
3047005a evam uktavatas tasya rAvaNasya zikhiprabhe
3047005c kruddhasya hariparyante rakte netre babhUvatuH
3047006a sadyaH saumyaM parityajya bhikSurUpaM sa rAvaNaH
3047006c svaM rUpaM kAlarUpAbhaM bheje vaizravaNAnujaH
3047007a saMraktanayanaH zrImAMs taptakAJcanakuNDalaH
3047007c dazAsyaH kArmukI bANI babhUva kSaNadAcaraH
3047008a sa parivrAjakacchadma mahAkAyo vihAya tat
3047008c pratipede svakaM rUpaM rAvaNo rAkSasAdhipaH
3047009a saMraktanayanaH krodhAj jImUtanicayaprabhaH
3047009c raktAmbaradharas tasthau strIratnaM prekSya maithilIm
3047010a sa tAm asitakezAntAM bhAskarasya prabhAm iva
3047010c vasanAbharaNopetAM maithilIM rAvaNo 'bravIt
3047011a triSu lokeSu vikhyAtaM yadi bhartAram icchasi
3047011c mAm Azraya varArohe tavAhaM sadRzaH patiH
3047012a mAM bhajasva cirAya tvam ahaM zlAghyas tava priyaH
3047012c naiva cAhaM kva cid bhadre kariSye tava vipriyam
3047012e tyajyatAM mAnuSo bhAvo mayi bhAvaH praNIyatAm
3047013a rAjyAc cyutam asiddhArthaM rAmaM parimitAyuSam
3047013c kair guNair anuraktAsi mUDhe paNDitamAnini
3047014a yaH striyA vacanAd rAjyaM vihAya sasuhRjjanam
3047014c asmin vyAlAnucarite vane vasati durmatiH
3047015a ity uktvA maithilIM vAkyaM priyArhAM priyavAdinIm
3047015c jagrAha rAvaNaH sItAM budhaH khe rohiNIm iva
3047016a vAmena sItAM padmAkSIM mUrdhajeSu kareNa saH
3047016c Urvos tu dakSiNenaiva parijagrAha pANinA
3047017a taM dRSTvA girizRGgAbhaM tIkSNadaMSTraM mahAbhujam
3047017c prAdravan mRtyusaMkAzaM bhayArtA vanadevatAH
3047018a sa ca mAyAmayo divyaH kharayuktaH kharasvanaH
3047018c pratyadRzyata hemAGgo rAvaNasya mahArathaH
3047019a tatas tAM paruSair vAkyair abhitarjya mahAsvanaH
3047019c aGkenAdAya vaidehIM ratham Aropayat tadA
3047020a sA gRhItAticukroza rAvaNena yazasvinI
3047020c rAmeti sItA duHkhArtA rAmaM dUragataM vane
3047021a tAm akAmAM sa kAmArtaH pannagendravadhUm iva
3047021c viveSTamAnAm AdAya utpapAthAtha rAvaNaH
3047022a tataH sA rAkSasendreNa hriyamANA vihAyasA
3047022c bhRzaM cukroza matteva bhrAntacittA yathAturA
3047023a hA lakSmaNa mahAbAho gurucittaprasAdaka
3047023c hriyamANAM na jAnISe rakSasA kAmarUpiNA
3047024a jIvitaM sukham arthAMz ca dharmahetoH parityajan
3047024c hriyamANAm adharmeNa mAM rAghava na pazyasi
3047025a nanu nAmAvinItAnAM vinetAsi paraMtapa
3047025c katham evaMvidhaM pApaM na tvaM zAdhi hi rAvaNam
3047026a nanu sadyo 'vinItasya dRzyate karmaNaH phalam
3047026c kAlo 'py aGgI bhavaty atra sasyAnAm iva paktaye
3047027a sa karma kRtavAn etat kAlopahatacetanaH
3047027c jIvitAntakaraM ghoraM rAmAd vyasanam Apnuhi
3047028a hantedAnIM sakAmA tu kaikeyI bAndhavaiH saha
3047028c hriyeyaM dharmakAmasya dharmapatnI yazasvinaH
3047029a Amantraye janasthAnaM karNikArAMz ca puSpitAn
3047029c kSipraM rAmAya zaMsadhvaM sItAM harati rAvaNaH
3047030a mAlyavantaM zikhariNaM vande prasravaNaM girim
3047030c kSipraM rAmAya zaMsadhvaM sItAM harati rAvaNaH
3047031a haMsasArasasaMghuSTAM vande godAvarIM nadIm
3047031c kSipraM rAmAya zaMsadhvaM sItAM harati rAvaNaH
3047032a daivatAni ca yAnty asmin vane vividhapAdape
3047032c namaskaromy ahaM tebhyo bhartuH zaMsata mAM hRtAm
3047033a yAni kAni cid apy atra sattvAni nivasanty uta
3047033c sarvANi zaraNaM yAmi mRgapakSigaNAn api
3047034a hriyamANAM priyAM bhartuH prANebhyo 'pi garIyasIm
3047034c vivazApahRtA sItA rAvaNeneti zaMsata
3047035a viditvA mAM mahAbAhur amutrApi mahAbalaH
3047035c AneSyati parAkramya vaivasvatahRtAm api
3047036a rAmAya tu yathAtattvaM jaTAyo haraNaM mama
3047036c lakSmaNAya ca tat sarvam AkhyAtavyam azeSataH
3048001a taM zabdam avasuptasya jaTAyur atha zuzruve
3048001c niraikSad rAvaNaM kSipraM vaidehIM ca dadarza saH
3048002a tataH parvatakUTAbhas tIkSNatuNDaH khagottamaH
3048002c vanaspatigataH zrImAn vyAjahAra zubhAM giram
3048003a dazagrIvasthito dharme purANe satyasaMzrayaH
3048003c jaTAyur nAma nAmnAhaM gRdhrarAjo mahAbalaH
3048004a rAjA sarvasya lokasya mahendravaruNopamaH
3048004c lokAnAM ca hite yukto rAmo dazarathAtmajaH
3048005a tasyaiSA lokanAthasya dharmapatnI yazasvinI
3048005c sItA nAma varArohA yAM tvaM hartum ihecchasi
3048006a kathaM rAjA sthito dharme paradArAn parAmRzet
3048006c rakSaNIyA vizeSeNa rAjadArA mahAbalaH
3048006e nivartaya matiM nIcAM paradArAbhimarzanam
3048007a na tat samAcared dhIro yat paro 'sya vigarhayet
3048007c yathAtmanas tathAnyeSAM dArA rakSyA vimarzanAt
3048008a arthaM vA yadi vA kAmaM ziSTAH zAstreSv anAgatam
3048008c vyavasyanty anu rAjAnaM dharmaM paurastyanandana
3048009a rAjA dharmaz ca kAmaz ca dravyANAM cottamo nidhiH
3048009c dharmaH zubhaM vA pApaM vA rAjamUlaM pravartate
3048010a pApasvabhAvaz capalaH kathaM tvaM rakSasAM vara
3048010c aizvaryam abhisaMprApto vimAnam iva duSkRtI
3048011a kAmasvabhAvo yo yasya na sa zakyaH pramArjitum
3048011c na hi duSTAtmanAm Arya mA vasaty Alaye ciram
3048012a viSaye vA pure vA te yadA rAmo mahAbalaH
3048012c nAparAdhyati dharmAtmA kathaM tasyAparAdhyasi
3048013a yadi zUrpaNakhAhetor janasthAnagataH kharaH
3048013c ativRtto hataH pUrvaM rAmeNAkliSTakarmaNA
3048014a atra brUhi yathAsatyaM ko rAmasya vyatikramaH
3048014c yasya tvaM lokanAthasya hRtvA bhAryAM gamiSyasi
3048015a kSipraM visRja vaidehIM mA tvA ghoreNa cakSuSA
3048015c dahed dahana bhUtena vRtram indrAzanir yathA
3048016a sarpam AzIviSaM baddhvA vastrAnte nAvabudhyase
3048016c grIvAyAM pratimuktaM ca kAlapAzaM na pazyasi
3048017a sa bhAraH saumya bhartavyo yo naraM nAvasAdayet
3048017c tad annam upabhoktavyaM jIryate yad anAmayam
3048018a yat kRtvA na bhaved dharmo na kIrtir na yazo bhuvi
3048018c zarIrasya bhavet khedaH kas tat karma samAcaret
3048019a SaSTivarSasahasrANi mama jAtasya rAvaNa
3048019c pitRpaitAmahaM rAjyaM yathAvad anutiSThataH
3048020a vRddho 'haM tvaM yuvA dhanvI sarathaH kavacI zarI
3048020c tathApy AdAya vaidehIM kuzalI na gamiSyasi
3048021a na zaktas tvaM balAd dhartuM vaidehIM mama pazyataH
3048021c hetubhir nyAyasaMyuktair dhruvAM vedazrutIm iva
3048022a yudhyasva yadi zUro 'si muhUrtaM tiSTha rAvaNa
3048022c zayiSyase hato bhUmau yathApUrvaM kharas tathA
3048023a asakRt saMyuge yena nihatA daityadAnavAH
3048023c nacirAc cIravAsAs tvAM rAmo yudhi vadhiSyati
3048024a kiM nu zakyaM mayA kartuM gatau dUraM nRpAtmajau
3048024c kSipraM tvaM nazyase nIca tayor bhIto na saMzayaH
3048025a na hi me jIvamAnasya nayiSyasi zubhAm imAm
3048025c sItAM kamalapatrAkSIM rAmasya mahaSIM priyAm
3048026a avazyaM tu mayA kAryaM priyaM tasya mahAtmanaH
3048026c jIvitenApi rAmasya tathA dazarathasya ca
3048027a tiSTha tiSTha dazagrIva muhUrtaM pazya rAvaNa
3048027c yuddhAtithyaM pradAsyAmi yathAprANaM nizAcara
3048027e vRntAd iva phalaM tvAM tu pAtayeyaM rathottamAt
3049001a ity uktasya yathAnyAyaM rAvaNasya jaTAyuSA
3049001c kruddhasyAgninibhAH sarvA rejur viMzatidRSTayaH
3049002a saMraktanayanaH kopAt taptakAJcanakuNDalaH
3049002c rAkSasendro 'bhidudrAva patagendram amarSaNaH
3049003a sa saMprahAras tumulas tayos tasmin mahAvane
3049003c babhUva vAtoddhatayor meghayor gagane yathA
3049004a tad babhUvAdbhutaM yuddhaM gRdhrarAkSasayos tadA
3049004c sapakSayor mAlyavator mahAparvatayor iva
3049005a tato nAlIkanArAcais tIkSNAgraiz ca vikarNibhiH
3049005c abhyavarSan mahAghorair gRdhrarAjaM mahAbalaH
3049006a sa tAni zarajAlAni gRdhraH patrarathezvaraH
3049006c jaTAyuH pratijagrAha rAvaNAstrANi saMyuge
3049007a tasya tIkSNanakhAbhyAM tu caraNAbhyAM mahAbalaH
3049007c cakAra bahudhA gAtre vraNAn patagasattamaH
3049008a atha krodhAd dazagrIvo jagrAha dazamArgaNAn
3049008c mRtyudaNDanibhAn ghorAJ zatrumardanakAGkSayA
3049009a sa tair bANair mahAvIryaH pUrNamuktair ajihmagaiH
3049009c bibheda nizitais tIkSNair gRdhraM ghoraiH zilImukhaiH
3049010a sa rAkSasarathe pazyaJ jAnakIM bASpalocanAm
3049010c acintayitvA bANAMs tAn rAkSasaM samabhidravat
3049011a tato 'sya sazaraM cApaM muktAmaNivibhUSitam
3049011c caraNAbhyAM mahAtejA babhaJja patagezvaraH
3049012a tac cAgnisadRzaM dIptaM rAvaNasya zarAvaram
3049012c pakSAbhyAM ca mahAtejA vyadhunot patagezvaraH
3049013a kAJcanorazchadAn divyAn pizAcavadanAn kharAn
3049013c tAMz cAsya javasaMpannAJ jaghAna samare balI
3049014a varaM triveNusaMpannaM kAmagaM pAvakArciSam
3049014c maNihemavicitrAGgaM babhaJja ca mahAratham
3049014e pUrNacandrapratIkAzaM chatraM ca vyajanaiH saha
3049015a sa bhagnadhanvA viratho hatAzvo hatasArathiH
3049015c aGkenAdAya vaidehIM papAta bhuvi rAvaNaH
3049016a dRSTvA nipatitaM bhUmau rAvaNaM bhagnavAhanam
3049016c sAdhu sAdhv iti bhUtAni gRdhrarAjam apUjayan
3049017a parizrAntaM tu taM dRSTvA jarayA pakSiyUthapam
3049017c utpapAta punar hRSTo maithilIM gRhya rAvaNaH
3049018a taM prahRSTaM nidhAyAGke gacchantaM janakAtmajAm
3049018c gRdhrarAjaH samutpatya jaTAyur idam abravIt
3049019a vajrasaMsparzabANasya bhAryAM rAmasya rAvaNa
3049019c alpabuddhe harasy enAM vadhAya khalu rakSasAm
3049020a samitrabandhuH sAmAtyaH sabalaH saparicchadaH
3049020c viSapAnaM pibasy etat pipAsita ivodakam
3049021a anubandham ajAnantaH karmaNAm avicakSaNAH
3049021c zIghram eva vinazyanti yathA tvaM vinaziSyasi
3049022a baddhas tvaM kAlapAzena kva gatas tasya mokSyase
3049022c vadhAya baDizaM gRhya sAmiSaM jalajo yathA
3049023a na hi jAtu durAdharSau kAkutsthau tava rAvaNa
3049023c dharSaNaM cAzramasyAsya kSamiSyete tu rAghavau
3049024a yathA tvayA kRtaM karma bhIruNA lokagarhitam
3049024c taskarAcarito mArgo naiSa vIraniSevitaH
3049025a yudhyasva yadi zUro 'si muhUrtaM tiSTha rAvaNa
3049025c zayiSyase hato bhUmau yathA bhrAtA kharas tathA
3049026a paretakAle puruSo yat karma pratipadyate
3049026c vinAzAyAtmano 'dharmyaM pratipanno 'si karma tat
3049027a pApAnubandho vai yasya karmaNaH ko nu tat pumAn
3049027c kurvIta lokAdhipatiH svayambhUr bhagavAn api
3049028a evam uktvA zubhaM vAkyaM jaTAyus tasya rakSasaH
3049028c nipapAta bhRzaM pRSThe dazagrIvasya vIryavAn
3049029a taM gRhItvA nakhais tIkSNair virarAda samantataH
3049029c adhirUDho gajArohi yathA syAd duSTavAraNam
3049030a virarAda nakhair asya tuNDaM pRSThe samarpayan
3049030c kezAMz cotpATayAm Asa nakhapakSamukhAyudhaH
3049031a sa tathA gRdhrarAjena klizyamAno muhur muhuH
3049031c amarSasphuritauSThaH san prAkampata sa rAkSasaH
3049032a saMpariSvajya vaidehIM vAmenAGkena rAvaNaH
3049032c talenAbhijaghAnArto jaTAyuM krodhamUrchitaH
3049033a jaTAyus tam atikramya tuNDenAsya kharAdhipaH
3049033c vAmabAhUn daza tadA vyapAharad ariMdamaH
3049034a tataH kruddho dazakrIvaH sItAm utsRjya vIryavAn
3049034c muSTibhyAM caraNAbhyAM ca gRdhrarAjam apothayat
3049035a tato muhUrtaM saMgrAmo babhUvAtulavIryayoH
3049035c rAkSasAnAM ca mukhyasya pakSiNAM pravarasya ca
3049036a tasya vyAyacchamAnasya rAmasyArthe 'tha rAvaNaH
3049036c pakSau pAdau ca pArzvau ca khaDgam uddhRtya so 'cchinat
3049037a sa chinnapakSaH sahasA rakSasA raudrakarmaNA
3049037c nipapAta hato gRdhro dharaNyAm alpajIvitaH
3049038a taM dRSTvA patitaM bhUmau kSatajArdraM jaTAyuSam
3049038c abhyadhAvata vaidehI svabandhum iva duHkhitA
3049039a taM nIlajImUtanikAzakalpaM; supANDuroraskam udAravIryam
3049039c dadarza laGkAdhipatiH pRthivyAM; jaTAyuSaM zAntam ivAgnidAvam
3049040a tatas tu taM patrarathaM mahItale; nipAtitaM rAvaNavegamarditam
3049040c punaH pariSvajya zaziprabhAnanA; ruroda sItA janakAtmajA tadA
3050001a tam alpajIvitaM bhUmau sphurantaM rAkSasAdhipaH
3050001c dadarza gRdhraM patitaM samIpe rAghavAzramAt
3050002a sA tu tArAdhipamukhI rAvaNena samIkSya tam
3050002c gRdhrarAjaM vinihataM vilalApa suduHkhitA
3050003a nimittaM lakSaNajJAnaM zakunisvaradarzanam
3050003c avazyaM sukhaduHkheSu narANAM pratidRzyate
3050004a na nUnaM rAma jAnAsi mahad vyasanam AtmajaH
3050004c dhAvanti nUnaM kAkutstha madarthaM mRgapakSiNaH
3050005a trAhi mAm adya kAkutstha lakSmaNeti varAGganA
3050005c susaMtrastA samAkrandac chRNvatAM tu yathAntike
3050006a tAM kliSTamAlyAbharaNAM vilapantIm anAthavat
3050006c abhyadhAvata vaidehIM rAvaNo rAkSasAdhipaH
3050007a tAM latAm iva veSTantIm AliGgantIM mahAdrumAn
3050007c muJca muJceti bahuzaH pravadan rAkSasAdhipaH
3050008a krozantIM rAma rAmeti rAmeNa rahitAM vane
3050008c jIvitAntAya kezeSu jagrAhAntakasaMnibhaH
3050009a pradharSitAyAM vaidehyAM babhUva sacarAcaram
3050009c jagat sarvam amaryAdaM tamasAndhena saMvRtam
3050010a dRSTvA sItAM parAmRSTAM dInAM divyena cakSuSA
3050010c kRtaM kAryam iti zrImAn vyAjahAra pitAmahaH
3050011a prahRSTA vyathitAz cAsan sarve te paramarSayaH
3050011c dRSTvA sItAM parAmRSTAM daNDakAraNyavAsinaH
3050012a sa tu tAM rAma rAmeti rudantIM lakSmaNeti ca
3050012c jagAmAkAzam AdAya rAvaNo rAkSasAdhipaH
3050013a taptAbharaNasarvAGgI pItakauzeyavAsanI
3050013c rarAja rAjaputrI tu vidyut saudAmanI yathA
3050014a uddhUtena ca vastreNa tasyAH pItena rAvaNaH
3050014c adhikaM paribabhrAja girir dIpa ivAgninA
3050015a tasyAH paramakalyANyAs tAmrANi surabhINi ca
3050015c padmapatrANi vaidehyA abhyakIryanta rAvaNam
3050016a tasyAH kauzeyam uddhUtam AkAze kanakaprabham
3050016c babhau cAdityarAgeNa tAmram abhram ivAtape
3050017a tasyAs tad vimalaM vaktram AkAze rAvaNAGkagam
3050017c na rarAja vinA rAmaM vinAlam iva paGkajam
3050018a babhUva jaladaM nIlaM bhittvA candra ivoditaH
3050018c sulalATaM sukezAntaM padmagarbhAbham avraNam
3050018e zuklaiH suvimalair dantaiH prabhAvadbhir alaMkRtam
3050019a ruditaM vyapamRSTAstraM candravat priyadarzanam
3050019c sunAsaM cArutAmrauSTham AkASe hATakaprabham
3050020a rAkSasendrasamAdhUtaM tasyAs tad vacanaM zubham
3050020c zuzubhe na vinA rAmaM divA candra ivoditaH
3050021a sA hemavarNA nIlAGgaM maithilI rAkSasAdhipam
3050021c zuzubhe kAJcanI kAJcI nIlaM maNim ivAzritA
3050022a sA padmagaurI hemAbhA rAvaNaM janakAtmajA
3050022c vidyudghanam ivAvizya zuzubhe taptabhUSaNA
3050023a tasyA bhUSaNaghoSeNa vaidehyA rAkSasAdhipaH
3050023c babhUva vimalo nIlaH saghoSa iva toyadaH
3050024a uttamAGgacyutA tasyAH puSpavRSTiH samantataH
3050024c sItAyA hriyamANAyAH papAta dharaNItale
3050025a sA tu rAvaNavegena puSpavRSTiH samantataH
3050025c samAdhUtA dazagrIvaM punar evAbhyavartata
3050026a abhyavartata puSpANAM dhArA vaizravaNAnujam
3050026c nakSatramAlAvimalA meruM nagam ivottamam
3050027a caraNAn nUpuraM bhraSTaM vaidehyA ratnabhUSitam
3050027c vidyunmaNDalasaMkAzaM papAta madhurasvanam
3050028a tarupravAlaraktA sA nIlAGgaM rAkSasezvaram
3050028c prAzobhayata vaidehI gajaM kaSyeva kAJcanI
3050029a tAM maholkAm ivAkAze dIpyamAnAM svatejasA
3050029c jahArAkAzam Avizya sItAM vaizravaNAnujaH
3050030a tasyAs tAny agnivarNAni bhUSaNAni mahItale
3050030c saghoSANy avakIryanta kSINAs tArA ivAmbarAt
3050031a tasyAH stanAntarAd bhraSTo hAras tArAdhipadyutiH
3050031c vaidehyA nipatan bhAti gaGgeva gaganAc cyutA
3050032a utpAta vAtAbhihatA nAnAdvija gaNAyutAH
3050032c mA bhair iti vidhUtAgrA vyAjahrur iva pAdapAH
3050033a nalinyo dhvastakamalAs trastamInajale carAH
3050033c sakhIm iva gatotsAhAM zocantIva sma maithilIm
3050034a samantAd abhisaMpatya siMhavyAghramRgadvijAH
3050034c anvadhAvaMs tadA roSAt sItAcchAyAnugAminaH
3050035a jalaprapAtAsramukhAH zRGgair ucchritabAhavaH
3050035c sItAyAM hriyamANAyAM vikrozantIva parvatAH
3050036a hriyamANAM tu vaidehIM dRSTvA dIno divAkaraH
3050036c pravidhvastaprabhaH zrImAn AsIt pANDuramaNDalaH
3050037a nAsti dharmaH kutaH satyaM nArjavaM nAnRzaMsatA
3050037c yatra rAmasya vaidehIM bhAryAM harati rAvaNaH
3050038a iti sarvANi bhUtAni gaNazaH paryadevayan
3050038c vitrastakA dInamukhA rurudur mRgapotakAH
3050039a udvIkSyodvIkSya nayanair AsrapAtAvilekSaNAH
3050039c supravepitagAtrAz ca babhUvur vanadevatAH
3050040a vikrozantIM dRDhaM sItAM dRSTvA duHkhaM tathA gatAm
3050040c tAM tu lakSmaNa rAmeti krozantIM madhurasvarAm
3050041a avekSamANAM bahuSo vaidehIM dharaNItalam
3050041c sa tAm AkulakezAntAM vipramRSTavizeSakAm
3050041e jahArAtmavinAzAya dazagrIvo manasvinAm
3050042a tatas tu sA cArudatI zucismitA; vinAkRtA bandhujanena maithilI
3050042c apazyatI rAghavalakSmaNAv ubhau; vivarNavaktrA bhayabhArapIDitA
3051001a kham utpatantaM taM dRSTvA maithilI janakAtmajA
3051001c duHkhitA paramodvignA bhaye mahati vartinI
3051002a roSarodanatAmrAkSI bhImAkSaM rAkSasAdhipam
3051002c rudatI karuNaM sItA hriyamANedam abravIt
3051003a na vyapatrapase nIca karmaNAnena rAvaNa
3051003c jJAtvA virahitAM yo mAM corayitvA palAyase
3051004a tvayaiva nUnaM duSTAtman bhIruNA hartum icchatA
3051004c mamApavAhito bhartA mRgarUpeNa mAyayA
3051004e yo hi mAm udyatas trAtuM so 'py ayaM vinipAtitaH
3051005a paramaM khalu te vIryaM dRzyate rAkSasAdhama
3051005c vizrAvya nAmadheyaM hi yuddhe nAsti jitA tvayA
3051006a IdRzaM garhitaM karma kathaM kRtvA na lajjase
3051006c striyAz ca haraNaM nIca rahite ca parasya ca
3051007a kathayiSyanti lokeSu puruSAH karma kutsitam
3051007c sunRzaMsam adharmiSThaM tava zauNDIryamAninaH
3051008a dhik te zauryaM ca sattvaM ca yat tvayA kathitaM tadA
3051008c kulAkrozakaraM loke dhik te cAritram IdRzam
3051009a kiM zakyaM kartum evaM hi yaj javenaiva dhAvasi
3051009c muhUrtam api tiSThasva na jIvan pratiyAsyasi
3051010a na hi cakSuHpathaM prApya tayoH pArthivaputrayoH
3051010c sasainyo 'pi samartaHs tvaM muhUrtam api jIvitum
3051011a na tvaM tayoH zarasparzaM soDhuM zaktaH kathaM cana
3051011c vane prajvalitasyeva sparzam agner vihaMgamaH
3051012a sAdhu kRtvAtmanaH pathyaM sAdhu mAM muJca rAvaNa
3051012c matpradharSaNaruSTo hi bhrAtrA saha patir mama
3051012e vidhAsyati vinAzAya tvaM mAM yadi na muJcasi
3051013a yena tvaM vyavasAyena balAn mAM hartum icchasi
3051013c vyavasAyaH sa te nIca bhaviSyati nirarthakaH
3051014a na hy ahaM tam apazyantI bhartAraM vibudhopamam
3051014c utsahe zatruvazagA prANAn dhArayituM ciram
3051015a na nUnaM cAtmanaH zreyaH pathyaM vA samavekSase
3051015c mRtyukAle yathA martyo viparItAni sevate
3051016a mumUrSUNAM hi sarveSAM yat pathyaM tan na rocate
3051016c pazyAmIva hi kaNThe tvAM kAlapAzAvapAzitam
3051017a yathA cAsmin bhayasthAne na bibheSe dazAnana
3051017c vyaktaM hiraNmayAn hi tvaM saMpazyasi mahIruhAn
3051018a nadIM vairataNIM ghorAM rudhiraughanivAhinIm
3051018c khaDgapatravanaM caiva bhImaM pazyasi rAvaNa
3051019a taptakAJcanapuSpAM ca vaidUryapravaracchadAm
3051019c drakSyase zAlmalIM tIkSNAm AyasaiH kaNTakaiz citAm
3051020a na hi tvam IdRzaM kRtvA tasyAlIkaM mahAtmanaH
3051020c dhArituM zakSyasi ciraM viSaM pItveva nirghRNaH
3051021a baddhas tvaM kAlapAzena durnivAreNa rAvaNa
3051021c kva gato lapsyase zarma bhartur mama mahAtmanaH
3051022a nimeSAntaramAtreNa vinA bhrAtaram Ahave
3051022c rAkSasA nihatA yena sahasrANi caturdaza
3051023a sa kathaM rAghavo vIraH sarvAstrakuzalo balI
3051023c na tvAM hanyAc charais tIkSNair iSTabhAryApahAriNam
3051024a etac cAnyac ca paruSaM vaidehI rAvaNAGkagA
3051024c bhayazokasamAviSTA karuNaM vilalApa ha
3051025a tathA bhRzArtAM bahu caiva bhASiNIM; vilalApa pUrvaM karuNaM ca bhAminIm
3051025c jahAra pApas taruNIM viveSTatIM; nRpAtmajAm AgatagAtravepathum
3052001a hriyamANA tu vaidehI kaM cin nAtham apazyatI
3052001c dadarza girizRGgasthAn paJcavAnarapuMgavAn
3052002a teSAM madhye vizAlAkSI kauzeyaM kanakaprabham
3052002c uttarIyaM varArohA zubhAny AbharaNAni ca
3052002e mumoca yadi rAmAya zaMseyur iti maithilI
3052003a vastram utsRjya tan madhye vinikSiptaM sabhUSaNam
3052003c saMbhramAt tu dazagrIvas tat karma na ca buddhivAn
3052004a piGgAkSAs tAM vizAlAkSIM netrair animiSair iva
3052004c vikrozantIM tadA sItAM dadRzur vAnararSabhAH
3052005a sa ca pampAm atikramya laGkAm abhimukhaH purIm
3052005c jagAma rudatIM gRhya maithilIM rAkSasezvaraH
3052006a tAM jahAra susaMhRSTo rAvaNo mRtyum AtmanaH
3052006c utsaGgenaiva bhujagIM tIkSNadaMSTrAM mahAviSAm
3052007a vanAni saritaH zailAn sarAMsi ca vihAyasA
3052007c sa kSipraM samatIyAya zaraz cApAd iva cyutaH
3052008a timinakraniketaM tu varuNAlayam akSayam
3052008c saritAM zaraNaM gatvA samatIyAya sAgaram
3052009a saMbhramAt parivRttormI ruddhamInamahoragaH
3052009c vaidehyAM hriyamANAyAM babhUva varuNAlayaH
3052010a antarikSagatA vAcaH sasRjuz cAraNAs tadA
3052010c etad anto dazagrIva iti siddhAs tadAbruvan
3052011a sa tu sItAM viveSTantIm aGkenAdAya rAvaNaH
3052011c praviveza purIM laGkAM rUpiNIM mRtyum AtmanaH
3052012a so 'bhigamya purIM laGkAM suvibhaktamahApathAm
3052012c saMrUDhakakSyA bahulaM svam antaHpuram Avizat
3052013a tatra tAm asitApAGgIM zokamohaparAyaNAm
3052013c nidadhe rAvaNaH sItAM mayo mAyAm ivAsurIm
3052014a abravIc ca dazagrIvaH pizAcIr ghoradarzanAH
3052014c yathA nainAM pumAn strI vA sItAM pazyaty asaMmataH
3052015a muktAmaNisuvarNAni vastrANy AbharaNAni ca
3052015c yad yad icchet tad evAsyA deyaM macchandato yathA
3052016a yA ca vakSyati vaidehIM vacanaM kiM cid apriyam
3052016c ajJAnAd yadi vA jJAnAn na tasyA jIvitaM priyam
3052017a tathoktvA rAkSasIs tAs tu rAkSasendraH pratApavAn
3052017c niSkramyAntaHpurAt tasmAt kiM kRtyam iti cintayan
3052017e dadarzASTau mahAvIryAn rAkSasAn pizitAzanAn
3052018a sa tAn dRSTvA mahAvIryo varadAnena mohitaH
3052018c uvAcaitAn idaM vAkyaM prazasya balavIryataH
3052019a nAnApraharaNAH kSipram ito gacchata satvarAH
3052019c janasthAnaM hatasthAnaM bhUtapUrvaM kharAlayam
3052020a tatroSyatAM janasthAne zUnye nihatarAkSase
3052020c pauruSaM balam Azritya trAsam utsRjya dUrataH
3052021a balaM hi sumahad yan me janasthAne nivezitam
3052021c sadUSaNakharaM yuddhe hataM tad rAmasAyakaiH
3052022a tataH krodho mamApUrvo dhairyasyopari vardhate
3052022c vairaM ca sumahaj jAtaM rAmaM prati sudAruNam
3052023a niryAtayitum icchAmi tac ca vairam ahaM ripoH
3052023c na hi lapsyAmy ahaM nidrAm ahatvA saMyuge ripum
3052024a taM tv idAnIm ahaM hatvA kharadUSaNaghAtinam
3052024c rAmaM zarmopalapsyAmi dhanaM labdhveva nirdhanaH
3052025a janasthAne vasadbhis tu bhavadbhI rAmam AzritA
3052025c pravRttir upanetavyA kiM karotIti tattvataH
3052026a apramAdAc ca gantavyaM sarvair eva nizAcaraiH
3052026c kartavyaz ca sadA yatno rAghavasya vadhaM prati
3052027a yuSmAkaM hi balajJo 'haM bahuzo raNamUrdhani
3052027c ataz cAsmiJ janasthAne mayA yUyaM niyojitAH
3052028a tataH priyaM vAkyam upetya rAkSasA; mahArtham aSTAv abhivAdya rAvaNam
3052028c vihAya laGkAM sahitAH pratasthire; yato janasthAnam alakSyadarzanAH
3052029a tatas tu sItAm upalabhya rAvaNaH; susaMprahRSTaH parigRhya maithilIm
3052029c prasajya rAmeNa ca vairam uttamaM; babhUva mohAn muditaH sa rAkSasaH
3053001a saMdizya rAkSasAn ghorAn rAvaNo 'STau mahAbalAn
3053001c AtmAnaM buddhivaiklavyAt kRtakRtyam amanyata
3053002a sa cintayAno vaidehIM kAmabANasamarpitaH
3053002c praviveza gRhaM ramyaM sItAM draSTum abhitvaran
3053003a sa pravizya tu tadvezma rAvaNo rAkSasAdhipaH
3053003c apazyad rAkSasImadhye sItAM zokaparAyaNam
3053004a azrupUrNamukhIM dInAM zokabhArAvapIDitAm
3053004c vAyuvegair ivAkrAntAM majjantIM nAvam arNave
3053005a mRgayUthaparibhraSTAM mRgIM zvabhir ivAvRtAm
3053005c adhomukhamukhIM dInAm abhyetya ca nizAcaraH
3053006a tAM tu zokavazAM dInAm avazAM rAkSasAdhipaH
3053006c sa balAd darzayAm Asa gRhaM devagRhopamam
3053007a harmyaprAsAdasaMbadhaM strIsahasraniSevitam
3053007c nAnApakSigaNair juSTaM nAnAratnasamanvitam
3053008a kAJcanais tApanIyaiz ca sphATikai rAjatais tathA
3053008c vajravaidUryacitraiz ca stambhair dRSTimanoharaiH
3053009a divyadundubhinirhrAdaM taptakAJcanatoraNam
3053009c sopAnaM kAJcanaM citram Aruroha tayA saha
3053010a dAntakA rAjatAz caiva gavAkSAH priyadarzanAH
3053010c hemajAlAvRtAz cAsaMs tatra prAsAdapaGktayaH
3053011a sudhAmaNivicitrANi bhUmibhAgAni sarvazaH
3053011c dazagrIvaH svabhavane prAdarzayata maithilIm
3053012a dIrghikAH puSkariNyaz ca nAnApuSpasamAvRtAH
3053012c rAvaNo darzayAm Asa sItAM zokaparAyaNAm
3053013a darzayitvA tu vaidehIM kRtsnaM tad bhavanottamam
3053013c uvAca vAkyaM pApAtmA rAvaNo janakAtmajAm
3053014a dazarAkSasakoTyaz ca dvAviMzatir athAparAH
3053014c varjayitvA jarA vRddhAn bAlAMz ca rajanIcarAn
3053015a teSAM prabhur ahaM sIte sarveSAM bhImakarmaNAm
3053015c sahasram ekam ekasya mama kAryapuraHsaram
3053016a yad idaM rAjyatantraM me tvayi sarvaM pratiSThitam
3053016c jIvitaM ca vizAlAkSi tvaM me prANair garIyasI
3053017a bahUnAM strIsahasrANAM mama yo 'sau parigrahaH
3053017c tAsAM tvam IzvarI sIte mama bhAryA bhava priye
3053018a sAdhu kiM te 'nyayA buddhyA rocayasva vaco mama
3053018c bhajasva mAbhitaptasya prasAdaM kartum arhasi
3053019a parikSiptA samudreNa laGkeyaM zatayojanA
3053019c neyaM dharSayituM zakyA sendrair api surAsuraiH
3053020a na deveSu na yakSeSu na gandharveSu narSiSu
3053020c ahaM pazyAmi lokeSu yo me vIryasamo bhavet
3053021a rAjyabhraSTena dInena tApasena gatAyuSA
3053021c kiM kariSyasi rAmeNa mAnuSeNAlpatejasA
3053022a bhajasva sIte mAm eva bhartAhaM sadRzas tava
3053022c yauvanaM hy adhruvaM bhIru ramasveha mayA saha
3053023a darzane mA kRthA buddhiM rAghavasya varAnane
3053023c kAsya zaktir ihAgantum api sIte manorathaiH
3053024a na zakyo vAyur AkAze pAzair baddhaM mahAjavaH
3053024c dIpyamAnasya vApy agner grahItuM vimalAM zikhAm
3053025a trayANAm api lokAnAM na taM pazyAmi zobhane
3053025c vikrameNa nayed yas tvAM madbAhuparipAlitAm
3053026a laGkAyAM sumahad rAjyam idaM tvam anupAlaya
3053026c abhiSekodakaklinnA tuSTA ca ramayasva mAm
3053027a duSkRtaM yat purA karma vanavAsena tad gatam
3053027c yaz ca te sukRto dharmas tasyeha phalam Apnuhi
3053028a iha sarvANi mAlyAni divyagandhAni maithili
3053028c bhUSaNAni ca mukhyAni tAni seva mayA saha
3053029a puSpakaM nAma suzroNi bhrAtur vaizravaNasya me
3053029c vimAnaM ramaNIyaM ca tad vimAnaM manojavam
3053030a tatra sIte mayA sArdhaM viharasva yathAsukham
3053030c vadanaM padmasaMkAzaM vimalaM cArudarzanam
3053031a zokArtaM tu varArohe na bhrAjati varAnane
3053031c alaM vrIDena vaidehi dharmalopa kRtena te
3053032a ArSo 'yaM daivaniSyando yas tvAm abhigamiSyati
3053032c etau pAdau mayA snigdhau zirobhiH paripIDitau
3053033a prasAdaM kuru me kSipraM vazyo dAso 'ham asmi te
3053033c nemAH zUnyA mayA vAcaH zuSyamANena bhASitAH
3053034a na cApi rAvaNaH kAM cin mUrdhnA strIM praNameta ha
3053034c evam uktvA dazagrIvo maithilIM janakAtmajAm
3053035a kRtAntavazam Apanno mameyam iti manyate
3054001a sA tathoktA tu vaidehI nirbhayA zokakarSitA
3054001c tRNam antarataH kRtvA rAvaNaM pratyabhASata
3054002a rAjA dazaratho nAma dharmasetur ivAcalaH
3054002c satyasandhaH parijJAto yasya putraH sa rAghavaH
3054003a rAmo nAma sa dharmAtmA triSu lokeSu vizrutaH
3054003c dIrghabAhur vizAlAkSo daivataM sa patir mama
3054004a ikSvAkUNAM kule jAtaH siMhaskandho mahAdyutiH
3054004c lakSmaNena saha bhrAtrA yas te prANAM hariSyati
3054005a pratyakSaM yady ahaM tasya tvayA syAM dharSitA balAt
3054005c zayitA tvaM hataH saMkhye janasthAne yathA kharaH
3054006a ya ete rAkSasAH proktA ghorarUpA mahAbalAH
3054006c rAghave nirviSAH sarve suparNe pannagA yathA
3054007a tasya jyAvipramuktAs te zarAH kAJcanabhUSaNAH
3054007c zarIraM vidhamiSyanti gaGgAkUlam ivormayaH
3054008a asurair vA surair vA tvaM yady avadho 'si rAvaNa
3054008c utpAdya sumahad vairaM jIvaMs tasya na mokSyase
3054009a sa te jIvitazeSasya rAghavo 'ntakaro balI
3054009c pazor yUpagatasyeva jIvitaM tava durlabham
3054010a yadi pazyet sa rAmas tvAM roSadIptena cakSuSA
3054010c rakSas tvam adya nirdagdho gaccheH sadyaH parAbhavam
3054011a yaz candraM nabhaso bhUmau pAtayen nAzayeta vA
3054011c sAgaraM zoSayed vApi sa sItAM mocayed iha
3054012a gatAyus tvaM gatazrIko gatasattvo gatendriyaH
3054012c laGkA vaidhavyasaMyuktA tvatkRtena bhaviSyati
3054013a na te pApam idaM karma sukhodarkaM bhaviSyati
3054013c yAhaM nItA vinA bhAvaM patipArzvAt tvayA vanAt
3054014a sa hi daivatasaMyukto mama bhartA mahAdyutiH
3054014c nirbhayo vIryam Azritya zUnye vasati daNDake
3054015a sa te darpaM balaM vIryam utsekaM ca tathAvidham
3054015c apaneSyati gAtrebhyaH zaravarSeNa saMyuge
3054016a yadA vinAzo bhUtAnAM dRzyate kAlacoditaH
3054016c tadA kArye pramAdyanti narAH kAlavazaM gatAH
3054017a mAM pradhRSya sa te kAlaH prApto 'yaM rakSasAdhama
3054017c Atmano rAkSasAnAM ca vadhAyAntaHpurasya ca
3054018a na zakyA yajJamadhyasthA vediH srugbhANDa maNDitA
3054018c dvijAtimantrasaMpUtA caNDAlenAvamarditum
3054019a idaM zarIraM niHsaMjJaM bandha vA ghAtayasva vA
3054019c nedaM zarIraM rakSyaM me jIvitaM vApi rAkSasa
3054019e na hi zakSyAmy upakrozaM pRthivyAM dAtum AtmanaH
3054020a evam uktvA tu vaidehI kroddhAt suparuSaM vacaH
3054020c rAvaNaM maithilI tatra punar novAca kiM cana
3054021a sItAyA vacanaM zrutvA paruSaM romaharSaNam
3054021c pratyuvAca tataH sItAM bhayasaMdarzanaM vacaH
3054022a zRNu maithili madvAkyaM mAsAn dvAdaza bhAmini
3054022c kAlenAnena nAbhyeSi yadi mAM cAruhAsini
3054022e tatas tvAM prAtarAzArthaM sUdAz chetsyanti lezazaH
3054023a ity uktvA paruSaM vAkyaM rAvaNaH zatrurAvaNaH
3054023c rAkSasIz ca tataH kruddha idaM vacanam abravIt
3054024a zIghram evaM hi rAkSasyo vikRtA ghoradarzanAH
3054024c darpam asyA vineSyantu mAMsazoNitabhojanAH
3054025a vacanAd eva tAs tasya vikRtA ghoradarzanAH
3054025c kRtaprAJjalayo bhUtvA maithilIM paryavArayan
3054026a sa tAH provAca rAjA tu rAvaNo ghoradarzanaH
3054026c pracAlya caraNotkarSair dArayann iva medinIm
3054027a azokavanikAmadhye maithilI nIyatAm iti
3054027c tatreyaM rakSyatAM gUDham uSmAbhiH parivAritA
3054028a tatrainAM tarjanair ghoraiH punaH sAntvaiz ca maithilIm
3054028c AnayadhvaM vazaM sarvA vanyAM gajavadhUm iva
3054029a iti pratisamAdiSTA rAkSasyo rAvaNena tAH
3054029c azokavanikAM jagmur maithilIM parigRhya tAm
3054030a sarvakAmaphalair vRkSair nAnApuSpaphalair vRtAm
3054030c sarvakAlamadaiz cApi dvijaiH samupasevitAm
3054031a sA tu zokaparItAGgI maithilI janakAtmajA
3054031c rAkSasI vazam ApannA vyAghrINAM hariNI yathA
3054032a na vindate tatra tu zarma maithilI; virUpanetrAbhir atIva tarjitA
3054032c patiM smarantI dayitaM ca devaraM; vicetanAbhUd bhayazokapIDitA
3055001a rAkSasaM mRgarUpeNa carantaM kAmarUpiNam
3055001c nihatya rAmo mArIcaM tUrNaM pathi nyavartata
3055002a tasya saMtvaramANasya draSTukAmasya maithilIm
3055002c krUrasvaro 'tha gomAyur vinanAdAsya pRSThataH
3055003a sa tasya svaram AjJAya dAruNaM romaharSaNam
3055003c cintayAm Asa gomAyoH svareNa parizaGkitaH
3055004a azubhaM bata manye 'haM gomAyur vAzyate yathA
3055004c svasti syAd api vaidehyA rAkSasair bhakSaNaM vinA
3055005a mArIcena tu vijJAya svaram AlakSya mAmakam
3055005c vikruSTaM mRgarUpeNa lakSmaNaH zRNuyAd yadi
3055006a sa saumitriH svaraM zrutvA tAM ca hitvAtha maithilIm
3055006c tayaiva prahitaH kSipraM matsakAzam ihaiSyati
3055007a rAkSasaiH sahitair nUnaM sItAyA Ipsito vadhaH
3055007c kAJcanaz ca mRgo bhUtvA vyapanIyAzramAt tu mAm
3055008a dUraM nItvA tu mArIco rAkSaso 'bhUc charAhataH
3055008c hA lakSmaNa hato 'smIti yad vAkyaM vyajahAra ha
3055009a api svasti bhaved dvAbhyAM rahitAbhyAM mayA vane
3055009c janasthAnanimittaM hi kRtavairo 'smi rAkSasaiH
3055009e nimittAni ca ghorANi dRzyante 'dya bahUni ca
3055010a ity evaM cintayan rAmaH zrutvA gomAyuniHsvanam
3055010c Atmanaz cApanayanaM mRgarUpeNa rakSasA
3055010e AjagAma janasthAnaM rAghavaH parizaGkitaH
3055011a taM dInamAnasaM dInam Asedur mRgapakSiNaH
3055011c savyaM kRtvA mahAtmAnaM ghorAMz ca sasRjuH svarAn
3055012a tAni dRSTvA nimittAni mahAghorANi rAghavaH
3055012c tato lakSaNam AyAntaM dadarza vigataprabham
3055013a tato 'vidUre rAmeNa samIyAya sa lakSmaNaH
3055013c viSaNNaH sa viSaNNena duHkhito duHkhabhAginA
3055014a saMjagarhe 'tha taM bhrAtA jeSTho lakSmaNam Agatam
3055014c vihAya sItAM vijane vane rAkSasasevite
3055015a gRhItvA ca karaM savyaM lakSmaNaM raghunandanaH
3055015c uvAca madhurodarkam idaM paruSam Artavat
3055016a aho lakSmaNa garhyaM te kRtaM yat tvaM vihAya tAm
3055016c sItAm ihAgataH saumya kaccit svasti bhaved iti
3055017a na me 'sti saMzayo vIra sarvathA janakAtmajA
3055017c vinaSTA bhakSitA vApa rAkSasair vanacAribhiH
3055018a azubhAny eva bhUyiSThaM yathA prAdurbhavanti me
3055018c api lakSmaNa sItAyAH sAmagryaM prApnuyAvahe
3055019a idaM hi rakSomRgasaMnikAzaM; pralobhya mAM dUram anuprayAtam
3055019c hataM kathaM cin mahatA zrameNa; sa rAkSaso 'bhUn mriyamANa eva
3055020a manaz ca me dInam ihAprahRSTaM; cakSuz ca savyaM kurute vikAram
3055020c asaMzayaM lakSmaNa nAsti sItA; hRtA mRtA vA pathi vartate vA
3056001a sa dRSTvA lakSmaNaM dInaM zUnye dazarathAtmajaH
3056001c paryapRcchata dharmAtmA vaidehIm AgataM vinA
3056002a prasthitaM daNDakAraNyaM yA mAm anujagAma ha
3056002c kva sA lakSmaNa vaidehI yAM hitvA tvam ihAgataH
3056003a rAjyabhraSTasya dInasya daNDakAn paridhAvataH
3056003c kva sA duHkhasahAyA me vaidehI tanumadhyamA
3056004a yAM vinA notsahe vIra muhUrtam api jIvitum
3056004c kva sA prANasahAyA me sItA surasutopamA
3056005a patitvam amarANAM vA pRthivyAz cApi lakSmaNa
3056005c vinA tAM tapanIyAbhAM neccheyaM janakAtmajAm
3056006a kaccij jIvati vaidehI prANaiH priyatarA mama
3056006c kaccit pravrAjanaM saumya na me mithyA bhaviSyati
3056007a sItAnimittaM saumitre mRte mayi gate tvayi
3056007c kaccit sakAmA sukhitA kaikeyI sA bhaviSyati
3056008a saputrarAjyAM siddhArthAM mRtaputrA tapasvinI
3056008c upasthAsyati kausalyA kaccin saumya na kaikayIm
3056009a yadi jIvati vaidehI gamiSyAmy AzramaM punaH
3056009c suvRttA yadi vRttA sA prANAMs tyakSyAmi lakSmaNa
3056010a yadi mAm AzramagataM vaidehI nAbhibhASate
3056010c punaH prahasitA sItA vinaziSyAmi lakSmaNa
3056011a brUhi lakSmaNa vaidehI yadi jIvati vA na vA
3056011c tvayi pramatte rakSobhir bhakSitA vA tapasvinI
3056012a sukumArI ca bAlA ca nityaM cAduHkhadarzinI
3056012c madviyogena vaidehI vyaktaM zocati durmanAH
3056013a sarvathA rakSasA tena jihmena sudurAtmanA
3056013c vadatA lakSmaNety uccais tavApi janitaM bhayam
3056014a zrutaz ca zaGke vaidehyA sa svaraH sadRzo mama
3056014c trastayA preSitas tvaM ca draSTuM mAM zIghram AgataH
3056015a sarvathA tu kRtaM kaSTaM sItAm utsRjatA vane
3056015c pratikartuM nRzaMsAnAM rakSasAM dattam antaram
3056016a duHkhitAH kharaghAtena rAkSasAH pizitAzanAH
3056016c taiH sItA nihatA ghorair bhaviSyati na saMzayaH
3056017a aho 'smi vyasane magnaH sarvathA ripunAzana
3056017c kiM tv idAnIM kariSyAmi zaGke prAptavyam IdRzam
3056018a iti sItAM varArohAM cintayann eva rAghavaH
3056018c AjagAma janasthAnaM tvarayA sahalakSmaNaH
3056019a vigarhamANo 'nujam ArtarUpaM; kSudhA zramAc caiva pipAsayA ca
3056019c viniHzvasaJ zuSkamukho viSaNNaH; pratizrayaM prApya samIkSya zUnyam
3056020a svam AzramaM saMpravigAhya vIro; vihAradezAn anusRtya kAMz cit
3056020c etat tad ity eva nivAsabhUmau; prahRSTaromA vyathito babhUva
3057001a athAzramAd upAvRttam antarA raghunandanaH
3057001c paripapraccha saumitriM rAmo duHkhArditaH punaH
3057002a tam uvAca kimarthaM tvam Agato 'pAsya maithilIm
3057002c yadA sA tava vizvAsAd vane viharitA mayA
3057003a dRSTvaivAbhyAgataM tvAM me maithilIM tyajya lakSmaNa
3057003c zaGkamAnaM mahat pApaM yat satyaM vyathitaM manaH
3057004a sphurate nayanaM savyaM bAhuz ca hRdayaM ca me
3057004c dRSTvA lakSmaNa dUre tvAM sItAvirahitaM pathi
3057005a evam uktas tu saumitrir lakSmaNaH zubhalakSaNaH
3057005c bhUyo duHkhasamAviSTo duHkhitaM rAmam abravIt
3057006a na svayaM kAmakAreNa tAM tyaktvAham ihAgataH
3057006c pracoditas tayaivograis tvatsakAzam ihAgataH
3057007a AryeNeva parikruSTaM hA sIte lakSmaNeti ca
3057007c paritrAhIti yad vAkyaM maithilyAs tac chrutiM gatam
3057008a sA tam ArtasvaraM zrutvA tava snehena maithilI
3057008c gaccha gaccheti mAm Aha rudantI bhayavihvalA
3057009a pracodyamAnena mayA gaccheti bahuzas tayA
3057009c pratyuktA maithilI vAkyam idaM tvatpratyayAnvitam
3057010a na tat pazyAmy ahaM rakSo yad asya bhayam Avahet
3057010c nirvRtA bhava nAsty etat kenApy evam udAhRtam
3057011a vigarhitaM ca nIcaM ca katham Aryo 'bhidhAsyati
3057011c trAhIti vacanaM sIte yas trAyet tridazAn api
3057012a kiMnimittaM tu kenApi bhrAtur Alambya me svaram
3057012c visvaraM vyAhRtaM vAkyaM lakSmaNa trAhi mAm iti
3057012e na bhavatyA vyathA kAryA kunArIjanasevitA
3057013a alaM vaiklavyam Alambya svasthA bhava nirutsukA
3057013c na cAsti triSu lokeSu pumAn yo rAghavaM raNe
3057013e jAto vA jAyamAno vA saMyuge yaH parAjayet
3057014a evam uktA tu vaidehI parimohitacetanA
3057014c uvAcAzrUNi muJcantI dAruNaM mAm idaM vacaH
3057015a bhAvo mayi tavAtyarthaM pApa eva nivezitaH
3057015c vinaSTe bhrAtari prApte na ca tvaM mAm avApsyasi
3057016a saMketAd bharatena tvaM rAmaM samanugacchasi
3057016c krozantaM hi yathAtyarthaM nainam abhyavapadyase
3057017a ripuH pracchannacArI tvaM madartham anugacchasi
3057017c rAghavasyAntaraprepsus tathainaM nAbhipadyase
3057018a evam ukto hi vaidehyA saMrabdho raktalocanaH
3057018c krodhAt prasphuramANauSTha AzramAd abhinirgataH
3057019a evaM bruvANaM saumitriM rAmaH saMtApamohitaH
3057019c abravId duSkRtaM saumya tAM vinA yat tvam AgataH
3057020a jAnann api samarthaM mAM rakSasAM vinivAraNe
3057020c anena krodhavAkyena maithilyA niHsRto bhavAn
3057021a na hi te parituSyAmi tyaktvA yad yAsi maithilIm
3057021c kruddhAyAH paruSaM zrutvA striyA yat tvam ihAgataH
3057022a sarvathA tv apanItaM te sItayA yat pracoditaH
3057022c krodhasya vazam Agamya nAkaroH zAsanaM mama
3057023a asau hi rAkSasaH zete zareNAbhihato mayA
3057023c mRgarUpeNa yenAham AzramAd apavAditaH
3057024a vikRSya cApaM paridhAya sAyakaM; salIla bANena ca tADito mayA
3057024c mArgIM tanuM tyajya ca viklavasvaro; babhUva keyUradharaH sa rAkSasaH
3057025a zarAhatenaiva tadArtayA girA; svaraM mamAlambya sudUrasaMzravam
3057025c udAhRtaM tad vacanaM sudAruNaM; tvam Agato yena vihAya maithilIm
3058001a bhRzam AvrajamAnasya tasyAdhovAmalocanam
3058001c prAsphurac cAskhalad rAmo vepathuz cAsya jAyate
3058002a upAlakSya nimittAni so 'zubhAni muhur muhuH
3058002c api kSemaM tu sItAyA iti vai vyAjahAra ha
3058003a tvaramANo jagAmAtha sItAdarzanalAlasaH
3058003c zUnyam AvasathaM dRSTvA babhUvodvignamAnasaH
3058004a udbhramann iva vegena vikSipan raghunandanaH
3058004c tatra tatroTajasthAnam abhivIkSya samantataH
3058005a dadarza parNazAlAM ca rahitAM sItayA tadA
3058005c zriyA virahitAM dhvastAM hemante padminIm iva
3058006a rudantam iva vRkSaiz ca mlAnapuSpamRgadvijam
3058006c zriyA vihInaM vidhvastaM saMtyaktavanadaivatam
3058007a viprakIrNAjinakuzaM vipraviddhabRsIkaTam
3058007c dRSTvA zUnyoTajasthAnaM vilalApa punaH punaH
3058008a hRtA mRtA vA naSTA vA bhakSitA vA bhaviSyati
3058008c nilInApy atha vA bhIrur atha vA vanam AzritA
3058009a gatA vicetuM puSpANi phalAny api ca vA punaH
3058009c atha vA padminIM yAtA jalArthaM vA nadIM gatA
3058010a yatnAn mRgayamANas tu nAsasAda vane priyAm
3058010c zokaraktekSaNaH zokAd unmatta iva lakSyate
3058011a vRkSAd vRkSaM pradhAvan sa girIMz cApi nadIn nadIm
3058011c babhUva vilapan rAmaH zokapaGkArNavaplutaH
3058012a asti kaccit tvayA dRSTA sA kadambapriyA priyA
3058012c kadamba yadi jAnISe zaMsa sItAM zubhAnanAm
3058013a snigdhapallavasaMkAzAM pItakauzeyavAsinIm
3058013c zaMsasva yadi vA dRSTA bilva bilvopamastanI
3058014a atha vArjuna zaMsa tvaM priyAM tAm arjunapriyAm
3058014c janakasya sutA bhIrur yadi jIvati vA na vA
3058015a kakubhaH kakubhoruM tAM vyaktaM jAnAti maithilIm
3058015c latApallavapuSpADhyo bhAti hy eSa vanaspatiH
3058016a bhramarair upagItaz ca yathA drumavaro hy ayam
3058016c eSa vyaktaM vijAnAti tilakas tilakapriyAm
3058017a azokazokApanuda zokopahatacetasaM
3058017c tvannAmAnaM kuru kSipraM priyAsaMdarzanena mAm
3058018a yadi tAla tvayA dRSTA pakvatAlaphalastanI
3058018c kathayasva varArohAM kAruSyaM yadi te mayi
3058019a yadi dRSTA tvayA sItA jambujAmbUnadaprabhA
3058019c priyAM yadi vijAnISe niHzaGkaM kathayasva me
3058020a atha vA mRgazAvAkSIM mRga jAnAsi maithilIm
3058020c mRgaviprekSaNI kAntA mRgIbhiH sahitA bhavet
3058021a gaja sA gajanAsorur yadi dRSTA tvayA bhavet
3058021c tAM manye viditAM tubhyam AkhyAhi varavAraNa
3058022a zArdUla yadi sA dRSTA priyA candranibhAnanA
3058022c maithilI mama visrabdhaH kathayasva na te bhayam
3058023a kiM dhAvasi priye nUnaM dRSTAsi kamalekSaNe
3058023c vRkSeNAcchAdya cAtmAnaM kiM mAM na pratibhASase
3058024a tiSTha tiSTha varArohe na te 'sti karuNA mayi
3058024c nAtyarthaM hAsyazIlAsi kimarthaM mAm upekSase
3058025a pItakauzeyakenAsi sUcitA varavarNini
3058025c dhAvanty api mayA dRSTA tiSTha yady asti sauhRdam
3058026a naiva sA nUnam atha vA hiMsitA cAruhAsinI
3058026c kRcchraM prAptaM hi mAM nUnaM yathopekSitum arhati
3058027a vyaktaM sA bhakSitA bAlA rAkSasaiH pizitAzanaiH
3058027c vibhajyAGgAni sarvANi mayA virahitA priyA
3058028a nUnaM tac chubhadantauSThaM mukhaM niSprabhatAM gatam
3058028c sA hi campakavarNAbhA grIvA graiveya zobhitA
3058029a komalA vilapantyAs tu kAntAyA bhakSitA zubhA
3058029c nUnaM vikSipyamANau tau bAhU pallavakomalau
3058030a bhakSitau vepamAnAgrau sahastAbharaNAGgadau
3058030c mayA virahitA bAlA rakSasAM bhakSaNAya vai
3058031a sArtheneva parityaktA bhakSitA bahubAndhavA
3058031c hA lakSmaNa mahAbAho pazyasi tvaM priyAM kva cit
3058032a hA priye kva gatA bhadre hA sIteti punaH punaH
3058032c ity evaM vilapan rAmaH paridhAvan vanAd vanam
3058033a kva cid udbhramate vegAt kva cid vibhramate balAt
3058033c kva cin matta ivAbhAti kAntAn veSaNatatparaH
3058034a sa vanAni nadIH zailAn giriprasravaNAni ca
3058034c kAnanAni ca vegena bhramaty aparisaMsthitaH
3058035a tathA sa gatvA vipulaM mahad vanaM; parItya sarvaM tv atha maithilIM prati
3058035c aniSThitAzaH sa cakAra mArgaNe; punaH priyAyAH paramaM parizramam
3059001a dRSTAzramapadaM zUnyaM rAmo dazarathAtmajaH
3059001c rahitAM parNazAlAM ca vidhvastAny AsanAni ca
3059002a adRSTvA tatra vaidehIM saMnirIkSya ca sarvazaH
3059002c uvAca rAmaH prAkruzya pragRhya rucirau bhujau
3059003a kva nu lakSmaNa vaidehI kaM vA dezam ito gatA
3059003c kenAhRtA vA saumitre bhakSitA kena vA priyA
3059004a vRSkeNAvArya yadi mAM sIte hasitum icchasi
3059004c alaM te hasitenAdya mAM bhajasva suduHkhitam
3059005a yaiH saha krIDase sIte vizvastair mRgapotakaiH
3059005c ete hInAs tvayA saumye dhyAyanty asrAvilekSaNAH
3059006a mRtaM zokena mahatA sItAharaNajena mAm
3059006c paraloke mahArAjo nUnaM drakSyati me pitA
3059007a kathaM pratijJAM saMzrutya mayA tvam abhiyojitaH
3059007c apUrayitvA taM kAlaM matsakAzam ihAgataH
3059008a kAmavRttam anAryaM mAM mRSAvAdinam eva ca
3059008c dhik tvAm iti pare loke vyaktaM vakSyati me pitA
3059009a vivazaM zokasaMtaptaM dInaM bhagnamanoratham
3059009c mAm ihotsRjya karuNaM kIrtir naram ivAnRjum
3059010a kva gacchasi varArohe mAm utsRjya sumadhyame
3059010c tvayA virahitaz cAhaM mokSye jIvitam AtmanaH
3059011a itIva vilapan rAmaH sItAdarzanalAlasaH
3059011c na dadarza suduHkhArto rAghavo janakAtmajAm
3059012a anAsAdayamAnaM taM sItAM dazarathAtmajam
3059012c paGkam AsAdya vipulaM sIdantam iva kuJjaram
3059012e lakSmaNo rAmam atyartham uvAca hitakAmyayA
3059013a mA viSAdaM mahAbAho kuru yatnaM mayA saha
3059013c idaM ca hi vanaM zUra bahukandarazobhitam
3059014a priyakAnanasaMcArA vanonmattA ca maithilI
3059014c sA vanaM vA praviSTA syAn nalinIM vA supuSpitAm
3059015a saritaM vApi saMprAptA mInavaJjurasevitAm
3059015c vitrAsayitukAmA vA lInA syAt kAnane kva cit
3059015e jijJAsamAnA vaidehI tvAM mAM ca puruSarSabha
3059016a tasyA hy anveSaNe zrIman kSipram eva yatAvahe
3059016c vanaM sarvaM vicinuvo yatra sA janakAtmajA
3059016e manyase yadi kAkutstha mA sma zoke manaH kRthAH
3059017a evam uktas tu sauhArdAl lakSmaNena samAhitaH
3059017c saha saumitriNA rAmo vicetum upacakrame
3059017e tau vanAni girIMz caiva saritaz ca sarAMsi ca
3059018a nikhilena vicinvantau sItAM dazarathAtmajau
3059018c tasya zailasya sAnUni guhAz ca zikharANi ca
3059019a nikhilena vicinvantau naiva tAm abhijagmatuH
3059019c vicitya sarvataH zailaM rAmo lakSmaNam abravIt
3059020a neha pazyAmi saumitre vaidehIM parvate zubhe
3059020c tato duHkhAbhisaMtapto lakSmaNo vAkyam abravIt
3059021a vicaran daNDakAraNyaM bhrAtaraM dIptatejasaM
3059021c prApsyasi tvaM mahAprAjJa maithilIM janakAtmajAm
3059022a yathA viSNur mahAbAhur baliM baddhvA mahIm imAm
3059022c evam uktas tu vIreNa lakSmaNena sa rAghavaH
3059023a uvAca dInayA vAcA duHkhAbhihatacetanaH
3059023c vanaM sarvaM suvicitaM padminyaH phullapaGkajAH
3059024a giriz cAyaM mahAprAjJa bahukandaranirjharaH
3059024c na hi pazyAmi vaidehIM prANebhyo 'pi garIyasIm
3059025a evaM sa vilapan rAmaH sItAharaNakarzitaH
3059025c dInaH zokasamAviSTo muhUrtaM vihvalo 'bhavat
3059026a sa vihvalitasarvAGgo gatabuddhir vicetanaH
3059026c viSasAdAturo dIno niHzvasyAzItam Ayatam
3059027a bahuzaH sa tu niHzvasya rAmo rAjIvalocanaH
3059027c hA priyeti vicukroza bahuzo bASpagadgadaH
3059028a taM sAntvayAm Asa tato lakSmaNaH priyabAndhavaH
3059028c bahuprakAraM dharmajJaH prazritaH prazritAJjaliH
3059029a anAdRtya tu tad vAkyaM lakSmaNauSThapuTacyutam
3059029c apazyaMs tAM priyAM sItAM prAkrozat sa punaH punaH
3060001a sa dIno dInayA vAcA lakSmaNaM vAkyam abravIt
3060001c zIghraM lakSmaNa jAnIhi gatvA godAvarIM nadIm
3060001e api godAvarIM sItA padmAny AnayituM gatA
3060002a evam uktas tu rAmeNa lakSmaNaH punar eva hi
3060002c nadIM godAvarIM ramyAM jagAma laghuvikramaH
3060003a tAM lakSmaNas tIrthavatIM vicitvA rAmam abravIt
3060003c nainAM pazyAmi tIrtheSu krozato na zRNoti me
3060004a kaM nu sA dezam ApannA vaidehI klezanAzinI
3060004c na hi taM vedmi vai rAma yatra sA tanumadhyamA
3060005a lakSmaNasya vacaH zrutvA dInaH saMtApa mohitaH
3060005c rAmaH samabhicakrAma svayaM godAvarIM nadIm
3060006a sa tAm upasthito rAmaH kva sItety evam abravIt
3060007a bhUtAni rAkSasendreNa vadhArheNa hRtAm api
3060007c na tAM zazaMsU rAmAya tathA godAvarI nadI
3060008a tataH pracoditA bhUtaiH zaMsAsmai tAM priyAm iti
3060008c na ca sAbhyavadat sItAM pRSTA rAmeNa zocitA
3060009a rAvaNasya ca tad rUpaM karmANi ca durAtmanaH
3060009c dhyAtvA bhayAt tu vaidehIM sA nadI na zazaMsa tAm
3060010a nirAzas tu tayA nadyA sItAyA darzane kRtaH
3060010c uvAca rAmaH saumitriM sItAdarzanakarzitaH
3060011a kiM nu lakSmaNa vakSyAmi sametya janakaM vacaH
3060011c mAtaraM caiva vaidehyA vinA tAm aham apriyam
3060012a yA me rAjyavihInasya vane vanyena jIvataH
3060012c sarvaM vyapanayac chokaM vaidehI kva nu sA gatA
3060013a jJAtipakSavihInasya rAjaputrIm apazyataH
3060013c manye dIrghA bhaviSyanti rAtrayo mama jAgrataH
3060014a godAvarIM janasthAnam imaM prasravaNaM girim
3060014c sarvANy anucariSyAmi yadi sItA hi dRzyate
3060015a evaM saMbhASamANau tAv anyonyaM bhrAtarAv ubhau
3060015c vasuMdharAyAM patitaM puSpamArgam apazyatAm
3060016a tAM puSpavRSTiM patitAM dRSTvA rAmo mahItale
3060016c uvAca lakSmaNaM vIro duHkhito duHkhitaM vacaH
3060017a abhijAnAmi puSpANi tAnImAmIha lakSmaNa
3060017c apinaddhAni vaidehyA mayA dattAni kAnane
3060018a evam uktvA mahAbAhur lakSmaNaM puruSarSabham
3060018c kruddho 'bravId giriM tatra siMhaH kSudramRgaM yathA
3060019a tAM hemavarNAM hemAbhAM sItAM darzaya parvata
3060019c yAvat sAnUni sarvANi na te vidhvaMsayAmy aham
3060020a mama bANAgninirdagdho bhasmIbhUto bhaviSyasi
3060020c asevyaH satataM caiva nistRNadrumapallavaH
3060021a imAM vA saritaM cAdya zoSayiSyAmi lakSmaNa
3060021c yadi nAkhyAti me sItAm adya candranibhAnanAm
3060022a evaM sa ruSito rAmo didhakSann iva cakSuSA
3060022c dadarza bhUmau niSkrAntaM rAkSasasya padaM mahat
3060023a sa samIkSya parikrAntaM sItAyA rAkSasasya ca
3060023c saMbhrAntahRdayo rAmaH zazaMsa bhrAtaraM priyam
3060024a pazya lakSmaNa vaidehyAH zIrNAH kanakabindavaH
3060024c bhUSaNAnAM hi saumitre mAlyAni vividhAni ca
3060025a taptabindunikAzaiz ca citraiH kSatajabindubhiH
3060025c AvRtaM pazya saumitre sarvato dharaNItalam
3060026a manye lakSmaNa vaidehI rAkSasaiH kAmarUpibhiH
3060026c bhittvA bhittvA vibhaktA vA bhakSitA vA bhaviSyati
3060027a tasya nimittaM vaidehyA dvayor vivadamAnayoH
3060027c babhUva yuddhaM saumitre ghoraM rAkSasayor iha
3060028a muktAmaNicitaM cedaM tapanIyavibhUSitam
3060028c dharaNyAM patitaM saumya kasya bhagnaM mahad dhanuH
3060029a taruNAdityasaMkAzaM vaidUryagulikAcitam
3060029c vizIrNaM patitaM bhUmau kavacaM kasya kAJcanam
3060030a chatraM zatazalAkaM ca divyamAlyopazobhitam
3060030c bhagnadaNDam idaM kasya bhUmau saumya nipAtitam
3060031a kAJcanorazchadAz ceme pizAcavadanAH kharAH
3060031c bhImarUpA mahAkAyAH kasya vA nihatA raNe
3060032a dIptapAvakasaMkAzo dyutimAn samaradhvajaH
3060032c apaviddhaz ca bhagnaz ca kasya sAMgrAmiko rathaH
3060033a rathAkSamAtrA vizikhAs tapanIyavibhUSaNAH
3060033c kasyeme 'bhihatA bANAH prakIrNA ghorakarmaNaH
3060034a vairaM zataguNaM pazya mamedaM jIvitAntakam
3060034c sughorahRdayaiH saumya rAkSasaiH kAmarUpibhiH
3060035a hRtA mRtA vA sItA hi bhakSitA vA tapasvinI
3060035c na dharmas trAyate sItAM hriyamANAM mahAvane
3060036a bhakSitAyAM hi vaidehyAM hRtAyAm api lakSmaNa
3060036c ke hi loke priyaM kartuM zaktAH saumya mamezvarAH
3060037a kartAram api lokAnAM zUraM karuNavedinam
3060037c ajJAnAd avamanyeran sarvabhUtAni lakSmaNa
3060038a mRduM lokahite yuktaM dAntaM karuNavedinam
3060038c nirvIrya iti manyante nUnaM mAM tridazezvarAH
3060039a mAM prApya hi guNo doSaH saMvRttaH pazya lakSmaNa
3060039c adyaiva sarvabhUtAnAM rakSasAm abhavAya ca
3060039e saMhRtyaiva zazijyotsnAM mahAn sUrya ivoditaH
3060040a naiva yakSA na gandharvA na pizAcA na rAkSasAH
3060040c kiMnarA vA manuSyA vA sukhaM prApsyanti lakSmaNa
3060041a mamAstrabANasaMpUrNam AkAzaM pazya lakSmaNa
3060041c niHsaMpAtaM kariSyAmi hy adya trailokyacAriNAm
3060042a saMniruddhagrahagaNam AvAritanizAkaram
3060042c vipranaSTAnalamarudbhAskaradyutisaMvRtam
3060043a vinirmathitazailAgraM zuSyamANajalAzayam
3060043c dhvastadrumalatAgulmaM vipraNAzitasAgaram
3060044a na tAM kuzalinIM sItAM pradAsyanti mamezvarAH
3060044c asmin muhUrte saumitre mama drakSyanti vikramam
3060045a nAkAzam utpatiSyanti sarvabhUtAni lakSmaNa
3060045c mama cApaguNAn muktair bANajAlair nirantaram
3060046a arditaM mama nArAcair dhvastabhrAntamRgadvijam
3060046c samAkulam amaryAdaM jagat pazyAdya lakSmaNa
3060047a AkarNapUrNair iSubhir jIvalokaM durAvaraiH
3060047c kariSye maithilIhetor apizAcam arAkSasaM
3060048a mama roSaprayuktAnAM sAyakAnAM balaM surAH
3060048c drakSyanty adya vimuktAnAm amarSAd dUragAminAm
3060049a naiva devA na daiteyA na pizAcA na rAkSasAH
3060049c bhaviSyanti mama krodhAt trailokye vipraNAzite
3060050a devadAnavayakSANAM lokA ye rakSasAm api
3060050c bahudhA nipatiSyanti bANaughaiH zakulIkRtAH
3060050e nirmaryAdAn imA&l lokAn kariSyAmy adya sAyakaiH
3060051a yathA jarA yathA mRtyur yathAkAlo yathAvidhiH
3060051c nityaM na pratihanyante sarvabhUteSu lakSmaNa
3060051e tathAhaM krodhasaMyukto na nivAryo 'smy asaMzayam
3060052a pureva me cArudatIm aninditAM; dizanti sItAM yadi nAdya maithilIm
3060052c sadevagandharvamanuSya pannagaM; jagat sazailaM parivartayAmy aham
3061001a tapyamAnaM tathA rAmaM sItAharaNakarzitam
3061001c lokAnAm abhave yuktaM sAmvartakam ivAnalam
3061002a vIkSamANaM dhanuH sajyaM niHzvasantaM muhur muhuH
3061002c hantukAmaM pazuM rudraM kruddhaM dakSakratau yathA
3061003a adRSTapUrvaM saMkruddhaM dRSTvA rAmaM sa lakSmaNaH
3061003c abravIt prAJjalir vAkyaM mukhena parizuSyatA
3061004a purA bhUtvA mRdur dAntaH sarvabhUtahite rataH
3061004c na krodhavazam ApannaH prakRtiM hAtum arhasi
3061005a candre lakSNIH prabhA sUrye gatir vAyau bhuvi kSamA
3061005c etac ca niyataM sarvaM tvayi cAnuttamaM yazaH
3061006a na tu jAnAmi kasyAyaM bhagnaH sAMgrAmiko rathaH
3061006c kena vA kasya vA hetoH sAyudhaH saparicchadaH
3061007a khuranemikSataz cAyaM sikto rudhirabindubhiH
3061007c dezo nivRttasaMgrAmaH sughoraH pArthivAtmaja
3061008a ekasya tu vimardo 'yaM na dvayor vadatAM vara
3061008c na hi vRttaM hi pazyAmi balasya mahataH padam
3061009a naikasya tu kRte lokAn vinAzayitum arhasi
3061009c yuktadaNDA hi mRdavaH prazAntA vasudhAdhipAH
3061010a sadA tvaM sarvabhUtAnAM zaraNyaH paramA gatiH
3061010c ko nu dArapraNAzaM te sAdhu manyeta rAghava
3061011a saritaH sAgarAH zailA devagandharvadAnavAH
3061011c nAlaM te vipriyaM kartuM dIkSitasyeva sAdhavaH
3061012a yena rAjan hRtA sItA tam anveSitum arhasi
3061012c maddvitIyo dhanuSpANiH sahAyaiH paramarSibhiH
3061013a samudraM ca viceSyAmaH parvatAMz ca vanAni ca
3061013c guhAz ca vividhA ghorA nalinIH pArvatIz ca ha
3061014a devagandharvalokAMz ca viceSyAmaH samAhitAH
3061014c yAvan nAdhigamiSyAmas tava bhAryApahAriNam
3061015a na cet sAmnA pradAsyanti patnIM te tridazezvarAH
3061015c kosalendra tataH pazcAt prAptakAlaM kariSyasi
3061016a zIlena sAmnA vinayena sItAM; nayena na prApsyasi cen narendra
3061016c tataH samutsAdaya hemapuGkhair; mahendravajrapratimaiH zaraughaiH
3062001a taM tathA zokasaMtaptaM vilapantam anAthavat
3062001c mohena mahatAviSTaM paridyUnam acetanam
3062002a tataH saumitrir AzvAsya muhUrtAd iva lakSmaNaH
3062002c rAmaM saMbodhayAm Asa caraNau cAbhipIDayan
3062003a mahatA tapasA rAma mahatA cApi karmaNA
3062003c rAjJA dazarathenAsIl labdho 'mRtam ivAmaraiH
3062004a tava caiva guNair baddhas tvadviyogAn mahIpatiH
3062004c rAjA devatvam Apanno bharatasya yathA zrutam
3062005a yadi duHkham idaM prAptaM kAkutstha na sahiSyase
3062005c prAkRtaz cAlpasattvaz ca itaraH kaH sahiSyati
3062006a duHkhito hi bhavA&l lokAMs tejasA yadi dhakSyate
3062006c ArtAH prajA naravyAghra kva nu yAsyanti nirvRtim
3062007a lokasvabhAva evaiSa yayAtir nahuSAtmajaH
3062007c gataH zakreNa sAlokyam anayas taM samaspRzat
3062008a maharSayo vasiSThas tu yaH pitur naH purohitaH
3062008c ahnA putrazataM jajJe tathaivAsya punar hatam
3062009a yA ceyaM jagato mAtA devI lokanamaskRtA
3062009c asyAz ca calanaM bhUmer dRzyate satyasaMzrava
3062010a yau cemau jagatAM netre yatra sarvaM pratiSThitam
3062010c Adityacandrau grahaNam abhyupetau mahAbalau
3062011a sumahAnty api bhUtAni devAz ca puruSarSabha
3062011c na daivasya pramuJcanti sarvabhUtAni dehinaH
3062012a zakrAdiSv api deveSu vartamAnau nayAnayau
3062012c zrUyete narazArdUla na tvaM vyathitum arhasi
3062013a naSTAyAm api vaidehyAM hRtAyAm api cAnagha
3062013c zocituM nArhase vIra yathAnyaH prAkRtas tathA
3062014a tvadvidhA hi na zocanti satataM satyadarzinaH
3062014c sumahatsv api kRcchreSu rAmAnirviNNadarzaNAH
3062015a tattvato hi narazreSTha buddhyA samanucintaya
3062015c buddhyA yuktA mahAprAjJA vijAnanti zubhAzubhe
3062016a adRSTaguNadoSANAm adhRtAnAM ca karmaNAm
3062016c nAntareNa kriyAM teSAM phalam iSTaM pravartate
3062017a mAm eva hi purA vIra tvam eva bahuSo 'nvazAH
3062017c anuziSyAd dhi ko nu tvAm api sAkSAd bRhaspatiH
3062018a buddhiz ca te mahAprAjJa devair api duranvayA
3062018c zokenAbhiprasuptaM te jJAnaM saMbodhayAmy aham
3062019a divyaM ca mAnuSaM caivam Atmanaz ca parAkramam
3062019c ikSvAkuvRSabhAvekSya yatasva dviSatAM badhe
3062020a kiM te sarvavinAzena kRtena puruSarSabha
3062020c tam eva tu ripuM pApaM vijJAyoddhartum arhasi
3063001a pUrvajo 'py uktamAtras tu lakSmaNena subhASitam
3063001c sAragrAhI mahAsAraM pratijagrAha rAghavaH
3063002a saMnigRhya mahAbAhuH pravRddhaM kopam AtmanaH
3063002c avaSTabhya dhanuz citraM rAmo lakSmaNam abravIt
3063003a kiM kariSyAvahe vatsa kva vA gacchAva lakSmaNa
3063003c kenopAyena pazyeyaM sItAm iti vicintaya
3063004a taM tathA paritApArtaM lakSmaNo rAmam abravIt
3063004c idam eva janasthAnaM tvam anveSitum arhasi
3063005a rAkSasair bahubhiH kIrNaM nAnAdrumalatAyutam
3063005c santIha giridurgANi nirdarAH kandarANi ca
3063006a guhAz ca vividhA ghorA nAnAmRgagaNAkulAH
3063006c AvAsAH kiMnarANAM ca gandharvabhavanAni ca
3063007a tAni yukto mayA sArdhaM tvam anveSitum arhasi
3063007c tvadvidho buddhisaMpannA mAhAtmAno nararSabha
3063008a Apatsu na prakampante vAyuvegair ivAcalAH
3063008c ity uktas tad vanaM sarvaM vicacAra salakSmaNaH
3063009a kruddho rAmaH zaraM ghoraM saMdhAya dhanuSi kSuram
3063009c tataH parvatakUTAbhaM mahAbhAgaM dvijottamam
3063010a dadarza patitaM bhUmau kSatajArdraM jaTAyuSam
3063010c taM dRSTvA girizRGgAbhaM rAmo lakSmaNam abravIt
3063010e anena sItA vaidehI bhakSitA nAtra saMzayaH
3063011a gRdhrarUpam idaM vyaktaM rakSo bhramati kAnanam
3063011c bhakSayitvA vizAlAkSIm Aste sItAM yathAsukham
3063011e enaM vadhiSye dIptAgrair ghorair bANair ajihmagaiH
3063012a ity uktvAbhyapatad gRdhraM saMdhAya dhanuSi kSuram
3063012c kruddho rAmaH samudrAntAM cAlayann iva medinIm
3063013a taM dInadInayA vAcA saphenaM rudhiraM vaman
3063013c abhyabhASata pakSI tu rAmaM dazarathAtmajam
3063014a yAm oSadhim ivAyuSmann anveSasi mahAvane
3063014c sA devI mama ca prANA rAvaNenobhayaM hRtam
3063015a tvayA virahitA devI lakSmaNena ca rAghava
3063015c hriyamANA mayA dRSTA rAvaNena balIyasA
3063016a sItAm abhyavapan no 'haM rAvaNaz ca raNe mayA
3063016c vidhvaMsitarathacchatraH pAtito dharaNItale
3063017a etad asya dhanur bhagnam etad asya zarAvaram
3063017c ayam asya raNe rAma bhagnaH sAMgrAmiko rathaH
3063018a parizrAntasya me pakSau chittvA khaDgena rAvaNaH
3063018c sItAm AdAya vaidehIm utpapAta vihAyasaM
3063018e rakSasA nihataM pUrvma na mAM hantuM tvam arhasi
3063019a rAmas tasya tu vijJAya sItAsaktAM priyAM kathAm
3063019c gRdhrarAjaM pariSvajya ruroda sahalakSmaNaH
3063020a ekam ekAyane durge niHzvasantaM kathaM cana
3063020c samIkSya duHkhito rAmaH saumitrim idam abravIt
3063021a rAjyAd bhraMzo vane vAsaH sItA naSTA hato dvijaH
3063021c IdRzIyaM mamAlakSmIr nirdahed api pAvakam
3063022a saMpUrNam api ced adya pratareyaM mahodadhim
3063022c so 'pi nUnaM mamAlakSmyA vizuSyet saritAM patiH
3063023a nAsty abhAgyataro loke matto 'smin sacarAcare
3063023c yeneyaM mahatI prAptA mayA vyasanavAgurA
3063024a ayaM pitRvayasyo me gRdhrarAjo jarAnvitaH
3063024c zete vinihato bhUmau mama bhAgyaviparyayAt
3063025a ity evam uktvA bahuzo rAghavaH sahalakSmaNaH
3063025c jaTAyuSaM ca pasparza pitRsnehaM nidarzayan
3063026a nikRttapakSaM rudhirAvasiktaM; taM gRdhrarAjaM parirabhya rAmaH
3063026c kva maithili prANasamA mameti; vimucya vAcaM nipapAta bhUmau
3064001a rAmaH prekSya tu taM gRdhraM bhuvi raudreNa pAtitam
3064001c saumitriM mitrasaMpannam idaM vacanam abravIt
3064002a mamAyaM nUnam artheSu yatamAno vihaMgamaH
3064002c rAkSasena hataH saMkhye prANAMs tyajati dustyajAn
3064003a ayam asya zarIre 'smin prANo lakSmaNa vidyate
3064003c tathA svaravihIno 'yaM viklavaM samudIkSate
3064004a jaTAyo yadi zaknoSi vAkyaM vyAharituM punaH
3064004c sItAm AkhyAhi bhadraM te vadham AkhyAhi cAtmanaH
3064005a kiMnimitto 'harat sItAM rAvaNas tasya kiM mayA
3064005c aparAddhaM tu yaM dRSTvA rAvaNena hRtA priyA
3064006a kathaM tac candrasaMkAzaM mukham AsIn manoharam
3064006c sItayA kAni coktAni tasmin kAle dvijottama
3064007a kathaMvIryaH kathaMrUpaH kiMkarmA sa ca rAkSasaH
3064007c kva cAsya bhavanaM tAta brUhi me paripRcchataH
3064008a tam udvIkSyAtha dInAtmA vilapantam anantaram
3064008c vAcAtisannayA rAmaM jaTAyur idam abravIt
3064009a sA hRtA rAkSasendreNa rAvaNena vihAyasA
3064009c mAyAm AsthAya vipulAM vAtadurdinasaMkulAm
3064010a parizrAntasya me tAta pakSau chittvA nizAcaraH
3064010c sItAm AdAya vaidehIM prayAto dakSiNA mukhaH
3064011a uparudhyanti me prANA dRSTir bhramati rAghava
3064011c pazyAmi vRkSAn sauvarNAn uzIrakRtamUrdhajAn
3064012a yena yAti muhUrtena sItAm AdAya rAvaNaH
3064012c vipranaSTaM dhanaM kSipraM tat svAmipratipadyate
3064013a vindo nAma muhUrto 'sau sa ca kAkutstha nAbudhat
3064013c jhaSavad baDizaM gRhya kSipram eva vinazyati
3064014a na ca tvayA vyathA kAryA janakasya sutAM prati
3064014c vaidehyA raMsyase kSipraM hatvA taM rAkSasaM raNe
3064015a asaMmUDhasya gRdhrasya rAmaM pratyanubhASataH
3064015c AsyAt susrAva rudhiraM mriyamANasya sAmiSam
3064016a putro vizravasaH sAkSAd bhrAtA vaizravaNasya ca
3064016c ity uktvA durlabhAn prANAn mumoca patagezvaraH
3064017a brUhi brUhIti rAmasya bruvANasya kRtAJjaleH
3064017c tyaktvA zarIraM gRdhrasya jagmuH prANA vihAyasaM
3064018a sa nikSipya ziro bhUmau prasArya caraNau tadA
3064018c vikSipya ca zarIraM svaM papAta dharaNItale
3064019a taM gRdhraM prekSya tAmrAkSaM gatAsum acalopamam
3064019c rAmaH subahubhir duHkhair dInaH saumitrim abravIt
3064020a bahUni rakSasAM vAse varSANi vasatA sukham
3064020c anena daNDakAraNye vicIrNam iha pakSiNA
3064021a anekavArSiko yas tu cirakAlaM samutthitaH
3064021c so 'yam adya hataH zete kAlo hi duratikramaH
3064022a pazya lakSmaNa gRdhro 'yam upakArI hataz ca me
3064022c sItAm abhyavapan no vai rAvaNena balIyasA
3064023a gRdhrarAjyaM parityajya pitRpaitAmahaM mahat
3064023c mama hetor ayaM prANAn mumoca patagezvaraH
3064024a sarvatra khalu dRzyante sAdhavo dharmacAriNaH
3064024c zUrAH zaraNyAH saumitre tiryagyonigateSv api
3064025a sItAharaNajaM duHkhaM na me saumya tathAgatam
3064025c yathA vinAzo gRdhrasya matkRte ca paraMtapa
3064026a rAjA dazarathaH zrImAn yathA mama mayA yazAH
3064026c pUjanIyaz ca mAnyaz ca tathAyaM patagezvaraH
3064027a saumitre hara kASThAni nirmathiSyAmi pAvakam
3064027c gRdhrarAjaM didhakSAmi matkRte nidhanaM gatam
3064028a nAthaM patagalokasya citAm AropayAmy aham
3064028c imaM dhakSyAmi saumitre hataM raudreNa rakSasA
3064029a yA gatir yajJazIlAnAm AhitAgnez ca yA gatiH
3064029c aparAvartinAM yA ca yA ca bhUmipradAyinAm
3064030a mayA tvaM samanujJAto gaccha lokAn anuttamAn
3064030c gRdhrarAja mahAsattva saMskRtaz ca mayA vraja
3064031a evam uktvA citAM dIptAm Aropya patagezvaram
3064031c dadAha rAmo dharmAtmA svabandhum iva duHkhitaH
3064032a rAmo 'tha sahasaumitrir vanaM yAtvA sa vIryavAn
3064032c sthUlAn hatvA mahArohIn anu tastAra taM dvijam
3064033a rohimAMsAni coddhRtya pezIkRtvA mahAyazAH
3064033c zakunAya dadau rAmo ramye haritazAdvale
3064034a yat tat pretasya martyasya kathayanti dvijAtayaH
3064034c tat svargagamanaM tasya kSipraM rAmo jajApa ha
3064035a tato godAvarIM gatvA nadIM naravarAtmajau
3064035c udakaM cakratus tasmai gRdhrarAjAya tAv ubhau
3064036a sa gRdhrarAjaH kRtavAn yazaskaraM; suduSkaraM karma raNe nipAtitaH
3064036c maharSikalpena ca saMskRtas tadA; jagAma puNyAM gatim AtmanaH zubhAm
3065001a kRtvaivam udakaM tasmai prasthitau rAghavau tadA
3065001c avekSantau vane sItAM pazcimAM jagmatur dizam
3065002a tAM dizaM dakSiNAM gatvA zaracApAsidhAriNau
3065002c aviprahatam aikSvAkau panthAnaM pratipedatuH
3065003a gulmair vRkSaiz ca bahubhir latAbhiz ca praveSTitam
3065003c AvRtaM sarvato durgaM gahanaM ghoradarzanam
3065004a vyatikramya tu vegena gRhItvA dakSiNAM dizam
3065004c subhImaM tan mahAraNyaM vyatiyAtau mahAbalau
3065005a tataH paraM janasthAnAt trikrozaM gamya rAghavau
3065005c krauJcAraNyaM vivizatur gahanaM tau mahaujasau
3065006a nAnAmeghaghanaprakhyaM prahRSTam iva sarvataH
3065006c nAnAvarNaiH zubhaiH puSpair mRgapakSigaNair yutam
3065007a didRkSamANau vaidehIM tad vanaM tau vicikyatuH
3065007c tatra tatrAvatiSThantau sItAharaNakarzitau
3065008a lakSmaNas tu mahAtejAH sattvavAJ zIlavAJ zuciH
3065008c abravIt prAJjalir vAkyaM bhrAtaraM dIptatejasaM
3065009a spandate me dRDhaM bAhur udvignam iva me manaH
3065009c prAyazaz cApy aniSTAni nimittAny upalakSaye
3065010a tasmAt sajjIbhavArya tvaM kuruSva vacanaM hitam
3065010c mamaiva hi nimittAni sadyaH zaMsanti saMbhramam
3065011a eSa vaJculako nAma pakSI paramadAruNaH
3065011c Avayor vijayaM yuddhe zaMsann iva vinardati
3065012a tayor anveSator evaM sarvaM tad vanam ojasA
3065012c saMjajJe vipulaH zabdaH prabhaJjann iva tad vanam
3065013a saMveSTitam ivAtyarthaM gahanaM mAtarizvanA
3065013c vanasya tasya zabdo 'bhUd divam ApUrayann iva
3065014a taM zabdaM kAGkSamANas tu rAmaH kakSe sahAnujaH
3065014c dadarza sumahAkAyaM rAkSasaM vipulorasaM
3065015a Asedatus tatas tatra tAv ubhau pramukhe sthitam
3065015c vivRddham azirogrIvaM kabandham udare mukham
3065016a romabhir nicitais tIkSNair mahAgirim ivocchritam
3065016c nIlameghanibhaM raudraM meghastanitaniHsvanam
3065017a mahApakSmeNa piGgena vipulenAyatena ca
3065017c ekenorasi ghoreNa nayanenAzudarzinA
3065018a mahAdaMSTropapannaM taM lelihAnaM mahAmukham
3065018c bhakSayantaM mahAghorAn RkSasiMhamRgadvipAn
3065019a ghorau bhujau vikurvANam ubhau yojanam Ayatau
3065019c karAbhyAM vividhAn gRhya RSkAn pakSigaNAn mRgAn
3065020a AkarSantaM vikarSantam anekAn mRgayUthapAn
3065020c sthitam AvRtya panthAnaM tayor bhrAtroH prapannayoH
3065021a atha tau samatikramya krozamAtre dadarzatuH
3065021c mahAntaM dAruNaM bhImaM kabandhaM bhujasaMvRtam
3065022a sa mahAbAhur atyarthaM prasArya vipulau bhujau
3065022c jagrAha sahitAv eva rAghavau pIDayan balAt
3065023a khaDginau dRDhadhanvAnau tigmatejau mahAbhujau
3065023c bhrAtarau vivazaM prAptau kRSyamANau mahAbalau
3065024a tAv uvAca mahAbAhuH kabandho dAnavottamaH
3065024c kau yuvAM vRSabhaskandhau mahAkhaDgadhanurdharau
3065025a ghoraM dezam imaM prAptau mama bhakSAv upasthitau
3065025c vadataM kAryam iha vAM kimarthaM cAgatau yuvAm
3065026a imaM dezam anuprAptau kSudhArtasyeha tiSThataH
3065026c sabANacApakhaDgau ca tIkSNazRGgAv ivarSabhau
3065026e mamAsyam anusaMprAptau durlabhaM jIvitaM punaH
3065027a tasya tad vacanaM zrutvA kabandhasya durAtmanaH
3065027c uvAca lakSmaNaM rAmo mukhena parizuSyatA
3065028a kRcchrAt kRcchrataraM prApya dAruNaM satyavikrama
3065028c vyasanaM jIvitAntAya prAptam aprApya tAM priyAm
3065029a kAlasya sumahad vIryaM sarvabhUteSu lakSmaNa
3065029c tvAM ca mAM ca naravyAghra vyasanaiH pazya mohitau
3065029e nAtibhAro 'sti daivasya sarvabhuteSu lakSmaNa
3065030a zUrAz ca balavantaz ca kRtAstrAz ca raNAjire
3065030c kAlAbhipannAH sIdanti yathA vAlukasetavaH
3065031a iti bruvANo dRDhasatyavikramo; mahAyazA dAzarathiH pratApavAn
3065031c avekSya saumitrim udagravikramaM; sthirAM tadA svAM matim AtmanAkarot
3066001a tau tu tatra sthitau dRSTvA bhrAtarau rAmalakSmaNau
3066001c bAhupAzaparikSiptau kabandho vAkyam abravIt
3066002a tiSThataH kiM nu mAM dRSTvA kSudhArtaM kSatriyarSabhau
3066002c AhArArthaM tu saMdiSTau daivena gatacetasau
3066003a tac chrutvA lakSmaNo vAkyaM prAptakAlaM hitaM tadA
3066003c uvAcArtisamApanno vikrame kRtanizcayaH
3066004a tvAM ca mAM ca purA tUrNam Adatte rAkSasAdhamaH
3066004c tasmAd asibhyAm asyAzu bAhU chindAvahe gurU
3066005a tatas tau dezakAlajJau khaDgAbhyAm eva rAghavau
3066005c acchindatAM susaMhRSTau bAhU tasyAMsadezayoH
3066006a dakSiNo dakSiNaM bAhum asaktam asinA tataH
3066006c ciccheda rAmo vegena savyaM vIras tu lakSmaNaH
3066007a sa papAta mahAbAhuz chinnabAhur mahAsvanaH
3066007c khaM ca gAM ca dizaz caiva nAdayaJ jalado yathA
3066008a sa nikRttau bhujau dRSTvA zoNitaughapariplutaH
3066008c dInaH papraccha tau vIrau kau yuvAm iti dAnavaH
3066009a iti tasya bruvANasya lakSmaNaH zubhalakSaNaH
3066009c zazaMsa tasya kAkutsthaM kabandhasya mahAbalaH
3066010a ayam ikSvAkudAyAdo rAmo nAma janaiH zrutaH
3066010c asyaivAvarajaM viddhi bhrAtaraM mAM ca lakSmaNam
3066011a asya devaprabhAvasya vasato vijane vane
3066011c rakSasApahRtA bhAryA yAm icchantAv ihAgatau
3066012a tvaM tu ko vA kimarthaM vA kabandha sadRzo vane
3066012c Asyenorasi dIptena bhagnajaGgho viceSTase
3066013a evam uktaH kabandhas tu lakSmaNenottaraM vacaH
3066013c uvAca paramaprItas tad indravacanaM smaran
3066014a svAgataM vAM naravyAghrau diSTyA pazyAmi cApy aham
3066014c diSTyA cemau nikRttau me yuvAbhyAM bAhubandhanau
3066015a virUpaM yac ca me rUpaM prAptaM hy avinayAd yathA
3066015c tan me zRNu naravyAghra tattvataH zaMsatas tava
3067001a purA rAma mahAbAho mahAbalaparAkrama
3067001c rUpam AsIn mamAcintyaM triSu lokeSu vizrutam
3067001e yathA somasya zakrasya sUryasya ca yathA vapuH
3067002a so 'haM rUpam idaM kRtvA lokavitrAsanaM mahat
3067002c RSIn vanagatAn rAma trAsayAmi tatas tataH
3067003a tataH sthUlazirA nAma maharSiH kopito mayA
3067003c saMcinvan vividhaM vanyaM rUpeNAnena dharSitaH
3067004a tenAham uktaH prekSyaivaM ghorazApAbhidhAyinA
3067004c etad eva nRzaMsaM te rUpam astu vigarhitam
3067005a sa mayA yAcitaH kruddhaH zApasyAnto bhaved iti
3067005c abhizApakRtasyeti tenedaM bhASitaM vacaH
3067006a yadA chittvA bhujau rAmas tvAM dahed vijane vane
3067006c tadA tvaM prApsyase rUpaM svam eva vipulaM zubham
3067007a zriyA virAjitaM putraM danos tvaM viddhi lakSmaNa
3067007c indrakopAd idaM rUpaM prAptam evaM raNAjire
3067008a ahaM hi tapasogreNa pitAmaham atoSayam
3067008c dIrgham AyuH sa me prAdAt tato mAM vibhramo 'spRzat
3067009a dIrgham Ayur mayA prAptaM kiM me zakraH kariSyati
3067009c ity evaM buddhim AsthAya raNe zakram adharSayam
3067010a tasya bAhupramuktena vajreNa zataparvaNA
3067010c sakthinI ca ziraz caiva zarIre saMpravezitam
3067011a sa mayA yAcyamAnaH sann Anayad yamasAdanam
3067011c pitAmahavacaH satyaM tad astv iti mamAbravIt
3067012a anAhAraH kathaM zakto bhagnasakthiziromukhaH
3067012c vajreNAbhihataH kAlaM sudIrgham api jIvitum
3067013a evam uktas tu me zakro bAhU yojanam Ayatau
3067013c prAdAd AsyaM ca me kukSau tIkSNadaMSTram akalpayat
3067014a so 'haM bhujAbhyAM dIrghAbhyAM samAkRSya vanecarAn
3067014c siMhadvipamRgavyAghrAn bhakSayAmi samantataH
3067015a sa tu mAm abravId indro yadA rAmaH salakSmaNaH
3067015c chetsyate samare bAhU tadA svargaM gamiSyasi
3067016a sa tvaM rAmo 'si bhadraM te nAham anyena rAghava
3067016c zakyo hantuM yathAtattvam evam uktaM maharSiNA
3067017a ahaM hi matisAcivyaM kariSyAmi nararSabha
3067017c mitraM caivopadekSyAmi yuvAbhyAM saMskRto 'gninA
3067018a evam uktas tu dharmAtmA danunA tena rAghavaH
3067018c idaM jagAda vacanaM lakSmaNasyopazRNvataH
3067019a rAvaNena hRtA sItA mama bhAryA yazasvinI
3067019c niSkrAntasya janasthAnAt saha bhrAtrA yathAsukham
3067020a nAmamAtraM tu jAnAmi na rUpaM tasya rakSasaH
3067020c nivAsaM vA prabhAvaM vA vayaM tasya na vidmahe
3067021a zokArtAnAm anAthAnAm evaM viparidhAvatAm
3067021c kAruNyaM sadRzaM kartum upakAre ca vartatAm
3067022a kASThAny AnIya zuSkANi kAle bhagnAni kuJjaraiH
3067022c bhakSyAmas tvAM vayaM vIra zvabhre mahati kalpite
3067023a sa tvaM sItAM samAcakSva yena vA yatra vA hRtA
3067023c kuru kalyANam atyarthaM yadi jAnAsi tattvataH
3067024a evam uktas tu rAmeNa vAkyaM danur anuttamam
3067024c provAca kuzalo vaktuM vaktAram api rAghavam
3067025a divyam asti na me jJAnaM nAbhijAnAmi maithilIm
3067025c yas tAM jJAsyati taM vakSye dagdhaH svaM rUpam AsthitaH
3067026a adagdhasya hi vijJAtuM zaktir asti na me prabho
3067026c rAkSasaM taM mahAvIryaM sItA yena hRtA tava
3067027a vijJAnaM hi mahad bhraSTaM zApadoSeNa rAghava
3067027c svakRtena mayA prAptaM rUpaM lokavigarhitam
3067028a kiM tu yAvan na yAty astaM savitA zrAntavAhanaH
3067028c tAvan mAm avaTe kSiptvA daha rAma yathAvidhi
3067029a dagdhas tvayAham avaTe nyAyena raghunandana
3067029c vakSyAmi tam ahaM vIra yas taM jJAsyati rAkSasaM
3067030a tena sakhyaM ca kartavyaM nyAyyavRttena rAghava
3067030c kalpayiSyati te prItaH sAhAyyaM laghuvikramaH
3067031a na hi tasyAsty avijJAtaM triSu lokeSu rAghava
3067031c sarvAn parisRto lokAn purA vai kAraNAntare
3068001a evam uktau tu tau vIrau kabandhena narezvarau
3068001c giripradaram AsAdya pAvakaM visasarjatuH
3068002a lakSmaNas tu maholkAbhir jvalitAbhiH samantataH
3068002c citAm AdIpayAm Asa sA prajajvAla sarvataH
3068003a tac charIraM kabandhasya ghRtapiNDopamaM mahat
3068003c medasA pacyamAnasya mandaM dahati pAvaka
3068004a sa vidhUya citAm Azu vidhUmo 'gnir ivotthitaH
3068004c araje vAsasI vibhran mAlAM divyAM mahAbalaH
3068005a tataz citAyA vegena bhAsvaro virajAmbaraH
3068005c utpapAtAzu saMhRSTaH sarvapratyaGgabhUSaNaH
3068006a vimAne bhAsvare tiSThan haMsayukte yazaskare
3068006c prabhayA ca mahAtejA dizo daza virAjayan
3068007a so 'ntarikSagato rAmaM kabandho vAkyam abravIt
3068007c zRNu rAghava tattvena yathA sImAm avApsyasi
3068008a rAma SaD yuktayo loke yAbhiH sarvaM vimRzyate
3068008c parimRSTo dazAntena dazAbhAgena sevyate
3068009a dazAbhAgagato hInas tvaM rAma sahalakSmaNaH
3068009c yat kRte vyasanaM prAptaM tvayA dArapradharSaNam
3068010a tad avazyaM tvayA kAryaH sa suhRt suhRdAM vara
3068010c akRtvA na hi te siddhim ahaM pazyAmi cintayan
3068011a zrUyatAM rAma vakSyAmi sugrIvo nAma vAnaraH
3068011c bhrAtrA nirastaH kruddhena vAlinA zakrasUnunA
3068012a RSyamUke girivare pampAparyantazobhite
3068012c nivasaty AtmavAn vIraz caturbhiH saha vAnaraiH
3068013a vayasyaM taM kuru kSipram ito gatvAdya rAghava
3068013c adrohAya samAgamya dIpyamAne vibhAvasau
3068014a na ca te so 'vamantavyaH sugrIvo vAnarAdhipaH
3068014c kRtajJaH kAmarUpI ca sahAyArthI ca vIryavAn
3068015a zaktau hy adya yuvAM kartuM kAryaM tasya cikIrSitam
3068015c kRtArtho vAkRtArtho vA kRtyaM tava kariSyati
3068016a sa RkSarajasaH putraH pampAm aTati zaGkitaH
3068016c bhAskarasyaurasaH putro vAlinA kRtakilbiSaH
3068017a saMnidhAyAyudhaM kSipram RSyamUkAlayaM kapim
3068017c kuru rAghava satyena vayasyaM vanacAriNam
3068018a sa hi sthAnAni sarvANi kArtsnyena kapikuJjaraH
3068018c naramAMsAzinAM loke naipuNyAd adhigacchati
3068019a na tasyAviditaM loke kiM cid asti hi rAghava
3068019c yAvat sUryaH pratapati sahasrAMzur ariMdama
3068020a sa nadIr vipulAJ zailAn giridurgANi kandarAn
3068020c anviSya vAnaraiH sArdhaM patnIM te 'dhigamiSyati
3068021a vAnarAMz ca mahAkAyAn preSayiSyati rAghava
3068021c dizo vicetuM tAM sItAM tvadviyogena zocatIm
3068022a sa meruzRGgAgragatAm aninditAM; pravizya pAtAlatale 'pi vAzritAm
3068022c plavaMgamAnAM pravaras tava priyAM; nihatya rakSAMsi punaH pradAsyati
3069001a nidarzayitvA rAmAya sItAyAH pratipAdane
3069001c vAkyam anvartham arthajJaH kabandhaH punar abravIt
3069002a eSa rAma zivaH panthA yatraite puSpitA drumAH
3069002c pratIcIM dizam Azritya prakAzante manoramAH
3069003a jambUpriyAlapanasAH plakSanyagrodhatindukAH
3069003c azvatthAH karNikArAz ca cUtAz cAnye ca pAdapAH
3069004a tAn AruhyAtha vA bhUmau pAtayitvA ca tAn balAt
3069004c phalAny amRtakalpAni bhakSayantau gamiSyathaH
3069005a caGkramantau varAn dezAJ zailAc chailaM vanAd vanam
3069005c tataH puSkariNIM vIrau pampAM nAma gamiSyathaH
3069006a azarkarAm avibhraMzAM samatIrtham azaivalAm
3069006c rAma saMjAtavAlUkAM kamalotpalazobhitAm
3069007a tatra haMsAH plavAH krauJcAH kurarAz caiva rAghava
3069007c valgusvarA nikUjanti pampAsalilagocarAH
3069008a nodvijante narAn dRSTvA vadhasyAkovidAH zubhAH
3069008c ghRtapiNDopamAn sthUlAMs tAn dvijAn bhakSayiSyathaH
3069009a rohitAn vakratuNDAMz ca nalamInAMz ca rAghava
3069009c pampAyAm iSubhir matsyAMs tatra rAma varAn hatAn
3069010a nistvakpakSAn ayastaptAn akRzAn ekakaNTakAn
3069010c tava bhaktyA samAyukto lakSmaNaH saMpradAsyati
3069011a bhRzaM te khAdato matsyAn pampAyAH puSpasaMcaye
3069011c padmagandhi zivaM vAri sukhazItam anAmayam
3069012a uddhRtya sa tadAkliSTaM rUpyasphaTikasaMnibham
3069012c atha puSkaraparNena lakSmaNaH pAyayiSyati
3069013a sthUlAn giriguhAzayyAn varAhAn vanacAriNaH
3069013c apAM lobhAd upAvRttAn vRSabhAn iva nardataH
3069013e rUpAnvitAMz ca pampAyAM drakSyasi tvaM narottama
3069014a sAyAhne vicaran rAma viTapI mAlyadhAriNaH
3069014c zItodakaM ca pampAyAM dRSTvA zokaM vihAsyasi
3069015a sumanobhiz citAMs tatra tilakAn naktamAlakAn
3069015c utpalAni ca phullAni paGkajAni ca rAghava
3069016a na tAni kaz cin mAlyAni tatrAropayitA naraH
3069016c mataGgaziSyAs tatrAsann RSayaH susamAhitaH
3069017a teSAM bhArAbhitaptAnAM vanyam AharatAM guroH
3069017c ye prapetur mahIM tUrNaM zarIrAt svedabindavaH
3069018a tAni mAlyAni jAtAni munInAM tapasA tadA
3069018c svedabindusamutthAni na vinazyanti rAghava
3069019a teSAm adyApi tatraiva dRzyate paricAriNI
3069019c zramaNI zabarI nAma kAkutstha cirajIvinI
3069020a tvAM tu dharme sthitA nityaM sarvabhUtanamaskRtam
3069020c dRSTvA devopamaM rAma svargalokaM gamiSyati
3069021a tatas tad rAma pampAyAs tIram Azritya pazcimam
3069021c AzramasthAnam atulaM guhyaM kAkutstha pazyasi
3069022a na tatrAkramituM nAgAH zaknuvanti tam Azramam
3069022c RSes tasya mataGgasya vidhAnAt tac ca kAnanam
3069023a tasmin nandanasaMkAze devAraNyopame vane
3069023c nAnAvihagasaMkIrNe raMsyase rAma nirvRtaH
3069024a RSyamUkas tu pampAyAH purastAt puSpitadrumaH
3069024c suduHkhArohaNo nAma zizunAgAbhirakSitaH
3069024e udAro brahmaNA caiva pUrvakAle vinirmitaH
3069025a zayAnaH puruSo rAma tasya zailasya mUrdhani
3069025c yat svapne labhate vittaM tat prabuddho 'dhigacchati
3069026a na tv enaM viSamAcAraH pApakarmAdhirohati
3069026c tatraiva praharanty enaM suptam AdAya rAkSasAH
3069027a tato 'pi zizunAgAnAm AkrandaH zrUyate mahAn
3069027c krIDatAM rAma pampAyAM mataGgAraNyavAsinAm
3069028a siktA rudhiradhArAbhiH saMhatya paramadvipAH
3069028c pracaranti pRthak kIrNA meghavarNAs tarasvinaH
3069029a te tatra pItvA pAnIyaM vimalaM zItam avyayam
3069029c nivRttAH saMvigAhante vanAni vanagocarAH
3069030a rAma tasya tu zailasya mahatI zobhate guhA
3069030c zilApidhAnA kAkutstha duHkhaM cAsyAH pravezanam
3069031a tasyA guhAyAH prAgdvAre mahAJ zItodako hradaH
3069031c bahumUlaphalo ramyo nAnAnagasamAvRtaH
3069032a tasyAM vasati sugrIvaz caturbhiH saha vAnaraiH
3069032c kadA cic chikhare tasya parvatasyAvatiSThate
3069033a kabandhas tv anuzAsyaivaM tAv ubhau rAmalakSmaNau
3069033c sragvI bhAskaravarNAbhaH khe vyarocata vIryavAn
3069034a taM tu khasthaM mahAbhAgaM kabandhaM rAmalakSmaNau
3069034c prasthitau tvaM vrajasveti vAkyam Ucatur antikAt
3069035a gamyatAM kAryasiddhyartham iti tAv abravIc ca saH
3069035c suprItau tAv anujJApya kabandhaH prasthitas tadA
3069036a sa tat kabandhaH pratipadya rUpaM; vRtaH zriyA bhAskaratulyadehaH
3069036c nidarzayan rAmam avekSya khasthaH; sakhyaM kuruSveti tadAbhyuvAca
3070001a tau kabandhena taM mArgaM pampAyA darzitaM vane
3070001c Atasthatur dizaM gRhya pratIcIM nRvarAtmajau
3070002a tau zaileSv AcitAnekAn kSaudrakalpaphaladrumAn
3070002c vIkSantau jagmatur draSTuM sugrIvaM rAmalakSmaNau
3070003a kRtvA ca zailapRSThe tu tau vAsaM raghunandanau
3070003c pampAyAH pazcimaM tIraM rAghavAv upatasthatuH
3070004a tau puSkariNyAH pampAyAs tIram AsAdya pazcimam
3070004c apazyatAM tatas tatra zabaryA ramyam Azramam
3070005a tau tam Azramam AsAdya drumair bahubhir AvRtam
3070005c suramyam abhivIkSantau zabarIm abhyupeyatuH
3070006a tau tu dRSTvA tadA siddhA samutthAya kRtAJjaliH
3070006c pAdau jagrAha rAmasya lakSmaNasya ca dhImataH
3070007a tAm uvAca tato rAmaH zramaNIM saMzitavratAm
3070007c kaccit te nirjitA vighnAH kaccit te vardhate tapaH
3070008a kaccit te niyataH kopa AhAraz ca tapodhane
3070008c kaccit te niyamAH prAptAH kaccit te manasaH sukham
3070008e kaccit te guruzuzrUSA saphalA cArubhASiNi
3070009a rAmeNa tApasI pRSThA sA siddhA siddhasaMmatA
3070009c zazaMsa zabarI vRddhA rAmAya pratyupasthitA
3070010a citrakUTaM tvayi prApte vimAnair atulaprabhaiH
3070010c itas te divam ArUDhA yAn ahaM paryacAriSam
3070011a taiz cAham uktA dharmajJair mahAbhAgair maharSibhiH
3070011c AgamiSyati te rAmaH supuNyam imam Azramam
3070012a sa te pratigrahItavyaH saumitrisahito 'tithiH
3070012c taM ca dRSTvA varA&l lokAn akSayAMs tvaM gamiSyasi
3070013a mayA tu vividhaM vanyaM saMcitaM puruSarSabha
3070013c tavArthe puruSavyAghra pampAyAs tIrasaMbhavam
3070014a evam uktaH sa dharmAtmA zabaryA zabarIm idam
3070014c rAghavaH prAha vijJAne tAM nityam abahiSkRtAm
3070015a danoH sakAzAt tattvena prabhAvaM te mahAtmanaH
3070015c zrutaM pratyakSam icchAmi saMdraSTuM yadi manyase
3070016a etat tu vacanaM zrutvA rAmavaktrAd viniHsRtam
3070016c zabarI darzayAm Asa tAv ubhau tad vanaM mahat
3070017a pazya meghaghanaprakhyaM mRgapakSisamAkulam
3070017c mataGgavanam ity eva vizrutaM raghunandana
3070018a iha te bhAvitAtmAno guravo me mahAdyute
3070018c juhavAMz cakrire tIrthaM mantravan mantrapUjitam
3070019a iyaM pratyak sthalI vedI yatra te me susatkRtAH
3070019c puSpopahAraM kurvanti zramAd udvepibhiH karaiH
3070020a teSAM tapaH prabhAvena pazyAdyApi raghUttama
3070020c dyotayanti dizaH sarvAH zriyA vedyo 'tulaprabhAH
3070021a azaknuvadbhis tair gantum upavAsazramAlasaiH
3070021c cintite 'bhyAgatAn pazya sametAn sapta sAgarAn
3070022a kRtAbhiSekais tair nyastA valkalAH pAdapeSv iha
3070022c adyApi na vizuSyanti pradeze raghunandana
3070023a kRtsnaM vanam idaM dRSTaM zrotavyaM ca zrutaM tvayA
3070023c tad icchAmy abhyanujJAtA tyaktum etat kalevaram
3070024a teSAm icchAmy ahaM gantuM samIpaM bhAvitAtmanAm
3070024c munInAm AzraMmo yeSAm ahaM ca paricAriNI
3070025a dharmiSThaM tu vacaH zrutvA rAghavaH sahalakSmaNaH
3070025c anujAnAmi gaccheti prahRSTavadano 'bravIt
3070026a anujJAtA tu rAmeNa hutvAtmAnaM hutAzane
3070026c jvalatpAvakasaMkAzA svargam eva jagAma sA
3070027a yatra te sukRtAtmAno viharanti maharSayaH
3070027c tat puNyaM zabarIsthAnaM jagAmAtmasamAdhinA
3071001a divaM tu tasyAM yAtAyAM zabaryAM svena karmaNA
3071001c lakSmaNena saha bhrAtrA cintayAm Asa rAghavaH
3071002a cintayitvA tu dharmAtmA prabhAvaM taM mahAtmanAm
3071002c hitakAriNam ekAgraM lakSmaNaM rAghavo 'bravIt
3071003a dRSTo 'yam AzramaH saumya bahvAzcaryaH kRtAtmanAm
3071003c vizvastamRgazArdUlo nAnAvihagasevitaH
3071004a saptAnAM ca samudrANAm eSu tIrtheSu lakSmaNa
3071004c upaspRSTaM ca vidhivat pitaraz cApi tarpitAH
3071005a pranaSTam azubhaM yat tat kalyANaM samupasthitam
3071005c tena tv etat prahRSTaM me mano lakSmaNa saMprati
3071006a hRdaye hi naravyAghra zubham AvirbhaviSyati
3071006c tad Agaccha gamiSyAvaH pampAM tAM priyadarzanAm
3071007a RzyamUko girir yatra nAtidUre prakAzate
3071007c yasmin vasati dharmAtmA sugrIvo 'MzumataH sutaH
3071007e nityaM vAlibhayAt trastaz caturbhiH saha vAnaraiH
3071008a abhitvare ca taM draSTuM sugrIvaM vAnararSabham
3071008c tadadhInaM hi me saumya sItAyAH parimArgaNam
3071009a iti bruvANaM taM rAmaM saumitrir idam abravIt
3071009c gacchAvas tvaritaM tatra mamApi tvarate manaH
3071010a AzramAt tu tatas tasmAn niSkramya sa vizAM patiH
3071010c AjagAma tataH pampAM lakSmaNena sahAbhibhUH
3071011a samIkSamANaH puSpADhyaM sarvato vipuladrumam
3071011c koyaSTibhiz cArjunakaiH zatapatraiz ca kIcakaiH
3071011e etaiz cAnyaiz ca vividhair nAditaM tad vanaM mahat
3071012a sa rAmo vidhivAn vRkSAn sarAMsi vividhAni ca
3071012c pazyan kAmAbhisaMtapto jagAma paramaM hradam
3071013a sa tAm AsAdya vai rAmo dUrAd udakavAhinIm
3071013c mataGgasarasaM nAma hradaM samavagAhata
3071014a sa tu zokasamAviSTo rAmo dazarathAtmajaH
3071014c viveza nalinIM pampAM paGkajaiz ca samAvRtAm
3071015a tilakAzokapuMnAgabakuloddAla kAzinIm
3071015c ramyopavanasaMbAdhAM padmasaMpIDitodakAm
3071016a sphaTikopamatoyADhyAM zlakSNavAlukasaMtatAm
3071016c matsyakacchapasaMbAdhAM tIrasthadrumazobhitAm
3071017a sakhIbhir iva yuktAbhir latAbhir anuveSTitAm
3071017c kiMnaroragagandharvayakSarAkSasasevitAm
3071017e nAnAdrumalatAkIrNAM zItavArinidhiM zubhAm
3071018a padmaiH saugandhikais tAmrAM zuklAM kumudamaNDalaiH
3071018c nIlAM kuvalayoddhAtair bahuvarNAM kuthAm iva
3071019a aravindotpalavatIM padmasaugandhikAyutAm
3071019c puSpitAmravaNopetAM barhiNodghuSTanAditAm
3071020a sa tAM dRSTvA tataH pampAM rAmaH saumitriNA saha
3071020c vilalApa ca tejasvI kAmAd dazarathAtmajaH
3071021a tilakair bIjapUraiz ca vaTaiH zukladrumais tathA
3071021c puSpitaiH karavIraiz ca puMnAgaiz ca supuSpitaiH
3071022a mAlatIkundagulmaiz ca bhaNDIrair niculais tathA
3071022c azokaiH saptaparNaiz ca ketakair atimuktakaiH
3071022e anyaiz ca vividhair vRkSaiH pramadevopazobhitAm
3071023a asyAs tIre tu pUrvoktaH parvato dhAtumaNDitaH
3071023c RzyamUka iti khyAtaz citrapuSpitakAnanaH
3071024a harir RkSarajo nAmnaH putras tasya mahAtmanaH
3071024c adhyAste taM mahAvIryaH sugrIva iti vizrutaH
3071025a sugrIvam abhigaccha tvaM vAnarendraM nararSabha
3071025c ity uvAca punar vAkyaM lakSmaNaM satyavikramam
3071026a tato mahad vartma ca dUrasaMkramaM; krameNa gatvA pravilokayan vanam
3071026c dadarza pampAM zubhadarza kAnanAm; anekanAnAvidhapakSisaMkulAm