% Ramayana: Yuddhakanda
% Last updated: Wed Mar 11 2020
% Encoding: ASCII
%
6001001a zrutvA hanumato vAkyaM yathAvad abhibhASitam
6001001c rAmaH prItisamAyukto vAkyam uttaram abravIt
6001002a kRtaM hanumatA kAryaM sumahad bhuvi duSkaram
6001002c manasApi yad anyena na zakyaM dharaNItale
6001003a na hi taM paripazyAmi yas tareta mahArNavam
6001003c anyatra garuNAd vAyor anyatra ca hanUmataH
6001004a devadAnavayakSANAM gandharvoragarakSasAm
6001004c apradhRSyAM purIM laGkAM rAvaNena surakSitAm
6001005a praviSTaH sattvam Azritya jIvan ko nAma niSkramet
6001005c ko vizet sudurAdharSAM rAkSasaiz ca surakSitAm
6001005e yo vIryabalasaMpanno na samaH syAd dhanUmataH
6001006a bhRtyakAryaM hanumatA sugrIvasya kRtaM mahat
6001006c evaM vidhAya svabalaM sadRzaM vikramasya ca
6001007a yo hi bhRtyo niyuktaH san bhartrA karmaNi duSkare
6001007c kuryAt tadanurAgeNa tam AhuH puruSottamam
6001008a niyukto nRpateH kAryaM na kuryAd yaH samAhitaH
6001008c bhRtyo yuktaH samarthaz ca tam AhuH puruSAdhamam
6001009a tanniyoge niyuktena kRtaM kRtyaM hanUmatA
6001009c na cAtmA laghutAM nItaH sugrIvaz cApi toSitaH
6001010a ahaM ca raghuvaMzaz ca lakSmaNaz ca mahAbalaH
6001010c vaidehyA darzanenAdya dharmataH parirakSitAH
6001011a idaM tu mama dInasyA mano bhUyaH prakarSati
6001011c yad ihAsya priyAkhyAtur na kurmi sadRzaM priyam
6001012a eSa sarvasvabhUtas tu pariSvaGgo hanUmataH
6001012c mayA kAlam imaM prApya dattas tasya mahAtmanaH
6001013a sarvathA sukRtaM tAvat sItAyAH parimArgaNam
6001013c sAgaraM tu samAsAdya punar naSTaM mano mama
6001014a kathaM nAma samudrasya duSpArasya mahAmbhasaH
6001014c harayo dakSiNaM pAraM gamiSyanti samAhitAH
6001015a yady apy eSa tu vRttAnto vaidehyA gadito mama
6001015c samudrapAragamane harINAM kim ivottaram
6001016a ity uktvA zokasaMbhrAnto rAmaH zatrunibarhaNaH
6001016c hanUmantaM mahAbAhus tato dhyAnam upAgamat
6002001a taM tu zokaparidyUnaM rAmaM dazarathAtmajam
6002001c uvAca vacanaM zrImAn sugrIvaH zokanAzanam
6002002a kiM tvaM saMtapyase vIra yathAnyaH prAkRtas tathA
6002002c maivaM bhUs tyaja saMtApaM kRtaghna iva sauhRdam
6002003a saMtApasya ca te sthAnaM na hi pazyAmi rAghava
6002003c pravRttAv upalabdhAyAM jJAte ca nilaye ripoH
6002004a dhRtimAJ zAstravit prAjJaH paNDitaz cAsi rAghava
6002004c tyajemAM pApikAM buddhiM kRtvAtmevArthadUSaNIm
6002005a samudraM laGghayitvA tu mahAnakrasamAkulam
6002005c laGkAm ArohayiSyAmo haniSyAmaz ca te ripum
6002006a nirutsAhasya dInasya zokaparyAkulAtmanaH
6002006c sarvArthA vyavasIdanti vyasanaM cAdhigacchati
6002007a ime zUrAH samarthAz ca sarve no hariyUthapAH
6002007c tvatpriyArthaM kRtotsAhAH praveSTum api pAvakam
6002008a eSAM harSeNa jAnAmi tarkaz cAsmin dRDho mama
6002008c vikrameNa samAneSye sItAM hatvA yathA ripum
6002009a setur atra yathA vadhyed yathA pazyema tAM purIm
6002009c tasya rAkSasarAjasya tathA tvaM kuru rAghava
6002010a dRSTvA tAM hi purIM laGkAM trikUTazikhare sthitAm
6002010c hataM ca rAvaNaM yuddhe darzanAd upadhAraya
6002011a setubaddhaH samudre ca yAval laGkA samIpataH
6002011c sarvaM tIrNaM ca vai sainyaM jitam ity upadhAryatAm
6002012a ime hi samare zUrA harayaH kAmarUpiNaH
6002012c tad alaM viklavA buddhI rAjan sarvArthanAzanI
6002013a puruSasya hi loke 'smiJ zokaH zauryApakarSaNaH
6002013c yat tu kAryaM manuSyeNa zauNDIryam avalambatA
6002013e zUrANAM hi manuSyANAM tvadvidhAnAM mahAtmanAm
6002014a vinaSTe vA pranaSTe vA zokaH sarvArthanAzanaH
6002014c tvaM tu buddhimatAM zreSThaH sarvazAstrArthakovidaH
6002015a madvidhaiH sacivaiH sArtham ariM jetum ihArhasi
6002015c na hi pazyAmy ahaM kaM cit triSu lokeSu rAghava
6002016a gRhItadhanuSo yas te tiSThed abhimukho raNe
6002016c vAnareSu samAsaktaM na te kAryaM vipatsyate
6002017a acirAd drakSyase sItAM tIrtvA sAgaram akSayam
6002017c tad alaM zokam Alambya krodham Alamba bhUpate
6002018a nizceSTAH kSatriyA mandAH sarve caNDasya bibhyati
6002018c laGganArthaM ca ghorasya samudrasya nadIpateH
6002019a sahAsmAbhir ihopetaH sUkSmabuddhir vicAraya
6002019c ime hi samare zUrA harayaH kAmarUpiNaH
6002020a tAn arIn vidhamiSyanti zilApAdapavRSTibhiH
6002020c kathaM cit paripazyAmas te vayaM varuNAlayam
6002021a kim uktvA bahudhA cApi sarvathA vijayI bhavAn
6003001a sugrIvasya vacaH zrutvA hetumat paramArthavit
6003001c pratijagrAha kAkutstho hanUmantam athAbravIt
6003002a tarasA setubandhena sAgarocchoSaNena vA
6003002c sarvathA susamartho 'smi sAgarasyAsya laGghane
6003003a kati durgANi durgAyA laGkAyAs tad bravIhi me
6003003c jJAtum icchAmi tat sarvaM darzanAd iva vAnara
6003004a balasya parimANaM ca dvAradurgakriyAm api
6003004c gupti karma ca laGkAyA rakSasAM sadanAni ca
6003005a yathAsukhaM yathAvac ca laGkAyAm asi dRSTavAn
6003005c saram AcakSva tattvena sarvathA kuzalo hy asi
6003006a zrutvA rAmasya vacanaM hanUmAn mArutAtmajaH
6003006c vAkyaM vAkyavidAM zreSTho rAmaM punar athAbravIt
6003007a zrUyatAM sarvam AkhyAsye durgakarmavidhAnataH
6003007c guptA purI yathA laGkA rakSitA ca yathA balaiH
6003008a parAM samRddhiM laGkAyAH sAgarasya ca bhImatAm
6003008c vibhAgaM ca balaughasya nirdezaM vAhanasya ca
6003009a prahRSTA muditA laGkA mattadvipasamAkulA
6003009c mahatI rathasaMpUrNA rakSogaNasamAkulA
6003010a dRDhabaddhakavATAni mahAparighavanti ca
6003010c dvArANi vipulAny asyAz catvAri sumahAnti ca
6003011a vapreSUpalayantrANi balavanti mahAnti ca
6003011c AgataM parasainyaM tais tatra pratinivAryate
6003012a dvAreSu saMskRtA bhImAH kAlAyasamayAH zitAH
6003012c zatazo rocitA vIraiH zataghnyo rakSasAM gaNaiH
6003013a sauvarNaz ca mahAMs tasyAH prAkAro duSpradharSaNaH
6003013c maNividrumavaidUryamuktAvicaritAntaraH
6003014a sarvataz ca mahAbhImAH zItatoyA mahAzubhAH
6003014c agAdhA grAhavatyaz ca parikhA mInasevitAH
6003015a dvAreSu tAsAM catvAraH saMkramAH paramAyatAH
6003015c yantrair upetA bahubhir mahadbhir dRDhasaMdhibhiH
6003016a trAyante saMkramAs tatra parasainyAgame sati
6003016c yantrais tair avakIryante parikhAsu samantataH
6003017a ekas tv akampyo balavAn saMkramaH sumahAdRDhaH
6003017c kAJcanair bahubhiH stambhair vedikAbhiz ca zobhitaH
6003018a svayaM prakRtisaMpanno yuyutsU rAma rAvaNaH
6003018c utthitaz cApramattaz ca balAnAm anudarzane
6003019a laGkA purI nirAlambA devadurgA bhayAvahA
6003019c nAdeyaM pArvataM vanyaM kRtrimaM ca caturvidham
6003020a sthitA pAre samudrasya dUrapArasya rAghava
6003020c naupathaz cApi nAsty atra nirAdezaz ca sarvataH
6003021a zailAgre racitA durgA sA pUr devapuropamA
6003021c vAjivAraNasaMpUrNA laGkA paramadurjayA
6003022a parighAz ca zataghnyaz ca yantrANi vividhAni ca
6003022c zobhayanti purIM laGkAM rAvaNasya durAtmanaH
6003023a ayutaM rakSasAm atra pazcimadvAram Azritam
6003023c zUlahastA durAdharSAH sarve khaDgAgrayodhinaH
6003024a niyutaM rakSasAm atra dakSiNadvAram Azritam
6003024c caturaGgeNa sainyena yodhAs tatrApy anuttamAH
6003025a prayutaM rakSasAm atra pUrvadvAraM samAzritam
6003025c carmakhaDgadharAH sarve tathA sarvAstrakovidAH
6003026a arbudaM rakSasAm atra uttaradvAram Azritam
6003026c rathinaz cAzvavAhAz ca kulaputrAH supUjitAH
6003027a zataM zatasahasrANAM madhyamaM gulmam Azritam
6003027c yAtudhAnA durAdharSAH sAgrakoTiz ca rakSasAm
6003028a te mayA saMkramA bhagnAH parikhAz cAvapUritAH
6003028c dagdhA ca nagarI laGkA prAkArAz cAvasAditAH
6003029a yena kena tu mArgeNa tarAma varuNAlayam
6003029c hateti nagarI laGkAM vAnarair avadhAryatAm
6003030a aGgado dvivido maindo jAmbavAn panaso nalaH
6003030c nIlaH senApatiz caiva balazeSeNa kiM tava
6003031a plavamAnA hi gatvA tAM rAvaNasya mahApurIm
6003031c saprakArAM sabhavanAm AnayiSyanti maithilIm
6003032a evam AjJApaya kSipraM balAnAM sarvasaMgraham
6003032c muhUrtena tu yuktena prasthAnam abhirocaya
6004001a zrutvA hanUmato vAkyaM yathAvad anupUrvazaH
6004001c tato 'bravIn mahAtejA rAmaH satyaparAkramaH
6004002a yAM nivedayase laGkAM purIM bhImasya rakSasaH
6004002c kSipram enAM vadhiSyAmi satyam etad bravImi te
6004003a asmin muhUrte sugrIva prayANam abhirocaye
6004003c yukto muhUrto vijayaH prApto madhyaM divAkaraH
6004004a uttarA phalgunI hy adya zvas tu hastena yokSyate
6004004c abhiprayAma sugrIva sarvAnIkasamAvRtAH
6004005a nimittAni ca dhanyAni yAni prAdurbhavanti me
6004005c nihatya rAvaNaM sItAm AnayiSyAmi jAnakIm
6004006a upariSTAd dhi nayanaM sphuramANam idaM mama
6004006c vijayaM samanuprAptaM zaMsatIva manoratham
6004007a agre yAtu balasyAsya nIlo mArgam avekSitum
6004007c vRtaH zatasahasreNa vAnarANAM tarasvinAm
6004008a phalamUlavatA nIla zItakAnanavAriNA
6004008c pathA madhumatA cAzu senAM senApate naya
6004009a dUSayeyur durAtmAnaH pathi mUlaphalodakam
6004009c rAkSasAH parirakSethAs tebhyas tvaM nityam udyataH
6004010a nimneSu vanadurgeSu vaneSu ca vanaukasaH
6004010c abhiplutyAbhipazyeyuH pareSAM nihataM balam
6004011a sAgaraughanibhaM bhImam agrAnIkaM mahAbalAH
6004011c kapisiMhA prakarSantu zatazo 'tha sahasrazaH
6004012a gajaz ca girisaMkAzo gavayaz ca mahAbalaH
6004012c gavAkSaz cAgrato yAntu gavAM dRptA ivarSabhAH
6004013a yAtu vAnaravAhinyA vAnaraH plavatAM patiH
6004013c pAlayan dakSiNaM pArzvam RSabho vAnararSabhaH
6004014a gandhahastIva durdharSas tarasvI gandhamAdanaH
6004014c yAtu vAnaravAhinyAH savyaM pArzvam adhiSThitaH
6004015a yAsyAmi balamadhye 'haM balaugham abhiharSayan
6004015c adhiruhya hanUmantam airAvatam ivezvaraH
6004016a aGgadenaiSa saMyAtu lakSmaNaz cAntakopamaH
6004016c sArvabhaumeNa bhUtezo draviNAdhipatir yathA
6004017a jAmbavAMz ca suSeNaz ca vegadarzI ca vAnaraH
6004017c RkSarAjo mahAsattvaH kukSiM rakSantu te trayaH
6004018a rAghavasya vacaH zrutvA sugrIvo vAhinIpatiH
6004018c vyAdideza mahAvIryAn vAnarAn vAnararSabhaH
6004019a te vAnaragaNAH sarve samutpatya yuyutsavaH
6004019c guhAbhyaH zikharebhyaz ca Azu pupluvire tadA
6004020a tato vAnararAjena lakSmaNena ca pUjitaH
6004020c jagAma rAmo dharmAtmA sasainyo dakSiNAM dizam
6004021a zataiH zatasahasraiz ca koTIbhir ayutair api
6004021c vAraNAbhiz ca haribhir yayau parivRtas tadA
6004022a taM yAntam anuyAti sma mahatI harivAhinI
6004023a hRSTAH pramuditAH sarve sugrIveNAbhipAlitAH
6004023c AplavantaH plavantaz ca garjantaz ca plavaMgamAH
6004023e kSvelanto ninadantaz ca jagmur vai dakSiNAM dizam
6004024a bhakSayantaH sugandhIni madhUni ca phalAni ca
6004024c udvahanto mahAvRkSAn maJjarIpuJjadhAriNaH
6004025a anyonyaM sahasA dRSTA nirvahanti kSipanti ca
6004025c patantaz cotpatanty anye pAtayanty apare parAn
6004026a rAvaNo no nihantavyaH sarve ca rajanIcarAH
6004026c iti garjanti harayo rAghavasya samIpataH
6004027a purastAd RSabho vIro nIlaH kumuda eva ca
6004027c pathAnaM zodhayanti sma vAnarair bahubhiH saha
6004028a madhye tu rAjA sugrIvo rAmo lakSmaNa eva ca
6004028c bahubhir balibhir bhImair vRtAH zatrunibarhaNaH
6004029a hariH zatabalir vIraH koTIbhir dazabhir vRtaH
6004029c sarvAm eko hy avaSTabhya rarakSa harivAhinIm
6004030a koTIzataparIvAraH kesarI panaso gajaH
6004030c arkaz cAtibalaH pArzvam ekaM tasyAbhirakSati
6004031a suSeNo jAmbavAMz caiva RkSair bahubhir AvRtaH
6004031c sugrIvaM purataH kRtvA jaghanaM saMrarakSatuH
6004032a teSAM senApatir vIro nIlo vAnarapuMgavaH
6004032c saMpatan patatAM zreSThas tad balaM paryapAlayat
6004033a darImikhaH prajaGghaz ca jambho 'tha rabhasaH kapiH
6004033c sarvataz ca yayur vIrAs tvarayantaH plavaMgamAn
6004034a evaM te harizArdUlA gacchanto baladarpitAH
6004034c apazyaMs te girizreSThaM sahyaM drumalatAyutam
6004035a sAgaraughanibhaM bhImaM tad vAnarabalaM mahat
6004035c niHsasarpa mahAghoSaM bhImavega ivArNavaH
6004036a tasya dAzaratheH pArzve zUrAs te kapikuJjarAH
6004036c tUrNam ApupluvuH sarve sadazvA iva coditAH
6004037a kapibhyAm uhyamAnau tau zuzubhate nararSabhau
6004037c mahadbhyAm iva saMspRSTau grAhAbhyAM candrabhAskarau
6004038a tam aGgadagato rAmaM lakSmaNaH zubhayA girA
6004038c uvAca pratipUrNArthaH smRtimAn pratibhAnavAn
6004039a hRtAm avApya vaidehIM kSipraM hatvA ca rAvaNam
6004039c samRddhArthaH samRddhArthAm ayodhyAM pratiyAsyasi
6004040a mahAnti ca nimittAni divi bhUmau ca rAghava
6004040c zubhAnti tava pazyAmi sarvANy evArthasiddhaye
6004041a anu vAti zubho vAyuH senAM mRduhitaH sukhaH
6004041c pUrNavalgusvarAz ceme pravadanti mRgadvijAH
6004042a prasannAz ca dizaH sarvA vimalaz ca divAkaraH
6004042c uzanA ca prasannArcir anu tvAM bhArgavo gataH
6004043a brahmarAzir vizuddhaz ca zuddhAz ca paramarSayaH
6004043c arciSmantaH prakAzante dhruvaM sarve pradakSiNam
6004044a trizaGkur vimalo bhAti rAjarSiH sapurohitaH
6004044c pitAmahavaro 'smAkam iSkvAkUNAM mahAtmanAm
6004045a vimale ca prakAzete vizAkhe nirupadrave
6004045c nakSatraM param asmAkam ikSvAkUNAM mahAtmanAm
6004046a nairRtaM nairRtAnAM ca nakSatram abhipIDyate
6004046c mUlaM mUlavatA spRSTaM dhUpyate dhUmaketunA
6004047a saraM caitad vinAzAya rAkSasAnAm upasthitam
6004047c kAle kAlagRhItAnAM nakatraM grahapIDitam
6004048a prasannAH surasAz cApo vanAni phalavanti ca
6004048c pravAnty abhyadhikaM gandhA yathartukusumA drumAH
6004049a vyUDhAni kapisainyAni prakAzante 'dhikaM prabho
6004049c devAnAm iva sainyAni saMgrAme tArakAmaye
6004050a evam Arya samIkSyaitAn prIto bhavitum arhasi
6004050c iti bhrAtaram AzvAsya hRSTaH saumitrir abravIt
6004051a athAvRtya mahIM kRtsnAM jagAma mahatI camUH
6004051c RkSavAnarazArdUlair nakhadaMSTrAyudhair vRtA
6004052a karAgraiz caraNAgraiz ca vAnarair uddhataM rajaH
6004052c bhaumam antardadhe lokaM nivArya savituH prabhAm
6004053a sA sma yAti divArAtraM mahatI harivAhinI
6004053c hRSTapramuditA senA sugrIveNAbhirakSitA
6004054a vanarAs tvaritaM yAnti sarve yuddhAbhinandanaH
6004054c mumokSayiSavaH sItAM muhUrtaM kvApi nAsata
6004055a tataH pAdapasaMbAdhaM nAnAmRgasamAkulam
6004055c sahyaparvatam Asedur malayaM ca mahI dharam
6004056a kAnanAni vicitrANi nadIprasravaNAni ca
6004056c pazyann api yayau rAmaH sahyasya malayasya ca
6004057a campakAMs tilakAMz cUtAn azokAn sinduvArakAn
6004057c karavIrAMz ca timizAn bhaJjanti sma plavaMgamAH
6004058a phalAny amRtagandhIni mUlAni kusumAni ca
6004058c bubhujur vAnarAs tatra pAdapAnAM balotkaTAH
6004059a droNamAtrapramANAni lambamAnAni vAnarAH
6004059c yayuH pibanto hRSTAs te madhUni madhupiGgalAH
6004060a pAdapAn avabhaJjanto vikarSantas tathA latAH
6004060c vidhamanto girivarAn prayayuH plavagarSabhAH
6004061a vRkSebhyo 'nye tu kapayo nardanto madhudarpitAH
6004061c anye vRkSAn prapadyante prapatanty api cApare
6004062a babhUva vasudhA tais tu saMpUrNA haripuMgavaiH
6004062c yathA kamalakedAraiH pakvair iva vasuMdharA
6004063a mahendram atha saMprApya rAmo rAjIvalocanaH
6004063c adhyArohan mahAbAhuH zikharaM drumabhUSitam
6004064a tataH zikharam Aruhya rAmo dazarathAtmajaH
6004064c kUrmamInasamAkIrNam apazyat salilAzayam
6004065a te sahyaM samatikramya malayaM ca mahAgirim
6004065c Asedur AnupUrvyeNa samudraM bhImaniHsvanam
6004066a avaruhya jagAmAzu velAvanam anuttamam
6004066c rAmo ramayatAM zreSThaH sasugrIvaH salakSmaNaH
6004067a atha dhautopalatalAM toyaughaiH sahasotthitaiH
6004067c velAm AsAdya vipulAM rAmo vacanam abravIt
6004068a ete vayam anuprAptAH sugrIva varuNAlayam
6004068c ihedAnIM vicintA sA yA na pUrvaM samutthitA
6004069a ataH paramatIro 'yaM sAgaraH saritAM pati
6004069c na cAyam anupAyena zakyas taritum arNavaH
6004070a tad ihaiva nivezo 'stu mantraH prastUyatAm iha
6004070c yathedaM vAnarabalaM paraM pAram avApnuyAt
6004071a itIva sa mahAbAhuH sItAharaNakarzitaH
6004071c rAmaH sAgaram AsAdya vAsam AjJApayat tadA
6004072a saMprApto mantrakAlo naH sAgarasyeha laGghane
6004072c svAM svAM senAM samutsRjya mA ca kaz cit kuto vrajet
6004072e gacchantu vAnarAH zUrA jJeyaM channaM bhayaM ca naH
6004073a rAmasya vacanaM zrutvA sugrIvaH sahalakSmaNaH
6004073c senAM nyavezayat tIre sAgarasya drumAyute
6004074a virarAja samIpasthaM sAgarasya tu tad balam
6004074c madhupANDujalaH zrImAn dvitIya iva sAgaraH
6004075a velAvanam upAgamya tatas te haripuMgavAH
6004075c viniviSTAH paraM pAraM kAGkSamANA mahodadheH
6004076a sA mahArNavam AsAdya hRSTA vAnaravAhinI
6004076c vAyuvegasamAdhUtaM pazyamAnA mahArNavam
6004077a dUrapAram asaMbAdhaM rakSogaNaniSevitam
6004077c pazyanto varuNAvAsaM niSedur hariyUthapAH
6004078a caNDanakragrahaM ghoraM kSapAdau divasakSaye
6004078c candrodaye samAdhUtaM praticandrasamAkulam
6004079a caNDAnilamahAgrAhaiH kIrNaM timitimiMgilaiH
6004079c dIptabhogair ivAkrIrNaM bhujaMgair varuNAlayam
6004080a avagADhaM mahAsattair nAnAzailasamAkulam
6004080c durgaM drugam amArgaM tam agAdham asurAlayam
6004081a makarair nAgabhogaiz ca vigADhA vAtalohitAH
6004081c utpetuz ca nipetuz ca pravRddhA jalarAzayaH
6004082a agnicUrNam ivAviddhaM bhAskarAmbumanoragam
6004082c surAriviSayaM ghoraM pAtAlaviSamaM sadA
6004083a sAgaraM cAmbaraprakhyam ambaraM sAgaropamam
6004083c sAgaraM cAmbaraM ceti nirvizeSam adRzyata
6004084a saMpRktaM nabhasA hy ambhaH saMpRktaM ca nabho 'mbhasA
6004084c tAdRgrUpe sma dRzyete tArA ratnasamAkule
6004085a samutpatitameghasya vIcci mAlAkulasya ca
6004085c vizeSo na dvayor AsIt sAgarasyAmbarasya ca
6004086a anyonyair AhatAH saktAH sasvanur bhImaniHsvanAH
6004086c UrmayaH sindhurAjasya mahAbherya ivAhave
6004087a ratnaughajalasaMnAdaM viSaktam iva vAyunA
6004087c utpatantam iva kruddhaM yAdogaNasamAkulam
6004088a dadRzus te mahAtmAno vAtAhatajalAzayam
6004088c aniloddhUtam AkAze pravalgatam ivormibhiH
6004088e bhrAntormijalasaMnAdaM pralolam iva sAgaram
6005001a sA tu nIlena vidhivat svArakSA susamAhitA
6005001c sAgarasyottare tIre sAdhu senA nivezitA
6005002a maindaz ca dvividhaz cobhau tatra vAnarapuMgavau
6005002c viceratuz ca tAM senAM rakSArthaM sarvato dizam
6005003a niviSTAyAM tu senAyAM tIre nadanadIpateH
6005003c pArzvasthaM lakSmaNaM dRSTvA rAmo vacanam abravIt
6005004a zokaz ca kila kAlena gacchatA hy apagacchati
6005004c mama cApazyataH kAntAm ahany ahani vardhate
6005005a na me duHkhaM priyA dUre na me duHkhaM hRteti ca
6005005c etad evAnuzocAmi vayo 'syA hy ativartate
6005006a vAhi vAta yataH kanyA tAM spRSTvA mAm api spRza
6005006c tvayi me gAtrasaMsparzaz candre dRSTisamAgamaH
6005007a tan me dahati gAtrANi viSaM pItam ivAzaye
6005007c hA nAtheti priyA sA mAM hriyamANA yad abravIt
6005008a tadviyogendhanavatA taccintAvipulArciSA
6005008c rAtriM divaM zarIraM me dahyate madanAgninA
6005009a avagAhyArNavaM svapsye saumitre bhavatA vinA
6005009c kathaM cit prajvalan kAmaH samAsuptaM jale dahet
6005010a bahv etat kAmayAnasya zakyam etena jIvitum
6005010c yad ahaM sA ca vAmorur ekAM dharaNim Azritau
6005011a kedArasyeva kedAraH sodakasya nirUdakaH
6005011c upasnehena jIvAmi jIvantIM yac chRNomi tAm
6005012a kadA tu khalu suszoNIM zatapatrAyatekSaNAm
6005012c vijitya zatrUn drakSyAmi sItAM sphItAm iva zriyam
6005013a kadA nu cArubimbauSThaM tasyAH padmam ivAnanam
6005013c ISadunnamya pAsyAmi rasAyanam ivAturaH
6005014a tau tasyAH saMhatau pInau stanau tAlaphalopamau
6005014c kadA nu khalu sotkampau hasantyA mAM bhajiSyataH
6005015a sA nUnam asitApAGgI rakSomadhyagatA satI
6005015c mannAthA nAthahIneva trAtAraM nAdhigacchati
6005016a kadA vikSobhya rakSAMsi sA vidhUyotpatiSyati
6005016c vidhUya jaladAn nIlAJ zazilekhA zaratsv iva
6005017a svabhAvatanukA nUnaM zokenAnazanena ca
6005017c bhUyas tanutarA sItA dezakAlaviparyayAt
6005018a kadA nu rAkSasendrasya nidhAyorasi sAyakAn
6005018c sItAM pratyAhariSyAmi zokam utsRjya mAnasaM
6005019a kadA nu khalu mAM sAdhvI sItAmarasutopamA
6005019c sotkaNThA kaNTham Alambya mokSyaty AnandajaM jalam
6005020a kadA zokam imaM ghoraM maithilI viprayogajam
6005020c sahasA vipramokSyAmi vAsaH zukletaraM yathA
6005021a evaM vilapatas tasya tatra rAmasya dhImataH
6005021c dinakSayAn mandavapur bhAskaro 'stam upAgamat
6005022a AzvAsito lakSmaNena rAmaH saMdhyAm upAsata
6005022c smaran kamalapatrAkSIM sItAM zokAkulIkRtaH
6006001a laGkAyAM tu kRtaM karma ghoraM dRSTvA bhavAvaham
6006001c rAkSasendro hanumatA zakreNeva mahAtmanA
6006001e abravId rAkSasAn sarvAn hriyA kiM cid avAGmukhaH
6006002a dharSitA ca praviSTA ca laGkA duSprasahA purI
6006002c tena vAnaramAtreNa dRSTA sItA ca jAnakI
6006003a prasAdo dharSitaz caityaH pravarA rAkSasA hatAH
6006003c AvilA ca purI laGkA sarvA hanumatA kRtA
6006004a kiM kariSyAmi bhadraM vaH kiM vA yuktam anantaram
6006004c ucyatAM naH samarthaM yat kRtaM ca sukRtaM bhavet
6006005a mantramUlaM hi vijayaM prAhur AryA manasvinaH
6006005c tasmAd vai rocaye mantraM rAmaM prati mahAbalAH
6006006a trividhAH puruSA loke uttamAdhamamadhyamAH
6006006c teSAM tu samavetAnAM guNadoSaM vadAmy aham
6006007a mantribhir hitasaMyuktaiH samarthair mantranirNaye
6006007c mitrair vApi samAnArthair bAndhavair api vA hitaiH
6006008a sahito mantrayitvA yaH karmArambhAn pravartayet
6006008c daive ca kurute yatnaM tam AhuH puruSottamam
6006009a eko 'rthaM vimRzed eko dharme prakurute manaH
6006009c ekaH kAryANi kurute tam Ahur madhyamaM naram
6006010a guNadoSAv anizcitya tyaktvA daivavyapAzrayam
6006010c kariSyAmIti yaH kAryam upekSet sa narAdhamaH
6006011a yatheme puruSA nityam uttamAdhamamadhyamAH
6006011c evaM mantro 'pi vijJeya uttamAdhamamadhyamaH
6006012a aikamatyam upAgamya zAstradRSTena cakSuSA
6006012c mantriNo yatra nirastAs tam Ahur mantram uttamam
6006013a bahvyo 'pi matayo gatvA mantriNo hy arthanirNaye
6006013c punar yatraikatAM prAptaH sa mantro madhyamaH smRtaH
6006014a anyonyamatim AsthAya yatra saMpratibhASyate
6006014c na caikamatye zreyo 'sti mantraH so 'dhama ucyate
6006015a tasmAt sumantritaM sAdhu bhavanto mantrisattamAH
6006015c kAryaM saMpratipadyantAm etat kRtyatamaM mama
6006016a vAnarANAM hi vIrANAM sahasraiH parivAritaH
6006016c rAmo 'bhyeti purIM laGkAm asmAkam uparodhakaH
6006017a tariSyati ca suvyaktaM rAghavaH sAgaraM sukham
6006017c tarasA yuktarUpeNa sAnujaH sabalAnugaH
6006018a asminn evaMgate kArye viruddhe vAnaraiH saha
6006018c hitaM pure ca sainye ca sarvaM saMmantryatAM mama
6007001a ity uktA rAkSasendreNa rAkSasAs te mahAbalAH
6007001c UcuH prAJjalayaH sarve rAvaNaM rAkSasezvaram
6007002a rAjan parighazaktyRSTizUlapaTTasasaMkulam
6007002c sumahan no balaM kasmAd viSAdaM bhajate bhavAn
6007003a kailAsazikharAvAsI yakSair bahubhir AvRtaH
6007003c sumahat kadanaM kRtvA vazyas te dhanadaH kRtaH
6007004a sa mahezvarasakhyena zlAghamAnas tvayA vibho
6007004c nirjitaH samare roSAl lokapAlo mahAbalaH
6007005a vinihatya ca yakSaughAn vikSobhya ca vigRhya ca
6007005c tvayA kailAsazikharAd vimAnam idam AhRtam
6007006a mayena dAnavendreNa tvadbhayAt sakhyam icchatA
6007006c duhitA tava bhAryArthe dattA rAkSasapuMgava
6007007a dAnavendro madhur nAma vIryotsikto durAsadaH
6007007c vigRhya vazam AnItaH kumbhInasyAH sukhAvahaH
6007008a nirjitAs te mahAbAho nAgA gatvA rasAtalam
6007008c vAsukis takSakaH zaGkho jaTI ca vazam AhRtAH
6007009a akSayA balavantaz ca zUrA labdhavarAH punaH
6007009c tvayA saMvatsaraM yuddhvA samare dAnavA vibho
6007010a svabalaM samupAzritya nItA vazam ariMdama
6007010c mAyAz cAdhigatAs tatra bahavo rAkSasAdhipa
6007011a zUrAz ca balavantaz ca varuNasya sutA raNe
6007011c nirjitAs te mahAbAho caturvidhabalAnugAH
6007012a mRtyudaNDamahAgrAhaM zAlmalidvIpamaNDitam
6007012c avagAhya tvayA rAjan yamasya balasAgaram
6007013a jayaz ca viplulaH prApto mRtyuz ca pratiSedhitaH
6007013c suyuddhena ca te sarve lokAs tatra sutoSitAH
6007014a kSatriyair bahubhir vIraiH zakratulyaparAkramaiH
6007014c AsId vasumatI pUrNA mahadbhir iva pAdapaiH
6007015a teSAM vIryaguNotsAhair na samo rAghavo raNe
6007015c prasahya te tvayA rAjan hatAH paramadurjayAH
6007016a rAjan nApad ayukteyam AgatA prAkRtAj janAt
6007016c hRdi naiva tvayA kAryA tvaM vadhiSyasi rAghavam
6008001a tato nIlAmbudanibhaH prahasto nAma rAkSasaH
6008001c abravIt prAJjalir vAkyaM zUraH senApatis tadA
6008002a devadAnavagandharvAH pizAcapatagoragAH
6008002c na tvAM dharSayituM zaktAH kiM punar vAnarA raNe
6008003a sarve pramattA vizvastA vaJcitAH sma hanUmatA
6008003c na hi me jIvato gacchej jIvan sa vanagocaraH
6008004a sarvAM sAgaraparyantAM sazailavanakAnanAm
6008004c karomy avAnarAM bhUmim AjJApayatu mAM bhavAn
6008005a rakSAM caiva vidhAsyAmi vAnarAd rajanIcara
6008005c nAgamiSyati te duHkhaM kiM cid AtmAparAdhajam
6008006a abravIc ca susaMkruddho durmukho nAma rAkSasaH
6008006c idaM na kSamaNIyaM hi sarveSAM naH pradharSaNam
6008007a ayaM paribhavo bhUyaH purasyAntaHpurasya ca
6008007c zrImato rAkSasendrasya vAnarendrapradharSaNam
6008008a asmin muhUrte hatvaiko nivartiSyAmi vAnarAn
6008008c praviSTAn sAgaraM bhImam ambaraM vA rasAtalam
6008009a tato 'bravIt susaMkruddho vajradaMSTro mahAbalaH
6008009c pragRhya parighaM ghoraM mAMsazoNitarUpitam
6008010a kiM vo hanumatA kAryaM kRpaNena tapasvinA
6008010c rAme tiSThati durdharSe sugrIve sahalakSmaNe
6008011a adya rAmaM sasugrIvaM parigheNa salakSmaNam
6008011c AgamiSyAmi hatvaiko vikSobhya harivAhinIm
6008012a kaumbhakarNis tato vIro nikumbho nAma vIryavAn
6008012c abravIt paramakurddho rAvaNaM lokarAvaNam
6008013a sarve bhavantas tiSThantu mahArAjena saMgatAH
6008013c aham eko haniSyAmi rAghavaM sahalakSmaNam
6008014a tato vajrahanur nAma rAkSasaH parvatopamaH
6008014c kruddhaH parilihan vaktraM jihvayA vAkyam abravIt
6008015a svairaM kurvantu kAryANi bhavanto vigatajvarAH
6008015c eko 'haM bhakSayiSyAmi tAn sarvAn hariyUthapAn
6008016a svasthAH krIDantu nizcintAH pibantu madhuvAruNIm
6008016c aham eko haniSyAmi sugrIvaM sahalakSmaNam
6008016e sAGgadaM ca hanUmantaM rAmaM ca raNakuJjaram
6009001a tato nikumbho rabhasaH sUryazatrur mahAbalaH
6009001c suptaghno yajJakopaz ca mahApArzvo mahodaraH
6009002a agniketuz ca durdharSo razmiketuz ca rAkSasaH
6009002c indrajic ca mahAtejA balavAn rAvaNAtmajaH
6009003a prahasto 'tha virUpAkSo vajradaMSTro mahAbalaH
6009003c dhUmrAkSaz cAtikAyaz ca durmukhaz caiva rAkSasaH
6009004a parighAn paTTasAn prAsAJ zaktizUlaparazvadhAn
6009004c cApAni ca sabANAni khaDgAMz ca vipulAJ zitAn
6009005a pragRhya paramakruddhAH samutpatya ca rAkSasAH
6009005c abruvan rAvaNaM sarve pradIptA iva tejasA
6009006a adya rAmaM vadhiSyAmaH sugrIvaM ca salakSmaNam
6009006c kRpaNaM ca hanUmantaM laGkA yena pradharSitA
6009007a tAn gRhItAyudhAn sarvAn vArayitvA vibhISaNaH
6009007c abravIt prAJjalir vAkyaM punaH pratyupavezya tAn
6009008a apy upAyais tribhis tAta yo 'rthaH prAptuM na zakyate
6009008c tasya vikramakAlAMs tAn yuktAn Ahur manISiNaH
6009009a pramatteSv abhiyukteSu daivena prahateSu ca
6009009c vikramAs tAta sidhyanti parIkSya vidhinA kRtAH
6009010a apramattaM kathaM taM tu vijigISuM bale sthitam
6009010c jitaroSaM durAdharSaM pradharSayitum icchatha
6009011a samudraM laGghayitvA tu ghoraM nadanadIpatim
6009011c kRtaM hanumatA karma duSkaraM tarkayeta kaH
6009012a balAny aparimeyAni vIryANi ca nizAcarAH
6009012c pareSAM sahasAvajJA na kartavyA kathaM cana
6009013a kiM ca rAkSasarAjasya rAmeNApakRtaM purA
6009013c AjahAra janasthAnAd yasya bhAryAM yazasvinaH
6009014a kharo yady ativRttas tu rAmeNa nihato raNe
6009014c avazyaM prANinAM prANA rakSitavyA yathA balam
6009015a etannimittaM vaidehI bhayaM naH sumahad bhavet
6009015c AhRtA sA parityAjyA kalahArthe kRte na kim
6009016a na naH kSamaM vIryavatA tena dharmAnuvartinA
6009016c vairaM nirarthakaM kartuM dIyatAm asya maithilI
6009017a yAvan na sagajAM sAzvAM bahuratnasamAkulAm
6009017c purIM dArayate bANair dIyatAm asya maithilI
6009018a yAvat sughorA mahatI durdharSA harivAhinI
6009018c nAvaskandati no laGkAM tAvat sItA pradIyatAm
6009019a vinazyed dhi purI laGkA zUrAH sarve ca rAkSasAH
6009019c rAmasya dayitA patnI na svayaM yadi dIyate
6009020a prasAdaye tvAM bandhutvAt kuruSva vacanaM mama
6009020c hitaM pathyaM tv ahaM brUmi dIyatAm asya maithilI
6009021a purA zaratsUryamarIcisaMnibhAn; navAgrapuGkhAn sudRDhAn nRpAtmajaH
6009021c sRjaty amoghAn vizikhAn vadhAya te; pradIyatAM dAzarathAya maithilI
6009022a tyajasva kopaM sukhadharmanAzanaM; bhajasva dharmaM ratikIrtivardhanam
6009022c prasIda jIvema saputrabAndhavAH; pradIyatAM dAzarathAya maithilI
6010001a suniviSTaM hitaM vAkyam uktavantaM vibhISaNam
6010001c abravIt paruSaM vAkyaM rAvaNaH kAlacoditaH
6010002a vaset saha sapatnena kruddhenAzIviSeNa vA
6010002c na tu mitrapravAdena saMvasec chatrusevinA
6010003a jAnAmi zIlaM jJAtInAM sarvalokeSu rAkSasa
6010003c hRSyanti vyasaneSv ete jJAtInAM jJAtayaH sadA
6010004a pradhAnaM sAdhakaM vaidyaM dharmazIlaM ca rAkSasa
6010004c jJAtayo hy avamanyante zUraM paribhavanti ca
6010005a nityam anyonyasaMhRSTA vyasaneSv AtatAyinaH
6010005c pracchannahRdayA ghorA jJAtayas tu bhayAvahAH
6010006a zrUyante hastibhir gItAH zlokAH padmavane kva cit
6010006c pAzahastAn narAn dRSTvA zRNu tAn gadato mama
6010007a nAgnir nAnyAni zastrANi na naH pAzA bhayAvahAH
6010007c ghorAH svArthaprayuktAs tu jJAtayo no bhayAvahAH
6010008a upAyam ete vakSyanti grahaNe nAtra saMzayaH
6010008c kRtsnAd bhayAj jJAtibhayaM sukaSTaM viditaM ca naH
6010009a vidyate goSu saMpannaM vidyate brAhmaNe damaH
6010009c vidyate strISu cApalyaM vidyate jJAtito bhayam
6010010a tato neSTam idaM saumya yad ahaM lokasatkRtaH
6010010c aizvaryam abhijAtaz ca ripUNAM mUrdhni ca sthitaH
6010011a anyas tv evaMvidhaM brUyAd vAkyam etan nizAcara
6010011c asmin muhUrte na bhavet tvAM tu dhik kulapAMsanam
6010012a ity uktaH paruSaM vAkyaM nyAyavAdI vibhISaNaH
6010012c utpapAta gadApANiz caturbhiH saha rAkSasaiH
6010013a abravIc ca tadA vAkyaM jAtakrodho vibhISaNaH
6010013c antarikSagataH zrImAn bhrAtaraM rAkSasAdhipam
6010014a sa tvaM bhrAtAsi me rAjan brUhi mAM yad yad icchasi
6010014c idaM tu paruSaM vAkyaM na kSamAmy anRtaM tava
6010015a sunItaM hitakAmena vAkyam uktaM dazAnana
6010015c na gRhNanty akRtAtmAnaH kAlasya vazam AgatAH
6010016a sulabhAH puruSA rAjan satataM priyavAdinaH
6010016c apriyasya tu pathyasya vaktA zrotA ca durlabhaH
6010017a baddhaM kAlasya pAzena sarvabhUtApahAriNA
6010017c na nazyantam upekSeyaM pradIptaM zaraNaM yathA
6010018a dIptapAvakasaMkAzaiH zitaiH kAJcanabhUSaNaiH
6010018c na tvAm icchAmy ahaM draSTuM rAmeNa nihataM zaraiH
6010019a zUrAz ca balavantaz ca kRtAstrAz ca raNAjire
6010019c kAlAbhipannA sIdanti yathA vAlukasetavaH
6010020a AtmAnaM sarvathA rakSa purIM cemAM sarAkSasAm
6010020c svasti te 'stu gamiSyAmi sukhI bhava mayA vinA
6010021a nivAryamANasya mayA hitaiSiNA; na rocate te vacanaM nizAcara
6010021c parItakAlA hi gatAyuSo narA; hitaM na gRhNanti suhRdbhir Iritam
6011001a ity uktvA paruSaM vAkyaM rAvaNaM rAvaNAnujaH
6011001c AjagAma muhUrtena yatra rAmaH salakSmaNaH
6011002a taM meruzikharAkAraM dIptAm iva zatahradAm
6011002c gaganasthaM mahIsthAs te dadRzur vAnarAdhipAH
6011003a tam AtmapaJcamaM dRSTvA sugrIvo vAnarAdhipaH
6011003c vAnaraiH saha durdharSaz cintayAm Asa buddhimAn
6011004a cintayitvA muhUrtaM tu vAnarAMs tAn uvAca ha
6011004c hanUmatpramukhAn sarvAn idaM vacanam uttamam
6011005a eSa sarvAyudhopetaz caturbhiH saha rAkSasaiH
6011005c rAkSaso 'bhyeti pazyadhvam asmAn hantuM na saMzayaH
6011006a sugrIvasya vacaH zrutvA sarve te vAnarottamAH
6011006c sAlAn udyamya zailAMz ca idaM vacanam abruvan
6011007a zIghraM vyAdiza no rAjan vadhAyaiSAM durAtmanAm
6011007c nipatantu hatAz caite dharaNyAm alpajIvitAH
6011008a teSAM saMbhASamANAnAm anyonyaM sa vibhISaNaH
6011008c uttaraM tIram AsAdya khastha eva vyatiSThata
6011009a uvAca ca mahAprAjJaH svareNa mahatA mahAn
6011009c sugrIvaM tAMz ca saMprekSya khastha eva vibhISaNaH
6011010a rAvaNo nAma durvRtto rAkSaso rAkSasezvaraH
6011010c tasyAham anujo bhrAtA vibhISaNa iti zrutaH
6011011a tena sItA janasthAnAd dhRtA hatvA jaTAyuSam
6011011c ruddhvA ca vivazA dInA rAkSasIbhiH surakSitA
6011012a tam ahaM hetubhir vAkyair vividhaiz ca nyadarzayam
6011012c sAdhu niryAtyatAM sItA rAmAyeti punaH punaH
6011013a sa ca na pratijagrAha rAvaNaH kAlacoditaH
6011013c ucyamAno hitaM vAkyaM viparIta ivauSadham
6011014a so 'haM paruSitas tena dAsavac cAvamAnitaH
6011014c tyaktvA putrAMz ca dArAMz ca rAghavaM zaraNaM gataH
6011015a sarvalokazaraNyAya rAghavAya mahAtmane
6011015c nivedayata mAM kSipraM vibhISaNam upasthitam
6011016a etat tu vacanaM zrutvA sugrIvo laghuvikramaH
6011016c lakSmaNasyAgrato rAmaM saMrabdham idam abravIt
6011017a rAvaNasyAnujo bhrAtA vibhISaNa iti zrutaH
6011017c caturbhiH saha rakSobhir bhavantaM zaraNaM gataH
6011018a rAvaNena praNihitaM tam avehi vibhISaNam
6011018c tasyAhaM nigrahaM manye kSamaM kSamavatAM vara
6011019a rAkSaso jihmayA buddhyA saMdiSTo 'yam upasthitaH
6011019c prahartuM mAyayA channo vizvaste tvayi rAghava
6011020a badhyatAm eSa tIvreNa daNDena sacivaiH saha
6011020c rAvaNasya nRzaMsasya bhrAtA hy eSa vibhISaNaH
6011021a evam uktvA tu taM rAmaM saMrabdho vAhinIpatiH
6011021c vAkyajJo vAkyakuzalaM tato maunam upAgamat
6011022a sugrIvasya tu tad vAkyaM zrutvA rAmo mahAbalaH
6011022c samIpasthAn uvAcedaM hanUmatpramukhAn harIn
6011023a yad uktaM kapirAjena rAvaNAvarajaM prati
6011023c vAkyaM hetumad atyarthaM bhavadbhir api tac chrutam
6011024a suhRdA hy arthakRccheSu yuktaM buddhimatA satA
6011024c samarthenApi saMdeSTuM zAzvatIM bhUtim icchatA
6011025a ity evaM paripRSTAs te svaM svaM matam atandritAH
6011025c sopacAraM tadA rAmam Ucur hitacikIrSavaH
6011026a ajJAtaM nAsti te kiM cit triSu lokeSu rAghava
6011026c AtmAnaM pUjayan rAma pRcchasy asmAn suhRttayA
6011027a tvaM hi satyavrataH zUro dhArmiko dRDhavikramaH
6011027c parIkSya kArA smRtimAn nisRSTAtmA suhRtsu ca
6011028a tasmAd ekaikazas tAvad bruvantu sacivAs tava
6011028c hetuto matisaMpannAH samarthAz ca punaH punaH
6011029a ity ukte rAghavAyAtha matimAn aGgado 'grataH
6011029c vibhISaNaparIkSArtham uvAca vacanaM hariH
6011030a zatroH sakAzAt saMprAptaH sarvathA zaGkya eva hi
6011030c vizvAsayogyaH sahasA na kartavyo vibhISaNaH
6011031a chAdayitvAtmabhAvaM hi caranti zaThabuddhayaH
6011031c praharanti ca randhreSu so 'narthaH sumahAn bhavet
6011032a arthAnarthau vinizcitya vyavasAyaM bhajeta ha
6011032c guNataH saMgrahaM kuryAd doSatas tu visarjayet
6011033a yadi doSo mahAMs tasmiMs tyajyatAm avizaGkitam
6011033c guNAn vApi bahUJ jJAtvA saMgrahaH kriyatAM nRpa
6011034a zarabhas tv atha nizcitya sArthaM vacanam abravIt
6011034c kSipram asmin naravyAghra cAraH pratividhIyatAm
6011035a praNidhAya hi cAreNa yathAvat sUkSmabuddhinA
6011035c parIkSya ca tataH kAryo yathAnyAyaM parigrahaH
6011036a jAmbavAMs tv atha saMprekSya zAstrabuddhyA vicakSaNaH
6011036c vAkyaM vijJApayAm Asa guNavad doSavarjitam
6011037a baddhavairAc ca pApAc ca rAkSasendrAd vibhISaNaH
6011037c adeza kAle saMprAptaH sarvathA zaGkyatAm ayam
6011038a tato maindas tu saMprekSya nayApanayakovidaH
6011038c vAkyaM vacanasaMpanno babhASe hetumattaram
6011039a vacanaM nAma tasyaiSa rAvaNasya vibhISaNaH
6011039c pRcchyatAM madhureNAyaM zanair naravarezvara
6011040a bhAvam asya tu vijJAya tatas tattvaM kariSyasi
6011040c yadi dRSTo na duSTo vA buddhipUrvaM nararSabha
6011041a atha saMskArasaMpanno hanUmAn sacivottamaH
6011041c uvAca vacanaM zlakSNam arthavan madhuraM laghu
6011042a na bhavantaM matizreSThaM samarthaM vadatAM varam
6011042c atizAyayituM zakto bRhaspatir api bruvan
6011043a na vAdAn nApi saMgharSAn nAdhikyAn na ca kAmataH
6011043c vakSyAmi vacanaM rAjan yathArthaM rAmagauravAt
6011044a arthAnarthanimittaM hi yad uktaM sacivais tava
6011044c tatra doSaM prapazyAmi kriyA na hy upapadyate
6011045a Rte niyogAt sAmarthyam avaboddhuM na zakyate
6011045c sahasA viniyogo hi doSavAn pratibhAti me
6011046a cArapraNihitaM yuktaM yad uktaM sacivais tava
6011046c arthasyAsaMbhavAt tatra kAraNaM nopapadyate
6011047a adeza kAle saMprApta ity ayaM yad vibhISaNaH
6011047c vivakSA cAtra me 'stIyaM tAM nibodha yathA mati
6011048a sa eSa dezaH kAlaz ca bhavatIha yathA tathA
6011048c puruSAt puruSaM prApya tathA doSaguNAv api
6011049a daurAtmyaM rAvaNe dRSTvA vikramaM ca tathA tvayi
6011049c yuktam AgamanaM tasya sadRzaM tasya buddhitaH
6011050a ajJAtarUpaiH puruSaiH sa rAjan pRcchyatAm iti
6011050c yad uktam atra me prekSA kA cid asti samIkSitA
6011051a pRcchyamAno vizaGketa sahasA buddhimAn vacaH
6011051c tatra mitraM praduSyeta mithyapRSTaM sukhAgatam
6011052a azakyaH sahasA rAjan bhAvo vettuM parasya vai
6011052c antaH svabhAvair gItais tair naipuNyaM pazyatA bhRzam
6011053a na tv asya bruvato jAtu lakSyate duSTabhAvatA
6011053c prasannaM vadanaM cApi tasmAn me nAsti saMzayaH
6011054a azaGkitamatiH svastho na zaThaH parisarpati
6011054c na cAsya duSTA vAk cApi tasmAn nAstIha saMzayaH
6011055a AkAraz chAdyamAno 'pi na zakyo vinigUhitum
6011055c balAd dhi vivRNoty eva bhAvam antargataM nRNAm
6011056a dezakAlopapannaM ca kAryaM kAryavidAM vara
6011056c saphalaM kurute kSipraM prayogeNAbhisaMhitam
6011057a udyogaM tava saMprekSya mithyAvRttaM ca rAvaNam
6011057c vAlinaz ca vadhaM zrutvA sugrIvaM cAbhiSecitam
6011058a rAjyaM prArthayamAnaz ca buddhipUrvam ihAgataH
6011058c etAvat tu puraskRtya yujyate tv asya saMgrahaH
6011059a yathAzakti mayoktaM tu rAkSasasyArjavaM prati
6011059c tvaM pramANaM tu zeSasya zrutvA buddhimatAM vara
6012001a atha rAmaH prasannAtmA zrutvA vAyusutasya ha
6012001c pratyabhASata durdharSaH zrutavAn Atmani sthitam
6012002a mamApi tu vivakSAsti kA cit prati vibhISaNam
6012002c zrutam icchAmi tat sarvaM bhavadbhiH zreyasi sthitaiH
6012003a mitrabhAvena saMprAptaM na tyajeyaM kathaM cana
6012003c doSo yady api tasya syAt satAm etad agarhitam
6012004a rAmasya vacanaM zrutvA sugrIvaH plavagezvaraH
6012004c pratyabhASata kAkutsthaM sauhArdenAbhicoditaH
6012005a kim atra citraM dharmajJa lokanAthazikhAmaNe
6012005c yat tvam AryaM prabhASethAH sattvavAn sapathe sthitaH
6012006a mama cApy antarAtmAyaM zuddhiM vetti vibhISaNam
6012006c anumanAc ca bhAvAc ca sarvataH suparIkSitaH
6012007a tasmAt kSipraM sahAsmAbhis tulyo bhavatu rAghava
6012007c vibhISaNo mahAprAjJaH sakhitvaM cAbhyupaitu naH
6012008a sa sugrIvasya tad vAkyaM rAmaH zrutvA vimRzya ca
6012008c tataH zubhataraM vAkyam uvAca haripuMgavam
6012009a suduSTo vApy aduSTo vA kim eSa rajanIcaraH
6012009c sUkSmam apy ahitaM kartuM mamAzaktaH kathaM cana
6012010a pizAcAn dAnavAn yakSAn pRthivyAM caiva rAkSasAn
6012010c aGgulyagreNa tAn hanyAm icchan harigaNezvara
6012011a zrUyate hi kapotena zatruH zaraNam AgataH
6012011c arcitaz ca yathAnyAyaM svaiz ca mAMsair nimantritaH
6012012a sa hi taM pratijagrAha bhAryA hartAram Agatam
6012012c kapoto vAnarazreSTha kiM punar madvidho janaH
6012013a RSeH kaNvasya putreNa kaNDunA paramarSiNA
6012013c zRNu gAthAM purA gItAM dharmiSThAM satyavAdinA
6012014a baddhAJjalipuTaM dInaM yAcantaM zaraNAgatam
6012014c na hanyAd AnRzaMsyArtham api zatruM paraM pata
6012015a Arto vA yadi vA dRptaH pareSAM zaraNaM gataH
6012015c ariH prANAn parityajya rakSitavyaH kRtAtmanA
6012016a sa ced bhayAd vA mohAd vA kAmAd vApi na rakSati
6012016c svayA zaktyA yathAtattvaM tat pApaM lokagarhitam
6012017a vinaSTaH pazyatas tasya rakSiNaH zaraNAgataH
6012017c AdAya sukRtaM tasya sarvaM gacched arakSitaH
6012018a evaM doSo mahAn atra prapannAnAm arakSaNe
6012018c asvargyaM cAyazasyaM ca balavIryavinAzanam
6012019a kariSyAmi yathArthaM tu kaNDor vacanam uttamam
6012019c dharmiSThaM ca yazasyaM ca svargyaM syAt tu phalodaye
6012020a sakRd eva prapannAya tavAsmIti ca yAcate
6012020c abhayaM sarvabhUtebhyo dadAmy etad vrataM mama
6012021a AnayainaM harizreSTha dattam asyAbhayaM mayA
6012021c vibhISaNo vA sugrIva yadi vA rAvaNaH svayam
6012022a tatas tu sugrIvavaco nizamya tad; dharIzvareNAbhihitaM narezvaraH
6012022c vibhISaNenAzu jagAma saMgamaM; patatrirAjena yathA puraMdaraH
6013001a rAghaveNAbhaye datte saMnato rAvaNAnujaH
6013001c khAt papAtAvaniM hRSTo bhaktair anucaraiH saha
6013002a sa tu rAmasya dharmAtmA nipapAta vibhISaNaH
6013002c pAdayoH zaraNAnveSI caturbhiH saha rAkSasaiH
6013003a abravIc ca tadA rAmaM vAkyaM tatra vibhISaNaH
6013003c dharmayuktaM ca yuktaM ca sAmprataM saMpraharSaNam
6013004a anujo rAvaNasyAhaM tena cAsmy avamAnitaH
6013004c bhavantaM sarvabhUtAnAM zaraNyaM zaraNaM gataH
6013005a parityaktA mayA laGkA mitrANi ca dhanAni ca
6013005c bhavadgataM me rAjyaM ca jIvitaM ca sukhAni ca
6013006a rAkSasAnAM vadhe sAhyaM laGkAyAz ca pradharSaNe
6013006c kariSyAmi yathAprANaM pravekSyAmi ca vAhinIm
6013007a iti bruvANaM rAmas tu pariSvajya vibhISaNam
6013007c abravIl lakSmaNaM prItaH samudrAj jalam Anaya
6013008a tena cemaM mahAprAjJam abhiSiJca vibhISaNam
6013008c rAjAnaM rakSasAM kSipraM prasanne mayi mAnada
6013009a evam uktas tu saumitrir abhyaSiJcad vibhISaNam
6013009c madhye vAnaramukhyAnAM rAjAnaM rAmazAsanAt
6013010a taM prasAdaM tu rAmasya dRSTvA sadyaH plavaMgamAH
6013010c pracukruzur mahAnAdAn sAdhu sAdhv iti cAbruvan
6013011a abravIc ca hanUmAMz ca sugrIvaz ca vibhISaNam
6013011c kathaM sAgaram akSobhyaM tarAma varuNAlayam
6013012a upAyair abhigacchAmo yathA nadanadIpatim
6013012c tarAma tarasA sarve sasainyA varuNAlayam
6013013a evam uktas tu dharmajJaH pratyuvAca vibhISaNaH
6013013c samudraM rAghavo rAjA zaraNaM gantum arhati
6013014a khAnitaH sagareNAyam aprameyo mahodadhiH
6013014c kartum arhati rAmasya jJAteH kAryaM mahodadhiH
6013015a evaM vibhISaNenokte rAkSasena vipazcitA
6013015c prakRtyA dharmazIlasya rAghavasyApy arocata
6013016a sa lakSmaNaM mahAtejAH sugrIvaM ca harIzvaram
6013016c satkriyArthaM kriyAdakSaH smitapUrvam uvAca ha
6013017a vibhISaNasya mantro 'yaM mama lakSmaNa rocate
6013017c brUhi tvaM sahasugrIvas tavApi yadi rocate
6013018a sugrIvaH paNDito nityaM bhavAn mantravicakSaNaH
6013018c ubhAbhyAM saMpradhAryAryaM rocate yat tad ucyatAm
6013019a evam uktau tu tau vIrAv ubhau sugrIvalakSmaNau
6013019c samudAcAra saMyuktam idaM vacanam UcatuH
6013020a kimarthaM no naravyAghra na rociSyati rAghava
6013020c vibhISaNena yat tUktam asmin kAle sukhAvaham
6013021a abaddhvA sAgare setuM ghore 'smin varuNAlaye
6013021c laGkA nAsAdituM zakyA sendrair api surAsuraiH
6013022a vibhISaNasya zUrasya yathArthaM kriyatAM vacaH
6013022c alaM kAlAtyayaM kRtvA samudro 'yaM niyujyatAm
6013023a evam uktaH kuzAstIrNe tIre nadanadIpateH
6013023c saMviveza tadA rAmo vedyAm iva hutAzanaH
6014001a tasya rAmasya suptasya kuzAstIrNe mahItale
6014001c niyamAd apramattasya nizAs tisro 'ticakramuH
6014002a na ca darzayate mandas tadA rAmasya sAgaraH
6014002c prayatenApi rAmeNa yathArham abhipUjitaH
6014003a samudrasya tataH kruddho rAmo raktAntalocanaH
6014003c samIpastham uvAcedaM lakSmaNaM zubhalakSmaNam
6014004a pazya tAvad anAryasya pUjyamAnasya lakSmaNa
6014004c avalepaM samudrasya na darzayati yat svayam
6014005a prazamaz ca kSamA caiva ArjavaM priyavAditA
6014005c asAmarthyaM phalanty ete nirguNeSu satAM guNAH
6014006a AtmaprazaMsinaM duSTaM dhRSTaM viparidhAvakam
6014006c sarvatrotsRSTadaNDaM ca lokaH satkurute naram
6014007a na sAmnA zakyate kIrtir na sAmnA zakyate yazaH
6014007c prAptuM lakSmaNa loke 'smiJ jayo vA raNamUdhani
6014008a adya madbANanirbhinnair makarair makarAlayam
6014008c niruddhatoyaM saumitre plavadbhiH pazya sarvataH
6014009a mahAbhogAni matsyAnAM kariNAM ca karAn iha
6014009c bhogAMz ca pazya nAgAnAM mayA bhinnAni lakSmaNa
6014010a sazaGkhazuktikA jAlaM samInamakaraM zaraiH
6014010c adya yuddhena mahatA samudraM parizoSaye
6014011a kSamayA hi samAyuktaM mAm ayaM makarAlayaH
6014011c asamarthaM vijAnAti dhik kSamAm IdRze jane
6014012a cApam Anaya saumitre zarAMz cAzIviSopamAn
6014012c adyAkSobhyam api kruddhaH kSobhayiSyAmi sAgaram
6014013a velAsu kRtamaryAdaM sahasormisamAkulam
6014013c nirmaryAdaM kariSyAmi sAyakair varuNAlayam
6014014a evam uktvA dhanuSpANiH krodhavisphAritekSaNaH
6014014c babhUva rAmo durdharSo yugAntAgnir iva jvalan
6014015a saMpIDya ca dhanur ghoraM kampayitvA zarair jagat
6014015c mumoca vizikhAn ugrAn vajrANIva zatakratuH
6014016a te jvalanto mahAvegAs tejasA sAyakottamAH
6014016c pravizanti samudrasya salilaM trastapannagam
6014017a tato vegaH samudrasya sanakramakaro mahAn
6014017c saMbabhUva mahAghoraH samArutaravas tadA
6014018a mahormimAlAvitataH zaGkhazuktisamAkulaH
6014018c sadhUmaparivRttormiH sahasAbhUn mahodadhiH
6014019a vyathitAH pannagAz cAsan dIptAsyA dIptalocanAH
6014019c dAnavAz ca mahAvIryAH pAtAlatalavAsinaH
6014020a UrmayaH sindhurAjasya sanakramakarAs tadA
6014020c vindhyamandarasaMkAzAH samutpetuH sahasrazaH
6014021a AghUrNitataraGgaughaH saMbhrAntoragarAkSasaH
6014021c udvartita mahAgrAhaH saMvRttaH salilAzayaH
6015001a tato madhyAt samudrasya sAgaraH svayam utthitaH
6015001c udayan hi mahAzailAn meror iva divAkaraH
6015001e pannagaiH saha dIptAsyaiH samudraH pratyadRzyata
6015002a snigdhavaidUryasaMkAzo jAmbUnadavibhUSitaH
6015002c raktamAlyAmbaradharaH padmapatranibhekSaNaH
6015003a sAgaraH samatikramya pUrvam Amantrya vIryavAn
6015003c abravIt prAJjalir vAkyaM rAghavaM zarapANinam
6015004a pRthivI vAyur AkAzam Apo jyotiz ca rAghavaH
6015004c svabhAve saumya tiSThanti zAzvataM mArgam AzritAH
6015005a tat svabhAvo mamApy eSa yad agAdho 'ham aplavaH
6015005c vikAras tu bhaved rAdha etat te pravadAmy aham
6015006a na kAmAn na ca lobhAd vA na bhayAt pArthivAtmaja
6015006c grAhanakrAkulajalaM stambhayeyaM kathaM cana
6015007a vidhAsye rAma yenApi viSahiSye hy ahaM tathA
6015007c grAhA na prahariSyanti yAvat senA tariSyati
6015008a ayaM saumya nalo nAma tanujo vizvakarmaNaH
6015008c pitrA dattavaraH zrImAn pratimo vizvakarmaNaH
6015009a eSa setuM mahotsAhaH karotu mayi vAnaraH
6015009c tam ahaM dhArayiSyAmi tathA hy eSa yathA pitA
6015010a evam uktvodadhir naSTaH samutthAya nalas tataH
6015010c abravId vAnarazreSTho vAkyaM rAmaM mahAbalaH
6015011a ahaM setuM kariSyAmi vistIrNe varuNAlaye
6015011c pituH sAmarthyam AsthAya tattvam Aha mahodadhiH
6015012a mama mAtur varo datto mandare vizvakarmaNA
6015012c aurasas tasya putro 'haM sadRzo vizvakarmaNA
6015013a na cApy aham anukto vai prabrUyAm Atmano guNAn
6015013c kAmam adyaiva badhnantu setuM vAnarapuMgavAH
6015014a tato nisRSTarAmeNa sarvato hariyUthapAH
6015014c abhipetur mahAraNyaM hRSTAH zatasahasrazaH
6015015a te nagAn nagasaMkAzAH zAkhAmRgagaNarSabhAH
6015015c babhaJjur vAnarAs tatra pracakarSuz ca sAgaram
6015016a te sAlaiz cAzvakarNaiz ca dhavair vaMzaiz ca vAnarAH
6015016c kuTajair arjunais tAlais tikalais timizair api
6015017a bilvakaiH saptaparNaiz ca karNikAraiz ca puSpitaiH
6015017c cUtaiz cAzokavRkSaiz ca sAgaraM samapUrayan
6015018a samUlAMz ca vimUlAMz ca pAdapAn harisattamAH
6015018c indraketUn ivodyamya prajahrur harayas tarUn
6015019a prakSipyamANair acalaiH sahasA jalam uddhatam
6015019c samutpatitam AkAzam apAsarpat tatas tataH
6015020a dazayojanavistIrNaM zatayojanam Ayatam
6015020c nalaz cakre mahAsetuM madhye nadanadIpateH
6015021a zilAnAM kSipyamANAnAM zailAnAM tatra pAtyatAm
6015021c babhUva tumulaH zabdas tadA tasmin mahodadhau
6015022a sa nalena kRtaH setuH sAgare makarAlaye
6015022c zuzubhe subhagaH zrImAn svAtIpatha ivAmbare
6015023a tato devAH sagandharvAH siddhAz ca paramarSayaH
6015024a AplavantaH plavantaz ca garjantaz ca plavaMgamAH
6015024c tam acintyam asahyaM ca adbhutaM lomaharSaNam
6015024e dadRzuH sarvabhUtAni sAgare setubandhanam
6015025a tAni koTisahasrANi vAnarANAM mahaujasAm
6015025c badhnantaH sAgare setuM jagmuH pAraM mahodadheH
6015026a vizAlaH sukRtaH zrImAn subhUmiH susamAhitaH
6015026c azobhata mahAsetuH sImanta iva sAgare
6015027a tataH pare samudrasya gadApANir vibhISaNaH
6015027c pareSAm abhighatArtham atiSThat sacivaiH saha
6015028a agratas tasya sainyasya zrImAn rAmaH salakSmaNaH
6015028c jagAma dhanvI dharmAtmA sugrIveNa samanvitaH
6015029a anye madhyena gacchanti pArzvato 'nye plavaMgamAH
6015029c salile prapatanty anye mArgam anye na lebhire
6015029e ke cid vaihAyasa gatAH suparNA iva pupluvuH
6015030a ghoSeNa mahatA ghoSaM sAgarasya samucchritam
6015030c bhImam antardadhe bhImA tarantI harivAhinI
6015031a vAnarANAM hi sA tIrNA vAhinI nala setunA
6015031c tIre nivivize rAjJA bahumUlaphalodake
6015032a tad adbhutaM rAghava karma duSkaraM; samIkSya devAH saha siddhacAraNaiH
6015032c upetya rAmaM sahitA maharSibhiH; samabhyaSiJcan suzubhair jalaiH pRthak
6015033a jayasva zatrUn naradeva medinIM; sasAgarAM pAlaya zAzvatIH samAH
6015033c itIva rAmaM naradevasatkRtaM; zubhair vacobhir vividhair apUjayan
6016001a sabale sAgaraM tIrNe rAme dazarathAtmaje
6016001c amAtyau rAvaNaH zrImAn abravIc chukasAraNau
6016002a samagraM sAgaraM tIrNaM dustaraM vAnaraM balam
6016002c abhUtapUrvaM rAmeNa sAgare setubandhanam
6016003a sAgare setubandhaM tu na zraddadhyAM kathaM cana
6016003c avazyaM cApi saMkhyeyaM tan mayA vAnaraM balam
6016004a bhavantau vAnaraM sainyaM pravizyAnupalakSitau
6016004c parimANaM ca vIryaM ca ye ca mukhyAH plavaMgamAH
6016005a mantriNo ye ca rAmasya sugrIvasya ca saMmatAH
6016005c ye pUrvam abhivartante ye ca zUrAH plavaMgamAH
6016006a sa ca setur yathA baddhaH sAgare salilArNave
6016006c nivezaz ca yathA teSAM vAnarANAM mahAtmanAm
6016007a rAmasya vyavasAyaM ca vIryaM praharaNAni ca
6016007c lakSmaNasya ca vIrasya tattvato jJAtum arhatha
6016008a kaz ca senApatis teSAM vAnarANAM mahaujasAm
6016008c etaj jJAtvA yathAtattvaM zIghram agantum arhathaH
6016009a iti pratisamAdiSTau rAkSasau zukasAraNau
6016009c harirUpadharau vIrau praviSTau vAnaraM balam
6016010a tatas tad vAnaraM sainyam acintyaM lomaharSaNam
6016010c saMkhyAtuM nAdhyagacchetAM tadA tau zukasAraNau
6016011a tat sthitaM parvatAgreSu nirdareSu guhAsu ca
6016011c samudrasya ca tIreSu vaneSUpavaneSu ca
6016012a taramANaM ca tIrNaM ca tartukAmaM ca sarvazaH
6016012c niviSTaM nivizac caiva bhImanAdaM mahAbalam
6016013a tau dadarza mahAtejAH pracchannau ca vibhISaNaH
6016013c AcacakSe 'tha rAmAya gRhItvA zukasAraNau
6016013e laGkAyAH samanuprAptau cArau parapuraMjayau
6016014a tau dRSTvA vyathitau rAmaM nirAzau jIvite tadA
6016014c kRtAJjalipuTau bhItau vacanaM cedam UcatuH
6016015a AvAm ihAgatau saumya rAvaNaprahitAv ubhau
6016015c parijJAtuM balaM kRtsnaM tavedaM raghunandana
6016016a tayos tad vacanaM zrutvA rAmo dazarathAtmajaH
6016016c abravIt prahasan vAkyaM sarvabhUtahite rataH
6016017a yadi dRSTaM balaM kRtsnaM vayaM vA susamIkSitAH
6016017c yathoktaM vA kRtaM kAryaM chandataH pratigamyatAm
6016018a pravizya nagarIM laGkAM bhavadbhyAM dhanadAnujaH
6016018c vaktavyo rakSasAM rAjA yathoktaM vacanaM mama
6016019a yad balaM ca samAzritya sItAM me hRtavAn asi
6016019c tad darzaya yathAkAmaM sasainyaH sahabAndhavaH
6016020a zvaHkAle nagarIM laGkAM saprAkArAM satoraNAm
6016020c rAkSasaM ca balaM pazya zarair vidhvaMsitaM mayA
6016021a ghoraM roSam ahaM mokSye balaM dhAraya rAvaNa
6016021c zvaHkAle vajravAn vajraM dAnaveSv iva vAsavaH
6016022a iti pratisamAdiSTau rAkSasau zukasAraNau
6016022c Agamya nagarIM laGkAm abrUtAM rAkSasAdhipam
6016023a vibhISaNagRhItau tu vadhArhau rAkSasezvara
6016023c dRSTvA dharmAtmanA muktau rAmeNAmitatejasA
6016024a ekasthAnagatA yatra catvAraH puruSarSabhAH
6016024c lokapAlopamAH zUrAH kRtAstrA dRDhavikramAH
6016025a rAmo dAzarathiH zrImA&l lakSmaNaz ca vibhISaNaH
6016025c sugrIvaz ca mahAtejA mahendrasamavikramaH
6016026a ete zaktAH purIM laGkAM saprAkArAM satoraNAm
6016026c utpATya saMkrAmayituM sarve tiSThantu vAnarAH
6016027a yAdRzaM tasya rAmasya rUpaM praharaNAni ca
6016027c vadhiSyati purIM laGkAm ekas tiSThantu te trayaH
6016028a rAmalakSmaNaguptA sA sugrIveNa ca vAhinI
6016028c babhUva durdharSatarA sarvair api surAsuraiH
6016029a prahRSTarUpA dhvajinI vanaukasAM; mahAtmanAM saMprati yoddhum icchatAm
6016029c alaM virodhena zamo vidhIyatAM; pradIyatAM dAzarathAya maithilI
6017001a tad vacaH pathyam aklIbaM sAraNenAbhibhASitam
6017001c nizamya rAvaNo rAjA pratyabhASata sAraNam
6017002a yadi mAm abhiyuJjIran devagandharvadAnavAH
6017002c naiva sItAM pradAsyAmi sarvalokabhayAd api
6017003a tvaM tu saumya paritrasto haribhir nirjito bhRzam
6017003c pratipradAnam adyaiva sItAyAH sAdhu manyase
6017003e ko hi nAma sapatno mAM samare jetum arhati
6017004a ity uktvA paruSaM vAkyaM rAvaNo rAkSasAdhipaH
6017004c Aruroha tataH zrImAn prAsAdaM himapANDuram
6017004e bahutAlasamutsedhaM rAvaNo 'tha didRkSayA
6017005a tAbhyAM carAbhyAM sahito rAvaNaH krodhamUrchitaH
6017005c pazyamAnaH samudraM ca parvatAMz ca vanAni ca
6017005e dadarza pRthivIdezaM susaMpUrNaM plavaMgamaiH
6017006a tad apAram asaMkhyeyaM vAnarANAM mahad balam
6017006c Alokya rAvaNo rAjA paripapraccha sAraNam
6017007a eSAM vAnaramukhyAnAM ke zUrAH ke mahAbalAH
6017007c ke pUrvam abhivartante mahotsAhAH samantataH
6017008a keSAM zRNoti sugrIvaH ke vA yUthapayUthapAH
6017008c sAraNAcakSva me sarvaM ke pradhAnAH plavaMgamAH
6017009a sAraNo rAkSasendrasya vacanaM paripRcchataH
6017009c AcacakSe 'tha mukhyajJo mukhyAMs tAMs tu vanaukasaH
6017010a eSa yo 'bhimukho laGkAM nardaMs tiSThati vAnaraH
6017010c yUthapAnAM sahasrANAM zatena parivAritaH
6017011a yasya ghoSeNa mahatA saprAkArA satoraNA
6017011c laGkA pravepate sarvA sazailavanakAnanA
6017012a sarvazAkhAmRgendrasya sugrIvasya mahAtmanaH
6017012c balAgre tiSThate vIro nIlo nAmaiSa yUthapaH
6017013a bAhU pragRhya yaH padbhyAM mahIM gacchati vIryavAn
6017013c laGkAm abhimukhaH kopAd abhIkSNaM ca vijRmbhate
6017014a girizRGgapratIkAzaH padmakiJjalkasaMnibhaH
6017014c sphoTayaty abhisaMrabdho lAGgUlaM ca punaH punaH
6017015a yasya lAGgUlazabdena svanantIva dizo daza
6017015c eSa vAnararAjena surgrIveNAbhiSecitaH
6017015e yauvarAjye 'Ggado nAma tvAm Ahvayati saMyuge
6017016a ye tu viSTabhya gAtrANi kSveDayanti nadanti ca
6017016c utthAya ca vijRmbhante krodhena haripuMgavAH
6017017a ete duSprasahA ghorAz caNDAz caNDaparAkramAH
6017017c aSTau zatasahasrANi dazakoTizatAni ca
6017018a ya enam anugacchanti vIrAz candanavAsinaH
6017018c eSa AzaMsate laGkAM svenAnIkena marditum
6017019a zveto rajatasaMkAzaH sabalo bhImavikramaH
6017019c buddhimAn vAnaraH zUras triSu lokeSu vizrutaH
6017020a tUrNaM sugrIvam Agamya punar gacchati vAnaraH
6017020c vibhajan vAnarIM senAm anIkAni praharSayan
6017021a yaH purA gomatItIre ramyaM paryeti parvatam
6017021c nAmnA saMkocano nAma nAnAnagayuto giriH
6017022a tatra rAjyaM prazAsty eSa kumudo nAma yUthapaH
6017022c yo 'sau zatasahasrANAM sahasraM parikarSati
6017023a yasya vAlA bahuvyAmA dIrghalAGgUlam AzritAH
6017023c tAmrAH pItAH sitAH zvetAH prakIrNA ghorakarmaNaH
6017024a adIno roSaNaz caNDaH saMgrAmam abhikAGkSati
6017024c eSaivAzaMsate laGkAM svenAnIkena marditum
6017025a yas tv eSa siMhasaMkAzaH kapilo dIrghakesaraH
6017025c nibhRtaH prekSate laGkAM didhakSann iva cakSuSA
6017026a vindhyaM kRSNagiriM sahyaM parvataM ca sudarzanam
6017026c rAjan satatam adhyAste rambho nAmaiSa yUthapaH
6017027a zataM zatasahasrANAM triMzac ca hariyUthapAH
6017027c parivAryAnugacchanti laGkAM marditum ojasA
6017028a yas tu karNau vivRNute jRmbhate ca punaH punaH
6017028c na ca saMvijate mRtyor na ca yUthAd vidhAvati
6017029a mahAbalo vItabhayo ramyaM sAlveya parvatam
6017029c rAjan satatam adhyAste zarabho nAma yUthapaH
6017030a etasya balinaH sarve vihArA nAma yUthapAH
6017030c rAjaJ zatasahasrANi catvAriMzat tathaiva ca
6017031a yas tu megha ivAkAzaM mahAn AvRtya tiSThati
6017031c madhye vAnaravIrANAM surANAm iva vAsavaH
6017032a bherINAm iva saMnAdo yasyaiSa zrUyate mahAn
6017032c ghoraH zAkhAmRgendrANAM saMgrAmam abhikAGkSatAm
6017033a eSa parvatam adhyAste pAriyAtram anuttamam
6017033c yuddhe duSprasaho nityaM panaso nAma yUthapaH
6017034a enaM zatasahasrANAM zatArdhaM paryupAsate
6017034c yUthapA yUthapazreSThaM yeSAM yUthAni bhAgazaH
6017035a yas tu bhImAM pravalgantIM camUM tiSThati zobhayan
6017035c sthitAM tIre samudrasya dvitIya iva sAgaraH
6017036a eSa dardarasaMkAzo vinato nAma yUthapaH
6017036c pibaMz carati parNAzAM nadInAm uttamAM nadIm
6017037a SaSTiH zatasahasrANi balam asya plavaMgamAH
6017037c tvAm Ahvayati yuddhAya krathano nAma yUthapaH
6017038a yas tu gairikavarNAbhaM vapuH puSyati vAnaraH
6017038c gavayo nAma tejasvI tvAM krodhAd abhivartate
6017039a enaM zatasahasrANi saptatiH paryupAsate
6017039c eSa AzaMsate laGkAM svenAnIkena marditum
6017040a ete duSprasahA ghorA balinaH kAmarUpiNaH
6017040c yUthapA yUthapazreSThA yeSAM saMkhyA na vidyate
6018001a tAMs tu te 'haM pravakSyAmi prekSamANasya yUthapAn
6018001c rAghavArthe parAkrAntA ye na rakSanti jIvitam
6018002a snigdhA yasya bahuzyAmA bAlA lAGgUlam AzritAH
6018002c tAmrAH pItAH sitAH zvetAH prakIrNA ghorakarmaNaH
6018003a pragRhItAH prakAzante sUryasyeva marIcayaH
6018003c pRthivyAM cAnukRSyante haro nAmaiSa yUthapaH
6018004a yaM pRSThato 'nugacchanti zatazo 'tha sahasrazaH
6018004c drumAn udyamya sahitA laGkArohaNatatparAH
6018005a eSa koTIsahasreNa vAnarANAM mahaujasAm
6018005c AkAGkSate tvAM saMgrAme jetuM parapuraMjaya
6018006a nIlAn iva mahAmeghAMs tiSThato yAMs tu pazyasi
6018006c asitAJ janasaMkAzAn yuddhe satyaparAkramAn
6018007a nakhadaMSTrAyudhAn vIrAMs tIkSNakopAn bhayAvahAn
6018007c asaMkhyeyAn anirdezyAn paraM pAram ivodadheH
6018008a parvateSu ca ye ke cid viSameSu nadISu ca
6018008c ete tvAm abhivartante rAjann RSkAH sudAruNAH
6018009a eSAM madhye sthito rAjan bhImAkSo bhImadarzanaH
6018009c parjanya iva jImUtaiH samantAt parivAritaH
6018010a RkSavantaM girizreSTham adhyAste narmadAM piban
6018010c sarvarkSANAm adhipatir dhUmro nAmaiSa yUthapaH
6018011a yavIyAn asya tu bhrAtA pazyainaM parvatopamam
6018011c bhrAtrA samAno rUpeNa viziSTas tu parAkrame
6018012a sa eSa jAmbavAn nAma mahAyUthapayUthapaH
6018012c prazAnto guruvartI ca saMprahAreSv amarSaNaH
6018013a etena sAhyaM sumahat kRtaM zakrasya dhImatA
6018013c devAsure jAmbavatA labdhAz ca bahavo varAH
6018014a Aruhya parvatAgrebhyo mahAbhravipulAH zilAH
6018014c muJcanti vipulAkArA na mRtyor udvijanti ca
6018015a rAkSasAnAM ca sadRzAH pizAcAnAM ca romazAH
6018015c etasya sainye bahavo vicaranty agnitejasaH
6018016a yaM tv enam abhisaMrabdhaM plavamAnam iva sthitam
6018016c prekSante vAnarAH sarve sthitaM yUthapayUthapam
6018017a eSa rAjan sahasrAkSaM paryupAste harIzvaraH
6018017c balena balasaMpanno rambho nAmaiSa yUthapaH
6018018a yaH sthitaM yojane zailaM gacchan pArzvena sevate
6018018c UrdhvaM tathaiva kAyena gataH prApnoti yojanam
6018019a yasmAn na paramaM rUpaM catuSpAdeSu vidyate
6018019c zrutaH saMnAdano nAma vAnarANAM pitAmahaH
6018020a yena yuddhaM tadA dattaM raNe zakrasya dhImatA
6018020c parAjayaz ca na prAptaH so 'yaM yUthapayUthapaH
6018020e yasya vikramamANasya zakrasyeva parAkramaH
6018021a eSa gandharvakanyAyAm utpannaH kRSNavartmanA
6018021c purA devAsure yuddhe sAhyArthaM tridivaukasAm
6018022a yasya vaizravaNo rAjA jambUm upaniSevate
6018022c yo rAjA parvatendrANAM bahukiMnarasevinAm
6018023a vihArasukhado nityaM bhrAtus te rAkSasAdhipa
6018023c tatraiSa vasati zrImAn balavAn vAnararSabhaH
6018023e yuddheSv akatthano nityaM krathano nAma yUthapaH
6018024a vRtaH koTisahasreNa harINAM samupasthitaH
6018024c eSaivAzaMsate laGkAM svenAnIkena marditum
6018025a yo gaGgAm anu paryeti trAsayan hastiyUthapAn
6018025c hastinAM vAnarANAM ca pUrvavairam anusmaran
6018026a eSa yUthapatir netA gacchan giriguhAzayaH
6018026c harINAM vAhinI mukhyo nadIM haimavatIm anu
6018027a uzIra bIjam Azritya parvataM mandaropamam
6018027c ramate vAnarazreSTho divi zakra iva svayam
6018028a enaM zatasahasrANAM sahasram abhivartate
6018028c eSa durmarSaNo rAjan pramAthI nAma yUthapaH
6018029a vAtenevoddhataM meghaM yam enam anupazyasi
6018029c vivartamAnaM bahuzo yatraitad bahulaM rajaH
6018030a ete 'sitamukhA ghorA golAGgUlA mahAbalAH
6018030c zataM zatasahasrANi dRSTvA vai setubandhanam
6018031a golAGgUlaM mahAvegaM gavAkSaM nAma yUthapam
6018031c parivAryAbhivartante laGkAM marditum ojasA
6018032a bhramarAcaritA yatra sarvakAmaphaladrumAH
6018032c yaM sUryatulyavarNAbham anuparyeti parvatam
6018033a yasya bhAsA sadA bhAnti tadvarNA mRgapakSiNaH
6018033c yasya prasthaM mahAtmAno na tyajanti maharSayaH
6018034a tatraiSa ramate rAjan ramye kAJcanaparvate
6018034c mukhyo vAnaramukhyAnAM kesarI nAma yUthapaH
6018035a SaSTir girisahasrANAM ramyAH kAJcanaparvatAH
6018035c teSAM madhye girivaras tvam ivAnagha rakSasAm
6018036a tatraite kapilAH zvetAs tAmrAsyA madhupiGgalAH
6018036c nivasanty uttamagirau tIkSNadaMSTrAnakhAyudhAH
6018037a siMha iva caturdaMSTrA vyAghrA iva durAsadAH
6018037c sarve vaizvanarasamA jvalitAzIviSopamAH
6018038a sudIrghAJcitalAGgUlA mattamAtaMgasaMnibhAH
6018038c mahAparvatasaMkAzA mahAjImUtanisvanAH
6018039a eSa caiSAm adhipatir madhye tiSThati vIryavAn
6018039c nAmnA pRthivyAM vikhyAto rAjaJ zatabalIti yaH
6018039e eSaivAzaMsate laGkAM svenAnIkena marditum
6018040a gajo gavAkSo gavayo nalo nIlaz ca vAnaraH
6018040c ekaika eva yUthAnAM koTibhir dazabhir vRtaH
6018041a tathAnye vAnarazreSThA vindhyaparvatavAsinaH
6018041c na zakyante bahutvAt tu saMkhyAtuM laghuvikramAH
6018042a sarve mahArAja mahAprabhAvAH; sarve mahAzailanikAzakAyAH
6018042c sarve samarthAH pRthivIM kSaNena; kartuM pravidhvastavikIrNazailAm
6019001a sAraNasya vacaH zrutvA rAvaNaM rAkSasAdhipam
6019001c balam Alokayan sarvaM zuko vAkyam athAbravIt
6019002a sthitAn pazyasi yAn etAn mattAn iva mahAdvipAn
6019002c nyagrodhAn iva gAGgeyAn sAlAn haimavatIn iva
6019003a ete duSprasahA rAjan balinaH kAmarUpiNaH
6019003c daityadAnavasaMkAzA yuddhe devaparAkramAH
6019004a eSAM koTisahasrANi nava paJcaca sapta ca
6019004c tathA zaGkhasahasrANi tathA vRndazatAni ca
6019005a ete sugrIvasacivAH kiSkindhAnilayAH sadA
6019005c harayo devagandharvair utpannAH kAmarUpiNaH
6019006a yau tau pazyasi tiSThantau kumArau devarUpiNau
6019006c maindaz ca dvividaz cobhau tAbhyAM nAsti samo yudhi
6019007a brahmaNA samanujJAtAv amRtaprAzinAv ubhau
6019007c AzaMsete yudhA laGkAm etau marditum ojasA
6019008a yAv etAv etayoH pArzve sthitau parvatasaMnibhau
6019008c sumukho vimukhaz caiva mRtyuputrau pituH samau
6019009a yaM tu pazyasi tiSThantaM prabhinnam iva kuJjaram
6019009c yo balAt kSobhayet kruddhaH samudram api vAnaraH
6019010a eSo 'bhigantA laGkAyA vaidehyAs tava ca prabho
6019010c enaM pazya purA dRSTaM vAnaraM punar Agatam
6019011a jyeSThaH kesariNaH putro vAtAtmaja iti zrutaH
6019011c hanUmAn iti vikhyAto laGghito yena sAgaraH
6019012a kAmarUpI harizreSTho balarUpasamanvitaH
6019012c anivAryagatiz caiva yathA satatagaH prabhuH
6019013a udyantaM bhAskaraM dRSTvA bAlaH kila pipAsitaH
6019013c triyojanasahasraM tu adhvAnam avatIrya hi
6019014a Adityam AhariSyAmi na me kSut pratiyAsyati
6019014c iti saMcintya manasA puraiSa baladarpitaH
6019015a anAdhRSyatamaM devam api devarSidAnavaiH
6019015c anAsAdyaiva patito bhAskarodayane girau
6019016a patitasya kaper asya hanur ekA zilAtale
6019016c kiM cid bhinnA dRDhahanor hanUmAn eSa tena vai
6019017a satyam Agamayogena mamaiSa vidito hariH
6019017c nAsya zakyaM balaM rUpaM prabhAvo vAnubhASitum
6019018a eSa AzaMsate laGkAm eko marditum ojasA
6019018c yaz caiSo 'nantaraH zUraH zyAmaH padmanibhekSaNaH
6019019a ikSvAkUNAm atiratho loke vikhyAta pauruSaH
6019019c yasmin na calate dharmo yo dharmaM nAtivartate
6019020a yo brAhmam astraM vedAMz ca veda vedavidAM varaH
6019020c yo bhindyAd gaganaM bANaiH parvatAMz cApi dArayet
6019021a yasya mRtyor iva krodhaH zakrasyeva parAkramaH
6019021c sa eSa rAmas tvAM yoddhuM rAjan samabhivartate
6019022a yaz caiSa dakSiNe pArzve zuddhajAmbUnadaprabhaH
6019022c vizAlavakSAs tAmrAkSo nIlakuJcitamUrdhajaH
6019023a eSo 'sya lakSmaNo nAma bhrAtA prANasamaH priyaH
6019023c naye yuddhe ca kuzalaH sarvazAstravizAradaH
6019024a amarSI durjayo jetA vikrAnto buddhimAn balI
6019024c rAmasya dakSiNo bAhur nityaM prANo bahizcaraH
6019025a na hy eSa rAghavasyArthe jIvitaM parirakSati
6019025c eSaivAzaMsate yuddhe nihantuM sarvarAkSasAn
6019026a yas tu savyam asau pakSaM rAmasyAzritya tiSThati
6019026c rakSogaNaparikSipto rAjA hy eSa vibhISaNaH
6019027a zrImatA rAjarAjena laGkAyAm abhiSecitaH
6019027c tvAm eva pratisaMrabdho yuddhAyaiSo 'bhivartate
6019028a yaM tu pazyasi tiSThantaM madhye girim ivAcalam
6019028c sarvazAkhAmRgendrANAM bhartAram aparAjitam
6019029a tejasA yazasA buddhyA jJAnenAbhijanena ca
6019029c yaH kapIn ati babhrAja himavAn iva parvatAn
6019030a kiSkindhAM yaH samadhyAste guhAM sagahanadrumAm
6019030c durgAM parvatadurgasthAM pradhAnaiH saha yUthapaiH
6019031a yasyaiSA kAJcanI mAlA zobhate zatapuSkarA
6019031c kAntA devamanuSyANAM yasyAM lakSmIH pratiSThitA
6019032a etAM ca mAlAM tArAM ca kapirAjyaM ca zAzvatam
6019032c sugrIvo vAlinaM hatvA rAmeNa pratipAditaH
6019033a evaM koTisahasreNa zaGkUnAM ca zatena ca
6019033c sugrIvo vAnarendras tvAM yuddhArtham abhivartate
6019034a imAM mahArAjasamIkSya vAhinIm; upasthitAM prajvalitagrahopamAm
6019034c tataH prayatnaH paramo vidhIyatAM; yathA jayaH syAn na paraiH parAjayaH
6020001a zukena tu samAkhyAtAMs tAn dRSTvA hariyUthapAn
6020001c samIpasthaM ca rAmasya bhrAtaraM svaM vibhISaNam
6020002a lakSmaNaM ca mahAvIryaM bhujaM rAmasya dakSiNam
6020002c sarvavAnararAjaM ca sugrIvaM bhImavikramam
6020003a kiM cid AvignahRdayo jAtakrodhaz ca rAvaNaH
6020003c bhartsayAm Asa tau vIrau kathAnte zukasAraNau
6020004a adhomukhau tau praNatAv abravIc chukasAraNau
6020004c roSagadgadayA vAcA saMrabdhaH paruSaM vacaH
6020005a na tAvat sadRzaM nAma sacivair upajIvibhiH
6020005c vipriyaM nRpater vaktuM nigrahapragrahe vibhoH
6020006a ripUNAM pratikUlAnAM yuddhArtham abhivartatAm
6020006c ubhAbhyAM sadRzaM nAma vaktum aprastave stavam
6020007a AcAryA guravo vRddhA vRthA vAM paryupAsitAH
6020007c sAraM yad rAjazAstrANAm anujIvyaM na gRhyate
6020008a gRhIto vA na vijJAto bhAro jJAnasya vochyate
6020008c IdRzaiH sacivair yukto mUrkhair diSTyA dharAmy aham
6020009a kiM nu mRtyor bhayaM nAsti mAM vaktuM paruSaM vacaH
6020009c yasya me zAsato jihvA prayacchati zubhAzubham
6020010a apy eva dahanaM spRSTvA vane tiSThanti pAdapAH
6020010c rAjadoSaparAmRSTAs tiSThante nAparAdhinaH
6020011a hanyAm aham imau pApau zatrupakSaprazaMsakau
6020011c yadi pUrvopakArair me na krodho mRdutAM vrajet
6020012a apadhvaMsata gacchadhvaM saMnikarSAd ito mama
6020012c na hi vAM hantum icchAmi smarann upakRtAni vAm
6020012e hatAv eva kRtaghnau tau mayi snehaparAGmukhau
6020013a evam uktau tu savrIDau tAv ubhau zukasAraNau
6020013c rAvaNaM jayazabdena pratinandyAbhiniHsRtau
6020014a abravIt sa dazagrIvaH samIpasthaM mahodaram
6020014c upasthApaya zIghraM me cArAn nItivizAradAn
6020015a tataz carAH saMtvaritAH prAptAH pArthivazAsanAt
6020015c upasthitAH prAJjalayo vardhayitvA jayAziSA
6020016a tAn abravIt tato vAkyaM rAvaNo rAkSasAdhipaH
6020016c cArAn pratyayikAJ zUrAn bhaktAn vigatasAdhvasAn
6020017a ito gacchata rAmasya vyavasAyaM parIkSatha
6020017c mantreSv abhyantarA ye 'sya prItyA tena samAgatAH
6020018a kathaM svapiti jAgarti kim anyac ca kariSyati
6020018c vijJAya nipuNaM sarvam Agantavyam azeSataH
6020019a cAreNa viditaH zatruH paNDitair vasudhAdhipaiH
6020019c yuddhe svalpena yatnena samAsAdya nirasyate
6020020a cArAs tu te tathety uktvA prahRSTA rAkSasezvaram
6020020c kRtvA pradakSiNaM jagmur yatra rAmaH salakSmaNaH
6020021a te suvelasya zailasya samIpe rAmalakSmaNau
6020021c pracchannA dadRzur gatvA sasugrIvavibhISaNau
6020022a te tu dharmAtmanA dRSTA rAkSasendreNa rAkSasAH
6020022c vibhISaNena tatrasthA nigRhItA yadRcchayA
6020023a vAnarair arditAs te tu vikrAntair laghuvikramaiH
6020023c punar laGkAm anuprAptAH zvasanto naSTacetasaH
6020024a tato dazagrIvam upasthitAs te; cArA bahirnityacarA nizAcarAH
6020024c gireH suvelasya samIpavAsinaM; nyavedayan bhImabalaM mahAbalAH
6021001a tatas tam akSobhya balaM laGkAdhipataye carAH
6021001c suvele rAghavaM zaile niviSTaM pratyavedayan
6021002a cArANAM rAvaNaH zrutvA prAptaM rAmaM mahAbalam
6021002c jAtodvego 'bhavat kiM cic chArdUlaM vAkyam abravIt
6021003a ayathAvac ca te varNo dInaz cAsi nizAcara
6021003c nAsi kaccid amitrANAM kruddhAnAM vazam AgataH
6021004a iti tenAnuziSTas tu vAcaM mandam udIrayat
6021004c tadA rAkSasazArdUlaM zArdUlo bhayavihvalaH
6021005a na te cArayituM zakyA rAjan vAnarapuMgavAH
6021005c vikrAntA balavantaz ca rAghaveNa ca rakSitAH
6021006a nApi saMbhASituM zakyAH saMprazno 'tra na labhyate
6021006c sarvato rakSyate panthA vAnaraiH parvatopamaiH
6021007a praviSTamAtre jJAto 'haM bale tasminn acArite
6021007c balAd gRhIto bahubhir bahudhAsmi vidAritaH
6021008a jAnubhir muSTibhir dantais talaiz cAbhihato bhRzam
6021008c pariNIto 'smi haribhir balavadbhir amarSaNaiH
6021009a pariNIya ca sarvatra nIto 'haM rAmasaMsadam
6021009c rudhirAdigdhasarvAGgo vihvalaz calitendriyaH
6021010a haribhir vadhyamAnaz ca yAcamAnaH kRtAJjaliH
6021010c rAghaveNa paritrAto jIvAmi ha yadRcchayA
6021011a eSa zailaiH zilAbhiz ca pUrayitvA mahArNavam
6021011c dvAram Azritya laGkAyA rAmas tiSThati sAyudhaH
6021012a garuDavyUham AsthAya sarvato haribhir vRtaH
6021012c mAM visRjya mahAtejA laGkAm evAbhivartate
6021013a purA prAkAram AyAti kSipram ekataraM kuru
6021013c sItAM cAsmai prayacchAzu suyuddhaM vA pradIyatAm
6021014a manasA saMtatApAtha tac chrutvA rAkSasAdhipaH
6021014c zArdUlasya mahad vAkyam athovAca sa rAvaNaH
6021015a yadi mAM pratiyudhyeran devagandharvadAnavAH
6021015c naiva sItAM pradAsyAmi sarvalokabhayAd api
6021016a evam uktvA mahAtejA rAvaNaH punar abravIt
6021016c cAritA bhavatA senA ke 'tra zUrAH plavaMgamAH
6021017a kIdRzAH kiMprabhAvAz ca vAnarA ye durAsadAH
6021017c kasya putrAz ca pautrAz ca tattvam AkhyAhi rAkSasa
6021018a tatr atra pratipatsyAmi jJAtvA teSAM balAbalam
6021018c avazyaM balasaMkhyAnaM kartavyaM yuddham icchatA
6021019a athaivam uktaH zArdUlo rAvaNenottamaz caraH
6021019c idaM vacanam Arebhe vaktuM rAvaNasaMnidhau
6021020a atharkSarajasaH putro yudhi rAjan sudurjayaH
6021020c gadgadasyAtha putro 'tra jAmbavAn iti vizrutaH
6021021a gadgadasyaiva putro 'nyo guruputraH zatakratoH
6021021c kadanaM yasya putreNa kRtam ekena rakSasAm
6021022a suSeNaz cApi dharmAtmA putro dharmasya vIryavAn
6021022c saumyaH somAtmajaz cAtra rAjan dadhimukhaH kapiH
6021023a sumukho durmukhaz cAtra vegadarzI ca vAnaraH
6021023c mRtyur vAnararUpeNa nUnaM sRSTaH svayambhuvA
6021024a putro hutavahasyAtha nIlaH senApatiH svayam
6021024c anilasya ca putro 'tra hanUmAn iti vizrutaH
6021025a naptA zakrasya durdharSo balavAn aGgado yuvA
6021025c maindaz ca dvividaz cobhau balinAv azvisaMbhavau
6021026a putrA vaivasvatasyAtra paJcakAlAntakopamAH
6021026c gajo gavAkSo gavayaH zarabho gandhamAdanaH
6021027a zveto jyotirmukhaz cAtra bhAskarasyAtmasaMbhavau
6021027c varuNasya ca putro 'tha hemakUTaH plavaMgamaH
6021028a vizvakarmasuto vIro nalaH plavagasattamaH
6021028c vikrAnto vegavAn atra vasuputraH sudurdharaH
6021029a dazavAnarakoTyaz ca zUrANAM yuddhakAGkSiNAm
6021029c zrImatAM devaputrANAM zeSAn nAkhyAtum utsahe
6021030a putro dazarathasyaiSa siMhasaMhanano yuvA
6021030c dUSaNo nihato yena kharaz ca trizirAs tathA
6021031a nAsti rAmasya sadRzo vikrame bhuvi kaz cana
6021031c virAdho nihato yena kabandhaz cAntakopamaH
6021032a vaktuM na zakto rAmasya naraH kaz cid guNAn kSitau
6021032c janasthAnagatA yena tAvanto rAkSasA hatAH
6021033a lakSmaNaz cAtra dharmAtmA mAtaMgAnAm ivarSabhaH
6021033c yasya bANapathaM prApya na jIved api vAsavaH
6021034a rAkSasAnAM variSThaz ca tava bhrAtA vibhISaNaH
6021034c parigRhya purIM laGkAM rAghavasya hite rataH
6021035a iti sarvaM samAkhyAtaM tavedaM vAnaraM balam
6021035c suvele 'dhiSThitaM zaile zeSakArye bhavAn gatiH
6022001a tatas tam akSobhyabalaM laGkAyAM nRpatez caraH
6022001c suvele rAghavaM zaile niviSTaM pratyavedayan
6022002a cArANAM rAvaNaH zrutvA prAptaM rAmaM mahAbalam
6022002c jAtodvego 'bhavat kiM cit sacivAMz cedam abravIt
6022003a mantriNaH zIghram AyAntu sarve vai susamAhitAH
6022003c ayaM no mantrakAlo hi saMprApta iva rAkSasAH
6022004a tasya tac chAsanaM zrutvA mantriNo 'bhyAgaman drutam
6022004c tataH saMmantrayAm Asa sacivai rAkSasaiH saha
6022005a mantrayitvA sa durdharSaH kSamaM yat samanantaram
6022005c visarjayitvA sacivAn praviveza svam Alayam
6022006a tato rAkSasam AhUya vidyujjihvaM mahAbalam
6022006c mAyAvidaM mahAmAyaH prAvizad yatra maithilI
6022007a vidyujjihvaM ca mAyAjJam abravId rAkSasAdhipaH
6022007c mohayiSyAmahe sItAM mAyayA janakAtmajAm
6022008a ziro mAyAmayaM gRhya rAghavasya nizAcara
6022008c mAM tvaM samupatiSThasva mahac ca sazaraM dhanuH
6022009a evam uktas tathety Aha vidyujjihvo nizAcaraH
6022009c tasya tuSTo 'bhavad rAjA pradadau ca vibhUSaNam
6022010a azokavanikAyAM tu praviveza mahAbalaH
6022010c tato dInAm adainyArhAM dadarza dhanadAnujaH
6022010e adhomukhIM zokaparAm upaviSTAM mahItale
6022011a bhartAram eva dhyAyantIm azokavanikAM gatAm
6022011c upAsyamAnAM ghorAbhI rAkSasIbhir adUrataH
6022012a upasRtya tataH sItAM praharSan nAma kIrtayan
6022012c idaM ca vacanaM dhRSTam uvAca janakAtmajAm
6022013a sAntvyamAnA mayA bhadre yam upAzritya valgase
6022013c khara hantA sa te bhartA rAghavaH samare hataH
6022014a chinnaM te sarvato mUlaM darpas te nihato mayA
6022014c vyasanenAtmanaH sIte mama bhAryA bhaviSyasi
6022015a alpapuNye nivRttArthe mUDhe paNDitamAnini
6022015c zRNu bhartRbadhaM sIte ghoraM vRtravadhaM yathA
6022016a samAyAtaH samudrAntaM mAM hantuM kila rAghavaH
6022016c vAnarendrapraNItena balena mahatA vRtaH
6022017a saMniviSTaH samudrasya tIram AsAdya dakSiNam
6022017c balena mahatA rAmo vrajaty astaM divAkare
6022018a athAdhvani parizrAntam ardharAtre sthitaM balam
6022018c sukhasuptaM samAsAdya cAritaM prathamaM caraiH
6022019a tat prahastapraNItena balena mahatA mama
6022019c balam asya hataM rAtrau yatra rAmaH sulakSmaNaH
6022020a paTTasAn parighAn khaDgAMz cakrAn daNDAn mahAyasAn
6022020c bANajAlAni zUlAni bhAsvarAn kUTamudgarAn
6022021a yaSTIz ca tomarAn prAsaMz cakrANi musalAni ca
6022021c udyamyodyamya rakSobhir vAnareSu nipAtitAH
6022022a atha suptasya rAmasya prahastena pramAthinA
6022022c asaktaM kRtahastena ziraz chinnaM mahAsinA
6022023a vibhISaNaH samutpatya nigRhIto yadRcchayA
6022023c dizaH pravrAjitaH sarvair lakSmaNaH plavagaiH saha
6022024a sugrIvo grIvayA zete bhagnayA plavagAdhipaH
6022024c nirastahanukaH zete hanUmAn rAkSasair hataH
6022025a jAmbavAn atha jAnubhyAm utpatan nihato yudhi
6022025c paTTasair bahubhiz chinno nikRttaH pAdapo yathA
6022026a maindaz ca dvividaz cobhau nihatau vAnararSabhau
6022026c niHzvasantau rudantau ca rudhireNa samukSitau
6022027a asinAbhyAhataz chinno madhye ripuniSUdanaH
6022027c abhiSTanati medinyAM panasaH panaso yathA
6022028a nArAcair bahubhiz chinnaH zete daryAM darImukhaH
6022028c kumudas tu mahAtejA niSkUjan sAyakair hataH
6022029a aGgado bahubhiz chinnaH zarair AsAdya rAkSasaiH
6022029c pAtito rudhirodgArI kSitau nipatito 'GgadaH
6022030a harayo mathitA nAgai rathajAlais tathApare
6022030c zAyitA mRditAs tatra vAyuvegair ivAmbudAH
6022031a pradrutAz ca pare trastA hanyamAnA jaghanyataH
6022031c abhidrutAs tu rakSobhiH siMhair iva mahAdvipAH
6022032a sAgare patitAH ke cit ke cid gaganam AzritAH
6022032c RkSA vRkSAn upArUDhA vAnarais tu vimizritAH
6022033a sAgarasya ca tIreSu zaileSu ca vaneSu ca
6022033c piGgAkSAs te virUpAkSair bahubhir bahavo hatAH
6022034a evaM tava hato bhartA sasainyo mama senayA
6022034c kSatajArdraM rajodhvastam idaM cAsyAhRtaM ziraH
6022035a tataH paramadurdharSo rAvaNo rAkSasezvaraH
6022035c sItAyAm upazRNvantyAM rAkSasIm idam abravIt
6022036a rAkSasaM krUrakarmANaM vidyujjihvaM tvam Anaya
6022036c yena tad rAghavaziraH saMgrAmAt svayam AhRtam
6022037a vidyujjihvas tato gRhya ziras tat sazarAsanam
6022037c praNAmaM zirasA kRtvA rAvaNasyAgrataH sthitaH
6022038a tam abravIt tato rAjA rAvaNo rAkSasaM sthitam
6022038c vidyujjihvaM mahAjihvaM samIpaparivartinam
6022039a agrataH kuru sItAyAH zIghraM dAzaratheH ziraH
6022039c avasthAM pazcimAM bhartuH kRpaNA sAdhu pazyatu
6022040a evam uktaM tu tad rakSaH ziras tat priyadarzanam
6022040c upanikSipya sItAyAH kSipram antaradhIyata
6022041a rAvaNaz cApi cikSepa bhAsvaraM kArmukaM mahat
6022041c triSu lokeSu vikhyAtaM sItAm idam uvAca ha
6022042a idaM tat tava rAmasya kArmukaM jyAsamanvitam
6022042c iha prahastenAnItaM hatvA taM nizi mAnuSam
6022043a sa vidyujjihvena sahaiva tac chiro; dhanuz ca bhUmau vinikIrya rAvaNaH
6022043c videharAjasya sutAM yazasvinIM; tato 'bravIt tAM bhava me vazAnugA
6023001a sA sItA tac chiro dRSTvA tac ca kArmukam uttamam
6023001c sugrIvapratisaMsargam AkhyAtaM ca hanUmatA
6023002a nayane mukhavarNaM ca bhartus tat sadRzaM mukham
6023002c kezAn kezAntadezaM ca taM ca cUDAmaNiM zubham
6023003a etaiH sarvair abhijJAnair abhijJAya suduHkhitA
6023003c vijagarhe 'tha kaikeyIM krozantI kurarI yathA
6023004a sakAmA bhava kaikeyi hato 'yaM kulanandanaH
6023004c kulam utsAditaM sarvaM tvayA kalahazIlayA
6023005a AryeNa kiM nu kaikeyyAH kRtaM rAmeNa vipriyam
6023005c yad gRhAc cIravasanas tayA prasthApito vanam
6023006a evam uktvA tu vaidehI vepamAnA tapasvinI
6023006c jagAma jagatIM bAlA chinnA tu kadalI yathA
6023007a sA muhUrtAt samAzvasya pratilabhya ca cetanAm
6023007c tac chiraH samupAghrAya vilalApAyatekSaNA
6023008a hA hatAsmi mahAbAho vIravratam anuvratA
6023008c imAM te pazcimAvasthAM gatAsmi vidhavA kRtA
6023009a prathamaM maraNaM nAryA bhartur vaiguNyam ucyate
6023009c suvRttaH sAdhuvRttAyAH saMvRttas tvaM mamAgrataH
6023010a duHkhAd duHkhaM prapannAyA magnAyAH zokasAgare
6023010c yo hi mAm udyatas trAtuM so 'pi tvaM vinipAtitaH
6023011a sA zvazrUr mama kausalyA tvayA putreNa rAghava
6023011c vatseneva yathA dhenur vivatsA vatsalA kRtA
6023012a AdiSTaM dIrgham Ayus te yair acintyaparAkrama
6023012c anRtaM vacanaM teSAm alpAyur asi rAghava
6023013a atha vA nazyati prajJA prAjJasyApi satas tava
6023013c pacaty enaM tathA kAlo bhUtAnAM prabhavo hy ayam
6023014a adRSTaM mRtyum ApannaH kasmAt tvaM nayazAstravit
6023014c vyasanAnAm upAyajJaH kuzalo hy asi varjane
6023015a tathA tvaM saMpariSvajya raudrayAtinRzaMsayA
6023015c kAlarAtryA mayAcchidya hRtaH kamalalocanaH
6023016a upazeSe mahAbAho mAM vihAya tapasvinIm
6023016c priyAm iva zubhAM nArIM pRthivIM puruSarSabha
6023017a arcitaM satataM yatnAd gandhamAlyair mayA tava
6023017c idaM te matpriyaM vIra dhanuH kAJcanabhUSitam
6023018a pitrA dazarathena tvaM zvazureNa mamAnagha
6023018c pUrvaiz ca pitRbhiH sArdhaM nUnaM svarge samAgataH
6023019a divi nakSatrabhUtas tvaM mahat karma kRtaM priyam
6023019c puNyaM rAjarSivaMzaM tvam AtmanaH samupekSase
6023020a kiM mAn na prekSase rAjan kiM mAM na pratibhASase
6023020c bAlAM bAlena saMprAptAM bhAryAM mAM sahacAriNIm
6023021a saMzrutaM gRhNatA pANiM cariSyAmIti yat tvayA
6023021c smara tan mama kAkutstha naya mAm api duHkhitAm
6023022a kasmAn mAm apahAya tvaM gato gatimatAM vara
6023022c asmAl lokAd amuM lokaM tyaktvA mAm iha duHkhitAm
6023023a kalyANair ucitaM yat tat pariSvaktaM mayaiva tu
6023023c kravyAdais tac charIraM te nUnaM viparikRSyate
6023024a agniSTomAdibhir yajJair iSTavAn AptadakSiNaiH
6023024c agnihotreNa saMskAraM kena tvaM tu na lapsyase
6023025a pravrajyAm upapannAnAM trayANAm ekam Agatam
6023025c pariprakSyati kausalyA lakSmaNaM zokalAlasA
6023026a sa tasyAH paripRcchantyA vadhaM mitrabalasya te
6023026c tava cAkhyAsyate nUnaM nizAyAM rAkSasair vadham
6023027a sA tvAM suptaM hataM zrutvA mAM ca rakSogRhaM gatAm
6023027c hRdayena vidIrNena na bhaviSyati rAghava
6023028a sAdhu pAtaya mAM kSipraM rAmasyopari rAvaNaH
6023028c samAnaya patiM patnyA kuru kalyANam uttamam
6023029a zirasA me ziraz cAsya kAyaM kAyena yojaya
6023029c rAvaNAnugamiSyAmi gatiM bhartur mahAtmanaH
6023029e muhUrtam api necchAmi jIvituM pApajIvinA
6023030a zrutaM mayA vedavidAM brAhmaNAnAM pitur gRhe
6023030c yAsAM strINAM priyo bhartA tAsAM lokA mahodayAH
6023031a kSamA yasmin damas tyAgaH satyaM dharmaH kRtajJatA
6023031c ahiMsA caiva bhUtAnAM tam Rte kA gatir mama
6023032a iti sA duHkhasaMtaptA vilalApAyatekSaNA
6023032c bhartuH ziro dhanus tatra samIkSya janakAtmajA
6023033a evaM lAlapyamAnAyAM sItAyAM tatra rAkSasaH
6023033c abhicakrAma bhartAram anIkasthaH kRtAJjaliH
6023034a vijayasvAryaputreti so 'bhivAdya prasAdya ca
6023034c nyavedayad anuprAptaM prahastaM vAhinIpatim
6023035a amAtyaiH sahitaH sarvaiH prahastaH samupasthitaH
6023035c kiM cid AtyayikaM kAryaM teSAM tvaM darzanaM kuru
6023036a etac chrutvA dazagrIvo rAkSasaprativeditam
6023036c azokavanikAM tyaktvA mantriNAM darzanaM yayau
6023037a sa tu sarvaM samarthyaiva mantribhiH kRtyam AtmanaH
6023037c sabhAM pravizya vidadhe viditvA rAmavikramam
6023038a antardhAnaM tu tac chIrSaM tac ca kArmukam uttamam
6023038c jagAma rAvaNasyaiva niryANasamanantaram
6023039a rAkSasendras tu taiH sArdhaM mantribhir bhImavikramaiH
6023039c samarthayAm Asa tadA rAmakAryavinizcayam
6023040a avidUrasthitAn sarvAn balAdhyakSAn hitaiSiNaH
6023040c abravIt kAlasadRzo rAvaNo rAkSasAdhipaH
6023041a zIghraM bherIninAdena sphuTakoNAhatena me
6023041c samAnayadhvaM sainyAni vaktavyaM ca na kAraNam
6023042a tatas tatheti pratigRhya tad vaco; balAdhipAs te mahad Atmano balam
6023042c samAnayaMz caiva samAgataM ca te; nyavedayan bhartari yuddhakAGkSiNi
6024001a sItAM tu mohitAM dRSTvA saramA nAma rAkSasI
6024001c AsasAdAzu vaidehIM priyAM praNayinI sakhI
6024002a sA hi tatra kRtA mitraM sItayA rakSyamANayA
6024002c rakSantI rAvaNAd iSTA sAnukrozA dRDhavratA
6024003a sA dadarza sakhIM sItAM saramA naSTacetanAm
6024003c upAvRtyotthitAM dhvastAM vaDavAm iva pAMsuSu
6024004a tAM samAzvAsayAm Asa sakhI snehena suvratA
6024004c uktA yad rAvaNena tvaM pratyuktaM ca svayaM tvayA
6024005a sakhIsnehena tad bhIru mayA sarvaM pratizrutam
6024005c lInayA ganahe zUhye bhayam utsRjya rAvaNAt
6024005e tava hetor vizAlAkSi na hi me jIvitaM priyam
6024006a sa saMbhrAntaz ca niSkrAnto yat kRte rAkSasAdhipaH
6024006c tac ca me viditaM sarvam abhiniSkramya maithili
6024007a na zakyaM sauptikaM kartuM rAmasya viditAtmanaH
6024007c vadhaz ca puruSavyAghre tasminn evopapadyate
6024008a na caiva vAnarA hantuM zakyAH pAdapayodhinaH
6024008c surA devarSabheNeva rAmeNa hi surakSitAH
6024009a dIrghavRttabhujaH zrImAn mahoraskaH pratApavAn
6024009c dhanvI saMhananopeto dharmAtmA bhuvi vizrutaH
6024010a vikrAnto rakSitA nityam Atmanaz ca parasya ca
6024010c lakSmaNena saha bhrAtrA kuzalI nayazAstravit
6024011a hantA parabalaughAnAm acintyabalapauruSaH
6024011c na hato rAghavaH zrImAn sIte zatrunibarhaNaH
6024012a ayuktabuddhikRtyena sarvabhUtavirodhinA
6024012c iyaM prayuktA raudreNa mAyA mAyAvidA tvayi
6024013a zokas te vigataH sarvaH kalyANaM tvAm upasthitam
6024013c dhruvaM tvAM bhajate lakSmIH priyaM prItikaraM zRNu
6024014a uttIrya sAgaraM rAmaH saha vAnarasenayA
6024014c saMniviSTaH samudrasya tIram AsAdya dakSiNam
6024015a dRSTo me paripUrNArthaH kAkutsthaH sahalakSmaNaH
6024015c sahitaiH sAgarAntasthair balais tiSThati rakSitaH
6024016a anena preSitA ye ca rAkSasA laghuvikramaH
6024016c rAghavas tIrNa ity evaM pravRttis tair ihAhRtA
6024017a sa tAM zrutvA vizAlAkSi pravRttiM rAkSasAdhipaH
6024017c eSa mantrayate sarvaiH sacivaiH saha rAvaNaH
6024018a iti bruvANA saramA rAkSasI sItayA saha
6024018c sarvodyogena sainyAnAM zabdaM zuzrAva bhairavam
6024019a daNDanirghAtavAdinyAH zrutvA bheryA mahAsvanam
6024019c uvAca saramA sItAm idaM madhurabhASiNI
6024020a saMnAhajananI hy eSA bhairavA bhIru bherikA
6024020c bherInAdaM ca gambhIraM zRNu toyadanisvanam
6024021a kalpyante mattamAtaMgA yujyante rathavAjinaH
6024021c tatra tatra ca saMnaddhAH saMpatanti padAtayaH
6024022a ApUryante rAjamArgAH sainyair adbhutadarzanaiH
6024022c vegavadbhir nadadbhiz ca toyaughair iva sAgaraH
6024023a zAstrANAM ca prasannAnAM carmaNAM varmaNAM tathA
6024023c rathavAjigajAnAM ca bhUSitAnAM ca rakSasAm
6024024a prabhAM visRjatAM pazya nAnAvarNAM samutthitAm
6024024c vanaM nirdahato dharme yathArUpaM vibhAvasoH
6024025a ghaNTAnAM zRNu nirghoSaM rathAnAM zRNu nisvanam
6024025c hayAnAM heSamANAnAM zRNu tUryadhvaniM yathA
6024026a udyatAyudhahastAnAM rAkSasendrAnuyAyinAm
6024026c saMbhramo rakSasAm eSa tumulo lomaharSaNaH
6024027a zrIs tvAM bhajati zokaghnI rakSasAM bhayam Agatam
6024027c rAmAt kamalapatrAkSi daityAnAm iva vAsavAt
6024028a avajitya jitakrodhas tam acintyaparAkramaH
6024028c rAvaNaM samare hatvA bhartA tvAdhigamiSyati
6024029a vikramiSyati rakSaHsu bhartA te sahalakSmaNaH
6024029c yathA zatruSu zatrughno viSNunA saha vAsavaH
6024030a Agatasya hi rAmasya kSipram aGkagatAM satIm
6024030c ahaM drakSyAmi siddhArthAM tvAM zatrau vinipAtite
6024031a azrUNy AnandajAni tvaM vartayiSyasi zobhane
6024031c samAgamya pariSvaktA tasyorasi mahorasaH
6024032a acirAn mokSyate sIte devi te jaghanaM gatAm
6024032c dhRtAm etAM bahUn mAsAn veNIM rAmo mahAbalaH
6024033a tasya dRSTvA mukhaM devi pUrNacandram ivoditam
6024033c mokSyase zokajaM vAri nirmokam iva pannagI
6024034a rAvaNaM samare hatvA nacirAd eva maithili
6024034c tvayA samagraM priyayA sukhArho lapsyate sukham
6024035a samAgatA tvaM rAmeNa modiSyasi mahAtmanA
6024035c suvarSeNa samAyuktA yathA sasyena medinI
6024036a girivaram abhito 'nuvartamAno; haya iva maNDalam Azu yaH karoti
6024036c tam iha zaraNam abhyupehi devi; divasakaraM prabhavo hy ayaM prajAnAm
6025001a atha tAM jAtasaMtApAM tena vAkyena mohitAm
6025001c saramA hlAdayAm Asa pRtivIM dyaur ivAmbhasA
6025002a tatas tasyA hitaM sakhyAz cikIrSantI sakhI vacaH
6025002c uvAca kAle kAlajJA smitapUrvAbhibhASiNI
6025003a utsaheyam ahaM gatvA tvadvAkyam asitekSaNe
6025003c nivedya kuzalaM rAme praticchannA nivartitum
6025004a na hi me kramamANAyA nirAlambe vihAyasi
6025004c samartho gatim anvetuM pavano garuDo 'pi vA
6025005a evaM bruvANAM tAM sItA saramAM punar abravIt
6025005c madhuraM zlakSNayA vAcA pUrvazokAbhipannayA
6025006a samarthA gaganaM gantum api vA tvaM rasAtalam
6025006c avagacchAmy akartavyaM kartavyaM te madantare
6025007a matpriyaM yadi kartavyaM yadi buddhiH sthirA tava
6025007c jJAtum icchAmi taM gatvA kiM karotIti rAvaNaH
6025008a sa hi mAyAbalaH krUro rAvaNaH zatrurAvaNaH
6025008c mAM mohayati duSTAtmA pItamAtreva vAruNI
6025009a tarjApayati mAM nityaM bhartsApayati cAsakRt
6025009c rAkSasIbhiH sughorAbhir yA mAM rakSanti nityazaH
6025010a udvignA zaGkitA cAsmi na ca svasthaM mano mama
6025010c tad bhayAc cAham udvignA azokavanikAM gatAH
6025011a yadi nAma kathA tasya nizcitaM vApi yad bhavet
6025011c nivedayethAH sarvaM tat paro me syAd anugrahaH
6025012a sA tv evaM bruvatIM sItAM saramA valgubhASiNI
6025012c uvAca vacanaM tasyAH spRzantI bASpaviklavam
6025013a eSa te yady abhiprAyas tasmAd gacchAmi jAnaki
6025013c gRhya zatror abhiprAyam upAvRttAM ca pazya mAm
6025014a evam uktvA tato gatvA samIpaM tasya rakSasaH
6025014c zuzrAva kathitaM tasya rAvaNasya samantriNaH
6025015a sA zrutvA nizcayaM tasya nizcayajJA durAtmanaH
6025015c punar evAgamat kSipram azokavanikAM tadA
6025016a sA praviSTA punas tatra dadarza janakAtmajAm
6025016c pratIkSamANAM svAm eva bhraSTapadmAm iva zriyam
6025017a tAM tu sItA punaH prAptAM saramAM valgubhASiNIm
6025017c pariSvajya ca susnigdhaM dadau ca svayam Asanam
6025018a ihAsInA sukhaM sarvam AkhyAhi mama tattvataH
6025018c krUrasya nizcayaM tasya rAvaNasya durAtmanaH
6025019a evam uktA tu saramA sItayA vepamAnayA
6025019c kathitaM sarvam AcaSTa rAvaNasya samantriNaH
6025020a jananyA rAkSasendro vai tvanmokSArthaM bRhadvacaH
6025020c aviddhena ca vaidehi mantrivRddhena bodhitaH
6025021a dIyatAm abhisatkRtya manujendrAya maithilI
6025021c nidarzanaM te paryAptaM janasthAne yad adbhutam
6025022a laGghanaM ca samudrasya darzanaM ca hanUmataH
6025022c vadhaM ca rakSasAM yuddhe kaH kuryAn mAnuSo bhuvi
6025023a evaM sa mantrivRddhaiz ca mAtrA ca bahu bhASitaH
6025023c na tvAm utsahate moktum artahm arthaparo yathA
6025024a notsahaty amRto moktuM yuddhe tvAm iti maithili
6025024c sAmAtyasya nRzaMsasya nizcayo hy eSa vartate
6025025a tad eSA susthirA buddhir mRtyulobhAd upasthitA
6025025c bhayAn na zaktas tvAM moktum anirastas tu saMyuge
6025025e rAkSasAnAM ca sarveSAm Atmanaz ca vadhena hi
6025026a nihatya rAvaNaM saMkhye sarvathA nizitaiH zaraiH
6025026c pratineSyati rAmas tvAm ayodhyAm asitekSaNe
6025027a etasminn antare zabdo bherIzaGkhasamAkulaH
6025027c zruto vai sarvasainyAnAM kampayan dharaNItalam
6025028a zrutvA tu taM vAnarasainyazabdaM; laGkAgatA rAkSasarAjabhRtyAH
6025028c naSTaujaso dainyaparItaceSTAH; zreyo na pazyanti nRpasya doSaiH
6026001a tena zaGkhavimizreNa bherIzabdena rAghavaH
6026001c upayato mahAbAhU rAmaH parapuraMjayaH
6026002a taM ninAdaM nizamyAtha rAvaNo rAkSasezvaraH
6026002c muhUrtaM dhyAnam AsthAya sacivAn abhyudaikSata
6026003a atha tAn sacivAMs tatra sarvAn AbhASya rAvaNaH
6026003c sabhAM saMnAdayan sarvAm ity uvAca mahAbalaH
6026004a taraNaM sAgarasyApi vikramaM balasaMcayam
6026004c yad uktavanto rAmasya bhavantas tan mayA zrutam
6026004e bhavataz cApy ahaM vedmi yuddhe satyaparAkramAn
6026005a tatas tu sumahAprAjJo mAlyavAn nAma rAkSasaH
6026005c rAvaNasya vacaH zrutvA mAtuH paitAmaho 'bravIt
6026006a vidyAsv abhivinIto yo rAjA rAjan nayAnugaH
6026006c sa zAsti ciram aizvaryam arIMz ca kurute vaze
6026007a saMdadhAno hi kAlena vigRhNaMz cAribhiH saha
6026007c svapakSavardhanaM kurvan mahad aizvaryam aznute
6026008a hIyamAnena kartavyo rAjJA saMdhiH samena ca
6026008c na zatrum avamanyeta jyAyAn kurvIta vigraham
6026009a tan mahyaM rocate saMdhiH saha rAmeNa rAvaNa
6026009c yadartham abhiyuktAH sma sItA tasmai pradIyatAm
6026010a tasya devarSayaH sarve gandharvAz ca jayaiSiNaH
6026010c virodhaM mA gamas tena saMdhis te tena rocatAm
6026011a asRjad bhagavAn pakSau dvAv eva hi pitAmahaH
6026011c surANAm asurANAM ca dharmAdharmau tadAzrayau
6026012a dharmo hi zrUyate pakSaH surANAM ca mahAtmanAm
6026012c adharmo rakSasaM pakSo hy asurANAM ca rAvaNa
6026013a dharmo vai grasate 'dharmaM tataH kRtam abhUd yugam
6026013c adharmo grasate dharmaM tatas tiSyaH pravartate
6026014a tat tvayA caratA lokAn dharmo vinihato mahAn
6026014c adharmaH pragRhItaz ca tenAsmadbalinaH pare
6026015a sa pramAdAd vivRddhas te 'dharmo 'hir grasate hi naH
6026015c vivardhayati pakSaM ca surANAM surabhAvanaH
6026016a viSayeSu prasaktena yatkiMcitkAriNA tvayA
6026016c RSINAm agnikalpAnAm udvego janito mahAn
6026016e teSAM prabhAvo durdharSaH pradIpta iva pAvakaH
6026017a tapasA bhAvitAtmAno dharmasyAnugrahe ratAH
6026017c mukhyair yajJair yajanty ete nityaM tais tair dvijAtayaH
6026018a juhvaty agnIMz ca vidhivad vedAMz coccair adhIyate
6026018c abhibhUya ca rakSAMsi brahmaghoSAn udairayan
6026018e dizo vipradrutAH sarve stanayitnur ivoSNage
6026019a RSINAm agnikalpAnAm agnihotrasamutthitaH
6026019c Adatte rakSasAM tejo dhUmo vyApya dizo daza
6026020a teSu teSu ca dezeSu puNyeSu ca dRDhavrataiH
6026020c caryamANaM tapas tIvraM saMtApayati rAkSasAn
6026021a utpAtAn vividhAn dRSTvA ghorAn bahuvidhAMs tathA
6026021c vinAzam anupazyAmi sarveSAM rakSasAm aham
6026022a kharAbhis tanitA ghorA meghAH pratibhayaMkaraH
6026022c zoNitenAbhivarSanti laGkAm uSNena sarvataH
6026023a rudatAM vAhanAnAM ca prapatanty asrabindavaH
6026023c dhvajA dhvastA vivarNAz ca na prabhAnti yathApuram
6026024a vyAlA gomAyavo gRdhrA vAzanti ca subhairavam
6026024c pravizya laGkAm anizaM samavAyAMz ca kurvate
6026025a kAlikAH pANDurair dantaiH prahasanty agrataH sthitAH
6026025c striyaH svapneSu muSNantyo gRhANi pratibhASya ca
6026026a gRhANAM balikarmANi zvAnaH paryupabhuJjate
6026026c kharA goSu prajAyante mUSikA nakulaiH saha
6026027a mArjArA dvIpibhiH sArdhaM sUkarAH zunakaiH saha
6026027c kiMnarA rAkSasaiz cApi sameyur mAnuSaiH saha
6026028a pANDurA raktapAdAz ca vihagAH kAlacoditAH
6026028c rAkSasAnAM vinAzAya kapotA vicaranti ca
6026029a cIkI kUcIti vAzantyaH zArikA vezmasu sthitAH
6026029c patanti grathitAz cApi nirjitAH kalahaiSiNaH
6026030a karAlo vikaTo muNDaH puruSaH kRSNapiGgalaH
6026030c kAlo gRhANi sarveSAM kAle kAle 'nvavekSate
6026030e etAny anyAni duSTAni nimittAny utpatanti ca
6026031a viSNuM manyAmahe rAmaM mAnuSaM deham Asthitam
6026031c na hi mAnuSamAtro 'sau rAghavo dRDhavikramaH
6026032a yena baddhaH samudrasya sa setuH paramAdbhutaH
6026032c kuruSva nararAjena saMdhiM rAmeNa rAvaNa
6026033a idaM vacas tatra nigadya mAlyavan; parIkSya rakSo'dhipater manaH punaH
6026033c anuttameSUttamapauruSo balI; babhUva tUSNIM samavekSya rAvaNam
6027001a tat tu mAlyavato vAkyaM hitam uktaM dazAnanaH
6027001c na marSayati duSTAtmA kAlasya vazam AgataH
6027002a sa baddhvA bhrukuTiM vaktre krodhasya vazam AgataH
6027002c amarSAt parivRttAkSo mAlyavantam athAbravIt
6027003a hitabuddhyA yad ahitaM vacaH paruSam ucyate
6027003c parapakSaM pravizyaiva naitac chrotragataM mama
6027004a mAnuSaM kRpaNaM rAmam ekaM zAkhAmRgAzrayam
6027004c samarthaM manyase kena tyaktaM pitrA vanAlayam
6027005a rakSasAm IzvaraM mAM ca devatAnAM bhayaMkaram
6027005c hInaM mAM manyase kena ahInaM sarvavikramaiH
6027006a vIradveSeNa vA zaGke pakSapAtena vA ripoH
6027006c tvayAhaM paruSANy uktaH paraprotsAhanena vA
6027007a prabhavantaM padasthaM hi paruSaM ko 'bhidhAsyati
6027007c paNDitaH zAstratattvajJo vinA protsAhanAd ripoH
6027008a AnIya ca vanAt sItAM padmahInAm iva zriyam
6027008c kimarthaM pratidAsyAmi rAghavasya bhayAd aham
6027009a vRtaM vAnarakoTIbhiH sasugrIvaM salakSmaNam
6027009c pazya kaiz cid ahobhis tvaM rAghavaM nihataM mayA
6027010a dvandve yasya na tiSThanti daivatAny api saMyuge
6027010c sa kasmAd rAvaNo yuddhe bhayam AhArayiSyati
6027011a dvidhA bhajyeyam apy evaM na nameyaM tu kasya cit
6027011c eSa me sahajo doSaH svabhAvo duratikramaH
6027012a yadi tAvat samudre tu setur baddho yadRcchayA
6027012c rAmeNa vismayaH ko 'tra yena te bhayam Agatam
6027013a sa tu tIrtvArNavaM rAmaH saha vAnarasenayA
6027013c pratijAnAmi te satyaM na jIvan pratiyAsyati
6027014a evaM bruvANaM saMrabdhaM ruSTaM vijJAya rAvaNam
6027014c vrIDito mAlyavAn vAkyaM nottaraM pratyapadyata
6027015a jayAziSA ca rAjAnaM vardhayitvA yathocitam
6027015c mAlyavAn abhyanujJAto jagAma svaM nivezanam
6027016a rAvaNas tu sahAmAtyo mantrayitvA vimRzya ca
6027016c laGkAyAm atulAM guptiM kArayAm Asa rAkSasaH
6027017a vyAdideza ca pUrvasyAM prahastaM dvAri rAkSasaM
6027017c dakSiNasyAM mahAvIryau mahApArzva mahodarau
6027018a pazcimAyAm atho dvAri putram indrajitaM tathA
6027018c vyAdideza mahAmAyaM rAkSasair bahubhir vRtam
6027019a uttarasyAM puradvAri vyAdizya zukasAraNau
6027019c svayaM cAtra bhaviSyAmi mantriNas tAn uvAca ha
6027020a rAkSasaM tu virUpAkSaM mahAvIryaparAkramam
6027020c madhyame 'sthApayad gulme bahubhiH saha rAkSasaiH
6027021a evaMvidhAnaM laGkAyAM kRtvA rAkSasapuMgavaH
6027021c mene kRtArtham AtmAnaM kRtAntavazam AgataH
6027022a visarjayAm Asa tataH sa mantriNo; vidhAnam AjJApya purasya puSkalam
6027022c jayAziSA mantragaNena pUjito; viveza so 'ntaHpuram Rddhiman mahat
6028001a naravAnararAjau tau sa ca vAyusutaH kapiH
6028001c jAmbavAn RkSarAjaz ca rAkSasaz ca vibhISaNaH
6028002a aGgado vAliputraz ca saumitriH zarabhaH kapiH
6028002c suSeNaH sahadAyAdo maindo dvivida eva ca
6028003a gajo gavAkSo kumudo nalo 'tha panasas tathA
6028003c amitraviSayaM prAptAH samavetAH samarthayan
6028004a iyaM sA lakSyate laGkA purI rAvaNapAlitA
6028004c sAsuroragagandharvair amarair api durjayA
6028005a kAryasiddhiM puraskRtya mantrayadhvaM vinirNaye
6028005c nityaM saMnihito hy atra rAvaNo rAkSasAdhipaH
6028006a tathA teSu bruvANeSu rAvaNAvarajo 'bravIt
6028006c vAkyam agrAmyapadavat puSkalArthaM vibhISaNaH
6028007a analaH zarabhaz caiva saMpAtiH praghasas tathA
6028007c gatvA laGkAM mamAmAtyAH purIM punar ihAgatAH
6028008a bhUtvA zakunayaH sarve praviSTAz ca ripor balam
6028008c vidhAnaM vihitaM yac ca tad dRSTvA samupasthitAH
6028009a saMvidhAnaM yathAhus te rAvaNasya durAtmanaH
6028009c rAma tad bruvataH sarvaM yathAtathyena me zRNu
6028010a pUrvaM prahastaH sabalo dvAram AsAdya tiSThati
6028010c dakSiNaM ca mahAvIryau mahApArzvamahodarau
6028011a indrajit pazcimadvAraM rAkSasair bahubhir vRtaH
6028011c paTTasAsidhanuSmadbhiH zUlamudgarapANibhiH
6028012a nAnApraharaNaiH zUrair AvRto rAvaNAtmajaH
6028012c rAkSasAnAM sahasrais tu bahubhiH zastrapANibhiH
6028013a yuktaH paramasaMvigno rAkSasair bahubhir vRtaH
6028013c uttaraM nagaradvAraM rAvaNaH svayam AsthitaH
6028014a virUpAkSas tu mahatA zUlakhaDgadhanuSmatA
6028014c balena rAkSasaiH sArdhaM madhyamaM gulmam AsthitaH
6028015a etAn evaMvidhAn gulmA&l laGkAyAM samudIkSya te
6028015c mAmakAH sacivAH sarve zIghraM punar ihAgatAH
6028016a gajAnAM ca sahasraM ca rathAnAm ayutaM pure
6028016c hayAnAm ayute dve ca sAgrakoTI ca rakSasAm
6028017a vikrAntA balavantaz ca saMyugeSv AtatAyinaH
6028017c iSTA rAkSasarAjasya nityam ete nizAcarAH
6028018a ekaikasyAtra yuddhArthe rAkSasasya vizAM pate
6028018c parivAraH sahasrANAM sahasram upatiSThate
6028019a etAM pravRttiM laGkAyAM mantriproktaM vibhISaNaH
6028019c rAmaM kamalapatrAkSam idam uttaram abravIt
6028020a kuberaM tu yadA rAma rAvaNaH pratyayudhyata
6028020c SaSTiH zatasahasrANi tadA niryAnti rAkSasAH
6028021a parAkrameNa vIryeNa tejasA sattvagauravAt
6028021c sadRzA yo 'tra darpeNa rAvaNasya durAtmanaH
6028022a atra manyur na kartavyo roSaye tvAM na bhISaye
6028022c samartho hy asi vIryeNa surANAm api nigrahe
6028023a tad bhavAMz caturaGgeNa balena mahatA vRtaH
6028023c vyUhyedaM vAnarAnIkaM nirmathiSyasi rAvaNam
6028024a rAvaNAvaraje vAkyam evaM bruvati rAghavaH
6028024c zatrUNAM pratighAtArtham idaM vacanam abravIt
6028025a pUrvadvAre tu laGkAyA nIlo vAnarapuMgavaH
6028025c prahastaM pratiyoddhA syAd vAnarair bahubhir vRtaH
6028026a aGgado vAliputras tu balena mahatA vRtaH
6028026c dakSiNe bAdhatAM dvAre mahApArzvamahodarau
6028027a hanUmAn pazcimadvAraM nipIDya pavanAtmajaH
6028027c pravizatv aprameyAtmA bahubhiH kapibhir vRtaH
6028028a daityadAnavasaMghAnAm RSINAM ca mahAtmanAm
6028028c viprakArapriyaH kSudro varadAnabalAnvitaH
6028029a parikrAmati yaH sarvA&l lokAn saMtApayan prajAH
6028029c tasyAhaM rAkSasendrasya svayam eva vadhe dhRtaH
6028030a uttaraM nagaradvAram ahaM saumitriNA saha
6028030c nipIDyAbhipravekSyAmi sabalo yatra rAvaNaH
6028031a vAnarendraz ca balavAn RkSarAjaz ca jAmbavAn
6028031c rAkSasendrAnujaz caiva gulme bhavatu madhyame
6028032a na caiva mAnuSaM rUpaM kAryaM haribhir Ahave
6028032c eSA bhavatu naH saMjJA yuddhe 'smin vAnare bale
6028033a vAnarA eva nizcihnaM svajane 'smin bhaviSyati
6028033c vayaM tu mAnuSeNaiva sapta yotsyAmahe parAn
6028034a aham eva saha bhrAtrA lakSmaNena mahaujasA
6028034c AtmanA paJcamaz cAyaM sakhA mama vibhISaNaH
6028035a sa rAmaH kAryasiddhyartham evam uktvA vibhISaNam
6028035c suvelArohaNe buddhiM cakAra matimAn matim
6028036a tatas tu rAmo mahatA balena; pracchAdya sarvAM pRthivIM mahAtmA
6028036c prahRSTarUpo 'bhijagAma laGkAM; kRtvA matiM so 'rivadhe mahAtmA
6029001a sa tu kRtvA suvelasya matim ArohaNaM prati
6029001c lakSmaNAnugato rAmaH sugrIvam idam abravIt
6029002a vibhISaNaM ca dharmajJam anuraktaM nizAcaram
6029002c mantrajJaM ca vidhijJaM ca zlakSNayA parayA girA
6029003a suvelaM sAdhu zailendram imaM dhAtuzataiz citam
6029003c adhyArohAmahe sarve vatsyAmo 'tra nizAm imAm
6029004a laGkAM cAlokayiSyAmo nilayaM tasya rakSasaH
6029004c yena me maraNAntAya hRtA bhAryA durAtmanA
6029005a yena dharmo na vijJAto na vRttaM na kulaM tathA
6029005c rAkSasyA nIcayA buddhyA yena tad garhitaM kRtam
6029006a yasmin me vardhate roSaH kIrtite rAkSasAdhame
6029006c yasyAparAdhAn nIcasya vadhaM drakSyAmi rakSasAm
6029007a eko hi kurute pApaM kAlapAzavazaM gataH
6029007c nIcenAtmApacAreNa kulaM tena vinazyati
6029008a evaM saMmantrayann eva sakrodho rAvaNaM prati
6029008c rAmaH suvelaM vAsAya citrasAnum upAruhat
6029009a pRSThato lakSmaNa cainam anvagacchat samAhitaH
6029009c sazaraM cApam udyamya sumahad vikrame rataH
6029010a tam anvarohat sugrIvaH sAmAtyaH savibhISaNaH
6029010c hanUmAn aGgado nIlo maindo dvivida eva ca
6029011a gajo gavAkSo gavayaH zarabho gandhamAdanaH
6029011c panasaH kumudaz caiva haro rambhaz ca yUthapaH
6029012a ete cAnye ca bahavo vAnarAH zIghragAminaH
6029012c te vAyuvegapravaNAs taM giriM giricAriNaH
6029012e adhyArohanta zatazaH suvelaM yatra rAghavaH
6029013a te tv adIrgheNa kAlena girim Aruhya sarvataH
6029013c dadRzuH zikhare tasya viSaktAm iva khe purIm
6029014a tAM zubhAM pravaradvArAM prAkAravarazobhitAm
6029014c laGkAM rAkSasasaMpUrNAM dadRzur hariyUthapAH
6029015a prAkAracayasaMsthaiz ca tathA nIlair nizAcaraiH
6029015c dadRzus te harizreSThAH prAkAram aparaM kRtam
6029016a te dRSTvA vAnarAH sarve rAkSasAn yuddhakAGkSiNaH
6029016c mumucur vipulAn nAdAMs tatra rAmasya pazyataH
6029017a tato 'stam agamat sUryaH saMdhyayA pratiraJjitaH
6029017c pUrNacandrapradIpA ca kSapA samabhivartate
6029018a tataH sa rAmo harivAhinIpatir; vibhISaNena pratinandya satkRtaH
6029018c salakSmaNo yUthapayUthasaMvRtaH; suvela pRSThe nyavasad yathAsukham
6030001a tAM rAtrim uSitAs tatra suvele haripuMgavAH
6030001c laGkAyAM dadRzur vIrA vanAny upavanAni ca
6030002a samasaumyAni ramyANi vizAlAny AyatAni ca
6030002c dRSTiramyANi te dRSTvA babhUvur jAtavismayAH
6030003a campakAzokapuMnAgasAlatAlasamAkulA
6030003c tamAlavanasaMchannA nAgamAlAsamAvRtA
6030004a hintAlair arjunair nIpaiH saptaparNaiz ca puSpitaiH
6030004c tilakaiH karNikAraiz ca paTAlaiz ca samantataH
6030005a zuzubhe puSpitAgraiz ca latAparigatair drumaiH
6030005c laGkA bahuvidhair divyair yathendrasyAmarAvatI
6030006a vicitrakusumopetai raktakomalapallavaiH
6030006c zAdvalaiz ca tathA nIlaiz citrAbhir vanarAjibhiH
6030007a gandhADhyAny abhiramyANi puSpANi ca phalAni ca
6030007c dhArayanty agamAs tatra bhUSaNAnIva mAnavAH
6030008a tac caitrarathasaMkAzaM manojJaM nandanopamam
6030008c vanaM sarvartukaM ramyaM zuzubhe SaTpadAyutam
6030009a natyUhakoyaSTibhakair nRtyamAnaiz ca barhibhiH
6030009c rutaM parabhRtAnAM ca zuzruve vananirjhare
6030010a nityamattavihaMgAni bhramarAcaritAni ca
6030010c kokilAkulaSaNDAni vihagAbhirutAni ca
6030011a bhRGgarAjAbhigItAni bhramaraiH sevitAni ca
6030011c koNAlakavighuSTAni sArasAbhirutAni ca
6030012a vivizus te tatas tAni vanAny upavanAni ca
6030012c hRSTAH pramuditA vIrA harayaH kAmarUpiNaH
6030013a teSAM pravizatAM tatra vAnarANAM mahaujasAm
6030013c puSpasaMsargasurabhir vavau ghrANasukho 'nilaH
6030014a anye tu harivIrANAM yUthAn niSkramya yUthapAH
6030014c sugrIveNAbhyanujJAtA laGkAM jagmuH patAkinIm
6030015a vitrAsayanto vihagAMs trAsayanto mRgadvipAn
6030015c kampayantaz ca tAM laGkAM nAdaiH svair nadatAM varAH
6030016a kurvantas te mahAvegA mahIM cAraNapIDitAm
6030016c rajaz ca sahasaivordhvaM jagAma caraNoddhatam
6030017a RkSAH siMhA varAhAz ca mahiSA vAraNA mRgAH
6030017c tena zabdena vitrastA jagmur bhItA dizo daza
6030018a zikharaM tu trikUTasya prAMzu caikaM divispRzam
6030018c samantAt puSpasaMchannaM mahArajatasaMnibham
6030019a zatayojanavistIrNaM vimalaM cArudarzanam
6030019c zlakSNaM zrIman mahac caiva duSprApaM zakunair api
6030020a manasApi durArohaM kiM punaH karmaNA janaiH
6030020c niviSTA tatra zikhare laGkA rAvaNapAlitA
6030021a sA purI gopurair uccaiH pANDurAmbudasaMnibhaiH
6030021c kAJcanena ca sAlena rAjatena ca zobhitA
6030022a prAsAdaiz ca vimAnaiz ca laGkA paramabhUSitA
6030022c ghanair ivAtapApAye madhyamaM vaiSNavaM padam
6030023a yasyAM stambhasahasreNa prAsAdaH samalaMkRtaH
6030023c kailAsazikharAkAro dRzyate kham ivollikhan
6030024a caityaH sa rAkSasendrasya babhUva purabhUSaNam
6030024c zatena rakSasAM nityaM yaH samagreNa rakSyate
6030025a tAM samRddhAM samRddhArtho lakSmIvA&l lakSmaNAgrajaH
6030025c rAvaNasya purIM rAmo dadarza saha vAnaraiH
6030026a tAM ratnapUrNAM bahusaMvidhAnAM; prAsAdamAlAbhir alaMkRtAM ca
6030026c purIM mahAyantrakavATamukhyAM; dadarza rAmo mahatA balena
6031001a atha tasmin nimittAni dRSTvA lakSmaNapUrvajaH
6031001c lakSmaNaM lakSmisaMpannam idaM vacanam abravIt
6031002a parigRhyodakaM zItaM vanAni phalavanti ca
6031002c balaughaM saMvibhajyemaM vyUhya tiSThema lakSmaNa
6031003a lokakSayakaraM bhImaM bhayaM pazyAmy upasthitam
6031003c nibarhaNaM pravIrANAm RkSavAnararakSasAm
6031004a vAtAz ca paruSaM vAnti kampate ca vasuMdharA
6031004c parvatAgrANi vepante patanti dharaNIdharAH
6031005a meghAH kravyAdasaMkAzAH paruSAH paruSasvanAH
6031005c krUrAH krUraM pravarSanti mizraM zoNitabindubhiH
6031006a raktacandanasaMkAzA saMdhyAparamadAruNA
6031006c jvalac ca nipataty etad AdityAd agnimaNDalam
6031007a Adityam abhivAzyante janayanto mahad bhayam
6031007c dInA dInasvarA ghorA aprazastA mRgadvijAH
6031008a rajanyAm aprakAzaz ca saMtApayati candramAH
6031008c kRSNaraktAMzuparyanto yathA lokasya saMkSaye
6031009a hrasvo rUkSo 'prazastaz ca pariveSaH sulohitaH
6031009c AdityamaNDale nIlaM lakSma lakSmaNa dRzyate
6031010a dRzyante na yathAvac ca nakSatrANy abhivartate
6031010c yugAntam iva lokasya pazya lakSmaNa zaMsati
6031011a kAkAH zyenAs tathA gRdhrA nIcaiH paripatanti ca
6031011c zivAz cApy azivA vAcaH pravadanti mahAsvanAH
6031012a kSipram adya durAdharSAM purIM rAvaNapAlitAm
6031012c abhiyAma javenaiva sarvato haribhir vRtAH
6031013a ity evaM tu vadan vIro lakSmaNaM lakSmaNAgrajaH
6031013c tasmAd avAtarac chIghraM parvatAgrAn mahAbalaH
6031014a avatIrya tu dharmAtmA tasmAc chailAt sa rAghavaH
6031014c paraiH paramadurdharSaM dadarza balam AtmanaH
6031015a saMnahya tu sasugrIvaH kapirAjabalaM mahat
6031015c kAlajJo rAghavaH kAle saMyugAyAbhyacodayat
6031016a tataH kAle mahAbAhur balena mahatA vRtaH
6031016c prasthitaH purato dhanvI laGkAm abhimukhaH purIm
6031017a taM vibhISaNa sugrIvau hanUmAJ jAmbavAn nalaH
6031017c RkSarAjas tathA nIlo lakSmaNaz cAnyayus tadA
6031018a tataH pazcAt sumahatI pRtanarkSavanaukasAm
6031018c pracchAdya mahatIM bhUmim anuyAti sma rAghavam
6031019a zailazRGgANi zatazaH pravRddhAMz ca mahIruhAm
6031019c jagRhuH kuJjaraprakhyA vAnarAH paravAraNAH
6031020a tau tv adIrgheNa kAlena bhrAtarau rAmalakSmaNau
6031020c rAvaNasya purIM laGkAm Asedatur ariMdamau
6031021a patAkAmAlinIM ramyAm udyAnavanazobhitAm
6031021c citravaprAM suduSprApAm uccaprAkAratoraNAm
6031022a tAM surair api durdharSAM rAmavAkyapracoditAH
6031022c yathAnidezaM saMpIDya nyavizanta vanaukasaH
6031023a laGkAyAs tUttaradvAraM zailazRGgam ivonnatam
6031023c rAmaH sahAnujo dhanvI jugopa ca rurodha ca
6031024a laGkAm upaniviSTaz ca rAmo dazarathAtmajaH
6031024c lakSmaNAnucaro vIraH purIM rAvaNapAlitAm
6031025a uttaradvAram AsAdya yatra tiSThati rAvaNaH
6031025c nAnyo rAmAd dhi tad dvAraM samarthaH parirakSitum
6031026a rAvaNAdhiSThitaM bhImaM varuNeneva sAgaram
6031026c sAyudhau rAkSasair bhImair abhiguptaM samantataH
6031026e laghUnAM trAsajananaM pAtAlam iva dAnavaiH
6031027a vinyastAni ca yodhAnAM bahUni vividhAni ca
6031027c dadarzAyudhajAlAni tathaiva kavacAni ca
6031028a pUrvaM tu dvAram AsAdya nIlo haricamUpatiH
6031028c atiSThat saha maindena dvividena ca vIryavAn
6031029a aGgado dakSiNadvAraM jagrAha sumahAbalaH
6031029c RSabheNa gavAkSeNa gajena gavayena ca
6031030a hanUmAn pazcimadvAraM rarakSa balavAn kapiH
6031030c pramAthi praghasAbhyAM ca vIrair anyaiz ca saMgataH
6031031a madhyame ca svayaM gulme sugrIvaH samatiSThata
6031031c saha sarvair harizreSThaiH suparNazvasanopamaiH
6031032a vAnarANAM tu SaTtriMzat koTyaH prakhyAtayUthapAH
6031032c nipIDyopaniviSTAz ca sugrIvo yatra vAnaraH
6031033a zAsanena tu rAmasya lakSmaNaH savibhISaNaH
6031033c dvAre dvAre harINAM tu koTiM koTiM nyavezayat
6031034a pazcimena tu rAmasya sugrIvaH saha jAmbavAn
6031034c adUrAn madhyame gulme tasthau bahubalAnugaH
6031035a te tu vAnarazArdUlAH zArdUlA iva daMSTriNaH
6031035c gRhItvA drumazailAgrAn hRSTA yuddhAya tasthire
6031036a sarve vikRtalAGgUlAH sarve daMSTrAnakhAyudhAH
6031036c sarve vikRtacitrAGgAH sarve ca vikRtAnanAH
6031037a dazanAgabalAH ke cit ke cid dazaguNottarAH
6031037c ke cin nAgasahasrasya babhUvus tulyavikramAH
6031038a santi caughA balAH ke cit ke cic chataguNottarAH
6031038c aprameyabalAz cAnye tatrAsan hariyUthapAH
6031039a adbhutaz ca vicitraz ca teSAm AsIt samAgamaH
6031039c tatra vAnarasainyAnAM zalabhAnAm ivodgamaH
6031040a paripUrNam ivAkAzaM saMchanneva ca medinI
6031040c laGkAm upaniviSTaiz ca saMpatadbhiz ca vAnaraiH
6031041a zataM zatasahasrANAM pRthag RkSavanaukasAm
6031041c laGkA dvArANy upAjagmur anye yoddhuM samantataH
6031042a AvRtaH sa giriH sarvais taiH samantAt plavaMgamaiH
6031042c ayutAnAM sahasraM ca purIM tAm abhyavartata
6031043a vAnarair balavadbhiz ca babhUva drumapANibhiH
6031043c sarvataH saMvRtA laGkA duSpravezApi vAyunA
6031044a rAkSasA vismayaM jagmuH sahasAbhinipIDitAH
6031044c vAnarair meghasaMkAzaiH zakratulyaparAkramaiH
6031045a mahAJ zabdo 'bhavat tatra balaughasyAbhivartataH
6031045c sAgarasyeva bhinnasya yathA syAt salilasvanaH
6031046a tena zabdena mahatA saprAkArA satoraNA
6031046c laGkA pracalitA sarvA sazailavanakAnanA
6031047a rAmalakSmaNaguptA sA sugrIveNa ca vAhinI
6031047c babhUva durdharSatarA sarvair api surAsuraiH
6031048a rAghavaH saMnivezyaivaM sainyaM svaM rakSasAM vadhe
6031048c saMmantrya mantribhiH sArdhaM nizcitya ca punaH punaH
6031049a Anantaryam abhiprepsuH kramayogArthatattvavit
6031049c vibhISaNasyAnumate rAjadharmam anusmaran
6031049e aGgadaM vAlitanayaM samAhUyedam abravIt
6031050a gatvA saumya dazagrIvaM brUhi madvacanAt kape
6031050c laGghayitvA purIM laGkAM bhayaM tyaktvA gatavyathaH
6031051a bhraSTazrIkagataizvaryamumUrSo naSTacetanaH
6031051c RSINAM devatAnAM ca gandharvApsarasAM tathA
6031052a nAgAnAm atha yakSANAM rAjJAM ca rajanIcara
6031052c yac ca pApaM kRtaM mohAd avaliptena rAkSasa
6031053a nUnam adya gato darpaH svayambhU varadAnajaH
6031053c yasya daNDadharas te 'haM dArAharaNakarzitaH
6031053e daNDaM dhArayamANas tu laGkAdvare vyavasthitaH
6031054a padavIM devatAnAM ca maharSINAM ca rAkSasa
6031054c rAjarSINAM ca sarveSAM gamiSyasi mayA hataH
6031055a balena yena vai sItAM mAyayA rAkSasAdhama
6031055c mAm atikrAmayitvA tvaM hRtavAMs tad vidarzaya
6031056a arAkSasam imaM lokaM kartAsmi nizitaiH zaraiH
6031056c na cec charaNam abhyeSi mAm upAdAya maithilIm
6031057a dharmAtmA rakSasAM zreSThaH saMprApto 'yaM vibhISaNaH
6031057c laGkaizvaryaM dhruvaM zrImAn ayaM prApnoty akaNTakam
6031058a na hi rAjyam adharmeNa bhoktuM kSaNam api tvayA
6031058c zakyaM mUrkhasahAyena pApenAvijitAtmanA
6031059a yudhyasva vA dhRtiM kRtvA zauryam Alambya rAkSasa
6031059c maccharais tvaM raNe zAntas tataH pUto bhaviSyasi
6031060a yady Avizasi lokAMs trIn pakSibhUto manojavaH
6031060c mama cakSuSpathaM prApya na jIvan pratiyAsyasi
6031061a bravImi tvAM hitaM vAkyaM kriyatAm aurdhvadekikam
6031061c sudRSTA kriyatAM laGkA jIvitaM te mayi sthitam
6031062a ity uktaH sa tu tAreyo rAmeNAkliSTakarmaNA
6031062c jagAmAkAzam Avizya mUrtimAn iva havyavAT
6031063a so 'tipatya muhUrtena zrImAn rAvaNamandiram
6031063c dadarzAsInam avyagraM rAvaNaM sacivaiH saha
6031064a tatas tasyAvidUreNa nipatya haripuMgavaH
6031064c dIptAgnisadRzas tasthAv aGgadaH kanakAGgadaH
6031065a tad rAmavacanaM sarvam anyUnAdhikam uttamam
6031065c sAmAtyaM zrAvayAm Asa nivedyAtmAnam AtmanA
6031066a dUto 'haM kosalendrasya rAmasyAkliSTakarmaNaH
6031066c vAliputro 'Ggado nAma yadi te zrotram AgataH
6031067a Aha tvAM rAghavo rAmaH kausalyAnandavardhanaH
6031067c niSpatya pratiyudhyasva nRzaMsaM puruSAdhama
6031068a hantAsmi tvAM sahAmAtyaM saputrajJAtibAndhavam
6031068c nirudvignAs trayo lokA bhaviSyanti hate tvayi
6031069a devadAnavayakSANAM gandharvoragarakSasAm
6031069c zatrum adyoddhariSyAmi tvAm RSINAM ca kaNTakam
6031070a vibhISaNasya caizvaryaM bhaviSyati hate tvayi
6031070c na cet satkRtya vaidehIM praNipatya pradAsyasi
6031071a ity evaM paruSaM vAkyaM bruvANe haripuMgave
6031071c amarSavazam Apanno nizAcaragaNezvaraH
6031072a tataH sa roSatAmrAkSaH zazAsa sacivAMs tadA
6031072c gRhyatAm eSa durmedhA vadhyatAm iti cAsakRt
6031073a rAvaNasya vacaH zrutvA dIptAgnisamatejasaH
6031073c jagRhus taM tato ghorAz catvAro rajanIcarAH
6031074a grAhayAm Asa tAreyaH svayam AtmAnam AtmanA
6031074c balaM darzayituM vIro yAtudhAnagaNe tadA
6031075a sa tAn bAhudvaye saktAn AdAya patagAn iva
6031075c prAsAdaM zailasaMkAzam utpApAtAGgadas tadA
6031076a te 'ntarikSAd vinirdhUtAs tasya vegena rAkSasAH
6031076c bhumau nipatitAH sarve rAkSasendrasya pazyataH
6031077a tataH prAsAdazikharaM zailazRGgam ivonnatam
6031077c tat paphAla tadAkrAntaM dazagrIvasya pazyataH
6031078a bhaGktvA prAsAdazikharaM nAma vizrAvya cAtmanaH
6031078c vinadya sumahAnAdam utpapAta vihAyasA
6031079a rAvaNas tu paraM cakre krodhaM prAsAdadharSaNAt
6031079c vinAzaM cAtmanaH pazyan niHzvAsaparamo 'bhavat
6031080a rAmas tu bahubhir hRSTair ninadadbhiH plavaMgamaiH
6031080c vRto ripuvadhAkAGkSI yuddhAyaivAbhyavartata
6031081a suSeNas tu mahAvIryo girikUTopamo hariH
6031081c bahubhiH saMvRtas tatra vAnaraiH kAmarUpibhiH
6031082a caturdvArANi sarvANi sugrIvavacanAt kapiH
6031082c paryAkramata durdharSo nakSatrANIva candramAH
6031083a teSAm akSauhiNizataM samavekSya vanaukasAm
6031083c laGkAm upaniviSTAnAM sAgaraM cAtivartatAm
6031084a rAkSasA vismayaM jagmus trAsaM jagmus tathApare
6031084c apare samaroddharSAd dharSam evopapedire
6031085a kRtsnaM hi kapibhir vyAptaM prAkAraparikhAntaram
6031085c dadRzU rAkSasA dInAH prAkAraM vAnarIkRtam
6031086a tasmin mahAbhISaNake pravRtte; kolAhale rAkSasarAjadhAnyAm
6031086c pragRhya rakSAMsi mahAyudhAni; yugAntavAtA iva saMviceruH
6032001a tatas te rAkSasAs tatra gatvA rAvaNamandiram
6032001c nyavedayan purIM ruddhAM rAmeNa saha vAnaraiH
6032002a ruddhAM tu nagarIM zrutvA jAtakrodho nizAcaraH
6032002c vidhAnaM dviguNaM zrutvA prAsAdaM so 'dhyarohata
6032003a sa dadarzAvRtAM laGkAM sazailavanakAnanAm
6032003c asaMkhyeyair harigaNaiH sarvato yuddhakAGkSibhiH
6032004a sa dRSTvA vAnaraiH sarvAM vasudhAM kavalIkRtAm
6032004c kathaM kSapayitavyAH syur iti cintAparo 'bhavat
6032005a sa cintayitvA suciraM dhairyam Alambya rAvaNaH
6032005c rAghavaM hariyUthAMz ca dadarzAyatalocanaH
6032006a prekSato rAkSasendrasya tAny anIkAni bhAgazaH
6032006c rAghavapriyakAmArthaM laGkAm Aruruhus tadA
6032007a te tAmravaktrA hemAbhA rAmArthe tyaktajIvitAH
6032007c laGkAm evAhyavartanta sAlatAlazilAyudhAH
6032008a te drumaiH parvatAgraiz ca muSTibhiz ca plavaMgamAH
6032008c prAsAdAgrANi coccAni mamantus toraNAni ca
6032009a pArikhAH pUrayanti sma prasannasalilAyutAH
6032009c pAMsubhiH parvatAgraiz ca tRNaiH kASThaiz ca vAnarAH
6032010a tataH sahasrayUthAz ca koTiyUthAz ca yUthapAH
6032010c koTIzatayutAz cAnye laGkAm Aruruhus tadA
6032011a kAJcanAni pramRdnantas toraNAni plavaMgamAH
6032011c kailAsazikharAbhAni gopurANi pramathya ca
6032012a AplavantaH plavantaz ca garjantaz ca plavaMgamAH
6032012c laGkAM tAm abhyavartanta mahAvAraNasaMnibhAH
6032013a jayaty atibalo rAmo lakSmaNaz ca mahAbalaH
6032013c rAjA jayati sugrIvo rAghaveNAbhipAlitaH
6032014a ity evaM ghoSayantaz ca garjantaz ca plavaMgamAH
6032014c abhyadhAvanta laGkAyAH prAkAraM kAmarUpiNaH
6032015a vIrabAhuH subAhuz ca nalaz ca vanagocaraH
6032015c nipIDyopaniviSTAs te prAkAraM hariyUthapAH
6032016a etasminn antare cakruH skandhAvAranivezanam
6032017a pUrvadvAraM tu kumudaH koTibhir dazabhir vRtaH
6032017c AvRtya balavAMs tasthau haribhir jitakAzibhiH
6032018a dakSiNadvAram Agamya vIraH zatabaliH kapiH
6032018c AvRtya balavAMs tasthau viMzatyA koTibhir vRtaH
6032019a suSeNaH pazcimadvAraM gatas tArA pitA hariH
6032019c AvRtya balavAMs tasthau SaSTi koTibhir AvRtaH
6032020a uttaradvAram AsAdya rAmaH saumitriNA saha
6032020c AvRtya balavAMs tasthau sugrIvaz ca harIzvaraH
6032021a golAGgUlo mahAkAyo gavAkSo bhImadarzanaH
6032021c vRtaH koTyA mahAvIryas tasthau rAmasya pArvataH
6032022a RSkANAM bhImavegAnAM dhUmraH zatrunibarhaNaH
6032022c vRtaH koTyA mahAvIryas tasthau rAmasya pArzvataH
6032023a saMnaddhas tu mahAvIryo gadApANir vibhISaNaH
6032023c vRto yas tais tu sacivais tasthau tatra mahAbalaH
6032024a gajo gavAkSo gavayaH zarabho gandhamAdanaH
6032024c samantAt parighAvanto rarakSur harivAhinIm
6032025a tataH kopaparItAtmA rAvaNo rAkSasezvaraH
6032025c niryANaM sarvasainyAnAM drutam AjJApayat tadA
6032026a niSpatanti tataH sainyA hRSTA rAvaNacoditAH
6032026c samaye pUryamANasya vegA iva mahodadheH
6032027a etasminn antare ghoraH saMgrAmaH samapadyata
6032027c rakSasAM vAnarANAM ca yathA devAsure purA
6032028a te gadAbhiH pradIptAbhiH zaktizUlaparazvadhaiH
6032028c nijaghnur vAnarAn ghorAH kathayantaH svavikramAn
6032029a tathA vRkSair mahAkAyAH parvatAgraiz ca vAnarAH
6032029c rAkSasAs tAni rakSAMsi nakhair dantaiz ca vegitAH
6032030a rAkSasAs tv apare bhImAH prAkArasthA mahIgatAn
6032030c bhiNDipAlaiz ca khaDgaiz ca zUlaiz caiva vyadArayan
6032031a vAnarAz cApi saMkruddhAH prAkArasthAn mahIgatAH
6032031c rAkSasAn pAtayAm AsuH samAplutya plavaMgamAH
6032032a sa saMprahAras tumulo mAMsazoNitakardamaH
6032032c rakSasAM vAnarANAM ca saMbabhUvAdbhutopamAH
6033001a yudhyatAM tu tatas teSAM vAnarANAM mahAtmanAm
6033001c rakSasAM saMbabhUvAtha balakopaH sudAruNaH
6033002a te hayaiH kAJcanApIDair dhvajaiz cAgnizikhopamaiH
6033002c rathaiz cAdityasaMkAzaiH kavacaiz ca manoramaiH
6033003a niryayU rAkSasavyAghrA nAdayanto dizo daza
6033003c rAkSasA bhImakarmANo rAvaNasya jayaiSiNaH
6033004a vAnarANAm api camUr mahatI jayam iccatAm
6033004c abhyadhAvata tAM senAM rakSasAM kAmarUpiNAm
6033005a etasminn antare teSAm anyonyam abhidhAvatAm
6033005c rakSasAM vAnarANAM ca dvandvayuddham avartata
6033006a aGgadenendrajit sArdhaM vAliputreNa rAkSasaH
6033006c ayudhyata mahAtejAs tryambakeNa yathAndhakaH
6033007a prajaGghena ca saMpAtir nityaM durmarSaNo raNe
6033007c jambUmAlinam Arabdho hanUmAn api vAnaraH
6033008a saMgataH sumahAkrodho rAkSaso rAvaNAnujaH
6033008c samare tIkSNavegena mitraghnena vibhISaNaH
6033009a tapanena gajaH sArdhaM rAkSasena mahAbalaH
6033009c nikumbhena mahAtejA nIlo 'pi samayudhyata
6033010a vAnarendras tu sugrIvaH praghasena samAgataH
6033010c saMgataH samare zrImAn virUpAkSeNa lakSmaNaH
6033011a agniketuz ca durdharSo razmiketuz ca rAkSasaH
6033011c suptaghno yajJakopaz ca rAmeNa saha saMgatAH
6033012a vajramuSTis tu maindena dvividenAzaniprabhaH
6033012c rAkSasAbhyAM sughorAbhyAM kapimukhyau samAgatau
6033013a vIraH pratapano ghoro rAkSaso raNadurdharaH
6033013c samare tIkSNavegena nalena samayudhyata
6033014a dharmasya putro balavAn suSeNa iti vizrutaH
6033014c sa vidyunmAlinA sArdham ayudhyata mahAkapiH
6033015a vAnarAz cApare bhImA rAkSasair aparaiH saha
6033015c dvandvaM samIyur bahudhA yuddhAya bahubhiH saha
6033016a tatrAsIt sumahad yuddhaM tumulaM lomaharSaNam
6033016c rakSasAM vAnarANAM ca vIrANAM jayam icchatAm
6033017a harirAkSasadehebhyaH prasRtAH kezazADvalAH
6033017c zarIrasaMghATavahAH prasusruH zoNitApagAH
6033018a AjaghAnendrajit kruddho vajreNeva zatakratuH
6033018c aGgadaM gadayA vIraM zatrusainyavidAraNam
6033019a tasya kAJcanacitrAGgaM rathaM sAzvaM sasArathim
6033019c jaghAna samare zrImAn aGgado vegavAn kapiH
6033020a saMpAtis tu tribhir bANaiH prajaGghena samAhataH
6033020c nijaghAnAzvakarNena prajaGghaM raNamUrdhani
6033021a jambUmAlI rathasthas tu rathazaktyA mahAbalaH
6033021c bibheda samare kruddho hanUmantaM stanAntare
6033022a tasya taM ratham AsthAya hanUmAn mArutAtmajaH
6033022c pramamAtha talenAzu saha tenaiva rakSasA
6033023a bhinnagAtraH zarais tIkSNaiH kSiprahastena rakSasA
6033023c prajaghAnAdrizRGgeNa tapanaM muSTinA gajaH
6033024a grasantam iva sainyAni praghasaM vAnarAdhipaH
6033024c sugrIvaH saptaparNena nirbibheda jaghAna ca
6033025a prapIDya zaravarSeNa rAkSasaM bhImadarzanam
6033025c nijaghAna virUpAkSaM zareNaikena lakSmaNaH
6033026a agniketuz ca durdharSo razmiketuz ca rAkSasaH
6033026c suptighno yajJakopaz ca rAmaM nirbibhiduH zaraiH
6033027a teSAM caturNAM rAmas tu zirAMsi samare zaraiH
6033027c kruddhaz caturbhiz ciccheda ghorair agnizikhopamaiH
6033028a vajramuSTis tu maindena muSTinA nihato raNe
6033028c papAta sarathaH sAzvaH purATTa iva bhUtale
6033029a vajrAzanisamasparzo dvivido 'py azaniprabham
6033029c jaghAna girizRGgeNa miSatAM sarvarakSasAm
6033030a dvividaM vAnarendraM tu drumayodhinam Ahave
6033030c zarair azanisaMkAzaiH sa vivyAdhAzaniprabhaH
6033031a sa zarair atividdhAGgo dvividaH krodhamUrchitaH
6033031c sAlena sarathaM sAzvaM nijaghAnAzaniprabham
6033032a nikumbhas tu raNe nIlaM nIlAJjanacayaprabham
6033032c nirbibheda zarais tIkSNaiH karair megham ivAMzumAn
6033033a punaH zarazatenAtha kSiprahasto nizAcaraH
6033033c bibheda samare nIlaM nikumbhaH prajahAsa ca
6033034a tasyaiva rathacakreNa nIlo viSNur ivAhave
6033034c ziraz ciccheda samare nikumbhasya ca sAratheH
6033035a vidyunmAlI rathasthas tu zaraiH kAJcanabhUSaNaiH
6033035c suSeNaM tADayAm Asa nanAda ca muhur muhuH
6033036a taM rathastham atho dRSTvA suSeNo vAnarottamaH
6033036c girizRGgeNa mahatA ratham Azu nyapAtayat
6033037a lAghavena tu saMyukto vidyunmAlI nizAcaraH
6033037c apakramya rathAt tUrNaM gadApANiH kSitau sthitaH
6033038a tataH krodhasamAviSTaH suSeNo haripuMgavaH
6033038c zilAM sumahatIM gRhya nizAcaram abhidravat
6033039a tam ApatantaM gadayA vidyunmAlI nizAcaraH
6033039c vakSasy abhijagnAnAzu suSeNaM harisattamam
6033040a gadAprahAraM taM ghoram acintyaplavagottamaH
6033040c tAM zilAM pAtayAm Asa tasyorasi mahAmRdhe
6033041a zilAprahArAbhihato vidyunmAlI nizAcaraH
6033041c niSpiSTahRdayo bhUmau gatAsur nipapAta ha
6033042a evaM tair vAnaraiH zUraiH zUrAs te rajanIcarAH
6033042c dvandve vimRditAs tatra daityA iva divaukasaiH
6033043a bhallaiH khaDgair gadAbhiz ca zaktitomara paTTasaiH
6033043c apaviddhaz ca bhinnaz ca rathaiH sAMgrAmikair hayaiH
6033044a nihataiH kuJjarair mattais tathA vAnararAkSasaiH
6033044c cakrAkSayugadaNDaiz ca bhagnair dharaNisaMzritaiH
6033044e babhUvAyodhanaM ghoraM gomAyugaNasevitam
6033045a kabandhAni samutpetur dikSu vAnararakSasAm
6033045c vimarde tumule tasmin devAsuraraNopame
6033046a vidAryamANA haripuMgavais tadA; nizAcarAH zoNitadigdhagAtrAH
6033046c punaH suyuddhaM tarasA samAzritA; divAkarasyAstamayAbhikAGkSiNaH
6034001a yudhyatAm eva teSAM tu tadA vAnararakSasAm
6034001c ravir astaM gato rAtriH pravRttA prANahAriNI
6034002a anyonyaM baddhavairANAM ghorANAM jayam icchatAm
6034002c saMpravRttaM nizAyuddhaM tadA vAraNarakSasAm
6034003a rAkSaso 'sIti harayo hariz cAsIti rAkSasAH
6034003c anyonyaM samare jaghnus tasmiMs tamasi dAruNe
6034004a jahi dAraya caitIti kathaM vidravasIti ca
6034004c evaM sutumulaH zabdas tasmiMs tamasi zuzruve
6034005a kAlAH kAJcanasaMnAhAs tasmiMs tamasi rAkSasAH
6034005c saMprAdRzyanta zailendrA dIptauSadhivanA iva
6034006a tasmiMs tamasi duSpAre rAkSasAH krodhamUrchitAH
6034006c paripetur mahAvegA bhakSayantaH plavaMgamAn
6034007a te hayAn kAJcanApIDan dhvajAMz cAgnizikhopamAn
6034007c Aplutya dazanais tIkSNair bhImakopA vyadArayan
6034008a kuJjarAn kuJjarArohAn patAkAdhvajino rathAn
6034008c cakarSuz ca dadaMzuz ca dazanaiH krodhamUrchitAH
6034009a lakSmaNaz cApi rAmaz ca zarair AzIviSomapaiH
6034009c dRzyAdRzyAni rakSAMsi pravarANi nijaghnatuH
6034010a turaMgakhuravidhvastaM rathanemisamuddhatam
6034010c rurodha karNanetrANiNyudhyatAM dharaNIrajaH
6034011a vartamAne tathA ghore saMgrAme lomaharSaNe
6034011c rudhirodA mahAvegA nadyas tatra prasusruvuH
6034012a tato bherImRdaGgAnAM paNavAnAM ca nisvanaH
6034012c zaGkhaveNusvanonmizraH saMbabhUvAdbhutopamaH
6034013a hatAnAM stanamAnAnAM rAkSasAnAM ca nisvanaH
6034013c zastrANAM vAnarANAM ca saMbabhUvAtidAruNaH
6034014a zastrapuSpopahArA ca tatrAsId yuddhamedinI
6034014c durjJeyA durnivezA ca zoNitAsravakardamA
6034015a sA babhUva nizA ghorA harirAkSasahAriNI
6034015c kAlarAtrIva bhUtAnAM sarveSAM duratikramA
6034016a tatas te rAkSasAs tatra tasmiMs tamasi dAruNe
6034016c rAmam evAbhyadhAvanta saMhRSTA zaravRSTibhiH
6034017a teSAm ApatatAM zabdaH kruddhAnAm abhigarjatAm
6034017c udvarta iva saptAnAM samudrANAm abhUt svanaH
6034018a teSAM rAmaH zaraiH SaDbhiH SaD jaghAna nizAcarAn
6034018c nimeSAntaramAtreNa zitair agnizikhopamaiH
6034019a yajJazatruz ca durdharSo mahApArzvamahodarau
6034019c vajradaMSTro mahAkAyas tau cobhau zukasAraNau
6034020a te tu rAmeNa bANaughaH sarvamarmasu tADitAH
6034020c yuddhAd apasRtAs tatra sAvazeSAyuSo 'bhavan
6034021a tataH kAJcanacitrAGgaiH zarair agnizikhopamaiH
6034021c dizaz cakAra vimalAH pradizaz ca mahAbalaH
6034022a ye tv anye rAkSasA vIrA rAmasyAbhimukhe sthitAH
6034022c te 'pi naSTAH samAsAdya pataMgA iva pAvakam
6034023a suvarNapuGkhair vizikhaiH saMpatadbhiH sahasrazaH
6034023c babhUva rajanI citrA khadyotair iva zAradI
6034024a rAkSasAnAM ca ninadair harINAM cApi garjitaiH
6034024c sA babhUva nizA ghorA bhUyo ghoratarA tadA
6034025a tena zabdena mahatA pravRddhena samantataH
6034025c trikUTaH kandarAkIrNaH pravyAharad ivAcalaH
6034026a golAGgUlA mahAkAyAs tamasA tulyavarcasaH
6034026c saMpariSvajya bAhubhyAM bhakSayan rajanIcarAn
6034027a aGgadas tu raNe zatruM nihantuM samupasthitaH
6034027c rAvaNer nijaghAnAzu sArathiM ca hayAn api
6034028a indrajit tu rathaM tyaktvA hatAzvo hatasArathiH
6034028c aGgadena mahAmAyas tatraivAntaradhIyata
6034029a so 'ntardhAna gataH pApo rAvaNI raNakarkazaH
6034029c brahmadattavaro vIro rAvaNiH krodhamUrchitaH
6034029e adRzyo nizitAn bANAn mumocAzanivarcasaH
6034030a sa rAmaM lakSmaNaM caiva ghorair nAgamayaiH zaraiH
6034030c bibheda samare kruddhaH sarvagAtreSu rAkSasaH
6035001a sa tasya gatim anvicchan rAjaputraH pratApavAn
6035001c didezAtibalo rAmo dazavAnarayUthapAn
6035002a dvau suSeNasya dAyAdau nIlaM ca plavagarSabham
6035002c aGgadaM vAliputraM ca zarabhaM ca tarasvinam
6035003a vinataM jAmbavantaM ca sAnuprasthaM mahAbalam
6035003c RSabhaM carSabhaskandham Adideza paraMtapaH
6035004a te saMprahRSTA harayo bhImAn udyamya pAdapAn
6035004c AkAzaM vivizuH sarve mArgAmANA dizo daza
6035005a teSAM vegavatAM vegam iSubhir vegavattaraiH
6035005c astravit paramAstreNa vArayAm Asa rAvaNiH
6035006a taM bhImavegA harayo nArAcaiH kSatavikSatAH
6035006c andhakAre na dadRzur meghaiH sUryam ivAvRtam
6035007a rAmalakSmaNayor eva sarvamarmabhidaH zarAn
6035007c bhRzam AvezayAm Asa rAvaNiH samitiMjayaH
6035008a nirantarazarIrau tu bhrAtarau rAmalakSmaNau
6035008c kruddhenendrajitA vIrau pannagaiH zaratAM gataiH
6035009a tayoH kSatajamArgeNa susrAva rudhiraM bahu
6035009c tAv ubhau ca prakAzete puSpitAv iva kiMzukau
6035010a tataH paryantaraktAkSo bhinnAJjanacayopamaH
6035010c rAvaNir bhrAtarau vAkyam antardhAnagato 'bravIt
6035011a yudhyamAnam anAlakSyaM zakro 'pi tridazezvaraH
6035011c draSTum AsAdituM vApi na zaktaH kiM punar yuvAm
6035012a prAvRtAv iSujAlena rAghavau kaGkapatriNA
6035012c eSa roSaparItAtmA nayAmi yamasAdanam
6035013a evam uktvA tu dharmajJau bhrAtarau rAmalakSmaNau
6035013c nirbibheda zitair bANaiH prajaharSa nanAda ca
6035014a bhinnAJjanacayazyAmo visphArya vipulaM dhanuH
6035014c bhUyo bhUyaH zarAn ghorAn visasarja mahAmRdhe
6035015a tato marmasu marmajJo majjayan nizitAJ zarAn
6035015c rAmalakSmaNayor vIro nanAda ca muhur muhuH
6035016a baddhau tu zarabandhena tAv ubhau raNamUrdhani
6035016c nimeSAntaramAtreNa na zekatur udIkSitum
6035017a tato vibhinnasarvAGgau zarazalyAcitAv ubhau
6035017c dhvajAv iva mahendrasya rajjumuktau prakampitau
6035018a tau saMpracalitau vIrau marmabhedena karzitau
6035018c nipetatur maheSvAsau jagatyAM jagatIpatI
6035019a tau vIrazayane vIrau zayAnau rudhirokSitau
6035019c zaraveSTitasarvAGgAv Artau paramapIDitau
6035020a na hy aviddhaM tayor gAtraM babhUvAGgulam antaram
6035020c nAnirbhinnaM na cAstabdham A karAgrAd ajihmagaiH
6035021a tau tu krUreNa nihatau rakSasA kAmarUpiNA
6035021c asRksusruvatus tIvraM jalaM prasravaNAv iva
6035022a papAta prathamaM rAmo viddho marmasu mArgaNaiH
6035022c krodhAd indrajitA yena purA zakro vinirjitaH
6035023a nAracair ardhanArAcair bhallair aJjalikair api
6035023c vivyAdha vatsadantaiz ca siMhadaMSTraiH kSurais tathA
6035024a sa vIrazayane zizye vijyam AdAya kArmukam
6035024c bhinnamuSTiparINAhaM triNataM rukmabhUSitam
6035025a bANapAtAntare rAmaM patitaM puruSarSabham
6035025c sa tatra lakSmaNo dRSTvA nirAzo jIvite 'bhavat
6035026a baddhau tu vIrau patitau zayAnau; tau vAnarAH saMparivArya tasthuH
6035026c samAgatA vAyusutapramukhyA; viSadam ArtAH paramaM ca jagmuH
6036001a tato dyAM pRthivIM caiva vIkSamANA vanaukasaH
6036001c dadRzuH saMtatau bANair bhrAtarau rAmalakSmaNau
6036002a vRSTvevoparate deve kRtakarmaNi rAkSase
6036002c AjagAmAtha taM dezaM sasugrIvo vibhISaNaH
6036003a nIladvividamaindAz ca suSeNasumukhAGgadAH
6036003c tUrNaM hanumatA sArdham anvazocanta rAghavau
6036004a nizceSTau mandaniHzvAsau zoNitaughapariplutau
6036004c zarajAlAcitau stabdhau zayAnau zaratalpayoH
6036005a niHzvasantau yathA sarpau nizceSTau mandavikramau
6036005c rudhirasrAvadigdhAGgau tApanIyAv iva dhvajau
6036006a tau vIrazayane vIrau zayAnau mandaceSTitau
6036006c yUthapais taiH parivRtau bASpavyAkulalocanaiH
6036007a rAghavau patitau dRSTvA zarajAlasamAvRtau
6036007c babhUvur vyathitAH sarve vAnarAH savibhISaNAH
6036008a antarikSaM nirIkSanto dizaH sarvAz ca vAnarAH
6036008c na cainaM mAyayA channaM dadRzU rAvaNiM raNe
6036009a taM tu mAyApraticchinnaM mAyayaiva vibhISaNaH
6036009c vIkSamANo dadarzAtha bhrAtuH putram avasthitam
6036010a tam apratima karmANam apratidvandvam Ahave
6036010c dadarzAntarhitaM vIraM varadAnAd vibhISaNaH
6036011a indrajit tv AtmanaH karma tau zayAnau samIkSya ca
6036011c uvAca paramaprIto harSayan sarvanairRtAn
6036012a dUSaNasya ca hantArau kharasya ca mahAbalau
6036012c sAditau mAmakair bANair bhrAtarau rAmalakSmaNau
6036013a nemau mokSayituM zakyAv etasmAd iSubandhanAt
6036013c sarvair api samAgamya sarSisaGghaiH surAsuraiH
6036014a yatkRte cintayAnasya zokArtasya pitur mama
6036014c aspRSTvA zayanaM gAtrais triyAmA yAti zarvatI
6036015a kRtsneyaM yatkRte laGkA nadI varSAsv ivAkulA
6036015c so 'yaM mUlaharo 'narthaH sarveSAM nihato mayA
6036016a rAmasya lakSmaNasyaiva sarveSAM ca vanaukasAm
6036016c vikramA niSphalAH sarve yathA zaradi toyadAH
6036017a evam uktvA tu tAn sarvAn rAkSasAn paripArzvagAn
6036017c yUthapAn api tAn sarvAMs tADayAm Asa rAvaNiH
6036018a tAn ardayitvA bANaughais trAsayitvA ca vAnarAn
6036018c prajahAsa mahAbAhur vacanaM cedam abravIt
6036019a zarabandhena ghoreNa mayA baddhau camUmukhe
6036019c sahitau bhrAtarAv etau nizAmayata rAkSasAH
6036020a evam uktAs tu te sarve rAkSasAH kUTayodhinaH
6036020c paraM vismayam AjagmuH karmaNA tena toSitAH
6036021a vineduz ca mahAnAdAn sarve te jaladopamAH
6036021c hato rAma iti jJAtvA rAvaNiM samapUjayan
6036022a niSpandau tu tadA dRSTvA tAv ubhau rAmalakSmaNau
6036022c vasudhAyAM nirucchvAsau hatAv ity anvamanyata
6036023a harSeNa tu samAviSTa indrajit samitiMjayaH
6036023c praviveza purIM laGkAM harSayan sarvanairRtAn
6036024a rAmalakSmaNayor dRSTvA zarIre sAyakaiz cite
6036024c sarvANi cAGgopAGgAni sugrIvaM bhayam Avizat
6036025a tam uvAca paritrastaM vAnarendraM vibhISaNaH
6036025c sabASpavadanaM dInaM zokavyAkulalocanam
6036026a alaM trAsena sugrIva bASpavego nigRhyatAm
6036026c evaM prAyANi yuddhAni vijayo nAsti naiSThikaH
6036027a sazeSabhAgyatAsmAkaM yadi vIra bhaviSyati
6036027c moham etau prahAsyete bhrAtarau rAmalakSmaNau
6036028a paryavasthApayAtmAnam anAthaM mAM ca vAnara
6036028c satyadharmAnuraktAnAM nAsti mRtyukRtaM bhayam
6036029a evam uktvA tatas tasya jalaklinnena pANinA
6036029c sugrIvasya zubhe netre pramamArja vibhISaNaH
6036030a pramRjya vadanaM tasya kapirAjasya dhImataH
6036030c abravIt kAlasaMprAtam asaMbhrAntam idaM vacaH
6036031a na kAlaH kapirAjendra vaiklavyam anuvartitum
6036031c atisneho 'py akAle 'smin maraNAyopapadyate
6036032a tasmAd utsRjya vaiklavyaM sarvakAryavinAzanam
6036032c hitaM rAmapurogANAM sainyAnAm anucintyatAm
6036033a atha vA rakSyatAM rAmo yAvat saMjJA viparyayaH
6036033c labdhasaMjJau tu kAkutsthau bhayaM no vyapaneSyataH
6036034a naitat kiM cana rAmasya na ca rAmo mumUrSati
6036034c na hy enaM hAsyate lakSmIr durlabhA yA gatAyuSAm
6036035a tasmAd AzvAsayAtmAnaM balaM cAzvAsaya svakam
6036035c yAvat sarvANi sainyAni punaH saMsthApayAmy aham
6036036a ete hy utphullanayanAs trAsAd AgatasAdhvasAH
6036036c karNe karNe prakathitA harayo haripuMgava
6036037a mAM tu dRSTvA pradhAvantam anIkaM saMpraharSitum
6036037c tyajantu harayas trAsaM bhuktapUrvAm iva srajam
6036038a samAzvAsya tu sugrIvaM rAkSasendro vibhISaNaH
6036038c vidrutaM vAnarAnIkaM tat samAzvAsayat punaH
6036039a indrajit tu mahAmAyaH sarvasainyasamAvRtaH
6036039c viveza nagarIM laGkAM pitaraM cAbhyupAgamat
6036040a tatra rAvaNam AsInam abhivAdya kRtAJjaliH
6036040c AcacakSe priyaM pitre nihatau rAmalakSmaNau
6036041a utpapAta tato hRSTaH putraM ca pariSasvaje
6036041c rAvaNo rakSasAM madhye zrutvA zatrU nipAtitau
6036042a upAghrAya sa mUrdhny enaM papraccha prItamAnasaH
6036042c pRcchate ca yathAvRttaM pitre sarvaM nyavedayat
6036043a sa harSavegAnugatAntarAtmA; zrutvA vacas tasya mahArathasya
6036043c jahau jvaraM dAzaratheH samutthitaM; prahRSya vAcAbhinananda putram
6037001a pratipraviSTe laGkAM tu kRtArthe rAvaNAtmaje
6037001c rAghavaM parivAryArtA rarakSur vAnararSabhAH
6037002a hanUmAn aGgado nIlaH suSeNaH kumudo nalaH
6037002c gajo gavAkSo gavayaH zarabho gandhamAdanaH
6037003a jAmbavAn RSabhaH sundo rambhaH zatabaliH pRthuH
6037003c vyUDhAnIkAz ca yattAz ca drumAn AdAya sarvataH
6037004a vIkSamANA dizaH sarvAs tiryag UrdhvaM ca vAnarAH
6037004c tRNeSv api ca ceSTatsu rAkSasA iti menire
6037005a rAvaNaz cApi saMhRSTo visRjyendrajitaM sutam
6037005c AjuhAva tataH sItA rakSaNI rAkSasIs tadA
6037006a rAkSasyas trijaTA cApi zAsanAt tam upasthitAH
6037006c tA uvAca tato hRSTo rAkSasI rAkSasezvaraH
6037007a hatAv indrajitAkhyAta vaidehyA rAmalakSmaNau
6037007c puSpakaM ca samAropya darzayadhvaM hatau raNe
6037008a yad AzrayAd avaSTabdho neyaM mAm upatiSThati
6037008c so 'syA bhartA saha bhrAtrA nirasto raNamUrdhani
6037009a nirvizaGkA nirudvignA nirapekSA ca maithilI
6037009c mAm upasthAsyate sItA sarvAbharaNabhUSitA
6037010a adya kAlavazaM prAptaM raNe rAmaM salakSmaNam
6037010c avekSya vinivRttAzA nAnyAM gatim apazyatI
6037011a tasya tad vacanaM zrutvA rAvaNasya durAtmanaH
6037011c rAkSasyas tAs tathety uktvA prajagmur yatra puSpakam
6037012a tataH puSpakam Adaya rAkSasyo rAvaNAjJayA
6037012c azokavanikAsthAM tAM maithilIM samupAnayan
6037013a tAm AdAya tu rAkSasyo bhartRzokaparAyaNAm
6037013c sItAm AropayAm Asur vimAnaM puSpakaM tadA
6037014a tataH puSpakam Aropya sItAM trijaTayA saha
6037014c rAvaNo 'kArayal laGkAM patAkAdhvajamAlinIm
6037015a prAghoSayata hRSTaz ca laGkAyAM rAkSasezvaraH
6037015c rAghavo lakSmaNaz caiva hatAv indrajitA raNe
6037016a vimAnenApi sItA tu gatvA trijaTayA saha
6037016c dadarza vAnarANAM tu sarvaM sinyaM nipAtitam
6037017a prahRSTamanasaz cApi dadarza pizitAzanAn
6037017c vAnarAMz cApi duHkhArtAn rAmalakSmaNapArzvataH
6037018a tataH sItA dadarzobhau zayAnau zatatalpayoH
6037018c lakSmaNaM caiva rAmaM ca visaMjJau zarapIDitau
6037019a vidhvastakavacau vIrau vipraviddhazarAsanau
6037019c sAyakaiz chinnasarvAGgau zarastambhamayau kSitau
6037020a tau dRSTvA bhrAtarau tatra vIrau sA puruSarSabhau
6037020c duHkhArtA subhRzaM sItA karuNaM vilalApa ha
6037021a sA bASpazokAbhihatA samIkSya; tau bhrAtarau devasamaprabhAvau
6037021c vitarkayantI nidhanaM tayoH sA; duHkhAnvitA vAkyam idaM jagAda
6038001a bhartAraM nihataM dRSTvA lakSmaNaM ca mahAbalam
6038001c vilalApa bhRzaM sItA karuNaM zokakarzitA
6038002a Ucur lakSaNikA ye mAM putriNy avidhaveti ca
6038002c te 'sya sarve hate rAme 'jJAnino 'nRtavAdinaH
6038003a yajvano mahiSIM ye mAm UcuH patnIM ca satriNaH
6038003c te 'dya sarve hate rAme 'jJAnino 'nRtavAdinaH
6038004a vIrapArthivapatnI tvaM ye dhanyeti ca mAM viduH
6038004c te 'dya sarve hate rAme 'jJAnino 'nRtavAdinaH
6038005a UcuH saMzravaNe ye mAM dvijAH kArtAntikAH zubhAm
6038005c te 'dya sarve hate rAme 'jJAnino 'nRtavAdinaH
6038006a imAni khalu padmAni pAdayor yaiH kila striyaH
6038006c adhirAjye 'bhiSicyante narendraiH patibhiH saha
6038007a vaidhavyaM yAnti yair nAryo 'lakSaNair bhAgyadurlabhAH
6038007c nAtmanas tAni pazyAmi pazyantI hatalakSaNA
6038008a satyAnImAni padmAni strINAm uktvAni lakSaNe
6038008c tAny adya nihate rAme vitathAni bhavanti me
6038009a kezAH sUkSmAH samA nIlA bhruvau cAsaMgate mama
6038009c vRtte cAlomaze jaGghe dantAz cAviralA mama
6038010a zaGkhe netre karau pAdau gulphAv UrU ca me citau
6038010c anuvRttA nakhAH snigdhAH samAz cAGgulayo mama
6038011a stanau cAviralau pInau mamemau magnacUcukau
6038011c magnA cotsaGginI nAbhiH pArzvoraskaM ca me citam
6038012a mama varNo maNinibho mRdUny aGgaruhANi ca
6038012c pratiSThitAM dvadazabhir mAm UcuH zubhalakSaNAm
6038013a samagrayavam acchidraM pANipAdaM ca varNavat
6038013c mandasmitety eva ca mAM kanyAlakSaNikA viduH
6038014a adhirAjye 'bhiSeko me brAhmaNaiH patinA saha
6038014c kRtAntakuzalair uktaM tat sarvaM vitathIkRtam
6038015a zodhayitvA janasthAnaM pravRttim upalabhya ca
6038015c tIrtvA sAgaram akSobhyaM bhrAtarau goSpade hatau
6038016a nanu vAruNam Agneyam aindraM vAyavyam eva ca
6038016c astraM brahmaziraz caiva rAghavau pratyapadyatAm
6038017a adRzyamAnena raNe mAyayA vAsavopamau
6038017c mama nAthAv anAthAyA nihatau rAmalakSmaNau
6038018a na hi dRSTipathaM prApya rAghavasya raNe ripuH
6038018c jIvan pratinivarteta yady api syAn manojavaH
6038019a na kAlasyAtibhAro 'sti kRtAntaz ca sudurjayaH
6038019c yatra rAmaH saha bhrAtrA zete yudhi nipAthitaH
6038020a nAhaM zocAmi bhartAraM nihataM na ca lakSmaNam
6038020c nAtmAnaM jananI cApi yathA zvazrUM tapasvinIm
6038021a sA hi cintayate nityaM samAptavratam Agatam
6038021c kadA drakSyAmi sItAM ca rAmaM ca sahalakSmaNam
6038022a paridevayamAnAM tAM rAkSasI trijaTAbravIt
6038022c mA viSAdaM kRthA devi bhartAyaM tava jIvati
6038023a kAraNAni ca vakSyAmi mahAnti sadRzAni ca
6038023c yathemau jIvato devi bhrAtarau rAmalakSmaNau
6038024a na hi kopaparItAni harSaparyutsukAni ca
6038024c bhavanti yudhi yodhAnAM mukhAni nihate patau
6038025a idaM vimAnaM vaidehi puSpakaM nAma nAmataH
6038025c divyaM tvAM dhArayen nedaM yady etau gajajIvitau
6038026a hatavIrapradhAnA hi hatotsAhA nirudyamA
6038026c senA bhramati saMkhyeSu hatakarNeva naur jale
6038027a iyaM punar asaMbhrAntA nirudvignA tarasvinI
6038027c senA rakSati kAkutsthau mAyayA nirjitau raNe
6038028a sA tvaM bhava suvisrabdhA anumAnaiH sukhodayaiH
6038028c ahatau pazya kAkutsthau snehAd etad bravImi te
6038029a anRtaM noktapUrvaM me na ca vakSye kadA cana
6038029c cAritrasukhazIlatvAt praviSTAsi mano mama
6038030a nemau zakyau raNe jetuM sendrair api surAsuraiH
6038030c etayor AnanaM dRSTvA mayA cAveditaM tava
6038031a idaM ca sumahac cihnaM zanaiH pazyasva maithili
6038031c niHsaMjJAv apy ubhAv etau naiva lakSmIr viyujyate
6038032a prAyeNa gatasattvAnAM puruSANAM gatAyuSAm
6038032c dRzyamAneSu vaktreSu paraM bhavati vaikRtam
6038033a tyaja zokaM ca duHkhaM ca mohaM ca janakAtmaje
6038033c rAmalakSmaNayor arthe nAdya zakyam ajIvitum
6038034a zrutvA tu vacanaM tasyAH sItA surasutopamA
6038034c kRtAJjalir uvAcedam evam astv iti maithilI
6038035a vimAnaM puSpakaM tat tu samivartya manojavam
6038035c dInA trijaTayA sItA laGkAm eva pravezitA
6038036a tatas trijaTayA sArdhaM puSpakAd avaruhya sA
6038036c azokavanikAm eva rakSasIbhiH pravezitA
6038037a pravizya sItA bahuvRkSaSaNDAM; tAM rAkSasendrasya vihArabhUmim
6038037c saMprekSya saMcintya ca rAjaputrau; paraM viSAdaM samupAjagAma
6039001a ghoreNa zarabandhena baddhau dazarathAtmajau
6039001c nizvasantau yathA nAgau zayAnau rudhirokSitau
6039002a sarve te vAnarazreSThAH sasugrIvA mahAbalAH
6039002c parivArya mahAtmAnau tasthuH zokapariplutAH
6039003a etasminn antere rAmaH pratyabudhyata vIryavAn
6039003c sthiratvAt sattvayogAc ca zaraiH saMdAnito 'pi san
6039004a tato dRSTvA sarudhiraM viSaNNaM gADham arpitam
6039004c bhrAtaraM dInavadanaM paryadevayad AturaH
6039005a kiM nu me sItayA kAryaM kiM kAryaM jIvitena vA
6039005c zayAnaM yo 'dya pazyAmi bhrAtaraM yudhi nirjitam
6039006a zakyA sItA samA nArI prAptuM loke vicinvatA
6039006c na lakSmaNasamo bhrAtA sacivaH sAmparAyikaH
6039007a parityakSyAmy ahaM prANAn vAnarANAM tu pazyatAm
6039007c yadi paJcatvam ApannaH sumitrAnandavardhanaH
6039008a kiM nu vakSyAmi kausalyAM mAtaraM kiM nu kaikayIm
6039008c katham ambAM sumitrAMca putradarzanalAlasAm
6039009a vivatsAM vepamAnAM ca krozantIM kurarIm iva
6039009c katham AzvAsayiSyAmi yadi yAsyAmi taM vinA
6039010a kathaM vakSyAmi zatrughnaM bharataM ca yazasvinam
6039010c mayA saha vanaM yAto vinA tenAgataH punaH
6039011a upAlambhaM na zakSyAmi soDhuM bata sumitrayA
6039011c ihaiva dehaM tyakSyAmi na hi jIvitum utsahe
6039012a dhiG mAM duSkRtakarmANam anAryaM yatkRte hy asau
6039012c lakSmaNaH patitaH zete zaratalpe gatAsuvat
6039013a tvaM nityaM suviSaNNaM mAm AzvAsayasi lakSmaNa
6039013c gatAsur nAdya zaknoSi mAm Artam abhibhASitum
6039014a yenAdya bahavo yuddhe rAkSasA nihatAH kSitau
6039014c tasyAm eva kSitau vIraH sa zete nihataH paraiH
6039015a zayAnaH zaratalpe 'smin svazoNitapariplutaH
6039015c zarajAlaiz cito bhAti bhAskaro 'stam iva vrajan
6039016a bANAbhihatamarmatvAn na zaknoty abhivIkSitum
6039016c rujA cAbruvato hy asya dRSTirAgeNa sUcyate
6039017a yathaiva mAM vanaM yAntam anuyAto mahAdyutiH
6039017c aham apy anuyAsyAmi tathaivainaM yamakSayam
6039018a iSTabandhujano nityaM mAM ca nityam anuvrataH
6039018c imAm adya gato 'vasthAM mamAnAryasya durnayaiH
6039019a suruSTenApi vIreNa lakSmaNenA na saMsmare
6039019c paruSaM vipriyaM vApi zrAvitaM na kadA cana
6039020a visasarjaikavegena paJcabANazatAni yaH
6039020c iSvastreSv adhikas tasmAt kArtavIryAc ca lakSmaNaH
6039021a astrair astrANi yo hanyAc chakrasyApi mahAtmanaH
6039021c so 'yam urvyAMhataH zete mahArhazayanocitaH
6039022a tac ca mithyA pralaptaM mAM pradhakSyati na saMzayaH
6039022c yan mayA na kRto rAjA rAkSasAnAM vibhISaNaH
6039023a asmin muhUrte sugrIva pratiyAtum ito 'rhasi
6039023c matvA hInaM mayA rAjan rAvaNo 'bhidraved balI
6039024a aGgadaM tu puraskRtya sasainyaH sasuhRjjanaH
6039024c sAgaraM tara sugrIva punas tenaiva setunA
6039025a kRtaM hanumatA kAryaM yad anyair duSkaraM raNe
6039025c RkSarAjena tuSyAmi golAGgUlAdhipena ca
6039026a aGgadena kRtaM karma maindena dvividena ca
6039026c yuddhaM kesariNA saMkhye ghoraM saMpAtinA kRtam
6039027a gavayena gavAkSeNa zarabheNa gajena ca
6039027c anyaiz ca haribhir yuddhaM madArthe tyaktajIvitaiH
6039028a na cAtikramituM zakyaM daivaM sugrIva mAnuSaiH
6039028c yat tu zakyaM vayasyena suhRdA vA paraMtapa
6039028e kRtaM sugrIva tat sarvaM bhavatAdharmabhIruNA
6039029a mitrakAryaM kRtam idaM bhavadbhir vAnararSabhAH
6039029c anujJAtA mayA sarve yatheSTaM gantum arhatha
6039030a zuzruvus tasya te sarve vAnarAH paridevitam
6039030c vartayAM cakrur azrUNi netraiH kRSNetarekSaNAH
6039031a tataH sarvANy anIkAni sthApayitvA vibhISaNaH
6039031c AjagAma gadApANis tvarito yatra rAghavaH
6039032a taM dRSTvA tvaritaM yAntaM nIlAJjanacayopamam
6039032c vAnarA dudruvuH sarve manyamAnAs tu rAvaNim
6040001a athovAca mahAtejA harirAjo mahAbalaH
6040001c kim iyaM vyathitA senA mUDhavAteva naur jale
6040002a sugrIvasya vacaH zrutvA vAliputro 'Ggado 'bravIt
6040002c na tvaM pazyasi rAmaM ca lakSmaNaM ca mahAbalam
6040003a zarajAlAcitau vIrAv ubhau dazarathAtmajau
6040003c zaratalpe mahAtmAnau zayAnau rudhirokSitau
6040004a athAbravId vAnarendraH sugrIvaH putram aGgadam
6040004c nAnimittam idaM manye bhavitavyaM bhayena tu
6040005a viSaNNavadanA hy ete tyaktapraharaNA dizaH
6040005c prapalAyanti harayas trAsAd utphullalocanAH
6040006a anyonyasya na lajjante na nirIkSanti pRSThataH
6040006c viprakarSanti cAnyonyaM patitaM laGghayanti ca
6040007a etasminn antare vIro gadApANir vibhISaNaH
6040007c sugrIvaM vardhayAm Asa rAghavaM ca niraikSata
6040008a vibhISaNaM taM sugrIvo dRSTvA vAnarabhISaNam
6040008c RkSarAjaM samIpasthaM jAmbavantam uvAca ha
6040009a vibhISaNo 'yaM saMprApto yaM dRSTvA vAnararSabhAH
6040009c vidravanti paritrastA rAvaNAtmajazaGkayA
6040010a zIghram etAn suvitrastAn bahudhA vipradhAvitAn
6040010c paryavasthApayAkhyAhi vibhISaNam upasthitam
6040011a sugrIveNaivam uktas tu jAmbavAn RkSapArthivaH
6040011c vAnarAn sAntvayAm Asa saMnivartya prahAvataH
6040012a te nivRttAH punaH sarve vAnarAs tyaktasaMbhramAH
6040012c RkSarAjavacaH zrutvA taM ca dRSTvA vibhISaNam
6040013a vibhISaNas tu rAmasya dRSTvA gAtraM zaraiz citam
6040013c lakSmaNasya ca dharmAtmA babhUva vyathitendriyaH
6040014a jalaklinnena hastena tayor netre pramRjya ca
6040014c zokasaMpIDitamanA ruroda vilalApa ca
6040015a imau tau sattvasaMpannau vikrAntau priyasaMyugau
6040015c imAm avasthAM gamitau rAkasaiH kUTayodhibhiH
6040016a bhrAtuH putreNa me tena duSputreNa durAtmanA
6040016c rAkSasyA jihmayA buddhyA chalitAv Rjuvikramau
6040017a zarair imAv alaM viddhau rudhireNa samukSitau
6040017c vasudhAyAm ima suptau dRzyete zalyakAv iva
6040018a yayor vIryam upAzritya pratiSThA kAGkSitA mayA
6040018c tAv ubhau dehanAzAya prasuptau puruSarSabhau
6040019a jIvann adya vipanno 'smi naSTarAjyamanorathaH
6040019c prAptapratijJaz ca ripuH sakAmo rAvaNaH kRtaH
6040020a evaM vilapamAnaM taM pariSvajya vibhISaNam
6040020c sugrIvaH sattvasaMpanno harirAjo 'bravId idam
6040021a rAjyaM prApsyasi dharmajJa laGkAyAM nAtra saMzayaH
6040021c rAvaNaH saha putreNa sa rAjyaM neha lapsyate
6040022a zarasaMpIDitAv etAv ubhau rAghavalakSmaNau
6040022c tyaktvA mohaM vadhiSyete sagaNaM rAvaNaM raNe
6040023a tam evaM sAntvayitvA tu samAzvAsya ca rAkSasaM
6040023c suSeNaM zvazuraM pArzve sugrIvas tam uvAca ha
6040024a saha zUrair harigaNair labdhasaMjJAv ariMdamau
6040024c gaccha tvaM bhrAtarau gRhya kiSkindhAM rAmalakSmaNau
6040025a ahaM tu rAvaNaM hatvA saputraM sahabAndhavam
6040025c maithilIm AnayiSyAmi zakro naSTAm iva zriyam
6040026a zrutvaitad vAnarendrasya suSeNo vAkyam abravIt
6040026c devAsuraM mahAyuddham anubhUtaM sudAruNam
6040027a tadA sma dAnavA devAJ zarasaMsparzakovidAH
6040027c nijaghnuH zastraviduSaz chAdayanto muhur muhuH
6040028a tAn ArtAn naSTasaMjJAMz ca parAsUMz ca bRhaspatiH
6040028c vidhyAbhir mantrayuktAbhir oSadhIbhiz cikitsati
6040029a tAny auSadhAny AnayituM kSIrodaM yAntu sAgaram
6040029c javena vAnarAH zIghraM saMpAti panasAdayaH
6040030a harayas tu vijAnanti pArvatI te mahauSadhI
6040030c saMjIvakaraNIM divyAM vizalyAM devanirmitAm
6040031a candraz ca nAma droNaz ca parvatau sAgarottame
6040031c amRtaM yatra mathitaM tatra te paramauSadhI
6040032a te tatra nihite devaiH parvate paramauSadhI
6040032c ayaM vAyusuto rAjan hanUmAMs tatra gacchatu
6040033a etasminn antare vAyur meghAMz cApi savidyutaH
6040033c paryasyan sAgare toyaM kampayann iva parvatAn
6040034a mahatA pakSavAtena sarve dvIpamahAdrumAH
6040034c nipetur bhagnaviTapAH samUlA lavaNAmbhasi
6040035a abhavan pannagAs trastA bhoginas tatravAsinaH
6040035c zIghraM sarvANi yAdAMsi jagmuz ca lavaNArNavam
6040036a tato muhUrtad garuDaM vainateyaM mahAbalam
6040036c vAnarA dadRzuH sarve jvalantam iva pAvakam
6040037a tam Agatam abhiprekSya nAgAs te vipradudruvuH
6040037c yais tau satpuruSau baddhau zarabhUtair mahAbalau
6040038a tataH suparNaH kAkutsthau dRSTvA pratyabhinandya ca
6040038c vimamarza ca pANibhyAM mukhe candrasamaprabhe
6040039a vainateyena saMspRSTAs tayoH saMruruhur vraNAH
6040039c suvarNe ca tanU snigdhe tayor Azu babhUvatuH
6040040a tejo vIryaM balaM cauja utsAhaz ca mahAguNAH
6040040c pradarzanaM ca buddhiz ca smRtiz ca dviguNaM tayoH
6040041a tAv utthApya mahAvIryau garuDo vAsavopamau
6040041c ubhau tau sasvaje hRSTau rAmaz cainam uvAca ha
6040042a bhavatprasAdAd vyasanaM rAvaNiprabhavaM mahat
6040042c AvAm iha vyatikrAntau zIghraM ca balinau kRtau
6040043a yathA tAtaM dazarathaM yathAjaM ca pitAmaham
6040043c tathA bhavantam AsAdya hRSayaM me prasIdati
6040044a ko bhavAn rUpasaMpanno divyasraganulepanaH
6040044c vasAno viraje vastre divyAbharaNabhUSitaH
6040045a tam uvAca mahAtejA vainateyo mahAbalaH
6040045c patatrirAjaH prItAtmA harSaparyAkulekSaNaH
6040046a ahaM sakhA te kAkutstha priyaH prANo bahizcaraH
6040046c garutmAn iha saMprApto yuvayoH sAhyakAraNAt
6040047a asurA vA mahAvIryA dAnavA vA mahAbalAH
6040047c surAz cApi sagandharvAH puraskRtya zatakratum
6040048a nemaM mokSayituM zaktAH zarabandhaM sudAruNam
6040048c mAyA balAd indrajitA nirmitaM krUrakarmaNA
6040049a ete nAgAH kAdraveyAs tIkSNadaMSTrAviSolbaNAH
6040049c rakSomAyA prabhAvena zarA bhUtvA tvadAzritAH
6040050a sabhAgyaz cAsi dharmajJa rAma satyaparAkrama
6040050c lakSmaNena saha bhrAtrA samare ripughAtinA
6040051a imaM zrutvA tu vRttAntaM tvaramANo 'ham AgataH
6040051c sahasA yuvayoH snehAt sakhitvam anupAlayan
6040052a mokSitau ca mahAghorAd asmAt sAyakabandhanAt
6040052c apramAdaz ca kartavyo yuvAbhyAM nityam eva hi
6040053a prakRtyA rAkSasAH sarve saMgrAme kUTayodhinaH
6040053c zUrANAM zuddhabhAvAnAM bhavatAm ArjavaM balam
6040054a tan na vizvasitavyaM vo rAkSasAnAM raNAjire
6040054c etenaivopamAnena nityajihmA hi rAkSasAH
6040055a evam uktvA tato rAmaM suparNaH sumahAbalaH
6040055c pariSvajya suhRtsnigdham ApraSTum upacakrame
6040056a sakhe rAghava dharmajJa ripUNAm api vatsala
6040056c abhyanujJAtum icchAmi gamiSyAmi yathAgatam
6040057a bAlavRddhAvazeSAM tu laGkAM kRtvA zarormibhiH
6040057c rAvaNaM ca ripuM hatvA sItAM samupalapsyase
6040058a ity evam uktvA vacanaM suparNaH zIghravikramaH
6040058c rAmaM ca virujaM kRtvA madhye teSAM vanaukasAm
6040059a pradakSiNaM tataH kRtvA pariSvajya ca vIryavAn
6040059c jagAmAkAzam Avizya suparNaH pavano yathA
6040060a virujau rAghavau dRSTvA tato vAnarayUthapAH
6040060c siMhanAdAMs tadA nedur lAGgUlaM dudhuvuz ca te
6040061a tato bherIH samAjaghnur mRdaGgAMz ca vyanAdayan
6040061c dadhmuH zaGkhAn saMprahRSTAH kSvelanty api yathApuram
6040062a AsphoTyAsphoTya vikrAntA vAnarA nagayodhinaH
6040062c drumAn utpATya vividhAMs tasthuH zatasahasrazaH
6040063a visRjanto mahAnAdAMs trAsayanto nizAcarAn
6040063c laGkAdvArANy upAjagmur yoddhukAmAH plavaMgamAH
6040064a tatas tu bhImas tumulo ninAdo; babhUva zAkhAmRgayUthapAnAm
6040064c kSaye nidAghasya yathA ghanAnAM; nAdaH subhImo nadatAM nizIthe
6041001a teSAM sutumulaM zabdaM vAnarANAM tarasvinAm
6041001c nardatAM rAkSasaiH sArdhaM tadA zuzrAva rAvaNaH
6041002a snigdhagambhIranirghoSaM zrutvA sa ninadaM bhRzam
6041002c sacivAnAM tatas teSAM madhye vacanam abravIt
6041003a yathAsau saMprahRSTAnAM vAnarANAM samutthitaH
6041003c bahUnAM sumahAn nAdo meghAnAm iva garjatAm
6041004a vyaktaM sumahatI prItir eteSAM nAtra saMzayaH
6041004c tathA hi vipulair nAdaiz cukSubhe varuNAlayaH
6041005a tau tu baddhau zarais tISkNair bhrAtarau rAmalakSmaNau
6041005c ayaM ca sumahAn nAdaH zaGkAM janayatIva me
6041006a etat tu vacanaM coktvA mantriNo rAkSasezvaraH
6041006c uvAca nairRtAMs tatra samIpaparivartinaH
6041007a jJAyatAM tUrNam etaSAM sarveSAM vanacAriNAm
6041007c zokakAle samutpanne harSakAraNam utthitam
6041008a tathoktAs tena saMbhrAntAH prAkAram adhiruhya te
6041008c dadRzuH pAlitAM senAM sugrIveNa mahAtmanA
6041009a tau ca muktau sughoreNa zarabandhena rAghavau
6041009c samutthitau mahAbhAgau viSeduH prekSya rAkSasAH
6041010a saMtrastahRdayA sarve prAkArAd avaruhya te
6041010c viSaNNavadanAH sarve rAkSasendram upasthitAH
6041011a tad apriyaM dInamukhA rAvaNasya nizAcarAH
6041011c kRtsnaM nivedayAm Asur yathAvad vAkyakovidAH
6041012a yau tAv indrajitA yuddhe bhrAtarau rAmalakSmaNau
6041012c nibaddhau zarabandhena niSprakampabhujau kRtau
6041013a vimuktau zarabandhena tau dRzyete raNAjire
6041013c pAzAn iva gajau chittvA gajendrasamavikramau
6041014a tac chrutvA vacanaM teSAM rAkSasendro mahAbalaH
6041014c cintAzokasamAkrAnto viSaNNavadano 'bravIt
6041015a ghorair dattavarair baddhau zarair AzIviSomapaiH
6041015c amoghaiH sUryasaMkAzaiH pramathyendrajitA yudhi
6041016a tam astrabandham AsAdya yadi muktau ripU mama
6041016c saMzayastham idaM sarvam anupazyAmy ahaM balam
6041017a niSphalAH khalu saMvRttAH zarA vAsukitejasaH
6041017c AdattaM yais tu saMgrAme ripUNAM mama jIvitam
6041018a evam uktvA tu saMkruddho nizvasann urago yathA
6041018c abravId rakSasAM madhye dhUmrAkSaM nAma rAkasaM
6041019a balena mahatA yukto rakSasAM bhImakarmaNAm
6041019c tvaM vadhAyAbhiniryAhi rAmasya saha vAnaraiH
6041020a evam uktas tu dhUmrAkSo rAkSasendreNa dhImatA
6041020c kRtvA praNAmaM saMhRSTo nirjagAma nRpAlayAt
6041021a abhiniSkramya taddvAraM balAdhyakSam uvAca ha
6041021c tvarayasva balaM tUrNaM kiM cireNa yuyutsataH
6041022a dhUmrAkSasya vacaH zrutvA balAdhyakSo balAnugaH
6041022c balam udyojayAm Asa rAvaNasyAjJayA drutam
6041023a te baddhaghaNTA balino ghorarUpA nizAcarAH
6041023c vinardamAnAH saMhRSTA dhUmrAkSaM paryavArayan
6041024a vividhAyudhahastAz ca zUlamudgarapANayaH
6041024c gadAbhiH paTTasair daNDair Ayasair musalair bhRzam
6041025a parighair bhiNDipAlaiz ca bhallaiH prAsaiH parazvadhaiH
6041025c niryayU rAkSasA ghorA nardanto jaladA yathA
6041026a rathaiH kavacinas tv anye dhvajaiz ca samalaMkRtaiH
6041026c suvarNajAlavihitaiH kharaiz ca vividhAnanaiH
6041027a hayaiH paramazIghraiz ca gajendraiz ca madotkaTaiH
6041027c niryayU rAkSasavyAghrA vyAghrA iva durAsadAH
6041028a vRkasiMhamukhair yuktaM kharaiH kanakabhUSaNaiH
6041028c Aruroha rathaM divyaM dhUmrAkSaH kharanisvanaH
6041029a sa niryAto mahAvIryo dhUmrAkSo rAkSasair vRtaH
6041029c prahasan pazcimadvAraM hanUmAn yatra yUthapaH
6041030a prayAntaM tu mahAghoraM rAkSasaM bhImadarzanam
6041030c antarikSagatAH krUrAH zakunAH pratyavArayan
6041031a rathazIrSe mahAbhImo gRdhraz ca nipapAta ha
6041031c dhvajAgre grathitAz caiva nipetuH kuNapAzanAH
6041032a rudhirArdro mahAJ zvetaH kabandhaH patito bhuvi
6041032c visvaraM cotsRjan nAdaM dhUmrAkSasya samIpataH
6041033a vavarSa rudhiraM devaH saMcacAla ca medinI
6041033c pratilomaM vavau vAyur nirghAtasamanisvanaH
6041033e timiraughAvRtAs tatra dizaz ca na cakAzire
6041034a sa tUtpAtAMs tato dRSTvA rAkSasAnAM bhayAvahAn
6041034c prAdurbhUtAn sughorAMz ca dhUmrAkSo vyathito 'bhavat
6041035a tataH subhImo bahubhir nizAcarair; vRto 'bhiniSkramya raNotsuko balI
6041035c dadarza tAM rAghavabAhupAlitAM; samudrakalpAM bahuvAnarIM camUm
6042001a dhUmrAkSaM prekSya niryAntaM rAkSasaM bhImanisvanam
6042001c vinedur vAnarAH sarve prahRSTA yuddhakAGkSiNaH
6042002a teSAM tu tumulaM yuddhaM saMjajJe harirakSasAm
6042002c anyonyaM pAdapair ghorair nighnataM zUlamudgaraiH
6042003a rAkSasair vAnarA ghorA vinikRttAH samantataH
6042003c vAnarai rAkSasAz cApi drumair bhUmau samIkRtAH
6042004a rAkSasAz cApi saMkruddhA vAnarAn nizitaiH zaraiH
6042004c vivyadhur ghorasaMkAzaiH kaGkapatrair ajihmagaiH
6042005a te gadAbhiz ca bhImAbhiH paTTasaiH kUTamudgaraiH
6042005c ghoraiz ca parighaiz citrais trizUlaiz cApi saMzitaiH
6042006a vidAryamANA rakSobhir vAnarAs te mahAbalAH
6042006c amarSAj janitoddharSAz cakruH karmANy abhItavat
6042007a zaranirbhinnagAtrAs te zUlanirbhinnadehinaH
6042007c jagRhus te drumAMs tatra zilAz ca hariyUthapAH
6042008a te bhImavegA harayo nardamAnAs tatas tataH
6042008c mamanthU rAkSasAn bhImAn nAmAni ca babhASire
6042009a tad babhUvAdbhutaM ghoraM yuddhaM vAnararakSasAm
6042009c zilAbhir vividhAbhiz ca bahuzAkhaiz ca pAdapaiH
6042010a rAkSasA mathitAH ke cid vAnarair jitakAzibhiH
6042010c vavarSU rudhiraM ke cin mukhai rudhirabhojanAH
6042011a pArzveSu dAritAH ke cit ke cid rAzIkRtA drumaiH
6042011c zilAbhiz cUrNitAH ke cit ke cid dantair vidAritAH
6042012a dhvajair vimathitair bhagnaiH kharaiz ca vinipAtitaiH
6042012c rathair vidhvaMsitaiz cApi patitai rajanIcaraiH
6042013a vAnarair bhImavikrAntair AplutyAplutya vegitaiH
6042013c rAkSasAH karajais tIkSNair mukheSu vinikartitAH
6042014a vivarNavadanA bhUyo viprakIrNaziroruhAH
6042014c mUDhAH zoNitagandhena nipetur dharaNItale
6042015a naye tu paramakruddhA rAkSasA bhImavikramAH
6042015c talair evAbhidhAvanti vajrasparzasamair harIn
6042016a vanarair Apatantas te vegitA vegavattaraiH
6042016c muSTibhiz caraNair dantaiH pAdapaiz cApapothitAH
6042017a sanyaM tu vidrutaM dRSTvA dhUmrAkSo rAkSasarSabhaH
6042017c krodhena kadanaM cakre vAnarANAM yuyutsatAm
6042018a prAsaiH pramathitAH ke cid vAnarAH zoNitasravAH
6042018c mudgarair AhatAH ke cit patitA dharaNItale
6042019a parighair mathitaH ke cid bhiNDipAlair vidAritAH
6042019c paTTasair AhatAH ke cid vihvalanto gatAsavaH
6042020a ke cid vinihatA bhUmau rudhirArdrA vanaukasaH
6042020c ke cid vidrAvitA naSTAH saMkruddhai rAkSasair yudhi
6042021a vibhinnahRdayAH ke cid ekapArzvena zAyitAH
6042021c vidAritAstrazUlai ca ke cid Antrair vinisrutAH
6042022a tat subhImaM mahad yuddhaM harirAkasa saMkulam
6042022c prababhau zastrabahulaM zilApAdapasaMkulam
6042023a dhanurjyAtantrimadhuraM hikkAtAlasamanvitam
6042023c mandrastanitasaMgItaM yuddhagAndharvam Ababhau
6042024a dhUmrAkSas tu dhanuSpANir vAnarAn raNamUrdhani
6042024c hasan vidrAvayAm Asa dizas tAJ zaravRSTibhiH
6042025a dhUmrAkSeNArditaM sainyaM vyathitaM dRzya mArutiH
6042025c abhyavartata saMkruddhaH pragRhya vipulAM zilAm
6042026a krodhAd dviguNatAmrAkSaH pitRtulyaparAkramaH
6042026c zilAM tAM pAtayAm Asa dhUmrAkSasya rathaM prati
6042027a ApatantIM zilAM dRSTvA gadAm udyamya saMbhramAt
6042027c rathAd Aplutya vegena vasudhAyAM vyatiSThata
6042028a sA pramathya rathaM tasya nipapAta zilAbhuvi
6042028c sacakrakUbaraM sAzvaM sadhvajaM sazarAsanam
6042029a sa bhaGktvA tu rathaM tasya hanUmAn mArutAtmajaH
6042029c rakSasAM kadanaM cakre saskandhaviTapair drumaiH
6042030a vibhinnaziraso bhUtvA rAkSasAH zoNitokSitAH
6042030c drumaiH pramathitAz cAnye nipetur dharaNItale
6042031a vidrAvya rAkSasaM sainyaM hanUmAn mArutAtmajaH
6042031c gireH zikharam AdAya dhUmrAkSam abhidudruve
6042032a tam ApatantaM dhUmrAkSo gadAm udyamya vIryavAn
6042032c vinardamAnaH sahasA hanUmantam abhidravat
6042033a tataH kruddhas tu vegena gadAM tAM bahukaNTakAm
6042033c pAtayAm Asa dhUmrAkSo mastake tu hanUmataH
6042034a tADitaH sa tayA tatra gadayA bhImarUpayA
6042034c sa kapir mArutabalas taM prahAram acintayan
6042034e dhUmrAkSasya ziro madhye girizRGgam apAtayat
6042035a sa vihvalitasarvAGgo girizRGgeNa tADitaH
6042035c papAta sahasA bhUmau vikIrNa iva parvataH
6042036a dhUmrAkSaM nihataM dRSTvA hatazeSA nizAcarAH
6042036c trastAH pravivizur laGkAM vadhyamAnAH plavaMgamaiH
6042037a sa tu pavanasuto nihatya zatruM; kSatajavahAH saritaz ca saMvikIrya
6042037c ripuvadhajanitazramo mahAtmA; mudam agamat kapibhiz ca pUjyamAnaH
6043001a dhUmrAkSaM nihataM zrutvA rAvaNo rAkSasezvaraH
6043001c balAdhyakSam uvAcedaM kRtAJjalim upasthitam
6043002a zIghraM niryAntu durdharSA rAkSasA bhImavikramAH
6043002c akampanaM puraskRtya sarvazastraprakovidam
6043003a tato nAnApraharaNA bhImAkSA bhImadarzanAH
6043003c niSpetU rAkSasA mukhyA balAdhyakSapracoditAH
6043004a ratham AsthAya vipulaM taptakAJcanakuNDalaH
6043004c rAkasaiH saMvRto ghorais tadA niryAty akampanaH
6043005a na hi kampayituM zakyaH surair api mahAmRdhe
6043005c akampanas tatas teSAm Aditya iva tejasA
6043006a tasya nidhAvamAnasya saMrabdhasya yuyutsayA
6043006c akasmAd dainyam Agacchad dhayAnAM rathavAhinAm
6043007a vyasphuran nayanaM cAsya savyaM yuddhAbhinandinaH
6043007c vivarNo mukhavarNaz ca gadgadaz cAbhavat svaraH
6043008a abhavat sudine cApi durdine rUkSamArutam
6043008c UcuH khagA mRgAH sarve vAcaH krUrA bhayAvahAH
6043009a sa siMhopacitaskandhaH zArdUlasamavikramaH
6043009c tAn utpAtAn acintyaiva nirjagAma raNAjiram
6043010a tadA nirgacchatas tasya rakSasaH saha rAkSasaiH
6043010c babhUva sumahAn nAdaH kSobhayann iva sAgaram
6043011a tena zabdena vitrastA vAnarANAM mahAcamUH
6043011c drumazailapraharaNA yoddhuM samavatiSThata
6043012a teSAM yuddhaM mahAraudraM saMjajJe kapirakSasAm
6043012c rAmarAvaNayor arthe samabhityaktajIvinAm
6043013a sarve hy atibalAH zUrAH sarve parvatasaMnibhAH
6043013c harayo rAkSasAz caiva parasparajighaMsavaH
6043014a teSAM vinardAtAM zabdaH saMyuge 'titarasvinAm
6043014c zuzruve sumahAn krodhAd anyonyam abhigarjatAm
6043015a rajaz cAruNavarNAbhaM subhImam abhavad bhRzam
6043015c uddhUtaM harirakSobhiH saMrurodha dizo daza
6043016a anyonyaM rajasA tena kauzeyoddhUtapANDunA
6043016c saMvRtAni ca bhUtAni dadRzur na raNAjire
6043017a na dhvajo na patAkAvA varma vA turago 'pi vA
6043017c AyudhaM syandanaM vApi dadRze tena reNunA
6043018a zabdaz ca sumahAMs teSAM nardatAm abhidhAvatAm
6043018c zrUyate tumule yuddhe na rUpANi cakAzire
6043019a harIn eva susaMkruddhA harayo jaghnur Ahave
6043019c rAkSasAz cApi rakSAMsi nijaghnus timire tadA
6043020a parAMz caiva vinighnantaH svAMz ca vAnararAkSasAH
6043020c rudhirArdraM tadA cakrur mahIM paGkAnulepanAm
6043021a tatas tu rudhiraugheNa siktaM vyapagataM rajaH
6043021c zarIrazavasaMkIrNA babhUva ca vasuMdharA
6043022a drumazaktizilAprAsair gadAparighatomaraiH
6043022c harayo rAkSasAs tUrNaM jaghnur anyonyam ojasA
6043023a bAhubhiH parighAkArair yudhyantaH parvatopamAH
6043023c harayo bhImakarmANo rAkSasAJ jaghnur Ahave
6043024a rAkSasAz cApi saMkruddhAH prAsatomarapANayaH
6043024c kapIn nijaghnire tatra zastraiH paramadAruNaiH
6043025a harayas tv api rakSAMsi mahAdrumamahAzmabhiH
6043025c vidArayanty abhikramya zastrANy Acchidya vIryataH
6043026a etasminn antare vIrA harayaH kumudo nalaH
6043026c maindaz ca paramakruddhaz cakrur vegam anuttamam
6043027a te tu vRkSair mahAvegA rAkSasAnAM camUmukhe
6043027c kadanaM sumaha cakrur lIlayA hariyUthapAH
6044001a tad dRSTvA sumahat karma kRtaM vAnarasattamaiH
6044001c krodham AhArayAm Asa yudhi tIvram akampanaH
6044002a krodhamUrchitarUpas tu dhnuvan paramakArmukam
6044002c dRSTvA tu karma zatrUNAM sArathiM vAkyam abravIt
6044003a tatraiva tAvat tvaritaM rathaM prApaya sArathe
6044003c ete 'tra bahavo ghnanti subahUn rAkSasAn raNe
6044004a ete 'tra balavanto hi bhImakAyAz ca vAnarAH
6044004c drumazailapraharaNAs tiSThanti pramukhe mama
6044005a etAn nihantum icchAmi samarazlAghino hy aham
6044005c etaiH pramathitaM sarvaM dRzyate rAkSasaM balam
6044006a tataH prajavitAzvena rathena rathinAM varaH
6044006c harIn abhyahanat krodhAc charajAlair akampanaH
6044007a na sthAtuM vAnarAH zekuH kiM punar yoddhum Ahave
6044007c akampanazarair bhagnAH sarva eva pradudruvuH
6044008a tAn mRtyuvazam ApannAn akampanavazaM gatAn
6044008c samIkSya hanumAJ jJAtIn upatasthe mahAbalaH
6044009a taM mahAplavagaM dRSTvA sarve plavagayUthapAH
6044009c sametya samare vIrAH sahitAH paryavArayan
6044010a vyavasthitaM hanUmantaM te dRSTvA hariyUthapAH
6044010c babhUvur balavanto hi balavantam upAzritAH
6044011a akampanas tu zailAbhaM hanUmantam avasthitam
6044011c mahendra iva dhArAbhiH zarair abhivavarSa ha
6044012a acintayitvA bANaughAJ zarIre patitAJ zitAn
6044012c akampanavadhArthAya mano dadhre mahAbalaH
6044013a sa prahasya mahAtejA hanUmAn mArutAtmajaH
6044013c abhidudrAva tad rakSaH kampayann iva medinIm
6044014a tasyAbhinardamAnasya dIpyamAnasya tejasA
6044014c babhUva rUpaM durdharSaM dIptasyeva vibhAvasoH
6044015a AtmAnaM tv apraharaNaM jJAtvA krodhasamanvitaH
6044015c zailam utpATayAm Asa vegena haripuMgavaH
6044016a taM gRhItvA mahAzailaM pANinaikena mArutiH
6044016c vinadya sumahAnAdaM bhrAmayAm Asa vIryavAn
6044017a tatas tam abhidudrAva rAkSasendram akampanam
6044017c yathA hi namuciM saMkhye vajreNeva puraMdaraH
6044018a akampanas tu tad dRSTvA girizRGgaM samudyatam
6044018c dUrAd eva mahAbANair ardhacandrair vyadArayat
6044019a tat parvatAgram AkAze rakSobANavidAritam
6044019c vikIrNaM patitaM dRSTvA hanUmAn krodhamUrchitaH
6044020a so 'zvakarNaM samAsAdya roSadarpAnvito hariH
6044020c tUrNam utpATayAm Asa mahAgirim ivocchritam
6044021a taM gRhItvA mahAskandhaM so 'zvakarNaM mahAdyutiH
6044021c prahasya parayA prItyA bhrAmayAm Asa saMyuge
6044022a pradhAvann uruvegena prabhaJjaMs tarasA drumAn
6044022c hanUmAn paramakruddhaz caraNair dArayat kSitim
6044023a gajAMz ca sagajArohAn sarathAn rathinas tathA
6044023c jaghAna hanumAn dhImAn rAkSasAMz ca padAtikAn
6044024a tam antakam iva kruddhaM samare prANahAriNam
6044024c hanUmantam abhiprekSya rAkSasA vipradudruvuH
6044025a tam ApatantaM saMkruddhaM rAkSasAnAM bhayAvaham
6044025c dadarzAkampano vIraz cukrodha ca nanAda ca
6044026a sa caturdazabhir bANaiH zitair dehavidAraNaiH
6044026c nirbibheda hanUmantaM mahAvIryam akampanaH
6044027a sa tathA pratividdhas tu bahvIbhiH zaravRSTibhiH
6044027c hanUmAn dadRze vIraH prarUDha iva sAnumAn
6044028a tato 'nyaM vRkSam utpATya kRtvA vegam anuttamam
6044028c zirasy abhijaghAnAzu rAkSasendram akampanam
6044029a sa vRkSeNa hatas tena sakrodhena mahAtmanA
6044029c rAkSaso vAnarendreNa papAta sa mamAra ca
6044030a taM dRSTvA nihataM bhUmau rAkSasendram akampanam
6044030c vyathitA rAkSasAH sarve kSitikampa iva drumAH
6044031a tyaktapraharaNAH sarve rAkSasAs te parAjitAH
6044031c laGkAm abhiyayus trastA vAnarais tair abhidrutAH
6044032a te muktakezAH saMbhrAntA bhagnamAnAH parAjitAH
6044032c sravacchramajalair aGgaiH zvasanto vipradudruvuH
6044033a anyonyaM pramamantus te vivizur nagaraM bhayAt
6044033c pRSThatas te susaMmUDhAH prekSamANA muhur muhuH
6044034a teSu laGkAM praviSTeSu rAkSaseSu mahAbalAH
6044034c sametya harayaH sarve hanUmantam apUjayan
6044035a so 'pi prahRSTas tAn sarvAn harIn saMpratyapUjayat
6044035c hanUmAn sattvasaMpanno yathArham anukUlataH
6044036a vineduz ca yathA prANaM harayo jitakAzinaH
6044036c cakarSuz ca punas tatra saprANAn eva rAkSasAn
6044037a sa vIrazobhAm abhajan mahAkapiH; sametya rakSAMsi nihatya mArutiH
6044037c mahAsuraM bhImam amitranAzanaM; yathaiva viSNur balinaM camUmukhe
6044038a apUjayan devagaNAs tadA kapiM; svayaM ca rAmo 'tibalaz ca lakSmaNaH
6044038c tathaiva sugrIvamukhAH plavaMgamA; vibhISaNaz caiva mahAbalas tadA
6045001a akampanavadhaM zrutvA kruddho vai rAkSasezvaraH
6045001c kiM cid dInamukhaz cApi sacivAMs tAn udaikSata
6045002a sa tu dhyAtvA muhUrtaM tu mantribhiH saMvicArya ca
6045002c purIM pariyayau laGkAM sarvAn gulmAn avekSitum
6045003a tAM rAkSasagaNair guptAM gulmair bahubhir AvRtAm
6045003c dadarza nagarIM laGkAM patAkAdhvajamAlinIm
6045004a ruddhAM tu nagarIM dRSTvA rAvaNo rAkSasezvaraH
6045004c uvAcAmarSitaH kAle prahastaM yuddhakovidam
6045005a purasyopaniviSTasya sahasA pIDitasya ca
6045005c nAnyaM yuddhAt prapazyAmi mokSaM yuddhavizArada
6045006a ahaM vA kumbhakarNo vA tvaM vA senApatir mama
6045006c indrajid vA nikumbho vA vaheyur bhAram IdRzam
6045007a sa tvaM balam itaH zIghram AdAya parigRhya ca
6045007c vijayAyAbhiniryAhi yatra sarve vanaukasaH
6045008a niryANAd eva te nUnaM capalA harivAhinI
6045008c nardatAM rAkSasendrANAM zrutvA nAdaM draviSyati
6045009a capalA hy avinItAz ca calacittAz ca vAnarAH
6045009c na sahiSyanti te nAdaM siMhanAdam iva dvipAH
6045010a vidrute ca bale tasmin rAmaH saumitriNA saha
6045010c avazaste nirAlambaH prahastavazam eSyati
6045011a ApatsaMzayitA zreyo nAtra niHsaMzayIkRtA
6045011c pratilomAnulomaM vA yad vA no manyase hitam
6045012a rAvaNenaivam uktas tu prahasto vAhinIpatiH
6045012c rAkSasendram uvAcedam asurendram ivozanA
6045013a rAjan mantritapUrvaM naH kuzalaiH saha mantribhiH
6045013c vivAdaz cApi no vRttaH samavekSya parasparam
6045014a pradAnena tu sItAyAH zreyo vyavasitaM mayA
6045014c apradAne punar yuddhaM dRSTam etat tathaiva naH
6045015a so 'haM dAnaiz ca mAnaiz ca satataM pUjitas tvayA
6045015c sAntvaiz ca vividhaiH kAle kiM na kuryAM priyaM tava
6045016a na hi me jIvitaM rakSyaM putradAradhanAni vA
6045016c tvaM pazya mAM juhUSantaM tvadarthe jIvitaM yudhi
6045017a evam uktvA tu bhartAraM rAvaNaM vAhinIpatiH
6045017c samAnayata me zIghraM rAkSasAnAM mahad balam
6045018a madbANAzanivegena hatAnAM tu raNAjire
6045018c adya tRpyantu mAMsena pakSiNaH kAnanaukasAm
6045019a ity uktAs te prahastena balAdhyakSAH kRtatvarAH
6045019c balam udyojayAm Asus tasmin rAkSasamandire
6045020a sA babhUva muhUrtena tigmanAnAvidhAyudhaiH
6045020c laGkA rAkSasavIrais tair gajair iva samAkulA
6045021a hutAzanaM tarpayatAM brAhmaNAMz ca namasyatAm
6045021c AjyagandhaprativahaH surabhir mAruto vavau
6045022a srajaz ca vividhAkArA jagRhus tv abhimantritAH
6045022c saMgrAmasajjAH saMhRSTA dhArayan rAkSasAs tadA
6045023a sadhanuSkAH kavacino vegAd Aplutya rAkSasAH
6045023c rAvaNaM prekSya rAjAnaM prahastaM paryavArayan
6045024a athAmantrya ca rAjAnaM bherIm Ahatya bhairavAm
6045024c Aruroha rathaM divyaM prahastaH sajjakalpitam
6045025a hayair mahAjavair yuktaM samyak sUtasusaMyutam
6045025c mahAjaladanirghoSaM sAkSAc candrArkabhAsvaram
6045026a uragadhvajadurdharSaM suvarUthaM svapaskaram
6045026c suvarNajAlasaMyuktaM prahasantam iva zriyA
6045027a tatas taM ratham AsthAya rAvaNArpitazAsanaH
6045027c laGkAyA niryayau tUrNaM balena mahatA vRtaH
6045028a tato duMdubhinirghoSaH parjanyaninadopamaH
6045028c zuzruve zaGkhazabdaz ca prayAte vAhinIpatau
6045029a ninadantaH svarAn ghorAn rAkSasA jagmur agrataH
6045029c bhImarUpA mahAkAyAH prahastasya puraHsarAH
6045030a vyUDhenaiva sughoreNa pUrvadvArAt sa niryayau
6045030c gajayUthanikAzena balena mahatA vRtaH
6045031a sAgarapratimaughena vRtas tena balena saH
6045031c prahasto niryayau tUrNaM kruddhaH kAlAntakopamaH
6045032a tasya niryANa ghoSeNa rAkSasAnAM ca nardatAm
6045032c laGkAyAM sarvabhUtAni vinedur vikRtaiH svaraiH
6045033a vyabhram AkAzam Avizya mAMsazoNitabhojanAH
6045033c maNDalAny apasavyAni khagAz cakrU rathaM prati
6045034a vamantyaH pAvakajvAlAH zivA ghorA vavAzire
6045035a antarikSAt papAtolkA vAyuz ca paruSo vavau
6045035c anyonyam abhisaMrabdhA grahAz ca na cakAzire
6045036a vavarSU rudhiraM cAsya siSicuz ca puraHsarAn
6045036c ketumUrdhani gRdhro 'sya vilIno dakSiNAmukhaH
6045037a sArather bahuzaz cAsya saMgrAmam avagAhataH
6045037c pratodo nyapatad dhastAt sUtasya hayasAdinaH
6045038a niryANa zrIz ca yAsyAsId bhAsvarA ca sudurlabhA
6045038c sA nanAza muhUrtena same ca skhalitA hayAH
6045039a prahastaM tv abhiniryAntaM prakhyAta balapauruSam
6045039c yudhi nAnApraharaNA kapisenAbhyavartata
6045040a atha ghoSaH sutumulo harINAM samajAyata
6045040c vRkSAn ArujatAM caiva gurvIz cAgRhNatAM zilAH
6045041a ubhe pramudite sainye rakSogaNavanaukasAm
6045041c vegitAnAM samarthAnAm anyonyavadhakAGkSiNAm
6045041e parasparaM cAhvayatAM ninAdaH zrUyate mahAn
6045042a tataH prahastaH kapirAjavAhinIm; abhipratasthe vijayAya durmatiH
6045042c vivRddhavegAM ca viveza tAM camUM; yathA mumUrSuH zalabho vibhAvasum
6046001a tataH prahastaM niryAntaM bhImaM bhImaparAkramam
6046001c garjantaM sumahAkAyaM rAkSasair abhisaMvRtam
6046002a dadarza mahatI senA vAnarANAM balIyasAm
6046002c atisaMjAtaroSANAM prahastam abhigarjatAm
6046003a khaDgazaktyaSTibANAz ca zUlAni musalAni ca
6046003c gadAz ca parighAH prAsA vividhAz ca parazvadhAH
6046004a dhanUMSi ca vicitrANi rAkSasAnAM jayaiSiNAm
6046004c pragRhItAny azobhanta vAnarAn abhidhAvatAm
6046005a jagRhuH pAdapAMz cApi puSpitAn vAnararSabhAH
6046005c zilAz ca vipulA dIrghA yoddhukAmAH plavaMgamAH
6046006a teSAm anyonyam AsAdya saMgrAmaH sumahAn abhUt
6046006c bahUnAm azmavRSTiM ca zaravRSTiM ca varSatAm
6046007a bahavo rAkSasA yuddhe bahUn vAnarayUthapAn
6046007c vAnarA rAkSasAMz cApi nijaghnur bahavo bahUn
6046008a zUlaiH pramathitAH ke cit ke cit tu paramAyudhaiH
6046008c parighair AhatAH ke cit ke cic chinnAH parazvadhaiH
6046009a nirucchvAsAH punaH ke cit patitA dharaNItale
6046009c vibhinnahRdayAH ke cid iSusaMtAnasaMditAH
6046010a ke cid dvidhAkRtAH khaDgaiH sphurantaH patitA bhuvi
6046010c vAnarA rAkSasaiH zUlaiH pArzvataz ca vidAritAH
6046011a vAnaraiz cApi saMkruddhai rAkSasaughAH samantataH
6046011c pAdapair girizRGgaiz ca saMpiSTA vasudhAtale
6046012a vajrasparzatalair hastair muSTibhiz ca hatA bhRzam
6046012c vemuH zoNitam Asyebhyo vizIrNadazanekSaNaH
6046013a ArtasvaraM ca svanatAM siMhanAdaM ca nardatAm
6046013c babhUva tumulaH zabdo harINAM rakSasAM yudhi
6046014a vAnarA rAkSasAH kruddhA vIramArgam anuvratAH
6046014c vivRttanayanAH krUrAz cakruH karmANy abhItavat
6046015a narAntakaH kumbhahanur mahAnAdaH samunnataH
6046015c ete prahastasacivAH sarve jaghnur vanaukasaH
6046016a teSAm ApatatAM zIghraM nighnatAM cApi vAnarAn
6046016c dvivido girizRGgeNa jaghAnaikaM narAntakam
6046017a durmukhaH punar utpATya kapiH sa vipuladrumam
6046017c rAkSasaM kSiprahastas tu samunnatam apothayat
6046018a jAmbavAMs tu susaMkruddhaH pragRhya mahatIM zilAm
6046018c pAtayAm Asa tejasvI mahAnAdasya vakSasi
6046019a atha kumbhahanus tatra tAreNAsAdya vIryavAn
6046019c vRkSeNAbhihato mUrdhni prANAMs tatyAja rAkSasaH
6046020a amRSyamANas tat karma prahasto ratham AsthitaH
6046020c cakAra kadanaM ghoraM dhanuSpANir vanaukasAm
6046021a Avarta iva saMjajJe ubhayoH senayos tadA
6046021c kSubhitasyAprameyasya sAgarasyeva nisvanaH
6046022a mahatA hi zaraugheNa prahasto yuddhakovidaH
6046022c ardayAm Asa saMkruddho vAnarAn paramAhave
6046023a vAnarANAM zarIrais tu rAkSasAnAM ca medinI
6046023c babhUva nicitA ghorA patitair iva parvataiH
6046024a sA mahIrudhiraugheNa pracchannA saMprakAzate
6046024c saMchannA mAdhave mAsi palAzair iva puSpitaiH
6046025a hatavIraughavaprAM tu bhagnAyudhamahAdrumAm
6046025c zoNitaughamahAtoyAM yamasAgaragAminIm
6046026a yakRtplIhamahApaGkAM vinikIrNAntrazaivalAm
6046026c bhinnakAyaziromInAm aGgAvayavazADvalAm
6046027a gRdhrahaMsagaNAkIrNAM kaGkasArasasevitAm
6046027c medhaHphenasamAkIrNAm ArtastanitanisvanAm
6046028a tAM kApuruSadustArAM yuddhabhUmimayIM nadIm
6046028c nadIm iva ghanApAye haMsasArasasevitAm
6046029a rAkSasAH kapimukhyAz ca terus tAM dustarAM nadIm
6046029c yathA padmarajodhvastAM nalinIM gajayUthapAH
6046030a tataH sRjantaM bANaughAn prahastaM syandane sthitam
6046030c dadarza tarasA nIlo vinighnantaM plavaMgamAn
6046031a sa taM paramadurdharSam ApatantaM mahAkapiH
6046031c prahastaM tADayAm Asa vRkSam utpATya vIryavAn
6046032a sa tenAbhihataH kruddho nadan rAkSasapuMgavaH
6046032c vavarSa zaravarSANi plavagAnAM camUpatau
6046033a apArayan vArayituM pratyagRhNAn nimIlitaH
6046033c yathaiva govRSo varSaM zAradaM zIghram Agatam
6046034a evam eva prahastasya zaravarSaM durAsadam
6046034c nimIlitAkSaH sahasA nIlaH sehe sudAruNam
6046035a roSitaH zaravarSeNa sAlena mahatA mahAn
6046035c prajaghAna hayAn nIlaH prahastasya manojavAn
6046036a vidhanus tu kRtas tena prahasto vAhinIpatiH
6046036c pragRhya musalaM ghoraM syandanAd avapupluve
6046037a tAv ubhau vAhinImukhyau jAtaroSau tarasvinau
6046037c sthitau kSatajadigdhAGgau prabhinnAv iva kuJjarau
6046038a ullikhantau sutIkSNAbhir daMSTrAbhir itaretaram
6046038c siMhazArdUlasadRzau siMhazArdUlaceSTitau
6046039a vikrAntavijayau vIrau samareSv anivartinau
6046039c kAGkSamANau yazaH prAptuM vRtravAsavayoH samau
6046040a AjaghAna tadA nIlaM lalATe musalena saH
6046040c prahastaH paramAyastas tasya susrAva zoNitam
6046041a tataH zoNitadigdhAGgaH pragRhya sumahAtarum
6046041c prahastasyorasi kruddho visasarja mahAkapiH
6046042a tam acintyaprahAraM sa pragRhya musalaM mahat
6046042c abhidudrAva balinaM balI nIlaM plavaMgamam
6046043a tam ugravegaM saMrabdham ApatantaM mahAkapiH
6046043c tataH saMprekSya jagrAha mahAvego mahAzilAm
6046044a tasya yuddhAbhikAmasya mRdhe musalayodhinaH
6046044c prahastasya zilAM nIlo mUrdhni tUrNam apAtayat
6046045a sA tena kapimukhyena vimuktA mahatI zilA
6046045c bibheda bahudhA ghorA prahastasya ziras tadA
6046046a sa gatAsur gatazrIko gatasattvo gatendriyaH
6046046c papAta sahasA bhUmau chinnamUla iva drumaH
6046047a vibhinnazirasas tasya bahu susrAvazoNitam
6046047c zarIrAd api susrAva gireH prasravaNaM yathA
6046048a hate prahaste nIlena tad akampyaM mahad balam
6046048c rakSasAm aprahRSTAnAM laGkAm abhijagAma ha
6046049a na zekuH samavasthAtuM nihate vAhinIpatau
6046049c setubandhaM samAsAdya vizIrNaM salilaM yathA
6046050a hate tasmiMz camUmukhye rAkSasas te nirudyamAH
6046050c rakSaHpatigRhaM gatvA dhyAnamUkatvam AgatAH
6046051a tatas tu nIlo vijayI mahAbalaH; prazasyamAnaH svakRtena karmaNA
6046051c sametya rAmeNa salakSmaNena; prahRSTarUpas tu babhUva yUthapaH
6047001a tasmin hate rAkSasasainyapAle; plavaMgamAnAm RSabheNa yuddhe
6047001c bhImAyudhaM sAgaratulyavegaM; pradudruve rAkSasarAjasainyam
6047002a gatvA tu rakSo'dhipateH zazaMsuH; senApatiM pAvakasUnuzastam
6047002c tac cApi teSAM vacanaM nizamya; rakSo'dhipaH krodhavazaM jagAma
6047003a saMkhye prahastaM nihataM nizamya; zokArditaH krodhaparItacetAH
6047003c uvAca tAn nairRtayodhamukhyAn; indro yathA cAmarayodhamukhyAn
6047004a nAvajJA ripave kAryA yair indrabalasUdanaH
6047004c sUditaH sainyapAlo me sAnuyAtraH sakuJjaraH
6047005a so 'haM ripuvinAzAya vijayAyAvicArayan
6047005c svayam eva gamiSyAmi raNazIrSaM tad adbhutam
6047006a adya tad vAnarAnIkaM rAmaM ca sahalakSmaNam
6047006c nirdahiSyAmi bANaughair vanaM dIptair ivAgnibhiH
6047007a sa evam uktvA jvalanaprakAzaM; rathaM turaMgottamarAjiyuktam
6047007c prakAzamAnaM vapuSA jvalantaM; samArurohAmararAjazatruH
6047008a sa zaGkhabherIpaTaha praNAdair; AsphoTitakSveDitasiMhanAdaiH
6047008c puNyaiH stavaiz cApy abhipUjyamAnas; tadA yayau rAkSasarAjamukhyaH
6047009a sa zailajImUtanikAza rUpair; mAMsAzanaiH pAvakadIptanetraiH
6047009c babhau vRto rAkSasarAjamukhyair; bhUtair vRto rudra ivAmarezaH
6047010a tato nagaryAH sahasA mahaujA; niSkramya tad vAnarasainyam ugram
6047010c mahArNavAbhrastanitaM dadarza; samudyataM pAdapazailahastam
6047011a tad rAkSasAnIkam atipracaNDam; Alokya rAmo bhujagendrabAhuH
6047011c vibhISaNaM zastrabhRtAM variSTham; uvAca senAnugataH pRthuzrIH
6047012a nAnApatAkAdhvajazastrajuSTaM; prAsAsizUlAyudhacakrajuSTam
6047012c sainyaM nagendropamanAgajuSTaM; kasyedam akSobhyam abhIrujuSTam
6047013a tatas tu rAmasya nizamya vAkyaM; vibhISaNaH zakrasamAnavIryaH
6047013c zazaMsa rAmasya balapravekaM; mahAtmanAM rAkSasapuMgavAnAm
6047014a yo 'sau gajaskandhagato mahAtmA; navoditArkopamatAmravaktraH
6047014c prakampayan nAgaziro 'bhyupaiti; hy akampanaM tv enam avehi rAjan
6047015a yo 'sau rathastho mRgarAjaketur; dhUnvan dhanuH zakradhanuHprakAzam
6047015c karIva bhAty ugravivRttadaMSTraH; sa indrajin nAma varapradhAnaH
6047016a yaz caiSa vindhyAstamahendrakalpo; dhanvI rathastho 'tiratho 'tivIryaH
6047016c visphArayaMz cApam atulyamAnaM; nAmnAtikAyo 'tivivRddhakAyaH
6047017a yo 'sau navArkoditatAmracakSur; Aruhya ghaNTAninadapraNAdam
6047017c gajaM kharaM garjati vai mahAtmA; mahodaro nAma sa eSa vIraH
6047018a yo 'sau hayaM kAJcanacitrabhANDam; Aruhya saMdhyAbhragiriprakAzam
6047018c prAsaM samudyamya marIcinaddhaM; pizAca eSAzanitulyavegaH
6047019a yaz caiSa zUlaM nizitaM pragRhya; vidyutprabhaM kiMkaravajravegam
6047019c vRSendram AsthAya giriprakAzam; AyAti so 'sau trizirA yazasvI
6047020a asau ca jImUtanikAza rUpaH; kumbhaH pRthuvyUDhasujAtavakSAH
6047020c samAhitaH pannagarAjaketur; visphArayan bhAti dhanur vidhUnvan
6047021a yaz caiSa jAmbUnadavajrajuSTaM; dIptaM sadhUmaM parighaM pragRhya
6047021c AyAti rakSobalaketubhUtaH; so 'sau nikumbho 'dbhutaghorakarmA
6047022a yaz caiSa cApAsizaraughajuSTaM; patAkinaM pAvakadIptarUpam
6047022c rathaM samAsthAya vibhAty udagro; narAntako 'sau nagazRGgayodhI
6047023a yaz caiSa nAnAvidhaghorarUpair; vyAghroSTranAgendramRgendravaktraiH
6047023c bhUtair vRto bhAti vivRttanetraiH; so 'sau surANAm api darpahantA
6047024a yatraitad indupratimaM vibhAtic; chattraM sitaM sUkSmazalAkam agryam
6047024c atraiSa rakSo'dhipatir mahAtmA; bhUtair vRto rudra ivAvabhAti
6047025a asau kirITI calakuNDalAsyo; nAgendravindhyopamabhImakAyaH
6047025c mahendravaivasvatadarpahantA; rakSo'dhipaH sUrya ivAvabhAti
6047026a pratyuvAca tato rAmo vibhISaNam ariMdamam
6047026c aho dIpto mahAtejA rAvaNo rAkSasezvaraH
6047027a Aditya iva duSprekSyo razmibhir bhAti rAvaNaH
6047027c suvyaktaM lakSaye hy asya rUpaM tejaHsamAvRtam
6047028a devadAnavavIrANAM vapur naivaMvidhaM bhavet
6047028c yAdRzaM rAkSasendrasya vapur etat prakAzate
6047029a sarve parvatasaMkAzAH sarve parvatayodhinaH
6047029c sarve dIptAyudhadharA yodhaz cAsya mahaujasaH
6047030a bhAti rAkSasarAjo 'sau pradIptair bhImavikramaiH
6047030c bhUtaiH parivRtas tIkSNair dehavadbhir ivAntakaH
6047031a evam uktvA tato rAmo dhanur AdAya vIryavAn
6047031c lakSmaNAnucaras tasthau samuddhRtya zarottamam
6047032a tataH sa rakSo'dhipatir mahAtmA; rakSAMsi tAny Aha mahAbalAni
6047032c dvAreSu caryAgRhagopureSu; sunirvRtAs tiSThata nirvizaGkAH
6047033a visarjayitvA sahasA tatas tAn; gateSu rakSaHsu yathAniyogam
6047033c vyadArayad vAnarasAgaraughaM; mahAjhaSaH pUrmam ivArNavaugham
6047034a tam ApatantaM sahasA samIkSya; dIpteSucApaM yudhi rAkSasendram
6047034c mahat samutpATya mahIdharAgraM; dudrAva rakSo'dhipatiM harIzaH
6047035a tac chailazRGgaM bahuvRkSasAnuM; pragRhya cikSepa nizAcarAya
6047035c tam ApatantaM sahasA samIkSya; bibheda bANais tapanIyapuGkhaiH
6047036a tasmin pravRddhottamasAnuvRkSe; zRGge vikIrNe patite pRthivyAm
6047036c mahAhikalpaM zaram antakAbhaM; samAdade rAkSasalokanAthaH
6047037a sa taM gRhItvAnilatulyavegaM; savisphuliGgajvalanaprakAzam
6047037c bANaM mahendrAzanitulyavegaM; cikSepa sugrIvavadhAya ruSTaH
6047038a sa sAyako rAvaNabAhumuktaH; zakrAzaniprakhyavapuH zitAgraH
6047038c sugrIvam AsAdya bibheda vegAd; guheritA kraucam ivograzaktiH
6047039a sa sAyakArto viparItacetAH; kUjan pRthivyAM nipapAta vIraH
6047039c taM prekSya bhUmau patitaM visaMjmaM; neduH prahRSTA yudhi yAtudhAnAH
6047040a tato gavAkSo gavayaH sudaMSTras; tatharSabho jyotimukho nalaz ca
6047040c zailAn samudyamya vivRddhakAyAH; pradudruvus taM prati rAkSasendram
6047041a teSAM prahArAn sa cakAra meghAn; rakSo'dhipo bANagaNaiH zitAgraiH
6047041c tAn vAnarendrAn api bANajAlair; bibheda jAmbUnadacitrapuGkhaiH
6047042a te vAnarendrAs tridazAribANair; bhinnA nipetur bhuvi bhImarUpAH
6047042c tatas tu tad vAnarasainyam ugraM; pracchAdayAm Asa sa bANajAlaiH
6047043a te vadhyamAnAH patitAgryavIrA; nAnadyamAnA bhayazalyaviddhAH
6047043c zAkhAmRgA rAvaNasAyakArtA; jagmuH zaraNyaM zaraNaM sma rAmam
6047044a tato mahAtmA sa dhanur dhanuSmAn; AdAya rAmaH saharA jagAma
6047044c taM lakSmaNaH prAJjalir abhyupetya; uvAca vAkyaM paramArthayuktam
6047045a kAmam AryaH suparyApto vadhAyAsya durAtmanaH
6047045c vidhamiSyAmy ahaM nIcam anujAnIhi mAM vibho
6047046a tam abravIn mahAtejA rAmaH satyaparAkramaH
6047046c gaccha yatnaparaz cApi bhava lakSmaNa saMyuge
6047047a rAvaNo hi mahAvIryo raNe 'dbhutaparAkramaH
6047047c trailokyenApi saMkruddho duSprasahyo na saMzayaH
6047048a tasya cchidrANi mArgasva svacchidrANi ca gopaya
6047048c cakSuSA dhanuSA yatnAd rakSAtmAnaM samAhitaH
6047049a rAghavasya vacaH zrutvA saMpariSvajya pUjya ca
6047049c abhivAdya tato rAmaM yayau saumitrir Ahavam
6047050a sa rAvaNaM vAraNahastabAhur; dadarza dIptodyatabhImacApam
6047050c pracchAdayantaM zaravRSTijAlais; tAn vAnarAn bhinnavikIrNadehAn
6047051a tam Alokya mahAtejA hanUmAn mArutAtmajA
6047051c nivArya zarajAlAni pradudrAva sa rAvaNam
6047052a rathaM tasya samAsAdya bhujam udyamya dakSiNam
6047052c trAsayan rAvaNaM dhImAn hanUmAn vAkyam abravIt
6047053a devadAnavagandharvA yakSAz ca saha rAkSasaiH
6047053c avadhyatvAt tvayA bhagnA vAnarebhyas tu te bhayam
6047054a eSa me dakSiNo bAhuH paJcazAkhaH samudyataH
6047054c vidhamiSyati te dehAd bhUtAtmAnaM ciroSitam
6047055a zrutvA hanUmato vAkyaM rAvaNo bhImavikramaH
6047055c saMraktanayanaH krodhAd idaM vacanam abravIt
6047056a kSipraM prahara niHzaGkaM sthirAM kIrtim avApnuhi
6047056c tatas tvAM jJAtivikrAntaM nAzayiSyAmi vAnara
6047057a rAvaNasya vacaH zrutvA vAyusUnur vaco 'bravIt
6047057c prahRtaM hi mayA pUrvam akSaM smara sutaM tava
6047058a evam ukto mahAtejA rAvaNo rAkSasezvaraH
6047058c AjaghAnAnilasutaM talenorasi vIryavAn
6047059a sa talAbhihatas tena cacAla ca muhur muhuH
6047059c AjaghAnAbhisaMkruddhas talenaivAmaradviSam
6047060a tatas talenAbhihato vAnareNa mahAtmanA
6047060c dazagrIvaH samAdhUto yathA bhUmicale 'calaH
6047061a saMgrAme taM tathA dRSTva rAvaNaM talatADitam
6047061c RSayo vAnarAH siddhA nedur devAH sahAsurAH
6047062a athAzvasya mahAtejA rAvaNo vAkyam abravIt
6047062c sAdhu vAnaravIryeNa zlAghanIyo 'si me ripuH
6047063a rAvaNenaivam uktas tu mArutir vAkyam abravIt
6047063c dhig astu mama vIryaM tu yat tvaM jIvasi rAvaNa
6047064a sakRt tu praharedAnIM durbuddhe kiM vikatthase
6047064c tatas tvAM mAmako muSTir nayiSyAmi yathAkSayam
6047064e tato mArutivAkyena krodhas tasya tadAjvalat
6047065a saMraktanayano yatnAn muSTim udyamya dakSiNam
6047065c pAtayAm Asa vegena vAnarorasi vIryavAn
6047065e hanUmAn vakSasi vyUdhe saMcacAla hataH punaH
6047066a vihvalaM taM tadA dRSTvA hanUmantaM mahAbalam
6047066c rathenAtirathaH zIghraM nIlaM prati samabhyagAt
6047067a pannagapratimair bhImaiH paramarmAtibhedibhiH
6047067c zarair AdIpayAm Asa nIlaM haricamUpatim
6047068a sa zaraughasamAyasto nIlaH kapicamUpatiH
6047068c kareNaikena zailAgraM rakSo'dhipataye 'sRjat
6047069a hanUmAn api tejasvI samAzvasto mahAmanAH
6047069c viprekSamANo yuddhepsuH saroSam idam abravIt
6047070a nIlena saha saMyuktaM rAvaNaM rAkSasezvaram
6047070c anyena yudhyamAnasya na yuktam abhidhAvanam
6047071a rAvaNo 'pi mahAtejAs tac chRGgaM saptabhiH zaraiH
6047071c AjaghAna sutIkSNAgrais tad vikIrNaM papAta ha
6047072a tad vikIrNaM gireH zRGgaM dRSTvA haricamUpatiH
6047072c kAlAgnir iva jajvAla krodhena paravIrahA
6047073a so 'zvakarNAn dhavAn sAlAMz cUtAMz cApi supuSpitAn
6047073c anyAMz ca vividhAn vRkSAn nIlaz cikSepa saMyuge
6047074a sa tAn vRkSAn samAsAdya praticiccheda rAvaNaH
6047074c abhyavarSat sughoreNa zaravarSeNa pAvakim
6047075a abhivRSTaH zaraugheNa megheneva mahAcalaH
6047075c hrasvaM kRtvA tadA rUpaM dhvajAgre nipapAta ha
6047076a pAvakAtmajam Alokya dhvajAgre samavasthitam
6047076c jajvAla rAvaNaH krodhAt tato nIlo nanAda ha
6047077a dhvajAgre dhanuSaz cAgre kirITAgre ca taM harim
6047077c lakSmaNo 'tha hanUmAMz ca dRSTvA rAmaz ca vismitAH
6047078a rAvaNo 'pi mahAtejAH kapilAghavavismitaH
6047078c astram AhArayAm Asa dIptam Agneyam adbhutam
6047079a tatas te cukruzur hRSTA labdhalakSyAH plavaMgamAH
6047079c nIlalAghavasaMbhrAntaM dRSTvA rAvaNam Ahave
6047080a vAnarANAM ca nAdena saMrabdho rAvaNas tadA
6047080c saMbhramAviSTahRdayo na kiM cit pratyapadyata
6047081a AgneyenAtha saMyuktaM gRhItvA rAvaNaH zaram
6047081c dhvajazIrSasthitaM nIlam udaikSata nizAcaraH
6047082a tato 'bravIn mahAtejA rAvaNo rAkSasezvaraH
6047082c kape lAghavayukto 'si mAyayA parayAnayA
6047083a jIvitaM khalu rakSasva yadi zaknoSi vAnara
6047083c tAni tAny AtmarUpANi sRjase tvam anekazaH
6047084a tathApi tvAM mayA muktaH sAyako 'straprayojitaH
6047084c jIvitaM parirakSantaM jIvitAd bhraMzayiSyati
6047085a evam uktvA mahAbAhU rAvaNo rAkSasezvaraH
6047085c saMdhAya bANam astreNa camUpatim atADayat
6047086a so 'strayuktena bANena nIlo vakSasi tADitaH
6047086c nirdahyamAnaH sahasA nipapAta mahItale
6047087a pitRmAhAtmya saMyogAd Atmanaz cApi tejasA
6047087c jAnubhyAm apatad bhUmau na ca prANair vyayujyata
6047088a visaMjJaM vAnaraM dRSTvA dazagrIvo raNotsukaH
6047088c rathenAmbudanAdena saumitrim abhidudruve
6047089a tam Aha saumitrir adInasattvo; visphArayantaM dhanur aprameyam
6047089c anvehi mAm eva nizAcarendra; na vAnarAMs tvaM prati yoddhum arhasi
6047090a sa tasya vAkyaM paripUrNaghoSaM; jyAzabdam ugraM ca nizamya rAjA
6047090c AsAdya saumitrim avasthitaM taM; kopAnvitaM vAkyam uvAca rakSaH
6047091a diSTyAsi me rAghava dRSTimArgaM; prApto 'ntagAmI viparItabuddhiH
6047091c asmin kSaNe yAsyasi mRtyudezaM; saMsAdyamAno mama bANajAlaiH
6047092a tam Aha saumitrir avismayAno; garjantam udvRttasitAgradaMSTram
6047092c rAjan na garjanti mahAprabhAvA; vikatthase pApakRtAM variSTha
6047093a jAnAmi vIryaM tava rAkSasendra; balaM pratApaM ca parAkramaM ca
6047093c avasthito 'haM zaracApapANir; Agaccha kiM moghavikatthanena
6047094a sa evam uktaH kupitaH sasarja; rakSo'dhipaH saptazarAn supuGkhAn
6047094c tA&l lakSmaNaH kAJcanacitrapuGkhaiz; ciccheda bANair nizitAgradhAraiH
6047095a tAn prekSamANaH sahasA nikRttAn; nikRttabhogAn iva pannagendrAn
6047095c laGkezvaraH krodhavazaM jagAma; sasarja cAnyAn nizitAn pRSatkAn
6047096a sa bANavarSaM tu vavarSa tIvraM; rAmAnujaH kArmukasaMprayuktam
6047096c kSurArdhacandrottamakarNibhallaiH; zarAMz ca ciccheda na cukSubhe ca
6047097a sa lakSmaNaz cAzu zarAJ zitAgrAn; mahendravajrAzanitulyavegAn
6047097c saMdhAya cApe jvalanaprakAzAn; sasarja rakSo'dhipater vadhAya
6047098a sa tAn praciccheda hi rAkSasendraz; chittvA ca tA&l lakSmaNam AjaghAna
6047098c zareNa kAlAgnisamaprabheNa; svayambhudattena lalATadeze
6047099a sa lakSmaNo rAvaNasAyakArtaz; cacAla cApaM zithilaM pragRhya
6047099c punaz ca saMjJAM pratilabhya kRcchrAc; ciccheda cApaM tridazendrazatroH
6047100a nikRttacApaM tribhir AjaghAna; bANais tadA dAzarathiH zitAgraiH
6047100c sa sAyakArto vicacAla rAjA; kRcchrAc ca saMjJAM punar AsasAda
6047101a sa kRttacApaH zaratADitaz ca; svedArdragAtro rudhirAvasiktaH
6047101c jagrAha zaktiM samudagrazaktiH; svayambhudattAM yudhi devazatruH
6047102a sa tAM vidhUmAnalasaMnikAzAM; vitrAsanIM vAnaravAhinInAm
6047102c cikSepa zaktiM tarasA jvalantIM; saumitraye rAkSasarASTranAthaH
6047103a tAm ApatantIM bharatAnujo 'strair; jaghAna bANaiz ca hutAgnikalpaiH
6047103c tathApi sA tasya viveza zaktir; bhujAntaraM dAzarather vizAlam
6047104a zaktyA brAmyA tu saumitris tADitas tu stanAntare
6047104c viSNor acintyaM svaM bhAgam AtmAnaM pratyanusmarat
6047105a tato dAnavadarpaghnaM saumitriM devakaNTakaH
6047105c taM pIDayitvA bAhubhyAm aprabhur laGghane 'bhavat
6047106a himavAn mandaro merus trailokyaM vA sahAmaraiH
6047106c zakyaM bhujAbhyAm uddhartuM na saMkhye bharatAnujaH
6047107a athainaM vaiSNavaM bhAgaM mAnuSaM deham Asthitam
6047107c visaMjJaM lakSmaNaM dRSTvA rAvaNo vismito 'bhavat
6047108a atha vAyusutaH kruddho rAvaNaM samabhidravat
6047108c AjaghAnorasi kruddho vajrakalpena muSTinA
6047109a tena muSTiprahAreNa rAvaNo rAkSasezvaraH
6047109c jAnubhyAm apatad bhUmau cacAla ca papAta ca
6047110a visaMjJaM rAvaNaM dRSTvA samare bhImavikramam
6047110c RSayo vAnarAz caiva nedur devAH savAsavAH
6047111a hanUmAn api tejasvI lakSmaNaM rAvaNArditam
6047111c anayad rAghavAbhyAzaM bAhubhyAM parigRhya tam
6047112a vAyusUnoH suhRttvena bhaktyA paramayA ca saH
6047112c zatrUNAm aprakampyo 'pi laghutvam agamat kapeH
6047113a taM samutsRjya sA zaktiH saumitriM yudhi durjayam
6047113c rAvaNasya rathe tasmin sthAnaM punar upAgamat
6047114a rAvaNo 'pi mahAtejAH prApya saMjJAM mahAhave
6047114c Adade nizitAn bANAJ jagrAha ca mahad dhanuH
6047115a Azvastaz ca vizalyaz ca lakSmaNaH zatrusUdanaH
6047115c viSNor bhAgam amImAMsyam AtmAnaM pratyanusmaran
6047116a nipAtitamahAvIrAM vAnarANAM mahAcamUm
6047116c rAghavas tu raNe dRSTvA rAvaNaM samabhidravat
6047117a athainam upasaMgamya hanUmAn vAkyam abravIt
6047117c mama pRSThaM samAruhya rakSasaM zAstum arhasi
6047118a tac chrutvA rAghavo vAkyaM vAyuputreNa bhASitam
6047118c Arohat sahasA zUro hanUmantaM mahAkapim
6047118e rathasthaM rAvaNaM saMkhye dadarza manujAdhipaH
6047119a tam Alokya mahAtejAH pradudrAva sa rAghavaH
6047119c vairocanam iva kruddho viSNur abhyudyatAyudhaH
6047120a jyAzabdam akarot tIvraM vajraniSpeSanisvanam
6047120c girA gambhIrayA rAmo rAkSasendram uvAca ha
6047121a tiSTha tiSTha mama tvaM hi kRtvA vipriyam IdRzam
6047121c kva nu rAkSasazArdUla gato mokSam avApsyasi
6047122a yadIndravaivasvata bhAskarAn vA; svayambhuvaizvAnarazaMkarAn vA
6047122c gamiSyasi tvaM daza vA dizo vA; tathApi me nAdya gato vimokSyase
6047123a yaz caiSa zaktyAbhihatas tvayAdya; icchan viSAdaM sahasAbhyupetaH
6047123c sa eSa rakSogaNarAja mRtyuH; saputradArasya tavAdya yuddhe
6047124a rAghavasya vacaH zrutvA rAkSasendro mahAkapim
6047124c AjaghAna zarais tIkSNaiH kAlAnalazikhopamaiH
6047125a rAkSasenAhave tasya tADitasyApi sAyakaiH
6047125c svabhAvatejoyuktasya bhUyas tejo vyavardhata
6047126a tato rAmo mahAtejA rAvaNena kRtavraNam
6047126c dRSTvA plavagazArdUlaM krodhasya vazam eyivAn
6047127a tasyAbhisaMkramya rathaM sacakraM; sAzvadhvajacchatramahApatAkam
6047127c sasArathiM sAzanizUlakhaDgaM; rAmaH praciccheda zaraiH supuGkhaiH
6047128a athendrazatruM tarasA jaghAna; bANena vajrAzanisaMnibhena
6047128c bhujAntare vyUDhasujAtarUpe; vajreNa meruM bhagavAn ivendraH
6047129a yo vajrapAtAzanisaMnipAtAn; na cukSubhe nApi cacAla rAjA
6047129c sa rAmabANAbhihato bhRzArtaz; cacAla cApaM ca mumoca vIraH
6047130a taM vihvalantaM prasamIkSya rAmaH; samAdade dIptam athArdhacandram
6047130c tenArkavarNaM sahasA kirITaM; ciccheda rakSo'dhipater mahAtmAH
6047131a taM nirviSAzIviSasaMnikAzaM; zAntArciSaM sUryam ivAprakAzam
6047131c gatazriyaM kRttakirITakUTam; uvAca rAmo yudhi rAkSasendram
6047132a kRtaM tvayA karma mahat subhImaM; hatapravIraz ca kRtas tvayAham
6047132c tasmAt parizrAnta iti vyavasya; na tvaM zarair mRtyuvazaM nayAmi
6047133a sa evam ukto hatadarpaharSo; nikRttacApaH sa hatAzvasUtaH
6047133c zarArditaH kRttamahAkirITo; viveza laGkAM sahasA sma rAjA
6047134a tasmin praviSTe rajanIcarendre; mahAbale dAnavadevazatrau
6047134c harIn vizalyAn sahalakSmaNena; cakAra rAmaH paramAhavAgre
6047135a tasmin prabhagne tridazendrazatrau; surAsurA bhUtagaNA dizaz ca
6047135c sasAgarAH sarSimahoragAz ca; tathaiva bhUmyambucarAz ca hRSTAH
6048001a sa pravizya purIM laGkAM rAmabANabhayArditaH
6048001c bhagnadarpas tadA rAjA babhUva vyathitendriyaH
6048002a mAtaMga iva siMhena garuDeneva pannagaH
6048002c abhibhUto 'bhavad rAjA rAghaveNa mahAtmanA
6048003a brahmadaNDaprakAzAnAM vidyutsadRzavarcasAm
6048003c smaran rAghavabANAnAM vivyathe rAkSasezvaraH
6048004a sa kAJcanamayaM divyam Azritya paramAsanam
6048004c vikprekSamANo rakSAMsi rAvaNo vAkyam abravIt
6048005a sarvaM tat khalu me moghaM yat taptaM paramaM tapaH
6048005c yat samAno mahendreNa mAnuSeNAsmi nirjitaH
6048006a idaM tad brahmaNo ghoraM vAkyaM mAm abhyupasthitam
6048006c mAnuSebhyo vijAnIhi bhayaM tvam iti tat tathA
6048007a devadAnavagandharvair yakSarAkSasapannagaiH
6048007c avadhyatvaM mayA prAptaM mAnuSebhyo na yAcitam
6048008a etad evAbhyupAgamya yatnaM kartum ihArhatha
6048008c rAkSasAz cApi tiSThantu caryAgopuramUrdhasu
6048009a sa cApratimagambhIro devadAnavadarpahA
6048009c brahmazApAbhibhUtas tu kumbhakarNo vibodhyatAm
6048010a sa parAjitam AtmAnaM prahastaM ca niSUditam
6048010c jJAtvA rakSobalaM bhImam Adideza mahAbalaH
6048011a dvAreSu yatnaH kriyatAM prAkArAz cAdhiruhyatAm
6048011c nidrAvazasamAviSTaH kumbhakarNo vibodhyatAm
6048012a nava SaT sapta cASTau ca mAsAn svapiti rAkSasaH
6048012c taM tu bodhayata kSipraM kumbhakarNaM mahAbalam
6048013a sa hi saMkhye mahAbAhuH kakudaM sarvarakSasAm
6048013c vAnarAn rAjaputrau ca kSipram eva vadhiSyati
6048014a kumbhakarNaH sadA zete mUDho grAmyasukhe rataH
6048014c rAmeNAbhinirastasya saMgrAmo 'smin sudAruNe
6048015a bhaviSyati na me zokaH kumbhakarNe vibodhite
6048015c kiM kariSyAmy ahaM tena zakratulyabalena hi
6048016a IdRze vyasane prApte yo na sAhyAya kalpate
6048016c te tu tad vacanaM zrutvA rAkSasendrasya rAkSasAH
6048017a jagmuH paramasaMbhrAntAH kumbhakarNanivezanam
6048017c te rAvaNasamAdiSTA mAMsazoNitabhojanAH
6048018a gandhamAlyAMs tathA bhakSyAn AdAya sahasA yayuH
6048018c tAM pravizya mahAdvArAM sarvato yojanAyatAm
6048019a kumbhakarNaguhAM ramyAM sarvagandhapravAhinIm
6048019c pratiSThamAnAH kRcchreNa yatnAt pravivizur guhAm
6048020a tAM pravizya guhAM ramyAM zubhAM kAJcanakuTTimAm
6048020c dadRzur nairRtavyAghraM zayAnaM bhImadarzanam
6048021a te tu taM vikRtaM suptaM vikIrNam iva parvatam
6048021c kumbhakarNaM mahAnidraM sahitAH pratyabodhayan
6048022a UrdhvaromAJcitatanuM zvasantam iva pannagam
6048022c trAsayantaM mahAzvAsaiH zayAnaM bhImadarzanam
6048023a bhImanAsApuTaM taM tu pAtAlavipulAnanam
6048023c dadRzur nairRtavyAghraM kumbhakarNaM mahAbalam
6048024a tataz cakrur mahAtmAnaH kumbhakarNAgratas tadA
6048024c mAMsAnAM merusaMkAzaM rAziM paramatarpaNam
6048025a mRgANAM mahiSANAM ca varAhANAM ca saMcayAn
6048025c cakrur nairRtazArdUlA rAzimann asya cAdbhutam
6048026a tataH zoNitakumbhAMz ca madyAni vividhAni ca
6048026c purastAt kumbhakarNasya cakrus tridazazatravaH
6048027a lilipuz ca parArdhyena candanena paraMtapam
6048027c divyair AcchAdayAm Asur mAlyair gandhaiH sugandhibhiH
6048028a dhUpaM sugandhaM sasRjus tuSTuvuz ca paraMtapam
6048028c jaladA iva conedur yAtudhAnAH sahasrazaH
6048029a zaGkhAn ApUrayAm AsuH zazAGkasadRzaprabhAn
6048029c tumulaM yugapac cApi vineduz cApy amarSitAH
6048030a nedur AsphoTayAm Asuz cikSipus te nizAcarAH
6048030c kumbhakarNavibodhArthaM cakrus te vipulaM svanam
6048031a sazaGkhabherIpaTahapraNAdam; AsphoTitakSveDitasiMhanAdam
6048031c dizo dravantas tridivaM kirantaH; zrutvA vihaMgAH sahasA nipetuH
6048032a yadA bhRzaM tair ninadair mahAtmA; na kumbhakarNo bubudhe prasuptaH
6048032c tato musuNDImusalAni sarve; rakSogaNAs te jagRhur gadAz ca
6048033a taM zailazRGgair musalair gadAbhir; vRkSais talair mudgaramuSTibhiz ca
6048033c sukhaprasuptaM bhuvi kumbhakarNaM; rakSAMsy udagrANi tadA nijaghnuH
6048034a tasya nizvAsavAtena kumbhakarNasya rakSasaH
6048034c rAkSasA balavanto 'pi sthAtuM nAzaknuvan puraH
6048035a tato 'sya purato gADhaM rAkSasA bhImavikramAH
6048035c mRdaGgapaNavAn bherIH zaGkhakumbhagaNAMs tathA
6048035e dazarAkSasasAhasraM yugapat paryavAdayan
6048036a nIlAJjanacayAkAraM te tu taM pratyabodhayan
6048036c abhighnanto nadantaz ca naiva saMvivide tu saH
6048037a yadA cainaM na zekus te pratibodhayituM tadA
6048037c tato gurutaraM yatnaM dAruNaM samupAkraman
6048038a azvAn uSTrAn kharAn nAgAJ jaghnur daNDakazAGkuzaiH
6048038c bherIzaGkhamRdaGgAMz ca sarvaprANair avAdayan
6048039a nijaghnuz cAsya gAtrANi mahAkASThakaTaM karaiH
6048039c mudgarair musalaiz caiva sarvaprANasamudyataiH
6048040a tena zabdena mahatA laGkA samabhipUritA
6048040c saparvatavanA sarvA so 'pi naiva prabudhyate
6048041a tataH sahasraM bherINAM yugapat samahanyata
6048041c mRSTakAJcanakoNAnAm asaktAnAM samantataH
6048042a evam apy atinidras tu yadA naiva prabudhyata
6048042c zApasya vazam Apannas tataH kruddhA nizAcarAH
6048043a mahAkrodhasamAviSTAH sarve bhImaparAkramAH
6048043c tad rakSobodhayiSyantaz cakrur anye parAkramam
6048044a anye bherIH samAjaghnur anye cakrur mahAsvanam
6048044c kezAn anye pralulupuH karNAv anye dazanti ca
6048044e na kumbhakarNaH paspande mahAnidrAvazaM gataH
6048045a anye ca balinas tasya kUTamudgarapANayaH
6048045c mUrdhni vakSasi gAtreSu pAtayan kUTamudgarAn
6048046a rajjubandhanabaddhAbhiH zataghnIbhiz ca sarvataH
6048046c vadhyamAno mahAkAyo na prAbudhyata rAkSasaH
6048047a vAraNAnAM sahasraM tu zarIre 'sya pradhAvitam
6048047c kumbhakarNas tato buddhaH sparzaM param abudhyata
6048048a sa pAtyamAnair girizRGgavRkSair; acintayaMs tAn vipulAn prahArAn
6048048c nidrAkSayAt kSudbhayapIDitaz ca; vijRmbhamANaH sahasotpapAta
6048049a sa nAgabhogAcalazRGgakalpau; vikSipya bAhU girizRGgasArau
6048049c vivRtya vaktraM vaDavAmukhAbhaM; nizAcaro 'sau vikRtaM jajRmbhe
6048050a tasya jAjRmbhamANasya vaktraM pAtAlasaMnibham
6048050c dadRze meruzRGgAgre divAkara ivoditaH
6048051a vijRmbhamANo 'tibalaH pratibuddho nizAcaraH
6048051c nizvAsaz cAsya saMjajJe parvatAd iva mArutaH
6048052a rUpam uttiSThatas tasya kumbhakarNasya tad babhau
6048052c tapAnte sabalAkasya meghasyeva vivarSataH
6048053a tasya dIptAgnisadRze vidyutsadRzavarcasI
6048053c dadRzAte mahAnetre dIptAv iva mahAgrahau
6048054a Adad bubhukSito mAMsaM zoNitaM tRSito 'pibat
6048054c medaH kumbhaM ca madyaM ca papau zakraripus tadA
6048055a tatas tRpta iti jJAtvA samutpetur nizAcarAH
6048055c zirobhiz ca praNamyainaM sarvataH paryavArayan
6048056a sa sarvAn sAntvayAm Asa nairRtAn nairRtarSabhaH
6048056c bodhanAd vismitaz cApi rAkSasAn idam abravIt
6048057a kimartham aham Ahatya bhavadbhiH pratibodhitaH
6048057c kaccit sukuzalaM rAjJo bhayaM vA neha kiM cana
6048058a atha vA dhruvam anyebhyo bhayaM param upasthitam
6048058c yadartham eva tvaritair bhavadbhiH pratibodhitaH
6048059a adya rAkSasarAjasya bhayam utpATayAmy aham
6048059c pAtayiSye mahendraM vA zAtayiSye tathAnalam
6048060a na hy alpakAraNe suptaM bodhayiSyati mAM bhRzam
6048060c tad AkhyAtArthatattvena matprabodhanakAraNam
6048061a evaM bruvANaM saMrabdhaM kumbhakarNam ariMdamam
6048061c yUpAkSaH sacivo rAjJaH kRtAJjalir uvAca ha
6048062a na no devakRtaM kiM cid bhayam asti kadA cana
6048062c na daityadAnavebhyo vA bhayam asti hi tAdRzam
6048062e yAdRzaM mAnuSaM rAjan bhayam asmAn upasthitam
6048063a vAnaraiH parvatAkArair laGkeyaM parivAritA
6048063c sItAharaNasaMtaptAd rAmAn nas tumulaM bhayam
6048064a ekena vAnareNeyaM pUrvaM dagdhA mahApurI
6048064c kumAro nihataz cAkSaH sAnuyAtraH sakuJjaraH
6048065a svayaM rakSo'dhipaz cApi paulastyo devakaNTakaH
6048065c mRteti saMyuge muktArAmeNAdityatejasA
6048066a yan na devaiH kRto rAjA nApi daityair na dAnavaiH
6048066c kRtaH sa iha rAmeNa vimuktaH prANasaMzayAt
6048067a sa yUpAkSavacaH zrutvA bhrAtur yudhi parAjayam
6048067c kumbhakarNo vivRttAkSo yUpAkSam idam abravIt
6048068a sarvam adyaiva yUpAkSa harisainyaM salakSmaNam
6048068c rAghavaM ca raNe hatvA pazcAd drakSyAmi rAvaNam
6048069a rAkSasAMs tarpayiSyAmi harINAM mAMsazoNitaiH
6048069c rAmalakSmaNayoz cApi svayaM pAsyAmi zoNitam
6048070a tat tasya vAkyaM bruvato nizamya; sagarvitaM roSavivRddhadoSam
6048070c mahodaro nairRtayodhamukhyaH; kRtAJjalir vAkyam idaM babhASe
6048071a rAvaNasya vacaH zrutvA guNadoSu vimRzya ca
6048071c pazcAd api mahAbAho zatrUn yudhi vijeSyasi
6048072a mahodaravacaH zrutvA rAkSasaiH parivAritaH
6048072c kumbhakarNo mahAtejAH saMpratasthe mahAbalaH
6048073a taM samutthApya bhImAkSaM bhImarUpaparAkramam
6048073c rAkSasAs tvaritA jagmur dazagrIvanivezanam
6048074a tato gatvA dazagrIvam AsInaM paramAsane
6048074c Ucur baddhAJjalipuTAH sarva eva nizAcarAH
6048075a prabuddhaH kumbhakarNo 'sau bhrAtA te rAkSasarSabha
6048075c kathaM tatraiva niryAtu drakSyase tam ihAgatam
6048076a rAvaNas tv abravId dhRSTo yathAnyAyaM ca pUjitam
6048076c draSTum enam ihecchAmi yathAnyAyaM ca pUjitam
6048077a tathety uktvA tu te sarve punar Agamya rAkSasAH
6048077c kumbhakarNam idaM vAkyam UcU rAvaNacoditAH
6048078a draSTuM tvAM kAGkSate rAjA sarvarAkSasapuMgavaH
6048078c gamane kriyatAM buddhir bhrAtaraM saMpraharSaya
6048079a kumbhakarNas tu durdharSo bhrAtur AjJAya zAsanam
6048079c tathety uktvA mahAvIryaH zayanAd utpapAta ha
6048080a prakSAlya vadanaM hRSTaH snAtaH paramabhUSitaH
6048080c pipAsus tvarayAm Asa pAnaM balasamIraNam
6048081a tatas te tvaritAs tasya rAjSasA rAvaNAjJayA
6048081c madyaM bhakSyAMz ca vividhAn kSipram evopahArayan
6048082a pItvA ghaTasahasraM sa gamanAyopacakrame
6048083a ISatsamutkaTo mattas tejobalasamanvitaH
6048083c kumbhakarNo babhau hRSTaH kAlAntakayamopamaH
6048084a bhrAtuH sa bhavanaM gacchan rakSobalasamanvitaH
6048084c kumbhakarNaH padanyAsair akampayata medinIm
6048085a sa rAjamArgaM vapuSA prakAzayan; sahasrarazmir dharaNIm ivAMzubhiH
6048085c jagAma tatrAJjalimAlayA vRtaH; zatakratur geham iva svayambhuvaH
6048086a ke cic charaNyaM zaraNaM sma rAmaM; vrajanti ke cid vyathitAH patanti
6048086c ke cid dizaH sma vyathitAH prayAnti; ke cid bhayArtA bhuvi zerate sma
6048087a tam adrizRGgapratimaM kirITinaM; spRzantam Adityam ivAtmatejasA
6048087c vanaukasaH prekSya vivRddham adbhutaM; bhayArditA dudruvire tatas tataH
6049001a tato rAmo mahAtejA dhanur AdAya vIryavAn
6049001c kirITinaM mahAkAyaM kumbhakarNaM dadarza ha
6049002a taM dRSTvA rAkSasazreSThaM parvatAkAradarzanam
6049002c kramamANam ivAkAzaM purA nArAyaNaM prabhum
6049003a satoyAmbudasaMkAzaM kAJcanAGgadabhUSaNam
6049003c dRSTvA punaH pradudrAva vAnarANAM mahAcamUH
6049004a vidrutAM vAhinIM dRSTvA vardhamAnaM ca rAkSasaM
6049004c savismayam idaM rAmo vibhISaNam uvAca ha
6049005a ko 'sau parvatasaMkazaH kirITI harilocanaH
6049005c laGkAyAM dRzyate vIraH savidyud iva toyadaH
6049006a pRthivyAH ketubhUto 'sau mahAn eko 'tra dRzyate
6049006c yaM dRSTvA vAnarAH sarve vidravanti tatas tataH
6049007a AcakSva me mahAn ko 'sau rakSo vA yadi vAsuraH
6049007c na mayaivaMvidhaM bhUtaM dRSTapUrvaM kadA cana
6049008a sa pRSTo rAjaputreNa rAmeNAkliSTakAriNA
6049008c vibhISaNo mahAprAjJaH kAkutstham idam abravIt
6049009a yena vaivasvato yuddhe vAsavaz ca parAjitaH
6049009c saiSa vizravasaH putraH kumbhakarNaH pratApavAn
6049010a etena devA yudhi dAnavAz ca; yakSA bhujaMgAH pizitAzanAz ca
6049010c gandharvavidyAdharakiMnarAz ca; sahasrazo rAghava saMprabhagnAH
6049011a zUlapANiM virUpAkSaM kumbhakarNaM mahAbalam
6049011c hantuM na zekus tridazAH kAlo 'yam iti mohitAH
6049012a prakRtyA hy eSa tejasvI kumbhakarNo mahAbalaH
6049012c anyeSAM rAkSasendrANAM varadAnakRtaM balam
6049013a etena jAtamAtreNa kSudhArtena mahAtmanA
6049013c bhakSitAni sahasrANi sattvAnAM subahUny api
6049014a teSu saMbhakSyamANeSu prajA bhayanipIDitAH
6049014c yAnti sma zaraNaM zakraM tam apy arthaM nyavedayan
6049015a sa kumbhakarNaM kupito mahendro; jaghAna vajreNa zitena vajrI
6049015c sa zakravajrAbhihato mahAtmA; cacAla kopAc ca bhRzaM nanAda
6049016a tasya nAnadyamAnasya kumbhakarNasya dhImataH
6049016c zrutvA ninAdaM vitrastA bhUyo bhUmir vitatrase
6049017a tataH kopAn mahendrasya kumbhakarNo mahAbalaH
6049017c vikRSyairAvatAd dantaM jaghAnorasi vAsavam
6049018a kumbhakarNaprahArArto vicacAla sa vAsavaH
6049018c tato viSeduH sahasA devabrahmarSidAnavAH
6049019a prajAbhiH saha zakraz ca yayau sthAnaM svayambhuvaH
6049019c kumbhakarNasya daurAtmyaM zazaMsus te prajApateH
6049019e prajAnAM bhakSaNaM cApi devAnAM cApi dharSaNam
6049020a evaM prajA yadi tv eSa bhakSayiSyati nityazaH
6049020c acireNaiva kAlena zUnyo loko bhaviSyati
6049021a vAsavasya vacaH zrutvA sarvalokapitAmahaH
6049021c rakSAMsy AvAhayAm Asa kumbhakarNaM dadarza ha
6049022a kumbhakarNaM samIkSyaiva vitatrAsa prajApatiH
6049022c dRSTvA nizvasya caivedaM svayambhUr idam abravIt
6049023a dhruvaM lokavinAzAya paurastyenAsi nirmitaH
6049023c tasmAt tvam adya prabhRti mRtakalpaH zayiSyasi
6049023e brahmazApAbhibhUto 'tha nipapAtAgrataH prabhoH
6049024a tataH paramasaMbhrAnto rAvaNo vAkyam abravIt
6049024c vivRddhaH kAJcano vRkSaH phalakAle nikRtyate
6049025a na naptAraM svakaM nyAyyaM zaptum evaM prajApate
6049025c na mithyAvacanaz ca tvaM svapsyaty eSa na saMzayaH
6049025e kAlas tu kriyatAm asya zayane jAgare tathA
6049026a rAvaNasya vacaH zrutvA svayambhUr idam abravIt
6049026c zayitA hy eSa SaN mAsAn ekAhaM jAgariSyati
6049027a ekenAhnA tv asau vIraz caran bhUmiM bubhukSitaH
6049027c vyAttAsyo bhakSayel lokAn saMkruddha iva pAvakaH
6049028a so 'sau vyasanam ApannaH kumbhakarNam abodhayat
6049028c tvatparAkramabhItaz ca rAjA saMprati rAvaNaH
6049029a sa eSa nirgato vIraH zibirAd bhImavikramaH
6049029c vAnarAn bhRzasaMkruddho bhakSayan paridhAvati
6049030a kumbhakarNaM samIkSyaiva harayo vipradudruvuH
6049030c katham enaM raNe kruddhaM vArayiSyanti vAnarAH
6049031a ucyantAM vAnarAH sarve yantram etat samucchritam
6049031c iti vijJAya harayo bhaviSyantIha nirbhayAH
6049032a vibhISaNavacaH zrutvA hetumat sumukhodgatam
6049032c uvAca rAghavo vAkyaM nIlaM senApatiM tadA
6049033a gaccha sainyAni sarvANi vyUhya tiSThasva pAvake
6049033c dvArANy AdAya laGkAyAz caryAz cApy atha saMkramAn
6049034a zailazRGgANi vRkSAMz ca zilAz cApy upasaMharan
6049034c tiSThantu vAnarAH sarve sAyudhAH zailapANayaH
6049035a rAghaveNa samAdiSTo nIlo haricamUpatiH
6049035c zazAsa vAnarAnIkaM yathAvat kapikuJjaraH
6049036a tato gavAkSaH zarabho hanumAn aGgado nalaH
6049036c zailazRGgANi zailAbhA gRhItvA dvAram abhyayuH
6049037a tato harINAM tad anIkam ugraM; rarAja zailodyatavRkSahastam
6049037c gireH samIpAnugataM yathaiva; mahan mahAmbhodharajAlam ugram
6050001a sa tu rAkSasazArdUlo nidrAmadasamAkulaH
6050001c rAjamArgaM zriyA juSTaM yayau vipulavikramaH
6050002a rAkSasAnAM sahasraiz ca vRtaH paramadurjayaH
6050002c gRhebhyaH puSpavarSeNa kAryamANas tadA yayau
6050003a sa hemajAlavitataM bhAnubhAsvaradarzanam
6050003c dadarza vipulaM ramyaM rAkSasendranivezanam
6050004a sa tat tadA sUrya ivAbhrajAlaM; pravizya rakSo'dhipater nivezanam
6050004c dadarza dUre 'grajam AsanasthaM; svayambhuvaM zakra ivAsanastham
6050005a so 'bhigamya gRhaM bhrAtuH kakSyAm abhivigAhya ca
6050005c dadarzodvignam AsInaM vimAne puSpake gurum
6050006a atha dRSTvA dazagrIvaH kumbhakarNam upasthitam
6050006c tUrNam utthAya saMhRSTaH saMnikarSam upAnayat
6050007a athAsInasya paryaGke kumbhakarNo mahAbalaH
6050007c bhrAtur vavande caraNAM kiM kRtyam iti cAbravIt
6050007e utpatya cainaM mudito rAvaNaH pariSasvaje
6050008a sa bhrAtrA saMpariSvakto yathAvac cAbhinanditaH
6050008c kumbhakarNaH zubhaM divyaM pratipede varAsanam
6050009a sa tadAsanam Azritya kumbhakarNo mahAbalaH
6050009c saMraktanayanaH kopAd rAvaNaM vAkyam abravIt
6050010a kimartham aham AdRtya tvayA rAjan prabodhitaH
6050010c zaMsa kasmAd bhayaM te 'sti ko 'dya preto bhaviSyati
6050011a bhrAtaraM rAvaNaH kruddhaM kumbhakarNam avasthitam
6050011c ISat tu parivRttAbhyAM netrAbhyAM vAkyam abravIt
6050012a adya te sumahAn kAlaH zayAnasya mahAbala
6050012c sukhitas tvaM na jAnISe mama rAmakRtaM bhayam
6050013a eSa dAzarathI rAmaH sugrIvasahito balI
6050013c samudraM sabalas tIrtvA mUlaM naH parikRntati
6050014a hanta pazyasva laGkAyA vanAny upavanAni ca
6050014c setunA sukham Agamya vAnaraikArNavaM kRtam
6050015a ye rAkSasA mukhyatamA hatAs te vAnarair yudhi
6050015c vAnarANAM kSayaM yuddhe na pazyAmi kadA cana
6050016a sarvakSapitakozaM ca sa tvam abhyavapadya mAm
6050016c trAyasvemAM purIM laGkAM bAlavRddhAvazeSitAm
6050017a bhrAtur arthe mahAbAho kuru karma suduSkaram
6050017c mayaivaM noktapUrvo hi kaz cid bhrAtaH paraMtapa
6050017e tvayy asti mama ca snehaH parA saMbhAvanA ca me
6050018a devAsuravimardeSu bahuzo rAkSasarSabha
6050018c tvayA devAH prativyUhya nirjitAz cAsurA yudhi
6050018e na hi te sarvabhUteSu dRzyate sadRzo balI
6050019a kuruSva me priyahitam etad uttamaM; yathApriyaM priyaraNabAndhavapriya
6050019c svatejasA vidhama sapatnavAhinIM; zaradghanaM pavana ivodyato mahAn
6051001a tasya rAkSasarAjasya nizamya paridevitam
6051001c kumbhakarNo babhASe 'tha vacanaM prajahAsa ca
6051002a dRSTo doSo hi yo 'smAbhiH purA mantravinirNaye
6051002c hiteSv anabhiyuktena so 'yam AsAditas tvayA
6051003a zIghraM khalv abhyupetaM tvAM phalaM pApasya karmaNaH
6051003c nirayeSv eva patanaM yathA duSkRtakarmaNaH
6051004a prathamaM vai mahArAja kRtyam etad acintitam
6051004c kevalaM vIryadarpeNa nAnubandho vicAritaH
6051005a yaH pazcAt pUrvakAryANi kuryAd aizvaryam AsthitaH
6051005c pUrvaM cottarakAryANi na sa veda nayAnayau
6051006a dezakAlavihInAni karmANi viparItavat
6051006c kriyamANAni duSyanti havIMSy aprayateSv iva
6051007a trayANAM paJcadhA yogaM karmaNAM yaH prapazyati
6051007c sacivaiH samayaM kRtvA sa sabhye vartate pathi
6051008a yathAgamaM ca yo rAjA samayaM vicikIrSati
6051008c budhyate sacivAn buddhyA suhRdaz cAnupazyati
6051009a dharmam arthaM ca kAmaM ca sarvAn vA rakSasAM pate
6051009c bhajate puruSaH kAle trINi dvandvAni vA punaH
6051010a triSu caiteSu yac chreSThaM zrutvA tan nAvabudhyate
6051010c rAjA vA rAjamAtro vA vyarthaM tasya bahuzrutam
6051011a upapradAnaM sAntvaM vA bhedaM kAle ca vikramam
6051011c yogaM ca rakSasAM zreSTha tAv ubhau ca nayAnayau
6051012a kAle dharmArthakAmAn yaH saMmantrya sacivaiH saha
6051012c niSevetAtmavA&l loke na sa vyasanam ApnuyAt
6051013a hitAnubandham Alokya kAryAkAryam ihAtmanaH
6051013c rAjA sahArthatattvajJaiH sacivaiH saha jIvati
6051014a anabhijJAya zAstrArthAn puruSAH pazubuddhayaH
6051014c prAgalbhyAd vaktum icchanti mantreSv abhyantarIkRtAH
6051015a azAstraviduSAM teSAM na kAryam ahitaM vacaH
6051015c arthazAstrAnabhijJAnAM vipulAM zriyam icchatAm
6051016a ahitaM ca hitAkAraM dhArSTyAj jalpanti ye narAH
6051016c avekSya mantrabAhyAs te kartavyAH kRtyadUSaNAH
6051017a vinAzayanto bhartAraM sahitAH zatrubhir budhaiH
6051017c viparItAni kRtyAni kArayantIha mantriNaH
6051018a tAn bhartA mitrasaMkAzAn amitrAn mantranirNaye
6051018c vyavahAreNa jAnIyAt sacivAn upasaMhitAn
6051019a capalasyeha kRtyAni sahasAnupradhAvataH
6051019c chidram anye prapadyante krauJcasya kham iva dvijAH
6051020a yo hi zatrum avajJAya nAtmAnam abhirakSati
6051020c avApnoti hi so 'narthAn sthAnAc ca vyavaropyate
6051021a tat tu zrutvA dazagrIvaH kumbhakarNasya bhASitam
6051021c bhrukuTiM caiva saMcakre kruddhaz cainam uvAca ha
6051022a mAnyo gurur ivAcAryaH kiM mAM tvam anuzAsati
6051022c kim evaM vAkzramaM kRtvA kAle yuktaM vidhIyatAm
6051023a vibhramAc cittamohAd vA balavIryAzrayeNa vA
6051023c nAbhipannam idAnIM yad vyarthAs tasya punaH kRthAH
6051024a asmin kAle tu yad yuktaM tad idAnIM vidhIyatAm
6051024c mamApanayajaM doSaM vikrameNa samIkuru
6051025a yadi khalv asti me sneho bhrAtRtvaM vAvagacchasi
6051025c yadi vA kAryam etat te hRdi kAryatamaM matam
6051026a sa suhRdyo vipannArthaM dInam abhyavapadyate
6051026c sa bandhur yo 'panIteSu sAhAyyAyopakalpate
6051027a tam athaivaM bruvANaM tu vacanaM dhIradAruNam
6051027c ruSTo 'yam iti vijJAya zanaiH zlakSNam uvAca ha
6051028a atIva hi samAlakSya bhrAtaraM kSubhitendriyam
6051028c kumbhakarNaH zanair vAkyaM babhASe parisAntvayan
6051029a alaM rAkSasarAjendra saMtApam upapadya te
6051029c roSaM ca saMparityajya svastho bhavitum arhasi
6051030a naitan manasi kartavvyaM mayi jIvati pArthiva
6051030c tam ahaM nAzayiSyAmi yatkRte paritapyase
6051031a avazyaM tu hitaM vAcyaM sarvAvasthaM mayA tava
6051031c bandhubhAvAd abhihitaM bhrAtRsnehAc ca pArthiva
6051032a sadRzaM yat tu kAle 'smin kartuM snigdhena bandhunA
6051032c zatrUNAM kadanaM pazya kriyamANaM mayA raNe
6051033a adya pazya mahAbAho mayA samaramUrdhani
6051033c hate rAme saha bhrAtrA dravantIM harivAhinIm
6051034a adya rAmasya tad dRSTvA mayAnItaM raNAc chiraH
6051034c sukhIbhava mahAbAho sItA bhavatu duHkhitA
6051035a adya rAmasya pazyantu nidhanaM sumahat priyam
6051035c laGkAyAM rAkSasAH sarve ye te nihatabAndhavAH
6051036a adya zokaparItAnAM svabandhuvadhakAraNAt
6051036c zatror yudhi vinAzena karomy asrapramArjanam
6051037a adya parvatasaMkAzaM sasUryam iva toyadam
6051037c vikIrNaM pazya samare sugrIvaM plavagezvaram
6051038a na paraH preSaNIyas te yuddhAyAtula vikrama
6051038c aham utsAdayiSyAmi zatrUMs tava mahAbala
6051039a yadi zakro yadi yamo yadi pAvakamArutau
6051039c tAn ahaM yodhayiSyAmi kubera varuNAv api
6051040a girimAtrazarIrasya zitazUladharasya me
6051040c nardatas tIkSNadaMSTrasya bibhIyAc ca puraMdaraH
6051041a atha vA tyaktazastrasya mRdgatas tarasA ripUn
6051041c na me pratimukhe kaz cic chaktaH sthAtuM jijIviSuH
6051042a naiva zaktyA na gadayA nAsinA na zitaiH zaraiH
6051042c hastAbhyAm eva saMrabdho haniSyAmy api vajriNam
6051043a yadi me muSTivegaM sa rAghavo 'dya sahiSyati
6051043c tataH pAsyanti bANaughA rudhiraM rAghavasya te
6051044a cintayA bAdhyase rAjan kimarthaM mayi tiSThati
6051044c so 'haM zatruvinAzAya tava niryAtum udyataH
6051045a muJca rAmAd bhayaM rAjan haniSyAmIha saMyuge
6051045c rAghavaM lakSmaNaM caiva sugrIvaM ca mahAbalam
6051045e asAdhAraNam icchAmi tava dAtuM mahad yazaH
6051046a vadhena te dAzaratheH sukhAvahaM; sukhaM samAhartum ahaM vrajAmi
6051046c nihatya rAmaM sahalakSmaNena; khAdAmi sarvAn hariyUthamukhyAn
6051047a ramasva kAmaM piba cAgryavAruNIM; kuruSva kRtyAni vinIyatAM jvaraH
6051047c mayAdya rAme gamite yamakSayaM; cirAya sItA vazagA bhaviSyati
6052001a tad uktam atikAyasya balino bAhuzAlinaH
6052001c kumbhakarNasya vacanaM zrutvovAca mahodaraH
6052002a kumbhakarNakule jAto dhRSTaH prAkRtadarzanaH
6052002c avalipto na zaknoSi kRtyaM sarvatra veditum
6052003a na hi rAjA na jAnIte kumbhakarNa nayAnayau
6052003c tvaM tu kaizorakAd dhRSTaH kevalaM vaktum icchasi
6052004a sthAnaM vRddhiM ca hAniM ca dezakAlavibhAgavit
6052004c Atmanaz ca pareSAM ca budhyate rAkSasarSabha
6052005a yat tu zakyaM balavatA kartuM prAkRtabuddhinA
6052005c anupAsitavRddhena kaH kuryAt tAdRzaM budhaH
6052006a yAMs tu dharmArthakAmAMs tvaM bravISi pRthag AzrayAn
6052006c anuboddhuM svabhAvena na hi lakSaNam asti te
6052007a karma caiva hi sarveSAM kAraNAnAM prayojanam
6052007c zreyaH pApIyasAM cAtra phalaM bhavati karmaNAm
6052008a niHzreyasa phalAv eva dharmArthAv itarAv api
6052008c adharmAnarthayoH prAptiH phalaM ca pratyavAyikam
6052009a aihalaukikapAratryaM karma pumbhir niSevyate
6052009c karmANy api tu kalpyAni labhate kAmam AsthitaH
6052010a tatra kLptam idaM rAjJA hRdi kAryaM mataM ca naH
6052010c zatrau hi sAhasaM yat syAt kim ivAtrApanIyate
6052011a ekasyaivAbhiyAne tu hetur yaH prakRtas tvayA
6052011c tatrApy anupapannaM te vakSyAmi yad asAdhu ca
6052012a yena pUrvaM janasthAne bahavo 'tibalA hatAH
6052012c rAkSasA rAghavaM taM tvaM katham eko jayiSyasi
6052013a ye purA nirjitAs tena janasthAne mahaujasaH
6052013c rAkSasAMs tAn pure sarvAn bhItAn adyApi pazyasi
6052014a taM siMham iva saMkruddhaM rAmaM dazarathAtmajam
6052014c sarpaM suptam ivAbuddhyA prabodhayitum icchasi
6052015a jvalantaM tejasA nityaM krodhena ca durAsadam
6052015c kas taM mRtyum ivAsahyam AsAdayitum arhati
6052016a saMzayastham idaM sarvaM zatroH pratisamAsane
6052016c ekasya gamanaM tatra na hi me rocate tava
6052017a hInArthas tu samRddhArthaM ko ripuM prAkRto yathA
6052017c nizcitaM jIvitatyAge vazam Anetum icchati
6052018a yasya nAsti manuSyeSu sadRzo rAkSasottama
6052018c katham AzaMsase yoddhuM tulyenendravivasvatoH
6052019a evam uktvA tu saMrabdhaM kumbhakarNaM mahodaraH
6052019c uvAca rakSasAM madhye rAvaNo lokarAvaNam
6052020a labdhvA punas tAM vaidehIM kimarthaM tvaM prajalpasi
6052020c yadecchasi tadA sItA vazagA te bhaviSyati
6052021a dRSTaH kaz cid upAyo me sItopasthAnakArakaH
6052021c rucitaz cet svayA buddhyA rAkSasezvara taM zRNu
6052022a ahaM dvijihvaH saMhrAdI kumbhakarNo vitardanaH
6052022c paJcarAmavadhAyaite niryAntIty avaghoSaya
6052023a tato gatvA vayaM yuddhaM dAsyAmas tasya yatnataH
6052023c jeSyAmo yadi te zatrUn nopAyaiH kRtyam asti naH
6052024a atha jIvati naH zatrur vayaM ca kRtasaMyugAH
6052024c tataH samabhipatsyAmo manasA yat samIkSitum
6052025a vayaM yuddhAd ihaiSyAmo rudhireNa samukSitAH
6052025c vidArya svatanuM bANai rAmanAmAGkitaiH zitaiH
6052026a bhakSito rAghavo 'smAbhir lakSmaNaz ceti vAdinaH
6052026c tava pAdau grahISyAmas tvaM naH kAma prapUraya
6052027a tato 'vaghoSaya pure gajaskandhena pArthiva
6052027c hato rAmaH saha bhrAtrA sasainya iti sarvataH
6052028a prIto nAma tato bhUtvA bhRtyAnAM tvam ariMdama
6052028c bhogAMz ca parivArAMz ca kAmAMz ca vasudApaya
6052029a tato mAlyAni vAsAMsi vIrANAm anulepanam
6052029c peyaM ca bahu yodhebhyaH svayaM ca muditaH piba
6052030a tato 'smin bahulIbhUte kaulIne sarvato gate
6052030c pravizyAzvAsya cApi tvaM sItAM rahasi sAntvaya
6052030e dhanadhAnyaiz ca kAmaiz ca ratnaiz cainAM pralobhaya
6052031a anayopadhayA rAjan bhayazokAnubandhayA
6052031c akAmA tvadvazaM sItA naSTanAthA gamiSyati
6052032a raJjanIyaM hi bhartAraM vinaSTam avagamya sA
6052032c nairAzyAt strIlaghutvAc ca tvadvazaM pratipatsyate
6052033a sA purA sukhasaMvRddhA sukhArhA duHkhakarSitA
6052033c tvayy adhInaH sukhaM jJAtvA sarvathopagamiSyati
6052034a etat sunItaM mama darzanena; rAmaM hi dRSTvaiva bhaved anarthaH
6052034c ihaiva te setsyati motsuko bhUr; mahAn ayuddhena sukhasya lAbhaH
6052035a anaSTasainyo hy anavAptasaMzayo; ripUn ayuddhena jayaJ janAdhipa
6052035c yazaz ca puNyaM ca mahan mahIpate; zriyaM ca kIrtiM ca ciraM samaznute
6053001a sa tathoktas tu nirbhartsya kumbhakarNo mahodaram
6053001c abravId rAkSasazreSThaM bhrAtaraM rAvaNaM tataH
6053002a so 'haM tava bhayaM ghoraM vadhAt tasya durAtmanaH
6053002c rAmasyAdya pramArjAmi nirvairas tvaM sukhIbhava
6053003a garjanti na vRthA zUra nirjalA iva toyadAH
6053003c pazya saMpAdyamAnaM tu garjitaM yudhi karmaNA
6053004a na marSayati cAtmAnaM saMbhAvayati nAtmanA
6053004c adarzayitvA zUrAs tu karma kurvanti duSkaram
6053005a viklavAnAm abuddhInAM rAjJAM paNDitamAninAm
6053005c zRNvatAm Adita idaM tvadvidhAnAM mahodara
6053006a yuddhe kApuruSair nityaM bhavadbhiH priyavAdibhiH
6053006c rAjAnam anugacchadbhiH kRtyam etad vinAzitam
6053007a rAjazeSA kRtA laGkA kSINaH kozo balaM hatam
6053007c rAjAnam imam AsAdya suhRccihnam amitrakam
6053008a eSa niryAmy ahaM yuddham udyataH zatrunirjaye
6053008c durnayaM bhavatAm adya samIkartuM mahAhave
6053009a evam uktavato vAkyaM kumbhakarNasya dhImataH
6053009c pratyuvAca tato vAkyaM prahasan rAkSasAdhipaH
6053010a mahodaro 'yaM rAmAt tu paritrasto na saMzayaH
6053010c na hi rocayate tAta yuddhaM yuddhavizArada
6053011a kaz cin me tvatsamo nAsti sauhRdena balena ca
6053011c gaccha zatruvadhAya tvaM kumbhakarNajayAya ca
6053012a Adade nizitaM zUlaM vegAc chatrunibarhaNaH
6053012c sarvakAlAyasaM dIptaM taptakAJcanabhUSaNam
6053013a indrAzanisamaM bhImaM vajrapratimagauravam
6053013c devadAnavagandharvayakSakiMnarasUdanam
6053014a raktamAlya mahAdAma svataz codgatapAvakam
6053014c AdAya nizitaM zUlaM zatruzoNitaraJjitam
6053014e kumbhakarNo mahAtejA rAvaNaM vAkyam abravIt
6053015a gamiSyAmy aham ekAkI tiSThatv iha balaM mahat
6053015c adya tAn kSudhitaH kruddho bhakSayiSyAmi vAnarAn
6053016a kumbhakarNavacaH zrutvA rAvaNo vAkyam abravIt
6053016c sainyaiH parivRto gaccha zUlamudgalapANibhiH
6053017a vAnarA hi mahAtmAnaH zIghrAz ca vyavasAyinaH
6053017c ekAkinaM pramattaM vA nayeyur dazanaiH kSayam
6053018a tasmAt paramadurdharSaiH sainyaiH parivRto vraja
6053018c rakSasAm ahitaM sarvaM zatrupakSaM nisUdaya
6053019a athAsanAt samutpatya srajaM maNikRtAntarAm
6053019c Ababandha mahAtejAH kumbhakarNasya rAvaNaH
6053020a aGgadAn aGgulIveSTAn varANy AbharaNAni ca
6053020c hAraM ca zazisaMkAzam Ababandha mahAtmanaH
6053021a divyAni ca sugandhIni mAlyadAmAni rAvaNaH
6053021c zrotre cAsajjayAm Asa zrImatI cAsya kuNDale
6053022a kAJcanAGgadakeyUro niSkAbharaNabhUSitaH
6053022c kumbhakarNo bRhatkarNaH suhuto 'gnir ivAbabhau
6053023a zroNIsUtreNa mahatA mecakena virAjitaH
6053023c amRtotpAdane naddho bhujaMgeneva mandaraH
6053024a sa kAJcanaM bhArasahaM nivAtaM; vidyutprabhaM dIptam ivAtmabhAsA
6053024c AbadhyamAnaH kavacaM rarAja; saMdhyAbhrasaMvIta ivAdrirAjaH
6053025a sarvAbharaNanaddhAGgaH zUlapANiH sa rAkSasaH
6053025c trivikramakRtotsAho nArAyaNa ivAbabhau
6053026a bhrAtaraM saMpariSvajya kRtvA cApi pradakSiNam
6053026c praNamya zirasA tasmai saMpratasthe mahAbaliH
6053026e tam AzIrbhiH prazastAbhiH preSayAm Asa rAvaNaH
6053027a zaGkhadundubhinirghoSaiH sainyaiz cApi varAyudhaiH
6053027c taM gajaiz ca turaMgaiz ca syandanaiz cAmbudasvanaiH
6053027e anujagmur mahAtmAnaM rathino rathinAM varam
6053028a sarpair uSTraiH kharair azvaiH siMhadvipamRgadvijaiH
6053028c anujagmuz ca taM ghoraM kumbhakarNaM mahAbalam
6053029a sa puSpavarNair avakIryamANo; dhRtAtapatraH zitazUlapANiH
6053029c madotkaTaH zoNitagandhamatto; viniryayau dAnavadevazatruH
6053030a padAtayaz a bahavo mahAnAdA mahAbalAH
6053030c anvayU rAkSasA bhImA bhImAkSAH zastrapANayaH
6053031a raktAkSAH sumahAkAyA nIlAJjanacayopamAH
6053031c zUrAn udyamya khaDgAMz ca nizitAMz ca parazvadhAn
6053032a bahuvyAmAMz ca vipulAn kSepaNIyAn durAsadAn
6053032c tAlaskandhAMz ca vipulAn kSepaNIyAn durAsadAn
6053033a athAnyad vapur AdAya dAruNaM lomaharSaNam
6053033c niSpapAta mahAtejAH kumbhakarNo mahAbalaH
6053034a dhanuHzataparINAhaH sa SaTzatasamucchitaH
6053034c raudraH zakaTacakrAkSo mahAparvatasaMnibhaH
6053035a saMnipatya ca rakSAMsi dagdhazailopamo mahAn
6053035c kumbhakarNo mahAvaktraH prahasann idam abravIt
6053036a adya vAnaramukhyAnAM tAni yUthAni bhAgazaH
6053036c nirdahiSyAmi saMkruddhaH zalabhAn iva pAvakaH
6053037a nAparAdhyanti me kAmaM vAnarA vanacAriNaH
6053037c jAtir asmadvidhAnAM sA purodyAnavibhUSaNam
6053038a purarodhasya mUlaM tu rAghavaH sahalakSmaNaH
6053038c hate tasmin hataM sarvaM taM vadhiSyAmi saMyuge
6053039a evaM tasya bruvANasya kumbhakarNasya rAkSasAH
6053039c nAdaM cakrur mahAghoraM kampayanta ivArNavam
6053040a tasya niSpatatas tUrNaM kumbhakarNasya dhImataH
6053040c babhUvur ghorarUpANi nimittAni samantataH
6053041a ulkAzaniyutA meghA vineduz ca sudAruNAH
6053041c sasAgaravanA caiva vasudhA samakampata
6053042a ghorarUpAH zivA neduH sajvAlakavalair mukhaiH
6053042c maNDalAny apasavyAni babandhuz ca vihaMgamAH
6053043a niSpapAta ca gRdhre 'sya zUle vai pathi gacchataH
6053043c prAsphuran nayanaM cAsya savyo bAhur akampata
6053044a niSpapAta tadA coklA jvalantI bhImanisvanA
6053044c Adityo niSprabhaz cAsIn na pravAti sukho 'nilaH
6053045a acintayan mahotpAtAn utthitA&l lomaharSaNAn
6053045c niryayau kumbhakarNas tu kRtAntabalacoditaH
6053046a sa laGghayitvA prAkAraM padbhyAM parvatasaMnibhaH
6053046c dadarzAbhraghanaprakhyaM vAnarAnIkam adbhutam
6053047a te dRSTvA rAkSasazreSThaM vAnarAH parvatopamam
6053047c vAyununnA iva ghanA yayuH sarvA dizas tadA
6053048a tad vAnarAnIkam atipracaNDaM; dizo dravad bhinnam ivAbhrajAlam
6053048c sa kumbhakarNaH samavekSya harSAn; nanAda bhUyo ghanavad ghanAbhaH
6053049a te tasya ghoraM ninadaM nizamya; yathA ninAdaM divi vAridasya
6053049c petur dharaNyAM bahavaH plavaMgA; nikRttamUlA iva sAlavRkSAH
6053050a vipulaparighavAn sa kumbhakarNo; ripunidhanAya viniHsRto mahAtmA
6053050c kapi gaNabhayam Adadat subhImaM; prabhur iva kiMkaradaNDavAn yugAnte
6054001a sa nanAda mahAnAdaM samudram abhinAdayan
6054001c janayann iva nirghAtAn vidhamann iva parvatAn
6054002a tam avadhyaM maghavatA yamena varuNena ca
6054002c prekSya bhImAkSam AyAntaM vAnarA vipradudruvuH
6054003a tAMs tu vidravato dRSTvA vAliputro 'Ggado 'bravIt
6054003c nalaM nIlaM gavAkSaM ca kumudaM ca mahAbalam
6054004a AtmAnam atra vismRtya vIryANy abhijanAni ca
6054004c kva gacchata bhayatrastAH prAkRtA harayo yathA
6054005a sAdhu saumyA nivartadhvaM kiM prANAn parirakSatha
6054005c nAlaM yuddhAya vai rakSo mahatIyaM vibhISikAH
6054006a mahatIm utthitAm enAM rAkSasAnAM vibhISikAm
6054006c vikramAd vidhamiSyAmo nivartadhvaM plavaMgamAH
6054007a kRcchreNa tu samAzvAsya saMgamya ca tatas tataH
6054007c vRkSAdrihastA harayaH saMpratasthU raNAjiram
6054008a te nivRtya tu saMkruddhAH kumbhakarNaM vanaukasaH
6054008c nijaghnuH paramakruddhAH samadA iva kuJjarAH
6054008e prAMzubhir girizRGgaiz ca zilAbhiz ca mahAbalAH
6054009a pAdapaiH puSpitAgraiz ca hanyamAno na kampate
6054009c tasya gAtreSu patitA bhidyante zatazaH zilAH
6054009e pAdapAH puSpitAgrAz ca bhagnAH petur mahItale
6054010a so 'pi sainyAni saMkruddho vAnarANAM mahaujasAm
6054010c mamantha paramAyatto vanAny agnir ivotthitaH
6054011a lohitArdrAs tu bahavaH zerate vAnararSabhAH
6054011c nirastAH patitA bhUmau tAmrapuSpA iva drumAH
6054012a laGghayantaH pradhAvanto vAnarA nAvalokayan
6054012c ke cit samudre patitAH ke cid gaganam AzritAH
6054013a vadhyamAnAs tu te vIrA rAkSasena balIyasA
6054013c sAgaraM yena te tIrNAH pathA tenaiva dudruvuH
6054014a te sthalAni tathA nimnaM viSaNNavadanA bhayAt
6054014c RkSA vRkSAn samArUDhAH ke cit parvatam AzritAH
6054015a mamajjur arNave ke cid guhAH ke cit samAzritAH
6054015c niSeduH plavagAH ke cit ke cin naivAvatasthire
6054016a tAn samIkSyAGgado bhaGgAn vAnarAn idam abravIt
6054016c avatiSThata yudhyAmo nivartadhvaM plavaMgamAH
6054017a bhagnAnAM vo na pazyAmi parigamya mahIm imAm
6054017c sthAnaM sarve nivartadhvaM kiM prANAn parirakSatha
6054018a nirAyudhAnAM dravatAm asaMgagatipauruSAH
6054018c dArA hy apahasiSyanti sa vai ghAtas tu jIvitAm
6054019a kuleSu jAtAH sarve sma vistIrNeSu mahatsu ca
6054019c anAryAH khalu yad bhItAs tyaktvA vIryaM pradhAvata
6054020a vikatthanAni vo yAni yadA vai janasaMsadi
6054020c tAni vaH kva ca yatAni sodagrANi mahAnti ca
6054021a bhIrupravAdAH zrUyante yas tu jIvati dhikkRtaH
6054021c mArgaH satpuruSair juSTaH sevyatAM tyajyatAM bhayam
6054022a zayAmahe vA nihatAH pRthivyAm alpajIvitAH
6054022c duSprApaM brahmalokaM vA prApnumo yudhi sUditAH
6054022e saMprApnuyAmaH kIrtiM vA nihatya zatrum Ahave
6054023a na kumbhakarNaH kAkutsthaM dRSTvA jIvan gamiSyati
6054023c dIpyamAnam ivAsAdya pataMgo jvalanaM yathA
6054024a palAyanena coddiSTAH prANAn rakSAmahe vayam
6054024c ekena bahavo bhagnA yazo nAzaM gamiSyati
6054025a evaM bruvANaM taM zUram aGgadaM kanakAGgadam
6054025c dravamANAs tato vAkyam UcuH zUravigarhitam
6054026a kRtaM naH kadanaM ghoraM kumbhakarNena rakSasA
6054026c na sthAnakAlo gacchAmo dayitaM jIvitaM hi naH
6054027a etAvad uktvA vacanaM sarve te bhejire dizaH
6054027c bhImaM bhImAkSam AyAntaM dRSTvA vAnarayUthapAH
6054028a dravamANAs tu te vIrA aGgadena valImukhAH
6054028c sAntvaiz ca bahumAnaiz ca tataH sarve nivartitAH
6054029a RSabhazarabhamaindadhUmranIlAH; kumudasuSeNagavAkSarambhatArAH
6054029c dvividapanasavAyuputramukhyAs; tvaritatarAbhimukhaM raNaM prayAtAH
6055001a te nivRttA mahAkAyAH zrutvAGgadavacas tadA
6055001c naiSThikIM buddhim AsthAya sarve saMgrAmakAGkSiNaH
6055002a samudIritavIryAs te samAropitavikramAH
6055002c paryavasthApitA vAkyair aGgadena valImukhAH
6055003a prayAtAz ca gatA harSaM maraNe kRtanizcayAH
6055003c cakruH sutumulaM yuddhaM vAnarAs tyaktajIvitAH
6055004a atha vRkSAn mahAkAyAH sAnUni sumahAnti ca
6055004c vAnarAs tUrNam udyamya kumbhakarNam abhidravan
6055005a sa kumbhakarNaH saMkruddho gadAm udyamya vIryavAn
6055005c ardayan sumahAkAyaH samantAd vyAkSipad ripUn
6055006a zatAni sapta cASTau ca sahasrANi ca vAnarAH
6055006c prakIrNAH zerate bhUmau kumbhakarNena pothitAH
6055007a SoDazASTau ca daza ca viMzat triMzat tathaiva ca
6055007c parikSipya ca bAhubhyAM khAdan viparidhAvati
6055007e bhakSayan bhRzasaMkruddho garuDaH pannagAn iva
6055008a hanUmAJ zailazRGgANi vRkSAMz ca vividhAn bahUn
6055008c vavarSa kumbhakarNasya zirasy ambaram AsthitaH
6055009a tAni parvatazRGgANi zUlena tu bibheda ha
6055009c babhaJja vRkSavarSaM ca kumbhakarNo mahAbalaH
6055010a tato harINAM tad anIkam ugraM; dudrAva zUlaM nizitaM pragRhya
6055010c tasthau tato 'syApatataH purastAn; mahIdharAgraM hanumAn pragRhya
6055011a sa kumbhakarNaM kupito jaghAna; vegena zailottamabhImakAyam
6055011c sa cukSubhe tena tadAbhibUto; medArdragAtro rudhirAvasiktaH
6055012a sa zUlam Avidhya taDitprakAzaM; giriM yathA prajvalitAgrazRGgam
6055012c bAhvantare mArutim AjaghAna; guho 'calaM krauJcam ivograzaktyA
6055013a sa zUlanirbhinna mahAbhujAntaraH; pravihvalaH zoNitam udvaman mukhAt
6055013c nanAda bhImaM hanumAn mahAhave; yugAntameghastanitasvanopamam
6055014a tato vineduH sahasA prahRSTA; rakSogaNAs taM vyathitaM samIkSya
6055014c plavaMgamAs tu vyathitA bhayArtAH; pradudruvuH saMyati kumbhakarNAt
6055015a nIlaz cikSepa zailAgraM kumbhakarNAya dhImate
6055015c tam ApatantaM saMprekSya muSTinAbhijaghAna ha
6055016a muSTiprahArAbhihataM tac chailAgraM vyazIryata
6055016c savisphuliGgaM sajvAlaM nipapAta mahItale
6055017a RSabhaH zarabho nIlo gavAkSo gandhamAdanaH
6055017c paJcavAnarazArdUlAH kumbhakarNam upAdravan
6055018a zailair vRkSais talaiH pAdair muSTibhiz ca mahAbalAH
6055018c kumbhakarNaM mahAkAyaM sarvato 'bhinijaghnire
6055019a sparzAn iva prahArAMs tAn vedayAno na vivyathe
6055019c RSabhaM tu mahAvegaM bAhubhyAM pariSasvaje
6055020a kumbhakarNabhujAbhyAM tu pIDito vAnararSabhaH
6055020c nipapAtarSabho bhImaH pramukhAgatazoNitaH
6055021a muSTinA zarabhaM hatvA jAnunA nIlam Ahave
6055021c AjaghAna gavAkSaM ca talenendraripus tadA
6055022a dattapraharavyathitA mumuhuH zoNitokSitAH
6055022c nipetus te tu medinyAM nikRttA iva kiMzukAH
6055023a teSu vAnaramukhyeSu patiteSu mahAtmasu
6055023c vAnarANAM sahasrANi kumbhakarNaM pradudruvuH
6055024a taM zailam iva zailAbhAH sarve tu plavagarSabhAH
6055024c samAruhya samutpatya dadaMzuz ca mahAbalAH
6055025a taM nakhair dazanaiz cApi muSTibhir jAnubhis tathA
6055025c kumbhakarNaM mahAkAyaM te jaghnuH plavagarSabhAH
6055026a sa vAnarasahasrais tair AcitaH parvatopamaH
6055026c rarAja rAkSasavyAghro girir Atmaruhair iva
6055027a bAhubhyAM vAnarAn sarvAn pragRhya sa mahAbalaH
6055027c bhakSayAm Asa saMkruddho garuDaH pannagAn iva
6055028a prakSiptAH kumbhakarNena vaktre pAtAlasaMnibhe
6055028c nAsA puTAbhyAM nirjagmuH karNAbhyAM caiva vAnarAH
6055029a bhakSayan bhRzasaMkruddho harIn parvatasaMnibhaH
6055029c babhaJja vAnarAn sarvAn saMkruddho rAkSasottamaH
6055030a mAMsazoNitasaMkledAM bhUmiM kurvan sa rAkSasaH
6055030c cacAra harisainyeSu kAlAgnir iva mUrchitaH
6055031a vajrahasto yathA zakraH pAzahasta ivAntakaH
6055031c zUlahasto babhau tasmin kumbhakarNo mahAbalaH
6055032a yathA zuSkANy araNyAni grISme dahati pAvakaH
6055032c tathA vAnarasainyAni kumbhakarNo vinirdahat
6055033a tatas te vadhyamAnAs tu hatayUthA vinAyakAH
6055033c vAnarA bhayasaMvignA vinedur visvaraM bhRzam
6055034a anekazo vadhyamAnAH kumbhakarNena vAnarAH
6055034c rAghavaM zaraNaM jagmur vyathitAH khinnacetasaH
6055035a tam ApatantaM saMprekSya kumbhakarNaM mahAbalam
6055035c utpapAta tadA vIraH sugrIvo vAnarAdhipaH
6055036a sa parvatAgram utkSipya samAvidhya mahAkapiH
6055036c abhidudrAva vegena kumbhakarNaM mahAbalam
6055037a tam ApatantaM saMprekSya kumbhakarNaH plavaMgamam
6055037c tasthau vivRtasarvAGgo vAnarendrasya saMmukhaH
6055038a kapizoNitadigdhAGgaM bhakSayantaM mahAkapIn
6055038c kumbhakarNaM sthitaM dRSTvA sugrIvo vAkyam abravIt
6055039a pAtitAz ca tvayA vIrAH kRtaM karma suduSkaram
6055039c bhakSitAni ca sainyAni prAptaM te paramaM yazaH
6055040a tyaja tad vAnarAnIkaM prAkRtaiH kiM kariSyasi
6055040c sahasvaikaM nipAtaM me parvatasyAsya rAkSasa
6055041a tad vAkyaM harirAjasya sattvadhairyasamanvitam
6055041c zrutvA rAkSasazArdUlaH kumbhakarNo 'bravId vacaH
6055042a prajApates tu pautras tvaM tathaivarkSarajaHsutaH
6055042c zrutapauruSasaMpannas tasmAd garjasi vAnara
6055043a sa kumbhakarNasya vaco nizamya; vyAvidhya zailaM sahasA mumoca
6055043c tenAjaghAnorasi kumbhakarNaM; zailena vajrAzanisaMnibhena
6055044a tac chailazRGgaM sahasA vikIrNaM; bhujAntare tasya tadA vizAle
6055044c tato viSeduH sahasA plavaMgamA; rakSogaNAz cApi mudA vineduH
6055045a sa zailazRGgAbhihataz cukopa; nanAda kopAc ca vivRtya vaktram
6055045c vyAvidhya zUlaM ca taDitprakAzaM; cikSepa haryRkSapater vadhAya
6055046a tat kumbhakarNasya bhujapraviddhaM; zUlaM zitaM kAJcanadAmajuSTam
6055046c kSipraM samutpatya nigRhya dorbhyAM; babhaJja vegena suto 'nilasya
6055047a kRtaM bhArasahasrasya zUlaM kAlAyasaM mahat
6055047c babhaJja janaum Aropya prahRSTaH plavagarSabhaH
6055048a sa tat tadA bhagnam avekSya zUlaM; cukopa rakSo'dhipatir mahAtmA
6055048c utpATya laGkAmalayAt sa zRGgaM; jaghAna sugrIvam upetya tena
6055049a sa zailazRGgAbhihato visaMjJaH; papAta bhUmau yudhi vAnarendraH
6055049c taM prekSya bhUmau patitaM visaMjJaM; neduH prahRSTA yudhi yAtudhAnAH
6055050a tam abhyupetyAdbhutaghoravIryaM; sa kumbhakarNo yudhi vAnarendram
6055050c jahAra sugrIvam abhipragRhya; yathAnilo megham atipracaNDaH
6055051a sa taM mahAmeghanikAzarUpam; utpATya gacchan yudhi kumbhakarNaH
6055051c rarAja merupratimAnarUpo; merur yathAtyucchritaghorazRGgaH
6055052a tataH samutpATya jagAma vIraH; saMstUyamAno yudhi rAkSasendraiH
6055052c zRNvan ninAdaM tridazAlayAnAM; plavaMgarAjagrahavismitAnAm
6055053a tatas tam AdAya tadA sa mene; harIndram indropamam indravIryaH
6055053c asmin hRte sarvam idaM hRtaM syAt; sarAghavaM sainyam itIndrazatruH
6055054a vidrutAM vAhinIM dRSTvA vAnarANAM tatas tataH
6055054c kumbhakarNena sugrIvaM gRhItaM cApi vAnaram
6055055a hanUmAMz cintayAm Asa matimAn mArutAtmajaH
6055055c evaM gRhIte sugrIve kiM kartavyaM mayA bhavet
6055056a yad vai nyAyyaM mayA kartuM tat kariSyAmi sarvathA
6055056c bhUtvA parvatasaMkAzo nAzayiSyAmi rAkSasaM
6055057a mayA hate saMyati kumbhakarNe; mahAbale muSTivizIrNadehe
6055057c vimocite vAnarapArthive ca; bhavantu hRSTAH pravagAH samagrAH
6055058a atha vA svayam apy eSa mokSaM prApsyati pArthivaH
6055058c gRhIto 'yaM yadi bhavet tridazaiH sAsuroragaiH
6055059a manye na tAvad AtmAnaM budhyate vAnarAdhipaH
6055059c zailaprahArAbhihataH kumbhakarNena saMyuge
6055060a ayaM muhUrtAt sugrIvo labdhasaMjJo mahAhave
6055060c Atmano vAnarANAM ca yat pathyaM tat kariSyati
6055061a mayA tu mokSitasyAsya sugrIvasya mahAtmanaH
6055061c aprItaz ca bhavet kaSTA kIrtinAzaz ca zAzvataH
6055062a tasmAn muhUrtaM kAGkSiSye vikramaM pArthivasya naH
6055062c bhinnaM ca vAnarAnIkaM tAvad AzvAsayAmy aham
6055063a ity evaM cintayitvA tu hanUmAn mArutAtmajaH
6055063c bhUyaH saMstambhayAm Asa vAnarANAM mahAcamUm
6055064a sa kumbhakarNo 'tha viveza laGkAM; sphurantam AdAya mahAhariM tam
6055064c vimAnacaryAgRhagopurasthaiH; puSpAgryavarSair avakIryamANaH
6055065a tataH sa saMjJAm upalabhya kRcchrAd; balIyasas tasya bhujAntarasthaH
6055065c avekSamANaH purarAjamArgaM; vicintayAm Asa muhur mahAtmA
6055066a evaM gRhItena kathaM nu nAma; zakyaM mayA saMprati kartum adya
6055066c tathA kariSyAmi yathA harINAM; bhaviSyatISTaM ca hitaM ca kAryam
6055067a tataH karAgraiH sahasA sametya; rAjA harINAm amarendrazatroH
6055067c nakhaiz ca karNau dazanaiz ca nAsAM; dadaMza pArzveSu ca kumbhakarNam
6055068a sa kumbhakarNau hRtakarNanAso; vidAritas tena vimarditaz ca
6055068c roSAbhibhUtaH kSatajArdragAtraH; sugrIvam Avidhya pipeSa bhUmau
6055069a sa bhUtale bhImabalAbhipiSTaH; surAribhis tair abhihanyamAnaH
6055069c jagAma khaM vegavad abhyupetya; punaz ca rAmeNa samAjagAma
6055070a karNanAsA vihInasya kumbhakarNo mahAbalaH
6055070c rarAja zoNitotsikto giriH prasravaNair iva
6055071a tataH sa puryAH sahasA mahAtmA; niSkramya tad vAnarasainyam ugram
6055071c babhakSa rakSo yudhi kumbhakarNaH; prajA yugAntAgnir iva pradIptaH
6055072a bubhukSitaH zoNitamAMsagRdhnuH; pravizya tad vAnarasainyam ugram
6055072c cakhAda rakSAMsi harIn pizAcAn; RkSAMz ca mohAd yudhi kumbhakarNaH
6055073a ekaM dvau trIn bahUn kruddho vAnarAn saha rAkSasaiH
6055073c samAdAyaikahastena pracikSepa tvaran mukhe
6055074a saMprasravaMs tadA medaH zoNitaM ca mahAbalaH
6055074c vadhyamAno nagendrAgrair bhakSayAm Asa vAnarAn
6055074e te bhakSyamANA harayo rAmaM jagmus tadA gatim
6055075a tasmin kAle sumitrAyAH putraH parabalArdanaH
6055075c cakAra lakSmaNaH kruddho yuddhaM parapuraMjayaH
6055076a sa kumbhakarNasya zarAJ zarIre sapta vIryavAn
6055076c nicakhAnAdade cAnyAn visasarja ca lakSmaNaH
6055077a atikramya ca saumitriM kumbhakarNo mahAbalaH
6055077c rAmam evAbhidudrAva dArayann iva medinIm
6055078a atha dAzarathI rAmo raudram astraM prayojayan
6055078c kumbhakarNasya hRdaye sasarja nizitAJ zarAn
6055079a tasya rAmeNa viddhasya sahasAbhipradhAvataH
6055079c aGgAramizrAH kruddhasya mukhAn nizcerur arciSaH
6055080a tasyorasi nimagnAz ca zarA barhiNavAsasaH
6055080c hastAc cAsya paribhraSTA papAtorvyAM mahAgadA
6055081a sa nirAyudham AtmAnaM yadA mene mahAbalaH
6055081c muSTibhyAM cAraNAbhyAM ca cakAra kadanaM mahat
6055082a sa bANair atividdhAGgaH kSatajena samukSitaH
6055082c rudhiraM parisusrAva giriH prasravaNAn iva
6055083a sa tIvreNa ca kopena rudhireNa ca mUrchitaH
6055083c vAnarAn rAkSasAn RkSAn khAdan viparidhAvati
6055084a tasmin kAle sa dharmAtmA lakSmaNo rAmam abravIt
6055084c kumbhakarNavadhe yukto yogAn parimRzan bahUn
6055085a naivAyaM vAnarAn rAjan na vijAnAti rAkSasAn
6055085c mattaH zoNitagandhena svAn parAMz caiva khAdati
6055086a sAdhv enam adhirohantu sarvato vAnararSabhAH
6055086c yUthapAz ca yathAmukhyAs tiSThantv asya samantataH
6055087a apy ayaM durmatiH kAle gurubhAraprapIDitaH
6055087c prapatan rAkSaso bhUmau nAnyAn hanyAt plavaMgamAn
6055088a tasya tad vacanaM zrutvA rAjaputrasya dhImataH
6055088c te samAruruhur hRSTAH kumbhakarNaM plavaMgamAH
6055089a kumbhakarNas tu saMkruddhaH samArUDhaH plavaMgamaiH
6055089c vyadhUnayat tAn vegena duSTahastIva hastipAn
6055090a tAn dRSTvA nirdhUtAn rAmo ruSTo 'yam iti rAkSasaH
6055090c samutpapAta vegena dhanur uttamam Adade
6055091a sa cApam AdAya bhujaMgakalpaM; dRDhajyam ugraM tapanIyacitram
6055091c harIn samAzvAsya samutpapAta; rAmo nibaddhottamatUNabANaH
6055092a sa vAnaragaNais tais tu vRtaH paramadurjayaH
6055092c lakSmaNAnucaro rAmaH saMpratasthe mahAbalaH
6055093a sa dadarza mahAtmAnaM kirITinam ariMdamam
6055093c zoNitAplutasarvAGgaM kumbhakarNaM mahAbalam
6055094a sarvAn samabhidhAvantaM yathAruSTaM dizA gajam
6055094c mArgamANaM harIn kruddhaM rAkSasaiH parivAritam
6055095a vindhyamandarasaMkAzaM kAJcanAGgadabhUSaNam
6055095c sravantaM rudhiraM vaktrAd varSamegham ivotthitam
6055096a jihvayA parilihyantaM zoNitaM zoNitokSitam
6055096c mRdnantaM vAnarAnIkaM kAlAntakayamopamam
6055097a taM dRSTvA rAkSasazreSThaM pradIptAnalavarcasaM
6055097c visphArayAm Asa tadA kArmukaM puruSarSabhaH
6055098a sa tasya cApanirghoSAt kupito nairRtarSabhaH
6055098c amRSyamANas taM ghoSam abhidudrAva rAghavam
6055099a tatas tu vAtoddhatameghakalpaM; bhujaMgarAjottamabhogabAhum
6055099c tam ApatantaM dharaNIdharAbham; uvAca rAmo yudhi kumbhakarNam
6055100a Agaccha rakSo'dhipamA viSAdam; avasthito 'haM pragRhItacApaH
6055100c avehi mAM zakrasapatna rAmam; ayaM muhUrtAd bhavitA vicetAH
6055101a rAmo 'yam iti vijJAya jahAsa vikRtasvanam
6055101c pAtayann iva sarveSAM hRdayAni vanaukasAm
6055102a prahasya vikRtaM bhImaM sa meghasvanitopamam
6055102c kumbhakarNo mahAtejA rAghavaM vAkyam abravIt
6055103a nAhaM virAdho vijJeyo na kabandhaH kharo na ca
6055103c na vAlI na ca mArIcaH kumbhakarNo 'ham AgataH
6055104a pazya me mudgaraM ghoraM sarvakAlAyasaM mahat
6055104c anena nirjitA devA dAnavAz ca mayA purA
6055105a vikarNanAsa iti mAM nAvajJAtuM tvam arhasi
6055105c svalpApi hi na me pIDA karNanAsAvinAzanAt
6055106a darzayekSvAkuzArdUla vIryaM gAtreSu me laghu
6055106c tatas tvAM bhakSayiSyAmi dRSTapauruSavikramam
6055107a sa kumbhakarNasya vaco nizamya; rAmaH supuGkhAn visasarja bANAn
6055107c tair Ahato vajrasamapravegair; na cukSubhe na vyathate surAriH
6055108a yaiH sAyakaiH sAlavarA nikRttA; vAlI hato vAnarapuMgavaz ca
6055108c te kumbhakarNasya tadA zarIraM; vajropamA na vyathayAM pracakruH
6055109a sa vAridhArA iva sAyakAMs tAn; pibaJ zarIreNa mahendrazatruH
6055109c jaghAna rAmasya zarapravegaM; vyAvidhya taM mudgaram ugravegam
6055110a tatas tu rakSaH kSatajAnuliptaM; vitrAsanaM devamahAcamUnAm
6055110c vyAvidhya taM mudgaram ugravegaM; vidrAvayAm Asa camUM harINAm
6055111a vAyavyam AdAya tato varAstraM; rAmaH pracikSepa nizAcarAya
6055111c samudgaraM tena jahAra bAhuM; sa kRttabAhus tumulaM nanAda
6055112a sa tasya bAhur girizRGgakalpaH; samudgaro rAghavabANakRttaH
6055112c papAta tasmin harirAjasainye; jaghAna tAM vAnaravAhinIM ca
6055113a te vAnarA bhagnahatAvazeSAH; paryantam Azritya tadA viSaNNAH
6055113c pravepitAGgA dadRzuH sughoraM; narendrarakSo'dhipasaMnipAtam
6055114a sa kumbhakarNo 'stranikRttabAhur; mahAn nikRttAgra ivAcalendraH
6055114c utpATayAm Asa kareNa vRkSaM; tato 'bhidudrAva raNe narendram
6055115a taM tasya bAhuM saha sAlavRkSaM; samudyataM pannagabhogakalpam
6055115c aindrAstrayuktena jahAra rAmo; bANena jAmbUnadacitritena
6055116a sa kumbhakarNasya bhujo nikRttaH; papAta bhUmau girisaMnikAzaH
6055116c viveSTamAno nijaghAna vRkSAJ; zailAJ zilAvAnararAkSasAMz ca
6055117a taM chinnabAhuM samavekSya rAmaH; samApatantaM sahasA nadantam
6055117c dvAv ardhacandrau nizitau pragRhya; ciccheda pAdau yudhi rAkSasasya
6055118a nikRttabAhur vinikRttapAdo; vidArya vaktraM vaDavAmukhAbham
6055118c dudrAva rAmaM sahasAbhigarjan; rAhur yathA candram ivAntarikSe
6055119a apUrayat tasya mukhaM zitAgrai; rAmaH zarair hemapinaddhapuGkhaiH
6055119c sa pUrNavaktro na zazAka vaktuM; cukUja kRcchreNa mumoha cApi
6055120a athAdade sUryamarIcikalpaM; sa brahmadaNDAntakakAlakalpam
6055120c ariSTam aindraM nizitaM supuGkhaM; rAmaH zaraM mArutatulyavegam
6055121a taM vajrajAmbUnadacArupuGkhaM; pradIptasUryajvalanaprakAzam
6055121c mahendravajrAzanitulyavegaM; rAmaH pracikSepa nizAcarAya
6055122a sa sAyako rAghavabAhucodito; dizaH svabhAsA daza saMprakAzayan
6055122c vidhUmavaizvAnaradIptadarzano; jagAma zakrAzanitulyavikramaH
6055123a sa tan mahAparvatakUTasaMnibhaM; vivRttadaMSTraM calacArukuNDalam
6055123c cakarta rakSo'dhipateH ziras tadA; yathaiva vRtrasya purA puraMdaraH
6055124a tad rAmabANAbhihataM papAta; rakSaHziraH parvatasaMnikAzam
6055124c babhaJja caryAgRhagopurANi; prAkAram uccaM tam apAtayac ca
6055125a tac cAtikAyaM himavatprakAzaM; rakSas tadA toyanidhau papAta
6055125c grAhAn mahAmInacayAn bhujaMgamAn; mamarda bhUmiM ca tathA viveza
6055126a tasmir hate brAhmaNadevazatrau; mahAbale saMyati kumbhakarNe
6055126c cacAla bhUr bhUmidharAz ca sarve; harSAc ca devAs tumulaM praNeduH
6055127a tatas tu devarSimaharSipannagAH; surAz ca bhUtAni suparNaguhyakAH
6055127c sayakSagandharvagaNA nabhogatAH; praharSitA rAma parAkrameNa
6055128a praharSam Iyur bahavas tu vAnarAH; prabuddhapadmapratimair ivAnanaiH
6055128c apUjayan rAghavam iSTabhAginaM; hate ripau bhImabale durAsade
6055129a sa kumbhakarNaM surasainyamardanaM; mahatsu yuddheSv aparAjitazramam
6055129c nananda hatvA bharatAgrajo raNe; mahAsuraM vRtram ivAmarAdhipaH
6056001a kumbhakarNaM hataM dRSTvA rAghaveNa mahAtmanA
6056001c rAkSasA rAkSasendrAya rAvaNAya nyavedayan
6056002a zrutvA vinihataM saMkhye kumbhakarNaM mahAbalam
6056002c rAvaNaH zokasaMtapto mumoha ca papAta ca
6056003a pitRvyaM nihataM zrutvA devAntakanarAntakau
6056003c trizirAz cAtikAyaz ca ruruduH zokapIDitAH
6056004a bhrAtaraM nihataM zrutvA rAmeNAkliSTakarmaNA
6056004c mahodaramahApArzvau zokAkrAntau babhUvatuH
6056005a tataH kRcchrAt samAsAdya saMjJAM rAkSasapuMgavaH
6056005c kumbhakarNavadhAd dIno vilalApa sa rAvaNaH
6056006a hA vIra ripudarpaghna kumbhakarNa mahAbala
6056006c zatrusainyaM pratApyaikaH kva mAM saMtyajya gacchasi
6056007a idAnIM khalv ahaM nAsmi yasya me patito bhujaH
6056007c dakSiNo yaM samAzritya na bibhemi surAsurAn
6056008a katham evaMvidho vIro devadAnavadarpahA
6056008c kAlAgnipratimo hy adya rAghaveNa raNe hataH
6056009a yasya te vajraniSpeSo na kuryAd vyasanaM sadA
6056009c sa kathaM rAmabANArtaH prasupto 'si mahItale
6056010a ete devagaNAH sArdham RSibhir gagane sthitAH
6056010c nihataM tvAM raNe dRSTvA ninadanti praharSitAH
6056011a dhruvam adyaiva saMhRSTA labdhalakSyAH plavaMgamAH
6056011c ArokSyantIha durgANi laGkAdvArANi sarvazaH
6056012a rAjyena nAsti me kAryaM kiM kariSyAmi sItayA
6056012c kumbhakarNavihInasya jIvite nAsti me ratiH
6056013a yady ahaM bhrAtRhantAraM na hanmi yudhi rAghavam
6056013c nanu me maraNaM zreyo na cedaM vyarthajIvitam
6056014a adyaiva taM gamiSyAmi dezaM yatrAnujo mama
6056014c na hi bhrAtqn samutsRjya kSaNaM jIvitum utsahe
6056015a devA hi mAM hasiSyanti dRSTvA pUrvApakAriNam
6056015c katham indraM jayiSyAmi kumbhakarNahate tvayi
6056016a tad idaM mAm anuprAptaM vibhISaNavacaH zubham
6056016c yad ajJAnAn mayA tasya na gRhItaM mahAtmanaH
6056017a vibhISaNavaco yAvat kumbhakarNaprahastayoH
6056017c vinAzo 'yaM samutpanno mAM vrIDayati dAruNaH
6056018a tasyAyaM karmaNaH prAto vipAko mama zokadaH
6056018c yan mayA dhArmikaH zrImAn sa nirasto vibhISaNaH
6056019a iti bahuvidham AkulAntarAtmA; kRpaNam atIva vilapya kumbhakarNam
6056019c nyapatad atha dazAnano bhRzArtas; tam anujam indraripuM hataM viditvA
6057001a evaM vilapamAnasya rAvaNasya durAtmanaH
6057001c zrutvA zokAbhitaptasya trizirA vAkyam abravIt
6057002a evam eva mahAvIryo hato nas tAta madhyamaH
6057002c na tu satpuruSA rAjan vilapanti yathA bhavAn
6057003a nUnaM tribhuvaNasyApi paryAptas tvam asi prabho
6057003c sa kasmAt prAkRta iva zokasyAtmAnam IdRzam
6057004a brahmadattAsti te zaktiH kavacaH sAyako dhanuH
6057004c sahasrakharasaMyukto ratho meghasamasvanaH
6057005a tvayAsakRd vizastreNa vizastA devadAnavAH
6057005c sa sarvAyudhasaMpanno rAghavaM zAstum arhasi
6057006a kAmaM tiSTha mahArAjanirgamiSyAmy ahaM raNam
6057006c uddhariSyAmi te zatrUn garuDaH pannagAn iha
6057007a zambaro devarAjena narako viSNunA yathA
6057007c tathAdya zayitA rAmo mayA yudhi nipAtitaH
6057008a zrutvA triziraso vAkyaM rAvaNo rAkSasAdhipaH
6057008c punar jAtam ivAtmAnaM manyate kAlacoditaH
6057009a zrutvA triziraso vAkyaM devAntakanarAntakau
6057009c atikAyaz ca tejasvI babhUvur yuddhaharSitAH
6057010a tato 'ham aham ity evaM garjanto nairRtarSabhAH
6057010c rAvaNasya sutA vIrAH zakratulyaparAkramAH
6057011a antarikSacarAH sarve sarve mAyA vizAradAH
6057011c sarve tridazadarpaghnAH sarve ca raNadurmadAH
6057012a sarve 'strabalasaMpannAH sarve vistIrNa kIrtayaH
6057012c sarve samaram AsAdya na zrUyante sma nirjitAH
6057013a sarve 'straviduSo vIrAH sarve yuddhavizAradAH
6057013c sarve pravarajijJAnAH sarve labdhavarAs tathA
6057014a sa tais tathA bhAskaratulyavarcasaiH; sutair vRtaH zatrubalapramardanaiH
6057014c rarAja rAjA maghavAn yathAmarair; vRto mahAdAnavadarpanAzanaiH
6057015a sa putrAn saMpariSvajya bhUSayitvA ca bhUSaNaiH
6057015c AzIrbhiz ca prazastAbhiH preSayAm Asa saMyuge
6057016a mahodaramahApArzvau bhrAtarau cApi rAvaNaH
6057016c rakSaNArthaM kumArANAM preSayAm Asa saMyuge
6057017a te 'bhivAdya mahAtmAnaM rAvaNaM ripurAvaNam
6057017c kRtvA pradakSiNaM caiva mahAkAyAH pratasthire
6057018a sarvauSadhIbhir gandhaiz ca samAlabhya mahAbalAH
6057018c nirjagmur nairRtazreSThAH SaD ete yuddhakAGkSiNaH
6057019a tataH sudarzanaM nAma nIlajImUtasaMnibham
6057019c airAvatakule jAtam Aruroha mahodaraH
6057020a sarvAyudhasamAyuktaM tUNIbhiz ca svalaMkRtam
6057020c rarAja gajam AsthAya savitevAstamUrdhani
6057021a hayottamasamAyuktaM sarvAyudhasamAkulam
6057021c Aruroha rathazreSThaM trizirA rAvaNAtmajaH
6057022a trizirA ratham AsthAya virarAja dhanurdharaH
6057022c savidyudulkaH sajvAlaH sendracApa ivAmbudaH
6057023a tribhiH kirITais trizirAH zuzubhe sa rathottame
6057023c himavAn iva zailendras tribhiH kAJcanaparvataiH
6057024a atikAyo 'pi tejasvI rAkSasendrasutas tadA
6057024c Aruroha rathazreSThaM zreSThaH sarvadhanuSmatAm
6057025a sucakrAkSaM susaMyuktaM sAnukarSaM sakUbaram
6057025c tUNIbANAsanair dIptaM prAsAsi parighAkulam
6057026a sa kAJcanavicitreNa kirITena virAjatA
6057026c bhUSaNaiz ca babhau meruH prabhAbhir iva bhAsvaraH
6057027a sa rarAja rathe tasmin rAjasUnur mahAbalaH
6057027c vRto nairRtazArdUlair vajrapANir ivAmaraiH
6057028a hayam uccaiHzravaH prakhyaM zvetaM kanakabhUSaNam
6057028c manojavaM mahAkAyam Aruroha narAntakaH
6057029a gRhItvA prAsam uklAbhaM virarAja narAntakaH
6057029c zaktim AdAya tejasvI guhaH zatruSv ivAhave
6057030a devAntakaH samAdAya parighaM vajrabhUSaNam
6057030c parigRhya giriM dorbhyAM vapur viSNor viDambayan
6057031a mahApArzvo mahAtejA gadAm AdAya vIryavAn
6057031c virarAja gadApANiH kubera iva saMyuge
6057032a te pratasthur mahAtmAno balair apratimair vRtAH
6057032c surA ivAmarAvatyAM balair apratimair vRtAH
6057033a tAn gajaiz ca turaMgaiz ca rathaiz cAmbudanisvanaiH
6057033c anujagmur mahAtmAno rAkSasAH pravarAyudhAH
6057034a te virejur mahAtmAno kumArAH sUryavarcasaH
6057034c kirITinaH zriyA juSTA grahA dIptA ivAmbare
6057035a pragRhItA babhau teSAM chatrANAm AvaliH sitA
6057035c zAradAbhrapratIkAzAM haMsAvalir ivAmbare
6057036a maraNaM vApi nizcitya zatrUNAM vA parAjayam
6057036c iti kRtvA matiM vIrA nirjagmuH saMyugArthinaH
6057037a jagarjuz ca praNeduz ca cikSipuz cApi sAyakAn
6057037c jahRSuz ca mahAtmAno niryAnto yuddhadurmadAH
6057038a kSveDitAsphoTaninadaiH saMcacAleva medinI
6057038c rakSasAM siMhanAdaiz ca pusphoTeva tadAmbaram
6057039a te 'bhiniSkramya muditA rAkSasendrA mahAbalAH
6057039c dadRzur vAnarAnIkaM samudyatazilAnagam
6057040a harayo 'pi mahAtmAno dadRzur nairRtaM balam
6057040c hastyazvarathasaMbAdhaM kiGkiNIzatanAditam
6057041a nIlajImUtasaMkAzaM samudyatamahAyudham
6057041c dIptAnalaraviprakhyair nairRtaiH sarvato vRtam
6057042a tad dRSTvA balam AyAntaM labdhalakSyAH plavaMgamAH
6057042c samudyatamahAzailAH saMpraNedur muhur muhuH
6057043a tataH samudghuSTaravaM nizamya; rakSogaNA vAnarayUthapAnAm
6057043c amRSyamANAH paraharSam ugraM; mahAbalA bhImataraM vineduH
6057044a te rAkSasabalaM ghoraM pravizya hariyUthapAH
6057044c vicerur udyataiH zailair nagAH zikhariNo yathA
6057045a ke cid AkAzam Avizya ke cid urvyAM plavaMgamAH
6057045c rakSaHsainyeSu saMkruddhAz cerur drumazilAyudhAH
6057046a te pAdapazilAzailaiz cakrur vRSTim anuttamAm
6057046c bANaughair vAryamANAz ca harayo bhImavikramAH
6057047a siMhanAdAn vineduz ca raNe rAkSasavAnarAH
6057047c zilAbhiz cUrNayAm Asur yAtudhAnAn plavaMgamAH
6057048a nijaghnuH saMyuge kruddhAH kavacAbharaNAvRtAn
6057048c ke cid rathagatAn vIrAn gajavAjigatAn api
6057049a nijaghnuH sahasAplutya yAtudhAnAn plavaMgamAH
6057049c zailazRGganipAtaiz ca muSTibhir vAntalocanAH
6057049e celuH petuz ca neduz ca tatra rAkSasapuMgavAH
6057050a tataH zailaiz ca khaDgaiz ca visRSTair harirAkSasaiH
6057050c muhUrtenAvRtA bhUmir abhavac choNitAplutA
6057051a vikIrNaparvatAkArai rakSobhir arimardanaiH
6057051c AkSiptAH kSipyamANAz ca bhagnazUlAz ca vAnaraiH
6057052a vAnarAn vAnarair eva jagnus te rajanIcarAH
6057052c rAkSasAn rAkSasair eva jaghnus te vAnarA api
6057053a AkSipya ca zilAs teSAM nijaghnU rAkSasA harIn
6057053c teSAM cAcchidya zastrANi jaghnU rakSAMsi vAnarAH
6057054a nijaghnuH zailazUlAstrair vibhiduz ca parasparam
6057054c siMhanAdAn vineduz ca raNe vAnararAkSasAH
6057055a chinnavarmatanutrANA rAkSasA vAnarair hatAH
6057055c rudhiraM prasrutAs tatra rasasAram iva drumAH
6057056a rathena ca rathaM cApi vAraNena ca vAraNam
6057056c hayena ca hayaM ke cin nijaghnur vAnarA raNe
6057057a kSuraprair ardhacandraiz ca bhallaiz ca nizitaiH zaraiH
6057057c rAkSasA vAnarendrANAM cicchiduH pAdapAJ zilAH
6057058a vikIrNaiH parvatAgraiz ca drumaiz chinnaiz ca saMyuge
6057058c hataiz ca kapirakSobhir durgamA vasudhAbhavat
6057059a tasmin pravRtte tumule vimarde; prahRSyamANeSu valI mukheSu
6057059c nipAtyamAneSu ca rAkSaseSu; maharSayo devagaNAz ca neduH
6057060a tato hayaM mArutatulyavegam; Aruhya zaktiM nizitAM pragRhya
6057060c narAntako vAnararAjasainyaM; mahArNavaM mIna ivAviveza
6057061a sa vAnarAn saptazatAni vIraH; prAsena dIptena vinirbibheda
6057061c ekaH kSaNenendraripur mahAtmA; jaghAna sainyaM haripuMgavAnAm
6057062a dadRzuz ca mahAtmAnaM hayapRSThe pratiSThitam
6057062c carantaM harisainyeSu vidyAdharamaharSayaH
6057063a sa tasya dadRze mArgo mAMsazoNitakardamaH
6057063c patitaiH parvatAkArair vAnarair abhisaMvRtaH
6057064a yAvad vikramituM buddhiM cakruH plavagapuMgavAH
6057064c tAvad etAn atikramya nirbibheda narAntakaH
6057065a jvalantaM prAsam udyamya saMgrAmAnte narAntakaH
6057065c dadAha harisainyAni vanAnIva vibhAvasuH
6057066a yAvad utpATayAm Asur vRkSAJ zailAn vanaukasaH
6057066c tAvat prAsahatAH petur vajrakRttA ivAcalAH
6057067a dikSu sarvAsu balavAn vicacAra narAntakaH
6057067c pramRdnan sarvato yuddhe prAvRTkAle yathAnilaH
6057068a na zekur dhAvituM vIrA na sthAtuM spandituM kutaH
6057068c utpatantaM sthitaM yAntaM sarvAn vivyAdha vIryavAn
6057069a ekenAntakakalpena prAsenAdityatejasA
6057069c bhinnAni harisainyAni nipetur dharaNItale
6057070a vajraniSpeSasadRzaM prAsasyAbhinipAtanam
6057070c na zekur vAnarAH soDhuM te vinedur mahAsvanam
6057071a patatAM harivIrANAM rUpANi pracakAzire
6057071c vajrabhinnAgrakUTAnAM zailAnAM patatAm iva
6057072a ye tu pUrvaM mahAtmAnaH kumbhakarNena pAtitAH
6057072c te 'svasthA vAnarazreSThAH sugrIvam upatasthire
6057073a viprekSamANaH sugrIvo dadarza harivAhinIm
6057073c narAntakabhayatrastAM vidravantIm itas tataH
6057074a vidrutAM vAhinIM dRSTvA sa dadarza narAntakam
6057074c gRhItaprAsam AyAntaM hayapRSThe pratiSThitam
6057075a athovAca mahAtejAH sugrIvo vAnarAdhipaH
6057075c kumAram aGgadaM vIraM zakratulyaparAkramam
6057076a gacchainaM rAkSasaM vIra yo 'sau turagam AsthitaH
6057076c kSobhayantaM haribalaM kSipraM prANair viyojaya
6057077a sa bhartur vacanaM zrutvA niSpapAtAGgadas tadA
6057077c anIkAn meghasaMkAzAn meghAnIkAd ivAMzumAn
6057078a zailasaMghAtasaMkAzo harINAm uttamo 'GgadaH
6057078c rarAjAGgadasaMnaddhaH sadhAtur iva parvataH
6057079a nirAyudho mahAtejAH kevalaM nakhadaMSTravAn
6057079c narAntakam abhikramya vAliputro 'bravId vacaH
6057080a tiSTha kiM prAkRtair ebhir haribhis tvaM kariSyasi
6057080c asmin vajrasamasparze prAsaM kSipa mamorasi
6057081a aGgadasya vacaH zrutvA pracukrodha narAntakaH
6057081c saMdazya dazanair oSThaM nizvasya ca bhujaMgavat
6057082a sa prAsam Avidhya tadAGgadAya; samujjvalantaM sahasotsasarja
6057082c sa vAliputrorasi vajrakalpe; babhUva bhagno nyapatac ca bhUmau
6057083a taM prAsam Alokya tadA vibhagnaM; suparNakRttoragabhogakalpam
6057083c talaM samudyamya sa vAliputras; turaMgamasyAbhijaghAna mUrdhni
6057084a nimagnapAdaH sphuTitAkSi tAro; niSkrAntajihvo 'calasaMnikAzaH
6057084c sa tasya vAjI nipapAta bhUmau; talaprahAreNa vikIrNamUrdhA
6057085a narAntakaH krodhavazaM jagAma; hataM turagaM patitaM nirIkSya
6057085c sa muSTim udyamya mahAprabhAvo; jaghAna zIrSe yudhi vAliputram
6057086a athAGgado muSTivibhinnamUrdhA; susrAva tIvraM rudhiraM bhRzoSNam
6057086c muhur vijajvAla mumoha cApi; saMjJAM samAsAdya visiSmiye ca
6057087a athAGgado vajrasamAnavegaM; saMvartya muSTiM girizRGgakalpam
6057087c nipAtayAm Asa tadA mahAtmA; narAntakasyorasi vAliputraH
6057088a sa muSTiniSpiSTavibhinnavakSA; jvAlAM vamaJ zoNitadigdhagAtraH
6057088c narAntako bhUmitale papAta; yathAcalo vajranipAtabhagnaH
6057089a athAntarikSe tridazottamAnAM; vanaukasAM caiva mahApraNAdaH
6057089c babhUva tasmin nihate 'gryavIre; narAntake vAlisutena saMkhye
6057090a athAGgado rAmamanaH praharSaNaM; suduSkaraM taM kRtavAn hi vikramam
6057090c visiSmiye so 'py ativIrya vikramaH; punaz ca yuddhe sa babhUva harSitaH
6058001a narAntakaM hataM dRSTvA cukruzur nairRtarSabhAH
6058001c devAntakas trimUrdhA ca paulastyaz ca mahodaraH
6058002a ArUDho meghasaMkAzaM vAraNendraM mahodaraH
6058002c vAliputraM mahAvIryam abhidudrAva vIryavAn
6058003a bhrAtRvyasanasaMtaptas tadA devAntako balI
6058003c AdAya parighaM dIptam aGgadaM samabhidravat
6058004a ratham AdityasaMkAzaM yuktaM paramavAjibhiH
6058004c AsthAya trizirA vIro vAliputram athAbhyayAt
6058005a sa tribhir devadarpaghnair nairRtendrair abhidrutaH
6058005c vRkSam utpATayAm Asa mahAviTapam aGgadaH
6058006a devAntakAya taM vIraz cikSepa sahasAGgadaH
6058006c mahAvRkSaM mahAzAkhaM zakro dIptam ivAzanim
6058007a trizirAs taM praciccheda zarair AzIviSopamaiH
6058007c sa vRkSaM kRttam Alokya utpapAta tato 'GgadaH
6058008a sa vavarSa tato vRkSAJ zilAz ca kapikuJjaraH
6058008c tAn praciccheda saMkruddhas trizirA nizitaiH zaraiH
6058009a parighAgreNa tAn vRkSAn babhaJja ca surAntakaH
6058009c trizirAz cAGgadaM vIram abhidudrAva sAyakaiH
6058010a gajena samabhidrutya vAliputraM mahodaraH
6058010c jaghAnorasi saMkruddhas tomarair vajrasaMnibhaiH
6058011a devAntakaz ca saMkruddhaH parigheNa tadAGgadam
6058011c upagamyAbhihatyAzu vyapacakrAma vegavAn
6058012a sa tribhir nairRtazreSThair yugapat samabhidrutaH
6058012c na vivyathe mahAtejA vAliputraH pratApavAn
6058013a talena bhRzam utpatya jaghAnAsya mahAgajam
6058013c petatur locane tasya vinanAda sa vAraNaH
6058014a viSANaM cAsya niSkRSya vAliputro mahAbalaH
6058014c devAntakam abhidrutya tADayAm Asa saMyuge
6058015a sa vihvalitasarvAGgo vAtoddhata iva drumaH
6058015c lAkSArasasavarNaM ca susrAva rudhiraM mukhAt
6058016a athAzvAsya mahAtejAH kRcchrAd devAntako balI
6058016c Avidhya parighaM ghoram AjaghAna tadAGgadam
6058017a parighAbhihataz cApi vAnarendrAtmajas tadA
6058017c jAnubhyAM patito bhUmau punar evotpapAta ha
6058018a samutpatantaM trizirAs tribhir AzIviSopamaiH
6058018c ghorair haripateH putraM lalATe 'bhijaghAna ha
6058019a tato 'GgadaM parikSiptaM tribhir nairRtapuMgavaiH
6058019c hanUmAn api vijJAya nIlaz cApi pratasthatuH
6058020a tataz cikSepa zailAgraM nIlas trizirase tadA
6058020c tad rAvaNasuto dhImAn bibheda nizitaiH zaraiH
6058021a tad bANazatanirbhinnaM vidAritazilAtalam
6058021c savisphuliGgaM sajvAlaM nipapAta gireH ziraH
6058022a tato jRmbhitam Alokya harSAd devAntakas tadA
6058022c parigheNAbhidudrAva mArutAtmajam Ahave
6058023a tam Apatantam utpatya hanUmAn mArutAtmajaH
6058023c AjaghAna tadA mUrdhni vajravegena muSTinA
6058024a sa muSTiniSpiSTavikIrNamUrdhA; nirvAntadantAkSivilambijihvaH
6058024c devAntako rAkSasarAjasUnur; gatAsur urvyAM sahasA papAta
6058025a tasmin hate rAkSasayodhamukhye; mahAbale saMyati devazatrau
6058025c kruddhas trimUrdhA nizitAgram ugraM; vavarSa nIlorasi bANavarSam
6058026a sa taiH zaraughair abhivarSyamANo; vibhinnagAtraH kapisainyapAlaH
6058026c nIlo babhUvAtha visRSTagAtro; viSTambhitas tena mahAbalena
6058027a tatas tu nIlaH pratilabhya saMjJAM; zailaM samutpATya savRkSaSaNDam
6058027c tataH samutpatya bhRzogravego; mahodaraM tena jaghAna mUrdhni
6058028a tataH sa zailAbhinipAtabhagno; mahodaras tena saha dvipena
6058028c vipothito bhUmitale gatAsuH; papAta varjAbhihato yathAdriH
6058029a pitRvyaM nihataM dRSTvA trizirAz cApam Adade
6058029c hanUmantaM ca saMkruddho vivyAdha nizitaiH zaraiH
6058030a hanUmAMs tu samutpatya hayAMs trizirasas tadA
6058030c vidadAra nakhaiH kruddho gajendraM mRgarAD iva
6058031a atha zaktiM samAdAya kAlarAtrim ivAntakaH
6058031c cikSepAnilaputrAya trizirA rAvaNAtmajaH
6058032a divi kSiptAm ivolkAM tAM zaktiM kSiptAm asaMgatAm
6058032c gRhItvA harizArdUlo babhaJja ca nanAda ca
6058033a tAM dRSTvA ghorasaMkAzAM zaktiM bhagnAM hanUmatA
6058033c prahRSTA vAnaragaNA vinedur jaladA iva
6058034a tataH khaDgaM samudyamya trizirA rAkSasottamaH
6058034c nicakhAna tadA roSAd vAnarendrasya vakSasi
6058035a khaDgaprahArAbhihato hanUmAn mArutAtmajaH
6058035c AjaghAna trimUrdhAnaM talenorasi vIryavAn
6058036a sa talabhihatas tena srastahastAmbaro bhuvi
6058036c nipapAta mahAtejAs trizirAs tyaktacetanaH
6058037a sa tasya patataH khaDgaM samAcchidya mahAkapiH
6058037c nanAda girisaMkAzas trAsayan sarvanairRtAn
6058038a amRSyamANas taM ghoSam utpapAta nizAcaraH
6058038c utpatya ca hanUmantaM tADayAm Asa muSTinA
6058039a tena muSTiprahAreNa saMcukopa mahAkapiH
6058039c kupitaz ca nijagrAha kirITe rAkSasarSabham
6058040a sa tasya zIrSANy asinA zitena; kirITajuSTAni sakuNDalAni
6058040c kruddhaH praciccheda suto 'nilasya; tvaSTuH sutasyeva zirAMsi zakraH
6058041a tAny AyatAkSANy agasaMnibhAni; pradIptavaizvAnaralocanAni
6058041c petuH zirAMsIndraripor dharaNyAM; jyotIMSi muktAni yathArkamArgAt
6058042a tasmin hate devaripau trizIrSe; hanUmata zakraparAkrameNa
6058042c neduH plavaMgAH pracacAla bhUmI; rakSAMsy atho dudruvire samantAt
6058043a hataM trizirasaM dRSTvA tathaiva ca mahodaram
6058043c hatau prekSya durAdharSau devAntakanarAntakau
6058044a cukopa paramAmarSI mahApArzvo mahAbalaH
6058044c jagrAhArciSmatIM cApi gadAM sarvAyasIM zubhAm
6058045a hemapaTTaparikSiptAM mAMsazoNitalepanAm
6058045c virAjamAnAM vapuSA zatruzoNitaraJjitAm
6058046a tejasA saMpradIptAgrAM raktamAlyavibhUSitAm
6058046c airAvatamahApadmasArvabhauma bhayAvahAm
6058047a gadAm AdAya saMkruddho mahApArzvo mahAbalaH
6058047c harIn samabhidudrAva yugAntAgnir iva jvalan
6058048a atharSayaH samutpatya vAnaro ravaNAnujam
6058048c mahApArzvam upAgamya tasthau tasyAgrato balI
6058049a taM purastAt sthitaM dRSTvA vAnaraM parvatopamam
6058049c AjaghAnorasi kruddho gadayA vajrakalpayA
6058050a sa tayAbhihatas tena gadayA vAnararSabhaH
6058050c bhinnavakSAH samAdhUtaH susrAva rudhiraM bahu
6058051a sa saMprApya cirAt saMjJAm RSabho vAnararSabhaH
6058051c kruddho visphuramANauSTho mahApArzvam udaikSata
6058052a tAM gRhItvA gadAM bhImAm Avidhya ca punaH punaH
6058052c mattAnIkaM mahApArzvaM jaghAna raNamUrdhani
6058053a sa svayA gadayA bhinno vikIrNadazanekSaNaH
6058053c nipapAta mahApArzvo vajrAhata ivAcalaH
6058054a tasmin hate bhrAtari rAvaNasya; tan nairRtAnAM balam arNavAbham
6058054c tyaktAyudhaM kevalajIvitArthaM; dudrAva bhinnArNavasaMnikAzam
6059001a svabalaM vyathitaM dRSTvA tumulaM lomaharSaNam
6059001c bhrAtqMz ca nihatAn dRSTvA zakratulyaparAkramAn
6059002a pitRvyau cApi saMdRzya samare saMniSUditau
6059002c mahodaramahApArzvau bhrAtarau rAkSasarSabhau
6059003a cukopa ca mahAtejA brahmadattavaro yudhi
6059003c atikAyo 'drisaMkAzo devadAnavadarpahA
6059004a sa bhAskarasahasrasya saMghAtam iva bhAsvaram
6059004c ratham AsthAya zakrArir abhidudrAva vAnarAn
6059005a sa visphArya mahac cApaM kirITI mRSTakuNDalaH
6059005c nAma vizrAvayAm Asa nanAda ca mahAsvanam
6059006a tena siMhapraNAdena nAmavizrAvaNena ca
6059006c jyAzabdena ca bhImena trAsayAm Asa vAnarAn
6059007a te tasya rUpam Alokya yathA viSNos trivikrame
6059007c bhayArtA vAnarAH sarve vidravanti dizo daza
6059008a te 'tikAyaM samAsAdya vAnarA mUDhacetasaH
6059008c zaraNyaM zaraNaM jagmur lakSmaNAgrajam Ahave
6059009a tato 'tikAyaM kAkutstho rathasthaM parvatopamam
6059009c dadarza dhanvinaM dUrAd garjantaM kAlameghavat
6059010a sa taM dRSTvA mahAtmAnaM rAghavas tu suvismitaH
6059010c vAnarAn sAntvayitvA tu vibhISaNam uvAca ha
6059011a ko 'sau parvatasaMkAzo dhanuSmAn harilocanaH
6059011c yukte hayasahasreNa vizAle syandane sthitaH
6059012a ya eSa nizitaiH zUlaiH sutIkSNaiH prAsatomaraiH
6059012c arciSmadbhir vRto bhAti bhUtair iva mahezvaraH
6059013a kAlajihvAprakAzAbhir ya eSo 'bhivirAjate
6059013c AvRto rathazaktIbhir vidyudbhir iva toyadaH
6059014a dhanUMsi cAsya sajyAni hemapRSThAni sarvazaH
6059014c zobhayanti rathazreSThaM zakrapAtam ivAmbaram
6059015a ka eSa rakSaH zArdUlo raNabhUmiM virAjayan
6059015c abhyeti rathinAM zreSTho rathenAdityatejasA
6059016a dhvajazRGgapratiSThena rAhuNAbhivirAjate
6059016c sUryarazmiprabhair bANair dizo daza virAjayan
6059017a triNataM meghanirhrAdaM hemapRSTham alaMkRtam
6059017c zatakratudhanuHprakhyaM dhanuz cAsya virAjate
6059018a sadhvajaH sapatAkaz ca sAnukarSo mahArathaH
6059018c catuHsAdisamAyukto meghastanitanisvanaH
6059019a viMzatir daza cASTau ca tUNIraratham AsthitAH
6059019c kArmukANi ca bhImAni jyAz ca kAJcanapiGgalAH
6059020a dvau ca khaDgau rathagatau pArzvasthau pArzvazobhinau
6059020c caturhastatsarucitau vyaktahastadazAyatau
6059021a raktakaNThaguNo dhIro mahAparvatasaMnibhaH
6059021c kAlaH kAlamahAvaktro meghastha iva bhAskaraH
6059022a kAJcanAGgadanaddhAbhyAM bhujAbhyAm eSa zobhate
6059022c zRGgAbhyAm iva tuGgAbhyAM himavAn parvatottamaH
6059023a kuNDalAbhyAM tu yasyaitad bhAti vaktraM zubhekSaNam
6059023c punarvasvantaragataM pUrNabimbam ivaindavam
6059024a AcakSva me mahAbAho tvam enaM rAkSasottamam
6059024c yaM dRSTvA vAnarAH sarve bhayArtA vidrutA dizaH
6059025a sa pRSTho rAjaputreNa rAmeNAmitatejasA
6059025c AcacakSe mahAtejA rAghavAya vibhISaNaH
6059026a dazagrIvo mahAtejA rAjA vaizravaNAnujaH
6059026c bhImakarmA mahotsAho rAvaNo rAkSasAdhipaH
6059027a tasyAsId vIryavAn putro rAvaNapratimo raNe
6059027c vRddhasevI zrutadharaH sarvAstraviduSAM varaH
6059028a azvapRSThe rathe nAge khaDge dhanuSi karSaNe
6059028c bhede sAntve ca dAne ca naye mantre ca saMmataH
6059029a yasya bAhuM samAzritya laGkA bhavati nirbhayA
6059029c tanayaM dhAnyamAlinyA atikAyam imaM viduH
6059030a etenArAdhito brahmA tapasA bhAvitAtmanA
6059030c astrANi cApy avAptAni ripavaz ca parAjitAH
6059031a surAsurair avadhyatvaM dattam asmai svayambhuvA
6059031c etac ca kavacaM divyaM rathaz caiSo 'rkabhAskaraH
6059032a etena zatazo devA dAnavAz ca parAjitAH
6059032c rakSitAni ca rakSAmi yakSAz cApi niSUditAH
6059033a vajraM viSTambhitaM yena bANair indrasya dhImataH
6059033c pAzaH salilarAjasya yuddhe pratihatas tathA
6059034a eSo 'tikAyo balavAn rAkSasAnAm atharSabhaH
6059034c rAvaNasya suto dhImAn devadanava darpahA
6059035a tad asmin kriyatAM yatnaH kSipraM puruSapuMgava
6059035c purA vAnarasainyAni kSayaM nayati sAyakaiH
6059036a tato 'tikAyo balavAn pravizya harivAhinIm
6059036c visphArayAm Asa dhanur nanAda ca punaH punaH
6059037a taM bhImavapuSaM dRSTvA rathasthaM rathinAM varam
6059037c abhipetur mahAtmAno ye pradhAnAH plavaMgamAH
6059038a kumudo dvivido maindo nIlaH zarabha eva ca
6059038c pAdapair girizRGgaiz ca yugapat samabhidravan
6059039a teSAM vRkSAMz ca zailAMz ca zaraiH kAJcanabhUSaNaiH
6059039c atikAyo mahAtejAz cicchedAstravidAM varaH
6059040a tAMz caiva sarAn sa harIJ zaraiH sarvAyasair balI
6059040c vivyAdhAbhimukhaH saMkhye bhImakAyo nizAcaraH
6059041a te 'rditA bANabarSeNa bhinnagAtrAH plavaMgamAH
6059041c na zekur atikAyasya pratikartuM mahAraNe
6059042a tat sainyaM harivIrANAM trAsayAm Asa rAkSasaH
6059042c mRgayUtham iva kruddho harir yauvanam AsthitaH
6059043a sa rASasendro harisainyamadhye; nAyudhyamAnaM nijaghAna kaM cit
6059043c upetya rAmaM sadhanuH kalApI; sagarvitaM vAkyam idaM babhASe
6059044a rathe sthito 'haM zaracApapANir; na prAkRtaM kaM cana yodhayAmi
6059044c yasyAsti zaktir vyavasAya yuktA; dadAtuM me kSipram ihAdya yuddham
6059045a tat tasya vAkyaM bruvato nizamya; cukopa saumitrir amitrahantA
6059045c amRSyamANaz ca samutpapAta; jagrAha cApaM ca tataH smayitvA
6059046a kruddhaH saumitrir utpatya tUNAd AkSipya sAyakam
6059046c purastAd atikAyasya vicakarSa mahad dhanuH
6059047a pUrayan sa mahIM zailAn AkAzaM sAgaraM dizaH
6059047c jyAzabdo lakSmaNasyogras trAsayan rajanIcarAn
6059048a saumitrez cApanirghoSaM zrutvA pratibhayaM tadA
6059048c visiSmiye mahAtejA rAkSasendrAtmajo balI
6059049a athAtikAyaH kupito dRSTvA lakSmaNam utthitam
6059049c AdAya nizitaM bANam idaM vacanam abravIt
6059050a bAlas tvam asi saumitre vikrameSv avicakSaNaH
6059050c gaccha kiM kAlasadRzaM mAM yodhayitum icchasi
6059051a na hi madbAhusRSTAnAm astrANAM himavAn api
6059051c soDhum utsahate vegam antarikSam atho mahI
6059052a sukhaprasuptaM kAlAgniM prabodhayitum icchasi
6059052c nyasya cApaM nivartasva mA prANAJ jahi madgataH
6059053a atha vA tvaM pratiSTabdho na nivartitum icchasi
6059053c tiSTha prANAn parityajya gamiSyasi yamakSayam
6059054a pazya me nizitAn bANAn aridarpaniSUdanAn
6059054c IzvarAyudhasaMkAzAMs taptakAJcanabhUSaNAn
6059055a eSa te sarpasaMkAzo bANaH pAsyati zoNitam
6059055c mRgarAja iva kruddho nAgarAjasya zoNitam
6059056a zrutvAtikAyasya vacaH saroSaM; sagarvitaM saMyati rAjaputraH
6059056c sa saMcukopAtibalo bRhacchrIr; uvAca vAkyaM ca tato mahArtham
6059057a na vAkyamAtreNa bhavAn pradhAno; na katthanAt satpuruSA bhavanti
6059057c mayi sthite dhanvini bANapANau; vidarzayasvAtmabalaM durAtman
6059058a karmaNA sUcayAtmAnaM na vikatthitum arhasi
6059058c pauruSeNa tu yo yuktaH sa tu zUra iti smRtaH
6059059a sarvAyudhasamAyukto dhanvI tvaM ratham AsthitaH
6059059c zarair vA yadi vApy astrair darzayasva parAkramam
6059060a tataH ziras te nizitaiH pAtayiSyAmy ahaM zaraiH
6059060c mArutaH kAlasaMpakvaM vRntAt tAlaphalaM yathA
6059061a adya te mAmakA bANAs taptakAJcanabhUSaNAH
6059061c pAsyanti rudhiraM gAtrAd bANazalyAntarotthitam
6059062a bAlo 'yam iti vijJAya na mAvajJAtum arhasi
6059062c bAlo vA yadi vA vRddho mRtyuM jAnIhi saMyuge
6059063a lakSmaNasya vacaH zrutvA hetumat paramArthavat
6059063c atikAyaH pracukrodha bANaM cottamam Adade
6059064a tato vidyAdharA bhUtA devA daityA maharSayaH
6059064c guhyakAz ca mahAtmAnas tad yuddhaM dadRzus tadA
6059065a tato 'tikAyaH kupitaz cApam Aropya sAyakam
6059065c lakSmaNasya pracikSepa saMkSipann iva cAmbaram
6059066a tam ApatantaM nizitaM zaram AzIviSopamam
6059066c ardhacandreNa ciccheda lakSmaNaH paravIrahA
6059067a taM nikRttaM zaraM dRSTvA kRttabhogam ivoragam
6059067c atikAyo bhRzaM kruddhaH paJcabANAn samAdade
6059068a tAJ zarAn saMpracikSepa lakSmaNAya nizAcaraH
6059068c tAn aprAptAJ zarais tIkSNaiz ciccheda bharatAnujaH
6059069a sa tAMz chittvA zarais tIkSNair lakSmaNaH paravIrahA
6059069c Adade nizitaM bANaM jvalantam iva tejasA
6059070a tam AdAya dhanuH zreSThe yojayAm Asa lakSmaNaH
6059070c vicakarSa ca vegena visasarja ca sAyakam
6059071a pUrNAyatavisRSTena zareNAnata parvaNA
6059071c lalATe rAkSasazreSTham AjaghAna sa vIryavAn
6059072a sa lalATe zaro magnas tasya bhImasya rakSasaH
6059072c dadRze zoNitenAktaH pannagendra ivAhave
6059073a rAkSasaH pracakampe ca lakSmaNeSu prakampitaH
6059073c rudrabANahataM bhImaM yathA tripuragopuram
6059074a cintayAm Asa cAzvasya vimRzya ca mahAbalaH
6059074c sAdhu bANanipAtena zvAghanIyo 'si me ripuH
6059075a vicAryaivaM vinamyAsyaM vinamya ca bhujAv ubhau
6059075c sa rathopastham AsthAya rathena pracacAra ha
6059076a ekaM trIn paJca sapteti sAyakAn rAkSasarSabhaH
6059076c Adade saMdadhe cApi vicakarSotsasarja ca
6059077a te bANAH kAlasaMkAzA rAkSasendradhanuz cyutAH
6059077c hemapuGkhA raviprakhyAz cakrur dIptam ivAmbaram
6059078a tatas tAn rAkSasotsRSTAJ zaraughAn rAvaNAnujaH
6059078c asaMbhrAntaH praciccheda nizitair bahubhiH zaraiH
6059079a tAJ zarAn yudhi saMprekSya nikRttAn rAvaNAtmajaH
6059079c cukopa tridazendrArir jagrAha nizitaM zaram
6059080a sa saMdhAya mahAtejAs taM bANaM sahasotsRjat
6059080c tataH saumitrim AyAntam AjaghAna stanAntare
6059081a atikAyena saumitris tADito yudhi vakSasi
6059081c susrAva rudhiraM tIvraM madaM matta iva dvipaH
6059082a sa cakAra tadAtmAnaM vizalyaM sahasA vibhuH
6059082c jagrAha ca zaraM tISNam astreNApi samAdadhe
6059083a Agneyena tadAstreNa yojayAm Asa sAyakam
6059083c sa jajvAla tadA bANo dhanuz cAsya mahAtmanaH
6059084a atikAyo 'titejasvI sauram astraM samAdade
6059084c tena bANaM bhujaMgAbhaM hemapuGkham ayojayat
6059085a tatas taM jvalitaM ghoraM lakSmaNaH zaram Ahitam
6059085c atikAyAya cikSepa kAladaNDam ivAntakaH
6059086a AgneyenAbhisaMyuktaM dRSTvA bANaM nizAcaraH
6059086c utsasarja tadA bANaM dIptaM sUryAstrayojitam
6059087a tAv ubhAv ambare bANAv anyonyam abhijaghnatuH
6059087c tejasA saMpradIptAgrau kruddhAv iva bhujaM gamau
6059088a tAv anyonyaM vinirdahya petatur dharaNItale
6059088c nirarciSau bhasmakRtau na bhrAjete zarottamau
6059089a tato 'tikAyaH saMkruddhas tv astram aiSIkam utsRjat
6059089c tat praciccheda saumitrir astram aindreNa vIryavAn
6059090a aiSIkaM nihataM dRSTvA kumAro rAvaNAtmajaH
6059090c yAmyenAstreNa saMkruddho yojayAm Asa sAyakam
6059091a tatas tad astraM cikSepa lakSmaNAya nizAcaraH
6059091c vAyavyena tad astraM tu nijaghAna sa lakSmaNaH
6059092a athainaM zaradhArAbhir dhArAbhir iva toyadaH
6059092c abhyavarSata saMkruddho lakSmaNo rAvaNAtmajam
6059093a te 'tikAyaM samAsAdya kavace vajrabhUSite
6059093c bhagnAgrazalyAH sahasA petur bANA mahItale
6059094a tAn moghAn abhisaMprekSya lakSmaNaH paravIrahA
6059094c abhyavarSata bANAnAM sahasreNa mahAyazAH
6059095a sa varSyamANo bANaughair atikAyo mahAbalaH
6059095c avadhyakavacaH saMkhye rAkSaso naiva vivyathe
6059096a na zazAka rujaM kartuM yudhi tasya narottamaH
6059096c athainam abhyupAgamya vAyur vAkyam uvAca ha
6059097a brahmadattavaro hy eSa avadhya kavacAvRtaH
6059097c brAhmeNAstreNa bhindhy enam eSa vadhyo hi nAnyathA
6059098a tataH sa vAyor vacanaM nizamya; saumitrir indrapratimAnavIryaH
6059098c samAdade bANam amoghavegaM; tad brAhmam astraM sahasA niyojya
6059099a tasmin varAstre tu niyujyamAne; saumitriNA bANavare zitAgre
6059099c dizaH sacandrArkamahAgrahAz ca; nabhaz ca tatrAsa rarAsa corvI
6059100a taM brahmaNo 'streNa niyujya cApe; zaraM supuGkhaM yamadUtakalpam
6059100c saumitrir indrArisutasya tasya; sasarja bANaM yudhi vajrakalpam
6059101a taM lakSmaNotsRSTam amoghavegaM; samApatantaM jvalanaprakAzam
6059101c suvarNavajrottamacitrapuGkhaM; tadAtikAyaH samare dadarza
6059102a taM prekSamANaH sahasAtikAyo; jaghAna bANair nizitair anekaiH
6059102c sa sAyakas tasya suparNavegas; tadAtivegena jagAma pArzvam
6059103a tam AgataM prekSya tadAtikAyo; bANaM pradIptAntakakAlakalpam
6059103c jaghAna zaktyRSTigadAkuThAraiH; zUlair halaiz cApy avipannaceSTaH
6059104a tAny AyudhAny adbhutavigrahANi; moghAni kRtvA sa zaro 'gnidIptaH
6059104c prasahya tasyaiva kirITajuSTaM; tadAtikAyasya ziro jahAra
6059105a tac chiraH saziras trANaM lakSmaNeSuprapIDitam
6059105c papAta sahasA bhUmau zRGgaM himavato yathA
6059106a praharSayuktA bahavas tu vAnarA; prabuddhapadmapratimAnanAs tadA
6059106c apUjaya&l lakSmaNam iSTabhAginaM; hate ripau bhImabale durAsade
6060001a tato hatAn rAkSasapuMgavAMs tAn; devAntakAditriziro 'tikAyAn
6060001c rakSogaNAs tatra hatAvaziSTAs; te rAvaNAya tvaritaM zazaMsuH
6060002a tato hatAMs tAn sahasA nizamya; rAjA mumohAzrupariplutAkSaH
6060002c putrakSayaM bhrAtRvadhaM ca ghoraM; vicintya rAjA vipulaM pradadhyau
6060003a tatas tu rAjAnam udIkSya dInaM; zokArNave saMparipupluvAnam
6060003c atharSabho rAkSasarAjasUnur; athendrajid vAkyam idaM babhASe
6060004a na tAta mohaM pratigantum arhasi; yatrendrajij jIvati rAkSasendra
6060004c nendrAribANAbhihato hi kaz cit; prANAn samarthaH samare 'bhidhartum
6060005a pazyAdya rAmaM sahalakSmaNena; madbANanirbhinnavikIrNadeham
6060005c gatAyuSaM bhUmitale zayAnaM; zaraiH zitair AcitasarvagAtram
6060006a imAM pratijJAM zRNu zakrazatroH; sunizcitAM pauruSadaivayuktAm
6060006c adyaiva rAmaM sahalakSmaNena; saMtApayiSyAmi zarair amoghaiH
6060007a adyendravaivasvataviSNumitra; sAdhyAzvivaizvAnaracandrasUryAH
6060007c drakSyanti me vikramam aprameyaM; viSNor ivograM baliyajJavATe
6060008a sa evam uktvA tridazendrazatrur; ApRcchya rAjAnam adInasattvaH
6060008c samArurohAnilatulyavegaM; rathaM kharazreSThasamAdhiyuktam
6060009a samAsthAya mahAtejA rathaM harirathopamam
6060009c jagAma sahasA tatra yatra yuddham ariMdama
6060010a taM prasthitaM mahAtmAnam anujagmur mahAbalAH
6060010c saMharSamANA bahavo dhanuHpravarapANayaH
6060011a gajaskandhagatAH ke cit ke cit paramavAjibhiH
6060011c prAsamudgaranistriMza parazvadhagadAdharAH
6060012a sa zaGkhaninadair bhImair bherINAM ca mahAsvanaiH
6060012c jagAma tridazendrAriH stUyamAno nizAcaraiH
6060013a sa zaGkhazazivarNena chatreNa ripusAdanaH
6060013c rarAja paripUrNena nabhaz candramasA yathA
6060014a avIjyata tato vIro haimair hemavibhUSitaiH
6060014c cArucAmaramukhyaiz ca mukhyaH sarvadhanuSmatAm
6060015a tatas tv indrajitA laGkA sUryapratimatejasA
6060015c rarAjAprativIryeNa dyaur ivArkeNa bhAsvatA
6060016a sa tu dRSTvA viniryAntaM balena mahatA vRtam
6060016c rAkSasAdhipatiH zrImAn rAvaNaH putram abravIt
6060017a tvam apratirathaH putra jitas te yudhi vAsavaH
6060017c kiM punar mAnuSaM dhRSyaM na vadhiSyasi rAghavam
6060018a tathokto rAkSasendreNa pratigRhya mahAziSaH
6060018c rathenAzvayujA vIraH zIghraM gatvA nikumbhilAm
6060019a sa saMprApya mahAtejA yuddhabhUmim ariMdamaH
6060019c sthApayAm Asa rakSAMsi rathaM prati samantataH
6060020a tatas tu hutabhoktAraM hutabhuk sadRzaprabhaH
6060020c juhuve rAkSasazreSTho mantravad vidhivat tadA
6060021a sa havirjAlasaMskArair mAlyagandhapuraskRtaiH
6060021c juhuve pAvakaM tatra rAkSasendraH pratApavAn
6060022a zastrANi zarapatrANi samidho 'tha vibhItakaH
6060022c lohitAni ca vAsAMsi sruvaM kArSNAyasaM tathA
6060023a sa tatrAgniM samAstIrya zarapatraiH satomaraiH
6060023c chAgasya sarvakRSNasya galaM jagrAha jIvataH
6060024a sakRd eva samiddhasya vidhUmasya mahArciSaH
6060024c babhUvus tAni liGgAni vijayaM yAny adarzayan
6060025a pradakSiNAvartazikhas taptakAJcanasaMnibhaH
6060025c havis tat pratijagrAha pAvakaH svayam utthitaH
6060026a so 'stram AhArayAm Asa brAhmam astravidAM varaH
6060026c dhanuz cAtmarathaM caiva sarvaM tatrAbhyamantrayat
6060027a tasminn AhUyamAne 'stre hUyamAne ca pAvake
6060027c sArkagrahendu nakSatraM vitatrAsa nabhastalam
6060028a sa pAvakaM pAvakadIptatejA; hutvA mahendrapratimaprabhAvaH
6060028c sacApabANAsirathAzvasUtaH; khe 'ntardadha AtmAnam acintyarUpaH
6060029a sa sainyam utsRjya sametya tUrNaM; mahAraNe vAnaravAhinISu
6060029c adRzyamAnaH zarajAlam ugraM; vavarSa nIlAmbudharo yathAmbu
6060030a te zakrajidbANavizIrNadehA; mAyAhatA visvaram unnadantaH
6060030c raNe nipetur harayo 'drikalpA; yathendravajrAbhihatA nagendrAH
6060031a te kevalaM saMdadRzuH zitAgrAn; bANAn raNe vAnaravAhinISu
6060031c mAyA nigUDhaM ca surendrazatruM; na cAtra taM rAkSasam abhyapazyan
6060032a tataH sa rakSo'dhipatir mahAtmA; sarvA dizo bANagaNaiH zitAgraiH
6060032c pracchAdayAm Asa raviprakAzair; viSAdayAm Asa ca vAnarendrAn
6060033a sa zUlanistriMza parazvadhAni; vyAvidhya dIptAnalasaMnibhAni
6060033c savisphuliGgojjvalapAvakAni; vavarSa tIvraM plavagendrasainye
6060034a tato jvalanasaMkAzaiH zitair vAnarayUthapAH
6060034c tADitAH zakrajidbANaiH praphullA iva kiMzukAH
6060035a anyonyam abhisarpanto ninadantaz ca visvaram
6060035c rAkSasendrAstranirbhinnA nipetur vAnararSabhAH
6060036a udIkSamANA gaganaM ke cin netreSu tADitAH
6060036c zarair vivizur anyonyaM petuz ca jagatItale
6060037a hanUmantaM ca sugrIvam aGgadaM gandhamAdanam
6060037c jAmbavantaM suSeNaM ca vegadarzinam eva ca
6060038a maindaM ca dvividaM nIlaM gavAkSaM gajagomukhau
6060038c kesariM harilomAnaM vidyuddaMSTraM ca vAnaram
6060039a sUryAnanaM jyotimukhaM tathA dadhimukhaM harim
6060039c pAvakAkSaM nalaM caiva kumudaM caiva vAnaram
6060040a prAsaiH zUlaiH zitair bANair indrajinmantrasaMhitaiH
6060040c vivyAdha harizArdUlAn sarvAMs tAn rAkSasottamaH
6060041a sa vai gadAbhir hariyUthamukhyAn; nirbhidya bANais tapanIyapuGkhaiH
6060041c vavarSa rAmaM zaravRSTijAlaiH; salakSmaNaM bhAskararazmikalpaiH
6060042a sa bANavarSair abhivarSyamANo; dhArAnipAtAn iva tAn vicintya
6060042c samIkSamANaH paramAdbhutazrI; rAmas tadA lakSmaNam ity uvAca
6060043a asau punar lakSmaNa rAkSasendro; brahmAstram Azritya surendrazatruH
6060043c nipAtayitvA harisainyam ugram; asmAJ zarair ardayati prasaktam
6060044a svayambhuvA dattavaro mahAtmA; kham Asthito 'ntarhitabhImakAyaH
6060044c kathaM nu zakyo yudhi naSTadeho; nihantum adyendrajid udyatAstraH
6060045a manye svayambhUr bhagavAn acintyo; yasyaitad astraM prabhavaz ca yo 'sya
6060045c bANAvapAtAMs tvam ihAdya dhIman; mayA sahAvyagramanAH sahasva
6060046a pracchAdayaty eSa hi rAkSasendraH; sarvA dizaH sAyakavRSTijAlaiH
6060046c etac ca sarvaM patitAgryavIraM; na bhrAjate vAnararAjasainyam
6060047a AvAM tu dRSTvA patitau visaMjJau; nivRttayuddhau hataroSaharSau
6060047c dhruvaM pravekSyaty amarArivAsaM; asau samAdAya raNAgralakSmIm
6060048a tatas tu tAv indrajid astrajAlair; babhUvatus tatra tadA vizastau
6060048c sa cApi tau tatra viSAdayitvA; nanAda harSAd yudhi rAkSasendraH
6060049a sa tat tadA vAnararAjasainyaM; rAmaM ca saMkhye sahalakSmaNena
6060049c viSAdayitvA sahasA viveza; purIM dazagrIvabhujAbhiguptAm
6061001a tayos tadA sAditayo raNAgre; mumoha sainyaM hariyUthapAnAm
6061001c sugrIvanIlAGgadajAmbavanto; na cApi kiM cit pratipedire te
6061002a tato viSaNNaM samavekSya sainyaM; vibhISaNo buddhimatAM variSThaH
6061002c uvAca zAkhAmRgarAjavIrAn; AzvAsayann apratimair vacobhiH
6061003a mA bhaiSTa nAsty atra viSAdakAlo; yad AryaputrAv avazau viSaNNau
6061003c svayambhuvo vAkyam athodvahantau; yat sAditAv indrajidastrajAlaiH
6061004a tasmai tu dattaM paramAstram etat; svayambhuvA brAhmam amoghavegam
6061004c tan mAnayantau yadi rAjaputrau; nipAtitau ko 'tra viSAdakAlaH
6061005a brAhmam astraM tadA dhImAn mAnayitvA tu mArutiH
6061005c vibhISaNavacaH zrutvA hanUmAMs tam athAbravIt
6061006a etasmin nihate sainye vAnarANAM tarasvinAm
6061006c yo yo dhArayate prANAMs taM tam AzvAsayAvahe
6061007a tAv ubhau yugapad vIrau hanUmad rAkSasottamau
6061007c ulkAhastau tadA rAtrau raNazIrSe viceratuH
6061008a chinnalAGgUlahastorupAdAGguli ziro dharaiH
6061008c sravadbhiH kSatajaM gAtraiH prasravadbhiH samantataH
6061009a patitaiH parvatAkArair vAnarair abhisaMkulAm
6061009c zastraiz ca patitair dIptair dadRzAte vasuMdharAm
6061010a sugrIvam aGgadaM nIlaM zarabhaM gandhamAdanam
6061010c jAmbavantaM suSeNaM ca vegadarzanam Ahukam
6061011a maindaM nalaM jyotimukhaM dvividaM panasaM tathA
6061011c vibhISaNo hanUmAMz ca dadRzAte hatAn raNe
6061012a saptaSaSTir hatAH koTyo vAnarANAM tarasvinAm
6061012c ahnaH paJcamazeSeNa vallabhena svayambhuvaH
6061013a sAgaraughanibhaM bhImaM dRSTvA bANArditaM balam
6061013c mArgate jAmbavantaM sma hanUmAn savibhISaNaH
6061014a svabhAvajarayA yuktaM vRddhaM zarazataiz citam
6061014c prajApatisutaM vIraM zAmyantam iva pAvakam
6061015a dRSTvA tam upasaMgamya paulastyo vAkyam abravIt
6061015c kaccid Aryazarais tIrSNair na prANA dhvaMsitAs tava
6061016a vibhISaNavacaH zrutvA jAmbavAn RkSapuMgavaH
6061016c kRcchrAd abhyudgiran vAkyam idaM vacanam abravIt
6061017a nairRtendramahAvIryasvareNa tvAbhilakSaye
6061017c pIDyamAnaH zitair bANair na tvAM pazyAmi cakSuSA
6061018a aJjanA suprajA yena mAtarizvA ca nairRta
6061018c hanUmAn vAnarazreSThaH prANAn dhArayate kva cit
6061019a zrutvA jAmbavato vAkyam uvAcedaM vibhISaNaH
6061019c AryaputrAv atikramya kasmAt pRcchasi mArutim
6061020a naiva rAjani sugrIve nAGgade nApi rAghave
6061020c Arya saMdarzitaH sneho yathA vAyusute paraH
6061021a vibhISaNavacaH zrutvA jAmbavAn vAkyam abravIt
6061021c zRNu nairRtazArdUla yasmAt pRcchAmi mArutim
6061022a tasmiJ jIvati vIre tu hatam apy ahataM balam
6061022c hanUmaty ujjhitaprANe jIvanto 'pi vayaM hatAH
6061023a dhriyate mArutis tAta mArutapratimo yadi
6061023c vaizvAnarasamo vIrye jIvitAzA tato bhavet
6061024a tato vRddham upAgamya niyamenAbhyavAdayat
6061024c gRhya jAmbavataH pAdau hanUmAn mArutAtmajaH
6061025a zrutvA hanumato vAkyaM tathApi vyathitendriyaH
6061025c punarjAtam ivAtmAnaM sa mene RkSapuMgavaH
6061026a tato 'bravIn mahAtejA hanUmantaM sa jAmbavAn
6061026c Agaccha harizArdUlavAnarAMs trAtum arhasi
6061027a nAnyo vikramaparyAptas tvam eSAM paramaH sakhA
6061027c tvatparAkramakAlo 'yaM nAnyaM pazyAmi kaJ cana
6061028a RkSavAnaravIrANAm anIkAni praharSaya
6061028c vizalyau kuru cApy etau sAditau rAmalakSmaNau
6061029a gatvA paramam adhvAnam upary upari sAgaram
6061029c himavantaM nagazreSThaM hanUman gantum arhasi
6061030a tataH kAJcanam atyugram RSabhaM parvatottamam
6061030c kailAsazikharaM cApi drakSyasy ariniSUdana
6061031a tayoH zikharayor madhye pradIptam atulaprabham
6061031c sarvauSadhiyutaM vIra drakSyasy auSadhiparvatam
6061032a tasya vAnarazArdUlacatasro mUrdhni saMbhavAH
6061032c drakSyasy oSadhayo dIptA dIpayantyo dizo daza
6061033a mRtasaMjIvanIM caiva vizalyakaraNIm api
6061033c sauvarNakaraNIM caiva saMdhAnIM ca mahauSadhIm
6061034a tAH sarvA hanuman gRhya kSipram Agantum arhasi
6061034c AzvAsaya harIn prANair yojya gandhavahAtmajaH
6061035a zrutvA jAmbavato vAkyaM hanUmAn haripuMgavaH
6061035c ApUryata baloddharSais toyavegair ivArNavaH
6061036a sa parvatataTAgrasthaH pIDayan parvatottaram
6061036c hanUmAn dRzyate vIro dvitIya iva parvataH
6061037a haripAdavinirbhinno niSasAda sa parvataH
6061037c na zazAka tadAtmAnaM soDhuM bhRzanipIDitaH
6061038a tasya petur nagA bhUmau harivegAc ca jajvaluH
6061038c zRGgANi ca vyakIryanta pIDitasya hanUmatA
6061039a tasmin saMpIDyamAne tu bhagnadrumazilAtale
6061039c na zekur vAnarAH sthAtuM ghUrNamAne nagottame
6061040a sa ghUrNitamahAdvArA prabhagnagRhagopurA
6061040c laGkA trAsAkulA rAtrau pranRttevAbhavat tadA
6061041a pRthivIdharasaMkAzo nipIDya dharaNIdharam
6061041c pRthivIM kSobhayAm Asa sArNavAM mArutAtmajaH
6061042a padbhyAM tu zailam ApIDya vaDavAmukhavan mukham
6061042c vivRtyograM nanAdoccais trAsayann iva rAkSasAn
6061043a tasya nAnadyamAnasya zrutvA ninadam adbhutam
6061043c laGkAsthA rAkSasAH sarve na zekuH spandituM bhayAt
6061044a namaskRtvAtha rAmAya mArutir bhImavikramaH
6061044c rAghavArthe paraM karma samaihata paraMtapaH
6061045a sa puccham udyamya bhujaMgakalpaM; vinamya pRSThaM zravaNe nikuJcya
6061045c vivRtya vaktraM vaDavAmukhAbham; Apupluve vyomni sa caNDavegaH
6061046a sa vRkSaSaNDAMs tarasA jahAra; zailAJ zilAH prAkRtavAnarAMz ca
6061046c bAhUruvegoddhatasaMpraNunnAs; te kSINavegAH salile nipetuH
6061047a sa tau prasAryoragabhogakalpau; bhujau bhujaMgArinikAzavIryaH
6061047c jagAma meruM nagarAjam agryaM; dizaH prakarSann iva vAyusUnuH
6061048a sa sAgaraM ghUrNitavIcimAlaM; tadA bhRzaM bhrAmitasarvasattvam
6061048c samIkSamANaH sahasA jagAma; cakraM yathA viSNukarAgramuktam
6061049a sa parvatAn vRkSagaNAn sarAMsi; nadIs taTAkAni purottamAni
6061049c sphItAJjanAMs tAn api saMprapazyaJ; jagAma vegAt pitRtulyavegaH
6061050a Adityapatham Azritya jagAma sa gatazramaH
6061050c sa dadarza harizreSTho himavantaM nagottamam
6061051a nAnAprasravaNopetaM bahukaMdaranirjharam
6061051c zvetAbhracayasaMkAzaiH zikharaiz cArudarzanaiH
6061052a sa taM samAsAdya mahAnagendram; atipravRddhottamaghorazRGgam
6061052c dadarza puNyAni mahAzramANi; surarSisaMghottamasevitAni
6061053a sa brahmakozaM rajatAlayaM ca; zakrAlayaM rudrazarapramokSam
6061053c hayAnanaM brahmaziraz ca dIptaM; dadarza vaivasvata kiMkarAMz ca
6061054a vajrAlayaM vaizvaraNAlayaM ca; sUryaprabhaM sUryanibandhanaM ca
6061054c brahmAsanaM zaMkarakArmukaM ca; dadarza nAbhiM ca vasuMdharAyAH
6061055a kailAsam agryaM himavacchilAM ca; tatharSabhaM kAJcanazailam agryam
6061055c sa dIptasarvauSadhisaMpradIptaM; dadarza sarvauSadhiparvatendram
6061056a sa taM samIkSyAnalarazmidIptaM; visiSmiye vAsavadUtasUnuH
6061056c Aplutya taM cauSadhiparvatendraM; tatrauSadhInAM vicayaM cakAra
6061057a sa yojanasahasrANi samatItya mahAkapiH
6061057c divyauSadhidharaM zailaM vyacaran mArutAtmajaH
6061058a mahauSadhyas tu tAH sarvAs tasmin parvatasattame
6061058c vijJAyArthinam AyAntaM tato jagmur adarzanam
6061059a sa tA mahAtmA hanumAn apazyaMz; cukopa kopAc ca bhRzaM nanAda
6061059c amRSyamANo 'gninikAzacakSur; mahIdharendraM tam uvAca vAkyam
6061060a kim etad evaM suvinizcitaM te; yad rAghave nAsi kRtAnukampaH
6061060c pazyAdya madbAhubalAbhibhUto; vikIrNam AtmAnam atho nagendra
6061061a sa tasya zRGgaM sanagaM sanAgaM; sakAJcanaM dhAtusahasrajuSTam
6061061c vikIrNakUTaM calitAgrasAnuM; pragRhya vegAt sahasonmamAtha
6061062a sa taM samutpATya kham utpapAta; vitrAsya lokAn sasurAn surendrAn
6061062c saMstUyamAnaH khacarair anekair; jagAma vegAd garuDogravIryaH
6061063a sa bhAskarAdhvAnam anuprapannas; tad bhAskarAbhaM zikharaM pragRhya
6061063c babhau tadA bhAskarasaMnikAzo; raveH samIpe pratibhAskarAbhaH
6061064a sa tena zailena bhRzaM rarAja; zailopamo gandhavahAtmajas tu
6061064c sahasradhAreNa sapAvakena; cakreNa khe viSNur ivoddhRtena
6061065a taM vAnarAH prekSya tadA vineduH; sa tAn api prekSya mudA nanAda
6061065c teSAM samudghuSTaravaM nizamya; laGkAlayA bhImataraM vineduH
6061066a tato mahAtmA nipapAta tasmiJ; zailottame vAnarasainyamadhye
6061066c haryuttamebhyaH zirasAbhivAdya; vibhISaNaM tatra ca sasvaje saH
6061067a tAv apy ubhau mAnuSarAjaputrau; taM gandham AghrAya mahauSadhInAm
6061067c babhUvatus tatra tadA vizalyAv; uttasthur anye ca haripravIrAH
6061068a tato harir gandhavahAtmajas tu; tam oSadhIzailam udagravIryaH
6061068c ninAya vegAd dhimavantam eva; punaz ca rAmeNa samAjagAma
6062001a tato 'bravIn mahAtejAH sugrIvo vAnarAdhipaH
6062001c arthyaM vijApayaMz cApi hanUmantaM mahAbalam
6062002a yato hataH kumbhakarNaH kumArAz ca niSUditAH
6062002c nedAnIm upanirhAraM rAvaNo dAtum arhati
6062003a ye ye mahAbalAH santi laghavaz ca plavaMgamAH
6062003c laGkAm abhyutpatantv Azu gRhyolkAH plavagarSabhAH
6062004a tato 'staM gata Aditye raudre tasmin nizAmukhe
6062004c laGkAm abhimukhAH solkA jagmus te plavagarSabhAH
6062005a ulkAhastair harigaNaiH sarvataH samabhidrutAH
6062005c ArakSasthA virUpAkSAH sahasA vipradudruvuH
6062006a gopurATTa pratolISu caryAsu vividhAsu ca
6062006c prAsAdeSu ca saMhRSTAH sasRjus te hutAzanam
6062007a teSAM gRhasahasrANi dadAha hutabhuk tadA
6062007c AvAsAn rAkSasAnAM ca sarveSAM gRhamedhinAm
6062008a hemacitratanutrANAM sragdAmAmbaradhAriNAm
6062008c sIdhupAnacalAkSANAM madavihvalagAminAm
6062009a kAntAlambitavastrANAM zatrusaMjAtamanyunAm
6062009c gadAzUlAsi hastAnAM khAdatAM pibatAm api
6062010a zayaneSu mahArheSu prasuptAnAM priyaiH saha
6062010c trastAnAM gacchatAM tUrNaM putrAn AdAya sarvataH
6062011a teSAM gRhasahasrANi tadA laGkAnivAsinAm
6062011c adahat pAvakas tatra jajvAla ca punaH punaH
6062012a sAravanti mahArhANi gambhIraguNavanti ca
6062012c hemacandrArdhacandrANi candrazAlonnatAni ca
6062013a ratnacitragavAkSANi sAdhiSThAnAni sarvazaH
6062013c maNividrumacitrANi spRzantIva ca bhAskaram
6062014a krauJcabarhiNavINAnAM bhUSaNAnAM ca nisvanaiH
6062014c nAditAny acalAbhAni vezmAny agnir dadAha saH
6062015a jvalanena parItAni toraNAni cakAzire
6062015c vidyudbhir iva naddhAni meghajAlAni gharmage
6062016a vimAneSu prasuptAz ca dahyamAnA varAGganAH
6062016c tyaktAbharaNasaMyogA hAhety uccair vicukruzaH
6062017a tatra cAgniparItAni nipetur bhavanAny api
6062017c vajrivajrahatAnIva zikharANi mahAgireH
6062018a tAni nirdahyamAnAni dUrataH pracakAzire
6062018c himavacchikharANIva dIptauSadhivanAni ca
6062019a harmyAgrair dahyamAnaiz ca jvAlAprajvalitair api
6062019c rAtrau sA dRzyate laGkA puSpitair iva kiMzukaiH
6062020a hastyadhyakSair gajair muktair muktaiz ca turagair api
6062020c babhUva laGkA lokAnte bhrAntagrAha ivArNavaH
6062021a azvaM muktaM gajo dRSTvA kaccid bhIto 'pasarpati
6062021c bhIto bhItaM gajaM dRSTvA kva cid azvo nivartate
6062022a sA babhUva muhUrtena haribhir dIpitA purI
6062022c lokasyAsya kSaye ghore pradIpteva vasuMdharA
6062023a nArI janasya dhUmena vyAptasyoccair vineduSaH
6062023c svano jvalanataptasya zuzruve dazayojanam
6062024a pradagdhakAyAn aparAn rAkSasAn nirgatAn bahiH
6062024c sahasAbhyutpatanti sma harayo 'tha yuyutsavaH
6062025a udghuSTaM vAnarANAM ca rAkSasAnAM ca nisvanaH
6062025c dizo daza samudraM ca pRthivIM cAnvanAdayat
6062026a vizalyau tu mahAtmAnau tAv ubhau rAmalakSmaNau
6062026c asaMbhrAntau jagRhatus tAv ubhau dhanuSI vare
6062027a tato visphArayANasya rAmasya dhanur uttamam
6062027c babhUva tumulaH zabdo rAkSasAnAM bhayAvahaH
6062028a azobhata tadA rAmo dhanur visphArayan mahat
6062028c bhagavAn iva saMkruddho bhavo vedamayaM dhanuH
6062029a vAnarodghuSTaghoSaz ca rAkSasAnAM ca nisvanaH
6062029c jyAzabdaz cApi rAmasya trayaM vyApa dizo daza
6062030a tasya kArmukamuktaiz ca zarais tatpuragopuram
6062030c kailAsazRGgapratimaM vikIrNam apatad bhuvi
6062031a tato rAmazarAn dRSTvA vimAneSu gRheSu ca
6062031c saMnAho rAkSasendrANAM tumulaH samapadyata
6062032a teSAM saMnahyamAnAnAM siMhanAdaM ca kurvatAm
6062032c zarvarI rAkSasendrANAM raudrIva samapadyata
6062033a AdiSTA vAnarendrAs te sugrIveNa mahAtmanA
6062033c AsannA dvAram AsAdya yudhyadhvaM plavagarSabhAH
6062034a yaz ca vo vitathaM kuryAt tatra tatra vyavasthitaH
6062034c sa hantavyo 'bhisaMplutya rAjazAsanadUSakaH
6062035a teSu vAnaramukhyeSu dIptolkojjvalapANiSu
6062035c sthiteSu dvAram AsAdya rAvaNaM manyur Avizat
6062036a tasya jRmbhitavikSepAd vyAmizrA vai dizo daza
6062036c rUpavAn iva rudrasya manyur gAtreSv adRzyata
6062037a sa nikumbhaM ca kumbhaM ca kumbhakarNAtmajAv ubhau
6062037c preSayAm Asa saMkruddho rAkSasair bahubhiH saha
6062038a zazAsa caiva tAn sarvAn rAkSasAn rAkSasezvaraH
6062038c rAkSasA gacchatAtraiva siMhanAdaM ca nAdayan
6062039a tatas tu coditAs tena rAkSasA jvalitAyudhAH
6062039c laGkAyA niryayur vIrAH praNadantaH punaH punaH
6062040a bhImAzvarathamAtaMgaM nAnApatti samAkulam
6062040c dIptazUlagadAkhaDgaprAsatomarakArmukam
6062041a tad rAkSasabalaM ghoraM bhImavikramapauruSam
6062041c dadRze jvalitaprAsaM kiGkiNIzatanAditam
6062042a hemajAlAcitabhujaM vyAveSTitaparazvadham
6062042c vyAghUrNitamahAzastraM bANasaMsaktakArmukam
6062043a gandhamAlyamadhUtsekasaMmodita mahAnilam
6062043c ghoraM zUrajanAkIrNaM mahAmbudharanisvanam
6062044a taM dRSTvA balam AyAntaM rAkSasAnAM sudAruNam
6062044c saMcacAla plavaMgAnAM balam uccair nanAda ca
6062045a javenAplutya ca punas tad rAkSasabalaM mahat
6062045c abhyayAt pratyaribalaM pataMga iva pAvakam
6062046a teSAM bhujaparAmarzavyAmRSTaparighAzani
6062046c rAkSasAnAM balaM zreSThaM bhUyastaram azobhata
6062047a tathaivApy apare teSAM kapInAm asibhiH zitaiH
6062047c pravIrAn abhito jaghnur ghorarUpA nizAcarAH
6062048a ghnantam anyaM jaghAnAnyaH pAtayantam apAtayat
6062048c garhamANaM jagarhAnye dazantam apare 'dazat
6062049a dehIty anye dadAty anyo dadAmIty aparaH punaH
6062049c kiM klezayasi tiSTheti tatrAnyonyaM babhASire
6062050a samudyatamahAprAsaM muSTizUlAsisaMkulam
6062050c prAvartata mahAraudraM yuddhaM vAnararakSasAm
6062051a vAnarAn daza sapteti rAkSasA abhyapAtayan
6062051c rAkSasAn dazasapteti vAnarA jaghnur Ahave
6062052a visrastakezarasanaM vimuktakavacadhvajam
6062052c balaM rAkSasam Alambya vAnarAH paryavArayan
6063001a pravRtte saMkule tasmin ghore vIrajanakSaye
6063001c aGgadaH kampanaM vIram AsasAda raNotsukaH
6063002a AhUya so 'GgadaM kopAt tADayAm Asa vegitaH
6063002c gadayA kampanaH pUrvaM sa cacAla bhRzAhataH
6063003a sa saMjJAM prApya tejasvI cikSepa zikharaM gireH
6063003c arditaz ca prahAreNa kampanaH patito bhuvi
6063004a hatapravIrA vyathitA rAkSasendracamUs tadA
6063004c jagAmAbhimukhI sA tu kumbhakarNasuto yataH
6063004e ApatantIM ca vegena kumbhas tAM sAntvayac camUm
6063005a sa dhanur dhanvinAM zreSThaH pragRhya susamAhitaH
6063005c mumocAzIviSaprakhyAJ zarAn dehavidAraNAn
6063006a tasya tac chuzubhe bhUyaH sazaraM dhanur uttamam
6063006c vidyudairAvatArciSmad dvitIyendradhanur yathA
6063007a AkarNakRSTamuktena jaghAna dvividaM tadA
6063007c tena hATakapuGkhena patriNA patravAsasA
6063008a sahasAbhihatas tena vipramuktapadaH sphuran
6063008c nipapAtAdrikUTAbho vihvalaH plavagottamaH
6063009a maindas tu bhrAtaraM dRSTvA bhagnaM tatra mahAhave
6063009c abhidudrAva vegena pragRhya mahatIM zilAm
6063010a tAM zilAM tu pracikSepa rAkSasAya mahAbalaH
6063010c bibheda tAM zilAM kumbhaH prasannaiH paJcabhiH zaraiH
6063011a saMdhAya cAnyaM sumukhaM zaram AzIviSopamam
6063011c AjaghAna mahAtejA vakSasi dvividAgrajam
6063012a sa tu tena prahAreNa maindo vAnarayUthapaH
6063012c marmaNy abhihatas tena papAta bhuvi mUrchitaH
6063013a aGgado mAtulau dRSTvA patitau tau mahAbalau
6063013c abhidudrAva vegena kumbham udyatakArmukam
6063014a tam ApatantaM vivyAdha kumbhaH paJcabhir AyasaiH
6063014c tribhiz cAnyaiH zitair bANair mAtaMgam iva tomaraiH
6063015a so 'GgadaM vividhair bANaiH kumbho vivyAdha vIryavAn
6063015c akuNThadhArair nizitais tIkSNaiH kanakabhUSaNaiH
6063016a aGgadaH pratividdhAGgo vAliputro na kampate
6063016c zilApAdapavarSANi tasya mUrdhni vavarSa ha
6063017a sa praciccheda tAn sarvAn bibheda ca punaH zilAH
6063017c kumbhakarNAtmajaH zrImAn vAliputrasamIritAn
6063018a ApatantaM ca saMprekSya kumbho vAnarayUthapam
6063018c bhruvor vivyAdha bANAbhyAm ulkAbhyAm iva kuJjaram
6063019a aGgadaH pANinA netre pidhAya rudhirokSite
6063019c sAlam Asannam ekena parijagrAha pANinA
6063020a tam indraketupratimaM vRkSaM mandarasaMnibham
6063020c samutsRjantaM vegena pazyatAM sarvarakSasAm
6063021a sa ciccheda zitair bANaiH saptabhiH kAyabhedanaiH
6063021c aGgado vivyathe 'bhIkSNaM sasAda ca mumoha ca
6063022a aGgadaM vyathitaM dRSTvA sIdantam iva sAgare
6063022c durAsadaM harizreSThA rAghavAya nyavedayan
6063023a rAmas tu vyathitaM zrutvA vAliputraM mahAhave
6063023c vyAdideza harizreSThAJ jAmbavatpramukhAMs tataH
6063024a te tu vAnarazArdUlAH zrutvA rAmasya zAsanam
6063024c abhipetuH susaMkruddhAH kumbham udyatakArmukam
6063025a tato drumazilAhastAH kopasaMraktalocanAH
6063025c rirakSiSanto 'bhyapatann aGgadaM vAnararSabhAH
6063026a jAmbavAMz ca suSeNaz ca vegadarzI ca vAnaraH
6063026c kumbhakarNAtmajaM vIraM kruddhAH samabhidudruvuH
6063027a samIkSyAtatatas tAMs tu vAnarendrAn mahAbalAn
6063027c AvavAra zaraugheNa nageneva jalAzayam
6063028a tasya bANacayaM prApya na zoker ativartitum
6063028c vAnarendrA mahAtmAno velAm iva mahodadhiH
6063029a tAMs tu dRSTvA harigaNAJ zaravRSTibhir arditAn
6063029c aGgadaM pRSThataH kRtvA bhrAtRjaM plavagezvaraH
6063030a abhidudrAva vegena sugrIvaH kumbham Ahave
6063030c zailasAnu caraM nAgaM vegavAn iva kesarI
6063031a utpATya ca mahAzailAn azvakarNAn dhavAn bahUn
6063031c anyAMz ca vividhAn vRkSAMz cikSepa ca mahAbalaH
6063032a tAM chAdayantIm AkAzaM vRkSavRSTiM durAsadAm
6063032c kumbhakarNAtmajaH zrImAMz ciccheda nizitaiH zaraiH
6063033a abhilakSyeNa tIvreNa kumbhena nizitaiH zaraiH
6063033c AcitAs te drumA rejur yathA ghorAH zataghnayaH
6063034a drumavarSaM tu tac chinnaM dRSTvA kumbhena vIryavAn
6063034c vAnarAdhipatiH zrImAn mahAsattvo na vivyathe
6063035a nirbhidyamAnaH sahasA sahamAnaz ca tAJ zarAn
6063035c kumbhasya dhanur AkSipya babhaJjendradhanuHprabham
6063036a avaplutya tataH zIghraM kRtvA karma suduSkaram
6063036c abravIt kupitaH kumbhaM bhagnazRGgam iva dvipam
6063037a nikumbhAgraja vIryaM te bANavegaM tad adbhutam
6063037c saMnatiz ca prabhAvaz ca tava vA rAvaNasya vA
6063038a prahrAdabalivRtraghnakuberavaruNopama
6063038c ekas tvam anujAto 'si pitaraM balavattaraH
6063039a tvAm evaikaM mahAbAhuM zUlahastam ariMdamam
6063039c tridazA nAtivartante jitendriyam ivAdhayaH
6063040a varadAnAt pitRvyas te sahate devadAnavAn
6063040c kumbhakarNas tu vIryeNa sahate ca surAsurAn
6063041a dhanuSIndrajitas tulyaH pratApe rAvaNasya ca
6063041c tvam adya rakSasAM loke zreSTho 'si balavIryataH
6063042a mahAvimardaM samare mayA saha tavAdbhutam
6063042c adya bhUtAni pazyantu zakrazambarayor iva
6063043a kRtam apratimaM karma darzitaM cAstrakauzalam
6063043c pAtitA harivIrAz ca tvayaite bhImavikramAH
6063044a upAlambhabhayAc cApi nAsi vIra mayA hataH
6063044c kRtakarmA parizrAnto vizrAntaH pazya me balam
6063045a tena sugrIvavAkyena sAvamAnena mAnitaH
6063045c agner Ajyahutasyeva tejas tasyAbhyavardhata
6063046a tataH kumbhaH samutpatya sugrIvam abhipadya ca
6063046c AjaghAnorasi kruddho vajravegena muSTinA
6063047a tasya carma ca pusphoTa saMjajJe cAsya zoNitam
6063047c sa ca muSTir mahAvegaH pratijaghne 'sthimaNDale
6063048a tadA vegena tatrAsIt tejaH prajvAlitaM muhuH
6063048c vajraniSpeSasaMjAtajvAlA merau yathA girau
6063049a sa tatrAbhihatas tena sugrIvo vAnararSabhaH
6063049c muSTiM saMvartayAm Asa vajrakalpaM mahAbalaH
6063050a arciHsahasravikacaM ravimaNDalasaprabham
6063050c sa muSTiM pAtayAm Asa kumbhasyorasi vIryavAn
6063051a muSTinAbhihatas tena nipapAtAzu rAkSasaH
6063051c lohitAGga ivAkAzAd dIptarazmir yadRcchayA
6063052a kumbhasya patato rUpaM bhagnasyorasi muSTinA
6063052c babhau rudrAbhipannasya yathArUpaM gavAM pateH
6063053a tasmin hate bhImaparAkrameNa; plavaMgamAnAm RSabheNa yuddhe
6063053c mahI sazailA savanA cacAla; bhayaM ca rakSAMsy adhikaM viveza
6064001a nikumbho bhrAtaraM dRSTvA sugrIveNa nipAtitam
6064001c pradahann iva kopena vAnarendram avaikSata
6064002a tataH sragdAmasaMnaddhaM dattapaJcAGgulaM zubham
6064002c Adade parighaM vIro nagendrazikharopamam
6064003a hemapaTTaparikSiptaM vajravidrumabhUSitam
6064003c yamadaNDopamaM bhImaM rakSasAM bhayanAzanam
6064004a tam Avidhya mahAtejAH zakradhvajasamaM raNe
6064004c vinanAda vivRttAsyo nikumbho bhImavikramaH
6064005a urogatena niSkeNa bhujasthair aGgadair api
6064005c kuNDalAbhyAM ca mRSTAbhyAM mAlayA ca vicitrayA
6064006a nikumbho bhUSaNair bhAti tena sma parigheNa ca
6064006c yathendradhanuSA meghaH savidyutstanayitnumAn
6064007a parighAgreNa pusphoTa vAtagranthir mahAtmanaH
6064007c prajajvAla saghoSaz ca vidhUma iva pAvakaH
6064008a nagaryA viTapAvatyA gandharvabhavanottamaiH
6064008c saha caivAmarAvatyA sarvaiz ca bhavanaiH saha
6064009a satArAgaNanakSatraM sacandraM samahAgraham
6064009c nikumbhaparighAghUrNaM bhramatIva nabhastalam
6064010a durAsadaz ca saMjajJe parighAbharaNaprabhaH
6064010c krodhendhano nikumbhAgnir yugAntAgnir ivotthitaH
6064011a rAkSasA vAnarAz cApi na zekuH spandituM bhayAt
6064011c hanUmaMs tu vivRtyoras tasthau pramukhato balI
6064012a parighopamabAhus tu parighaM bhAskaraprabham
6064012c balI balavatas tasya pAtayAm Asa vakSasi
6064013a sthire tasyorasi vyUDhe parighaH zatadhA kRtaH
6064013c vizIryamANaH sahasA ulkA zatam ivAmbare
6064014a sa tu tena prahAreNa cacAla ca mahAkapiH
6064014c parigheNa samAdhUto yathA bhUmicale 'calaH
6064015a sa tathAbhihatas tena hanUmAn plavagottamaH
6064015c muSTiM saMvartayAm Asa balenAtimahAbalaH
6064016a tam udyamya mahAtejA nikumbhorasi vIryavAn
6064016c abhicikSepa vegena vegavAn vAyuvikramaH
6064017a tataH pusphoTa carmAsya prasusrAva ca zoNitam
6064017c muSTinA tena saMjajJe jvAlA vidyud ivotthitA
6064018a sa tu tena prahAreNa nikumbho vicacAla ha
6064018c svasthaz cApi nijagrAha hanUmantaM mahAbalam
6064019a vicukruzus tadA saMkhye bhImaM laGkAnivAsinaH
6064019c nikumbhenoddhRtaM dRSTvA hanUmantaM mahAbalam
6064020a sa tathA hriyamANo 'pi kumbhakarNAtmajena hi
6064020c AjaghAnAnilasuto vajravegena muSTinA
6064021a AtmAnaM mocayitvAtha kSitAv abhyavapadyata
6064021c hanUmAn unmamathAzu nikumbhaM mArutAtmajaH
6064022a nikSipya paramAyatto nikumbhaM niSpipeSa ca
6064022c utpatya cAsya vegena papAtorasi vIryavAn
6064023a parigRhya ca bAhubhyAM parivRtya zirodharAm
6064023c utpATayAm Asa ziro bhairavaM nadato mahat
6064024a atha vinadati sAdite nikumbhe; pavanasutena raNe babhUva yuddham
6064024c dazarathasutarAkSasendracamvor; bhRzataram AgataroSayoH subhImam
6065001a nikumbhaM ca hataM zrutvA kumbhaM ca vinipAtitam
6065001c rAvaNaH paramAmarSI prajajvAlAnalo yathA
6065002a nairRtaH krodhazokAbhyAM dvAbhyAM tu parimUrchitaH
6065002c kharaputraM vizAlAkSaM makarAkSam acodayat
6065003a gaccha putra mayAjJapto balenAbhisamanvitaH
6065003c rAghavaM lakSmaNaM caiva jahi tau savanaukasau
6065004a rAvaNasya vacaH zrutvA zUro mAnI kharAtmajaH
6065004c bADham ity abravId dhRSTo makarAkSo nizAcaraH
6065005a so 'bhivAdya dazagrIvaM kRtvA cApi pradakSiNam
6065005c nirjagAma gRhAc chubhrAd rAvaNasyAjJayA balI
6065006a samIpasthaM balAdhyakSaM kharaputro 'bravId idam
6065006c ratham AnIyatAM zIghraM sainyaM cAnIyatAM tvarAt
6065007a tasya tad vacanaM zrutvA balAdhyakSo nizAcaraH
6065007c syandanaM ca balaM caiva samIpaM pratyapAdayat
6065008a pradakSiNaM rathaM kRtvA Aruroha nizAcaraH
6065008c sUtaM saMcodayAm Asa zIghraM me ratham Avaha
6065009a atha tAn rAkSasAn sarvAn makarAkSo 'bravId idam
6065009c yUyaM sarve prayudhyadhvaM purastAn mama rAkSasAH
6065010a ahaM rAkSasarAjena rAvaNena mahAtmanA
6065010c AjJaptaH samare hantuM tAv ubhau rAmalakSmaNau
6065011a adya rAmaM vadhiSyAmi lakSmaNaM ca nizAcarAH
6065011c zAkhAmRgaM ca sugrIvaM vAnarAMz ca zarottamaiH
6065012a adya zUlanipAtaiz ca vAnarANAM mahAcamUm
6065012c pradahiSyAmi saMprAptAM zuSkendhanam ivAnalaH
6065013a makarAkSasya tac chrutvA vacanaM te nizAcarAH
6065013c sarve nAnAyudhopetA balavantaH samAhitAH
6065014a te kAmarUpiNaH zUrA daMSTriNaH piGgalekSaNAH
6065014c mAtaMgA iva nardanto dhvastakezA bhayAnakAH
6065015a parivArya mahAkAyA mahAkAyaM kharAtmajam
6065015c abhijagmus tadA hRSTAz cAlayanto vasuMdharAm
6065016a zaGkhabherIsahasrANAm AhatAnAM samantataH
6065016c kSveDitAsphoTitAnAM ca tataH zabdo mahAn abhUt
6065017a prabhraSTo 'tha karAt tasya pratodaH sArathes tadA
6065017c papAta sahasA caiva dhvajas tasya ca rakSasaH
6065018a tasya te rathasaMyuktA hayA vikramavarjitAH
6065018c caraNair Akulair gatvA dInAH sAsramukhA yayuH
6065019a pravAti pavanas tasya sapAMsuH kharadAruNaH
6065019c niryANe tasya raudrasya makarAkSasya durmateH
6065020a tAni dRSTvA nimittAni rAkSasA vIryavattamAH
6065020c acintyanirgatAH sarve yatra tau rAmalakSmaNau
6065021a ghanagajamahiSAGgatulyavarNAH; samaramukheSv asakRd gadAsibhinnAH
6065021c aham aham iti yuddhakauzalAs te; rajanicarAH paribabhramur nadantaH
6066001a nirgataM makarAkSaM te dRSTvA vAnarapuMgavAH
6066001c Aplutya sahasA sarve yoddhukAmA vyavasthitAH
6066002a tataH pravRttaM sumahat tad yuddhaM lomaharSaNam
6066002c nizAcaraiH plavaMgAnAM devAnAM dAnavair iva
6066003a vRkSazUlanipAtaiz ca zilAparighapAtanaiH
6066003c anyonyaM mardayanti sma tadA kapinizAcarAH
6066004a zaktizUlagadAkhaDgais tomaraiz ca nizAcarAH
6066004c paTTasair bhindipAlaiz ca bANapAtaiH samantataH
6066005a pAzamudgaradaNDaiz ca nirghAtaiz cAparais tathA
6066005c kadanaM kapisiMhAnAM cakrus te rajanIcarAH
6066006a bANaughair arditAz cApi kharaputreNa vAnarAH
6066006c saMbhrAntamanasaH sarve dudruvur bhayapIDitAH
6066007a tAn dRSTvA rAkSasAH sarve dravamANAn vanaukasaH
6066007c nedus te siMhavad dhRSTA rAkSasA jitakAzinaH
6066008a vidravatsu tadA teSu vAnareSu samantataH
6066008c rAmas tAn vArayAm Asa zaravarSeNa rAkSasAn
6066009a vAritAn rAkSasAn dRSTvA makarAkSo nizAcaraH
6066009c krodhAn alasam AviSTo vacanaM cedam abravIt
6066010a tiSTha rAma mayA sArdhaM dvandvayuddhaM dadAmi te
6066010c tyAjayiSyAmi te prANAn dhanurmuktaiH zitaiH zaraiH
6066011a yat tadA daNDakAraNye pitaraM hatavAn mama
6066011c madagrataH svakarmasthaM smRtvA roSo 'bhivardhate
6066012a dahyante bhRzam aGgAni durAtman mama rAghava
6066012c yan mayAsi na dRSTas tvaM tasmin kAle mahAvane
6066013a diSTyAsi darzanaM rAma mama tvaM prAptavAn iha
6066013c kAGkSito 'si kSudhArtasya siMhasyevetaro mRgaH
6066014a adya madbANavegena pretarAD viSayaM gataH
6066014c ye tvayA nihatAH zUrAH saha tais tvaM sameSyasi
6066015a bahunAtra kim uktena zRNu rAma vaco mama
6066015c pazyantu sakalA lokAs tvAM mAM caiva raNAjire
6066016a astrair vA gadayA vApi bAhubhyAM vA mahAhave
6066016c abhyastaM yena vA rAma tena vA vartatAM yudhi
6066017a makarAkSavacaH zrutvA rAmo dazarathAtmajaH
6066017c abravIt prahasan vAkyam uttarottaravAdinam
6066018a caturdazasahasrANi rakSasAM tvatpitA ca yaH
6066018c trizirA dUSaNaz cApi daNDake nihatA mayA
6066019a svAzitAs tava mAMsena gRdhragomAyuvAyasAH
6066019c bhaviSyanty adya vai pApa tIkSNatuNDanakhAGkuzAH
6066020a evam uktas tu rAmeNa kharaputro nizAcaraH
6066020c bANaughAn asRjat tasmai rAghavAya raNAjire
6066021a tAJ zarAJ zaravarSeNa rAmaz ciccheda naikadhA
6066021c nipetur bhuvi te chinnA rukmapuGkhAH sahasrazaH
6066022a tad yuddham abhavat tatra sametyAnyonyam ojasA
6066022c khara rAkSasaputrasya sUnor dazarathasya ca
6066023a jImUtayor ivAkAze zabdo jyAtalayos tadA
6066023c dhanur muktaH svanotkRSTaH zrUyate ca raNAjire
6066024a devadAnavagandharvAH kiMnarAz ca mahoragAH
6066024c antarikSagatAH sarve draSTukAmAs tad adbhutam
6066025a viddham anyonyagAtreSu dviguNaM vardhate balam
6066025c kRtapratikRtAnyonyaM kurvAte tau raNAjire
6066026a rAmam uktAs tu bANaughAn rAkSasas tv acchinad raNe
6066026c rakSomuktAMs tu rAmo vai naikadhA prAcchinac charaiH
6066027a bANaughavitatAH sarvA dizaz ca vidizas tathA
6066027c saMchannA vasudhA caiva samantAn na prakAzate
6066028a tataH kruddho mahAbAhur dhanuz ciccheda rakSasaH
6066028c aSTAbhir atha nArAcaiH sUtaM vivyAdha rAghavaH
6066028e bhittvA zarai rathaM rAmo rathAzvAn samapAtayat
6066029a viratho vasudhAM tiSThan makarAkSo nizAcaraH
6066029c atiSThad vasudhAM rakSaH zUlaM jagrAha pANinA
6066029e trAsanaM sarvabhUtAnAM yugAntAgnisamaprabham
6066030a vibhrAmya ca mahac chUlaM prajvalantaM nizAcaraH
6066030c sa krodhAt prAhiNot tasmai rAghavAya mahAhave
6066031a tam ApatantaM jvalitaM kharaputrakarAc cyutam
6066031c bANais tu tribhir AkAze zUlaM ciccheda rAghavaH
6066032a sacchinno naikadhA zUlo divyahATakamaNDitaH
6066032c vyazIryata mahokleva rAmabANArdito bhuvi
6066033a tac chUlaM nihataM dRSTvA rAmeNAdbhutakarmaNA
6066033c sAdhu sAdhv iti bhUtAni vyAharanti nabhogatAH
6066034a tad dRSTvA nihataM zUlaM makarAkSo nizAcaraH
6066034c muSTim udyamya kAkutsthaM tiSTha tiSTheti cAbravIt
6066035a sa taM dRSTvA patantaM vai prahasya raghunandanaH
6066035c pAvakAstraM tato rAmaH saMdadhe svazarAsane
6066036a tenAstreNa hataM rakSaH kAkutsthena tadA raNe
6066036c saMchinnahRdayaM tatra papAta ca mamAra ca
6066037a dRSTvA te rAkSasAH sarve makarAkSasya pAtanam
6066037c laGkAm eva pradhAvanta rAmabAlArditAs tadA
6066038a dazarathanRpaputrabANavegai; rajanicaraM nihataM kharAtmajaM tam
6066038c dadRzur atha ca devatAH prahRSTA; girim iva vajrahataM yathA vizIrNam
6067001a makarAkSaM hataM zrutvA rAvaNaH samitiMjayaH
6067001c AdidezAtha saMkruddho raNAyendrajitaM sutam
6067002a jahi vIra mahAvIryau bhrAtarau rAmalakSmaNau
6067002c adRzyo dRzyamAno vA sarvathA tvaM balAdhikaH
6067003a tvam apratimakarmANam indraM jayasi saMyuge
6067003c kiM punar mAnuSau dRSTvA na vadhiSyasi saMyuge
6067004a tathokto rAkSasendreNa pratigRhya pitur vacaH
6067004c yajJabhUmau sa vidhivat pAvakaM juhuve ndrajit
6067005a juhvataz cApi tatrAgniM raktoSNISadharAH striyaH
6067005c Ajagmus tatra saMbhrAntA rAkSasyo yatra rAvaNiH
6067006a zastrANi zarapatrANi samidho 'tha vibhItakAH
6067006c lohitAni ca vAsAMsi sruvaM kArSNAyasaM tathA
6067007a sarvato 'gniM samAstIrya zarapatraiH samantataH
6067007c chAgasya sarvakRSNasya galaM jagrAha jIvataH
6067008a caruhomasamiddhasya vidhUmasya mahArciSaH
6067008c babhUvus tAni liGgAni vijayaM darzayanti ca
6067009a pradakSiNAvartazikhas taptahATakasaMnibhaH
6067009c havis tat pratijagrAha pAvakaH svayam utthitaH
6067010a hutvAgniM tarpayitvAtha devadAnavarAkSasAn
6067010c Aruroha rathazreSTham antardhAnagataM zubham
6067011a sa vAjibhiz caturbhis tu bANaiz ca nizitair yutaH
6067011c AropitamahAcApaH zuzubhe syandanottame
6067012a jAjvalyamAno vapuSA tapanIyaparicchadaH
6067012c zaraiz candrArdhacandraiz ca sa rathaH samalaMkRtaH
6067013a jAmbUnadamahAkambur dIptapAvakasaMnibhaH
6067013c babhUvendrajitaH ketur vaidUryasamalaMkRtaH
6067014a tena cAdityakalpena brahmAstreNa ca pAlitaH
6067014c sa babhUva durAdharSo rAvaNiH sumahAbalaH
6067015a so 'bhiniryAya nagarAd indrajit samitiMjayaH
6067015c hutvAgniM rAkSasair mantrair antardhAnagato 'bravIt
6067016a adya hatvAhave yau tau mithyA pravrajitau vane
6067016c jayaM pitre pradAsyAmi rAvaNAya raNAdhikam
6067017a kRtvA nirvAnarAm urvIM hatvA rAmaM salakSmaNam
6067017c kariSye paramAM prItim ity uktvAntaradhIyata
6067018a ApapAtAtha saMkruddho dazagrIveNa coditaH
6067018c tIkSNakArmukanArAcais tIkSNas tv indraripU raNe
6067019a sa dadarza mahAvIryau nAgau trizirasAv iva
6067019c sRjantAv iSujAlAni vIrau vAnaramadhyagau
6067020a imau tAv iti saMcintya sajyaM kRtvA ca kArmukam
6067020c saMtatAneSudhArAbhiH parjanya iva vRSTimAn
6067021a sa tu vaihAyasaM prApya saratho rAmalakSmaNau
6067021c acakSur viSaye tiSThan vivyAdha nizitaiH zaraiH
6067022a tau tasya zaravegena parItau rAmalakSmaNau
6067022c dhanuSI sazare kRtvA divyam astraM pracakratuH
6067023a pracchAdayantau gaganaM zarajAlair mahAbalau
6067023c tam astraiH surasaMkAzau naiva pasparzatuH zaraiH
6067024a sa hi dhUmAndhakAraM ca cakre pracchAdayan nabhaH
6067024c dizaz cAntardadhe zrImAn nIhAratamasAvRtaH
6067025a naiva jyAtalanirghoSo na ca nemikhurasvanaH
6067025c zuzruve caratas tasya na ca rUpaM prakAzate
6067026a ghanAndhakAre timire zaravarSam ivAdbhutam
6067026c sa vavarSa mahAbAhur nArAcazaravRSTibhiH
6067027a sa rAmaM sUryasaMkAzaiH zarair dattavaro bhRzam
6067027c vivyAdha samare kruddhaH sarvagAtreSu rAvaNiH
6067028a tau hanyamAnau nArAcair dhArAbhir iva parvatau
6067028c hemapuGkhAn naravyAghrau tigmAn mumucatuH zarAn
6067029a antarikSaM samAsAdya rAvaNiM kaGkapatriNaH
6067029c nikRtya patagA bhUmau petus te zoNitokSitAH
6067030a atimAtraM zaraugheNa pIDyamAnau narottamau
6067030c tAn iSUn patato bhallair anekair nicakartatuH
6067031a yato hi dadRzAte tau zarAn nipatitAJ zitAn
6067031c tatas tato dAzarathI sasRjAte 'stram uttamam
6067032a rAvaNis tu dizaH sarvA rathenAtirathaH patan
6067032c vivyAdha tau dAzarathI laghv astro nizitaiH zaraiH
6067033a tenAtividdhau tau vIrau rukmapuGkhaiH susaMhataiH
6067033c babhUvatur dAzarathI puSpitAv iva kiMzukau
6067034a nAsya veda gatiM kaz cin na ca rUpaM dhanuH zarAn
6067034c na cAnyad viditaM kiM cit sUryasyevAbhrasaMplave
6067035a tena viddhAz ca harayo nihatAz ca gatAsavaH
6067035c babhUvuH zatazas tatra patitA dharaNItale
6067036a lakSmaNas tu susaMkruddho bhrAtaraM vAkyam abravIt
6067036c brAhmam astraM prayokSyAmi vadhArthaM sarvarakSasAm
6067037a tam uvAca tato rAmo lakSmaNaM zubhalakSaNam
6067037c naikasya heto rakSAMsi pRthivyAM hantum arhasi
6067038a ayudhyamAnaM pracchannaM prAJjaliM zaraNAgatam
6067038c palAyantaM pramattaM vA na tvaM hantum ihArhasi
6067039a asyaiva tu vadhe yatnaM kariSyAvo mahAbala
6067039c AdekSyAvo mahAvegAn astrAn AzIviSopamAn
6067040a tam enaM mAyinaM kSudram antarhitarathaM balAt
6067040c rAkSasaM nihaniSyanti dRSTvA vAnarayUthapAH
6067041a yady eSa bhUmiM vizate divaM vA; rasAtalaM vApi nabhastalaM vA
6067041c evaM nigUDho 'pi mamAstradagdhaH; patiSyate bhUmitale gatAsuH
6067042a ity evam uktvA vacanaM mahAtmA; raghupravIraH plavagarSabhair vRtaH
6067042c vadhAya raudrasya nRzaMsakarmaNas; tadA mahAtmA tvaritaM nirIkSate
6068001a vijJAya tu manas tasya rAghavasya mahAtmanaH
6068001c saMnivRtyAhavAt tasmAt praviveza puraM tataH
6068002a so 'nusmRtya vadhaM teSAM rAkSasAnAM tarasvinAm
6068002c krodhatAmrekSaNaH zUro nirjagAma mahAdyutiH
6068003a sa pazcimena dvAreNa niryayau rAkSasair vRtaH
6068003c indrajit tu mahAvIryaH paulastyo devakaNTakaH
6068004a indrajit tu tato dRSTvA bhrAtarau rAmalakSmaNau
6068004c raNAyAbhyudyatau vIrau mAyAM prAduSkarot tadA
6068005a indrajit tu rathe sthApya sItAM mAyAmayIM tadA
6068005c balena mahatAvRtya tasyA vadham arocayat
6068006a mohanArthaM tu sarveSAM buddhiM kRtvA sudurmatiH
6068006c hantuM sItAM vyavasito vAnarAbhimukho yayau
6068007a taM dRSTvA tv abhiniryAntaM nagaryAH kAnanaukasaH
6068007c utpetur abhisaMkruddhAH zilAhastA yuyutsavaH
6068008a hanUmAn puratas teSAM jagAma kapikuJjaraH
6068008c pragRhya sumahac chRGgaM parvatasya durAsadam
6068009a sa dadarza hatAnandAM sItAm indrajito rathe
6068009c ekaveNIdharAM dInAm upavAsakRzAnanAm
6068010a parikliSTaikavasanAm amRjAM rAghavapriyAm
6068010c rajomalAbhyAm AliptaiH sarvagAtrair varastriyam
6068011a tAM nirIkSya muhUrtaM tu maithilIm adhyavasya ca
6068011c bASpaparyAkulamukho hanUmAn vyathito 'bhavat
6068012a abravIt tAM tu zokArtAM nirAnandAM tapasvinAm
6068012c dRSTvA rathe stitAM sItAM rAkSasendrasutAzritAm
6068013a kiM samarthitam asyeti cintayan sa mahAkapiH
6068013c saha tair vAnarazreSThair abhyadhAvata rAvaNim
6068014a tad vAnarabalaM dRSTvA rAvaNiH krodhamUrchitaH
6068014c kRtvA vizokaM nistriMzaM mUrdhni sItAM parAmRzat
6068015a taM striyaM pazyatAM teSAM tADayAm Asa rAvaNiH
6068015c krozantIM rAma rAmeti mAyayA yojitAM rathe
6068016a gRhItamUrdhajAM dRSTvA hanUmAn dainyam AgataH
6068016c duHkhajaM vArinetrAbhyAm utsRjan mArutAtmajaH
6068016e abravIt paruSaM vAkyaM krodhAd rakSo'dhipAtmajam
6068017a durAtmann AtmanAzAya kezapakSe parAmRzaH
6068017c brahmarSINAM kule jAto rAkSasIM yonim AzritaH
6068017e dhik tvAM pApasamAcAraM yasya te matir IdRzI
6068018a nRzaMsAnArya durvRtta kSudra pApaparAkrama
6068018c anAryasyedRzaM karma ghRNA te nAsti nirghRNa
6068019a cyutA gRhAc ca rAjyAc ca rAmahastAc ca maithilI
6068019c kiM tavaiSAparAddhA hi yad enAM hantum icchasi
6068020a sItAM ca hatvA na ciraM jIviSyasi kathaM cana
6068020c vadhArhakarmaNAnena mama hastagato hy asi
6068021a ye ca strIghAtinAM lokA lokavadhyaiz ca kutsitAH
6068021c iha jIvitam utsRjya pretya tAn pratilapsyase
6068022a iti bruvANo hanumAn sAyudhair haribhir vRtaH
6068022c abhyadhAvata saMkruddho rAkSasendrasutaM prati
6068023a ApatantaM mahAvIryaM tad anIkaM vanaukasAm
6068023c rakSasAM bhImavegAnAm anIkena nyavArayat
6068024a sa tAM bANasahasreNa vikSobhya harivAhinIm
6068024c harizreSThaM hanUmantam indrajit pratyuvAca ha
6068025a sugrIvas tvaM ca rAmaz ca yannimittam ihAgatAH
6068025c tAM haniSyAmi vaidehIm adyaiva tava pazyataH
6068026a imAM hatvA tato rAmaM lakSmaNaM tvAM ca vAnara
6068026c sugrIvaM ca vadhiSyAmi taM cAnAryaM vibhISaNam
6068027a na hantavyAH striyaz ceti yad bravISi plavaMgama
6068027c pIDA karam amitrANAM yat syAt kartavyam eta tat
6068028a tam evam uktvA rudatIM sItAM mAyAmayIM tataH
6068028c zitadhAreNa khaDgena nijaghAnendrajit svayam
6068029a yajJopavItamArgeNa chinnA tena tapasvinI
6068029c sA pRthivyAM pRthuzroNI papAta priyadarzanA
6068030a tAm indrajitstriyaM hatvA hanUmantam uvAca ha
6068030c mayA rAmasya pazyemAM kopena ca niSUditAm
6068031a tataH khaDgena mahatA hatvA tAm indrajit svayam
6068031c hRSTaH sa ratham AsthAya vinanAda mahAsvanam
6068032a vAnarAH zuzruvuH zabdam adUre pratyavasthitAH
6068032c vyAditAsyasya nadatas tad durgaM saMzritasya tu
6068033a tathA tu sItAM vinihatya durmatiH; prahRSTacetAH sa babhUva rAvaNiH
6068033c taM hRSTarUpaM samudIkSya vAnarA; viSaNNarUpAH samabhipradudruvuH
6069001a zrutvA taM bhImanirhrAdaM zakrAzanisamasvanam
6069001c vIkSamANA dizaH sarvA dudruvur vAnararSabhAH
6069002a tAn uvAca tataH sarvAn hanUmAn mArutAtmajaH
6069002c viSaNNavadanAn dInAMs trastAn vidravataH pRthak
6069003a kasmAd viSaNNavadanA vidravadhvaM plavaMgamAH
6069003c tyaktayuddhasamutsAhAH zUratvaM kva nu vo gatam
6069004a pRSThato 'nuvrajadhvaM mAm agrato yAntam Ahave
6069004c zUrair abhijanopetair ayuktaM hi nivartitum
6069005a evam uktAH susaMkruddhA vAyuputreNa dhImatA
6069005c zailazRGgAn drumAMz caiva jagRhur hRSTamAnasAH
6069006a abhipetuz ca garjanto rAkSasAn vAnararSabhAH
6069006c parivArya hanUmantam anvayuz ca mahAhave
6069007a sa tair vAnaramukhyais tu hanUmAn sarvato vRtaH
6069007c hutAzana ivArciSmAn adahac chatruvAhinIm
6069008a sa rAkSasAnAM kadanaM cakAra sumahAkapiH
6069008c vRto vAnarasainyena kAlAntakayamopamaH
6069009a sa tu zokena cAviSTaH krodhena ca mahAkapiH
6069009c hanUmAn rAvaNi rathe mahatIM pAtayac chilAm
6069010a tAm ApatantIM dRSTvaiva rathaH sArathinA tadA
6069010c vidheyAzva samAyuktaH sudUram apavAhitaH
6069011a tam indrajitam aprApya rathathaM sahasArathim
6069011c viveza dharaNIM bhittvA sA zilAvyartham udyatA
6069012a patitAyAM zilAyAM tu rakSasAM vyathitA camUH
6069012c tam abhyadhAvaJ zatazo nadantaH kAnanaukasaH
6069013a te drumAMz ca mahAkAyA girizRGgANi codyatAH
6069013c cikSipur dviSatAM madhye vAnarA bhImavikramAH
6069014a vAnarair tair mahAvIryair ghorarUpA nizAcarAH
6069014c vIryAd abhihatA vRkSair vyaveSTanta raNakSitau
6069015a svasainyam abhivIkSyAtha vAnarArditam indrajit
6069015c pragRhItAyudhaH kruddhaH parAn abhimukho yayau
6069016a sa zaraughAn avasRjan svasainyenAbhisaMvRtaH
6069016c jaghAna kapizArdUlAn subahUn dRSTavikramaH
6069017a zUlair azanibhiH khaDgaiH paTTasaiH kUTamudgaraiH
6069017c te cApy anucarAMs tasya vAnarA jaghnur Ahave
6069018a saskandhaviTapaiH sAlaiH zilAbhiz ca mahAbalaiH
6069018c hanUmAn kadanaM cakre rakSasAM bhImakarmaNAm
6069019a sa nivArya parAnIkam abravIt tAn vanaukasaH
6069019c hanUmAn saMnivartadhvaM na naH sAdhyam idaM balam
6069020a tyaktvA prANAn viceSTanto rAma priyacikIrSavaH
6069020c yannimittaM hi yudhyAmo hatA sA janakAtmajA
6069021a imam arthaM hi vijJApya rAmaM sugrIvam eva ca
6069021c tau yat pratividhAsyete tat kariSyAmahe vayam
6069022a ity uktvA vAnarazreSTho vArayan sarvavAnarAn
6069022c zanaiH zanair asaMtrastaH sabalaH sa nyavartata
6069023a sa tu prekSya hanUmantaM vrajantaM yatra rAghavaH
6069023c nikumbhilAm adhiSThAya pAvakaM juhuve ndrajit
6069024a yajJabhUmyAM tu vidhivat pAvakas tena rakSasA
6069024c hUyamAnaH prajajvAla homazoNitabhuk tadA
6069025a so 'rciH pinaddho dadRze homazoNitatarpitaH
6069025c saMdhyAgata ivAdityaH sa tIvrAgniH samutthitaH
6069026a athendrajid rAkSasabhUtaye tu; juhAva havyaM vidhinA vidhAnavat
6069026c dRSTvA vyatiSThanta ca rAkSasAs te; mahAsamUheSu nayAnayajJAH
6070001a rAghavaz cApi vipulaM taM rAkSasavanaukasAm
6070001c zrutvA saMgrAmanirghoSaM jAmbavantam uvAca ha
6070002a saumya nUnaM hanumatA kRtaM karma suduSkaram
6070002c zrUyate hi yathA bhImaH sumahAn AyudhasvanaH
6070003a tad gaccha kuru sAhAyyaM svabalenAbhisaMvRtaH
6070003c kSipram RSkapate tasya kapizreSThasya yudhyataH
6070004a RkSarAjas tathety uktvA svenAnIkena saMvRtaH
6070004c Agacchat pazcimadvAraM hanUmAn yatra vAnaraH
6070005a athAyAntaM hanUmantaM dadarzarkSapatiH pathi
6070005c vAnaraiH kRtasaMgrAmaiH zvasadbhir abhisaMvRtam
6070006a dRSTvA pathi hanUmAMz ca tad RSkabalam udyatam
6070006c nIlameghanibhaM bhImaM saMnivArya nyavartata
6070007a sa tena harisainyena saMnikarSaM mahAyazAH
6070007c zIghram Agamya rAmAya duHkhito vAkyam abravIt
6070008a samare yudhyamAnAnAm asmAkaM prekSatAM ca saH
6070008c jaghAna rudatIM sItAm indrajid rAvaNAtmajaH
6070009a udbhrAntacittas tAM dRSTvA viSaNNo 'ham ariMdama
6070009c tad ahaM bhavato vRttaM vijJApayitum AgataH
6070010a tasya tad vacanaM zrutvA rAghavaH zokamUrchitaH
6070010c nipapAta tadA bhUmau chinnamUla iva drumaH
6070011a taM bhUmau devasaMkAzaM patitaM dRzya rAghavam
6070011c abhipetuH samutpatya sarvataH kapisattamAH
6070012a asiJcan salilaiz cainaM padmotpalasugandhibhiH
6070012c pradahantam asahyaM ca sahasAgnim ivotthitam
6070013a taM lakSmaNo 'tha bAhubhyAM pariSvajya suduHkhitaH
6070013c uvAca rAmam asvasthaM vAkyaM hetvarthasaMhitam
6070014a zubhe vartmani tiSThantaM tvAm Aryavijitendriyam
6070014c anarthebhyo na zaknoti trAtuM dharmo nirarthakaH
6070015a bhUtAnAM sthAvarANAM ca jaGgamAnAM ca darzanam
6070015c yathAsti na tathA dharmas tena nAstIti me matiH
6070016a yathaiva sthAvaraM vyaktaM jaGgamaM ca tathAvidham
6070016c nAyam arthas tathA yuktas tvadvidho na vipadyate
6070017a yady adharmo bhaved bhUto rAvaNo narakaM vrajet
6070017c bhavAMz ca dharmasaMyukto naivaM vyasanam ApnuyAt
6070018a tasya ca vyasanAbhAvAd vyasanaM ca gate tvayi
6070018c dharmeNopalabhed dharmam adharmaM cApy adharmataH
6070019a yadi dharmeNa yujyeran nAdharmarucayo janAH
6070019c dharmeNa caratAM dharmas tathA caiSAM phalaM bhavet
6070020a yasmAd arthA vivardhante yeSv adharmaH pratiSThitaH
6070020c klizyante dharmazIlAz ca tasmAd etau nirarthakau
6070021a vadhyante pApakarmANo yady adharmeNa rAghava
6070021c vadhakarmahato dharmaH sa hataH kaM vadhiSyati
6070022a atha vA vihitenAyaM hanyate hanti vA param
6070022c vidhir Alipyate tena na sa pApena karmaNA
6070023a adRSTapratikAreNa avyaktenAsatA satA
6070023c kathaM zakyaM paraM prAptuM dharmeNArivikarzana
6070024a yadi sat syAt satAM mukhya nAsat syAt tava kiM cana
6070024c tvayA yadIdRzaM prAptaM tasmAt san nopapadyate
6070025a atha vA durbalaH klIbo balaM dharmo 'nuvartate
6070025c durbalo hRtamaryAdo na sevya iti me matiH
6070026a balasya yadi ced dharmo guNabhUtaH parAkrame
6070026c dharmam utsRjya vartasva yathA dharme tathA bale
6070027a atha cet satyavacanaM dharmaH kila paraMtapa
6070027c anRtas tvayy akaruNaH kiM na baddhas tvayA pitA
6070028a yadi dharmo bhaved bhUta adharmo vA paraMtapa
6070028c na sma hatvA muniM vajrI kuryAd ijyAM zatakratuH
6070029a adharmasaMzrito dharmo vinAzayati rAghava
6070029c sarvam etad yathAkAmaM kAkutstha kurute naraH
6070030a mama cedaM mataM tAta dharmo 'yam iti rAghava
6070030c dharmamUlaM tvayA chinnaM rAjyam utsRjatA tadA
6070031a arthebhyo hi vivRddhebhyaH saMvRddhebhyas tatas tataH
6070031c kriyAH sarvAH pravartante parvatebhya ivApagAH
6070032a arthena hi viyuktasya puruSasyAlpatejasaH
6070032c vyucchidyante kriyAH sarvA grISme kusarito yathA
6070033a so 'yam arthaM parityajya sukhakAmaH sukhaidhitaH
6070033c pApam Arabhate kartuM tathA doSaH pravartate
6070034a yasyArthAs tasya mitrANi yasyArthAs tasya bAndhavaH
6070034c yasyArthAH sa pumA&l loke yasyArthAH sa ca paNDitaH
6070035a yasyArthAH sa ca vikrAnto yasyArthAH sa ca buddhimAn
6070035c yasyArthAH sa mahAbhAgo yasyArthAH sa mahAguNaH
6070036a arthasyaite parityAge doSAH pravyAhRtA mayA
6070036c rAjyam utsRjatA vIra yena buddhis tvayA kRtA
6070037a yasyArthA dharmakAmArthAs tasya sarvaM pradakSiNam
6070037c adhanenArthakAmena nArthaH zakyo vicinvatA
6070038a harSaH kAmaz ca darpaz ca dharmaH krodhaH zamo damaH
6070038c arthAd etAni sarvANi pravartante narAdhipa
6070039a yeSAM nazyaty ayaM lokaz caratAM dharmacAriNAm
6070039c te 'rthAs tvayi na dRzyante durdineSu yathA grahAH
6070040a tvayi pravrajite vIra guroz ca vacane sthite
6070040c rakSasApahRtA bhAryA prANaiH priyatarA tava
6070041a tad adya vipulaM vIra duHkham indrajitA kRtam
6070041c karmaNA vyapaneSyAmi tasmAd uttiSTha rAghava
6070042a ayam anagha tavoditaH priyArthaM; janakasutA nidhanaM nirIkSya ruSTaH
6070042c sahayagajarathAM sarAkSasendrAM; bhRzam iSubhir vinipAtayAmi laGkAm
6071001a rAmam AzvAsayAne tu lakSmaNe bhrAtRvatsale
6071001c nikSipya gulmAn svasthAne tatrAgacchad vibhISaNaH
6071002a nAnApraharaNair vIraiz caturbhiH sacivair vRtaH
6071002c nIlAJjanacayAkArair mAtaMgair iva yUthapaH
6071003a so 'bhigamya mahAtmAnaM rAghavaM zokalAlasaM
6071003c vAnarAMz caiva dadRze bASpaparyAkulekSaNAn
6071004a rAghavaM ca mahAtmAnam ikSvAkukulanandanam
6071004c dadarza moham ApannaM lakSmaNasyAGkam Azritam
6071005a vrIDitaM zokasaMtaptaM dRSTvA rAmaM vibhISaNaH
6071005c antarduHkhena dInAtmA kim etad iti so 'bravIt
6071006a vibhISaNa mukhaM dRSTvA sugrIvaM tAMz ca vAnarAn
6071006c uvAca lakSmaNo vAkyam idaM bASpapariplutaH
6071007a hatAm indrajitA sItAm iha zrutvaiva rAghavaH
6071007c hanUmad vacanAt saumya tato moham upAgataH
6071008a kathayantaM tu saumitriM saMnivArya vibhISaNaH
6071008c puSkalArtham idaM vAkyaM visaMjJaM rAmam abravIt
6071009a manujendrArtarUpeNa yad uktas tvaM hanUmatA
6071009c tad ayuktam ahaM manye sAgarasyeva zoSaNam
6071010a abhiprAyaM tu jAnAmi rAvaNasya durAtmanaH
6071010c sItAM prati mahAbAho na ca ghAtaM kariSyati
6071011a yAcyamAnaH subahuzo mayA hitacikIrSuNA
6071011c vaidehIm utsRjasveti na ca tat kRtavAn vacaH
6071012a naiva sAmnA na bhedena na dAnena kuto yudhA
6071012c sA draSTum api zakyeta naiva cAnyena kena cit
6071013a vAnarAn mohayitvA tu pratiyAtaH sa rAkSasaH
6071013c caityaM nikumbhilAM nAma yatra homaM kariSyati
6071014a hutavAn upayAto hi devair api savAsavaiH
6071014c durAdharSo bhavaty eSa saMgrAme rAvaNAtmajaH
6071015a tena mohayatA nUnam eSA mAyA prayojitA
6071015c vighnam anvicchatA tAta vAnarANAM parAkrame
6071015e sasainyAs tatra gacchAmo yAvat tan na samApyate
6071016a tyajemaM narazArdUlamithyA saMtApam Agatam
6071016c sIdate hi balaM sarvaM dRSTvA tvAM zokakarzitam
6071017a iha tvaM svastha hRdayas tiSTha sattvasamucchritaH
6071017c lakSmaNaM preSayAsmAbhiH saha sainyAnukarSibhiH
6071018a eSa taM narazArdUlo rAvaNiM nizitaiH zaraiH
6071018c tyAjayiSyati tat karma tato vadhyo bhaviSyati
6071019a tasyaite nizitAs tIkSNAH patripatrAGgavAjinaH
6071019c patatriNa ivAsaumyAH zarAH pAsyanti zoNitam
6071020a tat saMdiza mahAbAho lakSmaNaM zubhalakSaNam
6071020c rAkSasasya vinAzAya vajraM vajradharo yathA
6071021a manujavara na kAlaviprakarSo; ripunidhanaM prati yat kSamo 'dya kartum
6071021c tvam atisRja ripor vadhAya bANIm; asurapuronmathane yathA mahendraH
6071022a samAptakarmA hi sa rAkSasendro; bhavaty adRzyaH samare surAsuraiH
6071022c yuyutsatA tena samAptakarmaNA; bhavet surANAm api saMzayo mahAn
6072001a tasya tad vacanaM zrutvA rAghavaH zokakarzitaH
6072001c nopadhArayate vyaktaM yad uktaM tena rakSasA
6072002a tato dhairyam avaSTabhya rAmaH parapuraMjayaH
6072002c vibhISaNam upAsInam uvAca kapisaMnidhau
6072003a nairRtAdhipate vAkyaM yad uktaM te vibhISaNa
6072003c bhUyas tac chrotum icchAmi brUhi yat te vivakSitam
6072004a rAghavasya vacaH zrutvA vAkyaM vAkyavizAradaH
6072004c yat tat punar idaM vAkyaM babhASe sa vibhISaNaH
6072005a yathAjJaptaM mahAbAho tvayA gulmanivezanam
6072005c tat tathAnuSThitaM vIra tvadvAkyasamanantaram
6072006a tAny anIkAni sarvANi vibhaktAni samantataH
6072006c vinyastA yUthapAz caiva yathAnyAyaM vibhAgazaH
6072007a bhUyas tu mama vijApyaM tac chRNuSva mahAyazaH
6072007c tvayy akAraNasaMtapte saMtaptahRdayA vayam
6072008a tyaja rAjann imaM zokaM mithyA saMtApam Agatam
6072008c tad iyaM tyajyatAM cintA zatruharSavivardhanI
6072009a udyamaH kriyatAM vIra harSaH samupasevyatAm
6072009c prAptavyA yadi te sItA hantavyaz ca nizAcarAH
6072010a raghunandana vakSyAmi zrUyatAM me hitaM vacaH
6072010c sAdhv ayaM yAtu saumitrir balena mahatA vRtaH
6072010e nikumbhilAyAM saMprApya hantuM rAvaNim Ahave
6072011a dhanurmaNDalanirmuktair AzIviSaviSopamaiH
6072011c zarair hantuM maheSvAso rAvaNiM samitiMjayaH
6072012a tena vIreNa tapasA varadAnAt svayambhutaH
6072012c astraM brahmaziraH prAptaM kAmagAz ca turaMgamAH
6072013a nikumbhilAm asaMprAptam ahutAgniM ca yo ripuH
6072013c tvAm AtatAyinaM hanyAd indrazatro sa te vadhaH
6072013e ity evaM vihito rAjan vadhas tasyaiva dhImataH
6072014a vadhAyendrajito rAma taM dizasva mahAbalam
6072014c hate tasmin hataM viddhi rAvaNaM sasuhRjjanam
6072015a vibhISaNavacaH zrutva rAmo vAkyam athAbravIt
6072015c jAnAmi tasya raudrasya mAyAM satyaparAkrama
6072016a sa hi brahmAstravit prAjJo mahAmAyo mahAbalaH
6072016c karoty asaMjJAn saMgrAme devAn savaruNAn api
6072017a tasyAntarikSe carato rathasthasya mahAyazaH
6072017c na gatir jJAyate vIrasUryasyevAbhrasaMplave
6072018a rAghavas tu ripor jJAtvA mAyAvIryaM durAtmanaH
6072018c lakSmaNaM kIrtisaMpannam idaM vacanam abravIt
6072019a yad vAnarendrasya balaM tena sarveNa saMvRtaH
6072019c hanUmatpramukhaiz caiva yUthapaiH sahalakSmaNa
6072020a jAmbavenarkSapatinA saha sainyena saMvRtaH
6072020c jahi taM rAkSasasutaM mAyAbalavizAradam
6072021a ayaM tvAM sacivaiH sArdhaM mahAtmA rajanIcaraH
6072021c abhijJas tasya dezasya pRSThato 'nugamiSyati
6072022a rAghavasya vacaH zrutvA lakSmaNaH savibhISaNaH
6072022c jagrAha kArmukaM zreSTham anyad bhImaparAkramaH
6072023a saMnaddhaH kavacI khaDgI sa zarI hemacApadhRk
6072023c rAmapAdAv upaspRzya hRSTaH saumitrir abravIt
6072024a adya matkArmukonmukhAH zarA nirbhidya rAvaNim
6072024c laGkAm abhipatiSyanti haMsAH puSkariNIm iva
6072025a adyaiva tasya raudrasya zarIraM mAmakAH zarAH
6072025c vidhamiSyanti hatvA taM mahAcApaguNacyutAH
6072026a sa evam uktvA dyutimAn vacanaM bhrAtur agrataH
6072026c sa rAvaNivadhAkAGkSI lakSmaNas tvarito yayau
6072027a so 'bhivAdya guroH pAdau kRtvA cApi pradakSiNam
6072027c nikumbhilAm abhiyayau caityaM rAvaNipAlitam
6072028a vibhISaNena sahito rAjaputraH pratApavAn
6072028c kRtasvastyayano bhrAtrA lakSmaNas tvarito yayau
6072029a vAnarANAM sahasrais tu hanUmAn bahubhir vRtaH
6072029c vibhISaNaH sahAmAtyas tadA lakSmaNam anvagAt
6072030a mahatA harisainyena savegam abhisaMvRtaH
6072030c RkSarAjabalaM caiva dadarza pathi viSThitam
6072031a sa gatvA dUram adhvAnaM saumitrir mitranandanaH
6072031c rAkSasendrabalaM dUrAd apazyad vyUham Asthitam
6072032a sa saMprApya dhanuSpANir mAyAyogam ariMdama
6072032c tasthau brahmavidhAnena vijetuM raghunandanaH
6072033a vividham amalazastrabhAsvaraM tad; dhvajagahanaM vipulaM mahArathaiz ca
6072033c pratibhayatamam aprameyavegaM; timiram iva dviSatAM balaM viveza
6073001a atha tasyAm avasthAyAM lakSmaNaM rAvaNAnujaH
6073001c pareSAm ahitaM vAkyam arthasAdhakam abravIt
6073002a asyAnIkasya mahato bhedane yatalakSmaNa
6073002c rAkSasendrasuto 'py atra bhinne dRzyo bhaviSyati
6073003a sa tvam indrAzaniprakhyaiH zarair avakiran parAn
6073003c abhidravAzu yAvad vai naitat karma samApyate
6073004a jahi vIradurAtmAnaM mAyAparam adhArmikam
6073004c rAvaNiM krUrakarmANaM sarvalokabhayAvaham
6073005a vibhISaNavacaH zrutvA lakSmaNaH zubhalakSaNaH
6073005c vavarSa zaravarSANi rAkSasendrasutaM prati
6073006a RkSAH zAkhAmRgAz caiva drumAdrivarayodhinaH
6073006c abhyadhAvanta sahitAs tad anIkam avasthitam
6073007a rAkSasAz ca zitair bANair asibhiH zaktitomaraiH
6073007c udyataiH samavartanta kapisainyajighAMsavaH
6073008a sa saMprahAras tumulaH saMjajJe kapirakSasAm
6073008c zabdena mahatA laGkAM nAdayan vai samantataH
6073009a zastrair bahuvidhAkAraiH zitair bANaiz ca pAdapaiH
6073009c udyatair girizRGgaiz ca ghorair AkAzam AvRtam
6073010a te rAkSasA vAnareSu vikRtAnanabAhavaH
6073010c nivezayantaH zastrANi cakrus te sumahad bhayam
6073011a tathaiva sakalair vRkSair girizRGgaiz ca vAnarAH
6073011c abhijaghnur nijaghnuz ca samare rAkSasarSabhAn
6073012a RkSavAnaramukhyaiz ca mahAkAyair mahAbalaiH
6073012c rakSasAM vadhyamAnAnAM mahad bhayam ajAyata
6073013a svam anIkaM viSaNNaM tu zrutvA zatrubhir arditam
6073013c udatiSThata durdharSas tat karmaNy ananuSThite
6073014a vRkSAndhakArAn niSkramya jAtakrodhaH sa rAvaNiH
6073014c Aruroha rathaM sajjaM pUrvayuktaM sa rAkSasaH
6073015a sa bhImakArmukazaraH kRSNAJjanacayopamaH
6073015c raktAsyanayanaH krUro babhau mRtyur ivAntakaH
6073016a dRSTvaiva tu rathasthaM taM paryavartata tad balam
6073016c rakSasAM bhImavegAnAM lakSmaNena yuyutsatAm
6073017a tasmin kAle tu hanumAn udyamya sudurAsadam
6073017c dharaNIdharasaMkAzI mahAvRkSam ariMdamaH
6073018a sa rAkSasAnAM tat sainyaM kAlAgnir iva nirdahan
6073018c cakAra bahubhir vRkSair niHsaMjJaM yudhi vAnaraH
6073019a vidhvaMsayantaM tarasA dRSTvaiva pavanAtmajam
6073019c rAkSasAnAM sahasrANi hanUmantam avAkiran
6073020a zitazUladharAH zUlair asibhiz cAsipANayaH
6073020c zaktibhiH zaktihastAz ca paTTasaiH paTTasAyudhAH
6073021a parighaiz ca gadAbhiz ca kuntaiz ca zubhadarzanaiH
6073021c zatazaz ca zataghnIbhir Ayasair api mudgaraiH
6073022a ghoraiH parazubhiz caiva bhiNDipAlaiz ca rAkSasAH
6073022c muSTibhir vajravegaiz ca talair azanisaMnibhaiH
6073023a abhijaghnuH samAsAdya samantAt parvatopamam
6073023c teSAm api ca saMkruddhaz cakAra kadanaM mahat
6073024a sa dadarza kapizreSTham acalopamam indrajit
6073024c sUdayAnam amitraghnam amitrAn pavanAtmajam
6073025a sa sArathim uvAcedaM yAhi yatraiSa vAnaraH
6073025c kSayam eva hi naH kuryAd rAkSasAnAm upekSitaH
6073026a ity uktaH sArathis tena yayau yatra sa mArutiH
6073026c vahan paramadurdharSaM sthitam indrajitaM rathe
6073027a so 'bhyupetya zarAn khaDgAn paTTasAsiparazvadhAn
6073027c abhyavarSata durdharSaH kapimUrdhni sa rAkSasaH
6073028a tAni zastrANi ghorANi pratigRhya sa mArutiH
6073028c roSeNa mahatAviSo vAkyaM cedam uvAca ha
6073029a yudhyasva yadi zUro 'si rAvaNAtmaja durmate
6073029c vAyuputraM samAsAdya na jIvan pratiyAsyasi
6073030a bAhubhyAM saMprayudhyasva yadi me dvandvam Ahave
6073030c vegaM sahasva durbuddhe tatas tvaM rakSasAM varaH
6073031a hanUmantaM jighAMsantaM samudyatazarAsanam
6073031c rAvaNAtmajam AcaSTe lakSmaNAya vibhISaNaH
6073032a yas tu vAsavanirjetA rAvaNasyAtmasaMbhavaH
6073032c sa eSa ratham AsthAya hanUmantaM jighAMsati
6073033a tam apratimasaMsthAnaiH zaraiH zatruvidAraNaiH
6073033c jIvitAntakarair ghoraiH saumitre rAvaNiM jahi
6073034a ity evam uktas tu tadA mahAtmA; vibhISaNenArivibhISaNena
6073034c dadarza taM parvatasaMnikAzaM; rathasthitaM bhImabalaM durAsadam
6074001a evam uktvA tu saumitriM jAtaharSo vibhISaNaH
6074001c dhanuSpANinam AdAya tvaramANo jagAma saH
6074002a avidUraM tato gatvA pravizya ca mahad vanam
6074002c darzayAm Asa tat karma lakSmaNAya vibhISaNaH
6074003a nIlajImUtasaMkAzaM nyagrodhaM bhImadarzanam
6074003c tejasvI rAvaNabhrAtA lakSmaNAya nyavedayat
6074004a ihopahAraM bhUtAnAM balavAn rAvaNAtajaH
6074004c upahRtya tataH pazcAt saMgrAmam abhivartate
6074005a adRzyaH sarvabhUtAnAM tato bhavati rAkSasaH
6074005c nihanti samare zatrUn badhnAti ca zarottamaiH
6074006a tam apraviSTaM nyagrodhaM balinaM rAvaNAtmajam
6074006c vidhvaMsaya zarais tIkSNaiH sarathaM sAzvasArathim
6074007a tathety uktvA mahAtejAH saumitrir mitranandanaH
6074007c babhUvAvasthitas tatra citraM visphArayan dhanuH
6074008a sa rathenAgnivarNena balavAn rAvaNAtmajaH
6074008c indrajit kavacI khaDgI sadhvajaH pratyadRzyata
6074009a tam uvAca mahAtejAH paulastyam aparAjitam
6074009c samAhvaye tvAM samare samyag yuddhaM prayaccha me
6074010a evam ukto mahAtejA manasvI rAvaNAtmajaH
6074010c abravIt paruSaM vAkyaM tatra dRSTvA vibhISaNam
6074011a iha tvaM jAtasaMvRddhaH sAkSAd bhrAtA pitur mama
6074011c kathaM druhyasi putrasya pitRvyo mama rAkSasa
6074012a na jJAtitvaM na sauhArdaM na jAtis tava durmate
6074012c pramANaM na ca sodaryaM na dharmo dharmadUSaNa
6074013a zocyas tvam asi durbuddhe nindanIyaz ca sAdhubhiH
6074013c yas tvaM svajanam utsRjya parabhRtyatvam AgataH
6074014a naitac chithilayA buddhyA tvaM vetsi mahad antaram
6074014c kva ca svajanasaMvAsaH kva ca nIcaparAzrayaH
6074015a guNavAn vA parajanaH svajano nirguNo 'pi vA
6074015c nirguNaH svajanaH zreyAn yaH paraH para eva saH
6074016a niranukrozatA ceyaM yAdRzI te nizAcara
6074016c svajanena tvayA zakyaM paruSaM rAvaNAnuja
6074017a ity ukto bhrAtRputreNa pratyuvAca vibhISaNaH
6074017c ajAnann iva macchIlaM kiM rAkSasa vikatthase
6074018a rAkSasendrasutAsAdho pAruSyaM tyaja gauravAt
6074018c kule yady apy ahaM jAto rakSasAM krUrakarmaNAm
6074018e guNo 'yaM prathamo nqNAM tan me zIlam arAkSasaM
6074019a na rame dAruNenAhaM na cAdharmeNa vai rame
6074019c bhrAtrA viSamazIlena kathaM bhrAtA nirasyate
6074020a parasvAnAM ca haraNaM paradArAbhimarzanam
6074020c suhRdAm atizaGkAM ca trayo doSAH kSayAvahAH
6074021a maharSINAM vadho ghoraH sarvadevaiz ca vigrahaH
6074021c abhimAnaz ca kopaz ca vairitvaM pratikUlatA
6074022a ete doSA mama bhrAtur jIvitaizvaryanAzanAH
6074022c guNAn pracchAdayAm AsuH parvatAn iva toyadAH
6074023a doSair etaiH parityakto mayA bhrAtA pitA tava
6074023c neyam asti purI laGkA na ca tvaM na ca te pitA
6074024a atimAnI ca bAlaz ca durvinItaz ca rAkSasa
6074024c baddhas tvaM kAlapAzena brUhi mAM yad yad icchasi
6074025a adya te vyasanaM prAptaM kim iha tvaM tu vakSyasi
6074025c praveSTuM na tvayA zakyo nyagrodho rAkSasAdhama
6074026a dharSayitvA tu kAkutsthau na zakyaM jIvituM tvayA
6074026c yudhyasva naradevena lakSmaNena raNe saha
6074026e hatas tvaM devatA kAryaM kariSyasi yamakSaye
6074027a nidarzayasvAtmabalaM samudyataM; kuruSva sarvAyudhasAyakavyayam
6074027c na lakSmaNasyaitya hi bANagocaraM; tvam adya jIvan sabalo gamiSyasi
6075001a vibhISaNa vacaH zrutvA rAvaNiH krodhamUrchitaH
6075001c abravIt paruSaM vAkyaM vegenAbhyutpapAta ha
6075002a udyatAyudhanistriMzo rathe tu samalaMkRte
6075002c kAlAzvayukte mahati sthitaH kAlAntakopamaH
6075003a mahApramANam udyamya vipulaM vegavad dRDham
6075003c dhanur bhImaM parAmRzya zarAMz cAmitranAzanAn
6075004a uvAcainaM samArabdhaH saumitriM savibhISaNam
6075004c tAMz ca vAnarazArdUlAn pazyadhvaM me parAkramam
6075005a adya matkArmukotsRSTaM zaravarSaM durAsadam
6075005c muktaM varSam ivAkAze vArayiSyatha saMyuge
6075006a adya vo mAmakA bANA mahAkArmukaniHsRtAH
6075006c vidhamiSyanti gAtrANi tUlarAzim ivAnalaH
6075007a tIkSNasAyakanirbhinnAJ zUlazaktyRSTitomaraiH
6075007c adya vo gamayiSyAmi sarvAn eva yamakSayam
6075008a kSipataH zaravarSANi kSiprahastasya me yudhi
6075008c jImUtasyeva nadataH kaH sthAsyati mamAgrataH
6075009a tac chrutvA rAkSasendrasya garjitaM lakSmaNas tadA
6075009c abhItavadanaH kruddho rAvaNiM vAkyam abravIt
6075010a uktaz ca durgamaH pAraH kAryANAM rAkSasa tvayA
6075010c kAryANAM karmaNA pAraM yo gacchati sa buddhimAn
6075011a sa tvam arthasya hInArtho duravApasya kena cit
6075011c vaco vyAhRtya jAnISe kRtArtho 'smIti durmate
6075012a antardhAnagatenAjau yas tvayAcaritas tadA
6075012c taskarAcarito mArgo naiSa vIraniSevitaH
6075013a yathA bANapathaM prApya sthito 'haM tava rAkSasa
6075013c darzayasvAdya tat tejo vAcA tvaM kiM vikatthase
6075014a evam ukto dhanur bhImaM parAmRzya mahAbalaH
6075014c sasarje nizitAn bANAn indrajit samijiMjaya
6075015a te nisRSTA mahAvegAH zarAH sarpaviSopamAH
6075015c saMprApya lakSmaNaM petuH zvasanta iva pannagAH
6075016a zarair atimahAvegair vegavAn rAvaNAtmajaH
6075016c saumitrim indrajid yuddhe vivyAdha zubhalakSaNam
6075017a sa zarair atividdhAGgo rudhireNa samukSitaH
6075017c zuzubhe lakSmaNaH zrImAn vidhUma iva pAvakaH
6075018a indrajit tv AtmanaH karma prasamIkSyAdhigamya ca
6075018c vinadya sumahAnAdam idaM vacanam abravIt
6075019a patriNaH zitadhArAs te zarA matkArmukacyutAH
6075019c AdAsyante 'dya saumitre jIvitaM jIvitAntagAH
6075020a adya gomAyusaMghAz ca zyenasaMghAz ca lakSmaNa
6075020c gRdhrAz ca nipatantu tvAM gatAsuM nihataM mayA
6075021a kSatrabandhuH sadAnAryo rAmaH paramadurmatiH
6075021c bhaktaM bhrAtaram adyaiva tvAM drakSyati mayA hatam
6075022a vizastakavacaM bhUmau vyapaviddhazarAsanam
6075022c hRtottamAGgaM saumitre tvAm adya nihataM mayA
6075023a iti bruvANaM saMrabdhaM paruSaM rAvaNAtmajam
6075023c hetumadvAkyam atyarthaM lakSmaNaH pratyuvAca ha
6075024a akRtvA katthase karma kimartham iha rAkSasa
6075024c kuru tat karma yenAhaM zraddadhyAM tava katthanam
6075025a anuktvA paruSaM vAkyaM kiM cid apy anavakSipan
6075025c avikatthan vadhiSyAmi tvAM pazya puruSAdana
6075026a ity uktvA paJcanArAcAn AkarNApUritAJ zarAn
6075026c nicakhAna mahAvegA&l lakSmaNo rAkSasorasi
6075027a sa zarair Ahatas tena saroSo rAvaNAtmajaH
6075027c suprayuktais tribhir bANaiH prativivyAdha lakSmaNam
6075028a sa babhUva mahAbhImo nararAkSasasiMhayoH
6075028c vimardas tumulo yuddhe parasparavadhaiSiNoH
6075029a ubhau hi balasaMpannAv ubhau vikramazAlinau
6075029c ubhAv api suvikrAntau sarvazastrAstrakovidau
6075030a ubhau paramadurjeyAv atulyabalatejasau
6075030c yuyudhAte mahAvIrau grahAv iva nabho gatau
6075031a balavRtrAv iva hi tau yudhi vai duSpradharSaNau
6075031c yuyudhAte mahAtmAnau tadA kesariNAv iva
6075032a bahUn avasRjantau hi mArgaNaughAn avasthitau
6075032c nararAkSasasiMhau tau prahRSTAv abhyayudhyatAm
6075033a susaMprahRSTau nararAkSasottamau; jayaiSiNau mArgaNacApadhAriNau
6075033c parasparaM tau pravavarSatur bhRzaM; zaraughavarSeNa balAhakAv iva
6076001a tataH zaraM dAzarathiH saMdhAyAmitrakarzanaH
6076001c sasarja rAkSasendrAya kruddhaH sarpa iva zvasan
6076002a tasya jyAtalanirghoSaM sa zrutvA rAvaNAtmajaH
6076002c vivarNavadano bhUtvA lakSmaNaM samudaikSata
6076003a taM viSaNNamukhaM dRSTvA rAkSasaM rAvaNAtmajam
6076003c saumitriM yuddhasaMsaktaM pratyuvAca vibhISaNaH
6076004a nimittAny anupazyAmi yAny asmin rAvaNAtmaje
6076004c tvara tena mahAbAho bhagna eSa na saMzayaH
6076005a tataH saMdhAya saumitriH zarAn agnizikhopamAn
6076005c mumoca nizitAMs tasmai sarvAn iva viSolbaNAn
6076006a zakrAzanisamasparzair lakSmaNenAhataH zaraiH
6076006c muhUrtam abhavan mUDhaH sarvasaMkSubhitendriyaH
6076007a upalabhya muhUrtena saMjJAM pratyAgatendriyaH
6076007c dadarzAvasthitaM vIraM vIro dazarathAtmajam
6076008a so 'bhicakrAma saumitriM roSAt saMraktalocanaH
6076008c abravIc cainam AsAdya punaH sa paruSaM vacaH
6076009a kiM na smarasi tad yuddhe prathame matparAkramam
6076009c nibaddhas tvaM saha bhrAtrA yadA yudhi viceSTase
6076010a yuvA khalu mahAyuddhe zakrAzanisamaiH zaraiH
6076010c zAyinau prathamaM bhUmau visaMjJau sapuraHsarau
6076011a smRtir vA nAsti te manye vyaktaM vA yamasAdanam
6076011c gantum icchasi yasmAt tvaM mAM dharSayitum icchasi
6076012a yadi te prathame yuddhe na dRSTo matparAkramaH
6076012c adya tvAM darzayiSyAmi tiSThedAnIM vyavasthitaH
6076013a ity uktvA saptabhir bANair abhivivyAdha lakSmaNam
6076013c dazabhiz ca hanUmantaM tIkSNadhAraiH zarottamaiH
6076014a tataH zarazatenaiva suprayuktena vIryavAn
6076014c krodhAd dviguNasaMrabdho nirbibheda vibhISaNam
6076015a tad dRSTvendrajitaH karma kRtaM rAmAnujas tadA
6076015c acintayitvA prahasan naitat kiM cid iti bruvan
6076016a mumoca sa zarAn ghorAn saMgRhya narapuMgavaH
6076016c abhItavadanaH kruddho rAvaNiM lakSmaNo yudhi
6076017a naivaM raNagataH zUrAH praharanti nizAcara
6076017c laghavaz cAlpavIryAz ca sukhA hIme zarAs tava
6076018a naivaM zUrAs tu yudhyante samare jayakAGkSiNaH
6076018c ity evaM taM bruvANas tu zaravarSair avAkirat
6076019a tasya bANais tu vidhvastaM kavacaM hemabhUSitam
6076019c vyazIryata rathopasthe tArAjAlam ivAmbarAt
6076020a vidhUtavarmA nArAcair babhUva sa kRtavraNaH
6076020c indrajit samare zUraH prarUDha iva sAnumAn
6076021a abhIkSNaM nizvasantau hi yudhyetAM tumulaM yudhi
6076021c zarasaMkRttasarvAGgo sarvato rudhirokSitau
6076022a astrANy astravidAM zreSThau darzayantau punaH punaH
6076022c zarAn uccAvacAkArAn antarikSe babandhatuH
6076023a vyapetadoSam asyantau laghucitraM ca suSThu ca
6076023c ubhau tu tumulaM ghoraM cakratur nararAkSasau
6076024a tayoH pRthakpRthag bhImaH zuzruve talanisvanaH
6076024c sughorayor niSTanator gagane meghayor iva
6076025a te gAtrayor nipatitA rukmapuGkhAH zarA yudhi
6076025c asRgdigdhA viniSpetur vivizur dharaNItalam
6076026a anyaiH sunizitaiH zastrair AkAze saMjaghaTTire
6076026c babhaJjuz cicchiduz cApi tayor bANAH sahasrazaH
6076027a sa babhUva raNe ghoras tayor bANamayaz cayaH
6076027c agnibhyAm iva dIptAbhyAM satre kuzamayaz cayaH
6076028a tayoH kRtavraNau dehau zuzubhAte mahAtmanoH
6076028c sapuSpAv iva niSpatrau vane zAlmalikuMzukau
6076029a cakratus tumulaM ghoraM saMnipAtaM muhur muhuH
6076029c indrajil lakSmaNaz caiva parasparajayaiSiNau
6076030a lakSmaNo rAvaNiM yuddhe rAvaNiz cApi lakSmaNam
6076030c anyonyaM tAv abhighnantau na zramaM pratyapadyatAm
6076031a bANajAlaiH zarIrasthair avagADhais tarasvinau
6076031c zuzubhAte mahAvIrau virUDhAv iva parvatau
6076032a tayo rudhirasiktAni saMvRtAni zarair bhRzam
6076032c babhrAjuH sarvagAtrANi jvalanta iva pAvakAH
6076033a tayor atha mahAn kAlo vyatIyAd yudhyamAnayoH
6076033c na ca tau yuddhavaimukhyaM zramaM vApy upajagmatuH
6076034a atha samaraparizramaM nihantuM; samaramukheSv ajitasya lakSmaNasya
6076034c priyahitam upapAdayan mahaujAH; samaram upetya vibhISaNo 'vatasthe
6077001a yudhyamAnau tu tau dRSTvA prasaktau nararAkSasau
6077001c zUraH sa rAvaNabhrAtA tasthau saMgrAmamUrdhani
6077002a tato visphArayAm Asa mahad dhanur avasthitaH
6077002c utsasarja ca tIkSNAgrAn rAkSaseSu mahAzarAn
6077003a te zarAH zikhisaMkAzA nipatantaH samAhitAH
6077003c rAkSasAn dArayAm Asur vajrA iva mahAgirIn
6077004a vibhISaNasyAnucarAs te 'pi zUlAsipaTTasaiH
6077004c ciccheduH samare vIrAn rAkSasAn rAkSasottamAH
6077005a rAkSasais taiH parivRtaH sa tadA tu vibhISaNaH
6077005c babhau madhye prahRSTAnAM kalabhAnAm iva dvipaH
6077006a tataH saMcodayAno vai harIn rakSoraNapriyAn
6077006c uvAca vacanaM kAle kAlajJo rakSasAM varaH
6077007a eko 'yaM rAkSasendrasya parAyaNam iva sthitaH
6077007c etac cheSaM balaM tasya kiM tiSThata harIzvarAH
6077008a asmin vinihate pApe rAkSase raNamUrdhani
6077008c rAvaNaM varjayitvA tu zeSam asya balaM hatam
6077009a prahasto nihato vIro nikumbhaz ca mahAbalaH
6077009c kumbhakarNaz ca kumbhaz ca dhUmrAkSaz ca nizAcaraH
6077010a akampanaH supArzvaz ca cakramAlI ca rAkSasaH
6077010c kampanaH sattvavantaz ca devAntakanarAntakau
6077011a etAn nihatyAtibalAn bahUn rAkSasasattamAn
6077011c bAhubhyAM sAgaraM tIrtvA laGghyatAM goSpadaM laghu
6077012a etAvad iha zeSaM vo jetavyam iha vAnarAH
6077012c hatAH sarve samAgamya rAkSasA baladarpitAH
6077013a ayuktaM nidhanaM kartuM putrasya janitur mama
6077013c ghRNAm apAsya rAmArthe nihanyAM bhrAtur Atmajam
6077014a hantukAmasya me bASpaM cakzuz caiva nirudhyate
6077014c tad evaiSa mahAbAhur lakSmaNaH zamayiSyati
6077014e vAnarA ghnantuM saMbhUya bhRtyAn asya samIpagAn
6077015a iti tenAtiyazasA rAkSasenAbhicoditAH
6077015c vAnarendrA jahRSire lAGgalAni ca vivyadhuH
6077016a tatas te kapizArdUlAH kSveDantaz ca muhur muhuH
6077016c mumucur vividhAn nAdAn meghAn dRSTveva barhiNaH
6077017a jAmbavAn api taiH sarvaiH svayUthair abhisaMvRtaH
6077017c azmabhis tADayAm Asa nakhair dantaiz ca rAkSasAn
6077018a nighnantam RkSAdhipatiM rAkSasAs te mahAbalAH
6077018c parivavrur bhayaM tyaktvA tam anekavidhAyudhAH
6077019a zaraiH parazubhis tIkSNaiH paTTasair yaSTitomaraiH
6077019c jAmbavantaM mRdhe jaghnur nighnantaM rAkSasIM camUm
6077020a sa saMprahAras tumulaH saMjajJe kapirAkSasAm
6077020c devAsurANAM kruddhAnAM yathA bhImo mahAsvanaH
6077021a hanUmAn api saMkruddhaH sAlam utpATya parvatAt
6077021c rakSasAM kadanaM cakre samAsAdya sahasrazaH
6077022a sa dattvA tumulaM yuddhaM pitRvyasyendrajid yudhi
6077022c lakSmaNaM paravIraghnaM punar evAbhyadhAvata
6077023a tau prayuddhau tadA vIrau mRdhe lakSmaNarAkSasau
6077023c zaraughAn abhivarSantau jaghnatus tau parasparam
6077024a abhIkSNam antardadhatuH zarajAlair mahAbalau
6077024c candrAdityAv ivoSNAnte yathA meghais tarasvinau
6077025a na hy AdAnaM na saMdhAnaM dhanuSo vA parigrahaH
6077025c na vipramokSo bANAnAM na vikarSo na vigrahaH
6077026a na muSTipratisaMdhAnaM na lakSyapratipAdanam
6077026c adRzyata tayos tatra yudhyatoH pANilAghavAt
6077027a cApavegapramuktaiz ca bANajAlaiH samantataH
6077027c antarikSe 'bhisaMchanne na rUpANi cakAzire
6077027e tamasA pihitaM sarvam AsId bhImataraM mahat
6077028a na tadAnIM vavau vAyur na jajvAla ca pAvakaH
6077028c svastyas tu lokebhya iti jajalpaz ca maharSayaH
6077028e saMpetuz cAtra saMprAptA gandharvAH saha cAraNaiH
6077029a atha rAkSasasiMhasya kRSNAn kanakabhUSaNAn
6077029c zaraiz caturbhiH saumitrir vivyAdha caturo hayAn
6077030a tato 'pareNa bhallena sUtasya vicariSyataH
6077030c lAghavAd rAghavaH zrImAJ ziraH kAyAd apAharat
6077031a nihataM sArathiM dRSTvA samare rAvaNAtmajaH
6077031c prajahau samaroddharSaM viSaNNaH sa babhUva ha
6077032a viSaNNavadanaM dRSTvA rAkSasaM hariyUthapAH
6077032c tataH paramasaMhRSTo lakSmaNaM cAbhyapUjayan
6077033a tataH pramAthI zarabho rabhaso gandhamAdanaH
6077033c amRSyamANAz catvAraz cakrur vegaM harIzvarAH
6077034a te cAsya hayamukhyeSu tUrNam utpatya vAnarAH
6077034c caturSu sumahAvIryA nipetur bhImavikramAH
6077035a teSAm adhiSThitAnAM tair vAnaraiH parvatopamaiH
6077035c mukhebhyo rudhiraM vyaktaM hayAnAM samavartata
6077036a te nihatya hayAMs tasya pramathya ca mahAratham
6077036c punar utpatya vegena tasthur lakSmaNapArzvataH
6077037a sa hatAzvAd avaplutya rathAn mathitasAratheH
6077037c zaravarSeNa saumitrim abhyadhAvata rAvaNiH
6077038a tato mahendrapratimaH sa lakSmaNaH; padAtinaM taM nizitaiH zarottamaiH
6077038c sRjantam Adau nizitAJ zarottamAn; bhRzaM tadA bANagaNair nyavArayat
6078001a sa hatAzvo mahAtejA bhUmau tiSThan nizAcaraH
6078001c indrajit paramakruddhaH saMprajajvAla tejasA
6078002a tau dhanvinau jighAMsantAv anyonyam iSubhir bhRzam
6078002c vijayenAbhiniSkrAntau vane gajavRSAv iva
6078003a nibarhayantaz cAnyonyaM te rAkSasavanaukasaH
6078003c bhartAraM na jahur yuddhe saMpatantas tatas tataH
6078004a sa lakSmaNaM samuddizya paraM lAghavam AsthitaH
6078004c vavarSa zaravarSANi varSANIva puraMdaraH
6078005a muktam indrajitA tat tu zaravarSam ariMdamaH
6078005c avArayad asaMbhrAnto lakSmaNaH sudurAsadam
6078006a abhedyakacanaM matvA lakSmaNaM rAvaNAtmajaH
6078006c lalATe lakSmaNaM bANaiH supuGkhais tribhir indrajit
6078006e avidhyat paramakruddhaH zIghram astraM pradarzayan
6078007a taiH pRSatkair lalATasthaiH zuzubhe raghunandanaH
6078007c raNAgre samarazlAghI trizRGga iva parvataH
6078008a sa tathApy ardito bANai rAkSasena mahAmRdhe
6078008c tam Azu prativivyAdha lakSmaNaH panabhiH zaraiH
6078009a lakSmaNendrajitau vIrau mahAbalazarAsanau
6078009c anyonyaM jaghnatur bANair vizikhair bhImavikramau
6078010a tau parasparam abhyetya sarvagAtreSu dhanvinau
6078010c ghorair vivyadhatur bANaiH kRtabhAvAv ubhau jaye
6078011a tasmai dRDhataraM kruddho hatAzvAya vibhISaNaH
6078011c vajrasparzasamAn paJca sasarjorasi mArgaNAn
6078012a te tasya kAyaM nirbhidya rukmapuGkhA nimittagAH
6078012c babhUvur lohitAdigdhA raktA iva mahoragAH
6078013a sa pitRvyasya saMkruddha indrajic charam Adade
6078013c uttamaM rakSasAM madhye yamadattaM mahAbalaH
6078014a taM samIkSya mahAtejA maheSuM tena saMhitam
6078014c lakSmaNo 'py Adade bANam anyaM bhImaparAkramaH
6078015a kubereNa svayaM svapne yad dattam amitAtmanA
6078015c durjayaM durviSahyaM ca sendrair api surAsuraiH
6078016a tAbhyAM tau dhanuSi zreSThe saMhitau sAyakottamau
6078016c vikRSyamANau vIrAbhyAM bhRzaM jajvalatuH zriyA
6078017a tau bhAsayantAv AkAzaM dhanurbhyAM vizikhau cyutau
6078017c mukhena mukham Ahatya saMnipetatur ojasA
6078018a tau mahAgrahasaMkAzAv anyonyaM saMnipatya ca
6078018c saMgrAme zatadhA yAtau medinyAM vinipetatuH
6078019a zarau pratihatau dRSTvA tAv ubhau raNamUrdhani
6078019c vrIDito jAtaroSau ca lakSmaNendrajitAv ubhau
6078020a susaMrabdhas tu saumitrir astraM vAruNam Adade
6078020c raudraM mahedrajid yuddhe vyasRjad yudhi viSThitaH
6078021a tayoH sutumulaM yuddhaM saMbabhUvAdbhutopamam
6078021c gaganasthAni bhUtAni lakSmaNaM paryavArayan
6078022a bhairavAbhirute bhIme yuddhe vAnararAkSasAm
6078022c bhUtair bahubhir AkAzaM vismitair AvRtaM babhau
6078023a RSayaH pitaro devA gandharvA garuNoragAH
6078023c zatakratuM puraskRtya rarakSur lakSmaNaM raNe
6078024a athAnyaM mArgaNazreSThaM saMdadhe rAvaNAnujaH
6078024c hutAzanasamasparzaM rAvaNAtmajadAruNam
6078025a supatram anuvRttAGgaM suparvANaM susaMsthitam
6078025c suvarNavikRtaM vIraH zarIrAntakaraM zaram
6078026a durAvAraM durviSahaM rAkSasAnAM bhayAvaham
6078026c AzIviSaviSaprakhyaM devasaMghaiH samarcitam
6078027a yena zakro mahAtejA dAnavAn ajayat prabhuH
6078027c purA devAsure yuddhe vIryavAn harivAhanaH
6078028a tad aindram astraM saumitriH saMyugeSv aparAjitam
6078028c zarazreSThaM dhanuH zreSThe narazreSTho 'bhisaMdadhe
6078029a saMdhAyAmitradalanaM vicakarSa zarAsanam
6078029c sajyam Ayamya durdharzaH kAlo lokakSaye yathA
6078030a saMdhAya dhanuSi zreSThe vikarSann idam abravIt
6078030c lakSmIvA&l lakSmaNo vAkyam arthasAdhakam AtmanaH
6078031a dharmAtmA satyasaMdhaz ca rAmo dAzarathir yadi
6078031c pauruSe cApratidvandvas tad enaM jahi rAvaNim
6078032a ity uktvA bANam AkarNaM vikRSya tam ajihmagam
6078032c lakSmaNaH samare vIraH sasarjendrajitaM prati
6078032e aindrAstreNa samAyujya lakSmaNaH paravIrahA
6078033a tac chiraH saziras trANaM zrImaj jvalitakuNDalam
6078033c pramathyendrajitaH kAyAt papAta dharaNItale
6078034a tad rAkSasatanUjasya chinnaskandhaM ziro mahat
6078034c tapanIyanibhaM bhUmau dadRze rudhirokSitam
6078035a hatas tu nipapAtAzu dharaNyAM rAvaNAtmajaH
6078035c kavacI sazirastrANo vidhvastaH sazarAsanaH
6078036a cukruzus te tataH sarve vAnarAH savibhISaNAH
6078036c hRSyanto nihate tasmin devA vRtravadhe yathA
6078037a athAntarikSe bhUtAnAm RSINAM ca mahAtmanAm
6078037c abhijajJe ca saMnAdo gandharvApsarasAm api
6078038a patitaM samabhijJAya rAkSasI sA mahAcamUH
6078038c vadhyamAnA dizo bheje haribhir jitakAzibhiH
6078039a vanarair vadhyamAnAs te zastrANy utsRjya rAkSasAH
6078039c laGkAm abhimukhAH sarve naSTasaMjJAH pradhAvitAH
6078040a dudruvur bahudhA bhItA rAkSasAH zatazo dizaH
6078040c tyaktvA praharaNAn sarve paTTasAsiparazvadhAn
6078041a ke cil laGkAM paritrastAH praviSTA vAnarArditAH
6078041c samudre patitAH ke cit ke cit parvatam AzritAH
6078042a hatam indrajitaM dRSTvA zayAnaM samarakSitau
6078042c rAkSasAnAM sahasreSu na kaz cit pratyadRzyata
6078043a yathAstaM gata Aditye nAvatiSThanti razmayaH
6078043c tathA tasmin nipatite rAkSasAs te gatA dizaH
6078044a zAntarakzmir ivAdityo nirvANa iva pAvakaH
6078044c sa babhUva mahAtejA vyapAsta gatajIvitaH
6078045a prazAntapIDA bahulo vinaSTAriH praharSavAn
6078045c babhUva lokaH patite rAkSasendrasute tadA
6078046a harSaM ca zakro bhagavAn saha sarvaiH surarSabhaiH
6078046c jagAma nihate tasmin rAkSase pApakarmaNi
6078047a zuddhA Apo nabhaz caiva jahRSur daityadAnavAH
6078047c AjagmuH patite tasmin sarvalokabhayAvahe
6078048a Ucuz ca sahitAH sarve devagandharvadAnavAH
6078048c vijvarAH zAntakaluSA brAhmaNA vicarantv iti
6078049a tato 'bhyanandan saMhRSTAH samare hariyUthapAH
6078049c tam apratibalaM dRSTvA hataM nairRtapuMgavam
6078050a vibhISaNo hanUmAMz ca jAmbavAMz carkSayUthapaH
6078050c vijayenAbhinandantas tuSTuvuz cApi lakSmaNam
6078051a kSveDantaz ca nadantaz ca garjantaz ca plavaMgamAH
6078051c labdhalakSA raghusutaM parivAryopatasthire
6078052a lAGgUlAni pravidhyantaH sphoTayantaz ca vAnarAH
6078052c lakSmaNo jayatIty evaM vAkyaM vyazrAvayaMs tadA
6078053a anyonyaM ca samAzliSya kapayo hRSTamAnasAH
6078053c cakrur uccAvacaguNA rAghavAzrayajAH kathAH
6078054a tad asukaram athAbhivIkSya hRSTAH; priyasuhRdo yudhi lakSmaNasya karma
6078054c paramam upalabhan manaHpraharSaM; vinihatam indraripuM nizamya devAH
6079001a rudhiraklinnagAtras tu lakSmaNaH zubhalakSaNaH
6079001c babhUva hRSTas taM hatvA zakrajetAram Ahave
6079002a tataH sa jAmbavantaM ca hanUmantaM ca vIryavAn
6079002c saMnivartya mahAtejAs tAMz ca sarvAn vanaukasaH
6079003a AjagAma tataH zIghraM yatra sugrIvarAghavau
6079003c vibhISaNam avaSTabhya hanUmantaM ca lakSmaNaH
6079004a tato rAmam abhikramya saumitrir abhivAdya ca
6079004c tasthau bhrAtRsamIpasthaH zakrasyendrAnujo yathA
6079004e AcacakSe tadA vIro ghoram indrajito vadham
6079005a rAvaNas tu ziraz chinnaM lakSmaNena mahAtmanA
6079005c nyavedayata rAmAya tadA hRSTo vibhISaNaH
6079006a upavezya tam utsaGge pariSvajyAvapIDitam
6079006c mUrdhni cainam upAghrAya bhUyaH saMspRzya ca tvaran
6079006e uvAca lakSmaNaM vAkyam AzvAsya puruSarSabhaH
6079007a kRtaM paramakalyANaM karma duSkarakAriNA
6079007c niramitraH kRto 'smy adya niryAsyati hi rAvaNaH
6079007e balavyUhena mahatA zrutvA putraM nipAtitam
6079008a taM putravadhasaMtaptaM niryAntaM rAkSasAdhipam
6079008c balenAvRtya mahatA nihaniSyAmi durjayam
6079009a tvayA lakSmaNa nAthena sItA ca pRthivI ca me
6079009c na duSprApA hate tv adya zakrajetari cAhave
6079010a sa taM bhrAtaram AzvAsya pAriSvajya ca rAghavaH
6079010c rAmaH suSeNaM muditaH samAbhASyedam abravIt
6079011a sazalyo 'yaM mahAprAjJaH saumitrir mitravatsalaH
6079011c yathA bhavati susvasthas tathA tvaM samupAcara
6079011e vizalyaH kriyatAM kSipraM saumitriH savibhISaNaH
6079012a kRSa vAnarasainyAnAM zUrANAM drumayodhinAm
6079012c ye cAnye 'tra ca yudhyantaH sazalyA vraNinas tathA
6079012e te 'pi sarve prayatnena kriyantAM sukhinas tvayA
6079013a evam uktaH sa rAmeNa mahAtmA hariyUthapaH
6079013c lakSmaNAya dadau nastaH suSeNaH paramauSadham
6079014a sa tasya gandham AghrAya vizalyaH samapadyata
6079014c tadA nirvedanaz caiva saMrUDhavraNa eva ca
6079015a vibhISaNa mukhAnAM ca suhRdAM rAghavAjJayA
6079015c sarvavAnaramukhyAnAM cikitsAM sa tadAkarot
6079016a tataH prakRtim Apanno hRtazalyo gatavyathaH
6079016c saumitrir muditas tatra kSaNena vigatajvaraH
6079017a tathaiva rAmaH plavagAdhipas tadA; vibhISaNaz carkSapatiz ca jAmbavAn
6079017c avekSya saumitrim arogam utthitaM; mudA sasainyaH suciraM jaharSire
6079018a apUjayat karma sa lakSmaNasya; suduSkaraM dAzarathir mahAtmA
6079018c hRSTA babhUvur yudhi yUthapendrA; nizamya taM zakrajitaM nipAtitam
6080001a tataH paulastya sacivAH zrutvA cendrajitaM hatam
6080001c AcacakSur abhijJAya dazagrIvAya savyathAH
6080002a yuddhe hato mahArAja lakSmaNena tavAtmajaH
6080002c vibhISaNasahAyena miSatAM no mahAdyute
6080003a zUraH zUreNa saMgamya saMyugeSv aparAjitaH
6080003c lakSNanena hataH zUraH putras te vibudhendrajit
6080004a sa taM pratibhayaM zrutvA vadhaM putrasya dAruNam
6080004c ghoram indrajitaH saMkhye kazmalaM prAvizan mahat
6080005a upalabhya cirAt saMjJAM rAjA rAkSasapuMgavaH
6080005c putrazokArdito dIno vilalApAkulendriyaH
6080006a hA rAkSasacamUmukhya mama vatsa mahAratha
6080006c jitvendraM katham adya tvaM lakSmaNasya vazaM gataH
6080007a nanu tvam iSubhiH kruddho bhindyAH kAlAntakAv api
6080007c mandarasyApi zRGgANi kiM punar lakSmaNaM raNe
6080008a adya vaivasvato rAjA bhUyo bahumato mama
6080008c yenAdya tvaM mahAbAho saMyuktaH kAladharmaNA
6080009a eSa panthAH suyodhAnAM sarvAmaragaNeSv api
6080009c yaH kRte hanyate bhartuH sa pumAn svargam Rcchati
6080010a adya devagaNAH sarve lokapAlAs tatharSayaH
6080010c hatam indrajitaM dRSTvA sukhaM svapsyanti nirbhayAH
6080011a adya lokAs trayaH kRtsnAH pRthivI ca sakAnanA
6080011c ekenendrajitA hInA zUNyeva pratibhAti me
6080012a adya nairRtakanyAyAM zroSyAmy antaHpure ravam
6080012c kareNusaMghasya yathA ninAdaM girigahvare
6080013a yauvarAjyaM ca laGkAM ca rakSAMsi ca paraMtapa
6080013c mAtaraM mAM ca bhAryAM ca kva gato 'si vihAya naH
6080014a mama nAma tvayA vIra gatasya yamasAdanam
6080014c pretakAryANi kAryANi viparIte hi vartase
6080015a sa tvaM jIvati sugrIve rAghave ca salakSmaNe
6080015c mama zalyam anuddhRtya kva gato 'si vihAya naH
6080016a evamAdivilApArtaM rAvaNaM rAkSasAdhipam
6080016c Aviveza mahAn kopaH putravyasanasaMbhavaH
6080017a ghoraM prakRtyA rUpaM tat tasya krodhAgnimUrchitam
6080017c babhUva rUpaM rudrasya kruddhasyeva durAsadam
6080018a tasya kruddhasya netrAbhyAM prApatann asrabindavaH
6080018c dIptAbhyAm iva dIpAbhyAM sArciSaH snehabindavaH
6080019a dantAn vidazatas tasya zrUyate dazanasvanaH
6080019c yantrasyAveSTyamAnasya mahato dAnavair iva
6080020a kAlAgnir iva saMkruddho yAM yAM dizam avaikSata
6080020c tasyAM tasyAM bhayatrastA rAkSasAH saMnililyire
6080021a tam antakam iva kruddhaM carAcaracikhAdiSum
6080021c vIkSamANaM dizaH sarvA rAkSasA nopacakramuH
6080022a tataH paramasaMkruddho rAvaNo rAkSasAdhipaH
6080022c abravId rakSasAM madhye saMstambhayiSur Ahave
6080023a mayA varSasahasrANi caritvA duzcaraM tapaH
6080023c teSu teSv avakAzeSu svayambhUH paritoSitaH
6080024a tasyaiva tapaso vyuSTyA prasAdAc ca svayambhuvaH
6080024c nAsurebhyo na devebhyo bhayaM mama kadA cana
6080025a kavacaM brahmadattaM me yad Adityasamaprabham
6080025c devAsuravimardeSu na bhinnaM vajrazaktibhiH
6080026a tena mAm adya saMyuktaM rathastham iha saMyuge
6080026c pratIyAt ko 'dya mAm Ajau sAkSAd api puraMdaraH
6080027a yat tadAbhiprasannena sazaraM kArmukaM mahat
6080027c devAsuravimardeSu mama dattaM svayambhuvA
6080028a adya tUryazatair bhImaM dhanur utthApyatAM mahat
6080028c rAmalakSmaNayor eva vadhAya paramAhave
6080029a sa putravadhasaMtaptaH zUraH krodhavazaM gataH
6080029c samIkSya rAvaNo buddhyA sItAM hantuM vyavasyata
6080030a pratyavekSya tu tAmrAkSaH sughoro ghoradarzanAn
6080030c dIno dInasvarAn sarvAMs tAn uvAca nizAcarAn
6080031a mAyayA mama vatsena vaJcanArthaM vanaukasAm
6080031c kiM cid eva hataM tatra sIteyam iti darzitam
6080032a tad idaM satyam evAhaM kariSye priyam AtmanaH
6080032c vaidehIM nAzayiSyAmi kSatrabandhum anuvratAm
6080032e ity evam uktvA sacivAn khaDgam Azu parAmRzat
6080033a uddhRtya guNasaMpannaM vimalAmbaravarcasaM
6080033c niSpapAta sa vegena sabhAyAH sacivair vRtaH
6080034a rAvaNaH putrazokena bhRzam AkulacetanaH
6080034c saMkruddhaH khaDgam AdAya sahasA yatra maithilI
6080035a vrajantaM rAkSasaM prekSya siMhanAdaM pracukruzuH
6080035c Ucuz cAnyonyam AzliSya saMkruddhaM prekSya rAkSasAH
6080036a adyainaM tAv ubhau dRSTvA bhrAtarau pravyathiSyataH
6080036c lokapAlA hi catvAraH kruddhenAnena nirjitAH
6080036e bahavaH zatravaz cAnye saMyugeSv abhipAtitAH
6080037a teSAM saMjalpamAnAnAm azokavanikAM gatAm
6080037c abhidudrAva vaidehIM rAvaNaH krodhamUrchitaH
6080038a vAryamANaH susaMkruddhaH suhRdbhir hitabuddhibhiH
6080038c abhyadhAvata saMkruddhaH khe graho rohiNIm iva
6080039a maithilI rakSyamANA tu rAkSasIbhir aninditA
6080039c dadarza rAkSasaM kruddhaM nistriMzavaradhAriNam
6080040a taM nizAmya sanistriMzaM vyathitA janakAtmajA
6080040c nivAryamANaM bahuzaH suhRdbhir anivartinam
6080041a yathAyaM mAm abhikruddhaH samabhidravati svayam
6080041c vadhiSyati sanAthAM mAm anAthAm iva durmatiH
6080042a bahuzaz codayAm Asa bhartAraM mAm anuvratAm
6080042c bhAryA bhava ramasyeti pratyAkhyAto 'bhavan mayA
6080043a so 'yaM mAm anupasthAnAd vyaktaM nairAzyam AgataH
6080043c krodhamohasamAviSTo nihantuM mAM samudyataH
6080044a atha vA tau naravyAghrau bhrAtarau rAmalakSmaNau
6080044c mannimittam anAryeNa samare 'dya nipAtitau
6080044e aho dhin mannimitto 'yaM vinAzo rAjaputrayoH
6080045a hanUmato hi tadvAkyaM na kRtaM kSudrayA mayA
6080045c yady ahaM tasya pRSThena tadAyAsam aninditA
6080045e nAdyaivam anuzoceyaM bhartur aGkagatA satI
6080046a manye tu hRdayaM tasyAH kausalyAyAH phaliSyati
6080046c ekaputrA yadA putraM vinaSTaM zroSyate yudhi
6080047a sA hi janma ca bAlyaM ca yauvanaM ca mahAtmanaH
6080047c dharmakAryANi rUpaM ca rudatI saMsramiSyati
6080048a nirAzA nihate putre dattvA zrAddham acetanA
6080048c agnim ArokSyate nUnam apo vApi pravekSyati
6080049a dhig astu kubjAm asatIM mantharAM pApanizcayAm
6080049c yannimittam idaM duHkhaM kausalyA pratipatsyate
6080050a ity evaM maithilIM dRSTvA vilapantIM tapasvinIm
6080050c rohiNIm iva candreNa vinA grahavazaM gatAm
6080051a supArzvo nAma medhAvI rAvaNaM rAkSasezvaram
6080051c nivAryamANaM sacivair idaM vacanam abravIt
6080052a kathaM nAma dazagrIva sAkSAd vaizravaNAnuja
6080052c hantum icchasi vaidehIM krodhAd dharmam apAsya hi
6080053a veda vidyAvrata snAtaH svadharmanirataH sadA
6080053c striyAH kasmAd vadhaM vIra manyase rAkSasezvara
6080054a maithilIM rUpasaMpannAM pratyavekSasva pArthiva
6080054c tvam eva tu sahAsmAbhI rAghave krodham utsRja
6080055a abhyutthAnaM tvam adyaiva kRSNapakSacaturdazIm
6080055c kRtvA niryAhy amAvAsyAM vijayAya balair vRtaH
6080056a zUro dhImAn rathI khaDgI rathapravaram AsthitaH
6080056c hatvA dAzarathiM rAmaM bhavAn prApsyati maithilIm
6080057a sa tad durAtmA suhRdA niveditaM; vacaH sudharmyaM pratigRhya rAvaNaH
6080057c gRhaM jagAmAtha tataz ca vIryavAn; punaH sabhAM ca prayayau suhRdvRtaH
6081001a sa pravizya sabhAM rAjA dInaH paramaduHkhitaH
6081001c niSasAdAsane mukhye siMhaH kruddha iva zvasan
6081002a abravIc ca tadA sarvAn balamukhyAn mahAbalaH
6081002c rAvaNaH prAJjalIn vAkyaM putravyasanakarzitaH
6081003a sarve bhavantaH sarveNa hastyazvena samAvRtAH
6081003c niryAntu rathasaMghaiz ca pAdAtaiz copazobhitAH
6081004a ekaM rAmaM parikSipya samare hantum arhatha
6081004c prahRSTA zaravarSeNa prAvRTkAla ivAmbudAH
6081005a atha vAhaM zarair tIkSNair bhinnagAtraM mahAraNe
6081005c bhavadbhiH zvo nihantAsmi rAmaM lokasya pazyataH
6081006a ity evaM rAkSasendrasya vAkyam AdAya rAkSasAH
6081006c niryayus te rathaiH zIghraM nAgAnIkaiz ca saMvRtAH
6081007a sa saMgrAmo mahAbhImaH sUryasyodayanaM prati
6081007c rakSasAM vAnarANAM ca tumulaH samapadyata
6081008a te gadAbhir vicitrAbhiH prAsaiH khaDgaiH parazvadhaiH
6081008c anyonyaM samare jaghnus tadA vAnararAkSasAH
6081009a mAtaMgarathakUlasya vAjimatsyA dhvajadrumAH
6081009c zarIrasaMghATavahAH prasasruH zoNitApagAH
6081010a dhvajavarmarathAn azvAn nAnApraharaNAni ca
6081010c AplutyAplutya samare vAnarendrA babhaJjire
6081011a kezAn karNalalATAMz ca nAsikAz ca plavaMgamAH
6081011c rakSasAM dazanais tIkSNair nakhaiz cApi vyakartayan
6081012a ekaikaM rAkSasaM saMkhye zataM vAnarapuMgavAH
6081012c abhyadhAvanta phalinaM vRkSaM zakunayo yathA
6081013a tathA gadAbhir gurvIbhiH prAsaiH khaDgaiH parazvadhaiH
6081013c nirjaghnur vAnarAn ghorAn rAkSasAH parvatopamAH
6081014a rAkSasair vadhyamAnAnAM vAnarANAM mahAcamUH
6081014c zaraNyaM zaraNaM yAtA rAmaM dazarathAtmajam
6081015a tato rAmo mahAtejA dhanur AdAya vIryavAn
6081015c pravizya rAkSasaM sainyaM zaravarSaM vavarSa ha
6081016a praviSTaM tu tadA rAmaM meghAH sUryam ivAmbare
6081016c nAbhijagmur mahAghoraM nirdahantaM zarAgninA
6081017a kRtAny eva sughorANi rAmeNa rajanIcarAH
6081017c raNe rAmasya dadRzuH karmANy asukarANi ca
6081018a cAlayantaM mahAnIkaM vidhamantaM mahArathAn
6081018c dadRzus te na vai rAmaM vAtaM vanagataM yathA
6081019a chinnaM bhinnaM zarair dagdhaM prabhagnaM zastrapIDitam
6081019c balaM rAmeNa dadRzur na ramaM zIghrakAriNam
6081020a praharantaM zarIreSu na te pazyanti rAghavam
6081020c indriyArtheSu tiSThantaM bhUtAtmAnam iva prajAH
6081021a eSa hanti gajAnIkam eSa hanti mahArathAn
6081021c eSa hanti zarais tIkSNaiH padAtIn vAjibhiH saha
6081022a iti te rAkSasAH sarve rAmasya sadRzAn raNe
6081022c anyonyakupitA jaghnuH sAdRzyAd rAghavasya te
6081023a na te dadRzire rAmaM dahantam arivAhinIm
6081023c mohitAH paramAstreNa gAndharveNa mahAtmanA
6081024a te tu rAmasahasrANi raNe pazyanti rAkSasAH
6081024c punaH pazyanti kAkutstham ekam eva mahAhave
6081025a bhramantIM kAJcanIM koTiM kArmukasya mahAtmanaH
6081025c alAtacakrapratimAM dadRzus te na rAghavam
6081026a zarIranAbhi sattvArciH zarIraM nemikArmukam
6081026c jyAghoSatalanirghoSaM tejobuddhiguNaprabham
6081027a divyAstraguNaparyantaM nighnantaM yudhi rAkSasAn
6081027c dadRzU rAmacakraM tat kAlacakram iva prajAH
6081028a anIkaM dazasAhasraM rathAnAM vAtaraMhasAm
6081028c aSTAdazasahasrANi kuJjarANAM tarasvinAm
6081029a caturdazasahasrANi sArohANAM ca vAjinAm
6081029c pUrNe zatasahasre dve rAkSasAnAM padAtinAm
6081030a divasasyASTame bhAge zarair agnizikhopamaiH
6081030c hatAny ekena rAmeNa rakSasAM kAmarUpiNAm
6081031a te hatAzvA hatarathAH zrAntA vimathitadhvajAH
6081031c abhipetuH purIM laGkAM hatazeSA nizAcarAH
6081032a hatair gajapadAty azvais tad babhUva raNAjiram
6081032c AkrIDabhUmI rudrasya kruddhasyeva pinAkinaH
6081033a tato devAH sagandharvAH siddhAz ca paramarSayaH
6081033c sAdhu sAdhv iti rAmasya tat karma samapUjayan
6081034a abravIc ca tadA rAmaH sugrIvaM pratyanantaram
6081034c etad astrabalaM divyaM mama vA tryambakasya vA
6081035a nihatya tAM rAkSasavAhinIM tu; rAmas tadA zakrasamo mahAtmA
6081035c astreSu zastreSu jitaklamaz ca; saMstUyate devagaNaiH prahRSTaiH
6082001a tAni nAgasahasrANi sArohANAM ca vAjinAm
6082001c rathAnAM cAgnivarNAnAM sadhvajAnAM sahasrazaH
6082002a rAkSasAnAM sahasrANi gadAparighayodhinAm
6082002c kAJcanadhvajacitrANAM zUrANAM kAmarUpiNAm
6082003a nihatAni zarais tIkSNais taptakAJcanabhUSaNaiH
6082003c rAvaNena prayuktAni rAmeNAkliSTakarmaNA
6082004a dRSTvA zrutvA ca saMbhrAntA hatazeSA nizAcarAH
6082004c rAkSasyaz ca samAgamya dInAz cintApariplutAH
6082005a vidhavA hataputrAz ca krozantyo hatabAndhavAH
6082005c rAkSasyaH saha saMgamya duHkhArtAH paryadevayan
6082006a kathaM zUrpaNakhA vRddhA karAlA nirNatodarI
6082006c AsasAda vane rAmaM kandarpam iva rUpiNam
6082007a sukumAraM mahAsattvaM sarvabhUtahite ratam
6082007c taM dRSTvA lokavadhyA sA hInarUpA prakAmitA
6082008a kathaM sarvaguNair hInA guNavantaM mahaujasaM
6082008c sumukhaM durmukhI rAmaM kAmayAm Asa rAkSasI
6082009a janasyAsyAlpabhAgyatvAt palinI zvetamUrdhajA
6082009c akAryam apahAsyaM ca sarvalokavigarhitam
6082010a rAkSasAnAM vinAzAya dUSaNasya kharasya ca
6082010c cakArApratirUpA sA rAghavasya pradharSaNam
6082011a tan nimittam idaM vairaM rAvaNena kRtaM mahat
6082011c vadhAya nItA sA sItA dazagrIveNa rakSasA
6082012a na ca sItAM dazagrIvaH prApnoti janakAtmajAm
6082012c baddhaM balavatA vairam akSayaM rAghaveNa ha
6082013a vaidehIM prArthayAnaM taM virAdhaM prekSya rAkSasaM
6082013c hatam ekena rAmeNa paryAptaM tannidarzanam
6082014a caturdazasahasrANi rakSasAM bhImakarmaNAm
6082014c nihatAni janasthAne zarair agnizikhopamaiH
6082015a kharaz ca nihataH saMkhye dUSaNas trizirAs tathA
6082015c zarair AdityasaMkAzaiH paryAptaM tannidarzanam
6082016a hato yojanabAhuz ca kabandho rudhirAzanaH
6082016c krodhArto vinadan so 'tha paryAptaM tannidarzanam
6082017a jaghAna balinaM rAmaH sahasranayanAtmajam
6082017c bAlinaM meghasaMkAzaM paryAptaM tannidarzanam
6082018a RzyamUke vasaJ zaile dIno bhagnamanorathaH
6082018c sugrIvaH sthApito rAjye paryAptaM tannidarzanam
6082019a dharmArthasahitaM vAkyaM sarveSAM rakSasAM hitam
6082019c yuktaM vibhISaNenoktaM mohAt tasya na rocate
6082020a vibhISaNavacaH kuryAd yadi sma dhanadAnujaH
6082020c zmazAnabhUtA duHkhArtA neyaM laGkA purI bhavet
6082021a kumbhakarNaM hataM zrutvA rAghaveNa mahAbalam
6082021c priyaM cendrajitaM putraM rAvaNo nAvabudhyate
6082022a mama putro mama bhrAtA mama bhartA raNe hataH
6082022c ity evaM zrUyate zabdo rAkSasAnAM kule kule
6082023a rathAz cAzvAz ca nAgAz ca hatAH zatasahasrazaH
6082023c raNe rAmeNa zUreNa rAkSasAz ca padAtayaH
6082024a rudro vA yadi vA viSNur mahendro vA zatakratuH
6082024c hanti no rAmarUpeNa yadi vA svayam antakaH
6082025a hatapravIrA rAmeNa nirAzA jIvite vayam
6082025c apazyantyo bhayasyAntam anAthA vilapAmahe
6082026a rAmahastAd dazagrIvaH zUro dattavaro yudhi
6082026c idaM bhayaM mahAghoram utpannaM nAvabudhyate
6082027a na devA na ca gandharvA na pizAcA na rAkSasAH
6082027c upasRSTaM paritrAtuM zaktA rAmeNa saMyuge
6082028a utpAtAz cApi dRzyante rAvaNasya raNe raNe
6082028c kathayiSyanti rAmeNa rAvaNasya nibarhaNam
6082029a pitAmahena prItena devadAnavarAkSasaiH
6082029c rAvaNasyAbhayaM dattaM mAnuSebhyo na yAcitam
6082030a tad idaM mAnuSAn manye prAptaM niHsaMzayaM bhayam
6082030c jIvitAntakaraM ghoraM rakSasAM rAvaNasya ca
6082031a pIDyamAnAs tu balinA varadAnena rakSasA
6082031c dIptais tapobhir vibudhAH pitAmaham apUjayan
6082032a devatAnAM hitArthAya mahAtmA vai pitAmahaH
6082032c uvAca devatAH sarvA idaM tuSTo mahad vacaH
6082033a adya prabhRti lokAMs trIn sarve dAnavarAkSasAH
6082033c bhayena prAvRtA nityaM vicariSyanti zAzvatam
6082034a daivatais tu samAgamya sarvaiz cendrapurogamaiH
6082034c vRSadhvajas tripurahA mahAdevaH prasAditaH
6082035a prasannas tu mahAdevo devAn etad vaco 'bravIt
6082035c utpatsyati hitArthaM vo nArI rakSaHkSayAvahA
6082036a eSA devaiH prayuktA tu kSud yathA dAnavAn purA
6082036c bhakSayiSyati naH sItA rAkSasaghnI sarAvaNAn
6082037a rAvaNasyApanItena durvinItasya durmateH
6082037c ayaM niSTAnako ghoraH zokena samabhiplutaH
6082038a taM na pazyAmahe loke yo naH zaraNado bhavet
6082038c rAghaveNopasRSTAnAM kAleneva yugakSaye
6082039a itIva sarvA rajanIcarastriyaH; parasparaM saMparirabhya bAhubhiH
6082039c viSedur ArtAtibhayAbhipIDitA; vinedur uccaiz ca tadA sudAruNam
6083001a ArtAnAM rAkSasInAM tu laGkAyAM vai kule kule
6083001c rAvaNaH karuNaM zabdaM zuzrAva pariveditam
6083002a sa tu dIrghaM vinizvasya muhUrtaM dhyAnam AsthitaH
6083002c babhUva paramakruddho rAvaNo bhImadarzanaH
6083003a saMdazya dazanair oSThaM krodhasaMraktalocanaH
6083003c rAkSasair api durdarzaH kAlAgnir iva mUrchitaH
6083004a uvAca ca samIpasthAn rAkSasAn rAkSasezvaraH
6083004c bhayAvyaktakathAMs tatra nirdahann iva cakSuSA
6083005a mahodaraM mahApArzvaM virUpAkSaM ca rAkSasaM
6083005c zIghraM vadata sainyAni niryAteti mamAjJayA
6083006a tasya tad vacanaM zrutvA rAkSasAs te bhayArditAH
6083006c codayAm Asur avyagrAn rAkSasAMs tAn nRpAjJayA
6083007a te tu sarve tathety uktvA rAkSasA ghoradarzanAH
6083007c kRtasvastyayanAH sarve rAvaNAbhimukhA yayuH
6083008a pratipUjya yathAnyAyaM rAvaNaM te mahArathAH
6083008c tasthuH prAJjalayaH sarve bhartur vijayakAGkSiNaH
6083009a athovAca prahasyaitAn rAvaNaH krodhamUrchitaH
6083009c mahodaramahApArzvau virUpAkSaM ca rAkSasaM
6083010a adya bANair dhanurmuktair yugAntAdityasaMnibhaiH
6083010c rAghavaM lakSmaNaM caiva neSyAmi yamasAdhanam
6083011a kharasya kumbhakarNasya prahastendrajitos tathA
6083011c kariSyAmi pratIkAram adya zatruvadhAd aham
6083012a naivAntarikSaM na dizo na nadyo nApi sAgaraH
6083012c prakAzatvaM gamiSyanti madbANajaladAvRtAH
6083013a adya vAnarayUthAnAM tAni yUthAni bhAgazaH
6083013c dhanuHsamudrAd udbhUtair mathiSyAmi zarormibhiH
6083014a vyAkozapadmacakrANi padmakesaravarcasAm
6083014c adya yUthataTAkAni gajavat pramathAmy aham
6083015a sazarair adya vadanaiH saMkhye vAnarayUthapAH
6083015c maNDayiSyanti vasudhAM sanAlair iva paGkalaiH
6083016a adya yuddhapracaNDAnAM harINAM drumayodhinAm
6083016c muktenaikeSuNA yuddhe bhetsyAmi ca zataMzatam
6083017a hato bhartA hato bhrAtA yAsAM ca tanayA hatAH
6083017c vadhenAdya ripos tAsAM karmomy asrapramArjanam
6083018a adya madbANanirbhinnaiH prakIrNair gatacetanaiH
6083018c karomi vAnarair yuddhe yatnAvekSyatalAM mahIm
6083019a adya gomAyavo gRdhrA ye ca mAMsAzino 'pare
6083019c sarvAMs tAMs tarpayiSyAmi zatrumAMsaiH zarArditaiH
6083020a kalpyatAM me rathazIghraM kSipram AnIyatAM dhanuH
6083020c anuprayAntu mAM yuddhe ye 'vaziSTA nizAcarAH
6083021a tasya tad vacanaM zrutvA mahApArzvo 'bravId vacaH
6083021c balAdhyakSAn sthitAMs tatra balaM saMtvaryatAm iti
6083022a balAdhyakSAs tu saMrabdhA rAkSasAMs tAn gRhAd gRhAt
6083022c codayantaH pariyayur laGkAM laghuparAkramAH
6083023a tato muhUrtAn niSpetU rAkSasA bhImavikramAH
6083023c nardanto bhImavadanA nAnApraharaNair bhujaiH
6083024a asibhiH paTTasaiH zUlair galAbhir musalair halaiH
6083024c zaktibhis tIkSNadhArAbhir mahadbhiH kUTamudgaraiH
6083025a yaSTibhir vimalaiz cakrair nizitaiz ca parazvadhaiH
6083025c bhiNDipAlaiH zataghnIbhir anyaiz cApi varAyudhaiH
6083026a athAnayan balAdhyakSAz catvAro rAvaNAjJayA
6083026c drutaM sUtasamAyuktaM yuktASTaturagaM ratham
6083027a Aruroha rathaM divyaM dIpyamAnaM svatejasA
6083027c rAvaNaH sattvagAmbhIryAd dArayann iva medinIm
6083028a rAvaNenAbhyanujJAtau mahApArzvamahodarau
6083028c virUpAkSaz ca durdharSo rathAn Aruruhus tadA
6083029a te tu hRSTA vinardanto bhindanta iva medinIm
6083029c nAdaM ghoraM vimuJcanto niryayur jayakAGkSiNaH
6083030a tato yuddhAya tejasvI rakSogaNabalair vRtaH
6083030c niryayAv udyatadhanuH kAlAntakayamomapaH
6083031a tataH prajavanAzvena rathena sa mahArathaH
6083031c dvAreNa niryayau tena yatra tau rAmalakSmaNau
6083032a tato naSTaprabhaH sUryo dizaz ca timirAvRtAH
6083032c dvijAz ca nedur ghorAz ca saMcacAla ca medinI
6083033a vavarSa rudhiraM devaz caskhaluz ca turaMgamAH
6083033c dhvajAgre nyapatad gRdhro vineduz cAzivaM zivAH
6083034a nayanaM cAsphurad vAmaM savyo bAhur akampata
6083034c vivarNavadanaz cAsIt kiM cid abhrazyata svaraH
6083035a tato niSpatato yuddhe dazagrIvasya rakSasaH
6083035c raNe nidhanazaMsIni rUpANy etAni jajJire
6083036a antarikSAt papAtolkA nirghAtasamanisvanA
6083036c vinedur azivaM gRdhrA vAyasair anunAditAH
6083037a etAn acintayan ghorAn utpAtAn samupasthitAn
6083037c niryayau rAvaNo mohAd vadhArthI kAlacoditaH
6083038a teSAM tu rathaghoSeNa rAkSasAnAM mahAtmanAm
6083038c vAnarANAm api camUr yuddhAyaivAbhyavartata
6083039a teSAM sutumulaM yuddhaM babhUva kapirakSasAm
6083039c anyonyam AhvayAnAnAM kruddhAnAM jayam icchatAm
6083040a tataH kruddho dazagrIvaH zaraiH kAJcanabhUSaNaiH
6083040c vAnarANAm anIkeSu cakAra kadanaM mahat
6083041a nikRttazirasaH ke cid rAvaNena valImukhAH
6083041c nirucchvAsA hatAH ke cit ke cit pArzveSu dAritAH
6083041e ke cid vibhinnazirasaH ke cic cakSurvivarjitAH
6083042a dazAnanaH krodhavivRttanetro; yato yato 'bhyeti rathena saMkhye
6083042c tatas tatas tasya zarapravegaM; soDhuM na zekur hariyUthapAs te
6084001a tathA taiH kRttagAtrais tu dazagrIveNa mArgaNaiH
6084001c babhUva vasudhA tatra prakIrNA haribhir vRtA
6084002a rAvaNasyAprasahyaM taM zarasaMpAtam ekataH
6084002c na zekuH sahituM dIptaM pataMgA iva pAvakam
6084003a te 'rditA nizitair bANaiH krozanto vipradudruvuH
6084003c pAvakArciHsamAviSTA dahyamAnA yathA gajAH
6084004a plavaMgAnAm anIkAni mahAbhrANIva mArutaH
6084004c sa yayau samare tasmin vidhaman rAvaNaH zaraiH
6084005a kadanaM tarasA kRtvA rAkSasendro vanaukasAm
6084005c AsasAda tato yuddhe rAghavaM tvaritas tadA
6084006a sugrIvas tAn kapIn dRSTvA bhagnAn vidravato raNe
6084006c gulme suSeNaM nikSipya cakre yuddhe drutaM manaH
6084007a AtmanaH sadRzaM vIraM sa taM nikSipya vAnaram
6084007c sugrIvo 'bhimukhaH zatruM pratasthe pAdapAyudhaH
6084008a pArzvataH pRSThataz cAsya sarve yUthAdhipAH svayam
6084008c anujahrur mahAzailAn vividhAMz ca mahAdrumAn
6084009a sa nadan yudhi sugrIvaH svareNa mahatA mahAn
6084009c pAtayan vividhAMz cAnyAJ jaghAnottamarAkSasAn
6084010a mamarda ca mahAkAyo rAkSasAn vAnarezvaraH
6084010c yugAntasamaye vAyuH pravRddhAn agamAn iva
6084011a rAkSasAnAm anIkeSu zailavarSaM vavarSa ha
6084011c azmavarSaM yathA meghaH pakSisaMgheSu kAnane
6084012a kapirAjavimuktais taiH zailavarSais tu rAkSasAH
6084012c vikIrNazirasaH petur nikRttA iva parvatAH
6084013a atha saMkSIyamANeSu rAkSaseSu samantataH
6084013c sugrIveNa prabhagneSu patatsu vinadatsu ca
6084014a virUpAkSaH svakaM nAma dhanvI vizrAvya rAkSasaH
6084014c rathAd Aplutya durdharSo gajaskandham upAruhat
6084015a sa taM dviradam Aruhya virUpAkSo mahArathaH
6084015c vinadan bhImanirhrAlaM vAnarAn abhyadhAvata
6084016a sugrIve sa zarAn ghorAn visasarja camUmukhe
6084016c sthApayAm AsA codvignAn rAkSasAn saMpraharSayan
6084017a so 'tividdhaH zitair bANaiH kapIndras tena rakSasA
6084017c cukrodha ca mahAkrodho vadhe cAsya mano dadhe
6084018a tataH pAdapam uddhRtya zUraH saMpradhane hariH
6084018c abhipatya jaghAnAsya pramukhe taM mahAgajam
6084019a sa tu prahArAbhihataH sugrIveNa mahAgajaH
6084019c apAsarpad dhanurmAtraM niSasAda nanAda ca
6084020a gajAt tu mathitAt tUrNam apakramya sa vIryavAn
6084020c rAkSaso 'bhimukhaH zatruM pratyudgamya tataH kapim
6084021a ArSabhaM carmakhaDgaM ca pragRhya laghuvikramaH
6084021c bhartsayann iva sugrIvam AsasAda vyavasthitam
6084022a sa hi tasyAbhisaMkruddhaH pragRhya mahatIM zilAm
6084022c virUpAkSAya cikSepa sugrIvo jaladopamAm
6084023a sa tAM zilAm ApatantIM dRSTvA rAkSasapuMgavaH
6084023c apakramya suvikrAntaH khaDgena prAharat tadA
6084024a tena khaDgena saMkruddhaH sugrIvasya camUmukhe
6084024c kavacaM pAtayAm Asa sa khaDgAbhihato 'patat
6084025a sa samutthAya patitaH kapis tasya vyasarjayat
6084025c talaprahAram azaneH samAnaM bhImanisvanam
6084026a talaprahAraM tad rakSaH sugrIveNa samudyatam
6084026c naipuNyAn mocayitvainaM muSTinorasy atADayat
6084027a tatas tu saMkruddhataraH sugrIvo vAnarezvaraH
6084027c mokSitaM cAtmano dRSTvA prahAraM tena rakSasA
6084028a sa dadarzAntaraM tasya virUpAkSasya vAnaraH
6084028c tato nyapAtayat krodhAc chaGkhadeze mahAtalam
6084029a mahendrAzanikalpena talenAbhihataH kSitau
6084029c papAta rudhiraklinnaH zoNitaM sa samudvaman
6084030a vivRttanayanaM krodhAt saphenarudhirAplutam
6084030c dadRzus te virUpAkSaM virUpAkSataraM kRtam
6084031a sphurantaM parivarjantaM pArzvena rudhirokSitam
6084031c karuNaM ca vinardAntaM dadRzuH kapayo ripum
6084032a tathA tu tau saMyati saMprayuktau; tarasvinau vAnararAkSasAnAm
6084032c balArNavau sasvanatuH sabhImaM; mahArNavau dvAv iva bhinnavelau
6084033a vinAzitaM prekSya virUpanetraM; mahAbalaM taM haripArthivena
6084033c balaM samastaM kapirAkSasAnAm; unmattagaGgApratimaM babhUva
6085001a hanyamAne bale tUrNam anyonyaM te mahAmRdhe
6085001c sarasIva mahAgharme sUpakSINe babhUvatuH
6085002a svabalasya vighAtena virUpAkSavadhena ca
6085002c babhUva dviguNaM kruddho rAvaNo rAkSasAdhipaH
6085003a prakSINaM tu balaM dRSTvA vadhyamAnaM valImukhaiH
6085003c babhUvAsya vyathA yuddhe prekSya daivaviparyayam
6085004a uvAca ca samIpasthaM mahodaram ariMdamam
6085004c asmin kAle mahAbAho jayAzA tvayi me sthitA
6085005a jahi zatrucamUM vIra darzayAdya parAkramam
6085005c bhartRpiNDasya kAlo 'yaM nirveSTuM sAdhu yudhyatAm
6085006a evam uktas tathety uktvA rAkSasendraM mahodaraH
6085006c pravivezArisenAM sa pataMga iva pAvakam
6085007a tataH sa kadanaM cakre vAnarANAM mahAbalaH
6085007c bhartRvAkyena tejasvI svena vIryeNa coditaH
6085008a prabhagnAM samare dRSTvA vAnarANAM mahAcamUm
6085008c abhidudrAva sugrIvo mahodaram anantaram
6085009a pragRhya vipulAM ghorAM mahIdharasamAM zilAm
6085009c cikSepa ca mahAtejAs tad vadhAya harIzvaraH
6085010a tAm ApatantIM sahasA zilAM dRSTvA mahodaraH
6085010c asaMbhrAntas tato bANair nirbibheda durAsadAm
6085011a rakSasA tena bANaughair nikRttA sA sahasradhA
6085011c nipapAta zilA bhUmau gRdhracakram ivAkulam
6085012a tAM tu bhinnAM zilAM dRSTvA sugrIvaH krodhamUrchitaH
6085012c sAlam utpATya cikSepa rakSase raNamUrdhani
6085012e zaraiz ca vidadArainaM zUraH parapuraMjayaH
6085013a sa dadarza tataH kruddhaH parighaM patitaM bhuvi
6085013c Avidhya tu sa taM dIptaM parighaM tasya darzayan
6085013e parighAgreNa vegena jaghAnAsya hayottamAn
6085014a tasmAd dhatahayAd vIraH so 'vaplutya mahArathAt
6085014c gadAM jagrAha saMkruddho rAkSaso 'tha mahodaraH
6085015a gadAparighahastau tau yudhi vIrau samIyatuH
6085015c nardantau govRSaprakhyau ghanAv iva savidyutau
6085016a AjaghAna gadAM tasya parigheNa harIzvaraH
6085016c papAta sa gadodbhinnaH parighas tasya bhUtale
6085017a tato jagrAha tejasvI sugrIvo vasudhAtalAt
6085017c AyasaM musalaM ghoraM sarvato hemabhUSitam
6085018a taM samudyamya cikSepa so 'py anyAM vyAkSipad gadAm
6085018c bhinnAv anyonyam AsAdya petatur dharaNItale
6085019a tato bhagnapraharaNau muSTibhyAM tau samIyatuH
6085019c tejobalasamAviSTau dIptAv iva hutAzanau
6085020a jaghnatus tau tadAnyonyaM nedatuz ca punaH punaH
6085020c talaiz cAnyonyam Ahatya petatur dharaNItale
6085021a utpetatus tatas tUrNaM jaghnatuz ca parasparam
6085021c bhujaiz cikSepatur vIrAv anyonyam aparAjitau
6085022a AjahAra tadA khaDgam adUraparivartinam
6085022c rAkSasaz carmaNA sArdhaM mahAvego mahodaraH
6085023a tathaiva ca mahAkhaDgaM carmaNA patitaM saha
6085023c jagrAha vAnarazreSThaH sugrIvo vegavattaraH
6085024a tau tu roSaparItAGgau nardantAv abhyadhAvatAm
6085024c udyatAsI raNe hRSTau yudhi zastravizAradau
6085025a dakSiNaM maNDalaM cobhau tau tUrNaM saMparIyatuH
6085025c anyonyam abhisaMkruddhau jaye praNihitAv ubhau
6085026a sa tu zUro mahAvego vIryazlAghI mahodaraH
6085026c mahAcarmaNi taM khaDgaM pAtayAm Asa durmatiH
6085027a lagnam utkarSataH khaDgaM khaDgena kapikuJjaraH
6085027c jahAra saziras trANaM kuNDalopahitaM ziraH
6085028a nikRttazirasas tasya patitasya mahItale
6085028c tad balaM rAkSasendrasya dRSTvA tatra na tiSThati
6085029a hatvA taM vAnaraiH sArdhaM nanAda mudito hariH
6085029c cukrodha ca dazagrIvo babhau hRSTaz ca rAghavaH
6086001a mahodare tu nihate mahApArzvo mahAbalaH
6086001c aGgadasya camUM bhImAM kSobhayAm Asa sAyakaiH
6086002a sa vAnarANAM mukhyAnAm uttamAGgAni sarvazaH
6086002c pAtayAm Asa kAyebhyaH phalaM vRntAd ivAnilaH
6086003a keSAM cid iSubhir bAhUn skandhAMz cicheda rAkSasaH
6086003c vAnarANAM susaMkruddhaH pArzvaM keSAM vyadArayat
6086004a te 'rditA bANavarSeNa mahApArzvena vAnarAH
6086004c viSAdavimukhAH sarve babhUvur gatacetasaH
6086005a nirIkSya balam udvignam aGgado rAkSasArditam
6086005c vegaM cakre mahAbAhuH samudra iva parvaNi
6086006a AyasaM parighaM gRhya sUryarazmisamaprabham
6086006c samare vAnarazreSTho mahApArzve nyapAtayat
6086007a sa tu tena prahAreNa mahApArzvo vicetanaH
6086007c sasUtaH syandanAt tasmAd visaMjJaH prApatad bhuvi
6086008a sarkSarAjas tu tejasvI nIlAJjanacayopamaH
6086008c niSpatya sumahAvIryaH svAd yUthAn meghasaMnibhAt
6086009a pragRhya girizRGgAbhAM kruddhaH sa vipulAM zilAm
6086009c azvAJ jaghAna tarasA syandanaM ca babhaJja tam
6086010a muhUrtAl labdhasaMjJas tu mahApArzvo mahAbalaH
6086010c aGgadaM bahubhir bANair bhUyas taM pratyavidhyata
6086011a jAmbavantaM tribhir bANair AjaghAna stanAntare
6086011c RkSarAjaM gavAkSaM ca jaghAna bahubhiH zaraiH
6086012a gavAkSaM jAmbavantaM ca sa dRSTvA zarapIDitau
6086012c jagrAha parighaM ghoram aGgadaH krodhamUrchitaH
6086013a tasyAGgadaH prakupito rAkSasasya tam AyasaM
6086013c dUrasthitasya parighaM ravirazmisamaprabham
6086014a dvAbhyAM bhujAbhyAM saMgRhya bhrAmayitvA ca vegavAn
6086014c mahApArzvAya cikSepa vadhArthaM vAlinaH sutaH
6086015a sa tu kSipto balavatA parighas tasya rakSasaH
6086015c dhanuz ca sazaraM hastAc chirastraM cApy apAtayat
6086016a taM samAsAdya vegena vAliputraH pratApavAn
6086016c talenAbhyahanat kruddhaH karNamUle sakuNDale
6086017a sa tu kruddho mahAvego mahApArzvo mahAdyutiH
6086017c kareNaikena jagrAha sumahAntaM parazvadham
6086018a taM tailadhautaM vimalaM zailasAramayaM dRDham
6086018c rAkSasaH paramakruddho vAliputre nyapAtayat
6086019a tena vAmAMsaphalake bhRzaM pratyavapAtitam
6086019c aGgado mokSayAm Asa saroSaH sa parazvadham
6086020a sa vIro vajrasaMkAzam aGgado muSTim AtmanaH
6086020c saMvartayan susaMkruddhaH pitus tulyaparAkramaH
6086021a rAkSasasya stanAbhyAze marmajJo hRdayaM prati
6086021c indrAzanisamasparzaM sa muSTiM vinyapAtayat
6086022a tena tasya nipAtena rAkSasasya mahAmRdhe
6086022c paphAla hRdayaM cAzu sa papAta hato bhuvi
6086023a tasmin nipatite bhUmau tat sainyaM saMpracukSubhe
6086023c abhavac ca mahAn krodhaH samare rAvaNasya tu
6087001a mahodaramahApArzvau hatau dRSTvA tu rAkSasau
6087001c tasmiMz ca nihate vIre virUpAkSe mahAbale
6087002a Aviveza mahAn krodho rAvaNaM tu mahAmRdhe
6087002c sUtaM saMcodayAm Asa vAkyaM cedam uvAca ha
6087003a nihatAnAm amAtyAnAM ruddhasya nagarasya ca
6087003c duHkham eSo 'paneSyAmi hatvA tau rAmalakSmaNau
6087004a rAmavRkSaM raNe hanmi sItApuSpaphalapradam
6087004c prazAkhA yasya sugrIvo jAmbavAn kumudo nalaH
6087005a sa dizo daza ghoSeNa rathasyAtiratho mahAn
6087005c nAdayan prayayau tUrNaM rAghavaM cAbhyavartata
6087006a pUritA tena zabdena sanadIgirikAnanA
6087006c saMcacAla mahI sarvA savarAhamRgadvipA
6087007a tAmasaM sumahAghoraM cakArAstraM sudAruNam
6087007c nirdadAha kapIn sarvAMs te prapetuH samantataH
6087008a tAny anIkAny anekAni rAvaNasya zarottamaiH
6087008c dRSTvA bhagnAni zatazo rAghavaH paryavasthitaH
6087009a sa dadarza tato rAmaM tiSThantam aparAjitam
6087009c lakSmaNena saha bhrAtrA viSNunA vAsavaM yathA
6087010a Alikhantam ivAkAzam avaSTabhya mahad dhanuH
6087010c padmapatravizAlAkSaM dIrghabAhum ariMdamam
6087011a vAnarAMz ca raNe bhagnAn ApatantaM ca rAvaNam
6087011c samIkSya rAghavo hRSTo madhye jagrAha kArmukam
6087012a visphArayitum Arebhe tataH sa dhanur uttamam
6087012c mahAvegaM mahAnAdaM nirbhindann iva medinIm
6087013a tayoH zarapathaM prApya rAvaNo rAjaputrayoH
6087013c sa babhUva yathA rAhuH samIpe zazisUryayoH
6087014a rAvaNasya ca bANaughai rAmavispharitena ca
6087014c zabdena rAkSasAs tena petuz ca zatazas tadA
6087015a tam icchan prathamaM yoddhuM lakSmaNo nizitaiH zaraiH
6087015c mumoca dhanur Ayamya zarAn agnizikhopamAn
6087016a tAn muktamAtrAn AkAze lakSmaNena dhanuSmatA
6087016c bANAn bANair mahAtejA rAvaNaH pratyavArayat
6087017a ekam ekena bANena tribhis trIn dazabhir daza
6087017c lakSmaNasya praciccheda darzayan pANilAghavam
6087018a abhyatikramya saumitriM rAvaNaH samitiMjayaH
6087018c AsasAda tato rAmaM sthitaM zailam ivAcalam
6087019a sa saMkhye rAmam AsAdya krodhasaMraktalocanaH
6087019c vyasRjac charavarSAni rAvaNo rAghavopari
6087020a zaradhArAs tato rAmo rAvaNasya dhanuzcyutAH
6087020c dRSTvaivApatitAH zIghraM bhallAJ jagrAha satvaram
6087021a tAJ zaraughAMs tato bhallais tIkSNaiz ciccheda rAghavaH
6087021c dIpyamAnAn mahAvegAn kruddhAn AzIviSAn iva
6087022a rAghavo rAvaNaM tUrNaM rAvaNo rAghavaM tathA
6087022c anyonyaM vividhais tIkSNaiH zarair abhivavarSatuH
6087023a ceratuz ca ciraM citraM maNDalaM savyadakSiNam
6087023c bANavegAn samudIkSya samareSv aparAjitau
6087024a tayor bhUtAni vitreSur yugapat saMprayudhyatoH
6087024c raudrayoH sAyakamucor yamAntakanikAzayoH
6087025a saMtataM vividhair bANair babhUva gaganaM tadA
6087025c ghanair ivAtapApAye vidyunmAlAsamAkulaiH
6087026a gavAkSitam ivAkAzaM babhUva zUravRSTibhiH
6087026c mahAvegaiH sutIkSNAgrair gRdhrapatraiH suvAjitaiH
6087027a zarAndhakAraM tau bhImaM cakratuH paramaM tadA
6087027c gate 'staM tapane cApi mahAmeghAv ivotthitau
6087028a babhUva tumulaM yuddham anyonyavadhakAGkSiNoH
6087028c anAsAdyam acintyaM ca vRtravAsavayor iva
6087029a ubhau hi parameSvAsAv ubhau zastravizAradau
6087029c ubhau cAstravidAM mukhyAv ubhau yuddhe viceratuH
6087030a ubhau hi yena vrajatas tena tena zarormayaH
6087030c Urmayo vAyunA viddhA jagmuH sAgarayor iva
6087031a tataH saMsaktahastas tu rAvaNo lokarAvaNaH
6087031c nArAcamAlAM rAmasya lalATe pratyamuJcata
6087032a raudracApaprayuktAM tAM nIlotpaladalaprabhAm
6087032c zirasA dhArayan rAmo na vyathAM pratyapadyata
6087033a atha mantrAn api japan raudram astram udIrayan
6087033c zarAn bhUyaH samAdAya rAmaH krodhasamanvitaH
6087034a mumoca ca mahAtejAz cApam Ayamya vIryavAn
6087034c tAJ zarAn rAkSasendrAya cikSepAcchinnasAyakaH
6087035a te mahAmeghasaMkAze kavace patitAH zarAH
6087035c avadhye rAkSasendrasya na vyathAM janayaMs tadA
6087036a punar evAtha taM rAmo rathasthaM rAkSasAdhipam
6087036c lalATe paramAstreNa sarvAstrakuzalo 'bhinat
6087037a te bhittvA bANarUpANi paJcazIrSA ivoragAH
6087037c zvasanto vivizur bhUmiM rAvaNapratikUlatAH
6087038a nihatya rAghavasyAstraM rAvaNaH krodhamUrchitaH
6087038c AsuraM sumahAghoram anyad astraM samAdade
6087039a siMhavyAghramukhAMz cAnyAn kaGkakAkamukhAn api
6087039c gRdhrazyenamukhAMz cApi sRgAlavadanAMs tathA
6087040a IhAmRgamukhAMz cAnyAn vyAditAsyAn bhayAvahAn
6087040c paJcAsyA&l lelihAnAMz ca sasarja nizitAJ zarAn
6087041a zarAn kharamukhAMz cAnyAn varAhamukhasaMsthitAn
6087041c zvAnakukkuTavaktrAMz ca makarAzIviSAnanAn
6087042a etAMz cAnyAMz ca mAyAbhiH sasarja nizitAJ zarAn
6087042c rAmaM prati mahAtejAH kruddhaH sarpa iva zvasan
6087043a AsureNa samAviSTaH so 'streNa raghunandanaH
6087043c sasarjAstraM mahotsAhaH pAvakaM pAvakopamaH
6087044a agnidIptamukhAn bANAMs tathA sUryamukhAn api
6087044c candrArdhacandravaktrAMz ca dhUmaketumukhAn api
6087045a grahanakSatravarNAMz ca maholkAmukhasaMsthitAn
6087045c vidyujjihvopamAMz cAnyAn sasarja nizitAJ zarAn
6087046a te rAvaNazarA ghorA rAghavAstrasamAhatAH
6087046c vilayaM jagmur AkAze jagmuz caiva sahasrazaH
6087047a tad astraM nihataM dRSTvA rAmeNAkliSTakarmaNA
6087047c hRSTA nedus tataH sarve kapayaH kAmarUpiNaH
6088001a tasmin pratihate 'stre tu rAvaNo rAkSasAdhipaH
6088001c krodhaM ca dviguNaM cakre krodhAc cAstram anantaram
6088002a mayena vihitaM raudram anyad astraM mahAdyutiH
6088002c utsraSTuM rAvaNo ghoraM rAghavAya pracakrame
6088003a tataH zUlAni nizcerur gadAz ca musalAni ca
6088003c kArmukAd dIpyamAnAni vajrasArANi sarvazaH
6088004a kUTamudgarapAzAz ca dIptAz cAzanayas tathA
6088004c niSpetur vividhAs tIkSNA vAtA iva yugakSaye
6088005a tad astraM rAghavaH zrImAn uttamAstravidAM varaH
6088005c jaghAna paramAstreNa gandharveNa mahAdyutiH
6088006a tasmin pratihate 'stre tu rAghaveNa mahAtmanA
6088006c rAvaNaH krodhatAmrAkSaH sauram astram udIrayat
6088007a tataz cakrANi niSpetur bhAsvarANi mahAnti ca
6088007c kArmukAd bhImavegasya dazagrIvasya dhImataH
6088008a tair AsId gaganaM dIptaM saMpatadbhir itas tataH
6088008c patadbhiz ca dizo dIptaiz candrasUryagrahair iva
6088009a tAni ciccheda bANaughaiz cakrANi tu sa rAghavaH
6088009c AyudhAni vicitrANi rAvaNasya camUmukhe
6088010a tad astraM tu hataM dRSTvA rAvaNo rAkSasAdhipaH
6088010c vivyAdha dazabhir bANai rAmaM sarveSu marmasu
6088011a sa viddho dazabhir bANair mahAkArmukaniHsRtaiH
6088011c rAvaNena mahAtejA na prAkampata rAghavaH
6088012a tato vivyAdha gAtreSu sarveSu samitiMjayaH
6088012c rAghavas tu susaMkruddho rAvaNaM bahubhiH zaraiH
6088013a etasminn antare kruddho rAghavasyAnujo balI
6088013c lakSmaNaH sAyakAn sapta jagrAha paravIrahA
6088014a taiH sAyakair mahAvegai rAvaNasya mahAdyutiH
6088014c dhvajaM manuSyazIrSaM tu tasya ciccheda naikadhA
6088015a sArathez cApi bANena ziro jvalitakuNDalam
6088015c jahAra lakSmaNaH zrImAn nairRtasya mahAbalaH
6088016a tasya bANaiz ca ciccheda dhanur gajakaropamam
6088016c lakSmaNo rAkSasendrasya paJcabhir nizitaiH zaraiH
6088017a nIlameghanibhAMz cAsya sadazvAn parvatopamAn
6088017c jaghAnAplutya gadayA rAvaNasya vibhISaNaH
6088018a hatAzvAd vegavAn vegAd avaplutya mahArathAt
6088018c krodham AhArayat tIvraM bhrAtaraM prati rAvaNaH
6088019a tataH zaktiM mahAzaktir dIptAM dIptAzanIm iva
6088019c vibhISaNAya cikSepa rAkSasendraH pratApavAn
6088020a aprAptAm eva tAM bANais tribhiz ciccheda lakSmaNaH
6088020c athodatiSThat saMnAdo vAnarANAM tadA raNe
6088021a sA papAta tridhA chinnA zaktiH kAJcanamAlinI
6088021c savisphuliGgA jvalitA maholkeva divaz cyutA
6088022a tataH saMbhAvitatarAM kAlenApi durAsadAm
6088022c jagrAha vipulAM zaktiM dIpyamAnAM svatejasA
6088023a sA veginA balavatA rAvaNena durAtmanA
6088023c jajvAla sumahAghorA zakrAzanisamaprabhA
6088024a etasminn antare vIro lakSmaNas taM vibhISaNam
6088024c prANasaMzayam ApannaM tUrNam evAbhyapadyata
6088025a taM vimokSayituM vIraz cApam Ayamya lakSmaNaH
6088025c rAvaNaM zaktihastaM taM zaravarSair avAkirat
6088026a kIryamANaH zaraugheNa visRSTena mahAtmanA
6088026c na prahartuM manaz cakre vimukhIkRtavikramaH
6088027a mokSitaM bhrAtaraM dRSTvA lakSmaNena sa rAvaNaH
6088027c lakSmaNAbhimukhas tiSThann idaM vacanam abravIt
6088028a mokSitas te balazlAghin yasmAd evaM vibhISaNaH
6088028c vimucya rAkSasaM zaktis tvayIyaM vinipAtyate
6088029a eSA te hRdayaM bhittvA zaktir lohitalakSaNA
6088029c madbAhuparighotsRSTA prANAn AdAya yAsyati
6088030a ity evam uktvA tAM zaktim aSTaghaNTAM mahAsvanAm
6088030c mayena mAyAvihitAm amoghAM zatrughAtinIm
6088031a lakSmaNAya samuddizya jvalantIm iva tejasA
6088031c rAvaNaH paramakruddhaz cikSepa ca nanAda ca
6088032a sA kSiptA bhImavegena zakrAzanisamasvanA
6088032c zaktir abhyapatad vegAl lakSmaNaM raNamUrdhani
6088033a tAm anuvyAharac chaktim ApatantIM sa rAghavaH
6088033c svastyas tu lakSmaNAyeti moghA bhava hatodyamA
6088034a nyapatat sA mahAvegA lakSmaNasya mahorasi
6088034c jihvevoragarAjasya dIpyamAnA mahAdyutiH
6088035a tato rAvaNavegena sudUram avagADhayA
6088035c zaktyA nirbhinnahRdayaH papAta bhuvi lakSmaNaH
6088036a tadavasthaM samIpastho lakSmaNaM prekSya rAghavaH
6088036c bhrAtRsnehAn mahAtejA viSaNNahRdayo 'bhavat
6088037a sa muhUrtam anudhyAya bASpavyAkulalocanaH
6088037c babhUva saMrabdhataro yugAnta iva pAvakaH
6088038a na viSAdasya kAlo 'yam iti saMcintya rAghavaH
6088038c cakre sutumulaM yuddhaM rAvaNasya vadhe dhRtaH
6088039a sa dadarza tato rAmaH zaktyA bhinnaM mahAhave
6088039c lakSmaNaM rudhirAdigdhaM sapannagam ivAcalam
6088040a tAm api prahitAM zaktiM rAvaNena balIyasA
6088040c yatnatas te harizreSThA na zekur avamarditum
6088040e arditAz caiva bANaughaiH kSiprahastena rakSasA
6088041a saumitriM sA vinirbhidya praviSTA dharaNItalam
6088041c tAM karAbhyAM parAmRzya rAmaH zaktiM bhayAvahAm
6088041e babhaJja samare kruddho balavad vicakarSa ca
6088042a tasya niSkarSataH zaktiM rAvaNena balIyasA
6088042c zarAH sarveSu gAtreSu pAtitA marmabhedinaH
6088043a acintayitvA tAn bANAn samAzliSya ca lakSmaNam
6088043c abravIc ca hanUmantaM sugrIvaM caiva rAghavaH
6088043e lakSmaNaM parivAryeha tiSThadhvaM vAnarottamAH
6088044a parAkramasya kAlo 'yaM saMprApto me cirepsitaH
6088044c pApAtmAyaM dazagrIvo vadhyatAM pApanizcayaH
6088044e kAGkSitaH stokakasyeva gharmAnte meghadarzanam
6088045a asmin muhUrte nacirAt satyaM pratizRNomi vaH
6088045c arAvaNam arAmaM vA jagad drakSyatha vAnarAH
6088046a rAjyanAzaM vane vAsaM daNDake paridhAvanam
6088046c vaidehyAz ca parAmarzaM rakSobhiz ca samAgamam
6088047a prAptaM duHkhaM mahad ghoraM klezaM ca nirayopamam
6088047c adya sarvam ahaM tyakSye hatvA taM rAvaNaM raNe
6088048a yadarthaM vAnaraM sainyaM samAnItam idaM mayA
6088048c sugrIvaz ca kRto rAjye nihatvA vAlinaM raNe
6088049a yadarthaM sAgaraH krAntaH setur baddhaz ca sAgare
6088049c so 'yam adya raNe pApaz cakSurviSayam AgataH
6088050a cakSurviSayam Agamya nAyaM jIvitum arhati
6088050c dRSTiM dRSTiviSasyeva sarpasya mama rAvaNaH
6088051a svasthAH pazyata durdharSA yuddhaM vAnarapuMgavAH
6088051c AsInAH parvatAgreSu mamedaM rAvaNasya ca
6088052a adya rAmasya rAmatvaM pazyantu mama saMyuge
6088052c trayo lokAH sagandharvAH sadevAH sarSicAraNAH
6088053a adya karma kariSyAmi yal lokAH sacarAcarAH
6088053c sadevAH kathayiSyanti yAvad bhUmir dhariSyati
6088054a evam uktvA zitair bANais taptakAJcanabhUSaNaiH
6088054c AjaghAna dazagrIvaM raNe rAmaH samAhitaH
6088055a atha pradIptair nArAcair musalaiz cApi rAvaNaH
6088055c abhyavarSat tadA rAmaM dhArAbhir iva toyadaH
6088056a rAmarAvaNamuktAnAm anyonyam abhinighnatAm
6088056c zarANAM ca zarANAM ca babhUva tumulaH svanaH
6088057a te bhinnAz ca vikIrNAz ca rAmarAvaNayoH zarAH
6088057c antarikSAt pradIptAgrA nipetur dharaNItale
6088058a tayor jyAtalanirghoSo rAmarAvaNayor mahAn
6088058c trAsanaH sarvabUtAnAM sa babhUvAdbhutopamaH
6088059a sa kIryamANaH zarajAlavRSTibhir; mahAtmanA dIptadhanuSmatArditaH
6088059c bhayAt pradudrAva sametya rAvaNo; yathAnilenAbhihato balAhakaH
6089001a sa dattvA tumulaM yuddhaM rAvaNasya durAtmanaH
6089001c visRjann eva bANaughAn suSeNaM vAkyam abravIt
6089002a eSa rAvaNavegena lakSmaNaH patitaH kSitau
6089002c sarpavad veSTate vIro mama zokam udIrayan
6089003a zoNitArdram imaM vIraM prANair iSTataraM mama
6089003c pazyato mama kA zaktir yoddhuM paryAkulAtmanaH
6089004a ayaM sa samarazlAghI bhrAtA me zubhalakSaNaH
6089004c yadi paJcatvam ApannaH prANair me kiM sukhena vA
6089005a lajjatIva hi me vIryaM bhrazyatIva karAd dhanuH
6089005c sAyakA vyavasIdanti dRSTir bASpavazaM gatA
6089005e cintA me vardhate tIvrA mumUrSA copajAyate
6089006a bhrAtaraM nihataM dRSTvA rAvaNena durAtmanA
6089006c paraM viSAdam Apanno vilalApAkulendriyaH
6089007a na hi yuddhena me kAryaM naiva prANair na sItayA
6089007c bhrAtaraM nihataM dRSTvA lakSmaNaM raNapAMsuSu
6089008a kiM me rAjyena kiM prANair yuddhe kAryaM na vidyate
6089008c yatrAyaM nihataH zete raNamUrdhani lakSmaNaH
6089009a rAmam AzvAsayan vIraH suSeNo vAkyam abravIt
6089009c na mRto 'yaM mahAbAhur lakSmaNo lakSmivardhanaH
6089010a na cAsya vikRtaM vaktraM nApi zyAmaM na niSprabham
6089010c suprabhaM ca prasannaM ca mukham asyAbhilakSyate
6089011a padmaraktatalau hastau suprasanne ca locane
6089011c evaM na vidyate rUpaM gatAsUnAM vizAM pate
6089011e mAM viSAdaM kRthA vIra saprANo 'yam ariMdama
6089012a AkhyAsyate prasuptasya srastagAtrasya bhUtale
6089012c socchvAsaM hRdayaM vIra kampamAnaM muhur muhuH
6089013a evam uktvA tu vAkyajJaH suSeNo rAghavaM vacaH
6089013c samIpastham uvAcedaM hanUmantam abhitvaran
6089014a saumya zIghram ito gatvA zailam oSadhiparvatam
6089014c pUrvaM hi kathito yo 'sau vIra jAmbavatA zubhaH
6089015a dakSiNe zikhare tasya jAtAm oSadhim Anaya
6089015c vizalyakaraNI nAma vizalyakaraNIM zubhAm
6089016a sauvarNakaraNIM cApi tathA saMjIvanIm api
6089016c saMdhAnakaraNIM cApi gatvA zIghram ihAnaya
6089016e saMjIvanArthaM vIrasya lakSmaNasya mahAtmanaH
6089017a ity evam ukto hanumAn gatvA cauSadhiparvatam
6089017c cintAm abhyagamac chrImAn ajAnaMs tA mahauSadhIH
6089018a tasya buddhiH samutpannA mAruter amitaujasaH
6089018c idam eva gamiSyAmi gRhItvA zikharaM gireH
6089019a agRhya yadi gacchAmi vizalyakaraNIm aham
6089019c kAlAtyayena doSaH syAd vaiklavyaM ca mahad bhavet
6089020a iti saMcintya hanumAn gatvA kSipraM mahAbalaH
6089020c utpapAta gRhItvA tu hanUmAJ zikharaM gireH
6089021a oSadhIr nAvagachAmi tA ahaM haripuMgava
6089021c tad idaM zikharaM kRtsnaM gires tasyAhRtaM mayA
6089022a evaM kathayamAnaM taM prazasya pavanAtmajam
6089022c suSeNo vAnarazreSTho jagrAhotpATya cauSadhIH
6089023a tataH saMkSodayitvA tAm oSadhiM vAnarottamaH
6089023c lakSmaNasya dadau nastaH suSeNaH sumahAdyutiH
6089024a sazalyaH sa samAghrAya lakSmaNaH paravIrahA
6089024c vizalyo virujaH zIghram udatiSThan mahItalAt
6089025a samutthitaM te harayo bhUtalAt prekSya lakSmaNam
6089025c sAdhu sAdhv iti suprItAH suSeNaM pratyapUjayan
6089026a ehy ehIty abravId rAmo lakSmaNaM paravIrahA
6089026c sasvaje snehagADhaM ca bASpaparyAkulekSaNaH
6089027a abravIc ca pariSvajya saumitriM rAghavas tadA
6089027c diSTyA tvAM vIra pazyAmi maraNAt punar Agatam
6089028a na hi me jIvitenArthaH sItayA ca jayena vA
6089028c ko hi me jIvitenArthas tvayi paJcatvam Agate
6089029a ity evaM vadatas tasya rAghavasya mahAtmanaH
6089029c khinnaH zithilayA vAcA lakSmaNo vAkyam abravIt
6089030a tAM pratijJAM pratijJAya purA satyaparAkrama
6089030c laghuH kaz cid ivAsattvo naivaM vaktum ihArhasi
6089031a na pratijJAM hi kurvanti vitathAM sAdhavo 'nagha
6089031c lakSaNaM hi mahat tv asya pratijJAparipAlanam
6089032a nairAzyam upagantuM te tad alaM matkRte 'nagha
6089032c vadhena rAvaNasyAdya pratijJAm anupAlaya
6089033a na jIvan yAsyate zatrus tava bANapathaM gataH
6089033c nardatas tIkSNadaMSTrasya siMhasyeva mahAgajaH
6089034a ahaM tu vadham icchAmi zIghram asya durAtmanaH
6089034c yAvad astaM na yAty eSa kRtakarmA divAkaraH
6090001a lakSmaNena tu tad vAkyam uktaM zrutvA sa rAghavaH
6090001c rAvaNAya zarAn ghorAn visasarja camUmukhe
6090002a dazagrIvo rathasthas tu rAmaM vajropamaiH zaraiH
6090002c AjaghAna mahAghorair dhArAbhir iva toyadaH
6090003a dIptapAvakasaMkAzaiH zaraiH kAJcanabhUSaNaiH
6090003c nirbibheda raNe rAmo dazagrIvaM samAhitaH
6090004a bhUmisthitasya rAmasya rathasthasya ca rakSasaH
6090004c na samaM yuddham ity Ahur devagandharvadAnavAH
6090005a tataH kAJcanacitrAGgaH kiMkiNIzatabhUSitaH
6090005c taruNAdityasaMkAzo vaidUryamayakUbaraH
6090006a sadazvaiH kAJcanApIDair yuktaH zvetaprakIrNakaiH
6090006c haribhiH sUryasaMkAzair hemajAlavibhUSitaiH
6090007a rukmaveNudhvajaH zrImAn devarAjaratho varaH
6090007c abhyavartata kAkutstham avatIrya triviSTapAt
6090008a abravIc ca tadA rAmaM sapratodo rathe sthitaH
6090008c prAJjalir mAtalir vAkyaM sahasrAkSasya sArathiH
6090009a sahasrAkSeNa kAkutstha ratho 'yaM vijayAya te
6090009c dattas tava mahAsattva zrImAJ zatrunibarhaNaH
6090010a idam aindraM mahaccApaM kavacaM cAgnisaMnibham
6090010c zarAz cAdityasaMkAzAH zaktiz ca vimalA zitAH
6090011a AruhyemaM rathaM vIra rAkSasaM jahi rAvaNam
6090011c mayA sArathinA rAma mahendra iva dAnavAn
6090012a ity uktaH sa parikramya rathaM tam abhivAdya ca
6090012c Aruroha tadA rAmo lokA&l lakSmyA virAjayan
6090013a tad babhUvAdbhutaM yuddhaM dvairathaM lomaharSaNam
6090013c rAmasya ca mahAbAho rAvaNasya ca rakSasaH
6090014a sa gAndharveNa gAndharvaM daivaM daivena rAghavaH
6090014c astraM rAkSasarAjasya jaghAna paramAstravit
6090015a astraM tu paramaM ghoraM rAkSasaM rAkasAdhipaH
6090015c sasarja paramakruddhaH punar eva nizAcaraH
6090016a te rAvaNadhanurmuktAH zarAH kAJcanabhUSaNAH
6090016c abhyavartanta kAkutsthaM sarpA bhUtvA mahAviSAH
6090017a te dIptavadanA dIptaM vamanto jvalanaM mukhaiH
6090017c rAmam evAbhyavartanta vyAditAsyA bhayAnakAH
6090018a tair vAsukisamasparzair dIptabhogair mahAviSaiH
6090018c dizaz ca saMtatAH sarvAH pradizaz ca samAvRtAH
6090019a tAn dRSTvA pannagAn rAmaH samApatata Ahave
6090019c astraM gArutmataM ghoraM prAduzcakre bhayAvaham
6090020a te rAghavadhanurmuktA rukmapuGkhAH zikhiprabhAH
6090020c suparNAH kAJcanA bhUtvA viceruH sarpazatravaH
6090021a te tAn sarvAJ zarAJ jaghnuH sarparUpAn mahAjavAn
6090021c suparNarUpA rAmasya vizikhAH kAmarUpiNaH
6090022a astre pratihate kruddho rAvaNo rAkSasAdhipaH
6090022c abhyavarSat tadA rAmaM ghorAbhiH zaravRSTibhiH
6090023a tataH zarasahasreNa rAmam akliSTakAriNam
6090023c ardayitvA zaraugheNa mAtaliM pratyavidhyata
6090024a pAtayitvA rathopasthe rathAt ketuM ca kAJcanam
6090024c aindrAn abhijaghAnAzvAJ zarajAlena rAvaNaH
6090025a viSedur devagandharvA dAnavAz cAraNaiH saha
6090025c rAmam ArtaM tadA dRSTvA siddhAz ca paramarSayaH
6090026a vyathitA vAnarendrAz ca babhUvuH savibhISaNAH
6090026c rAmacandramasaM dRSTvA grastaM rAvaNarAhuNA
6090027a prAjApatyaM ca nakSatraM rohiNIM zazinaH priyAm
6090027c samAkramya budhas tasthau prajAnAm azubhAvahaH
6090028a sadhUmaparivRttormiH prajvalann iva sAgaraH
6090028c utpapAta tadA kruddhaH spRzann iva divAkaram
6090029a zastravarNaH suparuSo mandarazmir divAkaraH
6090029c adRzyata kabandhAGgaH saMsakto dhUmaketunA
6090030a kosalAnAM ca nakSatraM vyaktam indrAgnidaivatam
6090030c AkramyAGgArakas tasthau vizAkhAm api cAmbare
6090031a dazAsyo viMzatibhujaH pragRhItazarAsanaH
6090031c adRzyata dazagrIvo mainAka iva parvataH
6090032a nirasyamAno rAmas tu dazagrIveNa rakSasA
6090032c nAzakad abhisaMdhAtuM sAyakAn raNamUrdhani
6090033a sa kRtvA bhrukuTIM kruddhaH kiM cit saMraktalocanaH
6090033c jagAma sumahAkrodhaM nirdahann iva cakSuSA
6091001a tasya kruddhasya vadanaM dRSTvA rAmasya dhImataH
6091001c sarvabhUtAni vitreSuH prAkampata ca medinI
6091002a siMhazArdUlavAJ zailaH saMcacAlAcaladrumaH
6091002c babhUva cApi kSubhitaH samudraH saritAM patiH
6091003a khagAz ca kharanirghoSA gagane paruSasvanAH
6091003c autpAtikA vinardantaH samantAt paricakramuH
6091004a rAmaM dRSTvA susaMkruddham utpAtAMz ca sudAruNAn
6091004c vitreSuH sarvabhUtAni rAvaNasyAvizad bhayam
6091005a vimAnasthAs tadA devA gandharvAz ca mahoragAH
6091005c RSidAnavadaityAz ca garutmantaz ca khecarAH
6091006a dadRzus te tadA yuddhaM lokasaMvartasaMsthitam
6091006c nAnApraharaNair bhImaiH zUrayoH saMprayudhyatoH
6091007a UcuH surAsurAH sarve tadA vigraham AgatAH
6091007c prekSamANA mahAyuddhaM vAkyaM bhaktyA prahRSTavat
6091008a dazagrIvaM jayety Ahur asurAH samavasthitAH
6091008c devA rAmam athocus te tvaM jayeti punaH punaH
6091009a etasminn antare krodhAd rAghavasya sa rAvaNaH
6091009c prahartukAmo duSTAtmA spRzan praharaNaM mahat
6091010a vajrasAraM mahAnAdaM sarvazatrunibarhaNam
6091010c zailazRGganibhaiH kUTaiz citaM dRSTibhayAvaham
6091011a sadhUmam iva tIkSNAgraM yugAntAgnicayopamam
6091011c atiraudram anAsAdyaM kAlenApi durAsadam
6091012a trAsanaM sarvabhUtAnAM dAraNaM bhedanaM tathA
6091012c pradIpta iva roSeNa zUlaM jagrAha rAvaNaH
6091013a tac chUlaM paramakruddho madhye jagrAha vIryavAn
6091013c anekaiH samare zUrai rAkSasaiH parivAritaH
6091014a samudyamya mahAkAyo nanAda yudhi bhairavam
6091014c saMraktanayano roSAt svasainyam abhiharSayan
6091015a pRthivIM cAntarikSaM ca dizaz ca pradizas tathA
6091015c prAkampayat tadA zabdo rAkSasendrasya dAruNaH
6091016a atinAdasya nAdena tena tasya durAtmanaH
6091016c sarvabhUtAni vitreSuH sAgaraz ca pracukSubhe
6091017a sa gRhItvA mahAvIryaH zUlaM tad rAvaNo mahat
6091017c vinadya sumahAnAdaM rAmaM paruSam abravIt
6091018a zUlo 'yaM vajrasAras te rAma roSAn mayodyataH
6091018c tava bhrAtRsahAyasya sadyaH prANAn hariSyati
6091019a rakSasAm adya zUrANAM nihatAnAM camUmukhe
6091019c tvAM nihatya raNazlAghin karomi tarasA samam
6091020a tiSThedAnIM nihanmi tvAm eSa zUlena rAghava
6091020c evam uktvA sa cikSepa tac chUlaM rAkSasAdhipaH
6091021a ApatantaM zaraugheNa vArayAm Asa rAghavaH
6091021c utpatantaM yugAntAgniM jalaughair iva vAsavaH
6091022a nirdadAha sa tAn bANAn rAmakArmukaniHsRtAn
6091022c rAvaNasya mahAzUlaH pataMgAn iva pAvakaH
6091023a tAn dRSTvA bhasmasAd bhUtAJ zUlasaMsparzacUrNitAn
6091023c sAyakAn antarikSasthAn rAghavaH krodham Aharat
6091024a sa tAM mAtalinAnItAM zaktiM vAsavanirmitAm
6091024c jagrAha paramakruddho rAghavo raghunandanaH
6091025a sA tolitA balavatA zaktir ghaNTAkRtasvanA
6091025c nabhaH prajvAlayAm Asa yugAntolkeva saprabhA
6091026a sA kSiptA rAkSasendrasya tasmiJ zUle papAta ha
6091026c bhinnaH zaktyA mahAJ zUlo nipapAta gatadyutiH
6091027a nirbibheda tato bANair hayAn asya mahAjavAn
6091027c rAmas tIkSNair mahAvegair vajrakalpaiH zitaiH zaraiH
6091028a nirbibhedorasi tadA rAvaNaM nizitaiH zaraiH
6091028c rAghavaH paramAyatto lalATe patribhis tribhiH
6091029a sa zarair bhinnasarvAGgo gAtraprasrutazoNitaH
6091029c rAkSasendraH samUhasthaH phullAzoka ivAbabhau
6091030a sa rAmabANair atividdhagAtro; nizAcarendraH kSatajArdragAtraH
6091030c jagAma khedaM ca samAjamadhye; krodhaM ca cakre subhRzaM tadAnIm
6092001a sa tu tena tadA krodhAt kAkutsthenArdito raNe
6092001c rAvaNaH samarazlAghI mahAkrodham upAgamat
6092002a sa dIptanayano roSAc cApam Ayamya vIryavAn
6092002c abhyardayat susaMkruddho rAghavaM paramAhave
6092003a bANadhArAsahasrais tu sa toyada ivAmbarAt
6092003c rAghavaM rAvaNo bANais taTAkam iva pUrayat
6092004a pUritaH zarajAlena dhanurmuktena saMyuge
6092004c mahAgirir ivAkampyaH kAkustho na prakampate
6092005a sa zaraiH zarajAlAni vArayan samare sthitaH
6092005c gabhastIn iva sUryasya pratijagrAha vIryavAn
6092006a tataH zarasahasrANi kSiprahasto nizAcaraH
6092006c nijaghAnorasi kruddho rAghavasya mahAtmanaH
6092007a sa zoNitasamAdigdhaH samare lakSmaNAgrajaH
6092007c dRSTaH phulla ivAraNye sumahAn kiMzukadrumaH
6092008a zarAbhighAtasaMrabdhaH so 'pi jagrAha sAyakAn
6092008c kAkutsthaH sumahAtejA yugAntAdityavarcasaH
6092009a tato 'nyonyaM susaMrabdhAv ubhau tau rAmarAvaNau
6092009c zarAndhakAre samare nopAlakSayatAM tadA
6092010a tataH krodhasamAviSTo rAmo dazarathAtmajaH
6092010c uvAca rAvaNaM vIraH prahasya paruSaM vacaH
6092011a mama bhAryA janasthAnAd ajJAnAd rAkSasAdhama
6092011c hRtA te vivazA yasmAt tasmAt tvaM nAsi vIryavAn
6092012a mayA virahitAM dInAM vartamAnAM mahAvane
6092012c vaidehIM prasabhaM hRtvA zUro 'ham iti manyase
6092013a strISu zUra vinAthAsu paradArAbhimarzake
6092013c kRtvA kApuruSaM karma zUro 'ham iti manyase
6092014a bhinnamaryAda nirlajja cAritreSv anavasthita
6092014c darpAn mRtyum upAdAya zUro 'ham iti manyase
6092015a zUreNa dhanadabhrAtrA balaiH samuditena ca
6092015c zlAghanIyaM yazasyaM ca kRtaM karma mahat tvayA
6092016a utsekenAbhipannasya garhitasyAhitasya ca
6092016c karmaNaH prApnuhIdAnIM tasyAdya sumahat phalam
6092017a zUro 'ham iti cAtmAnam avagacchasi durmate
6092017c naiva lajjAsti te sItAM coravad vyapakarSataH
6092018a yadi matsaMnidhau sItA dharSitA syAt tvayA balAt
6092018c bhrAtaraM tu kharaM pazyes tadA matsAyakair hataH
6092019a diSTyAsi mama duSTAtmaMz cakSurviSayam AgataH
6092019c adya tvAM sAyakais tIkSNair nayAmi yamasAdanam
6092020a adya te maccharaiz chinnaM ziro jvalitakuNDalam
6092020c kravyAdA vyapakarSantu vikIrNaM raNapAMsuSu
6092021a nipatyorasi gRdhrAs te kSitau kSiptasya rAvaNa
6092021c pibantu rudhiraM tarSAd bANazalyAntarothitam
6092022a adya madbANAbhinnasya gatAsoH patitasya te
6092022c karSantv antrANi patagA garutmanta ivoragAn
6092023a ity evaM sa vadan vIro rAmaH zatrunibarhaNaH
6092023c rAkSasendraM samIpasthaM zaravarSair avAkirat
6092024a babhUva dviguNaM vIryaM balaM harSaz ca saMyuge
6092024c rAmasyAstrabalaM caiva zatror nidhanakAGkSiNaH
6092025a prAdurbabhUvur astrANi sarvANi viditAtmanaH
6092025c praharSAc ca mahAtejAH zIghrahastataro 'bhavat
6092026a zubhAny etAni cihnAni vijJAyAtmagatAni saH
6092026c bhUya evArdayad rAmo rAvaNaM rAkSasAntakRt
6092027a harINAM cAzmanikaraiH zaravarSaiz ca rAghavAt
6092027c hanyamAno dazagrIvo vighUrNahRdayo 'bhavat
6092028a yadA ca zastraM nArebhe na vyakarSac charAsanam
6092028c nAsya pratyakarod vIryaM viklavenAntarAtmanA
6092029a kSiptAz cApi zarAs tena zastrANi vividhAni ca
6092029c na raNArthAya vartante mRtyukAle 'bhivartataH
6092030a sUtas tu rathanetAsya tadavasthaM nirIkSya tam
6092030c zanair yuddhAd asaMbhAnto rathaM tasyApavAhayat
6093001a sa tu mohAt susaMkruddhaH kRtAntabalacoditaH
6093001c krodhasaMraktanayano rAvaNo sUtam abravIt
6093002a hInavIryam ivAzaktaM pauruSeNa vivarjitam
6093002c bhIruM laghum ivAsattvaM vihInam iva tejasA
6093003a vimuktam iva mAyAbhir astrair iva bahiSkRtam
6093003c mAm avajJAya durbuddhe svayA buddhyA viceSTase
6093004a kimarthaM mAm avajJAya macchandam anavekSya ca
6093004c tvayA zatrusamakSaM me ratho 'yam apavAhitaH
6093005a tvayAdya hi mamAnArya cirakAlasamArjitam
6093005c yazo vIryaM ca tejaz ca pratyayaz ca vinAzitaH
6093006a zatroH prakhyAtavIryasya raJjanIyasya vikramaiH
6093006c pazyato yuddhalubdho 'haM kRtaH kApuruSas tvayA
6093007a yas tvaM ratham imaM mohAn na codvahasi durmate
6093007c satyo 'yaM pratitarko me pareNa tvam upaskRtaH
6093008a na hIdaM vidyate karma suhRdo hitakAGkSiNaH
6093008c ripUNAM sadRzaM caitan na tvayaitat svanuSThitam
6093009a nivartaya rathaM zIghraM yAvan nApaiti me ripuH
6093009c yadi vApy uSito 'si tvaM smaryante yadi vA guNAH
6093010a evaM paruSam uktas tu hitabuddhir abuddhinA
6093010c abravId rAvaNaM sUto hitaM sAnunayaM vacaH
6093011a na bhIto 'smi na mUDho 'smi nopajapto 'smi zatrubhiH
6093011c na pramatto na niHsneho vismRtA na ca satkriyA
6093012a mayA tu hitakAmena yazaz ca parirakSatA
6093012c snehapraskannamanasA priyam ity apriyaM kRtam
6093013a nAsminn arthe mahArAja tvaM mAM priyahite ratam
6093013c kaz cil laghur ivAnAryo doSato gantum arhasi
6093014a zrUyatAm abhidhAsyAmi yannimittaM mayA rathaH
6093014c nadIvega ivAmbhobhiH saMyuge vinivartitaH
6093015a zramaM tavAvagacchAmi mahatA raNakarmaNA
6093015c na hi te vIra saumukhyaM praharSaM vopadhAraye
6093016a rathodvahanakhinnAz ca ta ime rathavAjinaH
6093016c dInA gharmaparizrAntA gAvo varSahatA iva
6093017a nimittAni ca bhUyiSThaM yAni prAdurbhavanti naH
6093017c teSu teSv abhipanneSu lakSayAmy apradakSiNam
6093018a dezakAlau ca vijJeyau lakSaNAnIGgitAni ca
6093018c dainyaM harSaz ca khedaz ca rathinaz ca balAbalam
6093019a sthalanimnAni bhUmez ca samAni viSamANi ca
6093019c yuddhakAlaz ca vijJeyaH parasyAntaradarzanam
6093020a upayAnApayAne ca sthAnaM pratyapasarpaNam
6093020c sarvam etad rathasthena jJeyaM rathakuTumbinA
6093021a tava vizrAmahetos tu tathaiSAM rathavAjinAm
6093021c raudraM varjayatA khedaM kSamaM kRtam idaM mayA
6093022a na mayA svecchayA vIra ratho 'yam apavAhitaH
6093022c bhartRsnehaparItena mayedaM yatkRtaM vibho
6093023a AjJApaya yathAtattvaM vakSyasy ariniSUdana
6093023c tat kariSyAmy ahaM vIraM gatAnRNyena cetasA
6093024a saMtuSTas tena vAkyena rAvaNas tasya sAratheH
6093024c prazasyainaM bahuvidhaM yuddhalubdho 'bravId idam
6093025a rathaM zIghram imaM sUta rAghavAbhimukhaM kuru
6093025c nAhatvA samare zatrUn nivartiSyati rAvaNaH
6093026a evam uktvA tatas tuSTo rAvaNo rAkSasezvaraH
6093026c dadau tasya zubhaM hy ekaM hastAbharaNam uttamam
6093027a tato drutaM rAvaNavAkyacoditaH; pracodayAm Asa hayAn sa sArathiH
6093027c sa rAkSasendrasya tato mahArathaH; kSaNena rAmasya raNAgrato 'bhavat
6094001a tam ApatantaM sahasA svanavantaM mahAdhvajam
6094001c rathaM rAkSasarAjasya nararAjo dadarza ha
6094002a kRSNavAjisamAyuktaM yuktaM raudreNa varcasA
6094002c taDitpatAkAgahanaM darzitendrAyudhAyudham
6094002e zaradhArA vimuJcantaM dhArAsAram ivAnbudam
6094003a taM dRSTvA meghasaMkAzam ApatantaM rathaM ripoH
6094003c girer vajrAbhimRSTasya dIryataH sadRzasvanam
6094003e uvAca mAtaliM rAmaH sahasrAkSasya sArathim
6094004a mAtale pazya saMrabdham ApatantaM rathaM ripoH
6094004c yathApasavyaM patatA vegena mahatA punaH
6094004e samare hantum AtmAnaM tathAnena kRtA matiH
6094005a tad apramAdam AtiSTha pratyudgaccha rathaM ripoH
6094005c vidhvaMsayitum icchAmi vAyur megham ivotthitam
6094006a aviklavam asaMbhrAntam avyagrahRdayekSaNam
6094006c razmisaMcAraniyataM pracodaya rathaM drutam
6094007a kAmaM na tvaM samAdheyaH puraMdararathocitaH
6094007c yuyutsur aham ekAgraH smAraye tvAM na zikSaye
6094008a parituSTaH sa rAmasya tena vAkyena mAtaliH
6094008c pracodayAm Asa rathaM surasArathisattamaH
6094009a apasavyaM tataH kurvan rAvaNasya mahAratham
6094009c cakrotkSiptena rajasA rAvaNaM vyavadhUnayat
6094010a tataH kruddho dazagrIvas tAmravisphAritekSaNaH
6094010c rathapratimukhaM rAmaM sAyakair avadhUnayat
6094011a dharSaNAmarSito rAmo dhairyaM roSeNa laGghayan
6094011c jagrAha sumahAvegam aindraM yudhi zarAsanam
6094011e zarAMz ca sumahAtejAH sUryarazmisamaprabhAn
6094012a tad upoDhaM mahad yuddham anyonyavadhakAGkSiNoH
6094012c parasparAbhimukhayor dRptayor iva siMhayoH
6094013a tato devAH sagandharvAH siddhAz ca paramarSayaH
6094013c samIyur dvairathaM draSTuM rAvaNakSayakAGkSiNaH
6094014a samutpetur athotpAtA dAruNA lomaharSaNAH
6094014c rAvaNasya vinAzAya rAghavasya jayAya ca
6094015a vavarSa rudhiraM devo rAvaNasya rathopari
6094015c vAtA maNDalinas tIvrA apasavyaM pracakramuH
6094016a mahad gRdhrakulaM cAsya bhramamANaM nabhastale
6094016c yena yena ratho yAti tena tena pradhAvati
6094017a saMdhyayA cAvRtA laGkA japApuSpanikAzayA
6094017c dRzyate saMpradIteva divase 'pi vasuMdharA
6094018a sanirghAtA maholkAz ca saMpracetur mahAsvanAH
6094018c viSAdayantyo rakSAMsi rAvaNasya tadAhitAH
6094019a rAvaNaz ca yatas tatra pracacAla vasuMdharA
6094019c rakSasAM ca praharatAM gRhItA iva bAhavaH
6094020a tAmrAH pItAH sitAH zvetAH patitAH sUryarazmayaH
6094020c dRzyante rAvaNasyAGge parvatasyeva dhAtavaH
6094021a gRdhrair anugatAz cAsya vamantyo jvalanaM mukhaiH
6094021c praNedur mukham IkSantyaH saMrabdham azivaM zivAH
6094022a pratikUlaM vavau vAyU raNe pAMsUn samutkiran
6094022c tasya rAkSasarAjasya kurvan dRSTivilopanam
6094023a nipetur indrAzanayaH sainye cAsya samantataH
6094023c durviSahya svanA ghorA vinA jaladharasvanam
6094024a dizaz ca pradizaH sarvA babhUvus timirAvRtAH
6094024c pAMsuvarSeNa mahatA durdarzaM ca nabho 'bhavat
6094025a kurvantyaH kalahaM ghoraM sArikAs tadrathaM prati
6094025c nipetuH zatazas tatra dAruNA dAruNasvanAH
6094026a jaghanebhyaH sphuliGgAMz ca netrebhyo 'zrUNi saMtatam
6094026c mumucus tasya turagAs tulyam agniM ca vAri ca
6094027a evaM prakArA bahavaH samutpAtA bhayAvahAH
6094027c rAvaNasya vinAzAya dAruNAH saMprajajJire
6094028a rAmasyApi nimittAni saumyAni ca zivAni ca
6094028c babhUvur jayazaMsIni prAdurbhUtAni sarvazaH
6094029a tato nirIkSyAtmagatAni rAghavo; raNe nimittAni nimittakovidaH
6094029c jagAma harSaM ca parAM ca nirvRtiM; cakAra yuddhe 'bhyadhikaM ca vikramam
6095001a tataH pravRttaM sukrUraM rAmarAvaNayos tadA
6095001c sumahad dvairathaM yuddhaM sarvalokabhayAvaham
6095002a tato rAkSasasainyaM ca harINAM ca mahad balam
6095002c pragRhItapraharaNaM nizceSTaM samatiSThata
6095003a saMprayuddhau tato dRSTvA balavan nararAkSasau
6095003c vyAkSiptahRdayAH sarve paraM vismayam AgatAH
6095004a nAnApraharaNair vyagrair bhujair vismitabuddhayaH
6095004c tasthuH prekSya ca saMgrAmaM nAbhijaghnuH parasparam
6095005a rakSasAM rAvaNaM cApi vAnarANAM ca rAghavam
6095005c pazyatAM vismitAkSANAM sainyaM citram ivAbabhau
6095006a tau tu tatra nimittAni dRSTvA rAghavarAvaNau
6095006c kRtabuddhI sthirAmarSau yuyudhAte abhItavat
6095007a jetavyam iti kAkutstho martavyam iti rAvaNaH
6095007c dhRtau svavIryasarvasvaM yuddhe 'darzayatAM tadA
6095008a tataH krodhAd dazagrIvaH zarAn saMdhAya vIryavAn
6095008c mumoca dhvajam uddizya rAghavasya rathe sthitam
6095009a te zarAs tam anAsAdya puraMdararathadhvajam
6095009c raktazaktiM parAmRzya nipetur dharaNItale
6095010a tato rAmo 'bhisaMkruddhaz cApam Ayamya vIryavAn
6095010c kRtapratikRtaM kartuM manasA saMpracakrame
6095011a rAvaNadhvajam uddizya mumoca nizitaM zaram
6095011c mahAsarpam ivAsahyaM jvalantaM svena tejasA
6095012a jagAma sa mahIM bhittvA dazagrIvadhvajaM zaraH
6095012c sa nikRtto 'patad bhUmau rAvaNasya rathadhvajaH
6095013a dhvajasyonmathanaM dRSTvA rAvaNaH sumahAbalaH
6095013c krodhajenAgninA saMkhye pradIpta iva cAbhavat
6095014a sa roSavazam ApannaH zaravarSaM mahad vaman
6095014c rAmasya turagAn divyAJ zarair vivyAdha rAvaNaH
6095015a te viddhA harayas tasya nAskhalan nApi babhramuH
6095015c babhUvuH svasthahRdayAH padmanAlair ivAhatAH
6095016a teSAm asaMbhramaM dRSTvA vAjinAM rAvaNas tadA
6095016c bhUya eva susaMkruddhaH zaravarSaM mumoca ha
6095017a gadAz ca parighAMz caiva cakrANi musalAni ca
6095017c girizRGgANi vRkSAMz ca tathA zUlaparazvadhAn
6095018a mAyAvihitam etat tu zastravarSam apAtayat
6095018c sahasrazas tato bANAn azrAntahRdayodyamaH
6095019a tumulaM trAsajananaM bhImaM bhImapratisvanam
6095019c durdharSam abhavad yuddhe naikazastramayaM mahat
6095020a vimucya rAghavarathaM samantAd vAnare bale
6095020c sAyakair antarikSaM ca cakArAzu nirantaram
6095020e mumoca ca dazagrIvo niHsaGgenAntarAtmanA
6095021a vyAyacchamAnaM taM dRSTvA tatparaM rAvaNaM raNe
6095021c prahasann iva kAkutsthaH saMdadhe sAyakAJ zitAn
6095022a sa mumoca tato bANAn raNe zatasahasrazaH
6095022c tAn dRSTvA rAvaNaz cakre svazaraiH khaM nirantaram
6095023a tatas tAbhyAM prayuktena zaravarSeNa bhAsvatA
6095023c zarabaddham ivAbhAti dvitIyaM bhAsvad ambaram
6095024a nAnimitto 'bhavad bANo nAtibhettA na niSphalaH
6095024c tathA visRjator bANAn rAmarAvaNayor mRdhe
6095025a prAyudhyetAm avicchinnam asyantau savyadakSiNam
6095025c cakratus tau zaraughais tu nirucchvAsam ivAmbaram
6095026a rAvaNasya hayAn rAmo hayAn rAmasya rAvaNaH
6095026c jaghnatus tau tadAnyonyaM kRtAnukRtakAriNau
6096001a tau tathA yudhyamAnau tu samare rAmarAvaNau
6096001c dadRzuH sarvabhUtAni vismitenAntarAtmanA
6096002a ardayantau tu samare tayos tau syandanottamau
6096002c parasparavadhe yuktau ghorarUpau babhUvatuH
6096003a maNDalAni ca vIthIz ca gatapratyAgatAni ca
6096003c darzayantau bahuvidhAM sUtau sArathyajAM gatim
6096004a ardayan rAvaNaM rAmo rAghavaM cApi rAvaNaH
6096004c gativegaM samApannau pravartana nivartane
6096005a kSipatoH zarajAlAni tayos tau syandanottamau
6096005c ceratuH saMyugamahIM sAsArau jaladAv iva
6096006a darzayitvA tadA tau tu gatiM bahuvidhAM raNe
6096006c parasparasyAbhimukhau punar eva ca tasthatuH
6096007a dhuraM dhureNa rathayor vaktraM vaktreNa vAjinAm
6096007c patAkAz ca patAkAbhiH sameyuH sthitayos tadA
6096008a rAvaNasya tato rAmo dhanurmuktaiH zitaiH zaraiH
6096008c caturbhiz caturo dIptAn hayAn pratyapasarpayat
6096009a sa krodhavazam Apanno hayAnAm apasarpaNe
6096009c mumoca nizitAn bANAn rAghavAya nizAcaraH
6096010a so 'tividdho balavatA dazagrIveNa rAghavaH
6096010c jagAma na vikAraM ca na cApi vyathito 'bhavat
6096011a cikSepa ca punar bANAn vajrapAtasamasvanAn
6096011c sArathiM vajrahastasya samuddizya nizAcaraH
6096012a mAtales tu mahAvegAH zarIre patitAH zarAH
6096012c na sUkSmam api saMmohaM vyathAM vA pradadur yudhi
6096013a tayA dharSaNayA kroddho mAtaler na tathAtmanaH
6096013c cakAra zarajAlena rAghavo vimukhaM ripum
6096014a viMzatiM triMzataM SaSTiM zatazo 'tha sahasrazaH
6096014c mumoca rAghavo vIraH sAyakAn syandane ripoH
6096015a gadAnAM musalAnAM ca parighANAM ca nisvanaiH
6096015c zarANAM puGkhavAtaiz ca kSubhitAH saptasAgarAH
6096016a kSubdhAnAM sAgarANAM ca pAtAlatalavAsinaH
6096016c vyathitAH pannagAH sarve dAnavAz ca sahasrazaH
6096017a cakampe medinI kRtsnA sazailavanakAnanA
6096017c bhAskaro niSprabhaz cAbhUn na vavau cApi mArutaH
6096018a tato devAH sagandharvAH siddhAz ca paramarSayaH
6096018c cintAm Apedire sarve sakiMnaramahoragAH
6096019a svasti gobrAhmaNebhyo 'stu lokAs tiSThantu zAzvatAH
6096019c jayatAM rAghavaH saMkhye rAvaNaM rAkSasezvaram
6096020a tataH kruddho mahAbAhU raghUNAM kIrtivardhanaH
6096020c saMdhAya dhanuSA rAmaH kSuram AzIviSopamam
6096020e rAvaNasya ziro 'cchindac chrImaj jvalitakuNDalam
6096021a tac chiraH patitaM bhUmau dRSTaM lokais tribhis tadA
6096021c tasyaiva sadRzaM cAnyad rAvaNasyotthitaM ziraH
6096022a tat kSipraM kSiprahastena rAmeNa kSiprakAriNA
6096022c dvitIyaM rAvaNaziraz chinnaM saMyati sAyakaiH
6096023a chinnamAtraM ca tac chIrSaM punar anyat sma dRzyate
6096023c tad apy azanisaMkAzaiz chinnaM rAmeNa sAyakaiH
6096024a evam eva zataM chinnaM zirasAM tulyavarcasAm
6096024c na caiva rAvaNasyAnto dRzyate jIvitakSaye
6096025a tataH sarvAstravid vIraH kausalyAnandivardhanaH
6096025c mArgaNair bahubhir yuktaz cintayAm Asa rAghavaH
6096026a mArIco nihato yais tu kharo yais tu sudUSaNaH
6096026c kraJcAraNye virAdhas tu kabandho daNDakA vane
6096027a ta ime sAyakAH sarve yuddhe pratyayikA mama
6096027c kiM nu tat kAraNaM yena rAvaNe mandatejasaH
6096028a iti cintAparaz cAsId apramattaz ca saMyuge
6096028c vavarSa zaravarSANi rAghavo rAvaNorasi
6096029a rAvaNo 'pi tataH kruddho rathastho rAkSasezvaraH
6096029c gadAmusalavarSeNa rAmaM pratyardayad raNe
6096030a devadAnavayakSANAM pizAcoragarakSasAm
6096030c pazyatAM tan mahad yuddhaM sarvarAtram avartata
6096031a naiva ratriM na divasaM na muhUrtaM na cakSaNam
6096031c rAmarAvaNayor yuddhaM virAmam upagacchati
6097001a atha saMsmArayAm Asa rAghavaM mAtalis tadA
6097001c ajAnann iva kiM vIra tvam enam anuvartase
6097002a visRjAsmai vadhAya tvam astraM paitAmahaM prabho
6097002c vinAzakAlaH kathito yaH suraiH so 'dya vartate
6097003a tataH saMsmArito rAmas tena vAkyena mAtaleH
6097003c jagrAha sa zaraM dIptaM nizvasantam ivoragam
6097004a yam asmai prathamaM prAdAd agastyo bhagavAn RSiH
6097004c brahmadattaM mahad bANam amoghaM yudhi vIryavAn
6097005a brahmaNA nirmitaM pUrvam indrArtham amitaujasA
6097005c dattaM surapateH pUrvaM trilokajayakAGkSiNaH
6097006a yasya vAjeSu pavanaH phale pAvakabhAskarau
6097006c zarIram AkAzamayaM gaurave merumandarau
6097007a jAjvalyamAnaM vapuSA supuGkhaM hemabhUSitam
6097007c tejasA sarvabhUtAnAM kRtaM bhAskaravarcasaM
6097008a sadhUmam iva kAlAgniM dIptam AzIviSaM yathA
6097008c rathanAgAzvavRndAnAM bhedanaM kSiprakAriNam
6097009a dvArANAM parighANAM ca girINAm api bhedanam
6097009c nAnArudhirasiktAGgaM medodigdhaM sudAruNam
6097010a vajrasAraM mahAnAdaM nAnAsamitidAruNam
6097010c sarvavitrAsanaM bhImaM zvasantam iva pannagam
6097011a kaGkagRdhrabalAnAM ca gomAyugaNarakSasAm
6097011c nityaM bhakSapradaM yuddhe yamarUpaM bhayAvaham
6097012a nandanaM vAnarendrANAM rakSasAm avasAdanam
6097012c vAjitaM vividhair vAjaiz cArucitrair garutmataH
6097013a tam uttameSuM lokAnAm ikSvAkubhayanAzanam
6097013c dviSatAM kIrtiharaNaM praharSakaram AtmanaH
6097014a abhimantrya tato rAmas taM maheSuM mahAbalaH
6097014c vedaproktena vidhinA saMdadhe kArmuke balI
6097015a sa rAvaNAya saMkruddho bhRzam Ayamya kArmukam
6097015c cikSepa param Ayattas taM zaraM marmaghAtinam
6097016a sa vajra iva durdharSo vajrabAhuvisarjitaH
6097016c kRtAnta iva cAvAryo nyapatad rAvaNorasi
6097017a sa visRSTo mahAvegaH zarIrAntakaraH zaraH
6097017c bibheda hRdayaM tasya rAvaNasya durAtmanaH
6097018a rudhirAktaH sa vegena jIvitAntakaraH zaraH
6097018c rAvaNasya haran prANAn viveza dharaNItalam
6097019a sa zaro rAvaNaM hatvA rudhirArdrakRtacchaviH
6097019c kRtakarmA nibhRtavat svatUNIM punar Avizat
6097020a tasya hastAd dhatasyAzu kArmukaM tat sasAyakam
6097020c nipapAta saha prANair bhrazyamAnasya jIvitAt
6097021a gatAsur bhImavegas tu nairRtendro mahAdyutiH
6097021c papAta syandanAd bhUmau vRtro vajrahato yathA
6097022a taM dRSTvA patitaM bhUmau hatazeSA nizAcarAH
6097022c hatanAthA bhayatrastAH sarvataH saMpradudruvuH
6097023a nardantaz cAbhipetus tAn vAnarA drumayodhinaH
6097023c dazagrIvavadhaM dRSTvA vijayaM rAghavasya ca
6097024a arditA vAnarair hRSTair laGkAm abhyapatan bhayAt
6097024c hatAzrayatvAt karuNair bASpaprasravaNair mukhaiH
6097025a tato vineduH saMhRSTA vAnarA jitakAzinaH
6097025c vadanto rAghavajayaM rAvaNasya ca taM vadham
6097026a athAntarikSe vyanadat saumyas tridazadundubhiH
6097026c divyagandhavahas tatra mArutaH susukho vavau
6097027a nipapAtAntarikSAc ca puSpavRSTis tadA bhuvi
6097027c kirantI rAghavarathaM duravApA manoharAH
6097028a rAghavastavasaMyuktA gagane ca vizuzruve
6097028c sAdhu sAdhv iti vAg agryA devatAnAM mahAtmanAm
6097029a Aviveza mahAn harSo devAnAM cAraNaiH saha
6097029c rAvaNe nihate raudre sarvalokabhayaMkare
6097030a tataH sakAmaM sugrIvam aGgadaM ca mahAbalam
6097030c cakAra rAghavaH prIto hatvA rAkSasapuMgavam
6097031a tataH prajagmuH prazamaM marudgaNA; dizaH prasedur vimalaM nabho 'bhavat
6097031c mahI cakampe na ca mArutA vavuH; sthiraprabhaz cApy abhavad divAkaraH
6097032a tatas tu sugrIvavibhISaNAdayaH; suhRdvizeSAH sahalakSmaNAs tadA
6097032c sametya hRSTA vijayena rAghavaM; raNe 'bhirAmaM vidhinAbhyapUjayan
6097033a sa tu nihataripuH sthirapratijJaH; svajanabalAbhivRto raNe rarAja
6097033c raghukulanRpanandano mahaujAs; tridazagaNair abhisaMvRto yathendraH
6098001a rAvaNaM nihataM zrutvA rAghaveNa mahAtmanA
6098001c antaHpurAd viniSpetU rAkSasyaH zokakarzitAH
6098002a vAryamANAH subahuzo vRSTantyaH kSitipAMsuSu
6098002c vimuktakezyo duHkhArtA gAvo vatsahatA yathA
6098003a uttareNa viniSkramya dvAreNa saha rAkSasaiH
6098003c pravizyAyodhanaM ghoraM vicinvantyo hataM patim
6098004a Aryaputreti vAdinyo hA nAtheti ca sarvazaH
6098004c paripetuH kabandhAGkAM mahIM zoNitakardamAm
6098005a tA bASpaparipUrNAkSyo bhartRzokaparAjitAH
6098005c kareNva iva nardantyo vinedur hatayUthapAH
6098006a dadRzus tA mahAkAyaM mahAvIryaM mahAdyutim
6098006c rAvaNaM nihataM bhUmau nIlAJjanacayopamam
6098007a tAH patiM sahasA dRSTvA zayAnaM raNapAMsuSu
6098007c nipetus tasya gAtreSu chinnA vanalatA iva
6098008a bahumAnAt pariSvajya kA cid enaM ruroda ha
6098008c caraNau kA cid AliGgya kA cit kaNThe 'valambya ca
6098009a uddhRtya ca bhujau kA cid bhUmau sma parivartate
6098009c hatasya vadanaM dRSTvA kA cin moham upAgamat
6098010a kA cid aGke ziraH kRtvA ruroda mukham IkSatI
6098010c snApayantI mukhaM bASpais tuSArair iva paGkajam
6098011a evam ArtAH patiM dRSTvA rAvaNaM nihataM bhuvi
6098011c cukruzur bahudhA zokAd bhUyas tAH paryadevayan
6098012a yena vitrAsitaH zakro yena vitrAsito yamaH
6098012c yena vaizravaNo rAjA puSpakeNa viyojitaH
6098013a gandharvANAm RSINAM ca surANAM ca mahAtmanAm
6098013c bhayaM yena mahad dattaM so 'yaM zete raNe hataH
6098014a asurebhyaH surebhyo vA pannagebhyo 'pi vA tathA
6098014c na bhayaM yo vijAnAti tasyedaM mAnuSAd bhayam
6098015a avadhyo devatAnAM yas tathA dAnavarakSasAm
6098015c hataH so 'yaM raNe zete mAnuSeNa padAtinA
6098016a yo na zakyaH surair hantuM na yakSair nAsurais tathA
6098016c so 'yaM kaz cid ivAsattvo mRtyuM martyena lambhitaH
6098017a evaM vadantyo bahudhA rurudus tasya tAH striyaH
6098017c bhUya eva ca duHkhArtA vilepuz ca punaH punaH
6098018a azRNvatA tu suhRdAM satataM hitavAdinAm
6098018c etAH samam idAnIM te vayam AtmA ca pAtitAH
6098019a bruvANo 'pi hitaM vAkyam iSTo bhrAtA vibhISaNaH
6098019c dhRSTaM paruSito mohAt tvayAtmavadhakAGkSiNA
6098020a yadi niryAtitA te syAt sItA rAmAya maithilI
6098020c na naH syAd vyasanaM ghoram idaM mUlaharaM mahat
6098021a vRttakAmo bhaved bhrAtA rAmo mitrakulaM bhavet
6098021c vayaM cAvidhavAH sarvAH sakAmA na ca zatravaH
6098022a tvayA punar nRzaMsena sItAM saMrundhatA balAt
6098022c rAkSasA vayam AtmA ca trayaM tulaM nipAtitam
6098023a na kAmakAraH kAmaM vA tava rAkSasapuMgava
6098023c daivaM ceSTayate sarvaM hataM daivena hanyate
6098024a vAnarANAM vinAzo 'yaM rAkSasAnAM ca te raNe
6098024c tava caiva mahAbAho daivayogAd upAgataH
6098025a naivArthena na kAmena vikrameNa na cAjJayA
6098025c zakyA daivagatir loke nivartayitum udyatA
6098026a vilepur evaM dInAs tA rAkSasAdhipayoSitaH
6098026c kurarya iva duHkhArtA bASpaparyAkulekSaNAH
6099001a tAsAM vilapamAnAnAM tathA rAkSasayoSitAm
6099001c jyeSThA patnI priyA dInA bhartAraM samudaikSata
6099002a dazagrIvaM hataM dRSTvA rAmeNAcintyakarmaNA
6099002c patiM mandodarI tatra kRpaNA paryadevayat
6099003a nanu nAma mahAbAho tava vaizravaNAnuja
6099003c kruddhasya pramukhe sthAtuM trasyaty api puraMdaraH
6099004a RSayaz ca mahIdevA gandharvAz ca yazasvinaH
6099004c nanu nAma tavodvegAc cAraNAz ca dizo gatAH
6099005a sa tvaM mAnuSamAtreNa rAmeNa yudhi nirjitaH
6099005c na vyapatrapase rAjan kim idaM rAkSasarSabha
6099006a kathaM trailokyam Akramya zriyA vIryeNa cAnvitam
6099006c aviSahyaM jaghAna tvAM mAnuSo vanagocaraH
6099007a mAnuSANAm aviSaye carataH kAmarUpiNaH
6099007c vinAzas tava rAmeNa saMyuge nopapadyate
6099008a na caitat karma rAmasya zraddadhAmi camUmukhe
6099008c sarvataH samupetasya tava tenAbhimarzanam
6099009a indriyANi purA jitvA jitaM tribhuvaNaM tvayA
6099009c smaradbhir iva tad vairam indriyair eva nirjitaH
6099010a atha vA rAmarUpeNa vAsavaH svayam AgataH
6099010c mAyAM tava vinAzAya vidhAyApratitarkitAm
6099011a yadaiva hi janasthAne rAkSasair bahubhir vRtaH
6099011c kharas tava hato bhrAtA tadaivAsau na mAnuSaH
6099012a yadaiva nagarIM laGkAM duSpraveSAM surair api
6099012c praviSTo hanumAn vIryAt tadaiva vyathitA vayam
6099013a kriyatAm avirodhaz ca rAghaveNeti yan mayA
6099013c ucyamAno na gRhNAsi tasyeyaM vyuSTir AgatA
6099014a akasmAc cAbhikAmo 'si sItAM rAkSasapuMgava
6099014c aizvaryasya vinAzAya dehasya svajanasya ca
6099015a arundhatyA viziSTAM tAM rohiNyAz cApi durmate
6099015c sItAM dharSayatA mAnyAM tvayA hy asadRzaM kRtam
6099016a na kulena na rUpeNa na dAkSiNyena maithilI
6099016c mayAdhikA vA tulyA vA tvaM tu mohAn na budhyase
6099017a sarvathA sarvabhUtAnAM nAsti mRtyur alakSaNaH
6099017c tava tAvad ayaM mRtyur maithilIkRtalakSaNaH
6099018a maithilI saha rAmeNa vizokA vihariSyati
6099018c alpapuNyA tv ahaM ghore patitA zokasAgare
6099019a kailAse mandare merau tathA caitrarathe vane
6099019c devodyAneSu sarveSu vihRtya sahitA tvayA
6099020a vimAnenAnurUpeNa yA yAmy atulayA zriyA
6099020c pazyantI vividhAn dezAMs tAMs tAMz citrasragambarA
6099020e bhraMzitA kAmabhogebhyaH sAsmi vIravadhAt tava
6099021a satyavAk sa mahAbhAgo devaro me yad abravIt
6099021c ayaM rAkSasamukhyAnAM vinAzaH paryupasthitaH
6099022a kAmakrodhasamutthena vyasanena prasaGginA
6099022c tvayA kRtam idaM sarvam anAthaM rakSasAM kulam
6099023a na hi tvaM zocitavyo me prakhyAtabalapauruSaH
6099023c strIsvabhAvAt tu me buddhiH kAruNye parivartate
6099024a sukRtaM duSkRtaM ca tvaM gRhItvA svAM gatiM gataH
6099024c AtmAnam anuzocAmi tvadviyogena duHkhitAm
6099025a nIlajImUtasaMkAzaH pItAmbarazubhAGgadaH
6099025c sarvagAtrANi vikSipya kiM zeSe rudhirAplutaH
6099025e prasupta iva zokArtAM kiM mAM na pratibhASase
6099026a mahAvIryasya dakSasya saMyugeSv apalAyinaH
6099026c yAtudhAnasya dauhitrIM kiM tvaM mAM nAbhyudIkSase
6099027a yena sUdayase zatrUn samare sUryavarcasA
6099027c vajro vajradharasyeva so 'yaM te satatArcitaH
6099028a raNe zatrupraharaNo hemajAlapariSkRtaH
6099028c parigho vyavakIrNas te bANaiz chinnaH sahasradhA
6099029a dhig astu hRdayaM yasyA mamedaM na sahasradhA
6099029c tvayi paJcatvam Apanne phalate zokapIDitam
6099030a etasminn antare rAmo vibhISaNam uvAca ha
6099030c saMskAraH kriyatAM bhrAtuH striyaz caitA nivartaya
6099031a taM prazritas tato rAmaM zrutavAkyo vibhISaNaH
6099031c vimRzya buddhyA dharmajJo dharmArthasahitaM vacaH
6099031e rAmasyaivAnuvRttyartham uttaraM pratyabhASata
6099032a tyaktadharmavrataM krUraM nRzaMsam anRtaM tathA
6099032c nAham arho 'smi saMskartuM paradArAbhimarzakam
6099033a bhrAtRrUpo hi me zatrur eSa sarvAhite rataH
6099033c rAvaNo nArhate pUjAM pUjyo 'pi gurugauravAt
6099034a nRzaMsa iti mAM rAma vakSyanti manujA bhuvi
6099034c zrutvA tasya guNAn sarve vakSyanti sukRtaM punaH
6099035a tac chrutvA paramaprIto rAmo dharmabhRtAM varaH
6099035c vibhISaNam uvAcedaM vAkyajJo vAkyakovidam
6099036a tavApi me priyaM kAryaM tvatprabhavAc ca me jitam
6099036c avazyaM tu kSamaM vAcyo mayA tvaM rAkSasezvara
6099037a adharmAnRtasaMyuktaH kAmam eSa nizAcaraH
6099037c tejasvI balavAJ zUraH saMgrAmeSu ca nityazaH
6099038a zatakratumukhair devaiH zrUyate na parAjitaH
6099038c mahAtmA balasaMpanno rAvaNo lokarAvaNaH
6099039a maraNAntAni vairANi nirvRttaM naH prayojanam
6099039c kriyatAm asya saMskAro mamApy eSa yathA tava
6099040a tvatsakAzAn mahAbAho saMskAraM vidhipUrvakam
6099040c kSipram arhati dharmajJa tvaM yazobhAg bhaviSyasi
6099041a rAghavasya vacaH zrutvA tvaramANo vibhISaNaH
6099041c saMskAreNAnurUpeNa yojayAm Asa rAvaNam
6099042a sa dadau pAvakaM tasya vidhiyuktaM vibhISaNaH
6099042c tAH striyo 'nunayAm Asa sAntvam uktvA punaH punaH
6099043a praviSTAsu ca sarvAsu rAkSasISu vibhISaNaH
6099043c rAmapArzvam upAgamya tadAtiSThad vinItavat
6099044a rAmo 'pi saha sainyena sasugrIvaH salakSmaNaH
6099044c harSaM lebhe ripuM hatvA yathA vRtraM zatakratuH
6100001a te rAvaNavadhaM dRSTvA devagandharvadAnavAH
6100001c jagmus tais tair vimAnaiH svaiH kathayantaH zubhAH kathAH
6100002a rAvaNasya vadhaM ghoraM rAghavasya parAkramam
6100002c suyuddhaM vAnarANAM ca sugrIvasya ca mantritam
6100003a anurAgaM ca vIryaM ca saumitrer lakSmaNasya ca
6100003c kathayanto mahAbhAgA jagmur hRSTA yathAgatam
6100004a rAghavas tu rathaM divyam indradattaM zikhiprabham
6100004c anujJAya mahAbhAgo mAtaliM pratyapUjayat
6100005a rAghaveNAbhyanujJAto mAtaliH zakrasArathiH
6100005c divyaM taM ratham AsthAya divam evAruroha saH
6100006a tasmiMs tu divam ArUDhe surasArathisattame
6100006c rAghavaH paramaprItaH sugrIvaM pariSasvaje
6100007a pariSvajya ca sugrIvaM lakSmaNenAbhivAditaH
6100007c pUjyamAno harizreSThair AjagAma balAlayam
6100008a abravIc ca tadA rAmaH samIpaparivartinam
6100008c saumitriM sattvasaMpannaM lakSmaNaM dIptatejasaM
6100009a vibhISaNam imaM saumya laGkAyAm abhiSecaya
6100009c anuraktaM ca bhaktaM ca mama caivopakAriNam
6100010a eSa me paramaH kAmo yad imaM rAvaNAnujam
6100010c laGkAyAM saumya pazyeyam abhiSiktaM vibhISaNam
6100011a evam uktas tu saumitrI rAghaveNa mahAtmanA
6100011c tathety uktvA tu saMhRSTaH sauvarNaM ghaTam Adade
6100012a ghaTena tena saumitrir abhyaSiJcad vibhISaNam
6100012c laGkAyAM rakSasAM madhye rAjAnaM rAmazAsanAt
6100013a abhyaSiJcat sa dharmAtmA zuddhAtmAnaM vibhISaNam
6100013c tasyAmAtyA jahRSire bhaktA ye cAsya rAkSasAH
6100014a dRSTvAbhiSiktaM laGkAyAM rAkSasendraM vibhISaNam
6100014c rAghavaH paramAM prItiM jagAma sahalakSmaNaH
6100015a sa tad rAjyaM mahat prApya rAmadattaM vibhISaNaH
6100015c prakRtIH sAntvayitvA ca tato rAmam upAgamat
6100016a akSatAn modakA&l lAjAn divyAH sumanasas tathA
6100016c Ajahrur atha saMhRSTAH paurAs tasmai nizAcarAH
6100017a sa tAn gRhItvA durdharSo rAghavAya nyavedayat
6100017c maGgalyaM maGgalaM sarvaM lakSmaNAya ca vIryavAn
6100018a kRtakAryaM samRddhArthaM dRSTvA rAmo vibhISaNam
6100018c pratijagrAha tat sarvaM tasyaiva priyakAmyayA
6100019a tataH zailopamaM vIraM prAJjaliM pArzvataH sthitam
6100019c abravId rAghavo vAkyaM hanUmantaM plavaMgamam
6100020a anumAnya mahArAjam imaM saumya vibhISaNam
6100020c pravizya rAvaNagRhaM vinayenopasRtya ca
6100021a vaidehyA mAM kuzalinaM sasugrIvaM salakSmaNam
6100021c AcakSva jayatAM zreSTha rAvaNaM ca mayA hatam
6100022a priyam etad udAhRtya maithilyAs tvaM harIzvara
6100022c pratigRhya ca saMdezam upAvartitum arhasi
6101001a iti pratisamAdiSTo hanUmAn mArutAtmajaH
6101001c praviveza purIM laGkAM pUjyamAno nizAcaraiH
6101002a pravizya tu mahAtejA rAvaNasya nivezanam
6101002c dadarza zazinA hInAM sAtaGkAm iva rohiNIm
6101003a nibhRtaH praNataH prahvaH so 'bhigamyAbhivAdya ca
6101003c rAmasya vacanaM sarvam AkhyAtum upacakrame
6101004a vaidehi kuzalI rAmaH sasugrIvaH salakSmaNaH
6101004c kuzalaM cAha siddhArtho hatazatrur ariMdamaH
6101005a vibhISaNasahAyena rAmeNa haribhiH saha
6101005c nihato rAvaNo devi lakSmaNasya nayena ca
6101006a pRSTvA ca kuzalaM rAmo vIras tvAM raghunandanaH
6101006c abravIt paramaprItaH kRtArthenAntarAtmanA
6101007a priyam AkhyAmi te devi tvAM tu bhUyaH sabhAjaye
6101007c diSTyA jIvasi dharmajJe jayena mama saMyuge
6101008a labdho no vijayaH sIte svasthA bhava gatavyathA
6101008c rAvaNaH sa hataH zatrur laGkA ceyaM vaze sthitA
6101009a mayA hy alabdhanidreNa dhRtena tava nirjaye
6101009c pratijJaiSA vinistIrNA baddhvA setuM mahodadhau
6101010a saMbhramaz ca na kartavyo vartantyA rAvaNAlaye
6101010c vibhISaNavidheyaM hi laGkaizvaryam idaM kRtam
6101011a tad Azvasihi vizvastA svagRhe parivartase
6101011c ayaM cAbhyeti saMhRSTas tvaddarzanasamutsukaH
6101012a evam uktA samutpatya sItA zazinibhAnanA
6101012c praharSeNAvaruddhA sA vyAjahAra na kiM cana
6101013a abravIc ca harizreSThaH sItAm apratijalpatIm
6101013c kiM tvaM cintayase devi kiM ca mAM nAbhibhASase
6101014a evam uktA hanumatA sItA dharme vyavasthitA
6101014c abravIt paramaprItA harSagadgadayA girA
6101015a priyam etad upazrutya bhartur vijayasaMzritam
6101015c praharSavazam ApannA nirvAkyAsmi kSaNAntaram
6101016a na hi pazyAmi sadRzaM cintayantI plavaMgama
6101016c matpriyAkhyAnakasyeha tava pratyabhinandanam
6101017a na ca pazyAmi tat saumya pRthivyAm api vAnara
6101017c sadRzaM matpriyAkhyAne tava dAtuM bhavet samam
6101018a hiraNyaM vA suvarNaM vA ratnAni vividhAni ca
6101018c rAjyaM vA triSu lokeSu naitad arhati bhASitum
6101019a evam uktas tu vaidehyA pratyuvAca plavaMgamaH
6101019c pragRhItAJjalir vAkyaM sItAyAH pramukhe sthitaH
6101020a bhartuH priyahite yukte bhartur vijayakAGkSiNi
6101020c snigdham evaMvidhaM vAkyaM tvam evArhasi bhASitum
6101021a tavaitad vacanaM saumye sAravat snigdham eva ca
6101021c ratnaughAd vividhAc cApi devarAjyAd viziSyate
6101022a arthataz ca mayA prAptA devarAjyAdayo guNAH
6101022c hatazatruM vijayinaM rAmaM pazyAmi yat sthitam
6101023a imAs tu khalu rAkSasyo yadi tvam anumanyase
6101023c hantum icchAmy ahaM sarvA yAbhis tvaM tarjitA purA
6101024a klizyantIM patidevAM tvAm azokavanikAM gatAm
6101024c ghorarUpasamAcArAH krUrAH krUratarekSaNAH
6101025a rAkSasyo dAruNakathA varam etaM prayaccha me
6101025c icchAmi vividhair ghAtair hantum etAH sudAruNAH
6101026a muSTibhiH pANibhiz caiva caraNaiz caiva zobhane
6101026c ghorair jAnuprahAraiz ca dazanAnAM ca pAtanaiH
6101027a bhakSaNaiH karNanAsAnAM kezAnAM luJcanais tathA
6101027c bhRzaM zuSkamukhIbhiz ca dAruNair laGghanair hataiH
6101028a evaMprakArair bahubhir viprakArair yazasvini
6101028c hantum icchAmy ahaM devi tavemAH kRtakilbiSAH
6101029a evam uktA mahumatA vaidehI janakAtmajA
6101029c uvAca dharmasahitaM hanUmantaM yazasvinI
6101030a rAjasaMzrayavazyAnAM kurvatInAM parAjJayA
6101030c vidheyAnAM ca dAsInAM kaH kupyed vAnarottama
6101031a bhAgyavaiSamyayogena purA duzcaritena ca
6101031c mayaitat prApyate sarvaM svakRtaM hy upabhujyate
6101032a prAptavyaM tu dazAyogAn mayaitad iti nizcitam
6101032c dAsInAM rAvaNasyAhaM marSayAmIha durbalA
6101033a AjJaptA rAvaNenaitA rAkSasyo mAm atarjayan
6101033c hate tasmin na kuryur hi tarjanaM vAnarottama
6101034a ayaM vyAghrasamIpe tu purANo dharmasaMhitaH
6101034c RkSeNa gItaH zloko me taM nibodha plavaMgama
6101035a na paraH pApam Adatte pareSAM pApakarmaNAm
6101035c samayo rakSitavyas tu santaz cAritrabhUSaNAH
6101036a pApAnAM vA zubhAnAM vA vadhArhANAM plavaMgama
6101036c kAryaM kAruNyam AryeNa na kaz cin nAparAdhyati
6101037a lokahiMsAvihArANAM rakSasAM kAmarUpiNam
6101037c kurvatAm api pApAni naiva kAryam azobhanam
6101038a evam uktas tu hanumAn sItayA vAkyakovidaH
6101038c pratyuvAca tataH sItAM rAmapatnIM yazasvinIm
6101039a yuktA rAmasya bhavatI dharmapatnI yazasvinI
6101039c pratisaMdiza mAM devi gamiSye yatra rAghavaH
6101040a evam uktA hanumatA vaidehI janakAtmajA
6101040c abravId draSTum icchAmi bhartAraM vAnarottama
6101041a tasyAs tad vacanaM zrutvA hanumAn pavanAtmajaH
6101041c harSayan maithilIM vAkyam uvAcedaM mahAdyutiH
6101042a pUrNacandrAnanaM rAmaM drakSyasy Arye salakSmaNam
6101042c sthiramitraM hatAmitraM zacIva tridazezvaram
6101043a tAm evam uktvA rAjantIM sItAM sAkSAd iva zriyam
6101043c AjagAma mahAvego hanUmAn yatra rAghavaH
6102001a sa uvAca mahAprajJam abhigamya plavaMgamaH
6102001c rAmaM vacanam arthajJo varaM sarvadhanuSmatAm
6102002a yannimitto 'yam ArambhaH karmaNAM ca phalodayaH
6102002c tAM devIM zokasaMtaptAM maithilIM draSTum arhasi
6102003a sA hi zokasamAviSTA bASpaparyAkulekSaNA
6102003c maithilI vijayaM zrutvA tava harSam upAgamat
6102004a pUrvakAt pratyayAc cAham ukto vizvastayA tayA
6102004c bhartAraM draSTum icchAmi kRtArthaM sahalakSmaNam
6102005a evam ukto hanumatA rAmo dharmabhRtAM varaH
6102005c agacchat sahasA dhyAnam AsId bASpapariplutaH
6102006a dIrgham uSNaM ca nizvasya medinIm avalokayan
6102006c uvAca meghasaMkAzaM vibhISaNam upasthitam
6102007a divyAGgarAgAM vaidehIM divyAbharaNabhUSitAm
6102007c iha sItAM ziraHsnAtAm upasthApaya mAciram
6102008a evam uktas tu rAmeNa tvaramANo vibhISaNaH
6102008c pravizyAntaHpuraM sItAM strIbhiH svAbhir acodayat
6102009a divyAGgarAgA vaidehI divyAbharaNabhUSitA
6102009c yAnam Aroha bhadraM te bhartA tvAM draSTum icchati
6102010a evam uktA tu vaidehI pratyuvAca vibhISaNam
6102010c asnAtA draSTum icchAmi bhartAraM rAkSasAdhipa
6102011a tasyAs tad vacanaM zrutvA pratyuvAca vibhISaNaH
6102011c yathAha rAmo bhartA te tat tathA kartum arhasi
6102012a tasya tad vacanaM zrutvA maithilI bhartRdevatA
6102012c bhartRbhaktivratA sAdhvI tatheti pratyabhASata
6102013a tataH sItAM ziraHsnAtAM yuvatIbhir alaMkRtAm
6102013c mahArhAbharaNopetAM mahArhAmbaradhAriNIm
6102014a Aropya zibikAM dIptAM parArdhyAmbarasaMvRtAm
6102014c rakSobhir bahubhir guptAm AjahAra vibhISaNaH
6102015a so 'bhigamya mahAtmAnaM jJAtvAbhidhyAnam Asthitam
6102015c praNataz ca prahRSTaz ca prAptAM sItAM nyavedayat
6102016a tAm AgatAm upazrutya rakSogRhaciroSitAm
6102016c harSo dainyaM ca roSaz ca trayaM rAghavam Avizat
6102017a tataH pArzvagataM dRSTvA savimarzaM vicArayan
6102017c vibhISaNam idaM vAkyam ahRSTo rAghavo 'bravIt
6102018a rAkSasAdhipate saumya nityaM madvijaye rata
6102018c vaidehI saMnikarSaM me zIghraM samupagacchatu
6102019a sa tad vacanam AjJAya rAghavasya vibhISaNaH
6102019c tUrNam utsAraNe yatnaM kArayAm Asa sarvataH
6102020a kaJcukoSNISiNas tatra vetrajharjharapANayaH
6102020c utsArayantaH puruSAH samantAt paricakramuH
6102021a RkSANAM vAnarANAM ca rAkSasAnAM ca sarvataH
6102021c vRndAny utsAryamANAni dUram utsasRjus tataH
6102022a teSAm utsAryamANAnAM sarveSAM dhvanir utthitaH
6102022c vAyunodvartamAnasya sAgarasyeva nisvanaH
6102023a utsAryamANAMs tAn dRSTvA samantAj jAtasaMbhramAn
6102023c dAkSiNyAt tadamarSAc ca vArayAm Asa rAghavaH
6102024a saMrabdhaz cAbravId rAmaz cakSuSA pradahann iva
6102024c vibhISaNaM mahAprAjJaM sopAlambham idaM vacaH
6102025a kimarthaM mAm anAdRtya kRzyate 'yaM tvayA janaH
6102025c nivartayainam udyogaM jano 'yaM svajano mama
6102026a na gRhANi na vastrANi na prAkArAs tiraskriyAH
6102026c nedRzA rAjasatkArA vRttam AvaraNaM striyaH
6102027a vyasaneSu na kRcchreSu na yuddhe na svayaMvare
6102027c na kratau no vivAhe ca darzanaM duSyate striyaH
6102028a saiSA yuddhagatA caiva kRcchre mahati ca sthitA
6102028c darzane 'syA na doSaH syAn matsamIpe vizeSataH
6102029a tad Anaya samIpaM me zIghram enAM vibhISaNa
6102029c sItA pazyatu mAm eSA suhRdgaNavRtaM sthitam
6102030a evam uktas tu rAmeNa savimarzo vibhISaNaH
6102030c rAmasyopAnayat sItAM saMnikarSaM vinItavat
6102031a tato lakSmaNasugrIvau hanUmAMz ca plavaMgamaH
6102031c nizamya vAkyaM rAmasya babhUvur vyathitA bhRzam
6102032a kalatranirapekSaiz ca iGgitair asya dAruNaiH
6102032c aprItam iva sItAyAM tarkayanti sma rAghavam
6102033a lajjayA tv avalIyantI sveSu gAtreSu maithilI
6102033c vibhISaNenAnugatA bhartAraM sAbhyavartata
6102034a sA vastrasaMruddhamukhI lajjayA janasaMsadi
6102034c rurodAsAdya bhartAram Aryaputreti bhASiNI
6102035a vismayAc ca praharSAc ca snehAc ca paridevatA
6102035c udaikSata mukhaM bhartuH saumyaM saumyatarAnanA
6102036a atha samapanudan manaHklamaM sA; suciram adRSTam udIkSya vai priyasya
6102036c vadanam uditapUrNacandrakAntaM; vimalazazAGkanibhAnanA tadAsIt
6103001a tAM tu pArzve sthitAM prahvAM rAmaH saMprekSya maithilIm
6103001c hRdayAntargatakrodho vyAhartum upacakrame
6103002a eSAsi nirjitA bhadre zatruM jitvA mayA raNe
6103002c pauruSAd yad anuSTheyaM tad etad upapAditam
6103003a gato 'smy antam amarSasya dharSaNA saMpramArjitA
6103003c avamAnaz ca zatruz ca mayA yugapad uddhRtau
6103004a adya me pauruSaM dRSTam adya me saphalaH zramaH
6103004c adya tIrNapratijJatvAt prabhavAmIha cAtmanaH
6103005a yA tvaM virahitA nItA calacittena rakSasA
6103005c daivasaMpAdito doSo mAnuSeNa mayA jitaH
6103006a saMprAptam avamAnaM yas tejasA na pramArjati
6103006c kas tasya puruSArtho 'sti puruSasyAlpatejasaH
6103007a laGghanaM ca samudrasya laGkAyAz cAvamardanam
6103007c saphalaM tasya tac chlAghyam adya karma hanUmataH
6103008a yuddhe vikramataz caiva hitaM mantrayataz ca me
6103008c sugrIvasya sasainyasya saphalo 'dya parizramaH
6103009a nirguNaM bhrAtaraM tyaktvA yo mAM svayam upasthitaH
6103009c vibhISaNasya bhaktasya saphalo 'dya parizramaH
6103010a ity evaM bruvatas tasya sItA rAmasya tad vacaH
6103010c mRgIvotphullanayanA babhUvAzrupariplutA
6103011a pazyatas tAM tu rAmasya bhUyaH krodho 'bhyavartata
6103011c prabhUtAjyAvasiktasya pAvakasyeva dIpyataH
6103012a sa baddhvA bhrukuTiM vaktre tiryakprekSitalocanaH
6103012c abravIt paruSaM sItAM madhye vAnararakSasAm
6103013a yat kartavyaM manuSyeNa dharSaNAM parimArjatA
6103013c tat kRtaM sakalaM sIte zatruhastAd amarSaNAt
6103014a nirjitA jIvalokasya tapasA bhAvitAtmanA
6103014c agastyena durAdharSA muninA dakSiNeva dik
6103015a viditaz cAstu bhadraM te yo 'yaM raNaparizramaH
6103015c sa tIrNaH suhRdAM vIryAn na tvadarthaM mayA kRtaH
6103016a rakSatA tu mayA vRttam apavAdaM ca sarvazaH
6103016c prakhyAtasyAtmavaMzasya nyaGgaM ca parimArjatA
6103017a prAptacAritrasaMdehA mama pratimukhe sthitA
6103017c dIpo netrAturasyeva pratikUlAsi me dRDham
6103018a tad gaccha hy abhyanujJAtA yateSTaM janakAtmaje
6103018c etA daza dizo bhadre kAryam asti na me tvayA
6103019a kaH pumAn hi kule jAtaH striyaM paragRhoSitAm
6103019c tejasvi punar AdadyAt suhRllekhena cetasA
6103020a rAvaNAGkaparibhraSTAM dRSTAM duSTena cakSuSA
6103020c kathaM tvAM punarAdadyAM kulaM vyapadizan mahat
6103021a tadarthaM nirjitA me tvaM yazaH pratyAhRtaM mayA
6103021c nAsti me tvayy abhiSvaGgo yatheSTaM gamyatAm itaH
6103022a iti pravyAhRtaM bhadre mayaitat kRtabuddhinA
6103022c lakSmaNe bharate vA tvaM kuru buddhiM yathAsukham
6103023a sugrIve vAnarendre vA rAkSasendre vibhISaNe
6103023c nivezaya manaH sIte yathA vA sukham AtmanaH
6103024a na hi tvAM rAvaNo dRSTvA divyarUpAM manoramAm
6103024c marSayate ciraM sIte svagRhe parivartinIm
6103025a tataH priyArhazvaraNA tad apriyaM; priyAd upazrutya cirasya maithilI
6103025c mumoca bASpaM subhRzaM pravepitA; gajendrahastAbhihateva vallarI
6104001a evam uktA tu vaidehI paruSaM lomaharSaNam
6104001c rAghaveNa saroSeNa bhRzaM pravyathitAbhavat
6104002a sA tad azrutapUrvaM hi jane mahati maithilI
6104002c zrutvA bhartRvaco rUkSaM lajjayA vrIDitAbhavat
6104003a pravizantIva gAtrANi svAny eva janakAtmajA
6104003c vAkzalyais taiH sazalyeva bhRzam azrUNy avartayat
6104004a tato bASpaparikliSTaM pramArjantI svam Ananam
6104004c zanair gadgadayA vAcA bhartAram idam abravIt
6104005a kiM mAm asadRzaM vAkyam IdRzaM zrotradAruNam
6104005c rUkSaM zrAvayase vIra prAkRtaH prAkRtAm iva
6104006a na tathAsmi mahAbAho yathA tvam avagacchasi
6104006c pratyayaM gaccha me svena cAritreNaiva te zape
6104007a pRthak strINAM pracAreNa jAtiM tvaM parizaGkase
6104007c parityajemAM zaGkAM tu yadi te 'haM parIkSitA
6104008a yady ahaM gAtrasaMsparzaM gatAsmi vivazA prabho
6104008c kAmakAro na me tatra daivaM tatrAparAdhyati
6104009a madadhInaM tu yat tan me hRdayaM tvayi vartate
6104009c parAdhIneSu gAtreSu kiM kariSyAmy anIzvarA
6104010a sahasaMvRddhabhAvAc ca saMsargeNa ca mAnada
6104010c yady ahaM te na vijJAtA hatA tenAsmi zAzvatam
6104011a preSitas te yadA vIro hanUmAn avalokakaH
6104011c laGkAsthAhaM tvayA vIra kiM tadA na visarjitA
6104012a pratyakSaM vAnarendrasya tvadvAkyasamanantaram
6104012c tvayA saMtyaktayA vIra tyaktaM syAj jIvitaM mayA
6104013a na vRthA te zramo 'yaM syAt saMzaye nyasya jIvitam
6104013c suhRjjanapariklezo na cAyaM niSphalas tava
6104014a tvayA tu narazArdUla krodham evAnuvartatA
6104014c laghuneva manuSyeNa strItvam eva puraskRtam
6104015a apadezena janakAn notpattir vasudhAtalAt
6104015c mama vRttaM ca vRttajJa bahu te na puraskRtam
6104016a na pramANIkRtaH pANir bAlye bAlena pIDitaH
6104016c mama bhaktiz ca zIlaM ca sarvaM te pRSThataH kRtam
6104017a evaM bruvANA rudatI bASpagadgadabhASiNI
6104017c abravIl lakSmaNaM sItA dInaM dhyAnaparaM sthitam
6104018a citAM me kuru saumitre vyasanasyAsya bheSajam
6104018c mithyApavAdopahatA nAhaM jIvitum utsahe
6104019a aprItasya guNair bhartus tyaktayA janasaMsadi
6104019c yA kSamA me gatir gantuM pravekSye havyavAhanam
6104020a evam uktas tu vaidehyA lakSmaNaH paravIrahA
6104020c amarSavazam Apanno rAghavAnanam aikSata
6104021a sa vijJAya manazchandaM rAmasyAkArasUcitam
6104021c citAM cakAra saumitrir mate rAmasya vIryavAn
6104022a adhomukhaM tato rAmaM zanaiH kRtvA pradakSiNam
6104022c upAsarpata vaidehI dIpyamAnaM hutAzanam
6104023a praNamya devatAbhyaz ca brAhmaNebhyaz ca maithilI
6104023c baddhAJjalipuTA cedam uvAcAgnisamIpataH
6104024a yathA me hRdayaM nityaM nApasarpati rAghavAt
6104024c tathA lokasya sAkSI mAM sarvataH pAtu pAvakaH
6104025a evam uktvA tu vaidehI parikramya hutAzanam
6104025c viveza jvalanaM dIptaM niHsaGgenAntarAtmanA
6104026a janaH sa sumahAMs tatra bAlavRddhasamAkulaH
6104026c dadarza maithilIM tatra pravizantIM hutAzanam
6104027a tasyAm agniM vizantyAM tu hAheti vipulaH svanaH
6104027c rakSasAM vAnarANAM ca saMbabhUvAdbhutopamaH
6105001a tato vaizravaNo rAjA yamaz cAmitrakarzanaH
6105001c sahasrAkSo mahendraz ca varuNaz ca paraMtapaH
6105002a SaDardhanayanaH zrImAn mahAdevo vRSadhvajaH
6105002c kartA sarvasya lokasya brahmA brahmavidAM varaH
6105003a ete sarve samAgamya vimAnaiH sUryasaMnibhaiH
6105003c Agamya nagarIM laGkAm abhijagmuz ca rAghavam
6105004a tataH sahastAbharaNAn pragRhya vipulAn bhujAn
6105004c abruvaMs tridazazreSThAH prAJjaliM rAghavaM sthitam
6105005a kartA sarvasya lokasya zreSTho jJAnavatAM varaH
6105005c upekSase kathaM sItAM patantIM havyavAhane
6105005e kathaM devagaNazreSTham AtmAnaM nAvabudhyase
6105006a RtadhAmA vasuH pUrvaM vasUnAM ca prajApatiH
6105006c tvaM trayANAM hi lokAnAm AdikartA svayaMprabhuH
6105007a rudrANAm aSTamo rudraH sAdhyAnAm api paJcamaH
6105007c azvinau cApi te karNau candrasUryau ca cakSuSI
6105008a ante cAdau ca lokAnAM dRzyase tvaM paraMtapa
6105008c upekSase ca vaidehIM mAnuSaH prAkRto yathA
6105009a ity ukto lokapAlais taiH svAmI lokasya rAghavaH
6105009c abravIt tridazazreSThAn rAmo dharmabhRtAM varaH
6105010a AtmAnaM mAnuSaM manye rAmaM dazarathAtmajam
6105010c yo 'haM yasya yataz cAhaM bhagavAMs tad bravItu me
6105011a iti bruvANaM kAkutsthaM brahmA brahmavidAM varaH
6105011c abravIc chRNu me rAma satyaM satyaparAkrama
6105012a bhavAn nArAyaNo devaH zrImAMz cakrAyudho vibhuH
6105012c ekazRGgo varAhas tvaM bhUtabhavyasapatnajit
6105013a akSaraM brahmasatyaM ca madhye cAnte ca rAghava
6105013c lokAnAM tvaM paro dharmo viSvaksenaz caturbhujaH
6105014a zArGgadhanvA hRSIkezaH puruSaH puruSottamaH
6105014c ajitaH khaDgadhRg viSNuH kRSNaz caiva bRhadbalaH
6105015a senAnIr grAmaNIz ca tvaM buddhiH sattvaM kSamA damaH
6105015c prabhavaz cApyayaz ca tvam upendro madhusUdanaH
6105016a indrakarmA mahendras tvaM padmanAbho raNAntakRt
6105016c zaraNyaM zaraNaM ca tvAm Ahur divyA maharSayaH
6105017a sahasrazRGgo vedAtmA zatajihvo maharSabhaH
6105017c tvaM yajJas tvaM vaSaTkAras tvam oMkAraH paraMtapa
6105018a prabhavaM nidhanaM vA te na viduH ko bhavAn iti
6105018c dRzyase sarvabhUteSu brAhmaNeSu ca goSu ca
6105019a dikSu sarvAsu gagane parvateSu vaneSu ca
6105019c sahasracaraNaH zrImAJ zatazIrSaH sahasradhRk
6105020a tvaM dhArayasi bhUtAni vasudhAM ca saparvatAm
6105020c ante pRthivyAH salile dRzyase tvaM mahoragaH
6105021a trI&l lokAn dhArayan rAma devagandharvadAnavAn
6105021c ahaM te hRdayaM rAma jihvA devI sarasvatI
6105022a devA gAtreSu lomAni nirmitA brahmaNA prabho
6105022c nimeSas te 'bhavad rAtrir unmeSas te 'bhavad divA
6105023a saMskArAs te 'bhavan vedA na tad asti tvayA vinA
6105023c jagat sarvaM zarIraM te sthairyaM te vasudhAtalam
6105024a agniH kopaH prasAdas te somaH zrIvatsalakSaNa
6105024c tvayA lokAs trayaH krAntAH purANe vikramais tribhiH
6105025a mahendraz ca kRto rAjA baliM baddhvA mahAsuram
6105025c sItA lakSmIr bhavAn viSNur devaH kRSNaH prajApatiH
6105026a vadhArthaM rAvaNasyeha praviSTo mAnuSIM tanum
6105026c tad idaM naH kRtaM kAryaM tvayA dharmabhRtAM vara
6105027a nihato rAvaNo rAma prahRSTo divam Akrama
6105027c amoghaM balavIryaM te amoghas te parAkramaH
6105028a amoghAs te bhaviSyanti bhaktimantaz ca ye narAH
6105028c ye tvAM devaM dhruvaM bhaktAH purANaM puruSottamam
6105029a ye narAH kIrtayiSyanti nAsti teSAM parAbhavaH
6106001a etac chrutvA zubhaM vAkyaM pitAmahasamIritam
6106001c aGkenAdAya vaidehIm utpapAta vibhAvasuH
6106002a taruNAdityasaMkAzAM taptakAJcanabhUSaNAm
6106002c raktAmbaradharAM bAlAM nIlakuJcitamUrdhajAm
6106003a akliSTamAlyAbharaNAM tathA rUpAM manasvinIm
6106003c dadau rAmAya vaidehIm aGke kRtvA vibhAvasuH
6106004a abravIc ca tadA rAmaM sAkSI lokasya pAvakaH
6106004c eSA te rAma vaidehI pApam asyA na vidyate
6106005a naiva vAcA na manasA nAnudhyAnAn na cakSuSA
6106005c suvRttA vRttazauNDIrA na tvAm aticacAra ha
6106006a rAvaNenApanItaiSA vIryotsiktena rakSasA
6106006c tvayA virahitA dInA vivazA nirjanAd vanAt
6106007a ruddhA cAntaHpure guptA tvakcittA tvatparAyaNA
6106007c rakSitA rAkSasI saMghair vikRtair ghoradarzanaiH
6106008a pralobhyamAnA vividhaM bhartsyamAnA ca maithilI
6106008c nAcintayata tad rakSas tvadgatenAntarAtmanA
6106009a vizuddhabhAvAM niSpApAM pratigRhNISva rAghava
6106009c na kiM cid abhidhAtavyam aham AjJApayAmi te
6106010a evam ukto mahAtejA dhRtimAn dRDhavikramaH
6106010c abravIt tridazazreSThaM rAmo dharmabhRtAM varaH
6106011a avazyaM triSu lokeSu sItA pAvanam arhati
6106011c dIrghakAloSitA ceyaM rAvaNAntaHpure zubhA
6106012a bAlizaH khalu kAmAtmA rAmo dazarathAtmajaH
6106012c iti vakSyanti mAM santo jAnakIm avizodhya hi
6106013a ananyahRdayAM bhaktAM maccittaparirakSaNIm
6106013c aham apy avagacchAmi maithilIM janakAtmajAm
6106014a pratyayArthaM tu lokAnAM trayANAM satyasaMzrayaH
6106014c upekSe cApi vaidehIM pravizantIM hutAzanam
6106015a imAm api vizAlAkSIM rakSitAM svena tejasA
6106015c rAvaNo nAtivarteta velAm iva mahodadhiH
6106016a na hi zaktaH sa duSTAtmA manasApi hi maithilIm
6106016c pradharSayitum aprAptAM dIptAm agnizikhAm iva
6106017a neyam arhati caizvaryaM rAvaNAntaHpure zubhA
6106017c ananyA hi mayA sItAM bhAskareNa prabhA yathA
6106018a vizuddhA triSu lokeSu maithilI janakAtmajA
6106018c na hi hAtum iyaM zakyA kIrtir AtmavatA yathA
6106019a avazyaM ca mayA kAryaM sarveSAM vo vaco hitam
6106019c snigdhAnAM lokamAnyAnAm evaM ca bruvatAM hitam
6106020a itIdam uktvA vacanaM mahAbalaiH; prazasyamAnaH svakRtena karmaNA
6106020c sametya rAmaH priyayA mahAbalaH; sukhaM sukhArho 'nubabhUva rAghavaH
6107001a etac chrutvA zubhaM vAkyaM rAghaveNa subhASitam
6107001c idaM zubhataraM vAkyaM vyAjahAra mahezvaraH
6107002a puSkarAkSa mahAbAho mahAvakSaH paraMtapa
6107002c diSTyA kRtam idaM karma tvayA zastrabhRtAM vara
6107003a diSTyA sarvasya lokasya pravRddhaM dAruNaM tamaH
6107003c apAvRttaM tvayA saMkhye rAma rAvaNajaM bhayam
6107004a AzvAsya bharataM dInaM kausalyAM ca yazasvinIm
6107004c kaikeyIM ca sumitrAM ca dRSTvA lakSmaNamAtaram
6107005a prApya rAjyam ayodhyAyAM nandayitvA suhRjjanam
6107005c ikSvAkUNAM kule vaMzaM sthApayitvA mahAbala
6107006a iSTvA turagamedhena prApya cAnuttamaM yazaH
6107006c brAhmaNebhyo dhanaM dattvA tridivaM gantum arhasi
6107007a eSa rAjA vimAnasthaH pitA dazarathas tava
6107007c kAkutstha mAnuSe loke gurus tava mahAyazAH
6107008a indralokaM gataH zrImAMs tvayA putreNa tAritaH
6107008c lakSmaNena saha bhrAtrA tvam enam abhivAdaya
6107009a mahAdevavacaH zrutvA kAkutsthaH sahalakSmaNaH
6107009c vimAnazikharasthasya praNAmam akarot pituH
6107010a dIpyamAnaM svayAM lakSmyA virajo'mbaradhAriNam
6107010c lakSmaNena saha bhrAtrA dadarza pitaraM prabhuH
6107011a harSeNa mahatAviSTo vimAnastho mahIpatiH
6107011c prANaiH priyataraM dRSTvA putraM dazarathas tadA
6107012a AropyAGkaM mahAbAhur varAsanagataH prabhuH
6107012c bAhubhyAM saMpariSvajya tato vAkyaM samAdade
6107013a na me svargo bahumataH saMmAnaz ca surarSibhiH
6107013c tvayA rAma vihInasya satyaM pratizRNomi te
6107014a kaikeyyA yAni coktAni vAkyAni vadatAM vara
6107014c tava pravrAjanArthAni sthitAni hRdaye mama
6107015a tvAM tu dRSTvA kuzalinaM pariSvajya salakSmaNam
6107015c adya duHkhAd vimukto 'smi nIhArAd iva bhAskaraH
6107016a tArito 'haM tvayA putra suputreNa mahAtmanA
6107016c aSTAvakreNa dharmAtmA tArito brAhmaNo yathA
6107017a idAnIM ca vijAnAmi yathA saumya surezvaraiH
6107017c vadhArthaM rAvaNasyeha vihitaM puruSottamam
6107018a siddhArthA khalu kausalyA yA tvAM rAma gRhaM gatam
6107018c vanAn nivRttaM saMhRSTA drakSyate zatrusUdana
6107019a siddhArthAH khalu te rAma narA ye tvAM purIM gatam
6107019c jalArdram abhiSiktaM ca drakSyanti vasudhAdhipam
6107020a anuraktena balinA zucinA dharmacAriNA
6107020c iccheyaM tvAm ahaM draSTuM bharatena samAgatam
6107021a caturdazasamAH saumya vane niryApitAs tvayA
6107021c vasatA sItayA sArdhaM lakSmaNena ca dhImatA
6107022a nivRttavanavAso 'si pratijJA saphalA kRtA
6107022c rAvaNaM ca raNe hatvA devAs te paritoSitAH
6107023a kRtaM karma yazaH zlAghyaM prAptaM te zatrusUdana
6107023c bhrAtRbhiH saha rAjyastho dIrgham Ayur avApnuhi
6107024a iti bruvANaM rAjAnaM rAmaH prAJjalir abravIt
6107024c kuru prasAdaM dharmajJa kaikeyyA bharatasya ca
6107025a saputrAM tvAM tyajAmIti yad uktA kaikayI tvayA
6107025c sa zApaH kaikayIM ghoraH saputrAM na spRzet prabho
6107026a sa tatheti mahArAjo rAmam uktvA kRtAJjalim
6107026c lakSmaNaM ca pariSvajya punar vAkyam uvAca ha
6107027a rAmaM zuzrUSatA bhaktyA vaidehyA saha sItayA
6107027c kRtA mama mahAprItiH prAptaM dharmaphalaM ca te
6107028a dharmaM prApsyasi dharmajJa yazaz ca vipulaM bhuvi
6107028c rAme prasanne svargaM ca mahimAnaM tathaiva ca
6107029a rAmaM zuzrUSa bhadraM te sumitrAnandavardhana
6107029c rAmaH sarvasya lokasya zubheSv abhirataH sadA
6107030a ete sendrAs trayo lokAH siddhAz ca paramarSayaH
6107030c abhigamya mahAtmAnam arcanti puruSottamam
6107031a etat tad uktam avyaktam akSaraM brahmanirmitam
6107031c devAnAM hRdayaM saumya guhyaM rAmaH paraMtapaH
6107032a avAptaM dharmacaraNaM yazaz ca vipulaM tvayA
6107032c rAmaM zuzrUSatA bhaktyA vaidehyA saha sItayA
6107033a sa tathoktvA mahAbAhur lakSmaNaM prAJjaliM sthitam
6107033c uvAca rAjA dharmAtmA vaidehIM vacanaM zubham
6107034a kartavyo na tu vaidehi manyus tyAgam imaM prati
6107034c rAmeNa tvadvizuddhyarthaM kRtam etad dhitaiSiNA
6107035a na tvaM subhru samAdheyA patizuzrUvaNaM prati
6107035c avazyaM tu mayA vAcyam eSa te daivataM param
6107036a iti pratisamAdizya putrau sItAM tathA snuSAm
6107036c indralokaM vimAnena yayau dazaratho jvalan
6108001a pratiprayAte kAkutsthe mahendraH pAkazAsanaH
6108001c abravIt paramaprIto rAghavaM prAJjaliM sthitam
6108002a amoghaM darzanaM rAma tavAsmAkaM paraMtapa
6108002c prItiyukto 'smi tena tvaM brUhi yan manasecchasi
6108003a evam uktas tu kAkutsthaH pratyuvAca kRtAJjaliH
6108003c lakSmaNena saha bhrAtrA sItayA cApi bhAryayA
6108004a yadi prItiH samutpannA mayi sarvasurezvara
6108004c vakSyAmi kuru me satyaM vacanaM vadatAM vara
6108005a mama hetoH parAkrAntA ye gatA yamasAdanam
6108005c te sarve jIvitaM prApya samuttiSThantu vAnarAH
6108006a matpriyeSv abhiraktAz ca na mRtyuM gaNayanti ca
6108006c tvatprasAdAt sameyus te varam etad ahaM vRNe
6108007a nIrujAn nirvraNAMz caiva saMpannabalapauruSAn
6108007c golAGgUlAMs tathaivarkSAn draSTum icchAmi mAnada
6108008a akAle cApi mukhyAni mUlAni ca phalAni ca
6108008c nadyaz ca vimalAs tatra tiSTheyur yatra vAnarAH
6108009a zrutvA tu vacanaM tasya rAghavasya mahAtmanaH
6108009c mahendraH pratyuvAcedaM vacanaM prItilakSaNam
6108010a mahAn ayaM varas tAta tvayokto raghunandana
6108010c samutthAsyanti harayaH suptA nidrAkSaye yathA
6108011a suhRdbhir bAndhavaiz caiva jJAtibhiH svajanena ca
6108011c sarva eva sameSyanti saMyuktAH parayA mudA
6108012a akAle puSpazabalAH phalavantaz ca pAdapAH
6108012c bhaviSyanti maheSvAsa nadyaz ca salilAyutAH
6108013a savraNaiH prathamaM gAtraiH saMvRtair nivraNaiH punaH
6108013c babhUvur vAnarAH sarve kim etad iti vismitaH
6108014a kAkutsthaM paripUrNArthaM dRSTvA sarve surottamAH
6108014c Ucus te prathamaM stutvA stavArhaM sahalakSmaNam
6108015a gacchAyodhyAm ito vIra visarjaya ca vAnarAn
6108015c maithilIM sAntvayasvainAm anuraktAM tapasvinIm
6108016a bhrAtaraM pazya bharataM tvacchokAd vratacAriNam
6108016c abhiSecaya cAtmAnaM paurAn gatvA praharSaya
6108017a evam uktvA tam Amantrya rAmaM saumitriNA saha
6108017c vimAnaiH sUryasaMkAzair hRSTA jagmuH surA divam
6108018a abhivAdya ca kAkutsthaH sarvAMs tAMs tridazottamAn
6108018c lakSmaNena saha bhrAtrA vAsam AjJApayat tadA
6108019a tatas tu sA lakSmaNarAmapAlitA; mahAcamUr hRSTajanA yazasvinI
6108019c zriyA jvalantI virarAja sarvato; nizApraNIteva hi zItarazminA
6109001a tAM rAtrim uSitaM rAmaM sukhotthitam ariMdamam
6109001c abravIt prAJjalir vAkyaM jayaM pRSTvA vibhISaNaH
6109002a snAnAni cAGgarAgANi vastrANy AbharaNAni ca
6109002c candanAni ca divyAni mAlyAni vividhAni ca
6109003a alaMkAravidaz cemA nAryaH padmanibhekSaNAH
6109003c upasthitAs tvAM vidhivat snApayiSyanti rAghava
6109004a evam uktas tu kAkutsthaH pratyuvAca vibhISaNam
6109004c harIn sugrIvamukhyAMs tvaM snAnenopanimantraya
6109005a sa tu tAmyati dharmAtmA mamahetoH sukhocitaH
6109005c sukumAro mahAbAhuH kumAraH satyasaMzravaH
6109006a taM vinA kaikeyIputraM bharataM dharmacAriNam
6109006c na me snAnaM bahumataM vastrANy AbharaNAni ca
6109007a ita eva pathA kSipraM pratigacchAma tAM purIm
6109007c ayodhyAm Ayato hy eSa panthAH paramadurgamaH
6109008a evam uktas tu kAkutsthaM pratyuvAca vibhISaNaH
6109008c ahnA tvAM prApayiSyAmi tAM purIM pArthivAtmaja
6109009a puSpakaM nAma bhadraM te vimAnaM sUryasaMnibham
6109009c mama bhrAtuH kuberasya rAvaNenAhRtaM balAt
6109010a tad idaM meghasaMkAzaM vimAnam iha tiSThati
6109010c tena yAsyasi yAnena tvam ayodhyAM gajajvaraH
6109011a ahaM te yady anugrAhyo yadi smarasi me guNAn
6109011c vasa tAvad iha prAjJa yady asti mayi sauhRdam
6109012a lakSmaNena saha bhrAtrA vaidehyA cApi bhAryayA
6109012c arcitaH sarvakAmais tvaM tato rAma gamiSyasi
6109013a prItiyuktas tu me rAma sasainyaH sasuhRdgaNaH
6109013c satkriyAM vihitAM tAvad gRhANa tvaM mayodyatAm
6109014a praNayAd bahumAnAc ca sauhRdena ca rAghava
6109014c prasAdayAmi preSyo 'haM na khalv AjJApayAmi te
6109015a evam uktas tato rAmaH pratyuvAca vibhISaNam
6109015c rakSasAM vAnarANAM ca sarveSAM copazRNvatAm
6109016a pUjito 'haM tvayA vIra sAcivyena paraMtapa
6109016c sarvAtmanA ca ceSTibhiH sauhRdenottamena ca
6109017a na khalv etan na kuryAM te vacanaM rAkSasezvara
6109017c taM tu me bhrAtaraM draSTuM bharataM tvarate manaH
6109018a mAM nivartayituM yo 'sau citrakUTam upAgataH
6109018c zirasA yAcato yasya vacanaM na kRtaM mayA
6109019a kausalyAM ca sumitrAM ca kaikeyIM ca yazasvinIm
6109019c gurUMz ca suhRdaz caiva paurAMz ca tanayaiH saha
6109020a upasthApaya me kSipraM vimAnaM rAkSasezvara
6109020c kRtakAryasya me vAsaH kathaM cid iha saMmataH
6109021a anujAnIhi mAM saumya pUjito 'smi vibhISaNa
6109021c manyur na khalu kartavyas tvaritas tvAnumAnaye
6109022a tataH kAJcanacitrAGgaM vaidUryamaNivedikam
6109022c kUTAgAraiH parikSiptaM sarvato rajataprabham
6109023a pANDurAbhiH patAkAbhir dhvajaiz ca samalaMkRtam
6109023c zobhitaM kAJcanair harmyair hemapadmavibhUSitam
6109024a prakIrNaM kiGkiNIjAlair muktAmaNigavAkSitam
6109024c ghaNTAjAlaiH parikSiptaM sarvato madhurasvanam
6109025a tan meruzikharAkAraM nirmitaM vizvakarmaNA
6109025c bahubhir bhUSitaM harmyair muktArajatasaMnibhau
6109026a talaiH sphaTikacitrAGgair vaidUryaiz ca varAsanaiH
6109026c mahArhAstaraNopetair upapannaM mahAdhanaiH
6109027a upasthitam anAdhRSyaM tad vimAnaM manojavam
6109027c nivedayitvA rAmAya tasthau tatra vibhISaNaH
6110001a upasthitaM tu taM dRSTvA puSpakaM puSpabhUSitam
6110001c avidUre sthitaM rAmaM pratyuvAca vibhISaNaH
6110002a sa tu baddhAJjaliH prahvo vinIto rAkSasezvaraH
6110002c abravIt tvarayopetaH kiM karomIti rAghavam
6110003a tam abravIn mahAtejA lakSmaNasyopazRNvataH
6110003c vimRzya rAghavo vAkyam idaM snehapuraskRtam
6110004a kRtaprayatnakarmANo vibhISaNa vanaukasaH
6110004c ratnair arthaiz ca vivibhair bhUSaNaiz cAbhipUjaya
6110005a sahaibhir arditA laGkA nirjitA rAkSasezvara
6110005c hRSTaiH prANabhayaM tyaktvA saMgrAmeSv anivartibhiH
6110006a evaM saMmAnitAz ceme mAnArhA mAnada tvayA
6110006c bhaviSyanti kRtajJena nirvRtA hariyUthapAH
6110007a tyAginaM saMgrahItAraM sAnukrozaM yazasvinam
6110007c yatas tvAm avagacchanti tataH saMbodhayAmi te
6110008a evam uktas tu rAmeNa vAnarAMs tAn vibhISaNaH
6110008c ratnArthaiH saMvibhAgena sarvAn evAnvapUjayat
6110009a tatas tAn pUjitAn dRSTvA ratnair arthaiz ca yUthapAn
6110009c Aruroha tato rAmas tad vimAnam anuttamam
6110010a aGkenAdAya vaidehIM lajjamAnAM yazasvinIm
6110010c lakSmaNena saha bhrAtrA vikrAntena dhanuSmatA
6110011a abravIc ca vimAnasthaH kAkutsthaH sarvavAnarAn
6110011c sugrIvaM ca mahAvIryaM rAkSasaM ca vibhISaNam
6110012a mitrakAryaM kRtam idaM bhavadbhir vAnarottamAH
6110012c anujJAtA mayA sarve yatheSTaM pratigacchata
6110013a yat tu kAryaM vayasyena suhRdA vA paraMtapa
6110013c kRtaM sugrIva tat sarvaM bhavatA dharmabhIruNA
6110013e kiSkindhAM pratiyAhy Azu svasainyenAbhisaMvRtaH
6110014a svarAjye vasa laGkAyAM mayA datte vibhISaNa
6110014c na tvAM dharSayituM zaktAH sendrA api divaukasaH
6110015a ayodhyAM pratiyAsyAmi rAjadhAnIM pitur mama
6110015c abhyanujJAtum icchAmi sarvAn AmantrayAmi vaH
6110016a evam uktAs tu rAmeNa vAnarAs te mahAbalAH
6110016c UcuH prAJjalayo rAmaM rAkSasaz ca vibhISaNaH
6110016e ayodhyAM gantum icchAmaH sarvAn nayatu no bhavAn
6110017a dRSTvA tvAm abhiSekArdraM kausalyAm abhivAdya ca
6110017c acireNAgamiSyAmaH svAn gRhAn nRpateH suta
6110018a evam uktas tu dharmAtmA vAnaraiH savibhISaNaiH
6110018c abravId rAghavaH zrImAn sasugrIvavibhISaNAn
6110019a priyAt priyataraM labdhaM yad ahaM sasuhRjjanaH
6110019c sarvair bhavadbhiH sahitaH prItiM lapsye purIM gataH
6110020a kSipram Aroha sugrIva vimAnaM vAnaraiH saha
6110020c tvam adhyAroha sAmAtyo rAkSasendravibhISaNa
6110021a tatas tat puSpakaM divyaM sugrIvaH saha senayA
6110021c adhyArohat tvaraJ zIghraM sAmAtyaz ca vibhISaNaH
6110022a teSv ArUDheSu sarveSu kauberaM paramAsanam
6110022c rAghaveNAbhyanujJAtam utpapAta vihAyasaM
6110023a yayau tena vimAnena haMsayuktena bhAsvatA
6110023c prahRSTaz ca pratItaz ca babhau rAmaH kuberavat
6111001a anujJAtaM tu rAmeNa tad vimAnam anuttamam
6111001c utpapAta mahAmeghaH zvasanenoddhato yathA
6111002a pAtayitvA tataz cakSuH sarvato raghunandanaH
6111002c abravIn maithilIM sItAM rAmaH zazinibhAnanAm
6111003a kailAsazikharAkAre trikUTazikhare sthitAm
6111003c laGkAm IkSasva vaidehi nirmitAM vizvakarmaNA
6111004a etad AyodhanaM pazya mAMsazoNitakardamam
6111004c harINAM rAkSasAnAM ca sIte vizasanaM mahat
6111005a tavahetor vizAlAkSi rAvaNo nihato mayA
6111005c kumbhakarNo 'tra nihataH prahastaz ca nizAcaraH
6111006a lakSmaNenendrajic cAtra rAvaNir nihato raNe
6111006c virUpAkSaz ca duSprekSyo mahApArzvamahodarau
6111007a akampanaz ca nihato balino 'nye ca rAkSasAH
6111007c trizirAz cAtikAyaz ca devAntakanarAntakau
6111008a atra mandodarI nAma bhAryA taM paryadevayat
6111008c sapatnInAM sahasreNa sAsreNa parivAritA
6111009a etat tu dRzyate tIrthaM samudrasya varAnane
6111009c yatra sAgaram uttIrya tAM rAtrim uSitA vayam
6111010a eSa setur mayA baddhaH sAgare salilArNave
6111010c tavahetor vizAlAkSi nalasetuH suduSkaraH
6111011a pazya sAgaram akSobhyaM vaidehi varuNAlayam
6111011c apAram abhigarjantaM zaGkhazuktiniSevitam
6111012a hiraNyanAbhaM zailendraM kAJcanaM pazya maithili
6111012c vizramArthaM hanumato bhittvA sAgaram utthitam
6111013a atra rAkSasarAjo 'yam AjagAma vibhISaNaH
6111014a eSA sA dRzyate sIte kiSkindhA citrakAnanA
6111014c sugrIvasya purI ramyA yatra vAlI mayA hataH
6111015a dRzyate 'sau mahAn sIte savidyud iva toyadaH
6111015c RzyamUko girizreSThaH kAJcanair dhAtubhir vRtaH
6111016a atrAhaM vAnarendreNa sugrIveNa samAgataH
6111016c samayaz ca kRtaH sIte vadhArthaM vAlino mayA
6111017a eSA sA dRzyate pampA nalinI citrakAnanA
6111017c tvayA vihIno yatrAhaM vilalApa suduHkhitaH
6111018a asyAs tIre mayA dRSTA zabarI dharmacAriNI
6111018c atra yojanabAhuz ca kabandho nihato mayA
6111019a dRzyate 'sau janasthAne sIte zrImAn vanaspatiH
6111019c yatra yuddhaM mahad vRttaM tavahetor vilAsini
6111019e rAvaNasya nRzaMsasya jaTAyoz ca mahAtmanaH
6111020a kharaz ca nihataz saMkhye dUSaNaz ca nipAtitaH
6111020c trizirAz ca mahAvIryo mayA bANair ajihmagaiH
6111021a parNazAlA tathA citrA dRzyate zubhadarzanA
6111021c yatra tvaM rAkSasendreNa rAvaNena hRtA balAt
6111022a eSA godAvarI ramyA prasannasalilA zivA
6111022c agastyasyAzramo hy eSa dRzyate pazya maithili
6111023a vaidehi dRzyate cAtra zarabhaGgAzramo mahAn
6111023c upayAtaH sahasrAkSo yatra zakraH puraMdaraH
6111024a ete te tApasAvAsA dRzyante tanumadhyame
6111024c atriH kulapatir yatra sUryavaizvAnaraprabhaH
6111024e atra sIte tvayA dRSTA tApasI dharmacAriNI
6111025a asmin deze mahAkAyo virAdho nihato mayA
6111026a asau sutanuzailendraz citrakUTaH prakAzate
6111026c yatra mAM kaikayIputraH prasAdayitum AgataH
6111027a eSA sA yamunA dUrAd dRzyate citrakAnanA
6111027c bharadvAjAzramo yatra zrImAn eSa prakAzate
6111028a eSA tripathagA gaGgA dRzyate varavarNini
6111028c zRGgaverapuraM caitad guho yatra samAgataH
6111029a eSA sA dRzyate 'yodhyA rAjadhAnI pitur mama
6111029c ayodhyAM kuru vaidehi praNAmaM punar AgatA
6111030a tatas te vAnarAH sarve rAkSasaz ca vibhISaNaH
6111030c utpatyotpatya dadRzus tAM purIM zubhadarzanAm
6111031a tatas tu tAM pANDuraharmyamAlinIM; vizAlakakSyAM gajavAjisaMkulAm
6111031c purIm ayodhyAM dadRzuH plavaMgamAH; purIM mahendrasya yathAmarAvatIm
6112001a pUrNe caturdaze varSe paJcabhyAM lakSmaNAgrajaH
6112001c bharadvAjAzramaM prApya vavande niyato munim
6112002a so 'pRcchad abhivAdyainaM bharadvAjaM tapodhanam
6112002c zRNoSi ka cid bhagavan subhikSAnAmayaM pure
6112002e kaccic ca yukto bharato jIvanty api ca mAtaraH
6112003a evam uktas tu rAmeNa bharadvAjo mahAmuniH
6112003c pratyuvAca raghuzreSThaM smitapUrvaM prahRSTavat
6112004a paGkadigdhas tu bharato jaTilas tvAM pratIkSate
6112004c pAduke te puraskRtya sarvaM ca kuzalaM gRhe
6112005a tvAM purA cIravasanaM pravizantaM mahAvanam
6112005c strItRtIyaM cyutaM rAjyAd dharmakAmaM ca kevalam
6112006a padAtiM tyaktasarvasvaM pitur vacanakAriNam
6112006c svargabhogaiH parityaktaM svargacyutam ivAmaram
6112007a dRSTvA tu karuNA pUrvaM mamAsIt samitiMjaya
6112007c kaikeyIvacane yuktaM vanyamUlaphalAzanam
6112008a sAmprataM susamRddhArthaM samitragaNabAndhavam
6112008c samIkSya vijitAriM tvAM mama prItir anuttamA
6112009a sarvaM ca sukhaduHkhaM te viditaM mama rAghava
6112009c yat tvayA vipulaM prAptaM janasthAnavadhAdikam
6112010a brAhmaNArthe niyuktasya rakSataH sarvatApasAn
6112010c mArIcadarzanaM caiva sItonmathanam eva ca
6112011a kabandhadarzanaM caiva pampAbhigamanaM tathA
6112011c sugrIveNa ca te sakhyaM yac ca vAlI hatas tvayA
6112012a mArgaNaM caiva vaidehyAH karma vAtAtmajasya ca
6112012c viditAyAM ca vaidehyAM nalasetur yathA kRtaH
6112012e yathA ca dIpitA laGkA prahRSTair hariyUthapaiH
6112013a saputrabAndhavAmAtyaH sabalaH saha vAhanaH
6112013c yathA ca nihataH saMkhye rAvaNo devakaNTakaH
6112014a samAgamaz ca tridazair yathAdattaz ca te varaH
6112014c sarvaM mamaitad viditaM tapasA dharmavatsala
6112015a aham apy atra te dadmi varaM zastrabhRtAM vara
6112015c arghyaM pratigRhANedam ayodhyAM zvo gamiSyasi
6112016a tasya tac chirasA vAkyaM pratigRhya nRpAtmajaH
6112016c bADham ity eva saMhRSTaH zrImAn varam ayAcata
6112017a akAlaphalino vRkSAH sarve cApi madhusravAH
6112017c bhavantu mArge bhagavann ayodhyAM prati gacchataH
6112018a niSphalAH phalinaz cAsan vipuSpAH puSpazAlinaH
6112018c zuSkAH samagrapatrAs te nagAz caiva madhusravAH
6113001a ayodhyAM tu samAlokya cintayAm Asa rAghavaH
6113001c cintayitvA tato dRSTiM vAnareSu nyapAtayat
6113002a priyakAmaH priyaM rAmas tatas tvaritavikramam
6113002c uvAca dhImAMs tejasvI hanUmantaM plavaMgamam
6113003a ayodhyAM tvarito gaccha kSipraM tvaM plavagottama
6113003c jAnIhi kaccit kuzalI jano nRpatimandire
6113004a zRGgaverapuraM prApya guhaM gahanagocaram
6113004c niSAdAdhipatiM brUhi kuzalaM vacanAn mama
6113005a zrutvA tu mAM kuzalinam arogaM vigatajvaram
6113005c bhaviSyati guhaH prItaH sa mamAtmasamaH sakhA
6113006a ayodhyAyAz ca te mArgaM pravRttiM bharatasya ca
6113006c nivedayiSyati prIto niSAdAdhipatir guhaH
6113007a bharatas tu tvayA vAcyaH kuzalaM vacanAn mama
6113007c siddhArthaM zaMsa mAM tasmai sabhAryaM sahalakSmaNam
6113008a haraNaM cApi vaidehyA rAvaNena balIyasA
6113008c sugrIveNa ca saMvAdaM vAlinaz ca vadhaM raNe
6113009a maithilyanveSaNaM caiva yathA cAdhigatA tvayA
6113009c laGghayitvA mahAtoyam ApagApatim avyayam
6113010a upayAnaM samudrasya sAgarasya ca darzanam
6113010c yathA ca kAritaH setU rAvaNaz ca yathA hataH
6113011a varadAnaM mahendreNa brahmaNA varuNena ca
6113011c mahAdevaprasAdAc ca pitrA mama samAgamam
6113012a jitvA zatrugaNAn rAmaH prApya cAnuttamaM yazaH
6113012c upayAti samRddhArthaH saha mitrair mahAbalaH
6113013a etac chrutvA yamAkAraM bhajate bharatas tataH
6113013c sa ca te veditavyaH syAt sarvaM yac cApi mAM prati
6113014a jJeyAH sarve ca vRttAntA bharatasyeGgitAni ca
6113014c tattvena mukhavarNena dRSTyA vyAbhASaNena ca
6113015a sarvakAmasamRddhaM hi hastyazvarathasaMkulam
6113015c pitRpaitAmahaM rAjyaM kasya nAvartayen manaH
6113016a saMgatyA bharataH zrImAn rAjyenArthI svayaM bhavet
6113016c prazAstu vasudhAM sarvAm akhilAM raghunandanaH
6113017a tasya buddhiM ca vijJAya vyavasAyaM ca vAnara
6113017c yAvan na dUraM yAtAH smaH kSipram Agantum arhasi
6113018a iti pratisamAdiSTo hanUmAn mArutAtmajaH
6113018c mAnuSaM dhArayan rUpam ayodhyAM tvarito yayau
6113019a laGghayitvA pitRpathaM bhujagendrAlayaM zubham
6113019c gaGgAyamunayor bhImaM saMnipAtam atItya ca
6113020a zRGgaverapuraM prApya guham AsAdya vIryavAn
6113020c sa vAcA zubhayA hRSTo hanUmAn idam abravIt
6113021a sakhA tu tava kAkutstho rAmaH satyaparAkramaH
6113021c sasItaH saha saumitriH sa tvAM kuzalam abravIt
6113022a paJcamIm adya rajanIm uSitvA vacanAn muneH
6113022c bharadvAjAbhyanujJAtaM drakSyasy adyaiva rAghavam
6113023a evam uktvA mahAtejAH saMprahRSTatanUruhaH
6113023c utpapAta mahAvego vegavAn avicArayan
6113024a so 'pazyad rAmatIrthaM ca nadIM vAlukinIM tathA
6113024c gomatIM tAM ca so 'pazyad bhImaM sAlavanaM tathA
6113025a sa gatvA dUram adhvAnaM tvaritaH kapikuJjaraH
6113025c AsasAda drumAn phullAn nandigrAmasamIpajAn
6113026a krozamAtre tv ayodhyAyAz cIrakRSNAjinAmbaram
6113026c dadarza bharataM dInaM kRzam AzramavAsinam
6113027a jaTilaM maladigdhAGgaM bhrAtRvyasanakarzitam
6113027c phalamUlAzinaM dAntaM tApasaM dharmacAriNam
6113028a samunnatajaTAbhAraM valkalAjinavAsasaM
6113028c niyataM bhAvitAtmAnaM brahmarSisamatejasaM
6113029a pAduke te puraskRtya zAsantaM vai vasuMdharAm
6113029c caturvarNyasya lokasya trAtAraM sarvato bhayAt
6113030a upasthitam amAtyaiz ca zucibhiz ca purohitaiH
6113030c balamukhyaiz ca yuktaiz ca kASAyAmbaradhAribhiH
6113031a na hi te rAjaputraM taM cIrakRSNAjinAmbaram
6113031c parimoktuM vyavasyanti paurA vai dharmavatsalAH
6113032a taM dharmam iva dharmajJaM devavantam ivAparam
6113032c uvAca prAJjalir vAkyaM hanUmAn mArutAtmajaH
6113033a vasantaM daNDakAraNye yaM tvaM cIrajaTAdharam
6113033c anuzocasi kAkutsthaM sa tvA kuzalam abravIt
6113034a priyam AkhyAmi te deva zokaM tyakSyasi dAruNam
6113034c asmin muhUrte bhrAtrA tvaM rAmeNa saha saMgataH
6113035a nihatya rAvaNaM rAmaH pratilabhya ca maithilIm
6113035c upayAti samRddhArthaH saha mitrair mahAbalaiH
6113036a lakSmaNaz ca mahAtejA vaidehI ca yazasvinI
6113036c sItA samagrA rAmeNa mahendreNa zacI yathA
6113037a evam ukto hanumatA bharataH kaikayIsutaH
6113037c papAta sahasA hRSTo harSAn mohaM jagAma ha
6113038a tato muhUrtAd utthAya pratyAzvasya ca rAghavaH
6113038c hanUmantam uvAcedaM bharataH priyavAdinam
6113039a azokajaiH prItimayaiH kapim AliGgya saMbhramAt
6113039c siSeca bharataH zrImAn vipulair azrubindubhiH
6113040a devo vA mAnuSo vA tvam anukrozAd ihAgataH
6113040c priyAkhyAnasya te saumya dadAmi bruvataH priyam
6113041a gavAM zatasahasraM ca grAmANAM ca zataM param
6113041c sakuNDalAH zubhAcArA bhAryAH kanyAz ca SoDaza
6113042a hemavarNAH sunAsorUH zazisaumyAnanAH striyaH
6113042c sarvAbharaNasaMpannA saMpannAH kulajAtibhiH
6113043a nizamya rAmAgamanaM nRpAtmajaH; kapipravIrasya tadAdbhutopamam
6113043c praharSito rAmadidRkSayAbhavat; punaz ca harSAd idam abravId vacaH
6114001a bahUni nAma varSANi gatasya sumahad vanam
6114001c zRNomy ahaM prItikaraM mama nAthasya kIrtanam
6114002a kalyANI bata gAtheyaM laukikI pratibhAti me
6114002c eti jIvantam Anando naraM varSazatAd api
6114003a rAghavasya harINAM ca katham AsIt samAgamaH
6114003c kasmin deze kim Azritya tat tvam AkhyAhi pRcchataH
6114004a sa pRSTo rAjaputreNa bRsyAM samupavezitaH
6114004c AcacakSe tataH sarvaM rAmasya caritaM vane
6114005a yathA pravrajito rAmo mAtur datte vare tava
6114005c yathA ca putrazokena rAjA dazaratho mRtaH
6114006a yathA dUtais tvam AnItas tUrNaM rAjagRhAt prabho
6114006c tvayAyodhyAM praviSTena yathA rAjyaM na cepsitam
6114007a citrakUTaM giriM gatvA rAjyenAmitrakarzanaH
6114007c nimantritas tvayA bhrAtA dharmam AcaritA satAm
6114008a sthitena rAjJo vacane yathA rAjyaM visarjitam
6114008c Aryasya pAduke gRhya yathAsi punar AgataH
6114009a sarvam etan mahAbAho yathAvad viditaM tava
6114009c tvayi pratiprayAte tu yad vRttaM tan nibodha me
6114010a apayAte tvayi tadA samudbhrAntamRgadvijam
6114010c pravivezAtha vijanaM sumahad daNDakAvanam
6114011a teSAM purastAd balavAn gacchatAM gahane vane
6114011c vinadan sumahAnAdaM virAdhaH pratyadRzyata
6114012a tam utkSipya mahAnAdam UrdhvabAhum adhomukham
6114012c nikhAte prakSipanti sma nadantam iva kuJjaram
6114013a tat kRtvA duSkaraM karma bhrAtarau rAmalakSmaNau
6114013c sAyAhne zarabhaGgasya ramyam Azramam IyatuH
6114014a zarabhaGge divaM prApte rAmaH satyaparAkramaH
6114014c abhivAdya munIn sarvAJ janasthAnam upAgamat
6114015a caturdazasahasrANi rakSasAM bhImakarmaNAm
6114015c hatAni vasatA tatra rAghaveNa mahAtmanA
6114016a tataH pazcAc chUrpaNakhA rAmapArzvam upAgatA
6114016c tato rAmeNa saMdiSTo lakSmaNaH sahasotthitaH
6114017a pragRhya khaDgaM ciccheda karNanAse mahAbalaH
6114017c tatas tenArditA bAlA rAvaNaM samupAgatA
6114018a rAvaNAnucaro ghoro mArIco nAma rAkSasaH
6114018c lobhayAm Asa vaidehIM bhUtvA ratnamayo mRgaH
6114019a sA rAmam abravId dRSTvA vaidehI gRhyatAm iti
6114019c aho manoharaH kAnta Azrame no bhaviSyati
6114020a tato rAmo dhanuSpANir dhAvantam anudhAvati
6114020c sa taM jaghAna dhAvantaM zareNAnataparvaNA
6114021a atha saumyA dazagrIvo mRgaM yAte tu rAghave
6114021c lakSmaNe cApi niSkrAnte pravivezAzramaM tadA
6114021e jagrAha tarasA sItAM grahaH khe rohiNIm iva
6114022a trAtukAmaM tato yuddhe hatvA gRdhraM jaTAyuSam
6114022c pragRhya sItAM sahasA jagAmAzu sa rAvaNaH
6114023a tatas tv adbhutasaMkAzAH sthitAH parvatamUrdhani
6114023c sItAM gRhItvA gacchantaM vAnarAH parvatopamAH
6114023e dadRzur vismitAs tatra rAvaNaM rAkSasAdhipam
6114024a praviverza tadA laGkAM rAvaNo lokarAvaNaH
6114025a tAM suvarNaparikrAnte zubhe mahati vezmani
6114025c pravezya maithilIM vAkyaiH sAntvayAm Asa rAvaNaH
6114026a nivartamAnaH kAkutstho dRSTvA gRdhraM pravivyathe
6114027a gRdhraM hataM tadA dagdhvA rAmaH priyasakhaM pituH
6114027c godAvarIm anucaran vanoddezAMz ca puSpitAn
6114027e Asedatur mahAraNye kabandhaM nAma rAkSasaM
6114028a tataH kabandhavacanAd rAmaH satyaparAkramaH
6114028c RzyamUkaM giriM gatvA sugrIveNa samAgataH
6114029a tayoH samAgamaH pUrvaM prItyA hArdo vyajAyata
6114029c itaretara saMvAdAt pragADhaH praNayas tayoH
6114030a rAmaH svabAhuvIryeNa svarAjyaM pratyapAdayat
6114030c vAlinaM samare hatvA mahAkAyaM mahAbalam
6114031a sugrIvaH sthApito rAjye sahitaH sarvavAnaraiH
6114031c rAmAya pratijAnIte rAjaputryAs tu mArgaNam
6114032a AdiSTA vAnarendreNa sugrIveNa mahAtmanA
6114032c dazakoTyaH plavaMgAnAM sarvAH prasthApitA dizaH
6114033a teSAM no vipranaSTAnAM vindhye parvatasattame
6114033c bhRzaM zokAbhitaptAnAM mahAn kAlo 'tyavartata
6114034a bhrAtA tu gRdhrarAjasya saMpAtir nAma vIryavAn
6114034c samAkhyAti sma vasatiM sItAyA rAvaNAlaye
6114035a so 'haM duHkhaparItAnAM duHkhaM tajjJAtinAM nudan
6114035c AtmavIryaM samAsthAya yojanAnAM zataM plutaH
6114036a tatrAham ekAm adrAkSam azokavanikAM gatAm
6114036c kauzeyavastrAM malinAM nirAnandAM dRDhavratAm
6114037a tayA sametya vidhivat pRSTvA sarvam aninditAm
6114037c abhijJAnaM maNiM labdhvA caritArtho 'ham AgataH
6114038a mayA ca punar Agamya rAmasyAkliSTakarmaNaH
6114038c abhijJAnaM mayA dattam arciSmAn sa mahAmaNiH
6114039a zrutvA tAM maithilIM hRSTas tv AzazaMse sa jIvitam
6114039c jIvitAntam anuprAptaH pItvAmRtam ivAturaH
6114040a udyojayiSyann udyogaM dadhre laGkAvadhe manaH
6114040c jighAMsur iva lokAMs te sarvA&l lokAn vibhAvasuH
6114041a tataH samudram AsAdya nalaM setum akArayat
6114041c atarat kapivIrANAM vAhinI tena setunA
6114042a prahastam avadhIn nIlaH kumbhakarNaM tu rAghavaH
6114042c lakSmaNo rAvaNasutaM svayaM rAmas tu rAvaNam
6114043a sa zakreNa samAgamya yamena varuNena ca
6114043c surarSibhiz ca kAkutstho varA&l lebhe paraMtapaH
6114044a sa tu dattavaraH prItyA vAnaraiz ca samAgataH
6114044c puSpakeNa vimAnena kiSkindhAm abhyupAgamat
6114045a taM gaGgAM punar AsAdya vasantaM munisaMnidhau
6114045c avighnaM puSyayogena zvo rAmaM draSTum arhasi
6114046a tataH sa satyaM hanumadvaco mahan; nizamya hRSTo bharataH kRtAJjaliH
6114046c uvAca vANIM manasaH praharSiNI; cirasya pUrNaH khalu me manorathaH
6115001a zrutvA tu param AnandaM bharataH satyavikramaH
6115001c hRSTam AjJApayAm Asa zatrughnaM paravIrahA
6115002a daivatAni ca sarvANi caityAni nagarasya ca
6115002c sugandhamAlyair vAditrair arcantu zucayo narAH
6115003a rAjadArAs tathAmAtyAH sainyAH senAgaNAGganAH
6115003c abhiniryAntu rAmasya draSTuM zazinibhaM mukham
6115004a bharatasya vacaH zrutvA zatrughnaH paravIrahA
6115004c viSTIr anekasAhasrIz codayAm Asa vIryavAn
6115005a samIkuruta nimnAni viSamANi samAni ca
6115005c sthAnAni ca nirasyantAM nandigrAmAd itaH param
6115006a siJcantu pRthivIM kRtsnAM himazItena vAriNA
6115006c tato 'bhyavakiraMs tv anye lAjaiH puSpaiz ca sarvataH
6115007a samucchritapatAkAs tu rathyAH puravarottame
6115007c zobhayantu ca vezmAni sUryasyodayanaM prati
6115008a sragdAmamuktapuSpaiz ca sugandhaiH paJcavarNakaiH
6115008c rAjamArgam asaMbAdhaM kirantu zatazo narAH
6115009a mattair nAgasahasraiz ca zAtakumbhavibhUSitaH
6115009c apare hemakakSyAbhiH sagajAbhiH kareNubhiH
6115009e niryayus tvarayA yuktA rathaiz ca sumahArathAH
6115010a tato yAnAny upArUDhAH sarvA dazarathastriyaH
6115010c kausalyAM pramukhe kRtvA sumitrAM cApi niryayuH
6115011a azvAnAM khurazabdena rathanemisvanena ca
6115011c zaGkhadundubhinAdena saMcacAleva medinI
6115012a kRtsnaM ca nagaraM tat tu nandigrAmam upAgamat
6115012c dvijAtimukhyair dharmAtmA zreNImukhyaiH sanaigamaiH
6115013a mAlyamodaka hastaiz ca mantribhir bharato vRtaH
6115013c zaGkhabherIninAdaiz ca bandibhiz cAbhivanditaH
6115014a AryapAdau gRhItvA tu zirasA dharmakovidaH
6115014c pANDuraM chatram AdAya zuklamAlyopazobhitam
6115015a zukle ca vAlavyajane rAjArhe hemabhUSite
6115015c upavAsakRzo dInaz cIrakRSNAjinAmbaraH
6115016a bhrAtur AgamanaM zrutvA tat pUrvaM harSam AgataH
6115016c pratyudyayau tadA rAmaM mahAtmA sacivaiH saha
6115017a samIkSya bharato vAkyam uvAca pavanAtmajam
6115017c kaccin na khalu kApeyI sevyate calacittatA
6115017e na hi pazyAmi kAkutsthaM rAmam AryaM paraMtapam
6115018a athaivam ukte vacane hanUmAn idam abravIt
6115018c arthaM vijJApayann eva bharataM satyavikramam
6115019a sadA phalAn kusumitAn vRkSAn prApya madhusravAn
6115019c bharadvAjaprasAdena mattabhramaranAditAn
6115020a tasya caiSa varo datto vAsavena paraMtapa
6115020c sasainyasya tadAtithyaM kRtaM sarvaguNAnvitam
6115021a nisvanaH zrUyate bhImaH prahRSTAnAM vanaukasAm
6115021c manye vAnarasenA sA nadIM tarati gomatIm
6115022a rajovarSaM samudbhUtaM pazya vAlukinIM prati
6115022c manye sAlavanaM ramyaM lolayanti plavaMgamAH
6115023a tad etad dRzyate dUrAd vimalaM candrasaMnibham
6115023c vimAnaM puSpakaM divyaM manasA brahmanirmitam
6115024a rAvaNaM bAndhavaiH sArdhaM hatvA labdhaM mahAtmanA
6115024c dhanadasya prasAdena divyam etan manojavam
6115025a etasmin bhrAtarau vIrau vaidehyA saha rAghavau
6115025c sugrIvaz ca mahAtejA rAkSasendro vibhISaNaH
6115026a tato harSasamudbhUto nisvano divam aspRzat
6115026c strIbAlayuvavRddhAnAM rAmo 'yam iti kIrtitaH
6115027a rathakuJjaravAjibhyas te 'vatIrya mahIM gatAH
6115027c dadRzus taM vimAnasthaM narAH somam ivAmbare
6115028a prAJjalir bharato bhUtvA prahRSTo rAghavonmukhaH
6115028c svAgatena yathArthena tato rAmam apUjayat
6115029a manasA brahmaNA sRSTe vimAne lakSmaNAgrajaH
6115029c rarAja pRthudIrghAkSo vajrapANir ivAparaH
6115030a tato vimAnAgragataM bharato bhrAtaraM tadA
6115030c vavande praNato rAmaM merustham iva bhAskaram
6115031a Aropito vimAnaM tad bharataH satyavikramaH
6115031c rAmam AsAdya muditaH punar evAbhyavAdayat
6115032a taM samutthApya kAkutsthaz cirasyAkSipathaM gatam
6115032c aGke bharatam Aropya muditaH pariSaSvaje
6115033a tato lakSmaNam AsAdya vaidehIM ca paraMtapaH
6115033c abhyavAdayata prIto bharato nAma cAbravIt
6115034a sugrIvaM kaikayI putro jAmbavantaM tathAGgadam
6115034c maindaM ca dvividaM nIlam RSabhaM caiva sasvaje
6115035a te kRtvA mAnuSaM rUpaM vAnarAH kAmarUpiNaH
6115035c kuzalaM paryapRcchanta prahRSTA bharataM tadA
6115036a vibhISaNaM ca bharataH sAntvayan vAkyam abravIt
6115036c diSTyA tvayA sahAyena kRtaM karma suduSkaram
6115037a zatrughnaz ca tadA rAmam abhivAdya salakSmaNam
6115037c sItAyAz caraNau pazcAd vavande vinayAnvitaH
6115038a rAmo mAtaram AsAdya viSaNNaM zokakarzitAm
6115038c jagrAha praNataH pAdau mano mAtuH prasAdayan
6115039a abhivAdya sumitrAM ca kaikeyIM ca yazasvinIm
6115039c sa mAtqz ca tadA sarvAH purohitam upAgamat
6115040a svAgataM te mahAbAho kausalyAnandavardhana
6115040c iti prAJjalayaH sarve nAgarA rAmam abruvan
6115041a tany aJjalisahasrANi pragRhItAni nAgaraiH
6115041c AkozAnIva padmAni dadarza bharatAgrajaH
6115042a pAduke te tu rAmasya gRhItvA bharataH svayam
6115042c caraNAbhyAM narendrasya yojayAm Asa dharmavit
6115043a abravIc ca tadA rAmaM bharataH sa kRtAJjaliH
6115043c etat te rakSitaM rAjan rAjyaM niryAtitaM mayA
6115044a adya janma kRtArthaM me saMvRttaz ca manorathaH
6115044c yas tvAM pazyAmi rAjAnam ayodhyAM punar Agatam
6115045a avekSatAM bhavAn kozaM koSThAgAraM puraM balam
6115045c bhavatas tejasA sarvaM kRtaM dazaguNaM mayA
6115046a tathA bruvANaM bharataM dRSTvA taM bhrAtRvatsalam
6115046c mumucur vAnarA bASpaM rAkSasaz ca vibhISaNaH
6115047a tataH praharSAd bharatam aGkam Aropya rAghavaH
6115047c yayau tena vimAnena sasainyo bharatAzramam
6115048a bharatAzramam AsAdya sasainyo rAghavas tadA
6115048c avatIrya vimAnAgrAd avatasthe mahItale
6115049a abravIc ca tadA rAmas tadvimAnam anuttamam
6115049c vaha vaizravaNaM devam anujAnAmi gamyatAm
6115050a tato rAmAbhyanujJAtaM tadvimAnam anuttamam
6115050c uttarAM dizam uddizya jagAma dhanadAlayam
6115051a purohitasyAtmasamasya rAghavo; bRhaspateH zakra ivAmarAdhipaH
6115051c nipIDya pAdau pRthag Asane zubhe; sahaiva tenopaviveza vIryavAn
6116001a zirasy aJjalim AdAya kaikeyInandivardhanaH
6116001c babhASe bharato jyeSThaM rAmaM satyaparAkramam
6116002a pUjitA mAmikA mAtA dattaM rAjyam idaM mama
6116002c tad dadAmi punas tubhyaM yathA tvam adadA mama
6116003a dhuram ekAkinA nyastAm RSabheNa balIyasA
6116003c kizoravad guruM bhAraM na voDhum aham utsahe
6116004a vArivegena mahatA bhinnaH setur iva kSaran
6116004c durbandhanam idaM manye rAjyacchidram asaMvRtam
6116005a gatiM khara ivAzvasya haMsasyeva ca vAyasaH
6116005c nAnvetum utsahe deva tava mArgam ariMdama
6116006a yathA ca ropito vRkSo jAtaz cAntarnivezane
6116006c mahAMz ca sudurAroho mahAskandhaH prazAkhavAn
6116007a zIryeta puSpito bhUtvA na phalAni pradarzayet
6116007c tasya nAnubhaved arthaM yasya hetoH sa ropyate
6116008a eSopamA mahAbAho tvam arthaM vettum arhasi
6116008c yady asmAn manujendra tvaM bhaktAn bhRtyAn na zAdhi hi
6116009a jagad adyAbhiSiktaM tvAm anupazyatu sarvataH
6116009c pratapantam ivAdityaM madhyAhne dIptatejasaM
6116010a tUryasaMghAtanirghoSaiH kAJcInUpuranisvanaiH
6116010c madhurair gItazabdaiz ca pratibudhyasva zeSva ca
6116011a yAvad Avartate cakraM yAvatI ca vasuMdharA
6116011c tAvat tvam iha sarvasya svAmitvam abhivartaya
6116012a bharatasya vacaH zrutvA rAmaH parapuraMjayaH
6116012c tatheti pratijagrAha niSasAdAsane zubhe
6116013a tataH zatrughnavacanAn nipuNAH zmazruvardhakAH
6116013c sukhahastAH suzIghrAz ca rAghavaM paryupAsata
6116014a pUrvaM tu bharate snAte lakSmaNe ca mahAbale
6116014c sugrIve vAnarendre ca rAkSasendre vibhISaNe
6116015a vizodhitajaTaH snAtaz citramAlyAnulepanaH
6116015c mahArhavasanopetas tasthau tatra zriyA jvalan
6116016a pratikarma ca rAmasya kArayAm Asa vIryavAn
6116016c lakSmaNasya ca lakSmIvAn ikSvAkukulavardhanaH
6116017a pratikarma ca sItAyAH sarvA dazarathastriyaH
6116017c Atmanaiva tadA cakrur manasvinyo manoharam
6116018a tato rAghavapatnInAM sarvAsAm eva zobhanam
6116018c cakAra yatnAt kausalyA prahRSTA putravatsalA
6116019a tataH zatrughnavacanAt sumantro nAma sArathiH
6116019c yojayitvAbhicakrAma rathaM sarvAGgazobhanam
6116020a arkamaNDalasaMkAzaM divyaM dRSTvA rathaM sthitam
6116020c Aruroha mahAbAhU rAmaH satyaparAkramaH
6116021a ayodhyAyAM tu sacivA rAjJo dazarathasya ye
6116021c purohitaM puraskRtya mantrayAm Asur arthavat
6116022a mantrayan rAmavRddhyarthaM vRttyarthaM nagarasya ca
6116022c sarvam evAbhiSekArthaM jayArhasya mahAtmanaH
6116022e kartum arhatha rAmasya yad yan maGgalapUrvakam
6116023a iti te mantriNaH sarve saMdizya tu purohitam
6116023c nagarAn niryayus tUrNaM rAmadarzanabuddhayaH
6116024a hariyuktaM sahasrAkSo ratham indra ivAnaghaH
6116024c prayayau ratham AsthAya rAmo nagaram uttamam
6116025a jagrAha bharato razmIJ zatrughnaz chatram Adade
6116025c lakSmaNo vyajanaM tasya mUrdhni saMparyavIjayat
6116026a zvetaM ca vAlavyajanaM sugrIvo vAnarezvaraH
6116026c aparaM candrasaMkAzaM rAkSasendro vibhISaNaH
6116027a RSisaMghair tadAkAze devaiz ca samarudgaNaiH
6116027c stUyamAnasya rAmasya zuzruve madhuradhvaniH
6116028a tataH zatruMjayaM nAma kuJjaraM parvatopamam
6116028c Aruroha mahAtejAH sugrIvo vAnarezvaraH
6116029a navanAgasahasrANi yayur AsthAya vAnarAH
6116029c mAnuSaM vigrahaM kRtvA sarvAbharaNabhUSitAH
6116030a zaGkhazabdapraNAdaiz ca dundubhInAM ca nisvanaiH
6116030c prayayU puruSavyAghras tAM purIM harmyamAlinIm
6116031a dadRzus te samAyAntaM rAghavaM sapuraHsaram
6116031c virAjamAnaM vapuSA rathenAtirathaM tadA
6116032a te vardhayitvA kAkutsthaM rAmeNa pratinanditAH
6116032c anujagmur mahAtmAnaM bhrAtRbhiH parivAritam
6116033a amAtyair brAhmaNaiz caiva tathA prakRtibhir vRtaH
6116033c zriyA viruruce rAmo nakSatrair iva candramAH
6116034a sa purogAmibhis tUryais tAlasvastikapANibhiH
6116034c pravyAharadbhir muditair maGgalAni yayau vRtaH
6116035a akSataM jAtarUpaM ca gAvaH kanyAs tathA dvijAH
6116035c narA modakahastAz ca rAmasya purato yayuH
6116036a sakhyaM ca rAmaH sugrIve prabhAvaM cAnilAtmaje
6116036c vAnarANAM ca tat karma vyAcacakSe 'tha mantriNAm
6116036e zrutvA ca vismayaM jagmur ayodhyApuravAsinaH
6116037a dyutimAn etad AkhyAya rAmo vAnarasaMvRtaH
6116037c hRSTapuSTajanAkIrNAm ayodhyAM praviveza ha
6116038a tato hy abhyucchrayan paurAH patAkAs te gRhe gRhe
6116038c aikSvAkAdhyuSitaM ramyam AsasAda pitur gRham
6116039a pitur bhavanam AsAdya pravizya ca mahAtmanaH
6116039c kausalyAM ca sumitrAM ca kaikeyIM cAbhyavAdayat
6116040a athAbravId rAjaputro bharataM dharmiNAM varam
6116040c athopahitayA vAcA madhuraM raghunandanaH
6116041a yac ca madbhavanaM zreSThaM sAzokavanikaM mahat
6116041c muktAvaidUryasaMkIrNaM sugrIvasya nivedaya
6116042a tasya tad vacanaM zrutvA bharataH satyavikramaH
6116042c pANau gRhItvA sugrIvaM praviveza tam Alayam
6116043a tatas tailapradIpAMz ca paryaGkAstaraNAni ca
6116043c gRhItvA vivizuH kSipraM zatrughnena pracoditAH
6116044a uvAca ca mahAtejAH sugrIvaM rAghavAnujaH
6116044c abhiSekAya rAmasya dUtAn AjJApaya prabho
6116045a sauvarNAn vAnarendrANAM caturNAM caturo ghaTAn
6116045c dadau kSipraM sa sugrIvaH sarvaratnavibhUSitAn
6116046a yathA pratyUSasamaye caturNAM sAgarAmbhasAm
6116046c pUrNair ghaTaiH pratIkSadhvaM tathA kuruta vAnarAH
6116047a evam uktA mahAtmAno vAnarA vAraNopamAH
6116047c utpetur gaganaM zIghraM garuDA iva zIghragAH
6116048a jAmbavAMz ca hanUmAMz ca vegadarzI ca vAnaraH
6116048c RSabhaz caiva kalazAJ jalapUrNAn athAnayan
6116048e nadIzatAnAM paJcAnAM jale kumbhair upAharan
6116049a pUrvAt samudrAt kalazaM jalapUrNam athAnayat
6116049c suSeNaH sattvasaMpannaH sarvaratnavibhUSitam
6116050a RSabho dakSiNAt tUrNaM samudrAj jalam Aharat
6116051a raktacandanakarpUraiH saMvRtaM kAJcanaM ghaTam
6116051c gavayaH pazcimAt toyam AjahAra mahArNavAt
6116052a ratnakumbhena mahatA zItaM mArutavikramaH
6116052c uttarAc ca jalaM zIghraM garuDAnilavikramaH
6116053a abhiSekAya rAmasya zatrughnaH sacivaiH saha
6116053c purohitAya zreSThAya suhRdbhyaz ca nyavedayat
6116054a tataH sa prayato vRddho vasiSTho brAhmaNaiH saha
6116054c rAmaM ratnamayo pIThe sahasItaM nyavezayat
6116055a vasiSTho vAmadevaz ca jAbAlir atha kAzyapaH
6116055c kAtyAyanaH suyajJaz ca gautamo vijayas tathA
6116056a abhyaSiJcan naravyAghraM prasannena sugandhinA
6116056c salilena sahasrAkSaM vasavo vAsavaM yathA
6116057a Rtvigbhir brAhmaNaiH pUrvaM kanyAbhir mantribhis tathA
6116057c yodhaiz caivAbhyaSiJcaMs te saMprahRSTAH sanaigamaiH
6116058a sarvauSadhirasaiz cApi daivatair nabhasi sthitaiH
6116058c caturhir lokapAlaiz ca sarvair devaiz ca saMgataiH
6116059a chatraM tasya ca jagrAha zatrughnaH pANDuraM zubham
6116059c zvetaM ca vAlavyajanaM sugrIvo vAnarezvaraH
6116059e aparaM candrasaMkAzaM rAkSasendro vibhISaNaH
6116060a mAlAM jvalantIM vapuSA kAJcanIM zatapuSkarAm
6116060c rAghavAya dadau vAyur vAsavena pracoditaH
6116061a sarvaratnasamAyuktaM maNiratnavibhUSitam
6116061c muktAhAraM narendrAya dadau zakrapracoditaH
6116062a prajagur devagandharvA nanRtuz cApsaro gaNAH
6116062c abhiSeke tad arhasya tadA rAmasya dhImataH
6116063a bhUmiH sasyavatI caiva phalavantaz ca pAdapAH
6116063c gandhavanti ca puSpANi babhUvU rAghavotsave
6116064a sahasrazatam azvAnAM dhenUnAM ca gavAM tathA
6116064c dadau zataM vRSAn pUrvaM dvijebhyo manujarSabhaH
6116065a triMzatkoTIr hiraNyasya brAhmaNebhyo dadau punaH
6116065c nAnAbharaNavastrANi mahArhANi ca rAghavaH
6116066a arkarazmipratIkAzAM kAJcanIM maNivigrahAm
6116066c sugrIvAya srajaM divyAM prAyacchan manujarSabhaH
6116067a vaidUryamaNicitre ca vajraratnavibhUSite
6116067c vAliputrAya dhRtimAn aGgadAyAGgade dadau
6116068a maNipravarajuSTaM ca muktAhAram anuttamam
6116068c sItAyai pradadau rAmaz candrarazmisamaprabham
6116069a araje vAsasI divye zubhAny AbharaNAni ca
6116069c avekSamANA vaidehI pradadau vAyusUnave
6116070a avamucyAtmanaH kaNThAd dhAraM janakanandinI
6116070c avaikSata harIn sarvAn bhartAraM ca muhur muhuH
6116071a tAm iGgitajJaH saMprekSya babhASe janakAtmajAm
6116071c pradehi subhage hAraM yasya tuSTAsi bhAmini
6116072a pauruSaM vikramo buddhir yasminn etAni nityadA
6116072c dadau sA vAyuputrAya taM hAram asitekSaNA
6116073a hanUmAMs tena hAreNa zuzubhe vAnararSabhaH
6116073c candrAMzucayagaureNa zvetAbhreNa yathAcalaH
6116074a tato dvivida maindAbhyAM nIlAya ca paraMtapaH
6116074c sarvAn kAmaguNAn vIkSya pradadau vasudhAdhipaH
6116075a sarvavAnaravRddhAz ca ye cAnye vAnarezvarAH
6116075c vAsobhir bhUSaNaiz caiva yathArhaM pratipUjitAH
6116076a yathArhaM pUjitAH sarve kAmai ratnaiz ca puSkalair
6116076c prahRSTamanasaH sarve jagmur eva yathAgatam
6116077a rAghavaH paramodAraH zazAsa parayA mudA
6116077c uvAca lakSmaNaM rAmo dharmajJaM dharmavatsalaH
6116078a AtiSTha dharmajJa mayA sahemAM; gAM pUrvarAjAdhyuSitAM balena
6116078c tulyaM mayA tvaM pitRbhir dhRtA yA; tAM yauvarAjye dhuram udvahasva
6116079a sarvAtmanA paryanunIyamAno; yadA na saumitrir upaiti yogam
6116079c niyujyamAno bhuvi yauvarAjye; tato 'bhyaSiJcad bharataM mahAtmA
6116080a rAghavaz cApi dharmAtmA prApya rAjyam anuttamam
6116080c Ije bahuvidhair yajJaiH sasuhRdbhrAtRbAndhavaH
6116081a pauNDarIkAzvamedhAbhyAM vAjapeyena cAsakRt
6116081c anyaiz ca vividhair yajJair ayajat pArthivarSabhaH
6116082a rAjyaM dazasahasrANi prApya varSANi rAghavaH
6116082c zatAzvamedhAn Ajahre sadazvAn bhUridakSiNAn
6116083a AjAnulambibAhuz ca mahAskandhaH pratApavAn
6116083c lakSmaNAnucaro rAmaH pRthivIm anvapAlayat
6116084a na paryadevan vidhavA na ca vyAlakRtaM bhayam
6116084c na vyAdhijaM bhayaM vApi rAme rAjyaM prazAsati
6116085a nirdasyur abhaval loko nAnarthaH kaM cid aspRzat
6116085c na ca sma vRddhA bAlAnAM pretakAryANi kurvate
6116086a sarvaM muditam evAsIt sarvo dharmaparo 'bhavat
6116086c rAmam evAnupazyanto nAbhyahiMsan parasparam
6116087a Asan varSasahasrANi tathA putrasahasriNaH
6116087c nirAmayA vizokAz ca rAme rAjyaM prazAsati
6116088a nityapuSpA nityaphalAs taravaH skandhavistRtAH
6116088c kAlavarSI ca parjanyaH sukhasparzaz ca mArutaH
6116089a svakarmasu pravartante tuSThAH svair eva karmabhiH
6116089c Asan prajA dharmaparA rAme zAsati nAnRtAH
6116090a sarve lakSaNasaMpannAH sarve dharmaparAyaNAH
6116090c dazavarSasahasrANi rAmo rAjyam akArayat