% Ramayana: Balakanda
% Last updated: Thu Oct 21 2021
% Encoding: ASCII
%
1001001a tapaHsvAdhyAyanirataM tapasvI vAgvidAM varam
1001001c nAradaM paripapraccha vAlmIkir munipuMgavam
1001002a ko nv asmin sAmprataM loke guNavAn kaz ca vIryavAn
1001002c dharmajJaz ca kRtajJaz ca satyavAkyo dRDhavrataH
1001003a cAritreNa ca ko yuktaH sarvabhUteSu ko hitaH
1001003c vidvAn kaH kaH samarthaz ca kaz caikapriyadarzanaH
1001004a AtmavAn ko jitakrodho dyutimAn ko 'nasUyakaH
1001004c kasya bibhyati devAz ca jAtaroSasya saMyuge
1001005a etad icchAmy ahaM zrotuM paraM kautUhalaM hi me
1001005c maharSe tvaM samartho 'si jJAtum evaMvidhaM naram
1001006a zrutvA caitat trilokajJo vAlmIker nArado vacaH
1001006c zrUyatAm iti cAmantrya prahRSTo vAkyam abravIt
1001007a bahavo durlabhAz caiva ye tvayA kIrtitA guNAH
1001007c mune vakSyAmy ahaM buddhvA tair yuktaH zrUyatAM naraH
1001008a ikSvAkuvaMzaprabhavo rAmo nAma janaiH zrutaH
1001008c niyatAtmA mahAvIryo dyutimAn dhRtimAn vazI
1001009a buddhimAn nItimAn vAgmI zrImAJ zatrunibarhaNaH
1001009c vipulAMso mahAbAhuH kambugrIvo mahAhanuH
1001010a mahorasko maheSvAso gUDhajatrur ariMdamaH
1001010c AjAnubAhuH suzirAH sulalATaH suvikramaH
1001011a samaH samavibhaktAGgaH snigdhavarNaH pratApavAn
1001011c pInavakSA vizAlAkSo lakSmIvAJ zubhalakSaNaH
1001012a dharmajJaH satyasaMdhaz ca prajAnAM ca hite rataH
1001012c yazasvI jJAnasaMpannaH zucir vazyaH samAdhimAn
1001013a rakSitA jIvalokasya dharmasya parirakSitA
1001013c vedavedAGgatattvajJo dhanurvede ca niSThitaH
1001014a sarvazAstrArthatattvajJa smRtimAn pratibhAnavAn
1001014c sarvalokapriyaH sAdhur adInAtmA vicakSaNaH
1001015a sarvadAbhigataH sadbhiH samudra iva sindhubhiH
1001015c AryaH sarvasamaz caiva sadaikapriyadarzanaH
1001016a sa ca sarvaguNopetaH kausalyAnandavardhanaH
1001016c samudra iva gAmbhIrye dhairyeNa himavAn iva
1001017a viSNunA sadRzo vIrye somavat priyadarzanaH
1001017c kAlAgnisadRzaH krodhe kSamayA pRthivIsamaH
1001018a dhanadena samas tyAge satye dharma ivAparaH
1001018c tam evaMguNasaMpannaM rAmaM satyaparAkramam
1001019a jyeSThaM zreSThaguNair yuktaM priyaM dazarathaH sutam
1001019c yauvarAjyena saMyoktum aicchat prItyA mahIpatiH
1001020a tasyAbhiSekasaMbhArAn dRSTvA bhAryAtha kaikayI
1001020c pUrvaM dattavarA devI varam enam ayAcata
1001020e vivAsanaM ca rAmasya bharatasyAbhiSecanam
1001021a sa satyavacanAd rAjA dharmapAzena saMyataH
1001021c vivAsayAm Asa sutaM rAmaM dazarathaH priyam
1001022a sa jagAma vanaM vIraH pratijJAm anupAlayan
1001022c pitur vacananirdezAt kaikeyyAH priyakAraNAt
1001023a taM vrajantaM priyo bhrAtA lakSmaNo 'nujagAma ha
1001023c snehAd vinayasaMpannaH sumitrAnandavardhanaH
1001024a sarvalakSaNasaMpannA nArINAm uttamA vadhUH
1001024c sItApy anugatA rAmaM zazinaM rohiNI yathA
1001025a paurair anugato dUraM pitrA dazarathena ca
1001025c zRGgaverapure sUtaM gaGgAkUle vyasarjayat
1001026a te vanena vanaM gatvA nadIs tIrtvA bahUdakAH
1001026c citrakUTam anuprApya bharadvAjasya zAsanAt
1001027a ramyam AvasathaM kRtvA ramamANA vane trayaH
1001027c devagandharvasaMkAzAs tatra te nyavasan sukham
1001028a citrakUTaM gate rAme putrazokAturas tadA
1001028c rAjA dazarathaH svargaM jagAma vilapan sutam
1001029a mRte tu tasmin bharato vasiSThapramukhair dvijaiH
1001029c niyujyamAno rAjyAya naicchad rAjyaM mahAbalaH
1001029e sa jagAma vanaM vIro rAmapAdaprasAdakaH
1001030a pAduke cAsya rAjyAya nyAsaM dattvA punaH punaH
1001030c nivartayAm Asa tato bharataM bharatAgrajaH
1001031a sa kAmam anavApyaiva rAmapAdAv upaspRzan
1001031c nandigrAme 'karod rAjyaM rAmAgamanakAGkSayA
1001032a rAmas tu punar AlakSya nAgarasya janasya ca
1001032c tatrAgamanam ekAgre daNDakAn praviveza ha
1001033a virAdhaM rAkSasaM hatvA zarabhaGgaM dadarza ha
1001033c sutIkSNaM cApy agastyaM ca agastya bhrAtaraM tathA
1001034a agastyavacanAc caiva jagrAhaindraM zarAsanam
1001034c khaDgaM ca paramaprItas tUNI cAkSayasAyakau
1001035a vasatas tasya rAmasya vane vanacaraiH saha
1001035c RSayo 'bhyAgaman sarve vadhAyAsurarakSasAm
1001036a tena tatraiva vasatA janasthAnanivAsinI
1001036c virUpitA zUrpaNakhA rAkSasI kAmarUpiNI
1001037a tataH zUrpaNakhAvAkyAd udyuktAn sarvarAkSasAn
1001037c kharaM trizirasaM caiva dUSaNaM caiva rAkSasam
1001038a nijaghAna raNe rAmas teSAM caiva padAnugAn
1001038c rakSasAM nihatAny Asan sahasrANi caturdaza
1001039a tato jJAtivadhaM zrutvA rAvaNaH krodhamUrchitaH
1001039c sahAyaM varayAm Asa mArIcaM nAma rAkSasam
1001040a vAryamANaH subahuzo mArIcena sa rAvaNaH
1001040c na virodho balavatA kSamo rAvaNa tena te
1001041a anAdRtya tu tad vAkyaM rAvaNaH kAlacoditaH
1001041c jagAma sahamArIcas tasyAzramapadaM tadA
1001042a tena mAyAvinA dUram apavAhya nRpAtmajau
1001042c jahAra bhAryAM rAmasya gRdhraM hatvA jaTAyuSam
1001043a gRdhraM ca nihataM dRSTvA hRtAM zrutvA ca maithilIm
1001043c rAghavaH zokasaMtapto vilalApAkulendriyaH
1001044a tatas tenaiva zokena gRdhraM dagdhvA jaTAyuSam
1001044c mArgamANo vane sItAM rAkSasaM saMdadarza ha
1001045a kabandhaM nAma rUpeNa vikRtaM ghoradarzanam
1001045c taM nihatya mahAbAhur dadAha svargataz ca saH
1001046a sa cAsya kathayAm Asa zabarIM dharmacAriNIm
1001046c zramaNIM dharmanipuNAm abhigaccheti rAghava
1001046e so 'bhyagacchan mahAtejAH zabarIM zatrusUdanaH
1001047a zabaryA pUjitaH samyag rAmo dazarathAtmajaH
1001047c pampAtIre hanumatA saMgato vAnareNa ha
1001048a hanumadvacanAc caiva sugrIveNa samAgataH
1001048c sugrIvAya ca tat sarvaM zaMsad rAmo mahAbalaH
1001049a tato vAnararAjena vairAnukathanaM prati
1001049c rAmAyAveditaM sarvaM praNayAd duHkhitena ca
1001049e vAlinaz ca balaM tatra kathayAm Asa vAnaraH
1001050a pratijJAtaM ca rAmeNa tadA vAlivadhaM prati
1001050c sugrIvaH zaGkitaz cAsIn nityaM vIryeNa rAghave
1001051a rAghavaH pratyayArthaM tu dundubheH kAyam uttamam
1001051c pAdAGguSThena cikSepa saMpUrNaM dazayojanam
1001052a bibheda ca punaH sAlAn saptaikena maheSuNA
1001052c giriM rasAtalaM caiva janayan pratyayaM tadA
1001053a tataH prItamanAs tena vizvastaH sa mahAkapiH
1001053c kiSkindhAM rAmasahito jagAma ca guhAM tadA
1001054a tato 'garjad dharivaraH sugrIvo hemapiGgalaH
1001054c tena nAdena mahatA nirjagAma harIzvaraH
1001055a tataH sugrIvavacanAd dhatvA vAlinam Ahave
1001055c sugrIvam eva tad rAjye rAghavaH pratyapAdayat
1001056a sa ca sarvAn samAnIya vAnarAn vAnararSabhaH
1001056c dizaH prasthApayAm Asa didRkSur janakAtmajAm
1001057a tato gRdhrasya vacanAt saMpAter hanumAn balI
1001057c zatayojanavistIrNaM pupluve lavaNArNavam
1001058a tatra laGkAM samAsAdya purIM rAvaNapAlitAm
1001058c dadarza sItAM dhyAyantIm azokavanikAM gatAm
1001059a nivedayitvAbhijJAnaM pravRttiM ca nivedya ca
1001059c samAzvAsya ca vaidehIM mardayAm Asa toraNam
1001060a paJca senAgragAn hatvA sapta mantrisutAn api
1001060c zUram akSaM ca niSpiSya grahaNaM samupAgamat
1001061a astreNonmuham AtmAnaM jJAtvA paitAmahAd varAt
1001061c marSayan rAkSasAn vIro yantriNas tAn yadRcchayA
1001062a tato dagdhvA purIM laGkAm Rte sItAM ca maithilIm
1001062c rAmAya priyam AkhyAtuM punar AyAn mahAkapiH
1001063a so 'bhigamya mahAtmAnaM kRtvA rAmaM pradakSiNam
1001063c nyavedayad ameyAtmA dRSTA sIteti tattvataH
1001064a tataH sugrIvasahito gatvA tIraM mahodadheH
1001064c samudraM kSobhayAm Asa zarair AdityasaMnibhaiH
1001065a darzayAm Asa cAtmAnaM samudraH saritAM patiH
1001065c samudravacanAc caiva nalaM setum akArayat
1001066a tena gatvA purIM laGkAM hatvA rAvaNam Ahave
1001066c abhyaSiJcat sa laGkAyAM rAkSasendraM vibhISaNam
1001067a karmaNA tena mahatA trailokyaM sacarAcaram
1001067c sadevarSigaNaM tuSTaM rAghavasya mahAtmanaH
1001068a tathA paramasaMtuSTaiH pUjitaH sarvadaivataiH
1001068c kRtakRtyas tadA rAmo vijvaraH pramumoda ha
1001069a devatAbhyo varAn prApya samutthApya ca vAnarAn
1001069c puSpakaM tat samAruhya nandigrAmaM yayau tadA
1001070a nandigrAme jaTAM hitvA bhrAtRbhiH sahito 'naghaH
1001070c rAmaH sItAm anuprApya rAjyaM punar avAptavAn
1001071a prahRSTamudito lokas tuSTaH puSTaH sudhArmikaH
1001071c nirAyamo arogaz ca durbhikSabhayavarjitaH
1001072a na putramaraNaM ke cid drakSyanti puruSAH kva cit
1001072c nAryaz cAvidhavA nityaM bhaviSyanti pativratAH
1001073a na vAtajaM bhayaM kiM cin nApsu majjanti jantavaH
1001073c na cAgrijaM bhayaM kiM cid yathA kRtayuge tathA
1001074a azvamedhazatair iSTvA tathA bahusuvarNakaiH
1001074c gavAM koTyayutaM dattvA vidvadbhyo vidhipUrvakam
1001075a rAjavaMzAJ zataguNAn sthApayiSyati rAghavaH
1001075c cAturvarNyaM ca loke 'smin sve sve dharme niyokSyati
1001076a dazavarSasahasrANi dazavarSazatAni ca
1001076c rAmo rAjyam upAsitvA brahmalokaM gamiSyati
1001077a idaM pavitraM pApaghnaM puNyaM vedaiz ca saMmitam
1001077c yaH paThed rAmacaritaM sarvapApaiH pramucyate
1001078a etad AkhyAnam AyuSyaM paThan rAmAyaNaM naraH
1001078c saputrapautraH sagaNaH pretya svarge mahIyate
1001079a paThan dvijo vAgRSabhatvam IyAt; syAt kSatriyo bhUmipatitvam IyAt
1001079c vaNigjanaH paNyaphalatvam IyAj; janaz ca zUdro 'pi mahattvam IyAt
1002001a nAradasya tu tad vAkyaM zrutvA vAkyavizAradaH
1002001c pUjayAm Asa dharmAtmA sahaziSyo mahAmuniH
1002002a yathAvat pUjitas tena devarSir nAradas tadA
1002002c ApRSTvaivAbhyanujJAtaH sa jagAma vihAyasam
1002003a sa muhUrtaM gate tasmin devalokaM munis tadA
1002003c jagAma tamasAtIraM jAhnavyAs tv avidUrataH
1002004a sa tu tIraM samAsAdya tamasAyA mahAmuniH
1002004c ziSyam Aha sthitaM pArzve dRSTvA tIrtham akardamam
1002005a akardamam idaM tIrthaM bharadvAja nizAmaya
1002005c ramaNIyaM prasannAmbu sanmanuSyamano yathA
1002006a nyasyatAM kalazas tAta dIyatAM valkalaM mama
1002006c idam evAvagAhiSye tamasAtIrtham uttamam
1002007a evam ukto bharadvAjo vAlmIkena mahAtmanA
1002007c prAyacchata munes tasya valkalaM niyato guroH
1002008a sa ziSyahastAd AdAya valkalaM niyatendriyaH
1002008c vicacAra ha pazyaMs tat sarvato vipulaM vanam
1002009a tasyAbhyAze tu mithunaM carantam anapAyinam
1002009c dadarza bhagavAMs tatra krauJcayoz cArunisvanam
1002010a tasmAt tu mithunAd ekaM pumAMsaM pApanizcayaH
1002010c jaghAna vairanilayo niSAdas tasya pazyataH
1002011a taM zoNitaparItAGgaM veSTamAnaM mahItale
1002011c bhAryA tu nihataM dRSTvA rurAva karuNAM giram
1002012a tathA tu taM dvijaM dRSTvA niSAdena nipAtitam
1002012c RSer dharmAtmanas tasya kAruNyaM samapadyata
1002013a tataH karuNaveditvAd adharmo 'yam iti dvijaH
1002013c nizAmya rudatIM krauJcIm idaM vacanam abravIt
1002014a mA niSAda pratiSThAM tvam agamaH zAzvatIH samAH
1002014c yat krauJcamithunAd ekam avadhIH kAmamohitam
1002015a tasyaivaM bruvataz cintA babhUva hRdi vIkSataH
1002015c zokArtenAsya zakuneH kim idaM vyAhRtaM mayA
1002016a cintayan sa mahAprAjJaz cakAra matimAn matim
1002016c ziSyaM caivAbravId vAkyam idaM sa munipuMgavaH
1002017a pAdabaddho 'kSarasamas tantrIlayasamanvitaH
1002017c zokArtasya pravRtto me zloko bhavatu nAnyathA
1002018a ziSyas tu tasya bruvato muner vAkyam anuttamam
1002018c pratijagrAha saMhRSTas tasya tuSTo 'bhavad guruH
1002019a so 'bhiSekaM tataH kRtvA tIrthe tasmin yathAvidhi
1002019c tam eva cintayann artham upAvartata vai muniH
1002020a bharadvAjas tataH ziSyo vinItaH zrutavAn guroH
1002020c kalazaM pUrNam AdAya pRSThato 'nujagAma ha
1002021a sa pravizyAzramapadaM ziSyeNa saha dharmavit
1002021c upaviSTaH kathAz cAnyAz cakAra dhyAnam AsthitaH
1002022a AjagAma tato brahmA lokakartA svayaM prabhuH
1002022c caturmukho mahAtejA draSTuM taM munipuMgavam
1002023a vAlmIkir atha taM dRSTvA sahasotthAya vAg yataH
1002023c prAJjaliH prayato bhUtvA tasthau paramavismitaH
1002024a pUjayAm Asa taM devaM pAdyArghyAsanavandanaiH
1002024c praNamya vidhivac cainaM pRSTvAnAmayam avyayam
1002025a athopavizya bhagavAn Asane paramArcite
1002025c vAlmIkaye maharSaye saMdidezAsanaM tataH
1002026a upaviSTe tadA tasmin sAkSAl lokapitAmahe
1002026c tad gatenaiva manasA vAlmIkir dhyAnam AsthitaH
1002027a pApAtmanA kRtaM kaSTaM vairagrahaNabuddhinA
1002027c yas tAdRzaM cAruravaM krauJcaM hanyAd akAraNAt
1002028a zocann eva muhuH krauJcIm upazlokam imaM punaH
1002028c jagAv antargatamanA bhUtvA zokaparAyaNaH
1002029a tam uvAca tato brahmA prahasan munipuMgavam
1002029c zloka eva tvayA baddho nAtra kAryA vicAraNA
1002030a macchandAd eva te brahman pravRtteyaM sarasvatI
1002030c rAmasya caritaM sarvaM kuru tvam RSisattama
1002031a dharmAtmano guNavato loke rAmasya dhImataH
1002031c vRttaM kathaya dhIrasya yathA te nAradAc chrutam
1002032a rahasyaM ca prakAzaM ca yad vRttaM tasya dhImataH
1002032c rAmasya saha saumitre rAkSasAnAM ca sarvazaH
1002033a vaidehyAz caiva yad vRttaM prakAzaM yadi vA rahaH
1002033c tac cApy aviditaM sarvaM viditaM te bhaviSyati
1002034a na te vAg anRtA kAvye kA cid atra bhaviSyati
1002034c kuru rAmakathAM puNyAM zlokabaddhAM manoramAm
1002035a yAvat sthAsyanti girayaH saritaz ca mahItale
1002035c tAvad rAmAyaNakathA lokeSu pracariSyati
1002036a yAvad rAmasya ca kathA tvatkRtA pracariSyati
1002036c tAvad Urdhvam adhaz ca tvaM mallokeSu nivatsyasi
1002037a ity uktvA bhagavAn brahmA tatraivAntaradhIyata
1002037c tataH saziSyo vAlmIkir munir vismayam Ayayau
1002038a tasya ziSyAs tataH sarve jaguH zlokam imaM punaH
1002038c muhur muhuH prIyamANAH prAhuz ca bhRzavismitAH
1002039a samAkSaraiz caturbhir yaH pAdair gIto maharSiNA
1002039c so 'nuvyAharaNAd bhUyaH zokaH zlokatvam AgataH
1002040a tasya buddhir iyaM jAtA vAlmIker bhAvitAtmanaH
1002040c kRtsnaM rAmAyaNaM kAvyam IdRzaiH karavANy aham
1002041a udAravRttArthapadair manoramais; tadAsya rAmasya cakAra kIrtimAn
1002041c samAkSaraiH zlokazatair yazasvino; yazaskaraM kAvyam udAradhIr muniH
1003001a zrutvA vas tu samagraM tad dharmAtmA dharmasaMhitam
1003001c vyaktam anveSate bhUyo yad vRttaM tasya dhImataH
1003002a upaspRzyodakaM saMyan muniH sthitvA kRtAJjaliH
1003002c prAcInAgreSu darbheSu dharmeNAnveSate gatim
1003003a janma rAmasya sumahad vIryaM sarvAnukUlatAm
1003003c lokasya priyatAM kSAntiM saumyatAM satyazIlatAm
1003004a nAnAcitrAH kathAz cAnyA vizvAmitrasahAyane
1003004c jAnakyAz ca vivAhaM ca dhanuSaz ca vibhedanam
1003005a rAmarAmavivAdaM ca guNAn dAzarathes tathA
1003005c tathAbhiSekaM rAmasya kaikeyyA duSTabhAvatAm
1003006a vyAghAtaM cAbhiSekasya rAmasya ca vivAsanam
1003006c rAjJaH zokavilApaM ca paralokasya cAzrayam
1003007a prakRtInAM viSAdaM ca prakRtInAM visarjanam
1003007c niSAdAdhipasaMvAdaM sUtopAvartanaM tathA
1003008a gaGgAyAz cApi saMtAraM bharadvAjasya darzanam
1003008c bharadvAjAbhyanujJAnAc citrakUTasya darzanam
1003009a vAstukarmanivezaM ca bharatAgamanaM tathA
1003009c prasAdanaM ca rAmasya pituz ca salilakriyAm
1003010a pAdukAgryAbhiSekaM ca nandigrAma nivAsanam
1003010c daNDakAraNyagamanaM sutIkSNena samAgamam
1003011a anasUyAsamasyAM ca aGgarAgasya cArpaNam
1003011c zUrpaNakhyAz ca saMvAdaM virUpakaraNaM tathA
1003012a vadhaM kharatrizirasor utthAnaM rAvaNasya ca
1003012c mArIcasya vadhaM caiva vaidehyA haraNaM tathA
1003013a rAghavasya vilApaM ca gRdhrarAjanibarhaNam
1003013c kabandhadarzanaM caiva pampAyAz cApi darzanam
1003014a zarbaryA darzanaM caiva hanUmaddarzanaM tathA
1003014c vilApaM caiva pampAyAM rAghavasya mahAtmanaH
1003015a RSyamUkasya gamanaM sugrIveNa samAgamam
1003015c pratyayotpAdanaM sakhyaM vAlisugrIvavigraham
1003016a vAlipramathanaM caiva sugrIvapratipAdanam
1003016c tArAvilApasamayaM varSarAtrinivAsanam
1003017a kopaM rAghavasiMhasya balAnAm upasaMgraham
1003017c dizaH prasthApanaM caiva pRthivyAz ca nivedanam
1003018a aGgulIyakadAnaM ca RkSasya biladarzanam
1003018c prAyopavezanaM caiva saMpAtez cApi darzanam
1003019a parvatArohaNaM caiva sAgarasya ca laGghanam
1003019c rAtrau laGkApravezaM ca ekasyApi vicintanam
1003020a ApAnabhUmigamanam avarodhasya darzanam
1003020c azokavanikAyAnaM sItAyAz cApi darzanam
1003021a abhijJAnapradAnaM ca sItAyAz cApi bhASaNam
1003021c rAkSasItarjanaM caiva trijaTAsvapnadarzanam
1003022a maNipradAnaM sItAyA vRkSabhaGgaM tathaiva ca
1003022c rAkSasIvidravaM caiva kiMkarANAM nibarhaNam
1003023a grahaNaM vAyusUnoz ca laGkAdAhAbhigarjanam
1003023c pratiplavanam evAtha madhUnAM haraNaM tathA
1003024a rAghavAzvAsanaM caiva maNiniryAtanaM tathA
1003024c saMgamaM ca samudrasya nalasetoz ca bandhanam
1003025a pratAraM ca samudrasya rAtrau laGkAvarodhanam
1003025c vibhISaNena saMsargaM vadhopAyanivedanam
1003026a kumbhakarNasya nidhanaM meghanAdanibarhaNam
1003026c rAvaNasya vinAzaM ca sItAvAptim areH pure
1003027a bibhISaNAbhiSekaM ca puSpakasya ca darzanam
1003027c ayodhyAyAz ca gamanaM bharatena samAgamam
1003028a rAmAbhiSekAbhyudayaM sarvasainyavisarjanam
1003028c svarASTraraJjanaM caiva vaidehyAz ca visarjanam
1003029a anAgataM ca yat kiM cid rAmasya vasudhAtale
1003029c tac cakArottare kAvye vAlmIkir bhagavAn RSiH
1004001a prAptarAjyasya rAmasya vAlmIkir bhagavAn RSiH
1004001c cakAra caritaM kRtsnaM vicitrapadam AtmavAn
1004002a kRtvA tu tan mahAprAjJaH sabhaviSyaM sahottaram
1004002c cintayAm Asa ko nv etat prayuJjIyAd iti prabhuH
1004003a tasya cintayamAnasya maharSer bhAvitAtmanaH
1004003c agRhNItAM tataH pAdau muniveSau kuzIlavau
1004004a kuzIlavau tu dharmajJau rAjaputrau yazasvinau
1004004c bhrAtarau svarasaMpannau dadarzAzramavAsinau
1004005a sa tu medhAvinau dRSTvA vedeSu pariniSThitau
1004005c vedopabRhmaNArthAya tAv agrAhayata prabhuH
1004006a kAvyaM rAmAyaNaM kRtsnaM sItAyAz caritaM mahat
1004006c paulastya vadham ity eva cakAra caritavrataH
1004007a pAThye geye ca madhuraM pramANais tribhir anvitam
1004007c jAtibhiH saptabhir baddhaM tantrIlayasamanvitam
1004008a hAsyazRGgArakAruNyaraudravIrabhayAnakaiH
1004008c bIbhatsAdirasair yuktaM kAvyam etad agAyatAm
1004009a tau tu gAndharvatattvajJau mUrcchanAsthAnakovidau
1004009c bhrAtarau svarasaMpannau gandharvAv iva rUpiNau
1004010a rUpalakSaNasaMpannau madhurasvarabhASiNau
1004010c bimbAd ivoddhRtau bimbau rAmadehAt tathAparau
1004011a tau rAjaputrau kArtsnyena dharmyam AkhyAnam uttamam
1004011c vAco vidheyaM tat sarvaM kRtvA kAvyam aninditau
1004012a RSINAM ca dvijAtInAM sAdhUnAM ca samAgame
1004012c yathopadezaM tattvajJau jagatus tau samAhitau
1004012e mahAtmAnau mahAbhAgau sarvalakSaNalakSitau
1004013a tau kadA cit sametAnAm RSINAM bhAvitAtmanAm
1004013c AsInAnAM samIpasthAv idaM kAvyam agAyatAm
1004014a tac chrutvA munayaH sarve bASpaparyAkulekSaNAH
1004014c sAdhu sAdhv ity tAv UcatuH paraM vismayam AgatAH
1004015a te prItamanasaH sarve munayo dharmavatsalAH
1004015c prazazaMsuH prazastavyau gAyamAnau kuzIlavau
1004016a aho gItasya mAdhuryaM zlokAnAM ca vizeSataH
1004016c ciranirvRttam apy etat pratyakSam iva darzitam
1004017a pravizya tAv ubhau suSThu tadA bhAvam agAyatAm
1004017c sahitau madhuraM raktaM saMpannaM svarasaMpadA
1004018a evaM prazasyamAnau tau tapaHzlAghyair maharSibhiH
1004018c saMraktataram atyarthaM madhuraM tAv agAyatAm
1004019a prItaH kaz cin munis tAbhyAM saMsthitaH kalazaM dadau
1004019c prasanno valkalaM kaz cid dadau tAbhyAM mahAyazAH
1004020a Azcaryam idam AkhyAnaM muninA saMprakIrtitam
1004020c paraM kavInAm AdhAraM samAptaM ca yathAkramam
1004021a prazasyamAnau sarvatra kadA cit tatra gAyakau
1004021c rathyAsu rAjamArgeSu dadarza bharatAgrajaH
1004022a svavezma cAnIya tato bhrAtarau sakuzIlavau
1004022c pUjayAm Asa pUjArhau rAmaH zatrunibarhaNaH
1004023a AsInaH kAJcane divye sa ca siMhAsane prabhuH
1004023c upopaviSTaiH sacivair bhrAtRbhiz ca paraMtapaH
1004024a dRSTvA tu rUpasaMpannau tAv ubhau vINinau tataH
1004024c uvAca lakSmaNaM rAmaH zatrughnaM bharataM tathA
1004025a zrUyatAm idam AkhyAnam anayor devavarcasoH
1004025c vicitrArthapadaM samyag gAyator madhurasvaram
1004026a imau munI pArthivalakSmaNAnvitau; kuzIlavau caiva mahAtapasvinau
1004026c mamApi tad bhUtikaraM pracakSate; mahAnubhAvaM caritaM nibodhata
1004027a tatas tu tau rAmavacaH pracoditAv; agAyatAM mArgavidhAnasaMpadA
1004027c sa cApi rAmaH pariSadgataH zanair; bubhUSayAsaktamanA babhUva ha
1005001a sarvApUrvam iyaM yeSAm AsIt kRtsnA vasuMdharA
1005001c prajApatim upAdAya nRpANAM jayazAlinAm
1005002a yeSAM sa sagaro nAma sAgaro yena khAnitaH
1005002c SaSTiH putrasahasrANi yaM yAntaM paryavArayan
1005003a ikSvAkUNAm idaM teSAM rAjJAM vaMze mahAtmanAm
1005003c mahad utpannam AkhyAnaM rAmAyaNam iti zrutam
1005004a tad idaM vartayiSyAmi sarvaM nikhilam AditaH
1005004c dharmakAmArthasahitaM zrotavyam anasUyayA
1005005a kosalo nAma muditaH sphIto janapado mahAn
1005005c niviSTaH sarayUtIre prabhUtadhanadhAnyavAn
1005006a ayodhyA nAma nagarI tatrAsIl lokavizrutA
1005006c manunA mAnavendreNa yA purI nirmitA svayam
1005007a AyatA daza ca dve ca yojanAni mahApurI
1005007c zrImatI trINi vistIrNA suvibhaktamahApathA
1005008a rAjamArgeNa mahatA suvibhaktena zobhitA
1005008c muktapuSpAvakIrNena jalasiktena nityazaH
1005009a tAM tu rAjA dazaratho mahArASTravivardhanaH
1005009c purIm AvAsayAm Asa divi devapatir yathA
1005010a kapATatoraNavatIM suvibhaktAntarApaNAm
1005010c sarvayantrAyudhavatIm upetAM sarvazilpibhiH
1005011a sUtamAgadhasaMbAdhAM zrImatIm atulaprabhAm
1005011c uccATTAladhvajavatIM zataghnIzatasaMkulAm
1005012a vadhUnATakasaGghaiz ca saMyuktAM sarvataH purIm
1005012c udyAnAmravaNopetAM mahatIM sAlamekhalAm
1005013a durgagambhIraparikhAM durgAm anyair durAsadAm
1005013c vAjivAraNasaMpUrNAM gobhir uSTraiH kharais tathA
1005014a sAmantarAjasaGghaiz ca balikarmabhir AvRtAm
1005014c nAnAdezanivAsaiz ca vaNigbhir upazobhitAm
1005015a prasAdai ratnavikRtaiH parvatair upazobhitAm
1005015c kUTAgAraiz ca saMpUrNAm indrasyevAmarAvatIm
1005016a citrAm aSTApadAkArAM varanArIgaNair yutAm
1005016c sarvaratnasamAkIrNAM vimAnagRhazobhitAm
1005017a gRhagADhAm avicchidrAM samabhUmau nivezitAm
1005017c zAlitaNDulasaMpUrNAm ikSukANDarasodakAm
1005018a dundubhIbhir mRdaGgaiz ca vINAbhiH paNavais tathA
1005018c nAditAM bhRzam atyarthaM pRthivyAM tAm anuttamAm
1005019a vimAnam iva siddhAnAM tapasAdhigataM divi
1005019c sunivezitavezmAntAM narottamasamAvRtAm
1005020a ye ca bANair na vidhyanti viviktam aparAparam
1005020c zabdavedhyaM ca vitataM laghuhastA vizAradAH
1005021a siMhavyAghravarAhANAM mattAnAM nadatAM vane
1005021c hantAro nizitaiH zastrair balAd bAhubalair api
1005022a tAdRzAnAM sahasrais tAm abhipUrNAM mahArathaiH
1005022c purIm AvAsayAm Asa rAjA dazarathas tadA
1005023a tAm agnimadbhir guNavadbhir AvRtAM; dvijottamair vedaSaDaGgapAragaiH
1005023c sahasradaiH satyaratair mahAtmabhir; maharSikalpair RSibhiz ca kevalaiH
1006001a puryAM tasyAm ayodhyAyAM vedavit sarvasaMgrahaH
1006001c dIrghadarzI mahAtejAH paurajAnapadapriyaH
1006002a ikSvAkUNAm atiratho yajvA dharmarato vazI
1006002c maharSikalpo rAjarSis triSu lokeSu vizrutaH
1006003a balavAn nihatAmitro mitravAn vijitendriyaH
1006003c dhanaiz ca saMcayaiz cAnyaiH zakravaizravaNopamaH
1006004a yathA manur mahAtejA lokasya parirakSitA
1006004c tathA dazaratho rAjA vasaJ jagad apAlayat
1006005a tena satyAbhisaMdhena trivargam anutiSThatA
1006005c pAlitA sA purI zreSThendreNa ivAmarAvatI
1006006a tasmin puravare hRSTA dharmAtmanA bahuzrutAH
1006006c narAs tuSTAdhanaiH svaiH svair alubdhAH satyavAdinaH
1006007a nAlpasaMnicayaH kaz cid AsIt tasmin purottame
1006007c kuTumbI yo hy asiddhArtho 'gavAzvadhanadhAnyavAn
1006008a kAmI vA na kadaryo vA nRzaMsaH puruSaH kva cit
1006008c draSTuM zakyam ayodhyAyAM nAvidvAn na ca nAstikaH
1006009a sarve narAz ca nAryaz ca dharmazIlAH susaMyatAH
1006009c muditAH zIlavRttAbhyAM maharSaya ivAmalAH
1006010a nAkuNDalI nAmukuTI nAsragvI nAlpabhogavAn
1006010c nAmRSTo nAnuliptAGgo nAsugandhaz ca vidyate
1006011a nAmRSTabhojI nAdAtA nApy anaGgadaniSkadhRk
1006011c nAhastAbharaNo vApi dRzyate nApy anAtmavAn
1006012a nAnAhitAgnir nAyajvA vipro nApy asahasradaH
1006012c kaz cid AsId ayodhyAyAM na ca nirvRttasaMkaraH
1006013a svakarmaniratA nityaM brAhmaNA vijitendriyAH
1006013c dAnAdhyayanazIlAz ca saMyatAz ca pratigrahe
1006014a na nAstiko nAnRtako na kaz cid abahuzrutaH
1006014c nAsUyako na cAzakto nAvidvAn vidyate tadA
1006015a na dInaH kSiptacitto vA vyathito vApi kaz cana
1006015c kaz cin naro vA nArI vA nAzrImAn nApy arUpavAn
1006015e draSTuM zakyam ayodhyAyAM nApi rAjanyabhaktimAn
1006016a varNeSv agryacaturtheSu devatAtithipUjakAH
1006016c dIrghAyuSo narAH sarve dharmaM satyaM ca saMzritAH
1006017a kSatraM brahmamukhaM cAsId vaizyAH kSatram anuvratAH
1006017c zUdrAH svadharmaniratAs trIn varNAn upacAriNaH
1006018a sA tenekSvAkunAthena purI suparirakSitA
1006018c yathA purastAn manunA mAnavendreNa dhImatA
1006019a yodhAnAm agnikalpAnAM pezalAnAm amarSiNAm
1006019c saMpUrNAkRtavidyAnAM guhAkesariNAm iva
1006020a kAmbojaviSaye jAtair bAhlIkaiz ca hayottamaiH
1006020c vanAyujair nadIjaiz ca pUrNAharihayopamaiH
1006021a vindhyaparvatajair mattaiH pUrNA haimavatair api
1006021c madAnvitair atibalair mAtaGgaiH parvatopamaiH
1006022a aJjanAd api niSkrAntair vAmanAd api ca dvipaiH
1006022c bhadramandrair bhadramRgair mRgamandraiz ca sA purI
1006023a nityamattaiH sadA pUrNA nAgair acalasaMnibhaiH
1006023c sA yojane ca dve bhUyaH satyanAmA prakAzate
1006024a tAM satyanAmAM dRDhatoraNArgalAm; gRhair vicitrair upazobhitAM zivAm
1006024c purIm ayodhyAM nRsahasrasaMkulAM; zazAsa vai zakrasamo mahIpatiH
1007001a aSTau babhUvur vIrasya tasyAmAtyA yazasvinaH
1007001c zucayaz cAnuraktAz ca rAjakRtyeSu nityazaH
1007002a dhRSTir jayanto vijayaH siddhArtho arthasAdhakaH
1007002c azoko mantrapAlaz ca sumantraz cASTamo 'bhavat
1007003a Rtvijau dvAv abhimatau tasyAstAm RSisattamau
1007003c vasiSTho vAmadevaz ca mantriNaz ca tathApare
1007004a zrImantaz ca mahAtmAnaH zAstrajJA dRDhavikramAH
1007004c kIrtimantaH praNihitA yathAvacanakAriNaH
1007005a tejaHkSamAyazaHprAptAH smitapUrvAbhibhASiNaH
1007005c krodhAt kAmArthahetor vA na brUyur anRtaM vacaH
1007006a teSAm aviditaM kiM cit sveSu nAsti pareSu vA
1007006c kriyamANaM kRtaM vApi cAreNApi cikIrSitam
1007007a kuzalA vyavahAreSu sauhRdeSu parIkSitAH
1007007c prAptakAlaM yathA daNDaM dhArayeyuH suteSv api
1007008a kozasaMgrahaNe yuktA balasya ca parigrahe
1007008c ahitaM cApi puruSaM na vihiMsyur adUSakam
1007009a vIrAz ca niyatotsAhA rAjazAstram anuSThitAH
1007009c zucInAM rakSitAraz ca nityaM viSayavAsinAm
1007010a brahmakSatram ahiMsantas te kozaM samapUrayan
1007010c sutIkSNadaNDAH saMprekSya puruSasya balAbalam
1007011a zucInAm ekabuddhInAM sarveSAM saMprajAnatAm
1007011c nAsIt pure vA rASTre vA mRSAvAdI naraH kva cit
1007012a kaz cin na duSTas tatrAsIt paradAraratir naraH
1007012c prazAntaM sarvam evAsId rASTraM puravaraM ca tat
1007013a suvAsasaH suvezAz ca te ca sarve suzIlinaH
1007013c hitArthaM ca narendrasya jAgrato nayacakSuSA
1007014a gurau guNagRhItAz ca prakhyAtAz ca parAkramaiH
1007014c videzeSv api vijJAtAH sarvato buddhinizcayAt
1007015a IdRzais tair amAtyais tu rAjA dazaratho 'naghaH
1007015c upapanno guNopetair anvazAsad vasuMdharAm
1007016a avekSamANaz cAreNa prajA dharmeNa raJjayan
1007016c nAdhyagacchad viziSTaM vA tulyaM vA zatrum AtmanaH
1007017a tair mantribhir mantrahitair niviSTair; vRto 'nuraktaiH kuzalaiH samarthaiH
1007017c sa pArthivo dIptim avApa yuktas; tejomayair gobhir ivodito 'rkaH
1008001a tasya tv evaM prabhAvasya dharmajJasya mahAtmanaH
1008001c sutArthaM tapyamAnasya nAsId vaMzakaraH sutaH
1008002a cintayAnasya tasyaivaM buddhir AsIn mahAtmanaH
1008002c sutArthaM vAjimedhena kimarthaM na yajAmy aham
1008003a sa nizcitAM matiM kRtvA yaSTavyam iti buddhimAn
1008003c mantribhiH saha dharmAtmA sarvair eva kRtAtmabhiH
1008004a tato 'bravId idaM rAjA sumantraM mantrisattamam
1008004c zIghram Anaya me sarvAn gurUMs tAn sapurohitAn
1008005a etac chrutvA rahaH sUto rAjAnam idam abravIt
1008005c Rtvigbhir upadiSTo 'yaM purAvRtto mayA zrutaH
1008006a sanatkumAro bhagavAn pUrvaM kathitavAn kathAm
1008006c RSINAM saMnidhau rAjaMs tava putrAgamaM prati
1008007a kAzyapasya tu putro 'sti vibhANDaka iti zrutaH
1008007c RzyazRGga iti khyAtas tasya putro bhaviSyati
1008008a sa vane nityasaMvRddho munir vanacaraH sadA
1008008c nAnyaM jAnAti viprendro nityaM pitranuvartanAt
1008009a dvaividhyaM brahmacaryasya bhaviSyati mahAtmanaH
1008009c lokeSu prathitaM rAjan vipraiz ca kathitaM sadA
1008010a tasyaivaM vartamAnasya kAlaH samabhivartata
1008010c agniM zuzrUSamANasya pitaraM ca yazasvinam
1008011a etasminn eva kAle tu lomapAdaH pratApavAn
1008011c aGgeSu prathito rAjA bhaviSyati mahAbalaH
1008012a tasya vyatikramAd rAjJo bhaviSyati sudAruNA
1008012c anAvRSTiH sughorA vai sarvabhUtabhayAvahA
1008013a anAvRSTyAM tu vRttAyAM rAjA duHkhasamanvitaH
1008013c brAhmaNAJ zrutavRddhAMz ca samAnIya pravakSyati
1008014a bhavantaH zrutadharmANo lokacAritravedinaH
1008014c samAdizantu niyamaM prAyazcittaM yathA bhavet
1008015a vakSyanti te mahIpAlaM brAhmaNA vedapAragAH
1008015c vibhANDakasutaM rAjan sarvopAyair ihAnaya
1008016a AnAyya ca mahIpAla RzyazRGgaM susatkRtam
1008016c prayaccha kanyAM zAntAM vai vidhinA susamAhitaH
1008017a teSAM tu vacanaM zrutvA rAjA cintAM prapatsyate
1008017c kenopAyena vai zakyam ihAnetuM sa vIryavAn
1008018a tato rAjA vinizcitya saha mantribhir AtmavAn
1008018c purohitam amAtyAMz ca preSayiSyati satkRtAn
1008019a te tu rAjJo vacaH zrutvA vyathitA vanatAnanAH
1008019c na gacchema RSer bhItA anuneSyanti taM nRpam
1008020a vakSyanti cintayitvA te tasyopAyAMz ca tAn kSamAn
1008020c AneSyAmo vayaM vipraM na ca doSo bhaviSyati
1008021a evam aGgAdhipenaiva gaNikAbhir RSeH sutaH
1008021c AnIto 'varSayad devaH zAntA cAsmai pradIyate
1008022a RzyazRGgas tu jAmAtA putrAMs tava vidhAsyati
1008022c sanatkumArakathitam etAvad vyAhRtaM mayA
1008023a atha hRSTo dazarathaH sumantraM pratyabhASata
1008023c yatharSyazRGgas tv AnIto vistareNa tvayocyatAm
1009001a sumantraz codito rAjJA provAcedaM vacas tadA
1009001c yatharSyazRGgas tv AnItaH zRNu me mantribhiH saha
1009002a lomapAdam uvAcedaM sahAmAtyaH purohitaH
1009002c upAyo nirapAyo 'yam asmAbhir abhicintitaH
1009003a RzyazRGgo vanacaras tapaHsvAdhyAyane rataH
1009003c anabhijJaH sa nArINAM viSayANAM sukhasya ca
1009004a indriyArthair abhimatair naracittapramAthibhiH
1009004c puram AnAyayiSyAmaH kSipraM cAdhyavasIyatAm
1009005a gaNikAs tatra gacchantu rUpavatyaH svalaMkRtAH
1009005c pralobhya vividhopAyair AneSyantIha satkRtAH
1009006a zrutvA tatheti rAjA ca pratyuvAca purohitam
1009006c purohito mantriNaz ca tathA cakruz ca te tadA
1009007a vAramukhyAs tu tac chrutvA vanaM pravivizur mahat
1009007c AzramasyAvidUre 'smin yatnaM kurvanti darzane
1009007e RSiputrasya ghorasya nityam AzramavAsinaH
1009008e pituH sa nityasaMtuSTo nAticakrAma cAzramAt
1009009a na tena janmaprabhRti dRSTapUrvaM tapasvinA
1009009c strI vA pumAn vA yac cAnyat sattvaM nagararASTrajam
1009010a tataH kadA cit taM dezam AjagAma yadRcchayA
1009010c vibhANDakasutas tatra tAz cApazyad varAGganAH
1009011a tAz citraveSAH pramadA gAyantyo madhurasvaraiH
1009011c RSiputram upAgamya sarvA vacanam abruvan
1009012a kas tvaM kiM vartase brahmaJ jJAtum icchAmahe vayam
1009012c ekas tvaM vijane ghore vane carasi zaMsa naH
1009013a adRSTarUpAs tAs tena kAmyarUpA vane striyaH
1009013c hArdAt tasya matir jAtA AkhyAtuM pitaraM svakam
1009014a pitA vibhANDako 'smAkaM tasyAhaM suta aurasaH
1009014c RzyazRGga iti khyAtaM nAma karma ca me bhuvi
1009015a ihAzramapado 'smAkaM samIpe zubhadarzanAH
1009015c kariSye vo 'tra pUjAM vai sarveSAM vidhipUrvakam
1009016a RSiputravacaH zrutvA sarvAsAM matir Asa vai
1009016c tad AzramapadaM draSTuM jagmuH sarvAz ca tena ha
1009017a gatAnAM tu tataH pUjAm RSiputraz cakAra ha
1009017c idam arghyam idaM pAdyam idaM mUlaM phalaM ca naH
1009018a pratigRhya tu tAM pUjAM sarvA eva samutsukAH
1009018c RSer bhItAz ca zIghraM tu gamanAya matiM dadhuH
1009019a asmAkam api mukhyAni phalAnImAni vai dvija
1009019c gRhANa prati bhadraM te bhakSayasva ca mA ciram
1009020a tatas tAs taM samAliGgya sarvA harSasamanvitAH
1009020c modakAn pradadus tasmai bhakSyAMz ca vividhAJ zubhAn
1009021a tAni cAsvAdya tejasvI phalAnIti sma manyate
1009021c anAsvAditapUrvANi vane nityanivAsinA
1009022a ApRcchya ca tadA vipraM vratacaryAM nivedya ca
1009022c gacchanti smApadezAt tA bhItAs tasya pituH striyaH
1009023a gatAsu tAsu sarvAsu kAzyapasyAtmajo dvijaH
1009023c asvasthahRdayaz cAsId duHkhaM sma parivartate
1009024a tato 'paredyus taM dezam AjagAma sa vIryavAn
1009024c manojJA yatra tA dRSTA vAramukhyAH svalaMkRtAH
1009025a dRSTvaiva ca tadA vipram AyAntaM hRSTamAnasAH
1009025c upasRtya tataH sarvAs tAs tam Ucur idaM vacaH
1009026a ehy AzramapadaM saumya asmAkam iti cAbruvan
1009026c tatrApy eSa vidhiH zrImAn vizeSeNa bhaviSyati
1009027a zrutvA tu vacanaM tAsAM sarvAsAM hRdayaMgamam
1009027c gamanAya matiM cakre taM ca ninyus tadA striyaH
1009028a tatra cAnIyamAne tu vipre tasmin mahAtmani
1009028c vavarSa sahasA devo jagat prahlAdayaMs tadA
1009029a varSeNaivAgataM vipraM viSayaM svaM narAdhipaH
1009029c pratyudgamya muniM prahvaH zirasA ca mahIM gataH
1009030a arghyaM ca pradadau tasmai nyAyataH susamAhitaH
1009030c vavre prasAdaM viprendrAn mA vipraM manyur Avizet
1009031a antaHpuraM pravizyAsmai kanyAM dattvA yathAvidhi
1009031c zAntAM zAntena manasA rAjA harSam avApa saH
1009032a evaM sa nyavasat tatra sarvakAmaiH supUjitaH
1009032c RzyazRGgo mahAtejAH zAntayA saha bhAryayA
1010001a bhUya eva ca rAjendra zRNu me vacanaM hitam
1010001c yathA sa devapravaraH kathAyAm evam abravIt
1010002a ikSvAkUNAM kule jAto bhaviSyati sudhArmikaH
1010002c rAjA dazaratho nAmnA zrImAn satyapratizravaH
1010003a aGgarAjena sakhyaM ca tasya rAjJo bhaviSyati
1010003c kanyA cAsya mahAbhAgA zAntA nAma bhaviSyati
1010004a putras tv aGgasya rAjJas tu lomapAda iti zrutaH
1010004c taM sa rAjA dazaratho gamiSyati mahAyazAH
1010005a anapatyo 'smi dharmAtmaJ zAntAbhartA mama kratum
1010005c Ahareta tvayAjJaptaH saMtAnArthaM kulasya ca
1010006a zrutvA rAjJo 'tha tad vAkyaM manasA sa vicintya ca
1010006c pradAsyate putravantaM zAntA bhartAram AtmavAn
1010007a pratigRhya ca taM vipraM sa rAjA vigatajvaraH
1010007c AhariSyati taM yajJaM prahRSTenAntarAtmanA
1010008a taM ca rAjA dazaratho yaSTukAmaH kRtAJjaliH
1010008c RzyazRGgaM dvijazreSThaM varayiSyati dharmavit
1010009a yajJArthaM prasavArthaM ca svargArthaM ca narezvaraH
1010009c labhate ca sa taM kAmaM dvijamukhyAd vizAM patiH
1010010a putrAz cAsya bhaviSyanti catvAro 'mitavikramAH
1010010c vaMzapratiSThAnakarAH sarvalokeSu vizrutAH
1010011a evaM sa devapravaraH pUrvaM kathitavAn kathAm
1010011c sanatkumAro bhagavAn purA devayuge prabhuH
1010012a sa tvaM puruSazArdUla tam Anaya susatkRtam
1010012c svayam eva mahArAja gatvA sabalavAhanaH
1010013a anumAnya vasiSThaM ca sUtavAkyaM nizamya ca
1010013c sAntaHpuraH sahAmAtyaH prayayau yatra sa dvijaH
1010014a vanAni saritaz caiva vyatikramya zanaiH zanaiH
1010014c abhicakrAma taM dezaM yatra vai munipuMgavaH
1010015a AsAdya taM dvijazreSThaM lomapAdasamIpagam
1010015c RSiputraM dadarzAdau dIpyamAnam ivAnalam
1010016a tato rAjA yathAnyAyaM pUjAM cakre vizeSataH
1010016c sakhitvAt tasya vai rAjJaH prahRSTenAntarAtmanA
1010017a lomapAdena cAkhyAtam RSiputrAya dhImate
1010017c sakhyaM saMbandhakaM caiva tadA taM pratyapUjayat
1010018a evaM susatkRtas tena sahoSitvA nararSabhaH
1010018c saptASTadivasAn rAjA rAjAnam idam abravIt
1010019a zAntA tava sutA rAjan saha bhartrA vizAmpate
1010019c madIyaM nagaraM yAtu kAryaM hi mahad udyatam
1010020a tatheti rAjA saMzrutya gamanaM tasya dhImataH
1010020c uvAca vacanaM vipraM gaccha tvaM saha bhAryayA
1010021a RSiputraH pratizrutya tathety Aha nRpaM tadA
1010021c sa nRpeNAbhyanujJAtaH prayayau saha bhAryayA
1010022a tAv anyonyAJjaliM kRtvA snehAt saMzliSya corasA
1010022c nanandatur dazaratho lomapAdaz ca vIryavAn
1010023a tataH suhRdam ApRcchya prasthito raghunandanaH
1010023c paurebhyaH preSayAm Asa dUtAn vai zIghragAminaH
1010023e kriyatAM nagaraM sarvaM kSipram eva svalaMkRtam
1010024a tataH prahRSTAH paurAs te zrutvA rAjAnam Agatam
1010024c tathA pracakrus tat sarvaM rAjJA yat preSitaM tadA
1010025a tataH svalaMkRtaM rAjA nagaraM praviveza ha
1010025c zaGkhadundubhinirghoSaiH puraskRtya dvijarSabham
1010026a tataH pramuditAH sarve dRSTvA taM nAgarA dvijam
1010026c pravezyamAnaM satkRtya narendreNendrakarmaNA
1010027a antaHpuraM pravezyainaM pUjAM kRtvA tu zAstrataH
1010027c kRtakRtyaM tadAtmAnaM mene tasyopavAhanAt
1010028a antaHpurANi sarvANi zAntAM dRSTvA tathAgatAm
1010028c saha bhartrA vizAlAkSIM prItyAnandam upAgaman
1010029a pUjyamAnA ca tAbhiH sA rAjJA caiva vizeSataH
1010029c uvAsa tatra sukhitA kaM cit kAlaM saha dvijA
1011001a tataH kAle bahutithe kasmiMz cit sumanohare
1011001c vasante samanuprApte rAjJo yaSTuM mano 'bhavat
1011002a tataH prasAdya zirasA taM vipraM devavarNinam
1011002c yajJAya varayAm Asa saMtAnArthaM kulasya vai
1011003a tatheti ca sa rAjAnam uvAca ca susatkRtaH
1011003c saMbhArAH saMbhriyantAM te turagaz ca vimucyatAm
1011004a tato rAjAbravId vAkyaM sumantraM mantrisattamam
1011004c sumantrAvAhaya kSipram Rtvijo brahmavAdinaH
1011005a tataH sumantras tvaritaM gatvA tvaritavikramaH
1011005c samAnayat sa tAn viprAn samastAn vedapAragAn
1011006a suyajJaM vAmadevaM ca jAbAlim atha kAzyapam
1011006c purohitaM vasiSThaM ca ye cAnye dvijasattamAH
1011007a tAn pUjayitvA dharmAtmA rAjA dazarathas tadA
1011007c idaM dharmArthasahitaM zlakSNaM vacanam abravIt
1011008a mama lAlapyamAnasya putrArthaM nAsti vai sukham
1011008c tadarthaM hayamedhena yakSyAmIti matir mama
1011009a tad ahaM yaSTum icchAmi zAstradRSTena karmaNA
1011009c RSiputraprabhAvena kAmAn prApsyAmi cApy aham
1011010a tataH sAdhv iti tad vAkyaM brAhmaNAH pratyapUjayan
1011010c vasiSThapramukhAH sarve pArthivasya mukhAc cyutam
1011011a RzyazRGgapurogAz ca pratyUcur nRpatiM tadA
1011011c saMbhArAH saMbhriyantAM te turagaz ca vimucyatAm
1011012a sarvathA prApyase putrAMz caturo 'mitavikramAn
1011012c yasya te dhArmikI buddhir iyaM putrArtham AgatA
1011013a tataH prIto 'bhavad rAjA zrutvA tad dvijabhASitam
1011013c amAtyAMz cAbravId rAjA harSeNedaM zubhAkSaram
1011014a gurUNAM vacanAc chIghraM saMbhArAH saMbhriyantu me
1011014c samarthAdhiSThitaz cAzvaH sopAdhyAyo vimucyatAm
1011015a sarayvAz cottare tIre yajJabhUmir vidhIyatAm
1011015c zAntayaz cAbhivardhantAM yathAkalpaM yathAvidhi
1011016a zakyaH kartum ayaM yajJaH sarveNApi mahIkSitA
1011016c nAparAdho bhavet kaSTo yady asmin kratusattame
1011017a chidraM hi mRgayante 'tra vidvAMso brahmarAkSasAH
1011017c vidhihInasya yajJasya sadyaH kartA vinazyati
1011018a tad yathA vidhipUrvaM me kratur eSa samApyate
1011018c tathAvidhAnaM kriyatAM samarthAH karaNeSv iha
1011019a tatheti ca tataH sarve mantriNaH pratyapUjayan
1011019c pArthivendrasya tad vAkyaM yathAjJaptam akurvata
1011020a tato dvijAs te dharmajJam astuvan pArthivarSabham
1011020c anujJAtAs tataH sarve punar jagmur yathAgatam
1011021a gatAnAM tu dvijAtInAM mantriNas tAn narAdhipaH
1011021c visarjayitvA svaM vezma praviveza mahAdyutiH
1012001a punaH prApte vasante tu pUrNaH saMvatsaro 'bhavat
1012001c abhivAdya vasiSThaM ca nyAyataH pratipUjya ca
1012002a abravIt prazritaM vAkyaM prasavArthaM dvijottamam
1012002c yajJo me kriyatAM vipra yathoktaM munipuMgava
1012003a yathA na vighnaH kriyate yajJAGgeSu vidhIyatAm
1012003c bhavAn snigdhaH suhRn mahyaM guruz ca paramo mahAn
1012004a voDhavyo bhavatA caiva bhAro yajJasya codyataH
1012004c tatheti ca sa rAjAnam abravId dvijasattamaH
1012005a kariSye sarvam evaitad bhavatA yat samarthitam
1012005c tato 'bravId dvijAn vRddhAn yajJakarmasu niSThitAn
1012006a sthApatye niSThitAMz caiva vRddhAn paramadhArmikAn
1012006c karmAntikAJ zilpakArAn vardhakIn khanakAn api
1012007a gaNakAJ zilpinaz caiva tathaiva naTanartakAn
1012007c tathA zucIJ zAstravidaH puruSAn subahuzrutAn
1012008a yajJakarma samIhantAM bhavanto rAjazAsanAt
1012008c iSTakA bahusAhasrI zIghram AnIyatAm iti
1012009a aupakAryAH kriyantAM ca rAjJAM bahuguNAnvitAH
1012009c brAhmaNAvasathAz caiva kartavyAH zatazaH zubhAH
1012010a bhakSyAnnapAnair bahubhiH samupetAH suniSThitAH
1012010c tathA paurajanasyApi kartavyA bahuvistarAH
1012011a AvAsA bahubhakSyA vai sarvakAmair upasthitAH
1012011c tathA jAnapadasyApi janasya bahuzobhanam
1012012a dAtavyam annaM vidhivat satkRtya na tu lIlayA
1012012c sarve varNA yathA pUjAM prApnuvanti susatkRtAH
1012013a na cAvajJA prayoktavyA kAmakrodhavazAd api
1012013c yajJakarmasu ye 'vyagrAH puruSAH zilpinas tathA
1012014a teSAm api vizeSeNa pUjA kAryA yathAkramam
1012014c yathA sarvaM suvihitaM na kiM cit parihIyate
1012015a tathA bhavantaH kurvantu prItisnigdhena cetasA
1012015c tataH sarve samAgamya vasiSTham idam abruvan
1012016a yathoktaM tat kariSyAmo na kiM cit parihAsyate
1012016c tataH sumantram AhUya vasiSTho vAkyam abravIt
1012017a nimantrayasya nRpatIn pRthivyAM ye ca dhArmikAH
1012017c brAhmaNAn kSatriyAn vaizyAJ zUdrAMz caiva sahasrazaH
1012018a samAnayasva satkRtya sarvadezeSu mAnavAn
1012018c mithilAdhipatiM zUraM janakaM satyavikramam
1012019a niSThitaM sarvazAstreSu tathA vedeSu niSThitam
1012019c tam Anaya mahAbhAgaM svayam eva susatkRtam
1012019e pUrvasaMbandhinaM jJAtvA tataH pUrvaM bravImi te
1012020a tathA kAzipatiM snigdhaM satataM priyavAdinam
1012020c sadvRttaM devasaMkAzaM svayam evAnayasva ha
1012021a tathA kekayarAjAnaM vRddhaM paramadhArmikam
1012021c zvazuraM rAjasiMhasya saputraM tam ihAnaya
1012022a aGgezvaraM mahAbhAgaM lomapAdaM susatkRtam
1012022c vayasyaM rAjasiMhasya tam Anaya yazasvinam
1012023a prAcInAn sindhusauvIrAn saurASThreyAMz ca pArthivAn
1012023c dAkSiNAtyAn narendrAMz ca samastAn Anayasva ha
1012024a santi snigdhAz ca ye cAnye rAjAnaH pRthivItale
1012024c tAn Anaya yathAkSipraM sAnugAn sahabAndhavAn
1012025a vasiSThavAkyaM tac chrutvA sumantras tvaritas tadA
1012025c vyAdizat puruSAMs tatra rAjJAm Anayane zubhAn
1012026a svayam eva hi dharmAtmA prayayau munizAsanAt
1012026c sumantras tvarito bhUtvA samAnetuM mahIkSitaH
1012027a te ca karmAntikAH sarve vasiSThAya ca dhImate
1012027c sarvaM nivedayanti sma yajJe yad upakalpitam
1012028a tataH prIto dvijazreSThas tAn sarvAn punar abravIt
1012028c avajJayA na dAtavyaM kasya cil lIlayApi vA
1012028e avajJayA kRtaM hanyAd dAtAraM nAtra saMzayaH
1012029a tataH kaiz cid ahorAtrair upayAtA mahIkSitaH
1012029c bahUni ratnAny AdAya rAjJo dazarathasya ha
1012030a tato vasiSThaH suprIto rAjAnam idam abravIt
1012030c upayAtA naravyAghra rAjAnas tava zAsanAt
1012031a mayApi satkRtAH sarve yathArhaM rAjasattamAH
1012031c yajJiyaM ca kRtaM rAjan puruSaiH susamAhitaiH
1012032a niryAtu ca bhavAn yaSTuM yajJAyatanam antikAt
1012032c sarvakAmair upahRtair upetaM vai samantataH
1012033a tathA vasiSThavacanAd RzyazRGgasya cobhayoH
1012033c zubhe divasa nakSatre niryAto jagatIpatiH
1012034a tato vasiSThapramukhAH sarva eva dvijottamAH
1012034c RzyazRGgaM puraskRtya yajJakarmArabhaMs tadA
1013001a atha saMvatsare pUrNe tasmin prApte turaGgame
1013001c sarayvAz cottare tIre rAjJo yajJo 'bhyavartata
1013002a RzyazRGgaM puraskRtya karma cakrur dvijarSabhAH
1013002c azvamedhe mahAyajJe rAjJo 'sya sumahAtmanaH
1013003a karma kurvanti vidhivad yAjakA vedapAragAH
1013003c yathAvidhi yathAnyAyaM parikrAmanti zAstrataH
1013004a pravargyaM zAstrataH kRtvA tathaivopasadaM dvijAH
1013004c cakruz ca vidhivat sarvam adhikaM karma zAstrataH
1013005a abhipUjya tato hRSTAH sarve cakrur yathAvidhi
1013005c prAtaHsavanapUrvANi karmANi munipuMgavAH
1013006a na cAhutam abhUt tatra skhalitaM vApi kiM cana
1013006c dRzyate brahmavat sarvaM kSemayuktaM hi cakrire
1013007a na teSv ahaHsu zrAnto vA kSudhito vApi dRzyate
1013007c nAvidvAn brAhmaNas tatra nAzatAnucaras tathA
1013008a brAhmaNA bhuJjate nityaM nAthavantaz ca bhuJjate
1013008c tApasA bhuJjate cApi zramaNA bhuJjate tathA
1013009a vRddhAz ca vyAdhitAz caiva striyo bAlAs tathaiva ca
1013009c anizaM bhuJjamAnAnAM na tRptir upalabhyate
1013010a dIyatAM dIyatAm annaM vAsAMsi vividhAni ca
1013010c iti saMcoditAs tatra tathA cakrur anekazaH
1013011a annakUTAz ca bahavo dRzyante parvatopamAH
1013011c divase divase tatra siddhasya vidhivat tadA
1013012a annaM hi vidhivat svAdu prazaMsanti dvijarSabhAH
1013012c aho tRptAH sma bhadraM te iti zuzrAva rAghavaH
1013013a svalaMkRtAz ca puruSA brAhmaNAn paryaveSayan
1013013c upAsate ca tAn anye sumRSTamaNikuNDalAH
1013014a karmAntare tadA viprA hetuvAdAn bahUn api
1013014c prAhuH suvAgmino dhIrAH parasparajigISayA
1013015a divase divase tatra saMstare kuzalA dvijAH
1013015c sarvakarmANi cakrus te yathAzAstraM pracoditAH
1013016a nASaDaGgavid atrAsIn nAvrato nAbahuzrutaH
1013016c sadasyas tasya vai rAjJo nAvAdakuzalo dvijaH
1013017a prApte yUpocchraye tasmin SaD bailvAH khAdirAs tathA
1013017c tAvanto bilvasahitAH parNinaz ca tathApare
1013018a zleSmAtakamayo diSTo devadArumayas tathA
1013018c dvAv eva tatra vihitau bAhuvyastaparigrahau
1013019a kAritAH sarva evaite zAstrajJair yajJakovidaiH
1013019c zobhArthaM tasya yajJasya kAJcanAlaMkRtA bhavan
1013020a vinyastA vidhivat sarve zilpibhiH sukRtA dRDhAH
1013020c aSTAzrayaH sarva eva zlakSNarUpasamanvitAH
1013021a AcchAditAs te vAsobhiH puSpair gandhaiz ca bhUSitAH
1013021c saptarSayo dIptimanto virAjante yathA divi
1013022a iSTakAz ca yathAnyAyaM kAritAz ca pramANataH
1013022c cito 'gnir brAhmaNais tatra kuzalaiH zulbakarmaNi
1013023a sa cityo rAjasiMhasya saMcitaH kuzalair dvijaiH
1013023c garuDo rukmapakSo vai triguNo 'STAdazAtmakaH
1013024a niyuktAs tatra pazavas tat tad uddizya daivatam
1013024c uragAH pakSiNaz caiva yathAzAstraM pracoditAH
1013024e zAmitre tu hayas tatra tathA jala carAz ca ye
1013025a RtvigbhiH sarvam evaitan niyuktaM zAstratas tadA
1013025c pazUnAM trizataM tatra yUpeSu niyataM tadA
1013025e azvaratnottamaM tasya rAjJo dazarathasya ha
1013026a kausalyA taM hayaM tatra paricarya samantataH
1013026c kRpANair vizazAsainaM tribhiH paramayA mudA
1013027a patatriNA tadA sArdhaM susthitena ca cetasA
1013027c avasad rajanIm ekAM kausalyA dharmakAmyayA
1013028a hotAdhvaryus tathodgAtA hayena samayojayan
1013028c mahiSyA parivRktyAtha vAvAtAm aparAM tathA
1013029a patatriNas tasya vapAm uddhRtya niyatendriyaH
1013029c Rtvik parama saMpannaH zrapayAm Asa zAstrataH
1013030a dhUmagandhaM vapAyAs tu jighrati sma narAdhipaH
1013030c yathAkAlaM yathAnyAyaM nirNudan pApam AtmanaH
1013031a hayasya yAni cAGgAni tAni sarvANi brAhmaNAH
1013031c agnau prAsyanti vidhivat samastAH SoDazartvijaH
1013032a plakSazAkhAsu yajJAnAm anyeSAM kriyate haviH
1013032c azvamedhasya caikasya vaitaso bhAga iSyate
1013033a tryaho 'zvamedhaH saMkhyAtaH kalpasUtreNa brAhmaNaiH
1013033c catuSTomam ahas tasya prathamaM parikalpitam
1013034a ukthyaM dvitIyaM saMkhyAtam atirAtraM tathottaram
1013034c kAritAs tatra bahavo vihitAH zAstradarzanAt
1013035a jyotiSTomAyuSI caiva atirAtrau ca nirmitau
1013035c abhijid vizvajic caiva aptoryAmo mahAkratuH
1013036a prAcIM hotre dadau rAjA dizaM svakulavardhanaH
1013036c adhvaryave pratIcIM tu brahmaNe dakSiNAM dizam
1013037a udgAtre tu tathodIcIM dakSiNaiSA vinirmitA
1013037c azvamedhe mahAyajJe svayambhuvihite purA
1013038a kratuM samApya tu tadA nyAyataH puruSarSabhaH
1013038c Rtvigbhyo hi dadau rAjA dharAM tAM kratuvardhanaH
1013039a Rtvijas tv abruvan sarve rAjAnaM gatakalmaSam
1013039c bhavAn eva mahIM kRtsnAm eko rakSitum arhati
1013040a na bhUmyA kAryam asmAkaM na hi zaktAH sma pAlane
1013040c ratAH svAdhyAyakaraNe vayaM nityaM hi bhUmipa
1013040e niSkrayaM kiM cid eveha prayacchatu bhavAn iti
1013041a gavAM zatasahasrANi daza tebhyo dadau nRpaH
1013041c dazakoTiM suvarNasya rajatasya caturguNam
1013042a Rtvijas tu tataH sarve pradaduH sahitA vasu
1013042c RzyazRGgAya munaye vasiSThAya ca dhImate
1013043a tatas te nyAyataH kRtvA pravibhAgaM dvijottamAH
1013043c suprItamanasaH sarve pratyUcur muditA bhRzam
1013044a tataH prItamanA rAjA prApya yajJam anuttamam
1013044c pApApahaM svarnayanaM dustaraM pArthivarSabhaiH
1013045a tato 'bravId RzyazRGgaM rAjA dazarathas tadA
1013045c kulasya vardhanaM tat tu kartum arhasi suvrata
1013046a tatheti ca sa rAjAnam uvAca dvijasattamaH
1013046c bhaviSyanti sutA rAjaMz catvAras te kulodvahAH
1014001a medhAvI tu tato dhyAtvA sa kiM cid idam uttamam
1014001c labdhasaMjJas tatas taM tu vedajJo nRpam abravIt
1014002a iSTiM te 'haM kariSyAmi putrIyAM putrakAraNAt
1014002c atharvazirasi proktair mantraiH siddhAM vidhAnataH
1014003a tataH prAkramad iSTiM tAM putrIyAM putra kAraNAt
1014003c juhAva cAgnau tejasvI mantradRSTena karmaNA
1014004a tato devAH sagandharvAH siddhAz ca paramarSayaH
1014004c bhAgapratigrahArthaM vai samavetA yathAvidhi
1014005a tAH sametya yathAnyAyaM tasmin sadasi devatAH
1014005c abruva&l lokakartAraM brahmANaM vacanaM mahat
1014006a bhagavaMs tvatprasAdena rAvaNo nAma rAkSasaH
1014006c sarvAnno bAdhate vIryAc chAsituM taM na zaknumaH
1014007a tvayA tasmai varo dattaH prItena bhagavan purA
1014007c mAnayantaz ca taM nityaM sarvaM tasya kSamAmahe
1014008a udvejayati lokAMs trIn ucchritAn dveSTi durmatiH
1014008c zakraM tridazarAjAnaM pradharSayitum icchati
1014009a RSIn yakSAn sagandharvAn asurAn brAhmaNAMs tathA
1014009c atikrAmati durdharSo varadAnena mohitaH
1014010a nainaM sUryaH pratapati pArzve vAti na mArutaH
1014010c calormimAlI taM dRSTvA samudro 'pi na kampate
1014011a tan mahan no bhayaM tasmAd rAkSasAd ghoradarzanAt
1014011c vadhArthaM tasya bhagavann upAyaM kartum arhasi
1014012a evam uktaH suraiH sarvaiz cintayitvA tato 'bravIt
1014012c hantAyaM vihitas tasya vadhopAyo durAtmanaH
1014013a tena gandharvayakSANAM devadAnavarakSasAm
1014013c avadhyo 'smIti vAg uktA tathety uktaM ca tan mayA
1014014a nAkIrtayad avajJAnAt tad rakSo mAnuSAMs tadA
1014014c tasmAt sa mAnuSAd vadhyo mRtyur nAnyo 'sya vidyate
1014015a etac chrutvA priyaM vAkyaM brahmaNA samudAhRtam
1014015c devA maharSayaH sarve prahRSTAs te 'bhavaMs tadA
1014016a etasminn antare viSNur upayAto mahAdyutiH
1014016c brahmaNA ca samAgamya tatra tasthau samAhitaH
1014017a tam abruvan surAH sarve samabhiSTUya saMnatAH
1014017c tvAM niyokSyAmahe viSNo lokAnAM hitakAmyayA
1014018a rAjJo dazarathasya tvam ayodhyAdhipater vibho
1014018c dharmajJasya vadAnyasya maharSisamatejasaH
1014018e tasya bhAryAsu tisRSu hrIzrIkIrtyupamAsu ca
1014018g viSNo putratvam Agaccha kRtvAtmAnaM caturvidham
1014019a tatra tvaM mAnuSo bhUtvA pravRddhaM lokakaNTakam
1014019c avadhyaM daivatair viSNo samare jahi rAvaNam
1014020a sa hi devAn sagandharvAn siddhAMz ca RSisattamAn
1014020c rAkSaso rAvaNo mUrkho vIryotsekena bAdhate
1014021a tad uddhataM rAvaNam RddhatejasaM; pravRddhadarpaM tridazezvaradviSam
1014021c virAvaNaM sAdhu tapasvikaNTakaM; tapasvinAm uddhara taM bhayAvaham
1015001a tato nArAyaNo viSNur niyuktaH surasattamaiH
1015001c jAnann api surAn evaM zlakSNaM vacanam abravIt
1015002a upAyaH ko vadhe tasya rAkSasAdhipateH surAH
1015002c yam ahaM taM samAsthAya nihanyAm RSikaNTakam
1015003a evam uktAH surAH sarve pratyUcur viSNum avyayam
1015003c mAnuSIM tanum AsthAya rAvaNaM jahi saMyuge
1015004a sa hi tepe tapas tIvraM dIrghakAlam ariMdama
1015004c yena tuSTo 'bhavad brahmA lokakRl lokapUjitaH
1015005a saMtuSTaH pradadau tasmai rAkSasAya varaM prabhuH
1015005c nAnAvidhebhyo bhUtebhyo bhayaM nAnyatra mAnuSAt
1015006a avajJAtAH purA tena varadAnena mAnavAH
1015006c tasmAt tasya vadho dRSTo mAnuSebhyaH paraMtapa
1015007a ity etad vacanaM zrutvA surANAM viSNur AtmavAn
1015007c pitaraM rocayAm Asa tadA dazarathaM nRpam
1015008a sa cApy aputro nRpatis tasmin kAle mahAdyutiH
1015008c ayajat putriyAm iSTiM putrepsur arisUdanaH
1015009a tato vai yajamAnasya pAvakAd atulaprabham
1015009c prAdurbhUtaM mahad bhUtaM mahAvIryaM mahAbalam
1015010a kRSNaM raktAmbaradharaM raktAsyaM dundubhisvanam
1015010c snigdhaharyakSatanujazmazrupravaramUrdhajam
1015011a zubhalakSaNasaMpannaM divyAbharaNabhUSitam
1015011c zailazRGgasamutsedhaM dRptazArdUlavikramam
1015012a divAkarasamAkAraM dIptAnalazikhopamam
1015012c taptajAmbUnadamayIM rAjatAntaparicchadAm
1015013a divyapAyasasaMpUrNAM pAtrIM patnIm iva priyAm
1015013c pragRhya vipulAM dorbhyAM svayaM mAyAmayIm iva
1015014a samavekSyAbravId vAkyam idaM dazarathaM nRpam
1015014c prAjApatyaM naraM viddhi mAm ihAbhyAgataM nRpa
1015015a tataH paraM tadA rAjA pratyuvAca kRtAJjaliH
1015015c bhagavan svAgataM te 'stu kim ahaM karavANi te
1015016a atho punar idaM vAkyaM prAjApatyo naro 'bravIt
1015016c rAjann arcayatA devAn adya prAptam idaM tvayA
1015017a idaM tu narazArdUla pAyasaM devanirmitam
1015017c prajAkaraM gRhANa tvaM dhanyam Arogyavardhanam
1015018a bhAryANAm anurUpANAm aznIteti prayaccha vai
1015018c tAsu tvaM lapsyase putrAn yadarthaM yajase nRpa
1015019a tatheti nRpatiH prItaH zirasA pratigRhya tAm
1015019c pAtrIM devAnnasaMpUrNAM devadattAM hiraNmayIm
1015020a abhivAdya ca tad bhUtam adbhutaM priyadarzanam
1015020c mudA paramayA yuktaz cakArAbhipradakSiNam
1015021a tato dazarathaH prApya pAyasaM devanirmitam
1015021c babhUva paramaprItaH prApya vittam ivAdhanaH
1015022a tatas tad adbhutaprakhyaM bhUtaM paramabhAsvaram
1015022c saMvartayitvA tat karma tatraivAntaradhIyata
1015023a harSarazmibhir udyotaM tasyAntaHpuram Ababhau
1015023c zAradasyAbhirAmasya candrasyeva nabho'MzubhiH
1015024a so 'ntaHpuraM pravizyaiva kausalyAm idam abravIt
1015024c pAyasaM pratigRhNISva putrIyaM tv idam AtmanaH
1015025a kausalyAyai narapatiH pAyasArdhaM dadau tadA
1015025c ardhAd ardhaM dadau cApi sumitrAyai narAdhipaH
1015025e kaikeyyai cAvaziSTArdhaM dadau putrArthakAraNAt
1015026a pradadau cAvaziSTArdhaM pAyasasyAmRtopamam
1015026c anucintya sumitrAyai punar eva mahIpatiH
1015027a evaM tAsAM dadau rAjA bhAryANAM pAyasaM pRthak
1015028a tAs tv etat pAyasaM prApya narendrasyottamAH striyaH
1015028c saMmAnaM menire sarvAH praharSoditacetasaH
1016001a putratvaM tu gate viSNau rAjJas tasya mahAtmanaH
1016001c uvAca devatAH sarvAH svayambhUr bhagavAn idam
1016002a satyasaMdhasya vIrasya sarveSAM no hitaiSiNaH
1016002c viSNoH sahAyAn balinaH sRjadhvaM kAmarUpiNaH
1016003a mAyAvidaz ca zUrAMz ca vAyuvegasamAJjave
1016003c nayajJAn buddhisaMpannAn viSNutulyaparAkramAn
1016004a asaMhAryAn upAyajJAn divyasaMhananAnvitAn
1016004c sarvAstraguNasaMpannAn amRtaprAzanAn iva
1016005a apsaraHsu ca mukhyAsu gandharvINAM tanUSu ca
1016005c yakSapannagakanyAsu RSkavidyAdharISu ca
1016006a kiMnarINAM ca gAtreSu vAnarINAM tanUSu ca
1016006c sRjadhvaM harirUpeNa putrAMs tulyaparAkramAn
1016007a te tathoktA bhagavatA tat pratizrutya zAsanam
1016007c janayAm Asur evaM te putrAn vAnararUpiNaH
1016008a RSayaz ca mahAtmAnaH siddhavidyAdharoragAH
1016008c cAraNAz ca sutAn vIrAn sasRjur vanacAriNaH
1016009a te sRSTA bahusAhasrA dazagrIvavadhodyatAH
1016009c aprameyabalA vIrA vikrAntAH kAmarUpiNaH
1016010a te gajAcalasaMkAzA vapuSmanto mahAbalAH
1016010c RkSavAnaragopucchAH kSipram evAbhijajJire
1016011a yasya devasya yad rUpaM veSo yaz ca parAkramaH
1016011c ajAyata samastena tasya tasya sutaH pRthak
1016012a golAGgUlISu cotpannAH ke cit saMmatavikramAH
1016012c RkSISu ca tathA jAtA vAnarAH kiMnarISu ca
1016013a zilApraharaNAH sarve sarve pAdapayodhinaH
1016013c nakhadaMSTrAyudhAH sarve sarve sarvAstrakovidAH
1016014a vicAlayeyuH zailendrAn bhedayeyuH sthirAn drumAn
1016014c kSobhayeyuz ca vegena samudraM saritAM patim
1016015a dArayeyuH kSitiM padbhyAm Aplaveyur mahArNavam
1016015c nabhastalaM vizeyuz ca gRhNIyur api toyadAn
1016016a gRhNIyur api mAtaGgAn mattAn pravrajato vane
1016016c nardamAnAMz ca nAdena pAtayeyur vihaMgamAn
1016017a IdRzAnAM prasUtAni harINAM kAmarUpiNAm
1016017c zataM zatasahasrANi yUthapAnAM mahAtmanAm
1016017e babhUvur yUthapazreSThA vIrAMz cAjanayan harIn
1016018a anye RkSavataH prasthAn upatasthuH sahasrazaH
1016018c anye nAnAvidhAJ zailAn kAnanAni ca bhejire
1016019a sUryaputraM ca sugrIvaM zakraputraM ca vAlinam
1016019c bhrAtarAv upatasthus te sarva eva harIzvarAH
1016020a tair meghavRndAcalakUTakalpair; mahAbalair vAnarayUthapAlaiH
1016020c babhUva bhUr bhImazarIrarUpaiH; samAvRtA rAmasahAyahetoH
1017001a nirvRtte tu kratau tasmin hayamedhe mahAtmanaH
1017001c pratigRhya surA bhAgAn pratijagmur yathAgatam
1017002a samAptadIkSAniyamaH patnIgaNasamanvitaH
1017002c praviveza purIM rAjA sabhRtyabalavAhanaH
1017003a yathArhaM pUjitAs tena rAjJA vai pRthivIzvarAH
1017003c muditAH prayayur dezAn praNamya munipuMgavam
1017004a gateSu pRthivIzeSu rAjA dazarathaH punaH
1017004c praviveza purIM zrImAn puraskRtya dvijottamAn
1017005a zAntayA prayayau sArdham RzyazRGgaH supUjitaH
1017005c anvIyamAno rAjJAtha sAnuyAtreNa dhImatA
1017006a kausalyAjanayad rAmaM divyalakSaNasaMyutam
1017006c viSNor ardhaM mahAbhAgaM putram ikSvAkunandanam
1017007a kausalyA zuzubhe tena putreNAmitatejasA
1017007c yathA vareNa devAnAm aditir vajrapANinA
1017008a bharato nAma kaikeyyAM jajJe satyaparAkramaH
1017008c sAkSAd viSNoz caturbhAgaH sarvaiH samudito guNaiH
1017009a atha lakSmaNazatrughnau sumitrAjanayat sutau
1017009c vIrau sarvAstrakuzalau viSNor ardhasamanvitau
1017010a rAjJaH putrA mahAtmAnaz catvAro jajJire pRthak
1017010c guNavanto 'nurUpAz ca rucyA proSThapadopamAH
1017011a atItyaikAdazAhaM tu nAma karma tathAkarot
1017011c jyeSThaM rAmaM mahAtmAnaM bharataM kaikayIsutam
1017012a saumitriM lakSmaNam iti zatrughnam aparaM tathA
1017012c vasiSThaH paramaprIto nAmAni kRtavAMs tadA
1017012e teSAM janmakriyAdIni sarvakarmANy akArayat
1017013a teSAM ketur iva jyeSTho rAmo ratikaraH pituH
1017013c babhUva bhUyo bhUtAnAM svayambhUr iva saMmataH
1017014a sarve vedavidaH zUrAH sarve lokahite ratAH
1017014c sarve jJAnopasaMpannAH sarve samuditA guNaiH
1017015a teSAm api mahAtejA rAmaH satyaparAkramaH
1017015c bAlyAt prabhRti susnigdho lakSmaNo lakSmivardhanaH
1017016a rAmasya lokarAmasya bhrAtur jyeSThasya nityazaH
1017016c sarvapriyakaras tasya rAmasyApi zarIrataH
1017017a lakSmaNo lakSmisaMpanno bahiHprANa ivAparaH
1017017c na ca tena vinA nidrAM labhate puruSottamaH
1017017e mRSTam annam upAnItam aznAti na hi taM vinA
1017018a yadA hi hayam ArUDho mRgayAM yAti rAghavaH
1017018c tadainaM pRSThato 'bhyeti sadhanuH paripAlayan
1017019a bharatasyApi zatrughno lakSmaNAvarajo hi saH
1017019c prANaiH priyataro nityaM tasya cAsIt tathA priyaH
1017020a sa caturbhir mahAbhAgaiH putrair dazarathaH priyaiH
1017020c babhUva paramaprIto devair iva pitAmahaH
1017021a te yadA jJAnasaMpannAH sarve samuditA guNaiH
1017021c hrImantaH kIrtimantaz ca sarvajJA dIrghadarzinaH
1017022a atha rAjA dazarathas teSAM dArakriyAM prati
1017022c cintayAm Asa dharmAtmA sopAdhyAyaH sabAndhavaH
1017023a tasya cintayamAnasya mantrimadhye mahAtmanaH
1017023c abhyAgacchan mahAtejo vizvAmitro mahAmuniH
1017024a sa rAjJo darzanAkAGkSI dvArAdhyakSAn uvAca ha
1017024c zIghram AkhyAta mAM prAptaM kauzikaM gAdhinaH sutam
1017025a tac chrutvA vacanaM tasya rAjavezma pradudruvuH
1017025c saMbhrAntamanasaH sarve tena vAkyena coditAH
1017026a te gatvA rAjabhavanaM vizvAmitram RSiM tadA
1017026c prAptam AvedayAm Asur nRpAyekSvAkave tadA
1017027a teSAM tad vacanaM zrutvA sapurodhAH samAhitaH
1017027c pratyujjagAma saMhRSTo brahmANam iva vAsavaH
1017028a sa dRSTvA jvalitaM dIptyA tApasaM saMzitavratam
1017028c prahRSTavadano rAjA tato 'rghyam upahArayat
1017029a sa rAjJaH pratigRhyArghyaM zAstradRSTena karmaNA
1017029c kuzalaM cAvyayaM caiva paryapRcchan narAdhipam
1017030a vasiSThaM ca samAgamya kuzalaM munipuMgavaH
1017030c RSIMz ca tAn yathA nyAyaM mahAbhAgAn uvAca ha
1017031a te sarve hRSTamanasas tasya rAjJo nivezanam
1017031c vivizuH pUjitAs tatra niSeduz ca yathArthataH
1017032a atha hRSTamanA rAjA vizvAmitraM mahAmunim
1017032c uvAca paramodAro hRSTas tam abhipUjayan
1017033a yathAmRtasya saMprAptir yathA varSam anUdake
1017033c yathA sadRzadAreSu putrajanmAprajasya ca
1017033e pranaSTasya yathA lAbho yathA harSo mahodaye
1017033g tathaivAgamanaM manye svAgataM te mahAmune
1017034a kaM ca te paramaM kAmaM karomi kim u harSitaH
1017034c pAtrabhUto 'si me vipra diSTyA prApto 'si dhArmika
1017034e adya me saphalaM janma jIvitaM ca sujIvitam
1017035a pUrvaM rAjarSizabdena tapasA dyotitaprabhaH
1017035c brahmarSitvam anuprAptaH pUjyo 'si bahudhA mayA
1017036a tad adbhutam idaM vipra pavitraM paramaM mama
1017036c zubhakSetragataz cAhaM tava saMdarzanAt prabho
1017037a brUhi yat prArthitaM tubhyaM kAryam AgamanaM prati
1017037c icchAmy anugRhIto 'haM tvadarthaparivRddhaye
1017038a kAryasya na vimarzaM ca gantum arhasi kauzika
1017038c kartA cAham azeSeNa daivataM hi bhavAn mama
1017039a iti hRdayasukhaM nizamya vAkyaM; zrutisukham AtmavatA vinItam uktam
1017039c prathitaguNayazA guNair viziSTaH; parama RSiH paramaM jagAma harSam
1018001a tac chrutvA rAjasiMhasya vAkyam adbhutavistaram
1018001c hRSTaromA mahAtejA vizvAmitro 'bhyabhASata
1018002a sadRzaM rAjazArdUla tavaitad bhuvi nAnyataH
1018002c mahAvaMzaprasUtasya vasiSThavyapadezinaH
1018003a yat tu me hRdgataM vAkyaM tasya kAryasya nizcayam
1018003c kuruSva rAjazArdUla bhava satyapratizravaH
1018004a ahaM niyamam AtiSThe siddhyarthaM puruSarSabha
1018004c tasya vighnakarau dvau tu rAkSasau kAmarUpiNau
1018005a vrate me bahuzaz cIrNe samAptyAM rAkSasAv imau
1018005c mArIcaz ca subAhuz ca vIryavantau suzikSitau
1018005e tau mAMsarudhiraugheNa vediM tAm abhyavarSatAm
1018006a avadhUte tathA bhUte tasmin niyamanizcaye
1018006c kRtazramo nirutsAhas tasmAd dezAd apAkrame
1018007a na ca me krodham utsraSTuM buddhir bhavati pArthiva
1018007c tathAbhUtA hi sA caryA na zApas tatra mucyate
1018008a svaputraM rAjazArdUla rAmaM satyaparAkramam
1018008c kAkapakSadharaM zUraM jyeSThaM me dAtum arhasi
1018009a zakto hy eSa mayA gupto divyena svena tejasA
1018009c rAkSasA ye vikartAras teSAm api vinAzane
1018010a zreyaz cAsmai pradAsyAmi bahurUpaM na saMzayaH
1018010c trayANAm api lokAnAM yena khyAtiM gamiSyati
1018011a na ca tau rAmam AsAdya zaktau sthAtuM kathaM cana
1018011c na ca tau rAghavAd anyo hantum utsahate pumAn
1018012a vIryotsiktau hi tau pApau kAlapAzavazaM gatau
1018012c rAmasya rAjazArdUla na paryAptau mahAtmanaH
1018013a na ca putrakRtaM snehaM kartum arhasi pArthiva
1018013c ahaM te pratijAnAmi hatau tau viddhi rAkSasau
1018014a ahaM vedmi mahAtmAnaM rAmaM satyaparAkramam
1018014c vasiSTho 'pi mahAtejA ye ceme tapasi sthitAH
1018015a yadi te dharmalAbhaM ca yazaz ca paramaM bhuvi
1018015c sthiram icchasi rAjendra rAmaM me dAtum arhasi
1018016a yady abhyanujJAM kAkutstha dadate tava mantriNaH
1018016c vasiSThapramukhAH sarve tato rAmaM visarjaya
1018017a abhipretam asaMsaktam AtmajaM dAtum arhasi
1018017c dazarAtraM hi yajJasya rAmaM rAjIvalocanam
1018018a nAtyeti kAlo yajJasya yathAyaM mama rAghava
1018018c tathA kuruSva bhadraM te mA ca zoke manaH kRthAH
1018019a ity evam uktvA dharmAtmA dharmArthasahitaM vacaH
1018019c virarAma mahAtejA vizvAmitro mahAmuniH
1018020a iti hRdayamanovidAraNaM; munivacanaM tad atIva zuzruvAn
1018020c narapatir agamad bhayaM mahad; vyathitamanAH pracacAla cAsanAt
1019001a tac chrutvA rAjazArdUla vizvAmitrasya bhASitam
1019001c muhUrtam iva niHsaMjJaH saMjJAvAn idam abravIt
1019002a UnaSoDazavarSo me rAmo rAjIvalocanaH
1019002c na yuddhayogyatAm asya pazyAmi saha rAkSasaiH
1019003a iyam akSauhiNI pUrNA yasyAhaM patir IzvaraH
1019003c anayA saMvRto gatvA yodhAhaM tair nizAcaraiH
1019004a ime zUrAz ca vikrAntA bhRtyA me 'stravizAradAH
1019004c yogyA rakSogaNair yoddhuM na rAmaM netum arhasi
1019005a aham eva dhanuSpANir goptA samaramUrdhani
1019005c yAvat prANAn dhariSyAmi tAvad yotsye nizAcaraiH
1019006a nirvighnA vratacaryA sA bhaviSyati surakSitA
1019006c ahaM tatra gamiSyAmi na rAma netum arhasi
1019007a bAlo hy akRtavidyaz ca na ca vetti balAbalam
1019007c na cAstrabalasaMyukto na ca yuddhavizAradaH
1019007e na cAsau rakSasAM yogyaH kUTayuddhA hi te dhruvam
1019008a viprayukto hi rAmeNa muhUrtam api notsahe
1019008c jIvituM munizArdUla na rAmaM netum arhasi
1019009a yadi vA rAghavaM brahman netum icchasi suvrata
1019009c caturaGgasamAyuktaM mayA saha ca taM naya
1019010a SaSTir varSasahasrANi jAtasya mama kauzika
1019010c duHkhenotpAditaz cAyaM na rAmaM netum arhasi
1019011a caturNAm AtmajAnAM hi prItiH paramikA mama
1019011c jyeSThaM dharmapradhAnaM ca na rAmaM netum arhasi
1019012a kiM vIryA rAkSasAs te ca kasya putrAz ca ke ca te
1019012c kathaM pramANAH ke caitAn rakSanti munipuMgava
1019013a kathaM ca pratikartavyaM teSAM rAmeNa rakSasAm
1019013c mAmakair vA balair brahman mayA vA kUTayodhinAm
1019014a sarvaM me zaMsa bhagavan kathaM teSAM mayA raNe
1019014c sthAtavyaM duSTabhAvAnAM vIryotsiktA hi rAkSasAH
1019015a tasya tad vacanaM zrutvA vizvAmitro 'bhyabhASata
1019015c paulastyavaMzaprabhavo rAvaNo nAma rAkSasaH
1019016a sa brahmaNA dattavaras trailokyaM bAdhate bhRzam
1019016c mahAbalo mahAvIryo rAkSasair bahubhir vRtaH
1019017a zrUyate hi mahAvIryo rAvaNo rAkSasAdhipaH
1019017c sAkSAd vaizravaNabhrAtA putro vizravaso muneH
1019018a yadA svayaM na yajJasya vighnakartA mahAbalaH
1019018c tena saMcoditau tau tu rAkSasau sumahAbalau
1019018e mArIcaz ca subAhuz ca yajJavighnaM kariSyataH
1019019a ity ukto muninA tena rAjovAca muniM tadA
1019019c na hi zakto 'smi saMgrAme sthAtuM tasya durAtmanaH
1019020a sa tvaM prasAdaM dharmajJa kuruSva mama putrake
1019020c devadAnavagandharvA yakSAH patagapannagAH
1019021a na zaktA rAvaNaM soDhuM kiM punar mAnavA yudhi
1019021c sa hi vIryavatAM vIryam Adatte yudhi rAkSasaH
1019022a tena cAhaM na zakto 'smi saMyoddhuM tasya vA balaiH
1019022c sabalo vA munizreSTha sahito vA mamAtmajaiH
1019023a katham apy amaraprakhyaM saMgrAmANAm akovidam
1019023c bAlaM me tanayaM brahman naiva dAsyAmi putrakam
1019024a atha kAlopamau yuddhe sutau sundopasundayoH
1019024c yajJavighnakarau tau te naiva dAsyAmi putrakam
1019025a mArIcaz ca subAhuz ca vIryavantau suzikSitau
1019025c tayor anyatareNAhaM yoddhA syAM sasuhRdgaNaH
1020001a tac chrutvA vacanaM tasya snehaparyAkulAkSaram
1020001c samanyuH kauziko vAkyaM pratyuvaca mahIpatim
1020002a pUrhvam arthaM pratizrutya pratijJAM hAtum icchasi
1020002c rAgavANAm ayukto 'yaM kulasyAsya viparyayaH
1020003a yad idaM te kSamaM rAjan gamiSyAmi yathAgatam
1020003c mithyApratijJaH kAkutstha sukhI bhava sabAndhavaH
1020004a tasya roSaparItasya vizvAmitrasya dhImataH
1020004c cacAla vasudhA kRtsnA viveza ca bhayaM surAn
1020005a trastarUpaM tu vijJAya jagat sarvaM mahAn RSiH
1020005c nRpatiM suvrato dhIro vasiSTho vAkyam abravIt
1020006a ikSvAkUNAM kule jAtaH sAkSAd dharma ivAparaH
1020006c dhRtimAnsuvrataH zrImAn na dharmaM hAtum arhasi
1020007a triSu lokeSu vikhyAto dharmAtmA iti rAghavaH
1020007c svadharmaM pratipadyasva nAdharmaM voDhum arhasi
1020008a saMzrutyaivaM kariSyAmIty akurvANasya rAghava
1020008c iSTApUrtavadho bhUyAt tasmAd rAmaM visarjaya
1020009a kRtAstram akRtAstraM vA nainaM zakSyanti rAkSasAH
1020009c guptaM kuzikaputreNa jvalanenAmRtaM yathA
1020010a eSa vigrahavAn dharma eSa vIryavatAM varaH
1020010c eSa buddhyAdhiko loke tapasaz ca parAyaNam
1020011a eSo 'strAn vividhAn vetti trailokye sacarAcare
1020011c nainam anyaH pumAn vetti na ca vetsyanti ke cana
1020012a na devA narSayaH ke cin nAsurA na ca rAkSasAH
1020012c gandharvayakSapravarAH sakiMnaramahoragAH
1020013a sarvAstrANi kRzAzvasya putrAH paramadhArmikAH
1020013c kauzikAya purA dattA yadA rAjyaM prazAsati
1020014a te 'pi putrAH kRzAzvasya prajApatisutAsutAH
1020014c naikarUpA mahAvIryA dIptimanto jayAvahAH
1020015a jayA ca suprabhA caiva dakSakanye sumadhyame
1020015c te suvAte 'strazastrANi zataM paramabhAsvaram
1020016a paJcAzataM sutA&l lebhe jayA nAma varAn purA
1020016c vadhAyAsurasainyAnAm ameyAn kAmarUpiNaH
1020017a suprabhAjanayac cApi putrAn paJcAzataM punaH
1020017c saMhArAn nAma durdharSAn durAkrAmAn balIyasaH
1020018a tAni cAstrANi vetty eSa yathAvat kuzikAtmajaH
1020018c apUrvANAM ca janane zakto bhUyaz ca dharmavit
1020019a evaM vIryo mahAtejA vizvAmitro mahAtapAH
1020019c na rAmagamane rAjan saMzayaM gantum arhasi
1021001a tathA vasiSThe bruvati rAjA dazarathaH sutam
1021001c prahRSTavadano rAmam AjuhAva salakSmaNam
1021002a kRtasvastyayanaM mAtrA pitrA dazarathena ca
1021002c purodhasA vasiSThena maGgalair abhimantritam
1021003a sa putraM mUrdhny upAghrAya rAjA dazarathaH priyam
1021003c dadau kuzikaputrAya suprItenAntarAtmanA
1021004a tato vAyuH sukhasparzo virajasko vavau tadA
1021004c vizvAmitragataM rAmaM dRSTvA rAjIvalocanam
1021005a puSpavRSTir mahaty AsId devadundubhinisvanaH
1021005c zaGkhadundubhinirghoSaH prayAte tu mahAtmani
1021006a vizvAmitro yayAv agre tato rAmo mahAyazAH
1021006c kAkapakSadharo dhanvI taM ca saumitrir anvagAt
1021007a kalApinau dhanuSpANI zobhayAnau dizo daza
1021007c vizvAmitraM mahAtmAnaM trizIrSAv iva pannagau
1021007e anujagmatur akSudrau pitAmaham ivAzvinau
1021008a baddhagodhAGgulitrANau khaDgavantau mahAdyutI
1021008c sthANuM devam ivAcintyaM kumArAv iva pAvakI
1021009a adhyardhayojanaM gatvA sarayvA dakSiNe taTe
1021009c rAmeti madhurA vANIM vizvAmitro 'bhyabhASata
1021010a gRhANa vatsa salilaM mA bhUt kAlasya paryayaH
1021010c mantragrAmaM gRhANa tvaM balAm atibalAM tathA
1021011a na zramo na jvaro vA te na rUpasya viparyayaH
1021011c na ca suptaM pramattaM vA dharSayiSyanti nairRtAH
1021012a na bAhvoH sadRzo vIrye pRthivyAm asti kaz cana
1021012c triSu lokeSu vA rAma na bhavet sadRzas tava
1021013a na saubhAgye na dAkSiNye na jJAne buddhinizcaye
1021013c nottare pratipattavyo samo loke tavAnagha
1021014a etadvidyAdvaye labdhe bhavitA nAsti te samaH
1021014c balA cAtibalA caiva sarvajJAnasya mAtarau
1021015a kSutpipAse na te rAma bhaviSyete narottama
1021015c balAm atibalAM caiva paThataH pathi rAghava
1021015e vidyAdvayam adhIyAne yazaz cApy atulaM bhuvi
1021016a pitAmahasute hy ete vidye tejaHsamanvite
1021016c pradAtuM tava kAkutstha sadRzas tvaM hi dhArmika
1021017a kAmaM bahuguNAH sarve tvayy ete nAtra saMzayaH
1021017c tapasA saMbhRte caite bahurUpe bhaviSyataH
1021018a tato rAmo jalaM spRSTvA prahRSTavadanaH zuciH
1021018c pratijagrAha te vidye maharSer bhAvitAtmanaH
1021018e vidyAsamudito rAmaH zuzubhe bhUrivikramaH
1021019a gurukAryANi sarvANi niyujya kuzikAtmaje
1021019c USus tAM rajanIM tatra sarayvAM susukhaM trayaH
1022001a prabhAtAyAM tu zarvaryAM vizvAmitro mahAmuniH
1022001c abhyabhASata kAkutsthaM zayAnaM parNasaMstare
1022002a kausalyA suprajA rAma pUrvA saMdhyA pravartate
1022002c uttiSTha narazArdUla kartavyaM daivam Ahnikam
1022003a tasyarSeH paramodAraM vacaH zrutvA nRpAtmajau
1022003c snAtvA kRtodakau vIrau jepatuH paramaM japam
1022004a kRtAhnikau mahAvIryau vizvAmitraM tapodhanam
1022004c abhivAdyAbhisaMhRSTau gamanAyopatasthatuH
1022005a tau prayAte mahAvIryau divyaM tripathagAM nadIm
1022005c dadRzAte tatas tatra sarayvAH saMgame zubhe
1022006a tatrAzramapadaM puNyam RSINAm ugratejasAm
1022006c bahuvarSasahasrANi tapyatAM paramaM tapaH
1022007a taM dRSTvA paramaprItau rAghavau puNyam Azramam
1022007c Ucatus taM mahAtmAnaM vizvAmitram idaM vacaH
1022008a kasyAyam AzramaH puNyaH ko nv asmin vasate pumAn
1022008c bhagavaJ zrotum icchAvaH paraM kautUhalaM hi nau
1022009a tayos tad vacanaM zrutvA prahasya munipuMgavaH
1022009c abravIc chrUyatAM rAma yasyAyaM pUrva AzramaH
1022010a kandarpo mUrtimAn AsIt kAma ity ucyate budhaiH
1022011a tapasyantam iha sthANuM niyamena samAhitam
1022011c kRtodvAhaM tu devezaM gacchantaM samarudgaNam
1022011e dharSayAm Asa durmedhA huMkRtaz ca mahAtmanA
1022012a dagdhasya tasya raudreNa cakSuSA raghunandana
1022012c vyazIryanta zarIrAt svAt sarvagAtrANi durmateH
1022013a tasya gAtraM hataM tatra nirdagdhasya mahAtmanA
1022013c azarIraH kRtaH kAmaH krodhAd devezvareNa ha
1022014a anaGga iti vikhyAtas tadA prabhRti rAghava
1022014c sa cAGgaviSayaH zrImAn yatrAGgaM sa mumoca ha
1022015a tasyAyam AzramaH puNyas tasyeme munayaH purA
1022015c ziSyA dharmaparA vIra teSAM pApaM na vidyate
1022016a ihAdya rajanIM rAma vasema zubhadarzana
1022016c puNyayoH saritor madhye zvas tariSyAmahe vayam
1022017a teSAM saMvadatAM tatra tapo dIrgheNa cakSuSA
1022017c vijJAya paramaprItA munayo harSam Agaman
1022018a arghyaM pAdyaM tathAtithyaM nivedyakuzikAtmaje
1022018c rAmalakSmaNayoH pazcAd akurvann atithikriyAm
1022019a satkAraM samanuprApya kathAbhir abhiraJjayan
1022019c nyavasan susukhaM tatra kAmAzramapade tadA
1023001a tataH prabhAte vimale kRtAhnikam ariMdamau
1023001c vizvAmitraM puraskRtya nadyAs tIram upAgatau
1023002a te ca sarve mahAtmAno munayaH saMzitavratAH
1023002c upasthApya zubhAM nAvaM vizvAmitram athAbruvan
1023003a Arohatu bhavAn nAvaM rAjaputrapuraskRtaH
1023003c ariSTaM gaccha panthAnaM mA bhUt kAlasya paryayaH
1023004a vizvAmitras tathety uktvA tAn RSIn abhipUjya ca
1023004c tatAra sahitas tAbhyAM saritaM sAgaraM gamAm
1023005a atha rAmaH sarinmadhye papraccha munipuGgavam
1023005c vAriNo bhidyamAnasya kim ayaM tumulo dhvaniH
1023006a rAghavasya vacaH zrutvA kautUhala samanvitam
1023006c kathayAm Asa dharmAtmA tasya zabdasya nizcayam
1023007a kailAsaparvate rAma manasA nirmitaM saraH
1023007c brahmaNA narazArdUla tenedaM mAnasaM saraH
1023008a tasmAt susrAva sarasaH sAyodhyAm upagUhate
1023008c saraHpravRttA sarayUH puNyA brahmasarazcyutA
1023009a tasyAyam atulaH zabdo jAhnavIm abhivartate
1023009c vArisaMkSobhajo rAma praNAmaM niyataH kuru
1023010a tAbhyAM tu tAv ubhau kRtvA praNAmam atidhArmikau
1023010c tIraM dakSiNam AsAdya jagmatur laghuvikramau
1023011a sa vanaM ghorasaMkAzaM dRSTvA nRpavarAtmajaH
1023011c aviprahatam aikSvAkaH papraccha munipuMgavam
1023012a aho vanam idaM durgaM jhillikAgaNanAditam
1023012c bhairavaiH zvApadaiH kIrNaM zakuntair dAruNArutaiH
1023013a nAnAprakAraiH zakunair vAzyadbhir bhairavasvanaiH
1023013c siMhavyAghravarAhaiz ca vAraNaiz cApi zobhitam
1023014a dhavAzvakarNakakubhair bilvatindukapATalaiH
1023014c saMkIrNaM badarIbhiz ca kiM nv idaM dAruNaM vanam
1023015a tam uvAca mahAtejA vizvAmitro mahAmuniH
1023015c zrUyatAM vatsa kAkutstha yasyaitad dAruNaM vanam
1023016a etau janapadau sphItau pUrvam AstAM narottama
1023016c maladAz ca karUSAz ca devanirmANanirmitau
1023017a purA vRtravadhe rAma malena samabhiplutam
1023017c kSudhA caiva sahasrAkSaM brahmahatyA yadAvizat
1023018a tam indraM snApayan devA RSayaz ca tapodhanAH
1023018c kalazaiH snApayAm Asur malaM cAsya pramocayan
1023019a iha bhUmyAM malaM dattvA dattvA kArUSam eva ca
1023019c zarIrajaM mahendrasya tato harSaM prapedire
1023020a nirmalo niSkarUSaz ca zucir indro yadAbhavat
1023020c dadau dezasya suprIto varaM prabhur anuttamam
1023021a imau janapadau sthItau khyAtiM loke gamiSyataH
1023021c maladAz ca karUSAz ca mamAGgamaladhAriNau
1023022a sAdhu sAdhv iti taM devAH pAkazAsanam abruvan
1023022c dezasya pUjAM tAM dRSTvA kRtAM zakreNa dhImatA
1023023a etau janapadau sthItau dIrghakAlam ariMdama
1023023c maladAz ca karUSAz ca muditau dhanadhAnyataH
1023024a kasya cit tv atha kAlasya yakSI vai kAmarUpiNI
1023024c balaM nAgasahasrasya dhArayantI tadA hy abhUt
1023025a tATakA nAma bhadraM te bhAryA sundasya dhImataH
1023025c mArIco rAkSasaH putro yasyAH zakraparAkramaH
1023026a imau janapadau nityaM vinAzayati rAghava
1023026c maladAMz ca karUSAMz ca tATakA duSTacAriNI
1023027a seyaM panthAnam AvArya vasaty atyardhayojane
1023027c ata eva ca gantavyaM tATakAyA vanaM yataH
1023028a svabAhubalam Azritya jahImAM duSTacAriNIm
1023028c manniyogAd imaM dezaM kuru niSkaNTakaM punaH
1023029a na hi kaz cid imaM dezaM zakroty Agantum IdRzam
1023029c yakSiNyA ghorayA rAma utsAditam asahyayA
1023030a etat te sarvam AkhyAtaM yathaitad daruNaM vanam
1023030c yakSyA cotsAditaM sarvam adyApi na nivartate
1024001a atha tasyAprameyasya muner vacanam uttamam
1024001c zrutvA puruSazArdUlaH pratyuvAca zubhAM giram
1024002a alpavIryA yadA yakSAH zrUyante munipuMgava
1024002c kathaM nAgasahasrasya dhArayaty abalA balam
1024003a vizvAmitro 'bravId vAkyaM zRNu yena balottarA
1024003c varadAnakRtaM vIryaM dhArayaty abalA balam
1024004a pUrvam AsIn mahAyakSaH suketur nAma vIryavAn
1024004c anapatyaH zubhAcAraH sa ca tepe mahat tapaH
1024005a pitAmahas tu suprItas tasya yakSapates tadA
1024005c kanyAratnaM dadau rAma tATakAM nAma nAmataH
1024006a dadau nAgasahasrasya balaM cAsyAH pitAmahaH
1024006c na tv eva putraM yakSAya dadau brahmA mahAyazAH
1024007a tAM tu jAtAM vivardhantIM rUpayauvanazAlinIm
1024007c jambhaputrAya sundAya dadau bhAryAM yazasvinIm
1024008a kasya cit tv atha kAlalsya yakSI putraM vyajAyata
1024008c mArIcaM nAma durdharSaM yaH zApAd rAkSaso 'bhavat
1024009a sunde tu nihate rAma agastyam RSisattamam
1024009c tATakA saha putreNa pradharSayitum icchati
1024010a rAkSasatvaM bhajasveti mArIcaM vyAjahAra saH
1024010c agastyaH paramakruddhas tATakAm api zaptavAn
1024011a puruSAdI mahAyakSI virUpA vikRtAnanA
1024011c idaM rUpam apahAya dAruNaM rUpam astu te
1024012a saiSA zApakRtAmarSA tATakA krodhamUrchitA
1024012c dezam utsAdayaty enam agastyacaritaM zubham
1024013a enAM rAghava durvRttAM yakSIM paramadAruNAm
1024013c gobrAhmaNahitArthAya jahi duSTaparAkramAm
1024014a na hy enAM zApasaMsRSTAM kaz cid utsahate pumAn
1024014c nihantuM triSu lokeSu tvAm Rte raghunandana
1024015a na hi te strIvadhakRte ghRNA kAryA narottama
1024015c cAturvarNyahitArthAya kartavyaM rAjasUnunA
1024016a rAjyabhAraniyuktAnAm eSa dharmaH sanAtanaH
1024016c adharmyAM jahi kAkutstha dharmo hy asyA na vidyate
1024017a zrUyate hi purA zakro virocanasutAM nRpa
1024017c pRthivIM hantum icchantIM mantharAm abhyasUdayat
1024018a viSNunA ca purA rAma bhRgupatnI dRDhavratA
1024018c anindraM lokam icchantI kAvyamAtA niSUditA
1024019a etaiz cAnyaiz ca bahubhI rAjaputramahAtmabhiH
1024019c adharmaniratA nAryo hatAH puruSasattamaiH
1025001a muner vacanam aklIbaM zrutvA naravarAtmajaH
1025001c rAghavaH prAJjalir bhUtvA pratyuvAca dRDhavrataH
1025002a pitur vacananirdezAt pitur vacanagauravAt
1025002c vacanaM kauzikasyeti kartavyam avizaGkayA
1025003a anuziSTo 'smy ayodhyAyAM gurumadhye mahAtmanA
1025003c pitrA dazarathenAhaM nAvajJeyaM ca tad vacaH
1025004a so 'haM pitur vacaH zrutvA zAsanAd brahma vAdinaH
1025004c kariSyAmi na saMdehas tATakAvadham uttamam
1025005a gobrAhmaNahitArthAya dezasyAsya sukhAya ca
1025005c tava caivAprameyasya vacanaM kartum udyataH
1025006a evam uktvA dhanurmadhye baddhvA muSTim ariMdamaH
1025006c jyAzabdam akarot tIvraM dizaH zabdena pUrayan
1025007a tena zabdena vitrastAs tATakA vanavAsinaH
1025007c tATakA ca susaMkruddhA tena zabdena mohitA
1025008a taM zabdam abhinidhyAya rAkSasI krodhamUrchitA
1025008c zrutvA cAbhyadravad vegAd yataH zabdo viniHsRtaH
1025009a tAM dRSTvA rAghavaH kruddhAM vikRtAM vikRtAnanAm
1025009c pramANenAtivRddhAM ca lakSmaNaM so 'bhyabhASata
1025010a pazya lakSmaNa yakSiNyA bhairavaM dAruNaM vapuH
1025010c bhidyeran darzanAd asyA bhIrUNAM hRdayAni ca
1025011a enAM pazya durAdharSAM mAyA balasamanvitAm
1025011c vinivRttAM karomy adya hRtakarNAgranAsikAm
1025012a na hy enAm utsahe hantuM strIsvabhAvena rakSitAm
1025012c vIryaM cAsyA gatiM cApi haniSyAmIti me matiH
1025013a evaM bruvANe rAme tu tATakA krodhamUrchitA
1025013c udyamya bAhU garjantI rAmam evAbhyadhAvata
1025014a tAm ApatantIM vegena vikrAntAm azanIm iva
1025014c zareNorasi vivyAdha sA papAta mamAra ca
1025015a tAM hatAM bhImasaMkAzAM dRSTvA surapatis tadA
1025015c sAdhu sAdhv iti kAkutsthaM surAz ca samapUjayan
1025016a uvAca paramaprItaH sahasrAkSaH puraMdaraH
1025016c surAz ca sarve saMhRSTA vizvAmitram athAbruvan
1025017a mune kauzike bhadraM te sendrAH sarve marudgaNAH
1025017c toSitAH karmaNAnena snehaM darzaya rAghave
1025018a prajApater kRzAzvasya putrAn satyaparAkramAn
1025018c tapobalabhRtAn brahman rAghavAya nivedaya
1025019a pAtrabhUtaz ca te brahmaMs tavAnugamane dhRtaH
1025019c kartavyaM ca mahat karma surANAM rAjasUnunA
1025020a evam uktvA surAH sarve hRSTA jagmur yathAgatam
1025020c vizvAmitraM pUjayitvA tataH saMdhyA pravartate
1025021a tato munivaraH prItis tATakA vadhatoSitaH
1025021c mUrdhni rAmam upAghrAya idaM vacanam abravIt
1025022a ihAdya rajanIM rAma vasema zubhadarzana
1025022c zvaH prabhAte gamiSyAmas tad AzramapadaM mama
1026001a atha tAM rajanIm uSya vizvAmiro mahAyazAH
1026001c prahasya rAghavaM vAkyam uvAca madhurAkSaram
1026002a patituSTo 'smi bhadraM te rAjaputra mahAyazaH
1026002c prItyA paramayA yukto dadAmy astrANi sarvazaH
1026003a devAsuragaNAn vApi sagandharvoragAn api
1026003c yair amitrAn prasahyAjau vazIkRtya jayiSyasi
1026004a tAni divyAni bhadraM te dadAmy astrANi sarvazaH
1026004c daNDacakraM mahad divyaM tava dAsyAmi rAghava
1026005a dharmacakraM tato vIra kAlacakraM tathaiva ca
1026005c viSNucakraM tathAtyugram aindraM cakraM tathaiva ca
1026006a vajram astraM narazreSTha zaivaM zUlavaraM tathA
1026006c astraM brahmaziraz caiva aiSIkam api rAghava
1026006e dadAmi te mahAbAho brAhmam astram anuttamam
1026007a gade dve caiva kAkutstha modakI zikharI ubhe
1026007c pradIpte narazArdUla prayacchAmi nRpAtmaja
1026008a dharmapAzam ahaM rAma kAlapAzaM tathaiva ca
1026008c vAruNaM pAzam astraM ca dadAny aham anuttamam
1026009a azanI dve prayacchAmi zuSkArdre raghunandana
1026010a dadAmi cAstraM painAkam astraM nArAyaNaM tathA
1026010c Agneyam astra dayitaM zikharaM nAma nAmataH
1026011a vAyavyaM prathamaM nAma dadAmi tava rAghava
1026011c astraM hayaziro nAma krauJcam astraM tathaiva ca
1026012a zakti dvayaM ca kAkutstha dadAmi tava cAnagha
1026012c kaGkAlaM musalaM ghoraM kApAlam atha kaGkaNam
1026013a dhArayanty asurA yAni dadAmy etAni sarvazaH
1026013c vaidyAdharaM mahAstraM ca nandanaM nAma nAmataH
1026014a asiratnaM mahAbAho dadAmi nRvarAtmaja
1026014c gAndharvam astraM dayitaM mAnavaM nAma nAmataH
1026015a prasvApanaprazamane dadmi sauraM ca rAghava
1026015c darpaNaM zoSaNaM caiva saMtApanavilApane
1026016a madanaM caiva durdharSaM kandarpadayitaM tathA
1026016c paizAcam astraM dayitaM mohanaM nAma nAmataH
1026016e pratIccha narazArdUla rAjaputra mahAyazaH
1026017a tAmasaM narazArdUla saumanaM ca mahAbalam
1026017c saMvartaM caiva durdharSaM mausalaM ca nRpAtmaja
1026018a satyam astraM mahAbAho tathA mAyAdharaM param
1026018c ghoraM tejaHprabhaM nAma paratejo'pakarSaNam
1026019a somAstraM ziziraM nAma tvASTram astraM sudAmanam
1026019c dAruNaM ca bhagasyApi zIteSum atha mAnavam
1026020a etAn nAma mahAbAho kAmarUpAn mahAbalAn
1026020c gRhANa paramodArAn kSipram eva nRpAtmaja
1026021a sthitas tu prAGmukho bhUtvA zucir nivaratas tadA
1026021c dadau rAmAya suprIto mantragrAmam anuttamam
1026022a japatas tu munes tasya vizvAmitrasya dhImataH
1026022c upatasthur mahArhANi sarvANy astrANi rAghavam
1026023a Ucuz ca muditA rAmaM sarve prAJjalayas tadA
1026023c ime sma paramodAra kiMkarAs tava rAghava
1026024a pratigRhya ca kAkutsthaH samAlabhya ca pANinA
1026024c manasA me bhaviSyadhvam iti tAny abhyacodayat
1026025a tataH prItamanA rAmo vizvAmitraM mahAmunim
1026025c abhivAdya mahAtejA gamanAyopacakrame
1027001a pratigRhya tato 'strANi prahRSTavadanaH zuciH
1027001c gacchann eva ca kAkutstho vizvAmitram athAbravIt
1027002a gRhItAstro 'smi bhagavan durAdharSaH surair api
1027002c astrANAM tv aham icchAmi saMhAraM munipuMgava
1027003a evaM bruvati kAkutsthe vizvAmitro mahAmuniH
1027003c saMhAraM vyAjahArAtha dhRtimAn suvrataH zuciH
1027004a satyavantaM satyakIrtiM dhRSTaM rabhasam eva ca
1027004c pratihArataraM nAma parAGmukham avAGmukham
1027005a lakSAkSaviSamau caiva dRDhanAbhasunAbhakau
1027005c dazAkSazatavaktrau ca dazazIrSazatodarau
1027006a padmanAbhamahAnAbhau dundunAbhasunAbhakau
1027006c jyotiSaM kRzanaM caiva nairAzya vimalAv ubhau
1027007a yaugandharaharidrau ca daityapramathanau tathA
1027007c pitryaM saumanasaM caiva vidhUtamakarAv ubhau
1027008a karavIrakaraM caiva dhanadhAnyau ca rAghava
1027008c kAmarUpaM kAmaruciM moham AvaraNaM tathA
1027009a jRmbhakaM sarvanAbhaM ca santAnavaraNau tathA
1027009c kRzAzvatanayAn rAma bhAsvarAn kAmarUpiNaH
1027010a pratIccha mama bhadraM te pAtrabhUto 'si rAghava
1027010c divyabhAsvaradehAz ca mUrtimantaH sukhapradAH
1027011a rAmaM prAJjalayo bhUtvAbruvan madhurabhASiNaH
1027011c ime sma narazArdUla zAdhi kiM karavAma te
1027012a gamyatAm iti tAn Aha yatheSTaM raghunandanaH
1027012c mAnasAH kAryakAleSu sAhAyyaM me kariSyatha
1027013a atha te rAmam Amantrya kRtvA cApi pradakSiNam
1027013c evam astv iti kAkutstham uktvA jagmur yathAgatam
1027014a sa ca tAn rAghavo jJAtvA vizvAmitraM mahAmunim
1027014c gacchann evAtha madhuraM zlakSNaM vacanam abravIt
1027015a kiM nv etan meghasaMkAzaM parvatasyAvidUrataH
1027015c vRkSaSaNDam ito bhAti paraM kautUhalaM hi me
1027016a darzanIyaM mRgAkIrNaM manoharam atIva ca
1027016c nAnAprakAraiH zakunair valgubhASair alaMkRtam
1027017a niHsRtAH sma munizreSTha kAntArAd romaharSaNAt
1027017c anayA tv avagacchAmi dezasya sukhavattayA
1027018a sarvaM me zaMsa bhagavan kasyAzramapadaM tv idam
1027018c saMprAptA yatra te pApA brahmaghnA duSTacAriNaH
1028001a atha tasyAprameyasya tad vanaM paripRcchataH
1028001c vizvAmitro mahAtejA vyAkhyAtum upacakrame
1028002a eSa pUrvAzramo rAma vAmanasya mahAtmanaH
1028002c siddhAzrama iti khyAtaH siddho hy atra mahAtapAH
1028003a etasminn eva kAle tu rAjA vairocanir baliH
1028003c nirjitya daivatagaNAn sendrAMz ca samarudgaNAn
1028003e kArayAm Asa tad rAjyaM triSu lokeSu vizrutaH
1028004a bales tu yajamAnasya devAH sAgnipurogamAH
1028004c samAgamya svayaM caiva viSNum Ucur ihAzrame
1028005a balir vairocanir viSNo yajate yajJam uttamam
1028005c asamApte kratau tasmin svakAryam abhipadyatAm
1028006a ye cainam abhivartante yAcitAra itas tataH
1028006c yac ca yatra yathAvac ca sarvaM tebhyaH prayacchati
1028007a sa tvaM surahitArthAya mAyAyogam upAzritaH
1028007c vAmanatvaM gato viSNo kuru kalyANam uttamam
1028008a ayaM siddhAzramo nAma prasAdAt te bhaviSyati
1028008c siddhe karmaNi deveza uttiSTha bhagavann itaH
1028009a atha viSNur mahAtejA adityAM samajAyata
1028009c vAmanaM rUpam AsthAya vairocanim upAgamat
1028010a trIn kramAn atha bhikSitvA pratigRhya ca mAnataH
1028010c Akramya lokA&l lokAtmA sarvabhUtahite rataH
1028011a mahendrAya punaH prAdAn niyamya balim ojasA
1028011c trailokyaM sa mahAtejAz cakre zakravazaM punaH
1028012a tenaiSa pUrvam AkrAnta AzramaH zramanAzanaH
1028012c mayApi bhaktyA tasyaiSa vAmanasyopabhujyate
1028013a etam Azramam AyAnti rAkSasA vighnakAriNaH
1028013c atra te puruSavyAghra hantavyA duSTacAriNaH
1028014a adya gacchAmahe rAma siddhAzramam anuttamam
1028014c tad AzramapadaM tAta tavApy etad yathA mama
1028015a taM dRSTvA munayaH sarve siddhAzramanivAsinaH
1028015c utpatyotpatya sahasA vizvAmitram apUjayan
1028016a yathArhaM cakrire pUjAM vizvAmitrAya dhImate
1028016c tathaiva rAjaputrAbhyAm akurvann atithikriyAm
1028017a muhUrtam atha vizrAntau rAjaputrAv ariMdamau
1028017c prAJjalI munizArdUlam UcatU raghunandanau
1028018a adyaiva dIkSAM praviza bhadraM te munipuMgava
1028018c siddhAzramo 'yaM siddhaH syAt satyam astu vacas tava
1028019a evam ukto mahAtejA vizvAmitro mahAmuniH
1028019c praviveza tadA dIkSAM niyato niyatendriyaH
1028020a kumArAv api tAM rAtrim uSitvA susamAhitau
1028020c prabhAtakAle cotthAya vizvAmitram avandatAm
1029001a atha tau dezakAlajJau rAjaputrAv ariMdamau
1029001c deze kAle ca vAkyajJAv abrUtAM kauzikaM vacaH
1029002a bhagavaJ zrotum icchAvo yasmin kAle nizAcarau
1029002c saMrakSaNIyau tau brahman nAtivarteta tatkSaNam
1029003a evaM bruvANau kAkutsthau tvaramANau yuyutsayA
1029003c sarve te munayaH prItAH prazazaMsur nRpAtmajau
1029004a adya prabhRti SaDrAtraM rakSataM rAghavau yuvAm
1029004c dIkSAM gato hy eSa munir maunitvaM ca gamiSyati
1029005a tau tu tad vacanaM zrutvA rAjaputrau yazasvinau
1029005c anidrau SaDahorAtraM tapovanam arakSatAm
1029006a upAsAM cakratur vIrau yattau paramadhanvinau
1029006c rarakSatur munivaraM vizvAmitram ariMdamau
1029007a atha kAle gate tasmin SaSThe 'hani samAgate
1029007c saumitram abravId rAmo yatto bhava samAhitaH
1029008a rAmasyaivaM bruvANasya tvaritasya yuyutsayA
1029008c prajajvAla tato vediH sopAdhyAyapurohitA
1029009a mantravac ca yathAnyAyaM yajJo 'sau saMpravartate
1029009c AkAze ca mahAJ zabdaH prAdur AsId bhayAnakaH
1029010a AvArya gaganaM megho yathA prAvRSi nirgataH
1029010c tathA mAyAM vikurvANau rAkSasAv abhyadhAvatAm
1029011a mArIcaz ca subAhuz ca tayor anucarAs tathA
1029011c Agamya bhImasaMkAzA rudhiraughAn avAsRjan
1029012a tAv Apatantau sahasA dRSTvA rAjIvalocanaH
1029012c lakSmaNaM tv abhisaMprekSya rAmo vacanam abravIt
1029013a pazya lakSmaNa durvRttAn rAkSasAn pizitAzanAn
1029013c mAnavAstrasamAdhUtAn anilena yathAghanAn
1029014a mAnavaM paramodAram astraM paramabhAsvaram
1029014c cikSepa paramakruddho mArIcor asi rAghavaH
1029015a sa tena paramAstreNa mAnavena samAhitaH
1029015c saMpUrNaM yojanazataM kSiptaH sAgarasaMplave
1029016a vicetanaM vighUrNantaM zIteSubalapIDitam
1029016c nirastaM dRzya mArIcaM rAmo lakSmaNam abravIt
1029017a pazya lakSmaNa zIteSuM mAnavaM dharmasaMhitam
1029017c mohayitvA nayaty enaM na ca prANair viyujyate
1029018a imAn api vadhiSyAmi nirghRNAn duSTacAriNaH
1029018c rAkSasAn pApakarmasthAn yajJaghnAn rudhirAzanAn
1029019a vigRhya sumahac cAstram AgneyaM raghunandanaH
1029019c subAhur asi cikSepa sa viddhaH prApatad bhuvi
1029020a zeSAn vAyavyam AdAya nijaghAna mahAyazAH
1029020c rAghavaH paramodAro munInAM mudam Avahan
1029021a sa hatvA rAkSasAn sarvAn yajJaghnAn raghunandanaH
1029021c RSibhiH pUjitas tatra yathendro vijaye purA
1029022a atha yajJe samApte tu vizvAmitro mahAmuniH
1029022c nirItikA dizo dRSTvA kAkutstham idam abravIt
1029023a kRtArtho 'smi mahAbAho kRtaM guruvacas tvayA
1029023c siddhAzramam idaM satyaM kRtaM rAma mahAyazaH
1030001a atha tAM rajanIM tatra kRtArthau rAmalakSaNau
1030001c USatur muditau vIrau prahRSTenAntarAtmanA
1030002a prabhAtAyAM tu zarvaryAM kRtapaurvAhNikakriyau
1030002c vizvAmitram RSIMz cAnyAn sahitAv abhijagmatuH
1030003a abhivAdya munizreSThaM jvalantam iva pAvakam
1030003c Ucatur madhurodAraM vAkyaM madhurabhASiNau
1030004a imau svo munizArdUla kiMkarau samupasthitau
1030004c AjJApaya yatheSTaM vai zAsanaM karavAva kim
1030005a evam ukte tatas tAbhyAM sarva eva maharSayaH
1030005c vizvAmitraM puraskRtya rAmaM vacanam abruvan
1030006a maithilasya narazreSTha janakasya bhaviSyati
1030006c yajJaH paramadharmiSThas tatra yAsyAmahe vayam
1030007a tvaM caiva narazArdUla sahAsmAbhir gamiSyasi
1030007c adbhutaM ca dhanUratnaM tatra tvaM draSTum arhasi
1030008a tad dhi pUrvaM narazreSTha dattaM sadasi daivataiH
1030008c aprameyabalaM ghoraM makhe paramabhAsvaram
1030009a nAsya devA na gandharvA nAsurA na ca rAkSasAH
1030009c kartum AropaNaM zaktA na kathaM cana mAnuSAH
1030010a dhanuSas tasya vIryaM hi jijJAsanto mahIkSitaH
1030010c na zekur AropayituM rAjaputrA mahAbalAH
1030011a tad dhanur narazArdUla maithilasya mahAtmanaH
1030011c tatra drakSyasi kAkutstha yajJaM cAdbhutadarzanam
1030012a tad dhi yajJaphalaM tena maithilenottamaM dhanuH
1030012c yAcitaM narazArdUla sunAbhaM sarvadaivataiH
1030013a evam uktvA munivaraH prasthAnam akarot tadA
1030013c sarSisaMghaH sakAkutstha Amantrya vanadevatAH
1030014a svasti vo 'stu gamiSyAmi siddhaH siddhAzramAd aham
1030014c uttare jAhnavItIre himavantaM ziloccayam
1030015a pradakSiNaM tataH kRtvA siddhAzramam anuttamam
1030015c uttarAM dizam uddizya prasthAtum upacakrame
1030016a taM vrajantaM munivaram anvagAd anusAriNAm
1030016c zakaTI zatamAtraM tu prayANe brahmavAdinAm
1030017a mRgapakSigaNAz caiva siddhAzramanivAsinaH
1030017c anujagmur mahAtmAnaM vizvAmitraM mahAmunim
1030018a te gatvA dUram adhvAnaM lambamAne divAkare
1030018c vAsaM cakrur munigaNAH zoNAkUle samAhitAH
1030019a te 'staM gate dinakare snAtvA hutahutAzanAH
1030019c vizvAmitraM puraskRtya niSedur amitaujasaH
1030020a rAmo 'pi sahasaumitrir munIMs tAn abhipUjya ca
1030020c agrato niSasAdAtha vizvAmitrasya dhImataH
1030021a atha rAmo mahAtejA vizvAmitraM mahAmunim
1030021c papraccha munizArdUlaM kautUhalasamanvitaH
1030022a bhagavan ko nv ayaM dezaH samRddhavanazobhitaH
1030022c zrotum icchAmi bhadraM te vaktum arhasi tattvataH
1030023a codito rAmavAkyena kathayAm Asa suvrataH
1030023c tasya dezasya nikhilam RSimadhye mahAtapAH
1031001a brahmayonir mahAn AsIt kuzo nAma mahAtapAH
1031001c vaidarbhyAM janayAm Asa caturaH sadRzAn sutAn
1031001e kuzAmbaM kuzanAbhaM ca AdhUrtarajasaM vasum
1031002a dIptiyuktAn mahotsAhAn kSatradharmacikIrSayA
1031002c tAn uvAca kuzaH putrAn dharmiSThAn satyavAdinaH
1031002e kriyatAM pAlanaM putrA dharmaM prApsyatha puSkalam
1031003a kuzasya vacanaM zrutvA catvAro lokasaMmatAH
1031003c nivezaM cakrire sarve purANAM nRvarAs tadA
1031004a kuzAmbas tu mahAtejAH kauzAmbIm akarot purIm
1031004c kuzanAbhas tu dharmAtmA paraM cakre mahodayam
1031005a AdhUrtarajaso rAma dharmAraNyaM mahIpatiH
1031005c cakre puravaraM rAjA vasuz cakre girivrajam
1031006a eSA vasumatI rAma vasos tasya mahAtmanaH
1031006c ete zailavarAH paJca prakAzante samantataH
1031007a sumAgadhI nadI ramyA mAgadhAn vizrutAyayau
1031007c paJcAnAM zailamukhyAnAM madhye mAleva zobhate
1031008a saiSA hi mAgadhI rAma vasos tasya mahAtmanaH
1031008c pUrvAbhicaritA rAma sukSetrA sasyamAlinI
1031009a kuzanAbhas tu rAjarSiH kanyAzatam anuttamam
1031009c janayAm Asa dharmAtmA ghRtAcyAM raghunandana
1031010a tAs tu yauvanazAlinyo rUpavatyaH svalaMkRtAH
1031010c udyAnabhUmim Agamya prAvRSIva zatahradAH
1031011a gAyantyo nRtyamAnAz ca vAdayantyaz ca rAghava
1031011c AmodaM paramaM jagmur varAbharaNabhUSitAH
1031012a atha tAz cArusarvAGgyo rUpeNApratimA bhuvi
1031012c udyAnabhUmim Agamya tArA iva ghanAntare
1031013a tAH sarvaguNasaMpannA rUpayauvanasaMyutAH
1031013c dRSTvA sarvAtmako vAyur idaM vacanam abravIt
1031014a ahaM vaH kAmaye sarvA bhAryA mama bhaviSyatha
1031014c mAnuSas tyajyatAM bhAvo dIrgham Ayur avApsyatha
1031015a tasya tad vacanaM zrutvA vAyor akliSTakarmaNaH
1031015c apahAsya tato vAkyaM kanyAzatam athAbravIt
1031016a antaz carasi bhUtAnAM sarveSAM tvaM surottama
1031016c prabhAvajJAz ca te sarvAH kim asmAn avamanyase
1031017a kuzanAbhasutAH sarvAH samarthAs tvAM surottama
1031017c sthAnAc cyAvayituM devaM rakSAmas tu tapo vayam
1031018a mA bhUt sa kAlo durmedhaH pitaraM satyavAdinam
1031018c nAvamanyasva dharmeNa svayaM varam upAsmahe
1031019a pitA hi prabhur asmAkaM daivataM paramaM hi saH
1031019c yasya no dAsyati pitA sa no bhartA bhaviSyati
1031020a tAsAM tad vacanaM zrutvA vAyuH paramakopanaH
1031020c pravizya sarvagAtrANi babhaJja bhagavAn prabhuH
1031021a tAH kanyA vAyunA bhagnA vivizur nRpater gRham
1031021c dRSTvA bhagnAs tadA rAjA saMbhrAnta idam abravIt
1031022a kim idaM kathyatAM putryaH ko dharmam avamanyate
1031022c kubjAH kena kRtAH sarvA veSTantyo nAbhibhASatha
1032001a tasya tad vacanaM zrutvA kuzanAbhasya dhImataH
1032001c zirobhiz caraNau spRSTvA kanyAzatam abhASata
1032002a vAyuH sarvAtmako rAjan pradharSayitum icchati
1032002c azubhaM mArgam AsthAya na dharmaM pratyavekSate
1032003a pitRmatyaH sma bhadraM te svacchande na vayaM sthitAH
1032003c pitaraM no vRNISva tvaM yadi no dAsyate tava
1032004a tena pApAnubandhena vacanaM na pratIcchatA
1032004c evaM bruvantyaH sarvAH sma vAyunA nihatA bhRSam
1032005a tAsAM tad vacanaM zrutvA rAjA paramadhArmikaH
1032005c pratyuvAca mahAtejAH kanyAzatam anuttamam
1032006a kSAntaM kSamAvatAM putryaH kartavyaM sumahat kRtam
1032006c aikamatyam upAgamya kulaM cAvekSitaM mama
1032007a alaMkAro hi nArINAM kSamA tu puruSasya vA
1032007c duSkaraM tac ca vaH kSAntaM tridazeSu vizeSataH
1032008a yAdRzIr vaH kSamA putryaH sarvAsAm avizeSataH
1032008c kSamA dAnaM kSamA yajJaH kSamA satyaM ca putrikAH
1032009a kSamA yazaH kSamA dharmaH kSamAyAM viSThitaM jagat
1032009c visRjya kanyAH kAkutstha rAjA tridazavikramaH
1032010a mantrajJo mantrayAm Asa pradAnaM saha mantribhiH
1032010c deze kAle pradAnasya sadRze pratipAdanam
1032011a etasminn eva kAle tu cUlI nAma mahAmuniH
1032011c UrdhvaretAH zubhAcAro brAhmaM tapa upAgamat
1032012a tapyantaM tam RSiM tatra gandharvI paryupAsate
1032012c somadA nAma bhadraM te UrmilA tanayA tadA
1032013a sA ca taM praNatA bhUtvA zuzrUSaNaparAyaNA
1032013c uvAsa kAle dharmiSThA tasyAs tuSTo 'bhavad guruH
1032014a sa ca tAM kAlayogena provAca raghunandana
1032014c parituSTo 'smi bhadraM te kiM karomi tava priyam
1032015a parituSTaM muniM jJAtvA gandharvI madhurasvaram
1032015c uvAca paramaprItA vAkyajJA vAkyakovidam
1032016a lakSmyA samudito brAhmyA brahmabhUto mahAtapAH
1032016c brAhmeNa tapasA yuktaM putram icchAmi dhArmikam
1032017a apatiz cAsmi bhadraM te bhAryA cAsmi na kasya cit
1032017c brAhmeNopagatAyAz ca dAtum arhasi me sutam
1032018a tasyAH prasanno brahmarSir dadau putram anuttamam
1032018c brahmadatta iti khyAtaM mAnasaM cUlinaH sutam
1032019a sa rAjA brahmadattas tu purIm adhyavasat tadA
1032019c kAmpilyAM parayA lakSmyA devarAjo yathA divam
1032020a sa buddhiM kRtavAn rAjA kuzanAbhaH sudhArmikaH
1032020c brahmadattAya kAkutstha dAtuM kanyAzataM tadA
1032021a tam AhUya mahAtejA brahmadattaM mahIpatiH
1032021c dadau kanyAzataM rAjA suprItenAntarAtmanA
1032022a yathAkramaM tataH pANiM jagrAha raghunandana
1032022c brahmadatto mahI pAlas tAsAM devapatir yathA
1032023a spRSTamAtre tataH pANau vikubjA vigatajvarAH
1032023c yuktAH paramayA lakSmyA babhuH kanyAzataM tadA
1032024a sa dRSTvA vAyunA muktAH kuzanAbho mahIpatiH
1032024c babhUva paramaprIto harSaM lebhe punaH punaH
1032025a kRtodvAhaM tu rAjAnaM brahmadattaM mahIpatiH
1032025c sadAraM preSayAm Asa sopAdhyAya gaNaM tadA
1032026a somadApi susaMhRSTA putrasya sadRzIM kriyAm
1032026c yathAnyAyaM ca gandharvI snuSAs tAH pratyanandata
1033001a kRtodvAhe gate tasmin brahmadatte ca rAghava
1033001c aputraH putralAbhAya pautrIm iSTim akalpayat
1033002a iSTyAM tu vartamAnAyAM kuzanAbhaM mahIpatim
1033002c uvAca paramaprItaH kuzo brahmasutas tadA
1033003a putras te sadRzaH putra bhaviSyati sudhArmikaH
1033003c gAdhiM prApsyasi tena tvaM kIrtiM loke ca zAzvatIm
1033004a evam uktvA kuzo rAma kuzanAbhaM mahIpatim
1033004c jagAmAkAzam Avizya brahmalokaM sanAtanam
1033005a kasya cit tv atha kAlasya kuzanAbhasya dhImataH
1033005c jajJe paramadharmiSTho gAdhir ity eva nAmataH
1033006a sa pitA mama kAkutstha gAdhiH paramadhArmikaH
1033006c kuzavaMzaprasUto 'smi kauziko raghunandana
1033007a pUrvajA bhaginI cApi mama rAghava suvratA
1033007c nAmnA satyavatI nAma RcIke pratipAditA
1033008a sazarIrA gatA svargaM bhartAram anuvartinI
1033008c kauzikI paramodArA sA pravRttA mahAnadI
1033009a divyA puNyodakA ramyA himavantam upAzritA
1033009c lokasya hitakAmArthaM pravRttA bhaginI mama
1033010a tato 'haM himavatpArzve vasAmi niyataH sukham
1033010c bhaginyAH snehasaMyuktaH kauzikyA raghunandana
1033011a sA tu satyavatI puNyA satye dharme pratiSThitA
1033011c pativratA mahAbhAgA kauzikI saritAM varA
1033012a ahaM hi niyamAd rAma hitvA tAM samupAgataH
1033012c siddhAzramam anuprApya siddho 'smi tava tejasA
1033013a eSA rAma mamotpattiH svasya vaMzasya kIrtitA
1033013c dezasya ca mahAbAho yan mAM tvaM paripRcchasi
1033014a gato 'rdharAtraH kAkutstha kathAH kathayato mama
1033014c nidrAm abhyehi bhadraM te mA bhUd vighno 'dhvanIha naH
1033015a niSpandAs taravaH sarve nilInA mRgapakSiNaH
1033015c naizena tamasA vyAptA dizaz ca raghunandana
1033016a zanair viyujyate saMdhyA nabho netrair ivAvRtam
1033016c nakSatratArAgahanaM jyotirbhir avabhAsate
1033017a uttiSThati ca zItAMzuH zazI lokatamonudaH
1033017c hlAdayan prANinAM loke manAMsi prabhayA vibho
1033018a naizAni sarvabhUtAni pracaranti tatas tataH
1033018c yakSarAkSasasaMghAz ca raudrAz ca pizitAzanAH
1033019a evam uktvA mahAtejA virarAma mahAmuniH
1033019c sAdhu sAdhv iti taM sarve munayo hy abhyapUjayan
1033020a rAmo 'pi saha saumitriH kiM cid AgatavismayaH
1033020c prazasya munizArdUlaM nidrAM samupasevate
1034001a upAsya rAtrizeSaM tu zoNAkUle maharSibhiH
1034001c nizAyAM suprabhAtAyAM vizvAmitro 'bhyabhASata
1034002a suprabhAtA nizA rAma pUrvA saMdhyA pravartate
1034002c uttiSThottiSTha bhadraM te gamanAyAbhirocaya
1034003a tac chrutvA vacanaM tasya kRtvA paurvAhNikIM kriyAm
1034003c gamanaM rocayAm Asa vAkyaM cedam uvAca ha
1034004a ayaM zoNaH zubhajalo gAdhaH pulinamaNDitaH
1034004c katareNa pathA brahman saMtariSyAmahe vayam
1034005a evam uktas tu rAmeNa vizvAmitro 'bravId idam
1034005c eSa panthA mayoddiSTo yena yAnti maharSayaH
1034006a te gatvA dUram adhvAnaM gate 'rdhadivase tadA
1034006c jAhnavIM saritAM zreSThAM dadRzur munisevitAm
1034007a tAM dRSTvA puNyasalilAM haMsasArasasevitAm
1034007c babhUvur muditAH sarve munayaH saharAghavAH
1034007e tasyAs tIre tataz cakrus te AvAsaparigraham
1034008a tataH snAtvA yathAnyAyaM saMtarpya pitRdevatAH
1034008c hutvA caivAgnihotrANi prAzya cAmRtavad dhaviH
1034009a vivizur jAhnavItIre zucau muditamAnasAH
1034009c vizvAmitraM mahAtmAnaM parivArya samantataH
1034010a saMprahRSTamanA rAmo vizvAmitram athAbravIt
1034010c bhagavaJ zrotum icchAmi gaGgAM tripathagAM nadIm
1034010e trailokyaM katham Akramya gatA nadanadIpatim
1034011a codito rAma vAkyena vizvAmitro mahAmuniH
1034011c vRddhiM janma ca gaGgAyA vaktum evopacakrame
1034012a zailendro himavAn nAma dhAtUnAm Akaro mahAn
1034012c tasya kanyA dvayaM rAma rUpeNApratimaM bhuvi
1034013a yA meruduhitA rAma tayor mAtA sumadhyamA
1034013c nAmnA menA manojJA vai patnI himavataH priyA
1034014a tasyAM gaGgeyam abhavaj jyeSThA himavataH sutA
1034014c umA nAma dvitIyAbhUt kanyA tasyaiva rAghava
1034015a atha jyeSThAM surAH sarve devatArthacikIrSayA
1034015c zailendraM varayAm Asur gaGgAM tripathagAM nadIm
1034016a dadau dharmeNa himavAMs tanayAM lokapAvanIm
1034016c svacchandapathagAM gaGgAM trailokyahitakAmyayA
1034017a pratigRhya trilokArthaM trilokahitakAriNaH
1034017c gaGgAm AdAya te 'gacchan kRtArthenAntarAtmanA
1034018a yA cAnyA zailaduhitA kanyAsId raghunandana
1034018c ugraM sA vratam AsthAya tapas tepe tapodhanA
1034019a ugreNa tapasA yuktAM dadau zailavaraH sutAm
1034019c rudrAyApratirUpAya umAM lokanamaskRtAm
1034020a ete te zaila rAjasya sute lokanamaskRte
1034020c gaGgA ca saritAM zreSThA umA devI ca rAghava
1034021a etat te dharmam AkhyAtaM yathA tripathagA nadI
1034021c khaM gatA prathamaM tAta gatiM gatimatAM vara
1035001a ukta vAkye munau tasminn ubhau rAghavalakSmaNau
1035001c pratinandya kathAM vIrAv Ucatur munipuMgavam
1035002a dharmayuktam idaM brahman kathitaM paramaM tvayA
1035002c duhituH zailarAjasya jyeSThAya vaktum arhasi
1035003a vistaraM vistarajJo 'si divyamAnuSasaMbhavam
1035003c trIn patho hetunA kena pAvayel lokapAvanI
1035004a kathaM gaGgAM tripathagA vizrutA sariduttamA
1035004c triSu lokeSu dharmajJa karmabhiH kaiH samanvitA
1035005a tathA bruvati kAkutsthe vizvAmitras tapodhanaH
1035005c nikhilena kathAM sarvAm RSimadhye nyavedayat
1035006a purA rAma kRtodvAhaH zitikaNTho mahAtapAH
1035006c dRSTvA ca spRhayA devIM maithunAyopacakrame
1035007a zitikaNThasya devasya divyaM varSazataM gatam
1035007c na cApi tanayo rAma tasyAm AsIt paraMtapa
1035008a tato devAH samudvignAH pitAmahapurogamAH
1035008c yad ihotpadyate bhUtaM kas tat pratisahiSyate
1035009a abhigamya surAH sarve praNipatyedam abruvan
1035009c devadeva mahAdeva lokasyAsya hite rata
1035009e surANAM praNipAtena prasAdaM kartum arhasi
1035010a na lokA dhArayiSyanti tava tejaH surottama
1035010c brAhmeNa tapasA yukto devyA saha tapaz cara
1035011a trailokyahitakAmArthaM tejas tejasi dhAraya
1035011c rakSa sarvAn imA&l lokAn nAlokaM kartum arhasi
1035012a devatAnAM vacaH zrutvA sarvalokamahezvaraH
1035012c bADham ity abravIt sarvAn punaz cedam uvAca ha
1035013a dhArayiSyAmy ahaM tejas tejasy eva sahomayA
1035013c tridazAH pRthivI caiva nirvANam adhigacchatu
1035014a yad idaM kSubhitaM sthAnAn mama tejo hy anuttamam
1035014c dhArayiSyati kas tan me bruvantu surasattamAH
1035015a evam uktAs tato devAH pratyUcur vRSabhadhvajam
1035015c yat tejaH kSubhitaM hy etat tad dharA dhArayiSyati
1035016a evam uktaH surapatiH pramumoca mahItale
1035016c tejasA pRthivI yena vyAptA sagirikAnanA
1035017a tato devAH punar idam Ucuz cAtha hutAzanam
1035017c praviza tvaM mahAtejo raudraM vAyusamanvitaH
1035018a tad agninA punar vyAptaM saMjAtaH zvetaparvataH
1035018c divyaM zaravaNaM caiva pAvakAdityasaMnibham
1035018e yatra jAto mahAtejAH kArtikeyo 'gnisaMbhavaH
1035019a athomAM ca zivaM caiva devAH sarSi gaNAs tadA
1035019c pUjayAm Asur atyarthaM suprItamanasas tataH
1035020a atha zaila sutA rAma tridazAn idam abravIt
1035020c samanyur azapat sarvAn krodhasaMraktalocanA
1035021a yasmAn nivAritA caiva saMgatA putrakAmyayA
1035021c apatyaM sveSu dAreSu notpAdayitum arhatha
1035021e adya prabhRti yuSmAkam aprajAH santu patnayaH
1035022a evam uktvA surAn sarvAJ zazApa pRthivIm api
1035022c avane naikarUpA tvaM bahubhAryA bhaviSyasi
1035023a na ca putrakRtAM prItiM matkrodhakaluSI kRtA
1035023c prApsyasi tvaM sudurmedhe mama putram anicchatI
1035024a tAn sarvAn vrIDitAn dRSTvA surAn surapatis tadA
1035024c gamanAyopacakrAma dizaM varuNapAlitAm
1035025a sa gatvA tapa AtiSThat pArzve tasyottare gireH
1035025c himavatprabhave zRGge saha devyA mahezvaraH
1035026a eSa te vistaro rAma zailaputryA niveditaH
1035026c gaGgAyAH prabhavaM caiva zRNu me sahalakSmaNaH
1036001a tapyamAne tapo deve devAH sarSigaNAH purA
1036001c senApatim abhIpsantaH pitAmaham upAgaman
1036002a tato 'bruvan surAH sarve bhagavantaM pitAmaham
1036002c praNipatya zubhaM vAkyaM sendrAH sAgnipurogamAH
1036003a yo naH senApatir deva datto bhagavatA purA
1036003c sa tapaH param AsthAya tapyate sma sahomayA
1036004a yad atrAnantaraM kAryaM lokAnAM hitakAmyayA
1036004c saMvidhatsva vidhAnajJa tvaM hi naH paramA gatiH
1036005a devatAnAM vacaH zrutvA sarvalokapitAmahaH
1036005c sAntvayan madhurair vAkyais tridazAn idam abravIt
1036006a zailaputryA yad uktaM tan na prajAsyatha patniSu
1036006c tasyA vacanam akliSTaM satyam eva na saMzayaH
1036007a iyam AkAzagA gaGgA yasyAM putraM hutAzanaH
1036007c janayiSyati devAnAM senApatim ariMdamam
1036008a jyeSThA zailendraduhitA mAnayiSyati taM sutam
1036008c umAyAs tad bahumataM bhaviSyati na saMzayaH
1036009a tac chrutvA vacanaM tasya kRtArthA raghunandana
1036009c praNipatya surAH sarve pitAmaham apUjayan
1036010a te gatvA parvataM rAma kailAsaM dhAtumaNDitam
1036010c agniM niyojayAm AsuH putrArthaM sarvadevatAH
1036011a devakAryam idaM deva samAdhatsva hutAzana
1036011c zailaputryAM mahAtejo gaGgAyAM teja utsRja
1036012a devatAnAM pratijJAya gaGgAm abhyetya pAvakaH
1036012c garbhaM dhAraya vai devi devatAnAm idaM priyam
1036013a ity etad vacanaM zrutvA divyaM rUpam adhArayat
1036013c sa tasyA mahimAM dRSTvA samantAd avakIryata
1036014a samantatas tadA devIm abhyaSiJcata pAvakaH
1036014c sarvasrotAMsi pUrNAni gaGgAyA raghunandana
1036015a tam uvAca tato gaGgA sarvadevapurohitam
1036015c azaktA dhAraNe deva tava tejaH samuddhatam
1036015e dahyamAnAgninA tena saMpravyathitacetanA
1036016a athAbravId idaM gaGgAM sarvadevahutAzanaH
1036016c iha haimavate pAde garbho 'yaM saMnivezyatAm
1036017a zrutvA tv agnivaco gaGgA taM garbham atibhAsvaram
1036017c utsasarja mahAtejAH srotobhyo hi tadAnagha
1036018a yad asyA nirgataM tasmAt taptajAmbUnadaprabham
1036018c kAJcanaM dharaNIM prAptaM hiraNyam amalaM zubham
1036019a tAmraM kArSNAyasaM caiva taikSNyAd evAbhijAyata
1036019c malaM tasyAbhavat tatra trapusIsakam eva ca
1036020a tad etad dharaNIM prApya nAnAdhAtur avardhata
1036021a nikSiptamAtre garbhe tu tejobhir abhiraJjitam
1036021c sarvaM parvatasaMnaddhaM sauvarNam abhavad vanam
1036022a jAtarUpam iti khyAtaM tadA prabhRti rAghava
1036022c suvarNaM puruSavyAghra hutAzanasamaprabham
1036023a taM kumAraM tato jAtaM sendrAH sahamarudgaNAH
1036023c kSIrasaMbhAvanArthAya kRttikAH samayojayan
1036024a tAH kSIraM jAtamAtrasya kRtvA samayam uttamam
1036024c daduH putro 'yam asmAkaM sarvAsAm iti nizcitAH
1036025a tatas tu devatAH sarvAH kArtikeya iti bruvan
1036025c putras trailokya vikhyAto bhaviSyati na saMzayaH
1036026a teSAM tad vacanaM zrutvA skannaM garbhaparisrave
1036026c snApayan parayA lakSmyA dIpyamAnam ivAnalam
1036027a skanda ity abruvan devAH skannaM garbhaparisravAt
1036027c kArtikeyaM mahAbhAgaM kAkutsthajvalanopamam
1036028a prAdurbhUtaM tataH kSIraM kRttikAnAm anuttamam
1036028c SaNNAM SaDAnano bhUtvA jagrAha stanajaM payaH
1036029a gRhItvA kSIram ekAhnA sukumAra vapus tadA
1036029c ajayat svena vIryeNa daityasainyagaNAn vibhuH
1036030a surasenAgaNapatiM tatas tam amaladyutim
1036030c abhyaSiJcan suragaNAH sametyAgnipurogamAH
1036031a eSa te rAma gaGgAyA vistaro 'bhihito mayA
1036031c kumArasaMbhavaz caiva dhanyaH puNyas tathaiva ca
1037001a tAM kathAM kauziko rAme nivedya madhurAkSaram
1037001c punar evAparaM vAkyaM kAkutstham idam abravIt
1037002a ayodhyAdhipatiH zUraH pUrvam AsIn narAdhipaH
1037002c sagaro nAma dharmAtmA prajAkAmaH sa cAprajaH
1037003a vaidarbhaduhitA rAma kezinI nAma nAmataH
1037003c jyeSThA sagarapatnI sA dharmiSThA satyavAdinI
1037004a ariSTanemiduhitA rUpeNApratimA bhuvi
1037004c dvitIyA sagarasyAsIt patnI sumatisaMjJitA
1037005a tAbhyAM saha tadA rAjA patnIbhyAM taptavAMs tapaH
1037005c himavantaM samAsAdya bhRguprasravaNe girau
1037006a atha varSa zate pUrNe tapasArAdhito muniH
1037006c sagarAya varaM prAdAd bhRguH satyavatAM varaH
1037007a apatyalAbhaH sumahAn bhaviSyati tavAnagha
1037007c kIrtiM cApratimAM loke prApsyase puruSarSabha
1037008a ekA janayitA tAta putraM vaMzakaraM tava
1037008c SaSTiM putrasahasrANi aparA janayiSyati
1037009a bhASamANaM naravyAghraM rAjapatnyau prasAdya tam
1037009c UcatuH paramaprIte kRtAJjalipuTe tadA
1037010a ekaH kasyAH suto brahman kA bahUJ janayiSyati
1037010c zrotum icchAvahe brahman satyam astu vacas tava
1037011a tayos tad vacanaM zrutvA bhRguH parama dhArmikaH
1037011c uvAca paramAM vANIM svacchando 'tra vidhIyatAm
1037012a eko vaMzakaro vAstu bahavo vA mahAbalAH
1037012c kIrtimanto mahotsAhAH kA vA kaM varam icchati
1037013a munes tu vacanaM zrutvA kezinI raghunandana
1037013c putraM vaMzakaraM rAma jagrAha nRpasaMnidhau
1037014a SaSTiM putrasahasrANi suparNabhaginI tadA
1037014c mahotsAhAn kIrtimato jagrAha sumatiH sutAn
1037015a pradakSiNam RSiM kRtvA zirasAbhipraNamya ca
1037015c jagAma svapuraM rAjA sabhAryA raghunandana
1037016a atha kAle gate tasmiJ jyeSThA putraM vyajAyata
1037016c asamaJja iti khyAtaM kezinI sagarAtmajam
1037017a sumatis tu naravyAghra garbhatumbaM vyajAyata
1037017c SaSTiH putrasahasrANi tumbabhedAd viniHsRtAH
1037018a ghRtapUrNeSu kumbheSu dhAtryas tAn samavardhayan
1037018c kAlena mahatA sarve yauvanaM pratipedire
1037019a atha dIrgheNa kAlena rUpayauvanazAlinaH
1037019c SaSTiH putrasahasrANi sagarasyAbhavaMs tadA
1037020a sa ca jyeSTho narazreSTha sagarasyAtmasaMbhavaH
1037020c bAlAn gRhItvA tu jale sarayvA raghunandana
1037020e prakSipya prahasan nityaM majjatas tAn nirIkSya vai
1037021a paurANAm ahite yuktaH pitrA nirvAsitaH purAt
1037022a tasya putro 'MzumAn nAma asamaJjasya vIryavAn
1037022c saMmataH sarvalokasya sarvasyApi priyaMvadaH
1037023a tataH kAlena mahatA matiH samabhijAyata
1037023c sagarasya narazreSTha yajeyam iti nizcitA
1037024a sa kRtvA nizcayaM rAjA sopAdhyAyagaNas tadA
1037024c yajJakarmaNi vedajJo yaSTuM samupacakrame
1038001a vizvAmitravacaH zrutvA kathAnte raghunandana
1038001c uvAca paramaprIto muniM dIptam ivAnalam
1038002a zrotum ichAmi bhadraM te vistareNa kathAm imAm
1038002c pUrvako me kathaM brahman yajJaM vai samupAharat
1038003a vizvAmitras tu kAkutstham uvAca prahasann iva
1038003c zrUyatAM vistaro rAma sagarasya mahAtmanaH
1038004a zaMkarazvazuro nAma himavAn acalottamaH
1038004c vindhyaparvatam AsAdya nirIkSete parasparam
1038005a tayor madhye pravRtto 'bhUd yajJaH sa puruSottama
1038005c sa hi dezo naravyAghra prazasto yajJakarmaNi
1038006a tasyAzvacaryAM kAkutstha dRDhadhanvA mahArathaH
1038006c aMzumAn akarot tAta sagarasya mate sthitaH
1038007a tasya parvaNi taM yajJaM yajamAnasya vAsavaH
1038007c rAkSasIM tanum AsthAya yajJiyAzvam apAharat
1038008a hriyamANe tu kAkutstha tasminn azve mahAtmanaH
1038008c upAdhyAya gaNAH sarve yajamAnam athAbruvan
1038009a ayaM parvaNi vegena yajJiyAzvo 'panIyate
1038009c hartAraM jahi kAkutstha hayaz caivopanIyatAm
1038010a yajJac chidraM bhavaty etat sarveSAm azivAya naH
1038010c tat tathA kriyatAM rAjan yathAchidraH kratur bhavet
1038011a upAdhyAya vacaH zrutvA tasmin sadasi pArthivaH
1038011c SaSTiM putrasahasrANi vAkyam etad uvAca ha
1038012a gatiM putrA na pazyAmi rakSasAM puruSarSabhAH
1038012c mantrapUtair mahAbhAgair Asthito hi mahAkratuH
1038013a tad gacchata vicinvadhvaM putrakA bhadram astu vaH
1038013c samudramAlinIM sarvAM pRthivIm anugacchata
1038014a ekaikaM yojanaM putrA vistAram abhigacchata
1038015a yAvat turagasaMdarzas tAvat khanata medinIm
1038015c tam eva hayahartAraM mArgamANA mamAjJayA
1038016a dIkSitaH pautrasahitaH sopAdhyAyagaNo hy aham
1038016c iha sthAsyAmi bhadraM vo yAvat turagadarzanam
1038017a ity uktvA hRSTamanaso rAjaputrA mahAbalAH
1038017c jagmur mahItalaM rAma pitur vacanayantritAH
1038018a yojanAyAm avistAram ekaiko dharaNItalam
1038018c bibhiduH puruSavyAghra vajrasparzasamair bhujaiH
1038019a zUlair azanikalpaiz ca halaiz cApi sudAruNaiH
1038019c bhidyamAnA vasumatI nanAda raghunandana
1038020a nAgAnAM vadhyamAnAnAm asurANAM ca rAghava
1038020c rAkSasAnAM ca durdharSaH sattvAnAM ninado 'bhavat
1038021a yojanAnAM sahasrANi SaSTiM tu raghunandana
1038021c bibhidur dharaNIM vIrA rasAtalam anuttamam
1038022a evaM parvatasaMbAdhaM jambUdvIpaM nRpAtmajAH
1038022c khananto nRpazArdUla sarvataH paricakramuH
1038023a tato devAH sagandharvAH sAsurAH sahapannagAH
1038023c saMbhrAntamanasaH sarve pitAmaham upAgaman
1038024a te prasAdya mahAtmAnaM viSaNNavadanAs tadA
1038024c UcuH paramasaMtrastAH pitAmaham idaM vacaH
1038025a bhagavan pRthivI sarvA khanyate sagarAtmajaiH
1038025c bahavaz ca mahAtmAno vadhyante jalacAriNaH
1038026a ayaM yajJahano 'smAkam anenAzvo 'panIyate
1038026c iti te sarvabhUtAni nighnanti sagarAtmajaH
1039001a devatAnAM vacaH zrutvA bhagavAn vai pitAmahaH
1039001c pratyuvAca susaMtrastAn kRtAntabalamohitAn
1039002a yasyeyaM vasudhA kRtsnA vAsudevasya dhImataH
1039002c kApilaM rUpam AsthAya dhArayaty anizaM dharAm
1039003a pRthivyAz cApi nirbhedo dRSTa eva sanAtanaH
1039003c sagarasya ca putrANAM vinAzo 'dIrghajIvinAm
1039004a pitAmahavacaH zrutvA trayas triMzad ariMdamaH
1039004c devAH paramasaMhRSTAH punar jagmur yathAgatam
1039005a sagarasya ca putrANAM prAdur AsIn mahAtmanAm
1039005c pRthivyAM bhidyamAnAyAM nirghAtasamanisvanaH
1039006a tato bhittvA mahIM sarvAM kRtvA cApi pradakSiNam
1039006c sahitAH sagarAH sarve pitaraM vAkyam abruvan
1039007a parikrAntA mahI sarvA sattvavantaz ca sUditAH
1039007c devadAnavarakSAMsi pizAcoragakiMnarAH
1039008a na ca pazyAmahe 'zvaM tam azvahartAram eva ca
1039008c kiM kariSyAma bhadraM te buddhir atra vicAryatAm
1039009a teSAM tad vacanaM zrutvA putrANAM rAjasattamaH
1039009c samanyur abravId vAkyaM sagaro raghunandana
1039010a bhUyaH khanata bhadraM vo nirbhidya vasudhAtalam
1039010c azvahartAram AsAdya kRtArthAz ca nivartatha
1039011a pitur vacanam AsthAya sagarasya mahAtmanaH
1039011c SaSTiH putrasahasrANi rasAtalam abhidravan
1039012a khanyamAne tatas tasmin dadRzuH parvatopamam
1039012c dizAgajaM virUpAkSaM dhArayantaM mahItalam
1039013a saparvatavanAM kRtsnAM pRthivIM raghunandana
1039013c zirasA dhArayAm Asa virUpAkSo mahAgajaH
1039014a yadA parvaNi kAkutstha vizramArthaM mahAgajaH
1039014c khedAc cAlayate zIrSaM bhUmikampas tadhA bhavet
1039015a taM te pradakSiNaM kRtvA dizApAlaM mahAgajam
1039015c mAnayanto hi te rAma jagmur bhittvA rasAtalam
1039016a tataH pUrvAM dizaM bhittvA dakSiNAM bibhiduH punaH
1039016c dakSiNasyAm api dizi dadRzus te mahAgajam
1039017a mahApadmaM mahAtmAnaM sumahAparvatopamam
1039017c zirasA dhArayantaM te vismayaM jagmur uttamam
1039018a tataH pradakSiNaM kRtvA sagarasya mahAtmanaH
1039018c SaSTiH putrasahasrANi pazcimAM bibhidur dizam
1039019a pazcimAyAm api dizi mahAntam acalopamam
1039019c dizAgajaM saumanasaM dadRzus te mahAbalAH
1039020a taM te pradakSiNaM kRtvA pRSTvA cApi nirAmayam
1039020c khanantaH samupakrAntA dizaM somavatIM tadA
1039021a uttarasyAM raghuzreSTha dadRzur himapANDuram
1039021c bhadraM bhadreNa vapuSA dhArayantaM mahIm imAm
1039022a samAlabhya tataH sarve kRtvA cainaM pradakSiNam
1039022c SaSTiH putrasahasrANi bibhidur vasudhAtalam
1039023a tataH prAguttarAM gatvA sAgarAH prathitAM dizam
1039023c roSAd abhyakhanan sarve pRthivIM sagarAtmajAH
1039024a dadRzuH kapilaM tatra vAsudevaM sanAtanam
1039024c hayaM ca tasya devasya carantam avidUrataH
1039025a te taM yajJahanaM jJAtvA krodhaparyAkulekSaNAH
1039025c abhyadhAvanta saMkruddhAs tiSTha tiSTheti cAbruvan
1039026a asmAkaM tvaM hi turagaM yajJiyaM hRtavAn asi
1039026c durmedhas tvaM hi saMprAptAn viddhi naH sagarAtmajAn
1039027a zrutvA tad vacanaM teSAM kapilo raghunandana
1039027c roSeNa mahatAviSTo huMkAram akarot tadA
1039028a tatas tenAprameyena kapilena mahAtmanA
1039028c bhasmarAzIkRtAH sarve kAkutstha sagarAtmajAH
1040001a putrAMz ciragatAJ jJAtvA sagaro raghunandana
1040001c naptAram abravId rAjA dIpyamAnaM svatejasA
1040002a zUraz ca kRtavidyaz ca pUrvais tulyo 'si tejasA
1040002c pitqNAM gatim anviccha yena cAzvo 'pahAritaH
1040003a antarbhaumAni sattvAni vIryavanti mahAnti ca
1040003c teSAM tvaM pratighAtArthaM sAsiM gRhNISva kArmukam
1040004a abhivAdyAbhivAdyAMs tvaM hatvA vighnakarAn api
1040004c siddhArthaH saMnivartasva mama yajJasya pAragaH
1040005a evam ukto 'MzumAn samyak sagareNa mahAtmanA
1040005c dhanur AdAya khaDgaM ca jagAma laghuvikramaH
1040006a sa khAtaM pitRbhir mArgam antarbhaumaM mahAtmabhiH
1040006c prApadyata narazreSTha tena rAjJAbhicoditaH
1040007a daityadAnavarakSobhiH pizAcapatagoragaiH
1040007c pUjyamAnaM mahAtejA dizAgajam apazyata
1040008a sa taM pradakSiNaM kRtvA pRSTvA caiva nirAmayam
1040008c pitqn sa paripapraccha vAjihartAram eva ca
1040009a dizAgajas tu tac chrutvA prItyAhAMzumato vacaH
1040009c AsamaJjakRtArthas tvaM sahAzvaH zIghram eSyasi
1040010a tasya tad vacanaM zrutvA sarvAn eva dizAgajAn
1040010c yathAkramaM yathAnyAyaM praSTuM samupacakrame
1040011a taiz ca sarvair dizApAlair vAkyajJair vAkyakovidaiH
1040011c pUjitaH sahayaz caiva gantAsIty abhicoditaH
1040012a teSAM tad vacanaM zrutvA jagAma laghuvikramaH
1040012c bhasmarAzIkRtA yatra pitaras tasya sAgarAH
1040013a sa duHkhavazam Apannas tv asamaJjasutas tadA
1040013c cukroza paramArtas tu vadhAt teSAM suduHkhitaH
1040014a yajJiyaM ca hayaM tatra carantam avidUrataH
1040014c dadarza puruSavyAghro duHkhazokasamanvitaH
1040015a dadarza puruSavyAghro kartukAmo jalakriyAm
1040015c salilArthI mahAtejA na cApazyaj jalAzayam
1040016a visArya nipuNAM dRSTiM tato 'pazyat khagAdhipam
1040016c pitqNAM mAtulaM rAma suparNam anilopamam
1040017a sa cainam abravId vAkyaM vainateyo mahAbalaH
1040017c mA zucaH puruSavyAghra vadho 'yaM lokasaMmataH
1040018a kapilenAprameyena dagdhA hIme mahAbalAH
1040018c salilaM nArhasi prAjJa dAtum eSAM hi laukikam
1040019a gaGgA himavato jyeSThA duhitA puruSarSabha
1040019c bhasmarAzIkRtAn etAn pAvayel lokapAvanI
1040020a tayA klinnam idaM bhasma gaGgayA lokakAntayA
1040020c SaSTiM putrasahasrANi svargalokaM nayiSyati
1040021a gaccha cAzvaM mahAbhAga saMgRhya puruSarSabha
1040021c yajJaM paitAmahaM vIra nirvartayitum arhasi
1040022a suparNavacanaM zrutvA so 'MzumAn ativIryavAn
1040022c tvaritaM hayam AdAya punar AyAn mahAyazAH
1040023a tato rAjAnam AsAdya dIkSitaM raghunandana
1040023c nyavedayad yathAvRttaM suparNavacanaM tathA
1040024a tac chrutvA ghorasaMkAzaM vAkyam aMzumato nRpaH
1040024c yajJaM nirvartayAm Asa yathAkalpaM yathAvidhi
1040025a svapuraM cAgamac chrImAn iSTayajJo mahIpatiH
1040025c gaGgAyAz cAgame rAjA nizcayaM nAdhyagacchata
1040026a agatvA nizcayaM rAjA kAlena mahatA mahAn
1040026c triMzadvarSasahasrANi rAjyaM kRtvA divaM gataH
1041001a kAladharmaM gate rAma sagare prakRtIjanAH
1041001c rAjAnaM rocayAm Asur aMzumantaM sudhArmikam
1041002a sa rAjA sumahAn AsId aMzumAn raghunandana
1041002c tasya putro mahAn AsId dilIpa iti vizrutaH
1041003a tasmin rAjyaM samAvezya dilIpe raghunandana
1041003c himavacchikhare ramye tapas tepe sudAruNam
1041004a dvAtriMzac ca sahasrANi varSANi sumahAyazAH
1041004c tapovanagato rAjA svargaM lebhe tapodhanaH
1041005a dilIpas tu mahAtejAH zrutvA paitAmahaM vadham
1041005c duHkhopahatayA buddhyA nizcayaM nAdhyagacchata
1041006a kathaM gaGgAvataraNaM kathaM teSAM jalakriyA
1041006c tArayeyaM kathaM caitAn iti cintA paro 'bhavat
1041007a tasya cintayato nityaM dharmeNa viditAtmanaH
1041007c putro bhagIratho nAma jajJe paramadhArmikaH
1041008a dilIpas tu mahAtejA yajJair bahubhir iSTavAn
1041008c triMzadvarSasahasrANi rAjA rAjyam akArayat
1041009a agatvA nizcayaM rAjA teSAm uddharaNaM prati
1041009c vyAdhinA narazArdUla kAladharmam upeyivAn
1041010a indralokaM gato rAjA svArjitenaiva karmaNA
1041010c rAjye bhagIrathaM putram abhiSicya nararSabhaH
1041011a bhagIrathas tu rAjarSir dhArmiko raghunandana
1041011c anapatyo mahAtejAH prajAkAmaH sa cAprajaH
1041012a sa tapo dIrgham AtiSThad gokarNe raghunandana
1041012c UrdhvabAhuH paJcatapA mAsAhAro jitendriyaH
1041013a tasya varSasahasrANi ghore tapasi tiSThataH
1041013c suprIto bhagavAn brahmA prajAnAM patir IzvaraH
1041014a tataH suragaNaiH sArdham upAgamya pitAmahaH
1041014c bhagIrathaM mahAtmAnaM tapyamAnam athAbravIt
1041015a bhagIratha mahAbhAga prItas te 'haM janezvara
1041015c tapasA ca sutaptena varaM varaya suvrata
1041016a tam uvAca mahAtejAH sarvalokapitAmaham
1041016c bhagIratho mahAbhAgaH kRtAJjalir avasthitaH
1041017a yadi me bhagavAn prIto yady asti tapasaH phalam
1041017c sagarasyAtmajAH sarve mattaH salilam ApnuyuH
1041018a gaGgAyAH salilaklinne bhasmany eSAM mahAtmanAm
1041018c svargaM gaccheyur atyantaM sarve me prapitAmahAH
1041019a deyA ca saMtatir deva nAvasIdet kulaM ca naH
1041019c ikSvAkUNAM kule deva eSa me 'stu varaH paraH
1041020a uktavAkyaM tu rAjAnaM sarvalokapitAmahaH
1041020c pratyuvAca zubhAM vANIM madhurAM madhurAkSarAm
1041021a manoratho mahAn eSa bhagIratha mahAratha
1041021c evaM bhavatu bhadraM te ikSvAkukulavardhana
1041022a iyaM haimavatI gaGgA jyeSThA himavataH sutA
1041022c tAM vai dhArayituM rAjan haras tatra niyujyatAm
1041023a gaGgAyAH patanaM rAjan pRthivI na sahiSyate
1041023c tAM vai dhArayituM vIra nAnyaM pazyAmi zUlinaH
1041024a tam evam uktvA rAjAnaM gaGgAM cAbhASya lokakRt
1041024c jagAma tridivaM devaH saha sarvair marudgaNaiH
1042001a devadeve gate tasmin so 'GguSThAgranipIDitAm
1042001c kRtvA vasumatIM rAma saMvatsaram upAsata
1042002a atha saMvatsare pUrNe sarvalokanamaskRtaH
1042002c umApatiH pazupatI rAjAnam idam abravIt
1042003a prItas te 'haM narazreSTha kariSyAmi tava priyam
1042003c zirasA dhArayiSyAmi zailarAjasutAm aham
1042004a tato haimavatI jyeSThA sarvalokanamaskRtA
1042004c tadA sAtimahad rUpaM kRtvA vegaM ca duHsaham
1042004e AkAzAd apatad rAma zive zivazirasy uta
1042005a naiva sA nirgamaM lebhe jaTAmaNDalamohitA
1042005c tatraivAbabhramad devI saMvatsaragaNAn bahUn
1042006a anena toSitaz cAsId atyarthaM raghunandana
1042006c visasarja tato gaGgAM haro bindusaraH prati
1042007a gaganAc chaMkaraziras tato dharaNim AgatA
1042007c vyasarpata jalaM tatra tIvrazabdapuraskRtam
1042008a tato devarSigandharvA yakSAH siddhagaNAs tathA
1042008c vyalokayanta te tatra gaganAd gAM gatAM tadA
1042009a vimAnair nagarAkArair hayair gajavarais tathA
1042009c pAriplavagatAz cApi devatAs tatra viSThitAH
1042010a tad adbhutatamaM loke gaGgApatanam uttamam
1042010c didRkSavo devagaNAH sameyur amitaujasaH
1042011a saMpatadbhiH suragaNais teSAM cAbharaNaujasA
1042011c zatAdityam ivAbhAti gaganaM gatatoyadam
1042012a ziMzumAroragagaNair mInair api ca caJcalaiH
1042012c vidyudbhir iva vikSiptair AkAzam abhavat tadA
1042013a pANDuraiH salilotpIDaiH kIryamANaiH sahasradhA
1042013c zAradAbhrair ivAkIrNaM gaganaM haMsasaMplavaiH
1042014a kva cid drutataraM yAti kuTilaM kva cid Ayatam
1042014c vinataM kva cid uddhUtaM kva cid yAti zanaiH zanaiH
1042015a salilenaiva salilaM kva cid abhyAhataM punaH
1042015c muhur UrdhvapathaM gatvA papAta vasudhAM punaH
1042016a tac chaMkarazirobhraSTaM bhraSTaM bhUmitale punaH
1042016c vyarocata tadA toyaM nirmalaM gatakalmaSam
1042017a tatrarSigaNagandharvA vasudhAtalavAsinaH
1042017c bhavAGgapatitaM toyaM pavitram iti paspRzuH
1042018a zApAt prapatitA ye ca gaganAd vasudhAtalam
1042018c kRtvA tatrAbhiSekaM te babhUvur gatakalmaSAH
1042019a dhUpapApAH punas tena toyenAtha subhAsvatA
1042019c punar AkAzam Avizya svA&l lokAn pratipedire
1042020a mumude mudito lokas tena toyena bhAsvatA
1042020c kRtAbhiSeko gaGgAyAM babhUva vigataklamaH
1042021a bhagIratho 'pi rAjarSir divyaM syandanam AsthitaH
1042021c prAyAd agre mahAtejAs taM gaGgA pRSThato 'nvagAt
1042022a devAH sarSigaNAH sarve daityadAnavarAkSasAH
1042022c gandharvayakSapravarAH sakiMnaramahoragAH
1042023a sarvAz cApsaraso rAma bhagIratharathAnugAH
1042023c gaGgAm anvagaman prItAH sarve jalacarAz ca ye
1042024a yato bhagIratho rAjA tato gaGgA yazasvinI
1042024c jagAma saritAM zreSThA sarvapApavinAzinI
1043001a sa gatvA sAgaraM rAjA gaGgayAnugatas tadA
1043001c praviveza talaM bhUmer yatra te bhasmasAtkRtAH
1043002a bhasmany athAplute rAma gaGgAyAH salilena vai
1043002c sarva lokaprabhur brahmA rAjAnam idam abravIt
1043003a tAritA narazArdUla divaM yAtAz ca devavat
1043003c SaSTiH putrasahasrANi sagarasya mahAtmanaH
1043004a sAgarasya jalaM loke yAvat sthAsyati pArthiva
1043004c sagarasyAtmajAs tAvat svarge sthAsyanti devavat
1043005a iyaM ca duhitA jyeSThA tava gaGgA bhaviSyati
1043005c tvatkRtena ca nAmnA vai loke sthAsyati vizrutA
1043006a gaGgA tripathagA nAma divyA bhAgIrathIti ca
1043006c tripatho bhAvayantIti tatas tripathagA smRtA
1043007a pitAmahAnAM sarveSAM tvam atra manujAdhipa
1043007c kuruSva salilaM rAjan pratijJAm apavarjaya
1043008a pUrvakeNa hi te rAjaMs tenAtiyazasA tadA
1043008c dharmiNAM pravareNAtha naiSa prApto manorathaH
1043009a tathaivAMzumatA tAta loke 'pratimatejasA
1043009c gaGgAM prArthayatA netuM pratijJA nApavarjitA
1043010a rAjarSiNA guNavatA maharSisamatejasA
1043010c mattulyatapasA caiva kSatradharmasthitena ca
1043011a dilIpena mahAbhAga tava pitrAtitejasA
1043011c punar na zaGkitA netuM gaGgAM prArthayatAnagha
1043012a sA tvayA samatikrAntA pratijJA puruSarSabha
1043012c prApto 'si paramaM loke yazaH paramasaMmatam
1043013a yac ca gaGgAvataraNaM tvayA kRtam ariMdama
1043013c anena ca bhavAn prApto dharmasyAyatanaM mahat
1043014a plAvayasva tvam AtmAnaM narottama sadocite
1043014c salile puruSavyAghra zuciH puNyaphalo bhava
1043015a pitAmahAnAM sarveSAM kuruSva salilakriyAm
1043015c svasti te 'stu gamiSyAmi svaM lokaM gamyatAM nRpa
1043016a ity evam uktvA devezaH sarvalokapitAmahaH
1043016c yathAgataM tathAgacchad devalokaM mahAyazAH
1043017a bhagIratho 'pi rAjarSiH kRtvA salilam uttamam
1043017c yathAkramaM yathAnyAyaM sAgarANAM mahAyazAH
1043017e kRtodakaH zucI rAjA svapuraM praviveza ha
1043018a samRddhArtho narazreSTha svarAjyaM prazazAsa ha
1043018c pramumoda ca lokas taM nRpam AsAdya rAghava
1043018e naSTazokaH samRddhArtho babhUva vigatajvaraH
1043019a eSa te rAma gaGgAyA vistaro 'bhihito mayA
1043019c svasti prApnuhi bhadraM te saMdhyAkAlo 'tivartate
1043020a dhanyaM yazasyam AyuSyaM svargyaM putryam athApi ca
1043020c idam AkhyAnam AkhyAtaM gaGgAvataraNaM mayA
1044001a vizvAmitravacaH zrutvA rAghavaH sahalakSmaNaH
1044001c vismayaM paramaM gatvA vizvAmitram athAbravIt
1044002a atyadbhutam idaM brahman kathitaM paramaM tvayA
1044002c gaGgAvataraNaM puNyaM sAgarasya ca pUraNam
1044003a tasya sA zarvarI sarvA saha saumitriNA tadA
1044003c jagAma cintayAnasya vizvAmitrakathAM zubhAm
1044004a tataH prabhAte vimale vizvAmitraM mahAmunim
1044004c uvAca rAghavo vAkyaM kRtAhnikam ariMdamaH
1044005a gatA bhagavatI rAtriH zrotavyaM paramaM zrutam
1044005c kSaNabhUteva sA rAtriH saMvRtteyaM mahAtapaH
1044005e imAM cintayataH sarvAM nikhilena kathAM tava
1044006a tarAma saritAM zreSThAM puNyAM tripathagAM nadIm
1044006c naur eSA hi sukhAstIrNA RSINAM puNyakarmaNAm
1044006e bhagavantam iha prAptaM jJAtvA tvaritam AgatA
1044007a tasya tad vacanaM zrutvA rAghavasya mahAtmanaH
1044007c saMtAraM kArayAm Asa sarSisaMghaH sarAghavaH
1044008a uttaraM tIram AsAdya saMpUjyarSigaNaM tatha
1044008c gaGgAkUle niviSTAs te vizAlAM dadRzuH purIm
1044009a tato munivaras tUrNaM jagAma saharAghavaH
1044009c vizAlAM nagarIM ramyAM divyAM svargopamAM tadA
1044010a atha rAmo mahAprAjJo vizvAmitraM mahAmunim
1044010c papraccha prAJjalir bhUtvA vizAlAm uttamAM purIm
1044011a kataro rAjavaMzo 'yaM vizAlAyAM mahAmune
1044011c zrotum icchAmi bhadraM te paraM kautUhalaM hi me
1044012a tasya tad vacanaM zrutvA rAmasya munipuMgavaH
1044012c AkhyAtuM tat samArebhe vizAlasya purAtanam
1044013a zrUyatAM rAma zakrasya kathAM kathayataH zubhAm
1044013c asmin deze hi yad vRttaM zRNu tattvena rAghava
1044014a pUrvaM kRtayuge rAma diteH putrA mahAbalAH
1044014c aditez ca mahAbhAgA vIryavantaH sudhArmikAH
1044015a tatas teSAM narazreSTha buddhir AsIn mahAtmanAm
1044015c amarA nirjarAz caiva kathaM syAma nirAmayAH
1044016a teSAM cintayatAM rAma buddhir AsId vipazcitAm
1044016c kSIrodamathanaM kRtvA rasaM prApsyAma tatra vai
1044017a tato nizcitya mathanaM yoktraM kRtvA ca vAsukim
1044017c manthAnaM mandaraM kRtvA mamanthur amitaujasaH
1044018a atha dhanvantarir nAma apsarAz ca suvarcasaH
1044018c apsu nirmathanAd eva rasAt tasmAd varastriyaH
1044018e utpetur manujazreSTha tasmAd apsaraso 'bhavan
1044019a SaSTiH koTyo 'bhavaMs tAsAm apsarANAM suvarcasAm
1044019c asaMkhyeyAs tu kAkutstha yAs tAsAM paricArikAH
1044020a na tAH sma pratigRhNanti sarve te devadAnavAH
1044020c apratigrahaNAc caiva tena sAdhAraNAH smRtAH
1044021a varuNasya tataH kanyA vAruNI raghunandana
1044021c utpapAta mahAbhAgA mArgamANA parigraham
1044022a diteH putrA na tAM rAma jagRhur varuNAtmajAm
1044022c adites tu sutA vIra jagRhus tAm aninditAm
1044023a asurAs tena daiteyAH surAs tenAditeH sutAH
1044023c hRSTAH pramuditAz cAsan vAruNI grahaNAt surAH
1044024a uccaiHzravA hayazreSTho maNiratnaM ca kaustubham
1044024c udatiSThan narazreSTha tathaivAmRtam uttamam
1044025a atha tasya kRte rAma mahAn AsIt kulakSayaH
1044025c adites tu tataH putrA diteH putrANa sUdayan
1044026a aditer AtmajA vIrA diteH putrAn nijaghnire
1044026c tasmin ghore mahAyuddhe daiteyAdityayor bhRzam
1044027a nihatya ditiputrAMs tu rAjyaM prApya puraMdaraH
1044027c zazAsa mudito lokAn sarSisaMghAn sacAraNAn
1045001a hateSu teSu putreSu ditiH paramaduHkhitA
1045001c mArIcaM kAzyapaM rAma bhartAram idam abravIt
1045002a hataputrAsmi bhagavaMs tava putrair mahAbalaiH
1045002c zakrahantAram icchAmi putraM dIrghatapo'rjitam
1045003a sAhaM tapaz cariSyAmi garbhaM me dAtum arhasi
1045003c IdRzaM zakrahantAraM tvam anujJAtum arhasi
1045004a tasyAs tad vacanaM zrutvA mArIcaH kAzyapas tadA
1045004c pratyuvAca mahAtejA ditiM paramaduHkhitAm
1045005a evaM bhavatu bhadraM te zucir bhava tapodhane
1045005c janayiSyasi putraM tvaM zakra hantAram Ahave
1045006a pUrNe varSasahasre tu zucir yadi bhaviSyasi
1045006c putraM trailokya hantAraM mattas tvaM janayiSyasi
1045007a evam uktvA mahAtejAH pANinA sa mamArja tAm
1045007c samAlabhya tataH svastIty uktvA sa tapase yayau
1045008a gate tasmin narazreSTha ditiH paramaharSitA
1045008c kuzaplavanam AsAdya tapas tepe sudAruNam
1045009a tapas tasyAM hi kurvatyAM paricaryAM cakAra ha
1045009c sahasrAkSo narazreSTha parayA guNasaMpadA
1045010a agniM kuzAn kASTham apaH phalaM mUlaM tathaiva ca
1045010c nyavedayat sahasrAkSo yac cAnyad api kAGkSitam
1045011a gAtrasaMvAhanaiz caiva zramApanayanais tathA
1045011c zakraH sarveSu kAleSu ditiM paricacAra ha
1045012a atha varSasahasretu dazone raghu nandana
1045012c ditiH paramasaMprItA sahasrAkSam athAbravIt
1045013a tapaz carantyA varSANi daza vIryavatAM vara
1045013c avaziSTAni bhadraM te bhrAtaraM drakSyase tataH
1045014a tam ahaM tvatkRte putra samAdhAsye jayotsukam
1045014c trailokyavijayaM putra saha bhokSyasi vijvaraH
1045015a evam uktvA ditiH zakraM prApte madhyaM divAkare
1045015c nidrayApahRtA devI pAdau kRtvAtha zIrSataH
1045016a dRSTvA tAm azuciM zakraH pAdataH kRtamUrdhajAm
1045016c ziraHsthAne kRtau pAdau jahAsa ca mumoda ca
1045017a tasyAH zarIravivaraM viveza ca puraMdaraH
1045017c garbhaM ca saptadhA rAma bibheda paramAtmavAn
1045018a bidhyamAnas tato garbho vajreNa zataparvaNA
1045018c ruroda susvaraM rAma tato ditir abudhyata
1045019a mA rudo mA rudaz ceti garbhaM zakro 'bhyabhASata
1045019c bibheda ca mahAtejA rudantam api vAsavaH
1045020a na hantavyo na hantavya ity evaM ditir abravIt
1045020c niSpapAta tataH zakro mAtur vacanagauravAt
1045021a prAJjalir vajrasahito ditiM zakro 'bhyabhASata
1045021c azucir devi suptAsi pAdayoH kRtamUrdhajA
1045022a tadantaram ahaM labdhvA zakrahantAram Ahave
1045022c abhindaM saptadhA devi tan me tvaM kSantum arhasi
1046001a saptadhA tu kRte garbhe ditiH paramaduHkhitA
1046001c sahasrAkSaM durAdharSaM vAkyaM sAnunayAbravIt
1046002a mamAparAdhAd garbho 'yaM saptadhA viphalIkRtaH
1046002c nAparAdho 'sti deveza tavAtra balasUdana
1046003a priyaM tu kRtam icchAmi mama garbhaviparyaye
1046003c marutAM saptaM saptAnAM sthAnapAlA bhavantv ime
1046004a vAtaskandhA ime sapta carantu divi putrakAH
1046004c mArutA iti vikhyAtA divyarUpA mamAtmajAH
1046005a brahmalokaM caratv eka indralokaM tathAparaH
1046005c divi vAyur iti khyAtas tRtIyo 'pi mahAyazAH
1046006a catvAras tu surazreSTha dizo vai tava zAsanAt
1046006c saMcariSyanti bhadraM te devabhUtA mamAtmajAH
1046006e tvatkRtenaiva nAmnA ca mArutA iti vizrutAH
1046007a tasyAs tad vacanaM zrutvA sahasrAkSaH puraMdaraH
1046007c uvAca prAJjalir vAkyaM ditiM balaniSUdanaH
1046008a sarvam etad yathoktaM te bhaviSyati na saMzayaH
1046008c vicariSyanti bhadraM te devabhUtAs tavAtmajAH
1046009a evaM tau nizcayaM kRtvA mAtAputrau tapovane
1046009c jagmatus tridivaM rAma kRtArthAv iti naH zrutam
1046010a eSa dezaH sa kAkutstha mahendrAdhyuSitaH purA
1046010c ditiM yatra tapaH siddhAm evaM paricacAra saH
1046011a ikSvAkos tu naravyAghra putraH paramadhArmikaH
1046011c alambuSAyAm utpanno vizAla iti vizrutaH
1046012a tena cAsId iha sthAne vizAleti purI kRtA
1046013a vizAlasya suto rAma hemacandro mahAbalaH
1046013c sucandra iti vikhyAto hemacandrAd anantaraH
1046014a sucandratanayo rAma dhUmrAzva iti vizrutaH
1046014c dhUmrAzvatanayaz cApi sRJjayaH samapadyata
1046015a sRJjayasya sutaH zrImAn sahadevaH pratApavAn
1046015c kuzAzvaH sahadevasya putraH paramadhArmikaH
1046016a kuzAzvasya mahAtejAH somadattaH pratApavAn
1046016c somadattasya putras tu kAkutstha iti vizrutaH
1046017a tasya putro mahAtejAH saMpraty eSa purIm imAm
1046017c Avasaty amaraprakhyaH sumatir nAma durjayaH
1046018a ikSvAkos tu prasAdena sarve vaizAlikA nRpAH
1046018c dIrghAyuSo mahAtmAno vIryavantaH sudhArmikAH
1046019a ihAdya rajanIM rAma sukhaM vatsyAmahe vayam
1046019c zvaH prabhAte narazreSTha janakaM draSTum arhasi
1046020a sumatis tu mahAtejA vizvAmitram upAgatam
1046020c zrutvA naravarazreSThaH pratyudgacchan mahAyazAH
1046021a pUjAM ca paramAM kRtvA sopAdhyAyaH sabAndhavaH
1046021c prAJjaliH kuzalaM pRSTvA vizvAmitram athAbravIt
1046022a dhanyo 'smy anugRhIto 'smi yasya me viSayaM mune
1046022c saMprApto darzanaM caiva nAsti dhanyataro mama
1047001a pRSTvA tu kuzalaM tatra parasparasamAgame
1047001c kathAnte sumatir vAkyaM vyAjahAra mahAmunim
1047002a imau kumArau bhadraM te devatulyaparAkramau
1047002c gajasiMhagatI vIrau zArdUlavRSabhopamau
1047003a padmapatravizAlAkSau khaDgatUNIdhanurdharau
1047003c azvinAv iva rUpeNa samupasthitayauvanau
1047004a yadRcchayaiva gAM prAptau devalokAd ivAmarau
1047004c kathaM padbhyAm iha prAptau kimarthaM kasya vA mune
1047005a bhUSayantAv imaM dezaM candrasUryAv ivAmbaram
1047005c parasparasya sadRzau pramANeGgitaceSTitaiH
1047006a kimarthaM ca narazreSThau saMprAptau durgame pathi
1047006c varAyudhadharau vIrau zrotum icchAmi tattvataH
1047007a tasya tad vacanaM zrutvA yathAvRttaM nyavedayat
1047007c siddhAzramanivAsaM ca rAkSasAnAM vadhaM tathA
1047008a vizvAmitravacaH zrutvA rAjA paramaharSitaH
1047008c atithI paramau prAptau putrau dazarathasya tau
1047008e pUjayAm Asa vidhivat satkArArhau mahAbalau
1047009a tataH paramasatkAraM sumateH prApya rAghavau
1047009c uSya tatra nizAm ekAM jagmatur mithilAM tataH
1047010a tAM dRSTvA munayaH sarve janakasya purIM zubhAm
1047010c sAdhu sAdhv iti zaMsanto mithilAM samapUjayan
1047011a mithilopavane tatra AzramaM dRzya rAghavaH
1047011c purANaM nirjanaM ramyaM papraccha munipuMgavam
1047012a zrImadAzramasaMkAzaM kiM nv idaM munivarjitam
1047012c zrotum icchAmi bhagavan kasyAyaM pUrva AzramaH
1047013a tac chrutA rAghaveNoktaM vAkyaM vAkyavizAradaH
1047013c pratyuvAca mahAtejA vizvamitro mahAmuniH
1047014a hanta te kathayiSyAmi zRNu tattvena rAghava
1047014c yasyaitad AzramapadaM zaptaM kopAn mahAtmanA
1047015a gautamasya narazreSTha pUrvam AsIn mahAtmanaH
1047015c Azramo divyasaMkAzaH surair api supUjitaH
1047016a sa ceha tapa AtiSThad ahalyAsahitaH purA
1047016c varSapUgAny anekAni rAjaputra mahAyazaH
1047017a tasyAntaraM viditvA tu sahasrAkSaH zacIpatiH
1047017c muniveSadharo 'halyAm idaM vacanam abravIt
1047018a RtukAlaM pratIkSante nArthinaH susamAhite
1047018c saMgamaM tv aham icchAmi tvayA saha sumadhyame
1047019a muniveSaM sahasrAkSaM vijJAya raghunandana
1047019c matiM cakAra durmedhA devarAjakutUhalAt
1047020a athAbravIt surazreSThaM kRtArthenAntarAtmanA
1047020c kRtArtho 'si surazreSTha gaccha zIghram itaH prabho
1047020e AtmAnaM mAM ca deveza sarvadA rakSa mAnadaH
1047021a indras tu prahasan vAkyam ahalyAm idam abravIt
1047021c suzroNi parituSTo 'smi gamiSyAmi yathAgatam
1047022a evaM saMgamya tu tayA nizcakrAmoTajAt tataH
1047022c sa saMbhramAt tvaran rAma zaGkito gautamaM prati
1047023a gautamaM sa dadarzAtha pravizantaM mahAmunim
1047023c devadAnavadurdharSaM tapobalasamanvitam
1047023e tIrthodakapariklinnaM dIpyamAnam ivAnalam
1047023g gRhItasamidhaM tatra sakuzaM munipuGgavam
1047024a dRSTvA surapatis trasto viSaNNavadano 'bhavat
1047025a atha dRSTvA sahasrAkSaM muniveSadharaM muniH
1047025c durvRttaM vRttasaMpanno roSAd vacanam abravIt
1047026a mama rUpaM samAsthAya kRtavAn asi durmate
1047026c akartavyam idaM yasmAd viphalas tvaM bhaviSyati
1047027a gautamenaivam uktasya saroSeNa mahAtmanA
1047027c petatur vRSaNau bhUmau sahasrAkSasya tatkSaNAt
1047028a tathA zaptvA sa vai zakraM bhAryAm api ca zaptavAn
1047028c iha varSasahasrANi bahUni tvaM nivatsyasi
1047029a vAyubhakSA nirAhArA tapyantI bhasmazAyinI
1047029c adRzyA sarvabhUtAnAm Azrame 'smin nivatsyasi
1047030a yadA caitad vanaM ghoraM rAmo dazarathAtmajaH
1047030c AgamiSyati durdharSas tadA pUtA bhaviSyasi
1047031a tasyAtithyena durvRtte lobhamohavivarjitA
1047031c matsakAze mudA yuktA svaM vapur dhArayiSyasi
1047032a evam uktvA mahAtejA gautamo duSTacAriNIm
1047032c imam Azramam utsRjya siddhacAraNasevite
1047032e himavacchikhare ramye tapas tepe mahAtapAH
1048001a aphalas tu tataH zakro devAn agnipurogamAn
1048001c abravIt trastavadanaH sarSisaMghAn sacAraNAn
1048002a kurvatA tapaso vighnaM gautamasya mahAtmanaH
1048002c krodham utpAdya hi mayA surakAryam idaM kRtam
1048003a aphalo 'smi kRtas tena krodhAt sA ca nirAkRtA
1048003c zApamokSeNa mahatA tapo 'syApahRtaM mayA
1048004a tan mAM suravarAH sarve sarSisaMghAH sacAraNAH
1048004c surasAhyakaraM sarve saphalaM kartum arhatha
1048005a zatakrator vacaH zrutvA devAH sAgnipurogamAH
1048005c pitRdevAn upetyAhuH saha sarvair marudgaNaiH
1048006a ayaM meSaH savRSaNaH zakro hy avRSaNaH kRtaH
1048006c meSasya vRSaNau gRhya zakrAyAzu prayacchata
1048007a aphalas tu kRto meSaH parAM tuSTiM pradAsyati
1048007c bhavatAM harSaNArthAya ye ca dAsyanti mAnavAH
1048008a agnes tu vacanaM zrutvA pitRdevAH samAgatAH
1048008c utpATya meSavRSaNau sahasrAkSe nyavedayan
1048009a tadA prabhRti kAkutstha pitRdevAH samAgatAH
1048009c aphalAn bhuJjate meSAn phalais teSAm ayojayan
1048010a indras tu meSavRSaNas tadA prabhRti rAghava
1048010c gautamasya prabhAvena tapasaz ca mahAtmanaH
1048011a tadAgaccha mahAteja AzramaM puNyakarmaNaH
1048011c tArayainAM mahAbhAgAm ahalyAM devarUpiNIm
1048012a vizvAmitravacaH zrutvA rAghavaH sahalakSmaNaH
1048012c vizvAmitraM puraskRtya AzramaM praviveza ha
1048013a dadarza ca mahAbhAgAM tapasA dyotitaprabhAm
1048013c lokair api samAgamya durnirIkSyAM surAsuraiH
1048014a prayatnAn nirmitAM dhAtrA divyAM mAyAmayIm iva
1048014c dhUmenAbhiparItAGgIM pUrNacandraprabhAm iva
1048015a satuSArAvRtAM sAbhrAM pUrNacandraprabhAm iva
1048015c madhye 'mbhaso durAdharSAM dIptAM sUryaprabhAm iva
1048016a sa hi gautamavAkyena durnirIkSyA babhUva ha
1048016c trayANAm api lokAnAM yAvad rAmasya darzanam
1048017a rAghavau tu tatas tasyAH pAdau jagRhatus tadA
1048017c smarantI gautamavacaH pratijagrAha sA ca tau
1048018a pAdyam arghyaM tathAtithyaM cakAra susamAhitA
1048018c pratijagrAha kAkutstho vidhidRSTena karmaNA
1048019a puSpavRSTir mahaty AsId devadundubhinisvanaiH
1048019c gandharvApsarasAM cApi mahAn AsIt samAgamaH
1048020a sAdhu sAdhv iti devAs tAm ahalyAM samapUjayan
1048020c tapobalavizuddhAGgIM gautamasya vazAnugAm
1048021a gautamo 'pi mahAtejA ahalyAsahitaH sukhI
1048021c rAmaM saMpUjya vidhivat tapas tepe mahAtapAH
1048022a rAmo 'pi paramAM pUjAM gautamasya mahAmuneH
1048022c sakAzAd vidhivat prApya jagAma mithilAM tataH
1049001a tataH prAguttarAM gatvA rAmaH saumitriNA saha
1049001c vizvAmitraM puraskRtya yajJavATam upAgamat
1049002a rAmas tu munizArdUlam uvAca sahalakSmaNaH
1049002c sAdhvI yajJasamRddhir hi janakasya mahAtmanaH
1049003a bahUnIha sahasrANi nAnAdezanivAsinAm
1049003c brAhmaNAnAM mahAbhAga vedAdhyayanazAlinAm
1049004a RSivATAz ca dRzyante zakaTIzatasaMkulAH
1049004c dezo vidhIyatAM brahman yatra vatsyAmahe vayam
1049005a rAmasya vacanaM zrutvA vizvAmitro mahAmuniH
1049005c nivezam akarod deze vivikte salilAyute
1049006a vizvAmitraM munizreSThaM zrutvA sa nRpatis tadA
1049006c zatAnandaM puraskRtya purohitam aninditam
1049007a Rtvijo 'pi mahAtmAnas tv arghyam AdAya satvaram
1049007c vizvAmitrAya dharmeNa dadur mantrapuraskRtam
1049008a pratigRhya tu tAM pUjAM janakasya mahAtmanaH
1049008c papraccha kuzalaM rAjJo yajJasya ca nirAmayam
1049009a sa tAMz cApi munIn pRSTvA sopAdhyAya purodhasaH
1049009c yathAnyAyaM tataH sarvaiH samAgacchat prahRSTavAn
1049010a atha rAjA munizreSThaM kRtAJjalir abhASata
1049010c Asane bhagavAn AstAM sahaibhir munisattamaiH
1049011a janakasya vacaH zrutvA niSasAda mahAmuniH
1049011c purodhA Rtvijaz caiva rAjA ca saha mantribhiH
1049012a AsaneSu yathAnyAyam upaviSTAn samantataH
1049012c dRSTvA sa nRpatis tatra vizvAmitram athAbravIt
1049013a adya yajJasamRddhir me saphalA daivataiH kRtA
1049013c adya yajJaphalaM prAptaM bhagavaddarzanAn mayA
1049014a dhanyo 'smy anugRhIto 'smi yasya me munipuMgava
1049014c yajJopasadanaM brahman prApto 'si munibhiH saha
1049015a dvAdazAhaM tu brahmarSe zeSam Ahur manISiNaH
1049015c tato bhAgArthino devAn draSTum arhasi kauzika
1049016a ity uktvA munizArdUlaM prahRSTavadanas tadA
1049016c punas taM paripapraccha prAJjaliH prayato nRpaH
1049017a imau kumArau bhadraM te devatulyaparAkramau
1049017c gajasiMhagatI vIrau zArdUlavRSabhopamau
1049018a padmapatravizAlAkSau khaDgatUNIdhanurdharau
1049018c azvinAv iva rUpeNa samupasthitayauvanau
1049019a yadRcchayaiva gAM prAptau devalokAd ivAmarau
1049019c kathaM padbhyAm iha prAptau kimarthaM kasya vA mune
1049020a varAyudhadharau vIrau kasya putrau mahAmune
1049020c bhUSayantAv imaM dezaM candrasUryAv ivAmbaram
1049021a parasparasya sadRzau pramANeGgitaceSTitaiH
1049021c kAkapakSadharau vIrau zrotum icchAmi tattvataH
1049022a tasya tad vacanaM zrutvA janakasya mahAtmanaH
1049022c nyavedayan mahAtmAnau putrau dazarathasya tau
1049023a siddhAzramanivAsaM ca rAkSasAnAM vadhaM tathA
1049023c tac cAgamanam avyagraM vizAlAyAz ca darzanam
1049024a ahalyAdarzanaM caiva gautamena samAgamam
1049024c mahAdhanuSi jijJAsAM kartum AgamanaM tathA
1049025a etat sarvaM mahAtejA janakAya mahAtmane
1049025c nivedya virarAmAtha vizvAmitro mahAmuniH
1050001a tasya tad vacanaM zrutvA vizvAmitrasya dhImataH
1050001c hRSTaromA mahAtejAH zatAnando mahAtapAH
1050002a gautamasya suto jyeSThas tapasA dyotitaprabhaH
1050002c rAmasaMdarzanAd eva paraM vismayam AgataH
1050003a sa tau niSaNNau saMprekSya sukhAsInau nRpAtmajau
1050003c zatAnando munizreSThaM vizvAmitram athAbravIt
1050004a api te munizArdUla mama mAtA yazasvinI
1050004c darzitA rAjaputrAya tapo dIrgham upAgatA
1050005a api rAme mahAtejo mama mAtA yazasvinI
1050005c vanyair upAharat pUjAM pUjArhe sarvadehinAm
1050006a api rAmAya kathitaM yathAvRttaM purAtanam
1050006c mama mAtur mahAtejo devena duranuSThitam
1050007a api kauzika bhadraM te guruNA mama saMgatA
1050007c mAtA mama munizreSTha rAmasaMdarzanAd itaH
1050008a api me guruNA rAmaH pUjitaH kuzikAtmaja
1050008c ihAgato mahAtejAH pUjAM prApya mahAtmanaH
1050009a api zAntena manasA gurur me kuzikAtmaja
1050009c ihAgatena rAmeNa prayatenAbhivAditaH
1050010a tac chrutvA vacanaM tasya vizvAmitro mahAmuniH
1050010c pratyuvAca zatAnandaM vAkyajJo vAkyakovidam
1050011a nAtikrAntaM munizreSTha yat kartavyaM kRtaM mayA
1050011c saMgatA muninA patnI bhArgaveNeva reNukA
1050012a tac chrutvA vacanaM tasya vizvAmitrasya dhImataH
1050012c zatAnando mahAtejA rAmaM vacanam abravIt
1050013a svAgataM te narazreSTha diSTyA prApto 'si rAghava
1050013c vizvAmitraM puraskRtya maharSim aparAjitam
1050014a acintyakarmA tapasA brahmarSir amitaprabhaH
1050014c vizvAmitro mahAtejA vetsy enaM paramAM gatim
1050015a nAsti dhanyataro rAma tvatto 'nyo bhuvi kaz cana
1050015c goptA kuzikaputras te yena taptaM mahat tapaH
1050016a zrUyatAM cAbhidAsyAmi kauzikasya mahAtmanaH
1050016c yathAbalaM yathAvRttaM tan me nigadataH zRNu
1050017a rAjAbhUd eSa dharmAtmA dIrgha kAlam ariMdamaH
1050017c dharmajJaH kRtavidyaz ca prajAnAM ca hite rataH
1050018a prajApatisutas tv AsIt kuzo nAma mahIpatiH
1050018c kuzasya putro balavAn kuzanAbhaH sudhArmikaH
1050019a kuzanAbhasutas tv AsId gAdhir ity eva vizrutaH
1050019c gAdheH putro mahAtejA vizvAmitro mahAmuniH
1050020a vizvamitro mahAtejAH pAlayAm Asa medinIm
1050020c bahuvarSasahasrANi rAjA rAjyam akArayat
1050021a kadA cit tu mahAtejA yojayitvA varUthinIm
1050021c akSauhiNIparivRtaH paricakrAma medinIm
1050022a nagarANi ca rASTrANi saritaz ca tathA girIn
1050022c AzramAn kramazo rAjA vicarann AjagAmaha
1050023a vasiSThasyAzramapadaM nAnApuSpaphaladrumam
1050023c nAnAmRgagaNAkIrNaM siddhacAraNasevitam
1050024a devadAnavagandharvaiH kiMnarair upazobhitam
1050024c prazAntahariNAkIrNaM dvijasaMghaniSevitam
1050025a brahmarSigaNasaMkIrNaM devarSigaNasevitam
1050025c tapazcaraNasaMsiddhair agnikalpair mahAtmabhiH
1050026a satataM saMkulaM zrImad brahmakalpair mahAtmabhiH
1050026c abbhakSair vAyubhakSaiz ca zIrNaparNAzanais tathA
1050027a phalamUlAzanair dAntair jitaroSair jitendriyaiH
1050027c RSibhir vAlakhilyaiz ca japahomaparAyaNaiH
1050028a vasiSThasyAzramapadaM brahmalokam ivAparam
1050028c dadarza jayatAM zreSTha vizvAmitro mahAbalaH
1051001a sa dRSTvA paramaprIto vizvAmitro mahAbalaH
1051001c praNato vinayAd vIro vasiSThaM japatAM varam
1051002a svAgataM tava cety ukto vasiSThena mahAtmanA
1051002c AsanaM cAsya bhagavAn vasiSTho vyAdideza ha
1051003a upaviSTAya ca tadA vizvAmitrAya dhImate
1051003c yathAnyAyaM munivaraH phalamUlam upAharat
1051004a pratigRhya ca tAM pUjAM vasiSThAd rAjasattamaH
1051004c tapo'gnihotraziSyeSu kuzalaM paryapRcchata
1051005a vizvAmitro mahAtejA vanaspatigaNe tathA
1051005c sarvatra kuzalaM cAha vasiSTho rAjasattamam
1051006a sukhopaviSTaM rAjAnaM vizvAmitraM mahAtapAH
1051006c papraccha japatAM zreSTho vasiSTho brahmaNaH sutaH
1051007a kaccit te kuzalaM rAjan kaccid dharmeNa raJjayan
1051007c prajAH pAlayase rAjan rAjavRttena dhArmika
1051008a kaccit te subhRtA bhRtyAH kaccit tiSThanti zAsane
1051008c kaccit te vijitAH sarve ripavo ripusUdana
1051009a kaccid bale ca koze ca mitreSu ca paraMtapa
1051009c kuzalaM te naravyAghra putrapautre tathAnagha
1051010a sarvatra kuzalaM rAjA vasiSThaM pratyudAharat
1051010c vizvAmitro mahAtejA vasiSThaM vinayAnvitaH
1051011a kRtvobhau suciraM kAlaM dharmiSThau tAH kathAH zubhAH
1051011c mudA paramayA yuktau prIyetAM tau parasparam
1051012a tato vasiSTho bhagavAn kathAnte raghunandana
1051012c vizvAmitram idaM vAkyam uvAca prahasann iva
1051013a AtithyaM kartum icchAmi balasyAsya mahAbala
1051013c tava caivAprameyasya yathArhaM saMpratIccha me
1051014a satkriyAM tu bhavAn etAM pratIcchatu mayodyatAm
1051014c rAjaMs tvam atithizreSThaH pUjanIyaH prayatnataH
1051015a evam ukto vasiSThena vizvAmitro mahAmatiH
1051015c kRtam ity abravId rAjA pUjAvAkyena me tvayA
1051016a phalamUlena bhagavan vidyate yat tavAzrame
1051016c pAdyenAcamanIyena bhagavaddarzanena ca
1051017a sarvathA ca mahAprAjJa pUjArheNa supUjitaH
1051017c gamiSyAmi namas te 'stu maitreNekSasva cakSuSA
1051018a evaM bruvantaM rAjAnaM vasiSThaH punar eva hi
1051018c nyamantrayata dharmAtmA punaH punar udAradhIH
1051019a bADham ity eva gAdheyo vasiSThaM pratyuvAca ha
1051019c yathA priyaM bhagavatas tathAstu munisattama
1051020a evam ukto mahAtejA vasiSTho japatAM varaH
1051020c AjuhAva tataH prItaH kalmASIM dhUtakalmaSaH
1051021a ehy ehi zabale kSipraM zRNu cApi vaco mama
1051021c sabalasyAsya rAjarSeH kartuM vyavasito 'smy aham
1051021e bhojanena mahArheNa satkAraM saMvidhatsva me
1051022a yasya yasya yathAkAmaM SaDraseSv abhipUjitam
1051022c tat sarvaM kAmadhug divye abhivarSakRte mama
1051023a rasenAnnena pAnena lehyacoSyeNa saMyutam
1051023c annAnAM nicayaM sarvaM sRjasva zabale tvara
1052001a evam uktA vasiSThena zabalA zatrusUdana
1052001c vidadhe kAmadhuk kAmAn yasya yasya yathepsitam
1052002a ikSUn madhUMs tathA lAjAn maireyAMz ca varAsavAn
1052002c pAnAni ca mahArhANi bhakSyAMz coccAvacAMs tathA
1052003a uSNADhyasyaudanasyApi rAzayaH parvatopamAH
1052003c mRSTAnnAni ca sUpAz ca dadhikulyAs tathaiva ca
1052004a nAnAsvAdurasAnAM ca SADavAnAM tathaiva ca
1052004c bhAjanAni supUrNAni gauDAni ca sahasrazaH
1052005a sarvam AsIt susaMtuSTaM hRSTapuSTajanAkulam
1052005c vizvAmitrabalaM rAma vasiSThenAbhitarpitam
1052006a vizvAmitro 'pi rAjarSir hRSTapuSTas tadAbhavat
1052006c sAntaH puravaro rAjA sabrAhmaNapurohitaH
1052007a sAmAtyo mantrisahitaH sabhRtyaH pUjitas tadA
1052007c yuktaH pareNa harSeNa vasiSTham idam abravIt
1052008a pUjito 'haM tvayA brahman pUjArheNa susatkRtaH
1052008c zrUyatAm abhidhAsyAmi vAkyaM vAkyavizArada
1052009a gavAM zatasahasreNa dIyatAM zabalA mama
1052009c ratnaM hi bhagavann etad ratnahArI ca pArthivaH
1052009e tasmAn me zabalAM dehi mamaiSA dharmato dvija
1052010a evam uktas tu bhagavAn vasiSTho munisattamaH
1052010c vizvAmitreNa dharmAtmA pratyuvAca mahIpatim
1052011a nAhaM zatasahasreNa nApi koTizatair gavAm
1052011c rAjan dAsyAmi zabalAM rAzibhI rajatasya vA
1052012a na parityAgam arheyaM matsakAzAd ariMdama
1052012c zAzvatI zabalA mahyaM kIrtir Atmavato yathA
1052013a asyAM havyaM ca kavyaM ca prANayAtrA tathaiva ca
1052013c Ayattam agnihotraM ca balir homas tathaiva ca
1052014a svAhAkAravaSaTkArau vidyAz ca vividhAs tathA
1052014c Ayattam atra rAjarSe sarvam etan na saMzayaH
1052015a sarva svam etat satyena mama tuSTikarI sadA
1052015c kAraNair bahubhI rAjan na dAsye zabalAM tava
1052016a vasiSThenaivam uktas tu vizvAmitro 'bravIt tataH
1052016c saMrabdhataram atyarthaM vAkyaM vAkyavizAradaH
1052017a hairaNyakakSyAgraiveyAn suvarNAGkuzabhUSitAn
1052017c dadAmi kuJjarANAM te sahasrANi caturdaza
1052018a hairaNyAnAM rathAnAM ca zvetAzvAnAM caturyujAm
1052018c dadAmi te zatAny aSTau kiGkiNIkavibhUSitAn
1052019a hayAnAM dezajAtAnAM kulajAnAM mahaujasAm
1052019c sahasram ekaM daza ca dadAmi tava suvrata
1052020a nAnAvarNavibhaktAnAM vayaHsthAnAM tathaiva ca
1052020c dadAmy ekAM gavAM koTiM zabalA dIyatAM mama
1052021a evam uktas tu bhagavAn vizvAmitreNa dhImatA
1052021c na dAsyAmIti zabalAM prAha rAjan kathaM cana
1052022a etad eva hi me ratnam etad eva hi me dhanam
1052022c etad eva hi sarvasvam etad eva hi jIvitam
1052023a darzaz ca pUrNamAsaz ca yajJAz caivAptadakSiNAH
1052023c etad eva hi me rAjan vividhAz ca kriyAs tathA
1052024a adomUlAH kriyAH sarvA mama rAjan na saMzayaH
1052024c bahUnAM kiM pralApena na dAsye kAmadohinIm
1053001a kAmadhenuM vasiSTho 'pi yadA na tyajate muniH
1053001c tadAsya zabalAM rAma vizvAmitro 'nvakarSata
1053002a nIyamAnA tu zabalA rAma rAjJA mahAtmanA
1053002c duHkhitA cintayAm Asa rudantI zokakarzitA
1053003a parityaktA vasiSThena kim ahaM sumahAtmanA
1053003c yAhaM rAjabhRtair dInA hriyeyaM bhRzaduHkhitA
1053004a kiM mayApakRtaM tasya maharSer bhAvitAtmanaH
1053004c yan mAm anAgasaM bhaktAm iSTAM tyajati dhArmikaH
1053005a iti sA cintayitvA tu niHzvasya ca punaH punaH
1053005c jagAma vegena tadA vasiSThaM paramaujasaM
1053006a nirdhUya tAMs tadA bhRtyAJ zatazaH zatrusUdana
1053006c jagAmAnilavegena pAdamUlaM mahAtmanaH
1053007a zabalA sA rudantI ca krozantI cedam abravIt
1053007c vasiSThasyAgrataH sthitvA meghadundubhirAviNI
1053008a bhagavan kiM parityaktA tvayAhaM brahmaNaH suta
1053008c yasmAd rAjabhRtA mAM hi nayante tvatsakAzataH
1053009a evam uktas tu brahmarSir idaM vacanam abravIt
1053009c zokasaMtaptahRdayAM svasAram iva duHkhitAm
1053010a na tvAM tyajAmi zabale nApi me 'pakRtaM tvayA
1053010c eSa tvAM nayate rAjA balAn matto mahAbalaH
1053011a na hi tulyaM balaM mahyaM rAjA tv adya vizeSataH
1053011c balI rAjA kSatriyaz ca pRthivyAH patir eva ca
1053012a iyam akSauhiNIpUrNA savAjirathasaMkulA
1053012c hastidhvajasamAkIrNA tenAsau balavattaraH
1053013a evam uktA vasiSThena pratyuvAca vinItavat
1053013c vacanaM vacanajJA sA brahmarSim amitaprabham
1053014a na balaM kSatriyasyAhur brAhmaNo balavattaraH
1053014c brahman brahmabalaM divyaM kSatrAt tu balavattaram
1053015a aprameyabalaM tubhyaM na tvayA balavattaraH
1053015c vizvAmitro mahAvIryas tejas tava durAsadam
1053016a niyuGkSva mAM mahAtejas tvadbrahmabalasaMbhRtAm
1053016c tasya darpaM balaM yat tan nAzayAmi durAtmanaH
1053017a ity uktas tu tayA rAma vasiSThaH sumahAyazAH
1053017c sRjasveti tadovAca balaM parabalArujam
1053018a tasyA humbhAravotsRSTAH pahlavAH zatazo nRpa
1053018c nAzayanti balaM sarvaM vizvAmitrasya pazyataH
1053019a sa rAjA paramakruddhaH krodhavisphAritekSaNaH
1053019c pahlavAn nAzayAm Asa zastrair uccAvacair api
1053020a vizvAmitrArditAn dRSTvA pahlavAJ zatazas tadA
1053020c bhUya evAsRjad ghorAJ zakAn yavanamizritAn
1053021a tair AsIt saMvRtA bhUmiH zakair yavanamizritaiH
1053021c prabhAvadbhir mahAvIryair hemakiJjalkasaMnibhaiH
1053022a dIrghAsipaTTizadharair hemavarNAmbarAvRtaiH
1053022c nirdagdhaM tad balaM sarvaM pradIptair iva pAvakaiH
1053023a tato 'strANi mahAtejA vizvAmitro mumoca ha
1054001a tatas tAn AkulAn dRSTvA vizvAmitrAstramohitAn
1054001c vasiSThaz codayAm Asa kAmadhuk sRja yogataH
1054002a tasyA humbhAravAj jAtAH kAmbojA ravisaMnibhAH
1054002c Udhasas tv atha saMjAtAH pahlavAH zastrapANayaH
1054003a yonidezAc ca yavanaH zakRddezAc chakAs tathA
1054003c romakUpeSu mecchAz ca harItAH sakirAtakAH
1054004a tais tan niSUditaM sainyaM vizvamitrasya tatkSaNAt
1054004c sapadAtigajaM sAzvaM sarathaM raghunandana
1054005a dRSTvA niSUditaM sainyaM vasiSThena mahAtmanA
1054005c vizvAmitrasutAnAM tu zataM nAnAvidhAyudham
1054006a abhyadhAvat susaMkruddhaM vasiSThaM japatAM varam
1054006c huMkAreNaiva tAn sarvAn nirdadAha mahAn RSiH
1054007a te sAzvarathapAdAtA vasiSThena mahAtmanA
1054007c bhasmIkRtA muhUrtena vizvAmitrasutAs tadA
1054008a dRSTvA vinAzitAn putrAn balaM ca sumahAyazAH
1054008c savrIDaz cintayAviSTo vizvAmitro 'bhavat tadA
1054009a saMdura iva nirvego bhagnadaMSTra ivoragaH
1054009c uparakta ivAdityaH sadyo niSprabhatAM gataH
1054010a hataputrabalo dIno lUnapakSa iva dvijaH
1054010c hatadarpo hatotsAho nirvedaM samapadyata
1054011a sa putram ekaM rAjyAya pAlayeti niyujya ca
1054011c pRthivIM kSatradharmeNa vanam evAnvapadyata
1054012a sa gatvA himavatpArzvaM kiMnaroragasevitam
1054012c mahAdevaprasAdArthaM tapas tepe mahAtapAH
1054013a kena cit tv atha kAlena devezo vRSabhadhvajaH
1054013c darzayAm Asa varado vizvAmitraM mahAmunim
1054014a kimarthaM tapyase rAjan brUhi yat te vivakSitam
1054014c varado 'smi varo yas te kAGkSitaH so 'bhidhIyatAm
1054015a evam uktas tu devena vizvAmitro mahAtapAH
1054015c praNipatya mahAdevam idaM vacanam abravIt
1054016a yadi tuSTo mahAdeva dhanurvedo mamAnagha
1054016c sAGgopAGgopaniSadaH sarahasyaH pradIyatAm
1054017a yAni deveSu cAstrANi dAnaveSu maharSiSu
1054017c gandharvayakSarakSaHsu pratibhAntu mamAnagha
1054018a tava prasAdAd bhavatu devadeva mamepsitam
1054018c evam astv iti devezo vAkyam uktvA divaM gataH
1054019a prApya cAstrANi rAjarSir vizvAmitro mahAbalaH
1054019c darpeNa mahatA yukto darpapUrNo 'bhavat tadA
1054020a vivardhamAno vIryeNa samudra iva parvaNi
1054020c hatam eva tadA mene vasiSTham RSisattamam
1054021a tato gatvAzramapadaM mumocAstrANi pArthivaH
1054021c yais tat tapovanaM sarvaM nirdagdhaM cAstratejasA
1054022a udIryamANam astraM tad vizvAmitrasya dhImataH
1054022c dRSTvA vipradrutA bhItA munayaH zatazo dizaH
1054023a vasiSThasya ca ye ziSyAs tathaiva mRgapakSiNaH
1054023c vidravanti bhayAd bhItA nAnAdigbhyaH sahasrazaH
1054024a vasiSThasyAzramapadaM zUnyam AsIn mahAtmanaH
1054024c muhUrtam iva niHzabdam AsId IriNasaMnibham
1054025a vadato vai vasiSThasya mA bhaiSTeti muhur muhuH
1054025c nAzayAmy adya gAdheyaM nIhAram iva bhAskaraH
1054026a evam uktvA mahAtejA vasiSTho japatAM varaH
1054026c vizvAmitraM tadA vAkyaM saroSam idam abravIt
1054027a AzramaM cirasaMvRddhaM yad vinAzitavAn asi
1054027c durAcAro 'si yan mUDha tasmAt tvaM na bhaviSyasi
1054028a ity uktvA paramakruddho daNDam udyamya satvaraH
1054028c vidhUma iva kAlAgnir yamadaNDam ivAparam
1055001a evam ukto vasiSThena vizvAmitro mahAbalaH
1055001c Agneyam astram utkSipya tiSTha tiSTheti cAbravIt
1055002a vasiSTho bhagavAn krodhAd idaM vacanam abravIt
1055003a kSatrabandho sthito 'smy eSa yad balaM tad vidarzaya
1055003c nAzayAmy eSa te darpaM zastrasya tava gAdhija
1055004a kva ca te kSatriyabalaM kva ca brahmabalaM mahat
1055004c pazya brahmabalaM divyaM mama kSatriyapAMsana
1055005a tasyAstraM gAdhiputrasya ghoram Agneyam uttamam
1055005c brahmadaNDena tac chAntam agner vega ivAmbhasA
1055006a vAruNaM caiva raudraM ca aindraM pAzupataM tathA
1055006c aiSIkaM cApi cikSepa ruSito gAdhinandanaH
1055007a mAnavaM mohanaM caiva gAndharvaM svApanaM tathA
1055007c jRmbhaNaM mohanaM caiva saMtApanavilApane
1055008a zoSaNaM dAraNaM caiva vajram astraM sudurjayam
1055008c brahmapAzaM kAlapAzaM vAruNaM pAzam eva ca
1055009a pinAkAstraM ca dayitaM zuSkArdre azanI tathA
1055009c daNDAstram atha paizAcaM krauJcam astraM tathaiva ca
1055010a dharmacakraM kAlacakraM viSNucakraM tathaiva ca
1055010c vAyavyaM mathanaM caiva astraM hayaziras tathA
1055011a zaktidvayaM ca cikSepa kaGkAlaM musalaM tathA
1055011c vaidyAdharaM mahAstraM ca kAlAstram atha dAruNam
1055012a trizUlam astraM ghoraM ca kApAlam atha kaGkaNam
1055012c etAny astrANi cikSepa sarvANi raghunandana
1055013a vasiSThe japatAM zreSThe tad adbhutam ivAbhavat
1055013c tAni sarvANi daNDena grasate brahmaNaH sutaH
1055014a teSu zAnteSu brahmAstraM kSiptavAn gAdhinandanaH
1055014c tad astram udyataM dRSTvA devAH sAgnipurogamAH
1055015a devarSayaz ca saMbhrAntA gandharvAH samahoragAH
1055015c trailokyam AsIt saMtrastaM brahmAstre samudIrite
1055016a tad apy astraM mahAghoraM brAhmaM brAhmeNa tejasA
1055016c vasiSTho grasate sarvaM brahmadaNDena rAghava
1055017a brahmAstraM grasamAnasya vasiSThasya mahAtmanaH
1055017c trailokyamohanaM raudraM rUpam AsIt sudAruNam
1055018a romakUpeSu sarveSu vasiSThasya mahAtmanaH
1055018c marIcya iva niSpetur agner dhUmAkulArciSaH
1055019a prAjvalad brahmadaNDaz ca vasiSThasya karodyataH
1055019c vidhUma iva kAlAgnir yamadaNDa ivAparaH
1055020a tato 'stuvan munigaNA vasiSThaM japatAM varam
1055020c amoghaM te balaM brahmaMs tejo dhAraya tejasA
1055021a nigRhItas tvayA brahman vizvAmitro mahAtapAH
1055021c prasIda japatAM zreSTha lokAH santu gatavyathAH
1055022a evam ukto mahAtejAH zamaM cakre mahAtapAH
1055022c vizvAmitro 'pi nikRto viniHzvasyedam abravIt
1055023a dhig balaM kSatriyabalaM brahmatejobalaM balam
1055023c ekena brahmadaNDena sarvAstrANi hatAni me
1055024a tad etat samavekSyAhaM prasannendriyamAnasaH
1055024c tapo mahat samAsthAsye yad vai brahmatvakArakam
1056001a tataH saMtaptahRdayaH smaran nigraham AtmanaH
1056001c viniHzvasya viniHzvasya kRtavairo mahAtmanA
1056002a sa dakSiNAM dizaM gatvA mahiSyA saha rAghava
1056002c tatApa paramaM ghoraM vizvAmitro mahAtapAH
1056002e phalamUlAzano dAntaz cacAra paramaM tapaH
1056003a athAsya jajJire putrAH satyadharmaparAyaNAH
1056003c haviSpando madhuSpando dRDhanetro mahArathaH
1056004a pUrNe varSasahasre tu brahmA lokapitAmahaH
1056004c abravIn madhuraM vAkyaM vizvAmitraM tapodhanam
1056005a jitA rAjarSilokAs te tapasA kuzikAtmaja
1056005c anena tapasA tvAM hi rAjarSir iti vidmahe
1056006a evam uktvA mahAtejA jagAma saha daivataiH
1056006c triviSTapaM brahmalokaM lokAnAM paramezvaraH
1056007a vizvAmitro 'pi tac chrutvA hriyA kiM cid avAGmukhaH
1056007c duHkhena mahatAviSTaH samanyur idam abravIt
1056008a tapaz ca sumahat taptaM rAjarSir iti mAM viduH
1056008c devAH sarSigaNAH sarve nAsti manye tapaHphalam
1056009a evaM nizcitya manasA bhUya eva mahAtapAH
1056009c tapaz cacAra kAkutstha paramaM paramAtmavAn
1056010a etasminn eva kAle tu satyavAdI jitendriyaH
1056010c trizaGkur iti vikhyAta ikSvAku kulanandanaH
1056011a tasya buddhiH samutpannA yajeyam iti rAghava
1056011c gaccheyaM svazarIreNa devAnAM paramAM gatim
1056012a sa vasiSThaM samAhUya kathayAm Asa cintitam
1056012c azakyam iti cApy ukto vasiSThena mahAtmanA
1056013a pratyAkhyAto vasiSThena sa yayau dakSiNAM dizam
1056013c vasiSThA dIrgha tapasas tapo yatra hi tepire
1056014a trizaGkuH sumahAtejAH zataM paramabhAsvaram
1056014c vasiSThaputrAn dadRze tapyamAnAn yazasvinaH
1056015a so 'bhigamya mahAtmAnaH sarvAn eva guroH sutAn
1056015c abhivAdyAnupUrvyeNa hriyA kiM cid avAGmukhaH
1056015e abravIt sumahAtejAH sarvAn eva kRtAJjaliH
1056016a zaraNaM vaH prapadye 'haM zaraNyAJ zaraNAgataH
1056016c pratyAkhyAto 'smi bhadraM vo vasiSThena mahAtmanA
1056017a yaSTukAmo mahAyajJaM tad anujJAtum arthatha
1056017c guruputrAn ahaM sarvAn namaskRtya prasAdaye
1056018a zirasA praNato yAce brAhmaNAMs tapasi sthitAn
1056018c te mAM bhavantaH siddhyarthaM yAjayantu samAhitAH
1056018e sazarIro yathAhaM hi devalokam avApnuyAm
1056019a pratyAkhyAto vasiSThena gatim anyAM tapodhanAH
1056019c guruputrAn Rte sarvAn nAhaM pazyAmi kAM cana
1056020a ikSvAkUNAM hi sarveSAM purodhAH paramA gatiH
1056020c tasmAd anantaraM sarve bhavanto daivataM mama
1057001a tatas trizaGkor vacanaM zrutvA krodhasamanvitam
1057001c RSiputrazataM rAma rAjAnam idam abravIt
1057002a pratyAkhyAto 'si durbuddhe guruNA satyavAdinA
1057002c taM kathaM samatikramya zAkhAntaram upeyivAn
1057003a ikSvAkUNAM hi sarveSAM purodhAH paramA gatiH
1057003c na cAtikramituM zakyaM vacanaM satyavAdinaH
1057004a azakyam iti covAca vasiSTho bhagavAn RSiH
1057004c taM vayaM vai samAhartuM kratuM zaktAH kathaM tava
1057005a bAlizas tvaM narazreSTha gamyatAM svapuraM punaH
1057005c yAjane bhagavAJ zaktas trailokyasyApi pArthiva
1057006a teSAM tad vacanaM zrutvA krodhaparyAkulAkSaram
1057006c sa rAjA punar evaitAn idaM vacanam abravIt
1057007a pratyAkhyAto 'smi guruNA guruputrais tathaiva ca
1057007c anyAM gatiM gamiSyAmi svasti vo 'stu tapodhanAH
1057008a RSiputrAs tu tac chrutvA vAkyaM ghorAbhisaMhitam
1057008c zepuH paramasaMkruddhAz caNDAlatvaM gamiSyasi
1057008e evam uktvA mahAtmAno vivizus te svam Azramam
1057009a atha rAtryAM vyatItAyAM rAjA caNDAlatAM gataH
1057009c nIlavastradharo nIlaH paruSo dhvastamUrdhajaH
1057009e cityamAlyAnulepaz ca AyasAbharaNo 'bhavat
1057010a taM dRSTvA mantriNaH sarve tyaktvA caNDAlarUpiNam
1057010c prAdravan sahitA rAma paurA ye 'syAnugAminaH
1057011a eko hi rAjA kAkutstha jagAma paramAtmavAn
1057011c dahyamAno divArAtraM vizvAmitraM tapodhanam
1057012a vizvAmitras tu taM dRSTvA rAjAnaM viphalIkRtam
1057012c caNDAlarUpiNaM rAma muniH kAruNyam AgataH
1057013a kAruNyAt sa mahAtejA vAkyaM parama dhArmikaH
1057013c idaM jagAda bhadraM te rAjAnaM ghoradarzanam
1057014a kim AgamanakAryaM te rAjaputra mahAbala
1057014c ayodhyAdhipate vIra zApAc caNDAlatAM gataH
1057015a atha tad vAkyam AkarNya rAjA caNDAlatAM gataH
1057015c abravIt prAJjalir vAkyaM vAkyajJo vAkyakovidam
1057016a pratyAkhyAto 'smi guruNA guruputrais tathaiva ca
1057016c anavApyaiva taM kAmaM mayA prApto viparyayaH
1057017a sazarIro divaM yAyAm iti me saumyadarzanam
1057017c mayA ceSTaM kratuzataM tac ca nAvApyate phalam
1057018a anRtaM nokta pUrvaM me na ca vakSye kadA cana
1057018c kRcchreSv api gataH saumya kSatradharmeNa te zape
1057019a yajJair bahuvidhair iSTaM prajA dharmeNa pAlitAH
1057019c guravaz ca mahAtmAnaH zIlavRttena toSitAH
1057020a dharme prayatamAnasya yajJaM cAhartum icchataH
1057020c paritoSaM na gacchanti guravo munipuMgava
1057021a daivam eva paraM manye pauruSaM tu nirarthakam
1057021c daivenAkramyate sarvaM daivaM hi paramA gatiH
1057022a tasya me paramArtasya prasAdam abhikAGkSataH
1057022c kartum arhasi bhadraM te daivopahatakarmaNaH
1057023a nAnyAM gatiM gamiSyAmi nAnyaH zaraNam asti me
1057023c daivaM puruSakAreNa nivartayitum arhasi
1058001a uktavAkyaM tu rAjAnaM kRpayA kuzikAtmajaH
1058001c abravIn madhuraM vAkyaM sAkSAc caNDAlarUpiNam
1058002a ikSvAko svAgataM vatsa jAnAmi tvAM sudhArmikam
1058002c zaraNaM te bhaviSyAmi mA bhaiSIr nRpapuMgava
1058003a aham Amantraye sarvAn maharSIn puNyakarmaNaH
1058003c yajJasAhyakarAn rAjaMs tato yakSyasi nirvRtaH
1058004a guruzApakRtaM rUpaM yad idaM tvayi vartate
1058004c anena saha rUpeNa sazarIro gamiSyasi
1058005a hastaprAptam ahaM manye svargaM tava narezvara
1058005c yas tvaM kauzikam Agamya zaraNyaM zaraNaM gataH
1058006a evam uktvA mahAtejAH putrAn paramadhArmikAn
1058006c vyAdideza mahAprAjJAn yajJasaMbhArakAraNAt
1058007a sarvAJ ziSyAn samAhUya vAkyam etad uvAca ha
1058008a sarvAn RSivarAn vatsA AnayadhvaM mamAjJayA
1058008c saziSyAn suhRdaz caiva sartvijaH subahuzrutAn
1058009a yad anyo vacanaM brUyAn madvAkyabalacoditaH
1058009c tat sarvam akhilenoktaM mamAkhyeyam anAdRtam
1058010a tasya tad vacanaM zrutvA dizo jagmus tadAjJayA
1058010c Ajagmur atha dezebhyaH sarvebhyo brahmavAdinaH
1058011a te ca ziSyAH samAgamya muniM jvalitatejasam
1058011c Ucuz ca vacanaM sarve sarveSAM brahmavAdinAm
1058012a zrutvA te vacanaM sarve samAyAnti dvijAtayaH
1058012c sarvadezeSu cAgacchan varjayitvA mahodayam
1058013a vAsiSThaM tac chataM sarvaM krodhaparyAkulAkSaram
1058013c yad Aha vacanaM sarvaM zRNu tvaM munipuMgava
1058014a kSatriyo yAjako yasya caNDAlasya vizeSataH
1058014c kathaM sadasi bhoktAro havis tasya surarSayaH
1058015a brAhmaNA vA mahAtmAno bhuktvA caNDAlabhojanam
1058015c kathaM svargaM gamiSyanti vizvAmitreNa pAlitAH
1058016a etad vacanaM naiSThuryam UcuH saMraktalocanAH
1058016c vAsiSThA munizArdUla sarve te samahodayAH
1058017a teSAM tad vacanaM zrutvA sarveSAM munipuMgavaH
1058017c krodhasaMraktanayanaH saroSam idam abravIt
1058018a yad dUSayanty aduSTaM mAM tapa ugraM samAsthitam
1058018c bhasmIbhUtA durAtmAno bhaviSyanti na saMzayaH
1058019a adya te kAlapAzena nItA vaivasvatakSayam
1058019c saptajAtizatAny eva mRtapAH santu sarvazaH
1058020a zvamAMsaniyatAhArA muSTikA nAma nirghRNAH
1058020c vikRtAz ca virUpAz ca lokAn anucarantv imAn
1058021a mahodayaz ca durbuddhir mAm adUSyaM hy adUSayat
1058021c dUSiTaH sarvalokeSu niSAdatvaM gamiSyati
1058022a prANAtipAtanirato niranukrozatAM gataH
1058022c dIrghakAlaM mama krodhAd durgatiM vartayiSyati
1058023a etAvad uktvA vacanaM vizvAmitro mahAtapAH
1058023c virarAma mahAtejA RSimadhye mahAmuniH
1059001a tapobalahatAn kRtvA vAsiSThAn samahodayAn
1059001c RSimadhye mahAtejA vizvAmitro 'bhyabhASata
1059002a ayam ikSvAkudAyAdas trizaGkur iti vizrutaH
1059002c dharmiSThaz ca vadAnyaz ca mAM caiva zaraNaM gataH
1059002e svenAnena zarIreNa devalokajigISayA
1059003a yathAyaM svazarIreNa devalokaM gamiSyati
1059003c tathA pravartyatAM yajJo bhavadbhiz ca mayA saha
1059004a vizvAmitravacaH zrutvA sarva eva maharSayaH
1059004c UcuH sametya sahitA dharmajJA dharmasaMhitam
1059005a ayaM kuzikadAyAdo muniH paramakopanaH
1059005c yad Aha vacanaM samyag etat kAryaM na saMzayaH
1059006a agnikalpo hi bhagavAJ zApaM dAsyati roSitaH
1059006c tasmAt pravartyatAM yajJaH sazarIro yathA divam
1059006e gacched ikSvAkudAyAdo vizvAmitrasya tejasA
1059007a tataH pravartyatAM yajJaH sarve samadhitiSThate
1059008a evam uktvA maharSayaH saMjahrus tAH kriyAs tadA
1059008c yAjakAz ca mahAtejA vizvAmitro 'bhavat kratau
1059009a Rtvijaz cAnupUrvyeNa mantravan mantrakovidAH
1059009c cakruH sarvANi karmANi yathAkalpaM yathAvidhi
1059010a tataH kAlena mahatA vizvAmitro mahAtapAH
1059010c cakArAvAhanaM tatra bhAgArthaM sarvadevatAH
1059011a nAhyAgamaMs tadAhUtA bhAgArthaM sarvadevatAH
1059011c tataH krodhasamAviSTo vizvamitro mahAmuniH
1059012a sruvam udyamya sakrodhas trizaGkum idam abravIt
1059012c pazya me tapaso vIryaM svArjitasya narezvara
1059013a eSa tvAM svazarIreNa nayAmi svargam ojasA
1059013c duSprApaM svazarIreNa divaM gaccha narAdhipa
1059014a svArjitaM kiM cid apy asti mayA hi tapasaH phalam
1059014c rAjaMs tvaM tejasA tasya sazarIro divaM vraja
1059015a uktavAkye munau tasmin sazarIro narezvaraH
1059015c divaM jagAma kAkutstha munInAM pazyatAM tadA
1059016a devalokagataM dRSTvA trizaGkuM pAkazAsanaH
1059016c saha sarvaiH suragaNair idaM vacanam abravIt
1059017a trizaGko gaccha bhUyas tvaM nAsi svargakRtAlayaH
1059017c guruzApahato mUDha pata bhUmim avAkzirAH
1059018a evam ukto mahendreNa trizaGkur apatat punaH
1059018c vikrozamAnas trAhIti vizvAmitraM tapodhanam
1059019a tac chrutvA vacanaM tasya krozamAnasya kauzikaH
1059019c roSam AhArayat tIvraM tiSTha tiSTheti cAbravIt
1059020a RSimadhye sa tejasvI prajApatir ivAparaH
1059020c sRjan dakSiNamArgasthAn saptarSIn aparAn punaH
1059021a nakSatramAlAm aparAm asRjat krodhamUrchitaH
1059021c dakSiNAM dizam AsthAya munimadhye mahAyazAH
1059022a sRSTvA nakSatravaMzaM ca krodhena kaluSIkRtaH
1059022c anyam indraM kariSyAmi loko vA syAd anindrakaH
1059022e daivatAny api sa krodhAt sraSTuM samupacakrame
1059023a tataH paramasaMbhrAntAH sarSisaMghAH surarSabhAH
1059023c vizvAmitraM mahAtmAnam UcuH sAnunayaM vacaH
1059024a ayaM rAjA mahAbhAga guruzApaparikSataH
1059024c sazarIro divaM yAtuM nArhaty eva tapodhana
1059025a teSAM tad vacanaM zrutvA devAnAM munipuMgavaH
1059025c abravIt sumahad vAkyaM kauzikaH sarvadevatAH
1059026a sazarIrasya bhadraM vas trizaGkor asya bhUpateH
1059026c ArohaNaM pratijJAya nAnRtaM kartum utsahe
1059027a sargo 'stu sazarIrasya trizaGkor asya zAzvataH
1059027c nakSatrANi ca sarvANi mAmakAni dhruvANy atha
1059028a yAval lokA dhariSyanti tiSThantv etAni sarvazaH
1059028c matkRtAni surAH sarve tad anujJAtum arhatha
1059029a evam uktAH surAH sarve pratyUcur munipuMgavam
1059030a evaM bhavatu bhadraM te tiSThantv etAni sarvazaH
1059030c gagane tAny anekAni vaizvAnarapathAd bahiH
1059031a nakSatrANi munizreSTha teSu jyotiHSu jAjvalan
1059031c avAkzirAs trizaGkuz ca tiSThatv amarasaMnibhaH
1059032a vizvAmitras tu dharmAtmA sarvadevair abhiSTutaH
1059032c RSibhiz ca mahAtejA bADham ity Aha devatAH
1059033a tato devA mahAtmAno munayaz ca tapodhanAH
1059033c jagmur yathAgataM sarve yajJasyAnte narottama
1060001a vizvAmitro mahAtmAtha prasthitAn prekSya tAn RSIn
1060001c abravIn narazArdUla sarvAMs tAn vanavAsinaH
1060002a mahAvighnaH pravRtto 'yaM dakSiNAm Asthito dizam
1060002c dizam anyAM prapatsyAmas tatra tapsyAmahe tapaH
1060003a pazcimAyAM vizAlAyAM puSkareSu mahAtmanaH
1060003c sukhaM tapaz cariSyAmaH paraM tad dhi tapovanam
1060004a evam uktvA mahAtejAH puSkareSu mahAmuniH
1060004c tapa ugraM durAdharSaM tepe mUlaphalAzanaH
1060005a etasminn eva kAle tu ayodhyAdhipatir nRpaH
1060005c ambarISa iti khyAto yaSTuM samupacakrame
1060006a tasya vai yajamAnasya pazum indro jahAra ha
1060006c pranaSTe tu pazau vipro rAjAnam idam abravIt
1060007a pazur adya hRto rAjan pranaSTas tava durnayAt
1060007c arakSitAraM rAjAnaM ghnanti doSA narezvara
1060008a prAyazcittaM mahad dhy etan naraM vA puruSarSabha
1060008c Anayasva pazuM zIghraM yAvat karma pravartate
1060009a upAdhyAya vacaH zrutvA sa rAjA puruSarSabha
1060009c anviyeSa mahAbuddhiH pazuM gobhiH sahasrazaH
1060010a dezAJ janapadAMs tAMs tAn nagarANi vanAni ca
1060010c AzramANi ca puNyAni mArgamANo mahIpatiH
1060011a sa putrasahitaM tAta sabhAryaM raghunandana
1060011c bhRgutuGge samAsInam RcIkaM saMdadarza ha
1060012a tam uvAca mahAtejAH praNamyAbhiprasAdya ca
1060012c brahmarSiM tapasA dIptaM rAjarSir amitaprabhaH
1060012e pRSTvA sarvatra kuzalam RcIkaM tam idaM vacaH
1060013a gavAM zatasahasreNa vikriNISe sutaM yadi
1060013c pazor arthe mahAbhAga kRtakRtyo 'smi bhArgava
1060014a sarve parisRtA dezA yajJiyaM na labhe pazum
1060014c dAtum arhasi mUlyena sutam ekam ito mama
1060015a evam ukto mahAtejA RcIkas tv abravId vacaH
1060015c nAhaM jyeSThaM narazreSThaM vikrINIyAM kathaM cana
1060016a RcIkasya vacaH zrutvA teSAM mAtA mahAtmanAm
1060016c uvAca narazArdUlam ambarISaM tapasvinI
1060017a mamApi dayitaM viddhi kaniSThaM zunakaM nRpa
1060018a prAyeNa hi narazreSTha jyeSThAH pitRSu vallabhAH
1060018c mAtqNAM ca kanIyAMsas tasmAd rakSe kanIyasam
1060019a uktavAkye munau tasmin munipatnyAM tathaiva ca
1060019c zunaHzepaH svayaM rAma madhyamo vAkyam abravIt
1060020a pitA jyeSTham avikreyaM mAtA cAha kanIyasam
1060020c vikrItaM madhyamaM manye rAjan putraM nayasva mAm
1060021a gavAM zatasahasreNa zunaHzepaM narezvaraH
1060021c gRhItvA paramaprIto jagAma raghunandana
1060022a ambarISas tu rAjarSI ratham Aropya satvaraH
1060022c zunaHzepaM mahAtejA jagAmAzu mahAyazAH
1061001a zunaHzepaM narazreSTha gRhItvA tu mahAyazAH
1061001c vyazrAmyat puSkare rAjA madhyAhne raghunandana
1061002a tasya vizramamANasya zunaHzepo mahAyazAH
1061002c puSkaraM zreSTham Agamya vizvAmitraM dadarza ha
1061003a viSaNNavadano dInas tRSNayA ca zrameNa ca
1061003c papAtAGke mune rAma vAkyaM cedam uvAca ha
1061004a na me 'sti mAtA na pitA jJAtayo bAndhavAH kutaH
1061004c trAtum arhasi mAM saumya dharmeNa munipuMgava
1061005a trAtA tvaM hi munizreSTha sarveSAM tvaM hi bhAvanaH
1061005c rAjA ca kRtakAryaH syAd ahaM dIrghAyur avyayaH
1061006a svargalokam upAznIyAM tapas taptvA hy anuttamam
1061006c sa me nAtho hy anAthasya bhava bhavyena cetasA
1061006e piteva putraM dharmAtmaMs trAtum arhasi kilbiSAt
1061007a tasya tad vacanaM zrutvA vizvAmitro mahAtapAH
1061007c sAntvayitvA bahuvidhaM putrAn idam uvAca ha
1061008a yatkRte pitaraH putrAJ janayanti zubhArthinaH
1061008c paralokahitArthAya tasya kAlo 'yam AgataH
1061009a ayaM munisuto bAlo mattaH zaraNam icchati
1061009c asya jIvitamAtreNa priyaM kuruta putrakAH
1061010a sarve sukRtakarmANaH sarve dharmaparAyaNAH
1061010c pazubhUtA narendrasya tRptim agneH prayacchata
1061011a nAthavAMz ca zunaHzepo yajJaz cAvighnato bhavet
1061011c devatAs tarpitAz ca syur mama cApi kRtaM vacaH
1061012a munes tu vacanaM zrutvA madhuSyandAdayaH sutAH
1061012c sAbhimAnaM narazreSTha salIlam idam abruvan
1061013a katham AtmasutAn hitvA trAyase 'nyasutaM vibho
1061013c akAryam iva pazyAmaH zvamAMsam iva bhojane
1061014a teSAM tad vacanaM zrutvA putrANAM munipuMgavaH
1061014c krodhasaMraktanayano vyAhartum upacakrame
1061015a niHsAdhvasam idaM proktaM dharmAd api vigarhitam
1061015c atikramya tu madvAkyaM dAruNaM romaharSaNam
1061016a zvamAMsabhojinaH sarve vAsiSThA iva jAtiSu
1061016c pUrNaM varSasahasraM tu pRthivyAm anuvatsyatha
1061017a kRtvA zApasamAyuktAn putrAn munivaras tadA
1061017c zunaHzepam uvAcArtaM kRtvA rakSAM nirAmayAm
1061018a pavitrapAzair Asakto raktamAlyAnulepanaH
1061018c vaiSNavaM yUpam AsAdya vAgbhir agnim udAhara
1061019a ime tu gAthe dve divye gAyethA muniputraka
1061019c ambarISasya yajJe 'smiMs tataH siddhim avApsyasi
1061020a zunaHzepo gRhItvA te dve gAthe susamAhitaH
1061020c tvarayA rAjasiMhaM tam ambarISam uvAca ha
1061021a rAjasiMha mahAsattva zIghraM gacchAvahe sadaH
1061021c nivartayasva rAjendra dIkSAM ca samupAhara
1061022a tad vAkyam RSiputrasya zrutvA harSaM samutsukaH
1061022c jagAma nRpatiH zIghraM yajJavATam atandritaH
1061023a sadasyAnumate rAjA pavitrakRtalakSaNam
1061023c pazuM raktAmbaraM kRtvA yUpe taM samabandhayat
1061024a sa baddho vAgbhir agryAbhir abhituSTAva vai surau
1061024c indram indrAnujaM caiva yathAvan muniputrakaH
1061025a tataH prItaH sahasrAkSo rahasyastutitarpitaH
1061025c dIrgham Ayus tadA prAdAc chunaHzepAya rAghava
1061026a sa ca rAjA narazreSTha yajJasya ca samAptavAn
1061026c phalaM bahuguNaM rAma sahasrAkSaprasAdajam
1061027a vizvAmitro 'pi dharmAtmA bhUyas tepe mahAtapAH
1061027c puSkareSu narazreSTha dazavarSazatAni ca
1062001a pUrNe varSasahasre tu vratasnAtaM mahAmunim
1062001c abhyAgacchan surAH sarve tapaHphalacikIrSavaH
1062002a abravIt sumahAtejA brahmA suruciraM vacaH
1062002c RSis tvam asi bhadraM te svArjitaiH karmabhiH zubhaiH
1062003a tam evam uktvA devezas tridivaM punar abhyagAt
1062003c vizvAmitro mahAtejA bhUyas tepe mahat tapaH
1062004a tataH kAlena mahatA menakA paramApsarAH
1062004c puSkareSu narazreSTha snAtuM samupacakrame
1062005a tAM dadarza mahAtejA menakAM kuzikAtmajaH
1062005c rUpeNApratimAM tatra vidyutaM jalade yathA
1062006a dRSTvA kandarpavazago munis tAm idam abravIt
1062006c apsaraH svAgataM te 'stu vasa ceha mamAzrame
1062006e anugRhNISva bhadraM te madanena sumohitam
1062007a ity uktA sA varArohA tatrAvAsam athAkarot
1062007c tapaso hi mahAvighno vizvAmitram upAgataH
1062008a tasyAM vasantyAM varSANi paJca paJca ca rAghava
1062008c vizvAmitrAzrame saumya sukhena vyaticakramuH
1062009a atha kAle gate tasmin vizvAmitro mahAmuniH
1062009c savrIDa iva saMvRttaz cintAzokaparAyaNaH
1062010a buddhir muneH samutpannA sAmarSA raghunandana
1062010c sarvaM surANAM karmaitat tapo'paharaNaM mahat
1062011a ahorAtrApadezena gatAH saMvatsarA daza
1062011c kAmamohAbhibhUtasya vighno 'yaM pratyupasthitaH
1062012a viniHzvasan munivaraH pazcAttApena duHkhitaH
1062013a bhItAm apsarasaM dRSTvA vepantIM prAJjaliM sthitAm
1062013c menakAM madhurair vAkyair visRjya kuzikAtmajaH
1062013e uttaraM parvataM rAma vizvAmitro jagAma ha
1062014a sa kRtvA naiSThikIM buddhiM jetukAmo mahAyazAH
1062014c kauzikItIram AsAdya tapas tepe sudAruNam
1062015a tasya varSasahasraM tu ghoraM tapa upAsataH
1062015c uttare parvate rAma devatAnAm abhUd bhayam
1062016a amantrayan samAgamya sarve sarSigaNAH surAH
1062016c maharSizabdaM labhatAM sAdhv ayaM kuzikAtmajaH
1062017a devatAnAM vacaH zrutvA sarvalokapitAmahaH
1062017c abravIn madhuraM vAkyaM vizvAmitraM tapodhanam
1062018a maharSe svAgataM vatsa tapasogreNa toSitaH
1062018c mahattvam RSimukhyatvaM dadAmi tava kauzika
1062019a brahmaNaH sa vacaH zrutvA vizvAmitras tapodhanaH
1062019c prAJjaliH praNato bhUtvA pratyuvAca pitAmaham
1062020a brahmarSi zabdam atulaM svArjitaiH karmabhiH zubhaiH
1062020c yadi me bhagavAn Aha tato 'haM vijitendriyaH
1062021a tam uvAca tato brahmA na tAvat tvaM jitendriyaH
1062021c yatasva munizArdUla ity uktvA tridivaM gataH
1062022a viprasthiteSu deveSu vizvAmitro mahAmuniH
1062022c UrdhvabAhur nirAlambo vAyubhakSas tapaz caran
1062023a dharme paJcatapA bhUtvA varSAsv AkAzasaMzrayaH
1062023c zizire salilasthAyI rAtryahAni tapodhanaH
1062024a evaM varSasahasraM hi tapo ghoram upAgamat
1062025a tasmin saMtapyamAne tu vizvAmitre mahAmunau
1062025c saMbhramaH sumahAn AsIt surANAM vAsavasya ca
1062026a rambhAm apsarasaM zakraH saha sarvair marudgaNaiH
1062026c uvAcAtmahitaM vAkyam ahitaM kauzikasya ca
1063001a surakAryam idaM rambhe kartavyaM sumahat tvayA
1063001c lobhanaM kauzikasyeha kAmamohasamanvitam
1063002a tathoktA sApsarA rAma sahasrAkSeNa dhImatA
1063002c vrIDitA prAJjalir bhUtvA pratyuvAca surezvaram
1063003a ayaM surapate ghoro vizvAmitro mahAmuniH
1063003c krodham utsrakSyate ghoraM mayi deva na saMzayaH
1063003e tato hi me bhayaM deva prasAdaM kartum arhasi
1063004a tAm uvAca sahasrAkSo vepamAnAM kRtAJjalim
1063004c mA bhaiSi rambhe bhadraM te kuruSva mama zAsanam
1063005a kokilo hRdayagrAhI mAdhave ruciradrume
1063005c ahaM kandarpasahitaH sthAsyAmi tava pArzvataH
1063006a tvaM hi rUpaM bahuguNaM kRtvA paramabhAsvaram
1063006c tam RSiM kauzikaM rambhe bhedayasva tapasvinam
1063007a sA zrutvA vacanaM tasya kRtvA rUpam anuttamam
1063007c lobhayAm Asa lalitA vizvAmitraM zucismitA
1063008a kokilasya tu zuzrAva valgu vyAharataH svanam
1063008c saMprahRSTena manasA tata enAm udaikSata
1063009a atha tasya ca zabdena gItenApratimena ca
1063009c darzanena ca rambhAyA muniH saMdeham AgataH
1063010a sahasrAkSasya tat karma vijJAya munipuMgavaH
1063010c rambhAM krodhasamAviSTaH zazApa kuzikAtmajaH
1063011a yan mAM lobhayase rambhe kAmakrodhajayaiSiNam
1063011c dazavarSasahasrANi zailI sthAsyasi durbhage
1063012a brAhmaNaH sumahAtejAs tapobalasamanvitaH
1063012c uddhariSyati rambhe tvAM matkrodhakaluSIkRtAm
1063013a evam uktvA mahAtejA vizvAmitro mahAmuniH
1063013c azaknuvan dhArayituM kopaM saMtApam AgataH
1063014a tasya zApena mahatA rambhA zailI tadAbhavat
1063014c vacaH zrutvA ca kandarpo maharSeH sa ca nirgataH
1063015a kopena sa mahAtejAs tapo 'paharaNe kRte
1063015c indriyair ajitai rAma na lebhe zAntim AtmanaH
1064001a atha haimavatIM rAma dizaM tyaktvA mahAmuniH
1064001c pUrvAM dizam anuprApya tapas tepe sudAruNam
1064002a maunaM varSasahasrasya kRtvA vratam anuttamam
1064002c cakArApratimaM rAma tapaH paramaduSkaram
1064003a pUrNe varSasahasre tu kASThabhUtaM mahAmunim
1064003c vighnair bahubhir AdhUtaM krodho nAntaram Avizat
1064004a tato devAH sagandharvAH pannagAsurarAkSasAH
1064004c mohitAs tejasA tasya tapasA mandarazmayaH
1064004e kazmalopahatAH sarve pitAmaham athAbruvan
1064005a bahubhiH kAraNair deva vizvAmitro mahAmuniH
1064005c lobhitaH krodhitaz caiva tapasA cAbhivardhate
1064006a na hy asya vRjinaM kiM cid dRzyate sUkSmam apy atha
1064006c na dIyate yadi tv asya manasA yad abhIpsitam
1064006e vinAzayati trailokyaM tapasA sacarAcaram
1064006g vyAkulAz ca dizaH sarvA na ca kiM cit prakAzate
1064007a sAgarAH kSubhitAH sarve vizIryante ca parvatAH
1064007c prakampate ca pRthivI vAyur vAti bhRzAkulaH
1064008a buddhiM na kurute yAvan nAze deva mahAmuniH
1064008c tAvat prasAdyo bhagavAn agnirUpo mahAdyutiH
1064009a kAlAgninA yathA pUrvaM trailokyaM dahyate 'khilam
1064009c devarAjye cikIrSeta dIyatAm asya yan matam
1064010a tataH suragaNAH sarve pitAmahapurogamAH
1064010c vizvAmitraM mahAtmAnaM vAkyaM madhuram abruvan
1064011a brahmarSe svAgataM te 'stu tapasA sma sutoSitAH
1064011c brAhmaNyaM tapasogreNa prAptavAn asi kauzika
1064012a dIrgham Ayuz ca te brahman dadAmi samarudgaNaH
1064012c svasti prApnuhi bhadraM te gaccha saumya yathAsukham
1064013a pitAmahavacaH zrutvA sarveSAM ca divaukasAm
1064013c kRtvA praNAmaM mudito vyAjahAra mahAmuniH
1064014a brAhmaNyaM yadi me prAptaM dIrgham Ayus tathaiva ca
1064014c oMkAro 'tha vaSaTkAro vedAz ca varayantu mAm
1064015a kSatravedavidAM zreSTho brahmavedavidAm api
1064015c brahmaputro vasiSTho mAm evaM vadatu devatAH
1064015e yady ayaM paramaH kAmaH kRto yAntu surarSabhAH
1064016a tataH prasAdito devair vasiSTho japatAM varaH
1064016c sakhyaM cakAra brahmarSir evam astv iti cAbravIt
1064017a brahmarSitvaM na saMdehaH sarvaM saMpatsyate tava
1064017c ity uktvA devatAz cApi sarvA jagmur yathAgatam
1064018a vizvAmitro 'pi dharmAtmA labdhvA brAhmaNyam uttamam
1064018c pUjayAm Asa brahmarSiM vasiSThaM japatAM varam
1064019a kRtakAmo mahIM sarvAM cacAra tapasi sthitaH
1064019c evaM tv anena brAhmaNyaM prAptaM rAma mahAtmanA
1064020a eSa rAma munizreSTha eSa vigrahavAMs tapaH
1064020c eSa dharmaH paro nityaM vIryasyaiSa parAyaNam
1064021a zatAnandavacaH zrutvA rAmalakSmaNasaMnidhau
1064021c janakaH prAJjalir vAkyam uvAca kuzikAtmajam
1064022a dhanyo 'smy anugRhIto 'smi yasya me munipuMgava
1064022c yajJaM kAkutstha sahitaH prAptavAn asi dhArmika
1064023a pAvito 'haM tvayA brahman darzanena mahAmune
1064023c guNA bahuvidhAH prAptAs tava saMdarzanAn mayA
1064024a vistareNa ca te brahman kIrtyamAnaM mahat tapaH
1064024c zrutaM mayA mahAtejo rAmeNa ca mahAtmanA
1064025a sadasyaiH prApya ca sadaH zrutAs te bahavo guNAH
1064026a aprameyaM tapas tubhyam aprameyaM ca te balam
1064026c aprameyA guNAz caiva nityaM te kuzikAtmaja
1064027a tRptir AzcaryabhUtAnAM kathAnAM nAsti me vibho
1064027c karmakAlo munizreSTha lambate ravimaNDalam
1064028a zvaH prabhAte mahAtejo draSTum arhasi mAM punaH
1064028c svAgataM tapasAM zreSTha mAm anujJAtum arhasi
1064029a evam uktvA munizreSThaM vaideho mithilAdhipaH
1064029c pradakSiNaM cakArAzu sopAdhyAyaH sabAndhavaH
1064030a vizvAmitro 'pi dharmAtmA saharAmaH salakSmaNaH
1064030c svaM vATam abhicakrAma pUjyamAno maharSibhiH
1065001a tataH prabhAte vimale kRtakarmA narAdhipaH
1065001c vizvAmitraM mahAtmAnam AjuhAva sarAghavam
1065002a tam arcayitvA dharmAtmA zAstradRSTena karmaNA
1065002c rAghavau ca mahAtmAnau tadA vAkyam uvAca ha
1065003a bhagavan svAgataM te 'stu kiM karomi tavAnagha
1065003c bhavAn AjJApayatu mAm AjJApyo bhavatA hy aham
1065004a evam uktaH sa dharmAtmA janakena mahAtmanA
1065004c pratyuvAca munir vIraM vAkyaM vAkyavizAradaH
1065005a putrau dazarathasyemau kSatriyau lokavizrutau
1065005c draSTukAmau dhanuH zreSThaM yad etat tvayi tiSThati
1065006a etad darzaya bhadraM te kRtakAmau nRpAtmajau
1065006c darzanAd asya dhanuSo yatheSTaM pratiyAsyataH
1065007a evam uktas tu janakaH pratyuvAca mahAmunim
1065007c zrUyatAm asya dhanuSo yad artham iha tiSThati
1065008a devarAta iti khyAto nimeH SaSTho mahIpatiH
1065008c nyAso 'yaM tasya bhagavan haste datto mahAtmanA
1065009a dakSayajJavadhe pUrvaM dhanur Ayamya vIryavAn
1065009c rudras tu tridazAn roSAt salIlam idam abravIt
1065010a yasmAd bhAgArthino bhAgAn nAkalpayata me surAH
1065010c varAGgAni mahArhANi dhanuSA zAtayAmi vaH
1065011a tato vimanasaH sarve devA vai munipuMgava
1065011c prasAdayanti devezaM teSAM prIto 'bhavad bhavaH
1065012a prItiyuktaH sa sarveSAM dadau teSAM mahAtmanAm
1065013a tad etad devadevasya dhanUratnaM mahAtmanaH
1065013c nyAsabhUtaM tadA nyastam asmAkaM pUrvake vibho
1065014a atha me kRSataH kSetraM lAGgalAd utthitA mama
1065014c kSetraM zodhayatA labdhvA nAmnA sIteti vizrutA
1065015a bhUtalAd utthitA sA tu vyavardhata mamAtmajA
1065015c vIryazulketi me kanyA sthApiteyam ayonijA
1065016a bhUtalAd utthitAM tAM tu vardhamAnAM mamAtmajAm
1065016c varayAm Asur Agamya rAjAno munipuMgava
1065017a teSAM varayatAM kanyAM sarveSAM pRthivIkSitAm
1065017c vIryazulketi bhagavan na dadAmi sutAm aham
1065018a tataH sarve nRpatayaH sametya munipuMgava
1065018c mithilAm abhyupAgamya vIryaM jijJAsavas tadA
1065019a teSAM jijJAsamAnAnAM vIryaM dhanur upAhRtam
1065019c na zekur grahaNe tasya dhanuSas tolane 'pi vA
1065020a teSAM vIryavatAM vIryam alpaM jJAtvA mahAmune
1065020c pratyAkhyAtA nRpatayas tan nibodha tapodhana
1065021a tataH paramakopena rAjAno munipuMgava
1065021c arundhan mithilAM sarve vIryasaMdeham AgatAH
1065022a AtmAnam avadhUtaM te vijJAya munipuMgava
1065022c roSeNa mahatAviSTAH pIDayan mithilAM purIm
1065023a tataH saMvatsare pUrNe kSayaM yAtAni sarvazaH
1065023c sAdhanAni munireSTha tato 'haM bhRzaduHkhitaH
1065024a tato devagaNAn sarvAMs tapasAhaM prasAdayam
1065024c daduz ca paramaprItAz caturaGgabalaM surAH
1065025a tato bhagnA nRpatayo hanyamAnA dizo yayuH
1065025c avIryA vIryasaMdigdhA sAmAtyAH pApakAriNaH
1065026a tad etan munizArdUla dhanuH paramabhAsvaram
1065026c rAmalakSmaNayoz cApi darzayiSyAmi suvrata
1065027a yady asya dhanuSo rAmaH kuryAd AropaNaM mune
1065027c sutAm ayonijAM sItAM dadyAM dAzarather aham
1066001a janakasya vacaH zrutvA vizvAmitro mahAmuniH
1066001c dhanur darzaya rAmAya iti hovAca pArthivam
1066002a tataH sa rAjA janakaH sacivAn vyAdideza ha
1066002c dhanur AnIyatAM divyaM gandhamAlyavibhUSitam
1066003a janakena samAdiSThAH sacivAH prAvizan purIm
1066003c tad dhanuH purataH kRtvA nirjagmuH pArthivAjJayA
1066004a nRpAM zatAni paJcAzad vyAyatAnAM mahAtmanAm
1066004c maJjUSAm aSTacakrAM tAM samUhus te kathaM cana
1066005a tAm AdAya tu maJjUSAm AyatIM yatra tad dhanuH
1066005c suropamaM te janakam Ucur nRpatimantriNaH
1066006a idaM dhanurvaraM rAjan pUjitaM sarvarAjabhiH
1066006c mithilAdhipa rAjendra darzanIyaM yadIcchasi
1066007a teSAM nRpo vacaH zrutvA kRtAJjalir abhASata
1066007c vizvAmitraM mahAtmAnaM tau cobhau rAmalakSmaNau
1066008a idaM dhanurvaraM brahmaJ janakair abhipUjitam
1066008c rAjabhiz ca mahAvIryair azakyaM pUrituM tadA
1066009a naitat suragaNAH sarve nAsurA na ca rAkSasAH
1066009c gandharvayakSapravarAH sakiMnaramahoragAH
1066010a kva gatir mAnuSANAM ca dhanuSo 'sya prapUraNe
1066010c AropaNe samAyoge vepane tolane 'pi vA
1066011a tad etad dhanuSAM zreSTham AnItaM munipuMgava
1066011c darzayaitan mahAbhAga anayo rAjaputrayoH
1066012a vizvAmitras tu dharmAtmA zrutvA janakabhASitam
1066012c vatsa rAma dhanuH pazya iti rAghavam abravIt
1066013a maharSer vacanAd rAmo yatra tiSThati tad dhanuH
1066013c maJjUSAM tAm apAvRtya dRSTvA dhanur athAbravIt
1066014a idaM dhanurvaraM brahman saMspRzAmIha pANinA
1066014c yatnavAMz ca bhaviSyAmi tolane pUraNe 'pi vA
1066015a bADham ity eva taM rAjA muniz ca samabhASata
1066015c lIlayA sa dhanur madhye jagrAha vacanAn muneH
1066016a pazyatAM nRSahasrANAM bahUnAM raghunandanaH
1066016c Aropayat sa dharmAtmA salIlam iva tad dhanuH
1066017a AropayitvA maurvIM ca pUrayAm Asa vIryavAn
1066017c tad babhaJja dhanur madhye narazreSTho mahAyazAH
1066018a tasya zabdo mahAn AsIn nirghAtasamanisvanaH
1066018c bhUmikampaz ca sumahAn parvatasyeva dIryataH
1066019a nipetuz ca narAH sarve tena zabdena mohitAH
1066019c varjayitvA munivaraM rAjAnaM tau ca rAghavau
1066020a pratyAzvaste jane tasmin rAjA vigatasAdhvasaH
1066020c uvAca prAJjalir vAkyaM vAkyajJo munipuMgavam
1066021a bhagavan dRSTavIryo me rAmo dazarathAtmajaH
1066021c atyadbhutam acintyaM ca atarkitam idaM mayA
1066022a janakAnAM kule kIrtim AhariSyati me sutA
1066022c sItA bhartAram AsAdya rAmaM dazarathAtmajam
1066023a mama satyA pratijJA ca vIryazulketi kauzika
1066023c sItA prANair bahumatA deyA rAmAya me sutA
1066024a bhavato 'numate brahmaJ zIghraM gacchantu mantriNaH
1066024c mama kauzika bhadraM te ayodhyAM tvaritA rathaiH
1066025a rAjAnaM prazritair vAkyair Anayantu puraM mama
1066025c pradAnaM vIryazulkAyAH kathayantu ca sarvazaH
1066026a muniguptau ca kAkutsthau kathayantu nRpAya vai
1066026c prIyamANaM tu rAjAnam Anayantu suzIghragAH
1066027a kauzikaz ca tathety Aha rAjA cAbhASya mantriNaH
1066027c ayodhyAM preSayAm Asa dharmAtmA kRtazAsanAt
1067001a janakena samAdiSTA dUtAs te klAntavAhanAH
1067001c trirAtram uSitvA mArge te 'yodhyAM prAvizan purIm
1067002a te rAjavacanAd dUtA rAjavezmapravezitAH
1067002c dadRzur devasaMkAzaM vRddhaM dazarathaM nRpam
1067003a baddhAJjalipuTAH sarve dUtA vigatasAdhvasAH
1067003c rAjAnaM prayatA vAkyam abruvan madhurAkSaram
1067004a maithilo janako rAjA sAgnihotrapuraskRtaH
1067004c kuzalaM cAvyayaM caiva sopAdhyAyapurohitam
1067005a muhur muhur madhurayA snehasaMyuktayA girA
1067005c janakas tvAM mahArAja pRcchate sapuraHsaram
1067006a pRSTvA kuzalam avyagraM vaideho mithilAdhipaH
1067006c kauzikAnumate vAkyaM bhavantam idam abravIt
1067007a pUrvaM pratijJA viditA vIryazulkA mamAtmajA
1067007c rAjAnaz ca kRtAmarSA nirvIryA vimukhIkRtAH
1067008a seyaM mama sutA rAjan vizvAmitrapuraHsaraiH
1067008c yadRcchayAgatair vIrair nirjitA tava putrakaiH
1067009a tac ca rAjan dhanur divyaM madhye bhagnaM mahAtmanA
1067009c rAmeNa hi mahArAja mahatyAM janasaMsadi
1067010a asmai deyA mayA sItA vIryazulkA mahAtmane
1067010c pratijJAM tartum icchAmi tad anujJAtum arhasi
1067011a sopAdhyAyo mahArAja purohitapuraskRtaH
1067011c zIghram Agaccha bhadraM te draSTum arhasi rAghavau
1067012a prItiM ca mama rAjendra nirvartayitum arhasi
1067012c putrayor ubhayor eva prItiM tvam api lapsyase
1067013a evaM videhAdhipatir madhuraM vAkyam abravIt
1067013c vizvAmitrAbhyanujJAtaH zatAnandamate sthitaH
1067014a dUtavAkyaM tu tac chrutvA rAjA paramaharSitaH
1067014c vasiSThaM vAmadevaM ca mantriNo 'nyAMz ca so 'bravIt
1067015a guptaH kuzikaputreNa kausalyAnandavardhanaH
1067015c lakSmaNena saha bhrAtrA videheSu vasaty asau
1067016a dRSTavIryas tu kAkutstho janakena mahAtmanA
1067016c saMpradAnaM sutAyAs tu rAghave kartum icchati
1067017a yadi vo rocate vRttaM janakasya mahAtmanaH
1067017c purIM gacchAmahe zIghraM mA bhUt kAlasya paryayaH
1067018a mantriNo bADham ity AhuH saha sarvair maharSibhiH
1067018c suprItaz cAbravId rAjA zvo yAtreti sa mantriNaH
1067019a mantriNas tu narendrasya rAtriM paramasatkRtAH
1067019c USuH pramuditAH sarve guNaiH sarvaiH samanvitAH
1068001a tato rAtryAM vyatItAyAM sopAdhyAyaH sabAndhavaH
1068001c rAjA dazaratho hRSTaH sumantram idam abravIt
1068002a adya sarve dhanAdhyakSA dhanam AdAya puSkalam
1068002c vrajantv agre suvihitA nAnAratnasamanvitAH
1068003a caturaGgabalaM cApi zIghraM niryAtu sarvazaH
1068003c mamAjJAsamakAlaM ca yAnayugyam anuttamam
1068004a vasiSTho vAmadevaz ca jAbAlir atha kAzyapaH
1068004c mArkaNDeyaz ca dIrghAyur RSiH kAtyAyanas tathA
1068005a ete dvijAH prayAntv agre syandanaM yojayasva me
1068005c yathA kAlAtyayo na syAd dUtA hi tvarayanti mAm
1068006a vacanAc ca narendrasya sA senA caturaGgiNI
1068006c rAjAnam RSibhiH sArdhaM vrajantaM pRSThato 'nvagAt
1068007a gatvA caturahaM mArgaM videhAn abhyupeyivAn
1068007c rAjA tu janakaH zrImAJ zrutvA pUjAm akalpayat
1068008a tato rAjAnam AsAdya vRddhaM dazarathaM nRpam
1068008c janako mudito rAjA harSaM ca paramaM yayau
1068008e uvAca ca narazreSTho narazreSThaM mudAnvitam
1068009a svAgataM te mahArAja diSTyA prApto 'si rAghava
1068009c putrayor ubhayoH prItiM lapsyase vIryanirjitAm
1068010a diSTyA prApto mahAtejA vasiSTho bhagavAn RSiH
1068010c saha sarvair dvijazreSThair devair iva zatakratuH
1068011a diSTyA me nirjitA vighnA diSTyA me pUjitaM kulam
1068011c rAghavaiH saha saMbandhAd vIryazreSThair mahAtmabhiH
1068012a zvaH prabhAte narendrendra nirvartayitum arhasi
1068012c yajJasyAnte narazreSTha vivAham RSisaMmatam
1068013a tasya tad vacanaM zrutvA RSimadhye narAdhipaH
1068013c vAkyaM vAkyavidAM zreSThaH pratyuvAca mahIpatim
1068014a pratigraho dAtRvazaH zrutam etan mayA purA
1068014c yathA vakSyasi dharmajJa tat kariSyAmahe vayam
1068015a tad dharmiSThaM yazasyaM ca vacanaM satyavAdinaH
1068015c zrutvA videhAdhipatiH paraM vismayam AgataH
1068016a tataH sarve munigaNAH parasparasamAgame
1068016c harSeNa mahatA yuktAs tAM nizAm avasan sukham
1068017a rAjA ca rAghavau putrau nizAmya pariharSitaH
1068017c uvAsa paramaprIto janakena supUjitaH
1068018a janako 'pi mahAtejAH kriyA dharmeNa tattvavit
1068018c yajJasya ca sutAbhyAM ca kRtvA rAtrim uvAsa ha
1069001a tataH prabhAte janakaH kRtakarmA maharSibhiH
1069001c uvAca vAkyaM vAkyajJaH zatAnandaM purohitam
1069002a bhrAtA mama mahAtejA yavIyAn atidhArmikaH
1069002c kuzadhvaja iti khyAtaH purIm adhyavasac chubhAm
1069003a vAryAphalakaparyantAM pibann ikSumatIM nadIm
1069003c sAMkAzyAM puNyasaMkAzAM vimAnam iva puSpakam
1069004a tam ahaM draSTum icchAmi yajJagoptA sa me mataH
1069004c prItiM so 'pi mahAtejA imAM bhoktA mayA saha
1069005a zAsanAt tu narendrasya prayayuH zIghravAjibhiH
1069005c samAnetuM naravyAghraM viSNum indrAjJayA yathA
1069006a AjJayA tu narendrasya AjagAma kuzadhvajaH
1069007a sa dadarza mahAtmAnaM janakaM dharmavatsalam
1069007c so 'bhivAdya zatAnandaM rAjAnaM cApi dhArmikam
1069008a rAjArhaM paramaM divyam AsanaM cAdhyarohata
1069008c upaviSTAv ubhau tau tu bhrAtarAv amitaujasau
1069009a preSayAm Asatur vIrau mantrizreSThaM sudAmanam
1069009c gaccha mantripate zIghram aikSvAkam amitaprabham
1069009e AtmajaiH saha durdharSam Anayasva samantriNam
1069010a aupakAryAM sa gatvA tu raghUNAM kulavardhanam
1069010c dadarza zirasA cainam abhivAdyedam abravIt
1069011a ayodhyAdhipate vIra vaideho mithilAdhipaH
1069011c sa tvAM draSTuM vyavasitaH sopAdhyAyapurohitam
1069012a mantrizreSThavacaH zrutvA rAjA sarSigaNas tadA
1069012c sabandhur agamat tatra janako yatra vartate
1069013a sa rAjA mantrisahitaH sopAdhyAyaH sabAndhavaH
1069013c vAkyaM vAkyavidAM zreSTho vaideham idam abravIt
1069014a viditaM te mahArAja ikSvAkukuladaivatam
1069014c vaktA sarveSu kRtyeSu vasiSTho bhagavAn RSiH
1069015a vizvAmitrAbhyanujJAtaH saha sarvair maharSibhiH
1069015c eSa vakSyati dharmAtmA vasiSTho me yathAkramam
1069016a tUSNIMbhUte dazarathe vasiSTho bhagavAn RSiH
1069016c uvAca vAkyaM vAkyajJo vaidehaM sapurohitam
1069017a avyaktaprabhavo brahmA zAzvato nitya avyayaH
1069017c tasmAn marIciH saMjajJe marIceH kazyapaH sutaH
1069018a vivasvAn kazyapAj jajJe manur vaivaisvataH smRtaH
1069018c manuH prajApatiH pUrvam ikSvAkus tu manoH sutaH
1069019a tam ikSvAkum ayodhyAyAM rAjAnaM viddhi pUrvakam
1069019c ikSvAkos tu sutaH zrImAn vikukSir udapadyata
1069020a vikukSes tu mahAtejA bANaH putraH pratApavAn
1069020c bANasya tu mahAtejA anaraNyaH pratApavAn
1069021a anaraNyAt pRthur jajJe trizaGkus tu pRthoH sutaH
1069021c trizaGkor abhavat putro dhundhumAro mahAyazAH
1069022a dhundhumArAn mahAtejA yuvanAzvo mahArathaH
1069022c yuvanAzvasutaH zrImAn mAndhAtA pRthivIpatiH
1069023a mAndhAtus tu sutaH zrImAn susaMdhir udapadyata
1069023c susaMdher api putrau dvau dhruvasaMdhiH prasenajit
1069024a yazasvI dhruvasaMdhes tu bharato nAma nAmataH
1069024c bharatAt tu mahAtejA asito nAma jAyata
1069025a saha tena gareNaiva jAtaH sa sagaro 'bhavat
1069025c sagarasyAsamaJjas tu asamaJjAd athAMzumAn
1069026a dilIpo 'MzumataH putro dilIpasya bhagIrathaH
1069026c bhagIrathAt kakutsthaz ca kakutsthasya raghus tathA
1069027a raghos tu putras tejasvI pravRddhaH puruSAdakaH
1069027c kalmASapAdo hy abhavat tasmAj jAtas tu zaGkhaNaH
1069028a sudarzanaH zaGkhaNasya agnivarNaH sudarzanAt
1069028c zIghragas tv agnivarNasya zIghragasya maruH sutaH
1069029a maroH prazuzrukas tv AsId ambarISaH prazuzrukAt
1069029c ambarISasya putro 'bhUn nahuSaH pRthivIpatiH
1069030a nahuSasya yayAtis tu nAbhAgas tu yayAtijaH
1069030c nAbhAgasya babhUvAja ajAd dazaratho 'bhavat
1069030e tasmAd dazarathAj jAtau bhrAtarau rAmalakSmaNau
1069031a AdivaMzavizuddhAnAM rAjJAM paramadharmiNAm
1069031c ikSvAkukulajAtAnAM vIrANAM satyavAdinAm
1069032a rAmalakSmaNayor arthe tvatsute varaye nRpa
1069032c sadRzAbhyAM narazreSTha sadRze dAtum arhasi
1070001a evaM bruvANaM janakaH pratyuvAca kRtAJjaliH
1070001c zrotum arhasi bhadraM te kulaM naH kIrtitaM param
1070002a pradAne hi munizreSTha kulaM niravazeSataH
1070002c vaktavyaM kulajAtena tan nibodha mahAmune
1070003a rAjAbhUt triSu lokeSu vizrutaH svena karmaNA
1070003c nimiH paramadharmAtmA sarvasattvavatAM varaH
1070004a tasya putro mithir nAma janako mithiputrakaH
1070004c prathamo janako nAma janakAd apy udAvasuH
1070005a udAvasos tu dharmAtmA jAto vai nandivardhanaH
1070005c nandivardhanaputras tu suketur nAma nAmataH
1070006a suketor api dharmAtmA devarAto mahAbalaH
1070006c devarAtasya rAjarSer bRhadratha iti zrutaH
1070007a bRhadrathasya zUro 'bhUn mahAvIraH pratApavAn
1070007c mahAvIrasya dhRtimAn sudhRtiH satyavikramaH
1070008a sudhRter api dharmAtmA dhRSTaketuH sudhArmikaH
1070008c dhRSTaketos tu rAjarSer haryazva iti vizrutaH
1070009a haryazvasya maruH putro maroH putraH pratIndhakaH
1070009c pratIndhakasya dharmAtmA rAjA kIrtirathaH sutaH
1070010a putraH kIrtirathasyApi devamIDha iti smRtaH
1070010c devamIDhasya vibudho vibudhasya mahIdhrakaH
1070011a mahIdhrakasuto rAjA kIrtirAto mahAbalaH
1070011c kIrtirAtasya rAjarSer mahAromA vyajAyata
1070012a mahAroMNas tu dharmAtmA svarNaromA vyajAyata
1070012c svarNaroMNas tu rAjarSer hrasvaromA vyajAyata
1070013a tasya putradvayaM jajJe dharmajJasya mahAtmanaH
1070013c jyeSTho 'ham anujo bhrAtA mama vIraH kuzadhvajaH
1070014a mAM tu jyeSThaM pitA rAjye so 'bhiSicya narAdhipaH
1070014c kuzadhvajaM samAvezya bhAraM mayi vanaM gataH
1070015a vRddhe pitari svaryAte dharmeNa dhuram Avaham
1070015c bhrAtaraM devasaMkAzaM snehAt pazyan kuzadhvajam
1070016a kasya cit tv atha kAlasya sAMkAzyAd agamat purAt
1070016c sudhanvA vIryavAn rAjA mithilAm avarodhakaH
1070017a sa ca me preSayAm Asa zaivaM dhanur anuttamam
1070017c sItA kanyA ca padmAkSI mahyaM vai dIyatAm iti
1070018a tasyApradAnAd brahmarSe yuddham AsIn mayA saha
1070018c sa hato 'bhimukho rAjA sudhanvA tu mayA raNe
1070019a nihatya taM munizreSTha sudhanvAnaM narAdhipam
1070019c sAMkAzye bhrAtaraM zUram abhyaSiJcaM kuzadhvajam
1070020a kanIyAn eSa me bhrAtA ahaM jyeSTho mahAmune
1070020c dadAmi paramaprIto vadhvau te munipuMgava
1070021a sItAM rAmAya bhadraM te UrmilAM lakSmaNAya ca
1070021c vIryazulkAM mama sutAM sItAM surasutopamAm
1070022a dvitIyAm UrmilAM caiva trir vadAmi na saMzayaH
1070022c dadAmi paramaprIto vadhvau te raghunandana
1070023a rAmalakSmaNayo rAjan godAnaM kArayasva ha
1070023c pitRkAryaM ca bhadraM te tato vaivAhikaM kuru
1070024a maghA hy adya mahAbAho tRtIye divase prabho
1070024c phalgunyAm uttare rAjaMs tasmin vaivAhikaM kuru
1070024e rAmalakSmaNayor arthe dAnaM kAryaM sukhodayam
1071001a tam uktavantaM vaidehaM vizvAmitro mahAmuniH
1071001c uvAca vacanaM vIraM vasiSThasahito nRpam
1071002a acintyAny aprameyAni kulAni narapuMgava
1071002c ikSvAkUNAM videhAnAM naiSAM tulyo 'sti kaz cana
1071003a sadRzo dharmasaMbandhaH sadRzo rUpasaMpadA
1071003c rAmalakSmaNayo rAjan sItA cormilayA saha
1071004a vaktavyaM ca narazreSTha zrUyatAM vacanaM mama
1071005a bhrAtA yavIyAn dharmajJa eSa rAjA kuzadhvajaH
1071005c asya dharmAtmano rAjan rUpeNApratimaM bhuvi
1071005e sutAdvayaM narazreSTha patnyarthaM varayAmahe
1071006a bharatasya kumArasya zatrughnasya ca dhImataH
1071006c varayema sute rAjaMs tayor arthe mahAtmanoH
1071007a putrA dazarathasyeme rUpayauvanazAlinaH
1071007c lokapAlopamAH sarve devatulyaparAkramAH
1071008a ubhayor api rAjendra saMbandhenAnubadhyatAm
1071008c ikSvAkukulam avyagraM bhavataH puNyakarmaNaH
1071009a vizvAmitravacaH zrutvA vasiSThasya mate tadA
1071009c janakaH prAJjalir vAkyam uvAca munipuMgavau
1071010a sadRzaM kulasaMbandhaM yad AjJApayathaH svayam
1071010c evaM bhavatu bhadraM vaH kuzadhvajasute ime
1071010e patnyau bhajetAM sahitau zatrughnabharatAv ubhau
1071011a ekAhnA rAjaputrINAM catasRNAM mahAmune
1071011c pANIn gRhNantu catvAro rAjaputrA mahAbalAH
1071012a uttare divase brahman phalgunIbhyAM manISiNaH
1071012c vaivAhikaM prazaMsanti bhago yatra prajApatiH
1071013a evam uktvA vacaH saumyaM pratyutthAya kRtAJjaliH
1071013c ubhau munivarau rAjA janako vAkyam abravIt
1071014a paro dharmaH kRto mahyaM ziSyo 'smi bhavatoH sadA
1071014c imAny AsanamukhyAni AsetAM munipuMgavau
1071015a yathA dazarathasyeyaM tathAyodhyA purI mama
1071015c prabhutve nAsit saMdeho yathArhaM kartum arhathaH
1071016a tathA bruvati vaidehe janake raghunandanaH
1071016c rAjA dazaratho hRSTaH pratyuvAca mahIpatim
1071017a yuvAm asaMkhyeya guNau bhrAtarau mithilezvarau
1071017c RSayo rAjasaMghAz ca bhavadbhyAm abhipUjitAH
1071018a svasti prApnuhi bhadraM te gamiSyAmi svam Alayam
1071018c zrAddhakarmANi sarvANi vidhAsya iti cAbravIt
1071019a tam ApRSTvA narapatiM rAjA dazarathas tadA
1071019c munIndrau tau puraskRtya jagAmAzu mahAyazAH
1071020a sa gatvA nilayaM rAjA zrAddhaM kRtvA vidhAnataH
1071020c prabhAte kAlyam utthAya cakre godAnam uttamam
1071021a gavAM zatasahasrANi brAhmaNebhyo narAdhipaH
1071021c ekaikazo dadau rAjA putrAn uddhizya dharmataH
1071022a suvarNazRGgAH saMpannAH savatsAH kAMsyadohanAH
1071022c gavAM zatasahasrANi catvAri puruSarSabhaH
1071023a vittam anyac ca subahu dvijebhyo raghunandanaH
1071023c dadau godAnam uddizya putrANAM putravatsalaH
1071024a sa sutaiH kRtagodAnair vRtaz ca nRpatis tadA
1071024c lokapAlair ivAbhAti vRtaH saumyaH prajApatiH
1072001a yasmiMs tu divase rAjA cakre godAnam uttamam
1072001c tasmiMs tu divase zUro yudhAjit samupeyivAn
1072002a putraH kekayarAjasya sAkSAd bharatamAtulaH
1072002c dRSTvA pRSTvA ca kuzalaM rAjAnam idam abravIt
1072003a kekayAdhipatI rAjA snehAt kuzalam abravIt
1072003c yeSAM kuzalakAmo 'si teSAM saMpraty anAmayam
1072004a svasrIyaM mama rAjendra draSTukAmo mahIpate
1072004c tadartham upayAto 'ham ayodhyAM raghunandana
1072005a zrutvA tv aham ayodhyAyAM vivAhArthaM tavAtmajAn
1072005c mithilAm upayAtAs tu tvayA saha mahIpate
1072005e tvarayAbhyupayAto 'haM draSTukAmaH svasuH sutam
1072006a atha rAjA dazarathaH priyAtithim upasthima
1072006c dRSTvA paramasatkAraiH pUjArhaM samapUjayat
1072007a tatas tAm uSito rAtriM saha putrair mahAtmabhiH
1072007c RSIMs tadA puraskRtya yajJavATam upAgamat
1072008a yukte muhUrte vijaye sarvAbharaNabhUSitaiH
1072008c bhrAtRbhiH sahito rAmaH kRtakautukamaGgalaH
1072008g vasiSThaM purataH kRtvA maharSIn aparAn api
1072009a vasiSTho bhagavAn etya vaideham idam abravIt
1072010a rAjA dazaratho rAjan kRtakautukamaGgalaiH
1072010c putrair naravarazreSTha dAtAram abhikAGkSate
1072011a dAtRpratigrahItRbhyAM sarvArthAH prabhavanti hi
1072011c svadharmaM pratipadyasva kRtvA vaivAhyam uttamam
1072012a ity uktaH paramodAro vasiSThena mahAtmanA
1072012c pratyuvAca mahAtejA vAkyaM paramadharmavit
1072013a kaH sthitaH pratihAro me kasyAjJA saMpratIkSyate
1072013c svagRhe ko vicAro 'sti yathA rAjyam idaM tava
1072014a kRtakautukasarvasvA vedimUlam upAgatAH
1072014c mama kanyA munizreSTha dIptA vahner ivArciSaH
1072015a sajjo 'haM tvatpratIkSo 'smi vedyAm asyAM pratiSThitaH
1072015c avighnaM kurutAM rAjA kimarthaM hi vilambyate
1072016a tadvAkyaM janakenoktaM zrutvA dazarathas tadA
1072016c pravezayAm Asa sutAn sarvAn RSigaNAn api
1072017a abravIj janako rAjA kausalyAnandavardhanam
1072017c iyaM sItA mama sutA sahadharmacarI tava
1072017e pratIccha cainAM bhadraM te pANiM gRhNISva pANinA
1072018a lakSmaNAgaccha bhadraM te UrmilAm udyatAM mayA
1072018c pratIccha pANiM gRhNISva mA bhUt kAlasya paryayaH
1072019a tam evam uktvA janako bharataM cAbhyabhASata
1072019c gRhANa pANiM mANDavyAH pANinA raghunandana
1072020a zatrughnaM cApi dharmAtmA abravIj janakezvaraH
1072020c zrutakIrtyA mahAbAho pANiM gRhNISva pANinA
1072021a sarve bhavantaH saMyAz ca sarve sucaritavratAH
1072021c patnIbhiH santu kAkutsthA mA bhUt kAlasya paryayaH
1072022a janakasya vacaH zrutvA pANIn pANibhir aspRzan
1072022c catvAras te catasRNAM vasiSThasya mate sthitAH
1072023a agniM pradakSiNaM kRtvA vediM rAjAnam eva ca
1072023c RSIMz caiva mahAtmAnaH saha bhAryA raghUttamAH
1072023e yathoktena tathA cakrur vivAhaM vidhipUrvakam
1072024a puSpavRSTir mahaty AsId antarikSAt subhAsvarA
1072024c divyadundubhinirghoSair gItavAditranisvanaiH
1072025a nanRtuz cApsaraHsaMghA gandharvAz ca jaguH kalam
1072025c vivAhe raghumukhyAnAM tad adbhutam ivAbhavat
1072026a IdRze vartamAne tu tUryodghuSTaninAdite
1072026c trir agniM te parikramya Uhur bhAryA mahaujasaH
1072027a athopakAryAM jagmus te sadArA raghunandanaH
1072027c rAjApy anuyayau pazyan sarSisaMghaH sabAndhavaH
1073001a atha rAtryAM vyatItAyAM vizvAmitro mahAmuniH
1073001c ApRcchya tau ca rAjAnau jagAmottaraparvatam
1073002a vizvAmitro gate rAjA vaidehaM mithilAdhipam
1073002c ApRcchyAtha jagAmAzu rAjA dazarathaH purIm
1073003a atha rAjA videhAnAM dadau kanyAdhanaM bahu
1073003c gavAM zatasahasrANi bahUni mithilezvaraH
1073004a kambalAnAM ca mukhyAnAM kSaumakoTyambarANi ca
1073004c hastyazvarathapAdAtaM divyarUpaM svalaMkRtam
1073005a dadau kanyA pitA tAsAM dAsIdAsam anuttamam
1073005c hiraNyasya suvarNasya muktAnAM vidrumasya ca
1073006a dadau paramasaMhRSTaH kanyAdhanam anuttamam
1073006c dattvA bahudhanaM rAjA samanujJApya pArthivam
1073007a praviveza svanilayaM mithilAM mithilezvaraH
1073007c rAjApy ayodhyAdhipatiH saha putrair mahAtmabhiH
1073008a RSIn sarvAn puraskRtya jagAma sabalAnugaH
1073008c gacchantaM tu naravyAghraM sarSisaMghaM sarAghavam
1073009a ghorAH sma pakSiNo vAco vyAharanti tatas tataH
1073009c bhaumAz caiva mRgAH sarve gacchanti sma pradakSiNam
1073010a tAn dRSTvA rAjazArdUlo vasiSThaM paryapRcchata
1073010c asaumyAH pakSiNo ghorA mRgAz cApi pradakSiNAH
1073010e kim idaM hRdayotkampi mano mama viSIdati
1073011a rAjJo dazarathasyaitac chrutvA vAkyaM mahAn RSiH
1073011c uvAca madhurAM vANIM zrUyatAm asya yat phalam
1073012a upasthitaM bhayaM ghoraM divyaM pakSimukhAc cyutam
1073012c mRgAH prazamayanty ete saMtApas tyajyatAm ayam
1073013a teSAM saMvadatAM tatra vAyuH prAdur babhUva ha
1073013c kampayan medinIM sarvAM pAtayaMz ca drumAJ zubhAn
1073014a tamasA saMvRtaH sUryaH sarvA na prababhur dizaH
1073014c bhasmanA cAvRtaM sarvaM saMmUDham iva tad balam
1073015a vasiSTha RSayaz cAnye rAjA ca sasutas tadA
1073015c sasaMjJA iva tatrAsan sarvam anyad vicetanam
1073016a tasmiMs tamasi ghore tu bhasmacchanneva sA camUH
1073016c dadarza bhImasaMkAzaM jaTAmaNDaladhAriNam
1073017a kailAsam iva durdharSaM kAlAgnim iva duHsaham
1073017c jvalantam iva tejobhir durnirIkSyaM pRthagjanaiH
1073018a skandhe cAsajya parazuM dhanur vidyudgaNopamam
1073018c pragRhya zaramukhyaM ca tripuraghnaM yathA haram
1073019a taM dRSTvA bhImasaMkAzaM jvalantam iva pAvakam
1073019c vasiSThapramukhA viprA japahomaparAyaNAH
1073019e saMgatA munayaH sarve saMjajalpur atho mithaH
1073020a kaccit pitRvadhAmarSI kSatraM notsAdayiSyati
1073020c pUrvaM kSatravadhaM kRtvA gatamanyur gatajvaraH
1073020e kSatrasyotsAdanaM bhUyo na khalv asya cikIrSitam
1073021a evam uktvArghyam AdAya bhArgavaM bhImadarzanam
1073021c RSayo rAma rAmeti madhurAM vAcam abruvan
1073022a pratigRhya tu tAM pUjAm RSidattAM pratApavAn
1073022c rAmaM dAzarathiM rAmo jAmadagnyo 'bhyabhASata
1074001a rAma dAzarathe vIra vIryaM te zrUyate 'dhutam
1074001c dhanuSo bhedanaM caiva nikhilena mayA zrutam
1074002a tad adbhutam acintyaM ca bhedanaM dhanuSas tvayA
1074002c tac chrutvAham anuprApto dhanur gRhyAparaM zubham
1074003a tad idaM ghorasaMkAzaM jAmadagnyaM mahad dhanuH
1074003c pUrayasva zareNaiva svabalaM darzayasva ca
1074004a tad ahaM te balaM dRSTvA dhanuSo 'sya prapUraNe
1074004c dvandvayuddhaM pradAsyAmi vIryazlAghyam idaM tava
1074005a tasya tad vacanaM zrutvA rAjA dazarathas tadA
1074005c viSaNNavadano dInaH prAJjalir vAkyam abravIt
1074006a kSatraroSAt prazAntas tvaM brAhmaNasya mahAyazAH
1074006c bAlAnAM mama putrANAm abhayaM dAtum arhasi
1074007a bhArgavANAM kule jAtaH svAdhyAyavratazAlinAm
1074007c sahasrAkSe pratijJAya zastraM nikSiptavAn asi
1074008a sa tvaM dharmaparo bhUtvA kAzyapAya vasuMdharAm
1074008c dattvA vanam upAgamya mahendrakRtaketanaH
1074009a mama sarvavinAzAya saMprAptas tvaM mahAmune
1074009c na caikasmin hate rAme sarve jIvAmahe vayam
1074010a bruvaty evaM dazarathe jAmadagnyaH pratApavAn
1074010c anAdRtyaiva tad vAkyaM rAmam evAbhyabhASata
1074011a ime dve dhanuSI zreSThe divye lokAbhivizrute
1074011c dRDhe balavatI mukhye sukRte vizvakarmaNA
1074012a atisRSTaM surair ekaM tryambakAya yuyutsave
1074012c tripuraghnaM narazreSTha bhagnaM kAkutstha yat tvayA
1074013a idaM dvitIyaM durdharSaM viSNor dattaM surottamaiH
1074013c samAnasAraM kAkutstha raudreNa dhanuSA tv idam
1074014a tadA tu devatAH sarvAH pRcchanti sma pitAmaham
1074014c zitikaNThasya viSNoz ca balAbalanirIkSayA
1074015a abhiprAyaM tu vijJAya devatAnAM pitAmahaH
1074015c virodhaM janayAm Asa tayoH satyavatAM varaH
1074016a virodhe ca mahad yuddham abhavad romaharSaNam
1074016c zitikaNThasya viSNoz ca parasparajayaiSiNoH
1074017a tadA taj jRmbhitaM zaivaM dhanur bhImaparAkramam
1074017c huMkAreNa mahAdevaH stambhito 'tha trilocanaH
1074018a devais tadA samAgamya sarSisaMghaiH sacAraNaiH
1074018c yAcitau prazamaM tatra jagmatus tau surottamau
1074019a jRmbhitaM tad dhanur dRSTvA zaivaM viSNuparAkramaiH
1074019c adhikaM menire viSNuM devAH sarSigaNAs tadA
1074020a dhanU rudras tu saMkruddho videheSu mahAyazAH
1074020c devarAtasya rAjarSer dadau haste sasAyakam
1074021a idaM ca viSNavaM rAma dhanuH parapuraMjayam
1074021c RcIke bhArgave prAdAd viSNuH sa nyAsam uttamam
1074022a RcIkas tu mahAtejAH putrasyApratikarmaNaH
1074022c pitur mama dadau divyaM jamadagner mahAtmanaH
1074023a nyastazastre pitari me tapobalasamanvite
1074023c arjuno vidadhe mRtyuM prAkRtAM buddhim AsthitaH
1074024a vadham apratirUpaM tu pituH zrutvA sudAruNam
1074024c kSatram utsAdayaM roSAj jAtaM jAtam anekazaH
1074025a pRthivIM cAkhilAM prApya kAzyapAya mahAtmane
1074025c yajJasyAnte tadA rAma dakSiNAM puNyakarmaNe
1074026a dattvA mahendranilayas tapobalasamanvitaH
1074026c zrutavAn dhanuSo bhedaM tato 'haM drutam AgataH
1074027a tad idaM vaiSNavaM rAma pitRpaitAmahaM mahat
1074027c kSatradharmaM puraskRtya gRhNISva dhanuruttamam
1074028a yojayasva dhanuH zreSThe zaraM parapuraMjayam
1074028c yadi zaknoSi kAkutstha dvandvaM dAsyAmi te tataH
1075001a zrutvA taj jAmadagnyasya vAkyaM dAzarathis tadA
1075001c gauravAd yantritakathaH pitU rAmam athAbravIt
1075002a zrutavAn asmi yat karma kRtavAn asi bhArgava
1075002c anurundhyAmahe brahman pitur AnRNyam AsthitaH
1075003a vIryahInam ivAzaktaM kSatradharmeNa bhArgava
1075003c avajAnAmi me tejaH pazya me 'dya parAkramam
1075004a ity uktvA rAghavaH kruddho bhArgavasya varAyudham
1075004c zaraM ca pratisaMgRhya hastAl laghuparAkramaH
1075005a Aropya sa dhanU rAmaH zaraM sajyaM cakAra ha
1075005c jAmadagnyaM tato rAmaM rAmaH kruddho 'bravId vacaH
1075006a brAhmaNo 'sIti pUjyo me vizvAmitrakRtena ca
1075006c tasmAc chakto na te rAma moktuM prANaharaM zaram
1075007a imAM vA tvadgatiM rAma tapobalasamArjitAn
1075007c lokAn apratimAn vApi haniSyAmi yad icchasi
1075008a na hy ayaM vaiSNavo divyaH zaraH parapuraMjayaH
1075008c moghaH patati vIryeNa baladarpavinAzanaH
1075009a varAyudhadharaM rAma draSTuM sarSigaNAH surAH
1075009c pitAmahaM puraskRtya sametAs tatra saMghazaH
1075010a gandharvApsarasaz caiva siddhacAraNakiMnarAH
1075010c yakSarAkSasanAgAz ca tad draSTuM mahad adbhutam
1075011a jaDIkRte tadA loke rAme varadhanurdhare
1075011c nirvIryo jAmadagnyo 'sau ramo rAmam udaikSata
1075012a tejobhir hatavIryatvAj jAmadagnyo jaDIkRtaH
1075012c rAmaM kamala patrAkSaM mandaM mandam uvAca ha
1075013a kAzyapAya mayA dattA yadA pUrvaM vasuMdharA
1075013c viSaye me na vastavyam iti mAM kAzyapo 'bravIt
1075014a so 'haM guruvacaH kurvan pRthivyAM na vase nizAm
1075014c iti pratijJA kAkutstha kRtA vai kAzyapasya ha
1075015a tad imAM tvaM gatiM vIra hantuM nArhasi rAghava
1075015c manojavaM gamiSyAmi mahendraM parvatottamam
1075016a lokAs tv apratimA rAma nirjitAs tapasA mayA
1075016c jahi tAJ zaramukhyena mA bhUt kAlasya paryayaH
1075017a akSayyaM madhuhantAraM jAnAmi tvAM surezvaram
1075017c dhanuSo 'sya parAmarzAt svasti te 'stu paraMtapa
1075018a ete suragaNAH sarve nirIkSante samAgatAH
1075018c tvAm apratimakarmANam apratidvandvam Ahave
1075019a na ceyaM mama kAkutstha vrIDA bhavitum arhati
1075019c tvayA trailokyanAthena yad ahaM vimukhIkRtaH
1075020a zaram apratimaM rAma moktum arhasi suvrata
1075020c zaramokSe gamiSyAmi mahendraM parvatottamam
1075021a tathA bruvati rAme tu jAmadagnye pratApavAn
1075021c rAmo dAzarathiH zrImAMz cikSepa zaram uttamam
1075022a tato vitimirAH sarvA dizA copadizas tathA
1075022c surAH sarSigaNA rAmaM prazazaMsur udAyudham
1075023a rAmaM dAzarathiM rAmo jAmadagnyaH prazasya ca
1075023c tataH pradakSiNIkRtya jagAmAtmagatiM prabhuH
1076001a gate rAme prazAntAtmA rAmo dAzarathir dhanuH
1076001c varuNAyAprameyAya dadau haste sasAyakam
1076002a abhivAdya tato rAmo vasiSTha pramukhAn RSIn
1076002c pitaraM vihvalaM dRSTvA provAca raghunandanaH
1076003a jAmadagnyo gato rAmaH prayAtu caturaGgiNI
1076003c ayodhyAbhimukhI senA tvayA nAthena pAlitA
1076004a rAmasya vacanaM zrutvA rAjA dazarathaH sutam
1076004c bAhubhyAM saMpariSvajya mUrdhni cAghrAya rAghavam
1076005a gato rAma iti zrutvA hRSTaH pramudito nRpaH
1076005c codayAm Asa tAM senAM jagAmAzu tataH purIm
1076006a patAkAdhvajinIM ramyAM tUryodghuSTaninAditAm
1076006c siktarAjapathAM ramyAM prakIrNakusumotkarAm
1076007a rAjapravezasumukhaiH paurair maGgalavAdibhiH
1076007c saMpUrNAM prAvizad rAjA janaughaiH samalaMkRtAm
1076008a kausalyA ca sumitrA ca kaikeyI ca sumadhyamA
1076008c vadhUpratigrahe yuktA yAz cAnyA rAjayoSitaH
1076009a tataH sItAM mahAbhAgAm UrmilAM ca yazasvinIm
1076009c kuzadhvajasute cobhe jagRhur nRpapatnayaH
1076010a maGgalAlApanaiz caiva zobhitAH kSaumavAsasaH
1076010c devatAyatanAny Azu sarvAs tAH pratyapUjayan
1076011a abhivAdyAbhivAdyAMz ca sarvA rAjasutAs tadA
1076011c remire muditAH sarvA bhartRbhiH sahitA rahaH
1076012a kRtadArAH kRtAstrAz ca sadhanAH sasuhRjjanAH
1076012c zuzrUSamANAH pitaraM vartayanti nararSabhAH
1076013a teSAm atiyazA loke rAmaH satyaparAkramaH
1076013c svayambhUr iva bhUtAnAM babhUva guNavattaraH
1076014a rAmas tu sItayA sArdhaM vijahAra bahUn RtUn
1076014c manasvI tadgatas tasyA nityaM hRdi samarpitaH
1076015a priyA tu sItA rAmasya dArAH pitRkRtA iti
1076015c guNAd rUpaguNAc cApi prItir bhUyo vyavardhata
1076016a tasyAz ca bhartA dviguNaM hRdaye parivartate
1076016c antarjAtam api vyaktam AkhyAti hRdayaM hRdA
1076017a tasya bhUyo vizeSeNa maithilI janakAtmajA
1076017c devatAbhiH samA rUpe sItA zrIr iva rUpiNI
1076018a tayA sa rAjarSisuto 'bhirAmayA; sameyivAn uttamarAjakanyayA
1076018c atIva rAmaH zuzubhe 'tikAmayA; vibhuH zriyA viSNur ivAmarezvaraH