% Mahabharata: Salyaparvan
% Last updated: Tue Jun 23 2020
% Encoding: ASCII
% Electronic text (C) Bhandarkar Oriental Research Institute,
% Pune, India, 1999
%
09001001  janamejaya uvAca
09001001a evaM nipAtite karNe samare savyasAcinA
09001001c alpAvaziSTAH kuravaH kim akurvata vai dvija
09001002a udIryamANaM ca balaM dRSTvA rAjA suyodhanaH
09001002c pANDavaiH prAptakAlaM ca kiM prApadyata kauravaH
09001003a etad icchAmy ahaM zrotuM tad AcakSva dvijottama
09001003c na hi tRpyAmi pUrveSAM zRNvAnaz caritaM mahat
09001004  vaizaMpAyana uvAca
09001004a tataH karNe hate rAjan dhArtarASTraH suyodhanaH
09001004c bhRzaM zokArNave magno nirAzaH sarvato 'bhavat
09001005a hA karNa hA karNa iti zocamAnaH punaH punaH
09001005c kRcchrAt svazibiraM prAyAd dhatazeSair nRpaiH saha
09001006a sa samAzvAsyamAno 'pi hetubhiH zAstranizcitaiH
09001006c rAjabhir nAlabhac charma sUtaputravadhaM smaran
09001007a sa daivaM balavan matvA bhavitavyaM ca pArthivaH
09001007c saMgrAme nizcayaM kRtvA punar yuddhAya niryayau
09001008a zalyaM senApatiM kRtvA vidhivad rAjapuMgavaH
09001008c raNAya niryayau rAjA hatazeSair nRpaiH saha
09001009a tataH sutumulaM yuddhaM kurupANDavasenayoH
09001009c babhUva bharatazreSTha devAsuraraNopamam
09001010a tataH zalyo mahArAja kRtvA kadanam Ahave
09001010c pANDusainyasya madhyAhne dharmarAjena pAtitaH
09001011a tato duryodhano rAjA hatabandhU raNAjirAt
09001011c apasRtya hradaM ghoraM viveza ripujAd bhayAt
09001012a athAparAhNe tasyAhnaH parivArya mahArathaiH
09001012c hradAd AhUya yogena bhImasenena pAtitaH
09001013a tasmin hate maheSvAse hataziSTAs trayo rathAH
09001013c saMrabhAn nizi rAjendra jaghnuH pAJcAlasainikAn
09001014a tataH pUrvAhNasamaye zibirAd etya saMjayaH
09001014c praviveza purIM dIno duHkhazokasamanvitaH
09001015a pravizya ca puraM tUrNaM bhujAv ucchritya duHkhitaH
09001015c vepamAnas tato rAjJaH praviveza nivezanam
09001016a ruroda ca naravyAghra hA rAjann iti duHkhitaH
09001016c aho bata vivignAH sma nidhanena mahAtmanaH
09001017a aho subalavAn kAlo gatiz ca paramA tathA
09001017c zakratulyabalAH sarve yatrAvadhyanta pArthivAH
09001018a dRSTvaiva ca puro rAjaJ janaH sarvaH sa saMjayam
09001018c praruroda bhRzodvigno hA rAjann iti sasvaram
09001019a AkumAraM naravyAghra tat puraM vai samantataH
09001019c ArtanAdaM mahac cakre zrutvA vinihataM nRpam
09001020a dhAvataz cApy apazyac ca tatra trIn puruSarSabhAn
09001020c naSTacittAn ivonmattAJ zokena bhRzapIDitAn
09001021a tathA sa vihvalaH sUtaH pravizya nRpatikSayam
09001021c dadarza nRpatizreSThaM prajJAcakSuSam Izvaram
09001022a dRSTvA cAsInam anaghaM samantAt parivAritam
09001022c snuSAbhir bharatazreSTha gAndhAryA vidureNa ca
09001023a tathAnyaiz ca suhRdbhiz ca jJAtibhiz ca hitaiSibhiH
09001023c tam eva cArthaM dhyAyantaM karNasya nidhanaM prati
09001024a rudann evAbravId vAkyaM rAjAnaM janamejaya
09001024c nAtihRSTamanAH sUto bASpasaMdigdhayA girA
09001025a saMjayo 'haM naravyAghra namas te bharatarSabha
09001025c madrAdhipo hataH zalyaH zakuniH saubalas tathA
09001025e ulUkaH puruSavyAghra kaitavyo dRDhavikramaH
09001026a saMzaptakA hatAH sarve kAmbojAz ca zakaiH saha
09001026c mlecchAz ca pArvatIyAz ca yavanAz ca nipAtitAH
09001027a prAcyA hatA mahArAja dAkSiNAtyAz ca sarvazaH
09001027c udIcyA nihatAH sarve pratIcyAz ca narAdhipa
09001027e rAjAno rAjaputrAz ca sarvato nihatA nRpa
09001028a duryodhano hato rAjan yathoktaM pANDavena ca
09001028c bhagnasaktho mahArAja zete pAMsuSu rUSitaH
09001029a dhRSTadyumno hato rAjaJ zikhaNDI cAparAjitaH
09001029c uttamaujA yudhAmanyus tathA rAjan prabhadrakAH
09001030a pAJcAlAz ca naravyAghrAz cedayaz ca niSUditAH
09001030c tava putrA hatAH sarve draupadeyAz ca bhArata
09001030e karNaputro hataH zUro vRSaseno mahAbalaH
09001031a narA vinihatAH sarve gajAz ca vinipAtitAH
09001031c rathinaz ca naravyAghra hayAz ca nihatA yudhi
09001032a kiMciccheSaM ca zibiraM tAvakAnAM kRtaM vibho
09001032c pANDavAnAM ca zUrANAM samAsAdya parasparam
09001033a prAyaH strIzeSam abhavaj jagat kAlena mohitam
09001033c sapta pANDavataH zeSA dhArtarASTrAs tathA trayaH
09001034a te caiva bhrAtaraH paJca vAsudevo 'tha sAtyakiH
09001034c kRpaz ca kRtavarmA ca drauNiz ca jayatAM varaH
09001035a tavApy ete mahArAja rathino nRpasattama
09001035c akSauhiNInAM sarvAsAM sametAnAM janezvara
09001035e ete zeSA mahArAja sarve 'nye nidhanaM gatAH
09001036a kAlena nihataM sarvaM jagad vai bharatarSabha
09001036c duryodhanaM vai purataH kRtvA vairasya bhArata
09001037a etac chrutvA vacaH krUraM dhRtarASTro janezvaraH
09001037c nipapAta mahArAja gatasattvo mahItale
09001038a tasmin nipatite bhUmau viduro 'pi mahAyazAH
09001038c nipapAta mahArAja rAjavyasanakarzitaH
09001039a gAndhArI ca nRpazreSTha sarvAz ca kuruyoSitaH
09001039c patitAH sahasA bhUmau zrutvA krUraM vacaz ca tAH
09001040a niHsaMjJaM patitaM bhUmau tadAsId rAjamaNDalam
09001040c pralApayuktA mahatI kathA nyastA paTe yathA
09001041a kRcchreNa tu tato rAjA dhRtarASTro mahIpatiH
09001041c zanair alabhata prANAn putravyasanakarzitaH
09001042a labdhvA tu sa nRpaH saMjJAM vepamAnaH suduHkhitaH
09001042c udIkSya ca dizaH sarvAH kSattAraM vAkyam abravIt
09001043a vidvan kSattar mahAprAjJa tvaM gatir bharatarSabha
09001043c mamAnAthasya subhRzaM putrair hInasya sarvazaH
09001043e evam uktvA tato bhUyo visaMjJo nipapAta ha
09001044a taM tathA patitaM dRSTvA bAndhavA ye 'sya ke cana
09001044c zItais tu siSicus toyair vivyajur vyajanair api
09001045a sa tu dIrgheNa kAlena pratyAzvasto mahIpatiH
09001045c tUSNIM dadhyau mahIpAlaH putravyasanakarzitaH
09001045e niHzvasaJ jihmaga iva kumbhakSipto vizAM pate
09001046a saMjayo 'py arudat tatra dRSTvA rAjAnam Aturam
09001046c tathA sarvAH striyaz caiva gAndhArI ca yazasvinI
09001047a tato dIrgheNa kAlena viduraM vAkyam abravIt
09001047c dhRtarASTro naravyAghro muhyamAno muhur muhuH
09001048a gacchantu yoSitaH sarvA gAndhArI ca yazasvinI
09001048c tatheme suhRdaH sarve bhrazyate me mano bhRzam
09001049a evam uktas tataH kSattA tAH striyo bharatarSabha
09001049c visarjayAm Asa zanair vepamAnaH punaH punaH
09001050a nizcakramus tataH sarvAs tAH striyo bharatarSabha
09001050c suhRdaz ca tataH sarve dRSTvA rAjAnam Aturam
09001051a tato narapatiM tatra labdhasaMjJaM paraMtapa
09001051c avekSya saMjayo dIno rodamAnaM bhRzAturam
09001052a prAJjalir niHzvasantaM ca taM narendraM muhur muhuH
09001052c samAzvAsayata kSattA vacasA madhureNa ca
09002001  vaizaMpAyana uvAca
09002001a visRSTAsv atha nArISu dhRtarASTro 'mbikAsutaH
09002001c vilalApa mahArAja duHkhAd duHkhataraM gataH
09002002a sadhUmam iva niHzvasya karau dhunvan punaH punaH
09002002c vicintya ca mahArAja tato vacanam abravIt
09002003a aho bata mahad duHkhaM yad ahaM pANDavAn raNe
09002003c kSemiNaz cAvyayAMz caiva tvattaH sUta zRNomi vai
09002004a vajrasAramayaM nUnaM hRdayaM sudRDhaM mama
09002004c yac chrutvA nihatAn putrAn dIryate na sahasradhA
09002005a cintayitvA vacas teSAM bAlakrIDAM ca saMjaya
09002005c adya zrutvA hatAn putrAn bhRzaM me dIryate manaH
09002006a andhatvAd yadi teSAM tu na me rUpanidarzanam
09002006c putrasnehakRtA prItir nityam eteSu dhAritA
09002007a bAlabhAvam atikrAntAn yauvanasthAMz ca tAn aham
09002007c madhyaprAptAMs tathA zrutvA hRSTa AsaM tathAnagha
09002008a tAn adya nihatAJ zrutvA hRtaizvaryAn hRtaujasaH
09002008c na labhe vai kva cic chAntiM putrAdhibhir abhiplutaH
09002009a ehy ehi putra rAjendra mamAnAthasya sAMpratam
09002009c tvayA hIno mahAbAho kAM nu yAsyAmy ahaM gatim
09002010a gatir bhUtvA mahArAja jJAtInAM suhRdAM tathA
09002010c andhaM vRddhaM ca mAM vIra vihAya kva nu gacchasi
09002011a sA kRpA sA ca te prItiH sA ca rAjan sumAnitA
09002011c kathaM vinihataH pArthaiH saMyugeSv aparAjitaH
09002012a kathaM tvaM pRthivIpAlAn bhuktvA tAta samAgatAn
09002012c zeSe vinihato bhUmau prAkRtaH kunRpo yathA
09002013a ko nu mAm utthitaM kAlye tAta tAteti vakSyati
09002013c mahArAjeti satataM lokanAtheti cAsakRt
09002014a pariSvajya ca mAM kaNThe snehenAklinnalocanaH
09002014c anuzAdhIti kauravya tat sAdhu vada me vacaH
09002015a nanu nAmAham azrauSaM vacanaM tava putraka
09002015c bhUyasI mama pRthvIyaM yathA pArthasya no tathA
09002016a bhagadattaH kRpaH zalya Avantyo 'tha jayadrathaH
09002016c bhUrizravAH somadatto mahArAjo 'tha bAhlikaH
09002017a azvatthAmA ca bhojaz ca mAgadhaz ca mahAbalaH
09002017c bRhadbalaz ca kAzIzaH zakuniz cApi saubalaH
09002018a mlecchAz ca bahusAhasrAH zakAz ca yavanaiH saha
09002018c sudakSiNaz ca kAmbojas trigartAdhipatis tathA
09002019a bhISmaH pitAmahaz caiva bhAradvAjo 'tha gautamaH
09002019c zrutAyuz cAcyutAyuz ca zatAyuz cApi vIryavAn
09002020a jalasaMdho 'thArzyazRGgI rAkSasaz cApy alAyudhaH
09002020c alaMbuso mahAbAhuH subAhuz ca mahArathaH
09002021a ete cAnye ca bahavo rAjAno rAjasattama
09002021c madartham udyatAH sarve prANAMs tyaktvA raNe prabho
09002022a yeSAM madhye sthito yuddhe bhrAtRbhiH parivAritaH
09002022c yodhayiSyAmy ahaM pArthAn pAJcAlAMz caiva sarvazaH
09002023a cedIMz ca nRpazArdUla draupadeyAMz ca saMyuge
09002023c sAtyakiM kuntibhojaM ca rAkSasaM ca ghaTotkacam
09002024a eko 'py eSAM mahArAja samarthaH saMnivAraNe
09002024c samare pANDaveyAnAM saMkruddho hy abhidhAvatAm
09002024e kiM punaH sahitA vIrAH kRtavairAz ca pANDavaiH
09002025a atha vA sarva evaite pANDavasyAnuyAyibhiH
09002025c yotsyanti saha rAjendra haniSyanti ca tAn mRdhe
09002026a karNas tv eko mayA sArdhaM nihaniSyati pANDavAn
09002026c tato nRpatayo vIrAH sthAsyanti mama zAsane
09002027a yaz ca teSAM praNetA vai vAsudevo mahAbalaH
09002027c na sa saMnahyate rAjann iti mAm abravId vacaH
09002028a tasyAhaM vadataH sUta bahuzo mama saMnidhau
09002028c yuktito hy anupazyAmi nihatAn pANDavAn mRdhe
09002029a teSAM madhye sthitA yatra hanyante mama putrakAH
09002029c vyAyacchamAnAH samare kim anyad bhAgadheyataH
09002030a bhISmaz ca nihato yatra lokanAthaH pratApavAn
09002030c zikhaNDinaM samAsAdya mRgendra iva jambukam
09002031a droNaz ca brAhmaNo yatra sarvazastrAstrapAragaH
09002031c nihataH pANDavaiH saMkhye kim anyad bhAgadheyataH
09002032a bhUrizravA hato yatra somadattaz ca saMyuge
09002032c bAhlIkaz ca mahArAja kim anyad bhAgadheyataH
09002033a sudakSiNo hato yatra jalasaMdhaz ca kauravaH
09002033c zrutAyuz cAcyutAyuz ca kim anyad bhAgadheyataH
09002034a bRhadbalo hato yatra mAgadhaz ca mahAbalaH
09002034c Avantyo nihato yatra trigartaz ca janAdhipaH
09002034e saMzaptakAz ca bahavaH kim anyad bhAgadheyataH
09002035a alaMbusas tathA rAjan rAkSasaz cApy alAyudhaH
09002035c ArzyazRGgaz ca nihataH kim anyad bhAgadheyataH
09002036a nArAyaNA hatA yatra gopAlA yuddhadurmadAH
09002036c mlecchAz ca bahusAhasrAH kim anyad bhAgadheyataH
09002037a zakuniH saubalo yatra kaitavyaz ca mahAbalaH
09002037c nihataH sabalo vIraH kim anyad bhAgadheyataH
09002038a rAjAno rAjaputrAz ca zUrAH parighabAhavaH
09002038c nihatA bahavo yatra kim anyad bhAgadheyataH
09002039a nAnAdezasamAvRttAH kSatriyA yatra saMjaya
09002039c nihatAH samare sarve kim anyad bhAgadheyataH
09002040a putrAz ca me vinihatAH pautrAz caiva mahAbalAH
09002040c vayasyA bhrAtaraz caiva kim anyad bhAgadheyataH
09002041a bhAgadheyasamAyukto dhruvam utpadyate naraH
09002041c yaz ca bhAgyasamAyuktaH sa zubhaM prApnuyAn naraH
09002042a ahaM viyuktaH svair bhAgyaiH putraiz caiveha saMjaya
09002042c katham adya bhaviSyAmi vRddhaH zatruvazaM gataH
09002043a nAnyad atra paraM manye vanavAsAd Rte prabho
09002043c so 'haM vanaM gamiSyAmi nirbandhur jJAtisaMkSaye
09002044a na hi me 'nyad bhavec chreyo vanAbhyupagamAd Rte
09002044c imAm avasthAM prAptasya lUnapakSasya saMjaya
09002045a duryodhano hato yatra zalyaz ca nihato yudhi
09002045c duHzAsano vizastaz ca vikarNaz ca mahAbalaH
09002046a kathaM hi bhImasenasya zroSye 'haM zabdam uttamam
09002046c ekena samare yena hataM putrazataM mama
09002047a asakRd vadatas tasya duryodhanavadhena ca
09002047c duHkhazokAbhisaMtapto na zroSye paruSA giraH
09002048a evaM sa zokasaMtaptaH pArthivo hatabAndhavaH
09002048c muhur muhur muhyamAnaH putrAdhibhir abhiplutaH
09002049a vilapya suciraM kAlaM dhRtarASTro 'mbikAsutaH
09002049c dIrgham uSNaM ca niHzvasya cintayitvA parAbhavam
09002050a duHkhena mahatA rAjA saMtapto bharatarSabha
09002050c punar gAvalgaNiM sUtaM paryapRcchad yathAtatham
09002051a bhISmadroNau hatau zrutvA sUtaputraM ca pAtitam
09002051c senApatiM praNetAraM kim akurvata mAmakAH
09002052a yaM yaM senApraNetAraM yudhi kurvanti mAmakAH
09002052c acireNaiva kAlena taM taM nighnanti pANDavAH
09002053a raNamUrdhni hato bhISmaH pazyatAM vaH kirITinA
09002053c evam eva hato droNaH sarveSAm eva pazyatAm
09002054a evam eva hataH karNaH sUtaputraH pratApavAn
09002054c sa rAjakAnAM sarveSAM pazyatAM vaH kirITinA
09002055a pUrvam evAham ukto vai vidureNa mahAtmanA
09002055c duryodhanAparAdhena prajeyaM vinaziSyati
09002056a ke cin na samyak pazyanti mUDhAH samyak tathApare
09002056c tad idaM mama mUDhasya tathAbhUtaM vacaH sma ha
09002057a yad abravIn me dharmAtmA viduro dIrghadarzivAn
09002057c tat tathA samanuprAptaM vacanaM satyavAdinaH
09002058a daivopahatacittena yan mayApakRtaM purA
09002058c anayasya phalaM tasya brUhi gAvalgaNe punaH
09002059a ko vA mukham anIkAnAm AsIt karNe nipAtite
09002059c arjunaM vAsudevaM ca ko vA pratyudyayau rathI
09002060a ke 'rakSan dakSiNaM cakraM madrarAjasya saMyuge
09002060c vAmaM ca yoddhukAmasya ke vA vIrasya pRSThataH
09002061a kathaM ca vaH sametAnAM madrarAjo mahAbalaH
09002061c nihataH pANDavaiH saMkhye putro vA mama saMjaya
09002062a brUhi sarvaM yathAtattvaM bharatAnAM mahAkSayam
09002062c yathA ca nihataH saMkhye putro duryodhano mama
09002063a pAJcAlAz ca yathA sarve nihatAH sapadAnugAH
09002063c dhRSTadyumnaH zikhaNDI ca draupadyAH paJca cAtmajAH
09002064a pANDavAz ca yathA muktAs tathobhau sAtvatau yudhi
09002064c kRpaz ca kRtavarmA ca bhAradvAjasya cAtmajaH
09002065a yad yathA yAdRzaM caiva yuddhaM vRttaM ca sAMpratam
09002065c akhilaM zrotum icchAmi kuzalo hy asi saMjaya
09003001  saMjaya uvAca
09003001a zRNu rAjann avahito yathA vRtto mahAn kSayaH
09003001c kurUNAM pANDavAnAM ca samAsAdya parasparam
09003002a nihate sUtaputre tu pANDavena mahAtmanA
09003002c vidruteSu ca sainyeSu samAnIteSu cAsakRt
09003003a vimukhe tava putre tu zokopahatacetasi
09003003c bhRzodvigneSu sainyeSu dRSTvA pArthasya vikramam
09003004a dhyAyamAneSu sainyeSu duHkhaM prApteSu bhArata
09003004c balAnAM mathyamAnAnAM zrutvA ninadam uttamam
09003005a abhijJAnaM narendrANAM vikRtaM prekSya saMyuge
09003005c patitAn rathanIDAMz ca rathAMz cApi mahAtmanAm
09003006a raNe vinihatAn nAgAn dRSTvA pattIMz ca mAriSa
09003006c AyodhanaM cAtighoraM rudrasyAkrIDasaMnibham
09003007a aprakhyAtiM gatAnAM tu rAjJAM zatasahasrazaH
09003007c kRpAviSTaH kRpo rAjan vayaHzIlasamanvitaH
09003008a abravIt tatra tejasvI so 'bhisRtya janAdhipam
09003008c duryodhanaM manyuvazAd vacanaM vacanakSamaH
09003009a duryodhana nibodhedaM yat tvA vakSyAmi kaurava
09003009c zrutvA kuru mahArAja yadi te rocate 'nagha
09003010a na yuddhadharmAc chreyAn vai panthA rAjendra vidyate
09003010c yaM samAzritya yudhyante kSatriyAH kSatriyarSabha
09003011a putro bhrAtA pitA caiva svasreyo mAtulas tathA
09003011c saMbandhibAndhavAz caiva yodhyA vai kSatrajIvinA
09003012a vadhe caiva paro dharmas tathAdharmaH palAyane
09003012c te sma ghorAM samApannA jIvikAM jIvitArthinaH
09003013a tatra tvAM prativakSyAmi kiM cid eva hitaM vacaH
09003013c hate bhISme ca droNe ca karNe caiva mahArathe
09003014a jayadrathe ca nihate tava bhrAtRSu cAnagha
09003014c lakSmaNe tava putre ca kiM zeSaM paryupAsmahe
09003015a yeSu bhAraM samAsajya rAjye matim akurmahi
09003015c te saMtyajya tanUr yAtAH zUrA brahmavidAM gatim
09003016a vayaM tv iha vinAbhUtA guNavadbhir mahArathaiH
09003016c kRpaNaM vartayiSyAma pAtayitvA nRpAn bahUn
09003017a sarvair api ca jIvadbhir bIbhatsur aparAjitaH
09003017c kRSNanetro mahAbAhur devair api durAsadaH
09003018a indrakArmukavajrAbham indraketum ivocchritam
09003018c vAnaraM ketum AsAdya saMcacAla mahAcamUH
09003019a siMhanAdena bhImasya pAJcajanyasvanena ca
09003019c gANDIvasya ca nirghoSAt saMhRSyanti manAMsi naH
09003020a carantIva mahAvidyun muSNantI nayanaprabhAm
09003020c alAtam iva cAviddhaM gANDIvaM samadRzyata
09003021a jAmbUnadavicitraM ca dhUyamAnaM mahad dhanuH
09003021c dRzyate dikSu sarvAsu vidyud abhraghaneSv iva
09003022a uhyamAnaz ca kRSNena vAyuneva balAhakaH
09003022c tAvakaM tad balaM rAjann arjuno 'stravidAM varaH
09003022e gahanaM zizire kakSaM dadAhAgnir ivotthitaH
09003023a gAhamAnam anIkAni mahendrasadRzaprabham
09003023c dhanaMjayam apazyAma caturdantam iva dvipam
09003024a vikSobhayantaM senAM te trAsayantaM ca pArthivAn
09003024c dhanaMjayam apazyAma nalinIm iva kuJjaram
09003025a trAsayantaM tathA yodhAn dhanur ghoSeNa pANDavam
09003025c bhUya enam apazyAma siMhaM mRgagaNA iva
09003026a sarvalokamaheSvAsau vRSabhau sarvadhanvinAm
09003026c Amuktakavacau kRSNau lokamadhye virejatuH
09003027a adya saptadazAhAni vartamAnasya bhArata
09003027c saMgrAmasyAtighorasya vadhyatAM cAbhito yudhi
09003028a vAyuneva vidhUtAni tavAnIkAni sarvazaH
09003028c zaradambhodajAlAni vyazIryanta samantataH
09003029a tAM nAvam iva paryastAM bhrAntavAtAM mahArNave
09003029c tava senAM mahArAja savyasAcI vyakampayat
09003030a kva nu te sUtaputro 'bhUt kva nu droNaH sahAnugaH
09003030c ahaM kva ca kva cAtmA te hArdikyaz ca tathA kva nu
09003030e duHzAsanaz ca bhrAtA te bhrAtRbhiH sahitaH kva nu
09003031a bANagocarasaMprAptaM prekSya caiva jayadratham
09003031c saMbandhinas te bhrAtqMz ca sahAyAn mAtulAMs tathA
09003032a sarvAn vikramya miSato lokAMz cAkramya mUrdhani
09003032c jayadratho hato rAjan kiM nu zeSam upAsmahe
09003033a ko veha sa pumAn asti yo vijeSyati pANDavam
09003033c tasya cAstrANi divyAni vividhAni mahAtmanaH
09003033e gANDIvasya ca nirghoSo vIryANi harate hi naH
09003034a naSTacandrA yathA rAtriH seneyaM hatanAyakA
09003034c nAgabhagnadrumA zuSkA nadIvAkulatAM gatA
09003035a dhvajinyAM hatanetrAyAM yatheSTaM zvetavAhanaH
09003035c cariSyati mahAbAhuH kakSe 'gnir iva saMjvalan
09003036a sAtyakez caiva yo vego bhImasenasya cobhayoH
09003036c dArayeta girIn sarvAJ zoSayeta ca sAgarAn
09003037a uvAca vAkyaM yad bhImaH sabhAmadhye vizAM pate
09003037c kRtaM tat sakalaM tena bhUyaz caiva kariSyati
09003038a pramukhasthe tadA karNe balaM pANDavarakSitam
09003038c durAsadaM tathA guptaM gUDhaM gANDIvadhanvanA
09003039a yuSmAbhis tAni cIrNAni yAny asAdhUni sAdhuSu
09003039c akAraNakRtAny eva teSAM vaH phalam Agatam
09003040a Atmano 'rthe tvayA loko yatnataH sarva AhRtaH
09003040c sa te saMzayitas tAta AtmA ca bharatarSabha
09003041a rakSa duryodhanAtmAnam AtmA sarvasya bhAjanam
09003041c bhinne hi bhAjane tAta dizo gacchati tadgatam
09003042a hIyamAnena vai saMdhiH paryeSTavyaH samena ca
09003042c vigraho vardhamAnena nItir eSA bRhaspateH
09003043a te vayaM pANDuputrebhyo hInAH svabalazaktitaH
09003043c atra te pANDavaiH sArdhaM saMdhiM manye kSamaM prabho
09003044a na jAnIte hi yaH zreyaH zreyasaz cAvamanyate
09003044c sa kSipraM bhrazyate rAjyAn na ca zreyo 'nuvindati
09003045a praNipatya hi rAjAnaM rAjyaM yadi labhemahi
09003045c zreyaH syAn na tu mauDhyena rAjan gantuM parAbhavam
09003046a vaicitravIryavacanAt kRpAzIlo yudhiSThiraH
09003046c viniyuJjIta rAjye tvAM govindavacanena ca
09003047a yad brUyAd dhi hRSIkezo rAjAnam aparAjitam
09003047c arjunaM bhImasenaM ca sarvaM kuryur asaMzayam
09003048a nAtikramiSyate kRSNo vacanaM kauravasya ha
09003048c dhRtarASTrasya manye 'haM nApi kRSNasya pANDavaH
09003049a etat kSamam ahaM manye tava pArthair avigraham
09003049c na tvA bravImi kArpaNyAn na prANaparirakSaNAt
09003049e pathyaM rAjan bravImi tvAM tat parAsuH smariSyasi
09003050a iti vRddho vilapyaitat kRpaH zAradvato vacaH
09003050c dIrgham uSNaM ca niHzvasya zuzoca ca mumoha ca
09004001  saMjaya uvAca
09004001a evam uktas tato rAjA gautamena yazasvinA
09004001c niHzvasya dIrgham uSNaM ca tUSNIm AsId vizAM pate
09004002a tato muhUrtaM sa dhyAtvA dhArtarASTro mahAmanAH
09004002c kRpaM zAradvataM vAkyam ity uvAca paraMtapaH
09004003a yat kiM cit suhRdA vAcyaM tat sarvaM zrAvito hy aham
09004003c kRtaM ca bhavatA sarvaM prANAn saMtyajya yudhyatA
09004004a gAhamAnam anIkAni yudhyamAnaM mahArathaiH
09004004c pANDavair atitejobhir lokas tvAm anudRSTavAn
09004005a suhRdA yad idaM vAcyaM bhavatA zrAvito hy aham
09004005c na mAM prINAti tat sarvaM mumUrSor iva bheSajam
09004006a hetukAraNasaMyuktaM hitaM vacanam uttamam
09004006c ucyamAnaM mahAbAho na me viprAgrya rocate
09004007a rAjyAd vinikRto 'smAbhiH kathaM so 'smAsu vizvaset
09004007c akSadyUte ca nRpatir jito 'smAbhir mahAdhanaH
09004007e sa kathaM mama vAkyAni zraddadhyAd bhUya eva tu
09004008a tathA dautyena saMprAptaH kRSNaH pArthahite rataH
09004008c pralabdhaz ca hRSIkezas tac ca karma virodhitam
09004008e sa ca me vacanaM brahman katham evAbhimaMsyate
09004009a vilalApa hi yat kRSNA sabhAmadhye sameyuSI
09004009c na tan marSayate kRSNo na rAjyaharaNaM tathA
09004010a ekaprANAv ubhau kRSNAv anyonyaM prati saMhatau
09004010c purA yac chrutam evAsId adya pazyAmi tat prabho
09004011a svasrIyaM ca hataM zrutvA duHkhaM svapiti kezavaH
09004011c kRtAgaso vayaM tasya sa madarthaM kathaM kSamet
09004012a abhimanyor vinAzena na zarma labhate 'rjunaH
09004012c sa kathaM maddhite yatnaM prakariSyati yAcitaH
09004013a madhyamaH pANDavas tIkSNo bhImaseno mahAbalaH
09004013c pratijJAtaM ca tenograM sa bhajyeta na saMnamet
09004014a ubhau tau baddhanistriMzAv ubhau cAbaddhakaGkaTau
09004014c kRtavairAv ubhau vIrau yamAv api yamopamau
09004015a dhRSTadyumnaH zikhaNDI ca kRtavairau mayA saha
09004015c tau kathaM maddhite yatnaM prakuryAtAM dvijottama
09004016a duHzAsanena yat kRSNA ekavastrA rajasvalA
09004016c parikliSTA sabhAmadhye sarvalokasya pazyataH
09004017a tathA vivasanAM dInAM smaranty adyApi pANDavAH
09004017c na nivArayituM zakyAH saMgrAmAt te paraMtapAH
09004018a yadA ca draupadI kRSNA madvinAzAya duHkhitA
09004018c ugraM tepe tapaH kRSNA bhartqNAm arthasiddhaye
09004018e sthaNDile nityadA zete yAvad vairasya yAtanA
09004019a nikSipya mAnaM darpaM ca vAsudevasahodarA
09004019c kRSNAyAH preSyavad bhUtvA zuzrUSAM kurute sadA
09004020a iti sarvaM samunnaddhaM na nirvAti kathaM cana
09004020c abhimanyor vinAzena sa saMdheyaH kathaM mayA
09004021a kathaM ca nAma bhuktvemAM pRthivIM sAgarAmbarAm
09004021c pANDavAnAM prasAdena bhuJjIyAM rAjyam alpakam
09004022a upary upari rAjJAM vai jvalito bhAskaro yathA
09004022c yudhiSThiraM kathaM pazcAd anuyAsyAmi dAsavat
09004023a kathaM bhuktvA svayaM bhogAn dattvA dAyAMz ca puSkalAn
09004023c kRpaNaM vartayiSyAmi kRpaNaiH saha jIvikAm
09004024a nAbhyasUyAmi te vAkyam uktaM snigdhaM hitaM tvayA
09004024c na tu saMdhim ahaM manye prAptakAlaM kathaM cana
09004025a sunItam anupazyAmi suyuddhena paraMtapa
09004025c nAyaM klIbayituM kAlaH saMyoddhuM kAla eva naH
09004026a iSTaM me bahubhir yajJair dattA vipreSu dakSiNAH
09004026c prAptAH kramazrutA vedAH zatrUNAM mUrdhni ca sthitam
09004027a bhRtyA me subhRtAs tAta dInaz cAbhyuddhRto janaH
09004027c yAtAni pararASTrANi svarASTram anupAlitam
09004028a bhuktAz ca vividhA bhogAs trivargaH sevito mayA
09004028c pitqNAM gatam AnRNyaM kSatradharmasya cobhayoH
09004029a na dhruvaM sukham astIha kuto rAjyaM kuto yazaH
09004029c iha kIrtir vidhAtavyA sA ca yuddhena nAnyathA
09004030a gRhe yat kSatriyasyApi nidhanaM tad vigarhitam
09004030c adharmaH sumahAn eSa yac chayyAmaraNaM gRhe
09004031a araNye yo vimuJceta saMgrAme vA tanuM naraH
09004031c kratUn AhRtya mahato mahimAnaM sa gacchati
09004032a kRpaNaM vilapann Arto jarayAbhipariplutaH
09004032c mriyate rudatAM madhye jJAtInAM na sa pUruSaH
09004033a tyaktvA tu vividhAn bhogAn prAptAnAM paramAM gatim
09004033c apIdAnIM suyuddhena gaccheyaM satsalokatAm
09004034a zUrANAm AryavRttAnAM saMgrAmeSv anivartinAm
09004034c dhImatAM satyasaMdhAnAM sarveSAM kratuyAjinAm
09004035a zastrAvabhRtham AptAnAM dhruvaM vAsas triviSTape
09004035c mudA nUnaM prapazyanti zubhrA hy apsarasAM gaNAH
09004036a pazyanti nUnaM pitaraH pUjitAJ zakrasaMsadi
09004036c apsarobhiH parivRtAn modamAnAMs triviSTape
09004037a panthAnam amarair yAtaM zUraiz caivAnivartibhiH
09004037c api taiH saMgataM mArgaM vayam apy Aruhemahi
09004038a pitAmahena vRddhena tathAcAryeNa dhImatA
09004038c jayadrathena karNena tathA duHzAsanena ca
09004039a ghaTamAnA madarthe 'smin hatAH zUrA janAdhipAH
09004039c zerate lohitAktAGgAH pRthivyAM zaravikSatAH
09004040a uttamAstravidaH zUrA yathoktakratuyAjinaH
09004040c tyaktvA prANAn yathAnyAyam indrasadmasu dhiSThitAH
09004041a tais tv ayaM racitaH panthA durgamo hi punar bhavet
09004041c saMpatadbhir mahAvegair ito yAdbhiz ca sadgatim
09004042a ye madarthe hatAH zUrAs teSAM kRtam anusmaran
09004042c RNaM tat pratimuJcAno na rAjye mana Adadhe
09004043a pAtayitvA vayasyAMz ca bhrAtqn atha pitAmahAn
09004043c jIvitaM yadi rakSeyaM loko mAM garhayed dhruvam
09004044a kIdRzaM ca bhaved rAjyaM mama hInasya bandhubhiH
09004044c sakhibhiz ca suhRdbhiz ca praNipatya ca pANDavam
09004045a so 'ham etAdRzaM kRtvA jagato 'sya parAbhavam
09004045c suyuddhena tataH svargaM prApsyAmi na tad anyathA
09004046a evaM duryodhanenoktaM sarve saMpUjya tad vacaH
09004046c sAdhu sAdhv iti rAjAnaM kSatriyAH saMbabhASire
09004047a parAjayam azocantaH kRtacittAz ca vikrame
09004047c sarve sunizcitA yoddhum udagramanaso 'bhavan
09004048a tato vAhAn samAzvAsya sarve yuddhAbhinandinaH
09004048c Une dviyojane gatvA pratyatiSThanta kauravAH
09004049a AkAze vidrume puNye prasthe himavataH zubhe
09004049c aruNAM sarasvatIM prApya papuH sasnuz ca tajjalam
09004050a tava putrAH kRtotsAhAH paryavartanta te tataH
09004050c paryavasthApya cAtmAnam anyonyena punas tadA
09004050e sarve rAjan nyavartanta kSatriyAH kAlacoditAH
09005001  saMjaya uvAca
09005001a atha haimavate prasthe sthitvA yuddhAbhinandinaH
09005001c sarva eva mahArAja yodhAs tatra samAgatAH
09005002a zalyaz ca citrasenaz ca zakuniz ca mahArathaH
09005002c azvatthAmA kRpaz caiva kRtavarmA ca sAtvataH
09005003a suSeNo 'riSTasenaz ca dhRtasenaz ca vIryavAn
09005003c jayatsenaz ca rAjAnas te rAtrim uSitAs tataH
09005004a raNe karNe hate vIre trAsitA jitakAzibhiH
09005004c nAlabhaJ zarma te putrA himavantam Rte girim
09005005a te 'bruvan sahitAs tatra rAjAnaM sainyasaMnidhau
09005005c kRtayatnA raNe rAjan saMpUjya vidhivat tadA
09005006a kRtvA senApraNetAraM parAMs tvaM yoddhum arhasi
09005006c yenAbhiguptAH saMgrAme jayemAsuhRdo vayam
09005007a tato duryodhanaH sthitvA rathe rathavarottamam
09005007c sarvayuddhavibhAgajJam antakapratimaM yudhi
09005008a svaGgaM pracchannazirasaM kambugrIvaM priyaMvadam
09005008c vyAkozapadmAbhimukhaM vyAghrAsyaM merugauravam
09005009a sthANor vRSasya sadRzaM skandhanetragatisvaraiH
09005009c puSTazliSTAyatabhujaM suvistIrNaghanorasam
09005010a jave bale ca sadRzam aruNAnujavAtayoH
09005010c Adityasya tviSA tulyaM buddhyA cozanasA samam
09005011a kAntirUpamukhaizvaryais tribhiz candramasopamam
09005011c kAJcanopalasaMghAtaiH sadRzaM zliSTasaMdhikam
09005012a suvRttorukaTIjaGghaM supAdaM svaGgulInakham
09005012c smRtvA smRtvaiva ca guNAn dhAtrA yatnAd vinirmitam
09005013a sarvalakSaNasaMpannaM nipuNaM zrutisAgaram
09005013c jetAraM tarasArINAm ajeyaM zatrubhir balAt
09005014a dazAGgaM yaz catuSpAdam iSvastraM veda tattvataH
09005014c sAGgAMz ca caturo vedAn samyag AkhyAnapaJcamAn
09005015a ArAdhya tryambakaM yatnAd vratair ugrair mahAtapAH
09005015c ayonijAyAm utpanno droNenAyonijena yaH
09005016a tam apratimakarmANaM rUpeNAsadRzaM bhuvi
09005016c pAragaM sarvavidyAnAM guNArNavam aninditam
09005016e tam abhyetyAtmajas tubhyam azvatthAmAnam abravIt
09005017a yaM puraskRtya sahitA yudhi jeSyAma pANDavAn
09005017c guruputro 'dya sarveSAm asmAkaM paramA gatiH
09005017e bhavAMs tasmAn niyogAt te ko 'stu senApatir mama
09005018  drauNir uvAca
09005018a ayaM kulena vIryeNa tejasA yazasA zriyA
09005018c sarvair guNaiH samuditaH zalyo no 'stu camUpatiH
09005019a bhAgineyAn nijAMs tyaktvA kRtajJo 'smAn upAgataH
09005019c mahAseno mahAbAhur mahAsena ivAparaH
09005020a enaM senApatiM kRtvA nRpatiM nRpasattama
09005020c zakyaH prAptuM jayo 'smAbhir devaiH skandam ivAjitam
09005021a tathokte droNaputreNa sarva eva narAdhipAH
09005021c parivArya sthitAH zalyaM jayazabdAMz ca cakrire
09005021e yuddhAya ca matiM cakrUr AvezaM ca paraM yayuH
09005022a tato duryodhanaH zalyaM bhUmau sthitvA rathe sthitam
09005022c uvAca prAJjalir bhUtvA rAmabhISmasamaM raNe
09005023a ayaM sa kAlaH saMprApto mitrANAM mitravatsala
09005023c yatra mitram amitraM vA parIkSante budhA janAH
09005024a sa bhavAn astu naH zUraH praNetA vAhinImukhe
09005024c raNaM ca yAte bhavati pANDavA mandacetasaH
09005024e bhaviSyanti sahAmAtyAH pAJcAlAz ca nirudyamAH
09005025  zalya uvAca
09005025a yat tu mAM manyase rAjan kururAja karomi tat
09005025c tvatpriyArthaM hi me sarvaM prANA rAjyaM dhanAni ca
09005026  duryodhana uvAca
09005026a senApatyena varaye tvAm ahaM mAtulAtulam
09005026c so 'smAn pAhi yudhAM zreSTha skando devAn ivAhave
09005027a abhiSicyasva rAjendra devAnAm iva pAvakiH
09005027c jahi zatrUn raNe vIra mahendro dAnavAn iva
09006001  saMjaya uvAca
09006001a etac chrutvA vaco rAjJo madrarAjaH pratApavAn
09006001c duryodhanaM tadA rAjan vAkyam etad uvAca ha
09006002a duryodhana mahAbAho zRNu vAkyavidAM vara
09006002c yAv etau manyase kRSNau rathasthau rathinAM varau
09006002e na me tulyAv ubhAv etau bAhuvIrye kathaM cana
09006003a udyatAM pRthivIM sarvAM sasurAsuramAnavAm
09006003c yodhayeyaM raNamukhe saMkruddhaH kim u pANDavAn
09006003e vijeSye ca raNe pArthAn somakAMz ca samAgatAn
09006004a ahaM senApraNetA te bhaviSyAmi na saMzayaH
09006004c taM ca vyUhaM vidhAsyAmi na tariSyanti yaM pare
09006004e iti satyaM bravImy eSa duryodhana na saMzayaH
09006005a evam uktas tato rAjA madrAdhipatim aJjasA
09006005c abhyaSiJcata senAyA madhye bharatasattama
09006005e vidhinA zAstradRSTena hRSTarUpo vizAM pate
09006006a abhiSikte tatas tasmin siMhanAdo mahAn abhUt
09006006c tava sainyeSv avAdyanta vAditrANi ca bhArata
09006007a hRSTAz cAsaMs tadA yodhA madrakAz ca mahArathAH
09006007c tuSTuvuz caiva rAjAnaM zalyam Ahavazobhinam
09006008a jaya rAjaMz ciraM jIva jahi zatrUn samAgatAn
09006008c tava bAhubalaM prApya dhArtarASTrA mahAbalAH
09006008e nikhilAM pRthivIM sarvAM prazAsantu hatadviSaH
09006009a tvaM hi zakto raNe jetuM sasurAsuramAnavAn
09006009c martyadharmANa iha tu kim u somakasRJjayAn
09006010a evaM saMstUyamAnas tu madrANAm adhipo balI
09006010c harSaM prApa tadA vIro durApam akRtAtmabhiH
09006011  zalya uvAca
09006011a adyaivAhaM raNe sarvAn pAJcAlAn saha pANDavaiH
09006011c nihaniSyAmi rAjendra svargaM yAsyAmi vA hataH
09006012a adya pazyantu mAM lokA vicarantam abhItavat
09006012c adya pANDusutAH sarve vAsudevaH sasAtyakiH
09006013a pAJcAlAz cedayaz caiva draupadeyAz ca sarvazaH
09006013c dhRSTadyumnaH zikhaNDI ca sarve cApi prabhadrakAH
09006014a vikramaM mama pazyantu dhanuSaz ca mahad balam
09006014c lAghavaM cAstravIryaM ca bhujayoz ca balaM yudhi
09006015a adya pazyantu me pArthAH siddhAz ca saha cAraNaiH
09006015c yAdRzaM me balaM bAhvoH saMpad astreSu yA ca me
09006016a adya me vikramaM dRSTvA pANDavAnAM mahArathAH
09006016c pratIkAraparA bhUtvA ceSTantAM vividhAH kriyAH
09006017a adya sainyAni pANDUnAM drAvayiSye samantataH
09006017c droNabhISmAv ati vibho sUtaputraM ca saMyuge
09006017e vicariSye raNe yudhyan priyArthaM tava kaurava
09006018  saMjaya uvAca
09006018a abhiSikte tadA zalye tava sainyeSu mAnada
09006018c na karNavyasanaM kiM cin menire tatra bhArata
09006019a hRSTAH sumanasaz caiva babhUvus tatra sainikAH
09006019c menire nihatAn pArthAn madrarAjavazaM gatAn
09006020a praharSaM prApya senA tu tAvakI bharatarSabha
09006020c tAM rAtriM sukhinI suptA svasthacitteva sAbhavat
09006021a sainyasya tava taM zabdaM zrutvA rAjA yudhiSThiraH
09006021c vArSNeyam abravId vAkyaM sarvakSatrasya zRNvataH
09006022a madrarAjaH kRtaH zalyo dhArtarASTreNa mAdhava
09006022c senApatir maheSvAsaH sarvasainyeSu pUjitaH
09006023a etaj jJAtvA yathAbhUtaM kuru mAdhava yat kSamam
09006023c bhavAn netA ca goptA ca vidhatsva yad anantaram
09006024a tam abravIn mahArAja vAsudevo janAdhipam
09006024c ArtAyanim ahaM jAne yathAtattvena bhArata
09006025a vIryavAMz ca mahAtejA mahAtmA ca vizeSataH
09006025c kRtI ca citrayodhI ca saMyukto lAghavena ca
09006026a yAdRg bhISmas tathA droNo yAdRk karNaz ca saMyuge
09006026c tAdRzas tad viziSTo vA madrarAjo mato mama
09006027a yudhyamAnasya tasyAjau cintayann eva bhArata
09006027c yoddhAraM nAdhigacchAmi tulyarUpaM janAdhipa
09006028a zikhaNDyarjunabhImAnAM sAtvatasya ca bhArata
09006028c dhRSTadyumnasya ca tathA balenAbhyadhiko raNe
09006029a madrarAjo mahArAja siMhadviradavikramaH
09006029c vicariSyaty abhIH kAle kAlaH kruddhaH prajAsv iva
09006030a tasyAdya na prapazyAmi pratiyoddhAram Ahave
09006030c tvAm Rte puruSavyAghra zArdUlasamavikramam
09006031a sadevaloke kRtsne 'smin nAnyas tvattaH pumAn bhavet
09006031c madrarAjaM raNe kruddhaM yo hanyAt kurunandana
09006031e ahany ahani yudhyantaM kSobhayantaM balaM tava
09006032a tasmAj jahi raNe zalyaM maghavAn iva zambaram
09006032c atipazcAd asau vIro dhArtarASTreNa satkRtaH
09006033a tavaiva hi jayo nUnaM hate madrezvare yudhi
09006033c tasmin hate hataM sarvaM dhArtarASTrabalaM mahat
09006034a etac chrutvA mahArAja vacanaM mama sAMpratam
09006034c pratyudyAhi raNe pArtha madrarAjaM mahAbalam
09006034e jahi cainaM mahAbAho vAsavo namuciM yathA
09006035a na caivAtra dayA kAryA mAtulo 'yaM mameti vai
09006035c kSatradharmaM puraskRtya jahi madrajanezvaram
09006036a bhISmadroNArNavaM tIrtvA karNapAtAlasaMbhavam
09006036c mA nimajjasva sagaNaH zalyam AsAdya goSpadam
09006037a yac ca te tapaso vIryaM yac ca kSAtraM balaM tava
09006037c tad darzaya raNe sarvaM jahi cainaM mahAratham
09006038a etAvad uktvA vacanaM kezavaH paravIrahA
09006038c jagAma zibiraM sAyaM pUjyamAno 'tha pANDavaiH
09006039a kezave tu tadA yAte dharmarAjo yudhiSThiraH
09006039c visRjya sarvAn bhrAtqMz ca pAJcAlAn atha somakAn
09006039e suSvApa rajanIM tAM tu vizalya iva kuJjaraH
09006040a te ca sarve maheSvAsAH pAJcAlAH pANDavAs tathA
09006040c karNasya nidhane hRSTAH suSupus tAM nizAM tadA
09006041a gatajvaraM maheSvAsaM tIrNapAraM mahAratham
09006041c babhUva pANDaveyAnAM sainyaM pramuditaM nizi
09006041e sUtaputrasya nidhane jayaM labdhvA ca mAriSa
09007001  saMjaya uvAca
09007001a vyatItAyAM rajanyAM tu rAjA duryodhanas tadA
09007001c abravIt tAvakAn sarvAn saMnahyantAM mahArathAH
09007002a rAjJas tu matam AjJAya samanahyata sA camUH
09007002c ayojayan rathAMs tUrNaM paryadhAvaMs tathApare
09007003a akalpyanta ca mAtaGgAH samanahyanta pattayaH
09007003c hayAn AstaraNopetAMz cakrur anye sahasrazaH
09007004a vAditrANAM ca ninadaH prAdurAsId vizAM pate
09007004c bodhanArthaM hi yodhAnAM sainyAnAM cApy udIryatAm
09007005a tato balAni sarvANi senAziSTAni bhArata
09007005c saMnaddhAny eva dadRzur mRtyuM kRtvA nivartanam
09007006a zalyaM senApatiM kRtvA madrarAjaM mahArathAH
09007006c pravibhajya balaM sarvam anIkeSu vyavasthitAH
09007007a tataH sarve samAgamya putreNa tava sainikAH
09007007c kRpaz ca kRtavarmA ca drauNiH zalyo 'tha saubalaH
09007008a anye ca pArthivAH zeSAH samayaM cakrire tadA
09007008c na na ekena yoddhavyaM kathaM cid api pANDavaiH
09007009a yo hy ekaH pANDavair yudhyed yo vA yudhyantam utsRjet
09007009c sa paJcabhir bhaved yuktaH pAtakaiH sopapAtakaiH
09007009e anyonyaM parirakSadbhir yoddhavyaM sahitaiz ca naH
09007010a evaM te samayaM kRtvA sarve tatra mahArathAH
09007010c madrarAjaM puraskRtya tUrNam abhyadravan parAn
09007011a tathaiva pANDavA rAjan vyUhya sainyaM mahAraNe
09007011c abhyayuH kauravAn sarvAn yotsyamAnAH samantataH
09007012a tad balaM bharatazreSTha kSubdhArNavasamasvanam
09007012c samuddhUtArNavAkAram uddhUtarathakuJjaram
09007013  dhRtarASTra uvAca
09007013a droNasya bhISmasya ca vai rAdheyasya ca me zrutam
09007013c pAtanaM zaMsa me bhUyaH zalyasyAtha sutasya me
09007014a kathaM raNe hataH zalyo dharmarAjena saMjaya
09007014c bhImena ca mahAbAhuH putro duryodhano mama
09007015  saMjaya uvAca
09007015a kSayaM manuSyadehAnAM rathanAgAzvasaMkSayam
09007015c zRNu rAjan sthiro bhUtvA saMgrAmaM zaMsato mama
09007016a AzA balavatI rAjan putrANAM te 'bhavat tadA
09007016c hate bhISme ca droNe ca sUtaputre ca pAtite
09007016e zalyaH pArthAn raNe sarvAn nihaniSyati mAriSa
09007017a tAm AzAM hRdaye kRtvA samAzvAsya ca bhArata
09007017c madrarAjaM ca samare samAzritya mahAratham
09007017e nAthavantam athAtmAnam amanyata sutas tava
09007018a yadA karNe hate pArthAH siMhanAdaM pracakrire
09007018c tadA rAjan dhArtarASTrAn Aviveza mahad bhayam
09007019a tAn samAzvAsya tu tadA madrarAjaH pratApavAn
09007019c vyUhya vyUhaM mahArAja sarvatobhadram Rddhimat
09007020a pratyudyAto raNe pArthAn madrarAjaH pratApavAn
09007020c vidhunvan kArmukaM citraM bhAraghnaM vegavattaram
09007021a rathapravaram AsthAya saindhavAzvaM mahArathaH
09007021c tasya sItA mahArAja rathasthAzobhayad ratham
09007022a sa tena saMvRto vIro rathenAmitrakarzanaH
09007022c tasthau zUro mahArAja putrANAM te bhayapraNut
09007023a prayANe madrarAjo 'bhUn mukhaM vyUhasya daMzitaH
09007023c madrakaiH sahito vIraiH karNaputraiz ca durjayaiH
09007024a savye 'bhUt kRtavarmA ca trigartaiH parivAritaH
09007024c gautamo dakSiNe pArzve zakaiz ca yavanaiH saha
09007025a azvatthAmA pRSThato 'bhUt kAmbojaiH parivAritaH
09007025c duryodhano 'bhavan madhye rakSitaH kurupuMgavaiH
09007026a hayAnIkena mahatA saubalaz cApi saMvRtaH
09007026c prayayau sarvasainyena kaitavyaz ca mahArathaH
09007027a pANDavAz ca maheSvAsA vyUhya sainyam ariMdamAH
09007027c tridhA bhUtvA mahArAja tava sainyam upAdravan
09007028a dhRSTadyumnaH zikhaNDI ca sAtyakiz ca mahArathaH
09007028c zalyasya vAhinIM tUrNam abhidudruvur Ahave
09007029a tato yudhiSThiro rAjA svenAnIkena saMvRtaH
09007029c zalyam evAbhidudrAva jighAMsur bharatarSabha
09007030a hArdikyaM tu maheSvAsam arjunaH zatrupUgahA
09007030c saMzaptakagaNAMz caiva vegato 'bhividudruve
09007031a gautamaM bhImaseno vai somakAz ca mahArathAH
09007031c abhyadravanta rAjendra jighAMsantaH parAn yudhi
09007032a mAdrIputrau tu zakunim ulUkaM ca mahArathau
09007032c sasainyau sahasenau tAv upatasthatur Ahave
09007033a tathaivAyutazo yodhAs tAvakAH pANDavAn raNe
09007033c abhyadravanta saMkruddhA vividhAyudhapANayaH
09007034  dhRtarASTra uvAca
09007034a hate bhISme maheSvAse droNe karNe mahArathe
09007034c kuruSv alpAvaziSTeSu pANDaveSu ca saMyuge
09007035a susaMrabdheSu pArtheSu parAkrAnteSu saMjaya
09007035c mAmakAnAM pareSAM ca kiM ziSTam abhavad balam
09007036  saMjaya uvAca
09007036a yathA vayaM pare rAjan yuddhAya samavasthitAH
09007036c yAvac cAsId balaM ziSTaM saMgrAme tan nibodha me
09007037a ekAdaza sahasrANi rathAnAM bharatarSabha
09007037c daza dantisahasrANi sapta caiva zatAni ca
09007038a pUrNe zatasahasre dve hayAnAM bharatarSabha
09007038c narakoTyas tathA tisro balam etat tavAbhavat
09007039a rathAnAM SaTsahasrANi SaTsahasrAz ca kuJjarAH
09007039c daza cAzvasahasrANi pattikoTI ca bhArata
09007040a etad balaM pANDavAnAm abhavac cheSam Ahave
09007040c eta eva samAjagmur yuddhAya bharatarSabha
09007041a evaM vibhajya rAjendra madrarAjamate sthitAH
09007041c pANDavAn pratyudIyAma jayagRddhAH pramanyavaH
09007042a tathaiva pANDavAH zUrAH samare jitakAzinaH
09007042c upayAtA naravyAghrAH pAJcAlAz ca yazasvinaH
09007043a evam ete balaughena parasparavadhaiSiNaH
09007043c upayAtA naravyAghrAH pUrvAM saMdhyAM prati prabho
09007044a tataH pravavRte yuddhaM ghorarUpaM bhayAnakam
09007044c tAvakAnAM pareSAM ca nighnatAm itaretaram
09008001  saMjaya uvAca
09008001a tataH pravavRte yuddhaM kurUNAM bhayavardhanam
09008001c sRJjayaiH saha rAjendra ghoraM devAsuropamam
09008002a narA rathA gajaughAz ca sAdinaz ca sahasrazaH
09008002c vAjinaz ca parAkrAntAH samAjagmuH parasparam
09008003a nAgAnAM bhImarUpANAM dravatAM nisvano mahAn
09008003c azrUyata yathA kAle jaladAnAM nabhastale
09008004a nAgair abhyAhatAH ke cit sarathA rathino 'patan
09008004c vyadravanta raNe vIrA drAvyamANA madotkaTaiH
09008005a hayaughAn pAdarakSAMz ca rathinas tatra zikSitAH
09008005c zaraiH saMpreSayAm AsuH paralokAya bhArata
09008006a sAdinaH zikSitA rAjan parivArya mahArathAn
09008006c vicaranto raNe 'bhyaghnan prAsazaktyRSTibhis tathA
09008007a dhanvinaH puruSAH ke cit saMnivArya mahArathAn
09008007c ekaM bahava AsAdya preSayeyur yamakSayam
09008008a nAgaM rathavarAMz cAnye parivArya mahArathAH
09008008c sottarAyudhinaM jaghnur dravamANA mahAravam
09008009a tathA ca rathinaM kruddhaM vikirantaM zarAn bahUn
09008009c nAgA jaghnur mahArAja parivArya samantataH
09008010a nAgo nAgam abhidrutya rathI ca rathinaM raNe
09008010c zaktitomaranArAcair nijaghnus tatra tatra ha
09008011a pAdAtAn avamRdnanto rathavAraNavAjinaH
09008011c raNamadhye vyadRzyanta kurvanto mahad Akulam
09008012a hayAz ca paryadhAvanta cAmarair upazobhitAH
09008012c haMsA himavataH prasthe pibanta iva medinIm
09008013a teSAM tu vAjinAM bhUmiH khuraiz citrA vizAM pate
09008013c azobhata yathA nArI karajakSatavikSatA
09008014a vAjinAM khurazabdena rathanemisvanena ca
09008014c pattInAM cApi zabdena nAgAnAM bRMhitena ca
09008015a vAditrANAM ca ghoSeNa zaGkhAnAM nisvanena ca
09008015c abhavan nAditA bhUmir nirghAtair iva bhArata
09008016a dhanuSAM kUjamAnAnAM nistriMzAnAM ca dIpyatAm
09008016c kavacAnAM prabhAbhiz ca na prAjJAyata kiM cana
09008017a bahavo bAhavaz chinnA nAgarAjakaropamAH
09008017c udveSTante viveSTante vegaM kurvanti dAruNam
09008018a zirasAM ca mahArAja patatAM vasudhAtale
09008018c cyutAnAm iva tAlebhyaH phalAnAM zrUyate svanaH
09008019a zirobhiH patitair bhAti rudhirArdrair vasuMdharA
09008019c tapanIyanibhaiH kAle nalinair iva bhArata
09008020a udvRttanayanais tais tu gatasattvaiH suvikSataiH
09008020c vyabhrAjata mahArAja puNDarIkair ivAvRtA
09008021a bAhubhiz candanAdigdhaiH sakeyUrair mahAdhanaiH
09008021c patitair bhAti rAjendra mahI zakradhvajair iva
09008022a Urubhiz ca narendrANAM vinikRttair mahAhave
09008022c hastihastopamair anyaiH saMvRtaM tad raNAGgaNam
09008023a kabandhazatasaMkIrNaM chatracAmarazobhitam
09008023c senAvanaM tac chuzubhe vanaM puSpAcitaM yathA
09008024a tatra yodhA mahArAja vicaranto hy abhItavat
09008024c dRzyante rudhirAktAGgAH puSpitA iva kiMzukAH
09008025a mAtaGgAz cApy adRzyanta zaratomarapIDitAH
09008025c patantas tatra tatraiva chinnAbhrasadRzA raNe
09008026a gajAnIkaM mahArAja vadhyamAnaM mahAtmabhiH
09008026c vyadIryata dizaH sarvA vAtanunnA ghanA iva
09008027a te gajA ghanasaMkAzAH petur urvyAM samantataH
09008027c vajrarugNA iva babhuH parvatA yugasaMkSaye
09008028a hayAnAM sAdibhiH sArdhaM patitAnAM mahItale
09008028c rAzayaH saMpradRzyante girimAtrAs tatas tataH
09008029a saMjajJe raNabhUmau tu paralokavahA nadI
09008029c zoNitodA rathAvartA dhvajavRkSAsthizarkarA
09008030a bhujanakrA dhanuHsrotA hastizailA hayopalA
09008030c medomajjAkardaminI chatrahaMsA gadoDupA
09008031a kavacoSNISasaMchannA patAkAruciradrumA
09008031c cakracakrAvalIjuSTA triveNUdaNDakAvRtA
09008032a zUrANAM harSajananI bhIrUNAM bhayavardhinI
09008032c prAvartata nadI raudrA kurusRJjayasaMkulA
09008033a tAM nadIM pitRlokAya vahantIm atibhairavAm
09008033c terur vAhananaubhis te zUrAH parighabAhavaH
09008034a vartamAne tathA yuddhe nirmaryAde vizAM pate
09008034c caturaGgakSaye ghore pUrvaM devAsuropame
09008035a akrozan bAndhavAn anye tatra tatra paraMtapa
09008035c krozadbhir bAndhavaiz cAnye bhayArtA na nivartire
09008036a nirmaryAde tathA yuddhe vartamAne bhayAnake
09008036c arjuno bhImasenaz ca mohayAM cakratuH parAn
09008037a sA vadhyamAnA mahatI senA tava janAdhipa
09008037c amuhyat tatra tatraiva yoSin madavazAd iva
09008038a mohayitvA ca tAM senAM bhImasenadhanaMjayau
09008038c dadhmatur vArijau tatra siMhanAdaM ca nedatuH
09008039a zrutvaiva tu mahAzabdaM dhRSTadyumnazikhaNDinau
09008039c dharmarAjaM puraskRtya madrarAjam abhidrutau
09008040a tatrAzcaryam apazyAma ghorarUpaM vizAM pate
09008040c zalyena saMgatAH zUrA yad ayudhyanta bhAgazaH
09008041a mAdrIputrau sarabhasau kRtAstrau yuddhadurmadau
09008041c abhyayAtAM tvarAyuktau jigISantau balaM tava
09008042a tato nyavartata balaM tAvakaM bharatarSabha
09008042c zaraiH praNunnaM bahudhA pANDavair jitakAzibhiH
09008043a vadhyamAnA camUH sA tu putrANAM prekSatAM tava
09008043c bheje dizo mahArAja praNunnA dRDhadhanvibhiH
09008043e hAhAkAro mahAJ jajJe yodhAnAM tava bhArata
09008044a tiSTha tiSTheti vAg AsId drAvitAnAM mahAtmanAm
09008044c kSatriyANAM tadAnyonyaM saMyuge jayam icchatAm
09008044e Adravann eva bhagnAs te pANDavais tava sainikAH
09008045a tyaktvA yuddhe priyAn putrAn bhrAtqn atha pitAmahAn
09008045c mAtulAn bhAgineyAMz ca tathA saMbandhibAndhavAn
09008046a hayAn dvipAMs tvarayanto yodhA jagmuH samantataH
09008046c AtmatrANakRtotsAhAs tAvakA bharatarSabha
09009001  saMjaya uvAca
09009001a tat prabhagnaM balaM dRSTvA madrarAjaH pratApavAn
09009001c uvAca sArathiM tUrNaM codayAzvAn mahAjavAn
09009002a eSa tiSThati vai rAjA pANDuputro yudhiSThiraH
09009002c chatreNa dhriyamANena pANDureNa virAjatA
09009003a atra mAM prApaya kSipraM pazya me sArathe balam
09009003c na samarthA hi me pArthAH sthAtum adya puro yudhi
09009004a evam uktas tataH prAyAn madrarAjasya sArathiH
09009004c yatra rAjA satyasaMdho dharmarAjo yudhiSThiraH
09009005a ApatantaM ca sahasA pANDavAnAM mahad balam
09009005c dadhAraiko raNe zalyo velevoddhRtam arNavam
09009006a pANDavAnAM balaughas tu zalyam AsAdya mAriSa
09009006c vyatiSThata tadA yuddhe sindhor vega ivAcalam
09009007a madrarAjaM tu samare dRSTvA yuddhAya viSThitam
09009007c kuravaH saMnyavartanta mRtyuM kRtvA nivartanam
09009008a teSu rAjan nivRtteSu vyUDhAnIkeSu bhAgazaH
09009008c prAvartata mahAraudraH saMgrAmaH zoNitodakaH
09009008e samArchac citrasenena nakulo yuddhadurmadaH
09009009a tau parasparam AsAdya citrakArmukadhAriNau
09009009c meghAv iva yathodvRttau dakSiNottaravarSiNau
09009010a zaratoyaiH siSicatus tau parasparam Ahave
09009010c nAntaraM tatra pazyAmi pANDavasyetarasya vA
09009011a ubhau kRtAstrau balinau rathacaryAvizAradau
09009011c parasparavadhe yattau chidrAnveSaNatatparau
09009012a citrasenas tu bhallena pItena nizitena ca
09009012c nakulasya mahArAja muSTideze 'cchinad dhanuH
09009013a athainaM chinnadhanvAnaM rukmapuGkhaiH zilAzitaiH
09009013c tribhiH zarair asaMbhrAnto lalATe vai samarpayat
09009014a hayAMz cAsya zarais tIkSNaiH preSayAm Asa mRtyave
09009014c tathA dhvajaM sArathiM ca tribhis tribhir apAtayat
09009015a sa zatrubhujanirmuktair lalATasthais tribhiH zaraiH
09009015c nakulaH zuzubhe rAjaMs trizRGga iva parvataH
09009016a sa chinnadhanvA virathaH khaDgam AdAya carma ca
09009016c rathAd avAtarad vIraH zailAgrAd iva kesarI
09009017a padbhyAm Apatatas tasya zaravRSTim avAsRjat
09009017c nakulo 'py agrasat tAM vai carmaNA laghuvikramaH
09009018a citrasenarathaM prApya citrayodhI jitazramaH
09009018c Aruroha mahAbAhuH sarvasainyasya pazyataH
09009019a sakuNDalaM samukuTaM sunasaM svAyatekSaNam
09009019c citrasenaziraH kAyAd apAharata pANDavaH
09009019e sa papAta rathopasthAd divAkarasamaprabhaH
09009020a citrasenaM vizastaM tu dRSTvA tatra mahArathAH
09009020c sAdhuvAdasvanAMz cakruH siMhanAdAMz ca puSkalAn
09009021a vizastaM bhrAtaraM dRSTvA karNaputrau mahArathau
09009021c suSeNaH satyasenaz ca muJcantau nizitAJ zarAn
09009022a tato 'bhyadhAvatAM tUrNaM pANDavaM rathinAM varam
09009022c jighAMsantau yathA nAgaM vyAghrau rAjan mahAvane
09009023a tAv abhyadhAvatAM tIkSNau dvAv apy enaM mahAratham
09009023c zaraughAn samyag asyantau jImUtau salilaM yathA
09009024a sa zaraiH sarvato viddhaH prahRSTa iva pANDavaH
09009024c anyat kArmukam AdAya ratham Aruhya vIryavAn
09009024e atiSThata raNe vIraH kruddharUpa ivAntakaH
09009025a tasya tau bhrAtarau rAjaJ zaraiH saMnataparvabhiH
09009025c rathaM vizakalIkartuM samArabdhau vizAM pate
09009026a tataH prahasya nakulaz caturbhiz caturo raNe
09009026c jaghAna nizitais tIkSNaiH satyasenasya vAjinaH
09009027a tataH saMdhAya nArAcaM rukmapuGkhaM zilAzitam
09009027c dhanuz ciccheda rAjendra satyasenasya pANDavaH
09009028a athAnyaM ratham AsthAya dhanur AdAya cAparam
09009028c satyasenaH suSeNaz ca pANDavaM paryadhAvatAm
09009029a avidhyat tAv asaMbhrAntau mAdrIputraH pratApavAn
09009029c dvAbhyAM dvAbhyAM mahArAja zarAbhyAM raNamUrdhani
09009030a suSeNas tu tataH kruddhaH pANDavasya mahad dhanuH
09009030c ciccheda prahasan yuddhe kSurapreNa mahArathaH
09009031a athAnyad dhanur AdAya nakulaH krodhamUrchitaH
09009031c suSeNaM paJcabhir viddhvA dhvajam ekena cicchide
09009032a satyasenasya ca dhanur hastAvApaM ca mAriSa
09009032c ciccheda tarasA yuddhe tata uccukruzur janAH
09009033a athAnyad dhanur AdAya vegaghnaM bhArasAdhanam
09009033c zaraiH saMchAdayAm Asa samantAt pANDunandanam
09009034a saMnivArya tu tAn bANAn nakulaH paravIrahA
09009034c satyasenaM suSeNaM ca dvAbhyAM dvAbhyAm avidhyata
09009035a tAv enaM pratyavidhyetAM pRthak pRthag ajihmagaiH
09009035c sArathiM cAsya rAjendra zarair vivyadhatuH zitaiH
09009036a satyaseno ratheSAM tu nakulasya dhanus tathA
09009036c pRthak zarAbhyAM ciccheda kRtahastaH pratApavAn
09009037a sa rathe 'tirathas tiSThan rathazaktiM parAmRzat
09009037c svarNadaNDAm akuNThAgrAM tailadhautAM sunirmalAm
09009038a lelihAnAm iva vibho nAgakanyAM mahAviSAm
09009038c samudyamya ca cikSepa satyasenasya saMyuge
09009039a sA tasya hRdayaM saMkhye bibheda zatadhA nRpa
09009039c sa papAta rathAd bhUmau gatasattvo 'lpacetanaH
09009040a bhrAtaraM nihataM dRSTvA suSeNaH krodhamUrchitaH
09009040c abhyavarSac charais tUrNaM padAtiM pANDunandanam
09009041a nakulaM virathaM dRSTvA draupadeyo mahAbalaH
09009041c sutasomo 'bhidudrAva parIpsan pitaraM raNe
09009042a tato 'dhiruhya nakulaH sutasomasya taM ratham
09009042c zuzubhe bharatazreSTho giristha iva kesarI
09009042e so 'nyat kArmukam AdAya suSeNaM samayodhayat
09009043a tAv ubhau zaravarSAbhyAM samAsAdya parasparam
09009043c parasparavadhe yatnaM cakratuH sumahArathau
09009044a suSeNas tu tataH kruddhaH pANDavaM vizikhais tribhiH
09009044c sutasomaM ca viMzatyA bAhvor urasi cArpayat
09009045a tataH kruddho mahArAja nakulaH paravIrahA
09009045c zarais tasya dizaH sarvAz chAdayAm Asa vIryavAn
09009046a tato gRhItvA tIkSNAgram ardhacandraM sutejanam
09009046c sa vegayuktaM cikSepa karNaputrasya saMyuge
09009047a tasya tena ziraH kAyAj jahAra nRpasattama
09009047c pazyatAM sarvasainyAnAM tad adbhutam ivAbhavat
09009048a sa hataH prApatad rAjan nakulena mahAtmanA
09009048c nadIvegAd ivArugNas tIrajaH pAdapo mahAn
09009049a karNaputravadhaM dRSTvA nakulasya ca vikramam
09009049c pradudrAva bhayAt senA tAvakI bharatarSabha
09009050a tAM tu senAM mahArAja madrarAjaH pratApavAn
09009050c apAlayad raNe zUraH senApatir ariMdamaH
09009051a vibhIs tasthau mahArAja vyavasthApya ca vAhinIm
09009051c siMhanAdaM bhRzaM kRtvA dhanuHzabdaM ca dAruNam
09009052a tAvakAH samare rAjan rakSitA dRDhadhanvanA
09009052c pratyudyayur arAtIMs te samantAd vigatavyathAH
09009053a madrarAjaM maheSvAsaM parivArya samantataH
09009053c sthitA rAjan mahAsenA yoddhukAmAH samantataH
09009054a sAtyakir bhImasenaz ca mAdrIputrau ca pANDavau
09009054c yudhiSThiraM puraskRtya hrIniSedham ariMdamam
09009055a parivArya raNe vIrAH siMhanAdaM pracakrire
09009055c bANazabdaravAMz cogrAn kSveDAMz ca vividhAn dadhuH
09009056a tathaiva tAvakAH sarve madrAdhipatim aJjasA
09009056c parivArya susaMrabdhAH punar yuddham arocayan
09009057a tataH pravavRte yuddhaM bhIrUNAM bhayavardhanam
09009057c tAvakAnAM pareSAM ca mRtyuM kRtvA nivartanam
09009058a yathA devAsuraM yuddhaM pUrvam AsId vizAM pate
09009058c abhItAnAM tathA rAjan yamarASTravivardhanam
09009059a tataH kapidhvajo rAjan hatvA saMzaptakAn raNe
09009059c abhyadravata tAM senAM kauravIM pANDunandanaH
09009060a tathaiva pANDavAH zeSA dhRSTadyumnapurogamAH
09009060c abhyadhAvanta tAM senAM visRjantaH zitAJ zarAn
09009061a pANDavair avakIrNAnAM saMmohaH samajAyata
09009061c na ca jajJur anIkAni dizo vA pradizas tathA
09009062a ApUryamANA nizitaiH zaraiH pANDavacoditaiH
09009062c hatapravIrA vidhvastA kIryamANA samantataH
09009062e kauravy avadhyata camUH pANDuputrair mahArathaiH
09009063a tathaiva pANDavI senA zarai rAjan samantataH
09009063c raNe 'hanyata putrais te zatazo 'tha sahasrazaH
09009064a te sene bhRzasaMtapte vadhyamAne parasparam
09009064c vyAkule samapadyetAM varSAsu saritAv iva
09009065a Aviveza tatas tIvraM tAvakAnAM mahad bhayam
09009065c pANDavAnAM ca rAjendra tathAbhUte mahAhave
09010001  saMjaya uvAca
09010001a tasmin vilulite sainye vadhyamAne parasparam
09010001c dravamANeSu yodheSu ninadatsu ca dantiSu
09010002a kUjatAM stanatAM caiva padAtInAM mahAhave
09010002c vidruteSu mahArAja hayeSu bahudhA tadA
09010003a prakSaye dAruNe jAte saMhAre sarvadehinAm
09010003c nAnAzastrasamAvApe vyatiSaktarathadvipe
09010004a harSaNe yuddhazauNDAnAM bhIrUNAM bhayavardhane
09010004c gAhamAneSu yodheSu parasparavadhaiSiSu
09010005a prANAdAne mahAghore vartamAne durodare
09010005c saMgrAme ghorarUpe tu yamarASTravivardhane
09010006a pANDavAs tAvakaM sainyaM vyadhaman nizitaiH zaraiH
09010006c tathaiva tAvakA yodhA jaghnuH pANDavasainikAn
09010007a tasmiMs tathA vartamAne yuddhe bhIrubhayAvahe
09010007c pUrvAhNe caiva saMprApte bhAskarodayanaM prati
09010008a labdhalakSAH pare rAjan rakSitAz ca mahAtmanA
09010008c ayodhayaMs tava balaM mRtyuM kRtvA nivartanam
09010009a balibhiH pANDavair dRptair labdhalakSaiH prahAribhiH
09010009c kauravy asIdat pRtanA mRgIvAgnisamAkulA
09010010a tAM dRSTvA sIdatIM senAM paGke gAm iva durbalAm
09010010c ujjihIrSus tadA zalyaH prAyAt pANDucamUM prati
09010011a madrarAjas tu saMkruddho gRhItvA dhanur uttamam
09010011c abhyadravata saMgrAme pANDavAn AtatAyinaH
09010012a pANDavAz ca mahArAja samare jitakAzinaH
09010012c madrarAjaM samAsAdya vivyadhur nizitaiH zaraiH
09010013a tataH zarazatais tIkSNair madrarAjo mahAbalaH
09010013c ardayAm Asa tAM senAM dharmarAjasya pazyataH
09010014a prAdurAsaMs tato rAjan nAnArUpANy anekazaH
09010014c cacAla zabdaM kurvANA mahI cApi saparvatA
09010015a sadaNDazUlA dIptAgrAH zIryamANAH samantataH
09010015c ulkA bhUmiM divaH petur Ahatya ravimaNDalam
09010016a mRgAz ca mAhiSAz cApi pakSiNaz ca vizAM pate
09010016c apasavyaM tadA cakruH senAM te bahuzo nRpa
09010017a tatas tad yuddham atyugram abhavat saMghacAriNAm
09010017c tathA sarvANy anIkAni saMnipatya janAdhipa
09010017e abhyayuH kauravA rAjan pANDavAnAm anIkinIm
09010018a zalyas tu zaravarSeNa varSann iva sahasradRk
09010018c abhyavarSad adInAtmA kuntIputraM yudhiSThiram
09010019a bhImasenaM zaraiz cApi rukmapuGkhaiH zilAzitaH
09010019c draupadeyAMs tathA sarvAn mAdrIputrau ca pANDavau
09010020a dhRSTadyumnaM ca zaineyaM zikhaNDinam athApi ca
09010020c ekaikaM dazabhir bANair vivyAdha ca mahAbalaH
09010020e tato 'sRjad bANavarSaM gharmAnte maghavAn iva
09010021a tataH prabhadrakA rAjan somakAz ca sahasrazaH
09010021c patitAH pAtyamAnAz ca dRzyante zalyasAyakaiH
09010022a bhramarANAm iva vrAtAH zalabhAnAm iva vrajAH
09010022c hrAdinya iva meghebhyaH zalyasya nyapataJ zarAH
09010023a dviradAs turagAz cArtAH pattayo rathinas tathA
09010023c zalyasya bANair nyapatan babhramur vyanadaMs tathA
09010024a AviSTa iva madrezo manyunA pauruSeNa ca
09010024c prAcchAdayad arIn saMkhye kAlasRSTa ivAntakaH
09010024e vinardamAno madrezo meghahrAdo mahAbalaH
09010025a sA vadhyamAnA zalyena pANDavAnAm anIkinI
09010025c ajAtazatruM kaunteyam abhyadhAvad yudhiSThiram
09010026a tAM samarpya tataH saMkhye laghuhastaH zitaiH zaraiH
09010026c zaravarSeNa mahatA yudhiSThiram apIDayat
09010027a tam ApatantaM pattyazvaiH kruddho rAjA yudhiSThiraH
09010027c avArayac charais tIkSNair mattaM dvipam ivAGkuzaiH
09010028a tasya zalyaH zaraM ghoraM mumocAzIviSopamam
09010028c so 'bhyavidhyan mahAtmAnaM vegenAbhyapatac ca gAm
09010029a tato vRkodaraH kruddhaH zalyaM vivyAdha saptabhiH
09010029c paJcabhiH sahadevas tu nakulo dazabhiH zaraiH
09010030a draupadeyAz ca zatrughnaM zUram ArtAyaniM zaraiH
09010030c abhyavarSan mahAbhAgaM meghA iva mahIdharam
09010031a tato dRSTvA tudyamAnaM zalyaM pArthaiH samantataH
09010031c kRtavarmA kRpaz caiva saMkruddhAv abhyadhAvatAm
09010032a ulUkaz ca patatrI ca zakuniz cApi saubalaH
09010032c smayamAnaz ca zanakair azvatthAmA mahArathaH
09010032e tava putrAz ca kArtsnyena jugupuH zalyam Ahave
09010033a bhImasenaM tribhir viddhvA kRtavarmA zilImukhaiH
09010033c bANavarSeNa mahatA kruddharUpam avArayat
09010034a dhRSTadyumnaM kRpaH kruddho bANavarSair apIDayat
09010034c draupadeyAMz ca zakunir yamau ca drauNir abhyayAt
09010035a duryodhano yudhAM zreSThAv Ahave kezavArjunau
09010035c samabhyayAd ugratejAH zaraiz cAbhyahanad balI
09010036a evaM dvaMdvazatAny AsaMs tvadIyAnAM paraiH saha
09010036c ghorarUpANi citrANi tatra tatra vizAM pate
09010037a RzyavarNAJ jaghAnAzvAn bhojo bhImasya saMyuge
09010037c so 'vatIrya rathopasthAd dhatAzvaH pANDunandanaH
09010037e kAlo daNDam ivodyamya gadApANir ayudhyata
09010038a pramukhe sahadevasya jaghAnAzvAMz ca madrarAT
09010038c tataH zalyasya tanayaM sahadevo 'sinAvadhIt
09010039a gautamaH punar AcAryo dhRSTadyumnam ayodhayat
09010039c asaMbhrAntam asaMbhrAnto yatnavAn yatnavattaram
09010040a draupadeyAMs tathA vIrAn ekaikaM dazabhiH zaraiH
09010040c avidhyad AcAryasuto nAtikruddhaH smayann iva
09010041a zalyo 'pi rAjan saMkruddho nighnan somakapANDavAn
09010041c punar eva zitair bANair yudhiSThiram apIDayat
09010042a tasya bhImo raNe kruddhaH saMdaSTadazanacchadaH
09010042c vinAzAyAbhisaMdhAya gadAm Adatta vIryavAn
09010043a yamadaNDapratIkAzAM kAlarAtrim ivodyatAm
09010043c gajavAjimanuSyANAM prANAntakaraNIm api
09010044a hemapaTTaparikSiptAm ulkAM prajvalitAm iva
09010044c zaikyAM vyAlIm ivAtyugrAM vajrakalpAm ayasmayIm
09010045a candanAgurupaGkAktAM pramadAm IpsitAm iva
09010045c vasAmedosRgAdigdhAM jihvAM vaivasvatIm iva
09010046a paTughaNTAravazatAM vAsavIm azanIm iva
09010046c nirmuktAzIviSAkArAM pRktAM gajamadair api
09010047a trAsanIM ripusainyAnAM svasainyapariharSiNIm
09010047c manuSyaloke vikhyAtAM girizRGgavidAriNIm
09010048a yayA kailAsabhavane mahezvarasakhaM balI
09010048c AhvayAm Asa kaunteyaH saMkruddham alakAdhipam
09010049a yayA mAyAvino dRptAn subahUn dhanadAlaye
09010049c jaghAna guhyakAn kruddho mandArArthe mahAbalaH
09010049e nivAryamANo bahubhir draupadyAH priyam AsthitaH
09010050a tAM vajramaNiratnaughAm aSTAzriM vajragauravAm
09010050c samudyamya mahAbAhuH zalyam abhyadravad raNe
09010051a gadayA yuddhakuzalas tayA dAruNanAdayA
09010051c pothayAm Asa zalyasya caturo 'zvAn mahAjavAn
09010052a tataH zalyo raNe kruddhaH pIne vakSasi tomaram
09010052c nicakhAna nadan vIro varma bhittvA ca so 'bhyagAt
09010053a vRkodaras tv asaMbhrAtas tam evoddhRtya tomaram
09010053c yantAraM madrarAjasya nirbibheda tato hRdi
09010054a sa bhinnavarmA rudhiraM vaman vitrastamAnasaH
09010054c papAtAbhimukho dIno madrarAjas tv apAkramat
09010055a kRtapratikRtaM dRSTvA zalyo vismitamAnasaH
09010055c gadAm Azritya dhIrAtmA pratyamitram avaikSata
09010056a tataH sumanasaH pArthA bhImasenam apUjayan
09010056c tad dRSTvA karma saMgrAme ghoram akliSTakarmaNaH
09011001  saMjaya uvAca
09011001a patitaM prekSya yantAraM zalyaH sarvAyasIM gadAm
09011001c AdAya tarasA rAjaMs tasthau girir ivAcalaH
09011002a taM dIptam iva kAlAgniM pAzahastam ivAntakam
09011002c sazRGgam iva kailAsaM savajram iva vAsavam
09011003a sazUlam iva haryakSaM vane mattam iva dvipam
09011003c javenAbhyapatad bhImaH pragRhya mahatIM gadAm
09011004a tataH zaGkhapraNAdaz ca tUryANAM ca sahasrazaH
09011004c siMhanAdaz ca saMjajJe zUrANAM harSavardhanaH
09011005a prekSantaH sarvatas tau hi yodhA yodhamahAdvipau
09011005c tAvakAz ca pare caiva sAdhu sAdhv ity athAbruvan
09011006a na hi madrAdhipAd anyo rAmAd vA yadunandanAt
09011006c soDhum utsahate vegaM bhImasenasya saMyuge
09011007a tathA madrAdhipasyApi gadAvegaM mahAtmanaH
09011007c soDhum utsahate nAnyo yodho yudhi vRkodarAt
09011008a tau vRSAv iva nardantau maNDalAni viceratuH
09011008c Avalgitau gadAhastau madrarAjavRkodarau
09011009a maNDalAvartamArgeSu gadAviharaNeSu ca
09011009c nirvizeSam abhUd yuddhaM tayoH puruSasiMhayoH
09011010a taptahemamayaiH zubhrair babhUva bhayavardhanI
09011010c agnijvAlair ivAviddhA paTTaiH zalyasya sA gadA
09011011a tathaiva carato mArgAn maNDaleSu mahAtmanaH
09011011c vidyudabhrapratIkAzA bhImasya zuzubhe gadA
09011012a tADitA madrarAjena bhImasya gadayA gadA
09011012c dIpyamAneva vai rAjan sasRje pAvakArciSaH
09011013a tathA bhImena zalyasya tADitA gadayA gadA
09011013c aGgAravarSaM mumuce tad adbhutam ivAbhavat
09011014a dantair iva mahAnAgau zRGgair iva maharSabhau
09011014c tottrair iva tadAnyonyaM gadAgrAbhyAM nijaghnatuH
09011015a tau gadAnihatair gAtraiH kSaNena rudhirokSitau
09011015c prekSaNIyatarAv AstAM puSpitAv iva kiMzukau
09011016a gadayA madrarAjena savyadakSiNam AhataH
09011016c bhImaseno mahAbAhur na cacAlAcalo yathA
09011017a tathA bhImagadAvegais tADyamAno muhur muhuH
09011017c zalyo na vivyathe rAjan dantinevAhato giriH
09011018a zuzruve dikSu sarvAsu tayoH puruSasiMhayoH
09011018c gadAnipAtasaMhrAdo vajrayor iva nisvanaH
09011019a nivRtya tu mahAvIryau samucchritagadAv ubhau
09011019c punar antaramArgasthau maNDalAni viceratuH
09011020a athAbhyetya padAny aSTau saMnipAto 'bhavat tayoH
09011020c udyamya lohadaNDAbhyAm atimAnuSakarmaNoH
09011021a prArthayAnau tadAnyo 'nyaM maNDalAni viceratuH
09011021c kriyAvizeSaM kRtinau darzayAm Asatus tadA
09011022a athodyamya gade ghore sazRGgAv iva parvatau
09011022c tAv Ajaghnatur anyonyaM yathA bhUmicale 'calau
09011023a tau parasparavegAc ca gadAbhyAM ca bhRzAhatau
09011023c yugapat petatur vIrAv ubhAv indradhvajAv iva
09011024a ubhayoH senayor vIrAs tadA hAhAkRto 'bhavan
09011024c bhRzaM marmaNy abhihatAv ubhAv AstAM suvihvalau
09011025a tataH sagadam Aropya madrANAm RSabhaM rathe
09011025c apovAha kRpaH zalyaM tUrNam AyodhanAd api
09011026a kSIbavad vihvalatvAt tu nimeSAt punar utthitaH
09011026c bhImaseno gadApANiH samAhvayata madrapam
09011027a tatas tu tAvakAH zUrA nAnAzastrasamAyutAH
09011027c nAnAvAditrazabdena pANDusenAm ayodhayan
09011028a bhujAv ucchritya zastraM ca zabdena mahatA tataH
09011028c abhyadravan mahArAja duryodhanapurogamAH
09011029a tad anIkam abhiprekSya tatas te pANDunandanAH
09011029c prayayuH siMhanAdena duryodhanavadhepsayA
09011030a teSAm ApatatAM tUrNaM putras te bharatarSabha
09011030c prAsena cekitAnaM vai vivyAdha hRdaye bhRzam
09011031a sa papAta rathopasthe tava putreNa tADitaH
09011031c rudhiraughapariklinnaH pravizya vipulaM tamaH
09011032a cekitAnaM hataM dRSTvA pANDavAnAM mahArathAH
09011032c prasaktam abhyavarSanta zaravarSANi bhAgazaH
09011033a tAvakAnAm anIkeSu pANDavA jitakAzinaH
09011033c vyacaranta mahArAja prekSaNIyAH samantataH
09011034a kRpaz ca kRtavarmA ca saubalaz ca mahAbalaH
09011034c ayodhayan dharmarAjaM madrarAjapuraskRtAH
09011035a bhAradvAjasya hantAraM bhUrivIryaparAkramam
09011035c duryodhano mahArAja dhRSTadyumnam ayodhayat
09011036a trisAhasrA rathA rAjaMs tava putreNa coditAH
09011036c ayodhayanta vijayaM droNaputrapuraskRtAH
09011037a vijaye dhRtasaMkalpAH samabhityaktajIvitAH
09011037c prAvizaMs tAvakA rAjan haMsA iva mahat saraH
09011038a tato yuddham abhUd ghoraM parasparavadhaiSiNAm
09011038c anyonyavadhasaMyuktam anyonyaprItivardhanam
09011039a tasmin pravRtte saMgrAme rAjan vIravarakSaye
09011039c anileneritaM ghoram uttasthau pArthivaM rajaH
09011040a zravaNAn nAmadheyAnAM pANDavAnAM ca kIrtanAt
09011040c parasparaM vijAnImo ye cAyudhyann abhItavat
09011041a tad rajaH puruSavyAghra zoNitena prazAmitam
09011041c dizaz ca vimalA jajJus tasmin rajasi zAmite
09011042a tathA pravRtte saMgrAme ghorarUpe bhayAnake
09011042c tAvakAnAM pareSAM ca nAsIt kaz cit parAGmukhaH
09011043a brahmalokaparA bhUtvA prArthayanto jayaM yudhi
09011043c suyuddhena parAkrAntA narAH svargam abhIpsavaH
09011044a bhartRpiNDavimokSArthaM bhartRkAryavinizcitAH
09011044c svargasaMsaktamanaso yodhA yuyudhire tadA
09011045a nAnArUpANi zastrANi visRjanto mahArathAH
09011045c anyonyam abhigarjantaH praharantaH parasparam
09011046a hata vidhyata gRhNIta praharadhvaM nikRntata
09011046c iti sma vAcaH zrUyante tava teSAM ca vai bale
09011047a tataH zalyo mahArAja dharmarAjaM yudhiSThiram
09011047c vivyAdha nizitair bANair hantukAmo mahAratham
09011048a tasya pArtho mahArAja nArAcAn vai caturdaza
09011048c marmANy uddizya marmajJo nicakhAna hasann iva
09011049a taM vArya pANDavaM bANair hantukAmo mahAyazAH
09011049c vivyAdha samare kruddho bahubhiH kaGkapatribhiH
09011050a atha bhUyo mahArAja zareNa nataparvaNA
09011050c yudhiSThiraM samAjaghne sarvasainyasya pazyataH
09011051a dharmarAjo 'pi saMkruddho madrarAjaM mahAyazAH
09011051c vivyAdha nizitair bANaiH kaGkabarhiNavAjitaiH
09011052a candrasenaM ca saptatyA sUtaM ca navabhiH zaraiH
09011052c drumasenaM catuHSaSTyA nijaghAna mahArathaH
09011053a cakrarakSe hate zalyaH pANDavena mahAtmanA
09011053c nijaghAna tato rAjaMz cedIn vai paJcaviMzatim
09011054a sAtyakiM paJcaviMzatyA bhImasenaM ca paJcabhiH
09011054c mAdrIputrau zatenAjau vivyAdha nizitaiH zaraiH
09011055a evaM vicaratas tasya saMgrAme rAjasattama
09011055c saMpreSayac chitAn pArthaH zarAn AzIviSopamAn
09011056a dhvajAgraM cAsya samare kuntIputro yudhiSThiraH
09011056c pramukhe vartamAnasya bhallenApaharad rathAt
09011057a pANDuputreNa vai tasya ketuM chinnaM mahAtmanA
09011057c nipatantam apazyAma girizRGgam ivAhatam
09011058a dhvajaM nipatitaM dRSTvA pANDavaM ca vyavasthitam
09011058c saMkruddho madrarAjo 'bhUc charavarSaM mumoca ha
09011059a zalyaH sAyakavarSeNa parjanya iva vRSTimAn
09011059c abhyavarSad ameyAtmA kSatriyaM kSatriyarSabhaH
09011060a sAtyakiM bhImasenaM ca mAdrIputrau ca pANDavau
09011060c ekaikaM paJcabhir viddhvA yudhiSThiram apIDayat
09011061a tato bANamayaM jAlaM vitataM pANDavorasi
09011061c apazyAma mahArAja meghajAlam ivodgatam
09011062a tasya zalyo raNe kruddho bANaiH saMnataparvabhiH
09011062c dizaH pracchAdayAm Asa pradizaz ca mahArathaH
09011063a tato yudhiSThiro rAjA bANajAlena pIDitaH
09011063c babhUva hRtavikrAnto jambho vRtrahaNA yathA
09012001  saMjaya uvAca
09012001a pIDite dharmarAje tu madrarAjena mAriSa
09012001c sAtyakir bhImasenaz ca mAdrIputrau ca pANDavau
09012001e parivArya rathaiH zalyaM pIDayAm Asur Ahave
09012002a tam ekaM bahubhir dRSTvA pIDyamAnaM mahArathaiH
09012002c sAdhuvAdo mahAJ jajJe siddhAz cAsan praharSitAH
09012002e Azcaryam ity abhASanta munayaz cApi saMgatAH
09012003a bhImaseno raNe zalyaM zalyabhUtaM parAkrame
09012003c ekena viddhvA bANena punar vivyAdha saptabhiH
09012004a sAtyakiz ca zatenainaM dharmaputraparIpsayA
09012004c madrezvaram avAkIrya siMhanAdam athAnadat
09012005a nakulaH paJcabhiz cainaM sahadevaz ca saptabhiH
09012005c viddhvA taM tu tatas tUrNaM punar vivyAdha saptabhiH
09012006a sa tu zUro raNe yattaH pIDitas tair mahArathaiH
09012006c vikRSya kArmukaM ghoraM vegaghnaM bhArasAdhanam
09012007a sAtyakiM paJcaviMzatyA zalyo vivyAdha mAriSa
09012007c bhImasenaM trisaptatyA nakulaM saptabhis tathA
09012008a tataH savizikhaM cApaM sahadevasya dhanvinaH
09012008c chittvA bhallena samare vivyAdhainaM trisaptabhiH
09012009a sahadevas tu samare mAtulaM bhUrivarcasam
09012009c sajyam anyad dhanuH kRtvA paJcabhiH samatADayat
09012009e zarair AzIviSAkArair jvalaj jvalanasaMnibhaiH
09012010a sArathiM cAsya samare zareNAnataparvaNA
09012010c vivyAdha bhRzasaMkruddhas taM ca bhUyas tribhiH zaraiH
09012011a bhImasenas trisaptatyA sAtyakir navabhiH zaraiH
09012011c dharmarAjas tathA SaSTyA gAtre zalyaM samarpayat
09012012a tataH zalyo mahArAja nirviddhas tair mahArathaiH
09012012c susrAva rudhiraM gAtrair gairikaM parvato yathA
09012013a tAMz ca sarvAn maheSvAsAn paJcabhiH paJcabhiH zaraiH
09012013c vivyAdha tarasA rAjaMs tad adbhutam ivAbhavat
09012014a tato 'pareNa bhallena dharmaputrasya mAriSa
09012014c dhanuz ciccheda samare sajyaM sa sumahArathaH
09012015a athAnyad dhanur AdAya dharmaputro mahArathaH
09012015c sAzvasUtadhvajarathaM zalyaM prAcchAdayac charaiH
09012016a sa cchAdyamAnaH samare dharmaputrasya sAyakaiH
09012016c yudhiSThiram athAvidhyad dazabhir nizitaiH zaraiH
09012017a sAtyakis tu tataH kruddho dharmaputre zarArdite
09012017c madrANAm adhipaM zUraM zaraughaiH samavArayat
09012018a sa sAtyakeH praciccheda kSurapreNa mahad dhanuH
09012018c bhImasenamukhAMs tAMz ca tribhis tribhir atADayat
09012019a tasya kruddho mahArAja sAtyakiH satyavikramaH
09012019c tomaraM preSayAm Asa svarNadaNDaM mahAdhanam
09012020a bhImaseno 'tha nArAcaM jvalantam iva pannagam
09012020c nakulaH samare zaktiM sahadevo gadAM zubhAm
09012020e dharmarAjaH zataghnIM tu jighAMsuH zalyam Ahave
09012021a tAn Apatata evAzu paJcAnAM vai bhujacyutAn
09012021c sAtyakiprahitaM zalyo bhallaiz ciccheda tomaram
09012022a bhImena prahitaM cApi zaraM kanakabhUSaNam
09012022c dvidhA ciccheda samare kRtahastaH pratApavAn
09012023a nakulapreSitAM zaktiM hemadaNDAM bhayAvahAm
09012023c gadAM ca sahadevena zaraughaiH samavArayat
09012024a zarAbhyAM ca zataghnIM tAM rAjJaz ciccheda bhArata
09012024c pazyatAM pANDuputrANAM siMhanAdaM nanAda ca
09012024e nAmRSyat taM tu zaineyaH zatror vijayam Ahave
09012025a athAnyad dhanur AdAya sAtyakiH krodhamUrchitaH
09012025c dvAbhyAM madrezvaraM viddhvA sArathiM ca tribhiH zaraiH
09012026a tataH zalyo mahArAja sarvAMs tAn dazabhiH zaraiH
09012026c vivyAdha subhRzaM kruddhas tottrair iva mahAdvipAn
09012027a te vAryamANAH samare madrarAjJA mahArathAH
09012027c na zekuH pramukhe sthAtuM tasya zatruniSUdanAH
09012028a tato duryodhano rAjA dRSTvA zalyasya vikramam
09012028c nihatAn pANDavAn mene pAJcAlAn atha sRJjayAn
09012029a tato rAjan mahAbAhur bhImasenaH pratApavAn
09012029c saMtyajya manasA prANAn madrAdhipam ayodhayat
09012030a nakulaH sahadevaz ca sAtyakiz ca mahArathaH
09012030c parivArya tadA zalyaM samantAd vyakiraJ zaraiH
09012031a sa caturbhir maheSvAsaiH pANDavAnAM mahArathaiH
09012031c vRtas tAn yodhayAm Asa madrarAjaH pratApavAn
09012032a tasya dharmasuto rAjan kSurapreNa mahAhave
09012032c cakrarakSaM jaghAnAzu madrarAjasya pArthiva
09012033a tasmiMs tu nihate zUre cakrarakSe mahArathe
09012033c madrarAjo 'tibalavAn sainikAn AstRNoc charaiH
09012034a samAcchannAMs tatas tAMs tu rAjan vIkSya sa sainikAn
09012034c cintayAm Asa samare dharmarAjo yudhiSThiraH
09012035a kathaM nu na bhavet satyaM tan mAdhavavaco mahat
09012035c na hi kruddho raNe rAjA kSapayeta balaM mama
09012036a tataH sarathanAgAzvAH pANDavAH pANDupUrvaja
09012036c madrezvaraM samAseduH pIDayantaH samantataH
09012037a nAnAzastraughabahulAM zastravRSTiM samutthitAm
09012037c vyadhamat samare rAjan mahAbhrANIva mArutaH
09012038a tataH kanakapuGkhAM tAM zalyakSiptAM viyadgatAm
09012038c zaravRSTim apazyAma zalabhAnAm ivAtatim
09012039a te zarA madrarAjena preSitA raNamUrdhani
09012039c saMpatantaH sma dRzyante zalabhAnAM vrajA iva
09012040a madrarAjadhanurmuktaiH zaraiH kanakabhUSaNaiH
09012040c nirantaram ivAkAzaM saMbabhUva janAdhipa
09012041a na pANDavAnAM nAsmAkaM tatra kaz cid vyadRzyata
09012041c bANAndhakAre mahati kRte tatra mahAbhaye
09012042a madrarAjena balinA lAghavAc charavRSTibhiH
09012042c loDyamAnaM tathA dRSTvA pANDavAnAM balArNavam
09012042e vismayaM paramaM jagmur devagandharvadAnavAH
09012043a sa tu tAn sarvato yattAJ zaraiH saMpIDya mAriSa
09012043c dharmarAjam avacchAdya siMhavad vyanadan muhuH
09012044a te channAH samare tena pANDavAnAM mahArathAH
09012044c na zekus taM tadA yuddhe pratyudyAtuM mahAratham
09012045a dharmarAjapurogAs tu bhImasenamukhA rathAH
09012045c na jahuH samare zUraM zalyam Ahavazobhinam
09013001  saMjaya uvAca
09013001a arjuno drauNinA viddho yuddhe bahubhir AyasaiH
09013001c tasya cAnucaraiH zUrais trigartAnAM mahArathaiH
09013001e drauNiM vivyAdha samare tribhir eva zilImukhaiH
09013002a tathetarAn maheSvAsAn dvAbhyAM dvAbhyAM dhanaMjayaH
09013002c bhUyaz caiva mahAbAhuH zaravarSair avAkirat
09013003a zarakaNTakitAs te tu tAvakA bharatarSabha
09013003c na jahuH samare pArthaM vadhyamAnAH zitaiH zaraiH
09013004a te 'rjunaM rathavaMzena droNaputrapurogamAH
09013004c ayodhayanta samare parivArya mahArathAH
09013005a tais tu kSiptAH zarA rAjan kArtasvaravibhUSitAH
09013005c arjunasya rathopasthaM pUrayAm Asur aJjasA
09013006a tathA kRSNau maheSvAsau vRSabhau sarvadhanvinAm
09013006c zarair vIkSya vitunnAGgau prahRSTau yuddhadurmadau
09013007a kUbaraM rathacakrANi ISA yoktrANi cAbhibho
09013007c yugaM caivAnukarSaM ca zarabhUtam abhUt tadA
09013008a naitAdRzaM dRSTapUrvaM rAjan naiva ca naH zrutam
09013008c yAdRzaM tatra pArthasya tAvakAH saMpracakrire
09013009a sa rathaH sarvato bhAti citrapuGkhaiH zitaiH zaraiH
09013009c ulkAzataiH saMpradIptaM vimAnam iva bhUtale
09013010a tato 'rjuno mahArAja zaraiH saMnataparvabhiH
09013010c avAkirat tAM pRtanAM megho vRSTyA yathAcalam
09013011a te vadhyamAnAH samare pArthanAmAGkitaiH zaraiH
09013011c pArthabhUtam amanyanta prekSamANAs tathAvidham
09013012a tato 'dbhutazarajvAlo dhanuHzabdAnilo mahAn
09013012c senendhanaM dadAhAzu tAvakaM pArthapAvakaH
09013013a cakrANAM patatAM caiva yugAnAM ca dharAtale
09013013c tUNIrANAM patAkAnAM dhvajAnAM ca rathaiH saha
09013014a ISANAm anukarSANAM triveNUnAM ca bhArata
09013014c akSANAm atha yoktrANAM pratodAnAM ca sarvazaH
09013015a zirasAM patatAM caiva kuNDaloSNISadhAriNAm
09013015c bhujAnAM ca mahArAja skandhAnAM ca samantataH
09013016a chatrANAM vyajanaiH sArdhaM mukuTAnAM ca rAzayaH
09013016c samadRzyanta pArthasya rathamArgeSu bhArata
09013017a agamyarUpA pRthivI mAMsazoNitakardamA
09013017c babhUva bharatazreSTha rudrasyAkrIDanaM yathA
09013017e bhIrUNAM trAsajananI zUrANAM harSavardhanI
09013018a hatvA tu samare pArthaH sahasre dve paraMtapa
09013018c rathAnAM savarUthAnAM vidhUmo 'gnir iva jvalan
09013019a yathA hi bhagavAn agnir jagad dagdhvA carAcaram
09013019c vidhUmo dRzyate rAjaMs tathA pArtho mahArathaH
09013020a drauNis tu samare dRSTvA pANDavasya parAkramam
09013020c rathenAtipatAkena pANDavaM pratyavArayat
09013021a tAv ubhau puruSavyAghrau zvetAzvau dhanvinAM varau
09013021c samIyatus tadA tUrNaM parasparavadhaiSiNau
09013022a tayor AsIn mahArAja bANavarSaM sudAruNam
09013022c jImUtAnAM yathA vRSTis tapAnte bharatarSabha
09013023a anyonyaspardhinau tau tu zaraiH saMnataparvabhiH
09013023c tatakSatur mRdhe 'nyonyaM zRGgAbhyAM vRSabhAv iva
09013024a tayor yuddhaM mahArAja ciraM samam ivAbhavat
09013024c astrANAM saMgamaz caiva ghoras tatrAbhavan mahAn
09013025a tato 'rjunaM dvAdazabhI rukmapuGkhaiH sutejanaiH
09013025c vAsudevaM ca dazabhir drauNir vivyAdha bhArata
09013026a tataH prahasya bIbhatsur vyAkSipad gANDivaM dhanuH
09013026c mAnayitvA muhUrtaM ca guruputraM mahAhave
09013027a vyazvasUtarathaM cakre savyasAcI mahArathaH
09013027c mRdupUrvaM tataz cainaM tribhir vivyAdha sAyakaiH
09013028a hatAzve tu rathe tiSThan droNaputras tv ayasmayam
09013028c musalaM pANDuputrAya cikSepa parighopamam
09013029a tam ApatantaM sahasA hemapaTTavibhUSitam
09013029c ciccheda saptadhA vIraH pArthaH zatrunibarhaNaH
09013030a sa cchinnaM musalaM dRSTvA drauNiH paramakopanaH
09013030c Adade parighaM ghoraM nagendrazikharopamam
09013030e cikSepa caiva pArthAya drauNir yuddhavizAradaH
09013031a tam antakam iva kruddhaM parighaM prekSya pANDavaH
09013031c arjunas tvarito jaghne paJcabhiH sAyakottamaiH
09013032a sa cchinnaH patito bhUmau pArthabANair mahAhave
09013032c dArayan pRthivIndrANAM manaH zabdena bhArata
09013033a tato 'parais tribhir bANair drauNiM vivyAdha pANDavaH
09013033c so 'tividdho balavatA pArthena sumahAbalaH
09013033e na saMbhrAntas tadA drauNiH pauruSe sve vyavasthitaH
09013034a sudharmA tu tato rAjan bhAradvAjaM mahAratham
09013034c avAkirac charavrAtaiH sarvakSatrasya pazyataH
09013035a tatas tu suratho 'py Ajau pAJcAlAnAM mahArathaH
09013035c rathena meghaghoSeNa drauNim evAbhyadhAvata
09013036a vikarSan vai dhanuH zreSThaM sarvabhArasahaM dRDham
09013036c jvalanAzIviSanibhaiH zaraiz cainam avAkirat
09013037a surathaM tu tataH kruddham ApatantaM mahAratham
09013037c cukopa samare drauNir daNDAhata ivoragaH
09013038a trizikhAM bhrukuTIM kRtvA sRkkiNI parilelihan
09013038c udvIkSya surathaM roSAd dhanurjyAm avamRjya ca
09013038e mumoca tIkSNaM nArAcaM yamadaNDasamadyutim
09013039a sa tasya hRdayaM bhittvA pravivezAtivegataH
09013039c zakrAzanir ivotsRSTA vidArya dharaNItalam
09013040a tatas taM patitaM bhUmau nArAcena samAhatam
09013040c vajreNeva yathA zRGgaM parvatasya mahAdhanam
09013041a tasmiMs tu nihate vIre droNaputraH pratApavAn
09013041c Aruroha rathaM tUrNaM tam eva rathinAM varaH
09013042a tataH sajjo mahArAja drauNir AhavadurmadaH
09013042c arjunaM yodhayAm Asa saMzaptakavRto raNe
09013043a tatra yuddhaM mahac cAsId arjunasya paraiH saha
09013043c madhyaMdinagate sUrye yamarASTravivardhanam
09013044a tatrAzcaryam apazyAma dRSTvA teSAM parAkramam
09013044c yad eko yugapad vIrAn samayodhayad arjunaH
09013045a vimardas tu mahAn AsId arjunasya paraiH saha
09013045c zatakrator yathA pUrvaM mahatyA daityasenayA
09014001  saMjaya uvAca
09014001a duryodhano mahArAja dhRSTadyumnaz ca pArSataH
09014001c cakratuH sumahad yuddhaM zarazaktisamAkulam
09014002a tayor Asan mahArAja zaradhArAH sahasrazaH
09014002c ambudAnAM yathA kAle jaladhArAH samantataH
09014003a rAjA tu pArSataM viddhvA zaraiH paJcabhir AyasaiH
09014003c droNahantAram ugreSuH punar vivyAdha saptabhiH
09014004a dhRSTadyumnas tu samare balavAn dRDhavikramaH
09014004c saptatyA vizikhAnAM vai duryodhanam apIDayat
09014005a pIDitaM prekSya rAjAnaM sodaryA bharatarSabha
09014005c mahatyA senayA sArdhaM parivavruH sma pArSatam
09014006a sa taiH parivRtaH zUraiH sarvato 'tirathair bhRzam
09014006c vyacarat samare rAjan darzayan hastalAghavam
09014007a zikhaNDI kRtavarmANaM gautamaM ca mahAratham
09014007c prabhadrakaiH samAyukto yodhayAm Asa dhanvinau
09014008a tatrApi sumahad yuddhaM ghorarUpaM vizAM pate
09014008c prANAn saMtyajatAM yuddhe prANadyUtAbhidevane
09014009a zalyas tu zaravarSANi vimuJcan sarvatodizam
09014009c pANDavAn pIDayAm Asa sasAtyakivRkodarAn
09014010a tathobhau ca yamau yuddhe yamatulyaparAkramau
09014010c yodhayAm Asa rAjendra vIryeNa ca balena ca
09014011a zalyasAyakanunnAnAM pANDavAnAM mahAmRdhe
09014011c trAtAraM nAdhyagacchanta ke cit tatra mahArathAH
09014012a tatas tu nakulaH zUro dharmarAje prapIDite
09014012c abhidudrAva vegena mAtulaM mAdrinandanaH
09014013a saMchAdya samare zalyaM nakulaH paravIrahA
09014013c vivyAdha cainaM dazabhiH smayamAnaH stanAntare
09014014a sarvapArazavair bANaiH karmAraparimArjitaiH
09014014c svarNapuGkhaiH zilAdhautair dhanuryantrapracoditaiH
09014015a zalyas tu pIDitas tena svasrIyeNa mahAtmanA
09014015c nakulaM pIDayAm Asa patribhir nataparvabhiH
09014016a tato yudhiSThiro rAjA bhImaseno 'tha sAtyakiH
09014016c sahadevaz ca mAdreyo madrarAjam upAdravan
09014017a tAn Apatata evAzu pUrayAnAn rathasvanaiH
09014017c dizaz ca pradizaz caiva kampayAnAMz ca medinIm
09014017e pratijagrAha samare senApatir amitrajit
09014018a yudhiSThiraM tribhir viddhvA bhImasenaM ca saptabhiH
09014018c sAtyakiM ca zatenAjau sahadevaM tribhiH zaraiH
09014019a tatas tu sazaraM cApaM nakulasya mahAtmanaH
09014019c madrezvaraH kSurapreNa tadA ciccheda mAriSa
09014019e tad azIryata vicchinnaM dhanuH zalyasya sAyakaiH
09014020a athAnyad dhanur AdAya mAdrIputro mahArathaH
09014020c madrarAjarathaM tUrNaM pUrayAm Asa patribhiH
09014021a yudhiSThiras tu madrezaM sahadevaz ca mAriSa
09014021c dazabhir dazabhir bANair urasy enam avidhyatAm
09014022a bhImasenas tataH SaSTyA sAtyakir navabhiH zaraiH
09014022c madrarAjam abhidrutya jaghnatuH kaGkapatribhiH
09014023a madrarAjas tataH kruddhaH sAtyakiM navabhiH zaraiH
09014023c vivyAdha bhUyaH saptatyA zarANAM nataparvaNAm
09014024a athAsya sazaraM cApaM muSTau ciccheda mAriSa
09014024c hayAMz ca caturaH saMkhye preSayAm Asa mRtyave
09014025a virathaM sAtyakiM kRtvA madrarAjo mahAbalaH
09014025c vizikhAnAM zatenainam AjaghAna samantataH
09014026a mAdrIputrau tu saMrabdhau bhImasenaM ca pANDavam
09014026c yudhiSThiraM ca kauravya vivyAdha dazabhiH zaraiH
09014027a tatrAdbhutam apazyAma madrarAjasya pauruSam
09014027c yad enaM sahitAH pArthA nAbhyavartanta saMyuge
09014028a athAnyaM ratham AsthAya sAtyakiH satyavikramaH
09014028c pIDitAn pANDavAn dRSTvA madrarAjavazaM gatAn
09014028e abhidudrAva vegena madrANAm adhipaM balI
09014029a ApatantaM rathaM tasya zalyaH samitizobhanaH
09014029c pratyudyayau rathenaiva matto mattam iva dvipam
09014030a sa saMnipAtas tumulo babhUvAdbhutadarzanaH
09014030c sAtyakez caiva zUrasya madrANAm adhipasya ca
09014030e yAdRzo vai purA vRttaH zambarAmararAjayoH
09014031a sAtyakiH prekSya samare madrarAjaM vyavasthitam
09014031c vivyAdha dazabhir bANais tiSTha tiSTheti cAbravIt
09014032a madrarAjas tu subhRzaM viddhas tena mahAtmanA
09014032c sAtyakiM prativivyAdha citrapuGkhaiH zitaiH zaraiH
09014033a tataH pArthA maheSvAsAH sAtvatAbhisRtaM nRpam
09014033c abhyadravan rathais tUrNaM mAtulaM vadhakAmyayA
09014034a tata AsIt parAmardas tumulaH zoNitodakaH
09014034c zUrANAM yudhyamAnAnAM siMhAnAm iva nardatAm
09014035a teSAm AsIn mahArAja vyatikSepaH parasparam
09014035c siMhAnAm AmiSepsUnAM kUjatAm iva saMyuge
09014036a teSAM bANasahasraughair AkIrNA vasudhAbhavat
09014036c antarikSaM ca sahasA bANabhUtam abhUt tadA
09014037a zarAndhakAraM bahudhA kRtaM tatra samantataH
09014037c abhracchAyeva saMjajJe zarair muktair mahAtmabhiH
09014038a tatra rAjaJ zarair muktair nirmuktair iva pannagaiH
09014038c svarNapuGkhaiH prakAzadbhir vyarocanta dizas tathA
09014039a tatrAdbhutaM paraM cakre zalyaH zatrunibarhaNaH
09014039c yad ekaH samare zUro yodhayAm Asa vai bahUn
09014040a madrarAjabhujotsRSTaiH kaGkabarhiNavAjitaiH
09014040c saMpatadbhiH zarair ghorair avAkIryata medinI
09014041a tatra zalyarathaM rAjan vicarantaM mahAhave
09014041c apazyAma yathA pUrvaM zakrasyAsurasaMkSaye
09015001  saMjaya uvAca
09015001a tataH sainyAs tava vibho madrarAjapuraskRtAH
09015001c punar abhyadravan pArthAn vegena mahatA raNe
09015002a pIDitAs tAvakAH sarve pradhAvanto raNotkaTAH
09015002c kSaNenaiva ca pArthAMs te bahutvAt samaloDayan
09015003a te vadhyamAnAH kurubhiH pANDavA nAvatasthire
09015003c nivAryamANA bhImena pazyatoH kRSNapArthayoH
09015004a tato dhanaMjayaH kruddhaH kRpaM saha padAnugaiH
09015004c avAkirac charaugheNa kRtavarmANam eva ca
09015005a zakuniM sahadevas tu sahasainyam avArayat
09015005c nakulaH pArzvataH sthitvA madrarAjam avaikSata
09015006a draupadeyA narendrAMz ca bhUyiSThaM samavArayan
09015006c droNaputraM ca pAJcAlyaH zikhaNDI samavArayat
09015007a bhImasenas tu rAjAnaM gadApANir avArayat
09015007c zalyaM tu saha sainyena kuntIputro yudhiSThiraH
09015008a tataH samabhavad yuddhaM saMsaktaM tatra tatra ha
09015008c tAvakAnAM pareSAM ca saMgrAmeSv anivartinAm
09015009a tatra pazyAmahe karma zalyasyAtimahad raNe
09015009c yad ekaH sarvasainyAni pANDavAnAm ayudhyata
09015010a vyadRzyata tadA zalyo yudhiSThirasamIpataH
09015010c raNe candramaso 'bhyAze zanaizcara iva grahaH
09015011a pIDayitvA tu rAjAnaM zarair AzIviSopamaiH
09015011c abhyadhAvat punar bhImaM zaravarSair avAkirat
09015012a tasya tal lAghavaM dRSTvA tathaiva ca kRtAstratAm
09015012c apUjayann anIkAni pareSAM tAvakAni ca
09015013a pIDyamAnAs tu zalyena pANDavA bhRzavikSatAH
09015013c prAdravanta raNaM hitvA krozamAne yudhiSThire
09015014a vadhyamAneSv anIkeSu madrarAjena pANDavaH
09015014c amarSavazam Apanno dharmarAjo yudhiSThiraH
09015014e tataH pauruSam AsthAya madrarAjam apIDayat
09015015a jayo vAstu vadho veti kRtabuddhir mahArathaH
09015015c samAhUyAbravIt sarvAn bhrAtqn kRSNaM ca mAdhavam
09015016a bhISmo droNaz ca karNaz ca ye cAnye pRthivIkSitaH
09015016c kauravArthe parAkrAntAH saMgrAme nidhanaM gatAH
09015017a yathAbhAgaM yathotsAhaM bhavantaH kRtapauruSAH
09015017c bhAgo 'vaziSTa eko 'yaM mama zalyo mahArathaH
09015018a so 'ham adya yudhA jetum AzaMse madrakezvaram
09015018c tatra yan mAnasaM mahyaM tat sarvaM nigadAmi vaH
09015019a cakrarakSAv imau zUrau mama mAdravatIsutau
09015019c ajeyau vAsavenApi samare vIrasaMmatau
09015020a sAdhv imau mAtulaM yuddhe kSatradharmapuraskRtau
09015020c madarthaM pratiyudhyetAM mAnArhau satyasaMgarau
09015021a mAM vA zalyo raNe hantA taM vAhaM bhadram astu vaH
09015021c iti satyAm imAM vANIM lokavIrA nibodhata
09015022a yotsye 'haM mAtulenAdya kSatradharmeNa pArthivAH
09015022c svayaM samabhisaMdhAya vijayAyetarAya vA
09015023a tasya me 'bhyadhikaM zastraM sarvopakaraNAni ca
09015023c saMyuJjantu raNe kSipraM zAstravad rathayojakAH
09015024a zaineyo dakSiNaM cakraM dhRSTadyumnas tathottaram
09015024c pRSThagopo bhavatv adya mama pArtho dhanaMjayaH
09015025a puraHsaro mamAdyAstu bhImaH zastrabhRtAM varaH
09015025c evam abhyadhikaH zalyAd bhaviSyAmi mahAmRdhe
09015026a evam uktAs tathA cakruH sarve rAjJaH priyaiSiNaH
09015026c tataH praharSaH sainyAnAM punar AsIt tadA nRpa
09015027a pAJcAlAnAM somakAnAM matsyAnAM ca vizeSataH
09015027c pratijJAM tAM ca saMgrAme dharmarAjasya pUrayan
09015028a tataH zaGkhAMz ca bherIz ca zatazaz caiva puSkarAn
09015028c avAdayanta pAJcAlAH siMhanAdAMz ca nedire
09015029a te 'bhyadhAvanta saMrabdhA madrarAjaM tarasvinaH
09015029c mahatA harSajenAtha nAdena kurupuMgavAH
09015030a hrAdena gajaghaNTAnAM zaGkhAnAM ninadena ca
09015030c tUryazabdena mahatA nAdayantaz ca medinIm
09015031a tAn pratyagRhNAt putras te madrarAjaz ca vIryavAn
09015031c mahAmeghAn iva bahUJ zailAv astodayAv ubhau
09015032a zalyas tu samarazlAghI dharmarAjam ariMdamam
09015032c vavarSa zaravarSeNa varSeNa maghavAn iva
09015033a tathaiva kururAjo 'pi pragRhya ruciraM dhanuH
09015033c droNopadezAn vividhAn darzayAno mahAmanAH
09015034a vavarSa zaravarSANi citraM laghu ca suSThu ca
09015034c na cAsya vivaraM kaz cid dadarza carato raNe
09015035a tAv ubhau vividhair bANais tatakSAte parasparam
09015035c zArdUlAv AmiSaprepsU parAkrAntAv ivAhave
09015036a bhImas tu tava putreNa raNazauNDena saMgataH
09015036c pAJcAlyaH sAtyakiz caiva mAdrIputrau ca pANDavau
09015036e zakunipramukhAn vIrAn pratyagRhNan samantataH
09015037a tadAsIt tumulaM yuddhaM punar eva jayaiSiNAm
09015037c tAvakAnAM pareSAM ca rAjan durmantrite tava
09015038a duryodhanas tu bhImasya zareNAnataparvaNA
09015038c cicchedAdizya saMgrAme dhvajaM hemavibhUSitam
09015039a sakiGkiNIkajAlena mahatA cArudarzanaH
09015039c papAta ruciraH siMho bhImasenasya nAnadan
09015040a punaz cAsya dhanuz citraM gajarAjakaropamam
09015040c kSureNa zitadhAreNa pracakarta narAdhipaH
09015041a sa cchinnadhanvA tejasvI rathazaktyA sutaM tava
09015041c bibhedorasi vikramya sa rathopastha Avizat
09015042a tasmin moham anuprApte punar eva vRkodaraH
09015042c yantur eva ziraH kAyAt kSurapreNAharat tadA
09015043a hatasUtA hayAs tasya ratham AdAya bhArata
09015043c vyadravanta dizo rAjan hAhAkAras tadAbhavat
09015044a tam abhyadhAvat trANArthaM droNaputro mahArathaH
09015044c kRpaz ca kRtavarmA ca putraM te 'bhiparIpsavaH
09015045a tasmin vilulite sainye trastAs tasya padAnugAH
09015045c gANDIvadhanvA visphArya dhanus tAn ahanac charaiH
09015046a yudhiSThiras tu madrezam abhyadhAvad amarSitaH
09015046c svayaM saMcodayann azvAn dantavarNAn manojavAn
09015047a tatrAdbhutam apazyAma kuntIputre yudhiSThire
09015047c purA bhUtvA mRdur dAnto yat tadA dAruNo 'bhavat
09015048a vivRtAkSaz ca kaunteyo vepamAnaz ca manyunA
09015048c ciccheda yodhAn nizitaiH zaraiH zatasahasrazaH
09015049a yAM yAM pratyudyayau senAM tAM tAM jyeSThaH sa pANDavaH
09015049c zarair apAtayad rAjan girIn vajrair ivottamaiH
09015050a sAzvasUtadhvajarathAn rathinaH pAtayan bahUn
09015050c AkrIDad eko balavAn pavanas toyadAn iva
09015051a sAzvArohAMz ca turagAn pattIMz caiva sahasrazaH
09015051c vyapothayata saMgrAme kruddho rudraH pazUn iva
09015052a zUnyam AyodhanaM kRtvA zaravarSaiH samantataH
09015052c abhyadravata madrezaM tiSTha zalyeti cAbravIt
09015053a tasya tac caritaM dRSTvA saMgrAme bhImakarmaNaH
09015053c vitresus tAvakAH sarve zalyas tv enaM samabhyayAt
09015054a tatas tau tu susaMrabdhau pradhmApya salilodbhavau
09015054c samAhUya tadAnyonyaM bhartsayantau samIyatuH
09015055a zalyas tu zaravarSeNa yudhiSThiram avAkirat
09015055c madrarAjaM ca kaunteyaH zaravarSair avAkirat
09015056a vyadRzyetAM tadA rAjan kaGkapatribhir Ahave
09015056c udbhinnarudhirau zUrau madrarAjayudhiSThirau
09015057a puSpitAv iva rejAte vane zalmalikiMzukau
09015057c dIpyamAnau mahAtmAnau prANayor yuddhadurmadau
09015058a dRSTvA sarvANi sainyAni nAdhyavasyaMs tayor jayam
09015058c hatvA madrAdhipaM pArtho bhokSyate 'dya vasuMdharAm
09015059a zalyo vA pANDavaM hatvA dadyAd duryodhanAya gAm
09015059c itIva nizcayo nAbhUd yodhAnAM tatra bhArata
09015060a pradakSiNam abhUt sarvaM dharmarAjasya yudhyataH
09015061a tataH zarazataM zalyo mumocAzu yudhiSThire
09015061c dhanuz cAsya zitAgreNa bANena nirakRntata
09015062a so 'nyat kArmukam AdAya zalyaM zarazatais tribhiH
09015062c avidhyat kArmukaM cAsya kSureNa nirakRntata
09015063a athAsya nijaghAnAzvAMz caturo nataparvabhiH
09015063c dvAbhyAm atha zitAgrAbhyAm ubhau ca pArSNisArathI
09015064a tato 'sya dIpyamAnena pItena nizitena ca
09015064c pramukhe vartamAnasya bhallenApAharad dhvajam
09015064e tataH prabhagnaM tat sainyaM dauryodhanam ariMdama
09015065a tato madrAdhipaM drauNir abhyadhAvat tathAkRtam
09015065c Aropya cainaM svarathaM tvaramANaH pradudruve
09015066a muhUrtam iva tau gatvA nardamAne yudhiSThire
09015066c sthitvA tato madrapatir anyaM syandanam AsthitaH
09015067a vidhivat kalpitaM zubhraM mahAmbudaninAdinam
09015067c sajjayantropakaraNaM dviSatAM romaharSaNam
09016001  saMjaya uvAca
09016001a athAnyad dhanur AdAya balavad vegavattaram
09016001c yudhiSThiraM madrapatir viddhvA siMha ivAnadat
09016002a tataH sa zaravarSeNa parjanya iva vRSTimAn
09016002c abhyavarSad ameyAtmA kSatriyAn kSatriyarSabhaH
09016003a sAtyakiM dazabhir viddhvA bhImasenaM tribhiH zaraiH
09016003c sahadevaM tribhir viddhvA yudhiSThiram apIDayat
09016004a tAMs tAn anyAn maheSvAsAn sAzvAn sarathakuJjarAn
09016004c kuJjarAn kuJjarArohAn azvAn azvaprayAyinaH
09016004e rathAMz ca rathibhiH sArdhaM jaghAna rathinAM varaH
09016005a bAhUMz ciccheda ca tathA sAyudhAn ketanAni ca
09016005c cakAra ca mahIM yodhais tIrNAM vedIM kuzair iva
09016006a tathA tam arisainyAni ghnantaM mRtyum ivAntakam
09016006c parivavrur bhRzaM kruddhAH pANDupAJcAlasomakAH
09016007a taM bhImasenaz ca zinez ca naptA; mAdryAz ca putrau puruSapravIrau
09016007c samAgataM bhImabalena rAjJA; paryApur anyonyam athAhvayantaH
09016008a tatas tu zUrAH samare narendraM; madrezvaraM prApya yudhAM variSTham
09016008c AvArya cainaM samare nRvIrA; jaghnuH zaraiH patribhir ugravegaiH
09016009a saMrakSito bhImasenena rAjA; mAdrIsutAbhyAm atha mAdhavena
09016009c madrAdhipaM patribhir ugravegaiH; stanAntare dharmasuto nijaghne
09016010a tato raNe tAvakAnAM rathaughAH; samIkSya madrAdhipatiM zarArtam
09016010c paryAvavruH pravarAH sarvazaz ca; duryodhanasyAnumate samantAt
09016011a tato drutaM madrajanAdhipo raNe; yudhiSThiraM saptabhir abhyavidhyat
09016011c taM cApi pArtho navabhiH pRSatkair; vivyAdha rAjaMs tumule mahAtmA
09016012a AkarNapUrNAyatasaMprayuktaiH; zarais tadA saMyati tailadhautaiH
09016012c anyonyam AcchAdayatAM mahArathau; madrAdhipaz cApi yudhiSThiraz ca
09016013a tatas tu tUrNaM samare mahArathau; parasparasyAntaram IkSamANau
09016013c zarair bhRzaM vivyadhatur nRpottamau; mahAbalau zatrubhir apradhRSyau
09016014a tayor dhanurjyAtalanisvano mahAn; mahendravajrAzanitulyanisvanaH
09016014c parasparaM bANagaNair mahAtmanoH; pravarSator madrapapANDuvIrayoH
09016015a tau ceratur vyAghrazizuprakAzau; mahAvaneSv AmiSagRddhinAv iva
09016015c viSANinau nAgavarAv ivobhau; tatakSatuH saMyugajAtadarpau
09016016a tatas tu madrAdhipatir mahAtmA; yudhiSThiraM bhImabalaM prasahya
09016016c vivyAdha vIraM hRdaye 'tivegaM; zareNa sUryAgnisamaprabheNa
09016017a tato 'tividdho 'tha yudhiSThiro 'pi; susaMprayuktena zareNa rAjan
09016017c jaghAna madrAdhipatiM mahAtmA; mudaM ca lebhe RSabhaH kurUNAm
09016018a tato muhUrtAd iva pArthivendro; labdhvA saMjJAM krodhasaMraktanetraH
09016018c zatena pArthaM tvarito jaghAna; sahasranetrapratimaprabhAvaH
09016019a tvaraMs tato dharmasuto mahAtmA; zalyasya kruddho navabhiH pRSatkaiH
09016019c bhittvA hy uras tapanIyaM ca varma; jaghAna SaDbhis tv aparaiH pRSatkaiH
09016020a tatas tu madrAdhipatiH prahRSTo; dhanur vikRSya vyasRjat pRSatkAn
09016020c dvAbhyAM kSurAbhyAM ca tathaiva rAjJaz; ciccheda cApaM kurupuMgavasya
09016021a navaM tato 'nyat samare pragRhya; rAjA dhanur ghorataraM mahAtmA
09016021c zalyaM tu viddhvA nizitaiH samantAd; yathA mahendro namuciM zitAgraiH
09016022a tatas tu zalyo navabhiH pRSatkair; bhImasya rAjJaz ca yudhiSThirasya
09016022c nikRtya raukme paTuvarmaNI tayor; vidArayAm Asa bhujau mahAtmA
09016023a tato 'pareNa jvalitArkatejasA; kSureNa rAjJo dhanur unmamAtha
09016023c kRpaz ca tasyaiva jaghAna sUtaM; SaDbhiH zaraiH so 'bhimukhaM papAta
09016024a madrAdhipaz cApi yudhiSThirasya; zaraiz caturbhir nijaghAna vAhAn
09016024c vAhAMz ca hatvA vyakaron mahAtmA; yodhakSayaM dharmasutasya rAjJaH
09016025a tathA kRte rAjani bhImaseno; madrAdhipasyAzu tato mahAtmA
09016025c chittvA dhanur vegavatA zareNa; dvAbhyAm avidhyat subhRzaM narendram
09016026a athApareNAsya jahAra yantuH; kAyAc chiraH saMnahanIyamadhyAt
09016026c jaghAna cAzvAMz caturaH sa zIghraM; tathA bhRzaM kupito bhImasenaH
09016027a tam agraNIH sarvadhanurdharANAm; ekaM carantaM samare 'tivegam
09016027c bhImaH zatena vyakirac charANAM; mAdrIputraH sahadevas tathaiva
09016028a taiH sAyakair mohitaM vIkSya zalyaM; bhImaH zarair asya cakarta varma
09016028c sa bhImasenena nikRttavarmA; madrAdhipaz carma sahasratAram
09016029a pragRhya khaDgaM ca rathAn mahAtmA; praskandya kuntIsutam abhyadhAvat
09016029c chittvA ratheSAM nakulasya so 'tha; yudhiSThiraM bhImabalo 'bhyadhAvat
09016030a taM cApi rAjAnam athotpatantaM; kruddhaM yathaivAntakam Apatantam
09016030c dhRSTadyumno draupadeyAH zikhaNDI; zinez ca naptA sahasA parIyuH
09016031a athAsya carmApratimaM nyakRntad; bhImo mahAtmA dazabhiH pRSatkaH
09016031c khaDgaM ca bhallair nicakarta muSTau; nadan prahRSTas tava sainyamadhye
09016032a tat karma bhImasya samIkSya hRSTAs; te pANDavAnAM pravarA rathaughAH
09016032c nAdaM ca cakrur bhRzam utsmayantaH; zaGkhAMz ca dadhmuH zazisaMnikAzAn
09016033a tenAtha zabdena vibhISaNena; tavAbhitaptaM balam aprahRSTam
09016033c svedAbhibhUtaM rudhirokSitAGgaM; visaMjJakalpaM ca tathA viSaNNam
09016034a sa madrarAjaH sahasAvakIrNo; bhImAgragaiH pANDavayodhamukhyaiH
09016034c yudhiSThirasyAbhimukhaM javena; siMho yathA mRgahetoH prayAtaH
09016035a sa dharmarAjo nihatAzvasUtaM; krodhena dIptajvalanaprakAzam
09016035c dRSTvA tu madrAdhipatiM sa tUrNaM; samabhyadhAvat tam ariM balena
09016036a govindavAkyaM tvaritaM vicintya; dadhre matiM zalyavinAzanAya
09016036c sa dharmarAjo nihatAzvasUte; rathe tiSThaJ zaktim evAbhikAGkSan
09016037a tac cApi zalyasya nizamya karma; mahAtmano bhAgam athAvaziSTam
09016037c smRtvA manaH zalyavadhe yatAtmA; yathoktam indrAvarajasya cakre
09016038a sa dharmarAjo maNihemadaNDAM; jagrAha zaktiM kanakaprakAzAm
09016038c netre ca dIpte sahasA vivRtya; madrAdhipaM kruddhamanA niraikSat
09016039a nirIkSito vai naradeva rAjJA; pUtAtmanA nirhRtakalmaSeNa
09016039c abhUn na yad bhasmasAn madrarAjas; tad adbhutaM me pratibhAti rAjan
09016040a tatas tu zaktiM rucirogradaNDAM; maNipravAlojjvalitAM pradIptAm
09016040c cikSepa vegAt subhRzaM mahAtmA; madrAdhipAya pravaraH kurUNAm
09016041a dIptAm athainAM mahatA balena; savisphuliGgAM sahasA patantIm
09016041c praikSanta sarve kuravaH sametA; yathA yugAnte mahatIm ivolkAm
09016042a tAM kAlarAtrIm iva pAzahastAM; yamasya dhAtrIm iva cograrUpAm
09016042c sabrahmadaNDapratimAm amoghAM; sasarja yatto yudhi dharmarAjaH
09016043a gandhasragagryAsanapAnabhojanair; abhyarcitAM pANDusutaiH prayatnAt
09016043c saMvartakAgnipratimAM jvalantIM; kRtyAm atharvAGgirasIm ivogrAm
09016044a IzAnahetoH pratinirmitAM tAM; tvaSTrA ripUNAm asudehabhakSAm
09016044c bhUmyantarikSAdijalAzayAni; prasahya bhUtAni nihantum IzAm
09016045a ghaNTApatAkAmaNivajrabhAjaM; vaiDUryacitrAM tapanIyadaNDAm
09016045c tvaSTrA prayatnAn niyamena kLptAM; brahmadviSAm antakarIm amoghAm
09016046a balaprayatnAd adhirUDhavegAM; mantraiz ca ghorair abhimantrayitvA
09016046c sasarja mArgeNa ca tAM pareNa; vadhAya madrAdhipates tadAnIm
09016047a hato 'sy asAv ity abhigarjamAno; rudro 'ntakAyAntakaraM yatheSum
09016047c prasArya bAhuM sudRDhaM supANiM; krodhena nRtyann iva dharmarAjaH
09016048a tAM sarvazaktyA prahitAM sa zaktiM; yudhiSThireNAprativAryavIryAm
09016048c pratigrahAyAbhinanarda zalyaH; samyag ghutAm agnir ivAjyadhArAm
09016049a sA tasya marmANi vidArya zubhram; uro vizAlaM ca tathaiva varma
09016049c viveza gAM toyam ivAprasaktA; yazo vizAlaM nRpater dahantI
09016050a nAsAkSikarNAsyaviniHsRtena; prasyandatA ca vraNasaMbhavena
09016050c saMsiktagAtro rudhireNa so 'bhUt; krauJco yathA skandahato mahAdriH
09016051a prasArya bAhU sa rathAd gato gAM; saMchinnavarmA kurunandanena
09016051c mahendravAhapratimo mahAtmA; vajrAhataM zRGgam ivAcalasya
09016052a bAhU prasAryAbhimukho dharmarAjasya madrarAT
09016052c tato nipatito bhUmAv indradhvaja ivocchritaH
09016053a sa tathA bhinnasarvAGgo rudhireNa samukSitaH
09016053c pratyudgata iva premNA bhUmyA sa narapuMgavaH
09016054a priyayA kAntayA kAntaH patamAna ivorasi
09016054c ciraM bhuktvA vasumatIM priyAM kAntAm iva prabhuH
09016054e sarvair aGgaiH samAzliSya prasupta iva so 'bhavat
09016055a dharmye dharmAtmanA yuddhe nihato dharmasUnunA
09016055c samyag ghuta iva sviSTaH prazAnto 'gnir ivAdhvare
09016056a zaktyA vibhinnahRdayaM vipraviddhAyudhadhvajam
09016056c saMzAntam api madrezaM lakSmIr naiva vyamuJcata
09016057a tato yudhiSThiraz cApam AdAyendradhanuSprabham
09016057c vyadhamad dviSataH saMkhye khagarAD iva pannagAn
09016057e dehAsUn nizitair bhallai ripUNAM nAzayan kSaNAt
09016058a tataH pArthasya bANaughair AvRtAH sainikAs tava
09016058c nimIlitAkSAH kSiNvanto bhRzam anyonyam arditAH
09016058e saMnyastakavacA dehair vipatrAyudhajIvitAH
09016059a tataH zalye nipatite madrarAjAnujo yuvA
09016059c bhrAtuH sarvair guNais tulyo rathI pANDavam abhyayAt
09016060a vivyAdha ca narazreSTho nArAcair bahubhis tvaran
09016060c hatasyApacitiM bhrAtuz cikIrSur yuddhadurmadaH
09016061a taM vivyAdhAzugaiH SaDbhir dharmarAjas tvarann iva
09016061c kArmukaM cAsya ciccheda kSurAbhyAM dhvajam eva ca
09016062a tato 'sya dIpyamAnena sudRDhena zitena ca
09016062c pramukhe vartamAnasya bhallenApAharac chiraH
09016063a sakuNDalaM tad dadRze patamAnaM ziro rathAt
09016063c puNyakSayam iva prApya patantaM svargavAsinam
09016064a tasyApakRSTazIrSaM tac charIraM patitaM rathAt
09016064c rudhireNAvasiktAGgaM dRSTvA sainyam abhajyata
09016065a vicitrakavace tasmin hate madranRpAnuje
09016065c hAhAkAraM vikurvANAH kuravo vipradudruvuH
09016066a zalyAnujaM hataM dRSTvA tAvakAs tyaktajIvitAH
09016066c vitresuH pANDavabhayAd rajodhvastAs tathA bhRzam
09016067a tAMs tathA bhajyatas trastAn kauravAn bharatarSabha
09016067c ziner naptA kiran bANair abhyavartata sAtyakiH
09016068a tam AyAntaM maheSvAsam aprasahyaM durAsadam
09016068c hArdikyas tvarito rAjan pratyagRhNAd abhItavat
09016069a tau sametau mahAtmAnau vArSNeyAv aparAjitau
09016069c hArdikyaH sAtyakiz caiva siMhAv iva madotkaTau
09016070a iSubhir vimalAbhAsaiz chAdayantau parasparam
09016070c arcirbhir iva sUryasya divAkarasamaprabhau
09016071a cApamArgabaloddhUtAn mArgaNAn vRSNisiMhayoH
09016071c AkAze samapazyAma pataMgAn iva zIghragAn
09016072a sAtyakiM dazabhir viddhvA hayAMz cAsya tribhiH zaraiH
09016072c cApam ekena ciccheda hArdikyo nataparvaNA
09016073a tan nikRttaM dhanuH zreSTham apAsya zinipuMgavaH
09016073c anyad Adatta vegena vegavattaram Ayudham
09016074a tad AdAya dhanuH zreSThaM variSThaH sarvadhanvinAm
09016074c hArdikyaM dazabhir bANaiH pratyavidhyat stanAntare
09016075a tato rathaM yugeSAM ca chittvA bhallaiH susaMyataiH
09016075c azvAMs tasyAvadhIt tUrNam ubhau ca pArSNisArathI
09016076a madrarAje hate rAjan virathe kRtavarmaNi
09016076c duryodhanabalaM sarvaM punar AsIt parAGmukham
09016077a tat pare nAvabudhyanta sainyena rajasA vRte
09016077c balaM tu hatabhUyiSThaM tat tadAsIt parAGmukham
09016078a tato muhUrtAt te 'pazyan rajo bhaumaM samutthitam
09016078c vividhaiH zoNitasrAvaiH prazAntaM puruSarSabha
09016079a tato duryodhano dRSTvA bhagnaM svabalam antikAt
09016079c javenApatataH pArthAn ekaH sarvAn avArayat
09016080a pANDavAn sarathAn dRSTvA dhRSTadyumnaM ca pArSatam
09016080c AnartaM ca durAdharSaM zitair bANair avAkirat
09016081a taM pare nAbhyavartanta martyA mRtyum ivAgatam
09016081c athAnyaM ratham AsthAya hArdikyo 'pi nyavartata
09016082a tato yudhiSThiro rAjA tvaramANo mahArathaH
09016082c caturbhir nijaghAnAzvAn patribhiH kRtavarmaNaH
09016082e vivyAdha gautamaM cApi SaDbhir bhallaiH sutejanaiH
09016083a azvatthAmA tato rAjJA hatAzvaM virathIkRtam
09016083c samapovAha hArdikyaM svarathena yudhiSThirAt
09016084a tataH zAradvato 'STAbhiH pratyavidhyad yudhiSThiram
09016084c vivyAdha cAzvAn nizitais tasyASTAbhiH zilImukhaiH
09016085a evam etan mahArAja yuddhazeSam avartata
09016085c tava durmantrite rAjan sahaputrasya bhArata
09016086a tasmin maheSvAsavare vizaste; saMgrAmamadhye kurupuMgavena
09016086c pArthAH sametAH paramaprahRSTAH; zaGkhAn pradadhmur hatam IkSya zalyam
09016087a yudhiSThiraM ca prazazaMsur Ajau; purA surA vRtravadhe yathendram
09016087c cakruz ca nAnAvidhavAdyazabdAn; ninAdayanto vasudhAM samantAt
09017001  saMjaya uvAca
09017001a zalye tu nihate rAjan madrarAjapadAnugAH
09017001c rathAH saptazatA vIrA niryayur mahato balAt
09017002a duryodhanas tu dviradam AruhyAcalasaMnibham
09017002c chatreNa dhriyamANena vIjyamAnaz ca cAmaraiH
09017002e na gantavyaM na gantavyam iti madrAn avArayat
09017003a duryodhanena te vIrA vAryamANAH punaH punaH
09017003c yudhiSThiraM jighAMsantaH pANDUnAM prAvizan balam
09017004a te tu zUrA mahArAja kRtacittAH sma yodhane
09017004c dhanuHzabdaM mahat kRtvA sahAyudhyanta pANDavaiH
09017005a zrutvA tu nihataM zalyaM dharmaputraM ca pIDitam
09017005c madrarAjapriye yuktair madrakANAM mahArathaiH
09017006a AjagAma tataH pArtho gANDIvaM vikSipan dhanuH
09017006c pUrayan rathaghoSeNa dizaH sarvA mahArathaH
09017007a tato 'rjunaz ca bhImaz ca mAdrIputrau ca pANDavau
09017007c sAtyakiz ca naravyAghro draupadeyAz ca sarvazaH
09017008a dhRSTadyumnaH zikhaNDI ca pAJcAlAH saha somakaiH
09017008c yudhiSThiraM parIpsantaH samantAt paryavArayan
09017009a te samantAt parivRtAH pANDavaiH puruSarSabhAH
09017009c kSobhayanti sma tAM senAM makarAH sAgaraM yathA
09017010a purovAtena gaGgeva kSobhyamAnA mahAnadI
09017010c akSobhyata tadA rAjan pANDUnAM dhvajinI punaH
09017011a praskandya senAM mahatIM tyaktAtmAno mahArathAH
09017011c vRkSAn iva mahAvAtAH kampayanti sma tAvakAH
09017012a bahavaz cukruzus tatra kva sa rAjA yudhiSThiraH
09017012c bhrAtaro vAsya te zUrA dRzyante neha ke cana
09017013a pAJcAlAnAM mahAvIryAH zikhaNDI ca mahArathaH
09017013c dhRSTadyumno 'tha zaineyo draupadeyAz ca sarvazaH
09017014a evaM tAn vAdinaH zUrAn draupadeyA mahArathAH
09017014c abhyaghnan yuyudhAnaz ca madrarAjapadAnugAn
09017015a cakrair vimathitaiH ke cit ke cic chinnair mahAdhvajaiH
09017015c pratyadRzyanta samare tAvakA nihatAH paraiH
09017016a Alokya pANDavAn yuddhe yodhA rAjan samantataH
09017016c vAryamANA yayur vegAt tava putreNa bhArata
09017017a duryodhanas tu tAn vIrAn vArayAm Asa sAntvayan
09017017c na cAsya zAsanaM kaz cit tatra cakre mahArathaH
09017018a tato gAndhArarAjasya putraH zakunir abravIt
09017018c duryodhanaM mahArAja vacanaM vacanakSamaH
09017019a kiM naH saMprekSamANAnAM madrANAM hanyate balam
09017019c na yuktam etat samare tvayi tiSThati bhArata
09017020a sahitair nAma yoddhavyam ity eSa samayaH kRtaH
09017020c atha kasmAt parAn eva ghnato marSayase nRpa
09017021  duryodhana uvAca
09017021a vAryamANA mayA pUrvaM naite cakrur vaco mama
09017021c ete hi nihatAH sarve praskannAH pANDuvAhinIm
09017022  zakunir uvAca
09017022a na bhartuH zAsanaM vIrA raNe kurvanty amarSitAH
09017022c alaM kroddhuM tathaiteSAM nAyaM kAla upekSitum
09017023a yAmaH sarve 'tra saMbhUya savAjirathakuJjarAH
09017023c paritrAtuM maheSvAsAn madrarAjapadAnugAn
09017024a anyonyaM parirakSAmo yatnena mahatA nRpa
09017024c evaM sarve 'nusaMcintya prayayur yatra sainikAH
09017025  saMjaya uvAca
09017025a evam uktas tato rAjA balena mahatA vRtaH
09017025c prayayau siMhanAdena kampayan vai vasuMdharAm
09017026a hata vidhyata gRhNIta praharadhvaM nikRntata
09017026c ity AsIt tumulaH zabdas tava sainyasya bhArata
09017027a pANDavAs tu raNe dRSTvA madrarAjapadAnugAn
09017027c sahitAn abhyavartanta gulmam AsthAya madhyamam
09017028a te muhUrtAd raNe vIrA hastAhastaM vizAM pate
09017028c nihatAH pratyadRzyanta madrarAjapadAnugAH
09017029a tato naH saMprayAtAnAM hatAmitrAs tarasvinaH
09017029c hRSTAH kilakilAzabdam akurvan sahitAH pare
09017030a athotthitAni ruNDAni samadRzyanta sarvazaH
09017030c papAta mahatI colkA madhyenAdityamaNDalam
09017031a rathair bhagnair yugAkSaiz ca nihataiz ca mahArathaiH
09017031c azvair nipatitaiz caiva saMchannAbhUd vasuMdharA
09017032a vAtAyamAnais turagair yugAsaktais turaMgamaiH
09017032c adRzyanta mahArAja yodhAs tatra raNAjire
09017033a bhagnacakrAn rathAn ke cid avahaMs turagA raNe
09017033c rathArdhaM ke cid AdAya dizo daza vibabhramuH
09017033e tatra tatra ca dRzyante yoktraiH zliSTAH sma vAjinaH
09017034a rathinaH patamAnAz ca vyadRzyanta narottama
09017034c gaganAt pracyutAH siddhAH puNyAnAm iva saMkSaye
09017035a nihateSu ca zUreSu madrarAjAnugeSu ca
09017035c asmAn Apatataz cApi dRSTvA pArthA mahArathAH
09017036a abhyavartanta vegena jayagRdhrAH prahAriNaH
09017036c bANazabdaravAn kRtvA vimizrAJ zaGkhanisvanaiH
09017037a asmAMs tu punar AsAdya labdhalakSAH prahAriNaH
09017037c zarAsanAni dhunvAnAH siMhanAdAn pracukruzuH
09017038a tato hatam abhiprekSya madrarAjabalaM mahat
09017038c madrarAjaM ca samare dRSTvA zUraM nipAtitam
09017038e duryodhanabalaM sarvaM punar AsIt parAGmukham
09017039a vadhyamAnaM mahArAja pANDavair jitakAzibhiH
09017039c dizo bheje 'tha saMbhrAntaM trAsitaM dRDhadhanvibhiH
09018001  saMjaya uvAca
09018001a pAtite yudhi durdharSe madrarAje mahArathe
09018001c tAvakAs tava putrAz ca prAyazo vimukhAbhavan
09018002a vaNijo nAvi bhinnAyAM yathAgAdhe 'plave 'rNave
09018002c apAre pAram icchanto hate zUre mahAtmani
09018003a madrarAje mahArAja vitrastAH zaravikSatAH
09018003c anAthA nAtham icchanto mRgAH siMhArditA iva
09018004a vRSA yathA bhagnazRGgAH zIrNadantA gajA iva
09018004c madhyAhne pratyapAyAma nirjitA dharmasUnunA
09018005a na saMdhAtum anIkAni na ca rAjan parAkrame
09018005c AsId buddhir hate zalye tava yodhasya kasya cit
09018006a bhISme droNe ca nihate sUtaputre ca bhArata
09018006c yad duHkhaM tava yodhAnAM bhayaM cAsId vizAM pate
09018006e tad bhayaM sa ca naH zoko bhUya evAbhyavartata
09018007a nirAzAz ca jaye tasmin hate zalye mahArathe
09018007c hatapravIrA vidhvastA vikRttAz ca zitaiH zaraiH
09018007e madrarAje hate rAjan yodhAs te prAdravan bhayAt
09018008a azvAn anye gajAn anye rathAn anye mahArathAH
09018008c Aruhya javasaMpannAH pAdAtAH prAdravan bhayAt
09018009a dvisAhasrAz ca mAtaGgA girirUpAH prahAriNaH
09018009c saMprAdravan hate zalye aGkuzAGguSThacoditAH
09018010a te raNAd bharatazreSTha tAvakAH prAdravan dizaH
09018010c dhAvantaz cApy adRzyanta zvasamAnAH zarAturAH
09018011a tAn prabhagnAn drutAn dRSTvA hatotsAhAn parAjitAn
09018011c abhyadravanta pAJcAlAH pANDavAz ca jayaiSiNaH
09018012a bANazabdaravaz cApi siMhanAdaz ca puSkalaH
09018012c zaGkhazabdaz ca zUrANAM dAruNaH samapadyata
09018013a dRSTvA tu kauravaM sainyaM bhayatrastaM pravidrutam
09018013c anyonyaM samabhASanta pAJcAlAH pANDavaiH saha
09018014a adya rAjA satyadhRtir jitAmitro yudhiSThiraH
09018014c adya duryodhano hIno dIptayA nRpatizriyA
09018015a adya zrutvA hataM putraM dhRtarASTro janezvaraH
09018015c niHsaMjJaH patito bhUmau kilbiSaM pratipadyatAm
09018016a adya jAnAtu kaunteyaM samarthaM sarvadhanvinAm
09018016c adyAtmAnaM ca durmedhA garhayiSyati pApakRt
09018016e adya kSattur vacaH satyaM smaratAM bruvato hitam
09018017a adyaprabhRti pArthAMz ca preSyabhUta upAcaran
09018017c vijAnAtu nRpo duHkhaM yat prAptaM pANDunandanaiH
09018018a adya kRSNasya mAhAtmyaM jAnAtu sa mahIpatiH
09018018c adyArjunadhanurghoSaM ghoraM jAnAtu saMyuge
09018019a astrANAM ca balaM sarvaM bAhvoz ca balam Ahave
09018019c adya jJAsyati bhImasya balaM ghoraM mahAtmanaH
09018020a hate duryodhane yuddhe zakreNevAsure maye
09018020c yat kRtaM bhImasenena duHzAsanavadhe tadA
09018020e nAnyaH kartAsti loke tad Rte bhImaM mahAbalam
09018021a jAnItAm adya jyeSThasya pANDavasya parAkramam
09018021c madrarAjaM hataM zrutvA devair api suduHsaham
09018022a adya jJAsyati saMgrAme mAdrIputrau mahAbalau
09018022c nihate saubale zUre gAndhAreSu ca sarvazaH
09018023a kathaM teSAM jayo na syAd yeSAM yoddhA dhanaMjayaH
09018023c sAtyakir bhImasenaz ca dhRSTadyumnaz ca pArSataH
09018024a draupadyAs tanayAH paJca mAdrIputrau ca pANDavau
09018024c zikhaNDI ca maheSvAso rAjA caiva yudhiSThiraH
09018025a yeSAM ca jagatAM nAtho nAthaH kRSNo janArdanaH
09018025c kathaM teSAM jayo na syAd yeSAM dharmo vyapAzrayaH
09018026a bhISmaM droNaM ca karNaM ca madrarAjAnam eva ca
09018026c tathAnyAn nRpatIn vIrAJ zatazo 'tha sahasrazaH
09018027a ko 'nyaH zakto raNe jetum Rte pArthaM yudhiSThiram
09018027c yasya nAtho hRSIkezaH sadA dharmayazonidhiH
09018028a ity evaM vadamAnAs te harSeNa mahatA yutAH
09018028c prabhagnAMs tAvakAn rAjan sRJjayAH pRSThato 'nvayuH
09018029a dhanaMjayo rathAnIkam abhyavartata vIryavAn
09018029c mAdrIputrau ca zakuniM sAtyakiz ca mahArathaH
09018030a tAn prekSya dravataH sarvAn bhImasenabhayArditAn
09018030c duryodhanas tadA sUtam abravId utsmayann iva
09018031a na mAtikramate pArtho dhanuSpANim avasthitam
09018031c jaghane sarvasainyAnAM mamAzvAn pratipAdaya
09018032a jaghane yudhyamAnaM hi kaunteyo mAM dhanaMjayaH
09018032c notsahetAbhyatikrAntuM velAm iva mahodadhiH
09018033a pazya sainyaM mahat sUta pANDavaiH samabhidrutam
09018033c sainyareNuM samuddhUtaM pazyasvainaM samantataH
09018034a siMhanAdAMz ca bahuzaH zRNu ghorAn bhayAnakAn
09018034c tasmAd yAhi zanaiH sUta jaghanaM paripAlaya
09018035a mayi sthite ca samare niruddheSu ca pANDuSu
09018035c punar Avartate tUrNaM mAmakaM balam ojasA
09018036a tac chrutvA tava putrasya zUrAgryasadRzaM vacaH
09018036c sArathir hemasaMchannAJ zanair azvAn acodayat
09018037a gajAzvarathibhir hInAs tyaktAtmAnaH padAtayaH
09018037c ekaviMzatisAhasrAH saMyugAyAvatasthire
09018038a nAnAdezasamudbhUtA nAnAraJjitavAsasaH
09018038c avasthitAs tadA yodhAH prArthayanto mahad yazaH
09018039a teSAm ApatatAM tatra saMhRSTAnAM parasparam
09018039c saMmardaH sumahAJ jajJe ghorarUpo bhayAnakaH
09018040a bhImasenaM tadA rAjan dhRSTadyumnaM ca pArSatam
09018040c balena caturaGgeNa nAnAdezyA nyavArayan
09018041a bhImam evAbhyavartanta raNe 'nye tu padAtayaH
09018041c prakSveDyAsphoTya saMhRSTA vIralokaM yiyAsavaH
09018042a AsAdya bhImasenaM tu saMrabdhA yuddhadurmadAH
09018042c dhArtarASTrA vinedur hi nAnyAM cAkathayan kathAm
09018042e parivArya raNe bhImaM nijaghnus te samantataH
09018043a sa vadhyamAnaH samare padAtigaNasaMvRtaH
09018043c na cacAla rathopasthe mainAka iva parvataH
09018044a te tu kruddhA mahArAja pANDavasya mahAratham
09018044c nigrahItuM pracakrur hi yodhAMz cAnyAn avArayan
09018045a akrudhyata raNe bhImas tais tadA paryavasthitaiH
09018045c so 'vatIrya rathAt tUrNaM padAtiH samavasthitaH
09018046a jAtarUpaparicchannAM pragRhya mahatIM gadAm
09018046c avadhIt tAvakAn yodhAn daNDapANir ivAntakaH
09018047a rathAzvadvipahInAMs tu tAn bhImo gadayA balI
09018047c ekaviMzatisAhasrAn padAtIn avapothayat
09018048a hatvA tat puruSAnIkaM bhImaH satyaparAkramaH
09018048c dhRSTadyumnaM puraskRtya nacirAt pratyadRzyata
09018049a pAdAtA nihatA bhUmau zizyire rudhirokSitAH
09018049c saMbhagnA iva vAtena karNikArAH supuSpitAH
09018050a nAnApuSpasrajopetA nAnAkuNDaladhAriNaH
09018050c nAnAjAtyA hatAs tatra nAnAdezasamAgatAH
09018051a patAkAdhvajasaMchannaM padAtInAM mahad balam
09018051c nikRttaM vibabhau tatra ghorarUpaM bhayAnakam
09018052a yudhiSThirapurogAs tu sarvasainyamahArathAH
09018052c abhyadhAvan mahAtmAnaM putraM duryodhanaM tava
09018053a te sarve tAvakAn dRSTvA maheSvAsAn parAGmukhAn
09018053c nAbhyavartanta te putraM veleva makarAlayam
09018054a tad adbhutam apazyAma tava putrasya pauruSam
09018054c yad ekaM sahitAH pArthA na zekur ativartitum
09018055a nAtidUrApayAtaM tu kRtabuddhiM palAyane
09018055c duryodhanaH svakaM sainyam abravId bhRzavikSatam
09018056a na taM dezaM prapazyAmi pRthivyAM parvateSu vA
09018056c yatra yAtAn na vo hanyuH pANDavAH kiM sRtena vaH
09018057a alpaM ca balam eteSAM kRSNau ca bhRzavikSatau
09018057c yadi sarve 'tra tiSThAmo dhruvo no vijayo bhavet
09018058a viprayAtAMs tu vo bhinnAn pANDavAH kRtakilbiSAn
09018058c anusRtya haniSyanti zreyo naH samare sthitam
09018059a zRNudhvaM kSatriyAH sarve yAvantaH stha samAgatAH
09018059c yadA zUraM ca bhIruM ca mArayaty antakaH sadA
09018059e ko nu mUDho na yudhyeta puruSaH kSatriyabruvaH
09018060a zreyo no bhImasenasya kruddhasya pramukhe sthitam
09018060c sukhaH sAMgrAmiko mRtyuH kSatradharmeNa yudhyatAm
09018060e jitveha sukham Apnoti hataH pretya mahat phalam
09018061a na yuddhadharmAc chreyAn vai panthAH svargasya kauravAH
09018061c acireNa jitA&l lokAn hato yuddhe samaznute
09018062a zrutvA tu vacanaM tasya pUjayitvA ca pArthivAH
09018062c punar evAnvavartanta pANDavAn AtatAyinaH
09018063a tAn Apatata evAzu vyUDhAnIkAH prahAriNaH
09018063c pratyudyayus tadA pArthA jayagRdhrAH prahAriNaH
09018064a dhanaMjayo rathenAjAv abhyavartata vIryavAn
09018064c vizrutaM triSu lokeSu gANDIvaM vikSipan dhanuH
09018065a mAdrIputrau ca zakuniM sAtyakiz ca mahAbalaH
09018065c javenAbhyapatan hRSTA yato vai tAvakaM balam
09019001  saMjaya uvAca
09019001a saMnivRtte balaughe tu zAlvo mlecchagaNAdhipaH
09019001c abhyavartata saMkruddhaH pANDUnAM sumahad balam
09019002a AsthAya sumahAnAgaM prabhinnaM parvatopamam
09019002c dRptam airAvataprakhyam amitragaNamardanam
09019003a yo 'sau mahAbhadrakulaprasUtaH; supUjito dhArtarASTreNa nityam
09019003c sukalpitaH zAstravinizcayajJaiH; sadopavAhyaH samareSu rAjan
09019004a tam Asthito rAjavaro babhUva; yathodayasthaH savitA kSapAnte
09019004c sa tena nAgapravareNa rAjann; abhyudyayau pANDusutAn samantAt
09019004e zitaiH pRSatkair vidadAra cApi; mahendravajrapratimaiH sughoraiH
09019005a tataH zarAn vai sRjato mahAraNe; yodhAMz ca rAjan nayato yamAya
09019005c nAsyAntaraM dadRzuH sve pare vA; yathA purA vajradharasya daityAH
09019006a te pANDavAH somakAH sRJjayAz ca; tam eva nAgaM dadRzuH samantAt
09019006c sahasrazo vai vicarantam ekaM; yathA mahendrasya gajaM samIpe
09019007a saMdrAvyamANaM tu balaM pareSAM; parItakalpaM vibabhau samantAt
09019007c naivAvatasthe samare bhRzaM bhayAd; vimardamAnaM tu parasparaM tadA
09019008a tataH prabhagnA sahasA mahAcamUH; sA pANDavI tena narAdhipena
09019008c dizaz catasraH sahasA pradhAvitA; gajendravegaM tam apArayantI
09019009a dRSTvA ca tAM vegavatA prabhagnAM; sarve tvadIyA yudhi yodhamukhyAH
09019009c apUjayaMs tatra narAdhipaM taM; dadhmuz ca zaGkhAJ zazisaMnikAzAn
09019010a zrutvA ninAdaM tv atha kauravANAM; harSAd vimuktaM saha zaGkhazabdaiH
09019010c senApatiH pANDavasRJjayAnAM; pAJcAlaputro na mamarSa roSAt
09019011a tatas tu taM vai dviradaM mahAtmA; pratyudyayau tvaramANo jayAya
09019011c jambho yathA zakrasamAgame vai; nAgendram airAvaNam indravAhyam
09019012a tam ApatantaM sahasA tu dRSTvA; pAJcAlarAjaM yudhi rAjasiMhaH
09019012c taM vai dvipaM preSayAm Asa tUrNaM; vadhAya rAjan drupadAtmajasya
09019013a sa taM dvipaM sahasAbhyApatantam; avidhyad arkapratimaiH pRSatkaiH
09019013c karmAradhautair nizitair jvaladbhir; nArAcamukhyais tribhir ugravegaiH
09019014a tato 'parAn paJca zitAn mahAtmA; nArAcamukhyAn visasarja kumbhe
09019014c sa tais tu viddhaH paramadvipo raNe; tadA parAvRtya bhRzaM pradudruve
09019015a taM nAgarAjaM sahasA praNunnaM; vidrAvyamANaM ca nigRhya zAlvaH
09019015c tottrAGkuzaiH preSayAm Asa tUrNaM; pAJcAlarAjasya rathaM pradizya
09019016a dRSTvApatantaM sahasA tu nAgaM; dhRSTadyumnaH svarathAc chIghram eva
09019016c gadAM pragRhyAzu javena vIro; bhUmiM prapanno bhayavihvalAGgaH
09019017a sa taM rathaM hemavibhUSitAGgaM; sAzvaM sasUtaM sahasA vimRdya
09019017c utkSipya hastena tadA mahAdvipo; vipothayAm Asa vasuMdharAtale
09019018a pAJcAlarAjasya sutaM sa dRSTvA; tadArditaM nAgavareNa tena
09019018c tam abhyadhAvat sahasA javena; bhImaH zikhaNDI ca zinez ca naptA
09019019a zaraiz ca vegaM sahasA nigRhya; tasyAbhito 'bhyApatato gajasya
09019019c sa saMgRhIto rathibhir gajo vai; cacAla tair vAryamANaz ca saMkhye
09019020a tataH pRSatkAn pravavarSa rAjA; sUryo yathA razmijAlaM samantAt
09019020c tenAzugair vadhyamAnA rathaughAH; pradudruvus tatra tatas tu sarve
09019021a tat karma zAlvasya samIkSya sarve; pAJcAlamatsyA nRpa sRJjayAz ca
09019021c hAhAkArair nAdayantaH sma yuddhe; dvipaM samantAd rurudhur narAgryAH
09019022a pAJcAlarAjas tvaritas tu zUro; gadAM pragRhyAcalazRGgakalpAm
09019022c asaMbhramaM bhArata zatrughAtI; javena vIro 'nusasAra nAgam
09019023a tato 'tha nAgaM dharaNIdharAbhaM; madaM sravantaM jaladaprakAzam
09019023c gadAM samAvidhya bhRzaM jaghAna; pAJcAlarAjasya sutas tarasvI
09019024a sa bhinnakumbhaH sahasA vinadya; mukhAt prabhUtaM kSatajaM vimuJcan
09019024c papAta nAgo dharaNIdharAbhaH; kSitiprakampAc calito yathAdriH
09019025a nipAtyamAne tu tadA gajendre; hAhAkRte tava putrasya sainye
09019025c sa zAlvarAjasya zinipravIro; jahAra bhallena ziraH zitena
09019026a hRtottamAGgo yudhi sAtvatena; papAta bhUmau saha nAgarAjJA
09019026c yathAdrizRGgaM sumahat praNunnaM; vajreNa devAdhipacoditena
09020001  saMjaya uvAca
09020001a tasmiMs tu nihate zUre zAlve samitizobhane
09020001c tavAbhajyad balaM vegAd vAteneva mahAdrumaH
09020002a tat prabhagnaM balaM dRSTvA kRtavarmA mahArathaH
09020002c dadhAra samare zUraH zatrusainyaM mahAbalaH
09020003a saMnivRttAs tu te zUrA dRSTvA sAtvatam Ahave
09020003c zailopamaM sthitaM rAjan kIryamANaM zarair yudhi
09020004a tataH pravavRte yuddhaM kurUNAM pANDavaiH saha
09020004c nivRttAnAM mahArAja mRtyuM kRtvA nivartanam
09020005a tatrAzcaryam abhUd yuddhaM sAtvatasya paraiH saha
09020005c yad eko vArayAm Asa pANDusenAM durAsadAm
09020006a teSAm anyonyasuhRdAM kRte karmaNi duSkare
09020006c siMhanAdaH prahRSTAnAM divaHspRk sumahAn abhUt
09020007a tena zabdena vitrastAn pAJcAlAn bharatarSabha
09020007c ziner naptA mahAbAhur anvapadyata sAtyakiH
09020008a sa samAsAdya rAjAnaM kSemadhUrtiM mahAbalam
09020008c saptabhir nizitair bANair anayad yamasAdanam
09020009a tam AyAntaM mahAbAhuM pravapantaM zitAJ zarAn
09020009c javenAbhyapatad dhImAn hArdikyaH zinipuMgavam
09020010a tau siMhAv iva nardantau dhanvinau rathinAM varau
09020010c anyonyam abhyadhAvetAM zastrapravaradhAriNau
09020011a pANDavAH saha pAJcAlair yodhAz cAnye nRpottamAH
09020011c prekSakAH samapadyanta tayoH puruSasiMhayoH
09020012a nArAcair vatsadantaiz ca vRSNyandhakamahArathau
09020012c abhijaghnatur anyonyaM prahRSTAv iva kuJjarau
09020013a carantau vividhAn mArgAn hArdikyazinipuMgavau
09020013c muhur antardadhAte tau bANavRSTyA parasparam
09020014a cApavegabaloddhUtAn mArgaNAn vRSNisiMhayoH
09020014c AkAze samapazyAma pataMgAn iva zIghragAn
09020015a tam ekaM satyakarmANam AsAdya hRdikAtmajaH
09020015c avidhyan nizitair bANaiz caturbhiz caturo hayAn
09020016a sa dIrghabAhuH saMkruddhas tottrArdita iva dvipaH
09020016c aSTAbhiH kRtavarmANam avidhyat parameSubhiH
09020017a tataH pUrNAyatotsRSTaiH kRtavarmA zilAzitaiH
09020017c sAtyakiM tribhir Ahatya dhanur ekena cicchide
09020018a nikRttaM tad dhanuHzreSTham apAsya zinipuMgavaH
09020018c anyad Adatta vegena zaineyaH sazaraM dhanuH
09020019a tad AdAya dhanuHzreSThaM variSThaH sarvadhanvinAm
09020019c Aropya ca mahAvIryo mahAbuddhir mahAbalaH
09020020a amRSyamANo dhanuSaz chedanaM kRtavarmaNA
09020020c kupito 'tirathaH zIghraM kRtavarmANam abhyayAt
09020021a tataH sunizitair bANair dazabhiH zinipuMgavaH
09020021c jaghAna sUtam azvAMz ca dhvajaM ca kRtavarmaNaH
09020022a tato rAjan maheSvAsaH kRtavarmA mahArathaH
09020022c hatAzvasUtaM saMprekSya rathaM hemapariSkRtam
09020023a roSeNa mahatAviSTaH zUlam udyamya mAriSa
09020023c cikSepa bhujavegena jighAMsuH zinipuMgavam
09020024a tac chUlaM sAtvato hy Ajau nirbhidya nizitaiH zaraiH
09020024c cUrNitaM pAtayAm Asa mohayann iva mAdhavam
09020024e tato 'pareNa bhallena hRdy enaM samatADayat
09020025a sa yuddhe yuyudhAnena hatAzvo hatasArathiH
09020025c kRtavarmA kRtAstreNa dharaNIm anvapadyata
09020026a tasmin sAtyakinA vIre dvairathe virathIkRte
09020026c samapadyata sarveSAM sainyAnAM sumahad bhayam
09020027a putrasya tava cAtyarthaM viSAdaH samapadyata
09020027c hatasUte hatAzve ca virathe kRtavarmaNi
09020028a hatAzvaM ca samAlakSya hatasUtam ariMdamam
09020028c abhyadhAvat kRpo rAjaJ jighAMsuH zinipuMgavam
09020029a tam Aropya rathopasthe miSatAM sarvadhanvinAm
09020029c apovAha mahAbAhus tUrNam AyodhanAd api
09020030a zaineye 'dhiSThite rAjan virathe kRtavarmaNi
09020030c duryodhanabalaM sarvaM punar AsIt parAGmukham
09020031a tat pare nAvabudhyanta sainyena rajasAvRte
09020031c tAvakAH pradrutA rAjan duryodhanam Rte nRpam
09020032a duryodhanas tu saMprekSya bhagnaM svabalam antikAt
09020032c javenAbhyapatat tUrNaM sarvAMz caiko nyavArayat
09020033a pANDUMz ca sarvAn saMkruddho dhRSTadyumnaM ca pArSatam
09020033c zikhaNDinaM draupadeyAn pAJcAlAnAM ca ye gaNAH
09020034a kekayAn somakAMz caiva pAJcAlAMz caiva mAriSa
09020034c asaMbhramaM durAdharSaH zitair astrair avArayat
09020035a atiSThad Ahave yattaH putras tava mahAbalaH
09020035c yathA yajJe mahAn agnir mantrapUtaH prakAzayan
09020036a taM pare nAbhyavartanta martyA mRtyum ivAhave
09020036c athAnyaM ratham AsthAya hArdikyaH samapadyata
09021001  saMjaya uvAca
09021001a putras tu te mahArAja rathastho rathinAM varaH
09021001c durutsaho babhau yuddhe yathA rudraH pratApavAn
09021002a tasya bANasahasrais tu pracchannA hy abhavan mahI
09021002c parAMz ca siSice bANair dhArAbhir iva parvatAn
09021003a na ca so 'sti pumAn kaz cit pANDavAnAM mahAhave
09021003c hayo gajo ratho vApi yo 'sya bANair avikSataH
09021004a yaM yaM hi samare yodhaM prapazyAmi vizAM pate
09021004c sa sa bANaiz cito 'bhUd vai putreNa tava bhArata
09021005a yathA sainyena rajasA samuddhUtena vAhinI
09021005c pratyadRzyata saMchannA tathA bANair mahAtmanaH
09021006a bANabhUtAm apazyAma pRthivIM pRthivIpate
09021006c duryodhanena prakRtAM kSiprahastena dhanvinA
09021007a teSu yodhasahasreSu tAvakeSu pareSu ca
09021007c eko duryodhano hy AsIt pumAn iti matir mama
09021008a tatrAdbhutam apazyAma tava putrasya vikramam
09021008c yad ekaM sahitAH pArthA nAtyavartanta bhArata
09021009a yudhiSThiraM zatenAjau vivyAdha bharatarSabha
09021009c bhImasenaM ca saptatyA sahadevaM ca saptabhiH
09021010a nakulaM ca catuHSaSTyA dhRSTadyumnaM ca paJcabhiH
09021010c saptabhir draupadeyAMz ca tribhir vivyAdha sAtyakim
09021010e dhanuz ciccheda bhallena sahadevasya mAriSa
09021011a tad apAsya dhanuz chinnaM mAdrIputraH pratApavAn
09021011c abhyadhAvata rAjAnaM pragRhyAnyan mahad dhanuH
09021011e tato duryodhanaM saMkhye vivyAdha dazabhiH zaraiH
09021012a nakulaz ca tato vIro rAjAnaM navabhiH zaraiH
09021012c ghorarUpair maheSvAso vivyAdha ca nanAda ca
09021013a sAtyakiz cApi rAjAnaM zareNAnataparvaNA
09021013c draupadeyAs trisaptatyA dharmarAjaz ca saptabhiH
09021013e azItyA bhImasenaz ca zarai rAjAnam Ardayat
09021014a samantAt kIryamANas tu bANasaMghair mahAtmabhiH
09021014c na cacAla mahArAja sarvasainyasya pazyataH
09021015a lAghavaM sauSThavaM cApi vIryaM caiva mahAtmanaH
09021015c ati sarvANi bhUtAni dadRzuH sarvamAnavAH
09021016a dhArtarASTrAs tu rAjendra yAtvA tu svalpam antaram
09021016c apazyamAnA rAjAnaM paryavartanta daMzitAH
09021017a teSAm ApatatAM ghoras tumulaH samajAyata
09021017c kSubdhasya hi samudrasya prAvRTkAle yathA nizi
09021018a samAsAdya raNe te tu rAjAnam aparAjitam
09021018c pratyudyayur maheSvAsAH pANDavAn AtatAyinaH
09021019a bhImasenaM raNe kruddhaM droNaputro nyavArayat
09021019c tato bANair mahArAja pramuktaiH sarvatodizam
09021019e nAjJAyanta raNe vIrA na dizaH pradizas tathA
09021020a tAv ubhau krUrakarmANAv ubhau bhArata duHsahau
09021020c ghorarUpam ayudhyetAM kRtapratikRtaiSiNau
09021020e trAsayantau jagat sarvaM jyAkSepavihatatvacau
09021021a zakunis tu raNe vIro yudhiSThiram apIDayat
09021021c tasyAzvAMz caturo hatvA subalasya suto vibhuH
09021021e nAdaM cakAra balavAn sarvasainyAni kampayan
09021022a etasminn antare vIraM rAjAnam aparAjitam
09021022c apovAha rathenAjau sahadevaH pratApavAn
09021023a athAnyaM ratham AsthAya dharmarAjo yudhiSThiraH
09021023c zakuniM navabhir viddhvA punar vivyAdha paJcabhiH
09021023e nanAda ca mahAnAdaM pravaraH sarvadhanvinAm
09021024a tad yuddham abhavac citraM ghorarUpaM ca mAriSa
09021024c IkSitRprItijananaM siddhacAraNasevitam
09021025a ulUkas tu maheSvAsaM nakulaM yuddhadurmadam
09021025c abhyadravad ameyAtmA zaravarSaiH samantataH
09021026a tathaiva nakulaH zUraH saubalasya sutaM raNe
09021026c zaravarSeNa mahatA samantAt paryavArayat
09021027a tau tatra samare vIrau kulaputrau mahArathau
09021027c yodhayantAv apazyetAM parasparakRtAgasau
09021028a tathaiva kRtavarmA tu zaineyaM zatrutApanam
09021028c yodhayaJ zuzubhe rAjan balaM zakra ivAhave
09021029a duryodhano dhanuz chittvA dhRSTadyumnasya saMyuge
09021029c athainaM chinnadhanvAnaM vivyAdha nizitaiH zaraiH
09021030a dhRSTadyumno 'pi samare pragRhya paramAyudham
09021030c rAjAnaM yodhayAm Asa pazyatAM sarvadhanvinAm
09021031a tayor yuddhaM mahac cAsIt saMgrAme bharatarSabha
09021031c prabhinnayor yathA saktaM mattayor varahastinoH
09021032a gautamas tu raNe kruddho draupadeyAn mahAbalAn
09021032c vivyAdha bahubhiH zUraH zaraiH saMnataparvabhiH
09021033a tasya tair abhavad yuddham indriyair iva dehinaH
09021033c ghorarUpam asaMvAryaM nirmaryAdam atIva ca
09021034a te ca taM pIDayAm Asur indriyANIva bAlizam
09021034c sa ca tAn pratisaMrabdhaH pratyayodhayad Ahave
09021035a evaM citram abhUd yuddhaM tasya taiH saha bhArata
09021035c utthAyotthAya hi yathA dehinAm indriyair vibho
09021036a narAz caiva naraiH sArdhaM dantino dantibhis tathA
09021036c hayA hayaiH samAsaktA rathino rathibhis tathA
09021036e saMkulaM cAbhavad bhUyo ghorarUpaM vizAM pate
09021037a idaM citram idaM ghoram idaM raudram iti prabho
09021037c yuddhAny Asan mahArAja ghorANi ca bahUni ca
09021038a te samAsAdya samare parasparam ariMdamAH
09021038c vivyadhuz caiva jaghnuz ca samAsAdya mahAhave
09021039a teSAM zastrasamudbhUtaM rajas tIvram adRzyata
09021039c pravAtenoddhataM rAjan dhAvadbhiz cAzvasAdibhiH
09021040a rathanemisamudbhUtaM niHzvAsaiz cApi dantinAm
09021040c rajaH saMdhyAbhrakapilaM divAkarapathaM yayau
09021041a rajasA tena saMpRkte bhAskare niSprabhIkRte
09021041c saMchAditAbhavad bhUmis te ca zUrA mahArathAH
09021042a muhUrtAd iva saMvRttaM nIrajaskaM samantataH
09021042c vIrazoNitasiktAyAM bhUmau bharatasattama
09021042e upAzAmyat tatas tIvraM tad rajo ghoradarzanam
09021043a tato 'pazyaM mahArAja dvaMdvayuddhAni bhArata
09021043c yathAprAgryaM yathAjyeSThaM madhyAhne vai sudAruNe
09021043e varmaNAM tatra rAjendra vyadRzyantojjvalAH prabhAH
09021044a zabdaH sutumulaH saMkhye zarANAM patatAm abhUt
09021044c mahAveNuvanasyeva dahyamAnasya sarvataH
09022001  saMjaya uvAca
09022001a vartamAne tathA yuddhe ghorarUpe bhayAnake
09022001c abhajyata balaM tatra tava putrasya pANDavaiH
09022002a tAMs tu yatnena mahatA saMnivArya mahArathAn
09022002c putras te yodhayAm Asa pANDavAnAm anIkinIm
09022003a nivRttAH sahasA yodhAs tava putrapriyaiSiNaH
09022003c saMnivRtteSu teSv evaM yuddham AsIt sudAruNam
09022004a tAvakAnAM pareSAM ca devAsuraraNopamam
09022004c pareSAM tava sainye ca nAsIt kaz cit parAGmukhaH
09022005a anumAnena yudhyante saMjJAbhiz ca parasparam
09022005c teSAM kSayo mahAn AsId yudhyatAm itaretaram
09022006a tato yudhiSThiro rAjA krodhena mahatA yutaH
09022006c jigISamANaH saMgrAme dhArtarASTrAn sarAjakAn
09022007a tribhiH zAradvataM viddhvA rukmapuGkhaiH zilAzitaiH
09022007c caturbhir nijaghAnAzvAn kalyANAn kRtavarmaNaH
09022008a azvatthAmA tu hArdikyam apovAha yazasvinam
09022008c atha zAradvato 'STAbhiH pratyavidhyad yudhiSThiram
09022009a tato duryodhano rAjA rathAn saptazatAn raNe
09022009c preSayad yatra rAjAsau dharmaputro yudhiSThiraH
09022010a te rathA rathibhir yuktA manomArutaraMhasaH
09022010c abhyadravanta saMgrAme kaunteyasya rathaM prati
09022011a te samantAn mahArAja parivArya yudhiSThiram
09022011c adRzyaM sAyakaiz cakrur meghA iva divAkaram
09022012a nAmRSyanta susaMrabdhAH zikhaNDipramukhA rathAH
09022012c rathair agryajavair yuktaiH kiGkiNIjAlasaMvRtaiH
09022012e Ajagmur abhirakSantaH kuntIputraM yudhiSThiram
09022013a tataH pravavRte raudraH saMgrAmaH zoNitodakaH
09022013c pANDavAnAM kurUNAM ca yamarASTravivardhanaH
09022014a rathAn saptazatAn hatvA kurUNAm AtatAyinAm
09022014c pANDavAH saha pAJcAlaiH punar evAbhyavArayan
09022015a tatra yuddhaM mahac cAsIt tava putrasya pANDavaiH
09022015c na ca nas tAdRzaM dRSTaM naiva cApi parizrutam
09022016a vartamAne tathA yuddhe nirmaryAde samantataH
09022016c vadhyamAneSu yodheSu tAvakeSv itareSu ca
09022017a ninadatsu ca yodheSu zaGkhavaryaiz ca pUritaiH
09022017c utkRSTaiH siMhanAdaiz ca garjitena ca dhanvinAm
09022018a atipravRddhe yuddhe ca chidyamAneSu marmasu
09022018c dhAvamAneSu yodheSu jayagRddhiSu mAriSa
09022019a saMhAre sarvato jAte pRthivyAM zokasaMbhave
09022019c bahvInAm uttamastrINAM sImantoddharaNe tathA
09022020a nirmaryAde tathA yuddhe vartamAne sudAruNe
09022020c prAdurAsan vinAzAya tadotpAtAH sudAruNAH
09022020e cacAla zabdaM kurvANA saparvatavanA mahI
09022021a sadaNDAH solmukA rAjaJ zIryamANAH samantataH
09022021c ulkAH petur divo bhUmAv Ahatya ravimaNDalam
09022022a viSvagvAtAH prAdurAsan nIcaiH zarkaravarSiNaH
09022022c azrUNi mumucur nAgA vepathuz cAspRzad bhRzam
09022023a etAn ghorAn anAdRtya samutpAtAn sudAruNAn
09022023c punar yuddhAya saMmantrya kSatriyAs tasthur avyathAH
09022023e ramaNIye kurukSetre puNye svargaM yiyAsavaH
09022024a tato gAndhArarAjasya putraH zakunir abravIt
09022024c yudhyadhvam agrato yAvat pRSThato hanmi pANDavAn
09022025a tato naH saMprayAtAnAM madrayodhAs tarasvinaH
09022025c hRSTAH kilakilAzabdam akurvantApare tathA
09022026a asmAMs tu punar AsAdya labdhalakSA durAsadAH
09022026c zarAsanAni dhunvantaH zaravarSair avAkiran
09022027a tato hataM parais tatra madrarAjabalaM tadA
09022027c duryodhanabalaM dRSTvA punar AsIt parAGmukham
09022028a gAndhArarAjas tu punar vAkyam Aha tato balI
09022028c nivartadhvam adharmajJA yudhyadhvaM kiM sRtena vaH
09022029a anIkaM dazasAhasram azvAnAM bharatarSabha
09022029c AsId gAndhArarAjasya vimalaprAsayodhinAm
09022030a balena tena vikramya vartamAne janakSaye
09022030c pRSThataH pANDavAnIkam abhyaghnan nizitaiH zaraiH
09022031a tad abhram iva vAtena kSipyamANaM samantataH
09022031c abhajyata mahArAja pANDUnAM sumahad balam
09022032a tato yudhiSThiraH prekSya bhagnaM svabalam antikAt
09022032c abhyacodayad avyagraH sahadevaM mahAbalam
09022033a asau subalaputro no jaghanaM pIDya daMzitaH
09022033c senAM nisUdayanty eSa pazya pANDava durmatim
09022034a gaccha tvaM draupadeyAz ca zakuniM saubalaM jahi
09022034c rathAnIkam ahaM rakSye pAJcAlasahito 'nagha
09022035a gacchantu kuJjarAH sarve vAjinaz ca saha tvayA
09022035c pAdAtAz ca trisAhasrAH zakuniM saubalaM jahi
09022036a tato gajAH saptazatAz cApapANibhir AsthitAH
09022036c paJca cAzvasahasrANi sahadevaz ca vIryavAn
09022037a pAdAtAz ca trisAhasrA draupadeyAz ca sarvazaH
09022037c raNe hy abhyadravaMs te tu zakuniM yuddhadurmadam
09022038a tatas tu saubalo rAjann abhyatikramya pANDavAn
09022038c jaghAna pRSThataH senAM jayagRdhraH pratApavAn
09022039a azvArohAs tu saMrabdhAH pANDavAnAM tarasvinAm
09022039c prAvizan saubalAnIkam abhyatikramya tAn rathAn
09022040a te tatra sAdinaH zUrAH saubalasya mahad balam
09022040c gajamadhye 'vatiSThantaH zaravarSair avAkiran
09022041a tad udyatagadAprAsam akApuruSasevitam
09022041c prAvartata mahad yuddhaM rAjan durmantrite tava
09022042a upAramanta jyAzabdAH prekSakA rathino 'bhavan
09022042c na hi sveSAM pareSAM vA vizeSaH pratyadRzyata
09022043a zUrabAhuvisRSTAnAM zaktInAM bharatarSabha
09022043c jyotiSAm iva saMpAtam apazyan kurupANDavAH
09022044a RSTibhir vimalAbhiz ca tatra tatra vizAM pate
09022044c saMpatantIbhir AkAzam AvRtaM bahv azobhata
09022045a prAsAnAM patatAM rAjan rUpam AsIt samantataH
09022045c zalabhAnAm ivAkAze tadA bharatasattama
09022046a rudhirokSitasarvAGgA vipraviddhair niyantRbhiH
09022046c hayAH paripatanti sma zatazo 'tha sahasrazaH
09022047a anyonyaparipiSTAz ca samAsAdya parasparam
09022047c avikSatAH sma dRzyante vamanto rudhiraM mukhaiH
09022048a tato 'bhavat tamo ghoraM sainyena rajasA vRte
09022048c tAn apAkramato 'drAkSaM tasmAd dezAd ariMdamAn
09022048e azvAn rAjan manuSyAMz ca rajasA saMvRte sati
09022049a bhUmau nipatitAz cAnye vamanto rudhiraM bahu
09022049c kezAkezisamAlagnA na zekuz ceSTituM janAH
09022050a anyonyam azvapRSThebhyo vikarSanto mahAbalAH
09022050c mallA iva samAsAdya nijaghnur itaretaram
09022050e azvaiz ca vyapakRSyanta bahavo 'tra gatAsavaH
09022051a bhUmau nipatitAz cAnye bahavo vijayaiSiNaH
09022051c tatra tatra vyadRzyanta puruSAH zUramAninaH
09022052a raktokSitaiz chinnabhujair apakRSTaziroruhaiH
09022052c vyadRzyata mahI kIrNA zatazo 'tha sahasrazaH
09022053a dUraM na zakyaM tatrAsId gantum azvena kena cit
09022053c sAzvArohair hatair azvair AvRte vasudhAtale
09022054a rudhirokSitasaMnAhair Attazastrair udAyudhaiH
09022054c nAnApraharaNair ghoraiH parasparavadhaiSibhiH
09022054e susaMnikRSTaiH saMgrAme hatabhUyiSThasainikaiH
09022055a sa muhUrtaM tato yuddhvA saubalo 'tha vizAM pate
09022055c SaTsahasrair hayaiH ziSTair apAyAc chakunis tataH
09022056a tathaiva pANDavAnIkaM rudhireNa samukSitam
09022056c SaTsahasrair hayaiH ziSTair apAyAc chrAntavAhanam
09022057a azvArohAs tu pANDUnAm abruvan rudhirokSitAH
09022057c susaMnikRSTAH saMgrAme bhUyiSThaM tyaktajIvitAH
09022058a neha zakyaM rathair yoddhuM kuta eva mahAgajaiH
09022058c rathAn eva rathA yAntu kuJjarAH kuJjarAn api
09022059a pratiyAto hi zakuniH svam anIkam avasthitaH
09022059c na punaH saubalo rAjA yuddham abhyAgamiSyati
09022060a tatas tu draupadeyAz ca te ca mattA mahAdvipAH
09022060c prayayur yatra pAJcAlyo dhRSTadyumno mahArathaH
09022061a sahadevo 'pi kauravya rajomeghe samutthite
09022061c ekAkI prayayau tatra yatra rAjA yudhiSThiraH
09022062a tatas teSu prayAteSu zakuniH saubalaH punaH
09022062c pArzvato 'bhyahanat kruddho dhRSTadyumnasya vAhinIm
09022063a tat punas tumulaM yuddhaM prANAMs tyaktvAbhyavartata
09022063c tAvakAnAM pareSAM ca parasparavadhaiSiNAm
09022064a te hy anyonyam avekSanta tasmin vIrasamAgame
09022064c yodhAH paryapatan rAjaJ zatazo 'tha sahasrazaH
09022065a asibhiz chidyamAnAnAM zirasAM lokasaMkSaye
09022065c prAdurAsIn mahAzabdas tAlAnAM patatAm iva
09022066a vimuktAnAM zarIrANAM bhinnAnAM patatAM bhuvi
09022066c sAyudhAnAM ca bAhUnAm urUNAM ca vizAM pate
09022066e AsIt kaTakaTAzabdaH sumahAn romaharSaNaH
09022067a nighnanto nizitaiH zastrair bhrAtqn putrAn sakhIn api
09022067c yodhAH paripatanti sma yathAmiSakRte khagAH
09022068a anyonyaM pratisaMrabdhAH samAsAdya parasparam
09022068c ahaM pUrvam ahaM pUrvam iti nyaghnan sahasrazaH
09022069a saMghAtair AsanabhraSTair azvArohair gatAsubhiH
09022069c hayAH paripatanti sma zatazo 'tha sahasrazaH
09022070a sphuratAM pratipiSTAnAm azvAnAM zIghrasAriNAm
09022070c stanatAM ca manuSyANAM saMnaddhAnAM vizAM pate
09022071a zaktyRSTiprAsazabdaz ca tumulaH samajAyata
09022071c bhindatAM paramarmANi rAjan durmantrite tava
09022072a zramAbhibhUtAH saMrabdhAH zrAntavAhAH pipAsitAH
09022072c vikSatAz ca zitaiH zastrair abhyavartanta tAvakAH
09022073a mattA rudhiragandhena bahavo 'tra vicetasaH
09022073c jaghnuH parAn svakAMz caiva prAptAn prAptAn anantarAn
09022074a bahavaz ca gataprANAH kSatriyA jayagRddhinaH
09022074c bhUmAv abhyapatan rAjaJ zaravRSTibhir AvRtAH
09022075a vRkagRdhrazRgAlAnAM tumule modane 'hani
09022075c AsId balakSayo ghoras tava putrasya pazyataH
09022076a narAzvakAyasaMchannA bhUmir AsId vizAM pate
09022076c rudhirodakacitrA ca bhIrUNAM bhayavardhinI
09022077a asibhiH paTTizaiH zUlais takSamANAH punaH punaH
09022077c tAvakAH pANDavAz caiva nAbhyavartanta bhArata
09022078a praharanto yathAzakti yAvat prANasya dhAraNam
09022078c yodhAH paripatanti sma vamanto rudhiraM vraNaiH
09022079a ziro gRhItvA kezeSu kabandhaH samadRzyata
09022079c udyamya nizitaM khaDgaM rudhireNa samukSitam
09022080a athotthiteSu bahuSu kabandheSu janAdhipa
09022080c tathA rudhiragandhena yodhAH kazmalam Avizan
09022081a mandIbhUte tataH zabde pANDavAnAM mahad balam
09022081c alpAvaziSTais turagair abhyavartata saubalaH
09022082a tato 'bhyadhAvaMs tvaritAH pANDavA jayagRddhinaH
09022082c padAtayaz ca nAgAz ca sAdinaz codyatAyudhAH
09022083a koSTakIkRtya cApy enaM parikSipya ca sarvazaH
09022083c zastrair nAnAvidhair jaghnur yuddhapAraM titIrSavaH
09022084a tvadIyAs tAMs tu saMprekSya sarvataH samabhidrutAn
09022084c sAzvapattidviparathAH pANDavAn abhidudruvuH
09022085a ke cit padAtayaH padbhir muSTibhiz ca parasparam
09022085c nijaghnuH samare zUrAH kSINazastrAs tato 'patan
09022086a rathebhyo rathinaH petur dvipebhyo hastisAdinaH
09022086c vimAnebhya iva bhraSTAH siddhAH puNyakSayAd yathA
09022087a evam anyonyam AyastA yodhA jaghnur mahAmRdhe
09022087c pitqn bhrAtqn vayasyAMz ca putrAn api tathApare
09022088a evam AsId amaryAdaM yuddhaM bharatasattama
09022088c prAsAsibANakalile vartamAne sudAruNe
09023001  saMjaya uvAca
09023001a tasmiJ zabde mRdau jAte pANDavair nihate bale
09023001c azvaiH saptazataiH ziSTair upAvartata saubalaH
09023002a sa yAtvA vAhinIM tUrNam abravIt tvarayan yudhi
09023002c yudhyadhvam iti saMhRSTAH punaH punar ariMdamaH
09023002e apRcchat kSatriyAMs tatra kva nu rAjA mahArathaH
09023003a zakunes tu vacaH zrutvA ta Ucur bharatarSabha
09023003c asau tiSThati kauravyo raNamadhye mahArathaH
09023004a yatraitat sumahac chatraM pUrNacandrasamaprabham
09023004c yatraite satalatrANA rathAs tiSThanti daMzitAH
09023005a yatraiSa zabdas tumulaH parjanyaninadopamaH
09023005c tatra gaccha drutaM rAjaMs tato drakSyasi kauravam
09023006a evam uktas tu taiH zUraiH zakuniH saubalas tadA
09023006c prayayau tatra yatrAsau putras tava narAdhipa
09023006e sarvataH saMvRto vIraiH samareSv anivartibhiH
09023007a tato duryodhanaM dRSTvA rathAnIke vyavasthitam
09023007c sarathAMs tAvakAn sarvAn harSayaJ zakunis tataH
09023008a duryodhanam idaM vAkyaM hRSTarUpo vizAM pate
09023008c kRtakAryam ivAtmAnaM manyamAno 'bravIn nRpam
09023009a jahi rAjan rathAnIkam azvAH sarve jitA mayA
09023009c nAtyaktvA jIvitaM saMkhye zakyo jetuM yudhiSThiraH
09023010a hate tasmin rathAnIke pANDavenAbhipAlite
09023010c gajAn etAn haniSyAmaH padAtIMz cetarAMs tathA
09023011a zrutvA tu vacanaM tasya tAvakA jayagRddhinaH
09023011c javenAbhyapatan hRSTAH pANDavAnAm anIkinIm
09023012a sarve vivRtatUNIrAH pragRhItazarAsanAH
09023012c zarAsanAni dhunvAnAH siMhanAdaM pracakrire
09023013a tato jyAtalanirghoSaH punar AsId vizAM pate
09023013c prAdurAsIc charANAM ca sumuktAnAM sudAruNaH
09023014a tAn samIpagatAn dRSTvA javenodyatakArmukAn
09023014c uvAca devakIputraM kuntIputro dhanaMjayaH
09023015a codayAzvAn asaMbhrAntaH pravizaitad balArNavam
09023015c antam adya gamiSyAmi zatrUNAM nizitaiH zaraiH
09023016a aSTAdaza dinAny adya yuddhasyAsya janArdana
09023016c vartamAnasya mahataH samAsAdya parasparam
09023017a anantakalpA dhvajinI bhUtvA hy eSAM mahAtmanAm
09023017c kSayam adya gatA yuddhe pazya daivaM yathAvidham
09023018a samudrakalpaM tu balaM dhArtarASTrasya mAdhava
09023018c asmAn AsAdya saMjAtaM goSpadopamam acyuta
09023019a hate bhISme ca saMdadhyAc chivaM syAd iha mAdhava
09023019c na ca tat kRtavAn mUDho dhArtarASTraH subAlizaH
09023020a uktaM bhISmeNa yad vAkyaM hitaM pathyaM ca mAdhava
09023020c tac cApi nAsau kRtavAn vItabuddhiH suyodhanaH
09023021a tasmiMs tu patite bhISme pracyute pRthivItale
09023021c na jAne kAraNaM kiM nu yena yuddham avartata
09023022a mUDhAMs tu sarvathA manye dhArtarASTrAn subAlizAn
09023022c patite zaMtanoH putre ye 'kArSuH saMyugaM punaH
09023023a anantaraM ca nihate droNe brahmavidAM vare
09023023c rAdheye ca vikarNe ca naivAzAmyata vaizasam
09023024a alpAvaziSTe sainye 'smin sUtaputre ca pAtite
09023024c saputre vai naravyAghre naivAzAmyata vaizasam
09023025a zrutAyuSi hate zUre jalasaMdhe ca paurave
09023025c zrutAyudhe ca nRpatau naivAzAmyata vaizasam
09023026a bhUrizravasi zalye ca zAlve caiva janArdana
09023026c AvantyeSu ca vIreSu naivAzAmyata vaizasam
09023027a jayadrathe ca nihate rAkSase cApy alAyudhe
09023027c bAhlike somadatte ca naivAzAmyata vaizasam
09023028a bhagadatte hate zUre kAmboje ca sudakSiNe
09023028c duHzAsane ca nihate naivAzAmyata vaizasam
09023029a dRSTvA ca nihatAJ zUrAn pRthaGmANDalikAn nRpAn
09023029c balinaz ca raNe kRSNa naivAzAmyata vaizasam
09023030a akSauhiNIpatIn dRSTvA bhImasenena pAtitAn
09023030c mohAd vA yadi vA lobhAn naivAzAmyata vaizasam
09023031a ko nu rAjakule jAtaH kauraveyo vizeSataH
09023031c nirarthakaM mahad vairaM kuryAd anyaH suyodhanAt
09023032a guNato 'bhyadhikaM jJAtvA balataH zauryato 'pi vA
09023032c amUDhaH ko nu yudhyeta jAnan prAjJo hitAhitam
09023033a yan na tasya mano hy AsIt tvayoktasya hitaM vacaH
09023033c prazame pANDavaiH sArdhaM so 'nyasya zRNuyAt katham
09023034a yena zAMtanavo bhISmo droNo vidura eva ca
09023034c pratyAkhyAtAH zamasyArthe kiM nu tasyAdya bheSajam
09023035a maurkhyAd yena pitA vRddhaH pratyAkhyAto janArdana
09023035c tathA mAtA hitaM vAkyaM bhASamANA hitaiSiNI
09023035e pratyAkhyAtA hy asatkRtya sa kasmai rocayed vacaH
09023036a kulAntakaraNo vyaktaM jAta eSa janArdana
09023036c tathAsya dRzyate ceSTA nItiz caiva vizAM pate
09023036e naiSa dAsyati no rAjyam iti me matir acyuta
09023037a ukto 'haM bahuzas tAta vidureNa mahAtmanA
09023037c na jIvan dAsyate bhAgaM dhArtarASTraH kathaM cana
09023038a yAvat prANA dhamiSyanti dhArtarASTrasya mAnada
09023038c tAvad yuSmAsv apApeSu pracariSyati pAtakam
09023039a na sa yukto 'nyathA jetum Rte yuddhena mAdhava
09023039c ity abravIt sadA mAM hi viduraH satyadarzanaH
09023040a tat sarvam adya jAnAmi vyavasAyaM durAtmanaH
09023040c yad uktaM vacanaM tena vidureNa mahAtmanA
09023041a yo hi zrutvA vacaH pathyaM jAmadagnyAd yathAtatham
09023041c avAmanyata durbuddhir dhruvaM nAzamukhe sthitaH
09023042a uktaM hi bahubhiH siddhair jAtamAtre suyodhane
09023042c enaM prApya durAtmAnaM kSayaM kSatraM gamiSyati
09023043a tad idaM vacanaM teSAM niruktaM vai janArdana
09023043c kSayaM yAtA hi rAjAno duryodhanakRte bhRzam
09023044a so 'dya sarvAn raNe yodhAn nihaniSyAmi mAdhava
09023044c kSatriyeSu hateSv Azu zUnye ca zibire kRte
09023045a vadhAya cAtmano 'smAbhiH saMyugaM rocayiSyati
09023045c tad antaM hi bhaved vairam anumAnena mAdhava
09023046a evaM pazyAmi vArSNeya cintayan prajJayA svayA
09023046c vidurasya ca vAkyena ceSTayA ca durAtmanaH
09023047a saMyAhi bhAratIM vIra yAvad dhanmi zitaiH zaraiH
09023047c duryodhanaM durAtmAnaM vAhinIM cAsya saMyuge
09023048a kSemam adya kariSyAmi dharmarAjasya mAdhava
09023048c hatvaitad durbalaM sainyaM dhArtarASTrasya pazyataH
09023049  saMjaya uvAca
09023049a abhIzuhasto dAzArhas tathoktaH savyasAcinA
09023049c tad balaugham amitrANAm abhItaH prAvizad raNe
09023050a zarAsanavaraM ghoraM zaktikaNTakasaMvRtam
09023050c gadAparighapanthAnaM rathanAgamahAdrumam
09023051a hayapattilatAkIrNaM gAhamAno mahAyazAH
09023051c vyacarat tatra govindo rathenAtipatAkinA
09023052a te hayAH pANDurA rAjan vahanto 'rjunam Ahave
09023052c dikSu sarvAsv adRzyanta dAzArheNa pracoditAH
09023053a tataH prAyAd rathenAjau savyasAcI paraMtapaH
09023053c kiraJ zarazatAMs tIkSNAn vAridhArA ivAmbudaH
09023054a prAdurAsIn mahAJ zabdaH zarANAM nataparvaNAm
09023054c iSubhiz chAdyamAnAnAM samare savyasAcinA
09023055a asajjantas tanutreSu zaraughAH prApatan bhuvi
09023055c indrAzanisamasparzA gANDIvapreSitAH zarAH
09023056a narAn nAgAn samAhatya hayAMz cApi vizAM pate
09023056c apatanta raNe bANAH pataMgA iva ghoSiNaH
09023057a AsIt sarvam avacchannaM gANDIvapreSitaiH zaraiH
09023057c na prAjJAyanta samare dizo vA pradizo 'pi vA
09023058a sarvam AsIj jagat pUrNaM pArthanAmAGkitaiH zaraiH
09023058c rukmapuGkhais tailadhautaiH karmAraparimArjitaiH
09023059a te dahyamAnAH pArthena pAvakeneva kuJjarAH
09023059c samAsIdanta kauravyA vadhyamAnAH zitaiH zaraiH
09023060a zaracApadharaH pArthaH prajvalann iva bhArata
09023060c dadAha samare yodhAn kakSam agnir iva jvalan
09023061a yathA vanAnte vanapair visRSTaH; kakSaM dahet kRSNagatiH saghoSaH
09023061c bhUridrumaM zuSkalatAvitAnaM; bhRzaM samRddho jvalanaH pratApI
09023062a evaM sa nArAcagaNapratApI; zarArcir uccAvacatigmatejAH
09023062c dadAha sarvAM tava putrasenAm; amRSyamANas tarasA tarasvI
09023063a tasyeSavaH prANaharAH sumuktA; nAsajjan vai varmasu rukmapuGkhAH
09023063c na ca dvitIyaM pramumoca bANaM; nare haye vA paramadvipe vA
09023064a anekarUpAkRtibhir hi bANair; mahArathAnIkam anupravizya
09023064c sa eva ekas tava putrasenAM; jaghAna daityAn iva vajrapANiH
09024001  saMjaya uvAca
09024001a asyatAM yatamAnAnAM zUrANAm anivartinAm
09024001c saMkalpam akaron moghaM gANDIvena dhanaMjayaH
09024002a indrAzanisamasparzAn aviSahyAn mahaujasaH
09024002c visRjan dRzyate bANAn dhArA muJcann ivAmbudaH
09024003a tat sainyaM bharatazreSTha vadhyamAnaM kirITinA
09024003c saMpradudrAva saMgrAmAt tava putrasya pazyataH
09024004a hatadhuryA rathAH ke cid dhatasUtAs tathApare
09024004c bhagnAkSayugacakreSAH ke cid Asan vizAM pate
09024005a anyeSAM sAyakAH kSINAs tathAnye zarapIDitAH
09024005c akSatA yugapat ke cit prAdravan bhayapIDitAH
09024006a ke cit putrAn upAdAya hatabhUyiSThavAhanAH
09024006c vicukruzuH pitqn anye sahAyAn apare punaH
09024007a bAndhavAMz ca naravyAghra bhrAtqn saMbandhinas tathA
09024007c dudruvuH ke cid utsRjya tatra tatra vizAM pate
09024008a bahavo 'tra bhRzaM viddhA muhyamAnA mahArathAH
09024008c niSTanantaH sma dRzyante pArthabANahatA narAH
09024009a tAn anye ratham Aropya samAzvAsya muhUrtakam
09024009c vizrAntAz ca vitRSNAz ca punar yuddhAya jagmire
09024010a tAn apAsya gatAH ke cit punar eva yuyutsavaH
09024010c kurvantas tava putrasya zAsanaM yuddhadurmadAH
09024011a pAnIyam apare pItvA paryAzvAsya ca vAhanam
09024011c varmANi ca samAropya ke cid bharatasattama
09024012a samAzvAsyApare bhrAtqn nikSipya zibire 'pi ca
09024012c putrAn anye pitqn anye punar yuddham arocayan
09024013a sajjayitvA rathAn ke cid yathAmukhyaM vizAM pate
09024013c Aplutya pANDavAnIkaM punar yuddham arocayan
09024014a te zUrAH kiGkiNIjAlaiH samAcchannA babhAsire
09024014c trailokyavijaye yuktA yathA daiteyadAnavAH
09024015a Agamya sahasA ke cid rathaiH svarNavibhUSitaiH
09024015c pANDavAnAm anIkeSu dhRSTadyumnam ayodhayan
09024016a dhRSTadyumno 'pi pAJcAlyaH zikhaNDI ca mahArathaH
09024016c nAkuliz ca zatAnIko rathAnIkam ayodhayan
09024017a pAJcAlyas tu tataH kruddhaH sainyena mahatA vRtaH
09024017c abhyadravat susaMrabdhas tAvakAn hantum udyataH
09024018a tatas tv Apatatas tasya tava putro janAdhipa
09024018c bANasaMghAn anekAn vai preSayAm Asa bhArata
09024019a dhRSTadyumnas tato rAjaMs tava putreNa dhanvinA
09024019c nArAcair bahubhiH kSipraM bAhvor urasi cArpitaH
09024020a so 'tividdho maheSvAsas tottrArdita iva dvipaH
09024020c tasyAzvAMz caturo bANaiH preSayAm Asa mRtyave
09024020e sArathez cAsya bhallena ziraH kAyAd apAharat
09024021a tato duryodhano rAjA pRSTham Aruhya vAjinaH
09024021c apAkrAmad dhataratho nAtidUram ariMdamaH
09024022a dRSTvA tu hatavikrAntaM svam anIkaM mahAbalaH
09024022c tava putro mahArAja prayayau yatra saubalaH
09024023a tato ratheSu bhagneSu trisAhasrA mahAdvipAH
09024023c pANDavAn rathinaH paJca samantAt paryavArayan
09024024a te vRtAH samare paJca gajAnIkena bhArata
09024024c azobhanta naravyAghrA grahA vyAptA ghanair iva
09024025a tato 'rjuno mahArAja labdhalakSo mahAbhujaH
09024025c viniryayau rathenaiva zvetAzvaH kRSNasArathiH
09024026a taiH samantAt parivRtaH kuJjaraiH parvatopamaiH
09024026c nArAcair vimalais tIkSNair gajAnIkam apothayat
09024027a tatraikabANanihatAn apazyAma mahAgajAn
09024027c patitAn pAtyamAnAMz ca vibhinnAn savyasAcinA
09024028a bhImasenas tu tAn dRSTvA nAgAn mattagajopamaH
09024028c kareNa gRhya mahatIM gadAm abhyapatad balI
09024028e avaplutya rathAt tUrNaM daNDapANir ivAntakaH
09024029a tam udyatagadaM dRSTvA pANDavAnAM mahAratham
09024029c vitresus tAvakAH sainyAH zakRnmUtraM prasusruvuH
09024029e AvignaM ca balaM sarvaM gadAhaste vRkodare
09024030a gadayA bhImasenena bhinnakumbhAn rajasvalAn
09024030c dhAvamAnAn apazyAma kuJjarAn parvatopamAn
09024031a pradhAvya kuJjarAs te tu bhImasenagadAhatAH
09024031c petur ArtasvaraM kRtvA chinnapakSA ivAdrayaH
09024032a tAn bhinnakumbhAn subahUn dravamANAn itas tataH
09024032c patamAnAMz ca saMprekSya vitresus tava sainikAH
09024033a yudhiSThiro 'pi saMkruddho mAdrIputrau ca pANDavau
09024033c gRdhrapakSaiH zitair bANair jaghnur vai gajayodhinaH
09024034a dhRSTadyumnas tu samare parAjitya narAdhipam
09024034c apakrAnte tava sute hayapRSThaM samAzrite
09024035a dRSTvA ca pANDavAn sarvAn kuJjaraiH parivAritAn
09024035c dhRSTadyumno mahArAja saha sarvaiH prabhadrakaiH
09024035e putraH pAJcAlarAjasya jighAMsuH kuJjarAn yayau
09024036a adRSTvA tu rathAnIke duryodhanam ariMdamam
09024036c azvatthAmA kRpaz caiva kRtavarmA ca sAtvataH
09024036e apRcchan kSatriyAMs tatra kva nu duryodhano gataH
09024037a apazyamAnA rAjAnaM vartamAne janakSaye
09024037c manvAnA nihataM tatra tava putraM mahArathAH
09024037e viSaNNavadanA bhUtvA paryapRcchanta te sutam
09024038a AhuH ke cid dhate sUte prayAto yatra saubalaH
09024038c apare tv abruvaMs tatra kSatriyA bhRzavikSatAH
09024039a duryodhanena kiM kAryaM drakSyadhvaM yadi jIvati
09024039c yudhyadhvaM sahitAH sarve kiM vo rAjA kariSyati
09024040a te kSatriyAH kSatair gAtrair hatabhUyiSThavAhanAH
09024040c zaraiH saMpIDyamAnAz ca nAtivyaktam ivAbruvan
09024041a idaM sarvaM balaM hanmo yena sma parivAritAH
09024041c ete sarve gajAn hatvA upayAnti sma pANDavAH
09024042a zrutvA tu vacanaM teSAm azvatthAmA mahAbalaH
09024042c hitvA pAJcAlarAjasya tad anIkaM durutsaham
09024043a kRpaz ca kRtavarmA ca prayayur yatra saubalaH
09024043c rathAnIkaM parityajya zUrAH sudRDhadhanvinaH
09024044a tatas teSu prayAteSu dhRSTadyumnapurogamAH
09024044c AyayuH pANDavA rAjan vinighnantaH sma tAvakAn
09024045a dRSTvA tu tAn ApatataH saMprahRSTAn mahArathAn
09024045c parAkrAntAMs tato vIrAn nirAzAJ jIvite tadA
09024045e vivarNamukhabhUyiSTham abhavat tAvakaM balam
09024046a parikSINAyudhAn dRSTvA tAn ahaM parivAritAn
09024046c rAjan balena dvyaGgena tyaktvA jIvitam AtmanaH
09024047a AtmanApaJcamo 'yudhyaM pAJcAlasya balena ha
09024047c tasmin deze vyavasthApya yatra zAradvataH sthitaH
09024048a saMprayuddhA vayaM paJca kirITizarapIDitAH
09024048c dhRSTadyumnaM mahAnIkaM tatra no 'bhUd raNo mahAn
09024048e jitAs tena vayaM sarve vyapayAma raNAt tataH
09024049a athApazyaM sAtyakiM tam upAyAntaM mahAratham
09024049c rathaiz catuHzatair vIro mAM cAbhyadravad Ahave
09024050a dhRSTadyumnAd ahaM muktaH kathaM cic chrAntavAhanaH
09024050c patito mAdhavAnIkaM duSkRtI narakaM yathA
09024050e tatra yuddham abhUd ghoraM muhUrtam atidAruNam
09024051a sAtyakis tu mahAbAhur mama hatvA paricchadam
09024051c jIvagrAham agRhNAn mAM mUrchitaM patitaM bhuvi
09024052a tato muhUrtAd iva tad gajAnIkam avadhyata
09024052c gadayA bhImasenena nArAcair arjunena ca
09024053a pratipiSTair mahAnAgaiH samantAt parvatopamaiH
09024053c nAtiprasiddheva gatiH pANDavAnAm ajAyata
09024054a rathamArgAMs tataz cakre bhImaseno mahAbalaH
09024054c pANDavAnAM mahArAja vyapakarSan mahAgajAn
09024055a azvatthAmA kRpaz caiva kRtavarmA ca sAtvataH
09024055c apazyanto rathAnIke duryodhanam ariMdamam
09024055e rAjAnaM mRgayAm Asus tava putraM mahAratham
09024056a parityajya ca pAJcAlaM prayAtA yatra saubalaH
09024056c rAjJo 'darzanasaMvignA vartamAne janakSaye
09025001  saMjaya uvAca
09025001a gajAnIke hate tasmin pANDuputreNa bhArata
09025001c vadhyamAne bale caiva bhImasenena saMyuge
09025002a carantaM ca tathA dRSTvA bhImasenam ariMdamam
09025002c daNDahastaM yathA kruddham antakaM prANahAriNam
09025003a sametya samare rAjan hatazeSAH sutAs tava
09025003c adRzyamAne kauravye putre duryodhane tava
09025003e sodaryAH sahitA bhUtvA bhImasenam upAdravan
09025004a durmarSaNo mahArAja jaitro bhUribalo raviH
09025004c ity ete sahitA bhUtvA tava putrAH samantataH
09025004e bhImasenam abhidrutya rurudhuH sarvatodizam
09025005a tato bhImo mahArAja svarathaM punar AsthitaH
09025005c mumoca nizitAn bANAn putrANAM tava marmasu
09025006a te kIryamANA bhImena putrAs tava mahAraNe
09025006c bhImasenam apAsedhan pravaNAd iva kuJjaram
09025007a tataH kruddho raNe bhImaH ziro durmarSaNasya ha
09025007c kSurapreNa pramathyAzu pAtayAm Asa bhUtale
09025008a tato 'pareNa bhallena sarvAvaraNabhedinA
09025008c zrutAntam avadhId bhImas tava putraM mahArathaH
09025009a jayatsenaM tato viddhvA nArAcena hasann iva
09025009c pAtayAm Asa kauravyaM rathopasthAd ariMdamaH
09025009e sa papAta rathAd rAjan bhUmau tUrNaM mamAra ca
09025010a zrutarvA tu tato bhImaM kruddho vivyAdha mAriSa
09025010c zatena gRdhravAjAnAM zarANAM nataparvaNAm
09025011a tataH kruddho raNe bhImo jaitraM bhUribalaM ravim
09025011c trIn etAMs tribhir Anarchad viSAgnipratimaiH zaraiH
09025012a te hatA nyapatan bhUmau syandanebhyo mahArathAH
09025012c vasante puSpazabalA nikRttA iva kiMzukAH
09025013a tato 'pareNa tIkSNena nArAcena paraMtapaH
09025013c durvimocanam Ahatya preSayAm Asa mRtyave
09025014a sa hataH prApatad bhUmau svarathAd rathinAM varaH
09025014c gires tu kUTajo bhagno mAruteneva pAdapaH
09025015a duSpradharSaM tataz caiva sujAtaM ca sutau tava
09025015c ekaikaM nyavadhIt saMkhye dvAbhyAM dvAbhyAM camUmukhe
09025015e tau zilImukhaviddhAGgau petatU rathasattamau
09025016a tato yatantam aparam abhivIkSya sutaM tava
09025016c bhallena yudhi vivyAdha bhImo durviSahaM raNe
09025016e sa papAta hato vAhAt pazyatAM sarvadhanvinAm
09025017a dRSTvA tu nihatAn bhrAtqn bahUn ekena saMyuge
09025017c amarSavazam ApannaH zrutarvA bhImam abhyayAt
09025018a vikSipan sumahac cApaM kArtasvaravibhUSitam
09025018c visRjan sAyakAMz caiva viSAgnipratimAn bahUn
09025019a sa tu rAjan dhanuz chittvA pANDavasya mahAmRdhe
09025019c athainaM chinnadhanvAnaM viMzatyA samavAkirat
09025020a tato 'nyad dhanur AdAya bhImaseno mahArathaH
09025020c avAkirat tava sutaM tiSTha tiSTheti cAbravIt
09025021a mahad AsIt tayor yuddhaM citrarUpaM bhayAnakam
09025021c yAdRzaM samare pUrvaM jambhavAsavayor abhUt
09025022a tayos tatra zarair muktair yamadaNDanibhaiH zubhaiH
09025022c samAcchannA dharA sarvA khaM ca sarvA dizas tathA
09025023a tataH zrutarvA saMkruddho dhanur Ayamya sAyakaiH
09025023c bhImasenaM raNe rAjan bAhvor urasi cArpayat
09025024a so 'tividdho mahArAja tava putreNa dhanvinA
09025024c bhImaH saMcukSubhe kruddhaH parvaNIva mahodadhiH
09025025a tato bhImo ruSAviSTaH putrasya tava mAriSa
09025025c sArathiM caturaz cAzvAn bANair ninye yamakSayam
09025026a virathaM taM samAlakSya vizikhair lomavAhibhiH
09025026c avAkirad ameyAtmA darzayan pANilAghavam
09025027a zrutarvA viratho rAjann Adade khaDgacarmaNI
09025027c athAsyAdadataH khaDgaM zatacandraM ca bhAnumat
09025027e kSurapreNa ziraH kAyAt pAtayAm Asa pANDavaH
09025028a chinnottamAGgasya tataH kSurapreNa mahAtmanaH
09025028c papAta kAyaH sa rathAd vasudhAm anunAdayan
09025029a tasmin nipatite vIre tAvakA bhayamohitAH
09025029c abhyadravanta saMgrAme bhImasenaM yuyutsavaH
09025030a tAn Apatata evAzu hatazeSAd balArNavAt
09025030c daMzitaH pratijagrAha bhImasenaH pratApavAn
09025030e te tu taM vai samAsAdya parivavruH samantataH
09025031a tatas tu saMvRto bhImas tAvakair nizitaiH zaraiH
09025031c pIDayAm Asa tAn sarvAn sahasrAkSa ivAsurAn
09025032a tataH paJcazatAn hatvA savarUthAn mahArathAn
09025032c jaghAna kuJjarAnIkaM punaH saptazataM yudhi
09025033a hatvA daza sahasrANi pattInAM parameSubhiH
09025033c vAjinAM ca zatAny aSTau pANDavaH sma virAjate
09025034a bhImasenas tu kaunteyo hatvA yuddhe sutAMs tava
09025034c mene kRtArtham AtmAnaM saphalaM janma ca prabho
09025035a taM tathA yudhyamAnaM ca vinighnantaM ca tAvakAn
09025035c IkSituM notsahante sma tava sainyAni bhArata
09025036a vidrAvya tu kurUn sarvAMs tAMz ca hatvA padAnugAn
09025036c dorbhyAM zabdaM tataz cakre trAsayAno mahAdvipAn
09025037a hatabhUyiSThayodhA tu tava senA vizAM pate
09025037c kiMciccheSA mahArAja kRpaNA samapadyata
09026001  saMjaya uvAca
09026001a duryodhano mahArAja sudarzaz cApi te sutaH
09026001c hatazeSau tadA saMkhye vAjimadhye vyavasthitau
09026002a tato duryodhanaM dRSTvA vAjimadhye vyavasthitam
09026002c uvAca devakIputraH kuntIputraM dhanaMjayam
09026003a zatravo hatabhUyiSThA jJAtayaH paripAlitAH
09026003c gRhItvA saMjayaM cAsau nivRttaH zinipuMgavaH
09026004a parizrAntaz ca nakulaH sahadevaz ca bhArata
09026004c yodhayitvA raNe pApAn dhArtarASTrapadAnugAn
09026005a suyodhanam abhityajya traya ete vyavasthitAH
09026005c kRpaz ca kRtavarmA ca drauNiz caiva mahArathaH
09026006a asau tiSThati pAJcAlyaH zriyA paramayA yutaH
09026006c duryodhanabalaM hatvA saha sarvaiH prabhadrakaiH
09026007a asau duryodhanaH pArtha vAjimadhye vyavasthitaH
09026007c chatreNa dhriyamANena prekSamANo muhur muhuH
09026008a prativyUhya balaM sarvaM raNamadhye vyavasthitaH
09026008c enaM hatvA zitair bANaiH kRtakRtyo bhaviSyasi
09026009a gajAnIkaM hataM dRSTvA tvAM ca prAptam ariMdama
09026009c yAvan na vidravanty ete tAvaj jahi suyodhanam
09026010a yAtu kaz cit tu pAJcAlyaM kSipram AgamyatAm iti
09026010c parizrAntabalas tAta naiSa mucyeta kilbiSI
09026011a tava hatvA balaM sarvaM saMgrAme dhRtarASTrajaH
09026011c jitAn pANDusutAn matvA rUpaM dhArayate mahat
09026012a nihataM svabalaM dRSTvA pIDitaM cApi pANDavaiH
09026012c dhruvam eSyati saMgrAme vadhAyaivAtmano nRpaH
09026013a evam uktaH phalgunas tu kRSNaM vacanam abravIt
09026013c dhRtarASTrasutAH sarve hatA bhImena mAnada
09026013e yAv etAv Asthitau kRSNa tAv adya na bhaviSyataH
09026014a hato bhISmo hato droNaH karNo vaikartano hataH
09026014c madrarAjo hataH zalyo hataH kRSNa jayadrathaH
09026015a hayAH paJcazatAH ziSTAH zakuneH saubalasya ca
09026015c rathAnAM tu zate ziSTe dve eva tu janArdana
09026015e dantinAM ca zataM sAgraM trisAhasrAH padAtayaH
09026016a azvatthAmA kRpaz caiva trigartAdhipatis tathA
09026016c ulUkaH zakuniz caiva kRtavarmA ca sAtvataH
09026017a etad balam abhUc cheSaM dhArtarASTrasya mAdhava
09026017c mokSo na nUnaM kAlAd dhi vidyate bhuvi kasya cit
09026018a tathA vinihate sainye pazya duryodhanaM sthitam
09026018c adyAhnA hi mahArAjo hatAmitro bhaviSyati
09026019a na hi me mokSyate kaz cit pareSAm iti cintaye
09026019c ye tv adya samaraM kRSNa na hAsyanti raNotkaTAH
09026019e tAn vai sarvAn haniSyAmi yady api syur amAnuSAH
09026020a adya yuddhe susaMkruddho dIrghaM rAjJaH prajAgaram
09026020c apaneSyAmi gAndhAraM pAtayitvA zitaiH zaraiH
09026021a nikRtyA vai durAcAro yAni ratnAni saubalaH
09026021c sabhAyAm aharad dyUte punas tAny AharAmy aham
09026022a adya tA api vetsyanti sarvA nAgapurastriyaH
09026022c zrutvA patIMz ca putrAMz ca pANDavair nihatAn yudhi
09026023a samAptam adya vai karma sarvaM kRSNa bhaviSyati
09026023c adya duryodhano dIptAM zriyaM prANAMz ca tyakSyati
09026024a nApayAti bhayAt kRSNa saMgrAmAd yadi cen mama
09026024c nihataM viddhi vArSNeya dhArtarASTraM subAlizam
09026025a mama hy etad azaktaM vai vAjivRndam ariMdama
09026025c soDhuM jyAtalanirghoSaM yAhi yAvan nihanmy aham
09026026a evam uktas tu dAzArhaH pANDavena yazasvinA
09026026c acodayad dhayAn rAjan duryodhanabalaM prati
09026027a tad anIkam abhiprekSya trayaH sajjA mahArathAH
09026027c bhImaseno 'rjunaz caiva sahadevaz ca mAriSa
09026027e prayayuH siMhanAdena duryodhanajighAMsayA
09026028a tAn prekSya sahitAn sarvAJ javenodyatakArmukAn
09026028c saubalo 'bhyadravad yuddhe pANDavAn AtatAyinaH
09026029a sudarzanas tava suto bhImasenaM samabhyayAt
09026029c suzarmA zakuniz caiva yuyudhAte kirITinA
09026029e sahadevaM tava suto hayapRSThagato 'bhyayAt
09026030a tato hy ayatnataH kSipraM tava putro janAdhipa
09026030c prAsena sahadevasya zirasi prAharad bhRzam
09026031a sopAvizad rathopasthe tava putreNa tADitaH
09026031c rudhirAplutasarvAGga AzIviSa iva zvasan
09026032a pratilabhya tataH saMjJAM sahadevo vizAM pate
09026032c duryodhanaM zarais tIkSNaiH saMkruddhaH samavAkirat
09026033a pArtho 'pi yudhi vikramya kuntIputro dhanaMjayaH
09026033c zUrANAm azvapRSThebhyaH zirAMsi nicakarta ha
09026034a tad anIkaM tadA pArtho vyadhamad bahubhiH zaraiH
09026034c pAtayitvA hayAn sarvAMs trigartAnAM rathAn yayau
09026035a tatas te sahitA bhUtvA trigartAnAM mahArathAH
09026035c arjunaM vAsudevaM ca zaravarSair avAkiran
09026036a satyakarmANam AkSipya kSurapreNa mahAyazAH
09026036c tato 'sya syandanasyeSAM cicchide pANDunandanaH
09026037a zilAzitena ca vibho kSurapreNa mahAyazAH
09026037c ziraz ciccheda prahasaMs taptakuNDalabhUSaNam
09026038a satyeSum atha cAdatta yodhAnAM miSatAM tataH
09026038c yathA siMho vane rAjan mRgaM paribubhukSitaH
09026039a taM nihatya tataH pArthaH suzarmANaM tribhiH zaraiH
09026039c viddhvA tAn ahanat sarvAn rathAn rukmavibhUSitAn
09026040a tatas tu pratvaran pArtho dIrghakAlaM susaMbhRtam
09026040c muJcan krodhaviSaM tIkSNaM prasthalAdhipatiM prati
09026041a tam arjunaH pRSatkAnAM zatena bharatarSabha
09026041c pUrayitvA tato vAhAn nyahanat tasya dhanvinaH
09026042a tataH zaraM samAdAya yamadaNDopamaM zitam
09026042c suzarmANaM samuddizya cikSepAzu hasann iva
09026043a sa zaraH preSitas tena krodhadIptena dhanvinA
09026043c suzarmANaM samAsAdya bibheda hRdayaM raNe
09026044a sa gatAsur mahArAja papAta dharaNItale
09026044c nandayan pANDavAn sarvAn vyathayaMz cApi tAvakAn
09026045a suzarmANaM raNe hatvA putrAn asya mahArathAn
09026045c sapta cASTau ca triMzac ca sAyakair anayat kSayam
09026046a tato 'sya nizitair bANaiH sarvAn hatvA padAnugAn
09026046c abhyagAd bhAratIM senAM hatazeSAM mahArathaH
09026047a bhImas tu samare kruddhaH putraM tava janAdhipa
09026047c sudarzanam adRzyaM taM zaraiz cakre hasann iva
09026048a tato 'sya prahasan kruddhaH ziraH kAyAd apAharat
09026048c kSurapreNa sutIkSNena sa hataH prApatad bhuvi
09026049a tasmiMs tu nihate vIre tatas tasya padAnugAH
09026049c parivavrU raNe bhImaM kiranto vizikhAJ zitAn
09026050a tatas tu nizitair bANais tad anIkaM vRkodaraH
09026050c indrAzanisamasparzaiH samantAt paryavAkirat
09026050e tataH kSaNena tad bhImo nyahanad bharatarSabha
09026051a teSu tUtsAdyamAneSu senAdhyakSA mahAbalAH
09026051c bhImasenaM samAsAdya tato 'yudhyanta bhArata
09026051e tAMs tu sarvAJ zarair ghorair avAkirata pANDavaH
09026052a tathaiva tAvakA rAjan pANDaveyAn mahArathAn
09026052c zaravarSeNa mahatA samantAt paryavArayan
09026053a vyAkulaM tad abhUt sarvaM pANDavAnAM paraiH saha
09026053c tAvakAnAM ca samare pANDaveyair yuyutsatAm
09026054a tatra yodhAs tadA petuH parasparasamAhatAH
09026054c ubhayoH senayo rAjan saMzocantaH sma bAndhavAn
09027001  saMjaya uvAca
09027001a tasmin pravRtte saMgrAme naravAjigajakSaye
09027001c zakuniH saubalo rAjan sahadevaM samabhyayAt
09027002a tato 'syApatatas tUrNaM sahadevaH pratApavAn
09027002c zaraughAn preSayAm Asa pataMgAn iva zIghragAn
09027002e ulUkaz ca raNe bhImaM vivyAdha dazabhiH zaraiH
09027003a zakunis tu mahArAja bhImaM viddhvA tribhiH zaraiH
09027003c sAyakAnAM navatyA vai sahadevam avAkirat
09027004a te zUrAH samare rAjan samAsAdya parasparam
09027004c vivyadhur nizitair bANaiH kaGkabarhiNavAjitaiH
09027004e svarNapuGkhaiH zilAdhautair A karNAt prahitaiH zaraiH
09027005a teSAM cApabhujotsRSTA zaravRSTir vizAM pate
09027005c AcchAdayad dizaH sarvA dhArAbhir iva toyadaH
09027006a tataH kruddho raNe bhImaH sahadevaz ca bhArata
09027006c ceratuH kadanaM saMkhye kurvantau sumahAbalau
09027007a tAbhyAM zarazataiz channaM tad balaM tava bhArata
09027007c andhakAram ivAkAzam abhavat tatra tatra ha
09027008a azvair viparidhAvadbhiH zaracchannair vizAM pate
09027008c tatra tatra kRto mArgo vikarSadbhir hatAn bahUn
09027009a nihatAnAM hayAnAM ca sahaiva hayayodhibhiH
09027009c varmabhir vinikRttaiz ca prAsaiz chinnaiz ca mAriSa
09027009e saMchannA pRthivI jajJe kusumaiH zabalA iva
09027010a yodhAs tatra mahArAja samAsAdya parasparam
09027010c vyacaranta raNe kruddhA vinighnantaH parasparam
09027011a udvRttanayanai roSAt saMdaSTauSThapuTair mukhaiH
09027011c sakuNDalair mahI channA padmakiJjalkasaMnibhaiH
09027012a bhujaiz chinnair mahArAja nAgarAjakaropamaiH
09027012c sAGgadaiH satanutraiz ca sAsiprAsaparazvadhaiH
09027013a kabandhair utthitaiz chinnair nRtyadbhiz cAparair yudhi
09027013c kravyAdagaNasaMkIrNA ghorAbhUt pRthivI vibho
09027014a alpAvaziSTe sainye tu kauraveyAn mahAhave
09027014c prahRSTAH pANDavA bhUtvA ninyire yamasAdanam
09027015a etasminn antare zUraH saubaleyaH pratApavAn
09027015c prAsena sahadevasya zirasi prAharad bhRzam
09027015e sa vihvalo mahArAja rathopastha upAvizat
09027016a sahadevaM tathA dRSTvA bhImasenaH pratApavAn
09027016c sarvasainyAni saMkruddho vArayAm Asa bhArata
09027017a nirbibheda ca nArAcaiH zatazo 'tha sahasrazaH
09027017c vinirbhidyAkaroc caiva siMhanAdam ariMdama
09027018a tena zabdena vitrastAH sarve sahayavAraNAH
09027018c prAdravan sahasA bhItAH zakunez ca padAnugAH
09027019a prabhagnAn atha tAn dRSTvA rAjA duryodhano 'bravIt
09027019c nivartadhvam adharmajJA yudhyadhvaM kiM sRtena vaH
09027020a iha kIrtiM samAdhAya pretya lokAn samaznute
09027020c prANAJ jahAti yo vIro yudhi pRSTham adarzayan
09027021a evam uktAs tu te rAjJA saubalasya padAnugAH
09027021c pANDavAn abhyavartanta mRtyuM kRtvA nivartanam
09027022a dravadbhis tatra rAjendra kRtaH zabdo 'tidAruNaH
09027022c kSubdhasAgarasaMkAzaH kSubhitaH sarvato 'bhavat
09027023a tAMs tadApatato dRSTvA saubalasya padAnugAn
09027023c pratyudyayur mahArAja pANDavA vijaye vRtAH
09027024a pratyAzvasya ca durdharSaH sahadevo vizAM pate
09027024c zakuniM dazabhir viddhvA hayAMz cAsya tribhiH zaraiH
09027024e dhanuz ciccheda ca zaraiH saubalasya hasann iva
09027025a athAnyad dhanur AdAya zakunir yuddhadurmadaH
09027025c vivyAdha nakulaM SaSTyA bhImasenaM ca saptabhiH
09027026a ulUko 'pi mahArAja bhImaM vivyAdha saptabhiH
09027026c sahadevaM ca saptatyA parIpsan pitaraM raNe
09027027a taM bhImasenaH samare vivyAdha nizitaiH zaraiH
09027027c zakuniM ca catuHSaSTyA pArzvasthAMz ca tribhis tribhiH
09027028a te hanyamAnA bhImena nArAcais tailapAyitaiH
09027028c sahadevaM raNe kruddhAz chAdayaJ zaravRSTibhiH
09027028e parvataM vAridhArAbhiH savidyuta ivAmbudAH
09027029a tato 'syApatataH zUraH sahadevaH pratApavAn
09027029c ulUkasya mahArAja bhallenApAharac chiraH
09027030a sa jagAma rathAd bhUmiM sahadevena pAtitaH
09027030c rudhirAplutasarvAGgo nandayan pANDavAn yudhi
09027031a putraM tu nihataM dRSTvA zakunis tatra bhArata
09027031c sAzrukaNTho viniHzvasya kSattur vAkyam anusmaran
09027032a cintayitvA muhUrtaM sa bASpapUrNekSaNaH zvasan
09027032c sahadevaM samAsAdya tribhir vivyAdha sAyakaiH
09027033a tAn apAsya zarAn muktAJ zarasaMghaiH pratApavAn
09027033c sahadevo mahArAja dhanuz ciccheda saMyuge
09027034a chinne dhanuSi rAjendra zakuniH saubalas tadA
09027034c pragRhya vipulaM khaDgaM sahadevAya prAhiNot
09027035a tam ApatantaM sahasA ghorarUpaM vizAM pate
09027035c dvidhA ciccheda samare saubalasya hasann iva
09027036a asiM dRSTvA dvidhA chinnaM pragRhya mahatIM gadAm
09027036c prAhiNot sahadevAya sA moghA nyapatad bhuvi
09027037a tataH zaktiM mahAghorAM kAlarAtrim ivodyatAm
09027037c preSayAm Asa saMkruddhaH pANDavaM prati saubalaH
09027038a tAm ApatantIM sahasA zaraiH kAJcanabhUSaNaiH
09027038c tridhA ciccheda samare sahadevo hasann iva
09027039a sA papAta tridhA chinnA bhUmau kanakabhUSaNA
09027039c zIryamANA yathA dIptA gaganAd vai zatahradA
09027040a zaktiM vinihatAM dRSTvA saubalaM ca bhayArditam
09027040c dudruvus tAvakAH sarve bhaye jAte sasaubalAH
09027041a athotkruSTaM mahad dhy AsIt pANDavair jitakAzibhiH
09027041c dhArtarASTrAs tataH sarve prAyazo vimukhAbhavan
09027042a tAn vai vimanaso dRSTvA mAdrIputraH pratApavAn
09027042c zarair anekasAhasrair vArayAm Asa saMyuge
09027043a tato gAndhArakair guptaM pRSThair azvair jaye dhRtam
09027043c AsasAda raNe yAntaM sahadevo 'tha saubalam
09027044a svam aMzam avaziSTaM sa saMsmRtya zakuniM nRpa
09027044c rathena kAJcanAGgena sahadevaH samabhyayAt
09027044e adhijyaM balavat kRtvA vyAkSipan sumahad dhanuH
09027045a sa saubalam abhidrutya gRdhrapatraiH zilAzitaiH
09027045c bhRzam abhyahanat kruddhas tottrair iva mahAdvipam
09027046a uvAca cainaM medhAvI nigRhya smArayann iva
09027046c kSatradharme sthito bhUtvA yudhyasva puruSo bhava
09027047a yat tadA hRSyase mUDha glahann akSaiH sabhAtale
09027047c phalam adya prapadyasva karmaNas tasya durmate
09027048a nihatAs te durAtmAno ye 'smAn avahasan purA
09027048c duryodhanaH kulAGgAraH ziSTas tvaM tasya mAtulaH
09027049a adya te vihaniSyAmi kSureNonmathitaM ziraH
09027049c vRkSAt phalam ivoddhRtya laguDena pramAthinA
09027050a evam uktvA mahArAja sahadevo mahAbalaH
09027050c saMkruddho narazArdUlo vegenAbhijagAma ha
09027051a abhigamya tu durdharSaH sahadevo yudhAM patiH
09027051c vikRSya balavac cApaM krodhena prahasann iva
09027052a zakuniM dazabhir viddhvA caturbhiz cAsya vAjinaH
09027052c chatraM dhvajaM dhanuz cAsya chittvA siMha ivAnadat
09027053a chinnadhvajadhanuzchatraH sahadevena saubalaH
09027053c tato viddhaz ca bahubhiH sarvamarmasu sAyakaiH
09027054a tato bhUyo mahArAja sahadevaH pratApavAn
09027054c zakuneH preSayAm Asa zaravRSTiM durAsadAm
09027055a tatas tu kruddhaH subalasya putro; mAdrIsutaM sahadevaM vimarde
09027055c prAsena jAmbUnadabhUSaNena; jighAMsur eko 'bhipapAta zIghram
09027056a mAdrIsutas tasya samudyataM taM; prAsaM suvRttau ca bhujau raNAgre
09027056c bhallais tribhir yugapat saMcakarta; nanAda coccais tarasAjimadhye
09027057a tasyAzukArI susamAhitena; suvarNapuGkhena dRDhAyasena
09027057c bhallena sarvAvaraNAtigena; ziraH zarIrAt pramamAtha bhUyaH
09027058a zareNa kArtasvarabhUSitena; divAkarAbhena susaMzitena
09027058c hRtottamAGgo yudhi pANDavena; papAta bhUmau subalasya putraH
09027059a sa tacchiro vegavatA zareNa; suvarNapuGkhena zilAzitena
09027059c prAverayat kupitaH pANDuputro; yat tat kurUNAm anayasya mUlam
09027060a hRtottamAGgaM zakuniM samIkSya; bhUmau zayAnaM rudhirArdragAtram
09027060c yodhAs tvadIyA bhayanaSTasattvA; dizaH prajagmuH pragRhItazastrAH
09027061a vipradrutAH zuSkamukhA visaMjJA; gANDIvaghoSeNa samAhatAz ca
09027061c bhayArditA bhagnarathAzvanAgAH; padAtayaz caiva sadhArtarASTrAH
09027062a tato rathAc chakuniM pAtayitvA; mudAnvitA bhArata pANDaveyAH
09027062c zaGkhAn pradadhmuH samare prahRSTAH; sakezavAH sainikAn harSayantaH
09027063a taM cApi sarve pratipUjayanto; hRSTA bruvANAH sahadevam Ajau
09027063c diSTyA hato naikRtiko durAtmA; sahAtmajo vIra raNe tvayeti
09028001  saMjaya uvAca
09028001a tataH kruddhA mahArAja saubalasya padAnugAH
09028001c tyaktvA jIvitam Akrande pANDavAn paryavArayan
09028002a tAn arjunaH pratyagRhNAt sahadevajaye dhRtaH
09028002c bhImasenaz ca tejasvI kruddhAzIviSadarzanaH
09028003a zaktyRSTiprAsahastAnAM sahadevaM jighAMsatAm
09028003c saMkalpam akaron moghaM gANDIvena dhanaMjayaH
09028004a pragRhItAyudhAn bAhUn yodhAnAm abhidhAvatAm
09028004c bhallaiz ciccheda bIbhatsuH zirAMsy api hayAn api
09028005a te hatAH pratyapadyanta vasudhAM vigatAsavaH
09028005c tvaritA lokavIreNa prahatAH savyasAcinA
09028006a tato duryodhano rAjA dRSTvA svabalasaMkSayam
09028006c hatazeSAn samAnIya kruddho rathazatAn vibho
09028007a kuJjarAMz ca hayAMz caiva pAdAtAMz ca paraMtapa
09028007c uvAca sahitAn sarvAn dhArtarASTra idaM vacaH
09028008a samAsAdya raNe sarvAn pANDavAn sasuhRdgaNAn
09028008c pAJcAlyaM cApi sabalaM hatvA zIghraM nivartata
09028009a tasya te zirasA gRhya vacanaM yuddhadurmadAH
09028009c pratyudyayU raNe pArthAMs tava putrasya zAsanAt
09028010a tAn abhyApatataH zIghraM hatazeSAn mahAraNe
09028010c zarair AzIviSAkAraiH pANDavAH samavAkiran
09028011a tat sainyaM bharatazreSTha muhUrtena mahAtmabhiH
09028011c avadhyata raNaM prApya trAtAraM nAbhyavindata
09028011e pratiSThamAnaM tu bhayAn nAvatiSThata daMzitam
09028012a azvair viparidhAvadbhiH sainyena rajasA vRte
09028012c na prAjJAyanta samare dizaz ca pradizas tathA
09028013a tatas tu pANDavAnIkAn niHsRtya bahavo janAH
09028013c abhyaghnaMs tAvakAn yuddhe muhUrtAd iva bhArata
09028013e tato niHzeSam abhavat tat sainyaM tava bhArata
09028014a akSauhiNyaH sametAs tu tava putrasya bhArata
09028014c ekAdaza hatA yuddhe tAH prabho pANDusRJjayaiH
09028015a teSu rAjasahasreSu tAvakeSu mahAtmasu
09028015c eko duryodhano rAjann adRzyata bhRzaM kSataH
09028016a tato vIkSya dizaH sarvA dRSTvA zUnyAM ca medinIm
09028016c vihInaH sarvayodhaiz ca pANDavAn vIkSya saMyuge
09028017a muditAn sarvasiddhArthAn nardamAnAn samantataH
09028017c bANazabdaravAMz caiva zrutvA teSAM mahAtmanAm
09028018a duryodhano mahArAja kazmalenAbhisaMvRtaH
09028018c apayAne manaz cakre vihInabalavAhanaH
09028019  dhRtarASTra uvAca
09028019a nihate mAmake sainye niHzeSe zibire kRte
09028019c pANDavAnAM balaM sUta kiM nu zeSam abhUt tadA
09028019e etan me pRcchato brUhi kuzalo hy asi saMjaya
09028020a yac ca duryodhano mandaH kRtavAMs tanayo mama
09028020c balakSayaM tathA dRSTvA sa ekaH pRthivIpatiH
09028021  saMjaya uvAca
09028021a rathAnAM dve sahasre tu sapta nAgazatAni ca
09028021c paJca cAzvasahasrANi pattInAM ca zataM zatAH
09028022a etac cheSam abhUd rAjan pANDavAnAM mahad balam
09028022c parigRhya hi yad yuddhe dhRSTadyumno vyavasthitaH
09028023a ekAkI bharatazreSTha tato duryodhano nRpaH
09028023c nApazyat samare kaM cit sahAyaM rathinAM varaH
09028024a nardamAnAn parAMz caiva svabalasya ca saMkSayam
09028024c hataM svahayam utsRjya prAGmukhaH prAdravad bhayAt
09028025a ekAdazacamUbhartA putro duryodhanas tava
09028025c gadAm AdAya tejasvI padAtiH prasthito hradam
09028026a nAtidUraM tato gatvA padbhyAm eva narAdhipaH
09028026c sasmAra vacanaM kSattur dharmazIlasya dhImataH
09028027a idaM nUnaM mahAprAjJo viduro dRSTavAn purA
09028027c mahad vaizasam asmAkaM kSatriyANAM ca saMyuge
09028028a evaM vicintayAnas tu pravivikSur hradaM nRpaH
09028028c duHkhasaMtaptahRdayo dRSTvA rAjan balakSayam
09028029a pANDavAz ca mahArAja dhRSTadyumnapurogamAH
09028029c abhyadhAvanta saMkruddhAs tava rAjan balaM prati
09028030a zaktyRSTiprAsahastAnAM balAnAm abhigarjatAm
09028030c saMkalpam akaron moghaM gANDIvena dhanaMjayaH
09028031a tAn hatvA nizitair bANaiH sAmAtyAn saha bandhubhiH
09028031c rathe zvetahaye tiSThann arjuno bahv azobhata
09028032a subalasya hate putre savAjirathakuJjare
09028032c mahAvanam iva chinnam abhavat tAvakaM balam
09028033a anekazatasAhasre bale duryodhanasya ha
09028033c nAnyo mahAratho rAjaJ jIvamAno vyadRzyata
09028034a droNaputrAd Rte vIrAt tathaiva kRtavarmaNaH
09028034c kRpAc ca gautamAd rAjan pArthivAc ca tavAtmajAt
09028035a dhRSTadyumnas tu mAM dRSTvA hasan sAtyakim abravIt
09028035c kim anena gRhItena nAnenArtho 'sti jIvatA
09028036a dhRSTadyumnavacaH zrutvA ziner naptA mahArathaH
09028036c udyamya nizitaM khaDgaM hantuM mAm udyatas tadA
09028037a tam Agamya mahAprAjJaH kRSNadvaipAyano 'bravIt
09028037c mucyatAM saMjayo jIvan na hantavyaH kathaM cana
09028038a dvaipAyanavacaH zrutvA ziner naptA kRtAJjaliH
09028038c tato mAm abravIn muktvA svasti saMjaya sAdhaya
09028039a anujJAtas tv ahaM tena nyastavarmA nirAyudhaH
09028039c prAtiSThaM yena nagaraM sAyAhne rudhirokSitaH
09028040a krozamAtram apakrAntaM gadApANim avasthitam
09028040c ekaM duryodhanaM rAjann apazyaM bhRzavikSatam
09028041a sa tu mAm azrupUrNAkSo nAzaknod abhivIkSitum
09028041c upapraikSata mAM dRSTvA tadA dInam avasthitam
09028042a taM cAham api zocantaM dRSTvaikAkinam Ahave
09028042c muhUrtaM nAzakaM vaktuM kiM cid duHkhapariplutaH
09028043a tato 'smai tad ahaM sarvam uktavAn grahaNaM tadA
09028043c dvaipAyanaprasAdAc ca jIvato mokSam Ahave
09028044a muhUrtam iva ca dhyAtvA pratilabhya ca cetanAm
09028044c bhrAtqMz ca sarvasainyAni paryapRcchata mAM tataH
09028045a tasmai tad aham AcakSaM sarvaM pratyakSadarzivAn
09028045c bhrAtqMz ca nihatAn sarvAn sainyaM ca vinipAtitam
09028046a trayaH kila rathAH ziSTAs tAvakAnAM narAdhipa
09028046c iti prasthAnakAle mAM kRSNadvaipAyano 'bravIt
09028047a sa dIrgham iva niHzvasya viprekSya ca punaH punaH
09028047c aMse mAM pANinA spRSTvA putras te paryabhASata
09028048a tvad anyo neha saMgrAme kaz cij jIvati saMjaya
09028048c dvitIyaM neha pazyAmi sasahAyAz ca pANDavAH
09028049a brUyAH saMjaya rAjAnaM prajJAcakSuSam Izvaram
09028049c duryodhanas tava sutaH praviSTo hradam ity uta
09028050a suhRdbhis tAdRzair hInaH putrair bhrAtRbhir eva ca
09028050c pANDavaiz ca hRte rAjye ko nu jIvati mAdRzaH
09028051a AcakSethAH sarvam idaM mAM ca muktaM mahAhavAt
09028051c asmiMs toyahrade suptaM jIvantaM bhRzavikSatam
09028052a evam uktvA mahArAja prAvizat taM hradaM nRpaH
09028052c astambhayata toyaM ca mAyayA manujAdhipaH
09028053a tasmin hradaM praviSTe tu trIn rathAJ zrAntavAhanAn
09028053c apazyaM sahitAn ekas taM dezaM samupeyuSaH
09028054a kRpaM zAradvataM vIraM drauNiM ca rathinAM varam
09028054c bhojaM ca kRtavarmANaM sahitAJ zaravikSatAn
09028055a te sarve mAm abhiprekSya tUrNam azvAn acodayan
09028055c upayAya ca mAm Ucur diSTyA jIvasi saMjaya
09028056a apRcchaMz caiva mAM sarve putraM tava janAdhipam
09028056c kaccid duryodhano rAjA sa no jIvati saMjaya
09028057a AkhyAtavAn ahaM tebhyas tadA kuzalinaM nRpam
09028057c tac caiva sarvam AcakSaM yan mAM duryodhano 'bravIt
09028057e hradaM caivAham AcaSTa yaM praviSTo narAdhipaH
09028058a azvatthAmA tu tad rAjan nizamya vacanaM mama
09028058c taM hradaM vipulaM prekSya karuNaM paryadevayat
09028059a aho dhiG na sa jAnAti jIvato 'smAn narAdhipaH
09028059c paryAptA hi vayaM tena saha yodhayituM parAn
09028060a te tu tatra ciraM kAlaM vilapya ca mahArathAH
09028060c prAdravan rathinAM zreSThA dRSTvA pANDusutAn raNe
09028061a te tu mAM ratham Aropya kRpasya supariSkRtam
09028061c senAnivezam Ajagmur hatazeSAs trayo rathAH
09028062a tatra gulmAH paritrastAH sUrye cAstam ite sati
09028062c sarve vicukruzuH zrutvA putrANAM tava saMkSayam
09028063a tato vRddhA mahArAja yoSitAM rakSaNo narAH
09028063c rAjadArAn upAdAya prayayur nagaraM prati
09028064a tatra vikrozatInAM ca rudatInAM ca sarvazaH
09028064c prAdurAsIn mahAJ zabdaH zrutvA tad balasaMkSayam
09028065a tatas tA yoSito rAjan krandantyo vai muhur muhuH
09028065c kurarya iva zabdena nAdayantyo mahItalam
09028066a AjaghnuH karajaiz cApi pANibhiz ca zirAMsy uta
09028066c luluvuz ca tadA kezAn krozantyas tatra tatra ha
09028067a hAhAkAravinAdinyo vinighnantya urAMsi ca
09028067c krozantyas tatra ruruduH krandamAnA vizAM pate
09028068a tato duryodhanAmAtyAH sAzrukaNThA bhRzAturAH
09028068c rAjadArAn upAdAya prayayur nagaraM prati
09028069a vetrajarjharahastAz ca dvArAdhyakSA vizAM pate
09028069c zayanIyAni zubhrANi spardhyAstaraNavanti ca
09028069e samAdAya yayus tUrNaM nagaraM dArarakSiNaH
09028070a AsthAyAzvatarIyuktAn syandanAn apare janAH
09028070c svAn svAn dArAn upAdAya prayayur nagaraM prati
09028071a adRSTapUrvA yA nAryo bhAskareNApi vezmasu
09028071c dadRzus tA mahArAja janA yAntIH puraM prati
09028072a tAH striyo bharatazreSTha saukumAryasamanvitAH
09028072c prayayur nagaraM tUrNaM hatasvajanabAndhavAH
09028073a A gopAlAvipAlebhyo dravanto nagaraM prati
09028073c yayur manuSyAH saMbhrAntA bhImasenabhayArditAH
09028074a api caiSAM bhayaM tIvraM pArthebhyo 'bhUt sudAruNam
09028074c prekSamANAs tadAnyonyam AdhAvan nagaraM prati
09028075a tasmiMs tadA vartamAne vidrave bhRzadAruNe
09028075c yuyutsuH zokasaMmUDhaH prAptakAlam acintayat
09028076a jito duryodhanaH saMkhye pANDavair bhImavikramaiH
09028076c ekAdazacamUbhartA bhrAtaraz cAsya sUditAH
09028076e hatAz ca kuravaH sarve bhISmadroNapuraHsarAH
09028077a aham eko vimuktas tu bhAgyayogAd yadRcchayA
09028077c vidrutAni ca sarvANi zibirANi samantataH
09028078a duryodhanasya sacivA ye ke cid avazeSitAH
09028078c rAjadArAn upAdAya vyadhAvan nagaraM prati
09028079a prAptakAlam ahaM manye pravezaM taiH sahAbhibho
09028079c yudhiSThiram anujJApya bhImasenaM tathaiva ca
09028080a etam arthaM mahAbAhur ubhayoH sa nyavedayat
09028080c tasya prIto 'bhavad rAjA nityaM karuNaveditA
09028080e pariSvajya mahAbAhur vaizyAputraM vyasarjayat
09028081a tataH sa ratham AsthAya drutam azvAn acodayat
09028081c asaMbhAvitavAMz cApi rAjadArAn puraM prati
09028082a taiz caiva sahitaH kSipram astaM gacchati bhAskare
09028082c praviSTo hAstinapuraM bASpakaNTho 'zrulocanaH
09028083a apazyata mahAprAjJaM viduraM sAzrulocanam
09028083c rAjJaH samIpAn niSkrAntaM zokopahatacetasam
09028084a tam abravIt satyadhRtiH praNataM tv agrataH sthitam
09028084c asmin kurukSaye vRtte diSTyA tvaM putra jIvasi
09028085a vinA rAjJaH pravezAd vai kim asi tvam ihAgataH
09028085c etan me kAraNaM sarvaM vistareNa nivedaya
09028086  yuyutsur uvAca
09028086a nihate zakunau tAta sajJAtisutabAndhave
09028086c hatazeSaparIvAro rAjA duryodhanas tataH
09028086e svakaM sa hayam utsRjya prAGmukhaH prAdravad bhayAt
09028087a apakrAnte tu nRpatau skandhAvAranivezanAt
09028087c bhayavyAkulitaM sarvaM prAdravan nagaraM prati
09028088a tato rAjJaH kalatrANi bhrAtqNAM cAsya sarvazaH
09028088c vAhaneSu samAropya stryadhyakSAH prAdravan bhayAt
09028089a tato 'haM samanujJApya rAjAnaM sahakezavam
09028089c praviSTo hAstinapuraM rakSa&l lokAd dhi vAcyatAm
09028090a etac chrutvA tu vacanaM vaizyAputreNa bhASitam
09028090c prAptakAlam iti jJAtvA viduraH sarvadharmavit
09028090e apUjayad ameyAtmA yuyutsuM vAkyakovidam
09028091a prAptakAlam idaM sarvaM bhavato bharatakSaye
09028091c adya tvam iha vizrAntaH zvo 'bhigantA yudhiSThiram
09028092a etAvad uktvA vacanaM viduraH sarvadharmavit
09028092c yuyutsuM samanujJApya praviveza nRpakSayam
09028092e yuyutsur api tAM rAtriM svagRhe nyavasat tadA
09029001  dhRtarASTra uvAca
09029001a hateSu sarvasainyeSu pANDuputrai raNAjire
09029001c mama sainyAvaziSTAs te kim akurvata saMjaya
09029002a kRtavarmA kRpaz caiva droNaputraz ca vIryavAn
09029002c duryodhanaz ca mandAtmA rAjA kim akarot tadA
09029003  saMjaya uvAca
09029003a saMprAdravatsu dAreSu kSatriyANAM mahAtmanAm
09029003c vidrute zibire zUnye bhRzodvignAs trayo rathAH
09029004a nizamya pANDuputrANAM tadA vijayinAM svanam
09029004c vidrutaM zibiraM dRSTvA sAyAhne rAjagRddhinaH
09029004e sthAnaM nArocayaMs tatra tatas te hradam abhyayuH
09029005a yudhiSThiro 'pi dharmAtmA bhrAtRbhiH sahito raNe
09029005c hRSTaH paryapatad rAjan duryodhanavadhepsayA
09029006a mArgamANAs tu saMkruddhAs tava putraM jayaiSiNaH
09029006c yatnato 'nveSamANAs tu naivApazyaJ janAdhipam
09029007a sa hi tIvreNa vegena gadApANir apAkramat
09029007c taM hradaM prAvizac cApi viSTabhyApaH svamAyayA
09029008a yadA tu pANDavAH sarve suparizrAntavAhanAH
09029008c tataH svazibiraM prApya vyatiSThan sahasainikAH
09029009a tataH kRpaz ca drauNiz ca kRtavarmA ca sAtvataH
09029009c saMniviSTeSu pArtheSu prayAtAs taM hradaM zanaiH
09029010a te taM hradaM samAsAdya yatra zete janAdhipaH
09029010c abhyabhASanta durdharSaM rAjAnaM suptam ambhasi
09029011a rAjann uttiSTha yudhyasva sahAsmAbhir yudhiSThiram
09029011c jitvA vA pRthivIM bhuGkSva hato vA svargam Apnuhi
09029012a teSAm api balaM sarvaM hataM duryodhana tvayA
09029012c pratirabdhAz ca bhUyiSThaM ye ziSTAs tatra sainikAH
09029013a na te vegaM viSahituM zaktAs tava vizAM pate
09029013c asmAbhir abhiguptasya tasmAd uttiSTha bhArata
09029014  duryodhana uvAca
09029014a diSTyA pazyAmi vo muktAn IdRzAt puruSakSayAt
09029014c pANDukauravasaMmardAj jIvamAnAn nararSabhAn
09029015a vijeSyAmo vayaM sarve vizrAntA vigataklamAH
09029015c bhavantaz ca parizrAntA vayaM ca bhRzavikSatAH
09029015e udIrNaM ca balaM teSAM tena yuddhaM na rocaye
09029016a na tv etad adbhutaM vIrA yad vo mahad idaM manaH
09029016c asmAsu ca parA bhaktir na tu kAlaH parAkrame
09029017a vizramyaikAM nizAm adya bhavadbhiH sahito raNe
09029017c pratiyotsyAmy ahaM zatrUJ zvo na me 'sty atra saMzayaH
09029018  saMjaya uvAca
09029018a evam ukto 'bravId drauNI rAjAnaM yuddhadurmadam
09029018c uttiSTha rAjan bhadraM te vijeSyAmo raNe parAn
09029019a iSTApUrtena dAnena satyena ca japena ca
09029019c zape rAjan yathA hy adya nihaniSyAmi somakAn
09029020a mA sma yajJakRtAM prItiM prApnuyAM sajjanocitAm
09029020c yadImAM rajanIM vyuSTAM na nihanmi parAn raNe
09029021a nAhatvA sarvapAJcAlAn vimokSye kavacaM vibho
09029021c iti satyaM bravImy etat tan me zRNu janAdhipa
09029022a teSu saMbhASamANeSu vyAdhAs taM dezam AyayuH
09029022c mAMsabhAraparizrAntAH pAnIyArthaM yadRcchayA
09029023a te hi nityaM mahArAja bhImasenasya lubdhakAH
09029023c mAMsabhArAn upAjahrur bhaktyA paramayA vibho
09029024a te tatra viSThitAs teSAM sarvaM tad vacanaM rahaH
09029024c duryodhanavacaz caiva zuzruvuH saMgatA mithaH
09029025a te 'pi sarve maheSvAsA ayuddhArthini kaurave
09029025c nirbandhaM paramaM cakrus tadA vai yuddhakAGkSiNaH
09029026a tAMs tathA samudIkSyAtha kauravANAM mahArathAn
09029026c ayuddhamanasaM caiva rAjAnaM sthitam ambhasi
09029027a teSAM zrutvA ca saMvAdaM rAjJaz ca salile sataH
09029027c vyAdhAbhyajAnan rAjendra salilasthaM suyodhanam
09029028a te pUrvaM pANDuputreNa pRSTA hy Asan sutaM tava
09029028c yadRcchopagatAs tatra rAjAnaM parimArgitAH
09029029a tatas te pANDuputrasya smRtvA tad bhASitaM tadA
09029029c anyonyam abruvan rAjan mRgavyAdhAH zanair idam
09029030a duryodhanaM khyApayAmo dhanaM dAsyati pANDavaH
09029030c suvyaktam iti naH khyAto hrade duryodhano nRpaH
09029031a tasmAd gacchAmahe sarve yatra rAjA yudhiSThiraH
09029031c AkhyAtuM salile suptaM duryodhanam amarSaNam
09029032a dhRtarASTrAtmajaM tasmai bhImasenAya dhImate
09029032c zayAnaM salile sarve kathayAmo dhanurbhRte
09029033a sa no dAsyati suprIto dhanAni bahulAny uta
09029033c kiM no mAMsena zuSkeNa parikliSTena zoSiNA
09029034a evam uktvA tato vyAdhAH saMprahRSTA dhanArthinaH
09029034c mAMsabhArAn upAdAya prayayuH zibiraM prati
09029035a pANDavAz ca mahArAja labdhalakSAH prahAriNaH
09029035c apazyamAnAH samare duryodhanam avasthitam
09029036a nikRtes tasya pApasya te pAraM gamanepsavaH
09029036c cArAn saMpreSayAm AsuH samantAt tad raNAjiram
09029037a Agamya tu tataH sarve naSTaM duryodhanaM nRpam
09029037c nyavedayanta sahitA dharmarAjasya sainikAH
09029038a teSAM tad vacanaM zrutvA cArANAM bharatarSabha
09029038c cintAm abhyagamat tIvrAM nizazvAsa ca pArthivaH
09029039a atha sthitAnAM pANDUnAM dInAnAM bharatarSabha
09029039c tasmAd dezAd apakramya tvaritA lubdhakA vibho
09029040a AjagmuH zibiraM hRSTA dRSTvA duryodhanaM nRpam
09029040c vAryamANAH praviSTAz ca bhImasenasya pazyataH
09029041a te tu pANDavam AsAdya bhImasenaM mahAbalam
09029041c tasmai tat sarvam Acakhyur yad vRttaM yac ca vai zrutam
09029042a tato vRkodaro rAjan dattvA teSAM dhanaM bahu
09029042c dharmarAjAya tat sarvam AcacakSe paraMtapaH
09029043a asau duryodhano rAjan vijJAto mama lubdhakaiH
09029043c saMstabhya salilaM zete yasyArthe paritapyase
09029044a tad vaco bhImasenasya priyaM zrutvA vizAM pate
09029044c ajAtazatruH kaunteyo hRSTo 'bhUt saha sodaraiH
09029045a taM ca zrutvA maheSvAsaM praviSTaM salilahradam
09029045c kSipram eva tato 'gacchat puraskRtya janArdanam
09029046a tataH kilakilAzabdaH prAdurAsId vizAM pate
09029046c pANDavAnAM prahRSTAnAM pAJcAlAnAM ca sarvazaH
09029047a siMhanAdAMs tataz cakruH kSveDAMz ca bharatarSabha
09029047c tvaritAH kSatriyA rAjaJ jagmur dvaipAyanaM hradam
09029048a jJAtaH pApo dhArtarASTro dRSTaz cety asakRd raNe
09029048c prAkrozan somakAs tatra hRSTarUpAH samantataH
09029049a teSAm Azu prayAtAnAM rathAnAM tatra veginAm
09029049c babhUva tumulaH zabdo divaspRk pRthivIpate
09029050a duryodhanaM parIpsantas tatra tatra yudhiSThiram
09029050c anvayus tvaritAs te vai rAjAnaM zrAntavAhanAH
09029051a arjuno bhImasenaz ca mAdrIputrau ca pANDavau
09029051c dhRSTadyumnaz ca pAJcAlyaH zikhaNDI cAparAjitaH
09029052a uttamaujA yudhAmanyuH sAtyakiz cAparAjitaH
09029052c pAJcAlAnAM ca ye ziSTA draupadeyAz ca bhArata
09029052e hayAz ca sarve nAgAz ca zatazaz ca padAtayaH
09029053a tataH prApto mahArAja dharmaputro yudhiSThiraH
09029053c dvaipAyanahradaM khyAtaM yatra duryodhano 'bhavat
09029054a zItAmalajalaM hRdyaM dvitIyam iva sAgaram
09029054c mAyayA salilaM stabhya yatrAbhUt te sutaH sthitaH
09029055a atyadbhutena vidhinA daivayogena bhArata
09029055c salilAntargataH zete durdarzaH kasya cit prabho
09029055e mAnuSasya manuSyendra gadAhasto janAdhipaH
09029056a tato duryodhano rAjA salitAntargato vasan
09029056c zuzruve tumulaM zabdaM jaladopamaniHsvanam
09029057a yudhiSThiras tu rAjendra hradaM taM saha sodaraiH
09029057c AjagAma mahArAja tava putravadhAya vai
09029058a mahatA zaGkhanAdena rathanemisvanena ca
09029058c uddhunvaMz ca mahAreNuM kampayaMz cApi medinIm
09029059a yaudhiSThirasya sainyasya zrutvA zabdaM mahArathAH
09029059c kRtavarmA kRpo drauNI rAjAnam idam abruvan
09029060a ime hy AyAnti saMhRSTAH pANDavA jitakAzinaH
09029060c apayAsyAmahe tAvad anujAnAtu no bhavAn
09029061a duryodhanas tu tac chrutvA teSAM tatra yazasvinAm
09029061c tathety uktvA hradaM taM vai mAyayAstambhayat prabho
09029062a te tv anujJApya rAjAnaM bhRzaM zokaparAyaNAH
09029062c jagmur dUraM mahArAja kRpaprabhRtayo rathAH
09029063a te gatvA dUram adhvAnaM nyagrodhaM prekSya mAriSa
09029063c nyavizanta bhRzaM zrAntAz cintayanto nRpaM prati
09029064a viSTabhya salilaM supto dhArtarASTro mahAbalaH
09029064c pANDavAz cApi saMprAptAs taM dezaM yuddham IpsavaH
09029065a kathaM nu yuddhaM bhavitA kathaM rAjA bhaviSyati
09029065c kathaM nu pANDavA rAjan pratipatsyanti kauravam
09029066a ity evaM cintayantas te rathebhyo 'zvAn vimucya ha
09029066c tatrAsAM cakrire rAjan kRpaprabhRtayo rathAH
09030001  saMjaya uvAca
09030001a tatas teSv apayAteSu ratheSu triSu pANDavAH
09030001c taM hradaM pratyapadyanta yatra duryodhano 'bhavat
09030002a AsAdya ca kuruzreSTha tadA dvaipAyanahradam
09030002c stambhitaM dhArtarASTreNa dRSTvA taM salilAzayam
09030002e vAsudevam idaM vAkyam abravIt kurunandanaH
09030003a pazyemAM dhArtarASTreNa mAyAm apsu prayojitAm
09030003c viSTabhya salilaM zete nAsya mAnuSato bhayam
09030004a daivIM mAyAm imAM kRtvA salilAntargato hy ayam
09030004c nikRtyA nikRtiprajJo na me jIvan vimokSyate
09030005a yady asya samare sAhyaM kurute vajrabhRt svayam
09030005c tathApy enaM hataM yuddhe loko drakSyati mAdhava
09030006  zrIvAsudeva uvAca
09030006a mAyAvina imAM mAyAM mAyayA jahi bhArata
09030006c mAyAvI mAyayA vadhyaH satyam etad yudhiSThira
09030007a kriyAbhyupAyair bahulair mAyAm apsu prayojya ha
09030007c jahi tvaM bharatazreSTha pApAtmAnaM suyodhanam
09030008a kriyAbhyupAyair indreNa nihatA daityadAnavAH
09030008c kriyAbhyupAyair bahubhir balir baddho mahAtmanA
09030009a kriyAbhyupAyaiH pUrvaM hi hiraNyAkSo mahAsuraH
09030009c hiraNyakazipuz caiva kriyayaiva niSUditau
09030009e vRtraz ca nihato rAjan kriyayaiva na saMzayaH
09030010a tathA paulastyatanayo rAvaNo nAma rAkSasaH
09030010c rAmeNa nihato rAjan sAnubandhaH sahAnugaH
09030010e kriyayA yogam AsthAya tathA tvam api vikrama
09030011a kriyAbhyupAyair nihato mayA rAjan purAtane
09030011c tArakaz ca mahAdaityo vipracittiz ca vIryavAn
09030012a vAtApir ilvalaz caiva trizirAz ca tathA vibho
09030012c sundopasundAv asurau kriyayaiva niSUditau
09030013a kriyAbhyupAyair indreNa tridivaM bhujyate vibho
09030013c kriyA balavatI rAjan nAnyat kiM cid yudhiSThira
09030014a daityAz ca dAnavAz caiva rAkSasAH pArthivAs tathA
09030014c kriyAbhyupAyair nihatAH kriyAM tasmAt samAcara
09030015  saMjaya uvAca
09030015a ity ukto vAsudevena pANDavaH saMzitavrataH
09030015c jalasthaM taM mahArAja tava putraM mahAbalam
09030015e abhyabhASata kaunteyaH prahasann iva bhArata
09030016a suyodhana kimartho 'yam Arambho 'psu kRtas tvayA
09030016c sarvaM kSatraM ghAtayitvA svakulaM ca vizAM pate
09030017a jalAzayaM praviSTo 'dya vAJchaJ jIvitam AtmanaH
09030017c uttiSTha rAjan yudhyasva sahAsmAbhiH suyodhana
09030018a sa ca darpo narazreSTha sa ca mAnaH kva te gataH
09030018c yas tvaM saMstabhya salilaM bhIto rAjan vyavasthitaH
09030019a sarve tvAM zUra ity eva janA jalpanti saMsadi
09030019c vyarthaM tad bhavato manye zauryaM salilazAyinaH
09030020a uttiSTha rAjan yudhyasva kSatriyo 'si kulodbhavaH
09030020c kauraveyo vizeSeNa kule janma ca saMsmara
09030021a sa kathaM kaurave vaMze prazaMsaJ janma cAtmanaH
09030021c yuddhAd bhItas tatas toyaM pravizya pratitiSThasi
09030022a ayuddham avyavasthAnaM naiSa dharmaH sanAtanaH
09030022c anAryajuSTam asvargyaM raNe rAjan palAyanam
09030023a kathaM pAram agatvA hi yuddhe tvaM vai jijIviSuH
09030023c imAn nipatitAn dRSTvA putrAn bhrAtqn pitqMs tathA
09030024a saMbandhino vayasyAMz ca mAtulAn bAndhavAMs tathA
09030024c ghAtayitvA kathaM tAta hrade tiSThasi sAMpratam
09030025a zUramAnI na zUras tvaM mithyA vadasi bhArata
09030025c zUro 'ham iti durbuddhe sarvalokasya zRNvataH
09030026a na hi zUrAH palAyante zatrUn dRSTvA kathaM cana
09030026c brUhi vA tvaM yayA dhRtyA zUra tyajasi saMgaram
09030027a sa tvam uttiSTha yudhyasva vinIya bhayam AtmanaH
09030027c ghAtayitvA sarvasainyaM bhrAtqMz caiva suyodhana
09030028a nedAnIM jIvite buddhiH kAryA dharmacikIrSayA
09030028c kSatradharmam apAzritya tvadvidhena suyodhana
09030029a yat tat karNam upAzritya zakuniM cApi saubalam
09030029c amartya iva saMmohAt tvam AtmAnaM na buddhavAn
09030030a tat pApaM sumahat kRtvA pratiyudhyasva bhArata
09030030c kathaM hi tvadvidho mohAd rocayeta palAyanam
09030031a kva te tat pauruSaM yAtaM kva ca mAnaH suyodhana
09030031c kva ca vikrAntatA yAtA kva ca visphUrjitaM mahat
09030032a kva te kRtAstratA yAtA kiM ca zeSe jalAzaye
09030032c sa tvam uttiSTha yudhyasva kSatradharmeNa bhArata
09030033a asmAn vA tvaM parAjitya prazAdhi pRthivIm imAm
09030033c atha vA nihato 'smAbhir bhUmau svapsyasi bhArata
09030034a eSa te prathamo dharmaH sRSTo dhAtrA mahAtmanA
09030034c taM kuruSva yathAtathyaM rAjA bhava mahAratha
09030035  duryodhana uvAca
09030035a naitac citraM mahArAja yad bhIH prANinam Avizet
09030035c na ca prANabhayAd bhIto vyapayAto 'smi bhArata
09030036a arathaz cAniSaGgI ca nihataH pArSNisArathiH
09030036c ekaz cApy agaNaH saMkhye pratyAzvAsam arocayam
09030037a na prANahetor na bhayAn na viSAdAd vizAM pate
09030037c idam ambhaH praviSTo 'smi zramAt tv idam anuSThitam
09030038a tvaM cAzvasihi kaunteya ye cApy anugatAs tava
09030038c aham utthAya vaH sarvAn pratiyotsyAmi saMyuge
09030039  yudhiSThira uvAca
09030039a AzvastA eva sarve sma ciraM tvAM mRgayAmahe
09030039c tad idAnIM samuttiSTha yudhyasveha suyodhana
09030040a hatvA vA samare pArthAn sphItaM rAjyam avApnuhi
09030040c nihato vA raNe 'smAbhir vIralokam avApsyasi
09030041  duryodhana uvAca
09030041a yadarthaM rAjyam icchAmi kurUNAM kurunandana
09030041c ta ime nihatAH sarve bhrAtaro me janezvara
09030042a kSINaratnAM ca pRthivIM hatakSatriyapuMgavAm
09030042c nAbhyutsahAmy ahaM bhoktuM vidhavAm iva yoSitam
09030043a adyApi tv aham AzaMse tvAM vijetuM yudhiSThira
09030043c bhaGktvA pAJcAlapANDUnAm utsAhaM bharatarSabha
09030044a na tv idAnIm ahaM manye kAryaM yuddhena karhi cit
09030044c droNe karNe ca saMzAnte nihate ca pitAmahe
09030045a astv idAnIm iyaM rAjan kevalA pRthivI tava
09030045c asahAyo hi ko rAjA rAjyam icchet prazAsitum
09030046a suhRdas tAdRzAn hitvA putrAn bhrAtqn pitqn api
09030046c bhavadbhiz ca hRte rAjye ko nu jIveta mAdRzaH
09030047a ahaM vanaM gamiSyAmi hy ajinaiH prativAsitaH
09030047c ratir hi nAsti me rAjye hatapakSasya bhArata
09030048a hatabAndhavabhUyiSThA hatAzvA hatakuJjarA
09030048c eSA te pRthivI rAjan bhuGkSvainAM vigatajvaraH
09030049a vanam eva gamiSyAmi vasAno mRgacarmaNI
09030049c na hi me nirjitasyAsti jIvite 'dya spRhA vibho
09030050a gaccha tvaM bhuGkSva rAjendra pRthivIM nihatezvarAm
09030050c hatayodhAM naSTaratnAM kSINavaprAM yathAsukham
09030051  yudhiSThira uvAca
09030051a ArtapralApAn mA tAta salilasthaH prabhASathAH
09030051c naitan manasi me rAjan vAzitaM zakuner iva
09030052a yadi cApi samarthaH syAs tvaM dAnAya suyodhana
09030052c nAham iccheyam avaniM tvayA dattAM prazAsitum
09030053a adharmeNa na gRhNIyAM tvayA dattAM mahIm imAm
09030053c na hi dharmaH smRto rAjan kSatriyasya pratigrahaH
09030054a tvayA dattAM na ceccheyaM pRthivIm akhilAm aham
09030054c tvAM tu yuddhe vinirjitya bhoktAsmi vasudhAm imAm
09030055a anIzvaraz ca pRthivIM kathaM tvaM dAtum icchasi
09030055c tvayeyaM pRthivI rAjan kiM na dattA tadaiva hi
09030056a dharmato yAcamAnAnAM zamArthaM ca kulasya naH
09030056c vArSNeyaM prathamaM rAjan pratyAkhyAya mahAbalam
09030057a kim idAnIM dadAsi tvaM ko hi te cittavibhramaH
09030057c abhiyuktas tu ko rAjA dAtum icched dhi medinIm
09030058a na tvam adya mahIM dAtum IzaH kauravanandana
09030058c AcchettuM vA balAd rAjan sa kathaM dAtum icchasi
09030058e mAM tu nirjitya saMgrAme pAlayemAM vasuMdharAm
09030059a sUcyagreNApi yad bhUmer api dhrIyeta bhArata
09030059c tanmAtram api no mahyaM na dadAti purA bhavAn
09030060a sa kathaM pRthivIm etAM pradadAsi vizAM pate
09030060c sUcyagraM nAtyajaH pUrvaM sa kathaM tyajasi kSitim
09030061a evam aizvaryam AsAdya prazAsya pRthivIm imAm
09030061c ko hi mUDho vyavasyeta zatror dAtuM vasuMdharAm
09030062a tvaM tu kevalamaurkhyeNa vimUDho nAvabudhyase
09030062c pRthivIM dAtukAmo 'pi jIvitenAdya mokSyase
09030063a asmAn vA tvaM parAjitya prazAdhi pRthivIm imAm
09030063c atha vA nihato 'smAbhir vraja lokAn anuttamAn
09030064a Avayor jIvato rAjan mayi ca tvayi ca dhruvam
09030064c saMzayaH sarvabhUtAnAM vijaye no bhaviSyati
09030065a jIvitaM tava duSprajJa mayi saMprati vartate
09030065c jIvayeyaM tv ahaM kAmaM na tu tvaM jIvituM kSamaH
09030066a dahane hi kRto yatnas tvayAsmAsu vizeSataH
09030066c AzIviSair viSaiz cApi jale cApi pravezanaiH
09030066e tvayA vinikRtA rAjan rAjyasya haraNena ca
09030067a etasmAt kAraNAt pApa jIvitaM te na vidyate
09030067c uttiSThottiSTha yudhyasva tat te zreyo bhaviSyati
09030068  saMjaya uvAca
09030068a evaM tu vividhA vAco jayayuktAH punaH punaH
09030068c kIrtayanti sma te vIrAs tatra tatra janAdhipa
09031001  dhRtarASTra uvAca
09031001a evaM saMtarjyamAnas tu mama putro mahIpatiH
09031001c prakRtyA manyumAn vIraH katham AsIt paraMtapaH
09031002a na hi saMtarjanA tena zrutapUrvA kadA cana
09031002c rAjabhAvena mAnyaz ca sarvalokasya so 'bhavat
09031003a iyaM ca pRthivI sarvA samlecchATavikA bhRzam
09031003c prasAdAd dhriyate yasya pratyakSaM tava saMjaya
09031004a sa tathA tarjyamAnas tu pANDuputrair vizeSataH
09031004c vihInaz ca svakair bhRtyair nirjane cAvRto bhRzam
09031005a zrutvA sa kaTukA vAco jayayuktAH punaH punaH
09031005c kim abravIt pANDaveyAMs tan mamAcakSva saMjaya
09031006  saMjaya uvAca
09031006a tarjyamAnas tadA rAjann udakasthas tavAtmajaH
09031006c yudhiSThireNa rAjendra bhrAtRbhiH sahitena ha
09031007a zrutvA sa kaTukA vAco viSamastho janAdhipaH
09031007c dIrgham uSNaM ca niHzvasya salilasthaH punaH punaH
09031008a salilAntargato rAjA dhunvan hastau punaH punaH
09031008c manaz cakAra yuddhAya rAjAnaM cAbhyabhASata
09031009a yUyaM sasuhRdaH pArthAH sarve sarathavAhanAH
09031009c aham ekaH paridyUno viratho hatavAhanaH
09031010a Attazastrai rathagatair bahubhiH parivAritaH
09031010c katham ekaH padAtiH sann azastro yoddhum utsahe
09031011a ekaikena tu mAM yUyaM yodhayadhvaM yudhiSThira
09031011c na hy eko bahubhir vIrair nyAyyaM yodhayituM yudhi
09031012a vizeSato vikavacaH zrAntaz cApaH samAzritaH
09031012c bhRzaM vikSatagAtraz ca zrAntavAhanasainikaH
09031013a na me tvatto bhayaM rAjan na ca pArthAd vRkodarAt
09031013c phalgunAd vAsudevAd vA pAJcAlebhyo 'tha vA punaH
09031014a yamAbhyAM yuyudhAnAd vA ye cAnye tava sainikAH
09031014c ekaH sarvAn ahaM kruddho na tAn yoddhum ihotsahe
09031015a dharmamUlA satAM kIrtir manuSyANAM janAdhipa
09031015c dharmaM caiveha kIrtiM ca pAlayan prabravImy aham
09031016a aham utthAya vaH sarvAn pratiyotsyAmi saMyuge
09031016c anvaMzAbhyAgatAn sarvAn RtUn saMvatsaro yathA
09031017a adya vaH sarathAn sAzvAn azastro viratho 'pi san
09031017c nakSatrANIva sarvANi savitA rAtrisaMkSaye
09031017e tejasA nAzayiSyAmi sthirIbhavata pANDavAH
09031018a adyAnRNyaM gamiSyAmi kSatriyANAM yazasvinAm
09031018c bAhlIkadroNabhISmANAM karNasya ca mahAtmanaH
09031019a jayadrathasya zUrasya bhagadattasya cobhayoH
09031019c madrarAjasya zalyasya bhUrizravasa eva ca
09031020a putrANAM bharatazreSTha zakuneH saubalasya ca
09031020c mitrANAM suhRdAM caiva bAndhavAnAM tathaiva ca
09031021a AnRNyam adya gacchAmi hatvA tvAM bhrAtRbhiH saha
09031021c etAvad uktvA vacanaM virarAma janAdhipaH
09031022  yudhiSThira uvAca
09031022a diSTyA tvam api jAnISe kSatradharmaM suyodhana
09031022c diSTyA te vartate buddhir yuddhAyaiva mahAbhuja
09031023a diSTyA zUro 'si kauravya diSTyA jAnAsi saMgaram
09031023c yas tvam eko hi naH sarvAn saMyuge yoddhum icchasi
09031024a eka ekena saMgamya yat te saMmatam Ayudham
09031024c tat tvam AdAya yudhyasva prekSakAs te vayaM sthitAH
09031025a ayam iSTaM ca te kAmaM vIra bhUyo dadAmy aham
09031025c hatvaikaM bhavato rAjyaM hato vA svargam Apnuhi
09031026  duryodhana uvAca
09031026a ekaz ced yoddhum Akrande varo 'dya mama dIyate
09031026c AyudhAnAm iyaM cApi vRtA tvatsaMmate gadA
09031027a bhrAtqNAM bhavatAm ekaH zakyaM mAM yo 'bhimanyate
09031027c padAtir gadayA saMkhye sa yudhyatu mayA saha
09031028a vRttAni rathayuddhAni vicitrANi pade pade
09031028c idam ekaM gadAyuddhaM bhavatv adyAdbhutaM mahat
09031029a annAnAm api paryAyaM kartum icchanti mAnavAH
09031029c yuddhAnAm api paryAyo bhavatv anumate tava
09031030a gadayA tvAM mahAbAho vijeSyAmi sahAnujam
09031030c pAJcAlAn sRJjayAMz caiva ye cAnye tava sainikAH
09031031  yudhiSThira uvAca
09031031a uttiSThottiSTha gAndhAre mAM yodhaya suyodhana
09031031c eka ekena saMgamya saMyuge gadayA balI
09031032a puruSo bhava gAndhAre yudhyasva susamAhitaH
09031032c adya te jIvitaM nAsti yady api tvaM manojavaH
09031033  saMjaya uvAca
09031033a etat sa narazArdUlo nAmRSyata tavAtmajaH
09031033c salilAntargataH zvabhre mahAnAga iva zvasan
09031034a tathAsau vAkpratodena tudyamAnaH punaH punaH
09031034c vAcaM na mamRSe dhImAn uttamAzvaH kazAm iva
09031035a saMkSobhya salilaM vegAd gadAm AdAya vIryavAn
09031035c adrisAramayIM gurvIM kAJcanAGgadabhUSaNAm
09031035e antarjalAt samuttasthau nAgendra iva niHzvasan
09031036a sa bhittvA stambhitaM toyaM skandhe kRtvAyasIM gadAm
09031036c udatiSThata putras te pratapan razmimAn iva
09031037a tataH zaikyAyasIM gurvIM jAtarUpapariSkRtAm
09031037c gadAM parAmRzad dhImAn dhArtarASTro mahAbalaH
09031038a gadAhastaM tu taM dRSTvA sazRGgam iva parvatam
09031038c prajAnAm iva saMkruddhaM zUlapANim avasthitam
09031038e sagado bhArato bhAti pratapan bhAskaro yathA
09031039a tam uttIrNaM mahAbAhuM gadAhastam ariMdamam
09031039c menire sarvabhUtAni daNDahastam ivAntakam
09031040a vajrahastaM yathA zakraM zUlahastaM yathA haram
09031040c dadRzuH sarvapAJcAlAH putraM tava janAdhipa
09031041a tam uttIrNaM tu saMprekSya samahRSyanta sarvazaH
09031041c pAJcAlAH pANDaveyAz ca te 'nyonyasya talAn daduH
09031042a avahAsaM tu taM matvA putro duryodhanas tava
09031042c udvRtya nayane kruddho didhakSur iva pANDavAn
09031043a trizikhAM bhrukuTIM kRtvA saMdaSTadazanacchadaH
09031043c pratyuvAca tatas tAn vai pANDavAn sahakezavAn
09031044a avahAsasya vo 'syAdya prativaktAsmi pANDavAH
09031044c gamiSyatha hatAH sadyaH sapAJcAlA yamakSayam
09031045a utthitas tu jalAt tasmAt putro duryodhanas tava
09031045c atiSThata gadApANI rudhireNa samukSitaH
09031046a tasya zoNitadigdhasya salilena samukSitam
09031046c zarIraM sma tadA bhAti sravann iva mahIdharaH
09031047a tam udyatagadaM vIraM menire tatra pANDavAH
09031047c vaivasvatam iva kruddhaM kiMkarodyatapANinam
09031048a sa meghaninado harSAn nadann iva ca govRSaH
09031048c AjuhAva tataH pArthAn gadayA yudhi vIryavAn
09031049  duryodhana uvAca
09031049a ekaikena ca mAM yUyam AsIdata yudhiSThira
09031049c na hy eko bahubhir nyAyyo vIra yodhayituM yudhi
09031050a nyastavarmA vizeSeNa zrAntaz cApsu pariplutaH
09031050c bhRzaM vikSatagAtraz ca hatavAhanasainikaH
09031051  yudhiSThira uvAca
09031051a nAbhUd iyaM tava prajJA katham evaM suyodhana
09031051c yadAbhimanyuM bahavo jaghnur yudhi mahArathAH
09031052a AmuJca kavacaM vIra mUrdhajAn yamayasva ca
09031052c yac cAnyad api te nAsti tad apy Adatsva bhArata
09031052e imam ekaM ca te kAmaM vIra bhUyo dadAmy aham
09031053a paJcAnAM pANDaveyAnAM yena yoddhum ihecchasi
09031053c taM hatvA vai bhavAn rAjA hato vA svargam Apnuhi
09031053e Rte ca jIvitAd vIra yuddhe kiM kurma te priyam
09031054  saMjaya uvAca
09031054a tatas tava suto rAjan varma jagrAha kAJcanam
09031054c vicitraM ca zirastrANaM jAmbUnadapariSkRtam
09031055a so 'vabaddhazirastrANaH zubhakAJcanavarmabhRt
09031055c rarAja rAjan putras te kAJcanaH zailarAD iva
09031056a saMnaddhaH sa gadI rAjan sajjaH saMgrAmamUrdhani
09031056c abravIt pANDavAn sarvAn putro duryodhanas tava
09031057a bhrAtqNAM bhavatAm eko yudhyatAM gadayA mayA
09031057c sahadevena vA yotsye bhImena nakulena vA
09031058a atha vA phalgunenAdya tvayA vA bharatarSabha
09031058c yotsye 'haM saMgaraM prApya vijeSye ca raNAjire
09031059a aham adya gamiSyAmi vairasyAntaM sudurgamam
09031059c gadayA puruSavyAghra hemapaTTavinaddhayA
09031060a gadAyuddhe na me kaz cit sadRzo 'stIti cintaya
09031060c gadayA vo haniSyAmi sarvAn eva samAgatAn
09031060e gRhNAtu sa gadAM yo vai yudhyate 'dya mayA saha
09032001  saMjaya uvAca
09032001a evaM duryodhane rAjan garjamAne muhur muhuH
09032001c yudhiSThirasya saMkruddho vAsudevo 'bravId idam
09032002a yadi nAma hy ayaM yuddhe varayet tvAM yudhiSThira
09032002c arjunaM nakulaM vApi sahadevam athApi vA
09032003a kim idaM sAhasaM rAjaMs tvayA vyAhRtam IdRzam
09032003c ekam eva nihatyAjau bhava rAjA kuruSv iti
09032004a etena hi kRtA yogyA varSANIha trayodaza
09032004c Ayase puruSe rAjan bhImasenajighAMsayA
09032005a kathaM nAma bhavet kAryam asmAbhir bharatarSabha
09032005c sAhasaM kRtavAMs tvaM tu hy anukrozAn nRpottama
09032006a nAnyam asyAnupazyAmi pratiyoddhAram Ahave
09032006c Rte vRkodarAt pArthAt sa ca nAtikRtazramaH
09032007a tad idaM dyUtam ArabdhaM punar eva yathA purA
09032007c viSamaM zakunez caiva tava caiva vizAM pate
09032008a balI bhImaH samarthaz ca kRtI rAjA suyodhanaH
09032008c balavAn vA kRtI veti kRtI rAjan viziSyate
09032009a so 'yaM rAjaMs tvayA zatruH same pathi nivezitaH
09032009c nyastaz cAtmA suviSame kRcchram ApAditA vayam
09032010a ko nu sarvAn vinirjitya zatrUn ekena vairiNA
09032010c paNitvA caikapANena rocayed evam Ahavam
09032011a na hi pazyAmi taM loke gadAhastaM narottamam
09032011c yudhyed duryodhanaM saMkhye kRtitvAd dhi vizeSayet
09032012a phalgunaM vA bhavantaM vA mAdrIputrAv athApi vA
09032012c na samarthAn ahaM manye gadAhastasya saMyuge
09032013a sa kathaM vadase zatruM yudhyasva gadayeti ha
09032013c ekaM ca no nihatyAjau bhava rAjeti bhArata
09032014a vRkodaraM samAsAdya saMzayo vijaye hi naH
09032014c nyAyato yudhyamAnAnAM kRtI hy eSa mahAbalaH
09032015  bhIma uvAca
09032015a madhusUdana mA kArSIr viSAdaM yadunandana
09032015c adya pAraM gamiSyAmi vairasya bhRzadurgamam
09032016a ahaM suyodhanaM saMkhye haniSyAmi na saMzayaH
09032016c vijayo vai dhruvaM kRSNa dharmarAjasya dRzyate
09032017a adhyardhena guNeneyaM gadA gurutarI mama
09032017c na tathA dhArtarASTrasya mA kArSIr mAdhava vyathAm
09032018a sAmarAn api lokAMs trIn nAnAzastradharAn yudhi
09032018c yodhayeyaM raNe hRSTaH kim utAdya suyodhanam
09032019  saMjaya uvAca
09032019a tathA saMbhASamANaM tu vAsudevo vRkodaram
09032019c hRSTaH saMpUjayAm Asa vacanaM cedam abravIt
09032020a tvAm Azritya mahAbAho dharmarAjo yudhiSThiraH
09032020c nihatAriH svakAM dIptAM zriyaM prApto na saMzayaH
09032021a tvayA vinihatAH sarve dhRtarASTrasutA raNe
09032021c rAjAno rAjaputrAz ca nAgAz ca vinipAtitAH
09032022a kaliGgA mAgadhAH prAcyA gAndhArAH kuravas tathA
09032022c tvAm AsAdya mahAyuddhe nihatAH pANDunandana
09032023a hatvA duryodhanaM cApi prayacchorvIM sasAgarAm
09032023c dharmarAjAya kaunteya yathA viSNuH zacIpateH
09032024a tvAM ca prApya raNe pApo dhArtarASTro vinaGkSyati
09032024c tvam asya sakthinI bhaGktvA pratijJAM pArayiSyasi
09032025a yatnena tu sadA pArtha yoddhavyo dhRtarASTrajaH
09032025c kRtI ca balavAMz caiva yuddhazauNDaz ca nityadA
09032026a tatas tu sAtyakI rAjan pUjayAm Asa pANDavam
09032026c vividhAbhiz ca tAM vAgbhiH pUjayAm Asa mAdhavaH
09032027a pAJcAlAH pANDaveyAz ca dharmarAjapurogamAH
09032027c tad vaco bhImasenasya sarva evAbhyapUjayan
09032028a tato bhImabalo bhImo yudhiSThiram athAbravIt
09032028c sRJjayaiH saha tiSThantaM tapantam iva bhAskaram
09032029a aham etena saMgamya saMyuge yoddhum utsahe
09032029c na hi zakto raNe jetuM mAm eSa puruSAdhamaH
09032030a adya krodhaM vimokSyAmi nihitaM hRdaye bhRzam
09032030c suyodhane dhArtarASTre khANDave 'gnim ivArjunaH
09032031a zalyam adyoddhariSyAmi tava pANDava hRcchayam
09032031c nihatya gadayA pApam adya rAjan sukhI bhava
09032032a adya kIrtimayIM mAlAM pratimokSye tavAnagha
09032032c prANAJ zriyaM ca rAjyaM ca mokSyate 'dya suyodhanaH
09032033a rAjA ca dhRtarASTro 'dya zrutvA putraM mayA hatam
09032033c smariSyaty azubhaM karma yat tac chakunibuddhijam
09032034a ity uktvA bharatazreSTho gadAm udyamya vIryavAn
09032034c udatiSThata yuddhAya zakro vRtram ivAhvayan
09032035a tam ekAkinam AsAdya dhArtarASTraM mahAbalam
09032035c niryUtham iva mAtaGgaM samahRSyanta pANDavAH
09032036a tam udyatagadaM dRSTvA kailAsam iva zRGgiNam
09032036c bhImasenas tadA rAjan duryodhanam athAbravIt
09032037a rAjJApi dhRtarASTreNa tvayA cAsmAsu yat kRtam
09032037c smara tad duSkRtaM karma yad vRttaM vAraNAvate
09032038a draupadI ca parikliSTA sabhAmadhye rajasvalA
09032038c dyUte yad vijito rAjA zakuner buddhinizcayAt
09032039a yAni cAnyAni duSTAtman pApAni kRtavAn asi
09032039c anAgaHsu ca pArtheSu tasya pazya mahat phalam
09032040a tvatkRte nihataH zete zaratalpe mahAyazAH
09032040c gAGgeyo bharatazreSThaH sarveSAM naH pitAmahaH
09032041a hato droNaz ca karNaz ca hataH zalyaH pratApavAn
09032041c vairasya cAdikartAsau zakunir nihato yudhi
09032042a bhrAtaras te hatAH zUrAH putrAz ca sahasainikAH
09032042c rAjAnaz ca hatAH zUrAH samareSv anivartinaH
09032043a ete cAnye ca nihatA bahavaH kSatriyarSabhAH
09032043c prAtikAmI tathA pApo draupadyAH klezakRd dhataH
09032044a avaziSTas tvam evaikaH kulaghno 'dhamapUruSaH
09032044c tvAm apy adya haniSyAmi gadayA nAtra saMzayaH
09032045a adya te 'haM raNe darpaM sarvaM nAzayitA nRpa
09032045c rAjyAzAM vipulAM rAjan pANDaveSu ca duSkRtam
09032046  duryodhana uvAca
09032046a kiM katthitena bahudhA yudhyasvAdya mayA saha
09032046c adya te 'haM vineSyAmi yuddhazraddhAM vRkodara
09032047a kiM na pazyasi mAM pApa gadAyuddhe vyavasthitam
09032047c himavacchikharAkArAM pragRhya mahatIM gadAm
09032048a gadinaM ko 'dya mAM pApa jetum utsahate ripuH
09032048c nyAyato yudhyamAnasya deveSv api puraMdaraH
09032049a mA vRthA garja kaunteya zAradAbhram ivAjalam
09032049c darzayasva balaM yuddhe yAvat tat te 'dya vidyate
09032050a tasya tad vacanaM zrutvA pAJcAlAH sahasRJjayAH
09032050c sarve saMpUjayAm Asus tad vaco vijigISavaH
09032051a taM mattam iva mAtaGgaM talazabdena mAnavAH
09032051c bhUyaH saMharSayAm AsU rAjan duryodhanaM nRpam
09032052a bRMhanti kuJjarAs tatra hayA heSanti cAsakRt
09032052c zastrANi saMpradIpyante pANDavAnAM jayaiSiNAm
09033001  saMjaya uvAca
09033001a tasmin yuddhe mahArAja saMpravRtte sudAruNe
09033001c upaviSTeSu sarveSu pANDaveSu mahAtmasu
09033002a tatas tAladhvajo rAmas tayor yuddha upasthite
09033002c zrutvA tac chiSyayo rAjann AjagAma halAyudhaH
09033003a taM dRSTvA paramaprItAH pUjayitvA narAdhipAH
09033003c ziSyayoH kauzalaM yuddhe pazya rAmeti cAbruvan
09033004a abravIc ca tadA rAmo dRSTvA kRSNaM ca pANDavam
09033004c duryodhanaM ca kauravyaM gadApANim avasthitam
09033005a catvAriMzad ahAny adya dve ca me niHsRtasya vai
09033005c puSyeNa saMprayAto 'smi zravaNe punarAgataH
09033005e ziSyayor vai gadAyuddhaM draSTukAmo 'smi mAdhava
09033006a tato yudhiSThiro rAjA pariSvajya halAyudham
09033006c svAgataM kuzalaM cAsmai paryapRcchad yathAtatham
09033007a kRSNau cApi maheSvAsAv abhivAdya halAyudham
09033007c sasvajAte pariprItau priyamANau yazasvinau
09033008a mAdrIputrau tathA zUrau draupadyAH paJca cAtmajAH
09033008c abhivAdya sthitA rAjan rauhiNeyaM mahAbalam
09033009a bhImaseno 'tha balavAn putras tava janAdhipa
09033009c tathaiva codyatagadau pUjayAm Asatur balam
09033010a svAgatena ca te tatra pratipUjya punaH punaH
09033010c pazya yuddhaM mahAbAho iti te rAmam abruvan
09033010e evam Ucur mahAtmAnaM rauhiNeyaM narAdhipAH
09033011a pariSvajya tadA rAmaH pANDavAn sRJjayAn api
09033011c apRcchat kuzalaM sarvAn pANDavAMz cAmitaujasaH
09033011e tathaiva te samAsAdya papracchus tam anAmayam
09033012a pratyabhyarcya halI sarvAn kSatriyAMz ca mahAmanAH
09033012c kRtvA kuzalasaMyuktAM saMvidaM ca yathAvayaH
09033013a janArdanaM sAtyakiM ca premNA sa pariSasvaje
09033013c mUrdhni caitAv upAghrAya kuzalaM paryapRcchata
09033014a tau cainaM vidhivad rAjan pUjayAm Asatur gurum
09033014c brahmANam iva devezam indropendrau mudA yutau
09033015a tato 'bravId dharmasuto rauhiNeyam ariMdamam
09033015c idaM bhrAtror mahAyuddhaM pazya rAmeti bhArata
09033016a teSAM madhye mahAbAhuH zrImAn kezavapUrvajaH
09033016c nyavizat paramaprItaH pUjyamAno mahArathaiH
09033017a sa babhau rAjamadhyastho nIlavAsAH sitaprabhaH
09033017c divIva nakSatragaNaiH parikIrNo nizAkaraH
09033018a tatas tayoH saMnipAtas tumulo romaharSaNaH
09033018c AsId antakaro rAjan vairasya tava putrayoH
09034001  janamejaya uvAca
09034001a pUrvam eva yadA rAmas tasmin yuddha upasthite
09034001c Amantrya kezavaM yAto vRSNibhiH sahitaH prabhuH
09034002a sAhAyyaM dhArtarASTrasya na ca kartAsmi kezava
09034002c na caiva pANDuputrANAM gamiSyAmi yathAgatam
09034003a evam uktvA tadA rAmo yAtaH zatrunibarhaNaH
09034003c tasya cAgamanaM bhUyo brahmaJ zaMsitum arhasi
09034004a AkhyAhi me vistarataH kathaM rAma upasthitaH
09034004c kathaM ca dRSTavAn yuddhaM kuzalo hy asi sattama
09034005  vaizaMpAyana uvAca
09034005a upaplavye niviSTeSu pANDaveSu mahAtmasu
09034005c preSito dhRtarASTrasya samIpaM madhusUdanaH
09034005e zamaM prati mahAbAho hitArthaM sarvadehinAm
09034006a sa gatvA hAstinapuraM dhRtarASTraM sametya ca
09034006c uktavAn vacanaM tathyaM hitaM caiva vizeSataH
09034006e na ca tat kRtavAn rAjA yathAkhyAtaM hi te purA
09034007a anavApya zamaM tatra kRSNaH puruSasattamaH
09034007c Agacchata mahAbAhur upaplavyaM janAdhipa
09034008a tataH pratyAgataH kRSNo dhArtarASTravisarjitaH
09034008c akriyAyAM naravyAghra pANDavAn idam abravIt
09034009a na kurvanti vaco mahyaM kuravaH kAlacoditAH
09034009c nirgacchadhvaM pANDaveyAH puSyeNa sahitA mayA
09034010a tato vibhajyamAneSu baleSu balinAM varaH
09034010c provAca bhrAtaraM kRSNaM rauhiNeyo mahAmanAH
09034011a teSAm api mahAbAho sAhAyyaM madhusUdana
09034011c kriyatAm iti tat kRSNo nAsya cakre vacas tadA
09034012a tato manyuparItAtmA jagAma yadunandanaH
09034012c tIrthayAtrAM haladharaH sarasvatyAM mahAyazAH
09034012e maitre nakSatrayoge sma sahitaH sarvayAdavaiH
09034013a AzrayAm Asa bhojas tu duryodhanam ariMdamaH
09034013c yuyudhAnena sahito vAsudevas tu pANDavAn
09034014a rauhiNeye gate zUre puSyeNa madhusUdanaH
09034014c pANDaveyAn puraskRtya yayAv abhimukhaH kurUn
09034015a gacchann eva pathisthas tu rAmaH preSyAn uvAca ha
09034015c saMbhArAMs tIrthayAtrAyAM sarvopakaraNAni ca
09034015e AnayadhvaM dvArakAyA agnIn vai yAjakAMs tathA
09034016a suvarNaM rajataM caiva dhenUr vAsAMsi vAjinaH
09034016c kuJjarAMz ca rathAMz caiva kharoSTraM vAhanAni ca
09034016e kSipram AnIyatAM sarvaM tIrthahetoH paricchadam
09034017a pratisrotaH sarasvatyA gacchadhvaM zIghragAminaH
09034017c Rtvijaz cAnayadhvaM vai zatazaz ca dvijarSabhAn
09034018a evaM saMdizya tu preSyAn baladevo mahAbalaH
09034018c tIrthayAtrAM yayau rAjan kurUNAM vaizase tadA
09034018e sarasvatIM pratisrotaH samudrAd abhijagmivAn
09034019a Rtvigbhiz ca suhRdbhiz ca tathAnyair dvijasattamaiH
09034019c rathair gajais tathAzvaiz ca preSyaiz ca bharatarSabha
09034019e gokharoSTraprayuktaiz ca yAnaiz ca bahubhir vRtaH
09034020a zrAntAnAM klAntavapuSAM zizUnAM vipulAyuSAm
09034020c tAni yAnAni dezeSu pratIkSyante sma bhArata
09034020e bubhukSitAnAm arthAya kLptam annaM samantataH
09034021a yo yo yatra dvijo bhoktuM kAmaM kAmayate tadA
09034021c tasya tasya tu tatraivam upajahrus tadA nRpa
09034022a tatra sthitA narA rAjan rauhiNeyasya zAsanAt
09034022c bhakSyapeyasya kurvanti rAzIMs tatra samantataH
09034023a vAsAMsi ca mahArhANi paryaGkAstaraNAni ca
09034023c pUjArthaM tatra kLptAni viprANAM sukham icchatAm
09034024a yatra yaH svapate vipraH kSatriyo vApi bhArata
09034024c tatra tatra tu tasyaiva sarvaM kLptam adRzyata
09034025a yathAsukhaM janaH sarvas tiSThate yAti vA tadA
09034025c yAtukAmasya yAnAni pAnAni tRSitasya ca
09034026a bubhukSitasya cAnnAni svAdUni bharatarSabha
09034026c upajahrur narAs tatra vastrANy AbharaNAni ca
09034027a sa panthAH prababhau rAjan sarvasyaiva sukhAvahaH
09034027c svargopamas tadA vIra narANAM tatra gacchatAm
09034028a nityapramuditopetaH svAdubhakSaH zubhAnvitaH
09034028c vipaNyApaNapaNyAnAM nAnAjanazatair vRtaH
09034028e nAnAdrumalatopeto nAnAratnavibhUSitaH
09034029a tato mahAtmA niyame sthitAtmA; puNyeSu tIrtheSu vasUni rAjan
09034029c dadau dvijebhyaH kratudakSiNAz ca; yadupravIro halabhRt pratItaH
09034030a dogdhrIz ca dhenUz ca sahasrazo vai; suvAsasaH kAJcanabaddhazRGgIH
09034030c hayAMz ca nAnAvidhadezajAtAn; yAnAni dAsIz ca tathA dvijebhyaH
09034031a ratnAni muktAmaNividrumaM ca; zRGgIsuvarNaM rajataM ca zubhram
09034031c ayasmayaM tAmramayaM ca bhANDaM; dadau dvijAtipravareSu rAmaH
09034032a evaM sa vittaM pradadau mahAtmA; sarasvatItIrthavareSu bhUri
09034032c yayau krameNApratimaprabhAvas; tataH kurukSetram udAravRttaH
09034033  janamejaya uvAca
09034033a sArasvatAnAM tIrthAnAM guNotpattiM vadasva me
09034033c phalaM ca dvipadAM zreSTha karmanirvRttim eva ca
09034034a yathAkramaM ca bhagavaMs tIrthAnAm anupUrvazaH
09034034c brahman brahmavidAM zreSTha paraM kautUhalaM hi me
09034035  vaizaMpAyana uvAca
09034035a tIrthAnAM vistaraM rAjan guNotpattiM ca sarvazaH
09034035c mayocyamAnAM zRNu vai puNyAM rAjendra kRtsnazaH
09034036a pUrvaM mahArAja yadupravIra; RtviksuhRdvipragaNaiz ca sArdham
09034036c puNyaM prabhAsaM samupAjagAma; yatroDurAD yakSmaNA klizyamAnaH
09034037a vimuktazApaH punar Apya tejaH; sarvaM jagad bhAsayate narendra
09034037c evaM tu tIrthapravaraM pRthivyAM; prabhAsanAt tasya tataH prabhAsaH
09034038  janamejaya uvAca
09034038a kimarthaM bhagavAn somo yakSmaNA samagRhyata
09034038c kathaM ca tIrthapravare tasmiMz candro nyamajjata
09034039a katham Aplutya tasmiMs tu punar ApyAyitaH zazI
09034039c etan me sarvam AcakSva vistareNa mahAmune
09034040  vaizaMpAyana uvAca
09034040a dakSasya tanayA yAs tAH prAdurAsan vizAM pate
09034040c sa saptaviMzatiM kanyA dakSaH somAya vai dadau
09034041a nakSatrayoganiratAH saMkhyAnArthaM ca bhArata
09034041c patnyo vai tasya rAjendra somasya zubhalakSaNAH
09034042a tAs tu sarvA vizAlAkSyo rUpeNApratimA bhuvi
09034042c atyaricyata tAsAM tu rohiNI rUpasaMpadA
09034043a tatas tasyAM sa bhagavAn prItiM cakre nizAkaraH
09034043c sAsya hRdyA babhUvAtha tasmAt tAM bubhuje sadA
09034044a purA hi somo rAjendra rohiNyAm avasac ciram
09034044c tato 'sya kupitAny Asan nakSatrANi mahAtmanaH
09034045a tA gatvA pitaraM prAhuH prajApatim atandritAH
09034045c somo vasati nAsmAsu rohiNIM bhajate sadA
09034046a tA vayaM sahitAH sarvAs tvatsakAze prajezvara
09034046c vatsyAmo niyatAhArAs tapazcaraNatatparAH
09034047a zrutvA tAsAM tu vacanaM dakSaH somam athAbravIt
09034047c samaM vartasva bhAryAsu mA tvAdharmo mahAn spRzet
09034048a tAz ca sarvAbravId dakSo gacchadhvaM somam antikAt
09034048c samaM vatsyati sarvAsu candramA mama zAsanAt
09034049a visRSTAs tAs tadA jagmuH zItAMzubhavanaM tadA
09034049c tathApi somo bhagavAn punar eva mahIpate
09034049e rohiNIM nivasaty eva prIyamANo muhur muhuH
09034050a tatas tAH sahitAH sarvA bhUyaH pitaram abruvan
09034050c tava zuzrUSaNe yuktA vatsyAmo hi tavAzrame
09034050e somo vasati nAsmAsu nAkarod vacanaM tava
09034051a tAsAM tad vacanaM zrutvA dakSaH somam athAbravIt
09034051c samaM vartasva bhAryAsu mA tvAM zapsye virocana
09034052a anAdRtya tu tad vAkyaM dakSasya bhagavAJ zazI
09034052c rohiNyA sArdham avasat tatas tAH kupitAH punaH
09034053a gatvA ca pitaraM prAhuH praNamya zirasA tadA
09034053c somo vasati nAsmAsu tasmAn naH zaraNaM bhava
09034054a rohiNyAm eva bhagavan sadA vasati candramAH
09034054c tasmAn nas trAhi sarvA vai yathA naH soma Avizet
09034055a tac chrutvA bhagavAn kruddho yakSmANaM pRthivIpate
09034055c sasarja roSAt somAya sa coDupatim Avizat
09034056a sa yakSmaNAbhibhUtAtmAkSIyatAharahaH zazI
09034056c yatnaM cApy akarod rAjan mokSArthaM tasya yakSmaNaH
09034057a iSTveSTibhir mahArAja vividhAbhir nizAkaraH
09034057c na cAmucyata zApAd vai kSayaM caivAbhyagacchata
09034058a kSIyamANe tataH some oSadhyo na prajajJire
09034058c nirAsvAdarasAH sarvA hatavIryAz ca sarvazaH
09034059a oSadhInAM kSaye jAte prANinAm api saMkSayaH
09034059c kRzAz cAsan prajAH sarvAH kSIyamANe nizAkare
09034060a tato devAH samAgamya somam Ucur mahIpate
09034060c kim idaM bhavato rUpam IdRzaM na prakAzate
09034061a kAraNaM brUhi naH sarvaM yenedaM te mahad bhayam
09034061c zrutvA tu vacanaM tvatto vidhAsyAmas tato vayam
09034062a evam uktaH pratyuvAca sarvAMs tAJ zazalakSaNaH
09034062c zApaM ca kAraNaM caiva yakSmANaM ca tathAtmanaH
09034063a devAs tasya vacaH zrutvA gatvA dakSam athAbruvan
09034063c prasIda bhagavan some zApaz caiSa nivartyatAm
09034064a asau hi candramAH kSINaH kiMciccheSo hi lakSyate
09034064c kSayAc caivAsya deveza prajAz cApi gatAH kSayam
09034065a vIrudoSadhayaz caiva bIjAni vividhAni ca
09034065c tathA vayaM lokaguro prasAdaM kartum arhasi
09034066a evam uktas tadA cintya prAha vAkyaM prajApatiH
09034066c naitac chakyaM mama vaco vyAvartayitum anyathA
09034066e hetunA tu mahAbhAgA nivartiSyati kena cit
09034067a samaM vartatu sarvAsu zazI bhAryAsu nityazaH
09034067c sarasvatyA vare tIrthe unmajjaJ zazalakSaNaH
09034067e punar vardhiSyate devAs tad vai satyaM vaco mama
09034068a mAsArdhaM ca kSayaM somo nityam eva gamiSyati
09034068c mAsArdhaM ca sadA vRddhiM satyam etad vaco mama
09034069a sarasvatIM tataH somo jagAma RSizAsanAt
09034069c prabhAsaM paramaM tIrthaM sarasvatyA jagAma ha
09034070a amAvAsyAM mahAtejAs tatronmajjan mahAdyutiH
09034070c lokAn prabhAsayAm Asa zItAMzutvam avApa ca
09034071a devAz ca sarve rAjendra prabhAsaM prApya puSkalam
09034071c somena sahitA bhUtvA dakSasya pramukhe 'bhavan
09034072a tataH prajApatiH sarvA visasarjAtha devatAH
09034072c somaM ca bhagavAn prIto bhUyo vacanam abravIt
09034073a mAvamaMsthAH striyaH putra mA ca viprAn kadA cana
09034073c gaccha yuktaH sadA bhUtvA kuru vai zAsanaM mama
09034074a sa visRSTo mahArAja jagAmAtha svam Alayam
09034074c prajAz ca muditA bhUtvA bhojane ca yathA purA
09034075a etat te sarvam AkhyAtaM yathA zapto nizAkaraH
09034075c prabhAsaM ca yathA tIrthaM tIrthAnAM pravaraM hy abhUt
09034076a amAvAsyAM mahArAja nityazaH zazalakSaNaH
09034076c snAtvA hy ApyAyate zrImAn prabhAse tIrtha uttame
09034077a ataz cainaM prajAnanti prabhAsam iti bhUmipa
09034077c prabhAM hi paramAM lebhe tasminn unmajjya candramAH
09034078a tatas tu camasodbhedam acyutas tv agamad balI
09034078c camasodbheda ity evaM yaM janAH kathayanty uta
09034079a tatra dattvA ca dAnAni viziSTAni halAyudhaH
09034079c uSitvA rajanIm ekAM snAtvA ca vidhivat tadA
09034080a udapAnam athAgacchat tvarAvAn kezavAgrajaH
09034080c AdyaM svastyayanaM caiva tatrAvApya mahat phalam
09034081a snigdhatvAd oSadhInAM ca bhUmez ca janamejaya
09034081c jAnanti siddhA rAjendra naSTAm api sarasvatIm
09035001  vaizaMpAyana uvAca
09035001a tasmAn nadIgataM cApi udapAnaM yazasvinaH
09035001c tritasya ca mahArAja jagAmAtha halAyudhaH
09035002a tatra dattvA bahu dravyaM pUjayitvA tathA dvijAn
09035002c upaspRzya ca tatraiva prahRSTo musalAyudhaH
09035003a tatra dharmaparo hy AsIt tritaH sa sumahAtapAH
09035003c kUpe ca vasatA tena somaH pIto mahAtmanA
09035004a tatra cainaM samutsRjya bhrAtarau jagmatur gRhAn
09035004c tatas tau vai zazApAtha trito brAhmaNasattamaH
09035005  janamejaya uvAca
09035005a udapAnaM kathaM brahman kathaM ca sumahAtapAH
09035005c patitaH kiM ca saMtyakto bhrAtRbhyAM dvijasattamaH
09035006a kUpe kathaM ca hitvainaM bhrAtarau jagmatur gRhAn
09035006c etad AcakSva me brahman yadi zrAvyaM hi manyase
09035007  vaizaMpAyana uvAca
09035007a Asan pUrvayuge rAjan munayo bhrAtaras trayaH
09035007c ekataz ca dvitaz caiva tritaz cAdityasaMnibhAH
09035008a sarve prajApatisamAH prajAvantas tathaiva ca
09035008c brahmalokajitaH sarve tapasA brahmavAdinaH
09035009a teSAM tu tapasA prIto niyamena damena ca
09035009c abhavad gautamo nityaM pitA dharmarataH sadA
09035010a sa tu dIrgheNa kAlena teSAM prItim avApya ca
09035010c jagAma bhagavAn sthAnam anurUpam ivAtmanaH
09035011a rAjAnas tasya ye pUrve yAjyA hy Asan mahAtmanaH
09035011c te sarve svargate tasmiMs tasya putrAn apUjayan
09035012a teSAM tu karmaNA rAjaMs tathaivAdhyayanena ca
09035012c tritaH sa zreSThatAM prApa yathaivAsya pitA tathA
09035013a taM sma sarve mahAbhAgA munayaH puNyalakSaNAH
09035013c apUjayan mahAbhAgaM tathA vidvattayaiva tu
09035014a kadA cid dhi tato rAjan bhrAtarAv ekatadvitau
09035014c yajJArthaM cakratuz cittaM dhanArthaM ca vizeSataH
09035015a tayoz cintA samabhavat tritaM gRhya paraMtapa
09035015c yAjyAn sarvAn upAdAya pratigRhya pazUMs tataH
09035016a somaM pAsyAmahe hRSTAH prApya yajJaM mahAphalam
09035016c cakruz caiva mahArAja bhrAtaras traya eva ha
09035017a tathA tu te parikramya yAjyAn sarvAn pazUn prati
09035017c yAjayitvA tato yAjyA&l labdhvA ca subahUn pazUn
09035018a yAjyena karmaNA tena pratigRhya vidhAnataH
09035018c prAcIM dizaM mahAtmAna Ajagmus te maharSayaH
09035019a tritas teSAM mahArAja purastAd yAti hRSTavat
09035019c ekataz ca dvitaz caiva pRSThataH kAlayan pazUn
09035020a tayoz cintA samabhavad dRSTvA pazugaNaM mahat
09035020c kathaM na syur imA gAva AvAbhyAM vai vinA tritam
09035021a tAv anyonyaM samAbhASya ekataz ca dvitaz ca ha
09035021c yad Ucatur mithaH pApau tan nibodha janezvara
09035022a trito yajJeSu kuzalas trito vedeSu niSThitaH
09035022c anyAs trito bahutarA gAvaH samupalapsyate
09035023a tad AvAM sahitau bhUtvA gAH prakAlya vrajAvahe
09035023c trito 'pi gacchatAM kAmam AvAbhyAM vai vinAkRtaH
09035024a teSAm AgacchatAM rAtrau pathisthAne vRko 'bhavat
09035024c tathA kUpo 'vidUre 'bhUt sarasvatyAs taTe mahAn
09035025a atha trito vRkaM dRSTvA pathi tiSThantam agrataH
09035025c tadbhayAd apasarpan vai tasmin kUpe papAta ha
09035025e agAdhe sumahAghore sarvabhUtabhayaMkare
09035026a tritas tato mahAbhAgaH kUpastho munisattamaH
09035026c ArtanAdaM tataz cakre tau tu zuzruvatur munI
09035027a taM jJAtvA patitaM kUpe bhrAtarAv ekatadvitau
09035027c vRkatrAsAc ca lobhAc ca samutsRjya prajagmatuH
09035028a bhrAtRbhyAM pazulubdhAbhyAm utsRSTaH sa mahAtapAH
09035028c udapAne mahArAja nirjale pAMsusaMvRte
09035029a trita AtmAnam AlakSya kUpe vIruttRNAvRte
09035029c nimagnaM bharatazreSTha pApakRn narake yathA
09035030a buddhyA hy agaNayat prAjJo mRtyor bhIto hy asomapaH
09035030c somaH kathaM nu pAtavya ihasthena mayA bhavet
09035031a sa evam anusaMcintya tasmin kUpe mahAtapAH
09035031c dadarza vIrudhaM tatra lambamAnAM yadRcchayA
09035032a pAMsugraste tataH kUpe vicintya salilaM muniH
09035032c agnIn saMkalpayAm Asa hotre cAtmAnam eva ca
09035033a tatas tAM vIrudhaM somaM saMkalpya sumahAtapAH
09035033c Rco yajUMSi sAmAni manasA cintayan muniH
09035033e grAvANaH zarkarAH kRtvA pracakre 'bhiSavaM nRpa
09035034a AjyaM ca salilaM cakre bhAgAMz ca tridivaukasAm
09035034c somasyAbhiSavaM kRtvA cakAra tumulaM dhvanim
09035035a sa cAvizad divaM rAjan svaraH zaikSas tritasya vai
09035035c samavApa ca taM yajJaM yathoktaM brahmavAdibhiH
09035036a vartamAne tathA yajJe tritasya sumahAtmanaH
09035036c AvignaM tridivaM sarvaM kAraNaM ca na budhyate
09035037a tataH sutumulaM zabdaM zuzrAvAtha bRhaspatiH
09035037c zrutvA caivAbravId devAn sarvAn devapurohitaH
09035038a tritasya vartate yajJas tatra gacchAmahe surAH
09035038c sa hi kruddhaH sRjed anyAn devAn api mahAtapAH
09035039a tac chrutvA vacanaM tasya sahitAH sarvadevatAH
09035039c prayayus tatra yatrAsau tritayajJaH pravartate
09035040a te tatra gatvA vibudhAs taM kUpaM yatra sa tritaH
09035040c dadRzus taM mahAtmAnaM dIkSitaM yajJakarmasu
09035041a dRSTvA cainaM mahAtmAnaM zriyA paramayA yutam
09035041c Ucuz cAtha mahAbhAgaM prAptA bhAgArthino vayam
09035042a athAbravId RSir devAn pazyadhvaM mAM divaukasaH
09035042c asmin pratibhaye kUpe nimagnaM naSTacetasam
09035043a tatas trito mahArAja bhAgAMs teSAM yathAvidhi
09035043c mantrayuktAn samadadAt te ca prItAs tadAbhavan
09035044a tato yathAvidhi prAptAn bhAgAn prApya divaukasaH
09035044c prItAtmAno dadus tasmai varAn yAn manasecchati
09035045a sa tu vavre varaM devAMs trAtum arhatha mAm itaH
09035045c yaz cehopaspRzet kUpe sa somapagatiM labhet
09035046a tatra cormimatI rAjann utpapAta sarasvatI
09035046c tayotkSiptas tritas tasthau pUjayaMs tridivaukasaH
09035047a tatheti coktvA vibudhA jagmU rAjan yathAgatam
09035047c tritaz cApy agamat prItaH svam eva nilayaM tadA
09035048a kruddhaH sa tu samAsAdya tAv RSI bhrAtarau tadA
09035048c uvAca paruSaM vAkyaM zazApa ca mahAtapAH
09035049a pazulubdhau yuvAM yasmAn mAm utsRjya pradhAvitau
09035049c tasmAd rUpeNa teSAM vai daMSTriNAm abhitazcarau
09035050a bhavitArau mayA zaptau pApenAnena karmaNA
09035050c prasavaz caiva yuvayor golAGgUlarkSavAnarAH
09035051a ity ukte tu tadA tena kSaNAd eva vizAM pate
09035051c tathAbhUtAv adRzyetAM vacanAt satyavAdinaH
09035052a tatrApy amitavikrAntaH spRSTvA toyaM halAyudhaH
09035052c dattvA ca vividhAn dAyAn pUjayitvA ca vai dvijAn
09035053a udapAnaM ca taM dRSTvA prazasya ca punaH punaH
09035053c nadIgatam adInAtmA prApto vinazanaM tadA
09036001  vaizaMpAyana uvAca
09036001a tato vinazanaM rAjann AjagAma halAyudhaH
09036001c zUdrAbhIrAn prati dveSAd yatra naSTA sarasvatI
09036002a yasmAt sA bharatazreSTha dveSAn naSTA sarasvatI
09036002c tasmAt tad RSayo nityaM prAhur vinazaneti ha
09036003a tac cApy upaspRzya balaH sarasvatyAM mahAbalaH
09036003c subhUmikaM tato 'gacchat sarasvatyAs taTe vare
09036004a tatra cApsarasaH zubhrA nityakAlam atandritAH
09036004c krIDAbhir vimalAbhiz ca krIDanti vimalAnanAH
09036005a tatra devAH sagandharvA mAsi mAsi janezvara
09036005c abhigacchanti tat tIrthaM puNyaM brAhmaNasevitam
09036006a tatrAdRzyanta gandharvAs tathaivApsarasAM gaNAH
09036006c sametya sahitA rAjan yathAprAptaM yathAsukham
09036007a tatra modanti devAz ca pitaraz ca savIrudhaH
09036007c puNyaiH puSpaiH sadA divyaiH kIryamANAH punaH punaH
09036008a AkrIDabhUmiH sA rAjaMs tAsAm apsarasAM zubhA
09036008c subhUmiketi vikhyAtA sarasvatyAs taTe vare
09036009a tatra snAtvA ca dattvA ca vasu vipreSu mAdhavaH
09036009c zrutvA gItaM ca tad divyaM vAditrANAM ca niHsvanam
09036010a chAyAz ca vipulA dRSTvA devagandharvarakSasAm
09036010c gandharvANAM tatas tIrtham Agacchad rohiNIsutaH
09036011a vizvAvasumukhAs tatra gandharvAs tapasAnvitAH
09036011c nRttavAditragItaM ca kurvanti sumanoramam
09036012a tatra dattvA haladharo viprebhyo vividhaM vasu
09036012c ajAvikaM gokharoSTraM suvarNaM rajataM tathA
09036013a bhojayitvA dvijAn kAmaiH saMtarpya ca mahAdhanaiH
09036013c prayayau sahito vipraiH stUyamAnaz ca mAdhavaH
09036014a tasmAd gandharvatIrthAc ca mahAbAhur ariMdamaH
09036014c gargasroto mahAtIrtham AjagAmaikakuNDalI
09036015a yatra gargeNa vRddhena tapasA bhAvitAtmanA
09036015c kAlajJAnagatiz caiva jyotiSAM ca vyatikramaH
09036016a utpAtA dAruNAz caiva zubhAz ca janamejaya
09036016c sarasvatyAH zubhe tIrthe vihitA vai mahAtmanA
09036016e tasya nAmnA ca tat tIrthaM gargasrota iti smRtam
09036017a tatra gargaM mahAbhAgam RSayaH suvratA nRpa
09036017c upAsAM cakrire nityaM kAlajJAnaM prati prabho
09036018a tatra gatvA mahArAja balaH zvetAnulepanaH
09036018c vidhivad dhi dhanaM dattvA munInAM bhAvitAtmanAm
09036019a uccAvacAMs tathA bhakSyAn dvijebhyo vipradAya saH
09036019c nIlavAsAs tato 'gacchac chaGkhatIrthaM mahAyazAH
09036020a tatrApazyan mahAzaGkhaM mahAmerum ivocchritam
09036020c zvetaparvatasaMkAzam RSisaMghair niSevitam
09036020e sarasvatyAs taTe jAtaM nagaM tAladhvajo balI
09036021a yakSA vidyAdharAz caiva rAkSasAz cAmitaujasaH
09036021c pizAcAz cAmitabalA yatra siddhAH sahasrazaH
09036022a te sarve hy azanaM tyaktvA phalaM tasya vanaspateH
09036022c vrataiz ca niyamaiz caiva kAle kAle sma bhuJjate
09036023a prAptaiz ca niyamais tais tair vicarantaH pRthak pRthak
09036023c adRzyamAnA manujair vyacaran puruSarSabha
09036024a evaM khyAto narapate loke 'smin sa vanaspatiH
09036024c tatra tIrthaM sarasvatyAH pAvanaM lokavizrutam
09036025a tasmiMz ca yaduzArdUlo dattvA tIrthe yazasvinAm
09036025c tAmrAyasAni bhANDAni vastrANi vividhAni ca
09036026a pUjayitvA dvijAMz caiva pUjitaz ca tapodhanaiH
09036026c puNyaM dvaitavanaM rAjann AjagAma halAyudhaH
09036027a tatra gatvA munIn dRSTvA nAnAveSadharAn balaH
09036027c Aplutya salile cApi pUjayAm Asa vai dvijAn
09036028a tathaiva dattvA viprebhyaH paribhogAn supuSkalAn
09036028c tataH prAyAd balo rAjan dakSiNena sarasvatIm
09036029a gatvA caiva mahAbAhur nAtidUraM mahAyazAH
09036029c dharmAtmA nAgadhanvAnaM tIrtham Agamad acyutaH
09036030a yatra pannagarAjasya vAsukeH saMnivezanam
09036030c mahAdyuter mahArAja bahubhiH pannagair vRtam
09036030e yatrAsann RSayaH siddhAH sahasrANi caturdaza
09036031a yatra devAH samAgamya vAsukiM pannagottamam
09036031c sarvapannagarAjAnam abhyaSiJcan yathAvidhi
09036031e pannagebhyo bhayaM tatra vidyate na sma kaurava
09036032a tatrApi vidhivad dattvA viprebhyo ratnasaMcayAn
09036032c prAyAt prAcIM dizaM rAjan dIpyamAnaH svatejasA
09036033a Aplutya bahuzo hRSTas teSu tIrtheSu lAGgalI
09036033c dattvA vasu dvijAtibhyo jagAmAti tapasvinaH
09036034a tatrasthAn RSisaMghAMs tAn abhivAdya halAyudhaH
09036034c tato rAmo 'gamat tIrtham RSibhiH sevitaM mahat
09036035a yatra bhUyo nivavRte prAGmukhA vai sarasvatI
09036035c RSINAM naimiSeyANAm avekSArthaM mahAtmanAm
09036036a nivRttAM tAM saricchreSThAM tatra dRSTvA tu lAGgalI
09036036c babhUva vismito rAjan balaH zvetAnulepanaH
09036037  janamejaya uvAca
09036037a kasmAt sarasvatI brahman nivRttA prAGmukhI tataH
09036037c vyAkhyAtum etad icchAmi sarvam adhvaryusattama
09036038a kasmiMz ca kAraNe tatra vismito yadunandanaH
09036038c vinivRttA saricchreSThA katham etad dvijottama
09036039  vaizaMpAyana uvAca
09036039a pUrvaM kRtayuge rAjan naimiSeyAs tapasvinaH
09036039c vartamAne subahule satre dvAdazavArSike
09036039e RSayo bahavo rAjaMs tatra saMpratipedire
09036040a uSitvA ca mahAbhAgAs tasmin satre yathAvidhi
09036040c nivRtte naimiSeye vai satre dvAdazavArSike
09036040e Ajagmur RSayas tatra bahavas tIrthakAraNAt
09036041a RSINAM bahulatvAt tu sarasvatyA vizAM pate
09036041c tIrthAni nagarAyante kUle vai dakSiNe tadA
09036042a samantapaJcakaM yAvat tAvat te dvijasattamAH
09036042c tIrthalobhAn naravyAghra nadyAs tIraM samAzritAH
09036043a juhvatAM tatra teSAM tu munInAM bhAvitAtmanAm
09036043c svAdhyAyenApi mahatA babhUvuH pUritA dizaH
09036044a agnihotrais tatas teSAM hUyamAnair mahAtmanAm
09036044c azobhata saricchreSThA dIpyamAnaiH samantataH
09036045a vAlakhilyA mahArAja azmakuTTAz ca tApasAH
09036045c dantolUkhalinaz cAnye saMprakSAlAs tathApare
09036046a vAyubhakSA jalAhArAH parNabhakSAz ca tApasAH
09036046c nAnAniyamayuktAz ca tathA sthaNDilazAyinaH
09036047a Asan vai munayas tatra sarasvatyAH samIpataH
09036047c zobhayantaH saricchreSThAM gaGgAm iva divaukasaH
09036048a tataH pazcAt samApetur RSayaH satrayAjinaH
09036048c te 'vakAzaM na dadRzuH kurukSetre mahAvratAH
09036049a tato yajJopavItais te tat tIrthaM nirmimAya vai
09036049c juhuvuz cAgnihotrANi cakruz ca vividhAH kriyAH
09036050a tatas tam RSisaMghAtaM nirAzaM cintayAnvitam
09036050c darzayAm Asa rAjendra teSAm arthe sarasvatI
09036051a tataH kuJjAn bahUn kRtvA saMnivRttA saridvarA
09036051c RSINAM puNyatapasAM kAruNyAj janamejaya
09036052a tato nivRtya rAjendra teSAm arthe sarasvatI
09036052c bhUyaH pratIcyabhimukhI susrAva saritAM varA
09036053a amoghA gamanaM kRtvA teSAM bhUyo vrajAmy aham
09036053c ity adbhutaM mahac cakre tato rAjan mahAnadI
09036054a evaM sa kuJjo rAjendra naimiSeya iti smRtaH
09036054c kurukSetre kuruzreSTha kuruSva mahatIH kriyAH
09036055a tatra kuJjAn bahUn dRSTvA saMnivRttAM ca tAM nadIm
09036055c babhUva vismayas tatra rAmasyAtha mahAtmanaH
09036056a upaspRzya tu tatrApi vidhivad yadunandanaH
09036056c dattvA dAyAn dvijAtibhyo bhANDAni vividhAni ca
09036056e bhakSyaM peyaM ca vividhaM brAhmaNAn pratyapAdayat
09036057a tataH prAyAd balo rAjan pUjyamAno dvijAtibhiH
09036057c sarasvatItIrthavaraM nAnAdvijagaNAyutam
09036058a badareGgudakAzmaryaplakSAzvatthavibhItakaiH
09036058c panasaiz ca palAzaiz ca karIraiH pIlubhis tathA
09036059a sarasvatItIraruhair bandhanaiH syandanais tathA
09036059c parUSakavanaiz caiva bilvair AmrAtakais tathA
09036060a atimuktakaSaNDaiz ca pArijAtaiz ca zobhitam
09036060c kadalIvanabhUyiSTham iSTaM kAntaM manoramam
09036061a vAyvambuphalaparNAdair dantolUkhalikair api
09036061c tathAzmakuTTair vAneyair munibhir bahubhir vRtam
09036062a svAdhyAyaghoSasaMghuSTaM mRgayUthazatAkulam
09036062c ahiMsrair dharmaparamair nRbhir atyantasevitam
09036063a saptasArasvataM tIrtham AjagAma halAyudhaH
09036063c yatra maGkaNakaH siddhas tapas tepe mahAmuniH
09037001  janamejaya uvAca
09037001a saptasArasvataM kasmAt kaz ca maGkaNako muniH
09037001c kathaM siddhaz ca bhagavAn kaz cAsya niyamo 'bhavat
09037002a kasya vaMze samutpannaH kiM cAdhItaM dvijottama
09037002c etad icchAmy ahaM zrotuM vidhivad dvijasattama
09037003  vaizaMpAyana uvAca
09037003a rAjan sapta sarasvatyo yAbhir vyAptam idaM jagat
09037003c AhUtA balavadbhir hi tatra tatra sarasvatI
09037004a suprabhA kAJcanAkSI ca vizAlA mAnasahradA
09037004c sarasvatI oghavatI suveNur vimalodakA
09037005a pitAmahasya mahato vartamAne mahItale
09037005c vitate yajJavATe vai sameteSu dvijAtiSu
09037006a puNyAhaghoSair vimalair vedAnAM ninadais tathA
09037006c deveSu caiva vyagreSu tasmin yajJavidhau tadA
09037007a tatra caiva mahArAja dIkSite prapitAmahe
09037007c yajatas tatra satreNa sarvakAmasamRddhinA
09037008a manasA cintitA hy arthA dharmArthakuzalais tadA
09037008c upatiSThanti rAjendra dvijAtIMs tatra tatra ha
09037009a jaguz ca tatra gandharvA nanRtuz cApsarogaNAH
09037009c vAditrANi ca divyAni vAdayAm Asur aJjasA
09037010a tasya yajJasya saMpattyA tutuSur devatA api
09037010c vismayaM paramaM jagmuH kim u mAnuSayonayaH
09037011a vartamAne tathA yajJe puSkarasthe pitAmahe
09037011c abruvann RSayo rAjan nAyaM yajJo mahAphalaH
09037011e na dRzyate saricchreSThA yasmAd iha sarasvatI
09037012a tac chrutvA bhagavAn prItaH sasmArAtha sarasvatIm
09037012c pitAmahena yajatA AhUtA puSkareSu vai
09037012e suprabhA nAma rAjendra nAmnA tatra sarasvatI
09037013a tAM dRSTvA munayas tuSTA vegayuktAM sarasvatIm
09037013c pitAmahaM mAnayantIM kratuM te bahu menire
09037014a evam eSA saricchreSThA puSkareSu sarasvatI
09037014c pitAmahArthaM saMbhUtA tuSTyarthaM ca manISiNAm
09037015a naimiSe munayo rAjan samAgamya samAsate
09037015c tatra citrAH kathA hy Asan vedaM prati janezvara
09037016a tatra te munayo hy Asan nAnAsvAdhyAyavedinaH
09037016c te samAgamya munayaH sasmarur vai sarasvatIm
09037017a sA tu dhyAtA mahArAja RSibhiH satrayAjibhiH
09037017c samAgatAnAM rAjendra sahAyArthaM mahAtmanAm
09037017e AjagAma mahAbhAgA tatra puNyA sarasvatI
09037018a naimiSe kAJcanAkSI tu munInAM satrayAjinAm
09037018c AgatA saritAM zreSThA tatra bhArata pUjitA
09037019a gayasya yajamAnasya gayeSv eva mahAkratum
09037019c AhUtA saritAM zreSThA gayayajJe sarasvatI
09037020a vizAlAM tu gayeSv Ahur RSayaH saMzitavratAH
09037020c sarit sA himavatpArzvAt prasUtA zIghragAminI
09037021a auddAlakes tathA yajJe yajatas tatra bhArata
09037021c samete sarvataH sphIte munInAM maNDale tadA
09037022a uttare kosalAbhAge puNye rAjan mahAtmanaH
09037022c auddAlakena yajatA pUrvaM dhyAtA sarasvatI
09037023a AjagAma saricchreSThA taM dezam RSikAraNAt
09037023c pUjyamAnA munigaNair valkalAjinasaMvRtaiH
09037023e manohradeti vikhyAtA sA hi tair manasA hRtA
09037024a suveNur RSabhadvIpe puNye rAjarSisevite
09037024c kuroz ca yajamAnasya kurukSetre mahAtmanaH
09037024e AjagAma mahAbhAgA saricchreSThA sarasvatI
09037025a oghavaty api rAjendra vasiSThena mahAtmanA
09037025c samAhUtA kurukSetre divyatoyA sarasvatI
09037026a dakSeNa yajatA cApi gaGgAdvAre sarasvatI
09037026c vimalodA bhagavatI brahmaNA yajatA punaH
09037026e samAhUtA yayau tatra puNye haimavate girau
09037027a ekIbhUtAs tatas tAs tu tasmiMs tIrthe samAgatAH
09037027c saptasArasvataM tIrthaM tatas tat prathitaM bhuvi
09037028a iti sapta sarasvatyo nAmataH parikIrtitAH
09037028c saptasArasvataM caiva tIrthaM puNyaM tathA smRtam
09037029a zRNu maGkaNakasyApi kaumArabrahmacAriNaH
09037029c ApagAm avagADhasya rAjan prakrIDitaM mahat
09037030a dRSTvA yadRcchayA tatra striyam ambhasi bhArata
09037030c snAyantIM rucirApAGgIM digvAsasam aninditAm
09037030e sarasvatyAM mahArAja caskande vIryam ambhasi
09037031a tad retaH sa tu jagrAha kalaze vai mahAtapAH
09037031c saptadhA pravibhAgaM tu kalazasthaM jagAma ha
09037031e tatrarSayaH sapta jAtA jajJire marutAM gaNAH
09037032a vAyuvego vAyubalo vAyuhA vAyumaNDalaH
09037032c vAyujvAlo vAyuretA vAyucakraz ca vIryavAn
09037032e evam ete samutpannA marutAM janayiSNavaH
09037033a idam anyac ca rAjendra zRNv AzcaryataraM bhuvi
09037033c maharSez caritaM yAdRk triSu lokeSu vizrutam
09037034a purA maGkaNakaH siddhaH kuzAgreNeti naH zrutam
09037034c kSataH kila kare rAjaMs tasya zAkaraso 'sravat
09037034e sa vi zAkarasaM dRSTvA harSAviSTaH pranRttavAn
09037035a tatas tasmin pranRtte vai sthAvaraM jaGgamaM ca yat
09037035c pranRttam ubhayaM vIra tejasA tasya mohitam
09037036a brahmAdibhiH surai rAjann RSibhiz ca tapodhanaiH
09037036c vijJapto vai mahAdeva RSer arthe narAdhipa
09037036e nAyaM nRtyed yathA deva tathA tvaM kartum arhasi
09037037a tato devo muniM dRSTvA harSAviSTam atIva ha
09037037c surANAM hitakAmArthaM mahAdevo 'bhyabhASata
09037038a bho bho brAhmaNa dharmajJa kimarthaM narinartsi vai
09037038c harSasthAnaM kimarthaM vai tavedaM munisattama
09037038e tapasvino dharmapathe sthitasya dvijasattama
09037039  RSir uvAca
09037039a kiM na pazyasi me brahman karAc chAkarasaM srutam
09037039c yaM dRSTvA vai pranRtto 'haM harSeNa mahatA vibho
09037040a taM prahasyAbravId devo muniM rAgeNa mohitam
09037040c ahaM na vismayaM vipra gacchAmIti prapazya mAm
09037041a evam uktvA munizreSThaM mahAdevena dhImatA
09037041c aGgulyagreNa rAjendra svAGguSThas tADito 'bhavat
09037042a tato bhasma kSatAd rAjan nirgataM himasaMnibham
09037042c tad dRSTvA vrIDito rAjan sa muniH pAdayor gataH
09037043  RSir uvAca
09037043a nAnyaM devAd ahaM manye rudrAt parataraM mahat
09037043c surAsurasya jagato gatis tvam asi zUladhRk
09037044a tvayA sRSTam idaM vizvaM vadantIha manISiNaH
09037044c tvAm eva sarvaM vizati punar eva yugakSaye
09037045a devair api na zakyas tvaM parijJAtuM kuto mayA
09037045c tvayi sarve sma dRzyante surA brahmAdayo 'nagha
09037046a sarvas tvam asi devAnAM kartA kArayitA ca ha
09037046c tvatprasAdAt surAH sarve modantIhAkutobhayAH
09037047a evaM stutvA mahAdevaM sa RSiH praNato 'bravIt
09037047c bhagavaMs tvatprasAdAd vai tapo me na kSared iti
09037048a tato devaH prItamanAs tam RSiM punar abravIt
09037048c tapas te vardhatAM vipra matprasAdAt sahasradhA
09037048e Azrame ceha vatsyAmi tvayA sArdham ahaM sadA
09037049a saptasArasvate cAsmin yo mAm arciSyate naraH
09037049c na tasya durlabhaM kiM cid bhaviteha paratra ca
09037049e sArasvataM ca lokaM te gamiSyanti na saMzayaH
09037050a etan maGkaNakasyApi caritaM bhUritejasaH
09037050c sa hi putraH sajanyAyAm utpanno mAtarizvanA
09038001  vaizaMpAyana uvAca
09038001a uSitvA tatra rAmas tu saMpUjyAzramavAsinaH
09038001c tathA maGkaNake prItiM zubhAM cakre halAyudhaH
09038002a dattvA dAnaM dvijAtibhyo rajanIM tAm upoSya ca
09038002c pUjito munisaMghaiz ca prAtar utthAya lAGgalI
09038003a anujJApya munIn sarvAn spRSTvA toyaM ca bhArata
09038003c prayayau tvarito rAmas tIrthahetor mahAbalaH
09038004a tata auzanasaM tIrtham AjagAma halAyudhaH
09038004c kapAlamocanaM nAma yatra mukto mahAmuniH
09038005a mahatA zirasA rAjan grastajaGgho mahodaraH
09038005c rAkSasasya mahArAja rAmakSiptasya vai purA
09038006a tatra pUrvaM tapas taptaM kAvyena sumahAtmanA
09038006c yatrAsya nItir akhilA prAdurbhUtA mahAtmanaH
09038006e tatrasthaz cintayAm Asa daityadAnavavigraham
09038007a tat prApya ca balo rAjaMs tIrthapravaram uttamam
09038007c vidhivad dhi dadau vittaM brAhmaNAnAM mahAtmanAm
09038008  janamejaya uvAca
09038008a kapAlamocanaM brahman kathaM yatra mahAmuniH
09038008c muktaH kathaM cAsya ziro lagnaM kena ca hetunA
09038009  vaizaMpAyana uvAca
09038009a purA vai daNDakAraNye rAghaveNa mahAtmanA
09038009c vasatA rAjazArdUla rAkSasAs tatra hiMsitAH
09038010a janasthAne ziraz chinnaM rAkSasasya durAtmanaH
09038010c kSureNa zitadhAreNa tat papAta mahAvane
09038011a mahodarasya tal lagnaM jaGghAyAM vai yadRcchayA
09038011c vane vicarato rAjann asthi bhittvAsphurat tadA
09038012a sa tena lagnena tadA dvijAtir na zazAka ha
09038012c abhigantuM mahAprAjJas tIrthAny AyatanAni ca
09038013a sa pUtinA visravatA vedanArto mahAmuniH
09038013c jagAma sarvatIrthAni pRthivyAm iti naH zrutam
09038014a sa gatvA saritaH sarvAH samudrAMz ca mahAtapAH
09038014c kathayAm Asa tat sarvam RSINAM bhAvitAtmanAm
09038015a AplutaH sarvatIrtheSu na ca mokSam avAptavAn
09038015c sa tu zuzrAva viprendro munInAM vacanaM mahat
09038016a sarasvatyAs tIrthavaraM khyAtam auzanasaM tadA
09038016c sarvapApaprazamanaM siddhakSetram anuttamam
09038017a sa tu gatvA tatas tatra tIrtham auzanasaM dvijaH
09038017c tata auzanase tIrthe tasyopaspRzatas tadA
09038017e tac chiraz caraNaM muktvA papAtAntarjale tadA
09038018a tataH sa virujo rAjan pUtAtmA vItakalmaSaH
09038018c AjagAmAzramaM prItaH kRtakRtyo mahodaraH
09038019a so 'tha gatvAzramaM puNyaM vipramukto mahAtapAH
09038019c kathayAm Asa tat sarvam RSINAM bhAvitAtmanAm
09038020a te zrutvA vacanaM tasya tatas tIrthasya mAnada
09038020c kapAlamocanam iti nAma cakruH samAgatAH
09038021a tatra dattvA bahUn dAyAn viprAn saMpUjya mAdhavaH
09038021c jagAma vRSNipravaro ruSaGgor AzramaM tadA
09038022a yatra taptaM tapo ghoram ArSTiSeNena bhArata
09038022c brAhmaNyaM labdhavAMs tatra vizvAmitro mahAmuniH
09038023a tato haladharaH zrImAn brAhmaNaiH parivAritaH
09038023c jagAma yatra rAjendra ruSaGgus tanum atyajat
09038024a ruSaGgur brAhmaNo vRddhas taponityaz ca bhArata
09038024c dehanyAse kRtamanA vicintya bahudhA bahu
09038025a tataH sarvAn upAdAya tanayAn vai mahAtapAH
09038025c ruSaGgur abravIt tatra nayadhvaM mA pRthUdakam
09038026a vijJAyAtItavayasaM ruSaGguM te tapodhanAH
09038026c taM vai tIrtham upAninyuH sarasvatyAs tapodhanam
09038027a sa taiH putrais tadA dhImAn AnIto vai sarasvatIm
09038027c puNyAM tIrthazatopetAM viprasaMghair niSevitAm
09038028a sa tatra vidhinA rAjann AplutaH sumahAtapAH
09038028c jJAtvA tIrthaguNAMz caiva prAhedam RSisattamaH
09038028e suprItaH puruSavyAghra sarvAn putrAn upAsataH
09038029a sarasvatyuttare tIre yas tyajed Atmanas tanum
09038029c pRthUdake japyaparo nainaM zvomaraNaM tapet
09038030a tatrAplutya sa dharmAtmA upaspRzya halAyudhaH
09038030c dattvA caiva bahUn dAyAn viprANAM vipravatsalaH
09038031a sasarja yatra bhagavA&l lokA&l lokapitAmahaH
09038031c yatrArSTiSeNaH kauravya brAhmaNyaM saMzitavrataH
09038031e tapasA mahatA rAjan prAptavAn RSisattamaH
09038032a sindhudvIpaz ca rAjarSir devApiz ca mahAtapAH
09038032c brAhmaNyaM labdhavAn yatra vizvAmitro mahAmuniH
09038032e mahAtapasvI bhagavAn ugratejA mahAtapAH
09038033a tatrAjagAma balavAn balabhadraH pratApavAn
09039001  janamejaya uvAca
09039001a katham ArSTiSeNo bhagavAn vipulaM taptavAMs tapaH
09039001c sindhudvIpaH kathaM cApi brAhmaNyaM labdhavAMs tadA
09039002a devApiz ca kathaM brahman vizvAmitraz ca sattama
09039002c tan mamAcakSva bhagavan paraM kautUhalaM hi me
09039003  vaizaMpAyana uvAca
09039003a purA kRtayuge rAjann ArSTiSeNo dvijottamaH
09039003c vasan gurukule nityaM nityam adhyayane rataH
09039004a tasya rAjan gurukule vasato nityam eva ha
09039004c samAptiM nAgamad vidyA nApi vedA vizAM pate
09039005a sa nirviNNas tato rAjaMs tapas tepe mahAtapAH
09039005c tato vai tapasA tena prApya vedAn anuttamAn
09039006a sa vidvAn vedayuktaz ca siddhaz cApy RSisattamaH
09039006c tatra tIrthe varAn prAdAt trIn eva sumahAtapAH
09039007a asmiMs tIrthe mahAnadyA adyaprabhRti mAnavaH
09039007c Apluto vAjimedhasya phalaM prApnoti puSkalam
09039008a adyaprabhRti naivAtra bhayaM vyAlAd bhaviSyati
09039008c api cAlpena yatnena phalaM prApsyati puSkalam
09039009a evam uktvA mahAtejA jagAma tridivaM muniH
09039009c evaM siddhaH sa bhagavAn ArSTiSeNaH pratApavAn
09039010a tasminn eva tadA tIrthe sindhudvIpaH pratApavAn
09039010c devApiz ca mahArAja brAhmaNyaM prApatur mahat
09039011a tathA ca kauzikas tAta taponityo jitendriyaH
09039011c tapasA vai sutaptena brAhmaNatvam avAptavAn
09039012a gAdhir nAma mahAn AsIt kSatriyaH prathito bhuvi
09039012c tasya putro 'bhavad rAjan vizvAmitraH pratApavAn
09039013a sa rAjA kauzikas tAta mahAyogy abhavat kila
09039013c sa putram abhiSicyAtha vizvAmitraM mahAtapAH
09039014a dehanyAse manaz cakre tam UcuH praNatAH prajAH
09039014c na gantavyaM mahAprAjJa trAhi cAsmAn mahAbhayAt
09039015a evam uktaH pratyuvAca tato gAdhiH prajAs tadA
09039015c vizvasya jagato goptA bhaviSyati suto mama
09039016a ity uktvA tu tato gAdhir vizvAmitraM nivezya ca
09039016c jagAma tridivaM rAjan vizvAmitro 'bhavan nRpaH
09039016e na ca zaknoti pRthivIM yatnavAn api rakSitum
09039017a tataH zuzrAva rAjA sa rAkSasebhyo mahAbhayam
09039017c niryayau nagarAc cApi caturaGgabalAnvitaH
09039018a sa gatvA dUram adhvAnaM vasiSThAzramam abhyayAt
09039018c tasya te sainikA rAjaMz cakrus tatrAnayAn bahUn
09039019a tatas tu bhagavAn vipro vasiSTho ''zramam abhyayAt
09039019c dadRze ca tataH sarvaM bhajyamAnaM mahAvanam
09039020a tasya kruddho mahArAja vasiSTho munisattamaH
09039020c sRjasva zabarAn ghorAn iti svAM gAm uvAca ha
09039021a tathoktA sAsRjad dhenuH puruSAn ghoradarzanAn
09039021c te ca tad balam AsAdya babhaJjuH sarvatodizam
09039022a tad dRSTvA vidrutaM sainyaM vizvAmitras tu gAdhijaH
09039022c tapaH paraM manyamAnas tapasy eva mano dadhe
09039023a so 'smiMs tIrthavare rAjan sarasvatyAH samAhitaH
09039023c niyamaiz copavAsaiz ca karzayan deham AtmanaH
09039024a jalAhAro vAyubhakSaH parNAhAraz ca so 'bhavat
09039024c tathA sthaNDilazAyI ca ye cAnye niyamAH pRthak
09039025a asakRt tasya devAs tu vratavighnaM pracakrire
09039025c na cAsya niyamAd buddhir apayAti mahAtmanaH
09039026a tataH pareNa yatnena taptvA bahuvidhaM tapaH
09039026c tejasA bhAskarAkAro gAdhijaH samapadyata
09039027a tapasA tu tathA yuktaM vizvAmitraM pitAmahaH
09039027c amanyata mahAtejA varado varam asya tat
09039028a sa tu vavre varaM rAjan syAm ahaM brAhmaNas tv iti
09039028c tatheti cAbravId brahmA sarvalokapitAmahaH
09039029a sa labdhvA tapasogreNa brAhmaNatvaM mahAyazAH
09039029c vicacAra mahIM kRtsnAM kRtakAmaH suropamaH
09039030a tasmiMs tIrthavare rAmaH pradAya vividhaM vasu
09039030c payasvinIs tathA dhenUr yAnAni zayanAni ca
09039031a tathA vastrANy alaMkAraM bhakSyaM peyaM ca zobhanam
09039031c adadAn mudito rAjan pUjayitvA dvijottamAn
09039032a yayau rAjaMs tato rAmo bakasyAzramam antikAt
09039032c yatra tepe tapas tIvraM dAlbhyo baka iti zrutiH
09040001  vaizaMpAyana uvAca
09040001a brahmayonibhir AkIrNaM jagAma yadunandanaH
09040001c yatra dAlbhyo bako rAjan pazvarthaM sumahAtapAH
09040001e juhAva dhRtarASTrasya rASTraM vaicitravIryiNaH
09040002a tapasA ghorarUpeNa karzayan deham AtmanaH
09040002c krodhena mahatAviSTo dharmAtmA vai pratApavAn
09040003a purA hi naimiSeyANAM satre dvAdazavArSike
09040003c vRtte vizvajito 'nte vai pAJcAlAn RSayo 'gaman
09040004a tatrezvaram ayAcanta dakSiNArthaM manISiNaH
09040004c balAnvitAn vatsatarAn nirvyAdhIn ekaviMzatim
09040005a tAn abravId bako vRddho vibhajadhvaM pazUn iti
09040005c pazUn etAn ahaM tyaktvA bhikSiSye rAjasattamam
09040006a evam uktvA tato rAjann RSIn sarvAn pratApavAn
09040006c jagAma dhRtarASTrasya bhavanaM brAhmaNottamaH
09040007a sa samIpagato bhUtvA dhRtarASTraM janezvaram
09040007c ayAcata pazUn dAlbhyaH sa cainaM ruSito 'bravIt
09040008a yadRcchayA mRtA dRSTvA gAs tadA nRpasattama
09040008c etAn pazUn naya kSipraM brahmabandho yadIcchasi
09040009a RSis tv atha vacaH zrutvA cintayAm Asa dharmavit
09040009c aho bata nRzaMsaM vai vAkyam ukto 'smi saMsadi
09040010a cintayitvA muhUrtaM ca roSAviSTo dvijottamaH
09040010c matiM cakre vinAzAya dhRtarASTrasya bhUpateH
09040011a sa utkRtya mRtAnAM vai mAMsAni dvijasattamaH
09040011c juhAva dhRtarASTrasya rASTraM narapateH purA
09040012a avakIrNe sarasvatyAs tIrthe prajvAlya pAvakam
09040012c bako dAlbhyo mahArAja niyamaM param AsthitaH
09040012e sa tair eva juhAvAsya rASTraM mAMsair mahAtapAH
09040013a tasmiMs tu vidhivat satre saMpravRtte sudAruNe
09040013c akSIyata tato rASTraM dhRtarASTrasya pArthiva
09040014a chidyamAnaM yathAnantaM vanaM parazunA vibho
09040014c babhUvApahataM tac cApy avakIrNam acetanam
09040015a dRSTvA tad avakIrNaM tu rASTraM sa manujAdhipaH
09040015c babhUva durmanA rAjaMz cintayAm Asa ca prabhuH
09040016a mokSArtham akarod yatnaM brAhmaNaiH sahitaH purA
09040016c athAsau pArthivaH khinnas te ca viprAs tadA nRpa
09040017a yadA cApi na zaknoti rASTraM mocayituM nRpa
09040017c atha vaiprAznikAMs tatra papraccha janamejaya
09040018a tato vaiprAznikAH prAhuH pazuviprakRtas tvayA
09040018c mAMsair abhijuhotIti tava rASTraM munir bakaH
09040019a tena te hUyamAnasya rASTrasyAsya kSayo mahAn
09040019c tasyaitat tapasaH karma yena te hy anayo mahAn
09040019e apAM kuJje sarasvatyAs taM prasAdaya pArthiva
09040020a sarasvatIM tato gatvA sa rAjA bakam abravIt
09040020c nipatya zirasA bhUmau prAJjalir bharatarSabha
09040021a prasAdaye tvA bhagavann aparAdhaM kSamasva me
09040021c mama dInasya lubdhasya maurkhyeNa hatacetasaH
09040021e tvaM gatis tvaM ca me nAthaH prasAdaM kartum arhasi
09040022a taM tathA vilapantaM tu zokopahatacetasam
09040022c dRSTvA tasya kRpA jajJe rASTraM tac ca vyamocayat
09040023a RSiH prasannas tasyAbhUt saMrambhaM ca vihAya saH
09040023c mokSArthaM tasya rASTrasya juhAva punar Ahutim
09040024a mokSayitvA tato rASTraM pratigRhya pazUn bahUn
09040024c hRSTAtmA naimiSAraNyaM jagAma punar eva hi
09040025a dhRtarASTro 'pi dharmAtmA svasthacetA mahAmanAH
09040025c svam eva nagaraM rAjA pratipede maharddhimat
09040026a tatra tIrthe mahArAja bRhaspatir udAradhIH
09040026c asurANAm abhAvAya bhAvAya ca divaukasAm
09040027a mAMsair api juhAveSTim akSIyanta tato 'surAH
09040027c daivatair api saMbhagnA jitakAzibhir Ahave
09040028a tatrApi vidhivad dattvA brAhmaNebhyo mahAyazAH
09040028c vAjinaH kuJjarAMz caiva rathAMz cAzvatarIyutAn
09040029a ratnAni ca mahArhANi dhanaM dhAnyaM ca puSkalam
09040029c yayau tIrthaM mahAbAhur yAyAtaM pRthivIpate
09040030a yatra yajJe yayAtes tu mahArAja sarasvatI
09040030c sarpiH payaz ca susrAva nAhuSasya mahAtmanaH
09040031a tatreSTvA puruSavyAghro yayAtiH pRthivIpatiH
09040031c AkrAmad UrdhvaM mudito lebhe lokAMz ca puSkalAn
09040032a yayAter yajamAnasya yatra rAjan sarasvatI
09040032c prasRtA pradadau kAmAn brAhmaNAnAM mahAtmanAm
09040033a yatra yatra hi yo vipro yAn yAn kAmAn abhIpsati
09040033c tatra tatra saricchreSThA sasarja subahUn rasAn
09040034a tatra devAH sagandharvAH prItA yajJasya saMpadA
09040034c vismitA mAnuSAz cAsan dRSTvA tAM yajJasaMpadam
09040035a tatas tAlaketur mahAdharmasetur; mahAtmA kRtAtmA mahAdAnanityaH
09040035c vasiSThApavAhaM mahAbhImavegaM; dhRtAtmA jitAtmA samabhyAjagAma
09041001  janamejaya uvAca
09041001a vasiSThasyApavAho vai bhImavegaH kathaM nu saH
09041001c kimarthaM ca saricchreSThA tam RSiM pratyavAhayat
09041002a kena cAsyAbhavad vairaM kAraNaM kiM ca tat prabho
09041002c zaMsa pRSTo mahAprAjJa na hi tRpyAmi kathyatAm
09041003  vaizaMpAyana uvAca
09041003a vizvAmitrasya caivarSer vasiSThasya ca bhArata
09041003c bhRzaM vairam abhUd rAjaMs tapaHspardhAkRtaM mahat
09041004a Azramo vai vasiSThasya sthANutIrthe 'bhavan mahAn
09041004c pUrvataH pazcimaz cAsId vizvAmitrasya dhImataH
09041005a yatra sthANur mahArAja taptavAn sumahat tapaH
09041005c yatrAsya karma tad ghoraM pravadanti manISiNaH
09041006a yatreSTvA bhagavAn sthANuH pUjayitvA sarasvatIm
09041006c sthApayAm Asa tat tIrthaM sthANutIrtham iti prabho
09041007a tatra sarve surAH skandam abhyaSiJcan narAdhipa
09041007c senApatyena mahatA surArivinibarhaNam
09041008a tasmin sarasvatItIrthe vizvAmitro mahAmuniH
09041008c vasiSThaM cAlayAm Asa tapasogreNa tac chRNu
09041009a vizvAmitravasiSThau tAv ahany ahani bhArata
09041009c spardhAM tapaHkRtAM tIvrAM cakratus tau tapodhanau
09041010a tatrApy adhikasaMtApo vizvAmitro mahAmuniH
09041010c dRSTvA tejo vasiSThasya cintAm abhijagAma ha
09041010e tasya buddhir iyaM hy AsId dharmanityasya bhArata
09041011a iyaM sarasvatI tUrNaM matsamIpaM tapodhanam
09041011c AnayiSyati vegena vasiSThaM japatAM varam
09041011e ihAgataM dvijazreSThaM haniSyAmi na saMzayaH
09041012a evaM nizcitya bhagavAn vizvAmitro mahAmuniH
09041012c sasmAra saritAM zreSThAM krodhasaMraktalocanaH
09041013a sA dhyAtA muninA tena vyAkulatvaM jagAma ha
09041013c jajJe cainaM mahAvIryaM mahAkopaM ca bhAminI
09041014a tata enaM vepamAnA vivarNA prAJjalis tadA
09041014c upatasthe munivaraM vizvAmitraM sarasvatI
09041015a hatavIrA yathA nArI sAbhavad duHkhitA bhRzam
09041015c brUhi kiM karavANIti provAca munisattamam
09041016a tAm uvAca muniH kruddho vasiSThaM zIghram Anaya
09041016c yAvad enaM nihanmy adya tac chrutvA vyathitA nadI
09041017a sAJjaliM tu tataH kRtvA puNDarIkanibhekSaNA
09041017c vivyathe suvirUDheva latA vAyusamIritA
09041018a tathAgatAM tu tAM dRSTvA vepamAnAM kRtAJjalim
09041018c vizvAmitro 'bravIt kruddho vasiSThaM zIghram Anaya
09041019a tato bhItA saricchreSThA cintayAm Asa bhArata
09041019c ubhayoH zApayor bhItA katham etad bhaviSyati
09041020a sAbhigamya vasiSThaM tu imam artham acodayat
09041020c yad uktA saritAM zreSThA vizvAmitreNa dhImatA
09041021a ubhayoH zApayor bhItA vepamAnA punaH punaH
09041021c cintayitvA mahAzApam RSivitrAsitA bhRzam
09041022a tAM kRzAM ca vivarNAM ca dRSTvA cintAsamanvitAm
09041022c uvAca rAjan dharmAtmA vasiSTho dvipadAM varaH
09041023a trAhy AtmAnaM saricchreSThe vaha mAM zIghragAminI
09041023c vizvAmitraH zaped dhi tvAM mA kRthAs tvaM vicAraNAm
09041024a tasya tad vacanaM zrutvA kRpAzIlasya sA sarit
09041024c cintayAm Asa kauravya kiM kRtaM sukRtaM bhavet
09041025a tasyAz cintA samutpannA vasiSTho mayy atIva hi
09041025c kRtavAn hi dayAM nityaM tasya kAryaM hitaM mayA
09041026a atha kUle svake rAjaJ japantam RSisattamam
09041026c juhvAnaM kauzikaM prekSya sarasvaty abhyacintayat
09041027a idam antaram ity eva tataH sA saritAM varA
09041027c kUlApahAram akarot svena vegena sA sarit
09041028a tena kUlApahAreNa maitrAvaruNir auhyata
09041028c uhyamAnaz ca tuSTAva tadA rAjan sarasvatIm
09041029a pitAmahasya sarasaH pravRttAsi sarasvati
09041029c vyAptaM cedaM jagat sarvaM tavaivAmbhobhir uttamaiH
09041030a tvam evAkAzagA devi megheSUtsRjase payaH
09041030c sarvAz cApas tvam eveti tvatto vayam adhImahe
09041031a puSTir dyutis tathA kIrtiH siddhir vRddhir umA tathA
09041031c tvam eva vANI svAhA tvaM tvayy Ayattam idaM jagat
09041031e tvam eva sarvabhUteSu vasasIha caturvidhA
09041032a evaM sarasvatI rAjan stUyamAnA maharSiNA
09041032c vegenovAha taM vipraM vizvAmitrAzramaM prati
09041032e nyavedayata cAbhIkSNaM vizvAmitrAya taM munim
09041033a tam AnItaM sarasvatyA dRSTvA kopasamanvitaH
09041033c athAnveSat praharaNaM vasiSThAntakaraM tadA
09041034a taM tu kruddham abhiprekSya brahmahatyAbhayAn nadI
09041034c apovAha vasiSThaM tu prAcIM dizam atandritA
09041034e ubhayoH kurvatI vAkyaM vaJcayitvA tu gAdhijam
09041035a tato 'pavAhitaM dRSTvA vasiSTham RSisattamam
09041035c abravId atha saMkruddho vizvAmitro hy amarSaNaH
09041036a yasmAn mA tvaM saricchreSThe vaJcayitvA punar gatA
09041036c zoNitaM vaha kalyANi rakSogrAmaNisaMmatam
09041037a tataH sarasvatI zaptA vizvAmitreNa dhImatA
09041037c avahac choNitonmizraM toyaM saMvatsaraM tadA
09041038a atharSayaz ca devAz ca gandharvApsarasas tathA
09041038c sarasvatIM tathA dRSTvA babhUvur bhRzaduHkhitAH
09041039a evaM vasiSThApavAho loke khyAto janAdhipa
09041039c Agacchac ca punar mArgaM svam eva saritAM varA
09042001  vaizaMpAyana uvAca
09042001a sA zaptA tena kruddhena vizvAmitreNa dhImatA
09042001c tasmiMs tIrthavare zubhre zoNitaM samupAvahat
09042002a athAjagmus tato rAjan rAkSasAs tatra bhArata
09042002c tatra te zoNitaM sarve pibantaH sukham Asate
09042003a tRptAz ca subhRzaM tena sukhitA vigatajvarAH
09042003c nRtyantaz ca hasantaz ca yathA svargajitas tathA
09042004a kasya cit tv atha kAlasya RSayaH satapodhanAH
09042004c tIrthayAtrAM samAjagmuH sarasvatyAM mahIpate
09042005a teSu sarveSu tIrtheSu Aplutya munipuMgavAH
09042005c prApya prItiM parAM cApi tapolubdhA vizAradAH
09042005e prayayur hi tato rAjan yena tIrthaM hi tat tathA
09042006a athAgamya mahAbhAgAs tat tIrthaM dAruNaM tadA
09042006c dRSTvA toyaM sarasvatyAH zoNitena pariplutam
09042006e pIyamAnaM ca rakSobhir bahubhir nRpasattama
09042007a tAn dRSTvA rAkSasAn rAjan munayaH saMzitavratAH
09042007c paritrANe sarasvatyAH paraM yatnaM pracakrire
09042008a te tu sarve mahAbhAgAH samAgamya mahAvratAH
09042008c AhUya saritAM zreSThAm idaM vacanam abruvan
09042009a kAraNaM brUhi kalyANi kimarthaM te hrado hy ayam
09042009c evam AkulatAM yAtaH zrutvA pAsyAmahe vayam
09042010a tataH sA sarvam AcaSTa yathAvRttaM pravepatI
09042010c duHkhitAm atha tAM dRSTvA ta Ucur vai tapodhanAH
09042011a kAraNaM zrutam asmAbhiH zApaz caiva zruto 'naghe
09042011c kariSyanti tu yat prAptaM sarva eva tapodhanAH
09042012a evam uktvA saricchreSThAm Ucus te 'tha parasparam
09042012c vimocayAmahe sarve zApAd etAM sarasvatIm
09042013a teSAM tu vacanAd eva prakRtisthA sarasvatI
09042013c prasannasalilA jajJe yathA pUrvaM tathaiva hi
09042013e vimuktA ca saricchreSThA vibabhau sA yathA purA
09042014a dRSTvA toyaM sarasvatyA munibhis tais tathA kRtam
09042014c kRtAJjalIs tato rAjan rAkSasAH kSudhayArditAH
09042014e Ucus tAn vai munIn sarvAn kRpAyuktAn punaH punaH
09042015a vayaM hi kSudhitAz caiva dharmAd dhInAz ca zAzvatAt
09042015c na ca naH kAmakAro 'yaM yad vayaM pApakAriNaH
09042016a yuSmAkaM cAprasAdena duSkRtena ca karmaNA
09042016c pakSo 'yaM vardhate 'smAkaM yataH sma brahmarAkSasAH
09042017a evaM hi vaizyazUdrANAM kSatriyANAM tathaiva ca
09042017c ye brAhmaNAn pradviSanti te bhavantIha rAkSasAH
09042018a AcAryam RtvijaM caiva guruM vRddhajanaM tathA
09042018c prANino ye 'vamanyante te bhavantIha rAkSasAH
09042018e yoSitAM caiva pApAnAM yonidoSeNa vardhate
09042019a tat kurudhvam ihAsmAkaM kAruNyaM dvijasattamAH
09042019c zaktA bhavantaH sarveSAM lokAnAm api tAraNe
09042020a teSAM te munayaH zrutvA tuSTuvus tAM mahAnadIm
09042020c mokSArthaM rakSasAM teSAm UcuH prayatamAnasAH
09042021a kSutakITAvapannaM ca yac cocchiSTAzitaM bhavet
09042021c kezAvapannam AdhUtam ArugNam api yad bhavet
09042021e zvabhiH saMspRSTam annaM ca bhAgo 'sau rakSasAm iha
09042022a tasmAj jJAtvA sadA vidvAn etAny annAni varjayet
09042022c rAkSasAnnam asau bhuGkte yo bhuGkte hy annam IdRzam
09042023a zodhayitvA tatas tIrtham RSayas te tapodhanAH
09042023c mokSArthaM rAkSasAnAM ca nadIM tAM pratyacodayan
09042024a maharSINAM mataM jJAtvA tataH sA saritAM varA
09042024c aruNAm AnayAm Asa svAM tanuM puruSarSabha
09042025a tasyAM te rAkSasAH snAtvA tanUs tyaktvA divaM gatAH
09042025c aruNAyAM mahArAja brahmahatyApahA hi sA
09042026a etam artham abhijJAya devarAjaH zatakratuH
09042026c tasmiMs tIrthavare snAtvA vimuktaH pApmanA kila
09042027  janamejaya uvAca
09042027a kimarthaM bhagavAJ zakro brahmahatyAm avAptavAn
09042027c katham asmiMz ca tIrthe vai AplutyAkalmaSo 'bhavat
09042028  vaizaMpAyana uvAca
09042028a zRNuSvaitad upAkhyAnaM yathAvRttaM janezvara
09042028c yathA bibheda samayaM namucer vAsavaH purA
09042029a namucir vAsavAd bhItaH sUryarazmiM samAvizat
09042029c tenendraH sakhyam akarot samayaM cedam abravIt
09042030a nArdreNa tvA na zuSkeNa na rAtrau nApi vAhani
09042030c vadhiSyAmy asurazreSTha sakhe satyena te zape
09042031a evaM sa kRtvA samayaM sRSTvA nIhAram IzvaraH
09042031c cicchedAsya ziro rAjann apAM phenena vAsavaH
09042032a tac chiro namucez chinnaM pRSThataH zakram anvayAt
09042032c he mitrahan pApa iti bruvANaM zakram antikAt
09042033a evaM sa zirasA tena codyamAnaH punaH punaH
09042033c pitAmahAya saMtapta evam arthaM nyavedayat
09042034a tam abravIl lokagurur aruNAyAM yathAvidhi
09042034c iSTvopaspRza devendra brahmahatyApahA hi sA
09042035a ity uktaH sa sarasvatyAH kuJje vai janamejaya
09042035c iSTvA yathAvad balabhid aruNAyAm upAspRzat
09042036a sa muktaH pApmanA tena brahmahatyAkRtena ha
09042036c jagAma saMhRSTamanAs tridivaM tridazezvaraH
09042037a ziras tac cApi namuces tatraivAplutya bhArata
09042037c lokAn kAmadughAn prAptam akSayAn rAjasattama
09042038a tatrApy upaspRzya balo mahAtmA; dattvA ca dAnAni pRthagvidhAni
09042038c avApya dharmaM param AryakarmA; jagAma somasya mahat sa tIrtham
09042039a yatrAyajad rAjasUyena somaH; sAkSAt purA vidhivat pArthivendra
09042039c atrir dhImAn vipramukhyo babhUva; hotA yasmin kratumukhye mahAtmA
09042040a yasyAnte 'bhUt sumahAn dAnavAnAM; daiteyAnAM rAkSasAnAM ca devaiH
09042040c sa saMgrAmas tArakAkhyaH sutIvro; yatra skandas tArakAkhyaM jaghAna
09042041a senApatyaM labdhavAn devatAnAM; mahAseno yatra daityAntakartA
09042041c sAkSAc cAtra nyavasat kArttikeyaH; sadA kumAro yatra sa plakSarAjaH
09043001  janamejaya uvAca
09043001a sarasvatyAH prabhAvo 'yam uktas te dvijasattama
09043001c kumArasyAbhiSekaM tu brahman vyAkhyAtum arhasi
09043002a yasmin kAle ca deze ca yathA ca vadatAM vara
09043002c yaiz cAbhiSikto bhagavAn vidhinA yena ca prabhuH
09043003a skando yathA ca daityAnAm akarot kadanaM mahat
09043003c tathA me sarvam AcakSva paraM kautUhalaM hi me
09043004  vaizaMpAyana uvAca
09043004a kuruvaMzasya sadRzam idaM kautUhalaM tava
09043004c harSam utpAdayaty etad vaco me janamejaya
09043005a hanta te kathayiSyAmi zRNvAnasya janAdhipa
09043005c abhiSekaM kumArasya prabhAvaM ca mahAtmanaH
09043006a tejo mAhezvaraM skannam agnau prapatitaM purA
09043006c tat sarvabhakSo bhagavAn nAzakad dagdhum akSayam
09043007a tenAsIdati tejasvI dIptimAn havyavAhanaH
09043007c na caiva dhArayAm Asa garbhaM tejomayaM tadA
09043008a sa gaGgAm abhisaMgamya niyogAd brahmaNaH prabhuH
09043008c garbham AhitavAn divyaM bhAskaropamatejasam
09043009a atha gaGgApi taM garbham asahantI vidhAraNe
09043009c utsasarja girau ramye himavaty amarArcite
09043010a sa tatra vavRdhe lokAn AvRtya jvalanAtmajaH
09043010c dadRzur jvalanAkAraM taM garbham atha kRttikAH
09043011a zarastambe mahAtmAnam analAtmajam Izvaram
09043011c mamAyam iti tAH sarvAH putrArthinyo 'bhicakramuH
09043012a tAsAM viditvA bhAvaM taM mAtqNAM bhagavAn prabhuH
09043012c prasnutAnAM payaH SaDbhir vadanair apibat tadA
09043013a taM prabhAvaM samAlakSya tasya bAlasya kRttikAH
09043013c paraM vismayam ApannA devyo divyavapurdharAH
09043014a yatrotsRSTaH sa bhagavAn gaGgayA girimUrdhani
09043014c sa zailaH kAJcanaH sarvaH saMbabhau kurusattama
09043015a vardhatA caiva garbheNa pRthivI tena raJjitA
09043015c ataz ca sarve saMvRttA girayaH kAJcanAkarAH
09043016a kumAraz ca mahAvIryaH kArttikeya iti smRtaH
09043016c gAGgeyaH pUrvam abhavan mahAyogabalAnvitaH
09043017a sa devas tapasA caiva vIryeNa ca samanvitaH
09043017c vavRdhe 'tIva rAjendra candravat priyadarzanaH
09043018a sa tasmin kAJcane divye zarastambe zriyA vRtaH
09043018c stUyamAnas tadA zete gandharvair munibhis tathA
09043019a tathainam anvanRtyanta devakanyAH sahasrazaH
09043019c divyavAditranRttajJAH stuvantyaz cArudarzanAH
09043020a anvAste ca nadI devaM gaGgA vai saritAM varA
09043020c dadhAra pRthivI cainaM bibhratI rUpam uttamam
09043021a jAtakarmAdikAs tasya kriyAz cakre bRhaspatiH
09043021c vedaz cainaM caturmUrtir upatasthe kRtAJjaliH
09043022a dhanurvedaz catuSpAdaH zastragrAmaH sasaMgrahaH
09043022c tatrainaM samupAtiSThat sAkSAd vANI ca kevalA
09043023a sa dadarza mahAvIryaM devadevam umApatim
09043023c zailaputryA sahAsInaM bhUtasaMghazatair vRtam
09043024a nikAyA bhUtasaMghAnAM paramAdbhutadarzanAH
09043024c vikRtA vikRtAkArA vikRtAbharaNadhvajAH
09043025a vyAghrasiMharkSavadanA biDAlamakarAnanAH
09043025c vRSadaMzamukhAz cAnye gajoSTravadanAs tathA
09043026a ulUkavadanAH ke cid gRdhragomAyudarzanAH
09043026c krauJcapArAvatanibhair vadanai rAGkavair api
09043027a zvAvicchalyakagodhAnAM kharaiDakagavAM tathA
09043027c sadRzAni vapUMSy anye tatra tatra vyadhArayan
09043028a ke cic chailAmbudaprakhyAz cakrAlAtagadAyudhAH
09043028c ke cid aJjanapuJjAbhAH ke cic chvetAcalaprabhAH
09043029a saptamAtRgaNAz caiva samAjagmur vizAM pate
09043029c sAdhyA vizve 'tha maruto vasavaH pitaras tathA
09043030a rudrAdityAs tathA siddhA bhujagA dAnavAH khagAH
09043030c brahmA svayaMbhUr bhagavAn saputraH saha viSNunA
09043031a zakras tathAbhyayAd draSTuM kumAravaram acyutam
09043031c nAradapramukhAz cApi devagandharvasattamAH
09043032a devarSayaz ca siddhAz ca bRhaspatipurogamAH
09043032c Rbhavo nAma varadA devAnAm api devatAH
09043032e te 'pi tatra samAjagmur yAmA dhAmAz ca sarvazaH
09043033a sa tu bAlo 'pi bhagavAn mahAyogabalAnvitaH
09043033c abhyAjagAma devezaM zUlahastaM pinAkinam
09043034a tam Avrajantam AlakSya zivasyAsIn manogatam
09043034c yugapac chailaputryAz ca gaGgAyAH pAvakasya ca
09043035a kiM nu pUrvam ayaM bAlo gauravAd abhyupaiSyati
09043035c api mAm iti sarveSAM teSAm AsIn manogatam
09043036a teSAm etam abhiprAyaM caturNAm upalakSya saH
09043036c yugapad yogam AsthAya sasarja vividhAs tanUH
09043037a tato 'bhavac caturmUrtiH kSaNena bhagavAn prabhuH
09043037c skandaH zAkho vizAkhaz ca naigameSaz ca pRSThataH
09043038a evaM sa kRtvA hy AtmAnaM caturdhA bhagavAn prabhuH
09043038c yato rudras tataH skando jagAmAdbhutadarzanaH
09043039a vizAkhas tu yayau yena devI girivarAtmajA
09043039c zAkho yayau ca bhagavAn vAyumUrtir vibhAvasum
09043039e naigameSo 'gamad gaGgAM kumAraH pAvakaprabhaH
09043040a sarve bhAsvaradehAs te catvAraH samarUpiNaH
09043040c tAn samabhyayur avyagrAs tad adbhutam ivAbhavat
09043041a hAhAkAro mahAn AsId devadAnavarakSasAm
09043041c tad dRSTvA mahad Azcaryam adbhutaM romaharSaNam
09043042a tato rudraz ca devI ca pAvakaz ca pitAmaham
09043042c gaGgayA sahitAH sarve praNipetur jagatpatim
09043043a praNipatya tatas te tu vidhivad rAjapuMgava
09043043c idam Ucur vaco rAjan kArttikeyapriyepsayA
09043044a asya bAlasya bhagavann AdhipatyaM yathepsitam
09043044c asmatpriyArthaM deveza sadRzaM dAtum arhasi
09043045a tataH sa bhagavAn dhImAn sarvalokapitAmahaH
09043045c manasA cintayAm Asa kim ayaM labhatAm iti
09043046a aizvaryANi hi sarvANi devagandharvarakSasAm
09043046c bhUtayakSavihaMgAnAM pannagAnAM ca sarvazaH
09043047a pUrvam evAdidezAsau nikAyeSu mahAtmanAm
09043047c samarthaM ca tam aizvarye mahAmatir amanyata
09043048a tato muhUrtaM sa dhyAtvA devAnAM zreyasi sthitaH
09043048c senApatyaM dadau tasmai sarvabhUteSu bhArata
09043049a sarvadevanikAyAnAM ye rAjAnaH parizrutAH
09043049c tAn sarvAn vyAdidezAsmai sarvabhUtapitAmahaH
09043050a tataH kumAram AdAya devA brahmapurogamAH
09043050c abhiSekArtham AjagmuH zailendraM sahitAs tataH
09043051a puNyAM haimavatIM devIM saricchreSThAM sarasvatIm
09043051c samantapaJcake yA vai triSu lokeSu vizrutA
09043052a tatra tIre sarasvatyAH puNye sarvaguNAnvite
09043052c niSedur devagandharvAH sarve saMpUrNamAnasAH
09044001  vaizaMpAyana uvAca
09044001a tato 'bhiSekasaMbhArAn sarvAn saMbhRtya zAstrataH
09044001c bRhaspatiH samiddhe 'gnau juhAvAjyaM yathAvidhi
09044002a tato himavatA datte maNipravarazobhite
09044002c divyaratnAcite divye niSaNNaH paramAsane
09044003a sarvamaGgalasaMbhArair vidhimantrapuraskRtam
09044003c AbhiSecanikaM dravyaM gRhItvA devatAgaNAH
09044004a indrAviSNU mahAvIryau sUryAcandramasau tathA
09044004c dhAtA caiva vidhAtA ca tathA caivAnilAnalau
09044005a pUSNA bhagenAryamNA ca aMzena ca vivasvatA
09044005c rudraz ca sahito dhImAn mitreNa varuNena ca
09044006a rudrair vasubhir Adityair azvibhyAM ca vRtaH prabhuH
09044006c vizvedevair marudbhiz ca sAdhyaiz ca pitRbhiH saha
09044007a gandharvair apsarobhiz ca yakSarAkSasapannagaiH
09044007c devarSibhir asaMkhyeyais tathA brahmarSibhir varaiH
09044008a vaikhAnasair vAlakhilyair vAyvAhArair marIcipaiH
09044008c bhRgubhiz cAGgirobhiz ca yatibhiz ca mahAtmabhiH
09044008e sarvair vidyAdharaiH puNyair yogasiddhais tathA vRtaH
09044009a pitAmahaH pulastyaz ca pulahaz ca mahAtapAH
09044009c aGgirAH kazyapo 'triz ca marIcir bhRgur eva ca
09044010a kratur haraH pracetAz ca manur dakSas tathaiva ca
09044010c Rtavaz ca grahAz caiva jyotIMSi ca vizAM pate
09044011a mUrtimatyaz ca sarito vedAz caiva sanAtanAH
09044011c samudrAz ca hradAz caiva tIrthAni vividhAni ca
09044011e pRthivI dyaur dizaz caiva pAdapAz ca janAdhipa
09044012a aditir devamAtA ca hrIH zrIH svAhA sarasvatI
09044012c umA zacI sinIvAlI tathA cAnumatiH kuhUH
09044012e rAkA ca dhiSaNA caiva patnyaz cAnyA divaukasAm
09044013a himavAMz caiva vindhyaz ca meruz cAnekazRGgavAn
09044013c airAvataH sAnucaraH kalAH kASThAs tathaiva ca
09044013e mAsArdhamAsA Rtavas tathA rAtryahanI nRpa
09044014a uccaiHzravA hayazreSTho nAgarAjaz ca vAmanaH
09044014c aruNo garuDaz caiva vRkSAz cauSadhibhiH saha
09044015a dharmaz ca bhagavAn devaH samAjagmur hi saMgatAH
09044015c kAlo yamaz ca mRtyuz ca yamasyAnucarAz ca ye
09044016a bahulatvAc ca noktA ye vividhA devatAgaNAH
09044016c te kumArAbhiSekArthaM samAjagmus tatas tataH
09044017a jagRhus te tadA rAjan sarva eva divaukasaH
09044017c AbhiSecanikaM bhANDaM maGgalAni ca sarvazaH
09044018a divyasaMbhArasaMyuktaiH kalazaiH kAJcanair nRpa
09044018c sarasvatIbhiH puNyAbhir divyatoyAbhir eva tu
09044019a abhyaSiJcan kumAraM vai saMprahRSTA divaukasaH
09044019c senApatiM mahAtmAnam asurANAM bhayAvaham
09044020a purA yathA mahArAja varuNaM vai jalezvaram
09044020c tathAbhyaSiJcad bhagavAn brahmA lokapitAmahaH
09044020e kazyapaz ca mahAtejA ye cAnye nAnukIrtitAH
09044021a tasmai brahmA dadau prIto balino vAtaraMhasaH
09044021c kAmavIryadharAn siddhAn mahApAriSadAn prabhuH
09044022a nandiSeNaM lohitAkSaM ghaNTAkarNaM ca saMmatam
09044022c caturtham asyAnucaraM khyAtaM kumudamAlinam
09044023a tataH sthANuM mahAvegaM mahApAriSadaM kratum
09044023c mAyAzatadharaM kAmaM kAmavIryabalAnvitam
09044023e dadau skandAya rAjendra surArivinibarhaNam
09044024a sa hi devAsure yuddhe daityAnAM bhImakarmaNAm
09044024c jaghAna dorbhyAM saMkruddhaH prayutAni caturdaza
09044025a tathA devA dadus tasmai senAM nairRtasaMkulAm
09044025c devazatrukSayakarIm ajayyAM vizvarUpiNIm
09044026a jayazabdaM tataz cakrur devAH sarve savAsavAH
09044026c gandharvayakSarakSAMsi munayaH pitaras tathA
09044027a yamaH prAdAd anucarau yamakAlopamAv ubhau
09044027c unmAthaM ca pramAthaM ca mahAvIryau mahAdyutI
09044028a subhrAjo bhAskaraz caiva yau tau sUryAnuyAyinau
09044028c tau sUryaH kArttikeyAya dadau prItaH pratApavAn
09044029a kailAsazRGgasaMkAzau zvetamAlyAnulepanau
09044029c somo 'py anucarau prAdAn maNiM sumaNim eva ca
09044030a jvAlAjihvaM tathA jyotir AtmajAya hutAzanaH
09044030c dadAv anucarau zUrau parasainyapramAthinau
09044031a parighaM ca vaTaM caiva bhImaM ca sumahAbalam
09044031c dahatiM dahanaM caiva pracaNDau vIryasaMmatau
09044031e aMzo 'py anucarAn paJca dadau skandAya dhImate
09044032a utkrozaM paGkajaM caiva vajradaNDadharAv ubhau
09044032c dadAv analaputrAya vAsavaH paravIrahA
09044032e tau hi zatrUn mahendrasya jaghnatuH samare bahUn
09044033a cakraM vikramakaM caiva saMkramaM ca mahAbalam
09044033c skandAya trIn anucarAn dadau viSNur mahAyazAH
09044034a vardhanaM nandanaM caiva sarvavidyAvizAradau
09044034c skandAya dadatuH prItAv azvinau bharatarSabha
09044035a kundanaM kusumaM caiva kumudaM ca mahAyazAH
09044035c DambarADambarau caiva dadau dhAtA mahAtmane
09044036a vakrAnuvakrau balinau meSavaktrau balotkaTau
09044036c dadau tvaSTA mahAmAyau skandAyAnucarau varau
09044037a suvrataM satyasaMdhaM ca dadau mitro mahAtmane
09044037c kumArAya mahAtmAnau tapovidyAdharau prabhuH
09044038a sudarzanIyau varadau triSu lokeSu vizrutau
09044038c suprabhaM ca mahAtmAnaM zubhakarmANam eva ca
09044038e kArttikeyAya saMprAdAd vidhAtA lokavizrutau
09044039a pAlitakaM kAlikaM ca mahAmAyAvinAv ubhau
09044039c pUSA ca pArSadau prAdAt kArttikeyAya bhArata
09044040a balaM cAtibalaM caiva mahAvaktrau mahAbalau
09044040c pradadau kArttikeyAya vAyur bharatasattama
09044041a ghasaM cAtighasaM caiva timivaktrau mahAbalau
09044041c pradadau kArttikeyAya varuNaH satyasaMgaraH
09044042a suvarcasaM mahAtmAnaM tathaivApy ativarcasam
09044042c himavAn pradadau rAjan hutAzanasutAya vai
09044043a kAJcanaM ca mahAtmAnaM meghamAlinam eva ca
09044043c dadAv anucarau merur agniputrAya bhArata
09044044a sthiraM cAtisthiraM caiva merur evAparau dadau
09044044c mahAtmane 'gniputrAya mahAbalaparAkramau
09044045a ucchritaM cAtizRGgaM ca mahApASANayodhinau
09044045c pradadAv agniputrAya vindhyaH pAriSadAv ubhau
09044046a saMgrahaM vigrahaM caiva samudro 'pi gadAdharau
09044046c pradadAv agniputrAya mahApAriSadAv ubhau
09044047a unmAdaM puSpadantaM ca zaGkukarNaM tathaiva ca
09044047c pradadAv agniputrAya pArvatI zubhadarzanA
09044048a jayaM mahAjayaM caiva nAgau jvalanasUnave
09044048c pradadau puruSavyAghra vAsukiH pannagezvaraH
09044049a evaM sAdhyAz ca rudrAz ca vasavaH pitaras tathA
09044049c sAgarAH saritaz caiva girayaz ca mahAbalAH
09044050a daduH senAgaNAdhyakSAJ zUlapaTTizadhAriNaH
09044050c divyapraharaNopetAn nAnAveSavibhUSitAn
09044051a zRNu nAmAni cAnyeSAM ye 'nye skandasya sainikAH
09044051c vividhAyudhasaMpannAz citrAbharaNavarmiNaH
09044052a zaGkukarNo nikumbhaz ca padmaH kumuda eva ca
09044052c ananto dvAdazabhujas tathA kRSNopakRSNakau
09044053a droNazravAH kapiskandhaH kAJcanAkSo jalaMdhamaH
09044053c akSasaMtarjano rAjan kunadIkas tamobhrakRt
09044054a ekAkSo dvAdazAkSaz ca tathaivaikajaTaH prabhuH
09044054c sahasrabAhur vikaTo vyAghrAkSaH kSitikampanaH
09044055a puNyanAmA sunAmA ca suvaktraH priyadarzanaH
09044055c parizrutaH kokanadaH priyamAlyAnulepanaH
09044056a ajodaro gajazirAH skandhAkSaH zatalocanaH
09044056c jvAlAjihvaH karAlaz ca sitakezo jaTI hariH
09044057a caturdaMSTro 'STajihvaz ca meghanAdaH pRthuzravAH
09044057c vidyudakSo dhanurvaktro jaTharo mArutAzanaH
09044058a udarAkSo jhaSAkSaz ca vajranAbho vasuprabhaH
09044058c samudravego rAjendra zailakampI tathaiva ca
09044059a putrameSaH pravAhaz ca tathA nandopanandakau
09044059c dhUmraH zvetaH kaliGgaz ca siddhArtho varadas tathA
09044060a priyakaz caiva nandaz ca gonandaz ca pratApavAn
09044060c Anandaz ca pramodaz ca svastiko dhruvakas tathA
09044061a kSemavApaH sujAtaz ca siddhayAtraz ca bhArata
09044061c govrajaH kanakApIDo mahApAriSadezvaraH
09044062a gAyano hasanaz caiva bANaH khaDgaz ca vIryavAn
09044062c vaitAlI cAtitAlI ca tathA katikavAtikau
09044063a haMsajaH paGkadigdhAGgaH samudronmAdanaz ca ha
09044063c raNotkaTaH prahAsaz ca zvetazIrSaz ca nandakaH
09044064a kAlakaNThaH prabhAsaz ca tathA kumbhANDako 'paraH
09044064c kAlakAkSaH sitaz caiva bhUtalonmathanas tathA
09044065a yajJavAhaH pravAhaz ca devayAjI ca somapaH
09044065c sajAlaz ca mahAtejAH krathakrAthau ca bhArata
09044066a tuhanaz ca tuhAnaz ca citradevaz ca vIryavAn
09044066c madhuraH suprasAdaz ca kirITI ca mahAbalaH
09044067a vasano madhuvarNaz ca kalazodara eva ca
09044067c dhamanto manmathakaraH sUcIvaktraz ca vIryavAn
09044068a zvetavaktraH suvaktraz ca cAruvaktraz ca pANDuraH
09044068c daNDabAhuH subAhuz ca rajaH kokilakas tathA
09044069a acalaH kanakAkSaz ca bAlAnAm ayikaH prabhuH
09044069c saMcArakaH kokanado gRdhravaktraz ca jambukaH
09044070a lohAzavaktro jaTharaH kumbhavaktraz ca kuNDakaH
09044070c madgugrIvaz ca kRSNaujA haMsavaktraz ca candrabhAH
09044071a pANikUrmA ca zambUkaH paJcavaktraz ca zikSakaH
09044071c cASavaktraz ca jambUkaH zAkavaktraz ca kuNDakaH
09044072a yogayuktA mahAtmAnaH satataM brAhmaNapriyAH
09044072c paitAmahA mahAtmAno mahApAriSadAz ca ha
09044072e yauvanasthAz ca bAlAz ca vRddhAz ca janamejaya
09044073a sahasrazaH pAriSadAH kumAram upatasthire
09044073c vaktrair nAnAvidhair ye tu zRNu tAJ janamejaya
09044074a kUrmakukkuTavaktrAz ca zazolUkamukhAs tathA
09044074c kharoSTravadanAz caiva varAhavadanAs tathA
09044075a manuSyameSavaktrAz ca sRgAlavadanAs tathA
09044075c bhImA makaravaktrAz ca ziMzumAramukhAs tathA
09044076a mArjArazazavaktrAz ca dIrghavaktrAz ca bhArata
09044076c nakulolUkavaktrAz ca zvavaktrAz ca tathApare
09044077a AkhubabhrukavaktrAz ca mayUravadanAs tathA
09044077c matsyameSAnanAz cAnye ajAvimahiSAnanAH
09044078a RkSazArdUlavaktrAz ca dvIpisiMhAnanAs tathA
09044078c bhImA gajAnanAz caiva tathA nakramukhAH pare
09044079a garuDAnanAH khaDgamukhA vRkakAkamukhAs tathA
09044079c gokharoSTramukhAz cAnye vRSadaMzamukhAs tathA
09044080a mahAjaTharapAdAGgAs tArakAkSAz ca bhArata
09044080c pArAvatamukhAz cAnye tathA vRSamukhAH pare
09044081a kokilAvadanAz cAnye zyenatittirikAnanAH
09044081c kRkalAsamukhAz caiva virajombaradhAriNaH
09044082a vyAlavaktrAH zUlamukhAz caNDavaktrAH zatAnanAH
09044082c AzIviSAz cIradharA gonAsAvaraNAs tathA
09044083a sthUlodarAH kRzAGgAz ca sthUlAGgAz ca kRzodarAH
09044083c hrasvagrIvA mahAkarNA nAnAvyAlavibhUSitAH
09044084a gajendracarmavasanAs tathA kRSNAjinAmbarAH
09044084c skandhemukhA mahArAja tathA hy udaratomukhAH
09044085a pRSThemukhA hanumukhAs tathA jaGghAmukhA api
09044085c pArzvAnanAz ca bahavo nAnAdezamukhAs tathA
09044086a tathA kITapataMgAnAM sadRzAsyA gaNezvarAH
09044086c nAnAvyAlamukhAz cAnye bahubAhuzirodharAH
09044087a nAnAvRkSabhujAH ke cit kaTizIrSAs tathApare
09044087c bhujaMgabhogavadanA nAnAgulmanivAsinaH
09044088a cIrasaMvRtagAtrAz ca tathA phalakavAsasaH
09044088c nAnAveSadharAz caiva carmavAsasa eva ca
09044089a uSNISiNo mukuTinaH kambugrIvAH suvarcasaH
09044089c kirITinaH paJcazikhAs tathA kaThinamUrdhajAH
09044090a trizikhA dvizikhAz caiva tathA saptazikhAH pare
09044090c zikhaNDino mukuTino muNDAz ca jaTilAs tathA
09044091a citramAlyadharAH ke cit ke cid romAnanAs tathA
09044091c divyamAlyAmbaradharAH satataM priyavigrahAH
09044092a kRSNA nirmAMsavaktrAz ca dIrghapRSThA nirUdarAH
09044092c sthUlapRSThA hrasvapRSThAH pralambodaramehanAH
09044093a mahAbhujA hrasvabhujA hrasvagAtrAz ca vAmanAH
09044093c kubjAz ca dIrghajaGghAz ca hastikarNazirodharAH
09044094a hastinAsAH kUrmanAsA vRkanAsAs tathApare
09044094c dIrghoSThA dIrghajihvAz ca vikarAlA hy adhomukhAH
09044095a mahAdaMSTrA hrasvadaMSTrAz caturdaMSTrAs tathApare
09044095c vAraNendranibhAz cAnye bhImA rAjan sahasrazaH
09044096a suvibhaktazarIrAz ca dIptimantaH svalaMkRtAH
09044096c piGgAkSAH zaGkukarNAz ca vakranAsAz ca bhArata
09044097a pRthudaMSTrA mahAdaMSTrAH sthUlauSThA harimUrdhajAH
09044097c nAnApAdauSThadaMSTrAz ca nAnAhastazirodharAH
09044097e nAnAvarmabhir AcchannA nAnAbhASAz ca bhArata
09044098a kuzalA dezabhASAsu jalpanto 'nyonyam IzvarAH
09044098c hRSTAH paripatanti sma mahApAriSadAs tathA
09044099a dIrghagrIvA dIrghanakhA dIrghapAdazirobhujAH
09044099c piGgAkSA nIlakaNThAz ca lambakarNAz ca bhArata
09044100a vRkodaranibhAz caiva ke cid aJjanasaMnibhAH
09044100c zvetAGgA lohitagrIvAH piGgAkSAz ca tathApare
09044100e kalmASA bahavo rAjaMz citravarNAz ca bhArata
09044101a cAmarApIDakanibhAH zvetalohitarAjayaH
09044101c nAnAvarNAH savarNAz ca mayUrasadRzaprabhAH
09044102a punaH praharaNAny eSAM kIrtyamAnAni me zRNu
09044102c zeSaiH kRtaM pAriSadair AyudhAnAM parigraham
09044103a pAzodyatakarAH ke cid vyAditAsyAH kharAnanAH
09044103c pRthvakSA nIlakaNThAz ca tathA parighabAhavaH
09044104a zataghnIcakrahastAz ca tathA musalapANayaH
09044104c zUlAsihastAz ca tathA mahAkAyA mahAbalAH
09044105a gadAbhuzuNDihastAz ca tathA tomarapANayaH
09044105c asimudgarahastAz ca daNDahastAz ca bhArata
09044106a Ayudhair vividhair ghorair mahAtmAno mahAjavAH
09044106c mahAbalA mahAvegA mahApAriSadAs tathA
09044107a abhiSekaM kumArasya dRSTvA hRSTA raNapriyAH
09044107c ghaNTAjAlapinaddhAGgA nanRtus te mahaujasaH
09044108a ete cAnye ca bahavo mahApAriSadA nRpa
09044108c upatasthur mahAtmAnaM kArttikeyaM yazasvinam
09044109a divyAz cApy AntarikSAz ca pArthivAz cAnilopamAH
09044109c vyAdiSTA daivataiH zUrAH skandasyAnucarAbhavan
09044110a tAdRzAnAM sahasrANi prayutAny arbudAni ca
09044110c abhiSiktaM mahAtmAnaM parivAryopatasthire
09045001  vaizaMpAyana uvAca
09045001a zRNu mAtRgaNAn rAjan kumArAnucarAn imAn
09045001c kIrtyamAnAn mayA vIra sapatnagaNasUdanAn
09045002a yazasvinInAM mAtqNAM zRNu nAmAni bhArata
09045002c yAbhir vyAptAs trayo lokAH kalyANIbhiz carAcarAH
09045003a prabhAvatI vizAlAkSI palitA gonasI tathA
09045003c zrImatI bahulA caiva tathaiva bahuputrikA
09045004a apsujAtA ca gopAlI bRhadambAlikA tathA
09045004c jayAvatI mAlatikA dhruvaratnA bhayaMkarI
09045005a vasudAmA sudAmA ca vizokA nandinI tathA
09045005c ekacUDA mahAcUDA cakranemiz ca bhArata
09045006a uttejanI jayatsenA kamalAkSy atha zobhanA
09045006c zatruMjayA tathA caiva krodhanA zalabhI kharI
09045007a mAdhavI zubhavaktrA ca tIrthanemiz ca bhArata
09045007c gItapriyA ca kalyANI kadrulA cAmitAzanA
09045008a meghasvanA bhogavatI subhrUz ca kanakAvatI
09045008c alAtAkSI vIryavatI vidyujjihvA ca bhArata
09045009a padmAvatI sunakSatrA kandarA bahuyojanA
09045009c saMtAnikA ca kauravya kamalA ca mahAbalA
09045010a sudAmA bahudAmA ca suprabhA ca yazasvinI
09045010c nRtyapriyA ca rAjendra zatolUkhalamekhalA
09045011a zataghaNTA zatAnandA bhaganandA ca bhAminI
09045011c vapuSmatI candrazItA bhadrakAlI ca bhArata
09045012a saMkArikA niSkuTikA bhramA catvaravAsinI
09045012c sumaGgalA svastimatI vRddhikAmA jayapriyA
09045013a dhanadA suprasAdA ca bhavadA ca jalezvarI
09045013c eDI bheDI sameDI ca vetAlajananI tathA
09045013e kaNDUtiH kAlikA caiva devamitrA ca bhArata
09045014a lambasI ketakI caiva citrasenA tathA balA
09045014c kukkuTikA zaGkhanikA tathA jarjarikA nRpa
09045015a kuNDArikA kokalikA kaNDarA ca zatodarI
09045015c utkrAthinI jareNA ca mahAvegA ca kaGkaNA
09045016a manojavA kaNTakinI praghasA pUtanA tathA
09045016c khazayA curvyuTir vAmA krozanAtha taDitprabhA
09045017a maNDodarI ca tuNDA ca koTarA meghavAsinI
09045017c subhagA lambinI lambA vasucUDA vikatthanI
09045018a UrdhvaveNIdharA caiva piGgAkSI lohamekhalA
09045018c pRthuvaktrA madhurikA madhukumbhA tathaiva ca
09045019a pakSAlikA manthanikA jarAyur jarjarAnanA
09045019c khyAtA dahadahA caiva tathA dhamadhamA nRpa
09045020a khaNDakhaNDA ca rAjendra pUSaNA maNikuNDalA
09045020c amocA caiva kauravya tathA lambapayodharA
09045021a veNuvINAdharA caiva piGgAkSI lohamekhalA
09045021c zazolUkamukhI kRSNA kharajaGghA mahAjavA
09045022a zizumAramukhI zvetA lohitAkSI vibhISaNA
09045022c jaTAlikA kAmacarI dIrghajihvA balotkaTA
09045023a kAleDikA vAmanikA mukuTA caiva bhArata
09045023c lohitAkSI mahAkAyA haripiNDI ca bhUmipa
09045024a ekAkSarA sukusumA kRSNakarNI ca bhArata
09045024c kSurakarNI catuSkarNI karNaprAvaraNA tathA
09045025a catuSpathaniketA ca gokarNI mahiSAnanA
09045025c kharakarNI mahAkarNI bherIsvanamahAsvanA
09045026a zaGkhakumbhasvanA caiva bhaGgadA ca mahAbalA
09045026c gaNA ca sugaNA caiva tathAbhIty atha kAmadA
09045027a catuSpatharatA caiva bhUtitIrthAnyagocarA
09045027c pazudA vittadA caiva sukhadA ca mahAyazAH
09045027e payodA gomahiSadA suviSANA ca bhArata
09045028a pratiSThA supratiSThA ca rocamAnA surocanA
09045028c gokarNI ca sukarNI ca sasirA stherikA tathA
09045028e ekacakrA megharavA meghamAlA virocanA
09045029a etAz cAnyAz ca bahavo mAtaro bharatarSabha
09045029c kArttikeyAnuyAyinyo nAnArUpAH sahasrazaH
09045030a dIrghanakhyo dIrghadantyo dIrghatuNDyaz ca bhArata
09045030c saralA madhurAz caiva yauvanasthAH svalaMkRtAH
09045031a mAhAtmyena ca saMyuktAH kAmarUpadharAs tathA
09045031c nirmAMsagAtryaH zvetAz ca tathA kAJcanasaMnibhAH
09045032a kRSNameghanibhAz cAnyA dhUmrAz ca bharatarSabha
09045032c aruNAbhA mahAbhAgA dIrghakezyaH sitAmbarAH
09045033a UrdhvaveNIdharAz caiva piGgAkSyo lambamekhalAH
09045033c lambodaryo lambakarNAs tathA lambapayodharAH
09045034a tAmrAkSyas tAmravarNAz ca haryakSyaz ca tathAparAH
09045034c varadAH kAmacAriNyo nityapramuditAs tathA
09045035a yAmyo raudryas tathA saumyAH kauberyo 'tha mahAbalAH
09045035c vAruNyo 'tha ca mAhendryas tathAgneyyaH paraMtapa
09045036a vAyavyaz cAtha kaumAryo brAhmyaz ca bharatarSabha
09045036c rUpeNApsarasAM tulyA jave vAyusamAs tathA
09045037a parapuSTopamA vAkye tatharddhyA dhanadopamAH
09045037c zakravIryopamAz caiva dIptyA vahnisamAs tathA
09045038a vRkSacatvaravAsinyaz catuSpathaniketanAH
09045038c guhAzmazAnavAsinyaH zailaprasravaNAlayAH
09045039a nAnAbharaNadhAriNyo nAnAmAlyAmbarAs tathA
09045039c nAnAvicitraveSAz ca nAnAbhASAs tathaiva ca
09045040a ete cAnye ca bahavo gaNAH zatrubhayaMkarAH
09045040c anujagmur mahAtmAnaM tridazendrasya saMmate
09045041a tataH zaktyastram adadad bhagavAn pAkazAsanaH
09045041c guhAya rAjazArdUla vinAzAya suradviSAm
09045042a mahAsvanAM mahAghaNTAM dyotamAnAM sitaprabhAm
09045042c taruNAdityavarNAM ca patAkAM bharatarSabha
09045043a dadau pazupatis tasmai sarvabhUtamahAcamUm
09045043c ugrAM nAnApraharaNAM tapovIryabalAnvitAm
09045044a viSNur dadau vaijayantIM mAlAM balavivardhinIm
09045044c umA dadau cArajasI vAsasI sUryasaprabhe
09045045a gaGgA kamaNDaluM divyam amRtodbhavam uttamam
09045045c dadau prItyA kumArAya daNDaM caiva bRhaspatiH
09045046a garuDo dayitaM putraM mayUraM citrabarhiNam
09045046c aruNas tAmracUDaM ca pradadau caraNAyudham
09045047a pAzaM tu varuNo rAjA balavIryasamanvitam
09045047c kRSNAjinaM tathA brahmA brahmaNyAya dadau prabhuH
09045047e samareSu jayaM caiva pradadau lokabhAvanaH
09045048a senApatyam anuprApya skando devagaNasya ha
09045048c zuzubhe jvalito 'rciSmAn dvitIya iva pAvakaH
09045048e tataH pAriSadaiz caiva mAtRbhiz ca samanvitaH
09045049a sA senA nairRtI bhImA saghaNTocchritaketanA
09045049c sabherIzaGkhamurajA sAyudhA sapatAkinI
09045049e zAradI dyaur ivAbhAti jyotirbhir upazobhitA
09045050a tato devanikAyAs te bhUtasenAgaNAs tathA
09045050c vAdayAm Asur avyagrA bherIzaGkhAMz ca puSkalAn
09045051a paTahAJ jharjharAMz caiva kRkacAn goviSANikAn
09045051c ADambarAn gomukhAMz ca DiNDimAMz ca mahAsvanAn
09045052a tuSTuvus te kumAraM ca sarve devAH savAsavAH
09045052c jaguz ca devagandharvA nanRtuz cApsarogaNAH
09045053a tataH prIto mahAsenas tridazebhyo varaM dadau
09045053c ripUn hantAsmi samare ye vo vadhacikIrSavaH
09045054a pratigRhya varaM devAs tasmAd vibudhasattamAt
09045054c prItAtmAno mahAtmAno menire nihatAn ripUn
09045055a sarveSAM bhUtasaMghAnAM harSAn nAdaH samutthitaH
09045055c apUrayata lokAMs trIn vare datte mahAtmanA
09045056a sa niryayau mahAseno mahatyA senayA vRtaH
09045056c vadhAya yudhi daityAnAM rakSArthaM ca divaukasAm
09045057a vyavasAyo jayo dharmaH siddhir lakSmIr dhRtiH smRtiH
09045057c mahAsenasya sainyAnAm agre jagmur narAdhipa
09045058a sa tayA bhImayA devaH zUlamudgarahastayA
09045058c gadAmusalanArAcazaktitomarahastayA
09045058e dRptasiMhaninAdinyA vinadya prayayau guhaH
09045059a taM dRSTvA sarvadaiteyA rAkSasA dAnavAs tathA
09045059c vyadravanta dizaH sarvA bhayodvignAH samantataH
09045059e abhyadravanta devAs tAn vividhAyudhapANayaH
09045060a dRSTvA ca sa tataH kruddhaH skandas tejobalAnvitaH
09045060c zaktyastraM bhagavAn bhImaM punaH punar avAsRjat
09045060e Adadhac cAtmanas tejo haviSeddha ivAnalaH
09045061a abhyasyamAne zaktyastre skandenAmitatejasA
09045061c ulkAjvAlA mahArAja papAta vasudhAtale
09045062a saMhrAdayantaz ca tathA nirghAtAz cApatan kSitau
09045062c yathAntakAlasamaye sughorAH syus tathA nRpa
09045063a kSiptA hy ekA tathA zaktiH sughorAnalasUnunA
09045063c tataH koTyo viniSpetuH zaktInAM bharatarSabha
09045064a sa zaktyastreNa saMgrAme jaghAna bhagavAn prabhuH
09045064c daityendraM tArakaM nAma mahAbalaparAkramam
09045064e vRtaM daityAyutair vIrair balibhir dazabhir nRpa
09045065a mahiSaM cASTabhiH padmair vRtaM saMkhye nijaghnivAn
09045065c tripAdaM cAyutazatair jaghAna dazabhir vRtam
09045066a hradodaraM nikharvaiz ca vRtaM dazabhir IzvaraH
09045066c jaghAnAnucaraiH sArdhaM vividhAyudhapANibhiH
09045067a tatrAkurvanta vipulaM nAdaM vadhyatsu zatruSu
09045067c kumArAnucarA rAjan pUrayanto dizo daza
09045068a zaktyastrasya tu rAjendra tato 'rcirbhiH samantataH
09045068c dagdhAH sahasrazo daityA nAdaiH skandasya cApare
09045069a patAkayAvadhUtAz ca hatAH ke cit suradviSaH
09045069c ke cid ghaNTAravatrastA nipetur vasudhAtale
09045069e ke cit praharaNaiz chinnA vinipetur gatAsavaH
09045070a evaM suradviSo 'nekAn balavAn AtatAyinaH
09045070c jaghAna samare vIraH kArttikeyo mahAbalaH
09045071a bANo nAmAtha daiteyo baleH putro mahAbalaH
09045071c krauJcaM parvatam AsAdya devasaMghAn abAdhata
09045072a tam abhyayAn mahAsenaH surazatrum udAradhIH
09045072c sa kArttikeyasya bhayAt krauJcaM zaraNam eyivAn
09045073a tataH krauJcaM mahAmanyuH krauJcanAdaninAditam
09045073c zaktyA bibheda bhagavAn kArttikeyo 'gnidattayA
09045074a sazAlaskandhasaralaM trastavAnaravAraNam
09045074c pulinatrastavihagaM viniSpatitapannagam
09045075a golAGgUlarkSasaMghaiz ca dravadbhir anunAditam
09045075c kuraGgagatinirghoSam udbhrAntasRmarAcitam
09045076a viniSpatadbhiH zarabhaiH siMhaiz ca sahasA drutaiH
09045076c zocyAm api dazAM prApto rarAjaiva sa parvataH
09045077a vidyAdharAH samutpetus tasya zRGganivAsinaH
09045077c kiMnarAz ca samudvignAH zaktipAtaravoddhatAH
09045078a tato daityA viniSpetuH zatazo 'tha sahasrazaH
09045078c pradIptAt parvatazreSThAd vicitrAbharaNasrajaH
09045079a tAn nijaghnur atikramya kumArAnucarA mRdhe
09045079c bibheda zaktyA krauJcaM ca pAvakiH paravIrahA
09045080a bahudhA caikadhA caiva kRtvAtmAnaM mahAtmanA
09045080c zaktiH kSiptA raNe tasya pANim eti punaH punaH
09045081a evaMprabhAvo bhagavAn ato bhUyaz ca pAvakiH
09045081c krauJcas tena vinirbhinno daityAz ca zatazo hatAH
09045082a tataH sa bhagavAn devo nihatya vibudhadviSaH
09045082c sabhAjyamAno vibudhaiH paraM harSam avApa ha
09045083a tato dundubhayo rAjan neduH zaGkhAz ca bhArata
09045083c mumucur devayoSAz ca puSpavarSam anuttamam
09045084a divyagandham upAdAya vavau puNyaz ca mArutaH
09045084c gandharvAs tuSTuvuz cainaM yajvAnaz ca maharSayaH
09045085a ke cid enaM vyavasyanti pitAmahasutaM prabhum
09045085c sanatkumAraM sarveSAM brahmayoniM tam agrajam
09045086a ke cin mahezvarasutaM ke cit putraM vibhAvasoH
09045086c umAyAH kRttikAnAM ca gaGgAyAz ca vadanty uta
09045087a ekadhA ca dvidhA caiva caturdhA ca mahAbalam
09045087c yoginAm IzvaraM devaM zatazo 'tha sahasrazaH
09045088a etat te kathitaM rAjan kArttikeyAbhiSecanam
09045088c zRNu caiva sarasvatyAs tIrthavaMzasya puNyatAm
09045089a babhUva tIrthapravaraM hateSu surazatruSu
09045089c kumAreNa mahArAja triviSTapam ivAparam
09045090a aizvaryANi ca tatrastho dadAv IzaH pRthak pRthak
09045090c tadA nairRtamukhyebhyas trailokye pAvakAtmajaH
09045091a evaM sa bhagavAMs tasmiMs tIrthe daityakulAntakaH
09045091c abhiSikto mahArAja devasenApatiH suraiH
09045092a aujasaM nAma tat tIrthaM yatra pUrvam apAM patiH
09045092c abhiSiktaH suragaNair varuNo bharatarSabha
09045093a tasmiMs tIrthavare snAtvA skandaM cAbhyarcya lAGgalI
09045093c brAhmaNebhyo dadau rukmaM vAsAMsy AbharaNAni ca
09045094a uSitvA rajanIM tatra mAdhavaH paravIrahA
09045094c pUjya tIrthavaraM tac ca spRSTvA toyaM ca lAGgalI
09045094e hRSTaH prItamanAz caiva hy abhavan mAdhavottamaH
09045095a etat te sarvam AkhyAtaM yan mAM tvaM paripRcchasi
09045095c yathAbhiSikto bhagavAn skando devaiH samAgataiH
09046001  janamejaya uvAca
09046001a atyadbhutam idaM brahmaJ zrutavAn asmi tattvataH
09046001c abhiSekaM kumArasya vistareNa yathAvidhi
09046002a yac chrutvA pUtam AtmAnaM vijAnAmi tapodhana
09046002c prahRSTAni ca romANi prasannaM ca mano mama
09046003a abhiSekaM kumArasya daityAnAM ca vadhaM tathA
09046003c zrutvA me paramA prItir bhUyaH kautUhalaM hi me
09046004a apAM patiH kathaM hy asminn abhiSiktaH surAsuraiH
09046004c tan me brUhi mahAprAjJa kuzalo hy asi sattama
09046005  vaizaMpAyana uvAca
09046005a zRNu rAjann idaM citraM pUrvakalpe yathAtatham
09046005c Adau kRtayuge tasmin vartamAne yathAvidhi
09046005e varuNaM devatAH sarvAH sametyedam athAbruvan
09046006a yathAsmAn surarAT zakro bhayebhyaH pAti sarvadA
09046006c tathA tvam api sarvAsAM saritAM vai patir bhava
09046007a vAsaz ca te sadA deva sAgare makarAlaye
09046007c samudro 'yaM tava vaze bhaviSyati nadIpatiH
09046008a somena sArdhaM ca tava hAnivRddhI bhaviSyataH
09046008c evam astv iti tAn devAn varuNo vAkyam abravIt
09046009a samAgamya tataH sarve varuNaM sAgarAlayam
09046009c apAM patiM pracakrur hi vidhidRSTena karmaNA
09046010a abhiSicya tato devA varuNaM yAdasAM patim
09046010c jagmuH svAny eva sthAnAni pUjayitvA jalezvaram
09046011a abhiSiktas tato devair varuNo 'pi mahAyazAH
09046011c saritaH sAgarAMz caiva nadAMz caiva sarAMsi ca
09046011e pAlayAm Asa vidhinA yathA devAJ zatakratuH
09046012a tatas tatrApy upaspRzya dattvA ca vividhaM vasu
09046012c agnitIrthaM mahAprAjJaH sa jagAma pralambahA
09046012e naSTo na dRzyate yatra zamIgarbhe hutAzanaH
09046013a lokAlokavinAze ca prAdurbhUte tadAnagha
09046013c upatasthur mahAtmAnaM sarvalokapitAmaham
09046014a agniH pranaSTo bhagavAn kAraNaM ca na vidmahe
09046014c sarvalokakSayo mA bhUt saMpAdayatu no 'nalam
09046015  janamejaya uvAca
09046015a kimarthaM bhagavAn agniH pranaSTo lokabhAvanaH
09046015c vijJAtaz ca kathaM devais tan mamAcakSva tattvataH
09046016  vaizaMpAyana uvAca
09046016a bhRgoH zApAd bhRzaM bhIto jAtavedAH pratApavAn
09046016c zamIgarbham athAsAdya nanAza bhagavAMs tataH
09046017a pranaSTe tu tadA vahnau devAH sarve savAsavAH
09046017c anveSanta tadA naSTaM jvalanaM bhRzaduHkhitAH
09046018a tato 'gnitIrtham AsAdya zamIgarbhastham eva hi
09046018c dadRzur jvalanaM tatra vasamAnaM yathAvidhi
09046019a devAH sarve naravyAghra bRhaspatipurogamAH
09046019c jvalanaM taM samAsAdya prItAbhUvan savAsavAH
09046019e punar yathAgataM jagmuH sarvabhakSaz ca so 'bhavat
09046020a bhRgoH zApAn mahIpAla yad uktaM brahmavAdinA
09046020c tatrApy Aplutya matimAn brahmayoniM jagAma ha
09046021a sasarja bhagavAn yatra sarvalokapitAmahaH
09046021c tatrAplutya tato brahmA saha devaiH prabhuH purA
09046021e sasarja cAnnAni tathA devatAnAM yathAvidhi
09046022a tatra snAtvA ca dattvA ca vasUni vividhAni ca
09046022c kauberaM prayayau tIrthaM tatra taptvA mahat tapaH
09046022e dhanAdhipatyaM saMprApto rAjann ailabilaH prabhuH
09046023a tatrastham eva taM rAjan dhanAni nidhayas tathA
09046023c upatasthur narazreSTha tat tIrthaM lAGgalI tataH
09046023e gatvA snAtvA ca vidhivad brAhmaNebhyo dhanaM dadau
09046024a dadRze tatra tat sthAnaM kaubere kAnanottame
09046024c purA yatra tapas taptaM vipulaM sumahAtmanA
09046025a yatra rAjJA kubereNa varA labdhAz ca puSkalAH
09046025c dhanAdhipatyaM sakhyaM ca rudreNAmitatejasA
09046026a suratvaM lokapAlatvaM putraM ca nalakUbaram
09046026c yatra lebhe mahAbAho dhanAdhipatir aJjasA
09046027a abhiSiktaz ca tatraiva samAgamya marudgaNaiH
09046027c vAhanaM cAsya tad dattaM haMsayuktaM manoramam
09046027e vimAnaM puSpakaM divyaM nairRtaizvaryam eva ca
09046028a tatrAplutya balo rAjan dattvA dAyAMz ca puSkalAn
09046028c jagAma tvarito rAmas tIrthaM zvetAnulepanaH
09046029a niSevitaM sarvasattvair nAmnA badarapAcanam
09046029c nAnartukavanopetaM sadApuSpaphalaM zubham
09047001  vaizaMpAyana uvAca
09047001a tatas tIrthavaraM rAmo yayau badarapAcanam
09047001c tapasvisiddhacaritaM yatra kanyA dhRtavratA
09047002a bharadvAjasya duhitA rUpeNApratimA bhuvi
09047002c srucAvatI nAma vibho kumArI brahmacAriNI
09047003a tapaz cacAra sAtyugraM niyamair bahubhir nRpa
09047003c bhartA me devarAjaH syAd iti nizcitya bhAminI
09047004a samAs tasyA vyatikrAntA bahvyaH kurukulodvaha
09047004c carantyA niyamAMs tAMs tAn strIbhis tIvrAn suduzcarAn
09047005a tasyAs tu tena vRttena tapasA ca vizAM pate
09047005c bhaktyA ca bhagavAn prItaH parayA pAkazAsanaH
09047006a AjagAmAzramaM tasyAs tridazAdhipatiH prabhuH
09047006c AsthAya rUpaM viprarSer vasiSThasya mahAtmanaH
09047007a sA taM dRSTvogratapasaM vasiSThaM tapatAM varam
09047007c AcArair munibhir dRSTaiH pUjayAm Asa bhArata
09047008a uvAca niyamajJA ca kalyANI sA priyaMvadA
09047008c bhagavan munizArdUla kim AjJApayasi prabho
09047009a sarvam adya yathAzakti tava dAsyAmi suvrata
09047009c zakrabhaktyA tu te pANiM na dAsyAmi kathaM cana
09047010a vrataiz ca niyamaiz caiva tapasA ca tapodhana
09047010c zakras toSayitavyo vai mayA tribhuvanezvaraH
09047011a ity ukto bhagavAn devaH smayann iva nirIkSya tAm
09047011c uvAca niyamajJAM tAM sAntvayann iva bhArata
09047012a ugraM tapaz carasi vai viditA me 'si suvrate
09047012c yadartham ayam Arambhas tava kalyANi hRdgataH
09047013a tac ca sarvaM yathAbhUtaM bhaviSyati varAnane
09047013c tapasA labhyate sarvaM sarvaM tapasi tiSThati
09047014a yAni sthAnAni divyAni vibudhAnAM zubhAnane
09047014c tapasA tAni prApyAni tapomUlaM mahat sukham
09047015a iha kRtvA tapo ghoraM dehaM saMnyasya mAnavAH
09047015c devatvaM yAnti kalyANi zRNu cedaM vaco mama
09047016a pacasvaitAni subhage badarANi zubhavrate
09047016c pacety uktvA sa bhagavAJ jagAma balasUdanaH
09047017a Amantrya tAM tu kalyANIM tato japyaM jajApa saH
09047017c avidUre tatas tasmAd AzramAt tIrtha uttame
09047017e indratIrthe mahArAja triSu lokeSu vizrute
09047018a tasyA jijJAsanArthaM sa bhagavAn pAkazAsanaH
09047018c badarANAm apacanaM cakAra vibudhAdhipaH
09047019a tataH sa prayatA rAjan vAgyatA vigataklamA
09047019c tatparA zucisaMvItA pAvake samadhizrayat
09047019e apacad rAjazArdUla badarANi mahAvratA
09047020a tasyAH pacantyAH sumahAn kAlo 'gAt puruSarSabha
09047020c na ca sma tAny apacyanta dinaM ca kSayam abhyagAt
09047021a hutAzanena dagdhaz ca yas tasyAH kASThasaMcayaH
09047021c akASTham agniM sA dRSTvA svazarIram athAdahat
09047022a pAdau prakSipya sA pUrvaM pAvake cArudarzanA
09047022c dagdhau dagdhau punaH pAdAv upAvartayatAnaghA
09047023a caraNau dahyamAnau ca nAcintayad aninditA
09047023c duHkhaM kamalapatrAkSI maharSeH priyakAmyayA
09047024a atha tat karma dRSTvAsyAH prItas tribhuvanezvaraH
09047024c tataH saMdarzayAm Asa kanyAyai rUpam AtmanaH
09047025a uvAca ca surazreSThas tAM kanyAM sudRDhavratAm
09047025c prIto 'smi te zubhe bhaktyA tapasA niyamena ca
09047026a tasmAd yo 'bhimataH kAmaH sa te saMpatsyate zubhe
09047026c dehaM tyaktvA mahAbhAge tridive mayi vatsyasi
09047027a idaM ca te tIrthavaraM sthiraM loke bhaviSyati
09047027c sarvapApApahaM subhru nAmnA badarapAcanam
09047027e vikhyAtaM triSu lokeSu brahmarSibhir abhiplutam
09047028a asmin khalu mahAbhAge zubhe tIrthavare purA
09047028c tyaktvA saptarSayo jagmur himavantam arundhatIm
09047029a tatas te vai mahAbhAgA gatvA tatra susaMzitAH
09047029c vRttyarthaM phalamUlAni samAhartuM yayuH kila
09047030a teSAM vRttyarthinAM tatra vasatAM himavadvane
09047030c anAvRSTir anuprAptA tadA dvAdazavArSikI
09047031a te kRtvA cAzramaM tatra nyavasanta tapasvinaH
09047031c arundhaty api kalyANI taponityAbhavat tadA
09047032a arundhatIM tato dRSTvA tIvraM niyamam AsthitAm
09047032c athAgamat trinayanaH suprIto varadas tadA
09047033a brAhmaM rUpaM tataH kRtvA mahAdevo mahAyazAH
09047033c tAm abhyetyAbravId devo bhikSAm icchAmy ahaM zubhe
09047034a pratyuvAca tataH sA taM brAhmaNaM cArudarzanA
09047034c kSINo 'nnasaMcayo vipra badarANIha bhakSaya
09047034e tato 'bravIn mahAdevaH pacasvaitAni suvrate
09047035a ity uktA sApacat tAni brAhmaNapriyakAmyayA
09047035c adhizritya samiddhe 'gnau badarANi yazasvinI
09047036a divyA manoramAH puNyAH kathAH zuzrAva sA tadA
09047036c atItA sA tv anAvRSTir ghorA dvAdazavArSikI
09047037a anaznantyAH pacantyAz ca zRNvantyAz ca kathAH zubhAH
09047037c ahaHsamaH sa tasyAs tu kAlo 'tItaH sudAruNaH
09047038a tatas te munayaH prAptAH phalAny AdAya parvatAt
09047038c tataH sa bhagavAn prItaH provAcArundhatIM tadA
09047039a upasarpasva dharmajJe yathApUrvam imAn RSIn
09047039c prIto 'smi tava dharmajJe tapasA niyamena ca
09047040a tataH saMdarzayAm Asa svarUpaM bhagavAn haraH
09047040c tato 'bravIt tadA tebhyas tasyAs tac caritaM mahat
09047041a bhavadbhir himavatpRSThe yat tapaH samupArjitam
09047041c asyAz ca yat tapo viprA na samaM tan mataM mama
09047042a anayA hi tapasvinyA tapas taptaM suduzcaram
09047042c anaznantyA pacantyA ca samA dvAdaza pAritAH
09047043a tataH provAca bhagavAMs tAm evArundhatIM punaH
09047043c varaM vRNISva kalyANi yat te 'bhilaSitaM hRdi
09047044a sAbravIt pRthutAmrAkSI devaM saptarSisaMsadi
09047044c bhagavAn yadi me prItas tIrthaM syAd idam uttamam
09047044e siddhadevarSidayitaM nAmnA badarapAcanam
09047045a tathAsmin devadeveza trirAtram uSitaH zuciH
09047045c prApnuyAd upavAsena phalaM dvAdazavArSikam
09047045e evam astv iti tAM coktvA haro yAtas tadA divam
09047046a RSayo vismayaM jagmus tAM dRSTvA cApy arundhatIm
09047046c azrAntAM cAvivarNAM ca kSutpipAsAsahAM satIm
09047047a evaM siddhiH parA prAptA arundhatyA vizuddhayA
09047047c yathA tvayA mahAbhAge madarthaM saMzitavrate
09047048a vizeSo hi tvayA bhadre vrate hy asmin samarpitaH
09047048c tathA cedaM dadAmy adya niyamena sutoSitaH
09047049a vizeSaM tava kalyANi prayacchAmi varaM vare
09047049c arundhatyA varas tasyA yo datto vai mahAtmanA
09047050a tasya cAhaM prasAdena tava kalyANi tejasA
09047050c pravakSyAmy aparaM bhUyo varam atra yathAvidhi
09047051a yas tv ekAM rajanIM tIrthe vatsyate susamAhitaH
09047051c sa snAtvA prApsyate lokAn dehanyAsAc ca durlabhAn
09047052a ity uktvA bhagavAn devaH sahasrAkSaH pratApavAn
09047052c srucAvatIM tataH puNyAM jagAma tridivaM punaH
09047053a gate vajradhare rAjaMs tatra varSaM papAta ha
09047053c puSpANAM bharatazreSTha divyAnAM divyagandhinAm
09047054a nedur dundubhayaz cApi samantAt sumahAsvanAH
09047054c mArutaz ca vavau yuktyA puNyagandho vizAM pate
09047055a utsRjya tu zubhaM dehaM jagAmendrasya bhAryatAm
09047055c tapasogreNa sA labdhvA tena reme sahAcyuta
09047056  janamejaya uvAca
09047056a kA tasyA bhagavan mAtA kva saMvRddhA ca zobhanA
09047056c zrotum icchAmy ahaM brahman paraM kautUhalaM hi me
09047057  vaizaMpAyana uvAca
09047057a bhAradvAjasya viprarSeH skannaM reto mahAtmanaH
09047057c dRSTvApsarasam AyAntIM ghRtAcIM pRthulocanAm
09047058a sa tu jagrAha tad retaH kareNa japatAM varaH
09047058c tadAvapat parNapuTe tatra sA saMbhavac chubhA
09047059a tasyAs tu jAtakarmAdi kRtvA sarvaM tapodhanaH
09047059c nAma cAsyAH sa kRtavAn bhAradvAjo mahAmuniH
09047060a srucAvatIti dharmAtmA tadarSigaNasaMsadi
09047060c sa ca tAm Azrame nyasya jagAma himavadvanam
09047061a tatrApy upaspRzya mahAnubhAvo; vasUni dattvA ca mahAdvijebhyaH
09047061c jagAma tIrthaM susamAhitAtmA; zakrasya vRSNipravaras tadAnIm
09048001  vaizaMpAyana uvAca
09048001a indratIrthaM tato gatvA yadUnAM pravaro balI
09048001c viprebhyo dhanaratnAni dadau snAtvA yathAvidhi
09048002a tatra hy amararAjo 'sAv Ije kratuzatena ha
09048002c bRhaspatez ca devezaH pradadau vipulaM dhanam
09048003a nirargalAn sajArUthyAn sarvAn vividhadakSiNAn
09048003c AjahAra kratUMs tatra yathoktAn vedapAragaiH
09048004a tAn kratUn bharatazreSTha zatakRtvo mahAdyutiH
09048004c pUrayAm Asa vidhivat tataH khyAtaH zatakratuH
09048005a tasya nAmnA ca tat tIrthaM zivaM puNyaM sanAtanam
09048005c indratIrtham iti khyAtaM sarvapApapramocanam
09048006a upaspRzya ca tatrApi vidhivan musalAyudhaH
09048006c brAhmaNAn pUjayitvA ca pAnAcchAdanabhojanaiH
09048006e zubhaM tIrthavaraM tasmAd rAmatIrthaM jagAma ha
09048007a yatra rAmo mahAbhAgo bhArgavaH sumahAtapAH
09048007c asakRt pRthivIM sarvAM hatakSatriyapuMgavAm
09048008a upAdhyAyaM puraskRtya kazyapaM munisattamam
09048008c ayajad vAjapeyena so 'zvamedhazatena ca
09048008e pradadau dakSiNArthaM ca pRthivIM vai sasAgarAm
09048009a rAmo dattvA dhanaM tatra dvijebhyo janamejaya
09048009c upaspRzya yathAnyAyaM pUjayitvA tathA dvijAn
09048010a puNye tIrthe zubhe deze vasu dattvA zubhAnanaH
09048010c munIMz caivAbhivAdyAtha yamunAtIrtham Agamat
09048011a yatrAnayAm Asa tadA rAjasUyaM mahIpate
09048011c putro 'diter mahAbhAgo varuNo vai sitaprabhaH
09048012a tatra nirjitya saMgrAme mAnuSAn daivatAMs tathA
09048012c varaM kratuM samAjahre varuNaH paravIrahA
09048013a tasmin kratuvare vRtte saMgrAmaH samajAyata
09048013c devAnAM dAnavAnAM ca trailokyasya kSayAvahaH
09048014a rAjasUye kratuzreSThe nivRtte janamejaya
09048014c jAyate sumahAghoraH saMgrAmaH kSatriyAn prati
09048015a sIrAyudhas tadA rAmas tasmiMs tIrthavare tadA
09048015c tatra snAtvA ca dattvA ca dvijebhyo vasu mAdhavaH
09048016a vanamAlI tato hRSTaH stUyamAno dvijAtibhiH
09048016c tasmAd AdityatIrthaM ca jagAma kamalekSaNaH
09048017a yatreSTvA bhagavAJ jyotir bhAskaro rAjasattama
09048017c jyotiSAm AdhipatyaM ca prabhAvaM cAbhyapadyata
09048018a tasyA nadyAs tu tIre vai sarve devAH savAsavAH
09048018c vizvedevAH samaruto gandharvApsarasaz ca ha
09048019a dvaipAyanaH zukaz caiva kRSNaz ca madhusUdanaH
09048019c yakSAz ca rAkSasAz caiva pizAcAz ca vizAM pate
09048020a ete cAnye ca bahavo yogasiddhAH sahasrazaH
09048020c tasmiMs tIrthe sarasvatyAH zive puNye paraMtapa
09048021a tatra hatvA purA viSNur asurau madhukaiTabhau
09048021c Apluto bharatazreSTha tIrthapravara uttame
09048022a dvaipAyanaz ca dharmAtmA tatraivAplutya bhArata
09048022c saMprAptaH paramaM yogaM siddhiM ca paramAM gataH
09048023a asito devalaz caiva tasminn eva mahAtapAH
09048023c paramaM yogam AsthAya RSir yogam avAptavAn
09049001  vaizaMpAyana uvAca
09049001a tasminn eva tu dharmAtmA vasati sma tapodhanaH
09049001c gArhasthyaM dharmam AsthAya asito devalaH purA
09049002a dharmanityaH zucir dAnto nyastadaNDo mahAtapAH
09049002c karmaNA manasA vAcA samaH sarveSu jantuSu
09049003a akrodhano mahArAja tulyanindApriyApriyaH
09049003c kAJcane loSTake caiva samadarzI mahAtapAH
09049004a devatAH pUjayan nityam atithIMz ca dvijaiH saha
09049004c brahmacaryarato nityaM sadA dharmaparAyaNaH
09049005a tato 'bhyetya mahArAja yogam AsthAya bhikSukaH
09049005c jaigISavyo munir dhImAMs tasmiMs tIrthe samAhitaH
09049006a devalasyAzrame rAjan nyavasat sa mahAdyutiH
09049006c yoganityo mahArAja siddhiM prApto mahAtapAH
09049007a taM tatra vasamAnaM tu jaigISavyaM mahAmunim
09049007c devalo darzayann eva naivAyuJjata dharmataH
09049008a evaM tayor mahArAja dIrghakAlo vyatikramat
09049008c jaigISavyaM muniM caiva na dadarzAtha devalaH
09049009a AhArakAle matimAn parivrAD janamejaya
09049009c upAtiSThata dharmajJo bhaikSakAle sa devalam
09049010a sa dRSTvA bhikSurUpeNa prAptaM tatra mahAmunim
09049010c gauravaM paramaM cakre prItiM ca vipulAM tathA
09049011a devalas tu yathAzakti pUjayAm Asa bhArata
09049011c RSidRSTena vidhinA samA bahvyaH samAhitaH
09049012a kadA cit tasya nRpate devalasya mahAtmanaH
09049012c cintA sumahatI jAtA muniM dRSTvA mahAdyutim
09049013a samAs tu samatikrAntA bahvyaH pUjayato mama
09049013c na cAyam alaso bhikSur abhyabhASata kiM cana
09049014a evaM vigaNayann eva sa jagAma mahodadhim
09049014c antarikSacaraH zrImAn kalazaM gRhya devalaH
09049015a gacchann eva sa dharmAtmA samudraM saritAM patim
09049015c jaigISavyaM tato 'pazyad gataM prAg eva bhArata
09049016a tataH savismayaz cintAM jagAmAthAsitaH prabhuH
09049016c kathaM bhikSur ayaM prAptaH samudre snAta eva ca
09049017a ity evaM cintayAm Asa maharSir asitas tadA
09049017c snAtvA samudre vidhivac chucir japyaM jajApa ha
09049018a kRtajapyAhnikaH zrImAn AzramaM ca jagAma ha
09049018c kalazaM jalapUrNaM vai gRhItvA janamejaya
09049019a tataH sa pravizann eva svam AzramapadaM muniH
09049019c AsInam Azrame tatra jaigISavyam apazyata
09049020a na vyAharati caivainaM jaigISavyaH kathaM cana
09049020c kASThabhUto ''zramapade vasati sma mahAtapAH
09049021a taM dRSTvA cAplutaM toye sAgare sAgaropamam
09049021c praviSTam AzramaM cApi pUrvam eva dadarza saH
09049022a asito devalo rAjaMz cintayAm Asa buddhimAn
09049022c dRSTaH prabhAvaM tapaso jaigISavyasya yogajam
09049023a cintayAm Asa rAjendra tadA sa munisattamaH
09049023c mayA dRSTaH samudre ca Azrame ca kathaM tv ayam
09049024a evaM vigaNayann eva sa munir mantrapAragaH
09049024c utpapAtAzramAt tasmAd antarikSaM vizAM pate
09049024e jijJAsArthaM tadA bhikSor jaigISavyasya devalaH
09049025a so 'ntarikSacarAn siddhAn samapazyat samAhitAn
09049025c jaigISavyaM ca taiH siddhaiH pUjyamAnam apazyata
09049026a tato 'sitaH susaMrabdho vyavasAyI dRDhavrataH
09049026c apazyad vai divaM yAntaM jaigISavyaM sa devalaH
09049027a tasmAc ca pitRlokaM taM vrajantaM so 'nvapazyata
09049027c pitRlokAc ca taM yAntaM yAmyaM lokam apazyata
09049028a tasmAd api samutpatya somalokam abhiSTutam
09049028c vrajantam anvapazyat sa jaigISavyaM mahAmunim
09049029a lokAn samutpatantaM ca zubhAn ekAntayAjinAm
09049029c tato 'gnihotriNAM lokAMs tebhyaz cApy utpapAta ha
09049030a darzaM ca paurNamAsaM ca ye yajanti tapodhanAH
09049030c tebhyaH sa dadRze dhImA&l lokebhyaH pazuyAjinAm
09049030e vrajantaM lokam amalam apazyad devapUjitam
09049031a cAturmAsyair bahuvidhair yajante ye tapodhanAH
09049031c teSAM sthAnaM tathA yAntaM tathAgniSTomayAjinAm
09049032a agniSTutena ca tathA ye yajanti tapodhanAH
09049032c tat sthAnam anusaMprAptam anvapazyata devalaH
09049033a vAjapeyaM kratuvaraM tathA bahusuvarNakam
09049033c Aharanti mahAprAjJAs teSAM lokeSv apazyata
09049034a yajante puNDarIkeNa rAjasUyena caiva ye
09049034c teSAM lokeSv apazyac ca jaigISavyaM sa devalaH
09049035a azvamedhaM kratuvaraM naramedhaM tathaiva ca
09049035c Aharanti narazreSThAs teSAM lokeSv apazyata
09049036a sarvamedhaM ca duSprApaM tathA sautrAmaNiM ca ye
09049036c teSAM lokeSv apazyac ca jaigISavyaM sa devalaH
09049037a dvAdazAhaiz ca satrair ye yajante vividhair nRpa
09049037c teSAM lokeSv apazyac ca jaigISavyaM sa devalaH
09049038a mitrAvaruNayor lokAn AdityAnAM tathaiva ca
09049038c salokatAm anuprAptam apazyata tato 'sitaH
09049039a rudrANAM ca vasUnAM ca sthAnaM yac ca bRhaspateH
09049039c tAni sarvANy atItaM ca samapazyat tato 'sitaH
09049040a Aruhya ca gavAM lokaM prayAntaM brahmasatriNAm
09049040c lokAn apazyad gacchantaM jaigISavyaM tato 'sitaH
09049041a trI&l lokAn aparAn vipram utpatantaM svatejasA
09049041c pativratAnAM lokAMz ca vrajantaM so 'nvapazyata
09049042a tato munivaraM bhUyo jaigISavyam athAsitaH
09049042c nAnvapazyata yogastham antarhitam ariMdama
09049043a so 'cintayan mahAbhAgo jaigISavyasya devalaH
09049043c prabhAvaM suvratatvaM ca siddhiM yogasya cAtulAm
09049044a asito 'pRcchata tadA siddhA&l lokeSu sattamAn
09049044c prayataH prAJjalir bhUtvA dhIras tAn brahmasatriNaH
09049045a jaigISavyaM na pazyAmi taM zaMsata mahaujasam
09049045c etad icchAmy ahaM zrotuM paraM kautUhalaM hi me
09049046  siddhA UcuH
09049046a zRNu devala bhUtArthaM zaMsatAM no dRDhavrata
09049046c jaigISavyo gato lokaM zAzvataM brahmaNo 'vyayam
09049047a sa zrutvA vacanaM teSAM siddhAnAM brahmasatriNAm
09049047c asito devalas tUrNam utpapAta papAta ca
09049048a tataH siddhAs ta Ucur hi devalaM punar eva ha
09049048c na devala gatis tatra tava gantuM tapodhana
09049048e brahmaNaH sadanaM vipra jaigISavyo yadAptavAn
09049049a teSAM tad vacanaM zrutvA siddhAnAM devalaH punaH
09049049c AnupUrvyeNa lokAMs tAn sarvAn avatatAra ha
09049050a svam AzramapadaM puNyam AjagAma pataMgavat
09049050c pravizann eva cApazyaj jaigISavyaM sa devalaH
09049051a tato buddhyA vyagaNayad devalo dharmayuktayA
09049051c dRSTvA prabhAvaM tapaso jaigISavyasya yogajam
09049052a tato 'bravIn mahAtmAnaM jaigISavyaM sa devalaH
09049052c vinayAvanato rAjann upasarpya mahAmunim
09049052e mokSadharmaM samAsthAtum iccheyaM bhagavann aham
09049053a tasya tad vacanaM zrutvA upadezaM cakAra saH
09049053c vidhiM ca yogasya paraM kAryAkAryaM ca zAstrataH
09049054a saMnyAsakRtabuddhiM taM tato dRSTvA mahAtapAH
09049054c sarvAz cAsya kriyAz cakre vidhidRSTena karmaNA
09049055a saMnyAsakRtabuddhiM taM bhUtAni pitRbhiH saha
09049055c tato dRSTvA praruruduH ko 'smAn saMvibhajiSyati
09049056a devalas tu vacaH zrutvA bhUtAnAM karuNaM tathA
09049056c dizo daza vyAharatAM mokSaM tyaktuM mano dadhe
09049057a tatas tu phalamUlAni pavitrANi ca bhArata
09049057c puSpANy oSadhayaz caiva rorUyante sahasrazaH
09049058a punar no devalaH kSudro nUnaM chetsyati durmatiH
09049058c abhayaM sarvabhUtebhyo yo dattvA nAvabudhyate
09049059a tato bhUyo vyagaNayat svabuddhyA munisattamaH
09049059c mokSe gArhasthyadharme vA kiM nu zreyaskaraM bhavet
09049060a iti nizcitya manasA devalo rAjasattama
09049060c tyaktvA gArhasthyadharmaM sa mokSadharmam arocayat
09049061a evamAdIni saMcintya devalo nizcayAt tataH
09049061c prAptavAn paramAM siddhiM paraM yogaM ca bhArata
09049062a tato devAH samAgamya bRhaspatipurogamAH
09049062c jaigISavyaM tapaz cAsya prazaMsanti tapasvinaH
09049063a athAbravId RSivaro devAn vai nAradas tadA
09049063c jaigISavye tapo nAsti vismApayati yo 'sitam
09049064a tam evaMvAdinaM dhIraM pratyUcus te divaukasaH
09049064c maivam ity eva zaMsanto jaigISavyaM mahAmunim
09049065a tatrApy upaspRzya tato mahAtmA; dattvA ca vittaM halabhRd dvijebhyaH
09049065c avApya dharmaM param AryakarmA; jagAma somasya mahat sa tIrtham
09050001  vaizaMpAyana uvAca
09050001a yatrejivAn uDupatI rAjasUyena bhArata
09050001c tasmin vRtte mahAn AsIt saMgrAmas tArakAmayaH
09050002a tatrApy upaspRzya balo dattvA dAnAni cAtmavAn
09050002c sArasvatasya dharmAtmA munes tIrthaM jagAma ha
09050003a yatra dvAdazavArSikyAm anAvRSTyAM dvijottamAn
09050003c vedAn adhyApayAm Asa purA sArasvato muniH
09050004  janamejaya uvAca
09050004a kathaM dvAdazavArSikyAm anAvRSTyAM tapodhanaH
09050004c vedAn adhyApayAm Asa purA sArasvato muniH
09050005  vaizaMpAyana uvAca
09050005a AsIt pUrvaM mahArAja munir dhImAn mahAtapAH
09050005c dadhIca iti vikhyAto brahmacArI jitendriyaH
09050006a tasyAtitapasaH zakro bibheti satataM vibho
09050006c na sa lobhayituM zakyaH phalair bahuvidhair api
09050007a pralobhanArthaM tasyAtha prAhiNot pAkazAsanaH
09050007c divyAm apsarasaM puNyAM darzanIyAm alambusAm
09050008a tasya tarpayato devAn sarasvatyAM mahAtmanaH
09050008c samIpato mahArAja sopAtiSThata bhAminI
09050009a tAM divyavapuSaM dRSTvA tasyarSer bhAvitAtmanaH
09050009c retaH skannaM sarasvatyAM tat sA jagrAha nimnagA
09050010a kukSau cApy adadhad dRSTvA tad retaH puruSarSabha
09050010c sA dadhAra ca taM garbhaM putrahetor mahAnadI
09050011a suSuve cApi samaye putraM sA saritAM varA
09050011c jagAma putram AdAya tam RSiM prati ca prabho
09050012a RSisaMsadi taM dRSTvA sA nadI munisattamam
09050012c tataH provAca rAjendra dadatI putram asya tam
09050012e brahmarSe tava putro 'yaM tvadbhaktyA dhArito mayA
09050013a dRSTvA te 'psarasaM reto yat skannaM prAg alambusAm
09050013c tat kukSiNA vai brahmarSe tvadbhaktyA dhRtavaty aham
09050014a na vinAzam idaM gacchet tvatteja iti nizcayAt
09050014c pratigRhNISva putraM svaM mayA dattam aninditam
09050015a ity uktaH pratijagrAha prItiM cAvApa uttamAm
09050015c mantravac copajighrat taM mUrdhni premNA dvijottamaH
09050016a pariSvajya ciraM kAlaM tadA bharatasattama
09050016c sarasvatyai varaM prAdAt prIyamANo mahAmuniH
09050017a vizve devAH sapitaro gandharvApsarasAM gaNAH
09050017c tRptiM yAsyanti subhage tarpyamANAs tavAmbhasA
09050018a ity uktvA sa tu tuSTAva vacobhir vai mahAnadIm
09050018c prItaH paramahRSTAtmA yathAvac chRNu pArthiva
09050019a prasRtAsi mahAbhAge saraso brahmaNaH purA
09050019c jAnanti tvAM saricchreSThe munayaH saMzitavratAH
09050020a mama priyakarI cApi satataM priyadarzane
09050020c tasmAt sArasvataH putro mahAMs te varavarNini
09050021a tavaiva nAmnA prathitaH putras te lokabhAvanaH
09050021c sArasvata iti khyAto bhaviSyati mahAtapAH
09050022a eSa dvAdazavArSikyAm anAvRSTyAM dvijarSabhAn
09050022c sArasvato mahAbhAge vedAn adhyApayiSyati
09050023a puNyAbhyaz ca saridbhyas tvaM sadA puNyatamA zubhe
09050023c bhaviSyasi mahAbhAge matprasAdAt sarasvati
09050024a evaM sA saMstutA tena varaM labdhvA mahAnadI
09050024c putram AdAya muditA jagAma bharatarSabha
09050025a etasminn eva kAle tu virodhe devadAnavaiH
09050025c zakraH praharaNAnveSI lokAMs trIn vicacAra ha
09050026a na copalebhe bhagavAJ zakraH praharaNaM tadA
09050026c yad vai teSAM bhaved yogyaM vadhAya vibudhadviSAm
09050027a tato 'bravIt surAJ zakro na me zakyA mahAsurAH
09050027c Rte 'sthibhir dadhIcasya nihantuM tridazadviSaH
09050028a tasmAd gatvA RSizreSTho yAcyatAM surasattamAH
09050028c dadhIcAsthIni dehIti tair vadhiSyAmahe ripUn
09050029a sa devair yAcito 'sthIni yatnAd RSivaras tadA
09050029c prANatyAgaM kuruSveti cakAraivAvicArayan
09050029e sa lokAn akSayAn prApto devapriyakaras tadA
09050030a tasyAsthibhir atho zakraH saMprahRSTamanAs tadA
09050030c kArayAm Asa divyAni nAnApraharaNAny uta
09050030e vajrANi cakrANi gadA gurudaNDAMz ca puSkalAn
09050031a sa hi tIvreNa tapasA saMbhRtaH paramarSiNA
09050031c prajApatisutenAtha bhRguNA lokabhAvanaH
09050032a atikAyaH sa tejasvI lokasAravinirmitaH
09050032c jajJe zailaguruH prAMzur mahimnA prathitaH prabhuH
09050032e nityam udvijate cAsya tejasA pAkazAsanaH
09050033a tena vajreNa bhagavAn mantrayuktena bhArata
09050033c bhRzaM krodhavisRSTena brahmatejobhavena ca
09050033e daityadAnavavIrANAM jaghAna navatIr nava
09050034a atha kAle vyatikrAnte mahaty atibhayaMkare
09050034c anAvRSTir anuprAptA rAjan dvAdazavArSikI
09050035a tasyAM dvAdazavArSikyAm anAvRSTyAM maharSayaH
09050035c vRttyarthaM prAdravan rAjan kSudhArtAH sarvatodizam
09050036a digbhyas tAn pradrutAn dRSTvA muniH sArasvatas tadA
09050036c gamanAya matiM cakre taM provAca sarasvatI
09050037a na gantavyam itaH putra tavAhAram ahaM sadA
09050037c dAsyAmi matsyapravarAn uSyatAm iha bhArata
09050038a ity uktas tarpayAm Asa sa pitqn devatAs tathA
09050038c AhAram akaron nityaM prANAn vedAMz ca dhArayan
09050039a atha tasyAm atItAyAm anAvRSTyAM maharSayaH
09050039c anyonyaM paripapracchuH punaH svAdhyAyakAraNAt
09050040a teSAM kSudhAparItAnAM naSTA vedA vidhAvatAm
09050040c sarveSAm eva rAjendra na kaz cit pratibhAnavAn
09050041a atha kaz cid RSis teSAM sArasvatam upeyivAn
09050041c kurvANaM saMzitAtmAnaM svAdhyAyam RSisattamam
09050042a sa gatvAcaSTa tebhyaz ca sArasvatam atiprabham
09050042c svAdhyAyam amaraprakhyaM kurvANaM vijane jane
09050043a tataH sarve samAjagmus tatra rAjan maharSayaH
09050043c sArasvataM munizreSTham idam UcuH samAgatAH
09050044a asmAn adhyApayasveti tAn uvAca tato muniH
09050044c ziSyatvam upagacchadhvaM vidhivad bho mamety uta
09050045a tato 'bravId RSigaNo bAlas tvam asi putraka
09050045c sa tAn Aha na me dharmo nazyed iti punar munIn
09050046a yo hy adharmeNa vibrUyAd gRhNIyAd vApy adharmataH
09050046c mriyatAM tAv ubhau kSipraM syAtAM vA vairiNAv ubhau
09050047a na hAyanair na palitair na vittena na bandhubhiH
09050047c RSayaz cakrire dharmaM yo 'nUcAnaH sa no mahAn
09050048a etac chrutvA vacas tasya munayas te vidhAnataH
09050048c tasmAd vedAn anuprApya punar dharmaM pracakrire
09050049a SaSTir munisahasrANi ziSyatvaM pratipedire
09050049c sArasvatasya viprarSer vedasvAdhyAyakAraNAt
09050050a muSTiM muSTiM tataH sarve darbhANAM te 'bhyupAharan
09050050c tasyAsanArthaM viprarSer bAlasyApi vaze sthitAH
09050051a tatrApi dattvA vasu rauhiNeyo; mahAbalaH kezavapUrvajo 'tha
09050051c jagAma tIrthaM muditaH krameNa; khyAtaM mahad vRddhakanyA sma yatra
09051001  janamejaya uvAca
09051001a kathaM kumArI bhagavaMs tapoyuktA hy abhUt purA
09051001c kimarthaM ca tapas tepe ko vAsyA niyamo 'bhavat
09051002a suduSkaram idaM brahmaMs tvattaH zrutam anuttamam
09051002c AkhyAhi tattvam akhilaM yathA tapasi sA sthitA
09051003  vaizaMpAyana uvAca
09051003a RSir AsIn mahAvIryaH kuNir gArgyo mahAyazAH
09051003c sa taptvA vipulaM rAjaMs tapo vai tapatAM varaH
09051003e mAnasIM sa sutAM subhrUM samutpAditavAn vibhuH
09051004a tAM ca dRSTvA bhRzaM prItaH kuNir gArgyo mahAyazAH
09051004c jagAma tridivaM rAjan saMtyajyeha kalevaram
09051005a subhrUH sA hy atha kalyANI puNDarIkanibhekSaNA
09051005c mahatA tapasogreNa kRtvAzramam aninditA
09051006a upavAsaiH pUjayantI pitqn devAMz ca sA purA
09051006c tasyAs tu tapasogreNa mahAn kAlo 'tyagAn nRpa
09051007a sA pitrA dIyamAnApi bhartre naicchad aninditA
09051007c AtmanaH sadRzaM sA tu bhartAraM nAnvapazyata
09051008a tataH sA tapasogreNa pIDayitvAtmanas tanum
09051008c pitRdevArcanaratA babhUva vijane vane
09051009a sAtmAnaM manyamAnApi kRtakRtyaM zramAnvitA
09051009c vArddhakena ca rAjendra tapasA caiva karzitA
09051010a sA nAzakad yadA gantuM padAt padam api svayam
09051010c cakAra gamane buddhiM paralokAya vai tadA
09051011a moktukAmAM tu tAM dRSTvA zarIraM nArado 'bravIt
09051011c asaMskRtAyAH kanyAyAH kuto lokAs tavAnaghe
09051012a evaM hi zrutam asmAbhir devaloke mahAvrate
09051012c tapaH paramakaM prAptaM na tu lokAs tvayA jitAH
09051013a tan nAradavacaH zrutvA sAbravId RSisaMsadi
09051013c tapaso 'rdhaM prayacchAmi pANigrAhasya sattamAH
09051014a ity ukte cAsyA jagrAha pANiM gAlavasaMbhavaH
09051014c RSiH prAk zRGgavAn nAma samayaM cedam abravIt
09051015a samayena tavAdyAhaM pANiM sprakSyAmi zobhane
09051015c yady ekarAtraM vastavyaM tvayA saha mayeti ha
09051016a tatheti sA pratizrutya tasmai pANiM dadau tadA
09051016c cakre ca pANigrahaNaM tasyodvAhaM ca gAlaviH
09051017a sA rAtrAv abhavad rAjaMs taruNI devavarNinI
09051017c divyAbharaNavastrA ca divyasraganulepanA
09051018a tAM dRSTvA gAlaviH prIto dIpayantIm ivAtmanA
09051018c uvAsa ca kSapAm ekAM prabhAte sAbravIc ca tam
09051019a yas tvayA samayo vipra kRto me tapatAM vara
09051019c tenoSitAsmi bhadraM te svasti te 'stu vrajAmy aham
09051020a sAnujJAtAbravId bhUyo yo 'smiMs tIrthe samAhitaH
09051020c vatsyate rajanIm ekAM tarpayitvA divaukasaH
09051021a catvAriMzatam aSTau ca dve cASTau samyag Acaret
09051021c yo brahmacaryaM varSANi phalaM tasya labheta saH
09051021e evam uktvA tataH sAdhvI dehaM tyaktvA divaM gatA
09051022a RSir apy abhavad dInas tasyA rUpaM vicintayan
09051022c samayena tapo 'rdhaM ca kRcchrAt pratigRhItavAn
09051023a sAdhayitvA tadAtmAnaM tasyAH sa gatim anvayAt
09051023c duHkhito bharatazreSTha tasyA rUpabalAtkRtaH
09051023e etat te vRddhakanyAyA vyAkhyAtaM caritaM mahat
09051024a tatrasthaz cApi zuzrAva hataM zalyaM halAyudhaH
09051024c tatrApi dattvA dAnAni dvijAtibhyaH paraMtapa
09051024e zuzoca zalyaM saMgrAme nihataM pANDavais tadA
09051025a samantapaJcakadvArAt tato niSkramya mAdhavaH
09051025c papraccharSigaNAn rAmaH kurukSetrasya yat phalam
09051026a te pRSTA yadusiMhena kurukSetraphalaM vibho
09051026c samAcakhyur mahAtmAnas tasmai sarvaM yathAtatham
09052001  RSaya UcuH
09052001a prajApater uttaravedir ucyate; sanAtanA rAma samantapaJcakam
09052001c samIjire yatra purA divaukaso; vareNa satreNa mahAvarapradAH
09052002a purA ca rAjarSivareNa dhImatA; bahUni varSANy amitena tejasA
09052002c prakRSTam etat kuruNA mahAtmanA; tataH kurukSetram itIha paprathe
09052003  rAma uvAca
09052003a kimarthaM kuruNA kRSTaM kSetram etan mahAtmanA
09052003c etad icchAmy ahaM zrotuM kathyamAnaM tapodhanAH
09052004  RSaya UcuH
09052004a purA kila kuruM rAma kRSantaM satatotthitam
09052004c abhyetya zakras tridivAt paryapRcchata kAraNam
09052005a kim idaM vartate rAjan prayatnena pareNa ca
09052005c rAjarSe kim abhipretaM yeneyaM kRSyate kSitiH
09052006  kurur uvAca
09052006a iha ye puruSAH kSetre mariSyanti zatakrato
09052006c te gamiSyanti sukRtA&l lokAn pApavivarjitAn
09052007a avahasya tataH zakro jagAma tridivaM prabhuH
09052007c rAjarSir apy anirviNNaH karSaty eva vasuMdharAm
09052008a AgamyAgamya caivainaM bhUyo bhUyo 'vahasya ca
09052008c zatakratur anirviNNaM pRSTvA pRSTvA jagAma ha
09052009a yadA tu tapasogreNa cakarSa vasudhAM nRpaH
09052009c tataH zakro 'bravId devAn rAjarSer yac cikIrSitam
09052010a tac chrutvA cAbruvan devAH sahasrAkSam idaM vacaH
09052010c vareNa cchandyatAM zakra rAjarSir yadi zakyate
09052011a yadi hy atra pramItA vai svargaM gacchanti mAnavAH
09052011c asmAn aniSTvA kratubhir bhAgo no na bhaviSyati
09052012a Agamya ca tataH zakras tadA rAjarSim abravIt
09052012c alaM khedena bhavataH kriyatAM vacanaM mama
09052013a mAnavA ye nirAhArA dehaM tyakSyanty atandritAH
09052013c yudhi vA nihatAH samyag api tiryaggatA nRpa
09052014a te svargabhAjo rAjendra bhavantv iti mahAmate
09052014c tathAstv iti tato rAjA kuruH zakram uvAca ha
09052015a tatas tam abhyanujJApya prahRSTenAntarAtmanA
09052015c jagAma tridivaM bhUyaH kSipraM balaniSUdanaH
09052016a evam etad yaduzreSTha kRSTaM rAjarSiNA purA
09052016c zakreNa cApy anujJAtaM puNyaM prANAn vimuJcatAm
09052017a api cAtra svayaM zakro jagau gAthAM surAdhipaH
09052017c kurukSetre nibaddhAM vai tAM zRNuSva halAyudha
09052018a pAMsavo 'pi kurukSetrAd vAyunA samudIritAH
09052018c api duSkRtakarmANaM nayanti paramAM gatim
09052019a surarSabhA brAhmaNasattamAz ca; tathA nRgAdyA naradevamukhyAH
09052019c iSTvA mahArhaiH kratubhir nRsiMha; saMnyasya dehAn sugatiM prapannAH
09052020a tarantukArantukayor yad antaraM; rAmahradAnAM ca macakrukasya
09052020c etat kurukSetrasamantapaJcakaM; prajApater uttaravedir ucyate
09052021a zivaM mahat puNyam idaM divaukasAM; susaMmataM svargaguNaiH samanvitam
09052021c ataz ca sarve 'pi vasuMdharAdhipA; hatA gamiSyanti mahAtmanAM gatim
09053001  vaizaMpAyana uvAca
09053001a kurukSetraM tato dRSTvA dattvA dAyAMz ca sAtvataH
09053001c AzramaM sumahad divyam agamaj janamejaya
09053002a madhUkAmravanopetaM plakSanyagrodhasaMkulam
09053002c ciribilvayutaM puNyaM panasArjunasaMkulam
09053003a taM dRSTvA yAdavazreSThaH pravaraM puNyalakSaNam
09053003c papraccha tAn RSIn sarvAn kasyAzramavaras tv ayam
09053004a te tu sarve mahAtmAnam UcU rAjan halAyudham
09053004c zRNu vistarato rAma yasyAyaM pUrvam AzramaH
09053005a atra viSNuH purA devas taptavAMs tapa uttamam
09053005c atrAsya vidhivad yajJAH sarve vRttAH sanAtanAH
09053006a atraiva brAhmaNI siddhA kaumArabrahmacAriNI
09053006c yogayuktA divaM yAtA tapaHsiddhA tapasvinI
09053007a babhUva zrImatI rAjaJ zANDilyasya mahAtmanaH
09053007c sutA dhRtavratA sAdhvI niyatA brahmacAriNI
09053008a sA tu prApya paraM yogaM gatA svargam anuttamam
09053008c bhuktvAzrame 'zvamedhasya phalaM phalavatAM zubhA
09053008e gatA svargaM mahAbhAgA pUjitA niyatAtmabhiH
09053009a abhigamyAzramaM puNyaM dRSTvA ca yadupuMgavaH
09053009c RSIMs tAn abhivAdyAtha pArzve himavato 'cyutaH
09053009e skandhAvArANi sarvANi nivartyAruruhe 'calam
09053010a nAtidUraM tato gatvA nagaM tAladhvajo balI
09053010c puNyaM tIrthavaraM dRSTvA vismayaM paramaM gataH
09053011a prabhavaM ca sarasvatyAH plakSaprasravaNaM balaH
09053011c saMprAptaH kArapacanaM tIrthapravaram uttamam
09053012a halAyudhas tatra cApi dattvA dAnaM mahAbalaH
09053012c AplutaH salile zIte tasmAc cApi jagAma ha
09053012e AzramaM paramaprIto mitrasya varuNasya ca
09053013a indro 'gnir aryamA caiva yatra prAk prItim Apnuvan
09053013c taM dezaM kArapacanAd yamunAyAM jagAma ha
09053014a snAtvA tatrApi dharmAtmA parAM tuSTim avApya ca
09053014c RSibhiz caiva siddhaiz ca sahito vai mahAbalaH
09053014e upaviSTaH kathAH zubhrAH zuzrAva yadupuMgavaH
09053015a tathA tu tiSThatAM teSAM nArado bhagavAn RSiH
09053015c AjagAmAtha taM dezaM yatra rAmo vyavasthitaH
09053016a jaTAmaNDalasaMvItaH svarNacIrI mahAtapAH
09053016c hemadaNDadharo rAjan kamaNDaludharas tathA
09053017a kacchapIM sukhazabdAM tAM gRhya vINAM manoramAm
09053017c nRtye gIte ca kuzalo devabrAhmaNapUjitaH
09053018a prakartA kalahAnAM ca nityaM ca kalahapriyaH
09053018c taM dezam agamad yatra zrImAn rAmo vyavasthitaH
09053019a pratyutthAya tu te sarve pUjayitvA yatavratam
09053019c devarSiM paryapRcchanta yathAvRttaM kurUn prati
09053020a tato 'syAkathayad rAjan nAradaH sarvadharmavit
09053020c sarvam eva yathAvRttam atItaM kurusaMkSayam
09053021a tato 'bravId rauhiNeyo nAradaM dInayA girA
09053021c kim avasthaM tu tat kSatraM ye ca tatrAbhavan nRpAH
09053022a zrutam etan mayA pUrvaM sarvam eva tapodhana
09053022c vistarazravaNe jAtaM kautUhalam atIva me
09053023  nArada uvAca
09053023a pUrvam eva hato bhISmo droNaH sindhupatis tathA
09053023c hato vaikartanaH karNaH putrAz cAsya mahArathAH
09053024a bhUrizravA rauhiNeya madrarAjaz ca vIryavAn
09053024c ete cAnye ca bahavas tatra tatra mahAbalAH
09053025a priyAn prANAn parityajya priyArthaM kauravasya vai
09053025c rAjAno rAjaputrAz ca samareSv anivartinaH
09053026a ahatAMs tu mahAbAho zRNu me tatra mAdhava
09053026c dhArtarASTrabale zeSAH kRpo bhojaz ca vIryavAn
09053026e azvatthAmA ca vikrAnto bhagnasainyA dizo gatAH
09053027a duryodhano hate sainye pradruteSu kRpAdiSu
09053027c hradaM dvaipAyanaM nAma viveza bhRzaduHkhitaH
09053028a zayAnaM dhArtarASTraM tu stambhite salile tadA
09053028c pANDavAH saha kRSNena vAgbhir ugrAbhir Ardayan
09053029a sa tudyamAno balavAn vAgbhI rAma samantataH
09053029c utthitaH prAg ghradAd vIraH pragRhya mahatIM gadAm
09053030a sa cApy upagato yuddhaM bhImena saha sAMpratam
09053030c bhaviSyati ca tat sadyas tayo rAma sudAruNam
09053031a yadi kautUhalaM te 'sti vraja mAdhava mA ciram
09053031c pazya yuddhaM mahAghoraM ziSyayor yadi manyase
09053032  vaizaMpAyana uvAca
09053032a nAradasya vacaH zrutvA tAn abhyarcya dvijarSabhAn
09053032c sarvAn visarjayAm Asa ye tenAbhyAgatAH saha
09053032e gamyatAM dvArakAM ceti so 'nvazAd anuyAyinaH
09053033a so 'vatIryAcalazreSThAt plakSaprasravaNAc chubhAt
09053033c tataH prItamanA rAmaH zrutvA tIrthaphalaM mahat
09053033e viprANAM saMnidhau zlokam agAyad idam acyutaH
09053034a sarasvatIvAsasamA kuto ratiH; sarasvatIvAsasamAH kuto guNAH
09053034c sarasvatIM prApya divaM gatA janAH; sadA smariSyanti nadIM sarasvatIm
09053035a sarasvatI sarvanadISu puNyA; sarasvatI lokasukhAvahA sadA
09053035c sarasvatIM prApya janAH suduSkRtAH; sadA na zocanti paratra ceha ca
09053036a tato muhur muhuH prItyA prekSamANaH sarasvatIm
09053036c hayair yuktaM rathaM zubhram AtiSThata paraMtapaH
09053037a sa zIghragAminA tena rathena yadupuMgavaH
09053037c didRkSur abhisaMprAptaH ziSyayuddham upasthitam
09054001  vaizaMpAyana uvAca
09054001a evaM tad abhavad yuddhaM tumulaM janamejaya
09054001c yatra duHkhAnvito rAjA dhRtarASTro 'bravId idam
09054002a rAmaM saMnihitaM dRSTvA gadAyuddha upasthite
09054002c mama putraH kathaM bhImaM pratyayudhyata saMjaya
09054003  saMjaya uvAca
09054003a rAmasAMnidhyam AsAdya putro duryodhanas tava
09054003c yuddhakAmo mahAbAhuH samahRSyata vIryavAn
09054004a dRSTvA lAGgalinaM rAjA pratyutthAya ca bhArata
09054004c prItyA paramayA yukto yudhiSThiram athAbravIt
09054005a samantapaJcakaM kSipram ito yAma vizAM pate
09054005c prathitottaravedI sA devaloke prajApateH
09054006a tasmin mahApuNyatame trailokyasya sanAtane
09054006c saMgrAme nidhanaM prApya dhruvaM svargo bhaviSyati
09054007a tathety uktvA mahArAja kuntIputro yudhiSThiraH
09054007c samantapaJcakaM vIraH prAyAd abhimukhaH prabhuH
09054008a tato duryodhano rAjA pragRhya mahatIM gadAm
09054008c padbhyAm amarSAd dyutimAn agacchat pANDavaiH saha
09054009a tathA yAntaM gadAhastaM varmaNA cApi daMzitam
09054009c antarikSagatA devAH sAdhu sAdhv ity apUjayan
09054009e vAtikAz ca narA ye 'tra dRSTvA te harSam AgatAH
09054010a sa pANDavaiH parivRtaH kururAjas tavAtmajaH
09054010c mattasyeva gajendrasya gatim AsthAya so 'vrajat
09054011a tataH zaGkhaninAdena bherINAM ca mahAsvanaiH
09054011c siMhanAdaiz ca zUrANAM dizaH sarvAH prapUritAH
09054012a pratIcyabhimukhaM dezaM yathoddiSTaM sutena te
09054012c gatvA ca taiH parikSiptaM samantAt sarvatodizam
09054013a dakSiNena sarasvatyAH svayanaM tIrtham uttamam
09054013c tasmin deze tv aniriNe tatra yuddham arocayan
09054014a tato bhImo mahAkoTiM gadAM gRhyAtha varmabhRt
09054014c bibhrad rUpaM mahArAja sadRzaM hi garutmataH
09054015a avabaddhazirastrANaH saMkhye kAJcanavarmabhRt
09054015c rarAja rAjan putras te kAJcanaH zailarAD iva
09054016a varmabhyAM saMvRtau vIrau bhImaduryodhanAv ubhau
09054016c saMyuge ca prakAzete saMrabdhAv iva kuJjarau
09054017a raNamaNDalamadhyasthau bhrAtarau tau nararSabhau
09054017c azobhetAM mahArAja candrasUryAv ivoditau
09054018a tAv anyonyaM nirIkSetAM kruddhAv iva mahAdvipau
09054018c dahantau locanai rAjan parasparavadhaiSiNau
09054019a saMprahRSTamanA rAjan gadAm AdAya kauravaH
09054019c sRkkiNI saMlihan rAjan krodharaktekSaNaH zvasan
09054020a tato duryodhano rAjA gadAm AdAya vIryavAn
09054020c bhImasenam abhiprekSya gajo gajam ivAhvayat
09054021a adrisAramayIM bhImas tathaivAdAya vIryavAn
09054021c AhvayAm Asa nRpatiM siMhaH siMhaM yathA vane
09054022a tAv udyatagadApANI duryodhanavRkodarau
09054022c saMyuge sma prakAzete girI sazikharAv iva
09054023a tAv ubhAv abhisaMkruddhAv ubhau bhImaparAkramau
09054023c ubhau ziSyau gadAyuddhe rauhiNeyasya dhImataH
09054024a ubhau sadRzakarmANau yamavAsavayor iva
09054024c tathA sadRzakarmANau varuNasya mahAbalau
09054025a vAsudevasya rAmasya tathA vaizravaNasya ca
09054025c sadRzau tau mahArAja madhukaiTabhayor yudhi
09054026a ubhau sadRzakarmANau raNe sundopasundayoH
09054026c tathaiva kAlasya samau mRtyoz caiva paraMtapau
09054027a anyonyam abhidhAvantau mattAv iva mahAdvipau
09054027c vAzitAsaMgame dRptau zaradIva madotkaTau
09054028a mattAv iva jigISantau mAtaGgau bharatarSabhau
09054028c ubhau krodhaviSaM dIptaM vamantAv uragAv iva
09054029a anyonyam abhisaMrabdhau prekSamANAv ariMdamau
09054029c ubhau bharatazArdUlau vikrameNa samanvitau
09054030a siMhAv iva durAdharSau gadAyuddhe paraMtapau
09054030c nakhadaMSTrAyudhau vIrau vyAghrAv iva durutsahau
09054031a prajAsaMharaNe kSubdhau samudrAv iva dustarau
09054031c lohitAGgAv iva kruddhau pratapantau mahArathau
09054032a razmimantau mahAtmAnau dIptimantau mahAbalau
09054032c dadRzAte kuruzreSThau kAlasUryAv ivoditau
09054033a vyAghrAv iva susaMrabdhau garjantAv iva toyadau
09054033c jahRSAte mahAbAhU siMhau kesariNAv iva
09054034a gajAv iva susaMrabdhau jvalitAv iva pAvakau
09054034c dadRzus tau mahAtmAnau sazRGgAv iva parvatau
09054035a roSAt prasphuramANoSThau nirIkSantau parasparam
09054035c tau sametau mahAtmAnau gadAhastau narottamau
09054036a ubhau paramasaMhRSTAv ubhau paramasaMmatau
09054036c sadazvAv iva heSantau bRMhantAv iva kuJjarau
09054037a vRSabhAv iva garjantau duryodhanavRkodarau
09054037c daityAv iva balonmattau rejatus tau narottamau
09054038a tato duryodhano rAjann idam Aha yudhiSThiram
09054038c sRJjayaiH saha tiSThantaM tapantam iva bhAskaram
09054039a idaM vyavasitaM yuddhaM mama bhImasya cobhayoH
09054039c upopaviSTAH pazyadhvaM vimardaM nRpasattamAH
09054040a tataH samupaviSTaM tat sumahad rAjamaNDalam
09054040c virAjamAnaM dadRze divIvAdityamaNDalam
09054041a teSAM madhye mahAbAhuH zrImAn kezavapUrvajaH
09054041c upaviSTo mahArAja pUjyamAnaH samantataH
09054042a zuzubhe rAjamadhyastho nIlavAsAH sitaprabhaH
09054042c nakSatrair iva saMpUrNo vRto nizi nizAkaraH
09054043a tau tathA tu mahArAja gadAhastau durAsadau
09054043c anyonyaM vAgbhir ugrAbhis takSamANau vyavasthitau
09054044a apriyANi tato 'nyonyam uktvA tau kurupuMgavau
09054044c udIkSantau sthitau vIrau vRtrazakrAv ivAhave
09055001  vaizaMpAyana uvAca
09055001a tato vAgyuddham abhavat tumulaM janamejaya
09055001c yatra duHkhAnvito rAjA dhRtarASTro 'bravId idam
09055002a dhig astu khalu mAnuSyaM yasya niSTheyam IdRzI
09055002c ekAdazacamUbhartA yatra putro mamAbhibhUH
09055003a AjJApya sarvAn nRpatIn bhuktvA cemAM vasuMdharAm
09055003c gadAm AdAya vegena padAtiH prasthito raNam
09055004a bhUtvA hi jagato nAtho hy anAtha iva me sutaH
09055004c gadAm udyamya yo yAti kim anyad bhAgadheyataH
09055005a aho duHkhaM mahat prAptaM putreNa mama saMjaya
09055005c evam uktvA sa duHkhArto virarAma janAdhipaH
09055006  saMjaya uvAca
09055006a sa meghaninado harSAd vinadann iva govRSaH
09055006c AjuhAva tataH pArthaM yuddhAya yudhi vIryavAn
09055007a bhImam AhvayamAne tu kururAje mahAtmani
09055007c prAdurAsan sughorANi rUpANi vividhAny uta
09055008a vavur vAtAH sanirghAtAH pAMsuvarSaM papAta ca
09055008c babhUvuz ca dizaH sarvAs timireNa samAvRtAH
09055009a mahAsvanAH sanirghAtAs tumulA romaharSaNAH
09055009c petus tatholkAH zatazaH sphoTayantyo nabhastalam
09055010a rAhuz cAgrasad Adityam aparvaNi vizAM pate
09055010c cakampe ca mahAkampaM pRthivI savanadrumA
09055011a rUkSAz ca vAtAH pravavur nIcaiH zarkaravarSiNaH
09055011c girINAM zikharANy eva nyapatanta mahItale
09055012a mRgA bahuvidhAkArAH saMpatanti dizo daza
09055012c dIptAH zivAz cApy anadan ghorarUpAH sudAruNAH
09055013a nirghAtAz ca mahAghorA babhUvU romaharSaNAH
09055013c dIptAyAM dizi rAjendra mRgAz cAzubhavAdinaH
09055014a udapAnagatAz cApo vyavardhanta samantataH
09055014c azarIrA mahAnAdAH zrUyante sma tadA nRpa
09055015a evamAdIni dRSTvAtha nimittAni vRkodaraH
09055015c uvAca bhrAtaraM jyeSThaM dharmarAjaM yudhiSThiram
09055016a naiSa zakto raNe jetuM mandAtmA mAM suyodhanaH
09055016c adya krodhaM vimokSyAmi nigUDhaM hRdaye ciram
09055016e suyodhane kauravendre khANDave pAvako yathA
09055017a zalyam adyoddhariSyAmi tava pANDava hRcchayam
09055017c nihatya gadayA pApam imaM kurukulAdhamam
09055018a adya kIrtimayIM mAlAM pratimokSyAmy ahaM tvayi
09055018c hatvemaM pApakarmANaM gadayA raNamUrdhani
09055019a adyAsya zatadhA dehaM bhinadmi gadayAnayA
09055019c nAyaM praveSTA nagaraM punar vAraNasAhvayam
09055020a sarpotsargasya zayane viSadAnasya bhojane
09055020c pramANakoTyAM pAtasya dAhasya jatuvezmani
09055021a sabhAyAm avahAsasya sarvasvaharaNasya ca
09055021c varSam ajJAtavAsasya vanavAsasya cAnagha
09055022a adyAntam eSAM duHkhAnAM gantA bharatasattama
09055022c ekAhnA vinihatyemaM bhaviSyAmy Atmano 'nRNaH
09055023a adyAyur dhArtarASTrasya durmater akRtAtmanaH
09055023c samAptaM bharatazreSTha mAtApitroz ca darzanam
09055024a adyAyaM kururAjasya zaMtanoH kulapAMsanaH
09055024c prANAJ zriyaM ca rAjyaM ca tyaktvA zeSyati bhUtale
09055025a rAjA ca dhRtarASTro 'dya zrutvA putraM mayA hatam
09055025c smariSyaty azubhaM karma yat tac chakunibuddhijam
09055026a ity uktvA rAjazArdUla gadAm AdAya vIryavAn
09055026c avAtiSThata yuddhAya zakro vRtram ivAhvayan
09055027a tam udyatagadaM dRSTvA kailAsam iva zRGgiNam
09055027c bhImasenaH punaH kruddho duryodhanam uvAca ha
09055028a rAjJaz ca dhRtarASTrasya tathA tvam api cAtmanaH
09055028c smara tad duSkRtaM karma yad vRttaM vAraNAvate
09055029a draupadI ca parikliSTA sabhAyAM yad rajasvalA
09055029c dyUte ca vaJcito rAjA yat tvayA saubalena ca
09055030a vane duHkhaM ca yat prAptam asmAbhis tvatkRtaM mahat
09055030c virATanagare caiva yonyantaragatair iva
09055030e tat sarvaM yAtayAmy adya diSTyA dRSTo 'si durmate
09055031a tvatkRte 'sau hataH zete zaratalpe pratApavAn
09055031c gAGgeyo rathinAM zreSTho nihato yAjJaseninA
09055032a hato droNaz ca karNaz ca tathA zalyaH pratApavAn
09055032c vairAgner AdikartA ca zakuniH saubalo hataH
09055033a prAtikAmI tathA pApo draupadyAH klezakRd dhataH
09055033c bhrAtaras te hatAH sarve zUrA vikrAntayodhinaH
09055034a ete cAnye ca bahavo nihatAs tvatkRte nRpAH
09055034c tvAm adya nihaniSyAmi gadayA nAtra saMzayaH
09055035a ity evam uccai rAjendra bhASamANaM vRkodaram
09055035c uvAca vItabhI rAjan putras te satyavikramaH
09055036a kiM katthitena bahudhA yudhyasva tvaM vRkodara
09055036c adya te 'haM vineSyAmi yuddhazraddhAM kulAdhama
09055037a naiva duryodhanaH kSudra kena cit tvadvidhena vai
09055037c zakyas trAsayituM vAcA yathAnyaH prAkRto naraH
09055038a cirakAlepsitaM diSTyA hRdayastham idaM mama
09055038c tvayA saha gadAyuddhaM tridazair upapAditam
09055039a kiM vAcA bahunoktena katthitena ca durmate
09055039c vANI saMpadyatAm eSA karmaNA mA ciraM kRthAH
09055040a tasya tad vacanaM zrutvA sarva evAbhyapUjayan
09055040c rAjAnaH somakAz caiva ye tatrAsan samAgatAH
09055041a tataH saMpUjitaH sarvaiH saMprahRSTatanUruhaH
09055041c bhUyo dhIraM manaz cakre yuddhAya kurunandanaH
09055042a taM mattam iva mAtaGgaM talatAlair narAdhipAH
09055042c bhUyaH saMharSayAM cakrur duryodhanam amarSaNam
09055043a taM mahAtmA mahAtmAnaM gadAm udyamya pANDavaH
09055043c abhidudrAva vegena dhArtarASTraM vRkodaraH
09055044a bRMhanti kuJjarAs tatra hayA heSanti cAsakRt
09055044c zastrANi cApy adIpyanta pANDavAnAM jayaiSiNAm
09056001  saMjaya uvAca
09056001a tato duryodhano dRSTvA bhImasenaM tathAgatam
09056001c pratyudyayAv adInAtmA vegena mahatA nadan
09056002a samApetatur Anadya zRGgiNau vRSabhAv iva
09056002c mahAnirghAtaghoSaz ca saMprahAras tayor abhUt
09056003a abhavac ca tayor yuddhaM tumulaM romaharSaNam
09056003c jigISator yudhAnyonyam indraprahrAdayor iva
09056004a rudhirokSitasarvAGgau gadAhastau manasvinau
09056004c dadRzAte mahAtmAnau puSpitAv iva kiMzukau
09056005a tathA tasmin mahAyuddhe vartamAne sudAruNe
09056005c khadyotasaMghair iva khaM darzanIyaM vyarocata
09056006a tathA tasmin vartamAne saMkule tumule bhRzam
09056006c ubhAv api parizrAntau yudhyamAnAv ariMdamau
09056007a tau muhUrtaM samAzvasya punar eva paraMtapau
09056007c abhyahArayatAM tatra saMpragRhya gade zubhe
09056008a tau tu dRSTvA mahAvIryau samAzvastau nararSabhau
09056008c balinau vAraNau yadvad vAzitArthe madotkaTau
09056009a apAravIryau saMprekSya pragRhItagadAv ubhau
09056009c vismayaM paramaM jagmur devagandharvadAnavAH
09056010a pragRhItagadau dRSTvA duryodhanavRkodarau
09056010c saMzayaH sarvabhUtAnAM vijaye samapadyata
09056011a samAgamya tato bhUyo bhrAtarau balinAM varau
09056011c anyonyasyAntaraprepsU pracakrAte 'ntaraM prati
09056012a yamadaNDopamAM gurvIm indrAzanim ivodyatAm
09056012c dadRzuH prekSakA rAjan raudrIM vizasanIM gadAm
09056013a Avidhyato gadAM tasya bhImasenasya saMyuge
09056013c zabdaH sutumulo ghoro muhUrtaM samapadyata
09056014a Avidhyantam abhiprekSya dhArtarASTro 'tha pANDavam
09056014c gadAm alaghuvegAM tAM vismitaH saMbabhUva ha
09056015a caraMz ca vividhAn mArgAn maNDalAni ca bhArata
09056015c azobhata tadA vIro bhUya eva vRkodaraH
09056016a tau parasparam AsAdya yat tAv anyonyarakSaNe
09056016c mArjArAv iva bhakSArthe tatakSAte muhur muhuH
09056017a acarad bhImasenas tu mArgAn bahuvidhAMs tathA
09056017c maNDalAni vicitrANi sthAnAni vividhAni ca
09056018a gomUtrikANi citrANi gatapratyAgatAni ca
09056018c parimokSaM prahArANAM varjanaM paridhAvanam
09056019a abhidravaNam AkSepam avasthAnaM savigraham
09056019c parAvartanasaMvartam avaplutam athAplutam
09056019e upanyastam apanyastaM gadAyuddhavizAradau
09056020a evaM tau vicarantau tu nyaghnatAM vai parasparam
09056020c vaJcayantau punaz caiva ceratuH kurusattamau
09056021a vikrIDantau subalinau maNDalAni praceratuH
09056021c gadAhastau tatas tau tu maNDalAvasthitau balI
09056022a dakSiNaM maNDalaM rAjan dhArtarASTro 'bhyavartata
09056022c savyaM tu maNDalaM tatra bhImaseno 'bhyavartata
09056023a tathA tu caratas tasya bhImasya raNamUrdhani
09056023c duryodhano mahArAja pArzvadeze 'bhyatADayat
09056024a Ahatas tu tadA bhImas tava putreNa bhArata
09056024c Avidhyata gadAM gurvIM prahAraM tam acintayan
09056025a indrAzanisamAM ghorAM yamadaNDam ivodyatAm
09056025c dadRzus te mahArAja bhImasenasya tAM gadAm
09056026a AvidhyantaM gadAM dRSTvA bhImasenaM tavAtmajaH
09056026c samudyamya gadAM ghorAM pratyavidhyad ariMdamaH
09056027a gadAmArutavegena tava putrasya bhArata
09056027c zabda AsIt sutumulas tejaz ca samajAyata
09056028a sa caran vividhAn mArgAn maNDalAni ca bhAgazaH
09056028c samazobhata tejasvI bhUyo bhImAt suyodhanaH
09056029a AviddhA sarvavegena bhImena mahatI gadA
09056029c sadhUmaM sArciSaM cAgniM mumocogrA mahAsvanA
09056030a AdhUtAM bhImasenena gadAM dRSTvA suyodhanaH
09056030c adrisAramayIM gurvIm Avidhyan bahv azobhata
09056031a gadAmArutavegaM hi dRSTvA tasya mahAtmanaH
09056031c bhayaM viveza pANDUn vai sarvAn eva sasomakAn
09056032a tau darzayantau samare yuddhakrIDAM samantataH
09056032c gadAbhyAM sahasAnyonyam Ajaghnatur ariMdamau
09056033a tau parasparam AsAdya daMSTrAbhyAM dviradau yathA
09056033c azobhetAM mahArAja zoNitena pariplutau
09056034a evaM tad abhavad yuddhaM ghorarUpam asaMvRtam
09056034c parivRtte 'hani krUraM vRtravAsavayor iva
09056035a dRSTvA vyavasthitaM bhImaM tava putro mahAbalaH
09056035c caraMz citratarAn mArgAn kaunteyam abhidudruve
09056036a tasya bhImo mahAvegAM jAmbUnadapariSkRtAm
09056036c abhikruddhasya kruddhas tu tADayAm Asa tAM gadAm
09056037a savisphuliGgo nirhrAdas tayos tatrAbhighAtajaH
09056037c prAdurAsIn mahArAja sRSTayor vajrayor iva
09056038a vegavatyA tayA tatra bhImasenapramuktayA
09056038c nipatantyA mahArAja pRthivI samakampata
09056039a tAM nAmRSyata kauravyo gadAM pratihatAM raNe
09056039c matto dvipa iva kruddhaH pratikuJjaradarzanAt
09056040a sa savyaM maNDalaM rAjann udbhrAmya kRtanizcayaH
09056040c Ajaghne mUrdhni kaunteyaM gadayA bhImavegayA
09056041a tayA tv abhihato bhImaH putreNa tava pANDavaH
09056041c nAkampata mahArAja tad adbhutam ivAbhavat
09056042a AzcaryaM cApi tad rAjan sarvasainyAny apUjayan
09056042c yad gadAbhihato bhImo nAkampata padAt padam
09056043a tato gurutarAM dIptAM gadAM hemapariSkRtAm
09056043c duryodhanAya vyasRjad bhImo bhImaparAkramaH
09056044a taM prahAram asaMbhrAnto lAghavena mahAbalaH
09056044c moghaM duryodhanaz cakre tatrAbhUd vismayo mahAn
09056045a sA tu moghA gadA rAjan patantI bhImacoditA
09056045c cAlayAm Asa pRthivIM mahAnirghAtanisvanA
09056046a AsthAya kauzikAn mArgAn utpatan sa punaH punaH
09056046c gadAnipAtaM prajJAya bhImasenam avaJcayat
09056047a vaJcayitvA tathA bhImaM gadayA kurusattamaH
09056047c tADayAm Asa saMkruddho vakSodeze mahAbalaH
09056048a gadayAbhihato bhImo muhyamAno mahAraNe
09056048c nAbhyamanyata kartavyaM putreNAbhyAhatas tava
09056049a tasmiMs tathA vartamAne rAjan somakapANDavAH
09056049c bhRzopahatasaMkalpA nahRSTamanaso 'bhavan
09056050a sa tu tena prahAreNa mAtaGga iva roSitaH
09056050c hastivad dhastisaMkAzam abhidudrAva te sutam
09056051a tatas tu rabhaso bhImo gadayA tanayaM tava
09056051c abhidudrAva vegena siMho vanagajaM yathA
09056052a upasRtya tu rAjAnaM gadAmokSavizAradaH
09056052c Avidhyata gadAM rAjan samuddizya sutaM tava
09056053a atADayad bhImasenaH pArzve duryodhanaM tadA
09056053c sa vihvalaH prahAreNa jAnubhyAm agaman mahIm
09056054a tasmiMs tu bharatazreSThe jAnubhyAm avanIM gate
09056054c udatiSThat tato nAdaH sRJjayAnAM jagatpate
09056055a teSAM tu ninadaM zrutvA sRJjayAnAM nararSabhaH
09056055c amarSAd bharatazreSTha putras te samakupyata
09056056a utthAya tu mahAbAhuH kruddho nAga iva zvasan
09056056c didhakSann iva netrAbhyAM bhImasenam avaikSata
09056057a tataH sa bharatazreSTho gadApANir abhidravat
09056057c pramathiSyann iva ziro bhImasenasya saMyuge
09056058a sa mahAtmA mahAtmAnaM bhImaM bhImaparAkramaH
09056058c atADayac chaGkhadeze sa cacAlAcalopamaH
09056059a sa bhUyaH zuzubhe pArthas tADito gadayA raNe
09056059c udbhinnarudhiro rAjan prabhinna iva kuJjaraH
09056060a tato gadAM vIrahaNIm ayasmayIM; pragRhya vajrAzanitulyanisvanAm
09056060c atADayac chatrum amitrakarzano; balena vikramya dhanaMjayAgrajaH
09056061a sa bhImasenAbhihatas tavAtmajaH; papAta saMkampitadehabandhanaH
09056061c supuSpito mArutavegatADito; mahAvane sAla ivAvaghUrNitaH
09056062a tataH praNedur jahRSuz ca pANDavAH; samIkSya putraM patitaM kSitau tava
09056062c tataH sutas te pratilabhya cetanAM; samutpapAta dvirado yathA hradAt
09056063a sa pArthivo nityam amarSitas tadA; mahArathaH zikSitavat paribhraman
09056063c atADayat pANDavam agrataH sthitaM; sa vihvalAGgo jagatIm upAspRzat
09056064a sa siMhanAdAn vinanAda kauravo; nipAtya bhUmau yudhi bhImam ojasA
09056064c bibheda caivAzanitulyatejasA; gadAnipAtena zarIrarakSaNam
09056065a tato 'ntarikSe ninado mahAn abhUd; divaukasAm apsarasAM ca neduSAm
09056065c papAta coccair amarapraveritaM; vicitrapuSpotkaravarSam uttamam
09056066a tataH parAn Avizad uttamaM bhayaM; samIkSya bhUmau patitaM narottamam
09056066c ahIyamAnaM ca balena kauravaM; nizamya bhedaM ca dRDhasya varmaNaH
09056067a tato muhUrtAd upalabhya cetanAM; pramRjya vaktraM rudhirArdram AtmanaH
09056067c dhRtiM samAlambya vivRttalocano; balena saMstabhya vRkodaraH sthitaH
09057001  saMjaya uvAca
09057001a samudIrNaM tato dRSTvA saMgrAmaM kurumukhyayoH
09057001c athAbravId arjunas tu vAsudevaM yazasvinam
09057002a anayor vIrayor yuddhe ko jyAyAn bhavato mataH
09057002c kasya vA ko guNo bhUyAn etad vada janArdana
09057003  vAsudeva uvAca
09057003a upadezo 'nayos tulyo bhImas tu balavattaraH
09057003c kRtayatnataras tv eSa dhArtarASTro vRkodarAt
09057004a bhImasenas tu dharmeNa yudhyamAno na jeSyati
09057004c anyAyena tu yudhyan vai hanyAd eSa suyodhanam
09057005a mAyayA nirjitA devair asurA iti naH zrutam
09057005c virocanaz ca zakreNa mAyayA nirjitaH sakhe
09057005e mAyayA cAkSipat tejo vRtrasya balasUdanaH
09057006a pratijJAtaM tu bhImena dyUtakAle dhanaMjaya
09057006c UrU bhetsyAmi te saMkhye gadayeti suyodhanam
09057007a so 'yaM pratijJAM tAM cApi pArayitvArikarzanaH
09057007c mAyAvinaM ca rAjAnaM mAyayaiva nikRntatu
09057008a yady eSa balam AsthAya nyAyena prahariSyati
09057008c viSamasthas tato rAjA bhaviSyati yudhiSThiraH
09057009a punar eva ca vakSyAmi pANDavedaM nibodha me
09057009c dharmarAjAparAdhena bhayaM naH punar Agatam
09057010a kRtvA hi sumahat karma hatvA bhISmamukhAn kurUn
09057010c jayaH prApto yazaz cAgryaM vairaM ca pratiyAtitam
09057010e tad evaM vijayaH prAptaH punaH saMzayitaH kRtaH
09057011a abuddhir eSA mahatI dharmarAjasya pANDava
09057011c yad ekavijaye yuddhaM paNitaM kRtam IdRzam
09057011e suyodhanaH kRtI vIra ekAyanagatas tathA
09057012a api cozanasA gItaH zrUyate 'yaM purAtanaH
09057012c zlokas tattvArthasahitas tan me nigadataH zRNu
09057013a punar AvartamAnAnAM bhagnAnAM jIvitaiSiNAm
09057013c bhetavyam arizeSANAm ekAyanagatA hi te
09057014a suyodhanam imaM bhagnaM hatasainyaM hradaM gatam
09057014c parAjitaM vanaprepsuM nirAzaM rAjyalambhane
09057015a ko nv eSa saMyuge prAjJaH punar dvaMdve samAhvayet
09057015c api vo nirjitaM rAjyaM na hareta suyodhanaH
09057016a yas trayodazavarSANi gadayA kRtanizramaH
09057016c caraty UrdhvaM ca tiryak ca bhImasenajighAMsayA
09057017a evaM cen na mahAbAhur anyAyena haniSyati
09057017c eSa vaH kauravo rAjA dhArtarASTro bhaviSyati
09057018a dhanaMjayas tu zrutvaitat kezavasya mahAtmanaH
09057018c prekSato bhImasenasya hastenorum atADayat
09057019a gRhya saMjJAM tato bhImo gadayA vyacarad raNe
09057019c maNDalAni vicitrANi yamakAnItarANi ca
09057020a dakSiNaM maNDalaM savyaM gomUtrakam athApi ca
09057020c vyacarat pANDavo rAjann ariM saMmohayann iva
09057021a tathaiva tava putro 'pi gadAmArgavizAradaH
09057021c vyacaral laghu citraM ca bhImasenajighAMsayA
09057022a Adhunvantau gade ghore candanAgarurUSite
09057022c vairasyAntaM parIpsantau raNe kruddhAv ivAntakau
09057023a anyonyaM tau jighAMsantau pravIrau puruSarSabhau
09057023c yuyudhAte garutmantau yathA nAgAmiSaiSiNau
09057024a maNDalAni vicitrANi carator nRpabhImayoH
09057024c gadAsaMpAtajAs tatra prajajJuH pAvakArciSaH
09057025a samaM praharatos tatra zUrayor balinor mRdhe
09057025c kSubdhayor vAyunA rAjan dvayor iva samudrayoH
09057026a tayoH praharatos tulyaM mattakuJjarayor iva
09057026c gadAnirghAtasaMhrAdaH prahArANAm ajAyata
09057027a tasmiMs tadA saMprahAre dAruNe saMkule bhRzam
09057027c ubhAv api parizrAntau yudhyamAnAv ariMdamau
09057028a tau muhUrtaM samAzvasya punar eva paraMtapau
09057028c abhyahArayatAM kruddhau pragRhya mahatI gade
09057029a tayoH samabhavad yuddhaM ghorarUpam asaMvRtam
09057029c gadAnipAtai rAjendra takSator vai parasparam
09057030a vyAyAmapradrutau tau tu vRSabhAkSau tarasvinau
09057030c anyonyaM jaghnatur vIrau paGkasthau mahiSAv iva
09057031a jarjarIkRtasarvAGgau rudhireNAbhisaMplutau
09057031c dadRzAte himavati puSpitAv iva kiMzukau
09057032a duryodhanena pArthas tu vivare saMpradarzite
09057032c ISad utsmayamAnas tu sahasA prasasAra ha
09057033a tam abhyAzagataM prAjJo raNe prekSya vRkodaraH
09057033c avAkSipad gadAM tasmai vegena mahatA balI
09057034a avakSepaM tu taM dRSTvA putras tava vizAM pate
09057034c apAsarpat tataH sthAnAt sA moghA nyapatad bhuvi
09057035a mokSayitvA prahAraM taM sutas tava sa saMbhramAt
09057035c bhImasenaM ca gadayA prAharat kurusattamaH
09057036a tasya viSyandamAnena rudhireNAmitaujasaH
09057036c prahAragurupAtAc ca mUrcheva samajAyata
09057037a duryodhanas taM ca veda pIDitaM pANDavaM raNe
09057037c dhArayAm Asa bhImo 'pi zarIram atipIDitam
09057038a amanyata sthitaM hy enaM prahariSyantam Ahave
09057038c ato na prAharat tasmai punar eva tavAtmajaH
09057039a tato muhUrtam Azvasya duryodhanam avasthitam
09057039c vegenAbhyadravad rAjan bhImasenaH pratApavAn
09057040a tam ApatantaM saMprekSya saMrabdham amitaujasam
09057040c mogham asya prahAraM taM cikIrSur bharatarSabha
09057041a avasthAne matiM kRtvA putras tava mahAmanAH
09057041c iyeSotpatituM rAjaMz chalayiSyan vRkodaram
09057042a abudhyad bhImasenas tad rAjJas tasya cikIrSitam
09057042c athAsya samabhidrutya samutkramya ca siMhavat
09057043a sRtyA vaJcayato rAjan punar evotpatiSyataH
09057043c UrubhyAM prAhiNod rAjan gadAM vegena pANDavaH
09057044a sA vajraniSpeSasamA prahitA bhImakarmaNA
09057044c UrU duryodhanasyAtha babhaJja priyadarzanau
09057045a sa papAta naravyAghro vasudhAm anunAdayan
09057045c bhagnorur bhImasenena putras tava mahIpate
09057046a vavur vAtAH sanirghAtAH pAMsuvarSaM papAta ca
09057046c cacAla pRthivI cApi savRkSakSupaparvatA
09057047a tasmin nipatite vIre patyau sarvamahIkSitAm
09057047c mahAsvanA punar dIptA sanirghAtA bhayaMkarI
09057047e papAta colkA mahatI patite pRthivIpatau
09057048a tathA zoNitavarSaM ca pAMsuvarSaM ca bhArata
09057048c vavarSa maghavAMs tatra tava putre nipAtite
09057049a yakSANAM rAkSasAnAM ca pizAcAnAM tathaiva ca
09057049c antarikSe mahAnAdaH zrUyate bharatarSabha
09057050a tena zabdena ghoreNa mRgANAm atha pakSiNAm
09057050c jajJe ghoratamaH zabdo bahUnAM sarvatodizam
09057051a ye tatra vAjinaH zeSA gajAz ca manujaiH saha
09057051c mumucus te mahAnAdaM tava putre nipAtite
09057052a bherIzaGkhamRdaGgAnAm abhavac ca svano mahAn
09057052c antarbhUmigataz caiva tava putre nipAtite
09057053a bahupAdair bahubhujaiH kabandhair ghoradarzanaiH
09057053c nRtyadbhir bhayadair vyAptA dizas tatrAbhavan nRpa
09057054a dhvajavanto 'stravantaz ca zastravantas tathaiva ca
09057054c prAkampanta tato rAjaMs tava putre nipAtite
09057055a hradAH kUpAz ca rudhiram udvemur nRpasattama
09057055c nadyaz ca sumahAvegAH pratisrotovahAbhavan
09057056a pulliGgA iva nAryas tu strIliGgAH puruSAbhavan
09057056c duryodhane tadA rAjan patite tanaye tava
09057057a dRSTvA tAn adbhutotpAtAn pAJcAlAH pANDavaiH saha
09057057c AvignamanasaH sarve babhUvur bharatarSabha
09057058a yayur devA yathAkAmaM gandharvApsarasas tathA
09057058c kathayanto 'dbhutaM yuddhaM sutayos tava bhArata
09057059a tathaiva siddhA rAjendra tathA vAtikacAraNAH
09057059c narasiMhau prazaMsantau viprajagmur yathAgatam
09058001  saMjaya uvAca
09058001a taM pAtitaM tato dRSTvA mahAzAlam ivodgatam
09058001c prahRSTamanasaH sarve babhUvus tatra pANDavAH
09058002a unmattam iva mAtaGgaM siMhena vinipAtitam
09058002c dadRzur hRSTaromANaH sarve te cApi somakAH
09058003a tato duryodhanaM hatvA bhImasenaH pratApavAn
09058003c patitaM kauravendraM tam upagamyedam abravIt
09058004a gaur gaur iti purA manda draupadIm ekavAsasam
09058004c yat sabhAyAM hasann asmAMs tadA vadasi durmate
09058004e tasyAvahAsasya phalam adya tvaM samavApnuhi
09058005a evam uktvA sa vAmena padA maulim upAspRzat
09058005c ziraz ca rAjasiMhasya pAdena samaloDayat
09058006a tathaiva krodhasaMrakto bhImaH parabalArdanaH
09058006c punar evAbravId vAkyaM yat tac chRNu narAdhipa
09058007a ye 'smAn puro 'panRtyanta punar gaur iti gaur iti
09058007c tAn vayaM pratinRtyAmaH punar gaur iti gaur iti
09058008a nAsmAkaM nikRtir vahnir nAkSadyUtaM na vaJcanA
09058008c svabAhubalam Azritya prabAdhAmo vayaM ripUn
09058009a so 'vApya vairasya parasya pAraM; vRkodaraH prAha zanaiH prahasya
09058009c yudhiSThiraM kezavasRJjayAMz ca; dhanaMjayaM mAdravatIsutau ca
09058010a rajasvalAM draupadIm Anayan ye; ye cApy akurvanta sadasy avastrAm
09058010c tAn pazyadhvaM pANDavair dhArtarASTrAn; raNe hatAMs tapasA yAjJasenyAH
09058011a ye naH purA SaNDhatilAn avocan; krUrA rAjJo dhRtarASTrasya putrAH
09058011c te no hatAH sagaNAH sAnubandhAH; kAmaM svargaM narakaM vA vrajAmaH
09058012a punaz ca rAjJaH patitasya bhUmau; sa tAM gadAM skandhagatAM nirIkSya
09058012c vAmena pAdena ziraH pramRdya; duryodhanaM naikRtikety avocat
09058013a hRSTena rAjan kurupArthivasya; kSudrAtmanA bhImasenena pAdam
09058013c dRSTvA kRtaM mUrdhani nAbhyanandan; dharmAtmAnaH somakAnAM prabarhAH
09058014a tava putraM tathA hatvA katthamAnaM vRkodaram
09058014c nRtyamAnaM ca bahuzo dharmarAjo 'bravId idam
09058015a mA ziro 'sya padA mardIr mA dharmas te 'tyagAn mahAn
09058015c rAjA jJAtir hataz cAyaM naitan nyAyyaM tavAnagha
09058016a vidhvasto 'yaM hatAmAtyo hatabhrAtA hataprajaH
09058016c utsannapiNDo bhrAtA ca naitan nyAyyaM kRtaM tvayA
09058017a dhArmiko bhImaseno 'sAv ity Ahus tvAM purA janAH
09058017c sa kasmAd bhImasena tvaM rAjAnam adhitiSThasi
09058018a dRSTvA duryodhanaM rAjA kuntIputras tathAgatam
09058018c netrAbhyAm azrupUrNAbhyAm idaM vacanam abravIt
09058019a nUnam etad balavatA dhAtrAdiSTaM mahAtmanA
09058019c yad vayaM tvAM jighAMsAmas tvaM cAsmAn kurusattama
09058020a Atmano hy aparAdhena mahad vyasanam IdRzam
09058020c prAptavAn asi yal lobhAn madAd bAlyAc ca bhArata
09058021a ghAtayitvA vayasyAMz ca bhrAtqn atha pitqMs tathA
09058021c putrAn pautrAMs tathAcAryAMs tato 'si nidhanaM gataH
09058022a tavAparAdhAd asmAbhir bhrAtaras te mahArathAH
09058022c nihatA jJAtayaz cAnye diSTaM manye duratyayam
09058023a snuSAz ca prasnuSAz caiva dhRtarASTrasya vihvalAH
09058023c garhayiSyanti no nUnaM vidhavAH zokakarzitAH
09058024a evam uktvA suduHkhArto nizazvAsa sa pArthivaH
09058024c vilalApa ciraM cApi dharmaputro yudhiSThiraH
09059001  dhRtarASTra uvAca
09059001a adharmeNa hataM dRSTvA rAjAnaM mAdhavottamaH
09059001c kim abravIt tadA sUta baladevo mahAbalaH
09059002a gadAyuddhavizeSajJo gadAyuddhavizAradaH
09059002c kRtavAn rauhiNeyo yat tan mamAcakSva saMjaya
09059003  saMjaya uvAca
09059003a zirasy abhihataM dRSTvA bhImasenena te sutam
09059003c rAmaH praharatAM zreSThaz cukrodha balavad balI
09059004a tato madhye narendrANAm UrdhvabAhur halAyudhaH
09059004c kurvann ArtasvaraM ghoraM dhig dhig bhImety uvAca ha
09059005a aho dhig yad adho nAbheH prahRtaM zuddhavikrame
09059005c naitad dRSTaM gadAyuddhe kRtavAn yad vRkodaraH
09059006a adho nAbhyA na hantavyam iti zAstrasya nizcayaH
09059006c ayaM tv azAstravin mUDhaH svacchandAt saMpravartate
09059007a tasya tat tad bruvANasya roSaH samabhavan mahAn
09059007c tato lAGgalam udyamya bhImam abhyadravad balI
09059008a tasyordhvabAhoH sadRzaM rUpam AsIn mahAtmanaH
09059008c bahudhAtuvicitrasya zvetasyeva mahAgireH
09059009a tam utpatantaM jagrAha kezavo vinayAnataH
09059009c bAhubhyAM pInavRttAbhyAM prayatnAd balavad balI
09059010a sitAsitau yaduvarau zuzubhAte 'dhikaM tataH
09059010c nabhogatau yathA rAjaMz candrasUryau dinakSaye
09059011a uvAca cainaM saMrabdhaM zamayann iva kezavaH
09059011c AtmavRddhir mitravRddhir mitramitrodayas tathA
09059011e viparItaM dviSatsv etat SaDvidhA vRddhir AtmanaH
09059012a Atmany api ca mitreSu viparItaM yadA bhavet
09059012c tadA vidyAn manojyAnim Azu zAntikaro bhavet
09059013a asmAkaM sahajaM mitraM pANDavAH zuddhapauruSAH
09059013c svakAH pitRSvasuH putrAs te parair nikRtA bhRzam
09059014a pratijJApAraNaM dharmaH kSatriyasyeti vettha ha
09059014c suyodhanasya gadayA bhaGktAsmy UrU mahAhave
09059014e iti pUrvaM pratijJAtaM bhImena hi sabhAtale
09059015a maitreyeNAbhizaptaz ca pUrvam eva maharSiNA
09059015c UrU bhetsyati te bhImo gadayeti paraMtapa
09059015e ato doSaM na pazyAmi mA krudhas tvaM pralambahan
09059016a yaunair hArdaiz ca saMbandhaiH saMbaddhAH smeha pANDavaiH
09059016c teSAM vRddhyAbhivRddhir no mA krudhaH puruSarSabha
09059017  rAma uvAca
09059017a dharmaH sucaritaH sadbhiH saha dvAbhyAM niyacchati
09059017c arthaz cAtyarthalubdhasya kAmaz cAtiprasaGginaH
09059018a dharmArthau dharmakAmau ca kAmArthau cApy apIDayan
09059018c dharmArthakAmAn yo 'bhyeti so 'tyantaM sukham aznute
09059019a tad idaM vyAkulaM sarvaM kRtaM dharmasya pIDanAt
09059019c bhImasenena govinda kAmaM tvaM tu yathAttha mAm
09059020  vAsudeva uvAca
09059020a aroSaNo hi dharmAtmA satataM dharmavatsalaH
09059020c bhavAn prakhyAyate loke tasmAt saMzAmya mA krudhaH
09059021a prAptaM kaliyugaM viddhi pratijJAM pANDavasya ca
09059021c AnRNyaM yAtu vairasya pratijJAyAz ca pANDavaH
09059022  saMjaya uvAca
09059022a dharmacchalam api zrutvA kezavAt sa vizAM pate
09059022c naiva prItamanA rAmo vacanaM prAha saMsadi
09059023a hatvAdharmeNa rAjAnaM dharmAtmAnaM suyodhanam
09059023c jihmayodhIti loke 'smin khyAtiM yAsyati pANDavaH
09059024a duryodhano 'pi dharmAtmA gatiM yAsyati zAzvatIm
09059024c RjuyodhI hato rAjA dhArtarASTro narAdhipaH
09059025a yuddhadIkSAM pravizyAjau raNayajJaM vitatya ca
09059025c hutvAtmAnam amitrAgnau prApa cAvabhRthaM yazaH
09059026a ity uktvA ratham AsthAya rauhiNeyaH pratApavAn
09059026c zvetAbhrazikharAkAraH prayayau dvArakAM prati
09059027a pAJcAlAz ca savArSNeyAH pANDavAz ca vizAM pate
09059027c rAme dvAravatIM yAte nAtipramanaso 'bhavan
09059028a tato yudhiSThiraM dInaM cintAparam adhomukham
09059028c zokopahatasaMkalpaM vAsudevo 'bravId idam
09059029a dharmarAja kimarthaM tvam adharmam anumanyase
09059029c hatabandhor yad etasya patitasya vicetasaH
09059030a duryodhanasya bhImena mRdyamAnaM ziraH padA
09059030c upaprekSasi kasmAt tvaM dharmajJaH san narAdhipa
09059031  yudhiSThira uvAca
09059031a na mamaitat priyaM kRSNa yad rAjAnaM vRkodaraH
09059031c padA mUrdhny aspRzat krodhAn na ca hRSye kulakSaye
09059032a nikRtyA nikRtA nityaM dhRtarASTrasutair vayam
09059032c bahUni paruSANy uktvA vanaM prasthApitAH sma ha
09059033a bhImasenasya tad duHkham atIva hRdi vartate
09059033c iti saMcintya vArSNeya mayaitat samupekSitam
09059034a tasmAd dhatvAkRtaprajJaM lubdhaM kAmavazAnugam
09059034c labhatAM pANDavaH kAmaM dharme 'dharme 'pi vA kRte
09059035  saMjaya uvAca
09059035a ity ukte dharmarAjena vAsudevo 'bravId idam
09059035c kAmam astv evam iti vai kRcchrAd yadukulodvahaH
09059036a ity ukto vAsudevena bhImapriyahitaiSiNA
09059036c anvamodata tat sarvaM yad bhImena kRtaM yudhi
09059037a bhImaseno 'pi hatvAjau tava putram amarSaNaH
09059037c abhivAdyAgrataH sthitvA saMprahRSTaH kRtAJjaliH
09059038a provAca sumahAtejA dharmarAjaM yudhiSThiram
09059038c harSAd utphullanayano jitakAzI vizAM pate
09059039a tavAdya pRthivI rAjan kSemA nihatakaNTakA
09059039c tAM prazAdhi mahArAja svadharmam anupAlayan
09059040a yas tu kartAsya vairasya nikRtyA nikRtipriyaH
09059040c so 'yaM vinihataH zete pRthivyAM pRthivIpate
09059041a duHzAsanaprabhRtayaH sarve te cogravAdinaH
09059041c rAdheyaH zakuniz cApi nihatAs tava zatravaH
09059042a seyaM ratnasamAkIrNA mahI savanaparvatA
09059042c upAvRttA mahArAja tvAm adya nihatadviSam
09059043  yudhiSThira uvAca
09059043a gataM vairasya nidhanaM hato rAjA suyodhanaH
09059043c kRSNasya matam AsthAya vijiteyaM vasuMdharA
09059044a diSTyA gatas tvam AnRNyaM mAtuH kopasya cobhayoH
09059044c diSTyA jayasi durdharSa diSTyA zatrur nipAtitaH
09060001  dhRtarASTra uvAca
09060001a hataM duryodhanaM dRSTvA bhImasenena saMyuge
09060001c pANDavAH sRJjayAz caiva kim akurvata saMjaya
09060002  saMjaya uvAca
09060002a hataM duryodhanaM dRSTvA bhImasenena saMyuge
09060002c siMheneva mahArAja mattaM vanagajaM vane
09060003a prahRSTamanasas tatra kRSNena saha pANDavAH
09060003c pAJcAlAH sRJjayAz caiva nihate kurunandane
09060004a Avidhyann uttarIyANi siMhanAdAMz ca nedire
09060004c naitAn harSasamAviSTAn iyaM sehe vasuMdharA
09060005a dhanUMSy anye vyAkSipanta jyAz cApy anye tathAkSipan
09060005c dadhmur anye mahAzaGkhAn anye jaghnuz ca dundubhIH
09060006a cikrIDuz ca tathaivAnye jahasuz ca tavAhitAH
09060006c abruvaMz cAsakRd vIrA bhImasenam idaM vacaH
09060007a duSkaraM bhavatA karma raNe 'dya sumahat kRtam
09060007c kauravendraM raNe hatvA gadayAtikRtazramam
09060008a indreNeva hi vRtrasya vadhaM paramasaMyuge
09060008c tvayA kRtam amanyanta zatror vadham imaM janAH
09060009a carantaM vividhAn mArgAn maNDalAni ca sarvazaH
09060009c duryodhanam imaM zUraM ko 'nyo hanyAd vRkodarAt
09060010a vairasya ca gataH pAraM tvam ihAnyaiH sudurgamam
09060010c azakyam etad anyena saMpAdayitum IdRzam
09060011a kuJjareNeva mattena vIra saMgrAmamUrdhani
09060011c duryodhanaziro diSTyA pAdena mRditaM tvayA
09060012a siMhena mahiSasyeva kRtvA saMgaram adbhutam
09060012c duHzAsanasya rudhiraM diSTyA pItaM tvayAnagha
09060013a ye viprakurvan rAjAnaM dharmAtmAnaM yudhiSThiram
09060013c mUrdhni teSAM kRtaH pAdo diSTyA te svena karmaNA
09060014a amitrANAm adhiSThAnAd vadhAd duryodhanasya ca
09060014c bhIma diSTyA pRthivyAM te prathitaM sumahad yazaH
09060015a evaM nUnaM hate vRtre zakraM nandanti bandinaH
09060015c tathA tvAM nihatAmitraM vayaM nandAma bhArata
09060016a duryodhanavadhe yAni romANi hRSitAni naH
09060016c adyApi na vihRSyanti tAni tad viddhi bhArata
09060016e ity abruvan bhImasenaM vAtikAs tatra saMgatAH
09060017a tAn hRSTAn puruSavyAghrAn pAJcAlAn pANDavaiH saha
09060017c bruvataH sadRzaM tatra provAca madhusUdanaH
09060018a na nyAyyaM nihataH zatrur bhUyo hantuM janAdhipAH
09060018c asakRd vAgbhir ugrAbhir nihato hy eSa mandadhIH
09060019a tadaivaiSa hataH pApo yadaiva nirapatrapaH
09060019c lubdhaH pApasahAyaz ca suhRdAM zAsanAtigaH
09060020a bahuzo viduradroNakRpagAGgeyasRJjayaiH
09060020c pANDubhyaH procyamAno 'pi pitryam aMzaM na dattavAn
09060021a naiSa yogyo 'dya mitraM vA zatrur vA puruSAdhamaH
09060021c kim anenAtinunnena vAgbhiH kASThasadharmaNA
09060022a ratheSv Arohata kSipraM gacchAmo vasudhAdhipAH
09060022c diSTyA hato 'yaM pApAtmA sAmAtyajJAtibAndhavaH
09060023a iti zrutvA tv adhikSepaM kRSNAd duryodhano nRpaH
09060023c amarSavazam Apanna udatiSThad vizAM pate
09060024a sphigdezenopaviSTaH sa dorbhyAM viSTabhya medinIm
09060024c dRSTiM bhrUsaMkaTAM kRtvA vAsudeve nyapAtayat
09060025a ardhonnatazarIrasya rUpam AsIn nRpasya tat
09060025c kruddhasyAzIviSasyeva cchinnapucchasya bhArata
09060026a prANAntakaraNIM ghorAM vedanAm avicintayan
09060026c duryodhano vAsudevaM vAgbhir ugrAbhir Ardayat
09060027a kaMsadAsasya dAyAda na te lajjAsty anena vai
09060027c adharmeNa gadAyuddhe yad ahaM vinipAtitaH
09060028a UrU bhindhIti bhImasya smRtiM mithyA prayacchatA
09060028c kiM na vijJAtam etan me yad arjunam avocathAH
09060029a ghAtayitvA mahIpAlAn RjuyuddhAn sahasrazaH
09060029c jihmair upAyair bahubhir na te lajjA na te ghRNA
09060030a ahany ahani zUrANAM kurvANaH kadanaM mahat
09060030c zikhaNDinaM puraskRtya ghAtitas te pitAmahaH
09060031a azvatthAmnaH sanAmAnaM hatvA nAgaM sudurmate
09060031c AcAryo nyAsitaH zastraM kiM tan na viditaM mama
09060032a sa cAnena nRzaMsena dhRSTadyumnena vIryavAn
09060032c pAtyamAnas tvayA dRSTo na cainaM tvam avArayaH
09060033a vadhArthaM pANDuputrasya yAcitAM zaktim eva ca
09060033c ghaTotkace vyaMsayathAH kas tvattaH pApakRttamaH
09060034a chinnabAhuH prAyagatas tathA bhUrizravA balI
09060034c tvayA nisRSTena hataH zaineyena durAtmanA
09060035a kurvANaz cottamaM karma karNaH pArthajigISayA
09060035c vyaMsanenAzvasenasya pannagendrasutasya vai
09060036a punaz ca patite cakre vyasanArtaH parAjitaH
09060036c pAtitaH samare karNaz cakravyagro 'graNIr nRNAm
09060037a yadi mAM cApi karNaM ca bhISmadroNau ca saMyuge
09060037c RjunA pratiyudhyethA na te syAd vijayo dhruvam
09060038a tvayA punar anAryeNa jihmamArgeNa pArthivAH
09060038c svadharmam anutiSThanto vayaM cAnye ca ghAtitAH
09060039  vAsudeva uvAca
09060039a hatas tvam asi gAndhAre sabhrAtRsutabAndhavaH
09060039c sagaNaH sasuhRc caiva pApamArgam anuSThitaH
09060040a tavaiva duSkRtair vIrau bhISmadroNau nipAtitau
09060040c karNaz ca nihataH saMkhye tava zIlAnuvartakaH
09060041a yAcyamAno mayA mUDha pitryam aMzaM na ditsasi
09060041c pANDavebhyaH svarAjyArdhaM lobhAc chakuninizcayAt
09060042a viSaM te bhImasenAya dattaM sarve ca pANDavAH
09060042c pradIpitA jatugRhe mAtrA saha sudurmate
09060043a sabhAyAM yAjJasenI ca kRSTA dyUte rajasvalA
09060043c tadaiva tAvad duSTAtman vadhyas tvaM nirapatrapaH
09060044a anakSajJaM ca dharmajJaM saubalenAkSavedinA
09060044c nikRtyA yat parAjaiSIs tasmAd asi hato raNe
09060045a jayadrathena pApena yat kRSNA klezitA vane
09060045c yAteSu mRgayAM teSu tRNabindor athAzrame
09060046a abhimanyuz ca yad bAla eko bahubhir Ahave
09060046c tvaddoSair nihataH pApa tasmAd asi hato raNe
09060047  duryodhana uvAca
09060047a adhItaM vidhivad dattaM bhUH prazAstA sasAgarA
09060047c mUrdhni sthitam amitrANAM ko nu svantataro mayA
09060048a yad iSTaM kSatrabandhUnAM svadharmam anupazyatAm
09060048c tad idaM nidhanaM prAptaM ko nu svantataro mayA
09060049a devArhA mAnuSA bhogAH prAptA asulabhA nRpaiH
09060049c aizvaryaM cottamaM prAptaM ko nu svantataro mayA
09060050a sasuhRt sAnubandhaz ca svargaM gantAham acyuta
09060050c yUyaM vihatasaMkalpAH zocanto vartayiSyatha
09060051  saMjaya uvAca
09060051a asya vAkyasya nidhane kururAjasya bhArata
09060051c apatat sumahad varSaM puSpANAM puNyagandhinAm
09060052a avAdayanta gandharvA jaguz cApsarasAM gaNAH
09060052c siddhAz ca mumucur vAcaH sAdhu sAdhv iti bhArata
09060053a vavau ca surabhir vAyuH puNyagandho mRduH sukhaH
09060053c vyarAjatAmalaM caiva nabho vaiDUryasaMnibham
09060054a atyadbhutAni te dRSTvA vAsudevapurogamAH
09060054c duryodhanasya pUjAM ca dRSTvA vrIDAm upAgaman
09060055a hatAMz cAdharmataH zrutvA zokArtAH zuzucur hi te
09060055c bhISmaM droNaM tathA karNaM bhUrizravasam eva ca
09060056a tAMs tu cintAparAn dRSTvA pANDavAn dInacetasaH
09060056c provAcedaM vacaH kRSNo meghadundubhinisvanaH
09060057a naiSa zakyo 'tizIghrAstras te ca sarve mahArathAH
09060057c Rjuyuddhena vikrAntA hantuM yuSmAbhir Ahave
09060058a upAyA vihitA hy ete mayA tasmAn narAdhipAH
09060058c anyathA pANDaveyAnAM nAbhaviSyaj jayaH kva cit
09060059a te hi sarve mahAtmAnaz catvAro 'tirathA bhuvi
09060059c na zakyA dharmato hantuM lokapAlair api svayam
09060060a tathaivAyaM gadApANir dhArtarASTro gataklamaH
09060060c na zakyo dharmato hantuM kAlenApIha daNDinA
09060061a na ca vo hRdi kartavyaM yad ayaM ghAtito nRpaH
09060061c mithyAvadhyAs tathopAyair bahavaH zatravo 'dhikAH
09060062a pUrvair anugato mArgo devair asuraghAtibhiH
09060062c sadbhiz cAnugataH panthAH sa sarvair anugamyate
09060063a kRtakRtyAH sma sAyAhne nivAsaM rocayAmahe
09060063c sAzvanAgarathAH sarve vizramAmo narAdhipAH
09060064a vAsudevavacaH zrutvA tadAnIM pANDavaiH saha
09060064c pAJcAlA bhRzasaMhRSTA vineduH siMhasaMghavat
09060065a tataH prAdhmApayaJ zaGkhAn pAJcajanyaM ca mAdhavaH
09060065c hRSTA duryodhanaM dRSTvA nihataM puruSarSabhAH
09061001  saMjaya uvAca
09061001a tatas te prayayuH sarve nivAsAya mahIkSitaH
09061001c zaGkhAn pradhmApayanto vai hRSTAH parighabAhavaH
09061002a pANDavAn gacchataz cApi zibiraM no vizAM pate
09061002c maheSvAso 'nvagAt pazcAd yuyutsuH sAtyakis tathA
09061003a dhRSTadyumnaH zikhaNDI ca draupadeyAz ca sarvazaH
09061003c sarve cAnye maheSvAsA yayuH svazibirANy uta
09061004a tatas te prAvizan pArthA hatatviTkaM hatezvaram
09061004c duryodhanasya zibiraM raGgavad visRte jane
09061005a gatotsavaM puram iva hRtanAgam iva hradam
09061005c strIvarSavarabhUyiSThaM vRddhAmAtyair adhiSThitam
09061006a tatraitAn paryupAtiSThan duryodhanapuraHsarAH
09061006c kRtAJjalipuTA rAjan kASAyamalinAmbarAH
09061007a zibiraM samanuprApya kururAjasya pANDavAH
09061007c avaterur mahArAja rathebhyo rathasattamAH
09061008a tato gANDIvadhanvAnam abhyabhASata kezavaH
09061008c sthitaH priyahite nityam atIva bharatarSabha
09061009a avaropaya gANDIvam akSayyau ca maheSudhI
09061009c athAham avarokSyAmi pazcAd bharatasattama
09061010a svayaM caivAvaroha tvam etac chreyas tavAnagha
09061010c tac cAkarot tathA vIraH pANDuputro dhanaMjayaH
09061011a atha pazcAt tataH kRSNo razmIn utsRjya vAjinAm
09061011c avArohata medhAvI rathAd gANDIvadhanvanaH
09061012a athAvatIrNe bhUtAnAm Izvare sumahAtmani
09061012c kapir antardadhe divyo dhvajo gANDIvadhanvanaH
09061013a sa dagdho droNakarNAbhyAM divyair astrair mahArathaH
09061013c atha dIpto 'gninA hy Azu prajajvAla mahIpate
09061014a sopAsaGgaH sarazmiz ca sAzvaH sayugabandhuraH
09061014c bhasmIbhUto 'patad bhUmau ratho gANDIvadhanvanaH
09061015a taM tathA bhasmabhUtaM tu dRSTvA pANDusutAH prabho
09061015c abhavan vismitA rAjann arjunaz cedam abravIt
09061016a kRtAJjaliH sapraNayaM praNipatyAbhivAdya ca
09061016c govinda kasmAd bhagavan ratho dagdho 'yam agninA
09061017a kim etan mahad Azcaryam abhavad yadunandana
09061017c tan me brUhi mahAbAho zrotavyaM yadi manyase
09061018  vAsudeva uvAca
09061018a astrair bahuvidhair dagdhaH pUrvam evAyam arjuna
09061018c madadhiSThitatvAt samare na vizIrNaH paraMtapa
09061019a idAnIM tu vizIrNo 'yaM dagdho brahmAstratejasA
09061019c mayA vimuktaH kaunteya tvayy adya kRtakarmaNi
09061020  saMjaya uvAca
09061020a ISad utsmayamAnaz ca bhagavAn kezavo 'rihA
09061020c pariSvajya ca rAjAnaM yudhiSThiram abhASata
09061021a diSTyA jayasi kaunteya diSTyA te zatravo jitAH
09061021c diSTyA gANDIvadhanvA ca bhImasenaz ca pANDavaH
09061022a tvaM cApi kuzalI rAjan mAdrIputrau ca pANDavau
09061022c muktA vIrakSayAd asmAt saMgrAmAn nihatadviSaH
09061022e kSipram uttarakAlAni kuru kAryANi bhArata
09061023a upayAtam upaplavyaM saha gANDIvadhanvanA
09061023c AnIya madhuparkaM mAM yat purA tvam avocathAH
09061024a eSa bhrAtA sakhA caiva tava kRSNa dhanaMjayaH
09061024c rakSitavyo mahAbAho sarvAsv Apatsv iti prabho
09061024e tava caivaM bruvANasya tathety evAham abruvam
09061025a sa savyasAcI guptas te vijayI ca narezvara
09061025c bhrAtRbhiH saha rAjendra zUraH satyaparAkramaH
09061025e mukto vIrakSayAd asmAt saMgrAmAd romaharSaNAt
09061026a evam uktas tu kRSNena dharmarAjo yudhiSThiraH
09061026c hRSTaromA mahArAja pratyuvAca janArdanam
09061027a pramuktaM droNakarNAbhyAM brahmAstram arimardana
09061027c kas tvad anyaH sahet sAkSAd api vajrI puraMdaraH
09061028a bhavatas tu prasAdena saMgrAme bahavo jitAH
09061028c mahAraNagataH pArtho yac ca nAsIt parAGmukhaH
09061029a tathaiva ca mahAbAho paryAyair bahubhir mayA
09061029c karmaNAm anusaMtAnaM tejasaz ca gatiH zubhA
09061030a upaplavye maharSir me kRSNadvaipAyano 'bravIt
09061030c yato dharmas tataH kRSNo yataH kRSNas tato jayaH
09061031a ity evam ukte te vIrAH zibiraM tava bhArata
09061031c pravizya pratyapadyanta kozaratnarddhisaMcayAn
09061032a rajataM jAtarUpaM ca maNIn atha ca mauktikAn
09061032c bhUSaNAny atha mukhyAni kambalAny ajinAni ca
09061032e dAsIdAsam asaMkhyeyaM rAjyopakaraNAni ca
09061033a te prApya dhanam akSayyaM tvadIyaM bharatarSabha
09061033c udakrozan maheSvAsA narendra vijitArayaH
09061034a te tu vIrAH samAzvasya vAhanAny avamucya ca
09061034c atiSThanta muhuH sarve pANDavAH sAtyakis tathA
09061035a athAbravIn mahArAja vAsudevo mahAyazAH
09061035c asmAbhir maGgalArthAya vastavyaM zibirAd bahiH
09061036a tathety uktvA ca te sarve pANDavAH sAtyakis tathA
09061036c vAsudevena sahitA maGgalArthaM yayur bahiH
09061037a te samAsAdya saritaM puNyAmoghavatIM nRpa
09061037c nyavasann atha tAM rAtriM pANDavA hatazatravaH
09061038a tataH saMpreSayAm Asur yAdavaM nAgasAhvayam
09061038c sa ca prAyAj javenAzu vAsudevaH pratApavAn
09061038e dArukaM ratham Aropya yena rAjAmbikAsutaH
09061039a tam UcuH saMprayAsyantaM sainyasugrIvavAhanam
09061039c pratyAzvAsaya gAndhArIM hataputrAM yazasvinIm
09061040a sa prAyAt pANDavair uktas tat puraM sAtvatAM varaH
09061040c AsasAdayiSuH kSipraM gAndhArIM nihatAtmajAm
09062001  janamejaya uvAca
09062001a kimarthaM rAjazArdUlo dharmarAjo yudhiSThiraH
09062001c gAndhAryAH preSayAm Asa vAsudevaM paraMtapam
09062002a yadA pUrvaM gataH kRSNaH zamArthaM kauravAn prati
09062002c na ca taM labdhavAn kAmaM tato yuddham abhUd idam
09062003a nihateSu tu yodheSu hate duryodhane tathA
09062003c pRthivyAM pANDaveyasya niHsapatne kRte yudhi
09062004a vidrute zibire zUnye prApte yazasi cottame
09062004c kiM nu tat kAraNaM brahman yena kRSNo gataH punaH
09062005a na caitat kAraNaM brahmann alpaM vai pratibhAti me
09062005c yatrAgamad ameyAtmA svayam eva janArdanaH
09062006a tattvato vai samAcakSva sarvam adhvaryusattama
09062006c yac cAtra kAraNaM brahman kAryasyAsya vinizcaye
09062007  vaizaMpAyana uvAca
09062007a tvadyukto 'yam anuprazno yan mAM pRcchasi pArthiva
09062007c tat te 'haM saMpravakSyAmi yathAvad bharatarSabha
09062008a hataM duryodhanaM dRSTvA bhImasenena saMyuge
09062008c vyutkramya samayaM rAjan dhArtarASTraM mahAbalam
09062009a anyAyena hataM dRSTvA gadAyuddhena bhArata
09062009c yudhiSThiraM mahArAja mahad bhayam athAvizat
09062010a cintayAno mahAbhAgAM gAndhArIM tapasAnvitAm
09062010c ghoreNa tapasA yuktAM trailokyam api sA dahet
09062011a tasya cintayamAnasya buddhiH samabhavat tadA
09062011c gAndhAryAH krodhadIptAyAH pUrvaM prazamanaM bhavet
09062012a sA hi putravadhaM zrutvA kRtam asmAbhir IdRzam
09062012c mAnasenAgninA kruddhA bhasmasAn naH kariSyati
09062013a kathaM duHkham idaM tIvraM gAndhArI prasahiSyati
09062013c zrutvA vinihataM putraM chalenAjihmayodhinam
09062014a evaM vicintya bahudhA bhayazokasamanvitaH
09062014c vAsudevam idaM vAkyaM dharmarAjo 'bhyabhASata
09062015a tava prasAdAd govinda rAjyaM nihatakaNTakam
09062015c aprApyaM manasApIha prAptam asmAbhir acyuta
09062016a pratyakSaM me mahAbAho saMgrAme romaharSaNe
09062016c vimardaH sumahAn prAptas tvayA yAdavanandana
09062017a tvayA devAsure yuddhe vadhArtham amaradviSAm
09062017c yathA sAhyaM purA dattaM hatAz ca vibudhadviSaH
09062018a sAhyaM tathA mahAbAho dattam asmAkam acyuta
09062018c sArathyena ca vArSNeya bhavatA yad dhRtA vayam
09062019a yadi na tvaM bhaven nAthaH phalgunasya mahAraNe
09062019c kathaM zakyo raNe jetuM bhaved eSa balArNavaH
09062020a gadAprahArA vipulAH parighaiz cApi tADanam
09062020c zaktibhir bhiNDipAlaiz ca tomaraiH saparazvadhaiH
09062021a vAcaz ca paruSAH prAptAs tvayA hy asmaddhitaiSiNA
09062021c tAz ca te saphalAH sarvA hate duryodhane 'cyuta
09062022a gAndhAryA hi mahAbAho krodhaM budhyasva mAdhava
09062022c sA hi nityaM mahAbhAgA tapasogreNa karzitA
09062023a putrapautravadhaM zrutvA dhruvaM naH saMpradhakSyati
09062023c tasyAH prasAdanaM vIra prAptakAlaM mataM mama
09062024a kaz ca tAM krodhadIptAkSIM putravyasanakarzitAm
09062024c vIkSituM puruSaH zaktas tvAm Rte puruSottama
09062025a tatra me gamanaM prAptaM rocate tava mAdhava
09062025c gAndhAryAH krodhadIptAyAH prazamArtham ariMdama
09062026a tvaM hi kartA vikartA ca lokAnAM prabhavApyayaH
09062026c hetukAraNasaMyuktair vAkyaiH kAlasamIritaiH
09062027a kSipram eva mahAprAjJa gAndhArIM zamayiSyasi
09062027c pitAmahaz ca bhagavAn kRSNas tatra bhaviSyati
09062028a sarvathA te mahAbAho gAndhAryAH krodhanAzanam
09062028c kartavyaM sAtvatazreSTha pANDavAnAM hitaiSiNA
09062029a dharmarAjasya vacanaM zrutvA yadukulodvahaH
09062029c Amantrya dArukaM prAha rathaH sajjo vidhIyatAm
09062030a kezavasya vacaH zrutvA tvaramANo 'tha dArukaH
09062030c nyavedayad rathaM sajjaM kezavAya mahAtmane
09062031a taM rathaM yAdavazreSThaH samAruhya paraMtapaH
09062031c jagAma hAstinapuraM tvaritaH kezavo vibhuH
09062032a tataH prAyAn mahArAja mAdhavo bhagavAn rathI
09062032c nAgasAhvayam AsAdya praviveza ca vIryavAn
09062033a pravizya nagaraM vIro rathaghoSeNa nAdayan
09062033c vidito dhRtarASTrasya so 'vatIrya rathottamAt
09062034a abhyagacchad adInAtmA dhRtarASTranivezanam
09062034c pUrvaM cAbhigataM tatra so 'pazyad RSisattamam
09062035a pAdau prapIDya kRSNasya rAjJaz cApi janArdanaH
09062035c abhyavAdayad avyagro gAndhArIM cApi kezavaH
09062036a tatas tu yAdavazreSTho dhRtarASTram adhokSajaH
09062036c pANim Alambya rAjJaH sa sasvaraM praruroda ha
09062037a sa muhUrtam ivotsRjya bASpaM zokasamudbhavam
09062037c prakSAlya vAriNA netre Acamya ca yathAvidhi
09062037e uvAca prazritaM vAkyaM dhRtarASTram ariMdamaH
09062038a na te 'sty aviditaM kiM cid bhUtabhavyasya bhArata
09062038c kAlasya ca yathA vRttaM tat te suviditaM prabho
09062039a yad idaM pANDavaiH sarvais tava cittAnurodhibhiH
09062039c kathaM kulakSayo na syAt tathA kSatrasya bhArata
09062040a bhrAtRbhiH samayaM kRtvA kSAntavAn dharmavatsalaH
09062040c dyUtacchalajitaiH zaktair vanavAso 'bhyupAgataH
09062041a ajJAtavAsacaryA ca nAnAvezasamAvRtaiH
09062041c anye ca bahavaH klezAs tv azaktair iva nityadA
09062042a mayA ca svayam Agamya yuddhakAla upasthite
09062042c sarvalokasya sAMnidhye grAmAMs tvaM paJca yAcitaH
09062043a tvayA kAlopasRSTena lobhato nApavarjitAH
09062043c tavAparAdhAn nRpate sarvaM kSatraM kSayaM gatam
09062044a bhISmeNa somadattena bAhlikena kRpeNa ca
09062044c droNena ca saputreNa vidureNa ca dhImatA
09062044e yAcitas tvaM zamaM nityaM na ca tat kRtavAn asi
09062045a kAlopahatacitto hi sarvo muhyati bhArata
09062045c yathA mUDho bhavAn pUrvam asminn arthe samudyate
09062046a kim anyat kAlayogAd dhi diSTam eva parAyaNam
09062046c mA ca doSaM mahArAja pANDaveSu nivezaya
09062047a alpo 'py atikramo nAsti pANDavAnAM mahAtmanAm
09062047c dharmato nyAyataz caiva snehataz ca paraMtapa
09062048a etat sarvaM tu vijJAya AtmadoSakRtaM phalam
09062048c asUyAM pANDuputreSu na bhavAn kartum arhati
09062049a kulaM vaMzaz ca piNDaz ca yac ca putrakRtaM phalam
09062049c gAndhAryAs tava caivAdya pANDaveSu pratiSThitam
09062050a etat sarvam anudhyAtvA Atmanaz ca vyatikramam
09062050c zivena pANDavAn dhyAhi namas te bharatarSabha
09062051a jAnAsi ca mahAbAho dharmarAjasya yA tvayi
09062051c bhaktir bharatazArdUla snehaz cApi svabhAvataH
09062052a etac ca kadanaM kRtvA zatrUNAm apakAriNAm
09062052c dahyate sma divArAtraM na ca zarmAdhigacchati
09062053a tvAM caiva narazArdUla gAndhArIM ca yazasvinIm
09062053c sa zocan bharatazreSTha na zAntim adhigacchati
09062054a hriyA ca parayAviSTo bhavantaM nAdhigacchati
09062054c putrazokAbhisaMtaptaM buddhivyAkulitendriyam
09062055a evam uktvA mahArAja dhRtarASTraM yadUttamaH
09062055c uvAca paramaM vAkyaM gAndhArIM zokakarzitAm
09062056a saubaleyi nibodha tvaM yat tvAM vakSyAmi suvrate
09062056c tvatsamA nAsti loke 'sminn adya sImantinI zubhe
09062057a jAnAmi ca yathA rAjJi sabhAyAM mama saMnidhau
09062057c dharmArthasahitaM vAkyam ubhayoH pakSayor hitam
09062057e uktavaty asi kalyANi na ca te tanayaiH zrutam
09062058a duryodhanas tvayA cokto jayArthI paruSaM vacaH
09062058c zRNu mUDha vaco mahyaM yato dharmas tato jayaH
09062059a tad idaM samanuprAptaM tava vAkyaM nRpAtmaje
09062059c evaM viditvA kalyANi mA sma zoke manaH kRthAH
09062059e pANDavAnAM vinAzAya mA te buddhiH kadA cana
09062060a zaktA cAsi mahAbhAge pRthivIM sacarAcarAm
09062060c cakSuSA krodhadIptena nirdagdhuM tapaso balAt
09062061a vAsudevavacaH zrutvA gAndhArI vAkyam abravIt
09062061c evam etan mahAbAho yathA vadasi kezava
09062062a Adhibhir dahyamAnAyA matiH saMcalitA mama
09062062c sA me vyavasthitA zrutvA tava vAkyaM janArdana
09062063a rAjJas tv andhasya vRddhasya hataputrasya kezava
09062063c tvaM gatiH saha tair vIraiH pANDavair dvipadAM vara
09062064a etAvad uktvA vacanaM mukhaM pracchAdya vAsasA
09062064c putrazokAbhisaMtaptA gAndhArI praruroda ha
09062065a tata enAM mahAbAhuH kezavaH zokakarzitAm
09062065c hetukAraNasaMyuktair vAkyair AzvAsayat prabhuH
09062066a samAzvAsya ca gAndhArIM dhRtarASTraM ca mAdhavaH
09062066c drauNeH saMkalpitaM bhAvam anvabudhyata kezavaH
09062067a tatas tvarita utthAya pAdau mUrdhnA praNamya ca
09062067c dvaipAyanasya rAjendra tataH kauravam abravIt
09062068a ApRcche tvAM kuruzreSTha mA ca zoke manaH kRthAH
09062068c drauNeH pApo 'sty abhiprAyas tenAsmi sahasotthitaH
09062068e pANDavAnAM vadhe rAtrau buddhis tena pradarzitA
09062069a etac chrutvA tu vacanaM gAndhAryA sahito 'bravIt
09062069c dhRtarASTro mahAbAhuH kezavaM kezisUdanam
09062070a zIghraM gaccha mahAbAho pANDavAn paripAlaya
09062070c bhUyas tvayA sameSyAmi kSipram eva janArdana
09062070e prAyAt tatas tu tvarito dArukeNa sahAcyutaH
09062071a vAsudeve gate rAjan dhRtarASTraM janezvaram
09062071c AzvAsayad ameyAtmA vyAso lokanamaskRtaH
09062072a vAsudevo 'pi dharmAtmA kRtakRtyo jagAma ha
09062072c zibiraM hAstinapurAd didRkSuH pANDavAn nRpa
09062073a Agamya zibiraM rAtrau so 'bhyagacchata pANDavAn
09062073c tac ca tebhyaH samAkhyAya sahitas taiH samAvizat
09063001  dhRtarASTra uvAca
09063001a adhiSThitaH padA mUrdhni bhagnasaktho mahIM gataH
09063001c zauTIramAnI putro me kAny abhASata saMjaya
09063002a atyarthaM kopano rAjA jAtavairaz ca pANDuSu
09063002c vyasanaM paramaM prAptaH kim Aha paramAhave
09063003  saMjaya uvAca
09063003a zRNu rAjan pravakSyAmi yathAvRttaM narAdhipa
09063003c rAjJA yad uktaM bhagnena tasmin vyasana Agate
09063004a bhagnasaktho nRpo rAjan pAMsunA so 'vaguNThitaH
09063004c yamayan mUrdhajAMs tatra vIkSya caiva dizo daza
09063005a kezAn niyamya yatnena niHzvasann urago yathA
09063005c saMrambhAzruparItAbhyAM netrAbhyAm abhivIkSya mAm
09063006a bAhU dharaNyAM niSpiSya muhur matta iva dvipaH
09063006c prakIrNAn mUrdhajAn dhunvan dantair dantAn upaspRzan
09063006e garhayan pANDavaM jyeSThaM niHzvasyedam athAbravIt
09063007a bhISme zAMtanave nAthe karNe cAstrabhRtAM vare
09063007c gautame zakunau cApi droNe cAstrabhRtAM vare
09063008a azvatthAmni tathA zalye zUre ca kRtavarmaNi
09063008c imAm avasthAM prApto 'smi kAlo hi duratikramaH
09063009a ekAdazacamUbhartA so 'ham etAM dazAM gataH
09063009c kAlaM prApya mahAbAho na kaz cid ativartate
09063010a AkhyAtavyaM madIyAnAM ye 'smiJ jIvanti saMgare
09063010c yathAhaM bhImasenena vyutkramya samayaM hataH
09063011a bahUni sunRzaMsAni kRtAni khalu pANDavaiH
09063011c bhUrizravasi karNe ca bhISme droNe ca zrImati
09063012a idaM cAkIrtijaM karma nRzaMsaiH pANDavaiH kRtam
09063012c yena te satsu nirvedaM gamiSyantIti me matiH
09063013a kA prItiH sattvayuktasya kRtvopadhikRtaM jayam
09063013c ko vA samayabhettAraM budhaH saMmantum arhati
09063014a adharmeNa jayaM labdhvA ko nu hRSyeta paNDitaH
09063014c yathA saMhRSyate pApaH pANDuputro vRkodaraH
09063015a kiM nu citram atas tv adya bhagnasakthasya yan mama
09063015c kruddhena bhImasenena pAdena mRditaM ziraH
09063016a pratapantaM zriyA juSTaM vartamAnaM ca bandhuSu
09063016c evaM kuryAn naro yo hi sa vai saMjaya pUjitaH
09063017a abhijJau kSatradharmasya mama mAtA pitA ca me
09063017c tau hi saMjaya duHkhArtau vijJApyau vacanAn mama
09063018a iSTaM bhRtyA bhRtAH samyag bhUH prazAstA sasAgarA
09063018c mUrdhni sthitam amitrANAM jIvatAm eva saMjaya
09063019a dattA dAyA yathAzakti mitrANAM ca priyaM kRtam
09063019c amitrA bAdhitAH sarve ko nu svantataro mayA
09063020a yAtAni pararASTrANi nRpA bhuktAz ca dAsavat
09063020c priyebhyaH prakRtaM sAdhu ko nu svantataro mayA
09063021a mAnitA bAndhavAH sarve mAnyaH saMpUjito janaH
09063021c tritayaM sevitaM sarvaM ko nu svantataro mayA
09063022a AjJaptaM nRpamukhyeSu mAnaH prAptaH sudurlabhaH
09063022c AjAneyais tathA yAtaM ko nu svantataro mayA
09063023a adhItaM vidhivad dattaM prAptam Ayur nirAmayam
09063023c svadharmeNa jitA lokAH ko nu svantataro mayA
09063024a diSTyA nAhaM jitaH saMkhye parAn preSyavad AzritaH
09063024c diSTyA me vipulA lakSmIr mRte tv anyaM gatA vibho
09063025a yad iSTaM kSatrabandhUnAM svadharmam anutiSThatAm
09063025c nidhanaM tan mayA prAptaM ko nu svantataro mayA
09063026a diSTyA nAhaM parAvRtto vairAt prAkRtavaj jitaH
09063026c diSTyA na vimatiM kAM cid bhajitvA tu parAjitaH
09063027a suptaM vAtha pramattaM vA yathA hanyAd viSeNa vA
09063027c evaM vyutkrAntadharmeNa vyutkramya samayaM hataH
09063028a azvatthAmA mahAbhAgaH kRtavarmA ca sAtvataH
09063028c kRpaH zAradvataz caiva vaktavyA vacanAn mama
09063029a adharmeNa pravRttAnAM pANDavAnAm anekazaH
09063029c vizvAsaM samayaghnAnAM na yUyaM gantum arhatha
09063030a vAtikAMz cAbravId rAjA putras te satyavikramaH
09063030c adharmAd bhImasenena nihato 'haM yathA raNe
09063031a so 'haM droNaM svargagataM zalyakarNAv ubhau tathA
09063031c vRSasenaM mahAvIryaM zakuniM cApi saubalam
09063032a jalasaMdhaM mahAvIryaM bhagadattaM ca pArthivam
09063032c saumadattiM maheSvAsaM saindhavaM ca jayadratham
09063033a duHzAsanapurogAMz ca bhrAtqn AtmasamAMs tathA
09063033c dauHzAsaniM ca vikrAntaM lakSmaNaM cAtmajAv ubhau
09063034a etAMz cAnyAMz ca subahUn madIyAMz ca sahasrazaH
09063034c pRSThato 'nugamiSyAmi sArthahIna ivAdhvagaH
09063035a kathaM bhrAtqn hatAJ zrutvA bhartAraM ca svasA mama
09063035c rorUyamANA duHkhArtA duHzalA sA bhaviSyati
09063036a snuSAbhiH prasnuSAbhiz ca vRddho rAjA pitA mama
09063036c gAndhArIsahitaH krozan kAM gatiM pratipatsyate
09063037a nUnaM lakSmaNamAtApi hataputrA hatezvarA
09063037c vinAzaM yAsyati kSipraM kalyANI pRthulocanA
09063038a yadi jAnAti cArvAkaH parivrAD vAgvizAradaH
09063038c kariSyati mahAbhAgo dhruvaM so 'pacitiM mama
09063039a samantapaJcake puNye triSu lokeSu vizrute
09063039c ahaM nidhanam AsAdya lokAn prApsyAmi zAzvatAn
09063040a tato janasahasrANi bASpapUrNAni mAriSa
09063040c pralApaM nRpateH zrutvA vidravanti dizo daza
09063041a sasAgaravanA ghorA pRthivI sacarAcarA
09063041c cacAlAtha sanirhrAdA dizaz caivAvilAbhavan
09063042a te droNaputram AsAdya yathAvRttaM nyavedayan
09063042c vyavahAraM gadAyuddhe pArthivasya ca ghAtanam
09063043a tad AkhyAya tataH sarve droNaputrasya bhArata
09063043c dhyAtvA ca suciraM kAlaM jagmur ArtA yathAgatam
09064001  saMjaya uvAca
09064001a vAtikAnAM sakAzAt tu zrutvA duryodhanaM hatam
09064001c hataziSTAs tato rAjan kauravANAM mahArathAH
09064002a vinirbhinnAH zitair bANair gadAtomarazaktibhiH
09064002c azvatthAmA kRpaz caiva kRtavarmA ca sAtvataH
09064002e tvaritA javanair azvair Ayodhanam upAgaman
09064003a tatrApazyan mahAtmAnaM dhArtarASTraM nipAtitam
09064003c prabhagnaM vAyuvegena mahAzAlaM yathA vane
09064004a bhUmau viveSTamAnaM taM rudhireNa samukSitam
09064004c mahAgajam ivAraNye vyAdhena vinipAtitam
09064005a vivartamAnaM bahuzo rudhiraughapariplutam
09064005c yadRcchayA nipatitaM cakram Adityagocaram
09064006a mahAvAtasamutthena saMzuSkam iva sAgaram
09064006c pUrNacandram iva vyomni tuSArAvRtamaNDalam
09064007a reNudhvastaM dIrghabhujaM mAtaGgasamavikramam
09064007c vRtaM bhUtagaNair ghoraiH kravyAdaiz ca samantataH
09064007e yathA dhanaM lipsamAnair bhRtyair nRpatisattamam
09064008a bhrukuTIkRtavaktrAntaM krodhAd udvRttacakSuSam
09064008c sAmarSaM taM naravyAghraM vyAghraM nipatitaM yathA
09064009a te tu dRSTvA maheSvAsA bhUtale patitaM nRpam
09064009c moham abhyAgaman sarve kRpaprabhRtayo rathAH
09064010a avatIrya rathebhyas tu prAdravan rAjasaMnidhau
09064010c duryodhanaM ca saMprekSya sarve bhUmAv upAvizan
09064011a tato drauNir mahArAja bASpapUrNekSaNaH zvasan
09064011c uvAca bharatazreSThaM sarvalokezvarezvaram
09064012a na nUnaM vidyate 'sahyaM mAnuSye kiM cid eva hi
09064012c yatra tvaM puruSavyAghra zeSe pAMsuSu rUSitaH
09064013a bhUtvA hi nRpatiH pUrvaM samAjJApya ca medinIm
09064013c katham eko 'dya rAjendra tiSThase nirjane vane
09064014a duHzAsanaM na pazyAmi nApi karNaM mahAratham
09064014c nApi tAn suhRdaH sarvAn kim idaM bharatarSabha
09064015a duHkhaM nUnaM kRtAntasya gatiM jJAtuM kathaM cana
09064015c lokAnAM ca bhavAn yatra zete pAMsuSu rUSitaH
09064016a eSa mUrdhAvasiktAnAm agre gatvA paraMtapaH
09064016c satRNaM grasate pAMsuM pazya kAlasya paryayam
09064017a kva te tad amalaM chatraM vyajanaM kva ca pArthiva
09064017c sA ca te mahatI senA kva gatA pArthivottama
09064018a durvijJeyA gatir nUnaM kAryANAM kAraNAntare
09064018c yad vai lokagurur bhUtvA bhavAn etAM dazAM gataH
09064019a adhruvA sarvamartyeSu dhruvaM zrIr upalakSyate
09064019c bhavato vyasanaM dRSTvA zakravispardhino bhRzam
09064020a tasya tad vacanaM zrutvA duHkhitasya vizeSataH
09064020c uvAca rAjan putras te prAptakAlam idaM vacaH
09064021a vimRjya netre pANibhyAM zokajaM bASpam utsRjan
09064021c kRpAdIn sa tadA vIrAn sarvAn eva narAdhipaH
09064022a IdRzo martyadharmo 'yaM dhAtrA nirdiSTa ucyate
09064022c vinAzaH sarvabhUtAnAM kAlaparyAyakAritaH
09064023a so 'yaM mAM samanuprAptaH pratyakSaM bhavatAM hi yaH
09064023c pRthivIM pAlayitvAham etAM niSThAm upAgataH
09064024a diSTyA nAhaM parAvRtto yuddhe kasyAM cid Apadi
09064024c diSTyAhaM nihataH pApaiz chalenaiva vizeSataH
09064025a utsAhaz ca kRto nityaM mayA diSTyA yuyutsatA
09064025c diSTyA cAsmi hato yuddhe nihatajJAtibAndhavaH
09064026a diSTyA ca vo 'haM pazyAmi muktAn asmAj janakSayAt
09064026c svastiyuktAMz ca kalyAMz ca tan me priyam anuttamam
09064027a mA bhavanto 'nutapyantAM sauhRdAn nidhanena me
09064027c yadi vedAH pramANaM vo jitA lokA mayAkSayAH
09064028a manyamAnaH prabhAvaM ca kRSNasyAmitatejasaH
09064028c tena na cyAvitaz cAhaM kSatradharmAt svanuSThitAt
09064029a sa mayA samanuprApto nAsmi zocyaH kathaM cana
09064029c kRtaM bhavadbhiH sadRzam anurUpam ivAtmanaH
09064029e yatitaM vijaye nityaM daivaM tu duratikramam
09064030a etAvad uktvA vacanaM bASpavyAkulalocanaH
09064030c tUSNIM babhUva rAjendra rujAsau vihvalo bhRzam
09064031a tathA tu dRSTvA rAjAnaM bASpazokasamanvitam
09064031c drauNiH krodhena jajvAla yathA vahnir jagatkSaye
09064032a sa tu krodhasamAviSTaH pANau pANiM nipIDya ca
09064032c bASpavihvalayA vAcA rAjAnam idam abravIt
09064033a pitA me nihataH kSudraiH sunRzaMsena karmaNA
09064033c na tathA tena tapyAmi yathA rAjaMs tvayAdya vai
09064034a zRNu cedaM vaco mahyaM satyena vadataH prabho
09064034c iSTApUrtena dAnena dharmeNa sukRtena ca
09064035a adyAhaM sarvapAJcAlAn vAsudevasya pazyataH
09064035c sarvopAyair hi neSyAmi pretarAjanivezanam
09064035e anujJAM tu mahArAja bhavAn me dAtum arhati
09064036a iti zrutvA tu vacanaM droNaputrasya kauravaH
09064036c manasaH prItijananaM kRpaM vacanam abravIt
09064036e AcArya zIghraM kalazaM jalapUrNaM samAnaya
09064037a sa tad vacanam AjJAya rAjJo brAhmaNasattamaH
09064037c kalazaM pUrNam AdAya rAjJo 'ntikam upAgamat
09064038a tam abravIn mahArAja putras tava vizAM pate
09064038c mamAjJayA dvijazreSTha droNaputro 'bhiSicyatAm
09064038e senApatyena bhadraM te mama ced icchasi priyam
09064039a rAjJo niyogAd yoddhavyaM brAhmaNena vizeSataH
09064039c vartatA kSatradharmeNa hy evaM dharmavido viduH
09064040a rAjJas tu vacanaM zrutvA kRpaH zAradvatas tataH
09064040c drauNiM rAjJo niyogena senApatye 'bhyaSecayat
09064041a so 'bhiSikto mahArAja pariSvajya nRpottamam
09064041c prayayau siMhanAdena dizaH sarvA vinAdayan
09064042a duryodhano 'pi rAjendra zoNitaughapariplutaH
09064042c tAM nizAM pratipede 'tha sarvabhUtabhayAvahAm
09064043a apakramya tu te tUrNaM tasmAd AyodhanAn nRpa
09064043c zokasaMvignamanasaz cintAdhyAnaparAbhavan